A tel lovin 17

A TEL LOVIN.. (Chapter- 17)

Ziaktu : Toni Râlte

 

(Adds mawlh kha aw.. Khawngaihtakin min lo click sak ve hram ula, 10sec vel kha min nghahsak bawk ula.. In tan ka ziah zel theih nan 😍

"Eheu! Eng ti zia nge Mama" Pi Zuali chuan a lo ti hû a. Arini meng tha hleithei lo, ding ngil thei bawk si lo chu a melh a. A sam a thur bâm mai bawk si. 

"Nu, hei hi ka thawhna Pi Nancy nau kha a nia. I la hmu ve chiah lo a ni maithei. Zanin chu hetah a riak ang" a ti a. Arini chu kaiin roomah a luhpui a, Mampuii leh Lucy an rawn chhuk ve chiah. 

Arini chu a khumah a muttir a, a rum ţiah tiah mai. Lucy te chu roomah an rawn lut ve a, Mampuii chuan makti takin, "Ehe! Arini chu.. Ti nge a? A rui law? " a û en pah chuan a ti nghek a. Mak a tih hmel ngang mai. 

"Aw an hrai rui a nih hi" A u chuan a lo ti tawp. Lucy chuan, "Hrai rui lo vang, a rui thin alawm. Ka hriatna a rei tawh" a lo ti hmiah mai. 

A khumah Arini a mut tak si avangin thutthleng seiah a mu ta a. Mutthilh erawh harsa a ti ngang mai. A rilruah Arini leh Sandra an inluh chhawk chhen mai. Sandra chu Johnsona nupui hual a ni tawh ang a, inhmu leh pawh nise a hma ang khan eng boruak mah a awm theih a ring tawh lo. Sandra chhanchhuak thei lova a awm chu a indem rualin kawng a pinzia a hrethiam tho bawk si. A hui leh pap thin. Arini lah buaina a nei ve reng bawk si, he nau hi engtia enkawl chi nge mawni dawn le.. A nu leh pa te hian a awm dan zawng zawng hi an hre vek ang em? An en liam mai mai tawh zawk em ni ang? Heti ringawt chuan a la mualpho bakah a nunna hi a tawi telh telh ngei ang. 

Khawvar dawn lamah a muhil ve ta chauh. A naute thawm vangin a harh hma leh bawk si, mut a kham lo kher mai. A thawh chuan Arini pawh tho tawhin dawhkan kilin a nu nen an lo thu dun mek a. A va kal ve a, "Class i kal dawn em? " Tiin Arini chu a zawt a. 

A lu a lo thing nar nar. "Chaw ei la, ei khamah ka va thlah leh dawn che nia" a ti a. Engmah a sawi lo. Inthlahrung hmel a pu a, Ruatfela chhungte chu a zah hmel khawp mai. Pi Zuali erawh chuan a be siam siam reng a, Arini chuan fel a ti khawp mai. Tukthuan te an ei khamah taxi-in Arini te inah an phei a, a thlah thlap hnuah Tanhril lamah a liam thla leh ta a. 

Two wheeler hi a mamawh ve êm vangin Nancy te driver Pu Thana khan a bike chu a zawrh a, a dinhmun a hriatpui vek avangin, "Instalment-in min pe dawn nia, ka khalh ngai chuang lo va" a ti a. Ruatfela chuan a nu rawn leh phawtin an mamawhzia te hriain an la ve ta tawp mai. A bike a la thar thain tunlai bike changkang tak ang ni lo mah se; a lawm ve kher mai. Tikha chuan mi dang tihbuai sek a ngai tawh bik lo vang chu. 

"Inthlan hi zo vat tawh se chet vat ka duh tawh a nia.. Ka hne ka ning. Ka nghak rei tawh" Arini chuan a pa melh chung chuan a ti hmarh hmarh a. Tu a sawina nge an hrethiam vek. 

"Anih engtia hmalak nge i tum? " A pa chuan a ti a. 

"Police kutah ka hlan ang chu" a lo ti puat. Hetia a sawi mai loh chuan a pa chuan kawng dang a lo verh a hlau a ni ber. 

A nu chuan, "Naute, hun a kal tam tawh bawk a, amah Rinawma pawh hlauin a tlanbo tawh a. Tuna tharthawh leh kha kan chhungkaw mualphona mai mai a ni lo vang maw? A tirah kha chuan ka thinrimin ka sa em em tho a, mahse, ka ngaihtuah hian, nupui te hial a nei tawh a. Tuna a nun tihchhiat leh vek kha a tul ber em mawni le? " a lo ti a. Arini chuan a nu chu a melh kâwk, "I fanu hi he pa vanga a nun hloh tawh hi i pelet thei dawn anih chuan engmah ka ti lo vang' a ti chang fak a. A kal zui nghal. A nu chuan inthiam loh hmel deuhin a thlir zui a. A fanu nundan zawng zawng a hre kilhkelh lo a ni mahna le.. 

Pu Thanga pawh thahnem a ngai hle. A tlin zawh chu rinawm chiah lo mah se; beih ve hrim hrim a duh. A hmaa a case kha hmanruaah a hmang ta hlauh zawk a, dawta puhna leh opposition te beihna angin an chhuah chuai chuai a. Awih tawk an lo awm ve zel bawk a. Document lem siam te chu thil harsa ni hek suh. Boruak a siam thiam phian mai. A nupui hian a support ve bawk a, a fateah chuan beisei tur a nei lem lo. Arini phei chuan a pa chu a tlin leh tlin loh a ngaihven dawn lo nasa. 

Thenzawl lamah pawh Pu Lawma te nupa pawh an la inkawp ve zel chu a nia! Mahse, neuh neuh an ngah ta viau. Hotela amah Pu Lawma s riah atang khan Rinpuii chu a thlauhthla ţan titih a. A hnathawk Nuthlawi bengvar leh hmel chhe lem lo, khawsak harsa ve tak Nunpuii nen sawi hat an kai nghal. Rinpuii chuan a hre lo thei lo va, a rang arangin a zuk chhuk ve a. Nunpuii chu bantir mai a tum laiin an pain a phal ikhaw lo mai. 

. "Hotel hi ka ta a ni a, inrawlhna tur i nei lo e. " a ti mai si. Rinpuii thinrim te chu engah teh vak a ngai si lo. Mi dang pawn Pu Lawma nunzia chu mak an ti. An sawi sep sep reng mai. Khati khawp khan a nupui fanau te aiin Rinpuii a thlang a, an in leh lo hial a tihral phah a. Tun ataka han thlauhthlak leh chu amah Pu Lawma chu an dem viau hlawm mai. Mahse, thenkhat erawh chuan, "An sawti reng ang chu. Mi nu luahlan hreh lo tu chu luahlanin a awm ve dawn tihna a ni mai. Lawma pawh sawn chetchhiat hun chu a la nei ve tho vang" an ti thung. An sawi hi a dikna chen pawh a awm ve reng. Mi nu luahlana an fate fahraha siamtu chu chunglam hian rorelsak a thiam riau a, Rinpuii pawh a tum ang ngawtin a che thei ta lo a ni ber. Pu Lawma erawh a la che tha rih a ni mai a, ani pawh tluk hun zawng a la nei ngei ang. Dik tak chuan a tihsualah khan thupha chawi a ngam tawh lo va, a thupha chawina aiah tunah hian a fate tan a thawkrim a ni mah zawk. Chu a rilru leh tum dan chu tuman an hriatpui lo. A sawi ngai miau lo va. 

Sandra te pawh an inhual fel ta chu a nia! Chhungkaw hnihte nen chawhlui kilin, inneihna nen a danglamna chu an mudun lo a ni mai. Sandra hlim hmel erawh hmuh tur a awm lo. Thudik tak hre ve lo te chuan engvanga ngui hmel pu reng nge a nih an hre thiam lo va, mak an ti. Mahse, ani ngui mai mai chu Johnson chuan a pawisa lo nasa mai. Engtikah emaw chuan hmana a sandra kha a rawn ni leh ang a, a ta niin a fate nu a la ni dawn tihah a inhnem tawp mai a ni. Khatia Sandra-in mi dang hmangaih a neih thu a hrilh khan a chiâi vek a, awih harsa a ti bawk. Chuvanga ngawi ta ngat ngat kha a ni reng a. A harh chhuah hnuah erawh chet lak dan tur ngaihtuain a thluak a hmang chho ta a. Sandra chhungte lamah ţuanin awlsam takin a duh ang chu a tipuitling ta a nih kha. Sandra aia hmel tha leh a duhthusam a hmu tawh dawn lo tih hriain sandra chelh nan chuan engpawh tih a huam ta mai a ni. A thinlung hneh tur erawh chuan hun a la mamawh deuh mahna. 

Ruatfela erawh a nun chu awmze nei em em lovin a hmang chho ve mawp mawp ringawt.. Sandra lakah chuan beisei a nei ta rih lo phawt ti ila, eng emaw tak la thleng tura rinna erawh a la nei cheu! Hei hi mi tam tak rilru putdan a ni châwk reng a ni. Arini pawh a reh ta rih a, han biaka eng nge a an tih zawh pawh a tum bik lo. A mamawh hunah a rawn ko leh mai ang. Ni e, na tak takin Arini hian tawngkhum thin mah se, a tawpkhawkah chuan Ruatfela bawk a pun leh thin. Chu chu Ruatfela pawn a hre ve kar tawh a, a laka a bat te tlak nan Arini kohna lamah chuan kal zel mai a duh tawh. Khati khawp khan a tina a, na angin lang duh lo mah se, a na tih hrethiam turin Arini mizia a lo hre tam ve tawh tlat. Chuvang chuan Arini duhna leh mamawhna te chu tlanchhiatsan a tum bik lo. A theih chin chinah puih a inhuam. 

"Awiii saw nu saw a ni chiang.. Tisaw chuan ruih nei lo a ang ve tawp" College campus-a thutna an siama thu hmeichhe pakhat chuan Arini kawk zauh chung chuan a ti sar sar a…. 

"Nia, mahse, amah lo pawh hi an rui ve thin awm tho e.. " a thiannu chuan a lo ti a. Arini chu kal zelin an class room a pan a, a thutna lam a pan lai chuan a hnung lam atangin, "Nang kha.. Hei i ruihzia hi.. " a hmaa a intihbuaipui Sambuangi khan a phone entir pah chuanna rawn ti a. 

Arini chuan a lo en ve mai. Ruatfela te ina a riah zan, a ruih em em zan kha a lo ni. 

"Hmeichhe pakhat zu rui a ni mai a, eng nge a danglam vakna" a lo ti sam èt a. Sambuangi zawk chu a hrilhhai letling. 

. "Hetianga ruih chhiat lutuk te chu i zah ve ka ring deuh mai mai a" ti el zet hian a ti a. 

"A ho ee.. Zu rui i hmu ngai lo mi? " a lo ti leh hmiah. 

Lecturer a rawn lut ta bawk a. An sawizui leh ta lo. Arini erawh chuan mi biak duh a nei chiang. Kha video kha tu lak nge nia tu thehdarh nge tih tal a hre duh tlat. A hmel a lang chiang ngang bawk si. Lunch break-ah Mampuii a zawng ta nghal a, canteen-ah a va hmu. Lucy nen an lo thu dun a, rice an lo ei mek. An bulah a va thu ve chawt a, Lucy mitmeng râng pawh a ngaipawimawh lo. 

"In ina ka lo riak zana khuma ka mu lai kha tuin nge cover-a thehdarh" Mampuii en chung chuan a ti ta a. Mampuii chuan hrilhhai hmel zet hian,"Chutiang a lo awm ni maw? Ka hre ve miah lo" a lo ti hû.. 

Arini chuan Lucy lam hawiin, "Engvanga ka zu rui lai chu lo cover nge i nih le? " a ti ta kalh a. 

Lucy lah Arini ang chiaha duatsual leh pawisak nei tehchiam lo a lo ni si…,"Ka cover chak a" a lo ti hmiah mai. 

"I châk vang ngawt chuan maw.. Okay, a tha alawm.. Mi zurui lai lo cover chak viau in awm te hi khawvel tifamkimtu" ngeiawm zet hian Arini chuan a ti ve a. 

"Zahna chang lah chu i la hre map lo lehnghal a" Lucy chuan a lo ti a. 

"Ka la hrechiang khawp ang che" Arini chuan a lo ti daih. Mampuii pawh be ta chuang lo chuan a chhuak leh ta daih. 

"Ti nge i lo cover renh reng a. " Mampuii chuan Lucy melh chung chuan a ti a. 

"Rawn kal fo lose ka duh alawm. I u pawh hrilh rawh, khatiang hmeichhia kha hnaih tawh suh se.. Miin an hmusit lutuk ang" Lucy chuan a ti a. Mampuii chu a ngawi ta daih. Lucy mizia hi an inhrawn rei telh telh a, a hrethiam lo tulh tulh. A duhsak theihna kawngah chuan duhsak tak a ni. Mahse, thian dang kawm leh han biak hian a titau nghal zel. A thikthu a chhe viau a ni mahna le… 

"I nau thiannu hi ka ngaina miah lo a nia" Arini msg a hmuh chuan mak a ti deuh. A nau thiannu chu Lucy a ni. Engvanga ngaina lo ringawt nge a nih ang? A felin a duhsak a, Mampuii tan phei chuan laizawn ang chiah a ni. 

"Engvang ringawt chuan maw?" tiin a chhang a. 

"Hei a thiltih hi en la" tiin Video a rawn dah a. A download nghal. A'n en nak chuan a khuma Arini rui chhe lutuk mu kha a lo ni! Mak a ti viau mai. Arini chu a call ta a, "Lucy tih a ni tih engtin nge i hriat? " a ti a. 

"Amah ngeiin a sawi. Chuan, saw mihring nu saw eng ang mi nge a nih ka la ngaihven ang. I nau tan hian a tha kher lo maithei ania" a rawn ti a. 

"Engtia chetlak nge i tum? " hlauthawng ru deuh hian Ruatfela chuan a ti a. 

"Video kha chu engah mah ka ngai lo. Kei kher lo zu rui tam tak an awm ve alawm. Ka zak hek lo. Mahse, khatiang video a lo cover a, a lo thehdarh kher chhan kha hriat ka la tum ang" a rawn ti ta a. A thaw huai mai. Lucy chuan kuthlei thiltihin a lo cover ve mai mai pawh a ni maithei. Emaw Arini hi a lo haw sa pawh a ni thei. Phone a dah hma chuan, "Friday zanah ka rawn riak dawn. Lo haw suh aw" Arini chuan a ti a. 

"A tha lawm" a ti ve mai. Lehlamah mikhual an neih tam zan ber a nih thin vangin Friday ah hi chuan a haw ngai lo tluk a ni. Saturday chawhnuah a haw tlangpui thin. Tun lai a boruak tawn nen phei chuan Aizawl khawpui bengchheng tak ai chuan he lai hmuna inhnangfak a thlang. Sandra nen an inbiak lohna a rei ta deuh. Biak hmasak tumna a nei tawh lo. Huat erawh a haw lo. 

"Nu, Lucy nute an zin thut a, ka han riahpui ang e aw" Mampuii chuan a nu bulah a ti a. A nu pawh chuan a lo remti ve mai. Lucy hi an tan a felin a tlawmngai em em a, a lakah that chhuah lo ngam chi an ni lo. Mampuii leh Lucy chu Lucy roomah phone khawihin kawisawi zetin an mu a. An titi pah reng bawk. Mampuii pawh Aizawl boruak a ngeih a ni chêk ang chu. A vun chu a no viau tawh mai, bakah a ţhang duh chi a nia, a rualpui te aiin a lian deuh zel. A hnute hi a nu a chhun nge a lian tha viau mai a, bra hren loh phei chuan a mawi lo lek lek. Amah hi chuan hnawk a ti thin. Tin, a dul vun a pan a, ei duh viau mah se, a dul a kiar vak lo. A cher lem lo naa thau mum tung a ni lo. Mipain a khal an tih ang tur hi a ni ve a. A u pawh hian a ruk tak chuan a chhuang, tin, ven an ngaih hun lai tak tij a hre bawk a. A theih ang tawkin a fuihin a zilh ve reng thin. 

"Ti daih ila, Arini kha a mak e, ti nge a ruih vak le? " Mampuii chuan a ti phawng a. Lucy chu a lo nui hak hak, "Eng lai pawn a rui alawm. Chuvang ania i kawm ka phal loh. Miin an en dan che a dan phah vek ang. " a lo ti a. 

"I va hriatchian hmel" ngaihven hmel zet hian Mampuii chuan a ti a. 

"Hostelah kan awm ho tawh alawm. Amah chuan min hre kher tawh lo vang. Insual a hrat sia, a chapo bawk sia, an hausa ve tho bawk nen.. Mahse, ka ngaisang lo" a ti nghat a. 

Mampuii pawh chuan, "Kei pawh mi chapo deuh hi chu ka ngaisang lo. Mahse, Arini kha chu a fel thoin ka hria.. Min biak vel khan" hriatthiam vak loh hmel hian a ti niah niah a. 

"Aw.. I u thian a nia, i û kha a ngaizawng ang ka ring. Chuvang aniang a biak that che" a lo ti vat. 

. "Naaa, ka u te chuan bialnu chhe lo tawk a nei reng. Siaha ami" naupangchhia zetin a lo ti a. 

"Thil dang sawi ang, eee.. Thil entir tur che ka nei" tih pahin Mampuii chu a rawn hnaih nghal ruak a. A phone chu a hmet zeuh zeuh a, Video pakhat a rawn lang ta a. Room pakhat thianghlim takah hmeichhe pahnih inkawmin an nui har har a. Rei vak loah zu niawm tak an in dun a. An han ruih takah chuan an inkhal kual ta mai a! Chutia an inkhawih vel Mampui'n a hmuh chuan a zak lutuk chu a sen ţawn ţawn mai. A mit te a hup thul. 

"Ti nge tiangte min entir? " a ti a. 

"A nawm hmel i ti lo mi? " Lucy chuan a ti ta a. Mampuii chuan thawh uaih pahin Lucy chu a melh kâwk. "Aih, tenawm lamah a kal" a ti sap a. 

Lucy chu a tho va, a room-a mini fridge chu hawngin beer cane hnih a rawn phawrh a. 

"Nia a tenawm. Hawh hei hi in daih ang" tiin pakhat chu a pe a. Mampuii chuan beer a hmuh vawikhatna a ni., "Eng nge hei hi.. A ruih theih em? " a ti ha a. Lucy chuan nui sak chungin, "Ruih theih se ka intir dawn che mawni le.. " a ti a. 

Amah chuan hawngin a in nghal khawlh khawlh. Mampuii chuan hawng thiam hek lo, a va hawnsak a. Tui a ti lo nasa.. a ner nasa mai. "Hmeichhe tan a tha, chhul a tichak a, hei hi i period dawna i in phei chuan na engmah i hre lo vang. Damdawi a nih hi" Lucy chuan a ti mawlh mawlh a. 

Cane khat a in zawh meuh chuan Mampuii chu a hai chhalh mai. Zu chu sawi loh Zufang takngial pawh in ngai lo nafam chuan beer pawh a hneh lo hle tih a lang reng mai. Lucy chuan fel takin a muttir a. Amah chuan Zu pangngai a va in zauh. Light a off a, Mampuii bulah chuan a mu ve ta a.. 

A taksa chu engtin emaw a awm a, tu emaw hian nghet zeta kuahin a taksa chu a chul kual niin a hria. Men a tum a, a mut a chhuak bawk si. A taksa lah chu a za chuai chuai.. A meng ta hlawl a, a thim vek. Mahse, a khumah a mu lo va, tu emaw chuan a taksa chu fawp kualin a hnute chu a lo ţham tawn tawn tih a hre ta. Rang zetin a thu chhuak a, parda kara thla eng lo lut chuan a taksa khawihtu hmel chu a rawn chhun fuh ta chiah a.. 

"Lucy" a ti sap. 

"Shh.. Engmah sawi loin tikhan awm tawp rawh" a lo ti ham ham a. A thaw chu a rang hle. Mampuii chuan a hrethiam lo tawp mai. Mahse, zan tira Lucy thil en tir kha a hre chhuak ta a. Khai leh! Khatiang tur khan Lucy chuan a sawngbawl mek tih ngaihdan a nei thiam ta. Lucy chu a nam kiang a, "Ka duh lo" a ti tham ţiak. 

"A rei dawn lo. Engtinmah ka ti dawn lo che.. " nem zet hian a rawn ti a. 

"Aih, ka haw dawn" tih leh khum thawhsan a rual nghal. Lucy a che rang ngei mai. A va pawt let lawp a, khumah chuan a nam mu chawrh. A rawn thawh leh hmain a kut chu a thut bet a. Light a on nghal bawk. Lucy chu saruak vekin a lo awm a, amah Mampuii erawh a tshirt leh kekawrte nen a la awm. 

"Ngaithla rawh. Hei i ngam chuan au rawh. Hei hi hria ang che. Keimah vanga tun hun thleng thei in nih hi.. Ka duh loh dan zawnga i awm vaih chuan, nichin i mutthilh hlana ka khawih dan che kha ka cover vek, i hmel a lang chiang bawk. Arini ang khan ka thehdarhsak ve che a ni mai.. I hrethiam em? " Lucy awrawl chu a nelawm loh ta kher mai. Mampuii rui pawh a harh chiang ngang mai. Hlauhna in a bual a, tihngaihna a hre si lo. Lucy chu hlauh rukna leh tihlawm loh hlauhnain a hma pawh khan a khat tawh reng reng a. A chhan chu a lakah ba nei anga a inhriat vang a ni. Thawmhnaw leh engkim a mamawh em em te chu a thlawnin a pe vek a, khawiah pawh kal se a zuiin a hruai zel a. A ei ngai loh tha tha Lucy vangin a ei thin baek. Khangte kha a thian anga a en vangah a lo ngai a. Tunah erawh enngvanga khatianga ti nge a nih a hre chiang ta khawp mai. A tah a chhuak ta hle. 

Lucy chu a tho va, Mampuii chuan chetsawn pawh a tum lem lo. Video avang khan hlauhnain a thunun mek a ni. Zu pangngai va lain, thei tui nen a pawlh a. "Kha hei hi in la, a awlsam mai ang. " tiin a pe a. Hreh zetin a lo la, in harsa a ti khawp mai. Mahse, no 3na vel chu awlsam takin a in ve thei mai. A rui ta hle a, Lucy khawihna leh fawhna te chu a mang hriat ruai ruai chauh.. A pawi mang e aw. Mampui.. 

"Zanriah lo la ei suh thil tui deuh ka lo keng dawn" Arini'n a tih avang chuan Ruatfela pawh chuan a thiante rualin a ei lo va. Dar 7 rik dawnah Arini chu a lo thleng. A bike chiangkuan loh thu a sawi mawlh mawlh a. A intihfai hnuah Zanriah chu an zu ei dun a. Eng dang ni lovin Bawngsa roast lek a lo keng. Thil vâng deuh a lo keng dawn emaw a tih nak a laiin. 

An ei khamah in chung zawlah an chho a. Pher an phah duai a. Chutah chuan an thu dun a. Khua a thiang nuam kher mai. 

"Ti nge hetia tha taka min biaka min kawm theih? " Ruatfela chuan a ti ta hlawl mai. Ni e, a mak em anni. A changa Arini ze inthlak thut thut chu ngaiah a nei tawh naa, haw reng zawk se awm dan a thiam zawk a ring. 

"Ka huat vang chein" a ti leh hmuk. 

"Kan huat te lakah tiangin kan awm ngai lo" a lo ti a. 

"Ka hre lo. Ih maw, tihnat ngawih ngawih che ka duh a, ka lakah inchhir la, hrehawm deuhin awm la tih ka duh. Mahse, ka mangan tawp leh mi dang puihna ka mamwh apiang hian nangmah bak ka hre chhuak ngai lo che a. Chuvang chuan ka huatzia che tihlana sual deuha hmachhawn che hi a harsa thin" Arini chuan a ti ta a. Dawt a sawi lo tih a chiang. 

"Chuan, a hmaa min en ang kha chuan min en tawh lo tiraw? " a lo ti a. 

"Ka hre lo" a ti hul hak. Ruatfela chuan, "Sandra vangin ti khawp khan ka tina tawh che a, chuvang chuan tihnat belh che ka duh tawh lo. Nang pawn min haw tawh lo la, u angin min en rawh. " a ti ta a. 

"Ka tum ve mek alawm. " a lo ti ve mai a. A thu tha hluai, "Hausak i duh em? " a ti thut. A zawh dan tehtawp chu a hrethiam lo. 

"Tu pawn hausak chu kan duh vek alawm" a lo ti a. 

"Dar 10 ri phawt se, hausakna tur thuruk ka hrilh ang che" a ti ta mai a. Arini chu a melh renh ringawt. Ani lah a lo nui mai si. 

Dar 10 nghah pah chuan an incard den leh ta a. A hmaa an boruak hre chang miah lo anga Arini hlim khek thawm a hriat chuan Ruatfela chu nuam tih lohnain a khat thung. Sandra lo lan hma ang chiah khan Arini chu a awm. A hmel a nung sar a, tihthinrim harsa tak hmel a pu a ni. 

"Hawh le.. " Dar 10 a rik hnu chuan Arini chuan a ti sar sar a, a tho tharh bawk. A zui ve vut a. Thawm dim angreng takin Building chu an chhuahsan a. Inthlakna pindan chu helin, a hnungah chuan an ding ta ran a. Arini chuan flashlight a on vu bawk. 

"Hmanrua kan keng lo va.. Ngawi lawk" tiin an piah lawka thing tlawn tanbun an chheh zinga pakhat chu a va la a. A lo thlir tawp. Engmah a hrethiam ve der si lo. Arini chuan lei chu a cho ta a, "eng nge i tih hi? " a ti ta nge nge a. 

"He tah hian drugs tam tham tak thuhruk a ni a. Kan la a nih chuan i hausa dawn tihna" a ti a. A hah deuh nge thaw hluam hluam mai. 

"Eng a?! Chutiang a theihnloh? " Ruatfela chuan a ti nghek a. 

"Tawng zawi rawh. A awm ka tih chuan a awm a ni mai" a lo ti hmak a. Lei chu a cho phut zel, thuk vak lo a laih hnuah polythene bag a lai chhuak ta a. A pawt chhuak hlawk a, a chhung an han bih nak chuan, damdawi chu a lo awm ta chiah mai. 

"Khitah kan inhrilhfiah dawn nia. Kal phawt ang" Arini chuan a ti a. A zui ve zel tawp. A room an thlen chuan, an han enchiang leh deuh a. Nuai 100 man awm vel tur a ni hem mai. Ruatfela chu a hlauthawng em em a, chutiang thil chu la hmu ngai hek lo. 

Arini chuan a thil hriat dan leh Zorina nen hai chhuah an tum dan te chu a sawi fai ta leng a. Chu damdawi dahtu chu hmanni lawka Bawngkawna ruang an chhar kha a nih thu a sawi bawk. 

"Tichuan, khang kha engtia tih nge i tum? " Ruatfela chuan a ti a. 

"Eng atan mah ka ti ve hleinem.. I ta an ni e. Tiral la, hausa rawh" a lo ti ta mai a. 

"I a tawh anih kha. Ka duh i ring ami? A teuh lo. La bo rawh. I duh leh paih mai rawh. " a lo ti nghek. Arini chu zaidam takin a nui a, "A tihralna i lungngai ami? Ka awm alawm.. Ka hre maithei ania, lei duh tur chu" a la ti zui. 

"I va a tak.. Khatiang sumdawnn tenawm kha ka duh lo bur a ni mai. Khatiang hmanga hausak ai chuan retheih ka la thlang rih" a ti ta nge nge a. Arini pawh chuan a hrethiam. 

"Tak tak ana, he thil ka rawn ngaihven chhan tak chu kha pa thattu te khan an rawn ngaihven ka ring deuh a, chuvang ania mikhual lo thlengte hming list, U hruaia ka lo dil ziah ni.. " a ti ta a. 

"Chungte chu police kutah dah rawh. Engah nge i lo buai vak? " Ruatfela'n a ti a. 

"Buaina tur ka nei alawm. Ka pa hian tel vena a nei tlata ka hriat vangin" zawi sap hian a ti a. 

Ruatfela chuan a melh nghek ringawt.. "Mahse, engmah ka la sawi lo vang. He thil ngaihven an awm hunah tu nge a bul tumtu tih chu ka hre tho vang" a ti a. 

A buai lohna tura a buai duh chu Ruatfela chuan a lo ngei zawk. Chu pa thihna nen chuan eng inzawmna mah an nei tawp si lo. A pa pawn tel vena nei ta se; tihtheih a nei dawn chuang lo. 

"I ngaihven loh tur i ngaihven a ni. Buai duh tawh suh.. I chetsual phah ang" a ti a. Arini chuan, "He thil hi Rinawm nen pawh a inzawm vek alawm. Chu chu ka ngaihven loh theih i ring em ni? " a ti hriam ta hraih a. Ruatfela chuan a melh vawng vawng ringawt.. 

(Lo lungngai suh u. In duh loh dana kan kal chang a awm ang a, in duh dan ang diak diaka kan herrem chang pawh a awm ang. A la inrem fuh thei rih lo a nih hi 😂