A tel lovin 12

A TEL LOVIN.. (Chapter - 12)

Ziaktu : Toni Râlte

Ruatfela case chu a khirh zêk a! Judy lah a ţang ve tlat si. Police lam te paw'n Ruatfela chu a hmel en reng reng pawn a dik zawk an ring ve tho. Mahse, an rin zawk vanga thiamchantir ngawt chi ni nghal lo chuan. Ruatfela chuan a evidence neih ve ber a phone call log chu a pho chhuak a. Judy'n a lo call-na kha a lang kuau mai. Judy phone an han ensak ve a, a lo la delete bik lo. Chutah chuan engvanga call nge a nih an zawt ta a. 

"Min lo tibuai tawh lo turin" a ti ringawt. A bak sawi tur a hre lo. A tibuai tih dawnin msg leh call na pakhatmah hmuh tur a awm si lo. Judy ţanhmun a phet chho ţan ta a. Tin, Dinpuia hliam awmdan leh Ruatfela sawi dan a lo inang chiah bawk si. Insual nise a taksa hmun dangah pawh hliam a tuar ve ngei tur a ni a. A chalah bak hliam a awm lo. Nancy ukil rawihsak a thiam bawk a, Ruatfela dinhmun a tha ţan khawp mai. Dinpuia a la harh chiang tlat lo va, thu zawhfiah ber tur kha. Judy erawh a tanna ngaiah a la tang ve reng. 

Arini pawh a ruk tak chuan a ţang em em. Judy chu a hua, mahse, han tih vak dan a hre si lo. Ruatfela nu leh naute lah an ngui nghiai reng a, a nu chu a zakin hrehawm a ti viau. A fapa chu a ringtawk viau naa mi ten an sawi duhdan avang chuan a lo ni tak tak em mawni le tih chang a nei. Mami te chhungkua erawh chuan Ruatfela an ţan ve tlat thung. 

"Ti nge nangmah chauhin" Ruatfela chuan Arini chu a melh ran a. Amah maia a rawn kal vang chuan mak a ti deuh a ni ngei ang. 

"Keimah hian a nuam ber alawm" a lo ti mai a. A room lamah kalin a thawmhnaw te a va dah fel a, "Kar khat lai ka awm dawn. Ka rawn pui dawn che u a. Inhlawhna ka duh sia, ka u ka dil a" a ti niah niah a. Mak a lo ti nasa. 

"Puih kan ngai hleinem" a ti a. 

"I court leh ţèp tawh kha" a lo ti daih. Ni e, a court leh veleh a thubuaia thutlukna diktak puanchhuah a ni tawh dawn a ni. 

"Min puih dawn rau rau chuan room tifaitu a lo kal lo va, a ai awh zuai la" Ruatfela'n a lo ti a. A hmaa an inngeih lohna kha an hre chang leh tawh lo a nih hmel. Bakah inhuat vak hleihtheih pawh a ni lo, Arini thisen zawmpuite chu a tan an hlu miau si a. An buai chungchangah ngat phei chuan. 

"A tha lawm. Ka va inthlak ange" a lo ti var a. A room lam a pan nghal. Ruatfela chu a khi suk mai. An exam zawh atang khan a hmu nula riau! Uniform ha lo va a hmuh fo tak vang pawh a ni maithei. Amah Arini lah a lian chi a lo ni bawk nen. A thil ngaihtuah chu duh lo niawm takin a lu a thing nar nar a. Choka lamah chawhmeh enfel turin a chhuk ta a. A thawhpuite hi a thubuaiah khan an lo ţang ve em em a. Judy chu an sawichhe bawrh bawrh thin. Ani erawh chuan kam khat pawhin Judy a la sawichhe lo. A ţawng tam loh bakah tul a ti lo. Mahse, Judy chet dan erawh mak a ti hlen tawhin a rinawm. 

Arini pawh phur takin a che sawk sawk a. A nu a zia deuh tawh a, a pa bulah, "Ka u te resort-ah ka zuk awm bo teh ang. Fel ka zuk zir ange" a ti ve ngei a. Phal lo mah se a kal leh dawn tho si a, a pa chuan a remti lo thei lo. A u te bulah erawh, "College admission ka tuak dawn" a ti thung. Chutiang thu a sawi ringawt pawh chu an tan chuan a mak viau. Sum hman sen loh an nei a, a buai ngai lo kha a nia. A nun siamthat a tum ve tak tak pawh a ni maithei. 

A hma zana an mikhual te sulhnu a chhui a, a ner nang nang reng mai. An che ţawp phian a ni ngei ang. Condom pawh pahnih lai a lo awm a! Ten hmel zetin dustbin chawp chuan a paih daih. Ruatfela'n a lo hmu fuh lehpek, "Dustbin em em kha chu paih lo la; a to asin' a lo ti a. 

"Aih, ka lei leh mai ang. Mipa chi te a awm alawm. " a lo ti hlar. 

Ruatfela nen chuan lai deuhin an ding ren rawn a, an laih chhan erawh an hre chuang lo. 

"I fel tawh dawn mi" a ti ta nge nge a. 

"Fel dawn pawh ka ti lo. Mahse, zu chu in tawh rih loh ka tum" a lo ti ve mai a. 

"A that chu, zanah games kan khel dawn nia. A khawharthlak thei si" a lo ti a. Arini a phur khawp mai. 

Hetih lai mek hian Dinpuia pawn nikhua a rawn hre chho a, a hriatna tlem a zawng erawh a hloh ngei e. A hawi â hû reng mai. Judy hmel a hmuh rual chuan, "Eng nge hetah i la tih a? Uirenu" a ti ta mai a! A bula dam lo awmpuitu chuan a lo hre fuh kher mai. An case kal lai mek a ni tih pawh hre chang lo lèkin Dinpuia tawngkam chu a awmna groupah a sawi ta nghal a. Midangin an share leh nghal. An belh hret hret zel bawk, "A nupui rehhlum a tum" tij te thlengin. Kam hahthlak thin mang e. Judy tantu te chuan, "Judy hi a uire lo, Ruatfela khan a zar buai em vangin Dinpuia tan pawh thik loh theih a ni lo alawm" ti zawngin an lo herrem leh a. Ruatfela tantu te lamin, "A uire thei a nih chuan Ruatfela hian a zar buai lo tih a lang reng alawm. A uire lai a phawk vangin an pa hian khawih a tum ang a, Ruatfela lo inveng ve si khan a khawih fuh ve a nih hi" an ti ve bawk. Media-ah hi chuan thil hrechiang tak tak kan tam thin sia, eng ber nge rina rin loh tur pawh thliar fe a ngai ve. A tu amah hi hmang thiam tak tak kan awm lo a nih ber mai hi maw.. 

Judy chuan pehhel tak leh thiam tak siin, "Ruatfela khan kei pawh min khawih hman a, mahse, ka tlan chhe thei hlauh a. Ka thiante ka pun chhungin a lo khawih che a nih kha. I thluak lam a khawih tel vangin engmah chiang takin i hre tawh lo a nih kha" a ti a. A pasal chu inhumtir a tum khawp mai. Eng nge an la an zel dawn ni.. 

Pu Lawma leh Rinpuii hotel siam tum pawh an buai ve khawp mai. Mahse, an hlim lai leh inlawm chhung hi a rei lo thin mai pawha. Tlai lamah zu an in lo thei tawh mang lo va, chutah chuan sum chungchangah an inhnial buai ziah! Pu Lawma lah chuan a in hralhna kha aman chalai kuala a Ac-a transfer a duh ve tlat a, a nih dan tur pawj a ni reng bawk. Rinpuii lahin phal hek suh. Hotel pawh an puitlin thei ngut ange maw le..pu Lawma chu a harhfim chang chuan a inngaihtuah nasa ve thin. Thil a thlentir rang teh thut lutuk kha chu amah pawn mak a inti. Rinpuii khan a bawl kual hnehin a lo zei phian si a. A thangkamah a awk ta sa sa, chuvang chuan Pu Lawma chuan tawpsan leh hni hnea mal taka awm a tum lo bur. An mualpho tawh ta sa sa a, Rinpuii chuan thlauhthla leh pawh nise tihbuai zel chu a thutlukna a ni hmiah. A nupui hlui chuan engtikahmah a pawm leh duh a ring ta lo bawk nen.. Rinpuii chu ngeiin ten hial chang nei thin mah se, neih hlen a tum ve tawp mai a ni. 

"A va mak tak.. Ka sa a chhe thei eee" Arini chuan a ti lang lang a. Ruatfela nen an incard den ta mai mai. A zia phian. Khawhar a hnem ve a, mikhual an nei lo bawk nen. Arini roomah khumah thuin an rak dun ve nasa. Ruatfela pawh a nui ve hawk hawk reng mai. Arini chezia lawmawm zet leh a ţang lutuk han titau der te chu a lawm riau. 

"Dar 9 a ri dawn. Mu tawh rawh. Thawh hma a ngai a nia" Ruatfela chuan card dah that pah chuan a ti a. Arini a ngui rawih hian a hriat. 

"Ka hlim e, zanin hi. I hlim ve em? " a ti ta daih a. A nui sen sen bawk. Ruatfela chuan, "Hlim em hi.. Nangmah vang" tiin a va melh zauh. 

A tho va, kawngka chu hawngin, "Muttui aw.. " a ti sup a. Arini chuan, "Lawk aw.. Sir" tiin a rawn pan a. 

Ruatfela'n a ngaihna hre vak lo va a melh reng lai chuan, dingdihlip ak ak hian Ruatfela biangah chuan a fawp ta zauh a. Ruatfela hrilhhai leh hamhaih lutul chu nuih sakin, "I mutui ngawt ang tikhan" a ti ta a. Ruatfela chu khi vur vurin a roomah a lut. Engvanga lawm viau nge a nih a inhre lo. 

A mut hnuah a phone a khawih ve zuai a. Chutah chuan Judy leh Dinpuia chunhchang chu a hmu ve chiah, a chhiar mek laiin Arini msg a rawn thleng a, ani pawn chu thu bawk chu a rawn forward ve. A tawpah, "Mi nu i uire ka rin lohna chhan chu.. I la virgin a" a rawn ti zui! Ruatfela chu a uang chak ta tlat a. 

"Virgin chiang e min lo hawnsak la" tiin a reply. A seen a tanga rei ve deuh hnuah "Ka ui e a.. Virgin ngei i la hawntir dawn nia" a rawn ti a. 

Chhan mai dan tur a hre ta lo hle. Tawngsual a hlau deuh bawk si. "A ho em mai. Virgin lam sawi lovin mu rawh" a va ti a. An inmang tha leh hnuah ani pawn phone chu dahin a maimichhing vang vang a. 

A tukah Arini nen pool thlanga huan an tifai a, chutia harsa leh hahthlak a ni hran lo. Hnim pawh a ni deuh mai. Ni a sa ve deuh nge Arini biang pawh a tai têk mai. 

"Kan zawhah tuiah sawn cheng ila" a ti a. 

"Yesii" a lo ti vat. Arini chuan a hmui tipawrhin, "Min van naupangchhe cheibawl" a ti a. 

"Naupang ni hek che" a lo ti ve mai. An han inchum leh rih. An innel thar leh pawh ta lutuk chu hnathawk dangte chuan mak an ti nasa. Arini lahin a sual a chhuah der si lo. Huan an tihfai zawh chuan an inhlip a, tuiah chuan an cheng zui nghal. An inchhaih nasa mai. Arini nui hawk hawk a hmuh vawikhatna a ni bawk a, Ruatfela chuan hmuhmawm a ti ru ngei mai. A rilru kal dik lo anga a hriatna chuan a titìm mai pawh a. "Kei chu ka bang. Ka inbual dawn" Ruatfela chu tui atang chuan a chhuak a. Bathroom a thleng ţep tihin Arini rak tuar a hria a, a hawi let vat. A lo phar nasa mai a, tuiah a tla a ni chêk ang. A changin a pil leh thut zel bawk. Hmanhmawh deuha tlan pheiin a zuangthla nghal a. Arini chu zuk pawmin a chhuahpui ta a. Arini zawi ngiai chu pool sirah muttirin, a sawi nawk nawk a. A awmah te nemin a hnungzangte a han nem thin. Eng a ang thei hlek lo. A mangang tan ta. Thawk a la hawk a, Arini hnar chu hupin a kaah chuan a zuk ham ta a. Chuveleh Arini chuan a hmui chu a lo fawp ta mai. A meng phawk ngei mai! Arini lahin hnuailam atangin a kuah tlat bawk si, an infawp ta ngawng ngawng a. Mahse, chulai hmuna awm ve dang an awm lo hlauh. An infawh zawh chuan Arini chu zangkhai zetin a rawn tho chhuak a, "Tihder i va nuam tak" a la ti zui! Ruatfela run lutuk chuan a biangah na zetin a va piai a. 

"Min fawh i chak vangin i tla der a maw? " a ti a. 

"Umm" a lo ti mai si. Ruatfela zawk chu a lai ţût! Mi te chuan hmu se Arini chu zakthei lo lutuk an ti ngei ang. Mahse, Ruatfela chuan Arini ze tlang zia leh pawisak nei vak mi a nih lohzia a hriatsa avangin a duhna tihhlawhtlin nana lem a chang chu mak a tih loh bakah zak thei lo a ti hran lo. Fawh a nawmzia kha a hre kur bawk si. 

"Inbual ang" tiin a tho ta daih a. Arini chuan umzuiin a kawngah a va kuah chat a. An ding dat. 

"I thinrim mi? " a ti hliai a. 

"Rim lo. Miin min hmu ange. " a lo ti a. 

"A ho, min hmu ang hmiang. " tiin a hmaah tak a rawn ding tharh a. Ruatfela melh kal chung chuan, "Sir, inngaihzawn ka duh" a ti ta a. Ruatfela kha a chih nge a ţawng thei der lo. 

"Mawh.. Chuan ka fel tawh bawk ang" tiin pangchang zetin a ngen nghar nghar a. Ruatfela chuan bual in lam panin a kai phei ringawt. Kawngka chu hawngin Arini chu a nam lut a, amah pawh a lut ve zat. Bangah chuan nem betin mitmeng thuk zeta melh hian, "I duh tak tak maw? " a ti hniam raih a. Zamna tel miah lo hian, "Aw" a lo ti zangkhai vah. 

"Anih chuan kan inngaizawng anga a ni mai alawm. Mahse, tuman hre rih suh se.. Chuan i sawi ang khan i nun siamtha vek bawk la " a ti ta a. Arini chuan, "Tehreng.. " a lo ti vat. Hnai deuha inmelhin intiam rual ang hrimin an infawp ta bawrh bawrh a. An taksa a la huh chhap bawk si, an innâwk chin a hriat hle. Ruatfela chu a khur dar dar a, bual in chhung êma tlingtlak a hreh si. Arini lah inhawngsa a ni a, mipat hmeichhiatna lama a chak lohzia a hria. Tunah pawh a mitmeng atang chuan a inpeih tawh tih a lang reng mai. 

"Lawk.. Min en rawh. Hei lawk, hetah chuan ni lo" Ruatfela chuan a ti hrâwk a. A aw te chu a lawi rût mai. 

"I thu vek alawm" a lo ti hap a. Mahse, a khur der der a, a sihhnipzia a lang chiang kher mai. 

Eng em thleng lo chuan an inbual thei ta hram e. Ruatfela erawh a inngaihtuah vung vung a, a thutlukna teh ngawt leh Arini sawi awlsam dan te a ngaihtuah chuan a lem tihna riau a nei. Arini hian a duh tak tak a ring lo bawk. Mahse, tikhan a lo chhang fel tawh si a, a rilru chuan, tihian siamthat tum ila a tha a ni mai. Nula fel tak a nih theih nana puih pawh missionary ang ka ni mai a ti a. Arini chhungten an hriat a hlau viau bawk. 

Zanah a ngaite bawkin an indeng leh a, inngaizawng an ni ve tawh tih an hre kar nge zan hmasa aiin an boruak a hot lo tlat. Eng pawh sawi se an lai dun ţût. Arini tak pawh ngaihzawng pangngai leh mi pangngai a ngaihzawn vawikhatna a ni a. Khatia zah loh chhuaha a sawi ta tawp te kha a ngaihtuah chhuah chuan amah leh amah te a insik leh vak thin. A lei te a chhuah thul. Mahse, a thleng vek tawh. Ruatfela chu a duh niin a inhria a, Judy laka thubuai a nei tih a hriat te khan nasa takin a thinrim a nih kha. A chhan erawh Judy a thik vang a ni tih a chiang chho zel. Ruatfela uapna hnuaia awma a thian hmeichhia te anga inzui ve det det te a chak ve a, bazar dunte pawh. Sex lam a ngaihtuah ngai miah lo thung. Mahse, Ruatfela khawihna ringawt pawn a taksa a tihdanglam hmatzia a hre chiang. Ruatfela a insum zo lo a nih chuan ani chu bel chhung sa a ni mai. 

A tukah an pahnih bawka hall an tihfai laiin a nuin a lo call a, speaker a on a. "Mama, naktuk i court hun a nih kha aw. Ka rilru hah lutuk hi mut pawh ka muhil thei lo. A hrehawm em mai" a rawn ti nghal bawrh bawrh a. Ruatfela zawk chu Arini lakah a lo inthlahrung. 

"Aw ka hria alawm. Nu, chutin mut theih loh phah nan hmang suh. A tha vek dawn alawm. " a ti dam thluam a. 

"Ni e, mi sawi hmangah pawh thiam i chan mai hi chu ka ring thut thut a, mahse, a zam awm em a ni.. Hei i nauin ka be duh che a ti" a ti a. A nau aw a hre zui nghal, "Û, phone pawh min lei thei ta awm si lo va, ukil rawihna man te kha a ngai dawn sia. Ka awt ve eee.. Mi ta hlui lei tur ka zawng dawn" a rawn ti ve thung. Arini chuan a ngaithla uluk ngang mai. Ruatfela chuan, "Tihdan a la awm mai ang. Lo lungngai suh " a ti a. Signal a chiang lo zui ta nen, a tawp ta daih a. 

"Judy hi ka hua" Arini chuan a ti hlawl mai. 

"Ngah maw" a lo ti var a. 

"I laka a chet dan hi ka ten. Ka kek hrep chak" a ti leh a. A thinrim hmel tak tak. 

"A ho lutuk, a ât vang a nih kha" a lo ti mai a. 

"I va tan ve. I la duh a ni maw? " a lo ti hlar a. Ruatfela a khi suk. "Tan lo ve. A a em alawm" a ti a. Arini chu a tau nghawng nghawng mai. Mahse, a titau tak tak hran lo. Ruatfela lah chuan thlem thiam hek lo, "Judy chu nuthlawi leh mah se, ka duh zawk che alawm" a ti a. A nuih a za deuh bawk si, An hnathawh chhung zawng Arini a tum tluan parh. Zanriah an ei dawnah erawh a nui ve leh thei ta a. An awmdan atang chuan thawk vete chuan, "Inngaizawng an ang e" an ti ru sap sap zel a. A hmaa an buaina avangin an ring ngam chiah si lo. 

A tukah Ruatfela chu court-a inlan turin a chho ta vang vang mai. Dik tak chuan a zâm ve takzet, a rilruin a tawngtai mawlh mawlh a. Thiam chang ta lo se Jail lamah a hun a hmang ngei awm si a. Mualphona nasa tak nen. Tin, a nu leh a naute a ngaihtuah tel lo thei lo. A tel lovin engtin nge an awm tak ang? Nancy pawn a rawn tawiawm ve leh a. He nu hi Ruatfela tan chuan vantirhkoh ang mai a ni. A ngilneihna chu a hrechiang tawh ngang mai. Judy te lam an reh hle. An nghak chhuak thei ta meuh lo, a hnuah Judy te ukil lam a rawn kal a. Magistrate leh Ruatfela ukil te nen an inbia a. Eng thu tak sawi ang maw an tih ruk laiin, Judy te lam chuan an case chu an laklet leh thu, an inhnuhdawh thu an rawn sawi ta. Ruatfela chu a thaw huai mai. Mahse, Nancy ngaihdan a lo ni awzawng lo mai a. "Hei chen min tibuai a, court hial thlen ngai khawpin. Defamation case ka file dawn. Ka duh lo tianga intih leh hnuhnawh" a ti ta siah siah mai a. Mahse, Ruatfela nu a rawn tawng ve ta vat a, "Min duhsakzia leh min khawngaihzia kan hria a. Kan lawm lutuk. Mahse, tihian kan buaina chu tawp mai se ka duh, inngaihdam hi a tha mai, Mama, eng nge i ngaihdan le? " tiin a fapa chu a rawn a. 

"Ka hrethiam lo angreng. Pi Nancy sawi pawh kha a dikna chen a awm ka tia, amaherawhchu, amah Judy pawh a dinhmun kha a khirh ve em bawk a, chuvang chuan kan case hi kal zel loin tawp mai se chu ka duh tho mai. Nunphung a tibuai" a ti dam thlap a. Nancy pawh thinrim viau mah se, amah Ruatfela berin a ngaihdam theih miau chuan sawi theih nei bik hek lo le.. An thubuai chu a tawp a ni ta der mai. Ruatfela chu court rorelna chuan, thiam lohna nei lo, pawisawi lo a ni tih an nemnghet ta a. Media lam ten an puangzar ta bawk. An sawi zui leh luih luih mai. 

"Vawiin chu i lo chho ta sa sa a, i duh leh in inah va riak ve mai la.. " Nancy chuan a ti a. A châk viau naa, Arini'n hrehawm a tih a hlau deuh si. 

"I nau a khua a har lutuk ang" a ti a. A nui bawk. Nancy chuan, "Ni tak e. A rawn riah chhan ber kha i ni bawk sia, haha, tak taka ka nau hi ka pa te meuh pawn an siam that zawh tawh loh a ni tawh a. Misual tak erawh a ni bik lo a nia, lo kawmhlimin hruai that lo tum ve hram hram teh aw" a ti ta duah a. Ruatfela pawh chuan, "Ni e, theihtawp ka lo chhuah ang. A fel lutuk tunah pawh, min pui ve zel a" a lo ti vat. 

Arini te ho pawn Ruatfela thubuai chungchang chu an lo hre ve tawh a. A lawm ngang mai. Chutih rualin hmingchhe taka awmtirtu Judy chu la tihnat ve ngei a tum fan a ni. Zanriah nang hmanin Ruatfela a rawn thleng a, inbual sawk sawk a. Chaw a ei zui ve nghal. Zanah Arini nen chhun lama an thil tawn te an sawi dun a. An hlimin an titi pawh a nung viau. 

Dar 9 bawr velah Arini chu Nancy'n a rawn call a, "Mate, ka pa an man! " a rawn ti ta mai! Arini a ding chawt. 

"Engvang chuan" a ti hâw a. 

"Ralthuam tawlhruk leh khehpuamah a lo inhnamhnawih ve a niawm a. Tunah khan an rawn la" a u chuan a ti ta a. Arini chuan mak a ti hran lo. A pa thil tihruk hi a hriatna a rei tawh. A ringhlel a ni mah zawk ang, fiahna tak tak a la neih loh vang zawka engmah sawi lo a ni. 

"Lo haw la, naktukah, ka nu a khawngaihthlak" a u chuan a ti leh a. 

"Umm ka lo haw dawn nia" a ti ve mai. A pa an man chu a tawrh vak hmel loh. Ruatfela bulah thil awmzia a sawi nghal a, Ruatfela thung chuan mak a ti viau. An hausak chhan khi a minister laia a lo ei ve vanv emaw a lo ti mai zel a. Sum lakluhna dang a lo neih vang a ni ngei ang. 

"I nu chu tha takin i han enkawl dawn nia, a dam tha bawk si lo va, chhuahsan renh reng suh" tiin a chah thlap. 

"Ka ngai dawn che e" a lo ti daih. Hun an la hmang dun rei lo viau naa, inngaihna khawp chu a tling ve bawk a ni. 

"Kei pawn ka ngai ang che. Kan inbe zel dawn alawm. In result pawh a chhuah dawn kha, naktukah" Ruatfela chuan a lo ti var a. 

"Ka pass dawn sa.. Kha chu" a lo ti sam êt. 

Mut dawnah inmangtha nan an infawp zauh a. An room ve veah an lut dun ta. Arini chuan Ruatfela bula mut a chak ngei mai. Sex ngawr ngawr lam aiin kuahin thlahlel takin pawm vawng vawng se, chutianga awm chu a châk a ni ber. 

A tukah an in lam panin a haw ve leh ta phawt a. A nu pawh a rin aiin a lo tha. A pawm thiam hmel khawp mai. Thil zahthlak tak a nihna chu a hrehawmna tur a ni. Mi ho lahin an sawi duh nasa si a. Pu Thanga thawhpui an man inpuanna atangin ania Pu Thanga pawh an hriatchhuah tak ni. 

A pa hmu turin a nu nen an chhuak a. Nancy a rawn tel thei hlauh bawk. Station an thlen rualin station atang chuan mi pakhat hi a rawn chhuak ve chiah a. Chupa hmel a hmuh rual chuan Arini chu a ding chawih, a dâng nghal sâwp sâwp bawk. A nu leh a u chuan makti takin, "Lo kal ta che" an ti a. Mahse, anmahni lam a melh lo hrim hrim, rawn kalpel thuaktu chu umzuiin a banah a va pawt hrâwk a. A lukhum khum lai chu a theh thlaksak bawk. 

A kutzungchala kawk va chungin, "Ka hmu ta che… tunah chuan phuba ka la thei dawn ta" a ti khur dat dat a.. 

(Vawiin chu ziah a har tawp. A chhan ka hre bik lo)