Psalm 51:10

PSALM 51:10

Ziaktu : Toni Râlte

Ka nuin min tur sek avangin phur fahran lo vin ka insiam a. Zingkar hi ka ngeih vak lo, ka mood hi a chhe vek zel. Zing kar tihah ka tho tlai over ngai chuang lo naa, zing dar 5 hmel hi ka hmu khât. Tlai lamah zel ka work out thin bawk. Vawiin hi ka pa Thianpa Pa mike-a fanu naupangber man hlan ni a ni miau a, Pa Mike-a a boral tawh si a, ka nu leh pa chuan nu leh pa chan an chan a ngai tlat a ni, chuta tul zual leh mamawh lei tura kalpui turin ka nuin min nawr a ni. Tetea pawh a awm ve reng si a. Kei hi chu tirh ka nawm vang nge kan in chhungah hian chhehchhawl deuh roh ka ni. Ka vui hran lo. Ka nu fapa duat lai ka ni tho. 

Ka û room pawh a la thim khap. Ani phei hi chu a tho hma ngai lo hrim hrim. Duat rawn tih takah lal hi a hrawt ve bawk nen. Ka nu chuan in hnuaiah min lo nghak ran tawh a. Ka nu aia hmel tha hi Aizawl nu-ah an tam ka ring lo, zing karah pawh a nalh vang zel mai. A sam a tan tawi hmarh a, ka pa nen an inhnial phah nghe nghe, "Kan upa ve zel a, sam sei hnûp chuan min tilang upa zual" a ti tlat a. Ka pain a hneh leh ta lo. 

"Kal nghal mai ang aw" a lo ti a. Buk nghut pahin chabi ka ban a, kan chhuak chu a ni mai. 

Kei hi Vanlalchhanchhuaha ka ni a. D'Rose chanchin lo hre tawhte chuan min hriat mai ka ring. Drose nau Mampuia kha ka ni. Ka phirpui pawh Tetea a nih kha. Ka nu chu Zodingpuii a ni a, Dite tia koh a ni thin. Ka pa pawh Dinfela. Kum 7 liamtaah khan ka pi chuan min boralsan tawh a. Ka pu Pu Vanlala pawh ka pi boral atanga kum khatna lekah a lungleng lutuk a ni ber ang chu, a taksa chak tawh lo nen. Min kalsan ve tawh bawk.Lehlam rei tak min dampui ve ve a, a hlu tawk tawh tho mai. In puiah ka pa rorelna hnuaiah kan la khawsa ve zel a. Ka tetlaia kan awmpui ti mai ila, U Zari khan pasal a nei ve tawh a. Nu Thiangi pawh pasal fel deuh neiin fa pakhat an nei a. Ka lawmpui takzet a ni. Ka nuin awmpui neih a ti ta vak lo va, mahse, a hah phah. Ka û hi in hriat tawh ang khan hmeichhe zia pu mang lo a nih vangin eirawngbawl leh engilo chu ka nuin a khawih tam zawk a. In chhung chet erawh ka u chuan a khawih ve tho. Tunah hian kum 22-na kan hmang ve mek a. Ka û pawh pasal nei rual zet a ni ve tawh. Mahse, la ngaihsak lo vet vet tak a ni. A bialpa kum 10 zet a nihpui U Mamawia lahin accident vangin a boralsan ta si a. Chungte avang pawh chuan, mipa lam hi a hawi ta meuh lo. Ka lainat thin khawp mai. 

Bazar kan thleng phei a, sa zawrhna lam kan pan nghal. Nu Akimi te hi Pa mike-an a boralsan atang khan an harsa chho ve riau a, ka nuin a sumdawnnaah hna a pe ta hlauh zawk a. Chu chu an eizawnna ve ber a ni. Mak ka tih ve mai mai chu, Pa Mikea chhungte lamin an ngaihsak vak lo chu a ni. An tu leh fate an ni ve tho si a, vawiinah erawh a langsar chinah an rawn intithei leh viau maithei. An mizia hi mipa e ti lo chuan ka ngaithei vak lo thin. Tuna pasal nei tur Hruaii pawh hi keini ai chuan a û hlek a, a pasal tur nen hian an inzui rei hle. A chhan pawh an unauah a nuin a en ve ber leh a innghahna a ni a, pasal neihsan daih kha a hreh ve êm a ni. Mahse, vanduaithlak takin nau a lo pai ta si a. An inkutsuih lo thei ta lo a ni. 

Ka nu chuan vawksa chu kg eng emaw zat a lei a, a pawlh tur antam kan zawng leh. Inneihni a nih lem loh vangin chaw ei tur an tam vak dawn lo va, a zia deuh. Bawlhhlo eng emaw kan lei leh nghek hnuah kan chhuak ve hram. Dawr inhawng pawh an la tam lem lo. 

"Hruaii chu eng nge i pek ve dawn? " ka nu chuan a ti thut a. 

"Drawer kha Tetea nen kan incon a, kan lei tawh. " ka lo ti var. 

"Ni dawn tak" a lo ti ve mai a. Ani pawh hi a haihawt sawt riau. Apu Lawma boral atang khan ka nu mizia hi tlem chuan a dang ta deuh. Khawvela a laichin, a thisen zawmpuite zawng zawng an kal bo ta si a. E ni leh lo, U Duati a la awm. Hmana kan tetlaia ka nu û Nupuii lah kha jail-ah inawkhluma hmuh a ni a, a ruang pawh kan inah an rawn nghat nghe nghe. Kha nu kha chu kan hre chiang ve vak lo, a chanchin sawi tur pawh ka hre lo. A pu Lawma erawh kan innelin kan inpawh em em a, Tetea aiin min duat zawk bawk. An ina ka riah te kha a va zing tak. Mahse, ani pawh natna mak tak a vei a, a upat ang zel khan a zual chho a, Alzheimer a nei ta hial bawk. Pite Zâmi hi ka fak tawp thei lo. A tawp thlengin Apu Lawma kha a ţawiawm a ni. A thih zan te khan keini chaw ei leh intifaia kan haw zawk lai a ni a, an nupain an inbawihsawm kha a nia. Au Duati lah a rai puar ul bawk si. Khatih lai kha chuan ka nu mi chak tak pawh kha a kehchhe chiang hle. Api Zâmi amah ringawta awm tir chu Au Duati te nupain an ngaingam ta lo va, an in chu mi dang luahtirin au Duati te inah an hruai phei ve ta a. Api Zami erawh chuan Apu Lawma lu nghahna a nih vangin kalsan harsa a ti viau. Mahse, amaha awm tur chuan a ngaihtuahawm si. Tunah chuan Au Duati pasal U Zothana Tar enkawlna hmunah Api Zami chu hnathawk ang deuhin a awm a. Tlem chuan a khawhar leh lungleng pawh a zia tawh a, hmuh pawh a nuam lrh tawh khawp mai. 

"Api, nimbu tui hi khawngaihtakin min leisak ve u la" mipa naupang bal thit thet, a kamiz var uklai zet ţet hrip hrep hian a lo ti a. Ka nu chuan, "Ehe.. Mama, engzat man nge ni a? " a lo ti nem thliam a. 

"50 man a nia" a aw chu a inthlahrung ngawih ngawih. Kei ka pa lohna lam ka ti dawn nge mi chanhai leh vakvai te ka hmuh hian ka inhaw lek lek thin. An tan tihtheih nei sia ka ti lo hi tiin. Tin, ka vanneihzia pawh ka hre leh thin. Ka nu chuan a purse atangin cheng 2000 tlang a phawrh a. Naupang chu a pe a, a la ngam lawk lo lehnghal. 

"Tikhan hei hi nei la, nimbu tui erawh kan la nei a, i zuar leh zawk dawn nia aw.. Kal tawh rawh. " tiin a lu-ah a chul a. A inher paha a mittui a hru zauh chu ka hmu hman, ka nu pawh chu a thlir vawng vawng mai. 

"Nu, tiang ho tan hian eng emaw chu kan tih a ngai a ni" kal pah chuan ka ti a. 

"A ni ngawt mai. Kan sumdawnna hi han lian chho leh se, in unauin mi harsa in la tlawh chhuak dawn nia" a lo ti a. Kumtin kum tawp apiangin kan veng chhunga mi harsa zual te tan ka nu leh pa ten Cheng nuai 2 an sem chhuak thin hrim hrim a. Keini unauin khawlbawm kan hawng bawk thin. Kan unauin sum chu kan sem thin. Veng chhungah fak kan hlawh ve viau, mi min fak duh vanga ti erawh kan ni lo. Kan veng chhung bak kan tanpui thei lo hi a hrehawm zawk. 

In kan thlen chuan ka nu nen kan thil lei te dahfelin kan phe buai nghal char char. Tumah an la tho lo. 

"I u han kai tho rawh. Em em zel hian" ka nu chuan a ti hlak hlak a. 

"Û.. Û, tho rawh. Ka nu puih a ngai" tiin a room kawngka ka kik dat dat. 

"Ninawm.. Zan a la nih hi" a rawn ti leh hlar mai. Ka nui ringawt. Ani kaih thawh tum hi chuan chhel a ngai. Tetea pawh ka kaitho a, ani hi chu a zia deuh. Games a khel nasa a, a mengrei thin. Tunah hian M. Sc (Mathematics) 3rd sem ka zir mek a, Tetea erawh M. Com a zir thung. Sumdawnna lam hi ka tui ve lem lo. Phaia kal hi Tetea'n a chak thin a, mahse, ka nu ten an remti lo. Mize ngheh loh lai a ni si a, min ringngam chiah lo a ni maithei. 

Ka pa pawh a rawn tho ve a, Ka nu nen an inchuks zauh chu ka mitsirin a hmu reng. He tiang nupa hi a nia ka awh thin. Nupui ka neih ve hunah chuan ka nu leh pa te ang hian ka awm ve ang ka ti thin. Tak ana.. Ngaihzawng hi pahnih chu ka nei ve tawh. Higher ka kal laiin pakhat, College-ah pakhat. Higher kal lai ami kha chu naupangchhe inngaihzawn ang kha a nia! Biak pawh kan inbe tha ngam lo. College-ah ka huai ve ta hlek a, Tetea hian min fuihin min zirtir nasa bawk. Ka fawp ngam ve tawh a, mahse, chu aia thui kal ka duh lo. Ka bialnu kha kam college-ah a luck leh lar pawl a ni ve si a, kei lah zûm chi, zei tehchiam lo ka ni bawk si nen.. Ka lakah a beidawng nge kan college ami tho nen an inkawp ta daih a. Kum khat dawn kan inzui ve hman si a, ka rilru a na ve khawp mai. Collgege chhuah hmain an inru ta nghe nghe. An inruk takah kha chuan ka rilru a tawp ta hlauh a, va ngaihna ang kha ka nei ta lo. Khami hnuah hei vawiin thlengin ka la single. 

Tetea erawh a dang zak thung. Ka mize letling chiah a ni a, a zeiin a lerh hle. Bialnu chhe lo zet zet a nei kal reng. A bialnute pawh an rawn leng fo mai. Ka nu hian a hau thin, "A tawpah i buai ange, fimkhur takin thlang rawh" a ti thin a. "Luck miau chuan" a lo ti deuh ziah bawk. Nie, a luck thawkhat ve bawk a ni. Kan hmel a inan êm vang hian a bialnute pawn min hai fo mai. A nuihzatthlak thei a nia aw.. 

"I u chu a va mu rei leh ve.. Tete, nang han kai tho ve teh" ka nu chuan a bai chawh pah chuan a ti a. 

Tetea pawh a kal ve mai. Tette atanga ka nu enkawlna vang nge kan nu leh pate thu hi kan hnial ngai lo tluk a ni. Ka pa ai mahin ka nu thu hi kan awih zawk emaw tih tur a ni ka pa hi chuan eng em em a sawi vak lo. A tawpkhawkah min zilh a ni deuh mai. Ka nu thu hnial ngam awmchhun chu ka û a ni mai. Phak chuapin a lo chhuk a, a ham bai bai mai. "Vawiin te chu mut rei ni ka lo ti ve em em a. In ninawm lutuk" a ti hluk hluk a. Ka pa chuan, "Hruaii te man inhlan a nia, inpeih hma a tha" a lo ti vat. 

"Ni dawn tak. Anih chuan chaw ei vat ila" a la tizui. Ka nu chuan, "I tho chiah a, chutiang rawn sawi suh. Intifai phawt rawh" a lo ti a. 

Ner nak chungin intifai turin a kal ta a. Tukthuan kan kil laiin, Pa Bena te chhungkua an lo thleng. A ngaite bawkin an fa naupang zawk Hlutea a harh leh hle. He nau hi kan inah chuan tlangnel ve tak a ni. Nu Eni hi ka nu cousin tho a nia, kan inpawhin kan chhungkhat dangte ai mahin kan inzawmna a thuk zawk awm e. Hlutea chu Tetea bula thu leh chatin a chaw thleng a zenpui leh nghal a, a Ù Aby erawh zakzum deuhin a thu fel leh thán mai. Ani hi zawng tleirawl ve ţan chho a ni bawk a, a nungchang a zawiawiin biak erawh chuan fel takin min chhang thin. A tetlai pawn kan awm ve hman. 

Ka u chuan, "Aby, chaw lo ei ve la" a ti lung lung a. 

"Aih, ka puar tawh" a lo ti fel leh thlap. A lian lo a, a ngo hle thung. A hmel pawh a chhe lo, a nui sen sen chu hmuhnawm tak a ni. A nau Hlutea erawh a u mize letling thawk, harh zet, tawngduh zet a ni thung. 

Chaw kan ei kham a, Tetea thleng sil ni a nih vangin engthawl zetin insiam turin room lam ka pan. Zan lamah keiin thleng ka sil a, aniin zing lamah a sil thung. Ka u in chaw ei thleng a sengfel thung thin. Chaw ri rual loh hi ka pa duh dan a nih loh vangin ka hriat theih tirh atangin ei rual loh chuan vawi li vel chiah kan la nei awm e. 

Ka inbual phawt a. Ka nute ruala kal ve kher ka tum hran lo. Tlangval kan inti ve tawh a, nute zui det det chu thing ka ti. Ka u chuan a zui leh pek ang. Ka inbual zo, towel venga ka tei thuak thuak lai chuan, Nu Enkawli a lo lut thut. 

"Mampui, I nau khu rawn phur mai ta che. Bungrua eng emaw kan dah sia, kan tawt deuh a.. " a rawn ti a. Aby a swina a ni tih ka hria. Hlutea chu Tetea'n a phurh ka ring. 

"Aw min lo nghak se" ka ti liam puat a. Ngawi rengin a chhuk leh mai. Aby'in min nghah si avangin ka speed a rang ta deuh. Inneih ni a la ni lo bawk a, inchei chiam ka tum lem lo. Ka room dawt chiaha awm ka û in, "Nuuu, eng nge ka hak dawn" a tih lang lang chu ka lo nuihpui. Nula senior a ni ve ţêp tawh a. A naupan lai atangin ka nu thlansak zel a la inbel. Nep lutuk mai a. Ka nu nen an inbiak lai chuan perfume ka inkap mawlh mawlh a. Faifuk rut rut chungin in hnuai lamah ka chhuk ta a. Aby pawh a lo thu ran mai. 

"Aby, Bike asin ka ken dawn? " ka ti satliah a. 

"Umm pawi lo" a lo ti sap. 

"Kal ila" ka ti a. Rang zetin a rawn tho nghal. Ka dar pawh a chen pha lo. E taka, Tetea'n a star tih hi ka hrilh tak ang. Ka phone phawrhin, "Ka hrilh dawn nia" tiin Tetea ka text zauh. Min reply na pawh ka en hman ta chuang lo. Aby hian Tetea aiin min ngaina zawk ka tih chuan ka tisual maithei. Ka bulah a awm tam zawk a, min be tam zawk bawk. Tetea hi miin an nel theih nen a mak ka ti fo. A lai emaw a zah emaw a ni maithei. 

"Aby, thil hrilh tur che ka nei a" tlan pah chuan ka ti a. 

"Sawi la" a ti thawp sat. 

"Startu che ka hria a" naupangchhia deuhin ka ti a. 

"Hmm.. Tu? " a nuiin ka hria. 

"I hre chiang rap. Keimah ang deuh" ka ti a. Keipawh ka nui. Min chum taih a, "I zak lo aw" a ti chhum hmak. 

"Nge a sawi reng zel che a.. " ka ti leh a. 

"A lerh si" a ti sap. Ka nui tawp, sawi dik lo chuang lo. A lerh ve bawk alawm. 

"A luck ve a. Chuvang alawm" tiin ka unaupa chu ka thup mawi ve a. 

"Unau kan nia" a lo ti daih. Tetea chu a duh lo mawni le.. Hmm, ka sawi tawh a. Bawhzui ve tawh mai rawh se. 

Nu Akimi'n min lo dawngsawng tha kher mai. An chhung khat an lo awm ve bawk. Ka nute pawh an lo thleng ve nghal mai. Ka u pawh a chhe lo ve viau e. 

Dar 1-ah hunserh hman tur a lo ni daih a. Ka duh aiin ka kal hma. Mahse, tihtur dang ka nei chuang lo bawk a ka ti leh tho. Aby chu ka bulah a thu ve zel a. Nu Akimi fate zingah a kawm rual an awm bik lo nen, a zakzum bawk si ka khawngaih reuh. 

Tetea te an lo thleng a, Akimi bulah a thu ta chat. Awmze nei zet hian min rawn melh zui. Aby a lai chhe takzet. Hlutea pawh a nungchang a la tha rih e. Hunserh kan hmang zo a, a hmangtu a thiam angreng. A sawi duah lo. Kan man ei te kan la diat diat a. Hruaii pawh an khawsak ngaihtuah chuan a chhawm tha dawn hlein ka hria. Hunserh hman zawh, chaw ei nana la hma deuh siah ka chhuak a, meizial ka va zu zuai. Nu Akimi te kawt zawl maiah ei in an siam a. Fatu pawh an awm ve laih laih mai. Pawna bench an hunah chuan ka thu a, mi dang pawh an awm ve. Mahse, a tumah ka hre lo. 

Ka meizial bung paihna tur ka zawn ruk lai chuan kan thutna lam panin hmeichhe pahnih hi an lo phei a. Fatu an ni tih ka hre nghal. Nu Akimi te pawh catering te pawh rawih mai awm ania. Mahse, lehlamah chuan hetia han fatu vel hi a zo a, a nuam phian mai. Chung hmeichhe lo kal te chu ka lo phek en ve mai, ka piah lawka bawlhhlawh bawm lo awmah chuan ka meizial bung chu ka va paih a. Ka let leh nghal. Ka thutna lai chu a lo la ruak a, ka thu leh nghal. 

Ka phone phawrhin group velah ka lut kual mai mai. Ka bul chiaha thu chuan, "Kuhva i nei mial lo maw? " a rawn ti a. Ka melh nghal kâwk. "Nei miah lo mai" ka ti a. Ka ei ngai lo tih sawi kher erawh ka tum hran lo. 

A bul chiaha thu chuan, "A ei ngai lo vang.. " a lo ti sap a. A aw nalh lutuk avang chuan ka melh nghal vat. Nichin khan ka lo phek en ringawt a, chiang taka ka han melh takah chuan engtin emaw ka awm. Ka nghing dawt ti ila a dik thei mai awm e. Nula te chhe lo tak, kei aiin a upa maithei. A upatna erawh a tam lo vang. Ngo over lo, hang lutuk bawk si lo a ni a. A sam chu a kawi sawlh a, a chhipah sang takin a ţawn kawh vah. A chal a hlai lek lek a, a mitmu chu a dum bakah a lian angreng. A hnar ngul erawh tribal hnar ngul ang ve tho a ni a. A hmui pawh a pan lam a ni. A kareh zau dan chuan a tilang sexy viau bawk. Hmeichhia hi ka en chik ngai lo va, tun hi ka chik ve ber tum a niawm e. Kan inhmu hnai angreng bawk si. Ka lo melh rei deuh nge, "Dik lo a awm mi? " a rawn ti leh. A aw chu a thâm chhelh a, ka sawi thiam danin Bolywood actress Rani Mukherji aw ang kha a ni. Hindi film hi ka en tam lo naa, hranghlui ho chu ka hre ve nual. 

"Awm lo ve. Aa.. Engmah a ni lo" ka ti bah nak. 

A thiannu ka bula thu zawk chuan, "Hruaii te hi in chhungte mi? " a lo ti vat a. Ka lawm angreng. 

"Umm ni mai ang chu" ka lo ti a. Kan inlaichin dan zawng zawng sawi kher chu tul berin ka hre lo. 

"Kuhva chu in ei chak viau em? Ka va lei dawn mi? " ka ti leh a. Inlak polite ve ka tum nasa. 

"A ngai lo. Kam a ruak em a, ka ti mai mai. Hei phei hi chuan a ei lo"tiin Sexy-i chu a kawk a. A ha var zet langin a rawn nui sen sen. 

"Mampuia ka nia,.. " tiin ka han chibai hnuhnawh a. 

Ka bula mi chuan, "Lawmpuii ka nia, hei hi Ruatfeli a nih hi" a lo ti vat. Lawmpuii chu ka hriatsual loh chuan nula senior ve lam a pawl tawh, a tawngkam pawh a puitlingin a confi viau. Ruatfeli chu ka va nuih suk a, "In lo fatu ve a. In fel khawp mai" ka ti ringawt. Tetea chu awm se biak dan tur a haihchham leh awm si lo. 

"Nia, saw lai lawk saw kan in a nia. Hruaii hi kan thiannu ve tho a ni bawk a, puih a phu alawm" a lo ti ve mai a. Ţawng reng se a aw chu ngaihthlak reng ka chak. 

Kan titi mek laiin ka u leh Aby an rawn kal a. 

"Mampui, dawrah kal lawk ang u.. " a rawn ti a. Ka û chu an en duh hlawm viau. Nia, a hmel hi a tha ve êm a, mahse, mi hrang ni ta se bialnu atan ka duh loh chi, a nu hnap lo em mai. 

Ka tho a, "Kuhva chu ka lo leisak dawn che u nia" ka ti sup a. Kan kal nghal. 

"I lerh ve reuh sia" ka u chuan a ti leh pek. 

"Ka chhun che a" ka lo ti ve hmak. 

"Vanlalchhanchhuah, zak teh" a ti leh hlar a. Aby a lo khi vur vur. 

Kan let leh chuan an lo la thu a, chaw ei a hun ţep. Kuhva chu Lawmpuii ka pe a, Ruatfeli chuan, "Khawi maw a rah kha ka lo thial ve"tiin a la ve a. Fatu dangten chet an lak tan avangin, "Kan va kal ve tawh ange" tiin min kalsan zui ta nghal a. Ka ruak huaiin ka hria. Hruaii ka va zawt chiang dawn tak. 

Tetea a lo chhuak a, kan han ding dun chu mi mit kan la leh ngei mai. Kan inang ve êm bawk a ni. 

"I sawi tiraw? " a ti zawi sup a. 

"Sawi e. A lerh si a ti che. Mahse, a huat vak hmel loh che" ka lo ti sa sa a. A khi suk, "Ka va bem thlu awm e aw. " a ti ngal ngal a. 

"Mahse, i bialnu dangte anga kawp chi a ni dawn lo ania. Ka nuin a hriat phei chuan" ka lo ti vat. 

"Ka hre ve. Neih ka duh alawm" a lo ti hluk. Mak ka lo ti viau thung. Chaw chu kan va dawh ve a. Ruaithehna velah hian dik tak chuan la ei puar ngai meuh lo. Ruatfeli chuan vawk lu bai a lo thutchilh ran a. Mahnia insuah mai tur a nih laiin ka fiam chak tlat a, "Min lo suah ve reng reng teh" ka ti a. Nui chungin min suah nghek mai. Ka ei zo thei awm der si lo. 

Kan ei kham a. Inah kan lut khawm leh rih. Hruaii chu a buai angreng si a, biak ngei ka duh bawk si. 

"Lalhruai, hman tawh teh. Biak che ka duh" ka ti sur sur a. Nui chungin, "Lawk aw.. A rei lo vang" tiin a thiante bulah a va kal leh zuai. A rawn let ta vat a. 

"Fatu zing ami Ruatfeli saw ka duh" ka ti nghal tâwng. A meng phar deuh a, "Lalchhanchhuah, teh tawp a che. Ruatfeli maw, nang aiin a upa asin" a ti sap a. 

"A ho e, Age is just a number" ka lo ti zauh. 

"Lo kal teh" tiin roomah min kai lut. A serious riau chu mak ka ti deuh. 

"Ih maw, Amah saw chu a fel tawp a, kan inkawm ve thin. Mahse, a awmna saw a patea te in a nia. A pa hi a thi tawh a, a nu lah sawi pawh a nuam vak lo, zu zuar ania, veng chhung atangin an hnawtchhuak a, tunah chuan khawchhak lamah pasal a um ta daih a. A nau mipa nen a patea te saw an bel ve tawp. A patea chu a fel reng, a nuteii saw a hahthlak ve a, ngaihzawng pawh a nei thei lo. A nei ngam lo a ni mah zawk ang chu. Ih, chawhmehte a zuar ve thin a, inhlawhna awm ang angah te a inhlawh. Amah chu ka fak, mahse, a chhungte vang sawn i la nat ka hlau" a ti ta duah a. Ruatfeli chu ka hre chiang ta deuh. Iaina pakhatmah ka nei lo, chutih a hnekin ka ngaisang zawk. 

"Bialpa a nei ngai lo maw? " ka ti hû a. 

"Nei ve tawh e. Hei hi ania ka sawi tum. Kan veng thenawm ami nen rei deuh an inzui ve a. Inneih hial te pawh an tum. Mahse, a tha saw chhawr an duh vangin a bialpa chu an hmu mawh chho va, zan khat an inru ve zuai tawh. Apatean a va hnuk chhuak. Tikhan an inthen zui ta a. Amah hnaih ve deuhtu te chu a nuteii sawn mei nei zet zetin a lo tawng khum thin a, amah Feli hian a nei ngam tawh lo. " a ti leh dap dap a. Ngaihnawm ka ti hle. 

"Chu! A thlawi ve zuai tawh ni maw? " ka ti hul hak a. 

"Umm.. Mahse, zan khat lek ania" a ti hram a. Pawi ka ti hran lo. A dinhmun ka hriatchian takah chuan ka vei zui telh telh. 

"Lo sawi la, chuan a number min pe bawk la" ka ti ta a. 

Ngawi rengin min pe ve mai. Lawm takin ka hawn tak kha.. 

A tuk inneih ni chu nalh zetin ka inchei ve. Ka u ka phur dawn zui! Ani pawh a rawn nalh ve khawp mai. Ruatfeli kha ka be ta miah lo. Ka ngam lo deuh a niang. Vawiinah hmuh ngei ka inbeisei. Inkhawm pawh kan thehnem kher mai. Hruaii chu a nalh takzet. A pasal tur hi a felin a puitling bawk a, ka lawmpui khawp mai. 

Inkhawm banah thla an han la leh a, tu emaw ka zawng rilru. Ka hmu mai thei. Hruaii thiante ho in thla an lakpui lai chuan ka va hawi phei a, aw le.. Ka hmu ta e. Kareii! A nalha a nalhzia chu. Mi dang mitah chuan eng teh ual a ni kher lo maithei. A inchei simple em em a, a sam chu a chhipah a zial a, make up a inhnawih chhah bawk si lo. A nui sen sen chu ral khat atangin ka thlir ngawih ngawih. Keini chhungkua pawn thla kan va lakpui ve a. Ruatfeli lam ka va hawi chu min lo en ve chiah, ka ţek chhawkin ka hria. 

Mipa ka nia lawm le tiin ka va pan ta hmiah. 

"In va fel ve, " ka ti puat a. Lawmpuii nen bawk an lo ding leh. An nui sáng a, "Nang pawh i nalh bawk si" Lawmpuii chuan a lo ti a. 

"Kawm tur pawh ka nei si lo va, min kawm ve ula" ka ti thâwr. Zak lo hi ka va inti tak. 

"Kawm tur kan nei bik lo" Ruatfeli chuan a lo ti vat. Kan pathum chuan kan inzui ve ta ral ral a. Chaw pawh kan dawh ho vek. Dawhkan khat kilin kan ei tlang leh bawk. Kan innel ve ta viau mai. Kei aiin an upa ve ve bawk a, min ngam sarh sarh viau. Lawmpuii lah tawng duh tak, kawm nuam zet a lo ni bawk si. Ka tan a la tangkai ngawtin ka ring. Chaw ei khamah "Ka thlah ang che u" ka ti a. An lo aw ve mai. Lawmpuii chu a chhuk hmasa a. Ka duhdan tak a ni. An in lam kan pan lai chuan, "I number ka nei tawh a. Ka lo be deuh sek dawn che nia aw" ka ti a. 

"Engtin nge i neih? " a lo ti hâ. 

"Hruaii ka dil a. Pawi i ti em? " ka ti a. Ka naupan ngaihtuahin ka zak lo ka inti. 

"Pawiti lo ve. Ngatan nge ka number te i tih ve" a ti a. 

"Ka duh alawm.. Hruaiin engmah a hrilh lo che mi? " ka ti a. 

"Hrilh e" a ti ringawt. Ka ding det a. "Chuan" tih pahin ka melh nghal. 

"I û rual daih ka nih hi" a lo ti nghal. Ka ner sawk, "A ho chutiang" ka ti nghat a. 

"Min hriatchian loh vang mai mai anih kha" a ti sap a. A hmel chu a ngui deuh. 

"Ka la hre chiang zel dawn che lawm.. " ka ti sup a. Sawi belh tur ka van duh tak. Ka hre mai bawk si lo. 

"Kan thleng" a ti hap a. An in chu a tha teh chiam lo. A te bawk. Hei vang hi a nih dawn hi a nuteii te chuan pasal neih an phal loh ka ti rilru a, a tha chhawr an thlahlel hle a ni ngei ang. 

"Leng turin min sawm dawn lo mi? " ka ti a. 

"Lo leng rih lo la a tha zawk. Anih aw.. Ka lawm e" tih pahin min rawn melh vâwt a. A khi sak bawk. Hmanhmawh zetin an inah chuan a lut ta nghal a. Ka inher a, kei pawh ka tlan zui nghal. 

Zanah whatsapp atangin ka va bia a. A seen thei lawk si lo. Ka mangangin ka call tawp. A ring quit ţêp hnuah a rawn la a, "I buai em? " ka ti nghal thawr a. 

"Tu nge aw" a lo ti sap. Ka number a la nei lo tak e. 

" Keimah.. Mampuia" ka ti tlang nghal a. 

"Ehe.. Umm.. I va fel ve" a rawn ti a. A nui hak ri ka hre bawk. 

"I buai em? " ka ti leh a. 

" Buai deuh. Panhnah ka roll a" a rawn ti a. 

"Ka be chak che sin le"

"Kan inbe thei tho lawm"

"I buai sia "

"Ka tawng pah thei tho" a tih mek lai chuan nutling aw hian, "Hnathawh lai laia phone hman ziah mai.. Dah teh dah teh" a rawn ti lawng lawng a. Ka inthlahrung zo vek. 

"Ka dah phawt ang. I hman veleh whatsapp ah lut rawh aw" ka ti sawk sawk a. Ka dah nghal. Ka khawngaih reuh. Reuh kan ti tak naa kei aiin a upa zawk si. Kum 4 laiin kan inthlau. Pawi erawh ka ti lo nasa. 

Ruatfeli nen ni 3 lai kan inbe ta. Min haw bik lo va, mahse, aw min la pawh duh chiah lo. Ka be lui zel tho. Hruaii lahin tan min lo lakpui ve bawk. 

"Ni 5 kan inbiakna a ni ta. Min duh ve tawh mai la " tiin ka text ta tawp a. 

Smiley lei chhuah lai a rawn dah tuar ringawt. 

"Mawh" ngampa zetin ka ti leh. 

"I naupan nen nen i zei reuh" a rawn ti a. Tetea zei zia a la hre lo zawk a, nasa min ti dun ngawt ang. 

"Zei vang pawh a ni lo.. Min duh em? " ka ti leh ngat. Areh vang vang hnuah, "Aw" tih chiah a lo thawn. Ka va hlim tak. Ka nui hawk thei mawle. 

"Inhmu ila" ka va ti a. 

"Tunah hian maw" a rawn ti hû. Zan dar 10 a pel tawh. 

"Naktukah" ka ti a. 

"Chawhmeh lak ni a nia. Ka hman ka va ring lo" a rawn ti a. 

"Ka kalpui ang che. Khawiah nge" ka lo ti vat. 

"Tachhipah a nia" a rawn ti. Class ka off mai aniang chu. 

A tuk zingah tuilum ka in laiin ka nuin, "I class kal pahin Chawlhhmuna i pu Siama te kha rawn tlawh teh aw. Kawnglawng min pe dawn a, rawn hawn teh" a ti a. 

"Ka kal dawn lo" ka lo ti sam et a. 

"Timaw? I dam lo mi? " a ti vat. 

"Ka bialnu nen kan inhmu dawn a. Chawhmeh ka kharpui dawn a" ka ti zung zung. Ka nu bulah engmah zep kan nei ngai lo. 

"A tu chu nge i ngaihzawn ve tak? " nui chungin a ti a. Ka û a rawn chhuk ve mek. 

"Hruaii thiannu a nia, Ruatfeli, nakinah a chanchin kimchang ka la hrilh ang che. " ka ti sawk sawk a. 

"Hmm.. Ka hria.. Inneih nia i zui i zui kha a ni chiang. Nang aiin a upa lo mi? " ka u chuan a no lak pahin a lo ti ve a. 

"Upa e. Mahse, a fel alawm. Ih, chawhmeh te a zuar thin a, thil dangte pawh.. " ka ti a. 

Ka nu chuan, "An khawsak a awlsam bik lo a ni maw? " a ti sap a. 

"Nakinah ka la hrilh ang che u. A khawngaihthlak reuh lutuk" ka ti a. Intifai turin wash room ka pan nghal. 

Tetea leh Aby pawh an ni ve tawhin ka hria. Aby hi a zakzum êm a, Tetea tan chuan a hrehawm thin ngawt ang. Mahse, an inhmeh reuh ngawt ang. Chaw ei khamah ka insiam nghal a. Ruatfeli nen kan inbe pah bawk. A inthlahrung a, keiin ka lo khawngaih thung. Tachhip lam pana kan tlan laiin, "Kan 1st date chu a ho hle mai" a ti sap a. A nui bawk. 

"A dangdai alawm.. " ka lo ti mai a. Ruatfeli hi college a kal ve a, mahse, a zir zo ta lo. A sawi danin lehkha zir lam hi a tui vak lo a niawm e. Mahse, ka rin danin a chhungte vang a nih ka ring zawk mah. Ka duh zualna em em pakhat chu a chhungte a rel ve ngai lo hi a ni. An chhungkaw chanchin a sawi ngai lo bawk. Ka zawt duh bik lo bawk. 

Tachhip kan thleng a. Chawhmeh chu a thlang kual a, ka lo thlir reng. Thahnem a ngai hle tih a lang reng mai. Ka thianten min hmu se min nuihzat maithei. Thing an ti leh bawk ang. Ni e, mi hausa tia insawi chu ka duh lo naa Aizawlah na nâ na chuan a khawsak nuam ve pawl kan ni ngei ang. Thawmhnaw, motor engpawh a changkang leh manto lam hlir nei thin kan ni. Chutih lai kara bialnute chawhmeh khar chhawng han kalpui chu inhmeh lo min ti ve thoin ka ring. 

"Maian bag hi load hmasa ila" a ti a. Ka lo bu nghut. Maian bag chu ka va pu lawp a, motorah ka hlang lut. Thil dang pawh kan phur teuh mai. A zawrh vek tur a niawm sia, a va hahpui dawn em.. 

"Ka zak" kan haw lamah chuan a ti zawi sap a. 

"Engah maw? " ka lo ti haw. 

"Min zahpui em? " a ti a. Hmalam a melh tlat. 

"Engah nge ka zahpui ang che" ka lo ti a. 

"Tiang mai hi ka ni sia. Ka nau zirna atan hian ka thawh a ngai ve sia.. A chang chuan ka zak ve thin. Mahse, dinhmun azir hian kan lo danglam thei khawp mai" a ti leh a. Ka tlan muang hret, "A zahthlak hleinem. Hnathawh zak ho hi alawm zahpuiawm zawk. I puitling ka ti" ka ti a. 

"Ka pa kha chu la dam se, tiang mai mai hi chu kan ni bik lo vang mawle" min bia ni chiah pawh ni loin a ti a. 

"Sawi nuam chu a ni lo ang a. Hruaiin min hrilh ve hlek a, i nuteii saw a tha vak lo mi! " ka ti ta a

A khuh kharh a, "I bul ania ka zep lo mai ang. Mi rel hi ka hreh viau nain.. Nia, a tha lo satliah lo. Min hmusit tlat a, an tan chuan hnawksak unau kan ni ringawt.. Belh tur dang kan nei bawk si lo va" a ti ta a. A hnuk a ulh lek lekin ka hria. 

"I nau nen in dang daih ula" ka lo ti hmanhmawh. 

"Nia, kan tum ve thin alawm. Mahse, an phal si lo va, in dan kan tum apiangin that an chhuah ziah a, nuteii a dam lo ziah bawk. Kan unau ringawt te chuan awm ila, ka dam tha anih chuan kan rethei bik lo ang" a ti a. 

"Ngawi rawh. In dan dan tur kan la ngaihtuah dawn nia. Kawng a awm em em ang. " tiin ka lo hnem ve a. 

Thil dang kan sawi zui ta daih. Kan hlim ve phian mai. A chawhmeh zawrhna thleng ka kal ve zel a. Chawhmeh te chu ka rempui ve vel. Ka zei lo teh e. Kan han nui leh rih. A thutpuite chuan an lo fiam zuk zuk bawk. 

"Haw tawh rawh.. Vawiin atan chuan tawk rawh se.. " a ti a. Hrehawm a tih lutuk loh nan kei pawh thuawih takin ka haw ve ta mai. Ka bialnu chu ka duh telh telh. A hmel pawh a tha tulh tulhin ka hria. 

Zana a whatsapp status chuan min tinui, "Ka mihring hriat tawhah a la chapo lo ber.. Mi danglam tak a ni. Ka va vannei si em" tih thu hi. Keimah min sawi chhan tih ka hai bik lo. An ina len a phal vak loh vangin kan inhmu zen thei lo. Chawhmeh a zawrh loh niin eitur a siam a, an vengah a zuar kual thin. Hun a nei lo ve bawk si. Zan lamah lah kuhva a khawih reng bawk. Kei lah chhun lamah class kal a ngai ve bawk nen. Mahse, kan inbe reng tho va. Ka ringtawk bawk. An dinhmun harsa tak atanga khai chhuah chu ka chakin ka ngaihtuah fo mai. 

Ka nu te bulah a chanchin kimchang ka sawi tawh bawk. Engmah harsatna an siam lo. An khawngaih ve viau bawk. Ka u phei chuan, "Nei la. A nau pawh rawn chhawm daih se" a ti hmiah. Mahse, nupui nei turin ka la upa tawk lo va, puitling ka la inti hek lo. 

Pa Bena te in lam panin ka tlan a, ka nuin Nu Enkawli bekang um min laktir leh pek. Kan chawhmeh leh kan thil ei hi a zo thei ania. Zo hi thil thing sawi nan erawh kan hmang ve ngai lo. Choka dawhkan kilin Aby a lo thu a, Alu a lo vel mek. Ka uang chak ta tlat. 

"I nute an awm lo hlauh chu a van tihzia tak" tiin a bulah ka thu sawt sawt a. Lai zetin min lo melh. 

"An awm reng. Anu a inbual mek" a lo ti sap a. A kut chu ka vuan a, "Ka ngai che a" ka ti sup. Mak ti hmel pu hian, "Hmm.. Min lo be zo chiah sia.. Min ngai leh hman tawh a maw" a ti ha a. 

"Ngai e.. I ngaihawm alawm" ka ti a. 

"Aaa.. U Mampuia zawk i ni chiang lutuk.. I van chhe tak" tiin a ding hluai. Ka insum zo lo chu ka nui nghek. Min chum leh taih taih a. A nu inbual zo a rawn chhuak chiah. 

"Ti nge nangni unau chu" a ti ve hlut a. 

"Hei, Aby hian a bialpa zawk emaw min tia" ka tih laiin ka hmui a lo hup vat. 

"I va zak lo tak" a ti chul bawk. 

"A nih reng kha" thei leh thei loin ka ti. Nu enkawli a hrilhhai letling. Phuba ka la ve a ni mai. College kal laia ka bialnu kha Tetea pawn a lo tihder chiam tawh, an lo inkiss hman tep zui. Ka thungrul ve chiah ni teh se.. 

"Zanin chu ka lo leng dawn aw" ka ti fiamthu a. 

"Aw.. Ka dang tawh lo vang che. An mood fuh lai a ni bawk a" Ruatfeli chuan a rawn ti a. Ka phur kher mai. Hma tawkah ka chhuak. 

"Lo thu rawh" tiin thutna min kawhhmuh a. An in a zau lo bawk a. An chêp ve hmel hle. Pahnah roll tur a lo inchhawp nuaih a. A nuteii leh keimah ang rual vel tur nula hian sofaah catloge ni awm tak an lo keu bawk. A patea te hian fa pathum an nei a. An upa ber mipa chuan nuthlawi a luhkhung a, an milai chuan pasal a nei tawh bawk. An te ber erawh Shillongah lehkha zirin a awm thung. Tuna keimah ang rual awm ve hi amah chu a ni maithei. 

" Hei ka thianpa Mampuia. anih hi" tih pahin a nuteii te chu a melh a. An lo hawi rual thawt. 

"Hei ka nuteii ania, chuan hei hi Kimkimi a nih hi. Ka nuteii te fa naupangber" felfai takin a ti leh a. Ka lo bu nghut nghut. Ka nui bawk. 

"I va fel ve i rawn leng a" a nuteii chuan a ti a. 

"Fel pawh a ni lo.. " Ka lo ti ringawt. An nufa chuan min kawm a ni mah zawk. Ruatfeli chu panhnah roll in a buai bawk si. An mizia hre sa tan lo chuan mi fel tak ang mai an ni. Tha tak chuan ka chhang ve zel tho e. A zan khatna a ni bawk a. Ka leng rei duh lo. 

Zan thum lai ka len ve hnuah chuan min hre ve tawh viau. Mahse, nuam tih lohna ka nei. A patea te fanu Kimkimi chuan min ngaizawng ta tlat. Ka len luh rualin ka bulah a thu nghal chawt a. Min ngheng talh talh thin. Ruatfeli lah a buai zel bawk si. Ka len chhan ber aiin kan inbe tam fo zawk. Kimkimi mizia chu ka ei lo satliah lo. Ka ten deuh.. A chhan pawh zan khat ka leng chu thingpui hmeh ka keng lut a, ka nu cake siam a nia, Ruatfelin ei ve se a tih vanga keng ka ni. 

"U Fel, thingpui va lum rawh. Hei a tui dawn lutuk" Kimkimi chuan Ruatfei kuhva thel mawlh mawlh chu a ti pek a! Ka farnu chu nise ka melh rum khawp ang. 

Ngawi rengin a va lum a, a rawn dah thlap. Cake chu Kimkimi chuan a zai a. Ruatfeli a zai kep ta hauh lo. Ka ngaihdan a pel ta tlat. 

"Ruatfel, lo ei rawh. I tana ka lo ken anih hi" ka ti ta hmiah a. Kimkimi leh a nu an tum hmak. Ani Ruatfeli pawh chuan a lo ngei ru ve deuh nge a rawn kal a, a duh tawka lian a zai a, a ei ve hmiah. A bang chu, "I nau pe ve rawh. Ka nuin in tan liau liau a ur ve anih hi" ka la tizui! Kimkimi te nufa mitmeng chu a hmuhnawm tehchiam loh. Mahse, ka huaisenna chu ka bialnu tan tawrhna a lo ni daih. Ka hawn hnuah an nufain an lo chilh rawn hrep a niawm e. 

"Khatiang mi hausa fapa te chu i tan an sang mah mah. Inlak mark that nana inlak khawngaihthlak te kha a ngai lo" ti zawngin an lo ti vel. Ka va ngei tak. 

Ni khat a chawhmeh a hralh thei deuh a, kan class ban rualin ka peng a, hawn a lo tum vel mek a. Remchangah ka la a, kan ina leng turin ka sawm ta a. "Min en la, ka thin em hi ka zak" a ti tlat si. 

"I ho eee.. An hre vek.. Khatiang kan care lo" ka ti ve tlat si. Min hnial hreh ve bawk nen, kan inhruai lui thei ta hram. A zâm ru hle tih erawh ka hria. Ka nu a lo haw tawh a, Tetea leh ka pa erawh an awm lo. Ka nu chuan nelawm takin a lo be sauh sauh a. Ka nu hi chu ka va chhuang thin tak. Ka u pawh a lo chhuk ve a, "Awiii indang daih ru.. Kan in hnuai khu a ruak dawn tak asin" a ti nghal bawrh bawrh. Ka lo ìp deuh. Ruatfeli pawh a nui ve tawp. 

"Hawh, ka room ka hmuhtir ang che" tiin ka kai chho va, a hreh hmel angreng. 

Ka room chu a melh kual ruai a. A zum dâk mai. Ka khawngaih tawp. Khumah ka thutpui a. A kut ka chelh.. "Tun atang hian a rukin inkhawl ve la, i nau nen indang vat ru. Inneih dawnin ka la naupang ve si a" ka ti a. 

A thaw hap. "Nia ka tum ve alawm. Sing hnih chu ka inkhawl ve tawh asin" a ti ta a. Ka lo khi vur vur. Kan inngaihzawn atangin vawi 5 vel bak kan la infawp lo. Chu pawh deep kiss a la ni lo zui. Zawi muangin a khabea dawmin ka kuai her a, "Ka fawp dawn che" tih rualin ka fawp zui hmiah. A thiam ang tawkin min lo chhang let ve. Kan duhthawh telh telh a, khumah ka bawhthlu ta. A thaw a rang a, kei phei chu ka sa chhuak tan mek. A hnute pawh ka hrawm nawk nawk mai. Min dang eih lo chu mak ka ti deuh. A tawp thlenpui mai pawi ka ti lo hman. Mahse, "Mampui, ka virgin tawh lo ania.. I hriat kha. Chutiang anih vang erawh chuan mipa dang laka inphalrai ka tum lo. Nang erawh ka zah chein ka tan i hlu em a, i duh duhin min khawsakpui thei e" a ti fiah kâk a. Chu chuan min dek a ni tawp. A inthlahrunna leh ka laka ba nei anga a inhriatna vang chuan ka lakah a inphal tihna. anih chu. Chu chu ka duh bik lo. Ka thawhsan a. 

"Inneih hunah aw" ka ti khur dat. A rawn tho a, a sam thur bâm chu a huih mam thuak thuak a. "I lakah hian ka te em a. Ka zak a ni" a ti leh tawp. Kei aia upa ni si hi a naupangchhia ve fo. 

"I te lo e aw.. I lian mah mah" ka lo ti ringawt. Nghet zetin kan kut kan inhumsak a. Ngawi rengin kan thu dun vang vang. Khamini atang phei kha chuan kan inpawh zual a. An inah erawh ka leng zen tawh lo. Kimkimi te nufa ka hne vangin. Amah pawn pawi a ti lem lo. 

Engtin nge Kimkimi chuan ka number a neih ka hre lo. Min lo be chhen mai. A zei hrep lehnghal. Ruatfeli a rawn rel deuh ziah bawk. "U Feli hi chu a fel reng, mahse, a lo thlawi ve zuai tawh vang khan mipa lakah a easy ve a, hei ber hi ka nute pawn an khuahkhirh chhan a nia. Amah hi chu a fel reng" ti ten a rawn sawi thin. Vawi khat phei chu ka ning deuh a, "Tu in nge zawt che" tiin ka reply. A reh hmak. Mahse, zanah a rawn ri leh nghal zat tho. Hneawm hian a. Ka hmeichhe duhzawng a ni lo hrim hrim. A che fel loin a dul a kiar si! 

"Mampui, ka lo rin che nen.. A va mak ve. Mahse, ka haw chuang lo che ania. Kei chu phatsan tlak ka nia lawm" Ruatfeli msg chu ka chhiar nawn tluk tluk mai. 

Ka call ta nghal a. "Eng nge a awmzia" ka ti nghal. 

"I hriat ang kha a ni mai. I bialnu pawh a chhe lo khawp mai. Ka tluk lo han han viau a ni" tiel rawngkai hian a rawn ti a. 

"Eng maw i hriat? Ka uang lo ania" ka ti vin thak. 

"Whatsappah thlalak ka rawn thawn ang" a ti sap a. A off nghal. Whatsapp ka lut vat. Thlalak chu a lo awm chiah reng a. Ka hmuh rualin ka nui nghek. Tetea leh Aby te pahnih inkai dun lai a lo nia! Ruatfeli haihawtzia hi chu aw. Ka call leh, "phirpui ka nei tih i hre reng sia, bakah Aby pawh inneihnaah khan i hmu ve bawk sia.. I van â tak " ka ti bawrh bawrh. A ngawih vang vang hnuah, "Ka van â tak" a ti ve hlawl. A rawn nui nghal hawk hawk bawk. 

Kimkimi'n Tetea te pahnih thlalak chu a lo pe niawm tak a ni. He nu teivet lah hi. Exam kan zo a, tihtur nei hek lo. Ka leng leh ta nge nge a. Panhnah te ka roll pui fo bawk. A nau nen pawh kan innel ve ta viau. Kimkimi te nufa pawh an la huangtau zel e. Biak chhiatin Ruatfelin a tawrh phah zel si a, ka be chhe ngawt thei lo. 

Zan khat ka len laiin Ruatfeli patea pum a na thut mai a, mi dang awm hek lo. Damdawiin lam ka panpui ta a. Kimkimi te nufa an tel ve bawk. An lo admit ta mai bawk sia. Kan buai angreng. Zu chhia a lo in nasa ve deuh a ni ngei ang. 

"Mampui, kimkimi hi va hawnpui leh phawt rawh. Keiin a pa chu ka awmpui mai ang" Pi Siami chuan a ti a. Dar 10 a ri ţèp. Kimkimi nen chuan kan haw phei leh ta a. 

"Mampui, U Feli nen hian in ni mi? " a ti hlawl a. 

"Umm " ka lo ti mai a. A che deuh sawk, "Mi dang ang bawkin a bum thlu ve leh tawh che a ni maw" a ti a. A nui har har. A nuih a za tak tak lo tih ka hria. 

"Min bum hleinem" ka lo ti mai a. A ngawi ta hmak. In kan thleng a, Ruatfeli chu a lo la meng a. Chanchinte kan han hrilh a, pawi a ti ve hle. 

"Mampui, riak ve mai teh a. Msa (Ruatfeli nau) lah a riak bo daih si a (chawlh lai tiin tlawng kamah hna an thawk) kan pahnih chauh chuan a nuam lo e" Kimkimi chuan a ti sar sar a. 

"A hlauhawm loh e" Ruatfeli'n a lo ti vat. 

"Ka hreh hran hleinem. Mahse, ka nute kan be phawt ange" ka ti a. Ka nu ka be zui nghal. A lo remti ve mai. 

Sitting room thutthleng seiah ka mu dawn a. Ruatfeli ka khawngaih vang ania ka riah ni. An ni pawh an mu zui ve nghal. Ka lu chu a za mer mer a, ka harh nghal kâwk! Ka phu chiang kher mai. Kimkimi chu ka mutna thutthleng seiah chuan rawn thu vein ka sam a lo chul mek a lo ni. Ka thu chhuak hlawl a. 

"Eng nge a" ka ti phak chuap. 

"Ka mu ngam lo va.. " a ti ţiau. 

"Hlauh tur a awm hleinem. Ruatfeli nen mu dun ula " ka lo ti a. 

"Ani chu a mang a chhe si.. Ka peih lo" a lo ti nghat. A thaw hawk a., zu rim ka hre nghal. A dik lo ka ti reng a. 

"Zu i lem ve hlek duh em? " a ti sa sa a. 

"Aih, duh lo. Va mu rawh. Engmah hlauh tur a awm lo" ka ti puat a. Ka mu tha leh nghal. Chutih lai tak chuan Ruatfeli room kawngka a ri rak, a rik rualin Kimkimi chuan min rawn bawh nghal thlawp. Ka lo hamhaih hle. Ka hmuiah a rawn fawp ta mai a. Nemsawn ka tumin min kuaibet tlat bawk si. Kawngka bula Ruatfeli ding zum reng chu ka va hmu. Kimkimi chu ka nam sawn ta dawrh a. Chhuatah a thu hnawk mai. 

"Kimi eng thil nge i tih a? " Ruatfeli aw chu a chang kher mai. 

A tho ţaih ţaih a, "I lo buai vena tur a awm lo" a ti hmak a. A roomah a lut nghal. Ruatfeli chu a rawn phei a, "Haw rawh. " a ti fak a. 

"I thinrim mi? Eng mah a thleng lo. I hmuh vek kha" ka lo ti a. 

"Ka hria lawm.. Ka hre vek. A rui anih kha. Chuvang chuan haw rawh" a ti leh a. Zing dar 3 a ri ţep. Mit thial urhin ka haw tak nge nge kha. Ka thil tawn chu ka va duh lo e aw. 

A tuk chawhma dar 10 velah Ruatfeli chuan min lo call a. A rawn ţap! A dinhmun chhiain harsatna tawk fo mah se; a ţap ngai lo. A mittui tla pawh ka la hmu lo. 

"Min hnawtchhuak a" a ti a. A insut hlawp hlawp. 

"Engvangin maw? " ka lo ti nghek. 

"Nizan thil thleng vang khan.. Kimkimi khan keimah min mawhpuh vek a, nangmah nena riak dun angin min sawi a. Nuteii thinrimin min beng a, ka insum zo loin engkim ka sawi chhuak ve a. Min hnawtchhuak ta a ni" a ti a. 

"A that chu.. Chhuak daih ula a tha a ni mai. In luah tur ka lo zawng nghal ang" ka ti hmiah. 

Pa Bena te in hnuai an sa zo fel chiah a, miin an hauh nual tawh naa ka ngen nasat em vangin Ruatfeli te luah an phalsak. Ka va lawm tak. Va hruai chhuak turin an in lam ka pan ta a. A lo insiam mek. Pi Siami leh Kimkimi chu an lo ang hlak hlak. Ka hmel an hmuh rual chuan, "Hei han khap ve teh.. Chhuah a tum anih hi.. Min chhuahsan hi a chak zek zek reng a. A ngaihna tak pawh ka hre lo. Keini aia hmangahtu hi a hmu awm chai si lo" pi Siami chuan a ti nghal bawrh bawrh a. Ka ner sawk. Ka zah buai peih tawh lo. 

"In hnawhchhuah vang anih kha. A in luah tur pawh ka be fel tawh" ka ti sak a. Ruatfeli chu ka pui ve daih. An nufa chu an hrilhhai hmel hle. An buai ve khawp ang le. Han chelh tum viau mah se; kei ka lo awm ve bawk nen, an chelh ding zo ta bik lo. Lawmpuii a lo lang ve ta bawk a. Bungrua an ngah lo bawk a. Kan inthiar zo nghal mai.. Bungbel engmah an nei si lo va, kan pe khawm liam liam tawp. A inthlahrung ngawih ngawih tih a lang reng, lawmthu sawi ngaihna pwh a hre lo. A sum khawl ve sa erawh lak chhuah ka remti lo. Kum tawp hmain ka khawl bawm ka hawn phah. Tam lo mah se ka pe ve ta mai. A nau pawh a be tawh a. A tukah a rawn haw dawn a ni. An khawsak a ziawm daih zawk ang. 

"Ka zak ee.. Kei chu. I chhungte pawn min hmusit ngawt ang" a ti a. A mittui a tling pam bawk. 

"A teuh lo. Hetia i awm hran hi an duh ve daih zawk.. " ka ti a. 

"A mak ee.. Mampui, min duh hi. Ka tha si lo va, ka thing bawk si.. Ka la upa zawk zui" a ti leh niah niah. 

Dik tak chuan a tir kha chuan han ngaihzawn satliah tum kha ka ni ve bawk a. Ka hmeichhe duhzawng tak a nih vangin. Mahse, a rei a, harsatna. anei fo a, buaina a tawk fo bawk. Chungte avang chuan ka nghet telh telh ni maiin ka hria. Ka hmangaih tawh ka ti ngam sak. 

"Ka nu ka lo sawipui ang a. Hna ruak a nei angem tih. Chawhmeh chu zuar tawh suh. I. Thawk rim em mai. I taksain a tuar ang" ka ti a. 

"A ngai lo. Chawhmeh zawrh hi a hlawk alawm" a lo ti vat. Kan han nui dun leh rih. 

A nau a lo hawng a. Hlawh tlem a rawn la haw ve bawk. Chungte chuan an mamawh zual te an lei ve a. Ka nu bulah hna ruak a awm leh awm loh ka zawt bawk. A lo ngaihven tur thu a sawi a. Ka beisei a sang hle. Kar hnih hnuah ka nu hnuaiah Ruatfeli chu a thawk ve thei ta. Hna a hmu tih ka hrilh ni chuan a ţap tawp. Kan inkuah vawng vawng mai. 

"Nang hi awm lo ta la.. Hetiang hi ka ni awm si lo va. Pathianin ka tana a siam che i nih hi" a ti thin. A hlim chuan ka hlim ve em em zel 

Ka nu hnuaia a thawh hnuah chuan a hmel tha zual a, an khawsak a lo awlsam ve ta deuh bawk a. An ei leh inte a lo tha ve bawk nen. A chhe lo telh telh mai. Thla 4 dawn a thawh hnuah phei chuan, ngaizawngtu a nei a nei a. Ka lo hah vek zel. An unau chauhin an awm ve bawk nen. 

Dik tak chuan Ruatfeli vang hian kei pawh ka puitling ka ti lo thei lo. Ka kum phu lohin ka tawngkam leh chezia a puitling. Ka nuin min fuih ve reng bawk nen. Pathian hian min hmangaih em a, Ruatfeli tana khawnvar leh a kawng sah ensaktu ka ni thei hi ka lawm thin. Ka ţawngtaina tam ber pawh Ruatfeli te unau tana malsawmna ni turin ka indil thin. Ka hmangaih takzet tawh. Amah vangin ka thinlung hi a paukhauh a hna hmuh vata nupuia neih ka suangtuah thin. Chubak hmabak neiin ka inhre lo. 

Hringnun hi ani nen chuan a nuam a. Mi min selna leh amah ngei an sawichhiatna te chu ka tan engmah a ni lo. Kan pahnihin kan tha tawk a, kan chak bawk. Kan pahnihin khawvel kan hmachhawn a. Kam hneh ve mai thin. Mahse, M. Sc. Ka pass a, M. Phil zir leh hram tura ka pain min tih vangin Chennai-ah ka chhuk a. 

Thla 3 zet ka awm hnua ka thu hriat chuan min tina kher mai. 

"Bawiha, Ruatfeli kha Pastor pakhat nen sawi an kai deuh ania.. " Tetea'n a rawn ti a.. 

Ka mit sulh mai. Pathian chauh lo chu neih ka nei ta lo. 

A chhan chu kar hnih hnuah ka nu ngeiin, "Thil zawng zawng hi a tluang purh ngai lo. Tluang mar pat se, Pathian i theihnghilh ang. Ruatfeli pawh dem suh. Pastor meuh chu atan hnar a harsa a niang e. A tan thil tam tak i lo ti tawh a.. A dam chhungin a theihnghilh tawh lo vang che. Bawiha, Mipa takin le.. Pathian kan neih kha aw" a rawn ti tlat a ni. 

Ni e, Ka hmangaih chu a liam ta… 

Mumal taka ka awm leh theihna chu Ruatfeli pasal neih atanga thla hnihna velah a ni. Mizorama haw turin ka inbuatsaih mek.. 

Airport-ah Tetea'n min lo hmuak. Inbe mang lo vin kan haw a. In kan thleng. Ka chhuk a, kan in ropui zet chu a chul rup mai hian ka hria.. Kawngka bula ding chu ka hmuh hnu a va ang em… ka pan nghal ruak ruak a. A mah a ni. Maktiin ka ding chawt. Ka chhungten min hual ţhap bawk. 

A rawn pen phei chhat chhat a. "Nang hi ka tan chuan pastor i ni alawm" a ti ta sap a. Ka nu ka en, min melh lo lui tlat. Tetea ka melh leh. Ka u nen an inbe daih. 

"Hmelho" ka ti tuar a. An vaiin an nui ta tuar tuar a.. Ka sen vekin ka ring.. Mawl hlawm lutuk… 

(Muttui u 😘