A tel lovin 15

A TEL LOVIN.. (Chapter- 15)

Ziaktu : Toni Râlte

Sandra te chu an haw a hun ta reng mai. An hun neih tlemtê chu âm takin an hmang dun a, mi dang pahnih thinlung an tihnat te chuan kap deuh mah se; an inthlakhlelhna a belhchhah sauh mai. Arini erawh Sandra te hawn hmain a haw chho va. Ruatfela chu a thaw huai naa, ngaihtuahna zawng a luah ve tho mai. A hna thlengin a tuar phah thei ang tih hresa karin, hna dang te pawh a ngaihven ru pah a. Tuna a hna aia thawh nuam leh hlawh tam hi chu a hmu kherin a ring lo. Mahse, Arini thungrulhna chu pachang taka dawnsawn a tum ve tlat a ni. A tina tih a hai reng reng si lo. Sandra bialpa Johnson pawh a reh vang vang a, ngaihthatthlak loh khawpin a ni a reh ni. An hawn hma zanah Ruatfela roomah Sandra chu a riak nghe nghe. A thiante pawn an hrethiamin engmah an sawi hran lo. A dik adik chuan Sandra hi an boss en deuh a ni a, an zingah a neinung ber leh engkimah pawh an hmatheh a ni tlat a! A lo dai pelh zeuh a nih pawhin an thup mawi ve ang chu. 

"Result a chhuak har dawn lo va, ka tlin ka ring bawk. Hostelah ka awm theih ka ring bawk a, weekend apiangin hetah kan hmang dun thei ang chu" Sandra chuan a ti sar sar a. A taksa ruak kâng chu Ruatfela chuan a chul heuh heuh a. 

"Weekend hi chu ka haw ve thin a. Mahse, insiamrem dan a awm mai ang. Thil pakhat, Arini vang khan hetah hian ka thawk reng thei kher lo mai thei.. Chu chu hre lawk la aw" Ruatfela chuan a ti a. 

"Umm nia, ka hria alawm.. Kha chu, hna dang kan zawng dawn nia" Sandra chuan a lo ti awlsam êt a. A tho kang a, hnai taka Ruatfela melhin, "Bakah heta i thawh reng hi ka remti lo" a ti sar sar a. An innuih ringawt. Chumi zan chuan rinawmna thu intiam tawn chung zelin hun an hmang a ni. Hetianga inthlakhlelhna leh inmamawh tawnna hi an ni pahnih hian an damchhungin an la tawng ngai reng reng lo. 

Sandra te an han kal liam ta chu ruak vekin a inhria a. A ngui vek. Thil han tihzai pawh a rel thei meuh lo. Hetiang em ema lunglen hi a neih awm pawh a la hre ngai lo. Ngaihzawng chu tihian pali a nei ve ta chu a nia, a virgin hawngtu a college bialnu kha chu hriat pawh a hre zui tawh lo. Enh emaw changa a han hre ve zauh hi a ni mai. Sandra chuan a rilru chhungril ber a luah a ni ber e. Kar tawp a ni a, an inah a han haw ve a. A nu pawn a awmdan atang chuan vei a nei tih a hrethiam nghal, a zawt ta nghe nghe a. 

"Sandra a nia, ka duh a, neih ngei pawh ka duh a ni " tiin Sandra nen an chanchin zawng zawng chu a sawi ta vek a. A nu pawh chuan a hriatthiampui hle. 

"Fimkhur la aw. Nulat tlangvalna kawngah te hian tlan ve reng reng suh.. Nang hi kan innghahna i ni tih hre reng la" tiin a nu chuan a fuih mawlh mawlh a. 

Mampuii result a la chhuak lo va, a beisei erawh a sang ve hle. A thian chhar thar Lucy nen an inbe deuh reng mai a. Lucy te chu Zarkawtah awmin, chhungkaw hûng leh neinung tak an ni a. Engtin nge Mampuii te ang thingtlang nula, fashion thing bawk si chu thian atan a rawn thlan ve mai ni tih Mampuii chuan a ngaihtuah fo mai. Chuvanv chuan a nia Lucy chu a ngainat a, a nel em em ni. Sunday tlaia lo len a tum thu a sawi nghe nghe a. Chaw ei ve turin Mampuii chuan a sawm a, ani lah chuan a lo remti ve mai bawk a. A nu a hrilh vat. Chawhmeh chu Ruatfela'n a rawn lei haw nual bawk a. Chutianga thian thar a nei chu an lawmpui ve bawk nen, lawm takin an lo dawngsawng ngei ang. 

"Rinsang, Larinsang, nizan zankhuain min timuhil lo aw. He thil hi eng nge?" tiin a pa chuan a phone- hmai chu a hmaah a rawn dah lang a. A lo en reng ringawt. Room atanga a nu lo chhuak chuan zan lamah mut a hmu miah lo tih hriat takin a meng val kalh a, a lang tar bâwih ni hian a lang. 

"Keimah ka nih kha" Arini chuan a ti ta a. 

A pa insum zo lo chuan a beng tlu ţhuai a, a nu a rawn tlan vat. An pa chu a chelh bet a. Pu Thanga chuan khur zawih zawih chungin, "I sual ka hria hetiang em em i nih hi chu ka ring lo asin. Min tichhe ta vek a nih hi. Engtin nge MLA -ah pawh ka din ngam tak ang?,, hmanni lawka ka mualphona lah ka sawi fel zo chiah a. Tunah ka fanu ngeiin ka hming tha tan mek i rawn thai chhe leh vek mai. " a ti ta phiar phiar a. Arini chu fel takin a tho va, khawng taka dingin a pa chu a melh kal a, "Kha video kha a la darh hleinem. A bul ţanna chauh a nih kha. Kha video kha a darh i duh loh chuan, Rinawma i thuhrukna sawi rawh" a ti ta chher chher mai. A mitmeng chu hlauhawm tak a ni. Pu Thanga chu a tawlh hnung dâwrh mai. 

"Tunah sawi rawh. Tichuan, kha video kha chu i damchhungin tu man an hmu lo vang. I sawi lo a nih erawh chuan, vawiinah hian zoram khawvelah ka thehdarh ang" a ti hem mai! A video chu a sex toy Zorina nena Cottage-a an chetla lai a ni. Arini duhthlanna ngeia an cover a ni nghe nghe. A chhan chu Rinawma chu a bo leh daih a, tunah a awmna chin hi Valtea takngial paw'n a hre tlat lo a ni. Chu tah chuan Arini chuan a pa hi a inrawlh a ring tlat! A pa kâ a antir theih nan khatiang kha a ruahman ta hmiah mai a ni. A chhan chu a pa hian an hma lawka MLA inthlan lo awm turah chuh ve a tum tih a hria, hmannia a case kha chu a ukil thiam tak ten mawihnai taka sawimamsakin mizo mipui tam zawk chuan an ţan leh dual tawh tlat a. Tuna a fanu scandal a darh vaih chuan a lama thle mek te hi an thlesawn thei tlat! Sex video nei hringtu pa chu tuin nge Zoram hruaitu atan duh bik ang le.. 

Pu Thanga chuan, a fanu chu melh in, "Hetiang hi chu ti suh. Rinawma awmna ka hre lo" a ti lâwi rût a. A nu erawh thutthlengah hah hmel zetin a thu ngawi hle hle. 

"Anih chuan vawiinah chhungkaw mualphona a thleng dawn anih chu" tia nui sakin a phone a phawrh a. 

"Inchhir hlek suh ang che" a ti ram hmak a. Pu Thanga chuan hlauthawng zetin, "Ti suh. Khawngaihin, aw ka sawi ang. " a ti ta chul a. 

"Tunah sawi rawh le" a lo ti fiah kâk a. Hmeichhe naupang Arini hmel pawisawi lo tak kha hmuh tur reng a awm tawh lo. Pawisak nei miah lo leh thih pawh hlau lo hmel a ni a put ni. Pu Thanga chuan a chil a lem khalh a, "Tuikualah ka building pakhatah an awm" a ti ţial ruan a. A fanu lakah dawl zawrin a zawr ta a ni ber e. 

"Dawt i sawi emaw i lo tlan chhuahtir anih chuan, hre rawh.. Kha aia nasa khan ka che ang" a lo ti ţhawt a. A kal tur chu Pu Thanga'n a lo chelh vat, "Mahse, tunah chuan engmah la ti lo hram rawh. Engmah ka sawi lo vang, thla khat chiah ka mamawh. Chumi hnuah chuan engpawh i ti dawn nia" a ti ta ngawih ngawih a. A thlan fim te chu bawlin a thisen zâm te pawh a pawng ţawlh ţawlh mai. A mangang takzet tih a lang reng mai. A nu chuan a fanu kut lehlam chelh chungin, "Mate, khawngaihin i pa thu chu ngaithla hram rawh. Kan chhungkaw chhanhim nan tunah chuan engmah ti rih lo hram rawh. I pa hian boruak dang a nei leh anih chuan engtikahmah kan damkhawchhuak tawh lo vang, i nu ka nihna angin ka ngen che a ni" a lo ti ve mawlh mawlh a. Chu in chhunga thil thleng chu eng emaw ti zawng chuan rapthlak tak a ni. Arini chu a ngawi vang vang a. Thla khat chu a tan a rei mah mah a ni. Ruatfela tel loin khawvel a hmachhawn dawn bawk si. A hmabak chu hlen vata thih daih a tum kha a ni si a. Mahse, amah hringtu a nu ngenna chu namnul harsa a ti ngang mai si. 

A che hret a, a pa chu melhin, "Anih min tiam rawh. Saw building atang sawn i la chhuak tawh tur a ni lo tih hi"a ti ta a. Pu Thanga tan duhthlan tur dang a awm ta lo. A fanu hmaah chuan thutiam nghet tak a nei ta a ni. 

"Lo kal rawh, Lucy, nu, hei Lucy chu a nia.. Lucy, hei ka nu leh ka u" tiin Mampuii chuan a chhungte leh Lucy te chu a hmelhriattir a. A nui sâng a, a duhawm tawp. A cher mah mah naa a taksa nen a inphut ve tho mai. Ruatfela nen pawh nui chungin an inchibai a. 

Mampuii nen chuan an ri zui ta hlut a, Lucy chuan a naute eitur eng eng emaw a lo keng nual a, an lawm chhungkua hle. An hausa ang tih chu a inchei dan leh a thil rawn lei ho man to dan atangin an hrethiam ve nghal mai. Ruatfela erawh kelsa siamin a buai daih a, ear phone vuahin Sandra nen an inbe deuh reng bawk. A hun lai a ni bawk a, over khawpin an inbe ngun a ni ber e. 

"Mampui, in in hi a te deuh a nih hi. Kan in hnuai hi a ruak dawn asin. Lo awm daih ula" Lucy chuan hawi kual pahin a ti a. 

"Ka hre bik lo, luah man a to awm e. He lai chu luah man a zia deuh a"Mampuii chuan a lo ti ve mai a. 

"Lungngai suh, ka pa te bulah ka sawi dawn alawm. He lai aia tlawm daihin in luah dawn nia. A zau a, nuam in ti zawk ang. Chuan kan inkawm reng thei bawk ang a" a ti sar sar a. Mampuii pawh chuan Lucy a ngainat em vangin a lo duh ve nghal mai. Mahse, thutlukna siam theitu a ni lem lo a. 

Zanriah an ei laiin Lucy thusawi chu a sawi chhawng leh a. A nu leh a û chu an inmelh zauh ringawt. A dik adik chuan an in luah mek hi chu a tê ve deuh zawng a ni. Mipa naupang pahnihte hi an lo len ve hunah phei chuan in dang luah tur hi chu an la zawn hrim hrim a ngai dawn sa. 

"Engzat man nge in in chu? " Ruatfela chuan a ti a. 

Lucy chuan, "4000-in an luah thin a, mahse, nangni chu 2500 velin in luah dawn nia" Lucy chuan a ti awlsam êt a. 

A nu chuan, "Ngawi teh, i pa ten an remti ngawt nang. " a lo ti vat. 

"Nu Zual, ka pa te fanu neihchhun ka nia, ka sawi apiang chu yes a ni mai. " nui chungin a lo ti hmiah. Ruatfela chuan Arini a hre chhuak zawk. Lucy nen hian inanna riau an nei tih a hre chhuak. Mi hausa fanu, awm chin tawk hre lo, in chhungkhura thuneihna nei ve tho si an ni tih hi. Lucy eraeh Arini ang ema tawrhhlelhawm a ni lo vang chu. A hmel pawh a fel hmel deuh zawk alawm. Arini a ngaihtuah chhuak chu a inthiam lo lek lek, engtin nge a awm zel ang le tih te thleng a ngaihtuah kai hman. Mahse, Lucy'in, "I u chu a va ngaihtuah tui ve " a tih riah a harh zawk. A nui tawp. 

Zanriah ei khamah Lucy chu a haw a. An han sawi khawm a, bawhzui chi niin an hria. Mami te chhungkua hi an tan tha viau mah se, nakinah a dang an la zawn tho a ngai dawn si a. Ruatfela chuan, "Pa Dinga chu keiman ka be dawn nia" a ti a. Remchang hmasa bera insawn chu an titlu ta ringawt mai. Mampuii pawh Lucy rualin class a kal ve thei ang a, a tlin ve hlauh chuan. Chungte chu an aim ve pah a ni. Mi khawngaihna umzui lo thei lo dinhmuna ding an ni rih a, nakinah Pathian zara an duhthusam ang an thlen theih hunah chuan mi dangte tanpuitu an la ni ve em ang chu.. 

Sandra erawh chuan buaina a tawk mek thung. Siaha a thleng tawh tih hriain, Johnson chu Mumbai atangin a rawn thlawk haw nghal a. Kalbosan hlen chu a lo tum awzawng lo a nih hmel. Sunday zan an inkhawm bang chu Johnson a lo thu vang mai. Sandra chu a hamhaih angreng hle. Mahse, hmeichhe mawl tak a ni bik lo va, "Ehe! I lo haw law.. " a ti chul a. 

"Nia, ka rawn surprise duh che a" a lo ti ve mai a. A hmelhmaiah engmah a lantir lo. A hma ang chiah khan a lang, chu tak chuan Sandra ngaih a titha lo a ni. 

Thingpuite an in zawh hnuah, "Ka chau deuh sia, zanin chu ka haw hma mai ang. " tiin Johnson chuan hawn a tum a. Sandra chuan a va thlah a, zawi sup hian, "Mi dang ta i nih hi ka phal i ring reng reng em ni? Tunah chet ka la ţan ang"Johnson chuan a ti ta mai a. Engmah sawi hman rual lohin a kal zui nghal daih. Sandra a hrilhhai hle. A mut thlengin a ngaihtuah a, Ruatfel erawh engmah a hrilh ve lo. A rilru a tihhah a hlauh vangin. Johnson hian a hma pawn a rinhlelh vangin a nghawngah chemte a lo chuktuah ran tawh anih kha.. A mizia leh pawisak a neih lohzia a hria. Chuvang chuan hetia a rawn let leh hi a hlau ta riau mai. An result chhuak vat se, Aizawla awm vat vat a châk tawh. A theih phei chuan Ruatfela nen inruk daih mai a duh rum rum mai. Kha chen a lo zuia a lo kawp tawh Johnson-a awlsam taka a hawisan thei chu amah pawn mak a inti. Inthiam lo deuh mah se; Ruatfela a hmangaihna a nasat èm vangin a inthiam chawp a, mi tih loh dan a ni hleinem tiin a thlir mam hram hram thin. 

Ruatfela chuan Resort a chhuk leh hmain Pu Dinga te nupa chu a bia a. "Kan chêp deuh tlat a, tunah chuan kan la zia viau, nakinah Puipuia te hi an la rawn tlangval chho ang a, kei pawn nupui chhia tha te ka la nei ve ang a, insawn tho kan la ngaih hmel si a" tiin Lucy te in ruah thu leh luah an duh thu chu a sawi ta a. Pu Dinga te pawn an lo hre thiam khawp mai. Sawi hmaih hauh loh tur chu Mami kha a piangthar a, Evangelist team zuiin a zin kual thin. In lamah a awm tam ta lo, Tin, a û khan nupui a ru ve zuai a, inneih tumin tunah hian palai an tir a, an la inngaichang ve mèk a ni. An sawi fel ta bawk a, kar tawp lama insawn tur chuan thu an titlu ta a. Lucy pawh Mampuii chuan a va hrilh ve bawk. Ruatfela pawh chawhnu lamah a chhuk leh ta a. Chawlhhmun an thlenin a chawhmeh lakna thin te in kawtah an ding a, ina an luh dawn chuan chu in atang chuan Judy te nupa an rawn chhuak ve hlawl mai! Dinpuia chuan a en vung vung a, a hre tawh lo emaw buaina a duh lo a ni maithei, engmah sawi lovin a kal nulh a. Judy zawk erawh chuan a melh ngat ngat, Ruatfela chuan, "In dam maw? " a ti ta hram a. Biak loh ngawt kha, a melh reng si a, nuam a ti lo a ni. 

"Dam ve e, nang zawk? " a lo ti zangkhai vah a. 

"Ka dam ve e" a ti a. A luhsan ta a. Eng nge maw he laiah te an tih ve ni? Han zawh chi lah a ni mang si lo. Judy hi chu a theihnghilh kher tawh lo vang, a chhan chu zoram khawvelin mualpho taka an hriat chhan kha a ni miau a. Mahse, phuba lak tumna erawh a nei hran lo. Chunglamin a rawn thungrul ve mai ang chu. 

Chawhmeh te an lak zawhah an kal leh nghal a, tun tum chu Pu Thana a hman loh vangin taxi a hmang ta mai. Fare lah hi a to fû roh a. An resort thlen hma kawiah Arini leh hmannia rawn kal Zorina te a hmu thut. An bike chu a chhia nge ni an lo ding laklawh angreng khawp mai. Taxi chu dintirin a chhuk a. 

"Kha in tha maw? " a va ti a. An rawn hawi rual ţhawt. 

"Hei petrol a zo laklawh a. A zia lo tak tak" Zorina chuan a lo ti vat a. Main road atangin a zuk hla ve leh deuh tawh tingtang si a, motor veivak chu a awm loh hmel.

Ruatfela chu chhukin, "Taxi hian Tanhril-ah han la zuai mai ta che u." a ti a. Zorina chuan, "A lawmawm viau ang" a lo ti vat a. Chawhmeh an phurh nual avangin a hnung lam seat chu thutna a awm lo. An rem hnawk angreng bawk si nen. Taxi ah chuan pakhat chiah driver nen an leng a ni. 

"Arin, min lo ngjak mai ula, kan rei lo vang" Zorina chuan Arini chu a melh a. "Aw a tha lawm" a lo ti ve mai. An let leh ta a. 

Mi pahnih te chu ngawi rengin an thu ta vang vang a. Sawi tur a van bakah an boruak chu a rit ru kher mai. 

Mipa zawk na nâ na chuan, "In lo riak dawn em ni?" a ti ta nge nge a. 

"Aw riak dawn" tha te te chuan a lo ti ve mai a. 

"Min hua em? " a ti ta a. Arini chuan a rawn melh kâwk, za vak lo hian a nui a, "Huat tham i ni hleinem. Ka thin tirim tur khawpin i chak tawk lo" a ti ta a. Ruatfela thinlung chu a na zawk mai. 

"Ni e, ka hria alawm.. Mahse, hrehawm ka ti khawp mai. Thian tha kan ni thei ang chu" tiin beiseina sang takin a melh a. 

"Hei hi i hre lo a ni. Mi tu emaw nen in inngaihzawn hma chuan thian chu in ni thei ang. Mahse, in inngaihzawn hnua in inthen hnuah chuan, engtikah mah thian tha in ni leh thei tawh ngai lo vang" Arini chuan a ti ta a. Ruatfela a ngawi ran mai. A sawi chu dik a ti a, mahse, a der tal pawha thian nih a la duh fan mai. 

"Mahse, i tan engmah ka ni chuang lo va, i natna thlen tur khawpin ka chak hleinem. A ni lawm ni? " A ti a. Arini chuan chiang zet hian a rawn melh a, "Ni e, chuvang chuan ka thian nih pawh chu a tul viau em ni? A lema thian nih der hi ka mizia a ni ve lo. Hmana kan sir ang khan awm la, kei pawh i student angin. Chu chu kan inzawmna awmchhun a ni tawh mai" a ti ta fak fak a. Ruatfela chuan a hmaa thu chu amah aia upa daih angin a ngai hial! A tawngkam tinte chu a puitling lutuk mah mah a ni. Hmeichhe tleirawl dang ang chu nise, an runluihin ţap chungin a awm te pawh an chum mahna. Mahse, chung chu Arini lakah chuan vaivut ang a ni. Engmah chutiang a ti lo. A ti reng nang. Hmana Rinsangi kha a ni tawh tlat alawm. A damchhan ber a innghahna lungpui kha tu emawin a chawisawn daih a, a tan nun chhan tur a awm tawh lo. 

"Chuan, ih, Zorina kha i sas thar em ni? " nelawm deuhin Ruatfela chuan a ti leh a. 

"Ni chiah lo. Ka sawi tawh kha.. Ka call boy ka tih kha" a lo ti a. 

"Khatiang nun kha chu khawngaihin kalsan rawh.. Chhiat belh tawh suh. Enteh, ka rilru atang hian i thi fai vek kher lo, ka la ngaihtuahin i that hi ka la duh em em asin. " a ti ta mial mial a. 

"Ka dam rei dawn hleinem.. Khatin mak ti vak suh. Ka damchhung reilote chu ka duh danin ka hmang ang. Tuman min dang dawn lo" Arini'n a tih mek laiin Zorina te an rawn thleng a. An sawi zawm ta lo. Arini te aiin Resort chu a zuk thleng thla hma a. An inbiakna te kha a rilruah a awm reng mai. Dam rei dawn lo tih thu kha engvanga sawi nge maw a nih le? Chu chuan a awm a tinuam thei ta reng reng lo. Mahse, "Ka thin tirim tur khawpin i chak tawk lo" a tih khan a rilru a tiluhlul ve bawk a, "Ni e, a nun alawm.. Ka ngaihven tawh loh a tha" tiin a infuih a. 

Pu Lawma te nupa pawn hotel thar an luah lut ta. Rinpuii chuan an in atanga vil a duh a, a chhan pawh a papuia chuan enkawltu a nei si lo. Ni lo, a nei reng, a patea fapa Dina te nupa pawn enkawl an inhuam reng, anihna takah chuan Pu tlanga chu a sum leh ro duh vanga enkawl duh an awm nual! A dawm hlumtu in in leh lo leh ro a chang dawn tlat a! Chu chu Rinpuii chuan a hre ve kar a, Hotela awmsan daih chu a hreh takzet. Pu Lawma pawn a hrethiam ve reng mai. Lehlamah amahin in leh lo a nei tawh si lo va, tuna hotel lah a ram a ni si lo. Chuvang chuan amah chuan a riah chilh ang a, kar tawpah a haw thin ang tiin thutlukna an siam ta a ni. A awmna hmunin a zir bakah hnathawk tura a rawih nuthlawi khal leh chhe lo zet Siami avang chuan a tir phat atangin pan a hlawh ta zêk a. A lùn chho ve ta tial tial mai. Pu Lawma paw'n tum nei ranin pawisa a khawl ve thei ang chu. Ruatfela a be zeuh zeuh a, mahse, a chhanna dawn hi a bung mah mah thin. A fapa chuan a be châk vak lo a ni mahna. Biak chakawm ni hek lo le.. 

Sandra chuan buaina a tawk ta chiah mai. Johnson chuan Sandra chhungte bulah inhualna nghet tak neih a duh thu leh a zirna a zawh ruala inneih a duh thu a sawi hmiah mai a. An inngaihzawnna hriatpuitu te vek an ni si a, Tin, an makpa chei deuh tlat tawh bawk. Johnson te chhungkua hi an hausak piah lamah an chhungkaw hnih inzawmna a tha em a, phatsan hni hne chu an tum lem lo. Sandra rilru engmah hre hek lo le, Johnson kal hma ngeia mi dangte hriatpuinaa inhual chu an titlu ta a. Amah Sandra pawh a tling ve a nih chuan a kal ve mai dawn bawk nen. Chu tak chu a nia Johnson chuan a chhuanlam, hmun hran ve veah an awm tawh dawn a. Eng emaw thleng thei te a nih vangin inven nan chutiang ruahmanna chu a siam ta mai niin a sawi. Sandra-in chutiang thu a han hre ta chu a mangang ta hle a. A thiante bak a hrilh thei lo. Ruatfela lah a la be tlang thei lo zui bawk si. Mangang tak a ni. A tawp a tawpah a nu bulah a inpuang ta tawp a. Nu te nge nge hi chu fate nen inzawmna a thûk bawk a, a nu pawh chuan a fanuin ţap zawih zawih chunga a han sawi takah chuan a lo khawngaih ve hle. Mahse, a pa hi mi ngawltawt, luhlul zet a ni a. Johnsona nen an inzui lai renga mipa dang a kawp pawh chu a fanu chungah eng emaw tak ti duh zawk tur khawp a ni tlat si. A nu bula a inpuan zawhah Ruatfela chu a call leh ta a, a tlang ta hram e. 

A lak rual rualin, "Kan chhe ta vek mai. Johnsona nen kan inhual dawn" ţap ţuau chungin a ti ta a. Ruatfela chuan a thu hriat chu a awih lo rum rum mai. Johnson kha a ngawi hmak kha a ni si a, hetia kaw dang hreuh a lo tum vang anih dawn hi a lo ngawih veng veng le.. 

"Engtin nge kan tih ang? " Ruatfela chuan a ti a. A thawk a sak ţalh mai. 

"Ka hre lo, engtin nge ni dawn? Karleh maiah a ni tawh dawn a.. Thih daih ka duh" Sandra chuan a ti a. 

"Aizawlah i lo kal theih i inring em? He lai i lo thlen theih chuan inru mai ang" Ruatfela'n a ti ta. Sandra chuan, "Tihdan ka lo zawng ang. Ka pa hian a hriat vaih chuan min vaw hlum duh ang. " a ti a. Tlem chuan a ippik zualpui a kiang ta deuh e. 

Ruatfela pawh a inngaihtuah nasa khawp mai. Nupui neih tumna rilru a la pu rih lo va, an dinhmunin a zir lo bawk nen. Mahse, a rin aia hmain a neih a ngai dawn ta a nih hmel. Sandra chu mi dang tan a phal thei thlawt si lo va. Engtin tin emaw an khawsa ve nawk nawk tawh mai ang chu. Mahse, a hun a thlen hma chuan a nu pawh a la hrilh duh rih lo. An plan a flop vaih chuan Sandra nen an inkar a tawp a ni mai. He lama rawn awm pawh Johnson khan a phal kher lo vang. A inngaihtuah buai lai takin Peka rak tuar tuar thawm a hre ta phut a. Hmanhmawh zetin a tlanchhuak, Peka chu Pool sirah a lo tlu niaih a, thlabar zetin a rak ruai ruai bawk. An mikhual te ho pawh an rawn chhuak ve vek mai. 

"Eng nge thleng a? Peka, hei i tha em? " tiin Ruatfela chuan a zuk ban a. 

"Ka hlau lutuk, ramhuai ramhuai" a ti chul a. A aw atang pawn a hlau thawkhat tih a lang reng mai. 

"Ramhuai an awm lo. Tho rawh.. Hawh le.. Engmah hlauh tur a awm lo" tiin a kai tho a. An thlir thup mai. 

"Dawra kal turin min tir sia, ka kal tur kha inthlakna room saw a ri dawt dawt a, zanah awm kan phal loh vangin va hauh ka tum a, ka va luh chuan tumah an awm lo. Kawngka ka khar leh chiah ka inher tihin hmeichhia samsei deuh nen kan inhmachhawn a. A hmel pawh ka hmu chiang lo. A lo nui ţhû a. Ka hlau lutuk kha hnunglam zawngin ka tlu ta a. Ani chu huan lam panin a tlan thla daih" thaw hlawp hlawp hian a ti a. Tlangvala pumpa dâwt han sawi ngawt chu a rinawm si loh. Amah hi chiang vak lo mah se; chutiang thila dawt sawia rak ruai ruai kha chu a lem a ni thei tlat lo. Hnathawkho te chuan huan lam chu torch light nen an pan thla ta a. Mahse, tumah an zuk hmu chuang lo. Zan a ni bawk si a, a tuka en fel turin an haw leh ta hlawm a. Ruatfela chu a hawi kual a, mikhual paruk lai an neih bakah Arini te pahnih an ni bawk. Arini te pahnih tih loh chu an kim ţhap. Khaw nge an ni hi an awm tehreng ni.. A room piah lawkah Arini room a awm bawk a tiin a va dak mai mai a. A room chu pawn lamah a lo inkalh thlap! Riak tur kha an ni sia, engtikah nge an hawn a hre miah lo. 

Thil dang han ngaihtuah kual mah se; Sandra bawk a rilruah a rawn awm leh thin. Aizawl a lo phei theih phawt chuan phatsan a tum lo bur. Harsatna erawh an tawk nasa dawn tih a hai lo. An rawn zawng ngei ang a. Patling taka a lo hmachhawn pawh a ngai dawn a ni. 

"Hmela mai mai chu le.. Ka va ngei tak" Arini chuan a ti sar sar a. Zorina chu a hawi kual vak vak, ramhnuaiah an awm mèk a ni. Thil thlen dan chu hei hi a ni. Zanriah an ei khamah khan in chung zawlah chhoin khua an chuan mai mai a, Zorina hi chu Arini thu thu in a awm a ni ber mai. An chhungkaw khawsak hi a sang lutuk bik lo naa inla changkang ve chi an ni thung. A bike man pawh hi an la ba,. Chutia an hawi valh valh lai chuan an piah kil sirah anmahni hnungchhawn zawngin pa pakhat hian phone a hmang a, Arini te an awm ve tih hre lovin a tawng mawlh mawlh mai. A thil sawi chuan an beng a verh a vangin anni pawh an biru ta vat a. Chu pa chu smugler a lo ni a! A hmain he laiah hian a lo thleng tawh a, a drugs thenkhat chu a zin hmasak khan an mansak tawh vangin he lai hmunah hian a thukru a lo nia! Inthlakna pindan hnung-a lei laih khuarah a lo dah a niawm e. Chumi zuk la leh tura heta rawn thleng leh a lo nia! Chu thu Arini ten an hriat chuan a lak hmaa lak an tum ta a ni. Arini chuan a mamawh hran lo, Zorina chuan mamawh tak a ni. Zorina te khawsak dan a hriat ve vang leh hetianga sumdawnna hi a huat em vangin chu pa tihkhaihlak chu a duh ve hrim hrim a. Drugs chu laka Zorina'n a duh dana a thehthang atan ruahmanna an siam a. Tichuan, kha lai hmunah khan an va kal a nih kha. An hmuh hmain Peka khan a rawn hre ta bawk si a, Peka'n mikhual ho bula a sawi an hlauh vangin ramhuai angin an che ta mai a ni. Drugs pawh chu la ta lo chuan huan lamah an tlan thla a, an hah hle ringawt. An chet dan atthlak zet chu an han nuihpui leh rih.. A ho ve khawp mai. 

Sandra pawh chuan a best friend Elim bulah engkim sawiin a niin rem a lo ruatpui ve a. Elim hi Johnson lamtamg a ni thin. Mahse, a thiannu chu a khawngaih bawk si a. Tanpui mai loh chu kawng dang neiin a inhre lo a ni. Sumo ticket a rukin an la a, Nilaini-a chhuah chu an tum ta a. A thawmhnaw pawimawh bak ken pawh a tum lo. Mi dangin an hriat vaih chuan an ruahmanna chu a chhe thei tih hriain an pahniha an awm dun pawn an sawi ri ngam lo. Thawhleh zanah Elim chu a va leng a, Sandra roomah a rukin an insiam ta a. Elim chuan bag chu a ak chhuak ang a, zingah Sandra a pe dawn a ni. Bag aka room atanga a lo chhuah chuan, "Eng nge i ah uaih? " an lo ti hlawm a. 

"Aizawl kan kal khan thawmhnaw kan indah ţwm vek sia, ka rawn la lawk anih hi. Amah lah hian min rawn pek a tum mang si lo" tiin Sandra chu a melh a. An ringhlel lo aniang. An hmelah engmah a lang lo. Elim hawn hnu lawkah Johnson pawh a rawn kal ve a. Sandra chuan rinhlelhawm awm loh hram a tum. A pa te nen an inkawm daih bawk a, a thu ngawi hle hle mai. Chumi zan chu a muhil hleithei meuh lo. Zinga walk thin a nih bawk avangin walk tur angin a chhuak ang, an ringhlel dawn lo ber. Alarm a ri ral ral a. A thi vat. A mit a thip hle. A muhil mang si lo va. A insiam sawk sawk a, room atanga a chhuah chuan a nu leh johnson an lo thu reng mai. Hlauhthawnnain a bual nghal. 

"I va rawn leng zing ve" tiin Johnson chu a bia a. 

"Nia, ka chhungten i thau dawn tlat. Walk ve rawh min tia, hei ka rawn sawm che" a lo ti sam èt a. Sandra chuan tla vawn vawnin a inhria. A mood a chhe nghal vek. Phur lo zetin Johnson chu a zui chhuak ta a. A ţah a va chhuak tak. Elim te inah pawh chuan a peng ta lo. A vawikhatna chu a chhe ta phawt e. Johnson lah chuan a be surh surh reng bawk si. 

Zanah Ruatfela bulah thil awm dan a zuk sawi a. Mak a lo ti hle. Engtin nge Johnson chuan a hriat theih ang le.. 

"I phone kha a hack a ni lo maw? " a ti ta tawp a. 

"Awii a ni ngei ngei ang. Ani ang computer engineer chuan a tihdan a thiam awm em mai" a rawn ti hluai a. 

"Vawiinah dawrah kalpui teh. Ka ringhlel tlat" a ti ta a. 

Sandra nen an inbiak zawh rualin msg a lo thleng a, a rin loh deuhin Arini msg a lo ni. 

"Ka thi ţèp tawh a. Ka thih hunah chuan, ka room-a Almira-ah diary ka dah a. I lo la dawn nia" tih ringawt hi.. 

Ruatfela chuan a call a, a ring ral thak. Mangan tawh nak alaiin Arini lehzel pawh chu aw… hlauthawng zetin a tlan chhuak a, Hruaia Bike hawh dilin Arini te ina kal tur chuan a ving chhuak ta nghal a. Ti nge maw thih thu ngawt a sawi le? A thih chuan a inthiam thei ngai lo vang. A chang leh min mamawh lo va, a tan engmah ka ni lo bawk. Engah nge hetia ka buaipui reng ni a inti a. Mahse, "He nau hian min mamawh tih a inhre lo zawk a ni. Ka pui lo a nih chuan ka inthiam ngai lo vang" tih thuin a tlang a kawm leh ta nge nge a. 

(Raino ang chiahin ka awm. Ka rai der si lo.. Ka luak reng mai. Min hreyhiam ru aw. A sei thoin ka hria 😢