A tel lovin 13

A TEL LOVIN.. (Chapter- 13)

Ziaktu : Toni Râlte

An ri hak mai. Nancy leh a nu chuan makti em emin Arini chet dan chu an thlir a, Rinawma lah kalsawn mai a tum der lo. A hlau pawh a ni mahna. A kawr awmah a va ţham a, "Hawh le," a ti ram hmak. Chutah erawh chuan Rinawma chuan a kut chu a vai thlaksak a, "Tu nge i nih a? Enhvangin nge hetia min tih ngawt? " a ti tuar a. 

"Rinawma i ni tih ka hai lo. Nu, en rawh. He pa hi i la hria em? Hmana kan ina rawn awm, Thingtlang atanga rawn awm kha a nih hi.. " tiin a nu lam a hawi. A nuin thlek chian tuma a va pan mek lai chuan Rinawma chu a tlan ta mai a. Arini a rak ţhawt, Police ho chu a ko chul a, "Sir, misual a nia. Khawngaihin min mansak ru" a ti a. Police ho lah an hamhaih ve nge an muangchang viau. Arini chu a thinrim kher mai. A pa an va hmuh pawn engmah a sawi lo. A pa chu ukil tha ber an rawihsak ang a, a chhuak leh thei mai ang. Mahse, Rinawma avangin Arini chuan eng dang mah a ngaihtuah thei tawh lo. He khawpuiah hian a awm tih a hria a, inhmuh hun zawng an nei leh khawp ang. Police tel lo va amah ngeia a hmabak hlen chu a tum bur mai. Tin, tuma bula sawi a tum hek lo. 

An result chu a chhuak ta bawk a. Distinction-ah pass-in English leh Geography-ah letter mark a hmu. Han inzir deuh phei se chuan top ten-ah Arts stream-ah a lang phak maithei. A result vang chuan lawm pawh a lawm lo emaw tih mai turin chumini chu a ngui. In an thlen veleh a nu chuan a û nen a ko a. Nancy hi chuan engmah a la hre ve lo miau a ni. 

"Rinawma kha a ni tak tak em? " a nu chuan Arini a melh ran a. 

"Kha zawngsena kha ka that khawp ang" a lo ti ngal ngal. Nancy chuan a ngaihna a hre lo kher mai. Mahse, a nu chuan Arini naupan laia thil thleng chu a sawi ta a. A pa hrilh dan angin a sawi thung. 

"Rinawma kha i pa pawn hrem tumin a zawng reng a, mahse, a lo tlanbo daih tawh a. Hrehawm a ti lutuk asin" tiin a tlip a. Arini a ner nâwng ringawt. A ding nghat a, tukverh lam hawi chungin, "I pasal thusawi kha awih suh. Ka pa khan a tir phat atang khan hremna pek a tum lo hrim hrim, zawn pawh a zawng hek lo. Zawn ngai lo turin police a ko nghal thei. Mahse, a ti lo. Chuvang chuan keiman hremna chu ka pe mai ang" a ti sak sak a. Nancy chuan, "Mate, ka hrethiam che. Ti nge i va thup rei ve. Eng emaw vanga sual kawng zawh ta emaw i nih chu ka ring thin a, mahse, khatiang kher a nih kha chu ka ring pha miah lo. Ka pa chu a dik lo hul hual a nih chu.. Rinawma a hum chhan kha a awm ngei ang. He Rinawma hi tuna an sumdawnnaah pawh hian inrawlhna a neih ka ring ta khawp mai" a ti ta hmiah hmiah a. A laizawnnu chu a ţan hle tih a lang. Mi dik kha a ni miau a. 

A nu erawh a ngawi reng. Han sawi vak tur a hre lo aniang e. Nancy bawk chuan, "Mahse, Mate, phuba lak kher a ngai lo aw. Danin a hrem mai tur a ni. I hmu anih pawhin dan chunga leng tumah kan awm lo tih hre reng rawh aw" a ti leh malh malh a. A nau rilru chu hneh tak ang maw.. 

Ruatfela pawh a za sek mai. Arini pa chungchang an ziah te chu a chhiar nawn tlut tlut a, lehlamah Class Xii result chhuak tur chuan a kap ţûn bawk. Result an rawn dah rualin website a tlawh nghal a, a farnu result a en hmasa ber. First division-ah a pass ve hlauh mai le! Chumi hnuah Arini a en ve leh. A rin ang ngeiin a ti tha khawp mai. A nau pass chu a lawm bawk a, amah chauh pawn a khi vur vur reng mai. A han call nghal zat a, ani pawn a lo hre ve chiah a, an unauin an rak nasa mai. Mahse, Ruatfela ngaihtuahna chu a buai. A nau pass lawm nan chuan eng nge a leisak tak ang? Phone chu em ni ang? Phone a lei chuan an khawsak a buai phah ngei dawn tih a hai lo. Mahse, a farnu neihchhun a ni tawh a, a awh ve ngawih ngawih han tihsak loh chu a hreh bawk si. Nancy tihbuai lah a zakin a inthlahrung tawh ngang si. Anih nih ni mai teh se tiin hlawh a lak veleh a nau phone leisak chu a tum ta a. A nu erawh a hrilh hran lo. 

Arini erawh khumah a mu kawm leh chial a. A taksa za chhuak vek chu maimichhing chungin a tuar tawp. A mittui a rawn luang ngiai ngiai a, a taksa hnuailamin a nawrna chu a nasa mang e. Ruatfela a ngaihtuah a, a bialpa a ni tawh a. Phatsan a duh si lo. A duh phawt chuan tu emaw koin a buaina chu a chingfel thei. Mahse, Ruatfela hmel a mitthla a, harsa a ti takzet a ni. A tho thut a, Almira hawngin a zu thuhruk chu a la chhuak a, Khum bula dawhkanah chuan no ah thli chhuakin a thawk khat piap mai. A pum chu a sa thla ham ham a. Tlaiah khan chaw pawh tih tham a ei lo, Rinawma vang zel a la ni. Resort-a riah thlak lam pawh a lang rih lo. A lo riak thla lo chu a inchhir lek lek. Ruatfela bulah awmin a harsatna chu a chinfelsak thei reng awm si a. Ni lo, chutiang zawngin Ruatfela a ngaihtuah tur a ni lo. Ani chu mipa thianghlim a ni a, a nun a tihchhiatsak ve tur a ni lo. 

"Nu, ka chhuak lawk dawn. Ka rei lo vang. Johny nen inbiak kan ngai a" tiin a nu sitting rooma lo thu mek chu a hrilh a. 

Hlauhthawn hmel zetin, "Baiwhte, chhuak lo hram rawh. I pa hetiang dinhmunah a ding tawh a, nang lehzel chuan timualpho nawn tawh suh" a rawn ti ţuau mai. A nu chu a khawngaih. Mahse, a chhuah a ngai. 

"Ka rei dawn lo, engmah ka ti dawn lo" a ti sap a. Auh hman lohin a chhuak zui nghal. An awmpuite an fel tho va, a nu chu an lo enkawl tha tho vang. 

Kal tumna bik pawh nei lovin a chhuak tawp, a tlan a tlan a. WBR lamah tlanin amah ang rual lo leng te pawh a hmu nual. Hmun pakhatah a chhuk a, a ding vang vang. Eng nge hetah hian a tih tih a ngaihtuah a, a inhua a, a inten bawk. Harh thut niawm takin a bike-ah a lawn leh tharh a, Ving takin Tanhril lamah a tlan thla ta vang vang mai. Thim a hlau lo va, ramhuai pawh a hlau hek lo. Hetianga a awm apiang hian a mangang a, tihtur ber hre loin a za kual sek thin. A thiante tumah a share thei si lo. Ni e, mipa an ni a, rilru eng emaw an pu thei tlat. Pawngsual tawk zawng zawngte hi an ni ve vek ang em le tiin a ngaihtuah thin a. Pawngsual nih pawh a nat tawh tehlul nen, piansual zuia mipa khawih hlek pawh zat pui nghal zel hmeichhe nih hi hremhmun ang mai a ni.. Gate chu an lo kalh vek tawh a. A reh ţhap mai. 

A phone phawrhin, Ruatfela number chu a dial ta a. A la thei lawk lo zui! A tawp a tawpah a rawn la hram. A lo mu tawh a lo nia. 

"Gate bulah ka awm. " a ti nghal tâwng. 

"Ehe! Ti nge.. A va buaithlak thin tak" tiin a tho ţuah ţuah a. Ani hi a rui lehpek em mawni le tih a ngaihtuah. Chabi khaiin gate lam chu a pan a. A va hawnsak. Ruih a nei a ni tih chu a va hmu thiam nghal. A lungawi chiah lo hle. A pa hetiang a nih lai laia hetia a awm leh thei mai hi.. 

Room pana an kal laiin, "Eng nge a chhan? " Ruatfela chuan a ti a. 

"Ka ngai che a" a lo ti hmiah. Ruatfela roomah zawk an innawr lut a, eng sawi set set lovin Ruatfela chu a fawp nghal bawrh bawrh. Ruatfela'n a fawh let ve takah phei chuan a taksa chu zahpuiawm khawpa nasain a za chhuak vek a ni. A mitmeng dava zet chuan a han melh a, Ruatfela chuan mak ti hmel pu deuh hian, "I tha em? " a ti sup a. 

"Tha lo. Ka that loh vang alawm ka lo pan che" a ti ta khawl mai. A hrethiam ta deuh. Mahse, tun hun hi inthunun zirna hun remchang tak a ni tih a hrechhuak nghal. Amah Arini a ìt loh vang ni lovin, a mutpui a nih chuan nakinah a aia nasain an la chesual fo ang a, an duh ang leh beisei ang nun pawh an hmang pha lo vang. Chuvang chuan a fuih zawk tur a ni. Khumah a nam ţhu a, chhuata tei chungin, " Tun hun kha i tan inzirna leh inthununna rahbi tha ber a ni. Enteh, i hneh thei, Arin, i tithei a nia" a ti mawlh mawlh a. Arini erawh a thu ngawi tlat. Chhuat lam a bih ngar bawk. 

"Piangsual emaw i intihna khan a kaihruai hneh tawh lutuk che a, piangsual tak tak angah i inngai tawh a nih kha. I piangsual lo. I tha vek. Pawngsual i lo tawk tawh a, i vanduai ka hria.. Mahse, kha thil avang khan i vawiin hun hi chu tihchhiat belh tawh suh.. Khawngaihin, ka pui zel ang che. I tan mipa tha ber ka ni zel ang. Kan hneh thei" tiin Arini kun reng chu a va kuah a. Ani erawh a la chechang chuang lo. 

"Mi hur i ni lo va, mipa mamawha tuihal thin i ni hek lo. Hmeichhia zawng zawng hi an menstrual cycle azirin chak loh hun an nei vek alawm. Chumi avang chuan an va tluk phah kher lo. Nang chu hman atangin mipa mamawh tur leh tuihal turin i inngai tlat a, kha khan a thunun tawh che a nih kha.. Tunah chuan thlamuang deuhin awm tawh rawh aw" tiin a kuai dak a, a chalah a fawhsak leh. Arini mittui luang ngiai ngiai chu hruksakin, "Dam i duh tak tak anih chuan min ring thei ang" a ti leh sup a. 

"Ka tenawm tiraw.. Ka va bawlhhlawh tak" a rawn ti hlawl. A ngik faih faih bawk. A zu in kha a la thawk ve deuh bawk nen. 

"I tenawm loh a, i bawlhhlawh reng reng lo. Hmeichhe tam tak aiin i thianghlim zawk. " a lo ti leh hmiah. Ruatfela chu a tan chuan pa ang mai a ni. A angchhungah chuan him hliah hliahin a inhria. Chumi zan chuan infuih mawlh mawlh chungin khum khatah an mu dun a. Ruatfela insum theih zan ber a la ni hial ta ve ang. Mipa a ni ve tho si a, mahse, amah pawn a hrethiam lo. Arini hi nupui atan a duh hran lo, a hmangaih pawn a inhre lo. Mahse, a farnu angah a chan thin a, a khawngaihin chhanchhuah a ngai in a hria a. Chuvangin a zui ni maiin a inhria. He a saltanna atanga a khai chhuah hunah chuan mipa tha tak tawngin pasal tha tak nei se a duhsak. Mahse, Arini chuan a tihlim ve tawh reng reng a, a chezia, a titau leh a nui hmel hmuhnawm a tihzia atang hian chhanchhuah mai lo pawh thil dang chu a awm ngei ang. 

Pu Lawma te pawh an hotel tur an la sa ve zel a, hnathawkho a vil thin. Rinpuii kutah sum zawng zawng a dah ngam tawh lo ţan. Bank-a thawk a hmelhriat pa bulah a harsatna te sawiin Rinpuii ac-a pawisa chu a Ac-a transfer sak turin a ngen a. Ani a hmelhriat pawh chuan Rinpuii awmdan leh zia avangin a lo hlauhthawnpui ve bawk nen, remchang hmasa berah an transfer ta a. Rinpui'n a hriat chuan a thinrim teh e. Rapthlak tak takin a ankhum a, in atangin a hnawtchhuak bawk. Pu Lawma lah nem duh bik miah loin an hotel sak mekah a va awm ta daih a. Ni hnih vel a awm hnuah Rinpuii mangang leh si chuan a rawn kohtir a. A haw ve leh mai. A nupui fanaute luahlantu hi chutimaia ineiraltir a tum bik hauh lo.,,zu pawh a hma ang em emin a in ta lo deuh. A dam rei a ngai tlat. Inchhir ang chuan lang duh lo mah se;Kar lova Rinpuii mizia a hriat tak si avangin a inchhir tih loh rual a ni lo. A zakin hrehawm a ti a. A hmaa an awmna vengah phei chuan a kal ngam der lo. Tumah a hmu ngam lo a ni ber. Chuvang chuan a nupui leh fate a tina ta sa sa a, an tan eng emaw tal hnutchhiah a tum ran a. Hotel hi an peiha an luah hunah chuan Ruatfela hminga dah a tum ru ran mai. Mahse, Rinpuii nen an inneih reng chuan a thei kher lo maithei. A in hralhna hmanga a sak a nih vang erawh chuan a huaisen deuh. Mampuii pass te pawh a hre ve a, awmhmunah a lo lawm ve em em mai. Han biak emaw tumna erawh a nei ngam lem lo. 

Weekend a ni bawk a. A haw ve a. A naute hi chu eitur eng emaw hawnin an lawm em em zel. Hlawh erawh an la la lo va. Zanriah an ei laiin, "Û, phone chu" inthlahrun hmel deuh hian Mampuii chuan a ti a. 

"Mampui, i la awm theih tho chuan nawr rih lo la, college admission tih na tur te pawh dah that a ngai dawn asin" A nu chuan a lo ti vat a. Mampuii a ngui nghal vek. A awm ve bawk a, tun laiah tleirawl te te pawn an hum vek tawh. Nei lo bik nih chu hrehawm tak tur a ni. Ruatfela chuan a hrethiam em em mai. A nu rilru tur pawh a hrethiam tho. 

"Hlawh kan la la lo va, lo lungngai lo phawt la aw.. " a ti a. A nau tihlunghnur chu a hreh em a ni. An te ber chuan, "Û, kei pawh JCB lian tawk ang kha min lei ve la" a lo ti a. 

"Umm kan lei ang. Kan lei dawn chiang" a lo ti var a. An khawsak dinhmun pawh a pangngai chho naa, a naute pahnih school admission atan eng emaw zat an hmang tawh a, Sawrkar school-a luhtir dawnin an awmna veng school chu a chhe lulai lutuk a, veng dang school lah a hla bawk si. An la naupan bakah chinchang engmah an hre ve vak si lo va. Chuvang chuan an thenawm lawka Private school-ah an kaltir lo thei ta lo. An principal a fel hlauh zawk a, an dinhmun te hriain, Puipuia fees chu a half-in an laksak nghe nghe. An zirlaibu leh uniform nen. Mamawh a tam si a, chawhmeh leh engilo ngaihtuah ve reng ngai bawk. Ruatfela hlawh ringawt chu a tawk zo lo a ni. A nu kuhva siamna hi chu bawlhhlo leh inchhung mamawh te tham deuh atan an hmang a. Ruatfela chuan pawisa khawl duh ve viau mah se, tunah rih chuan a tan tihngaihna a awm rih lo a ni ber. 

Arini nen an intext kal reng a, "I nau chu ka college kalna turah kaltir ve ula, kan inkawm thin ang a" a rawn ti a. Ani Arini chu PUC-ah kal a tum. Ani chu a tling chiang saa ngaih a ni. Mampuii erawh 1st chauh a nih vangin entrance pek te a ngai ang a, a tling kher ang e maw le. PUC- luhtir chu Ruatfela pawn a duh ber a ni. Hautak deuh mah se, a nau tal hi chuan sawrkar zèm a zen tur a ni tih ngaihdan a nei. Mizoramah chuan sawrkar hnathawh hi kan tum san ber a ni miau a. Mi ram anga private company-a inhlawhna tur tha tak awm ve hek lo. 

"E taka, Vawiinah Judy ka hmu asin" Arini chuan a rawn ti leh hlawl! Miss Judy pawh a ti duh tawh lo aniang. 

"A ho.. Sawi lo vang" Ruatfela'n inhauh leh hlau zetin a lo ti vat 

"A thiannu nen an nia, a cher rap mawle. A chhe tawh tawp. " a la rawn ti hram. Ni e, Judy kha engtin tak awm zel maw? Ruatfela ngaihtuah loh lam tak a ni tlat. 

Arini pawh chuan Ruatfela be chung reng chuan mi pakhat a be pah reng a. Chu pa chu Aizawl chhuah lama cheng, private detective a ni. Valte tia koh a ni nghe nghe. Arini'n a rawih chhan chu kan hre vek awm e. Rinawma a zawn chhuahsak ang a, an hmuh huna chet lak dan tur erawh Arini chuan a ngaihtuah fel vek tawh. Amah ngeiin hremna a pe ang. A thinlunga ser reh thei lo hnutchhiahtu hi a dam rei tawh mah mah a ni. Ruatfela hi tawng lo phei se chuan Rinawma a thah zawha thih ve nghal mai a duh hial ang. Mahse, dam chhan nei ve tawhin a inhria a, Ruatfela chu mipa danglam tak niin a tan a hlu a ni. Mahse, buaina a nei. Rinawma a thah chuan Ruatfela hian a pawm leh duh ang em? Tih hi. Police kutah hlan ta se, damchhung tang turin hrem pawh nise, he lai damchhung chu kum 12 lek te a nia! Chuta karah Jail-ah senior te chu an lalin an nuamsa em em bawk. Chu chu hremna tiin a sawi thei lo vang, a duh dan chuan Rinawma hi thih chak ngawih ngawih, dam reng ngai siin awm se a duh. A huatna lah chu a pun belh sauh zel lehnghal. A pa case chu chhetemahin a ngaihtuah lo. A pa pawn khuarkhuruma thlak a nih lai khan a tuamhlawm bik hleinem tih ngaihdan a nei hmiah mai. 

Resort-a a kir leh hmain Nancy a va hmu zuai a. A koh vang a nia. 

"Hei ka zin dawn a, resort khu i kutah ka dah ania. Chuan, hlawh hi ka pe nghal mai ang che. Eng chen nge ka thang dawn ka hre lo va. Chuan, ka nau hi khawngaihin farnu angin lo enkawl la, lo ngaihven hram rawh aw" tiin a chah malh malh a.

Hlawh chu a pe a. "E taka, Arini'n i nau pass thu te min hrilh tak a, eng emaw i leisak duh ka ring a, hei bonus aw" tiin envelope var hi a rawn pe tel a. Ruatfela a hamhaih hle. 

"A ngai lo, ka tan hian i tha em mai. A tawk tawh" a lo ti vat a. Mahse, Nancy chuan, "La mai rawh. Thil dangin kan inpui thei si lo.. Chuan, resort chu tha takin i lo enkawl dawn nia aw" a ti dam thlap a. A pasal a lo lan vangin Ruatfela pawh a chhuak zui ngjal. Thil thlawnpek dawn fo chu zahthlak a tiin a inthlahrung zozai tawh. Mahse, Pathian hian a mamawh hunah a rawn pe chat zel ni hian a hria. 

Envelope chu hawngin pawisa chu a chhiar a, a thaw hawk ringawt. A vaiin 20000 chiah chiah. Mampuii phone leina chu a daih zân mai. Engtin nge chutiang zah zah an pek phal le.. Mahse, le nia an hausa em a. An ni zawng nuai bi-ah an kai tawh tlat a tin ni. Hlawh lah kha thla khat hlawh a pe lawk nghal si a, pawisa a ak ta nual mai. A cash khera dawn a duh chhan chu bank dawrna hun te hi an nei ve mang si lo va, a ATM dil ve lah a chhuak har bawk si. Chuvang a ni pakhat. Mahse, tun tum chu a nu hriatpui lohin a then a zar chu bank-a a dah luh a ngai dawn a ni. 

Mampuii phone pawh chu a va en nghal thut thut a. A sarhu laia a leisak vat loh chuan a ti ve a ni. Amah pawhin a awh ruk em em, a neih phaka a dah ngai loh chu a farnu tan a leisak ta. An discount lai a ni hlauh a, 15000 in a lei thei. Tichuan, a thla khat hlawh atanga la bang zawng chu bank-ah a dah ve ta zân a. Rilru hlim leh engthawl zetin Resort lam pan ta lo chuan an inah bawk a phei leh ta a. Chawhnu lamah a chhuk tawh mai ang chu. A nu ten an lo hmuh chuan mak an ti hle. 

"Mampui, maimichhing teh" a ti a. A nau chu a chhing vat. 

"Meng rawh le" tih pahin phone chu a hmai zawnah a lek kang a. Mampuii mengin phone a hmu chu a ţap lo chauh. Tleirawl uaih e ti lo chuan a zuang zak zak mai. A nu pawn a lo nuilhpui var var a. 

"Khawvel û-ah i tha ber.. Ka lawm e aw.. U" tiin a û chu a kuah chuk chuk a. Ruatfela hnuk a ulh lek lek mai. A nau ai mah chuan a lawm zawkin a inhria. 

A nu hnenah a hlawh a bo a bang awm lovin a hlan thlap bawk. A nu chuan mak a lo ti nasa. Mahse, a han sawifiah a. Mampuii eraeh room-ah a phone thar chu a luhpui daih. A nu chuan, "Kan tan chuan pathian an ni ringawt alawm. Nang pawhin theihtawp chhuah la, an lungawina zan turin i hna tha takin hlen rawh" a ti mawlh mawlh a. Ruatfela rilru chiah a ni. A thawhchhuah atangin a nau chu phone leisak thei lo mah se, a hlim tho. 

Resort lam panin Pu Thana nen an chhuk leh ta boh boh mai. A ngai te bawkin Pu Thana a tawng duh leh hle. A kuhva ei hi a tui hmel thei bawk sia. 

"Kha.. Kan Rinsangi pawh a fel ve dawn a niang. Inah te pawh a tawm ve kûk tawh kha mawle" a ti a. 

Ruatfela a nui hak, "Aniang, a pa vangte pawh a ni mahna" a lo ti a. 

"Mahse, ngawiteh, he nau hi ka han sel vak thin naa a eng emaw ti thil phal reuh a. Hman deuha a tanpui thin, a scooty lo rutu te tan kha chuan pathian a ni hawt asin" a ti leh suam suam a. 

"Ni e, thatna lai hi kan nei theuh alawm" Ruatfela'n a lo ti. 

"Tukin a û bula a thil pek te kha an sawi zawng zawng ka va hre hman lo naa, a hming sawi a hlau hle aniang. 'Nangma pek angin sawi la, a nau pass i lawmpuina angin' a lo ti a. Pawisa niawm tak kha a û kutah a hmehbel chawt chawt a. Tu emaw tak tan chuan a luangchhuak ve leh tlat a nih dawn kha" Pu Thana chuan Ruatfela'n nau a nei tih hre miah loin a ti ta a. Ruatfela a hawi phawk nghal hrû.. Mahse, a insiam rem leh vat. 

"A ni maw.. A va fel reuh ve, Pi Nancy kuta dahin amah Pi Nancy pek anga lantir a tum tihna a ni maw? " a ti a. 

"A ni deuh ber ang chu. Envelope var a nia, pawisa a nih ngei ka ring. An neihin a tlin bawk a, a tan chuan luanchhuah a harsa lo ang" Pu Thana chuan a ti leh bawrh bawrh a. Ruatfela chuan engkim a hrethiam ta vek. Mampuii pass thu leh phone a awhzia hretu chu Arini a ni. Mampuii nen an inbiak laiin a awm ve tak kha maw.. A chhing vang vang a, lawm tur nge lungngaih tur pawh a hrethiam lo. Arini lakah chuan bat nei in a inhre ta. Bialnute hnen atanga a thlawna pawisa dawn ngawt chu a duh bik reng reng lo. Chumi a hriat avang chuan Arini chuan a hma ang bawkin ruahmanna a lo nei lehpek tawh a nih hmel. Resort-a a thawh chhan pawh amah Arini vang a nih kha mawle.. 

Resort an thleng a, mikhual an nei dawn lo bawk a. Zalen deuhin zan hun chu an hmang. Hnathawk thenkhat zingah zu han in ve zauh an awm thin a, Ruatfela pawn a hre reng. Hauh a tum hran lo. A hnawksak zawng leh an hna tibuai zawnga an khawsak loh chuan an nun a nia. An thawhchhuaha an ruih a ni bawk. Mizo zingah thenkhat hi chuan an hnuaia thawkte nun dan zawng zawng control an tum thin. Tupawh hi mihring kan nihna anga duh dan leh ngaih dan nei ve vek kan ni a. Inthunnunsak vek kher tum lovin an chak lohna kha hman tangkai tum mai tur. Ruatfela pawn zu in thin an cook leh room tifaitu te chu a kawm thiamin hna a sem thiam a, an hah viau ni ah chuan a rukin an in tur te a chahsak a, tlaiah a rukin a pe vr leh a. Hna thawh chu an tan nuam tak a ni. Tin, Ruatfela chu a naupan ang aiin a puitling bawk a, an zah thiam khawp mai. Tumah han nêka han kalpah an awm ngai mang lo. Amah a taimain a zam a tha si a, a tih ve miah loh tur thawh tul si te hi a thawk bawrh bawrh a, a zahawm letling thin. Tunah hian chenchilha thawk chu panga an ni a. Cook pahnih awmin, room tifaitu pakhat. Security pakhat nen. Huan leh a bul vel tihfai a ngaih chang erawh chuan an thawk ho bawrh bawrh a, an inpawh tawh khawp mai. Mipa hlang an ni bawk a, mikhual hmeichhia an neih chuan an sawizui nasa ve thin. 

Judy pasal a dam tawh a, damdawiin an chhuahsan kha a nia. A hriatna tlem tlem a hloh tih loh chu a panggai vek. A hna pawh a thawk ve leh ţan tawh. Khatia case a hnuhkir leh chhan chu vauna a tawh vang a ni. A ţang ta sa sa a, dawt pawh nise ţan ral raih a tum laiin number a hriat loh atangin thu mak tak a dawng a, "Khami zana thil thlen dan kimchang hre vektu ka ni a. I case hi i hnukkir lo a nih chuan ka video kawl hi ka tlangzarh ang. Tu nge thiama dik zawk chu zoram khawvelin an hre mai ang" tih chu. Kha khan nasa takin a tihlauthawng a, a rawn thawntu lah a reh zui hmak. A ngaibtuah kai zel a, kha in chung zawlah khan cctv te an lo dah reng em ni ang? Ruatfela leh Nancy confi dan atang ten a han ngaihtuah a, an thangkamah a awk zawk aniang tiin. Hmeichhia a ni bawk a, a tidik lotu a ni bawk nen. A zâm hma ta hle. Vauna bawk chu a dawng leh a, "I pasal kha neih reng i la duh anih chuan case lakir rawh. Naktuk court hma darkar khatah i inhnukdawk lo tih ka hriat chuan magistrate hnenah video clip hi ka hlan ang. I mualphoa i hmingchhiat loh nan tha takin ka dawr che a nih hi.." tih thu chu. 

A hlau ta tak tak a. Police bula kal lah a ngam tawh si lo. Chu msg pahnih chuan an dangchep ta viau a. A thiam lohna zawng zawng hailang ta se, a pasal bakah a chhungte thlenga a nghawng dan tur a hre kur bawk si a. A ukil biain, a pasalin case hnukkir tura a duh thu a sawi ta a. A pasal erawh chuan engmah a hre lo. A hriatna hloh chu Judy chuan hman tangkai a tum ve ta mai a ni. 

A hnua a pasal nuin a pasal bula, "Ti nge case chu lakir tura i tih mai le? Hremna an hmu ngei tur asin" a tih chuan, Dinpuia chuan a ngaihna hre lo takin Judy a melh reng ringawt. 

"Nia, kei pawn ka ti alawm.. Lakir ngei ngei rawh. I lakkir loh chuan kan inthen ang kha i ti bawk sia, ka ti lo ngam ta lo a ni" tiin a lo chhang vat a. Dinpuia chuan engmah a hre lo. Sawi tur pawh a hre hek lo. Tikhan engmah sawi zui tur awm lovin a zuzi ta mai kha a nia. Media vela a chanchin an sawi dan zawng zawng erawh Judy chuan a hmu ve vek. Hrehawm a ti, mahse, lakir lo ta se man chhuak leh ta si se, Ruatfela te thinrimin case an siamsak duh mai awm si a. Khatia case a lakkir pawh khan judge khan a remti tehchiam tawh lo kha a nia. Mahse, a pasal a chhuanlam tlat vang leh a ukilin a lo sawipui azarah engmah thu leh awm lovin an kaltlang thei ta hram kha a nia. A dinhmun kha a khirh em a ni. 

A hnu feah amah vautu number chu a call ta mai mai chhin a. Switch off a inti. A reh hlen ta hmak bawk! Tu nge a nih ang tih ngaihtuahin a buai nasa thin. Tun hnuah an video te chu tlangzarh ta mai se ti ten. Mut pawh a mu tha ngai meuh lo. Dinpuia lah a thinchhiain a huatthu a chhe rm em a, a damkawr bawk nen. Judy pawh a cher phah kâwk kâwk reng a ni. Ruatfela chu be ngam tawh tur a ni lo tih a inhria a. Mahse, a zah ru khawp mai. 

"Room pahnih kan lo duh ang aw.. Tlai dar 4 velah kan lo thleng ang" tia rawn betu aw chu a tliang nalh kher mai. Ruatfela chuan, "Tehreng mai. " a lo ti vat a. Phone an dah zui nghal. 

Arini nen inbe reng mah se; pawisa chungchang kha an sawi lem lo. Amah Ruatfela hian a sawi chhuak hreh, a chhan chu Nancy thlengin a kangkai ang tih a hlau a ni ber. Engtikah emaw a pawisa dawn zat chiah kha Arini kutah a la hlan mai aniang chu. 

"Ruat, an lo thleng" tlai dar 4 pelh hlekah Peka'n a rawn ti a. Ani hi tirhkah ang deuha an neih, zuanzang em em a ni a. Tlemin mi a phak chiah lo naa Ruatfela hian khawngahin mi pangngai ang chiahin a enkawl a ni. 

"Ee.. In lo thleng tawh maw? Hawh u.. He lamah" tiin mikhual pali hmeichhia hlir chu reception lamah a kalpui a. An hmel pawh a en lem lo. An rak chul a, "Awii a nawmzia hi. A zia tawp" an ti sap sap mai. 

"Tah hian in number kha lo ziak ta mai che u, chuan in ID khawngahinin" Ruatfela chuan a ti zung zung a. 

An rawn ziakin ID chu an hmuhtir sap sap, a hnuhnungbera rawn petu hmel a hmuh rual chuan Ruatfela chu a nghing dawt! Hmeichhia a hmuh tawh azawnga hmel tha ber mai a hmu tlat atin ni.. Chu nu chu a melh ta reng a, mahse, "dik lo a awm mi? " a rawn tih takah chuan a harh chhuak chiah. 

"A.. Aih.. Awm lo ve. " tiin ID chu a en a. 

Tihfel ngai an tihfel zawhah chabi pein an room lamah Peka leh Roa ten an hruai ta a. 

"A va mak ve" Ruatfela chuan a ti sup. Kha hmeichhia a hmuh rual khan engtin emaw a awm tlat a ni. Hei hi em ni ang, "Love at first sight chu? " a hrethiam ta hauh lo. 

Zanriah an ei laiin a zu chhuk ve a, "Ei ţeuh ru aw" a ti a. A nui sâng bawk. Heng nula te hi MZU-a Admission la tur an lo ni a. An chamrei dawn loh bakah motor an ken tho vangin MZU bul maia Resort-ah an rawn thleng a lo ni. Siaha khua vek an ni awm e. 

A kal sawn leh nghal a, mahse, an thusawi chu a hre hman tho. Hmelthai khan zawi sapin, "Ka hmuh rual khan engtin emawni ka awm.. A mak tawp" a ti a. Ruatfela chuan hawilet chak teh mah se, a inthunun a. A chhuak tlang daih. Zan dar 8 bawr velah a room chu an lo kik dat dat a. A va hawn chuan, hmelthai kha a lo ding ran mai. 

"Ih, englo.. Dawra kal kan duh a" a ti sap a. 

"Peka a awm alawm. Ka'n ko ange" a ti vat. A inha tha a, a chhuak ve a. A rawn zui ve zel. Corridor thui lo tê an zawh dun lai chuan, "A mak tiraw? " tih thu hi sawi rualin an ding rual ţhâwih. Makti em emin an inmelh dun ta ngawt ngawt a… 

(Tawk rih aw 😁