A Tel lovin 11

A TEL LOVIN.. (Chapter- 11)

Ziaktu: Toni Râlte

(Min ngainaa, ka story chhiar fo i duh ve ngai chuan, khawngaihin Adds kha min click sakin, 10sec vel min lo nghahsak hram la aw. Kan tan vek a ni e 😊😍

"Exam zawh kan rawn lawm dawn a. Vawiin chu" Arini chuan nui var var chungin a ti a. Ruatfela chu a ngawi ngal ringawt. 

"Sir, ka biak che chu..ka roomah kan awm leh mai ang. Chuan zanriah tur kan rawn keng a, cook te kha min lo hrilhsak mai ta che" a rawn ti leh a. Pu Thana chuan Ruatfela a va nghawk zauh. 

"Aw le" a lo ti chang rât a. A hmel landan avang chuan Arini chuan mak tih hmel zetin a en hâ. Ruatfela erawh ngawi rengin counter lam a pan daih. Pu Thana chuan, "I tihlau a niang" a lo ti sup. Ani hi chuan Arini hi a hlau ve vak lo aniang. 

"Ka hlauhawm hleinem" a lo ti ve mai a. A thiante nen a room lam an pan nghal. Ruatfela chu a thu ngawi ran a. A thu hriat khan a la ţhawng tih a hriat mai. Arini chu a thawhna neitu nau niin, pu Thanga, School atanga bantirtu fanu a ni bawk. Hei hi chu a hriatsa a ni. Chu aia mak a tih chu engtin nge Nancy te hnuaiah hna a thawh theih? Pu Ramtea khan Nancy te hnuaiah kher engtin nge hna a hmuhsak theih? Engkim an zêp vek a, Arini pawn engmah a sawi lo. He thilah hian Arini chu a inrawlh ngei a ring. Ni e, a laka a inthiam loh em vangin he hna hi a zawnsak a ni mahna. Khawngaihna vang leh thupha chawina avanga hnathawh chu a duh bik hauh lo mai. Engmah chu a ni lo, mahse, Pu Thanga'n a laka a thiltih kha a theihnghilh thei lo. 

A room-ah chho vin, Nancy a bia a. "I naute bak mikhual kan nei lo va, an ni chu enkawl em em an ngai lo bawk nen, ka nau a tha vak lo va, ka haw duh a. I remti em? " a ti a. 

Nancy chuan, "Ka nau a? Tu ka nau maw? " a lo ti hâ. Ruatfela a nui tawi tak a. 

"I nau Rinsangi mawle.. " awki ngaihnobei vak lo hian a ti ta a. 

Nancy a chek hlak, "E.. I hre tawh a ni maw? Aw le, a tha alawm.. Naktuk tlaiah erawh mikhual pawimawh kan nei dawn si a. I awm hram chu a ngaih hmel aw" a rawn ti zung zung a. Thu tam sawi tawh lovin an dah nghal. Ruatfela chu a insiam mawlh mawlh a. Pu Thana rualin a chho ve mai a niang chu.. 

A room atanga a chhuak chiah chu Arini lo phei lai a va hmu nghal. Mak tih hmel deuh hian a lo melh a. 

"Khaw nge i kal dawn? " a ti zawm zat. 

"Ka haw dawn" a ti hmuk a. 

"Sir, i thinrim mi? Ka rui miah lo ania" a lo ti vat a. 

"Engah nge rui pawh nila ka thinrim ve ngawt ang. Ka tan engmah i ni hleinem. I û te resort a ni tih i zêp erawh a chhan a awm ngei ang. " a lo ti hmiah. Arini hrilhhai hmel chu a haider lui tlat. 

"Ka.. Ih, chutiang a ni lo. Ka û te hnena i thawk tih hi ka hre lawk bik lo a nia" a ti bah nak a. Ruatfela a lo nui. 

"Engpawhnise, a tha vek mai e. Nuam deuhin hun in hmang dawn nia. " tiin a kal pel a. 

"Hetiang hna tha lutuk i thawk thei hi i lawm hle lo mi? A hahdam si" Arini aw a hriat rual chuan a ke pen a tawp chawt. A hawi let a, "Ka lawm e tih kher i phût chuan ka lawm e. I thupha chawina a nih pawn ka pawm e. Mahse, inhmelhriat angin awm tawh lo vang.. Min khawngaih vanga hna hi min hmuhsak tih hriatchhuah fo ka duh lo. Chubakah, hna dang ka hmuh veleh ka bang ang" a ti ta a. Arini chapona rawn lang pawh a khup zal zal mai. Ruatfela tawngkam tin te chu amah atanga chhuak niawm lo va mawi an ni. A inhmeh thlawt lo. Ti nge maw a thinrim em em ni? 

"Eng nge thinrim vak kher a tulna? Ka pa in i hna atanga a ban che avangin ka khawngaih che a, hei hi ka zawnsak che. Chu chu thinrimna chhan a tling mi? " a ti ve ta fak fak a. 

"I khawngaih nih ka duh lo ve" ti chhum hmukin a kal nghal daih. Mihring hian chapona kan nei vek si a. Mahse, Ruatfela chuan a hna chu bansan mai harsa a ti rih. Hlawh a that piahlamah an hahdam a, hei aia hna tha hi chu ani ang tan chuan a vâng rih tlat. Arini a lo khawngaihna leh siamthat duhna rilru a put te erawh a bo ta deuh. A mak ee, ngah nge maw a ngei tlat ni. Ni e, a nun a chawkbuai ve bawk atin a ni. Hmeichhe naupang lek a la ni si.. 

A hun hmaa a haw thut chu a nu ten mak an ti hle. Mahse, chawlh an pek thu a sawi a. A naute thil eitur a hawnsak chu a phawrh a, an lawm leh hle. Mampuii pawh Aizawl boruak a ngeih deuh nge a thaw pawh a hah leh rih tawh lo. A nu erawh a rilru a la chawl meuh lo a ni bawk a, a la cherin a la thu that reng mai. Zanriah an kil laiin, an te ber Buanga chuan, " Nizan ka mumangah pa ka lo hmu a. Min lo ngai lutuk" a ti a. A nu leh Ruatfela an inmelh zawk. 

A û chiah Puipuia chuan, "Kei pawh pa ka ngai. Nu, ti nge pa hi kan bulah a awm ve loh? " a rawn ti ve a. Engkim hrethiam vek rual an la nih loh bakah a nu te hian thil zawng zawng an hrilh bik lo bawk nen. 

"I pa chu a la rawn awm ve thei lo alawm. A la buai a" a nu chuan a ti mai a. Thil dang an sawi daih. 

"Û, phone min lei ve la, ka awt ve e. Ka thiante ho pawh ka ngai, biak ve ka chak" Mampuii chuan a ti a. 

"Lo nghak hram hram rawh. Hlawh kan lak leh veleh instalment-a lakna ka hria alawm. Kan lei dawn nia" Ruatfela chuan a lo ti a. Ani ang rual phone nei lo hi chu an vâng ve viau tawh ang. Mahse, a naute hi an fel hrim a, thil han awh leh ngen vak vak an ching lem lo. Ani pawh a phone hi thlak a hun tawh reng, a screen a keh bakah a tâng nasa thei lutuk a. Mahse, an dinhmun a hria a. A la awt ngam rih lo a ni ber. 

Judy'n a rawn be teh hlawl a, "Inneih ni pawh i rawn lang lo va, i mak ve khawp mai" a rawn ti tân tân a. 

"Ka hman ngang lo a ni. Eng nge pasal neih chu a an? A nuam em? " nui chungin a ti ve a. 

"Nuam vak nang. Mahni in ang a ni si lo va, tak taka ka lo biak chhan che chu, tunkar zirtawpah kan thianho in in resort-ah rawn riah kan tum a. Ka lo book lawk a nih chu" a rawn ti a. 

"Eee.. Lo kal ru, a nuam inti viau ang. Honeymoon a ni pah ve mai. Room engzat nge in duh dawn? " a ti zung zung a. 

"Pahnih a ni mai. Pali kan ni dawn a" a rawn ti a. 

Mut dawnah Kima nen an inbe leh zuai. A pa chanchin a zawt pah a, "Hotel siam an tum a niawm e. Petrol pump piah lawka ram awlah khan. Mahse, nimin piah khan an inhau hrep an tia, a chhan erawh ka hre lo. An la rui kal reng tih erawh ka hria"a rawn ti. A pa danglam ta lutuk chu awih harsa a ti thin. Engtikah emaw a la inchhir ngei awm si a, a nu hian a pawm leh thei kher ang e maw le.. 

Arini erawh a thiante hlim thawm leh khêk karah ngui zetin a thu khar mai. A tum leh beisei loh dan anga thil thleng chuan a mood a tichhe vek. Ruatfela kha thinrim viau tur a ni lo asin le.. Eng nge a sawi kha.. "Hmelhriat angin awm tawh lo vang" a ti tak e. Mai mai a, ani Thingtlang tlangval ve mai mai in khatiang khan a ţawngkhum a nia tiin a insawh a insawh a. A rilru chhungrilah erawh Ruatfela ngaihna leh thlakhlelhna a chambang khiau mai. 

Pu Thanga chu a hawi ruk ruk a, in hnuai thim rek rukah chuan a lut thla ta zâl zâl a. Kawngka chu zawitein a kik a. A rawn hawng vat. Chu in te takte chu a rimtui fahran lo hle. Thutthleng seiah chuan nu pakhat hi a lo mu a, blanket a sin hlun bawk. Kawngka lo hawnsaktu khan, "Kan kalpui vat a ngai. A zual zel a nia" a ti sur sur a. 

"Aizawla rawn kal miah lo tur hi i ni asin" Pu Thanga chuan a thlan hruk pahin a ti a.

"A thi ţèp si a. Khitah inenkawlna tha awm hek lo" A lo ti ve a. 

"Ka fanuin a hmuh che chuan thi ang tluk i ni mai.. " Pu Thanga aw chu a hlauhawm angreng. 

"Min hmu lo vang. Ka inthup ve alawm.. Tunah chuan ka nupui hi a dam phawt a ngai. Ani tel lo chuan ralthuam leh rangkachak pawh tawlh ngaihna a awm lo" Rinawma chuan a ti ta sup a. Chu Rinawma ngei chu Arini nun tichhiaa piangsuala siamtu chu a ni. Khatia Arini laka pawi rapthlak tak a khawih ni la la khan Pu Thanga remruat angin khawchhakah a tlanbo zui a. Awmhmun khuarin hun a kal zel a, nupui te hial neiin Pu Thanga nen sumdawnna tenawm tak an kalpui dun a. Aizawl leilung rap tawh lo tura thupek mah nise, a nupui chu thih ngamin a na a, khi lam Doctor ten Aizawl chu an refer miau si a. A rawn chhuk lo thei ta lo a ni. Tunah chuan a hmel landan te pawh a dang ve deuh tawh a, Arini chuan a hriat mai theih a ring lo deuh. Pu Thanga erawh a hlauthawng tho. A fanu hian zawn chhuah a la tum ruh ropui si a. 

"Anih chuan kha chabi hi, ka motor hi kawl rih la, in lo inbuaipui dawn nia. Zaninah chuan Lunglei lama kan thawhpui nen thil sawindun a ngai a. Sum i mamawh chuan card hi la rawh" tiin Credit card a pe tel bawk. Engvanga he pa lakah hian that chhuah viau nge maw a nih le.. 

"Aw le a tha alawm.. Ka lo buaipui mai ang. Hlauthawng suh" Rinawma chuan a ti a. Pu Thanga chu hawi leh zuk zuk chungin a chhuak nghal. Taxi-in a haw a. A chhungte bulah erawh a motor chu workshop-ah a dah thu a sawi. Tuman engmah an zawt zui lem lo. 

Ruatfela pawh mikhual an neih dawn si vangin chawhnu lamah Tanhril lam a pan leh ta a. Arini te chu haw hman se a duh angreng hle. A lo ngaina ve tingtang si a, han mi hran thut chu harsa a ti ve deuh. A tirah khan thinrim viau mah se, anihna takah chuan Arini sawi ang deuh khan lawm zawk tur a nihna chen a awm ve tlat a. Hei aia hna tha chu a hmu tawh awm si lo, Nancy lah a lakah a tha si a. Chuvang chuan a theih chen chen chu thawha inkhawl chhoh ve bek bek a tum a ni. 

A room lam a pan nghal a, kawngka a hawn dawn mek lai chuan choka lamah thawm a rawn awm a. Mipa thinrim awrawl niin a lang. Kawngka chu a hawng sawk sawk a, a bag chu khumah dahin choka lam a pan leh nghal. A zuk thlen chuan buaina eng emaw a awm tih a hre nghal. 

An cook tharlam ber Zuia leh Arini chu an lo inhmachhawn ran mai a. 

"Sangha hi fry rawh ka ti mawlh mawlh a ni lawm ni? Engah nge i chhum a? " Arini chuan a lo ti vin thak thak mai. 

Zuia lah chuan tu nge a nih chiah hre bik hek lo, "Fry rawh i ti lo, i rawn dah tawp a. Ka lo chhum mai a ni. Bakah sangha hi in rawn lei sa pawh a ni lo" a lo ti ve tlat. 

"Tu nge i hming? " Arini chuan cho zetin a ti a. 

Zuia tawng tur chiah chu Ruatfela'n a va khap. An inkarah dingin, " A tawk. Duhtawk ru. Buaina kan duh lo. Nangni pawh ti nge in la hawn loh? " Arini melh chung chuan a ti a. 

"Kan duh hun hunah kan haw ang. I sawi tur a awm lo. A hming maia Manager i nih kha" a lo ti hmiah. Ruatfela a zak letling. 

"Aw le.. He lai neitu nau i ni tih chu kan hria. Mahse, kan buai ve a, i thu angin engkim a thleng thei bik lo tih hi min lo hriatsak teh. Mikhual an lo thleng dawn lehnghal a. Buaina hi chu siam tawh lo la kan lawm khawp mai" Ruatfela chuan a ti ve ta sak sak a. 

Arini thiante chuan, Arini chu an rawn kai hrang a. "Nia, a tawk. Sangha chhum pawh a tui ve tho alawm.. Chho ang u.. Roomah" an ti sap sap. An fel phian mai. An rui lo bawk a. 

Rum zeta Ruatfela melh chungin, "Kha cook thar mawl zet kha a bang dawn tih in lo hre dawn nia" a la ti hram. Ruatfela thin thawk thut chuan a va phih a, "Hei.. Hre rawh. Mi eizawnna hi i tan chuan infiamna ang lek a ni maithei. Retheihna awmzia i hre tlat lo va. Zuia hi a bang a nih chuan kei pawh ka bang ve ang. I hre reng dawn nia" a ti chang fak a. Arini mitah tak a melh bawk. 

"Bang ve la ti nia.. Private schoolah inhlawh la i inhmeh tawk chiah" ti el zet hian Arini chuan a ti a. Ruatfela chuan engmah sawi tawh lovin a kalsan nghal. A thinur èm a, insum zawh loh a hlau. 

Mikhual dang an lo thleng zui ta bawk nen.. A thinrimna dah thain a buaipui nghal zar zar a. Tihlan chi ni nghal lo chuan. Arini te pawh engmah sawi tawh lem lovin roomah an lut diak a. Zu bawk an leklam leh ta. Arini thinrim lah chuan duhtawk chin nei hek lo, a in piap piap mai a. A thinrimna a ruih hnan lehnghal. A thiante chuan an vengthawng angreng. Mahse, an ni pawh an rui ve tho si. 

An mikhual te chu chaw ei turin kitchen lamah an rawn inzui phei a. Aizawl Resort tam zawk hian chaw an maintain vek lo va, hei tak hi Nancy te chuan chet that nan tak an lo hmang ve a ni. Eitur lah an siam tuiin an thianghlim bawk nen. 

Ruatfela erawh a ril a tam lo. Roomah a tawm rih a, Nancy lo biak hun a nghak a. A chhan pawh Arini khan a han call a ring a ni. Mahse, Nancy chuan a lo call rih lem lo. Arini'n a call lo a ni mahna. 

Room atanga chhuakin engkim a fel vek em tih en turin kitchen lam a pan thla chhat chhat a. An room lamah an tawmim tawh aniang, thawm a reh riau. Kitchen a thlen chuan hnathawk hoin chaw an lo ei mek a. "I ei ve nghal dawn em? " an lo ti a. A lu a thing ringawt. 

A ril a tam hlawl lo. Zu rim nam huk zel chu a duh lo ru hle. Kitchenah hian an in mawni dawn ni. An strict ve riau kha a nia. Tun tum zawng a khirh thei rih lo a ni ber e. Pawn lam boruak a tha em tih en fel turin a chhuak leh a, an uipa kawl lai Roger chuan a lo zuan that that, a mak ngawt mai. He ui nen an innel nghal em em hi. Pool bulah chuan a ding vang vang a, ni pawh a tla fel tawh. Boruak a dai viau. Engkim a tha vek nia a hriat vangin let leh tumin a inher a, mahse, nui ri a hriat vangin pool piah intê, tuicheng hote thawmhnaw dahna lam chu a va melh a. Chuta tanga lo chhuak chu a ni. An mikhual zinga inngaizawng emaw inkawp emaw an nih a ring a, mahse, an danah chuan khaw thim hnuah an room an chhuahsan thei lo. Thil an lei duh a nih pawn hnathawk an tir mai thin. Security a that loh chuan buaina a awm thei ve tlat a. 

Kawngka chu a kik dat dat a, nui ri chu a tawp chawt. A ngaichang vang vang a, a kik leh. A ri kharh a, a rawn inhawng. A rin loh lutukin Arini leh mikhual lo thleng thar zinga a thalai ber kha an lo ni tlat! A hamhaij deuh a. Mahse, a sawi tur chu a sawi a ngai si. 

"Khaw thim hnuah chuan he laia awm hi kan remti lo va, khawngaihin room lamah in chhunzawm thei mai ang em? " nem thlap hian a ti a. Arini chu a ding bu lâk lâk. A rui hle tih a lang. 

Tlangval chu a lo pangngai viau a, "E.. Aw le, kan lo hre lo a nih chu. Kan tihpalh lutuk. Kan chho nghal ang. Ti rawh le" tiin Arini chu a kai a. An inhruai chhuak zui. Kawngka a kalh mek lai chuan, Arini chuan ring angreng tak hian, "Zanin chauh chu nuam takin le" a ti ham ham a. Ruatfela a ţèk chhawk! Engtin emawni a awm. A sawi thiam chiah lo. Arini khan a piansualna kha a sawi tawh naa a hmuh laiin mipa a kawpin a chulnel ngai lo .Tunah a hmuh lai ngeiin khumpui kai dun turin an inzui chu a ni si a! A chhungten hre ta se.. Kha mikhual khan natna tha lo te vei ta se. A tam lutuk. Mahse, a buaina a ni lo. 

"I mawhphurhna a ni lo. Enliam rawh" tiin a infuih ru mawlh mawlh a. A rilru erawh nuam lo tak a ni. Arini kum zat a ngaihtuah a, a hui leh pap thin. Tin, mak takin kha pain a han chula a kuah vel tur a mitthla chuan a na zawk zawk thei. A roomah a tei sek a, tihtur lah a hre der si lo. A thìk a ni thei mai ang em? Ni lo, chulam hawiin a en ngai hleinem. A farnu ang riaka a ngaih hman avangin a na aniang tiin a inthiam chawp thul. Mut pawh a mu tha meuh lo tihtheih a ni. A tuk zingah a thawh hmain Arini te chu an haw a, mikhual dangte erawh an la chambang. 

Tukthuan an kil ho laiin Ruatfela pawh a zu chhuk ve a. Kha tlangvak khan ring angreng takin an zan hun hman dan a lo sawi lung lung lehnghal. A pangngai viau emaw a tia! 

.. "A zei phian. Mahse, a rui lutuk a, a che tha thei lo. Thinrim te pawh a ang. A awmdan kha.. Mahse, zan nuam tak a ni" a ti ham ham mai. A thiante lah an lo nui ţhâw hlawm a. Ruatfela lai a na ta deuh. Mahse, tawngkam neih kher a tum lo. Arini cho chhuah a ni miau a. Mipa tha lo te chuan chutiang chuan an sawi reng ang chu… 

In chhung a lut chiah tihin a pa âng thawm a hre zui leh zat. A kap vel na thum chuan a awm a tinuam lo. Ruatfela laka a thinrim hrikthlak nan, kha mikhualpa kha a hmang ta ngawt si a. Tlem chuan nuam tih lohna a nei. A mi hriatchian loh lakah a sihhnip ngai bik lo tlat a! 

"I nu pawh a la dam chiang lo va, a ngaihtuah em em che a. Tinge hetia i awm leh thin le.. Hmeichhia i nih hi.. Hmeichhia" a pa chuan a ti hmuar hmuar a. 

A ngawi reng. A nu hmu turin an roomah a lut a. A nu chu chairah thuin pawn lam a lo thlir veng veng. 

. "Nu, i tha em" a ti halh a. 

A rawn hawi vat. A nui sáng a. "Ka tha reng. Ti nge zan hnih lai i riahbo leh tak.. Bawihte, i nun hi siamthat tum rawh. College te i la kal dawn a. Heti ringawt chuan kan mualpho lutuk dawn asin" a lo ti dam thliam a. 

"Engtinmah ka awm hleinem. Ka riak chhuak ringawt alawm. " a lo ti mai a. 

. "Hmeichhia naupangte i la nia, in atanga riahbo fo kha a mawi lo alawm. Mi te enrawn leh an chìk kan nih hi.. I thil lo tawn tawh te chu engpawhnise, fel takin awm tum tawh rawh" a nu chuan a ti leh malh malh a. 

"Ka tum alawm" a ti hniam raih. A nu chalah a fawp zauh a. "Ka va intifai ang e" a ti a. A chhuak zui nghal. Engvanga chutia a nu laka nem viau nge a nih a inhre lo. A nun chu a ning thin. Pawl 10 lek a nih atangin sualna khur a dai tawh a. Aizawlah hian amah ang rual sual ve tak tak leh mipat hmeichhiatna lama chak lo ve tak tak zawng an awm chêk ang. Mahse, ani chu Minister lo ni ve tawh fanu a ni a, a hun tawn tumahin an hriatpui lo bawk. A pa nihna vang pawhin sawisep a kai hma bik a, tin, a sual duhdan hi mi ngei hlawh chi, a chapo leh mi chungtlak zawngin a ni lehzel bawk si. A chhungrila thatna la chambang ve pawh a ral tial tial ni maiin a hria. Ruatfela nen an inpawh viau lai kha chuan that ve tak taka pangngai taka khawsak a chak. A pa chu runluih dan kawng a la awm tho a ring. Mahse, Ruatfela nen lah tikhan an inbakkaih bawk si. Tin, that ve tuma a rilru a siam dawn lai tak hian, kha Rinawma, mi hur laka phuba a lak hun tur a ngaihtuah kai ziah a, "That hi a tulna a awm rih lo. Nakinah ka la that dawn tho si a" tih rilru a pu thin. Chu chuan tuna lo ţhat lawk kha a tih hreh phah tir a ni ber mai. 

A intifai a, a inthlak zawhah mu pahin phone a khawih. A ruih hi chuan a phone hi eng atanmah a ti ngai lo. Betu hi zawng a nei ve reng mai. A tam zawk hi chuan a taksa an ìt vang leh a sum eisak an duh vang tih a hre ve kar. Bialpa tia sawi fak tur nei lo mah se; zan hnih khat emaw thla khat dawn emaw han kawp lawp lawp ang hi chu a nei reng. Mahse, an term a tawp a, mi dang a melh leh mai thin. Mipakhat hi a hne zung zung a, a duh loh dan emaw a rilrem loh zawnga vawikhat an khawsak zeuh pawn kalsan a ni mai. Hmangaihna awmzia hi a hre lo va, hriat tul tihna a nei lo bawk. Hmangaihna tih thumal a ngaihtuah chhuah apiangin Ruatfela hming a hre chhuak thin. Hei hi a ni a hriatthiam loh fo thin chu. 

Status a en thla den den a. Ruatfela status-ah a tawp chat. 

"Vawiin chu Judy te inneih kan lawm ţha leh ang. " tih a lo nia! A ner sak. 

Chimawm a chhuah a, Ruatfela status chu comment-in, "I tuar awm. Ex te inneih lawm that leh chu" a va ti kher! Naupangchhia viau mah se; a ti ve duh hrim hrim. 

A seen duh lawk lo lehnghal. Reife hnuah, "Tuar hran lo ve" a rawn ti hram. A rawn reply duh ring ru deuh ring ngam chiah si lo vin a lo awm a. A rawn reply chuan a thawk a tirang hle. 

"Bialnute pawh venghim zo lo" a ti leh kher. Engvanga chutianga zuk ti hrep nge a nih a inhrethiam lo. 

"Venhim a ngai ve hleinem" a rawn ti ve leh chat. Chu thu chuan Arini thin a khei zak. Amah a sawi chhan ni tlata a hriat vangin. Nizan lama thil thlengte avang pawh khan.. 

"Chu.. Venhim ngai viau angin min lo hria elo? " a zuk ti ve leh. 

"Venhim chu i ngai. Mahse, ka venhim tur erawh i ni lo" a rawn ti ve ngat. An inchhang tawk viau e. Arini rilru erawh a na deuh. Hauh hrep a chak a, mahse, tawngkam na taka han tih maina tur a hre lo. 

"I mawl a nih chu" a zuk ti ngawt a. A seen a, a reply tawh lo. 

Judy te pawh an zu thleng thla a. Ruatfela'n hawihawm takin a lo dawngsawng. Mikhual dang an awm ta lo bawk a. An boruak a nuam viau. Judy nen an han inhmu leh chu amah Judy zawk chu a danglam deuh. An inhmuh lohna a rei ve ta deuh bawk nen. Ruatfela lah a hma aiin a lo hmel thain a vun te a lo nung ta sar bawk nen. Mahse, pasal a nei tawh tih chu a inhre ve kar. 

Zanriah pawh an sawm luih tlat vangin Ruatfela chuan a kilpui ve a. Judy chuan a thawhpui thin a ni tih bak a sawi lang bik lo bawk a. Rempuia tan chuan thìk ngawt ngaihna a awm lem lo. Zan dar 8 bawr velah Ruatfela chuan pawn lam te chu a va check leh thuak thuak a, Dik lo engmah a awm lo bawk a. A let leh ta vat. Corridor a zawh lai chuan Judy'n a lo call a, mammawh an nei a nih a ring. 

"Ruat, hetah in chung zawlah ka awm a. Lo chho lawk teh" a rawn ti a. Eng tak ni ang maw.. A roomah pawh pengkawi lovin in chung lam chu a pan chho nghal a. Judy chu kawr pante hain thlifim dawngin a lo ding vâng mai. Amah chauhin. 

"Eng nge ni ta? A va pawimawh awm ve" Ruatfela chuan a ti nghal a. 

A rawn lehhawi vat. "Eng em em ni lo e. I ngaihawm ve a " a lo ti mai a. 

Ruatfela chuan, "In pain min hmu a nge" a lo ti vat. 

"A ho em mai. Engahmah a ngai lo vang. Bakah a rui a. Ka awm peih lo. A bulah" a lo ti leh hmiah a. 

"A va zia lo ve aw" a ri ringawt. Mizo te zinga zu a mikhual lo lutuk leh buaina a thlen tamzia a ngaihtuah zui a. 

Judy chuan a kut a rawn vuan a, a phu zawk, "Zawhna ka nei a. Thudik tak sawi rawh aw. Khanglai khan i rilru tak tak min pe lo tiraw? " a ti zawi sap a. A mitah a melh kiau bawk. Ruatfela chuan dàwt hrilh chu tul berin a hre ta lo a niang, "Dik tak chuan.. Aw.. Ka rilru tak tak chu ka pe lo che alawm. Mahse, hei pasal tha deuh i nei tawh a. Ka lawmpui takzet che a ni" a ti ta a. Judy chu a khi sak, a nuih erawh a za tak tak hauh lo. 

"I rilru kha min pe ve tak takin ka duh ang che khan min duh ve ni la chuan, kan pa nen hian kan innei miah lo vang" a ti ta zel a. An awmdan chu dik dawnin a hre lo aniang, "Judy, chhuk tawh zawk ang. Tiang thil sawi hi a tul ber tawh lo. Tunah chuan pasal tha tak i nei tawh alawm" a ti zung zung a. 

Mahse, nui ri hak thawm an hre ta phut. An hawi let nâk chuan Rempuia a lo ding reng mai. Ruatfela chu kal tumin a pen nghal pâwk. A lai hùih mai. Rempuia chuan rum zetin Judy chu a melh a. 

"Hmanni lawkah kan innei a, tihian i bialpa hlui thawhnaah kan riak a, chutah in lo la inhmu zui a maw? " a ti chang ta fak mai. Rui hmel pawh a pu hran hauh lo. Ruatfela zawk chuan, "Thianpa, min hrethiam rawh. I ngaih ang khan engmah a thleng lo a nia. Ani nen chuan thian hlui mai alawm kan nih" a lo ti zung zung a. Rempuia chuan a ngaihpawimawh loh hmel kher mai. Judy chu pan hnaiin a biangah a beng ţhuai mai. A awp rawk a, thawm erawh a chhuah lo. Ruatfela'n a va chelh vat a, "Duhtawk teh.. Tiang tur a ni lo. I nupui nen hian eng inzawmna mah kan nei tawh lo. " a ti mawlh mawlh a. 

"In thusawi kha ka hre vek alawm. Engkim ka hria, i bialpa hlui a ni tih pawh i zèp a, a hma khan i phone ka checknaah ka hmu vek tawh. Chuvang chuan eng emaw tak a thlen ringin ka rui der a nih kha. Ka rin ang ngeiin in lo inhmu dun ngei a.. Zawngi, i hre viau ang" Rempuia chuan a ti ta tûn tûn a. Ruatfela khap daih chi ziazang a ni lo. A meng rum ûl tawh si. Dik tak chuan Ruatfela pawn a thiam ve tho, Judy chu a nupui ni ta se a thinrim ve tho a ring. Mahse, buaina lian zawk a thlen hmaa ruahmanna neih vat a ngai. 

"Engpawhnise, chhuk phawt ang u. Tha tetein sawifel ang u. Engtinmah kan awm lo a nia.. Ka tiam a che" tiin Rempuia chu a melh a. 

"Nang phiangsen lah hi tihsual nei miah lo ang chuan awm suh. Mi nu hmu ru duk dùk mipa chu mipa tha i ni bik lo vang. Tin, min khing ve ngam tur pawh i ni lo, nang resort-a thawk ve mai mai hian" tih pahin Ruatfela inrin loh lai takin a bekah a hnek ta bur a, Judy a rak nghal chul bawk. A pasal chu a va kuah bet, aniin a lo vai leng lawp. Ruatfela chuan, "Tharum zawng chuan ti lo vang. Tha takin a sawi dun theih a nia" a la ti hram hram a. A mipa rilru erawh thunun a tum hle. 

Mahse, Rempuia chuan a zuam laklawh nge, a rawn vai leh thuak a, Judy chu rak chul chungin inhnuaiah a chhuk a. A thiante kha a zuk pun dawn a ni mahna. Ruatfela chu a indang zel a, khawih ve tumna a nei hran lo. Rempuia a inhrosa thinrim zel a, zaidam taka a lo dawnsawn vang chuan a thinur zual nge khua a hmu tawh lo, rawn bawh thluk tumin a rawn thawk phei a. Ruatfela a petek zauh, ani Rempuia speed thunun zo tawh lo chu tlak dalna an siam, cement chang zetah chuan a va intauh ta bur a. A khawhmuh a thim nghal vek. A che chang zui tawh lo chiang kher mai. Judy te an rawn thleng chho ve chiah. A pasal tlu reng chu hmuin a va bawihsawm nghal a, Rempuia chal chu a thi zur zur a, nikhaw hre loin a let reng bawk. Ruatfela lam hawiin, "Ka pasal chungah hian eng thil nge i tih? Sawi rawh. " a ti tuar a. Ruatfela a lo hamhaih. Rempuia thianpa, dul kiar leng luang chuan Ruatfela chu a rawn vai thuak a, "Zawngsen" a ti nghal tuar bawk. Thil thlen dan teh thut chu a hrethiam lo. Engtinmah Rempuia kha a khawih hauh si lo. 

An thawm vang chuan hnathawk dang an rawn lang ve nghal vat a. An rawn ţhelh dai hram. Chutih chhung zawng chuan Judy chuan Ruatfela chu a ankhum ngat ngat! 

"Nang phiangsen hian ka pasal i lo khawih vel a. Eng atanmah ka ti tawh lo che. Zawng, police hmel i hmu dawn khawp e. " ti ten a tawngkhum nasa. Chutak chu mi rilru tluang Ruatfela chuan a hrethiam ta lo a ni. Chhan ve ngaihna pawh a hre lo reng a. Rempuia chu rang takin damdawiin hnai ber an panpui ta a. A thi em lo vang chu maw. Mahse, a va insawh na em a, a thluak lamah nghawng chu a nei maithei. A zan azanin Ruatfela chu police ten an rawn la ta nghal a. Judy khan FIR a thehlut miau si a.! 

A tuk chanchintharah Ruatfela te chungchang chu an chhuah zui nghal. Facebook lamah lah thu belhchiandawl lo a darh leh nual bawk. Nancy te pawn an lo hre ve ta vat a. An pa nen Police station lam an pan ve nghal. Arini erawh a la tho lo va, engmah a hre lo. 

Police lamin thu an han zawt chiang a. Judy chuan ţap par chungin thil thlen dan chu a sawi ta a. 

"Ka bialpa hlui chu a ni ngei a. Mahse, engmah inzawmna leh inbiakna kan nei tawh lo. A thawhnaah kan thianhoin kan zuk riak a, picnic a ni ber ang chu. Tah chuan zanah min hmuh a duh thu leh thu pawimawh tak a nih thu sawiin kei pawn ngaihthat lohna nei lovin ka han hmu ve ta mai a. Mahse, ani chuan tum dang a lo nei ru reng a. Min fawha min kuah te a tum chho va, keiin ka lo hnialin chhuk ka tum a, a phal si lo. Min chelh bet tlat si. Chutia kan inchai lai tak chuan kan pa hi a rawn chho va, tikhan an insual zui ta a ni. Kan pa phei chuan a khawih ve mang lo. Ka mangangin ka thiante ka zuk pun a, chumi chhung chuan tikhan nikhaw hre lovin a lo siam anih kha. Hremna a hmu ngei tur a ni. " a ti piap piap mai. Ruatfela ve thung chu a ngwwi reng a. Mahse, Nancy te hmel a hmuh takah leh a nu ngei a rawn lan ve takah chuan a ka a ang ve ta a. Thil nih dan leh thlen dan dik tak chu a sawi ve ta hmiah hmiah a. Mahse, fiahna leh hriatpuitu a nei lo. Judy erawh a thiante khan an pui tlat si. A chungthu ngaihtuah tur a ni ta a. Lockup-ah zan khat a riak ang a nih chu.. Bail erawh phalsak a ni hram. Mak takin Nancy chuan Ruatfela chu a ring thlap. A pasal erawh chuan engmah a sawi hran lo. Ruatfela mizia leh nungchang, khuta a thawh chhunga a awmdan zawng zawng avang pawhin Nancy chuan dawt a sawiin a ring lo. Judy zawk chuan inchhanhim nan dawt a sawi a nih a ring nghet bur a ni. 

"Ka thawk leh thei tawh awm si lo va, pawi ka ti.. Ka pi, mahse, engmah tihsual ka nei lo asin" Ruatfela chuan a ti a. A hmel chu a ngui vek. Nancy chuan a lainat ta em em a. 

"Engvangin nge i thawh theih loh ngawt ang. Ka ring che alawm. Theihtawp kan chhuah dawn nia, mizorama ukil tha ber kan ruai ang" a ti hmiah mai. Ruatfela chu a thaw suai suai a ni ber. Pathian hnenah lawmthu a sawi mawlh mawlh mai. 

Arini rawn tho chhuakin chutiang thu a han hre ve ta chu le.. A ţekin a ţêk a ni ber e. 

Ruatfela msg a type nghal. " Bang ang che. I phutawk a nih kha. " tiin. Ruatfela chu a hua, ni e, a haw takzet. Engvangin nge Judy chu a hmuh fal kher kher? Ruatfela insawifiahna erawh engmah a hre ve lo. Chuvanga dem em em a ni. A mood a chhe leh ta vek mai. 

Nancy te inah pheiin, A pasal a lo awm lo hlauh. 

"Û, i ban em? Ban ang che. Khatiang mawl lutuk" a ti nghal bawrh bawrh a. Nancy chuan dam thlapin, "Ka pui zawk dawn mawle" a lo ti sap a. 

"I â tawh a nih kha.. Mi zawng zawngin in resort tlawh an hreh phah ang a. An dem dawn che asin. Puih a phu lo" a ti nghek a. 

Nancy chuan a nau chu ngun zeta melhin, " Ka ban ang maw? " a ti zawi sap a. 

Arini chuan tìm hmel pu deuh hlek hian, "I thu thu" a lo ti leh lawi a! Nancy a nui hak hak, "Ka nau hian ngaihzawng a nei chiang. Ni e, i ngaizawng a nih kha" a ti ta a. Arini a ding hluai, rum zeta a u melhin, "A teuh lo. Ani nen khuan engtikahmah kan inngaizawng lo vang" a ti a. A lung phu dup dup chu a hre ran thung… 

(Muah ❤