A tel lovin 19

A TEL LOVIN.. (Chapter- 19)

(Adds kha aw.. Ka duatte u) 

Ziaktu: Toni Râlte

A nu ten damdawiin lama an hruai tawh vangin, Damdawiin lam a pan nghal a. A tlan chak bawk aniang. A thleng hma ngang mai. Mampuii an dahna ward-ah chuan a tlan lut a. A nu leh Lucy an lo awm. A nu chu a ţap pur tawh a. Doctor ten Mampuii chu an en mek, a lung a la phu det det a, mahse, amah a harh thei tlat lo. A nu chu a kuah a, "A tha mai ang" a ti a. 

Pathian zarah nunna êm chu an inchân ta lo. Harh lo mah se, lungphu a pangngai tawh a, nakinah a rawn harh mai tur thu an sawi. Engvanga khatia awm nge a nih tih an han zawh chuan, damdawi a lo bar teuh a niawm e! Ruatfela a thawng kher mai. A nau chuan damdawi a bar a maw?! Eng nge a chhan ni ta ang. A mize danglam ta vak nen hian inzawmna a nei ngei ang. Mampuii chu a mu chawrh chawrh mai si a, eng han zawhna khua pawh a la kaw rih mang si lo. 

A nuin thil awmzia a sawi a, "Chaw pawh tihtham a ei leh pek lo va. Lucy hian riakah a rawn sawm a. Mahse, 'ka nuamsam lo em mai' tiin a hnial a. A mu nghal daih. Mut dawnah a la harha ka hriat vangin, 'I u nen pawh kan zawt zing tawh che a. Hetia i awm hi a mak em mai. I nu ka ni a, engkim min hrilh rawh' ka ti a. 

"Nu, awm lo daih ila, in tan pawh a nuam zawk ang ka ring. Tihi chuan in rilru ka tihah sia" a ti a. Kei chuan, 'I ti ang lo em mai a. I vei ruk leh hetia awmtirtu che hi sawi la, kan siamtha vek dawn alawm' ka ti a. A ngawi ta veng veng ringawt. Ka rilruah a lo lut thut a ni chêk ang chu, ka tho leh a, a lu chungah kut nghatin ka va tawngtai a. Ka tawngtai zawh chuan, "Ka mutui ngawt ang. Nu, mang tha aw" a ti a. Kei pawh ngaihtha deuhin ka mu ve a. Zingah khan a thawh hunah pawh a rawn tho si lo va, ka va kaitho va, tikhan ka va hmu ta mai a ni" tiin. 

A farnu nungchang mawi leh ze tha tak, hlim thei em em, hetia a awm hi a mak takzet a ni. Ngaihzawng te hi a nei ve em ni zawk le.. Nei lo rual zawng a ni tawh bik lo va. Mahse, ngaihzawng vang ringawta hetia awm pawh chu! Nge nau te hi a rukin a lo pai reng em ni zawk? Ruatfela ngaihtuahna chu buai mup mup tak a ni. Lucy pawn nilengin a awmpui ve a, a fakawm thin ngawt mai. Engkimah a rawn tawiawmin a pui zel a. An tan pawh a thlamuanthlak thin e. 

Inthlan pawh ni 5 lekin a dang ta. Arini chet hun a hnai ta tial tial mai. Chutih laiin Ruatfela nena damdawi an phawrh khan nghawng a nei chho zel a. Tu lak nge tihah buaiin an inringhlel chho a, fiahna erawh an nei lem lo. Pu Thanga chu a tlin a rinawm chiah lo. A hmaa a case khan a hmel a tibal lo thei lo va, ringtu leh duhtu awm nual mah se; a laka rilru hel hrim hrim an tam zawk tlat a ni. Mahse, beih ve hrim hrim hi a tha a, theihtawp chu a chhuah ve zel e. Inthlan zawh huna a fanu chet dan tur chuan a rilru a kap lo thei bik lo va, Rinawma chu hum a tum ru tho. Hmingchhiat a hlauh ngawr ngawr vang lam ai mahin, Rinawma chuan a tan pawimawhna a nei tlat a tin ni. Engtin nge a hum ang tih lam erawh a la ngaihtuah hlei thei lo. Arini pawisak neih lohzia a hriat miau avangin fing taka chet a ngai dawn tih pawh a hai lo. 

"Khaw nge ka awm? " Mampuii chuan a ti tham ţiak a. A nu chuan a rawn hnaih vat, "Damdawiin.. I tui a hal em!" a ti var a. 

"Aih.. Ti nge min thihtir mai loh? " a nu chu a melh a. 

"Chutiang sawi suh.. Bawihte, i u pawh a rawn chho tawh a, i damdawi a zuk lei lawk anih kha" a lo ti nem diai a. 

"Nu, ka luak a chhuak" tih leh luak a rual nghal a, a nu chuan a buaipui vat. Nurse ten luak dannain an chiu nghal a. Lehlamah chuan a luah vang khan chau mah se;a damdawi bar chambang te kha a luak chhuak thei a. A tihzia angreng zawk. Ruatfela pawh a rawn lang ve a. Damdawi te chu a hung tha a, Nancy nen an inbe tawh bawk a. A thla a muang ta deuh. An buaina zawng zawng a hrilh a, a nau dam loh chhung chu chawlh a nei thei dawn hlauh mai. Nancy hi chu a fel teh e aw.. A nu nen chuan nileng deuhthawin an awmpui a, tlai eirawngbawl a ngaih si vangin a nu chuan tlai lamah a hawnsan a. A naute pahnih buaipui ngai bawk nen. Ti, buai rukna a nei. Hlawh an la la dawn lo va, bank-a a dah sa kha a lak chhuah mai a ngai dawn a ni. Mahse, an khawsak a harsat phah viau maithei. Damdawiin han luh meuh hi chuan insenso hi a lo na tawh thin si a. 

Khua a thim lek lek tawh tihin Lucy leh a thian an rawn kal a. Chaw an rawn dah a, Ruatfela chuan lawmthu a lo hrilh zung zung a. "Ka lo riahpui dawn mi ka tia" Lucy chuan a ti a. 

"Aaa kan tibuai che u em mai. A ngai lo ve, ka riahpui mai ang" a lo ti var a. Inthlahrun te pawh a na lek lek tawh alawm. Lucy te chu an thu ve deuh reng a, Mampuii erawh harh tho mah se, a tawng peih lo aniang, a mu chawrh chawrh ringawt. An hawn dawn chuan Lucy chuan a kutah a va chelhsak a, "Lo dam vat rawh aw. Naktukah nilengin ka lo awmpui ang che" nui chungin a ti a. Mampuii chuan ţit hmel zet hian, "Umm… aw" a lo ti nuaih mai. Lucy te chu an haw ta. 

"Û' Mampuii aw a hriat rual chuan a inperh tho vat. Dar 12 a pel vah tawh. Dam lo serious an awm lo bawk a, a reh tawh hle. 

"Mamawh i nei mi? " a va ti a. 

"Min zunpui rawh" a lo ti tiah tiah a. An va chhuak dun a, A zun zawha ward -a an luh leh hma si chuan, "Û, min ngaidam rawh aw" a ti tham chhal a. A luhai vang chuan a ner sak sak a. 

"Ngaihdam nachhan tur i awm hleinem" a lo ti dam thlap. 

"Arini lakah pawh khan ngaihdam min dilsak rawh aw. Kei chuan ka hmu ngam tawh lo" a ti leh daih. Ruatfela chuan mak a ti ta deuh a, a nau chu va kuah chungin, "Ka nau, engkim han sawi teh. I chunga thil thlen dan hi.. I u ka ni a, min ring rawh" a ti ta mawlh mawlh mai. Mampuii chu toilet bula bench tawite lo awmah chuan a thu ta hnawk a. 

"Engkim hi ka tihsual a ni. Rin loh tur ka lo ring a. Û, Lucy hi ka hlau a ni. Ka hlau ngawih ngawih, min hum tlat rawh aw" a ti ta mawlh mawlh a, a tha khur der der chu Ruatfela pawn a hre thei. 

"Lucy chuan i lakah eng nge a tih? Mawh' tiin a nau chu a han kar deuh a. 

Thawk la vang vangin a maimichhing a, a kut humruh chungin a thil tawn zawng zawng chu hmaih nei miah lovin a sawi ta a. A û chuan engtin nge a lo dawnsawn tih lam pawh a ngaihven thei lo. A thawpik lutuk kiang ta duak erawh a hre thei. Ruatfela chuan a kut hum ruh chungin a nau chu a melh ngawih ngawih a. A farnu, tawnhriat engmah la nei lo, mize tha leh dam tak tawn atan chuan a rapthlak mah mah deuh a ni. 

"Ka video a darh vaih chuan, U, ka dam zo lo vang" Mampuii chuan a ti sap a. A ippik kiang duak kha a rawn pik chho leh tan. 

"Lungngai miah suh. I u ka awm alawm. Ka chingfel vek ang. Mahse, amah Lucy hi a fin kherek em vangin a insawi fihlim thei dawn a, fiahna kan neih loh chuan an man ringawt dawn lo. Tunah pawh video hmangin a vaubet che a, video chu a kawl tak tak em tih kan hre lo bawk.. Dam phawt la, hma kan la dawn nia" a ti ta a. Mampuii pawh a thlamuang ta huai mai. 

"Arini chu ngaihdam min dilsak rawh aw" a ti leh hram a. Ruatfela chu a ner sawk. Amah ngei pawh hian a be ngam tawh kher ang em? Khati khawp khan a tinain a hnawtchhuak a. Dik lo zawka puhin in atangin a nam chhuak a. Engtin nge thudik kha a hmuh thiam loh? Mahse, Amah Mampuii ngeiin Arini hrai ruih angin a sawi ve kher bawk si a. Engpawhnise, Arini chuan engtikah emaw a la ngaihdam theih a beisei mai aniang chu.. 

A nu erawh engmah an la hrilh thei lo vang. A thinrim rilru na hian Lucy a lo nuai khaw lo ang tih an hlau. A fate avang chuan nu derdep tak a ni ngai lo tih an hre ve kar si a. Doctor te sawi hmangin zan khat bak riah pawh a ngai dawn tawh lo a niawm e. Mampuii pawn dam vat vata a nun tichhetu laka phuba lak a chak tawh hle. Lucy chu hlauin haw hle mah se;lem a chan a la ngai tlat si a. 

Ruatfela chuan a phone call dawn chu a melh vang vang a, a pa a ni. 

"Aw " tiin a la a. 

"Kan vengte ka atangin mampuii damdawiin awm thu ka lo hria a, a hma ang tho kha em ni? " a rawn ti a. A pa hi huatna nei mah se, pafa na nâ na chuan inzawmna an nei châwk. 

"Aih, thil dang vang a nia" a ti tha ve mai a. 

"A damdawiin awm man chu ka lo tum ve ang e. Tihtheih ka neih loh em hi" a rawn ti a. 

"A ngai lo, kan ti ve thei alawm. I nupui leh fate tan hmang zawk rawh " a ti ve ngat a. 

"Ka nupui fanaute chu nangmahni bak in ni lo. Min hua tih ka hria, mahse, in pa ka nih angin mawhphurhna ka nei ve alawm.. Khawngahin min tihtir mai mai rawh" a rawn ti leh a. Ruatfela rilru a buai viau, an pawisa neihdan hre vektu a ni a. Bank atangin tlem chu a la chhuak tawh naa, chu ringawt chuan Mampuii damdawi man zatve pawh a phuhru zo lo. 

Mahse, "Aa.. Pa, a ngai lo vang. Tih dan a awm ve mai zel" a ti leh ta a. A tlawm teuh ther ther hle mai. Damchhung khawsaknaah hian sum hian thil a lo tithei em em mai si a. 

Mampuii pawh a chhuak thei ta. A luhai leh deuh bak chu insawiselna a nei lem lo. Inthlan pawh a tuk mai a ni tawh a. Zoramah chuan titi dang a leng lo a ni ber mai. Arini pawh inah hmuh tur a awm lo chhunzawm zel a, lehlamah inleng an neih reng vangin a awm leh awm loh a hriat vak lo. Inthlan hma niin Nancy te pawh an rawn hawng a. Pa ber incandidate ve lem chu vote khat pawh uiawm hek le. Mama te pawh an rawn chho ve e. Arini chuan a thil tum hlen a nih teuh tawhzia a ngaihtuah chuan a mawngte a za, a helhhawlh a ni ber ang chu. Ruatfela chu han hriat chhuah chang nei ve bawk mah se; Rinawma a pawimawh rih zawk tlat. A farnu damdawiina a awm thute pawh a lo hre ve leh zel a. Va kana va tihlawm te chu a tum hnaisai tawh bik lo. A tlawm tawk tawhin a hre ve. Amah Ruatfela'n ngaihdam a rawn dil anih pawhin he khawvel a chhuahsan thuai tawh dawn bawk a, ngaihdam hmiah mai a tum. Mahse, a beisei angin a rawn zai miah lo. Pawi pawh a ti lem lo.

Hetih mek lai hian Sandra te pawh chuan buaina an tawk ve reng mai. Johnson nen an inhualna pawh a la rei loh em em laiin ni khat a inbual tur bathrooma a lut tur chiah chu a luhai vangin a tlu ta a! A nu ten ngaihtha lo takin Damdawiin hnai ber an panpui nghal. Chuta Doctor thusawi chuan chhungkaw hnih te inkarah eng emaw tak chu a hring chhuak ngei ang le.. Ni e, "In fanu hian nau a pai a ni" tih thu kha.. An inhual dawn khan Pastor hmaah inpuanna neiin an la chetsual miah loh thu an lo sawi dun ve ve tawh a. Inneih thlenga thianghlim taka inkawp an tum thu an intiam bawk! Chu ber chu a ni buaina chu. Sandra fa paina chu Johnson leh Sandra chhungte lamin an hria. Engtia chet lak tur nge an hre thiam lo. Amah Sandra lah nau pai haw chi a lo ni kher kher nen, a chau em em reng a, a rilru lamah uai rittu awm ta bawk si chu a taksa chuan a chauhpui lo thei lo ve bawk a. A luak deuh reng bawk. 

Johnson leh Sandra pa chu khunkhan taka titi dunin chet lak dan an rel ta a. Nau tihtlak chu an thutlukna a ni ta a ni. Vantlang mipuiin an hriat ve hmaa chinfel vat vat chu amah Sandra tan pawh tha tur zawkah an ngai. Sandra hnena an thutlukna an han sawi chuan thinrim takin a lo hnial fithla thak a. A phone a chelek theih rih loh vangin Elim bulah Ruatfela hnena thil awm dan sawi turin a rukin a hrilh bawk. Mahse, Elim chu Johnsonan ao vau ve lehzel a! "I hrilh anih chuan amah Sandra hian engpawh tawk se i mawhphurhna a ni mai" ti ang zawngin. Elim lah rilru dawih chi, ze nem chi a lo ni kher si! A hrilh ngam ta lo a niang e. Ruatfela lah Sandra laka a beidawn bakah a nau vangin buaina dang an tawk ta bawk si nen, Lucy chu dan anga hrem a nih ngei theih nan fing taka chet a ngai bawk si. A rilru a chawl meuh lo. Tichuan, A pa leh Johnson te nawr luihnain a fa pai chu an titla ta a, Sandra rilru na leh vai chu a ţap rawi rawi mai. Engtin nge nausen pawisawi lo chu rawng taka an tihhlum theih zawk ni? Johnson hian a lo hmangaih takzet em ni zawk? A chetdan hi atchilh rawngte pawh a kai tawh zawk awm e. 

Damdawiin atanga an chhuah zanah an in chhungah thil danglam tak a rawn thleng a. Zanriah an ei kham hlim, Puipuia'n thingpui hâng a thlit mek laiin a pa Pu Lawma a lo lut hlawl mai! Puipuia'n a pa a hmu thut chu a thingpui thlit lai theihnghilhin a thlauh darh chuaih! A thawmah mi dang an rawn lang a. A pa chu kawngka bulah a ding zum reng a. Ruatfela chuan a aw thian karhin, "Lo lut ta che " a ti a. Pu Lawma pawh chu zum angreng takin a lut a. A hawi kual nasa ngang mai. Pi Zuali erawh a hamhaih atalangin sawi mai tur pawh a hre lo. 

"Eng nge i rawn tih ve hlawl? " Ruatfela chuan pangngai takin a ti a. Puipuia'n thingpui chu a rawn chhawp a. Chhuatah a tihbuak te chu a hru fai ngjal zat. Pi Zuali hi a fel bawk a, a fapa naupang te pahnih pawh in lamah an tihtheih ang angah a chhawr zel a. Hna hahthlak a ni lem lo bawk a, thleng sil leh han senghawi te chu an awl hneh ve viau tawh a ni. 

"Mampuii ka rawn kan ve dawn e ka tia" Pu Lawma chuan a ti sup a. A fapa naupang ber Berhpuia chuan inthlahrung deuh si, thlakhlelh hmel bawk si hian a pa chu a hnaih hret hret a. "Apa ti nge i van lo haw har em em" a ti ta a. Pu Lawma tawng tum ang ziau pawh a tawp daih. Berhpuia chu a melh vung vung a, a pawm thawk a, "Ka fapa hi a lo va lian tawh em em ve. Ka hmuh loh karin.. A u i chen ţèp tawh alawm" a ti ta hlut a. Chu chuan an boruak uap churh pawh a rawn tikiang ta deuh. 

"Puipui, Berhpuia nen lehkha va zir lawk ru.. A pa te nen kan inkawm lawk ang" Pi Zuali chuan a ti a. Puipuia chu chinchang hre deuh tawh a ni bawk a. A nau chu kaiin roomah a luhpui ta nghal a. 

Pi Zuali chuan, "I nupui fanaute an dam tha maw? " a ti nghat a. A lung a la dam zan lo tih zawng a awrawlah pawh a hriat theih. 

"Umm dam e. Aa.. Kha lam chu sawi lo vang. Thil pawimawh deuh sawi duh ka nei a. Ngun takin lo ngaitjla ula ka duh a ni" Pu Lawma chuan a ti a. 

"Aw sawi la" Ruatfela chuan a lo ti ta vat a. A nu leh pa te chu an inbakkaih a hlau ve bawk a. 

"Englo a nia. Thla hmasa laihawl atang khan ka hrawk hi a rawn thip in ka aw te hi a rawn chhang leh thut zel a. Ngaihthat lohna pawh ka nei hran lo. Mahse, khatia a rawn awm a rawn awm takah leh awmna ang deuhtea ka awm fo vang khan ka thian ten inentir ve renh reng teh an tia. Sawtah Thenzawlah chuan ka inentir ve a. Doctor khan a lo ngai serious ta riau mai si a, Aizawl min refer a. Mahse, sawi leh sawi hnu hotelah ka buaiin han pengkawi thei nia ka inhriat loh vangin ka ngaihthah lui a, eng em ka ti lo vang tiin. Mahse, ni 3 liamta khan a rawn na leh vak a, ka aw lah a chhuak thei chang chang a ni ber mai. Ekhai! Aizawlah chuan va inentir ve mai teh ang tiin niminah khan ka rawn thleng a, sawtah Ramhlunah i pa Sapa te inah ka innghat a. Vawiinah khan Biopsy te an la a, ni 2 hnuah result lam turin min tia! Ka cancer a nih rinna a lian ta hle mai a. Chu chu ania ka lo kal chhan.. In in pawh hi ka zawng rei alawm. A hmaa in awmna hmasaah khan ka va kal phawt a, in insawn tawh thu leh in awmna veng hi min hrilh a, ka zawng rei khawp mai che u. A chhe ber pawh lo tawk ila, nangmahni bak chhung khat tak tak ka nei lo tih ka inhria a, thil tam tak lo tisual tawh mah ila; ngaihdam dil hman lo che ua kal hi ka hlauh ber a ni a. Ka rawn kal tawp mai a ni" Pu Lawma chuan a ti ta dap dap a. 

An ngawi thap mai. 

Amah bawk chuan, "Tunah hian ka hotel bakah ka sum la kawl ve te pawh Mama hmingin ka dah vek tawh a. Rinpuii sawn rawn chuhbuai tum mah se; lehkha pawh engkim felsa thlapin ka dah tawh a. Chu chu in lo hre dawn nia.. Tin, ka inthlahrung viau naa.. Ka lo thi ta a nih pawhin ka ruang tal chu in rawn kil ve aniang chu" a ti leh a. 

Ruatfela chuan, "Thih thu sawi suh, pa, i cancer lo vang.. I inngaihtuah nasa lutuk a nih kha" a lo ti ta vat. A rin aia hmain a pa chu a khawngaih. 

Pi Zuali pawh a insum thei ta lo nge, "Ee.. u Lawm, i thi thei lo. Thih thu chu sawi tawh lul suh. I result pawh a tha em em ang" a lo ti ve a. Chumi darkarah chuan ngaihdam indil miah lo mah se; an thinlungah chuan thuk takin an pa chu an ngaidam tih a lang reng mai. Chhungkaw thisen inzawmna thukzia hi aw… 

Thil tam tak an sawiho a, intaina leh khakna in hmun a chang meuh lo. 

Pi Zuali chuan, "Ro chungchangah kha chuan i tisualin ka hria. Mama hminga dah vek kha a tulna a awm reng reng lo. Rinpuii pawn chan a nei ve ngei tur a ni. Mualpho huamin tikhawp khan a zui chein a hmingchhiatpui che a, tun ataka i thlauhthlak leh hi ka remti thei lo. Siam tha leh la a tha ang" a ti a. Ruatfela te unau pawn chu chu dik an ti viau. Pu Lawma pawn a nupui leh fate ngenna vang chauhin a siam tha leh dawn tih a sawi. Zan rei tak hnuah a haw ve ta chauh. An tawngtainaah an pa chu an hre reng mai. 

Zoram khawvel chu inthlan vuakvetin a tuam mup mup a. Boruak pawh a alh hlep hlep mai. Ruatfela te chhung erawh an vuaicha deuh nge an vote kha la transfer hek lo, Thenzawla hawn phei lah chu a hun a bichilh tawh angreng si a. An thlak ta lo. A tu a pawh tling se, Zoram hi tha takin kaihruai se an duh a ni mai. 

Arini leh a thiante pawh an phusa viau. A pa ding ve chuan tibuai hran lo mah se, mi ngaiha mawia a ţan ve ìk loh chuan tiin a mawihawihah a ţang ve viau. A nihna takah chuan a pa chu tling lo se a duh. Ruihhlo hmanga sumdawnaah a inhnamhnawih chianzia a hre tawh a, chuta chhapah a fanu nun ngei pawh a chhiat pawisa lotu kha a ni a. Ani tehlul hian ram a hruai that a rinawm loh a ni. 

Result chhuak se, a che ve chiah ang tiin a intiam mawlh mawlh mai. 

Inthlan zanah chuan Ruatfela leh Mampuii pawn tum dang an lo nei ve tho va. An ruahman lawk tawh angin Mampuii chu Lucy bulah a riak leh dawn a ni. A taksa a la chak vak lo naa, rei tak nghah leh kha a thei tawh thlawt lo. Chuvang chuan Lucy chu hremna pek vat a duh a ni. Arini lrh Mampuii hremna pek duh dan hi a inang lo viau naa, Arini chuan kaihruaitu leh a thuruk hriatpuitu a tirah a nei ve tlat lo va, ama buai buaiin a buai ve tawp kha a nia! Dem chi pawh ni bik lo chuan… 

Lucy chu inthlan boruak velin a tihelhhawlh ve deuh nge Mampuii nen an riak dun tur pawh chu a phur nasa mai a. Amah Mampuii lahin a u fuihna angin a lem kual thiam ve reuh tawh si. Lucy nu leh pa te mut hnuah an pahnih chuan zu an in leh te te a, Mampuii chuan tih tham a in lo, a rukin a leihbaw zel a. Lucy hmuh lai erawh chuan a lem ve hlek hlek., zu hi a hua, a nu leh pa thendarhtu bul pawh kha zu a ni miau a. 

Lucy chuan zei takin a rawn kuahin a sawngbawl vel a. He nau pawh hian chanchin sawi tur a nei lo a ni bik lo. A pianchhuahna leh a seilenna in chhung hian a zir bik lo miau a! A sulhnute chhuisak hun a la awm anih ngai chuan a demawm lohna hmuh tur a la tam ve tho vang. 

"Lawk.. Kan tih hmain video kha ka en duh eee.. Ka zu in khan min hneh nge ka feel thei lo engmah" Mampuii chuan a ti ta ngher ngher a. Lucy chuan a bianga fawp zauhin, "Eng video maw? " a ti hû a. 

"Aw.. Kan tih hmasak ber zana ka ruih laia min khawihna kha" a lo ti vat. Lucy chu a nui hawk a, "Ka tihder che nih kha.. Ka nei tak tak lo. Video dang i en duh chuan ka ngah mai" tiin a phone a ban a. 

"Aih, kha kher kha ka en chak mai mai mawle.. Anih Loos, kha mi hmang khan min lo vau der vel tihna mi? Hmeli, i van fing tak" tiin thiam takin Mampuii chuan Lucy rui meng phi riai chu a chhaih tan ta a. 

"Umm.. A ni deuh mai. I duh dawn si lo va, khatia ka tih loh chuan.. Anih tunah hian min ngaina taj tak tawh em? Thian ang ni lovin" Lucy chuan a ti ta a. 

"Sawi lo mai teh, ka ngaih theihzia che chu a.. Damdawiin ka awm lai pawh khan ka hre reng che alawm.. Anih kei lo hi mi dang kawp i nei em? " Mampuii chuan a ti leh sap a. 

Lucy hmuiah te chuan a fawp thuak thuak a, "Nei tawh lo. A tir kha chuan ka nei a. Mahse, nangmah vangin ka kalsan vek tawh.. " a lo ti a. 

"Chuan, anih mi dang chu keimah ang thoin ami i thlem ve thin.. A tirah mak an ti ve awm" Mampuii chuan ruih hmel zet hian a ti leh a. 

"Naa.. Min zawt reng lo la, umm ni ve e.. Thenkhat chu video in ka cover tak tak a. Chuan, ka vau thin" nin hmel tak hian Lucy chuan a ti leh a. An duh ang chu an hmu tawh tih hriain Mampuii chuan "Ka va zung lawk" tiin khum atangin a chhuk a. Bathroomah chuan a va lut a. A chhuah leh chuan Zu umah chuan eng emawni a pawlh zauh a, "In leh zuai ang.. " tiin a thli nghal a. Lucy chuan a lo ban vat. A in atanga 5minute velah chuan a chau riai riai a, mut pawh mu tha thei lovin a muhil ta bawrh bawrh mai. 

A tukah Police hmel a hmuh chuan mak a ti ngang mai. A nu leh pa ten mak an ti bawk. Station-ah an hruai a, chutah chuan evidence fel fai takin a lo hmuak ran mai si. Sawi tur a vang ta hle. Mampuii chu huat hmel takin a melh ran a, "I hre viau ang.. " a ti nghat. 

Tlang thantir vak an duh lo bawk a, media lam pawh an hrilh lo. Lucy chuan dik lo taka Mampuii a vau beh vang leh mawi lo taka a khawsakpui vangin hremna a hmu ta a. Jail em erawh a lut lo. Chumini la la chuan, Ruatfela te chu insawn chhuak tura tih an ni ta bawk. An fanu thil tihsual chu thungrulh dan an hriat awmchhun Ruatfela te hnawhchhuah hmangin an thungrul ta ngawt mai a ni. Mahse, Lucy hian Mampuii chauh lo pawh a la khawihin a la tichhe awm si a. Chu chu Ruatfela chuan pawi a ti.. Mampuii pawn a thih phah ţhelh a, tu emaw chak lo zawk leh dinhmun chhe zawk a bum hunah chuan nunna hial in a tuar ang tih a hlauhthawnpui. Insawn chhuah chungchangah chuan a rin lawksa a nih avangin in luah tur a dap sa hrim hrim a, an vanneih asiamin an veng chhung ami tho te in a lo ruak hlauh a. Luah man erawh to deuh mah se; Lucy te in luah reng ai chuan a thlang zawk tho. A nu pawh thil awm dan an han hrilhfiah a, a thinrim ta chiah reng a. Mahse, an bengdai hram. Insawn chhuak tur chuan an insiam ta chuk chuk a. Thian ngamtlak an la nei mang si lo va, an buai angreng. Mahse, veng chhung tho a nia, an in luah tharna te fapa in a pui thei hlauh bawk a. Mualpho lovin an insawn thei ta hram e. Mampuii pawh a thaw huai e. Mahse, a chang chuan chhe vek leh tenawm, bawlhhlawh angah a inngai a, chu chuan a rilru lamah nghawng neiin a mumal loh phah fô mai. 

Pu Thanga pawh a tling zo ta lo. La na hmel erawh a pu lem lo ve. Arini chet a hun ta chiah mai. 

Inthlan result puan anih atanga ni 3-naah chuan news danglam takin Zoram khawvel a luah leh ta. "Pu Thangliana thuihhruai zinga a phusa ber leh a kut ke tihtheih Lalrinawma, Champhai khaw chhuak chu a awmna chin hriat lohin a bo mek a ni" tih thu chu.. 

Ruatfela pawn a lo hmu ve, a hmuh rualin mi pakhat a call nghal a. A ring ral thak.. Amah chauh an buai lo, Pu Thanga leh a chhungkua chu buai ru tak an ni. Nancy leh a nu chuan Rinawma, Arini laka a chet dan an hriat tawh vangin Arini thiltih nei ngeiin an hria a. Amah Arini lah a ngawi tlat bawk si.. Pu Thanga mawlh chu a nia.. A fanu a inhnamhnawih angem tih hlau reng rengin hun a hmang a. Arini lahin eng zawhna mah a chhang duh lo va, a roomah a tawm ngat ngat mai. Eng thil chiah nge maw thleng le?!! 

(Ka tihtheih tawk hi chu min lo pawmsak ve mai ru aw. Luak zeuh zeuh chungin ka rawn ziahsak hram che u. In zahawm ka ti a. Tin, keia thuziak min ngaihlutsak vang pawhin hetia rulh che u hi ka ba ve hrim hrim. A sei erawh a theih ngang loh a ni e)