Drose... Last

D'ROSE… (Last Chapter) 

Ziaktu : Toni Râlte

Dawhkan kilin mi eng emaw zat an thu a. Amanda chuan a hmaa thu hmeichhe hmel tha leh nalh em em chu melhin fiah kêk kâwk hian, "Le.. Nunui i thah dan leh tuna i chhungkua i bum dan zawng zawng min han hrilh teh le" a ti a. Teteii chuan zâm hmel a pu eih lo. Amanda chu a melh ve kar bawk. 

"Thil pakhat chiah ka ngen ang che. Hrem ka nih hmain Zairemmawia kha min thahtir rawh" Teteii aw chu a chang kher mai. Lo thu ve dangte chuan rãpthlak ti zetin an lo en hû hlawm a. Amanda chu a khi sak. 

"Kan ngaithla thei tawh ang em? " a ti a. A insiamrem nghal bawk. Teteii pawh chuan a hun tawp a thleng tih hriain, tui te chu a han in leh te te a. Muangchangin Nunui a thah dan leh a chhungte a bum dan chu a sawi ta a. 

"Dinfela fa ka pai tia ka bum thluk vek hnuah kha uipuinu khan min lo chhui ru khanglang a. Ni lo, doctor kan hmuh tumin thla thum lai ka lo pai tawh vangin a ngaih a tha lo tan a. Min enthla ta a ni. Aw ni e, ka fa pai kha a pa chu he khawpuia officer lar tak pakhat hi a ni a. Nupui fanau nei a nih bakah a paa puh kha ka tum lo hrim hrim. Nau ka pai tih ka hriat rualin chet ka la vat a. Tihluihna leh hrai ruihna hmangin Dinfela ka mutpui ta a. A paa ka puh theih nan. Engvangin nge Dinfela fa pai chu ka duh tih zawhna in nei anih chuan, ka nunah hian thil pakhat a pawimawh ber. Hausakna. Fapa neih chhun leh ro khawmtu tur fa ka pai a nih ngat chuan ka damchhungin ka rethei tawh dawn lo tih ka hria. Min nei duh lo mah se; ka fa a lo piang ang a, a pu hian a thlahthlam dawn hlek lo tih ka chiang. Ka fa ka bula a awm chhung chuan sum lamah ka buai dawn lo tih ka chian em vangin Dinfela chu ka fa pai mek pa nihtir ka tum tlat a ni. 

Mahse, ka nu nen kan inbe lai Nunui khan a lo hre ta si a. Dinfela fa ka pai lo tih a chiang ta. A pa leh a û hrilh a tum thu a sawi khan ka bing mup a, ngaihtuahna fim ka hmang thei ta lo a ni. Ka nam thlu a, chumi hnuah vase khan a lu-ah ka theihtawpa nain ka vaw ta a ni. A thi nghal mai dawn emaw ka tih laiin a lo la thaw a. ICU-a a awm chhung te khan thawk ka la hman meuh lo. A thih ngei ngei theih nan ka ţawngţai ţhin! A rawn harh chhuah rualin kan nufa chan chuan maian chan pawh a tluk zo dawn chai si lo va. Setana puihna nge ni dawn ni.. Tikhan harh chhuak ta miah loin a thi ta. Kei ka lo thaw hawk thung. Mahse, nau ka chhiat tak vangin Dinfela fa ka pai lo tih chu an hre ta tho va. Inenhranna a rawn awm chho ta a ni. Kei chu mi chuang, hnawksak leh hlauhawm hmuhin min hmu ta vek a. Ka pa lahin Dinfela leh Diteii inneihtir a tum ta bawk si. Khatih lai khan mumalin ka khawsa lo va, mipa chi hrang hrang kawp lawrin ruihhloah ka tlan nasa ta bawk. Mahse, zan khat chu ka inngaihtuah harh ta a. Heti reng renga ka nun chuan phuba ka la thei lo vang, ka chanvo min laksaktu te ka tina thei dawn lo ve tiin keimah leh keimah ka infuih ta a. 

Ka mamawh chu sum bawk a ni. Tu emaw ka bum thluka, ruahmanna mumal tak neihpui ka ngai a ni. Pu Dintluanga hi amah la hmu lo mah ila a hming chauh zawng ka hre ve. Amah kha ka target ta nghal a ni. Hmeichhe laka a sihhnipzia leh a thilphalzia te, a neihnun zia te ka hre ta vek. Tichuan, khami zan khan Hotelah ka thianpa kha thurualpuiin Pu Dintluanga te thian dun programme ka tibuai ta a. Plan vek a ni. A tawi zawngin, Pu Dintluanga chu ka zar ta ngar ngar a. A hnuaiah ka thawk thei ta. Ka chhungte erawh chuan ngaiah min nei tawh a. Ka riahbo leh bo loh an ngaihven tehchiam tawh lo. Zawi zawiin Pu Dintluanga ka hneh chho va. Sex-ah ka tihlawm em vangin hmeichhe dang a mamawh tawh lo. Ka thuhnuaiah ka dah thei ta thuai a. 

Sum chu ka nei ta. Mahse.. Ka kim chuang lo. Kha hmeichhe pakhat, ka ruang anga kan lantir kha ka thiannu fô thin a ni. Ks a ni a. Aizawl khua pawh a ni lo. Pu Dintluanga nen kan intawn hmaa ka riah fôna a ni. Ruahmanna ka neih vangin a thih a ngai ta tlat a nih kha. Nie, ka hruai chhuak a. Ka that ta a ni. A hrawkah hrui sinin ka rek bet a, rei lote hnuah a thi. Pu Dintluanga bulah erawh ka vawikhatna niawm takin leh keimaha mi pahnih awm niawm takin lem ka chang ta a. Ka ruahmanna ang chiahin surgery kan kalpui ta a ni. Kei chu ka thi ta a. Lalrinawmi a lo piang ta. 

Mala a lo lang a. Hmel tha ka tiin ka ngaina. Mahse, ka hmangaih lo. Pu Dintluanga kha duh aiin a dam rei a. A chhan awm lo va thah ngawt kha Mala thlengin min dem ka hlauh vangin Amah Mala tel ve theihna ber turin ka zêm kual ta a. Ani leh kei kan inngaihzawn thu a pain a hriat chhuah tak avanga apa chu dah bo anga kan lan theih nan. Ni e, kan ti ta reng a. Mala chuan min hmangaih em vangin engmah a sawi lo. Jail ka tâng tawh tih lah a hre hek lo. Mahse, a pa thih hnuah a pa diary a hai chhuak a. Dintluanga khan kan intawn dan leh ka nihna zawng zawng a lo ziak kêlh mai si a. zawhna a nei ta chiah. Chutah chuan Mala'n min kalsanin Police a pun mai ang tih hlauin lem ka chang chho leh a. Natna nei ang takin. MPD ka hre tawh a, chutiang ang thei ber tur chuan lem ka chang ta a. Jo nen kan inhre tawh a. Mahse, natna ka nei lo tih a hre chhuak thuai dawn tih ka hria. Ani pawh ka pawtlut lo thei ta lo a ni. Ani chu a awlsam fahran lutuk. "Mala kan dahbo hunah nang leh keiin ka ro khawm tur kan la ang a. Zalen takin hun kan hmang thei ang. Chumi hmain natna nei angin min enkawl tur a ni' tia saruaka a hmaa ka din chuan a hmin zawih zawih a ni ber e. Ka vannei chho ta zel a. Zothana a lo lang a. Ka tan a la hlauhawmin ro chungchangah pawh buaina a la awm theih ka hlauh vangin, Mala nen an inrem lohna tur thil ka ruahman leh a. In atangin chhuak se, Mala chu mal khalh ka duh vang a ni. Mahse, Zothana chuan chhuah a tum hauh lo. A pa thattu ka ni tih a hre tawh bawk si. Phuba lak a tum ngei tih ka chiang. Ani chu ka hlau ta a. Tichuan, ka chhungte bula kir leha chutatanga hmalak keuh keuh ka tum leh ta zawk a. Tikhan inchhir tak tak leh pawisawi lo niawm takin ka lang leh ta a. Mi rilru tha tih takah Diteii te chhungkua chu ka hneh leh thei ta a. Ka nu hi ka lama tang tura pawhpen a ngaih avangin Mala hmangin ka hip hnai a. Min khawngaihna leh lainatna ka hlawhchhuak ta chiah rêng a. Engkimna fel ta thlup mai. Chhunglam atang ngeia ka bei thei tawh tur ka lawm ruk em em laiin Zairemmawia ching cheng khan ka suangtuahna te a rawn tichhe zo va, hmanhmawh taka ka chet a ngaih phah ta a nih kha.. Ka tum dan chuan saw in neitu nih saw ka tum.. Zaia rawn lang lo se chuan ka ni ngei bawk ang" tiin. 

Ngaithlatu te chuan thawm an chhuah hauh lo. Hmeichhe pakhat, lemchang thiam em emi chu an melh rawn thup ringawt. Mak an ti a. Sawi tur an hre lo pawh a ni mahna le. Teteii lahin Zâm hmel a la pu ta chuang lo. Hmeichhe pakhat chu a tling ve khawp mai. 

Thuhretu leh ama inpuanna te zirchianna leh a dik ngei tih fiah a nih hnuah Zomuanawmi chu a dam chhunga jail run thim bel tura hrem a ni ta a ni. Teteii hringnun chu a tawp ta. 

Zairemmawia pawh Puia fanu naupangtê buma mipat hmeichhiatna a hmanpui vangin hrem theih a ni. Tin, Pi Zawmi te a blakmail vang pawhin. Mahse, Puia te nupa chuan Pathian hmingin an ngaidam ta hmiah a. An fanu pawh kum tling lo mahnise; chhia leh tha hre rual a ni tawh a. A duhthlanna a hmang ve thei vek tawh tih hriain Zaia chauh an burbun duh ta lo. Mahse, Pi Zawmi a lo blackmail avang erawh chuan, hrem a ni dawn ta tho va. Amanda tan hna a thawhsak ve tho vangin leh amah leh a nun dan enin a hlauhawm tawh an ring lo nge a nep thei ang berin a chungthu an relsak ta a ni. Hlimi pawh telvena a nei ve tlat sia, hremna a pumpelh ta bik lo. Sual hi chu a vulh rei theih loh rèng a ni. 

Diteii te chhungkaw nunphung pawh a danglam hman dâwrh mai. Boruak eng emaw an tawng reng si a. Pu Vanlala ber chu a rilru a dam hleithei lo. A fanu neihchhun kha thah a ni miau a! Chutah a nupuiin a la thup vek zui. A nupui chu neih leh chi rual niin a hre lo va. Mahse, Diteii a zah bawk si. A mangangin a tar bâwih reng a. Pi Zawmi pawh inchhir em em leh mahni inhaw chungin a tawm tlawk tlawk mai. Pu Vanlala duh danin room hrangah an awm ta a. Tar alama han in mihran leh chu an taksa in a tuar in an rilru pawh chavai tak a ni. 

Hetih lai mek hian Zothansanga leh Duati te tan erawh khawvel thar a rawn inhung mek thung. An buaina ber Teteii hrem a ni ta a. Zothana hriatrengna chauh lo chu an pahnih inkarah hnawksak thei a awm ta meuh lo. Duati chu chân a duh ngang si lo va, amah Duati lahin Zothana tel lo va a bul atanga khawvel hmachhawn leh a zuam mawlh si lo. Bul ţan tha leh turin thutlukna an siam ta poh a! Hun thim an hmachhawn chang zawng a awm ngei chhap ang. Zothana chuan a sumdawnna a kalpui chho ţan ta bawk a. An tum ang ngeiin duati pawh manager-ah a dah ta hmak. Training engmah paltlang ni ta lo chu a tirah a bil ve angreng a. Mahse, Zothana chuan a dawhtheiin Duati hriatthiam theih dan tura thil sawi fiah a thiam si. Thla hnih a ral leh meuh chuan Duati chuan a hna chu a bu ang thlapin a thawk thei ta a. A vannei, hlawh lah a chhe mawlh si lo. Lawma leh Zami paeh an la hlim nupa ve zel a, Lawma natna pawh eng emaw changa a chhuak leh zeuh thin tih loh chu a rilru a lo hahdam ta bawk nen, dam tha pangngai ang mai a ni tawh. Zami mawlh hi a ni. A chawr chhuahna ngaihtuah chuan heti taka nupui leh nu tha a ni hi rin a harsa. Engkimh a pasal a tawiawm thei zel a, a pasal te chhung lam tan lah mo tha tawp a tling bawk si. Duati pawh hian a nu tak a ni lo tih hre mah se; a nu tak tak a hmu hman lo bawk a. A nu tak takah a ngai hmak. Mami kha la dam in Duati hi enkawl mah se; a nu tak a nihna bak danglamna a awm kher lo vang. Tikhawp chuan Duati hi a hmangaih a ni. 

Drose te exam pawh an zo fel a, Hunpui a hnai chho ta bawk. Exam zawh atang khan a leng deuh reng mai. A pu Lawma te in lamah a tla thla deuh reng a, Teteii vanga an chhungkaw boruak danglam deuh chuan nghawng ve deuh mah se; amah Teteii ber a tan tak daihah chuan an sawi zui duh ta lem lo bawk a. Naupang ho chu an pangngai chho leh mai. Rinmawia pawh exam zawh tukah Shillongah a chhuk a, a chhuk hma zana Drose nen bathlar thlanglama an thu dun kha a nia.. Ngaihawm ta ber chu. 

Thla a eng lutuk lo naa boruak a nuam viau. Rinmawia a che hrut a, Drose kut chu a vawnsak a. Ani lah a lo lai em em bawk. Kut chu an inhumsak ngawt ngawt mai. 

"Christmas hetah rawn hmang ila i lawm ang em? " Rinmawia'n a ti sup a. 

A chil a lo lem khawlh. "Umm " a ti hmuk. 

"Mahse, ka pa te hian an phal lo maithei. Min ngai ve bawk sia" Rinmawia'n a ti a. 

"Hmm.. Ka hre thiam ve lo e a. I thu thu" a lo ti bah nuaih a. 

"Ka ngai dawn che em a" 

"Min ngai awm lo em mai"

"I ngaihawm dawn eee.. Min ngai ve ang em? "Rinmawia chuan a rawn melh ralh. 

"Ngaih ve loh che ten" a lo ti hû a. A melh let ve siah. 

"Nih i lo rinawm ang tiraw? " a ti leh a. 

"Rinawm ang. " a ti nghet charh. A mitmeng pawh a nung sar mai. 

"Mas ka rawn hman theih loh pawn inbe reng ang aw. Kum tharah ka lo chho vat ang" tiin Drose kut hnunglam a fawp zauh a. 

"Nia mahse, i lerh ka ring. Bialnu i nei ang" lungngaih hmel fê hian a lo ti a. 

"Bialnute chu nangmah ka nei reng che lawm" a lo ti nghut. 

"Kum hnih nghah a la ngai alawm" a lo ti hlar a. 

"Aa.. A buaithlak. Tihian ni nghet tawh mai ang. Ni ang tho kan nih hiiii" Rinmawia'n a lo ti. 

Drose a nui a, a lei a chhuah zuk bawk. "Mahse, ka zak e" a ti lawi rât a. 

"I nute pawn an hre vek tawh a. Zah vak a ngai lo" a lo ti. 

Drose chu a ngawi ta rauh rauh a. Rinmawia chuan a ngheng talh talh, zawi sup hian, "Inkiss kha" a ti sa sa a. Drose thawh a tum, Rinmawian a chelh nghet si. A thu leh hnawk. 

"Naa.. U Rinmawi, kei chu ka ui e, ka hmui hi" a ti niah niah a. 

"Chutiangin ka fawp hlup dawn hleinem. Insik tir chauh a ni mai" a lo ti a. 

A maimichhing a, "Anih" tiin a hmui chu a tipawrh deuh a. Light in a chhun fuh bawk si, Rinmawia chuan a melh ngawih ngawih, heti taka Drose a hmel tha hi.. Phu lo a inti. Diteii nen an inang viau bawk. Muangchangin Drose hmuiah chu a hnaih hret hret a. A hmui sen no chêkah chuan a hmui chu zuk nghatin, a fawp ri chek a. Drose a lo phu uih. 

"Kha kha a ni mai lawm" Rinmawia chuan thaw hawk chungin a lo ti a. 

"Ka hmui virgin i hawng sia. I lerh thei tawh lo aw" a lo ti salh. Rinmawia chu lehlam hawiin a khi sak a, "Ka damchhungin ka phatsan tawh lo vang che" tiin Drose biangah a fawp zauh a. 

Bena te pawh a û te nen an han sawiho a, kum thar lamah chuan palai tirh mai an rilruk ta deuh. An kum a naupang zawk zawk tawh lo bawk nen. Eni chhungte lam atangin engmah buai a awm lem lo bawk a. Inneih vat chu tha an ti tlang a ni. Teteii dam leh thu leh man a nih leh dan te a lo hre ve a. A va leng vat nghe nghe. Diteii a hmuh rualin, "Ka sawi reng kha.. Teteii ka that lo ka tih kha. A huat chu ka hua, mahse, ka that lo" a ti nghal a. 

"Anih ti nge i huat em em? " Diteii'n a lo ti var. 

Bena chu a chhing diar diar a. "Ka ngaihtuah hian nangmah vanga hua niin ka inhria. I chungah khan a sualin a hnawksak em a, ka best friend i lo ni bawk si nen.. Chuvang a nih ka ring. Ramthari nen khan inzawmna an neih ka ring miah lo" a ti ta a. Bena hian Ramthari'n a chenchilh hun lai kha chiang taka hriat a nei meuh tawh lo. Mumang ang ruaia han hriat chhuah erawh a nei thin. 

Zothana leh Duati chu Airport lam panin an tlan mek a. An ţawng lem lo. Zothana ngaihtuahna chu a kal ding viau. Ni e, tunah hian a û hmuak turin an kal mek a ni. Malsawma a rawn haw miau a. Teteii chungchang kha news atangin a lo hre ve a. A tu amahin an zuk hrilh ngam lo a ni zawk mah. Zothana a rawn be ta vat a. Aniin a chin chhuakin a lo hrilh. Mala thinrimzia leh rilru natzia chu phone atang pawn a hre thei. A û chu a haw thin naa a huatna kha lainatnain a thlak ta vek. A pa ngawih ngawih thattu a ni tih hre reng chunga a lo hum ruk ve hram hramin a lo bum kual tih leh a hmanrua atan chauh a hmang tih a han hriat takah chuan a nghawng nat dan tur a hai bik lo. Ni e, Mala chu Teteii chanchin a hriat atang khan ni 4 dawn chu engmah ei lo leh mutmu pawh tuah mang lo vin hun a hmang a. A chauh tawngkhawng em vangin nikhaw hre loin a awm ta hial a. A thlenna hotel-a thawk ten buaipuiin damdawiinah an hruai a. Doctor te enkawlna vangin a rawn tha chhuak leh hram a ni. Nat zawng a na thlawt. Mizoram rawn hawn vat a duh ta chiah bawk a. Zothana phei chuan la rawn haw rih lo mah se pawi a ti lo. An sulhnu a hmu leh dawn si a. Mahse, Mala luhlulzia a hria a. A thlem buai duh lo. 

"Duati chu i lo tel vr a ni maw? I va fel ve" Mala chuan a sunglass chu la thlain a ti mawlh mawlh a. 

"Nia, i pawimawh sia" Duati'n a lo ti zauh. An nui tlang a. Duati leh Zothana hmuh tum ai daihin Mala chu a tha. Cher kuam leh tla dãwk tura an ngaih laiin a tha zawk emaw tih mai turin a lang danglam a ni. Zothana chuan mak a ti viau nghe nghe. An inphur haw ta vang vang a. Zanriah pawh ei chhuah mai an tum. Zothana'n an ina thawk tur a la leh tawh a, in pawh a phuisuiin a fel leh thlup tawh mai. 

Zanriah an kil ho laiin Mala chuan, "Naktukah Jail-ah kalin ka zuk hmu ve ang e" a ti a. 

"Eng atan" Zothana'n a lo ti hû! 

"Theih phei se chuan lak chhuah ka chak asin" a la ti zui! A û hian a rilru a thlak miah lo em mawni le. Khati khawpa Teteii a hre chiang tawh chung pawn. 

"Chu zawng thei pawh ni la, ka dang tho ang che" a lo ti hmak. 

"Ka hria alawm. Ka duhthusamah chuan jail atanga la chhuakin ka bulah a damchhung hun hmang se, hremhmun ngai rawk khawpa nghaisak ka chãk a ni" Mala chuan a ti chang fak a. A mitmeng chu sawi thiam theih si loh hian a hlauhawm ru riau bawk. Zothana chuan a rilruin, "Phuba lak i chak hle a nih hi" a lo ti a. A langah eraeh, "Tikhuan a dam chhung hun a hmang tawh dawn alawm. Tunah pawh thih nawn leh chu a chak tawh maithei a ni" a lo ti a. Duati a awm ve reng si a, Duati nu nau a ni tih an hre dun bawk si. Teteii chungchang chu an sawi ta rih lo. Duati tan tak pawh a nuam lo viau ang. A nuteii chu a hre chiang ve lo naa, thil tam tak a lo tih tawhte avangin a haw ve tawp. A chungah sualin tih nei lo mah se, A nute Diteii te chhungkua a tihbuai nasat em vangin hrem a ni chu a lawm ve tawp. 

Puia te chhungkua pawh an inhmuh chhuah atang khan an boruak a nuam ta hle mai. An fapate pawn an farnu chu an duatin an ngaihsak tawh a. Nu leh paten an ngaihpawimawh miau chuan faten an zui lo thei lo. Senteii zawk chu a inthlahrung letling tawh. Hetiang hi hmanah khan ni se a chesual kherin a ring lo. A nu nen an inkwm nasa em em a, a nu chu a ngai zual ngawih ngawih tawh. A pa erawh hna nei a nih miau vangin hun an nei tam lem lo va, a hun awl erawh a fate tan a hmang thin. An thenawm khawveng te sawi sep sepna chu hre reng mah se, mena an thlak ve a ngai si a. An chhungkaw bil te chuan an inkawm ho ta dial dial a, an hlim a, nuam pawh an ti. Senteii pawh a hriselna dinhmun a tha viau. A naute pawh a tha.. A neih hunah chuan an duat sak ngawt ang le..Ni e, Pathian hian kan tan khawdur a siam a ngai fo thin. Thil tha hmuchhuak tur chuan thil tha lo kan tawn hmasak a ngai fó a, anchhia anga kan ngaih, kan duh ngai reng reng loh ten min chim chang pawh hian a phênah malsawmna a lo dah khiau thin. Chumi hai chhuaka hrethiamtu te nun chu khuarei thlengin nun awhawm a ni tawh thin. Pathian hi a va fing em.. 

"Ka pa hi titipui a ngai a ni. Nang i tithiam deuh a, sawipui teh. Ka nu nen upat lama hetia an awm hi ka duh lo" Dinfela'n an nu bulah a ti a. 

Diteii ngaihdan chiah pawh a ni. Mahse, dik tak chuan a inthlahrung. A pa chu a pa tak tak a ni lo va, a nu erawh a nu tak tak a nihna laiah. A pa zawk hmin tum chu a inthiam lo. A nu chu a dem ru em em, mahse, nufa na nâ na chu inensan reng theih ni hek lo. Lainatna chin leh a awm ve reng alawm tihtheihna chin a nei lo thei lo va, Pi Zawmi'n a fanu Teteii a hmangaihna chu dema huat ngawt theih a ni bik lo. Heti taka hmangaihtu nu a nei chunga suahsual chhuah zeltu Teteii hi a tenawm thlawt a ni. Khawvelah hian amah ang hi piang tawh lo se tu tan pawh a tha ang. 

"Ka lo be chhin dawn nia" Pasal te thu hnial hreh tih takah Diteii chuan a ti a. 

"Dite" An pain a ti sup. An pa mita melh pahin, "Eihah",a ti a. 

"Ka tan hian i va hlu tak em.. Buaina tam tak kan tawk chung pawn ka kiangah i ding zel thin a. Ka tlin lohnaah min hliah khuh zel bawk. Ka lawm e aw" Dinfela aw chu a thûk kher mai. 

"Kei deuh hi ka lawm. Ka thisen zawmpuite vangin in chhungkuain buaina leh harsatna tam tak in tawk a. Chuti chung pawha min dem duh lo leh ka lam i la tang zel thei hi ka lawm ngawih ngawih. Kei hi min nei lo ni la chuan buaina i tawk awm tawp si lo.. Ka inthlahrung thin" Diteii chuan a lo ti ve sap sap a. 

"Chhungkaw hlim reng leh buaina tawk ngai miah lo ni ila, kan hlutna te kan inhre tawn nang tiraw. Ka nupui i ni hi ka inchhir ngai lo va, ka damchhungin ka inchhir lo bawk ang. Ka hmangaih che" Tiin Dinfela chuan a nupui duh tak Diteii chu a fâwp ngawih ngawih a. Diteii pawn a lo chhanglet ve vat. An nupa nun phuarkhawmtu Hmangaihna chu a dai ngai lo va, daih a hnekin a alh hlep hlep reng a. Dinfela'n pasal nih a thiam tluk zetin Diteii lahin nupui nih a tlin bawk. An fate lah an duhawmin pawisawi lo vek an ni a.. Teteii a kalbo ta bawk a. Chhungkaw vanram chu an din thar leh thei ngei ang le… 

"Diteeee… ka pi hiii" Thiangi aw-ah chuan thlaphanna a lang thei. Diteii leh Dinfela chu room atangin an chhuak vat. 

Pi Zawmi chu khum nghengin chhuatah a lo thu a, a âwm a dawm bawk. A thaw hrawih hrawih mai. A lung lam fel lo a ni ngei ang. 

"Nu, i tha em? Engtin nge i awm? " tiin Diteii chuan a buaipui vat a. A rawn melh chho ţâwk ţâwk a. 

"Ka.. Ka thaw thei lo" a ti tham chhal. Dinfela'n a motor a va la chhuak vat. Pu Vanlala pawh room atangin a lo chhuak ve a. A nupui, a lo duha a lo hmangaih em em thin chu thawk harsa tih hmel zeta thaw hrawp hrawp chungin a va hmu. A mit sulh mai. Engtik laiin nge a va thlen phei a hre lo. 

"Nu-i, engtin nge i awm.. I tha leh vat ang.. " tiin a kut a va vawnsak a. Pi Zawmi chuan harsa ti zetin a nuih hram. An kuah chhuak a. Chak takin damdawiin an panpui nghal. Heart attack a lo ni a! An tlai ţhelh a ni! Doctor ten an bawihsawm nghal vat vat. Oxygen te pea damdawi te an han jection hnu chuan a pangngai ta deuh a. Diteii te erawh an la thlabar hle. Drose leh a nau ten in an lo nghak. An ni pawh hlauthawng tak an ni. 

"U, a pi chu a thi ang em le? " Mampuia'n a ti a. 

"Thi maithei. Thawk theih loh chuan an thi thin alawm" Drose chuan a lo ti a. A ngui ve khawp mai. 

"A pa te kha phone la" Tetea'n a lo ti a. Drose a che vat. A nu zawk a call a, "Nu, a pi chu" a ti nghèk. 

"Umm.. Bawibte, hei a zia chho e. Lo thlaphang suh u. I pa leh i nu Thiangi te an lo haw dawn e aw" a rawn ti a. 

"A thi lo. A pi chu.. " tih leh zuan a rual nghal. An unauin an lo hlim ve em em ringawt. Inngaina tehchiam lo mah se, Thihna hi zawng a nghawng hi a na a. Kan hmelma te meuh pawh an thih meuh chuan hlim taka nuihpui thei kan vâng pharh asin. 

Thirlenin a daidan hnan hmeichhia chu a melh vawng vawng a. A cherin a thu hle. A sam pawh a bawrchhawr angreng. Mut a hmu tlem tih a lang reng mai. 

"A tawp nan rawn hmuh che hi ka duh a. " Mala chuan a ti sup a. 

"Ka lawm e" a lo ti sap. 

"Theih se lak chhuah che ka duh tehlul nen" Mala chuan a ti leh a. 

Teteii chu a che zawk.. "Mal, i tithei ang. Ti teh. He lai hremhmun atang hian min la chhuak la, nun tharin bul ţan ang. Khawngaihin.. Mawh mawh" a ti ta mawlh mawlh a. Mala a khi suk. 

"Tete, ka lak chhuah duh chhan che chu maw.. I damchhunga tihretheih che ka duh vang a ni. Mahse, tunah chuan tuna i awmna hi i tan a tha zawk tih ka hria. Ka nau min ngenna angin tun hi kan damchhunga kan inhmuh tawpna ni rawh se.. " a ti ta a. Teteii mitmenga tawrhna leh beidawnna lo lang chu hmuhnawm ti zetin a melh ran bawk. A khawngaih miah lo chu a mak! 

"Mal, min hmangaih tawh lo em ni? " ngenngawl zetin a rawn ti a. 

"Aw.. Ka hmangaihna che kha a zo vek tawh. Nangman i phumbo vek tawh alawm" a lo ti hmiah. Inkan hun a tawp ta mai bawk si a, "Inenkawl tha ang che. I thih hunah i ruang hmuh nuam tak nihtir ang che" Mala tawngkam hnuhnung ber chuan Teteii chungril a kher ngut ngut mai. A beiseina awm chhun pawh a chhe ta. A tawp leh ta vek mai. A phutawk a hmu tih a inpawm theih hunah chuan, tuna a na tawrh hi a nep deuh mahna le.. 

"Paa" Pi Zawmi aw a hriat rual chuan Pu Vanlala chu a che vut. 

"Umm.. I lo harh tawh maw.. Mamawh i nei em? " a ti nghal var a. 

A rawn nuih sâng, upa tawh mah se, Pu Vanlala mitah chuan tuman an tluk lo. An nu a lo hriatthiam lohna leh huatna zawng zawng kha khaw nge an awm zawh tak a hre bik lo. A nupui chu a hma aiin a hmangaih ta sauh emaw tihtur a ni. 

"Min kaltir mai tur alawm" Pi Zawmi chuan a ti sap a. Pu Vanlala'n a kut a rawn vuan vat, "A teuh lo mai. Kan dam dun zel ang chu le.. I dam ang a, chhungkaw thar bul kan ţan ang. Hmana kan inneihtirh lai ang khan.. " a ti a. Pi Zawmi kut chuar ve tawh tak chu a fawp vawng vawng a. Pi Zawmi erawh a mittui a lo luang thung. 

December ni 23 a ni a. Drose chu in chungah chhoin, khua a chuan a. Ni tla tur chu a sen no nghiai a, mawi ti zetin a thlir vang vang. A phone chu a hum ran a. Rilru kaptu eng emaw chu a nei a nih hmel.. Rilru hah hmel deuhin a thaw leh halh thin bawk. 

"Hmela hi a lo chho dawn lo tak tak a nih hi. A chawh viau ang" a ti chhuak ta hlawl a. Nie, Kan Drose hi a lung a leng ve a ni ngei ang. 

"A û.. A û" Tetea aw a hriat rual chuan, "Ninawm.. Mi hi an ngai leh lutuk a" a ti hlak a. Ring zetin, "Eng nge" a ti nghek. 

"Au Mamawia a lo thleng" a rawn ti ta mai. A ding ngil zawt. Tuman an hmu lo bawk a ti niawm takin an in chung zawlah chuan a zuang ta zak zak a. A lei chhuahin, "Ka zak lo ee" a ti sap a. A sam te huihmamin in hnuaiah a chhuk thla ta chhat chhat a. 

D'ROSE A TAWP TA… 

Drose fans zawng zawngte, in zavai chungah ka lawm a. Ka hmangaih vek che u. Thawnthu thar ngaihnawm tak nen rawn let leh ka tum ang. Lo hlim u la, lo dam tha ang che u. 😍❤