A tel lovin 10

A TEL LOVIN… (Chapter- 10)

Ziaktu : Toni Râlte

"Kan riak dawn a" Arini chuan a ti sap a. 

"Aw le.. " tiin Register a va la a. Hming ziah a tum a. 

"A ngai lo ang. Ani chu" Johny chuan rawn din hma hret pahin a ti a. Ruatfela chuan mak tih hmel deuh hian a lo melh. 

"Aa.. Kei chu ka pe sa tawh alawm. Ka pe lawk tawh a" Arini chuan a ti vat. 

Ruatfela chuan, "I hming ka va hmu lo ve" a lo ti a. A thiante chuan a û chungchang an sawi a hlau si. 

"Aw.. Nia, Resort neitu te ka lo be tawh zawk a. Thawk thar i nia, an la hrilh lo che a niang" a ti vat. Johny bawk chuan, "Tu nge a nih i hre lo bawk a nih hmel, ani hi… " a tih mek lai chuan Arini chuan a ka a hup vat. "Chutiang sawi a ngai lo. Roomah kal nghal ang u" a ti a. Mi dangho chuan mak tih hmel deuhin an melh hrek hrek ringawt. A room lam an pan ta nghal. An luh rualin, "Ani kha kan sir hlui a nia. Chuvang chuan ka chungchang engmah sawi suh u. Ka u te ta a nih thu pawh sawi a ngai lo a nia" a ti nghal sawk sawk. 

"In sir hlui a nih vang chuan maw. " hrethiam vak lo hian Hruaia chuan a lo ti a. 

" ni deuh, a tam mai. Engmah sawi lo tawp ula a tha a ni mai" a ti ta a. 

Ruatfela chu a che buai angreng hle. Arini te lah an kal dial bawk si. Chabi pawh a pe si lo va, an hawng thei mawni le.. Ee ni tak, an phei dawn khan Arini'n a rawn la tak. A thawh phat atanga buaina niawm tak a tawk nghal chu pawi a ti hle. Engtia tih chi nge a hre si lo. Chutia a buai ruk viau lai chuan, Arini bawk kha a rawn lang leh a. 

"Englo, chaw kan duh dawn a. Mi paruk ei tur aw. " a rawn ti a. Amah a nih vangin he nau hian a namnul êm ni zawk le.. 

"Ngawi teh, room luah man in pe lo va, chaw ei in la tum zui.. Eng nge in awmzia? " a lo ti hâ a. 

Mi dang leh ni dang chu nise Arini chuan chapo takin a û te ta a nih thu a lo hrilh leh ngei awm si a. Mahse, tuna a hmachhawn hi mi dang a ni lo tlat. 

"Ka pe tawh tak tak alawm. I duh leh han zawt rawh. Kan inthenawm a, khitah ka pe nghal mai zel a" nem zet hian a lo ti a. Ruatfela a bu nghut ringawt. 

"In vai sawn room khata riah saw in tum tihna mi? " a ti a. Arini a nui hawk, "Kan tih fo dan alawm. Mut dan a awm ve mai zel" a ti a. 

"Ka student i lo nih tawhnaah ka fimkhurpui hle mai che. Mipa vek an ni si a. Ka sawi phak awm lo mah se; i awm dan hi a tha lo khawp mai" Ruatfela chuan a ti ta hmiah a. Arini a sen ţán ţán mai. 

"Nia, hei bak hi chu he tah min hmu tawh lo vang" a lo ti sap. Biak hman lohin a kal zui nghal. Ruatfela chuan fiah ve reng reng a duh vangin Nancy a call ta a. 

Thil awm dan chu a sawi a. Nancy chuan a lo intiam tawhna angin Arini chu a nau a ni tih a sawi lo. "Aw min pe sa tawh alawm. Nau anga ka en ania. Lo duat la aw" a rawn ti. 

Ruatfela chuan duat a tum hran lo. Mipa tam takin an hual alawm. Chokaah a va kal a, mi paliin rawng an lo bawl. An che thianghlim a, an hmel hmuh pawh a nuam e. Mi paruk tan chaw siam turin a hrilh a. 

"An lo lang leh tawh ni maw? " an chief cook chuan a ti sup a. 

"Tu te maw? " a lo ti vat. 

"Nancy naute kha.. A hma chuan an tawrhhlelhawm thei ania. Mahse, hei nang chu an zah che a niang. Thawm an la nei lo em mai" a lo ti a. Nancyin nau angin ka en a tih vangin Ruatfela chuan a nau tak tak a ni ang tih rin ngaihna a hre lem lo. 

"Umm.. An tawrhhlelhawm dawn chuan min lo hrilh ru aw" tiin a chhuahsan ta a. A room lamah a chho va. A inziak fel leh. A nu te a ngaihtuah angreng hle. Thenzawla an in pawh a pain a hralh tawh tih a hre tawh a. A rilru na teh mah se; tihnngaihna a awm ngang lo a ni. Rinpuii chu a huat rualin a pa pawh nep a ti a. Patling pui si, mawhphurhna hlen ngam lo leh tlansan a ni tih chu theihnghilh loh hram a tum.. 

Judy'n a lo call. Zangkhai vahin, "Aw ka pi" a ti a. A nui sâng bawk. 

Judy chuan, "Inneih hun chu i lo tel ve thei ang tiraw.. " a rawn ti a. 

"Eng tik nge khah" a lo ti he haw a. 

"A mak, kar leh nilai a ni tawh" titau deuh hian a rawn ti a. 

"Changtunu pasal neihah te chuan kan kal lo ngam nang" a lo ti uang a. Judy a rawn phun hlan. 

"School pawh a nuam tawh lo. I awm si lo va. I aiawhnu lah kha a inla ve sia.. Kan inmil lo" a rawn ti bawrh bawrh a. Ruatfela a nui hawk hawk. A thawhpui dangte pawn an lo sawi tawh. Mahse, a rel ve duh lem lo. 

"Sir, lo chhuk lawk mai teh a.. Buaina kan nei" a mu dawn tihin hnathawk pakhat chuan a rawn ti a. Hmanhmawh takin a chhuk. 

Arini te room ep chiah atang chuan Arini leh Johny bakah hmeichhe pakhat hi an rawn chhuak a. An ni hi a bialpa nen tlaia rawn lut an ni. Hmeichhe sam chu a thur bam a, a kamsir a thi bawk. 

"Eng nge thleng a? " Ruatfela chuan a ti a. Arini chu a melh ran bawk. 

"Engmah. ' a lo tihsan a. 

"An ni ho hian ka bialpa an sawisa a ni. Tunah sawn thi thei dinhmunah a ding reng" ţal faih faihin hmeichhia chuan a ti a. 

Arini a melh leh, a rawn melh ve chiah. 

"A hur man a hmu a nih kha" a ti zawi raih a. Johny pawh chuan, "Arini hian thiam lohna a nei lo. A bialpa khan a beisei a, kan chaw ei khama zu kan in laiin a rawn kal ve a, zu a rawn nei nual bawk. Kan in ho ta a. Arini kha a beisei deuh tlat a, awmze nei zet zetin a be kual a, kan mit a tikham tawh lutuk, mahse, amah Arini hian min khap vangin engmah kan sawi lo. Mut dawnah Arini hian phone a hmang a, bathlarah sawn a chhuak a. Chu chu a lo fight ve ringawt a nih kha" a ti ta mawlh mawlh a. Ruatfela chuan a melh kual a, roomah chuan lutin an sawisak pa chu chhuatah a lo let reng mai a. A thisen a chhuak nasa hle bawk. 

"Hetiang ringawt chu a dik lo. Damdawiina kalpui a ngai ang" a ti a. 

A bialnu pawh chuan a lo support ve vat a. An han kai tho a, a la rui hle bawk. 

"Ka kal duh lo. Engtinmah ka awm lo vang. Hetah ka aw duh" a rawn ti ta a. Lehlamah chuan a kalpui tur ber an driver lah a haw bawk si. Kalpui ngaihna chu a vâng riau ang. Bike-a phurh chi a ni bawk si lo. Khumah chuan muttirin an damdawi kawl ang angin an han sawngbawl a. A zia ve leh êm ang chu maw. 

"An sawisakna man hi chu an tel ang. Pawisa min pek a ngai ang" a bialnu chuan a ti tân tân a. Arini chu a lo nui hak, "Nang pawh ka ben nghal loh che" a lo ti. Ruatfela'n, "Biak lawk che ka duh. " a ti a. An lo melh ţhap. "Min lo zui rawh" a ti a, a kal nghal. Arini chu a hamhaih deuh naa a zui ve tho. Ruatfela roomah chuan an lut a. 

"School a ni tawh lo tih ka hre tho va. Mahse, farnu zilhin ka zilh ang che. I awm dan hi sim rawh" Ruatfela chuan a ti chang fak a. A ngaihtuahna hriat a har hle. Arini chu chair-ah a thu zawi hnak a. Ruatfela chu a melh reng ringawt. 

"Kha pa khan a tidik lo tih chu ka hria, mahse, kha pa chauh lo pawn an la beisei fo ang che. I awmdan hian zir hek lo. Zu i rui a, mipa bulah i tal a, in atanga chhuakin. Kum engzat nge i nih i hria. I rualpui te hi tiang hian an awm ve em? " a ti leh ta khawl khawl a. Arini a ngei leh huat vang lam aiin tha ve se a duh tlat, Pathian lam atangin a vei a ni mahna. 

"Min ngaihtuah ang takin awm der suh" a lo ti sap. Ruatfela a thle hâw ringawt. 

"Zilhtu i la nei hi lawm viau rawh. Hetianga i awm zel chuan i thi har lo vang" a ti ta hmiah a. 

"Thih chu a nuam zawk hle ang chu" ti el rawngkai hian a lo ti a. 

"Thih i châk te chuan thi ta che. I chhungte mangan turzia ka ngaihtuah hian ka lo hrehawmpui.. I la naupang si, lehkha i thiam a, hmabak tha tak i la nei asin" zaidam deuh zawk hian a ti a. 

"Hei hi ka khawvel ve tur reng zawk alawm. Mi pangngai treatin min treat suh" a lo ti a. A mittui a tling pam bawk. 

"I hun hmasa lamah eng thil nge i lo tawn tawh ka hre lo. Mahse, tu pawn nunhlui kan nei vek. Mahse, kan inhnehtir lo a ni mai. I nunhluia i hliam te chu phumbo tawh la, fanu tha tak ni tawh rawh" a ti ta mial mial a. Thahnem a ngai angreng khawp mai. 

"Min ngaihtuah tak tak em ni?" tiin Ruatfela mitah tak chuan a melh a. 

Lo melh let ve sakin, "Aw ka ngaihtuah che" a ti sup a. Ngawi rengin an inmelh ngawt ngawt. An rilrua awm erawh a dang daih. Arini chuan Ruatfela chu a mipa ni turin a suangtuah a, Ruatfela erawh chuan a farnu enin a en. Mampuii hi tiang hian awm ve ta se, a hrehawm ti lutuk hi a damrei pawhin a ring lo. 

"Naktuk atang chuan nun pangngai tak neih tum tawh rawh aw" a ti leh a. 

"Mi pakhat ka thah hma loh chuan ka fel thei lo alawm" a lo ti riap mai. Ruatfela a phu chiang kher mai. 

Arini hnaiah thuin, "Engkim sawi teh.. Ka pui thei maithei che asin" a ti ta thlawt a. Hmeichhe naupang lunglian leh rorum em em, a nu leh pa te pawh zah zo lo va zan riak chhuaka rui reng mai, tharum thawhna ngaina em em chu a ţap ta a. Ruatfela chuan a awmzia engmah hre lo mahse, Arini thil lo tawn tawh chu a nep a ring bik hauh lo mai. 

"I farnu khan a tet laia pawngsual a tawh ve loh avangin Pathian hnenah lawmthu i sawi ngai em? " a bianga mittui luang chungin a ti ta a. Ruatfela a ding hluai. Arini buaina chu a hre ta. A rin loh lam daih a ni. A kut a humruh nghal. 

"He thuruk hi tikhan khawvelah mi pangain kan hre ta chiah e. Ka nu chu a rilru nat êm vangin a natna a zual a. Engmah sawipui ka duh loh vangin ka pehhel char char a ni. Ka pa erawh chuan a bul rat atangin a hria a. Amah vanga ka nunkhua hi chhe ta vek a ni ka tih chuan i awih kher lo maithei. Mahse, a fanu chunga thil rapthlak tak titu a hum vang hian khawvela anchhia zawng zawng hi a chungah tla se ka duh a ni. " a ti nghet charh a. A mittui a tla tawh lo, a hmel landan chu a inthlak leh vek tawh. Mi hlauhawm leh pawisak nei reng reng lo hmel a pu a ni. 

Zawitein a kut chu a la kang a, a humsak a. "A va pawi tak em" Ruatfela chuan a ti hniam raih a. Pawi a ti tak tak tih a lang reng mai. Arini a lo ngaihdan leh en dan pawh a danglam nghal vek. 

"Chu aia pawi lehzual i hre duh em? Mipa ka mutpui phah asin.. Hehe.. Ni e, mipa ka mutpui thin. A chhan chu ka hneh zo lo alawm. Mi piangsual ka ni a. Chumi hrereng chunga hmalam hun atana tha taka inbuatsaih chu vantirhkoh pawn an thei lo vang" a ti leh ta sak sak a. Ruatfela chuan a kut chu a lo hum nghehsak sawt. 

"Tu nge? Chu mi tenawm chu" a ti ta a. 

"A thi tawh aniang. Khami atang khan vawi khatmah he khawpuiah hian ka hmu leh tawh lo. Ka zawng ru reng thin. Ka hmuh rual ruala vit hlum nghal turin englai pawn chemte ka pai thin" a lo ti a. Phuba lak chu a damchhan a ni tih a chiang kher mai. 

"Mahse, that ta la, i natna kha a reh ang em? I insum theih lohna te kha a zia sawt ang em? " Ruatfela chuan a ti a. 

"Ka hre lo. Ka that ang a, kei pawhin dam ka tum bik hleinem" a lo ti. Ruatfela chuan a sama zut pahin, "I hun tawn chu a rapthlak hle mai. Mahse, hei hi hria la la duh. Hetia i awma i pa i runluih emaw i intih lai hian nangmah i intichhe zel zawk asin. Chu ai chuan ţang sauh sauh zawk la, theihnghilh thei lo mah la nitin hneh tuma i beih phawt chuan i tan a awlsam tial tial mai ang. " a ti a. 

"Felin awmzia a nei lo. Mipa ka mutpui lo thei lo alawm" a lo ti hrâwk a. 

"Chupawh chu i hneh thei.. Arin, i thei asin. Mi chak tak i nih kha" Ruatfela chuan a lo ti ve tlat. He nau hi chhan chhuah a ngai a ni. Mahse, a tan chuan a harsa viau ang.

Kawngka an lo kik a, a va hawn chuan Johny a lo ni. 

"Arin, i pain a lo call che a. I nu dinhmun a tha vak lo a niawm e. A chau thut a" a rawn ti ta mai. Arini a ding vat, hmel phelh phang hian, "Ka haw dawn" a ti a. A chhuak zui nghal. Ani ang ruala chutiang buaina inchher chhuan nuaih han tawn chu Ruatfela chuan a khawngaih kher mai. A nu chu a tha em ang chu maw.. 

Arini chu chak zetin a tlan haw a. A thianten an zui ve bawk. A lungphu chu rang tak a ni. A nu khan a thuruk a hriat tak avang khan biaka sawipui a tum thin, mahse, a pehhel zel a. A nu bula nem tak leh derthawng taka lan a duh loh vangin. A nu chuan a pa chu a ngaidam nge tih erawh a hre lo. A tawngtai ngai lo va, mahse, a tlan lai chuan a rilruin, "I awm a nih chuan ka nu aiah kei hi min la zawk rawh" a ti a. A nu chu a thih vaih chuan amah vangah a ngai dawn. Nie, hrisel lohna chu nei neuh neuh thin mah se; tun hnaia a zual chhan chu amah vang a ni. A thuruk a hriat takah khan a lung tha lo a zual a. Ani lahin a pehhel zel bawk si. Damdawiin kawt a thleng a, bike pawh hung tha hman lo vin a tlan lut rawk rawk. A pa leh a û te nupa bakah a patea te nupa an lo thu thap. A nu chu ICU-ah an nawrlut tawh. 

"Khaw nge ka nu chu" a ti nghal tuar a. 

A pa chuan thinrima in dawnsawn hun a ni lo tih hriain a lo hrilh vat. A thiante nen chuan corridor-ah an thu tlar thap a. Sawi tur an hre lo tlang kher mai. Arini pawh a mangang takzet a ni. A nu chu heart attack niin, an chhan hman ang em hriat a la ni lo. 

Pu Lawma leh Rinpuii pawn sumdawnna chungchang an sawi a, Thenzawl daiah hotel nuam tawk tak siam an duh a ni. Mahse, an tlin kher ange maw le.. 

Chutia an titi mawlh mawlh lai chuan Rinpuii phone a ri a, a han lak chuan Pu Lawma farnu mampuii awmna kha a lo ni. 

"Ka u kha ka lo be lawk mai ang. A pawimawh lutuk a" a rawn ti a. Rinpuii pawn a pe ve mai. Engtikah emaw Lawma chhungte hian an la pawm a beisei ve bawk nen. 

"Ka u, hei Mampuii thaw hah a zual tlat mai a. Exam tur a ni bawk sia, a damdawi lah hi a man a sang angreng si a, inpeizawn tlang ila kan tia" nem takin a rawn ti a. Pu Lawma a ding zawk. 

Mampuii hi a tet lai atanga thaw hah nei thin a ni a, Damdawiin pawh vawi li lai an lut tawh. A chak loh deuh leh a rilru hah chang hian a zual thin a, oxygen hip tur hi a inchhawp reng thin. Mahse, an khawsak a harsa ta si a, damdawi a nghei ta ringawt a. Sawi rik ngam chi ni bik hek lo, an boruak khatiang kha a ni si a. Tunah a rawn zual leh thut a, Thenzawlah a damdawi a awm lo lehnghal a, Aizawla chah a ngai dawn a ni. 

"A va zia lo ve. Ka lo tum dawn nia, in chah tawh em? " Pu Lawma chuan a ti a. 

"Aw Valtea kan chah nghal a, a rawn hawn ang. A zia lobtak tak a ni. I tum sak theih dawn chuan a that chu. Kan pa kawchhung na a chhuak sia, hna a thawk thei si lo va, neih kan nei tawh mang si lo va, ka lo pun tawp che a ni" a farnu chuan a rawn ti leh a. 

"Tunah eng tin nge a awm a. Ngawi rawh. Ka lo chhuk dawn nia" Pu Lawma chuan a ti zung zung a. Phone a dah a. A insiam nghal, "Mampuii thawhah a chhuak leh a, ka zuk lang ve ange. Chuan cheng singkhat min lo pe teh aw. A damdawi man kha a to angreng si a, bakah a ni te pawh puih an ngai re re e" a ti zung zung a. 

"Singkhat a?! A sawi pawh i va ngam zawk ve a" Rinpuii chuan a ti ta mai a. Pu Lawma a ding chawt. 

"Rawn la mai rawh" a ti nghut a. 

Rinpuii chu khawng leh lawhin a ding to a, "Sangkhat a tawk ang. Chutiang mai maia insenso ka phal teuh lo mai" a ti ta hmiah mai. Pu Lawma pa zaidam em em chu a alh phat mai. A rui miah lo bawk. 

"Ka in ka hralhna zawng zawng kha ka pek nghal loh a.. Rawn la ringawt mai rawh. I pawisa ka hmanh dawn pawh ni hlei lo" a ti ta fak a. Rinpuii lah chu a nui lui vel a. Pu Lawma thinin a diar ta lo nge a beng ta pawp a, Pu Tlânga bengngawng bak inah an awm ve lo. 

"I rawn la dawn em? Mai mai che hian a. I ta emaw i lo ti e lo? " a ti a. Rinpuii chuan ring leng lawng hian, "Kut min thlak a maw? Zawng phiangsen.. I va zak lo tak" a ti phiar phiar a. 

Pu Lawma chu roomah lutin an nu pawisa dahna chu a va hai a, Singkhat leh sangnga a la chhuak a, engmah sawi lovin a chhuak nghal. Fanu te meuh an han nat chuan pawisak a lo nei vak bik lo a ni mahna le.. Rinpuii tihngaihna hre lo chu a insawh a insawh ringawt. 

Arini nu pawh a tukah chuan a rawn harh ta a. Biak erawh phal a la ni lo. Arini pawh chuan a nu dam loh chhung na nâ na chu chhuah loh a tum ve a ni. Ruatfela zilhna zawng zawngte kha a theihnghilh lo. He pa hi a ngaihtuah leh run thin a, hmuh lah a chak thei si. A ngaizawng tak tak em mawni dawn ni. 

Ruatfela pawh nuamti tak chuan a thawk ve ta zel a. Hnathawk dangte nen an inhre pawp ta bawk a. An inkawm thei phian. Arini pawh chanchin a han zawt deuh reng a, an inbiak tam phah angreng. Pathian thu hrilh em em lo mah se; a insiamthat theihna tur eng emaw tal a sawi ziah thin. Judy te inneih erawh mikhual an ngah deuh vangin a kal thei ta lo. Gift erawh a thawn ve ta tho. A lawmpui hle. A nu te pawh mami te nen an innelin an inpawh ve tawh a. Hrehawm an ti lutuk tawh lo. Engmah ti lo va awm mai mai thiam hek lo, Kuhva zawrh a tum ta a. In lamah a buaipui a, an in chhak lawka dawrah a dah ve thin. An zia sawt viau e. 

Class Xii exam an tan chho ta. Ruatfela pawh a tang ru hle. A farnu neihchhun leh Arini tan a tawngtai ve reng mai. Mampuii thaw hah pawh a zia ta bawk a, lehkha thiam tak ni lo mah se; a inzir peih em a. A pass ve mai chu a rinawm. Arini chu a ngaihtuahawm loh. Exam pawh kum dang aiin an zo hma a, Mampuii pawh exam zawh tuk leh ah Aizawlah a rawn phei ve ta bawk a. An kim ta. 

Ruatfela leh Pu Thana chu pool sirah eng emaw sawiin an titi nasa mai a. Pipe an siam tha pah bawk. Pu Thana nen hian an inpawhin an inkawm thei viau mai. Mikhual pawh an nei lem lo. A chang hi chuan an awl thin viau a, a changin an rawn buk leh laih a. Ruatfela chuan a hna chu a thawh chi tak niin a hria, a hnathawh ngaibtuahin a hlawh chu tam a ti. Nancy lah a felin dawr a nuam bawk si. A pasal erawh a nel thei meuh lo a ni e. 

Xenon a rawn tlan lut a, an lo thlir reng. Driver seat atang chuan Johny a rawn tum thla chhak. Mi dang pawh an rawn chhuk ve sap sap a. Arini thiante vek an ni. A tawp. Berah Arini pawh a rawn tum thla ve a. Arini a hmuh rual chuan Pu Thana chuan, "Chhei le.. Hmabak a va ko ve. Kan misualnu a lo thleng e". a ti ta sup a. 

Ruatfela chuan, "I hre ngai mi? " a lo ti vat. 

"Ka hriat lohin Nancy nau a lawm. Kan ex MLA Pu Thanga fanu naupangber, misual turu lutuk a nih saw" a ti ta mai a. Ruatfela thil khawih lai a tawp chawt. 

"Nancy nau maw? A nau tak tak maw? " a ti hû a. 

Pu Thana chuan maktih hmel takin, "A hma pawn a chanchin ka sawi tawh kha. Kha nu ngei kha a nia lawm.. Rinsangi, Nancy te unau zinga naupangber, keite a nih saw" chiang kekkawkin a ti ta a. Ruatfela chu a ding a, Arini hlim hmel taka lo phei mek chu a melh ngawt ngawt a…