A tel lovin.. 14

A TEL LOVIN.. (Chapter- 14)

Ziaktu : Toni Râlte

"Tunah khawiah maw a awm chiah" Arini chuan a ti sar sar a. 

Lehlam ami chuan, "Pu Darkhaia colony-ah in hnuai pakhat luahin a awm. Nupui a nei a niawm e" a rawn ti fiah kâk a. Arini a khi sak. 

"Ka lawm e, a hun hman dan kimchang ka hre duh ang aw' a ti leh a. 

"Aw le" a rawn ti a. Phone an dah khap. 

PUC lam panin Mampuii pawh a kal ve chhat chhat a, amah chauh anih vangin a zûm hle. A û-in entrance pe ve tura a nawr tlat avangin hreh ru tak chungin a kal ve ta chawm kha a nia. Ţhiante chu a nei chhunzawm ve leh zel ang chu. A school kalpui te ho erawh kha chuan college dang an tum fur a. Lehlamah an pass tha vak lo hlawm ve bawk nen. A awm ve tho mai. College a thleng thla a, kawm tur nei ta lo chu amahin a thu ve ran mai. Mi chetla chu a thlir vel mai mai a, a piah lawka hmeichhe rual te chu an changkan hmel hlawm hle. An incheina te chu nalh tak a ni, an nui hawr hawr a. An hmel pawh a tha. A piah lawka amah ang rual tho hmeichhe pahnihte pawh chu an inthuamna a changkang tho. Amah a han inen a, Thenzawl a awm laia a nuin instalment-a a leisak ve smart pant dum a ha a, a phuai lek lek tawh. A inchei ve apianga a hak thin vangin. Kawr erawh a û-in Aizawl a thlen tirha a leisak a ha a. A chhuah dawn khan mawi a intih ve tehlul nen, College a thlen meuh chuan a inhmu tê ngawih ngawih. A phone hman lai erawh chuan rual a pawl ve deuh. Uniform hak ngai tawh lo chu a tan chuan hrehawm bulţanna a ni ringawt dawn a nih hmel. 

Ruatfela pawn a nau chu a ngaihtuah ru hle. A nau leh an mikhual nula a ngaihtuah chhawk zak zak mai. Arini lam reng reng a hre chang tawh lo. Bakah Arini'n a rawn be miah lo ve bawk nen. An mikhual nula hming chu Sandra Lawbei a ni. Mara an ni a, an hausa thawkhat tih chu a lang reng mai. A ngoin a vun a nung sar a, a sam chu a kawng thleng vel niin a buang thar bawk. A kawi deuh bawk nen, a sam chu a chawi ve êm bawk lah taka.. A hmel hmai pawh a fuh em em vek, a hnar erawh tlemin tribal tih takah a bawng ve lek lek. Ruatfela mitah erawh vai hnar aia a mawi lohna a awm lo. A hmui sen hiam leh chhah lek lek chuan a tilang sexy thlawt. 

An chhuah dawnah Ruatfela nuih saih pahin, "Zanriah chawhmeh atan chuan sangha ka duh a. A theih ang tiraw? " a ti sap a. 

"Tehreng mai. Lo haw vat ula" a lo ti! A zak ve reng. 

"Kan theih anga rangin kan lo haw ang" a lo ti ve hnâp. A thiante an lo nui a, Sandra hian eng emaw a hrilh pawh a ni mahna. Ruatfela rilruah erawh Sandra a châm reng mai. 

Mampuii pawn tluang takin a entrance pek tur te a pe zo ve hram a. Ama lamah chuan titha a inti ve reng mai. Amah chauh chuan a haw leh hnak hnak a, taxi lak mai tur a awm si lo va, ke in a kal ringawt. A nu leh a û bulah chanchin a hrilh a, a phone a ah that lai tak chuan, "Thiannu, i bag kha a inhawng ania" a hnung atangin a rawn ti a. A lehhawi vat. Amah ang rual vel tleirawl ngo var mai, cher ve angreng tak hi a lo nia! 

"E aw a nih hi. Ka lawm e" tiin a bag chu a siam tha nghal a. 

"I haw dawn mi? " a rawn ti leh a. A lo bu nghat. 

"Kei pawh ka haw dawn alawm. Hawh lo chuang ve rawh" tiin an ep chiaha scooty ding chu a kawk a. Mampuii a hamhaih deuh, "Aa.. Kan kalna tur a inang lo vang" a ti niah niah a. 

"Ka thlah dawn che nia. A la hla si, ni a sa bawk sia, lo kal rawh" a ti leh a. Mampuii pawn thian a lo mamawh ve bawk nen, lawm takin a zui ta a. Chu chu Lucy nen an inhmelhriat dan a ni. 

"I van reh em em, min va be lo thei ve leh" Arini chuan a ti hlak hlak a. Ruatfela a lo tìm deuh. 

"Nia ka buai ve deuh a" a ti ringawt. Arini lakah chuan a inthiam lo deuh. Mahse, a inthunun thei si lo va. 

"Zanin chu ka lo riak thla dawn aw" a rawn ti a. Ruatfela a tho zawk, "Aa.. Aih, a ngai lo. Ka sawi awmzia chu mikhual kan nei nual a, ka ngaihsak hman dawn lo che a, hrehawm i ti ang" a ti bah nak mai. Arini chu a lo thaw hawk ringawt. 

"Bakah ina i awm khan ka ngaih a tha" Ruatfela chuan inthiam loh ngawih ngawih hmelpu hian a ti leh sup a. Arini lakah chuan a rilruin ngaihdam a dil mawlh mawlh mai. 

"Aw, a tha alawm.. Naktukah ka nu nen kan bazar dawn a, tlaiah ka rawn chhuk ang" a rawn ti hram a. A hnial duh ta bik lo. Chuvang chuan zanin hi a pawimawh tawpkhawk ta. Sandra chu a fala hmuha kawm a chak ngawih ngawih. Mahse, bialnu a nei si! Arini'n hre chhuak ta se.. A ngaihtuah zui duh lo law law. 

Sangha an chah pawh a lo thleng a, cook ten uluk mangtara-in an siam ta a. Sandra te pawh an rawn haw ve mek. Thian awmkhawm an ni bawk a, an nui leh ham ham thin. Sandra chuan car chu khalhin, Ruatfela chhe lo a tihzia a sawi leh niap niap a. 

"I melh dan kha a dik lo reng a ni. I duh a nih kha. " a bula thu Emy chuan a lo ti vat a. 

Jenet chuan, "Mawina amah pawn a duh che. A awmdan leh biak danah che khan ka hre vek. Ni ru.. Awii a nuam ngawt ang, hostela kan awm hunah weekend kan va hmang thin ang a" tiin a phar kual a, an nui leh ham ham a. Sandra pawh a ruk chuan a hlimin a phur takzet. Ruatfela rilru ang chiah a pu miau a, mahse, hmeichhia zawk a nih angin chet lak hmasak chu a hreh ve deuh. Lehlamah a inthiam chiah bik lo, bialpa a nei ve tho tlat! Mara ve tho niin Johnson a ni. Kum 2 lai an inzui ve tawh lehnghal, a pa leh Johnson pa chu best friend niin an chhungkua an inpawh in engkimah an inpuitawn thin. An in pawh a inhlat lo. Johnson nen hian tleirawl lai atanga inkawm tawhin, college an kal dun hnuah an inngaizawng ta chauh a ni. A duh ve hle emaw a tih laiin, Ruatfela a hmuh khan a buai chhe vek. Johnson lam renh reng a rilruah a awm tawh lo. 

A best friend, Elim chuan, "Mahse, Johnson hi? " a rawn ti ta khauh reng a. Boruak a reh nghal dûk mai. Johnson-in a duhzia leh a atchilhzia an hre vek, tuna thil thleng mek hi hre ngat se chuan a rawn thleng ve nghal duh maiin an ring. 

Sandra chuan, "Ni e. Chuvang chuan engmah thleng lo mai rawh se" a ti sap a. A rilru tak takah erawh chuan, "Ani chu ka then mai ang, " a ti tho. Johnson nen inhualna angreng an neih te pawh sût mai pawi ti lo khawpa siamtu Ruatfela chu engtiang chiaha tha leh famkim ni tak ang maw?! 

Zanriah an ei lai mekin Ruatfela chu a rawn lut ve chhak. Sandra nen an inmelh lo thei lo. An thiante pawh chuan hrethiam takin an en lo lui ve a. An bulah rawn dingin, "Sangha chu a tui em? " a ti a. 

Emy chuan, "Tui tak a ni. In siam thiam tawp. " a lo ti vat. 

"Chuan vawiin lamah te in va che tha em? " a ti leh a. Written an nei tih a hre ve vek. 

"Ţha a ni mai ang chu.. Pathian zarah kan tlin mai chu kan inring" Jenet chuan a lo ti ve vat a. An fel hle hlawm mai. Sandra erawh a ngawi tlat. A ţawng zak. Ruatfela hmel pawh a melh tha ngam tawh lo. 

An eikham hnuah Ruatfela te chuan an ei ve ta chauh a. A rilrua Sandra a len èm vangin a ei tha thei meuh lo. Eikham veleh a room a pan nghal a. A nu a be zuai. Arini hi a reh daih. Biak tumna a nei hran lo. A awm awmin lo awm anh hmiang. A chang erawh chuan amah chu a inhua, Arini'n a tana a tihsak tawhte a ngaihtuah chuan tuna hetia a phatsan ta mai hi nuam tih lohna a nei. Mhase, Sandra hmel a mitthla erawh chuan a nuam tih lohna leh a inthiam lohna zawng zawngte an bo duak zel. A mak a ni. Mak tak a ni. 

Sandra phone number, Register-atanga a lak kha a hmetchhuak a. A'n melh vang vang, a be châk, a ngam chiah si lo. Eng nge mipa alawm le ka nih le… tia infuihin call button chu a hmet ta hmiah a. A ring ral ral, a ring tawp dawn emaw a tih hnuah a rawn hello puam ta ţâlh mai. Sawi tur a hre leh ta si lo.. 

"A.. Ruatfela ka nia, in mu tawh em? " a ti nawk nawk a. 

"Mu lo ve, ti nge min lo biak? " a rawn ti tliang ral a. 

"Hmuh lawk che ka duh a, a rem chuan, khawngaihin" a ti tlang ta nge nge a. Sandra chu a inngaihtuah aniang, a reh vang vang a, a hnuah, "Aw le, khawiah nge niang? " a rawn ti ta a. 

Hmana Judy nen an inhmuhna in chungah khan Ruatfela chuan a lo nghak ran a. A lung a phu dup dup mai. Eng nge a sawi ang tih erawh a la hre lo. Engpawhnise, a rilrua a awmdan leh a hmuh phat atanga a awmdan chu sawi vek phawt mai a duh ta a. Sandra chu zawitein a rawn pen chhat chhat a, thli a thawt deuh vangin puan nem a rawn bat bawk. A sam a thlah hniang a, a nu ngawih ngawih a ni ber e. 

"Eng nge i sawi duh chu? " Ruatfela pawh melh ngam bik chuag lo chuan a ti sap a. 

Inhum ruh chungin, "Ih maw.. Ka hmuh phat che khan ka buai vek a. Ka sawi thiam lo. Englai pawhin ka rilruah i awm a ni ber. A hrehawm ka ti keipawn" Ruatfela chuan a ti ta mial mial a. Sandra chu lang lo lamah a khi sak. An awmdan inang chiah chu Pathian remruat a ni mai ang em? 

"A va mak awm ve" a ti ringawt a. Inpuan ve chu a chak takzet. Mahse, ani hi chuan Johnson a la ngaihtuah tel hram. 

"Chuan, min duh ve tur pawhin ka ti thei chuang lo che a. Inpuan hrim hrim hi ka duh a, tiang hian ka la awm ngai lo va" Ruatfela chuan a ti leh a. A zâmna te kha an bo ţan mêk. A rilrua awm te sawi chhuak ngam lo tur khawpa dawihzep a ni lo reng a ni. 

"Dik tak chuan, i awm ang chiah khan ka awm ve asin" Sandra chuan a ti ta a. Ruatfela thinlung chu a zuanin a zuang a ni ber. A va hnaih nghal ruak a, "Anih chuan" a ti salh. 

Sandra chu a rawn hawi chhuak pheu a, thla eng zawng zawng nen a hmel chu a ţha takzet a ni. "Ih, bialpa ka nei a" a ti ta nge nge a. Ruatfela ai chuan a la huaisen tal alawm. Ruatfela chuan Arini a ngaihtuah chang tawh miah hleinem. 

"I sawi takah chuan kei pawn ka nei ve" a ti zawi ta sup a. 

"A mak e tiraw.. Ngaihzawng kan nei ve ve bawk sia.. Hetia awm tlat hi" naupangchhia takin Sandra chuan a ti a. Rilru hah hmel takin a thaw hak bawk. 

"Nia, Pathian ruat kan ni pawh a ni maithei asin.. " a lo ti ve nghut. Mahse, ngaihzawng nei ve ve an nihna chuan an kut pawh a suihzawmtir thei lo. An tìm a, mawlhtu an nei tlat si. 

"Anih Sandra, i bialpa chu i then thei ang em? " a dara vuan chung chuan a ti ta a. 

"Ka thei ang a, mahse, amah hian a thei lo vang. Min zawng zel ang" a lo ti tawp. Ruatfela chu a hui pap a, "Kei pawh" a ti ve leh lawi si! An dinhmun a va khirh lulai em. 

"Engpawhnise, khawngaihin ka lo kuah che aw" Ruatfela chuan a ti ta tawp a, hnialna awma a hriat loh vangin Sandra chu a kuah ta chawt a, an inpawm vang vang mai. Inkuah ringawt chu an duhtawk zo ta lo nge an inmelh ngat ngat hnuah an hmui chu a inchuktuah ta nge nge a. Thla eng leh arsi te chiahin an hriatpui tur thil a ni. 

"Chhuk tawh ang. Ka thianten min ngai dik lo vang" Sandra chuan an kal thui zel hlauin a ti tham ţiak a. A aw a lâwi rât mai. Ruatfela tak pawh a thaw a rang a, Arini'n khati khawpa a sawngbawl chung pawha insum thei si kha, Sandra chu chulai hmuna a tawp thlenpui mai hnial lohna a nei thut thut mai. Eng ti zai zia nge ni ta ang le? An room ve ve an pan dawn chuan, Sandra bek tawn tawna chelha kuaidak chungin, "Ka hmangaih che niin ka hria" a ti thawp sup a. 

Sandra chuan a chhang lo. Mahse, a mitmengah Ruatfela a rinzia a lang thung. Chumi zan chuan an intext tlaivar deuhthaw a ni e. Thu ngaiah an kual lut leh zel thin. Hmabak nei an inti lo va, inthlah hlen harsa an ti bawk si. An kawppui te ve ve ţhen turin an han infuih tawn a, mahse, "Thei lo ta se" tih thu bawkin an inhnial chho leh a. Ruatfela hi chuan a hreh hran lo. A hna pawh chân phah ngai dawn se Sandra nen an inzawm theihna a nih dawn chuan engmah pawi a ti lo. Mahse, hmeichhia zawk tih takah Sandra chuan dawihzep chin a nei tlat! A chhan chu Johnson a khawngaihna piah lamah sex a lo hmanpui tawhna chuan Johnson-a rilruah a chhe zawngin hna a thawk thei tih a hai si lo va. Chhungkaw khat ang maia inpawh an lo ni ve bawk nen. Inngaihtuah thata Johnsona biak a duh thu a sawi ta a. Hun pek a ni. Ruatfela pawh hi a inchingfel thei ngût ange maw.. 

"Lawma, Lawmthang, mi tenawmpa, hotel chu ka hmingin dah vat mai rawh. " Rinpuii chu a meng sen râm a. A rim lah chu a ţhing rim hlir. Zingkar atangin inhauh an han ţan leh ta chu a nia. 

Lawma lah chuan chhan enah a en lo nge a ngawihsan hmiah bawk si. 

"Ka sawi chu i hria em? Ka hminga i dah lo a nih chuan kan inthen ang" a ti leh tân tân a. 

"A pawi hleinem" a lo ti hmiah. Rinpuii zawk chu a hrilhhai hle. Lawma hi a bumin a thangkamah a awk emaw a tih laiin mi mawl ber a lo ni hauh lo va, amah zawk chu a bawhbet a ni ta reng mai. 

"I nupui hluite chu va pan leh la tinia.. Chuti khawpa inthen i chak te chuan" a ti leh a. 

"Ka pan lo vang. Mahse, ka pui zel ang" a lo ti hmak. Rinpuii thinrim lutuk ţawng ngaihna hre tawh lo chuan, "Thi rawh" an ti ngawt a! Lawma chuan, "Ka nupuia anga awm i la duh anih chuan khatiang thu kha sawi sawi tawh suh. Min bum emaw i tih lai khan ka lo harhfim lo èm a, tunah chuan min bum leh mai mai tawh lo vang" a ti ta a. Rinpuii tan chu chu thutawp a ni. 

Arini chu dar 10-ah a rawn tho phak chhap mai. Nidangah chuan zing dar 7 aia tlaiah a tho ngai lo tihtheih a ni. Mahse, chuti taka tho tlai chu chhan a awm ngei ang. Ni e, nizanah khan a sa veh lai chângin zing dar 4 thleng a va ţhu alawm. Rinawma hun hman dan a hre tawh a, nupui neiin fa a la nei lo tih te, a pa sumdawnnaah a inrawlh ve tih te thlengin a hre vek tawh. Tin, a pa nen khang kum tam tak chhung khan an lo la inbe pawp reng thin tih lam nen. Chu chuan a thin a tirim zual a, Ruatfela leh a û te thusawi, phuba la lo tura an ngenna pawh a sût leh phah. A pa pawh ukil thiam tak vangin jail-ah hun a hmang lo va, hremna a la pe ve khawp ang. Tumah a kawng daltir a duh lo. 

"Vawiin chu kan bazar dawn ta em? " a nu chuan a lo ti a. 

"Nidangah ni mai. Ka chau deuh tlat. Tlaiah resort-ah ka chhuk dawn bawk sia" a ti a. A college admission an la fel tawh a. College ţan hma chu zalen deuha hun hman a duh rih. A nu pawh chuan tihtur dang a lo nei tho bawk a, pawi a ti hran lo. 

"Resort-ah chuan eng nge i tih dawn? Kal fo lo la ka duh, heta i awm hian ka thla a muang zawk asin" a nu chuan a ti nem leh diai a. 

"Ka chawl hahdam duh alawm. Hetah chuan inleng an awm reng a, ka ning. " a ti hlak. A ni lah tak bawk a, a pa case kal lai nen, rawn tlawn paha rawn leng neuh neuh nen. Reh lai a awm hleithei meuh lo a ni e. 

Chawhnuah a insiam ţan a, Ruatfela nen an inbe khât lutuk chu amah vanga a ngai. Aman a biak loh chuan rawn biak a tum si lo. Bakah a buai ve viau pawh a ni mahna. Hmeichhe dang lakah chuan rinhlelhna a nei hran lo. A ngai tawh a, a bula awma a tawrhna theihnghilha nuih leh a châk tawh a ni. Pu Thana nen Resort lam chu khaw thim hmain an pan ta a. Pu Thana nen hian an inbe thei ve ta viau, a hma kha chuan an insual lo chauh zel kha a nia. A nun a han thlak deuh takah chuan Pu Thana pawn a be chhe duh bik lo. An zuk thlen thlak lai chuan an mikhual ten chaw an lo ei mek a. Ruatfela erawh a roomah a awm. A room kawngka chu a kik dat dat a, a rawn hawn rual chuan, "Barakhaih! Min lo ngai tawh em? " a ti hlut a. Ruatfela chuan a melh run ringawt. 

A awmdan danglam tak deuh vang chuan Arini chuan, "Ti nge engkim a tha maw? " ngaibtuah hmel zet hian a ti a. 

"Tha e, i lo kal thut a, min ţhawng alawm" a lo ti nghut. Lungawi vak lo hmel zawng a pu chiang alawm. 

"Niminah ka rawn sawi vek kha.. A mak.. Chaw i la ei lo tiraw, min lo nghak rawh aw" tiin a roomah a va indah fel te te a. Ruatfela erawh khumah a thu hnawk. A hmabak ko tak avang chuan a chau riau mai. 

Ni e, chhun lamah Sandra te chuan eng em em tihtur an neih loh vangin Resort chu an fang kual a, thla te lain an hlim hle. Ruatfela a tel ve zel bawk. A thiante nen pawh an innelin an inkawm thei fu mai. Tlai lamah Sandra nen chuan hun fal nei leh thei hlauhin an hmabak tur an sawi dun anih kha.. 

"Ţhen ve ve phawt ila, tichuan, nun thar bul kan ţan dawn nia.. Min then thei ta lo anih pawhin tha takin kan hmachhawn ang" tiin thutlukna an siam a. Sandra chuan Johnson a call nghal. 

"John, inthen ka duh a ni. Min hrethiam rawh. Hmangaih dik tak ka tawng a, ka kalsan thei lo" a ti hmiah mai. Johnson chu a reh vang vang hnuah, "I tithei lo, kan thei lo. Kan kal thui tawh lutuk" a rawn ti a. 

"Ka hria alawm. Tunah ka bulah ani chu a awm mek a, John, ka hmangaih takzet a ni. Khawngaihin min kalsan ang che" Sandra chuan intipachang hram hramin a ti a. 

Ruatfela chuan a kut a lo humsak bawk. "Aw le, i tih tlat chuan le.. " tiin phone a dah ta hmak a. Sandra chu a fel theiah an ngai dun a. Rilru chu nuam chiah lo mah se; an pahnih kalkawnga hling leh hnim te chu an sam fai a ngai tlat si a ni. Ruatfela pawn Arini a call ve nghal a, mahse, a ring ral thak. A call lai hi Arini te rawn chhuk mek lai niin a phone ri a hre thei lo a ni. 

"He tah a rawn kal dawn a, kan pahnihin kan lo hmachhawn dawn nia" tiin Ruatfela chuan Arini chu a thawhna neitu nau a nih thu te thleng a hrilh a. A vanduaina erawh a sawi lo. Sandra pawn a remti a, an lo nghak a ni ber. Ruatfela'n Arini hmel a hmuh leh takah khan hrehawm a ti a, Arini tawrhna han thlen leh chu a châk fahran lo hle. Mahse, Sandra pawn huaisen takin a bialpa a kalsan a. Ani mipa zawk chuan a tithei ngei tur a ni tiin a infuih a. 

Arini nen zanriah ei tura an chhuk dun chu Sandra te nen an intawk a. Sandra chuan a rawn melh zawk, hmui phunin, "Nakinah" Ruatfela chuan a ti a. A lo bu nghat. Arini chu an chaw ei chhung zawng a titi siam siam a. A nui hek hek bawk. A hlim takzet tih a lang reng mai si. Ruatfela tan chuan a tihtur chu huphurhawm ve tak a ni. Mahse, Sandra hmel a mitthla a, tih ngei chu a tum. 

An eikhamah a room-a a luh dawnin, "Tihtur ka nei lawk a. Dar 8-ah in chung zawlah inbe lawk ang" Arini bulah a ti a. Arini chuan mak a ti deuh, "Aw a tha alawm. Chumi hma chu eng nge i tih dawn? " a ti hû a. 

"Inziah fel lawk ka ngai a" a lo ti ve mai. 

"In chung kher kher. Ka roomah i lo kal thei tho sia" pangchang zetin a ti a. 

"I hre mai ang. Lo awm rawh aw" a ti sup a. A nui lui sak bawk. A roomah a luhsan ta a. Chhuatah a vei sek, a rilruin a tawngtai bawk. "Lalpa, Arini hi farnu ang bakin ka en thei si lo va, khawvel dan anga ka kawppui tura i thlan nia ka ngaih Sandra tan tunah hian ka tina dawn a ni. Khawngahin thil tha lo a tih loh nan tanpui hram ang che" tiin. 

Dar 8 a ri ta. Sandra nen in chung zawl lam panin an chho ta a. Ramhnuai ngaw dur khup lam hawiin Arini chu a lo ding vâng bawk. Ruatfela chuan thawk a la vang vang a, Sandra hmel melh leh zauh pahin, "Arin" a ti a. 

A rawn hawi vat. An pahniha an ding dun a hmuh rual chuan a nui hmel chu a reh riai riai mai. 

"Ti nge" a ti hû a. Ruatfela chuan a aw a thian kharh. 

"Ih, thil pawimawh deuh sawipui che ka duh a. Hei hi Sandra a nia. Ani nen hian kan inhmangaih a ni" a ti ta a. A aw chu a ri chang chang a ni ber, Arini bengah erawh a ring viau ngei ang. 

"Maw.. I uang ami? " a lo ti leh a, awmze nei lo zetin a nui hak bawk. 

"Ka uang lo, Sandra nen hian kan inhmangaih a, ka bialnu a ni tawh. Chuvangin nang leh kei chu thian ang bakin kan awm thei tawh lo a ni. Puih i ngaihnaah chuan ka pui zel ang che. Mahse, thian tha angin" Ruatfela chuan a ti ta khawl khawl a. Arini chuan a sam a chul a chul ringawt. An pahnih chuan a melh tawn sek a, a la ringhlel tih a lang reng mai. 

Sandra zawk chuan, "Pawi ka ti lutuk. Mahse, kan inhmangaih miau si a" a lo ti ve a. Chutah zet chuan Arini chuan fiamthu mai a nih lohzia a hrethiam ta a ni chêk ang, a tawlhnung a, a hmel chu hrilhhaina in a tuam khat tlat a ni ber. 

"Min ngai dam rawh aw. A ruka kawp chea tihnat che ka hreh vangin thudik ka sawi ta tawp a ni e. I duh phawt chuan ka hna atang pawn min bantir mai dawn nia. Ka laka i tih duh apiang chu ti rawh, ka dem lo vang che" Ruatfela chuan tumruh hmel takin a ti leh a. Arini chuan a lu a lo thing nar nar, "Ka.. Ih, ka hre lo, engmah.. Engtin nge " a ti bah nuaih a. A kut chu awmze nei loin a vai vak vak bawk. 

"Khawngaihin i nun tihchhiat nan hmang suh aw" Ruatfela chuan ngenngawl zetin a ti a. 

Arini chuan thawk la vang vangin chunglam a melh a, chutah a nui sak. An lam rawn hawiin a rawn pan hnai a, "Ka tha e.. Ka tha.. " a ti sap a. Koh hman rual lohin in hnuaiah a tlan thla nghal. An en zui vang vang ringawt. 

Khumah a bawk thlawp a, a room chu sound proof vek a ni bawk a, a tet laia pawngsual a tawh tirha a ţah ang chiah khan chhuak em emin a ţap ta hlawp hlawp a. Lukham chu chumin, "Ti nge a tirah khan min hnawl mai loh? Ti nge min lo duh ve? Mawh.. I va sual ve" a ti nawk nawk a. A mittui chu a sur zung zung mai. Chutah insum tumin a zangthal zawngin a mu a, ceiling melh vang vangin, "Tihtur pakhat chiah ka nei ta. Chumi zawhah chuan ka dam ve reng hi a ţul tawh lo. Phuba lak tur nei lo ila chuan tunah pawh ka thi nghal ang" a ti ţiau a. Rinawma laka a tihtur a hlen hun hunah thih chu a tum nghet ta bur mai. A hma kha chuan Ruatfela vanga damchhan nei anga inngaiin a phuba lak dan turah pawh a buai thin. Mahse, tunah chuan buaina a nei ta lo. A tawp vek tawh. Rinawma a that ang a, ani pawh a thi ve ang. Chu chauh chu khawvela a la chen ve chhan a ni ta. 

Ruatfela leh Sandra te pawh an hlim bik hauh lo. An mi tihnat te avanga nuih chu thil theih ni hek lo. Anmahni room ve veah tawmin, an ngaihtuahna an kawm melh melh a. Ruatfela chuan a thutlukna chu a dik loh a hlau ngawih ngawih. Amah vangin Arini hian mipa mutpuiin zu te rui lehin a chhhia zawng zawng fawm khawm leh ta se?! A enliam thei ang em? A thinlung chhungril tak atanga khawngaihna chu Arini'n a chang vek. Mahse, a hmangaih niin a hre si lo. Sandra chu chân tur leh hloh tur anga a han ngaihtuah lahin a na ngut ngut bawk si. A thu chhuak hlawl a, a riin, "Lalpa, engmah ka hrethiam tawh lo. Min pui hram teh" a ti ta tawp a. A tlaivar chiang khawp mai. 

A tukah Sandra te chuan personal interview an hmachhawn dawn a. Ruatfela thawh ve hmain an inpeih fel vek, an kal tur a va nang hman hram. Duhsakna a hlan a. An kalsan nghal. Arini hmel hmuh tur a awm lo. Ani hi tih loh loh te hi a lo ti em ni le tiin a ngaihtuah a, a roomah a va kal, pawn lamah a lo inkalh si. Chokaah a awm bawk si lo, Peka chu a zawt ta tawp a. 

"Nichin lawk khan huan thlang lamah a chhuk" a lo ti a. A thaw huai mai. Mahse, eng nge huan thlang lamah a zuk tih ang tih a ngaihtuah leh. Zuk kal ve mai tur em ni ang tih a ngaibtuah laiin Arini ngei mai chu serthlum pum eng emaw zat ak chunginna rawn lang heu mai. 

"Serthlum ka zuk lo va, a lo tla nasa mai. Lawhtir tur a nih khu" a ti siam siam a. Zan lama thil thleng khan amahah engmah a thlen lo ni mai awm hian a lang. 

"Nia, ka zuk lo dawn nia" Ruatfela chuan a ti a. 

"E chuan, Tlai lamah mi pakhat a lo thleng dawn a. Chaw kha in lo kep dawn nia aw.. " Arini chuan a ti leh sar sar a. Ruatfela mitmenga maktihna chu a ngaipawimawh lo aniang, en pawh a en lo. 

Chhunah Ruatfela chuan huan thlanga serthlum chu Peka nen an zuk lo va. Hralh suma chantir theih pawh a ni naa zuartur an awm si lo va. An insem ringawt. A chauh ve em vangin dar 2 velah a muhil a. A mutui kher mai. Arini erawh poolah te chuan amaha chengin amah leh amah chu intihhlim tum tih hriat takin a inbe mial mial reng a, chawhnu lamah erawh intifaiin, a roomah a tawm ve thung. 

Sandra te interview pawh a hma ang bawkin an titha tlang ni tur a ni. An hlim hmel em mai. An inbual sawk sawk a, an ril a tam tawh bawk nen, zanriah an zuk ei a. Ruatfela pawh a lo awm tawh. Sandra nen chuan tìmna awm tawh lem lovin an inzawmna chu an tilang ta mai. Hnathawk ho pawn an hre fur tawh. Sandra chu hmel tha an lo ti ve nasa mai. Khaw thim tawh hnuah bike a rawn tlan lut a, Ruatfela chu a va chhuak vat. A la hmuh ngai loh mipa hleitling tak hmel tha tak a ni a. 

"Arini mikhual ka nia" a lo ti nghal var. 

"Aw.. Chaw pawh a ei theih nghal aw" Ruatfela chuan a lo ti ve mai a. A lo buk khum nghut. Arini roomah innghat vein a inbual fai zawhah chaw ei tur chuan an chhuk dun a. Choka bula common roomah chuan TV enin Ruatfela te leh Sandra te ho chu an thu khawm thap. 

Arini te pawn an ei mial mial. Han en mai chuan unau te pawh an nih duh hmel. 

"I lo kir leh hi ka lawm" Zorina chuan a ti a. Arini a lo khi ver ver. An ei zawhah ngawi rengin an inzui chho leh. Mahse, Ruatfela chuan a hmu vek. A chhan sawi tur awm si lovin a lung a awi lo ru tlat! A awmdan chu a duh lo. Arini chu a tina a, a duh angin a nun a hmang dawn a ni mai. Chutah chuan telve na leh mawhphurhna a nei tawh lo. A ngaihven pawh a tul tawh hek lo. 

Sandra nen dar 11 thleng dawn an inkawm a, an tum loh deuhin an mudun lehnghal. Virgin tawh lo ve ve chu, an inhìp tawnna a chak bawk nen, an inthunun hman ngang lo a ni e. A rooma Sandra a va thlah zo a let leh tur chu, Arini tui la tur nen an intawk a. 

"A nuam bawk em? " Arini chuan a ti zauh a. 

"Nawmna tur a awm mi? " a lo ti ve ringawt. 

"Min hmangaihtu leh kan hmangaihte bula awm chu a nuam ang chu" a lo ti chat a. 

"Nia, nang pawh a nuam em?" Ruatfela chuan a ti ve a. A nui bawk. 

"Ani te chu ka call boy alawm. Ka mamawh chang apianga lo kal thin mipa" Nui sâwng chungin a ti a, a kal kiang nghal. 

Ruatfela chuan a thlir zui vang vang a, "A hma ang bawkin maw? " a ti sup a. Arini erawh chuan a hre pha tawh lo. 

(Kut a kham hma ta a nih chu 😆😆