A tel lovin 20

A TEL LOVIN… (chapter- 20)

Ziaktu: Toni Râlte

"Khawiah nge i thuhruk? Sawi vat rawh" rei tak a room-a a tawm hnuah a pa hmaah tiang thu hi a sawi leh ta si a! A nu leh pa te chuan mak an ti ngang mai. 

"Nangma thuhruk zawk a ni lawm ni? Keiin engmah tih ka nei lo" Pu Thanga chuan a lo ti hlar a. 

"Phuba ka la dawn tih i hriatsa avangin i hum leh pek tawh a nih hi" Arini chuan a lo ti halh. A rilru a buai hmel angreng viau bawk. 

"Engmah inhnamhnawihna ka nei lo, tun boruakah hi chuan. Hum duh pawh ni ila, a awmna chin ka hre bik lo" Beidawn hmel zetin a pa chuan a ti a. Arini pawh chuan a pa chuan dawt a sawiin a ring bik lo nge, a nawr chiam lem lo. A saseh tur mi dangin an lo ru bo daih chu a tan a manganthlak duh ngawt ang. A detective rawih lai Valtea takngial pawn chhui zui ngaihna vâng a ti kher mai. Mahse, theihtawp erawh a chhuah ve reng tho. 

"Ka nu, Ka pa chu a cancer a nih chu! " Ruatfela aw zawi leh hniam raihah chuan lungngaihna thuk tak a tel tih a hriat. Duh lova kalsan tawhtu mah nise; a pa a ni tlat! Thi mai thei dinhmuna a han din takah phei chuan pi Zuali tak pawn awmngaihna a hre mang lo a ni. Mampuii lah a ţap faih faih reng bawk si. 

"Mama, i ngaihdan chu a ni kher lo maithei a. Mahse, i pa duhdan a nih phawt chuan he lama enkawl ka pawiti hran lo a nia. A hun hnuhnung chu kan bulah hmang se pawi ka ti lo" A fapa mitmei veng ru tak siin hmangaihnaa khat Pi Zuali chuan a ti a. Ruatfela ngaihdan chiah a ni. 

"Amah hi biak kan tum leh ang a, chuta min chhan dan azir chuan ni rawh se aw" a ti a. Ani pawh an in tharah rei pawh lovin Tanhril lamah a liam thla leh tawh a. A pa chanchin a ngaihven ve reng vangin a cancer thu chu a hre lo thei lo a ni. A pa erawh a reh hmak thung. Engvang teh lèk nge mawni dawn ni.. Ruatfela nun hi a chingchivet a, a buai tulh tulh mai. Hmangaihna kawngah a tluang lo va, a chhungkua nise a enkawl zo lo lam chu a ni. A farnu ngei pawh a venghim thei si lo. Chuvang chuan keimah hian ka tha mai, mi dang ka tina lo ber tiin mi dang lakah a inthiarfihlim a. Sandra pawh biak tumna leh a chanchin hriat chakna a nei tawh lo. Ani pawh a ngawih theih chuan engah nge ka theih loh bik ang ti ve tlat nun kha a tawng chho ve mek a ni. Arini erawh a lakah bat neiin a la inhria a. A farnu vangin ngaihdam a la dil ngei ang, a lo ngaidam thei ta lo anih leh a chantawkah a lawm mai ang chu.. Tunah chuan a chhungte aia ngaihtuah thil dang neih a duh tawh lo. 

Police lam te pawn Rinawma bo chungchang chu an chhui ve reng a, a nupui sawi danin inthlan boruak leh a sarhu lai a ni bawk a, inah a awm tam lem lo. Khami zan pawh khan a chhuak a, khawvar hnu lamah te a lo haw fo vangin ngaihthat lohna a nei lem lo niawm tak a ni. Mahse, a tuk nileng pawn a chanchin hriat tur a awm loh bakah a rawn lang reng reng si lo va, a ngaih a tha ta lo a ni. A phone lah a switchoff tlat bawk si! Police te tan pawh a luhaithlak viau ang. Mahse, theihtawp zawng an chhuah ve ngei ang le.. 

Rinawma bo atanga ni 4naah mipa pakhat hi Police Station-ah a rawn lang hlawl a! Rinawma chungchangah hriat a neih thu a rawn sawi ta a. Khami zan a bo zan khan an inzui chhuak a, zing dar 1 bawr velah call a dawng a, "Mi tu emaw hmuh tur ka nei" tiin a kal hrang ta a. Khami lo call tu ngei khan Rinawma hi a ru bo emaw a that emaw a nih ka ring.. " tiin. 

"Mahse, engvangin nge a thah ang? " tia an han zawh chuan a tim deuh dui a. Mahse, an zawh sek avang chuan, "A hmaa ruang in chhar khawchhak lam mi kha Rinawma thahah an ngai a, phuba an rawn la a ni maithei" a ti ta mai a. Kha ruang pawh kha a thattu an la hriat chhuah theih loh kha a ni. 

Chu pa Station-a lo kal chu Lala a inti mai a. Khawchhak lam mi tho niin Rinawma te nen hian hman atang tawha inhria leh sumdawng ho an ni tawh a ni. Police te chuan Lala zawk chu rinhlelhna an nei ta tlat a! Thil a sawi tha duh si lo leh a thianpa thattu niawma a rin te pawh tu te nge tih a sawi thei chuang bawk si lo lai tak chu an rinhlelhna a ni. A tawp a tawpah Lala chuan tihian a ti ta a, "Kei pawh hi thah tumin min veh reng tawh ang, ka thla a muang thei ngang lo va, ka rawn intlulut tawp zawk a ni. Ka thianpa chungah hian engmah tih ka nei lo. Mahse, heng mi te hian kan lakah duh chu an nei a ni" tiin. 

"A bul atangin sawi la, kan venghim thei che alawm. A chin chhuakin sawi vek rawh" an ti a. 

Lala chuan a sawi ta a. 

"Ruihhlo hmanga sumdawng thin kan ni a. Rinawma hi kan khaipa leh he lam mite pawn an biak rawn ber a ni. Thla hmasa khan kan damdawi thenkhat chu keimahni ang tho va sumdawng ve ten an lo ru chhuak nual a. Nuai 300 man dawn a ni. Mizoramah an rawn luhpui tih kan hriat avangin keini pawh a rang thei ang berin kan rawn chhuk thla a. Kha pa, hmannia a ruang in chhar kha Suaka a ni a. Suaka kha an kentir tih te kan hre ta zel a. Tichuan, kan chhui ve zel a. Suaka kalna te kan hre zel a, mahse, a thil ruk a dahna ber chu kan hre thei tlat lo. Police rawih chi a ni bawk si lo va. Tichuan, amah Suaka kha kan man ta tawp a! Rinawma inah kan hruai nghe nghe. Nasa takin kan dâwp a, a sawi duh si lo. A tawpah Rinawma chuan a nupui fanaute thahsakah a vau ta a, a ngaingam ta ngang lo aniang. Resort pakhata hmun pakhatah a thuhruk thu a sawi ta a. A la lak chhuah loh thu a sawi bawk. Chumi thu kan hriat takah chuan Suaka chu kan kaltir ve mai. Mahse, rang taka chet a ngai tih kan hre tho va. Resort-ah chuan a hmun thlithlai pahin kan zu thleng ve a. Suaka kha kan that miah lo, ama mi leh sa ten an dah tha zawk a nih ka ring. An ni lam pawh an rawn chet thuai a rinawm vangin Rinawma nen chuan chet kan la ta vat a. Mahse, a sawina hmun kan han dap chiam pawn damdawi reng reng kan hmu ta lo a ni. Suaka mi leh sa te bawkin min lak khalh a nih hmel.. 

Mahse, Rinawma a bo leh ta zel hian ngaihtuahna dang min neihtir, kha ruihhlo kha tu emaw ten an lo la zawk ang a, kan lak emaw tiin Rinawma hi an dil let leh zawk em mawni te ka ti.. Ka hre thiam chiah lo. Mhase, ka dinhmun hi a derthawng ve tho mai" tiin. 

Police te chuan an sumdawnnah mizorama inhnamhnawih ho an zawt a, "Ka hre ve lo. Amah Rinawma'n a hria. Kei chu a kengtu chauh. A petu ber leh pawisa dawngtu ber chu Rinawma" a ti ta tlat a. Dawp ngial mah se; dawt a sawi lo aniang, a ţang rei thei em mai. 

Tichuan, Police te chuan a hmunhma thlithlai turin Resort chu an pan ta a. Mikhual an neih loh lai tak a ni lehnghal a. A zia phian. Ruatfela erawh Nancy te nen meeting an neih vangin a lo awm lo. Damdawi laihna hnuhma chu a pawr fap a, tu emaw chuan a hausakpui tawh maithei a ni. Police te chuan hnathawkho te chu thu zawtfiahin an pindante an han endik a, search warrant erawh an la ve leh te te a ni. ; Ruatfela room pawh an endik ve a. An ringhlel hran lo naa eng emaw palh te a awm thei tiin, An beisei loh deuhin Almira chhungah a kawr thleh chunga duhdah deuh taka saranga lo intuamin an hmu ta a! An ngaihtuahna a kal thui ngei mai. Ruatfela chu be nghalin a rang thei ang bera station-a kal turin an ti ta a. 

Tu kâ atanga chhuak nge hriat va ni suh. Social mediaah, "Ruatfela, Resort-a thawk mek chuan number -4 tam tham tak a lo kawl reng a, cheng nuai 300 man bawr vel niin a la tiral lo niawm tak a ni" tiin an lo post leh hman tawh! Inkhapsen ni tawh hek lo le. Hmana a thubuai fel ta, Judy case-a tang khan an chhui chho leh a, comment lamah zeldin angreng deuhin amah demna thu hmuh tur a tam hle. Rinawma nen inzawmna an nei tih erawh an hre bik lo nge sawi a awm lem lo. 

Ruatfela chu a hamhaih viau mai a, Police hmuh fo hi nuam a ti lo. Eng chungchang nge an hrilh mai bawk si lo. 

Station a va thlen chuan indawpna pindanah an nawrlut nghal ngawt a! Ruihhlo vanga a fate pahnih lai chân tawh phei chuan hlap inpeihsa atin a lo thlir reng mai. Damdawi chungchang chu an han sawi ta a. Ruatfela chuan awlsam fe hian, "Kha kha maw.. Aw kan lai chhuak alawm. Hman ngaihna ka hre si lo va, ka dah reng ringawt a. In kuta lo dah daih tawh tur a nia. Ka lo theihnghilh ve tawh a niang, ka buai ve thei si a" a ti ta êt a. Police lam an hawihai.. 

"Tu nge i thurualpui? Eng chen nge he sumdawnna hi i kalpui tawh" tih zawhna te chuan a nuih an tiza lek lek. A inhnamhnawih lohzia hria se aw.. 

"Kan mikhual pakhat thusawi ka hre ru a, a dik em tih hre turin ka va hai ve ta mai a ni. A lo awm ta chiah bawk sia, ka thalaipui te hrai nana hman ai chuan tiin ka la ta mai a ni. Damdawi hmangin sumdawng ni ila, mi in luahin rethei bakberhin kan awm lo vang ka pu" a han tih dap dapah chuan Police te chuan an ring titih mai. Pawisawi hmel a pu bawk si lo. 

Mahse, Lala ka atangin engkim an hre tawh a, Rinawma tel ve theihna thil a nih vangin uluk takin an chhui a, Zan khat chu Lockup-ah a riak ve ta nghe nghe. Nancy te pawn an hre ta vat a, Police bulah kalin Ruatfela dikzia leh chutiang mi a nih lohzia a va sawi a. Mahse, a pa sumdawnna hre rutu ve tho a ni miau a! A pa a kankai erawh a hlau ru ve tho mai. 

Arini chuan a sam chu sang takah ţawnin, tshirt dum loose hek hawk chu a ha a, jean kekawr mar pang mai ha lehin a hmai chu eng eng emaw a hnawih ve thuak thuak a. A kalna tur sawi miah lovin a chhuak ta vang vang mai. Khawi hmun dang a pan lo, Police Station-kawtah a ding chat a, hnehsawh zeta a bike hung thain Thana-ah chuan a lut ta a. 

"In mi man Ruatfela khan thiam lohna a nei lo tih sawi tura rawn kal ka ni" a ti chang fal a. 

"Tu nge i nih? " an lo ti vat. 

"Rinsangi, Ex MLA Pu Thangliana fanu ka ni e. Ani sawn dik lohna a nei lo. Engkim kha keima tih vek a ni" a ti ta a. 

An han kawm chian chuan Zorina nen mikhual pakhat thusawi an hriat ruk atanga Ruatfela nen an va laih chhuah dan thlengin a sawi ta vek a. 

"Amah hum i duh vang hrim hrim a ni lo maw? " an tih chuan, "Hum ka duh vang lam ai mahin, Dawt vanga tu emaw a nat ai chuan thudik ka rawn sawi mai a ni" a ti a. 

Damdawi a la tiral lo bawk a, Ruatfela leh Arini thusawi te chu pawmsakin, mahse, koh theih renga awm tura inchahin an chhuahtir ta a. Arini pawh an kaltir ve ta mai. 

"Sawi tel loh hram che ka tum laiin ti nge i rawn sawi vek? " Ruatfela chuan a ti a. 

"Rinawma chungchang an sawi em? " a lo ti daih! 

"Sawi a, mahse, tu ten nge ru bo emaw that emaw an hre thei rih lo" a lo ti ve mai a. Tun hi hun remchang tak nia a hriat vangin, Arini lam chu a hawi a.. 

"Arin" a ti zawi sup a. A rawn melh let ve kuau.. 

"Engkimah ngaihdam dil che ka duh a ni. Ka nau chunga i chetdanah hriat sual ka lo nei a, Lucy thiltih vek kha a lo ni si a, k nau pawn hrehawm a ti lutuk asin. Ngaihdam min lo dilsak rawh a tia. Chuan, keima tan pawh ka dil nghal e" a ti ta a. Ral hla tak lam a lo thlir daib a, a rilruah eng nge awm ang tih a hriat theih loh.. 

"I ngaihdam dilna chu ka pawm e. Mahse, nangmah ngeiin i sawi tawh angin hmelhriat loh ang khan awm zel ang " a lo ti ta sap a. Ruatfela thinlung chu a na zawk mai, mahse, tisualtu zawk a ni a, a nawrin a thlem tur a ni lo. 

"A hmaa thian tha ang khan a theih tawh loh tihna em ni? " kha chu a ti ta hram a. 

"Theih tawh loh. Keima lamah ka nunah tumah seng luh ka duh tawh lo. I la hrethiam mai ang" a lo tihsan a. A kal sawn nghal. Hrilhhai takin a en liam ta ringawt mai. Ni e, heng hi chu a phutawk alawm. Arini kha ti khawp khan a tina a, chumi hnu lawkah a nau vangin hliam a siamsak leh a. Arini te ang hmeichhe induhtawk leh nasa ve tak tan chuan paidam a harsa tawh viau ngei ang.. Chuvang chuan Ruatfela chuan Arini a tihnat zel loh nan a sawi tawh ang khan hmelhriat loh anga awm kha a tha zawkin a hre ta zawk a. A tithei em ang chu maw.. 

Pu Lawma pawh a cancer tih a han hriat takah meuh chuan a lo ngai holam mai mai thei ta bik lo va. A tla nghal dâwk thei nia! Cancer hi chuan mihring nunna a va suat hnem tawh tak em.. Chutia a natna hriat chhuah a han nih takah chuan Rinpuii ze dik tak a lang ta chiah reng a. A pasal laka lungawi lo sa a ni bawk a, thi mai tur a pasal chu insengsoa enkawl a zuam ta hauh lo mai. 

"I duh leh i nupui fanaute i pan thei ang. I duhsak ber zel bawk a, chuvang chuan inngaihtuahtir ve tawh mai rawh" a ti ta hmiah mai. Pu Lawma rin ruk sa a ni a, mak a tih hmel vak loh. Mahse, a rin aia hmaa a zia a rawn lantir chuan a tina ve deuh. A fate leh Pi zuali ngenna vangin Rinpuii tan chanvo a la siamsak ve zawk a. Laklet leh daih a chak kher mai. Mahse, Rinpuii chu inchhir tir ve hrim hrim a tum ran a. Ruatfela'n a rawn be tawh a, an hnena awma inenkawl turin, A dik a dik chuan Aizawlah chhung khat hnaivai tak a nei bik lo va, chemo khai leh eng ilo te tih reng a la ngai dawn si a. Mahni in ang chiaha a ngaih theih in chu a mamawh chiang alawm. Mahse, a inthlahrung ru em em si.. Natna a neih hnu chauha inhmu chhuak angah a inchan a, a zakin a natna pawh Pathian thungrulhna ni ngeiin a ring. Hotel chu tihral mai tur em ni ang tih te chu Ruatfela pawh a rawn ve a. Ani Ruatfela lahin Aizawl atang daihin a enkawl hleithei dawn si lo. Chuvang chuan a ngam huai ber hnena tihral mai a rilruk ta a. A ram neitu Pu Siamliana te chuan lei an duh ta hlauh a, an ram a ni bawk a, a hrana hotel sak that a ngai dawn lo bawk a, an tan chuan a tha viau tak ang. Tichuan, an indawr fel thei ta mai a. Rinpuii pawh a rawn lawr rang leh ngei mai. 

"I nupui ka nih angin chan chu ka nei ve tur a ni dawn lawm ni? " tiin Pu Lawma a kar a. Sum mena meng a ni bawk a, zah a hre vak lo. Thenzawl kha mipuiin a pasal cancer a enkawl peih loh thu an hre deuh vek tawh si a, pawisak te chu han neih ve awm tak hi a nia le.. A ngaihna a awm lo a ni e. 

Rilru fim takin Pu Lawma pawh a inngaihtuah a. Rinpuii a neih chhan te kha a tirah chuan amah Rinpuii taksa a vang te, a zu vangte a ni pakhat a. Ruatfelan a rawn koha a haw loh chhan pawh an laklawh zo tawh si a, chhungkaw pangngai tak an din leh theih a rin loh vang a ni pakhat… A in a han tiral ta a, Rinpuii duhthusam a thleng dik ta kha a ni a. Mahse, Pu Lawma harh chhuak ve lehin pa takin ama duhdan ngatin thil a kalpui zui ve ta zat a, Rinpuii chuan engmah tihtheih a nei lem lo. Tunah natna a tuar a, a thi mai dawn. A nupui fanaute tak tak zawk chu a ngaihtuah zawk leh a duhsak zawk an ni nachungin, Rinpuii khan rei tak chhung kha a thlawnin a lo chawmin a lo tinuamsa ve tho va, mualpho huamin a zui ve tho kha a nia. Tuna chan chhe lutuk leh engmah pe lo tawpa kaltir mai chu a thih hnu thlarau tan pawh a la nuam lo thei ang tih ringin Rinpuii chu sum tlem a zawng a sih chhuahsak ve ta a ni. Ruatfela te remtihna thlapin

.. Rinpuii chu a lungawi mai lo, a ang leh bian bian a, mahse, "Min dawmhlumtu ten ka ro chu an chang ang. Nang chuan ka cancer tih i hriat rualin min enkawl peih loh thu i sawi nghal a, i chantawkah hian lawm tum rawh. Ka pe phal che hi lawm hle zawk rawh" a ti ta hmiah a. 

"Min enkawl duh tak si loah chuan ka fate hnenah 'min enkawl ru' tiin ka ngen a. Hotel pawh i hminga ka dah sa kha a nia, ka thaichhe leh ta mai anih kha" Pu Lawma chuan dawt var a sawi ta zauh a. Chawplehchilhin Rinpuii chu a inchhir nghal. 

"Engmah i sawi lo anih kha. Hotel vel pawh i fapa tan i dah emaw ka tih vang a nia. Ka tihpalh.. Lungngai suh. Kan inenkawl char char dawn nia" a la ti ngam! 

Pu Lawma erawh a ngawi hmuk tawh si. Hotel a hralh atanga ni 2-naah Aizawl panin a thawmhnaw te nen Thenzawl chu a chhuahsan ta rup mai. Rinpuii tan chuan inchhir a sawt ta lo. Mi nu a luahlan a hnu hmanah a sum zawng zawng chansak la tumtu chu hmeichhe tha tak a ni lo tih a lang reng mai. Zoram khawvelah hetiang hmeichhia hi an mikhual tawh hauh lo lehnghal. Mipain zir bik suh.. Mi nu leh mi fate hi tu emaw vangin an ţap fo reng a ni. 

"Eng nge i en a? " Ruatfela aw chu a zawi viau naa, a lo phu zuk mai. 

"Mikhual thlen dan ka en lawk" a ti pangngai a. Ruatfela chuan mak a ti deuh, a rawn kal tih pawh a hre lo. Tunah Reception counterah thuin Register a lo bih ngawng ngawng si a. 

"Eng atan? " a ti ve leh kher a. 

"Ka tan" a lo ti hmuk. Biak zui ngaihna a vang ta hle. 

"Aw le, i en zawhah khawngaihin pindan kawngka kha i kalh dawn nia" a ti a. A pindan lam panin a kal zui nghal. 

Arini chuan hming inziak tlar thla dul chu a kawk thla zar zar a, Lala leh Rinawma rawn riah zan atanga zan 3-naah chiah a mi duh niawm tak chu a hmu ta a. Chu pa ngei chuan damdawi kha rawn ngaihvenin a hmu ta lo va, Rinawma chungah a che ta a ni maithei. A hming chu computer-ah chhu lutin, a thlalak a rawn lang nghal a. He pa hi hmuh tawhna nei thanin a inhre tlat! Khawiah emaw chuan a hmu tawh chiang a ni. A ngaihtuah thei mai lo. A biak theihna number chu a phone-ah a chhu lut a, a call ta nghal. 

"Hello" mipa aw thum lam hian a rawn ti a. 

"E.. Englo a nia, hetah Tanhril Resort atangin ania. In thianpa thil thuhruk haichhuah nia sawi kha dawt vek a nia, nangmahni koh chhuah nana an duh vang a ni. A tak tak zawk chu ka kawl mek a, mahse, phut ka nei" a ti ta zung zung a. 

A reh hlek hnuah, aw pangngai tak hian, "Tu nge i nih ringawt a? " a rawn ti a. Hei hi chu an tawng dan tue pawh a ni ve reng alawm. 

"Keimah a ni tawp. Ka hming sawi kher a tulna a awm lo. Ka be sual che a ni maithei. A nih chuan ka thil kawl hi ka tihral vat a ngai dawn nih chu" a ti leh ta a. 

Aw thian kharh ri a hriat hnuah, "Tu nge i biak duh? " a rawn ti leh cheu! A fimkhur ve hle mai maw.. 

"Nangmah kha Lalthangpuia ngei kha mawle.. Tahan atanga rawn kal vang vang kha.. A chiang tawk em? " inringtawk zetin a lo ti ta kalh a. 

"Thil te chu police kutah a awm tawh kha" Mipa chuan a rawn ti hnuhnawh a. 

"A lem siam a harsa hleinem. Nang pawn a lem leh a tak chu i thliar thei ang chu tiraw.. " tiel lek lek hian Arini chuan a ti ve leh a. 

"Aw le, a tha alawm. Khaw nge kan inhmuh ang? " a rawn ti ta a. Arini chuan thawk a la vang vang a, "Kan inhmuh hmain ka thil phut hi a hlawhtlin ka duh. Rinawma kha i kutah a awm tih ka hria, min pe let rawh" a ti ta a. 

"Ani hian tangkaina a nei tawh si lo va, tihhlum ka lo tum mek asin. Thil dang duh te i nei em? Tin, police tirh i ni lo tih engtin nge ka hriat theih ang? " a rawn ti a. 

"Police te ngei ka be tawh alawm.. Kha damdawi lem kha ka lak chhuah a ni tiin. Nang aiin min hriat chhuah ka hlau zawk. Hei hi hre dun ang, nang leh kei hian police kan ngaina lo ve ve, police tel lovin engkim kan ti ang. A tha em? " A mitmeng ling hlar chung chuan a ti ta fak fak a. A inngaihtuah buai viauin a rinawm. Mahse, damdawi kha an tan a pawimawh lutuk tlat! Harsa taka an ruk chhuah, cheng man tam man a ni a. An hmu let thei anih chuan hausaknain a hmuak dawn. Hun dang reng rengah khatiang anga man tam kha Mizoramah lak luh a ni ngai lo. Chuvang chuan an hloh thiang lo a ni tawp. 

Inhmuhna hmun tur sawiin an inbiakna an titawp ta a. A rin aia a awlsam avang chuan a khi sak. Tunah chuan a mumang leh suangtuahna te an hlawhtling dawn ta e. A pindan panin zangkhai takin a kal a. Ruatfela room kawtah a ding chat.. 

"Thih hnu piah lam ram hi a awm tak tak anih ngai chuan, chumi hmunah chuan ka ta i nih theih nan ka lo nghak reng ang che" tiin a phun sep a. Inhumruh chungin a pindan lam a pan leh ta. 

"He nau hi a.. Class kal reng reng a tum bawk si lo. Engtia awm nge maw a tum le.. Em em lutuk a" Pu Thanga chuan a ti tun tun a. Inthlanah a tling ta bawk si lo, chutah Rinawma bo bawk, an sumdawnna man chhuaha a awm hlau bawk si, a nun chu ippik tak a ni. A thinchhe hlur ringawt. 

"Ka hrethiam tawh lo. Ina a lo haw lahin biak hman lohin a inkalh khum nghal a. Eng emaw tak hi chu a thleng a ni" an nu pawh chuan a lo ti ve a. 

"Ngawi tak rawh se, hetia a mualpho zawnga mi siam zel dawn chuan home-ah ka nawr lut khawp ang. Hetiang fanu lak tlak loh lutuk ka lo nei hi chu a pawi a ni" Pu Thanga chuan a ti vawng vawng a. 

Pi Mali chuan ngawi rengin an pa chu a thlir tawp! A fanu vanga a rilru hahna leh buaina te hi a kiang thei ngai dawn lo a nih hi. Chhungkaw pangngai tak nih ve te hi a va chak thin em.. A theih ngang si loh. 

Pu Lawma pawh Pi Zuali te inah chuan a innghat ta rup a. Cancer Hospital, Zemabawkah an va inhem thin dawn a ni. Mampuii class kal a ngai si a, Ruatfela lah a hman si lo. Pi Zuali bak hruai tu tur a nei ta lo va, a inthlahrung ta hle. Mahse, Pi Zuali chuan zo takin, "Fate pa i ni a, ka tih ve tur pawh ania lawm.. Dam vat tum la a ni mai" a lo ti mai a. A dam chhuah rinawm lo mah se; chutia pa uapna ang deuh an han ni leh ringawt pawh chu hlu tak a ni. Nupa ang chuan an khawsa chuang lo va. Bank-ah kalin a hotel hralhna bakah a ac-a pawisa la awm te chu Ruatfela ac-ah a thun ta vek a. 

"Inenkawlna senso a san deuh dawn chuan min enkawl buai suh u aw.. Ka kal dawn tho va, hautak deuha thih ka duh lo" a ti lawk diam tawh a. Mhase, amah hmangaihtu te tan chuan a harsa khawp ang. Mampuii pawh class a kal chho leh tan a. Lucy a hmu ngai miah lo. A bang ta pawh a ni maithei. Thian thar fel tak Zaui a chhar thar a, amah ang bawka Thingtlang atanga rawn zir ve a ni bawk a. An inzui nasa ta hle. Tin, ngaizawngtu a nei ta bawk. Mahse, ngaihzawng nei tura a insuangtuah hian a zak tlat! A thuruk kha an hriat chhuah mai te a hlau bawk. Lucy khan a lo khawih chingpen nasa hman si a, a hymen thlengin a lo khawih chhe hman tawh a, chuvang chuan bawlhhlawh angin a inhre tlat tawh. Tin, mak deuh bawk chu hetia Zaui nen inclose taka an inkawma an inkuah te hian feelings a nei tlat zel! Hmeichhe lakah chiah feelings a nei dawn tihna nge engmah a hrethiam tawh lo. Engtikah emaw a ruk deuha a u chu sawipui a la rilruk nghe nghe. Zoram khawvelah hian mahni anpui kawpa lang thei rama pawisawi si lo hi kan kuh ţûn si a, Mampuii anga sal beh, vau beh tawk pawh hi an awm nawk tawh ang. Chuvang chuan kan fate mizia leh nunphung hi kan hriat chian a tha takzet a ni. 

A tlan chak ngei mai. Rinawma a hmu leh dawn bawk a, a phur sarh a ni ber e. An inhmuhna hmun tur a thlen chuan fimkhur takin a hawi kual a, A pa car a ru chhuak tih a pain a hriat hmaa a hawnpui leh vat a ngai tih a hre ve ran. Minute 2 vel a nghah hnuah a mi duhte chu an rawn thleng a. An motor atang chuan Rinawma chu zawi zetin a rawn chhuak a, a hmaiah hliam neuh neuh hmuh tur a awm. A biak pa nen inhmachhawnin damdawi fun fel thlap, tam tham tak chu a hlan ta a. Aniin a tak nge a lem tih a lo test nghal zat. A bu ta nghut a. Arini chuan Rinawma chu cara lut turin a hrilh a. 

An tlan chhuak ta nghal. 

"Khaw nge min kalpui dawn.. Mawh? " hlauthawng takin a ti a. 

A ngawi tlat! Rinawma chu a hawi kual ruai a. A kut chu phuar lo se zawng a lum chhuak duh mai awm e. A chhan chu tuna phur mektu hi hmana hmeichhe naupang a pawngsual tak kha a ni si a! An kalna hmun lah chu a chhengchhe viau lehnghal.. Arini phone a ri ta ral ral. A pa chuan a car bo thu a hre ta ni maw.. 

"Aw" a ti satliah a. 

"Ka car i la chhuak em ni? " a rawn ti pawr hlur a. 

"Aw zanin chu ka lo kawl ve lawk ang. Rawn dah hman ka tum naa ka hman leh lo. Zingah ka rawn dah ang" a ti dam thlap a. A fanu tawng dam lutuk chuan a ngaihte pawh a titha lo lek lek e. 

Motorin a thlen theih chin an kal thleng ta. Chumi piah lawkah chuan thlam pakhat lian vak lo a ding a. An kalna chu huan a ni tih a hriat. Serthlum kung a ding nual a, a reh em em bawk. Thlam lam pan chuan kein an kal dun a. Rinawma chu a hawi zawk zawk mai, "Tlan chhuah tum buai duh suh. Khawi lai mah i thleng hman chuang lo vang. Hei hi ka nei alawm" tiin a kawnga a zeh pistol chu a rawn phawrh ta mai a! 

"Ka tum lo" a lo ti nghal vat. Thih chu a la hlauh hmel hle mai. Thlam chu a inkalh a, Arini chuan a bakkilh hmangin a hawng ta rak rak a. A thim deuh vangin mei a va chhem leh rih a. Khawnvar a chhi bawk. A neitu te an che fel tih hriat takin a hnum hlarh mai. An pawnthuah pawh a intel fel at mai. 

"Engtia min tih nge i tum? " Rinawma chuan a ti ta a.. 

"Engtia thih nge i duh thlang rawh" a lo ti hmiah. 

"Nang hian min thah i duh tih chu ka hria. Mahse, khanglai khan ka la â em a, engmah ka la hrethiam bik lo a ni. Min ngaidam hram rawh. I duh zah zah sum ka pe ang che.. " tiin hmeichhe tleirawl hmaah chuan ngaihdam a dil ta ngawih ngawih mai. 

"Nang hian ka nun hi hremhmunah i siam asin.. Chuvang chuan hremhmun i tem ve vat a ngai. Ka that che ang a, hetah hian i ruang an hmu ang a. Kei chu tuman min ringhlel lo vang".. A ti a. 

"Min that lo hram rawh. Min thah loh chhan tur thil pakhat a awm asin.. " Rinawma chuan beiseina nen a han melh chho va. 

"Ka thah lohna chhan tur che chu chhan tha tawk tak a ni ngei tur a ni. Sawi rawh le" a ti vawt raih a… 

Rinawma chuan a chil a lem khawlh… 

(Uak uak tih reng hi ka va hne ve 😪😭