Drose 27

D'ROSE… (Chapter- 27)

Ziaktu: Toni Rãlte

Hlimi chu a muttui hmel kher mai. 

"Diteii ten an hre dawn asin" Pi Zawmi chuan hlauthawng takin a ti a. 

"Zanin zan laiah ka phur chhuak dawn alawm. A dahna tur chu ka hre mai ang" Teteii chuan a lo ti a. Anmahni zawk chu room atanga an chhuah vangin an roomah a tu amah an lut lo. Pi Zawmi erawh hlauthawng hmel a pu reng a; Teteii chuan, "Mu tawh mai rawh. An man chhuak ang che. I lan dan kha" a ti sap a. Thuawih zetin a lut ve mai. 

Zaia chuan Hlimi phone off tlat chu mak a ti deuh a, ngaihthat lohna erawh a la nei lem lo. Teteii a be ta zawk a. 

"Chaw ei kham atang khan ka mut a chhuak a ti reng a, a mu tawh. A chau tawngkhawng a niang" tiin Hlimi chungchang chu a sawi a. Zaia chuan, "Umm.. Muhil rawh se.. A chau anih chu" a lo ti ve mai. 

Teteii tan chuan zan a rei duh angreng hle. A buai rukna erawh amah chauhin engtin nge Hlimi chu in atanga a chhuahpui theih ang tih chu a ni. Amah aiin a lian lehnghal. Mahse, mi sual ţhang tih takah ngaihtuahna thar a nei leh vat. Hlimi chu tihharh nan damdawi chi dangin a chiu leh ta zawk a. Darkar chanve hnu velah a rawn zi ţelh ţelh. A meng â hû mai. Teteii chuan, "Kan chhuah a ngai. Khatia ka tih chhan che chu ka nu laka lemchan a ngaih vang a ni. Intiharh rawh le" a ti sa sa a. Hlimi harh chiang mang hlei lo chuan a zui ve chawt ringawt. Zan dar 9 a ri ţèp chauh a ni. Pi Zawmi te chu an mu tawh a. Teteii chu in chungah chhoin, Diteii te room kawngka chu a kik dat dat a. Dinfela'n a lo hawng a. An la mu bik lo a ni maithei. 

"Ee.. Dina, Hlimi nu a tha chiah lo va, va thlah a ngai sia, motor ka lo hmang lawk mai dawn mi le" Teteii chuan a ti sap a. Diteii pawh a rawn chhuak ve. 

"A va zia lo ve. Engtia na nge? Keini pawh va lan a that chu" a lo ti vat a. 

"A ngai lo. Keiman ka va thlah mai ang. Chutia tha lo lutuk chu a ni lo. Amah khuan a ngaihtuah ve deuh si a. Kei pawh ka tha tawh tho va, ka lo awmpui zawk mai ang. Hna in ngah kha" Teteii chuan a ti zung zung. 

An nupa chu mitmeiin an inrawn zauh a. Chabi chu pein, "Chanchin min rawn hrilh rawh aw" Dinfela chuan a ti a. Motor a khalh thiam tih hi chu Lalrinawmi a nih lai khan an hre tawh. An zawt lem lo. Teteii chu a bu nghat a, lawmthu a sawi zawhin in hnuaiah a chhuk leh ta nghal a. 

Hlimi lo bu lûk lùk chu kai chhuakin pawn boruak vawt ţan mekah chuan a dinpui vang vang a. In chhung ai chuan a harh hmel ta deuh. Teteii chuan motor va la chhuakin, Hlimi nen chuan an tlan chhuak ta nghal a. Hlimi chu a muthlu leh ţan. A ngaihtuahna a hmang thei meuh lo a ni ber e. Teteii chu tlan zelin Falkland-ah a lut thla a, Kawngpui atanga kawng peng lo awmah chuan tlan lutin, building lian angreng tak lo awm chu tlan pelin, a piah lawka in te fel ren rawn lo awm lam chu a pan a. Gate chu a lo inkalh a. Phone-a tu emaw a biak hnuah vai niawm tak cher lam pang hi a rawn chhuak vat a. Gate chu a rawn hawng a. Hlimi chu kuah titihin In-ah chuan an luhpui a. 

"Raju, naktuk atang chuan hetah ka awm leh rih dawn a. In hi i chhuahsan rih dawn nia. I nupuite pawn an ngai tawh ang che" tiin Vaipa chu a be mawlh mawlh a. Raju-a chu chu in enkawltu chu a ni ngei ang. Amah hi Falkland-a awm tho a ni a. In hi a tet deuh vang leh Teteii'n rem a tih chiah loh vangin a nupui te an cheng ve lo va, in atangin a enkawl a ni ber mai. He in hi Pu Dintluanga'n a tan liau liaua a sak, a ruka a neih chhun a ni. A lian lem lo naa a mawi bakah a hlu ve tlat. Rajua hian pu Dintluanga pawisaa pûksak a, chumi rulh nan chuan he in hi a enkawl ta mai a ni. Lehlam takah chuan vai ho hi an lo rinawm phian nge amah Pu Dintluanga awm tawh lo mah se; a enkawl hnûm angreng viau. Teteii hian a in chungchang hi Mala a hrilh ve ta bawk a. Mala hian a rawn vil ve zeuh zeuh bawk nen, a ti lo ngam lo a ni maithei. Khatia Zaia'n a blackmail-a pawisa chungchanga an buai tak riauah khan Teteii phei chuan hralh mai a duh hman rum rum a. Mahse, a neihchhun ve takmeuh a nih vangin kawng dang a dap hram hram a ni. 

Hlimi chu a hawi a hawi a. A harh telh telh niin a lang. 

"Hei khawi lai nge? " a ti hâ a. 

"Ka in a nih hi. Hetah hian ni rei vak lo chhung chu i cheng rih dawn a ni" a lo tihsan a. Hlimi hmelah chuan hlauhna a lo lang nghal. 

"Nang hian eng nge i tih? " a ti nghêk a. 

"Hahdam rawh. Ka laka game in khel kha intihsual lian ber a ni. A pawi khawp mai. Ka hmanrua i nih a ngai rih tlat" a lo ti hmiah mai. Hlimi chu a che hrut a, rang tawkin kawngka lam a pan vut. Teteii chuan hahdam zeta thu chungin a lo nuih sâng ringawt. Kawngka kalhna chu hawngin pawnah a tlan chhuak a, gate a thleng zui nghal. Gate chu lawn liam chi rual a lo ni lo va, tala lian pui mai a inkhai hnuk bawk. Beidawng zetin street light-in a chhun phakah kawng a dap a, thirlen a inzar vek a, tlan chhuahna tur reng reng a awm lo. Gate chu a sawi a, a au nghek nghek. An piah deuha building lian taka eng rawn chhuak chu a va hmu thei. A awrawl tawp tawpin, "Min ţanpui ru" tiin a au a. Mahse, tumah an rawn dikdâk eih lo. A indap a, a phone a lo ak bawk si lo. 

"I chau vek ang. Lo lut mai rawh. Mu ang" Teteii chuan a hnunglam atangin a rawn ti vawt raih a. A phu chiang kher mai. Teteii chu a va bawh a, a lo petek zauh. Ani damdawi hnathawh la reh fel si lo nen a luhai chu lei charah chuan a tlu hnawk a. A khup a la sawh zui. A zak tawn tawna rawn kuahin, "Kha i intina mai mai. Lut ang" tiin a kai tho a, in chhunga luh leh mai loh chu kawng dang a awm lo. 

Zing dar 3 a pel tawh. Zaia mutui lai chu a phone riinna tiharh ta a. Teteii a lo ni. Buaina a awm mawni le ti rilru chungin phak chuapin a la a. 

"Zaia, Hlimi'n a be duh che" tih leh Hlimi pek a rual nghal. 

"Hello, Zai, Teteii'n min kidnap' tih leh ţah a rual nghal a. Zaia a thu chhuak chiang kher mai. 

"Hlimi.. Hello.. Eng maw i sawi kha" a ti mial mial a. 

"Aw.. Teteii hian min that duh mai ang" Hlimi'n a tih zawh rualin Teteii chuan, "Police rim nam ka hriat rualin i bialnu hrawkhrui ka zaichat nghal ang. Hun rei tak ka mamawh lo. Ka duh chu, kei leh ka nu hi min tibuai tawh suh. Min kaltir la, mi hrang angin kawng hran zawh ang" Teteii aw ngaihnobei lo zet chuan a rawn ti ta chher chher mai. Zaia chu a phâwk hru mai. 

"Khaw nge in awm? Ka lo kal dawn" a ti lawi rût a. 

"Mi mawl ka ni lo aw. Ka duh dan i pawm anih chuan Hlimi hmel i hmu leh vat ang" Teteii'n a rawn ti. 

"Aw.. Ka pawm e. Chhuah rawh. Ka tibuai tawh lo vang che u" Zaia chuan a ti chûl a. 

"Naktuk tlaiah kan inhmu ang. Chumi hnuah chuan khawpui hi in chhuahsan lo a nih pawhin kei leh ka chhungkua hi min lo tibuai leh tawh ngai suh ang che. A chiang em? " Teteii chuan a ti nghet charh charh a. 

"Um.. Aww.. Tehreng mai" Zaia chuan a ti nawk nawk. Teteii chuan phone a dah nghal hmak. 

"I him dawn e. Mu ang" tiin Hlimi a melh a. 

Tukţhuan an ei laiin Teteii leh Hlimi chungchang chu Dinfela'n a sawi a. Pi Zawmi chuan a man thiam nghal mai. Mahse, a hlauhthawn hmel takzet a ni. 

"A va zia lo ve aw. Chanchin an la rawn sawi lo em ni? " Pu Vanlal chuan a ti chuar chuar a. 

"Sawi lo. An buai deuh a ni maithei.," Dinfela chuan a lo ti vat a. Drose te pawh vawiin chu an exam loh ni a ni a. A thawveng angreng hle. 

"Apû Lawma te inah ka zuk leng teh ang. Ka ar ka keng bawk ang a" a ti a. 

"Lehkha i zir ang. In exam zo ţêp" A nuin a lo ti vat. A nu melh run run chungin, "Min ngai tawh alawm le aw. Ka thiam vek tawh kan exam tur chu" a lo ti hlar a. 

"Mamawi, nang pawh in chawl bawk a. Maths hi a chak lo nasa si a. I lo enpui zeuh zeuh dawn nia aw" Diteii chuan Mamawia a be daih. Ani pawh a lo bu nghut a, Drose chuan, "U Rinmawia te chuan zir tur a ngah lutuk. Min zirtir hman lo" a lo ti a. 

"Ka hman reng. Zir vak a ngai tawh lo va" a lo ti sam êt. Drose chuan a va ngei tak. A kham nghal hmak. A pu Lawma a ngaih tawh bakah a ar sual huai a keng chhuak khat tawh a. A za zek zek asin le aw. 

"I la insiam na nge? " Zothana rawn lut chuan Duati lo mu zâl chu a melh kâwk a. Duati a tho vat. Zâmi erawh dawrah a awm thung. 

"Hmuh che a ngaihna ka hre lo" a lo ti hmak. 

"Insiam rawh. I nu pawh ka hrilh tawh e" ngaipawjmawh lo zetin Zothana'n a lo ti a. Duati chuan a melh râm râm ringawt. 

"A va mak. Insiam rawh" a ti leh a. 

"Hetah hian sawi mai rawh. Chhuah kher ka duh lo. Keimah vangin insualna a thleng leh palh ang" a lo ti nghal tâwn tâwn a. A inup ve deuh bawk a ni. 

"I nu a lo haw chuan ka sawi zo hman lo vang" a lo ti zawi sup. 

"Engthil fakau nge a. Inzawmna kan nei tawh lo va, eng nge ka hriat tur la awm cheu" a lo ti leh nghek. Zothana a nui a, "Ropui rapthlak deuh a nia. Ka rilru ka thlak leh hma hian insiam thuai teh" a lo ti nghet churh. A tumruh hmel angreng si a. Duati pawh chuan a hre chak ve tho si. Peih lo zetin a va insiam a. Simple takin a inchei. Zothana duhzawng tak angin. An chhuak dun ta a. Zothana chuan an in lam a panpui a. Duati chu a ţawng eih lo. Zawhna pawh a nei hek lo. 

In an thleng a. Zothana'n a roomah a hruai lut ngjal. A zui ve zel tawp. Hnialin awmzia nei hek lo le. 

Chairah a thuttir a. Ani khumah a thu thung. An ngawih dun vang vang hnuah, "Sawi vat rawh" Duati chuan a ti hmuk a. Zothana a lo thaw hawk. A tana sawi chhuah a harsatzia a hriatthiampui si lo. Huat hmel zeta a rawn melh leh râm râm thinte chuan a tina takzet. Mahse, mipa a ni a. Inthunun a tum tlat. A aw a thian kâk kâk a. Zawi muangin Teteii nihna dik tak leh a thil lo tih tawhte chu a sawi ta malh malh a. Duati chu a changin a lo meng phâwk deuh thin a, a chang leh rinhlelh hmel deuhin a lo awm bawk. 

A tawpah, "Chuvang chuan a ni harsa ti tak chunga bansan che ka tum ni" a ti ta a. A thawl hawkin a inhria. Duati erawh a ner deuh, a ngaihna hriat loh hmel deuh hian, " Chu chu ka tan eng nge a pawimawhna. Ani saw ka nu nau a ni satliah ringawt.. Ka tan engmah a nu ve lo" a lo ti chhum hmak. 

Zothana chuan harsa tih hmel zet hian, "Ani saw i nu nau a ni a, ani saw ka pa thattu a ni bawk asin" a ti ta sup a. Duati a tho zawk. Rapthlak tih hmel zetin Zothana a melh a. 

"Fiamthu thawh turin helaiah ka zui lo che" a ti vin tuar. 

"Thudik a ni. He thuruk hi ka u nen chiah kan hria" a lo ti nghut. 

"Aw le. Thudik a nih takzet chuan nang leh kei chu a rem ngang lo a nih dawn chu" Beidawn hmel zetin Duati chuan a lo ti a. 

Zothana chuan lainat hmel zeta melh vawng vawng chungin, "Kawng khat chu a la awm" a ti sup a. 

Duati erawh a ngawi. "Nang hian ka nupui nih i duh anih chuan Teteii laka phuba lak ka tumna hi harsa ti tak chungin ka lalet ang. Mahse, i tan a harsat ve turzia ka hria. I thisen zawmpuiin i pasal pa a that tih hre reng chunga ka bula i mu zantin tur chu inngaihtuah la, i thutlukna eng pawh ka pawm ang" Zothana chuan a ti ta a. Duati'n a chil a lem khawlh. Sawi tur reng reng a hre lo. Tluanga a hre chhuak a, ani nen chuan engtikahmah a rem tawh dawn lo. Tin, Tluanga lakah a rilru a lêt chiang hle tawh bawk. Zothana hi a mipa duhzawng tak a ni a, a bulah chuan him hliah hliahin a inhre thin. Mahse, khatia hmeichhe dang nen an lo khatihna khan amah rin lohna a a tizual a. Ring leh tur chuan hun a mamawh rei viau maithei. Duati lah mi sakhat, rilru nghet bur chi a ni si a. 

"Ka lo inngaihtuah ang " a ti ve ta sap a. Zothana pawh a bu nghat mai. Duati chu a va thlah leh thlap a. An indeh fuh palh hlek pawn feelings an la ngahzia an hre ve ve. Inhìpna nasa tak chuan an rilru a tihah zual. Duati phei chu hmeichhia a la ni zui. Awm dan tur a hre thiam ta der lo mai. 

Zairemmawia erawh rilru buai leh hlauthawng takin a motor chu a khalh miah miah a. Natna tihdam theih loh vei si, heti chen chen a dam theihna chhan langsar tak chu Hlimi hi a ni. Hlimi hian tawp chin nei lo khawpin a hmangaih a, engkim a ngaihtuahsak vek a, a damdawi ei hun pawh a hriatpui vek. Engvanga hmangaih ta tlat nge a nih Zaia pawn a hre thiam lo. Puia fanu laka a chet dan te a ngaihtuah a, Hlimi'n a la hre lo hlauh. Heti khawpa amah hmangaihtu a phatsan thei mai hi amah pawn mak a inti. Senteii kha a lo ìtawmin bum a nuam viau si a, a intalawk a ni ber mai. Dinhmun hlauhawma Hlimi an din meuh chuan, Hlimi hlutna te chu chiang takin a rawn inlar zut zut a. A chân phal thlawt lo a ni ber mai. Teteii ber kher an lo bitum chu a inchhir vawng vawng mai. Mahse, sum chu a chân mai ang chu.. Nunna pakhat pawh hi a hlu êm asin. Teteii hrilhna lam zelah a tlan a. Kawng pengah Teteii chu a lo ding vâng mai. 

Teteii hian Dinfela biain, Hlimi nu a la that loh deuh vangin a la awm ve rih thu leh motor pawh kawl rih a dil nghal a. Dinfela lahin that lo chhuah vein a lo remti ve mai. Hlimi'n a ph a off tlat vangin Teteii chu an thu hriatna a ni mai a. Ngaihthat lohna em em an nei lo. A chhan pawh Hlimi kha hmeichhe fel tak a ni tlat a. Teteii pawn a chunga tha tan that a chhuah ni ve maiah an ngai a ni. 

A in lamah an inzui phei a. Zaia chu a hmanhmawh kher mai. Hlimi chu pangngai takin a va hmu a, a lawm kher mai. An inkuah nghal chawt. Teteii chuan ngawi rengin a lo thlir a. Mala a hre chhuak vang vang mai. Ani pawh a rawn haw hnai ve tawh ang chu. 

"Tichuan, in inlawm kha duhtawk u la, kan ruahmanna sawiho ta zawk ila" a rawn ti ta a. 

Zaia chuan, "I sawi ang khan.. Ka sum khawlsa hmang hian Aizawl hi kan chhuahsan vat ang. Kan duh dan a ni hrim hrim bawk a. Mahse, thil pakhat erawh min tihsak ve la ka duh" A ti a. Engvanga Teteii chu hlau viau nge maw an nih le.. 

"Eng nge sawi rawh" a lo ti vat. 

"Chang nuai khat tal min pe rawh. Tichuan, in chhungkaw nun atangin kan kal bo ang. " a lo ti hmiah mai. Nawr ve ngam tur pawh an ni tho mai. 

"Aw le.. Tihsakin i awm ang. Mahse, ka sawi tawh ang khan kan nun atanga in kal bo lo va, kaw dang in hreuh leh a nih vaih chuan, Hmun tinah ka awm tih hi hre phawt ang che u" Inringtawk zet hian Teteii chuan a lo ti a. 

Zaia bawk chuan, "Anih leh i chhungkua saw i hmangaihin kir leh i duh takzet em? Ka puihna i la mamawh leh mai lawng maw? " a lo ti leh a. Teteii chu a melh kar bawk. 

"Keimahin ka ti thei. Saw chhungkuaa lut leh tura ka beihna hautakzia hria la, nanga puihna mai mai hi ka mamawh ring suh. Keima tan ka bei ang a, keima tan chauh ka hneh bawk ang" a mitmeng chu Lalrinawmi chiah chiah a ni. 

"Aw le, a tha alawm.. Mahse, Fimkhur rawh. Kei chauh lo pawh hian Nunui i that tih hretu an awm maithei ania" Zaia aw chu a fiah kher mai. Hlimi erawh chuan an pahnih chuan a lo melh tawn sek ringawt. 

"Tuin nge hria ang? Mala chu ka ta a ni. Doctor Jo lah ka hneh hnu.. Tuman ka hlawhtlinna kawng hi min chhuhsak leh tawh lo vang.".a lo ti hriam hraih a. Zaia chu a melh thut, "Engvanga khatiang thute kha sawi kual duah nge i nih a?" a ti zawi sap a. A rawn din hnaih nghal. 

"A chhan chu ka rin loh em vang che a ni. A tira ka rinna kha a dik chiah reng bawk. I nun sima saw chhungkuaa i kir leh tak tak hi ka ring therte lo va, ka ring dik chiah bawk. Tum eng emaw i nei anih loh chuan i hmelma te hmel hmu reng chunga saw ina chen ve saw i peih ka ring lo.. " a lo ti ve sak sak. Thinrim hmel erawh a pu hran lo. Teteii chu a nui hak a. 

"Ka hnungzuitu i ni tawh bawk a. Min hre chiang kher mai. Ni e, a dik, ka plan i tiflop a, chuvanga tunah pawh bei che ka ni. Ka thil ruahman sa i tihbuai avangin. Aw, ni e, tum chu ka nei alawm. Hman atanga tun thlengin ka tum a la ngai reng. Ka nun hremhmuna chantirtu Zodingpuii leh a pasal te hi ka la phumbo dawn a ni" a ti vawt raih a, a aw chu a khur lek lek bawk. Hlimi chuan makti zetin a lo melh a, Zaia erawh a nui deuh. A hmelah chuan hlawhtling intihna te pawh a lang. 

A tho va, Hlimi pawh a ding ve zat. "Anih kan kalsan ang che. Pawisa chu aw" a ti a. 

"Naktuk zanah Hlimi kutah ka lo dah ang. Tichuan, nang leh kei hi kumkhua atan kan inmangtha tawh ang" Teteii chuan zangkhai vahin a lo ti a. Zaia te chu an chhuak zui nghal. Gate thleng a va thlah a. A rin aia thil a awlsam tak avangin a nui sak. Rajua pawh koh leh vat a ngai dawn anih hmel. Chumi hmain hahdam a mamawh tak alawm. Number pakhat a hmet chhuak a. 

"Jo, hetah ka awm. Mala chu i han thlim leh ziai ziai mai ang hmiang" a ti har har a. A nui ri chu a mawi. Mahse, Mala tan chuan hriat a nuam lo viau ang le. A hre pha lo chu a lawmawm lamah ngai ang. 

"Ka lo kal ang" Jo chuan a rawn ti sup a. Phone chu dahin, chunglam a melh vawng vawng a. 

"Ka hneh ţêp e" a ti sap. 

"U Rinmawi.. U Rinmawi.. Heiii.. Eng nge i ngaihtuah? " Drose chuan a ti nghek a. Rinmawia a phu zawk. A melh ngai melhin a lo thu vung vung a, a ngaibtuahna erawh a ho hle. Shillonga ka chhuk hnuah Drose hi a lo lerh ang em tih vel mai mai a ni. Sawi pawh a sawi duh lo. 

"Ka chhungte ka ngai a" a ti ta daih. 

"Chhungte ngai rual pawh i nih tawh loh khaaa.. " a lo ti hlak hlak. 

"Nangte chu i nute bulah i awm a. Ka awm ve loh hi" a lo ti hluk. 

"Hmm.. Ka awm tho alawm keimah" tiin a nui sen sen a. A zak leh deuh nge a lei a chhuah zuk. 

"Mahse, min ngai lo ee.. Nang chu. Min lensan te i tum kha" Titau awka hian a lo ti a. Drose chuan inthiam loh hmel deuh hian, "Aa.. Ka ngai vak lo che. Kan inhmu reng bawk sia" a ti heu mai. A frank mah mah chu Rinmawia chuan a lawm daih zawk. Drose kum ngaihtuahin bialpa ngai hiam rual a la ni tlat lo ve bawk a ni. 

"Anih ka hawn hmain inkiss ve tal ila" a ti ta a. Drose chu a ang zuau.. Chutah, "Ka thiam lo vang. Engtia awm tur nge" a ti hû. 

"Awm tawp a ni mai. I hmui i lo dawh tawp anga ka lo fawp dawn alawm" dawhthei zetin Rinmawia'n a lo ti. 

"Ih… Insi hlekin aw.. A zahthlak sia" a lo ti ve ta a. Rinmawia lawm tawk a tling der. Drose upat hun hi ani aia nghakhlel tur an tam kher bik lo vang. 

"Aw Tete, eng nge in chanchin? " Diteii chuan a ti a. 

"Hlimi nu chu a zia tawh reng. Amah Hlimi hian a phone a tibi a, hei a la buai angreng. Kei chu Mala te inah ka riak lawk ang ka tia. Lehkha pawimawh enfel turin min tia" Teteii chuan whisky no lek chungin a ti sar sar. A hmaa thu Dr Jo chu a lo khi ţhaw bawk. 

"Aw le.. A that chu.. Inenkawl tha la aw" Diteii chuan a ti a. Phone a dah nghal. 

Zankhuain Teteii leh Dr Jo chuan nuam an chen a ni ber e. 

A tuk zing ni chhuak chu a kang tha kher mai. Teteii pawh thlamuang zetin a inkhalh haw a. Mala a be pah mawlh mawlh bawk. Mala lah chuan engmah a rawn hre ve der si lo. Zing dar 9-ah chiah an in kawt a thleng a. Thawveng zetin a chhuk. In chhung a lut chiah chu a ding châwih! Engdang vang a ni lo. Police uniform ha mi pathum leh hmeichhe pakhat fin hmel zet ten an lo hmachhawn vang a ni. 

"Eng nge thleng a" pawisawi lo zet hian a ti a. A chhungte pawh an kim thap mai. 

Hmeichhe fin hmel zet khan rawn panin, "Ka thil chhui sual awmchhun la ni hial tur, min bum chiang em emtu ka hmu che hi ka lawm hle mai. Mi tha ni la, han thawk dun thei ila a tha tur. Mahse, hmanah i thihna ka chhui a, tunah erawh kha mitthi kha ka man a ngai ta tlat.. Nunui i thah vangin man i ni e" a ti fiah kâk a. An inmelh tawn ran mai. 

"Eng a?! Eng thu nge i sawi a? " Teteii chuan a ti ţhat. 

Amanda chuan, "Zairemmawi kha ka hmanrua a nih kha.. Hei hi i en ve duh mai em? " tiin pendrive a lek vâ a. Room kila computer inhungah chuan a vit lut nghal. Chutah chuan Zairemmawia nen a ina an inbiakna zawng zawng leh a hmel zawng zawng nen a rawn lang ta vek mai le. Teteii chu a thi ta. A vawi hnihna atan Diteii a hneh leh ta lo. A bing mum mum a. Sawintur a hre lo. A tlu tur chu Officer pakhatin a rawn man hman hram. Pi Zawmi a lo rak ţhawt bawk. Mi dang erawh an che chang lo. 

Evidence a that em vangin Teteii tan insawi kuak theih a ni ta lo va, man a ni leh ta. A vawi khatna chu Lalrinawmi a nih lai khan a ni a. Tunah erawh Zomuanawmi ngei a ni ta e. Engtin nge hetiang zawng zawng hi a thlen theih?! A mak hle a ni. He thil bultumtu a kaikuang ber chu Pu Vanlala a ni. 

A nupui Diary a chhiar atang khan a ngaih a tha thei ta lo reng reng a. A nupui awm dan lo danglam ve zel bawk nen. A rukin Amanda hi a ruai ta tawp a. Teteii a rawn lut ve ta chiah, Amanda bulah Teteii chungchang engkim a sawi vek bawk. Kha khan Amanda hna a tihawlsam phah ta hle a nih kha. Zairemmawia'n a blakmail tih Amanda khan a hre thei ta a. Teteii chet hun a nghak ran mai. Tlai erawh a hlau. Teteii inringtawk lutuk kha a pawi zo ta a ni ber. Zaia chu a kuta awm sa, a hnuhkual theih emaw a ti a, hneh emaw a intih laiin hmanrua a lo ni reng si. Ni e, Teteii te ina Hlimi a riah zan khan Amanda chuan enthlak hna a thawk daih tawh. A beisei ang chiahin Teteii'n a phur chhuak a, Zaia pawh hrilh hriat a ni ta chiah. Khami zing Zaia'n Teteii a zuk hmuh hma si khan Amanda te chu chein, Zaia chu an man ta hmiah a. Mi a blackmail vangin. Tichuan, thiam taka Zaia dâwpin Teteii'n Nunui a thah thu te chu a sawi ta vek a. Remruatna an siam ta a ni. Zaia chu an thawhpui turin an sawm a. Zalènna an tawktarh bawk. Ani lahin Teteij a lo haw ve bawk si nen.. A kawr hma ipte-a a pen ah laiah khan camera kam ruk a ni ta a. A theihtawpa Teteii inpuantir kha a tihtur a ni ta a ni. 

A hlawhtling ta chiah reng a. Pu Vanlala beihna pawh a thlawn ta lo. A fanu dikna chanvo a hmuhsak ta kan ti thei ang. 

Diteii te erawh a ţhawng takzet a ni. A pain engmah a hrilh si lo va. Awih harsa an tih rualin Teteii nihna han enin dawt a ni lo tih a chiang si. Diteii rilru pawh a na takzet a ni. A unaunu kha a la ni miau si a. 

Heng zawng zawng aia mak leh danglam zawk chu Teteii hian engtin nge a bum vek theih tih kha a ni. Chu Zawng Amanda-in a la sawitir em ang chu.. 

"Nu, ka sawi tawh kha aw. Kha nu kha mi sual ka tih reng kha" Drose chuan a ti a. 

Diteii chu za lo zetin a nui ringawt. 

"Ani kha ka û a ni asin" ama hriat tawk lek hian a ti sap a. 

(Last chapter chiah a ngai ta 😚