A tel lovin 16

A TEL LOVIN.. (Chapter- 16)

Ziaktu : Toni Râlte

"Arini a awm em? " Arini te nulain kawngka a rawn hawn rual chuan Ruatfela chuan a ti a. 

An nula chu a hamhaih deuh. "Awm lo. Tlaiah a chhuak a" a lo ti a. Chutia an inbiak lai tak chuan Pi Mali a rawn kal a, "Eng nge ni ta? " tiin an nula chu a melh a. 

"Hei Arini awm leh awm loh a hre duh a" a ti mai a.

"A awm tlat lo, a thianpa em ni i nin le? " nelawm takin Pi Mali chuan a ti a. 

Ruatfela chuan, "Aw a ni mai ang chu. Hmuh duhna ka nei deuh a, ka kal leh nghal mai ang" tih leh kal a rual nghal. 

Pi Mali te chuan ngaihthat lohna an nei hran lo, Arini chu a chhuak fo va, a lo haw ve leh mai zel bawk a. Tun hnaiah erawh a chhuak tam ngang mai. 

Ruatfela chuan Arini chu a call leh ta nge nge a, a ring ral ţèp tihin a rawn chhang hlauh mai. Thawm a ri nuai nuai a, tawng pawh an inhre tha hleithei lo. 

"Khaw nge i awm? I tha em? " Ruatfela chuan a ti nghek a. 

"Ka tha.. Hetah ka awm" a rawn ti maiin a hria. Thawm a bengchheng lutuk a, Arini zawk chuan a dah leh daih. Umm a tha a nih dawn kha. Ngaihven zui tawh lo mai ang tiin Ruatfela pawh a haw zui ve ta nghal a. A inchhir lek lek, khi chen chen han ngaihven vel kha. Tlawm thlak tihna riau a nei bawk. 

A tukah Motor hire-in Lucy te in hnuaiah chuan an insawn phei dawn ta a. A thawhpui ten an rawn pui ve bawk. Bungrua an ngah lem lo bawk a, an zo hma khawp mai. Lucy chuan a lo dawngsawng a, a chhungte erawh Lengpuiah an kal thu a sawi. A sawi ang khan in chu a nuamin a zau viau a, an bungrua a beitham si a, an thawl mah mah zawk. Thutthleng erawh a awmsa an ring tel bawk a. Engkim chu an in hmasa ai chuan a changkang deuh. Choka lam pawh Mampuii duhthu a sam hle. Pi Zuali chuan Ruatfela thiante ho nena kil ho atan Bawng sa a lei nual a, chungte chu an siam nghal a. Hlim takin zanriah an ei a, ei khamah Ruatfela tih loh chu Resort lamah an liam thla leh ta nghal a. Ruatfela erawh Nancy pawh hrilhin ni 2 vel chawlh a la a ni. An in tharah eng emaw siam ngai leh thawm that ngai lai te a awm chuan amah lo ti thei dang an awm si lo va. Bakah a rilru ippik leh rit lutuk chu thawidamna zawn a duh ve reng renh bawk. Sandra lah a reh em em reng a, han call hmasak kha Johnson a venthawn vang leh an manchhuah a hlauh vangin a ngam chiah si lo. Sandra hian a ţhulhsan ta a nih a ring lek lek tawh. Elim kha a be tlang thei lèk lo lehnghal. 

Lucy nu leh pa te pawh an rawn hawng ve ta a, a pa chu pa thau luang mai, zu heh hmel fahran a ni a. A nu erawh ti dìm dèm, hlauh nei ang maia meng zek zek renh a ni. Nupa inhmeh lo ber an niawm e. An pa zawk chu a fel thur thur viau, mamawh an neih phawt chuan zawt hreh lo turin a ti deuh chhen a. An nu erawh a tawngkam hman a fimkhur hmel thei angreng. Mi sual tak hmel pu lo mah se; nel har chi niin a lang. Lucy te hi a nihna takah chuan Ganja hmanga sumdawng thin an ni. In leh lo tha tak an neih chhan pawh an ganja zawrh a hlawk êm a. An tihna a rei ve tawh bawk nen. Lucy hian u mipa pakhat a nei a, nupui neiin a nupui te khaw lamah an awm ta daih. A tlangval lai atanga mi tha leh dikna ngaina mi tak a ni a. An eizawnna chu duh lovin a pa te pawh vawi tam a hrilh thin. Mahhse, a hlawkna hre tawh tu an ni a, chutimaia bansan an tum si lo. An innghirngho ta fo a, nupui a neih hnuah phei chuan Lucy leh a nupui chu inmil hek lo, an buai ta zeuh zeuh mai. Chuvang chuan a chhungte lak atanga inlak hran mai chu a duh ta hial a. A man hna tha tak a thawk bawk nen, a nupuite khuaah transfer a dil a, tichuan, an va inbengbel ta daih a ni. Tihian Lucy leh a nu leh pa bakah awmpui mipa tleirawl ti ila, Thingtlang atanga rawn awm leh nuthlawi pakhat an awmpui te nen an inah chuan an awm ta tlawng mai a ni. An che nuam a, veng chhung duty te pawn han man thin mah se, engtin tin emaw an inkhul chhuak leh zel a. An tâng ve thei lo tluk a ni. Lamtang an ngah ru phian bawk si. Lucy Pa Pu Sawmvela hi en ai hian a fing roh nge, Kohhranah sawma pakhat a chhung lut ziah zel a. A pe tam thei si, Kohhran lamin hnawl phal hek suh. An tlatlum angreng phian lawi a. Hei hi zoramah a mikhual fahran lo hle. 

"Arin, Tun mai khan Rinawma leh a nupui chu zin tur angin an chhuak" Valtea msg a chhiar zawh rual rual chuan a pa te room lam a pan nghal. Kawngka a chum bur bur a, a nuin a lo hawng vat. A pa chu bathroom atangin a lo chhuak chiah a, a inbual zo a ni ngei ang. 

"Khawiah tehlul nge i kaltir dawn a? " a ti nghal tâwng. A pa chu a melh rûn bawk. 

"Tu te maw" a lo ti hû. 

"Rinawma te nupa" a ti hul hak a. A pa chuan makti hmel pu deuhin, "Khaw nge an kal dawn a? Engmah ka hre ve reng reng lo. Tunlai ka buaizia leh kha lam ka ngaihsak theih lohzia i hriat kha" a pa chuan a ti ta a. 

A hmelah a hriat loh ve hmel tak tak. Mahse, "Bia la, khawpui chhuahsan lo turin hrilh ang che. Anih loh chuan ka tihtur i hriat kha" a ti ram hmak a. A room lamah a let leh nghal. A nu leh pa chu an inmelh reng ringawt. Pu Thanga chuan a dinhmun ngaihtuahin Rinawma biak chu a tum ta nge nge a. 

Pindan thim leh chèp tak a ni. A rim lah a tui fahran lo hle. Sazu chìk thawm leh khau inperh ri awt awt thawm a ring viau. Pindan kawngka chu hawngin chhuahna a zawng a, chhuahna mai tur a hmu lo. Chutia a buai em em lai chuan pindan tawp berah chuan a hminga kotu a hre ta a. Chu aw chu a hriat tawh hnu ang a ti hle. Zawi muangin hlauthawng ru deuh chungin a va pan ţhem ţhem a. Chu aw lah chu a ring telh telh, "Min pui rawh.. Khawngaihin min la chhuak rawh" a rawn ti a. A kut hum ruh chungin pindan chu a pan zel a. Kawngka chu a nam ta a. A inhawng riai riai a, khum zaupui lo awmah chuan, Mipa lian leh chak hmel tak, dum run hian Arini hi a lo bawhbet run mai! Hmanhmawh zetin a va tlan lut a, chu pa chu a va nam kiang sawk. Arini let reng chu sawi nawk nawkin, "Kal ang" a ti tuar a, ani chu thei leh thei lo va rawn thoin kut inkai chung chuan pindan kawngka chu an pan a. Kawngka an pel dawn chiah tihin a tukhum a rawn na zawk. A nghing lawih mai… a harh ta hlawl a! A thlanin a bual huh vek. A khur dar dar bawk. Light a on a, tui a in leh khawlh khawlh. A mumang tehreng chu aw.. Chau zetin khumah a let thla leh a. Kha pindan thim leh rimchhe taka tâng mek Arini hmel kha chiang takin a mitthlaah a rawn lang a. Eng nge a sawi kha.. "min pui rawh. Min la chhuak rawh" a ti a nih kha.. He nu hian a puihna a mamawh a ni. Mahse, ani chuan tlanchhiatsanin kawng dang a zawhsan a. A puihna mamawh em emtu hmeichhia chu hnualsuatin hmeichhe dang kut a vuan a.. Ni lo, engtin nge hetiang hi a tih theih? He tiang inphatsanna hi haw ngawih ngawh tur zawk a ni asin. A pa in a nu lakah tuna Arini laka a tih ang hi a lo ti ve tawh si a.. A natzia leh hrehawmzia hre tawhtu a ni a ni lawm ni? Engtin nge Arini kha a thlah theih? 

A muhil thei tawh lo. A let tawn sek a. Inchhir chu hreh teh mah se;Arini a va hmangaih tihna lam ni lovin a mamawh em em laia a kalsan kha a inthiam lohna a nasa ta hle. Sandra chu a thlah hlen thei dawn miah lo tih leh Sandra kai chunga Arini chhanchhuah tum chu thil harsa tak a ni dawn tih a hria. Dik tak chuan Sandra a hmuh khan a che buai vek a, engpwh chân huam khawpin a atchilh kha a nia. Sandra a thlan tak vanga a ruala mi pahnih an nat tak dan te, tuna Sandrain harsatna a tawh mek dan te a han ngaihtuah chuan a thutlukna kha a dik ta lo em ni ang tih chu a ngaihtuah thin. Mahse, mipa a ni a, hmeichhe duhzawng leh ngainatzawng te chu a nei thiang alawm. Arini leh Sandra kha a duh phawt chuan a rualin a kawp thei maithei. Mahse, mi fair thek thawk tak a nih vangin Arini hnenah thudik a sawi ta kha a nia.. Huiham, buaina hi a la inmûng chauh zawk a ni mai ang em? 

"Arin, Enteh, hei he pa hi a thi? " Zorina msg chu chhiarin thlalak a rawn dah chu a thlek nghal a. A phu ve zawk mai. Hman zana drugs thukru tu pa ngei kha a ni. 

"Engtin nhe a thih? Khawiah" a va ti vata. 

"Bawngkawnah a ruang an chhar alawm. I news lo thei sia, va chhiar ve rawh" a rawn ti zèk a. Arini pawh chuan chupa ruang hmuh dan vel chu a va chhiar ta vat. Lunghnema a ni a, Champhai lam a niawm e. Zing exer la tur ten a ruang hi side drain-ah an hmu a ni. Police hrilh nghalin postmortem turin an la tawh a, Thah ni ngeia hriat a ni. Tu thah tak ni ang maw? inhnamhnawihna nei ve miah lo mah s; hman lawka an thil tawn vang khan a nghawng lo thei ta lo a ni. 

Inthlan ni vat vat se a tihtur tul ang ang te tih vat vata, thlamuang taka chawlh a chak tawh. A chang chuan Ruatfela sawi ang deuh khan, Rinawma a huatna leh amah a inngaihhlut tawh lohna hian a piansualtir em mawni aw tih chang a nei thin. Mipain an khawih changa feelings neih vat chu a tur ve rengah a ngai tawh a, lo dan buaia lo insum vak kha ţul berah a ngai tawh lo. Mahse, Ruatfela nen an insum zan khan a insum tluan thei reng si a! Engvangin nge tunah mipa dang lakah pawh a insum ve mai loh le?! 

"Sandra, i va reh em em ve, eng nge thleng? " Ruatfela chuan a ti hluai a. A reh tak daih vangin a call ta tawp kha a nia. 

Mipain a lo chhang ta daih mai. "Sandra chu a muhil a, nakinah i lo be dawn nia" a rawn ti. A aw atang chuan Johnson a nih a ring lo, Sandra pa a nih a ring. Hlauhthawnnain a khat nghal a, Sandra chungah eng emaw tak a thleng a nih rinna a nei. Phone a dah chiah tihin Elim in a lo call nghal nia! Rang zetin a la a. "Aw.. Eng nge thleng? " a ti nghal tâwng. 

"Engkim an hre vek tawh a. Chuvang a nia a reh. Kei pawh min rawn be ta si lo va, ka be tlang thei bik si lo nen.. Tun lawk khan an inah ka va kal a, thil awmzia ka va hre nghal a ni. Pindanah an khung" a rawn ti ta mawlh mawlh a. 

"Engtin nge an hriat theih? " a ti nghek. 

"Johnson khan a phone a lo hack tak tak alawm.. A phone siamtir tura dawra a chhuah khan a chhungte bulah engkim a lo sawi vek a, a rang a rangin an an va hruai haw a, a pa phei chuan kut a thlak a niawm e. Tichuan, pindanah an khung bo hmak. A phone pawh a pain a kawl" a rawn ti ta zel a. 

"Min rawn hrilh vat ta che.. Nang lah i biak tlang theih bawk si loh" Ruatfela aw chu a vin lek lek. Elim chuan hrethiam takin, "Nia, ka phone ka thlauh veleh zel a, tunah a tha chiah alawm. Amah Sandra chu ka nu phone atang pawn biak ka tum reng a, a tlang ngai si lo va, keimah ka va kal tawp a ni. Kei pawh min huat phah a chhungten" a rawn ti leh a. Ruatfela a thaw hawk. 

"Elim, ka hre thiam lo a ni. Sandra hi ka chan loh tur a ni pawh a nia nge. An inhual chuan a tawp a ni mai" a ti ta thlawt a. 

"Ka hrethiam bik lo. Amah hi be thei i la chuan awmdan tur pawh a hriat theih ang a. Ka khawngaih tawp. Chuan, MA pawh a zir dawn lo an tia" Elim chian a ti a. Chutiang lehzel a nih phei chuan, Ruatfela tan kawng a tawp a ni ber mai. Amah Siaha ah va zin ngawt dawn se, Johnson a fing si a, eng a va an chuan a ring lo. 

"Chanchin ka rawn hrilh leh ang che. Amah hi biak dan ka lo zawng ang" Elim chuan a ti leh a. An inbiakna an titawp ta rih. 

A nunkawng hman dan chu mak a ti ta viau mai. A mumal lo chho riau hian a hria. Hmanni lawka reilote a ngaihzawn, a atchilh ngawih ngawihin pasal hual a nei dawn chu a ni si a. Engmah tihtheih a nei der si lo. A hui pap a, a hah a, a chau a ni. Hetiang hun hi a la tawng ngai lo va, inngaihzawnnah kher chuan. Chuvang chuan a zuau ta deuh pawh a ni mahna le.. A thutiam a bawhchhe ta tlat! Peka a call a, a zu lak tir zinga pakhat chu rawn keng chho turin a hrilh ta a. In ngheka mut daih a duh. Engmah ngaihtuah loh a duh a ni ber. Peka chuan a rawn dah vat a, zu ûm chu a melh vang vang mai. Hmanah he zu hian buaina khirh zetah a hnuk lut tawh a, in tawh lo turin a intiam a. Tunah a buaina chinfel nan hman a tum leh si chu a nia! Mikhual an nei naa, an rehin an thawm a zawi hle. Zan dar 9 a ri ţêp tawh a, Zawitein in chung zawl a pan a. Thla eng hnuaiah chuan khawhar takin zu chu a thli ta kerh kerh a. 

Gate inhawng thawm a hria a, ţawng ri nak nak nen. Hruaia a awm tho va, a zuk ngaihven duh ta lo mai. A harhfim bawk si lo nen. Thawm chu a reh ve leh daih. Boruak a nuam viau a, hmanah he tah hian a vawi khat nan Sandra nen an infawp a nih kha. Hmanni lawk a la ni tak e. Tunah pasal hual nei turin khung hran a ni ta si. Inbe thei tal se a tawrhna a ziaawm tur. 

"Zu i in a maw? " chu aw chuan a ngaihtuahna a kai harh chiang kher mai. 

A hawi let vat a, Rinsangi Arini ngei mai chu a sam thlah chhap hian a lo ding khawng reng mai 

"I lo kal law? " a ti puat a. Arini chuan a rawn pan hnai a, "Thil eng emaw rawn tih lawk tur ka nei a. Hetah i lo awm daih sia" a ti a. A aw ah chuan engmah han hriatthiam tur a awm lo. 

"Nia, zanin chu ka in a ngai tlat" a lo ti nghut. A rawn thu ve a, a rim chu Sandra rim nen a inang chiah! 

"Sandra i ngai em ni? " a rawn ti sap a. 

"Ka ngai a, ka khawngaih bawk.. " Arini rilru hre miah lovin a lo ti a. 

"Engvangin nge i khawngaih? " 

"A chhung ten an khung hrang a, pasal hual nei turin an tir lui dawn" a lo ti chang fak. Thinrimna tlem chu a ruih hnan a ni maithei. 

"A va pawi ve. Engtikah nge an inhual dawn? " Arini aw chu a zawi hle. 

"Nilainiah khian" 

"Chu! Ni 4 lai i la neih chu.. Ru mai ta che" 

Ruatfela chuan Arini a melh kâwk. "I rilru ni lo pui kha sawi duah lo mai teh" a ti hluk. Arini chu a nui sak a, "Ka la duh chein ka la ngai che emaw i ti em ni? I mawl lutuk. Nang hian ka nunah engmah tel vena i nei tawh lo. Sandra chu ru rawh" a ti ta mial mial a. 

"A theih loh. An khung hrang alawm. An veng tlat a" beidawn hmel zet hian a ti a. 

"Kan pahnihin kal ila, kan ru thei ang" Arini zet chu! 

"Lo buai ve suh. Tumah tihbuai ka duh lo.. Ka tha mai ang" a ti ringawt. Arini sawi anga Sandra ruk chu thil awlsam nise a kal nghal ang. Mahse, Amah Sandra takngial pawh an be thei lo chu a ni si a. 

Zu a inthlit leh dawn lai chuan, "Khawi keiman" tiin Arini chuan a rawn thlit ta vat a. Ruatfela chuan meng phelh chial chungin, "In ve suh aw.. Ka nau i nih kha" a ti nuah nuah a. 

"Hetiang zu ka in ngai lo" a lo ti hlak. A in lo ta reng bawk a. Ruatfela inhrikthlakna zawng zawng a ngaithlaksak vek a, a hmel landan atang chuan a khawngaih nge khawngaih lo tih a hriat theih loh. Ruatfela chu a tan buaina a ni tawh lo tak tak em ni zawk… a rui ta riau va, Arini chuan, "Chhuk tawh ang. Hawh ka kuah thla ang che" a ti a. A lo ding ve mai. A thawh thut vang chuan a pai khut khut a. Amah pawh a nuih a za. 

.. "Ti nge ka tina che sia. Hetia min tih? " Arini melh chung chuan a ti a. 

"Hliam ka tawrh zana min puihna te, i ina min awmtir ve te kha ka rul let chiah che " a lo ti hmiah. Khang kha Ruatfela chuan hriat pawh a lo hre tawh mang lo. 

"Rulh let ka ngai lo.. " a ti naa, Arini rinchhan lo chuan a pen hleithei der lo. "Ruih hnâp i duh bawk a, rui hnâp la, muhil vang vang ang che" a khuma nam thlak pah chuan a ti sap a. A mut dan te chu siam remin rizai a sintir a. Ruatfela thaw sák sák chu melh leh zauhin, "Engtin nge i lakah hian that ka la chhuah theih tih min zawt a maw? Ka huat em vang che anih hi.. " a ti zawi sap a. A chhuahsan ta a. 

Mampuii pawh PUC-ah a lut ve thei dawn ta. Lucy hi an senior a ni naa, an kal rual zel thei ang a. A zia tak tak. Arini pawh college kal tura a inpuahchah ve tan chu a ngaih hmel e. A tihtur a la hlen thei mai si lo va, khawvel dan anga nunphung pangngai te a zawh ve zel loh chuan a nu rilru a hah lutuk danwin a hria a. A theih chin chinah fel taka awm rih a tum a ni. 

Mampuii pawh a u bula a ngen angin kekawr thar leh kawr thar bakah Lucy pheikhawk bun hlui, la tha tak tak a nei ve ta raih mai. A neih phak tawkah a lungawi ve khawp. Tukthuan a ei sawk sawk a, Lucy'in a rawn ko lang lang, "Ka insiam dawn mek" tiin a au let ve a. Chaw eina pawh a seng fel hman tawh lo. A insiam ta sawk sawk a. A nu pawh chuan hmuhnawm ti takin a fanu hlim leh phur hmel chu a lo thlir a. A zawh veleh Lucy nen an college lam panin an tlan ta vang vang mai. A nu khan cheng 100 a paitir ve ngei a, a lungawi khawp mai. 

Lucy a felin engkim lo hre tawh a ni bawk a, an class room te pawh a zawnsak vek a. An lo la thleng tam vak lo. A thutna duh bera a va thut kâk hnuah Lucy chuan a kalsan chauh. Mampuii hian Lucy hi a ngaisang nasa, ngaisang awm tak pawh a ni. 

An lecturer rawn luh hma chuan an ri deuh hak. Tlar hnung lamah a ni. An hawi thup a. Hmeichhe sam buang lian lam pang leh amah aia te hlek, ngo zet hi an lo indinchilh ran mai. 

"Ka bag ka dah a, i hmu ve reng. Ka hauh tih i hrethiam lo mi? " Sambuangi chuan a ti a. A thinrim hmel viau. Thutna inchuh vanga buaina a nih ber chu. 

"I bag kha mihring a ni lo va, a pawi khawp mai. Chuan, bengchheng chiam lo teh. Boruak siam ka peih lo annia" Kan Arini ngei mai chuan a lo ti hmiah. Mampuii chuan Arini chu hmuh tawhna neiin a inhria a, a hre chhuak zo tawh lo. 

"I va zam lo ham ham tak. " Sambuangi chuan a ti a. A va nek deuh sawk bawk. A thiante niawm tak chuan rum zetin Arini chu an melh bawk. 

A lo nui hak a, "Kal teh u. In hnawk. " tih pahin a thutna chu a siam tha sauh sauh a. Hmalam a hawisan daih. Lecturer a rawn lut ta bawk a, eng em ti lo chuan an kiang darh thei hram. Lecturer chuan hming a lam a, Mampuii chu a hnung pawl a ni. An tam viau a, a thutna dawt chiaha thu mipa hang lam, cher lam lek lek chuan dildar phawrhin a ei zauh a, Mampuii chu va melhin, "I duh ve em? " a ti sa sa a. A lu a lo thing. Chuta tang chuan inbe chhovin, hmingte an inhrilh a. Chupa chu Rindika a ni a, Lunglei atanga rawn kal ve tho a niawm e. Chanmari-ah an unauin in an luah. Thian dang nei hek suh, an titi ve ta reng a. Arini pawn Mampuii thutna chu a chhinchhiah ran a, ban veleh biak a tum ruh hle. Thian a la nei lo tih a hmu thei a, Ruatfela nau a nihna ang pawhin a mawhphurhnaah a ngai ve tawp. An kum te chu a inrual khat reng tho ang a, mahse, Arini hi chu khawi hmunah pawh a leng ve tlat a. Thian nei vak lo tan chuan belhbulh chi viau a ni. 

An ni hmasa ber a ni bawk a, an bang hma. 

"Mampui" a hnung lam atanga kotu avang chuan a hawi let vat. 

Nichina intibuai te zinga pakhat zawk, a hriat hnu ang deuh kha a ni. A rawn pan hnai a, "Arini ka nia, ih, I U Ruatfela thian ka nia" nelawm zet hian a ti a. 

"Ehe.. Ka hmu tawh chein ka inhre reng a. " a lo ti ve hliai a. 

"I haw nghal dawn em? " a lo ti a. 

"Aw.. Mahse, ka thiannu ka nghak a, min phur haw dawn a" a lo ti vat. Arini chuan, "A va tha ve aw. Hawn pui tur i neih loh chuan ka awm aw. " tiin a nui sak a. Mampuii pawn a nel nghal hle. Arini nui sen sen chu a duhawm si a. 

"Min lo nghak rei tawh em? " Lucy aw a hriat rualin a hawi vat. "Rei lo e, hei Arini nen kan lo awm a" a ti vat a. Lucy leh Arini chu a hmelhriattir ve a. Lucy mitmeng chu a thim mâk mai. Arini zawk chu a nui var var a, "Ka kalsan ang che u. Nih aw, Mampui" tiin a bu nghat a. A bike awmna lam a pan nghal. 

Lucy chuan, ram hmak hian, "Thian dang i mamawh chuan ka zawnsak thei tho che ania" a ti a. Mampuii chuan mak a ti nasa.. "Aih, chutianh a ni lo. Ka u thiannu a nia" a lo ti vat. Lucy awmdan leh mitmeng chu mak a ti angreng hle. Thian lakah a thikthu a chhe viau dawn anih hi a ti rilru a. 

"I lo inngaihtuah tawh em? Duhthlan tur dang i nei lo ka tih tawh kha. Johnson hi i nei anih chuan MA pawh i kal zawm thei ang. Mahse, i hel emaw lem i chang a nih erawh chuan hetah kan bulah in inneih hma chu i awm ang" Sandra pa chuan a fanu mu meng kar chu melhin a ti a. 

Chunglam melh chungin, "Aw le, inhual chu ka duh e" a ti sap a. A maimichhing nghal. Hna hautak tak a hmachhawn dawn ta chu a ni reng mai. MA kala, Ruatfela hmel vawikhat tal hmuh leh a chakna chuan a pawtna ngang si a. A pa te duhthlanna chhawp chhuah chu a pawmsak mai a ngai a ni. Nakinah Ruatfela chu a la hrilhfiah mai ang chu. 

"A tha alawm. Mahse, Aizawla in awm hunah Johnson nau te nen in in luah ho dawn ania" a pa chuan a ti leh a. A thu chhuak zawk, "In ti ve mah mah a ni. Innei pwh kan la ni lo va, chutianga chenho nghal ka duh hleinem. Hostelah Elim nen kan inroommate dawn" a ti ve ta hlar a. 

"Johnson remruat a nia, i pawm a ngai. Eng emaw a thlen leh a hlau a ni. A thleng leh anih chuan i pa hi ka zakin ka mualpho hle dawn tih hre reng ang che. In luahho i duh loh chuan hetah i awm a ngai a ni mai" a pa thu chu thutawp a ni ta. Sandra tah chu a chhuak takzet, Johnsom chuan engtin chiah nge a pa thluak chu a lo suksak bik ni… a haw ngawih ngawih. 

Ruatfela a vang chauhin, "Aw ka awmpui ang" a ti ta sap a. Hun remchang chu a hmu tho ang. Elim tanpuina nen pawh. 

Sunday chawhnu inkhawm pawh a ţhulh ta mai. A awm a nuam thei tlat lo. Engvang nge tih lah a hre der si lo. Mampuii chu Lucy te inah a leng a. A naute pahnih erawh an thenawm naupangte nen inkawmin an rak hlut reng mai. An thenawm maia naupang lo awm ve chu an lawm hle, an in hmasaah kha chuan kawm tur an vân thei si a. An school luhna erawh a hla ta em em si a, he lama sawn dan an ngaihtuah mek a ni. Engkimah sum chelek a ngai zel tawh si lai hi an buaina ber a ni. A nu erawh chawhnu a han inkhawm hram. A nu hi zawng rethei bakberha an awm lai pawha inkhawm thulh ngai lo kha a nia. Zing tawngtai pawh a kal zat zat thin naa he lama an awm tak hnu hian mikhual chan an lo chang ve ta deuh nen, a la zum rih nge a la tel lem lo. 

Khumah muin a phone chu a kheuh a kheuh ringawt a. Sandra a biak theih loh a, mi dang biak tur a hre lo. Arini pawh a reh! A nau nen an inhmuh thu erawh a nau ka atangin a hria. A va inphihharh a, room-a a lut leh chiah chu a ph a ri ta. Rang takin a va la a, Elim a lo ni. 

"Sandra chuan inhual a duh a. An ti dawn" a rawn ti teh tawp. Ruatfela a chhing sawk, "Engtin" a ti thei ţâwk. 

"An vau a nih ka ring. An inhual dawn tih chiah ka hria" a rawn ti a. A tawp leh daih. Khumah a thu leh hnawk, "A ngaihna a awm ngang lo a nih hi" a ti sup a. Sandra lakah chuan a beidawng ţan ta der mai. A tir phat atangin harsatna an tawk nghal bawk si a. 

A mu zal mai mai chu a lo muhil daih a, a nu lo hawn lai pawh a hre lo. Zanriah ei dawnah an rawn kai tho va, phak chuapin a va tho. Chaw ei pawh a tui hleithei lo aniang, a ei tam falua lo kher mai. Inkhawm pawh a tum lo. A nu pawn a nawr lem bik lo va. A naute nen a nu hovin an han inkhawm dial a, in a lo nghak thung. 

Dar 8 leh tlem vel a ni tawh ang tihin Arini call a dawng ta a. 

"Zemabawk RT cottage-ah.. Vatin.. Lo kal rawh" A rawn ti teh tawp a. A insut hlawp hlawp. Thil ri ţhuai thawm in a rawn chhilh zui a. A tawp ta hmak mai. Ruatfela mu lai chu a inperh tho chiang kher mai. Buaina bawk maw.. 

Lucy te inah lutin, Lucy pa bulah an bike chu hmansak a dil ta tawp a. Petrol man a tum tur thu leh a pawimawh thu te sawiin. An lo remti em em lehnghal. Mi sual tak zawng an ni lo. Chak zetin Zemabawk lamah a lim phei leh ta, a hma pawh khan thih thu vangin tiang hian a kal tawh. Engmah a lo ni leh si lo anih kha.. tunah pawh hian engmah a nih loh rinna a nei. Mahse, Arini laka bat nei anga a inhriatna hian a kiansan thei si lo va. A kohna apiangah a kal lo thei lo a ni ber mai. RT cottage chu a lo la eng va a, Arini chu a call leh a, a ring ral ţhak. Reception-ah chuan lutin,"Ka farnu ka rawn zawng a, hetah hian room an lo book niin ka hria a. Khawngaihin ka lo en thei ang em? " a ti ta tawp. A nghaktu nula chuan phal takin a lo entir ve mai bawk a. 

Arini hming reng a hmu lo. Zorina hming a hmu bawk si lo. 

"Hming dang a hmang annih ka ring, emaw a mipa hruai hmingin an book a ni ngei ang, khawngaihin he nula hi a lo kal em tih min lo hrilh mai" tiin Arini thlalak chu a hmuh ta tawp a. A ngawih vang vang hnuah, "I farnu a ni tak tak em? " a ti a. 

"Aw min lo call alawm aman. A rui deuh a, hruai turin.. Amah ka be tlang leh thei si lo va" a ti a. Nula chuan Arini te room number chu a hrilh ta a. Stepah chhuk thlain, cottage fal deuh taka lo ding lam chu a pan ta a. Room chu a eng pap a, mahse, thawm a reh angreng hle. Kawngka bulah chuan a ding vang vang a, kawngka kik tura a kut a lek rual chuan, "Ka thu angin awm mai rawh. Zu inpui tur ringawtin hetah ka hruai lo che" Mipa aw thum chher chhur hian a ti a. Ruatfela a meng phawk hle. Tìmna nei miah lo hian kawngka chu a kik ta a, a tawp lamah phei chuan a chum bur bur mai. A rawn hawng ta nge nge a. 

Arini chu khum bul chhuatah kekawrte nen, a kawr hak lai nen a lo thu niaih a, a meng â ruai mai. Zu um a let rum bawk. 

"Ka hruai chhuak dawn" a ti nghal tâwng a. 

"Hei i va zak lo ve, ka nula a nih hi" mipa chuan a ti ta mai a. 

"Ka farnu a nih hi." a ti bung nghut. Arini chu kekawr a haktir a, a sam te tuai mamsakin, tuiin a kawr te pawh a chul mamsak a. Mipa chu a rum ngul ngul reng mai. Chutia a sava bu keu lek lek tawh an rawn chhuhsak ringawt chu a ngaihdan a nih loh hmel kher mai. 

"Ding rawh le.. Aw tikhan" tiin pheikhawk an inbuntir a. 

"Ngawi lawk teh. He nu hian min zui tawh a, chuti mai chuan i hruai thei lo vang" Mipa chuan a rawn ti leh a. 

"Police hmel hmuh i duh loh chuan min lo dang suh" Ruatfela aw chu a nelawm tehchiam lo. Pai khut khut chungin an inhruai chhuak thei ta hram e. 

"Bike i keng em? " Ruatfela chuan a ti a. 

A lu a lo thing nar nar. A bek tawn tawna dawmin a kuai dak a, "Ti nge hetia i awm leh thin. Min tirilru hah thin" a ti nawk nawk a. A thinrim tel deuh bawk. 

A mitmenga tawrhna lo lang nen, zawi te hian, "Ka huat vang che alawm" a ti ţiau a. A mittui chu a rawn hnam nghal.. 

"Kal ang" Ruatfela chuan a ti nghut a.. Arini hmela tawrhna zawng zawng a hmuh khan a sahal tlat.. 

"Inah ka haw peih lo" a hnunglam atangin a rawn ti a. 

"Aw le.. Kan inah ka hruai dawn che nia" a ti bung nghut a. 

Ngawi rengin an tlan zui ta nghal a.. 

(Tawp leh ta 😆😂