D'ROSE… (Chapter- 26)
Ziaktu : Toni Râlte
Diteii chuan, "Zairemmawia ngei a ni tih i chiang em? " a lo ti vat.
Puia chuan, "Chiang e, amah ngei a ni. Ka fanu bumin a natna a lo kai bawk. Ka rilru natzia hi " a ti nghut nghut a. Diteii chuan pawi a tihpui kher mai.
"U Zaia address min lo pe rawh " a ti chang fal a. Puia chuan a rawn pe.
Zairemmawia a rawn let leh chuan buaina eng emaw tak zawng a rawn keng tel leh ngeiin a rinawm. Chu chu Diteii te tan chuan a hlauhthanawm tawh takzet a ni.
Pi Zawmi te pawh buai ru tak an ni. Anmahni blackmail tu an hre tawh a. Teteii lah chuan pawisa pek a tum lo bur si. Pi Zawmi a hlauthawng ropui bawk si. Teteii chuan engtia chet lak nge a tum a hre thiam pha lo. Hun an nei tlem tawh bawk si. Teteii chuan phone thar a leitir a, sim card thar nen. A hma khan a phone kha a tibo daih a. Amah phone khawih thei ziazang ni hek lo. Phone nei lo vin rei tak a awm hman a ni.
Zairemmawia chu a call ta a. Vawi 4 dawn a ring ral hnuah zangkhai zetin a rawn la ta a.
"Zaia, keimah Teteii.. Mawla, ti nge ka plan i tihflop vek a? " a ti nghal bawrh bawrh a. Zaia chu a ngawi det. A hamhaih a ni mahna.
"Eng nge a awmzia? " a ti hâ a.
"Blackmail ka tum tak i rawn tinzawn ve a. Ka chanpual a ni asin" Teteii chuan a ti leh a. Pi Zawmi chuan buai hmel zetin a lo melh reng ringawt.
"A va mak ve. I kir tawh maw ka tia" Zaia chuan a ti bah nak. Rin harsa a ti viau.
"Min be pawp hmasa ni la, thil a awlsam zawk tur. Tun atang chuan kan thawk dun leh ang. Thurualpui i nei em? " a ti nghal zat a.
"Nei e.. " a lo ti hmuk.
"Enteh, min rinngam rih lo niin ka hria. Hmaichhanah kan sawi dun thei alawm. Tunah hian ka nu leh Diteii chu sum ngaihtuahin an buai vel mek ang. I thangkam a per ţêp a, kei hi ka inrawlh a, ka ka ka ang a nih chuan i hlawhchham a ni mai. " inringtawk zetin a ti leh a. Zaia chu a inngaihtuah buai viau ngei ang.
"I dam loh kha.. Khaw nge kan inhmuh ang? " a ti ban ta chat a. Teteii mize hre tawhtu a ni a, a chhungrilah Teteii ţihna a la nei tlat a ni. A boss kha a ni thin miau a.
"Naktuk zanah Alabasta Hotel-ah room lo book la, dar 8-ah kan inhmu dawn nia" Teteii chuan a ti a. A rilru hi chu a chak ve tawk a ni. Zaia pawh chuan, "Aw le.. A tha alawm" a rawn ti ve a. An inbiakna an titawp.
"Nangmah chuah hmu lul suh. A lo tina thei che asin" Pi Zawmi chuan a fanu en chung chuan a ti a.
"Zairemmawia hi ka hre chiang alawm. Min tina ngam lo vang. Lo lungngai suh.. Nu, nang leh kei kan himna tur a nih dawn phawt chuan a tawp thlengin le" a ti nghet charh a. An inhmuh tur thu erawh Diteii te hrilh lo turin a ti thung. Pi Zawmi rilru erawh a nuam tehchiam lo hle mai.
"Drose, ti nge min lo nghah loh? " thingpui ina dawhkan a kil laiin Rinmawia a rawn haw a.
"Ka zo hma lutuk a" a lo ti a. Chhangthawp a keih leh tâwn tâwn mai.
Rinmawia paw'n thingpui chu a inthlit ve nghal a.
"I ti tha em? " tiin a zawt a.
"Pass-na khawp chu ka chhang ve ngei mai ah" a lo ti mai a.
"Engtik nge maths in tih dawn khah? "
"A tawp berah. Min exam sak mai la a tha tur. Ka hne ee" a lo ti hnual raih a. Rinmawia a khi suk, "Kan chawk char char dawn nia. Kei chu zir vak ngai a awm tawh lo va" a lo ti a
"Zir laiin mi fawh thut i ching si" a lo ti hlak. Tumah an bulah an awm loh vanga chutia sawi ngam chu a ni.
"Hmuiah tawh aw" Rinmawia'n a lo ti sur sur.
"Zak teh. Ka hmui virgin hi chu nakkumah i hawng dawn nia" a lo ti nghek.
"A virgin tawh awm lo em mai. Zorina paw'n a fawp tawh ang" a lo ti hluk.
Rinmawia melh rum pahin, "Awiiii Zorina sawn ka kut a vuan ringawt aw. Engmah a bak a ti lo hrim hrim. A fawh a nat hmel em mai, a hmui a chhah si" a lo ti leh chiam. Thiangi a rawn kal tak vangin thil dang an sawi ta daih.
Enkawli pawh dam takin Damdawiin atangin a chhuak ve thei ta. A chhuah zanah chhungkhat laina ten chaw an ei khawm a. Bena pawn phur zetin ar te a talh surh surh. An makpa chei titih vangin a inkiltawih duh bik lo. Eni chu chân a hlau a, nakinah hun thawlah Eni nu leh pate titipui a tum nghe nghe. A û te pawn an hrethiam em em a, chanchin an lo zawt chamchi mai. Bena hmangaih chu an ngaina ve nghal mai niawm a ni.
Puia te chhungkua erawh an buai takzet. An nupa an innghirngho reng a. Senteii lah a tawm tlawk tlawk a. Chaw a ei thei bawk si lo. An nau pai pawh a ngaihsak hleithei lo. Hiv a positive ta si a, thi vat turah te a inngai. Zaia chu a ngai em em a. Ani lah a thisen test atang khan a reh hmak si. Ngaihdam tal pawh rawn dil ve se, ngaihdam a chak. "Kan lo heti tawh si a, kan positive ve ve tho va, innei ang" tiin rawn hruai daih se tih ten a ngaihtuah fó. A nu te lahin tha zaiin an be hleithei lo va, an fanu neihchhun an duat em em kha an mi chuang en ţan ta chu a nia. Ani kum naupangte tan chuan tawrh harsa tak a ni. Thih daihte a chak a. A naute chu a ngaihtuah ve bawk si. A nuţa te lahin, "Min kai tawh lo maw? " ti ten an ţawngkhum thul. A tan chuan hun chu a khirhin a nunrawng mah mah a ni.
"Dah mai ang. Heti te chuan thenawm ten an hre vat ang a. Engtin nge kan awm ang a" Baby chuan a ti hlar a. Senteii dah bo dan an ngaihtuah mek a ni.
Phaiah Puia ni hi a awm a. A bulah zuk daha fa te a neih hnua fa nei lo ang hmiaha hruai leh an rêl mek a ni. Puia eraeh chuan a chhungrilah nuam tih lohna a nei tlat thung. An fanu neihchhun a ni a, chhungte mah nise an inhmu khat tawh a, chutiang mi te bula naupangte raipuar chunga a zuk awm tur kha a khawngaih a ni. Baby ngaihdan leh duh dan te chu mak a ti ru takzet. A tawpkhawk a ni tawh a, nu zawk a ni a, a fanu chu lainata tuamhlawm tur a ni si a.
An inhnial buai laiin an awmpuiin inleng an neih thu a rawn sawi a. An va chhuah chuan Diteii a lo ni reng mai. Eitur a rawn keng nual bawk a.
"Senteii ka rawn kan dawn a" a ti a.
"Roomah a tawm leh tawh anih kha.. Kan ko ang e" tiin Baby chu Senteii roomah lutin, "I nu Diteii a lo kal. Rawn hmu rawh" a ti bak hlak. Senteii chu a phur chiah lo hle. A nu Diteii chu a ngaina thin em em, a zah bawk.
A rawn chhuak phei ve a.
"Awhaw.. Ka hmuh tum dan che aiin hmuh i nuam daih mai. I duhzawng tak ka rawn keng a nia" tiin a thil khai ho chu a phawrh a. Senteii chu a ngawi reng. Diteii chuan Apple chu a va vel nghal mawlh mawlh a. Senteii chu a pe a, "Chaw i ei thei vak awm si lo va, tiangte hi a tha.. Ei châk i neih chuan rawn sawi rawh aw. Kha.. Dah tha la" tiin bag chu Senteii a pe a. Senteii pawn, "Ka lawm e" tiin a roomah a va dah a.
Puia chuan, "Zairemmawia chu engtia tih chi nge? " a lo ti thawt thawt a. Diteii chuan mitmeiin a khap vat. Senteii chu a rawn kal leh a, Diteii chuan duat deuhin a lo kuah a. A sama chul heuh heuhin, "Buaina lian tak i tawk si a, thil tha lo deuh deuh i lo ngaibtuah te ka hlau a. Tihsual engmah i nei lo a nia. Bumin i awm ve a ni mai. Nangmah anga bum tawk hi an tam ania aw. Thenkhat chu an thi a, thenkhat chu an damkhawchhuak thung. Nang pawh a dam khawchhuak tur zing ami i ni. Nau pai i ni bawk si a, inngaihtuah hah vak vak loh kha a tha aw.. Damdawi ei tha bawk la. Hiv te phei chu damdawi i ei that phawt chuan, mi dam tha pangngaiin i thau mum kâng mai ang. Beidawng miah suh ang che. I lam kan ţang vek a nia" a ti mawlh mawlh a. Senteii a kun ngawih ngawih. A mittui rawn hnâm ţiam ţiam chu a khap sak sak a. Zawite fiah deuh si hian, "Nu Dite, nu ni daih la ka ti" a ti ta a. Puia te nupa pawn an hre pha. Baby chu a nghing dawt. Puia pawh a inhumruh nghal.
"Ngah maw.. Ih e, i nu leh pate hi chu hre thiam rih rawh aw. An rilru a nain a hrehawm em em a ni. An hmangaih lutuk vang che a nia. I tawrh ve rih a ngai alawm.. An hmangaih takzet che a nia" Diteii chuan a ti leh heuh heuh a. Baby zawk chu a inpet fan fan. A fanu hmel dang bai leh mitmeng vai riai te chu a lo en liam mai zel a. A chhungril khawhar zia leh mangan ruk ve zia tur a lo ngaihtuah ngai lo. Fanu dangte chu an nute bulah inbunruakin an ţap hawm hawm a. An nuten duat takin an lo dawngsawng thin a ni ngai a! Ani ve hian a fanu chu thinrimna leh ama natna nen a lo hmachhawn a. A fanu chu a nat ve a phalsak lo emaw tihturin na ber leh hrehawm ti ber angin a awm a. A hma a sial vang a ni bawk. Mi ten an sawi dan turah a buai a. Natna tihdam theih loh vei mek a fanu avang chuan mi ten an thinhrik a hlau bawk. Mahse, tun hi a ni lawm ni.. Pathian ringtu a nih a lanna tur chu.. A fanuin a mamawh ber laiin a lo vaikiang a, a tlanchhiatsan zel chu a ni si a.
A fanu bulah va thuin a kuah thlawp a. Mittui tling pam chungin, "Bawihte, ka lo va sual em.. I tana a hrehawm turzia ka lo hre chang lo va. Ka lo va tirethei che em.. Min ngaidam rawh aw. Tun atang chuan i tan nu tha ber nih ka tum tawh ang. I nu. Diteii atang hian zir tur ka va ngah em.. Bawihte, khawvel hian min hawisan pawh nise, i kiangah ka awm zel tawh ang.. " a ti ta mawlh mawlh a. Puia pawh a hnìm ruih mai. Senteii pawh insum zo loin a ţap chhuak ta râwih a. A nu nen an inkuah ngawt ngawt mai.
"Dite, i lo kal lo ang tih ka va hlau em.. Kan chhungkaw tidam tura Pathian tirh che i nih dawn hi" Puia chuan a lo ti ve bawk. Diteii pawh a inhru ve fap fap. Pathian hnenah lawmthu a sawi mawlh mawlh mai.
"Mahse, Zairemmawia hian engmah a la rawn sawi lo maw? " tiin Puia a melh a.
"Ka va biak chuan, Sawn man te min lo thing phawt u la a tia" Puia'n a lo ti a.
Diteii chuan, "Va ţhin ve phawt chu a ngai alawm. Tunah chuan mualpho huamin kan chet a ngai a ni mai. " a lo ti a.
"Ni e, chhungkua kan lo inrawn ve leh ang a" Puia'n a lo ti. Diteii a lo bu nghat.
Dinfela a hna a laklawh deuh vangin zanriah a rawn nang lo va. Chaw an ei laiin, Drose chuan, "Exam zawh chu apu te rualin ka zin ve tawh ang" a ti a. A nu pawh chuan, "In chawlh chhung chu i duh leh zuk zin ve rawh. Mahse, ţan hmain lo haw la" a lo ti ve a.
Pi Zawmi chuan, "Teteii pawh a lo kal ve dawn ni lawm ni? Phai lam Doctor hoin han enkawl se a dam sawt sawt mai ang" tiin Teteii chu a melh a.
"Eee.. Anih chuan ka kal leh lo mai ang. " Drose chuan a lo ti! Diteii'n a melh kâwk. A ngaipawimawh lem lo. Teteii chuan nêm zet hian, " Ka kal ve vanga i kal dawn loh ai chuan ka zin ve lo mai ang" a lo ti a.
Rinmawia chuan a kein Drose chu a va nghawk zauh a. Drose lah chuan phut uih pahin, "Nge? " a lo ti hû pek! Rinmawia chuan a melh duh lo lui ngar ngar.
"Drose, Teteii zin ve dawn vangin maw zin chu i duh leh tak loh" Diteii chuan a ti a.
Drose chuan, "Ni deuh" tih pahin a kham zui nghal. Diteii ţawng tum a an ziau laiin, "A ho em mai. Tleirawl lai nun a nih hi. Mi ei loh te hi an tina ve lawm" Teteii chuan a lo ti vat. A inthlahrung hmel chu Diteii chuan hmuh hrehawm a lo ti a. Drose chu a ngei khawp mai. A fanu mahnise; hetianga a awm hi a ngaihdan a ni tawh lo nasa. Dinfela hauhtir a tum. A pa hian a hau ngai mang lo va, a hauh ve tawh chinah chuan Drose hian a tâwn lui ngam ngai lo. Engvanga Teteii hi haw tlat nge maw a nih ni..
"Lalduat, i cher riauin ka hria. Ti nge chaw i ei tha lo mi? " a thiannu Pari chuan a ti sar sar a. An thil order a la thleng lo. A hma zawna thu inla nula ve chi Lalhminga pawh chuan, "Dik chiah, hmannia kan inhmuhte kha chuan i mum kâng sia. Rilru natna te hi i nei leh a ni lo maw? " a lo ti hlawi hlawi a. Duati a nui lui sâng, "Ka pum a chiang lo va, tun lai chu. Thil ka ei tha thei lo" a lo ti a. Ni hnih thum lek chhunga lang thei khawpa a lo tlahniam chu amah a inhua. Nep a inti bawk. Mahse, tawrhna hi ngaia neih a har ve bawk si a ni.
Zanin tlaiah Pari zin a lo haw lawm nan an dine out a. Intihharh pahin tiin phur vak lo chungin a zui ve ta mai kha a nia. Hminga bula awm hi a nuam ve a, sawi tur a lo hre ve bawk nen. Pari lah thawveng chi a ni bawk a. An bulah chuan tlem tala a thawven ve a beisei a ni. Sea food a chah ho chu a rawn thleng a, kaikuang a hmuh rual chuan Zothana a hre chhuak nghal. A hnual nghal vek thei mawle. Mahse, a intipachang hram hram a.
"Eng nge sas lam te.. Tluanga bawk em ni i la mutân? " Pari chuan a ti a. A nui rah rah bawk. Tluanga bak kha an hre ve lem lo. Zothana hi chu a nu leh pa ten an hriatpui a, chu chu a ni deuh mai. Tluanga nen an inthenna a la rei loh deuh vangin han tlangzarh chiam kha a hreh ve bawk a ni.
"Ni mai mai lo. Tumah an awm lo" a lo ti a. A eitur chu a chawk let a chawk let ringawt.
"Tluanga chu hmanni khan ka hmu a, Awiij rui chhe tawp ta nih chu. Amah a ang lo tawp. In inthen hi a la tuar dawn chauh a nih hmel" Hminga chuan a lo ti ve a.
"Nia, a phatsan che kha chu a la inchhir ve viau ang. Tunah pawh a inchhir tawh.. A chawh ee" Pari chuan a lo ti leh hmiah. A thianten thil an hre lo lutuk chu a lo nui tawp. A sawi hreh ve laklawh tawh si.
"Awiii saw pa saw lawm man ka tih chuuu.. Hei tikhan melh vak vak suu.. Hmanni lam kan zirnaah U Masangi'n a rawn hruai ve a. A hmei a pain kan star vek" Hminga chuan a ti mawlh mawlh a. An piah chiaha rawn thu mek chu a melh zauh zauh. Duati erawh a kimki chawih chawih. A hmel chu a thup pah bawk. Ni e, Zothansanga leh hmeichhe pakhat nalh zet an ni tlat a tin ni.
"A chhe lo em anih saw" Pari chuan a ti ru sar sar a. Duati erawh a ngawi reng. Thil chu a ei mawlh mawlh ringawt. Zothana hawi kual chuan a rawn hmu ve ta chiah. Ani pawh a danglam nghal. Duati taksa landan danglam hman lutuk chuan a chhungrilah nâ a siam vawng vawng. A lainat takzet. Mahse, hetia a tih hi a ngai si a. Thil pawh a ei tha thei meuh bik lo. Masangi lah a tawng duhin a titi tui phian bawk si. Duati chuan engtin tak ngai ang maw tiin a ngaibtuah a. Amah leh amah te a inhua.
Duati te chuan an ei kham ta. "Leng ve leh ila" Hminga chuan a ti lar lar a. Duati erawh chuan, "Ka nuin haw vat turin min ti sia. Kei chu ka hman loh hmel" a lo ti nghal vat. Zothana'n a beng a chhi ran tih a hre lo thung.
"A mak thei. Kan vah harhpui ang che. E ka hria, Christy te inah kal ang u. Amah chiahin a awm. Nuam dawn heavy" Hminga bawk.
Pari pawh chuan, "Nia, drinks lei ve i la, Awii Lalchristy chu a lawm dawn. Va surprise ang u" a lo ti ve chul. Duati chuan, "Zanin atan chuan tawk teh se.. Nidangah ti mai ang u" mangan hmel zetin a lo ti a. Zothana'n a kut a lo hum ruh. A rilruin, "Duati, haw rawh. Kal ve suh. Zu i in ve tur a ni lo" a ti mawlh mawlh. Masangi thusawi pawh hriat alawi a nei lo.
Duati te chu an chhuak ta a. Zothana a za sek. Pawn lama thawm ri hak chuan a beng a verh zak mai. Mipa rak chul leh hmeichhe thinrim awrawl a ni. A tho ta vut. Ding zetin pawnah a va chhuak, mi dang chawl ve pawh thawm ngaichangin an rawn chhuak ve nghal. Hotel bathlar hmalamah chuan, Duati leh Tluanga an lo indinchilh ran a. Hminga hnar thi chu Pari'n a lo buaipui bawk. Tluanga chu a ding ngil thei meuh lo. A kekawr ipte a zen ţût a. Duati erawh a ding khawng lah, thinrim hmel zetin Tluanga chu a melh khai khai bawk.
Manager chuan, "Buaina kan duh lo a nia. Hetah chuan. Khawngaihin min chhuahsan rawh u" a ti chang fak a. Pari chuan Duati chu a va kai a, "Kal ang" a ti zui sap. Duati chesawn chiah chu Tluanga chuan a pawt let lawp a, a hrawkah a rek nghal.
"Kan thi dun mai tur a ni. Mi dang i neih dawn ai chuan" a ti sehchilh nawk nawk. Zothana chuan eng laiin nge a chet pawh a inhre lo. A hriat chhun chu Tluanga a hnek thal tawp chu a ni mai. Duati thlabar taka awm chu a kuah thlawp a, "Haw ang" a ti sup. Lo awm ve dangte chuan mak ti em emin an lo en thap. Hminga leh Masangi mawlh chu an phâwk. Duati chu a kai a, stepah a chhukthlak pui miah miah. Duati lah a chiâi nasa, a zui ve mawp mawp bawk. A la thlabar hle tih a lang reng mai. Motor-a an thut hnuah, "I la hmangaih em ni? " Zothana chuan a ti nghut a.
Duati chuan a rawn melh hrâwk, "I buaina tur a ni lo. Ka chhuk dawn" tih leh kawngka hawn a rual, Zothana kut erawh a rang zawk deuh, a rawn pawt lut zawk.
"Awm mai mai rawh. Ka seh dawn lo che" a ti a. Ngawi rengin Duati te in lam an pan. A chhuk dawnah, "Naktukah ka rawn hruai chhuak dawn che. Mumal takin inbia ang" Zothana chuan a ti a.
"I zak thei lo e a" a lo ti hmak. Zothana chu a nui suk a, "Mi zakzum ka ni ngai lo reng a ni. Lo inpeih la, engkim kan sawifel ang" a ti a. Duati chuan chhan pawh a chhang peih tawh lo. A thakhur a la reh chiah lo lehnghal. Ngawi rengin a chhuk a, lehhawi tawh miah lovin an in lam a pan zui nghal.
Teteii chu a inchei malh malh a. Diteii te ina a awm atang hian a rilru a lo nuam ta deuh bawk nen, a hma ngawt ai chuan hmuh pawh a nuam ta deuh. A la cher deuh tih mai loh chu. A duh ang taka make up a han inbel leh takah chuan a lang tharin a hmel tha leh kher mai. Pi Zawmi'n a vil leh chawt a. A hlauthawng a ni ber mai.
"Dina hi hrilh ila, va kal dun zawk mai ru.. Ka ngaih a tha lo" a ti deuh chhen a. Teteii a lo nui mai mai si.
"Nu, lo hahdam teh. Ka chingfel dawn. Min ring rawh. Engtinmah ka awm lo vang" Mascara inhnawih pah chuan a ti sar sar a. A phur hmel kher mai. Hlimi a rawn lut a, "Ka hawnsan tawh dawn che u sin. Ehe.. Teteii chu khaw nge i kal dawn? " a ti a.
"Nia hei chhuahna tur pawimawh lutuk ka nei a. " a lo ti ve mai a.
"Fimkhur rawh aw. Damdawi kha pai rawh. I chauh thut takin" Hlimi chuan ngaihtuah hmel zetin a ti a.
Teteii pawh chuan a bag-ah a khung ve nghal mai bawk a. A nu buk khum zauhin room a chhuahsan. Drose lo chhuk mek nen an intawk chiah, "Ehe.. Tikha chuan hman ami ang kha i ni leh tawh. " a lo ti chul a. A hua tih a theihnghilh a ni ngei ang.
Teteii chuan nui sâng chungin, "Ka ni reng tawh ang" a lo ti zawi sap a. Kawngkapui hawngin a chhuak nghal vut. Drose chuan a enzui vang vang mai.
Alabasta hotel a thleng phei a. Dar 7:50 chiah chiah a ni. Zairemmawia'n a room hauh a rawn sawi tawh a. Receptionist chu hrilhin room lam a pan nghal. Room kawngka chu a kik dat dat a. A ri khep a. A rawn inhawng nghal. Zairemmawia nen an inhmachhawn ta ran mai.
"I cher hlek anih kha. A bak chu i la danglam lo e" a lo ti sup a.
Teteii a nui hak. Khuma thut thaih pah chuan, "Nang erawh i danglam ta hle mai" a ti a. A aw ki a zangkhai khawp mai.
Zaia chu a hmaa chair-ah chuan a thu a.
"In tur i duh em? " a ti nghal. Teteii a bu nghat.Zaia chuan Whisky a thli zui a.
"Tu nge i thurualpui chu? " Teteii chuan a ti nghal zat.
Zaia chu a'n ngawi ren rawn a. "Rinngam i ni takzet maw? " a ti ta a. Teteii chu chiang takin Zaia chu a melh a.
"Hmanah khan tu nge ka nih i hria ni lawm ni? Engvang ringawtin nge saw chhungkuaah sawn ka intahluh ang? Chhan tha tak a awm tur a ni dawn lawm ni? " a ti a. Zaia chuan a chil a lem khawlh.
"Mahse, inchhir vanga lut i ni emaw ka lo tia" a ti a.
"Chutiang chuan tupawn an ngaih ka duh alawm. Ka nau fanu pawh ru bo duhtu hian inchhirna ka pianpui i ring em? " a lo ti let thung.
Zaia chu a ding hluai a. "Anih engtin nge ni ang. Sum chungchang chu" a ti a.
"Chu chu buaina a ni ber lo. Hun kan pek belh a ngai. Tunah sawn a buai mek a. Sum a lakhawm mek, a la nei daih lo. A mangang tan a, Diteii sawn a puih ngei a rinawm bawk. Pawisa kim loa lungawi ai chuan nghah hlek kha a tha" Teteii chuan inringtawk zetin a ti a.
Zaia chuan, "Nangmah enkawltu Nurse kha ania ka thurualpui chu. Ani hnenah khan ka hriat tur thil chu i lo hrilh zel mai dawn nia. Ni e, nghah te chu ka thei alawm. Mahse, ka sawi nawn ang, sum kan hmuh hunah buaina ka duh lo ania" a enghelh ber chu a sawi leh a.
Teteii a then sak, "A va mak fó e aw. Kei aia i chet hmasak vangin ka duhâm lo vang. Nuai 10 lek te i dil reng reng bawk a. An hausakzia i hre ve reng si a. Nuai 4 ka hauh ang a. Nuai 6 i chang ang. I thurualpui nu erawh ka lo chingfel ang" a ti leh hmiah mai.
Zaia chuan, "Ka thurualpui a ni satliah lo. Ka bialnu a nih kha.. Ani nen khan shillonga inbengbel daih kan tum asin" a lo ti vat. A lungawi hmel vak loh.
"Anih si chuan, nuai 10 chauh engvangin nge i dil le aw.. Tihian ti ang. Pu Vanlala saw bitumna kawng ka lo dap ang. Ani saw kan phihawh tel theih chuan sum a tam a ni mai" Teteii chuan a ti a. Zaia chuan a ngaisang hman lek lek. Hman a Lalrinawmi ngei kha a ni leh ta si a.
"Mahse, Pu Vanlala chu kawng a van ka ring. Kei pawn ka chhui nasa alawm. Diteii fanu saw ru bo leh mai ang" Zaia chuan a ti thut. Teteii a tho uaih a, "Mawl viau suh. Hman ang kha a ni thei tawh lo. Rukbo theihin a khawsa tawh lo. Bakah Police kuta luh ka duh tawh lo" a ti hrâwk a. Whisky chu a tlak bap.
"Ka chhuhsan ang che. Tikha chuan kan thawk dun tawh tih hria la, inbumna ka duh lo a nia" Teteii chuan chiang fek fawkin a ti a. A insiam tha thuak thuak a. A chhuak nghal daih.
Zaia chuan a phone a phawrh a. "Aw.. A chhuak chiah. I lo enchik lehzual a ngai ang aw. Kan thlim dawn tih kha theihnghilh suh. Mahse, a fing ania" a ti mawlh mawlh a. Lehlam ami chuan, "Dont worry bawiha, Ka kutah dah rawh" a rawn ti sa sa a.
Puia te chhungkaw inrawnkhawm chuan sawn man thin chu thaa an hriat vangin thin an titlu a. An ţhenawm Kohhran upa ni bawk Pu Lawma leh Pu Ramtea te an ngen nghal bawk. Zairemmawia chu amaha in luah a ni a, zan tir lama va kal chu fuh berin an hria.
An vanneih asiamin a lo awm hlauh bawk a. Thu zaizap takin sawn man chu an han ţhing ta a. Lungngaih hmel lek lek hian, "Neih mai ka hnial lo asin. A chhungten rem an tih chuan" a lo ti!
"Chu tluk a awm hleinem. Mahse, ala naupang deuh a, fa te saw nei fel phawt se an ti deuh niawm tak a ni" Pu Lawma chuan a ti dap dap a.
"Nia, a naupang khawp mai. Keimah hi tun hnaiah ka buai bawk si a, ka ngaihsak hman meuh si lo va. Ka inthiam lo khawp mai. Ni e, in tih ang chuan sâwn man chu ka pe rih phawt che u a nga. Nangni lam pawn neih ka hnial loh thu leh anmahni ka ngaihchan vang zawka che rih lo ka nih thu hi min lo sawi sak ve hram ula" Zaia chuan a ti zung zung a.
"Ni tuk e, karah fa an awm tawh chuan inneih tluk hi a aw hleinem. Nang pawn rinawm takin i lo nghak a niang chu" Pu Ramtea chuan a ti a. Sawn man te inpe felin rei vak lo an thut hnuah an haw ve ta a. An chhuah atanga rei vak loah Hlimi a rawn lut.
"Zanin chu ka riak mai ang. Ka chau riau" tiin khumah a mu zangthal nghal a.
"I riah loh ten. Ka ngai tawj che alawm. Chuan vawiin lam eng nge chanchin? " a lo ti nghal var.
"A tha a ni mai ang chu. A nu bulah chuan 'Hun min pek belh turin ka ngen a. Min pek belh kha.. An duh ang chu tihsak mai a thain ka hria' a tih kha maw. Pitari saw a khawngaihthlak letling. Tisawn a fanu duat em emin a bum ve reng si a.. ". A lo ti niah niah a.
"Nia.. Engmah a tisual ve bawk si lo. Teteii hi chu a va tenawm tak," Zaia chuan a ti ta hlawl a. A rilru dik tak a sawi. Mahni nute pawh bum hlum thak hreh lo hmuhin Teteii chu a hmu tawh. Chuvang ringawt pawh chuan tuna an thil tih mekah hian thlim a phû. A chawh ve tawh ang a a ni mai.
Dinfela chuan a fanu chu chiang takin a melh a.
"Tichuan, i U Duati sawi vang ringawtin Teteii chu i hua a maw? " a ti a.
A lo bu nghat.
"Ani saw tun atang chuan i nu ang chiahin i en tawh tur a ni. A chiang em? Engmah tihsual a nei lo. Tha takin i dawngsawng tur a ni. Nungchang chhe tak i neih ka duh lo aw.. Ka naute.. " a pa chuan a ti dam dap a. Drose chuan, "Mahse, pa, ngainat ka tum pawn ka hlau tlat. Amah hi ka sawi thiam lo. A nu anga en dawn pawn a nu nen an inang lo si" a lo ti hmanhmawh. Dinfela a khi suk, "Mahse, i nu nen an inngaina a. Nang pawn i ngainat ve a ngai alawm" a lo ti a.
"Ka lo tum ang. " a ti nghat.
"E chuan, bawihte, i U Mamawia hi i duh tak tak mi?" Nelawm zet hian a ti leh a. Drose a ding nghal uaih.
"Chutiang ka sawi peih lo. Ka ning" a ti hlar a.
"Aw.. Zah kher a ngai hleinem.. Engkim sawiho hi a tha alawm" a pa chuan a lo ti leh.
"In ninawm. Min ngaihven hûrh suh u. Bialpa ka nei peih lo" a lo ti leh a.
"Bialpa neih chu a thiang alawm. Mahse, i nu sawi fô ang khan thianghlim takin aw" a pa chuan zaidam takin a lo ti a.
" Ka thianghlim em mai aw. In ninawm sia a. Ka biangah pawh vawi hnih bak a la fawp lo" a lo ti leh hlar a. A pa chu a nui hawk hawk. "Ka fanu chu i ni sia aw" a ti a. Drose erawh a tûm bâr thung.
Pi Zawmi chu a vei sek a, "Hun engzat chiah maw kan la neih? " tiin Teteii chu a melh a. Hahdam hmel angreng deuh hian, "Ni 4 " a lo ti sap.
"Huiham.. Ka chingfel ang i tih khaa" vin lek lek hian a lo ti a.
"Nu, i hmanhmawh a nih khaa.. Hahdam rawh" a lo ti leh thliam.
Thinrim zetin, "Engtin nge ka hahdam theih ang a. Kei chu i pa bula inpuan mai hi ka duh tawh" a ti ta mai a. Teteii a tho zawk. "I ti lo vang. Ti miah suh. Ka chingfel dawn ka tih kha. Vawikhat chiah min ring leh la a tawk" a ti ta mawlh mawlh a. Pi Zawmi tan pawh awmdan thiam a harsa ngei mai.
Teteii chu bathroomah a lut a. Darthlalang a hmel lo lang chu melhin, "I ti thei ania. Nang leh i nu tan.. He chhungkuaa i la chen ve duh chuan kawng dang i nei lo" tiin a infuih a. A hmai phihin a chhuak leh a. Hlimi a rawn lut ve chiah.
"Jection a hun" a ti a. Teteii chuan a kawr ban hlimin a lo dawh nghal vat. Pi Zawmi erawh a phone a rik vangin a chhuak a.
"Zanin chu riak rawh aw. Ka nu sawn ka pa bula inpuan mai a duh thu a sawi a. Eng emaw tih a tum thut chuan eng emaw kan tih a ngai dawn ania" a ti sap a. Hlimi pawh a bu nghat mai.
A riah zeuh zeuh tho vangin chhungkaw ho pawn mak an ti lem lo. Zanriah an ei kham a roomah an lut leh dial. Teteii leh Hlimi pawh roomah tawmin an titi a. Pi Zawmi lo luh hun an nghak a ni ber.
"Inpuang ta se.. Kan chhe vek dawn a ni maw? " Hlimi chuan a tih mek laiin Pi Zawmi a lo lut.
Kawngka a kalh khap a. Teteii leh Hlimi chuan an lo melh kal mai.
"Ka inpuang mai dawn" a ti zawi raih a. Teteii te pahnih an tho rual ţhawt. Hlimi zawk chuan a va pan vat a. "I sawi thei lo" tih leh va pawm a rual nghal. Pi Zawmi chu a au miah lo. Teteii chu Hlimi hnungah chiah rawn ding vein, "Ni e, Nu, i tithei lo. I tih a ngai lo vang ka tih kha" tih leh syringe -a Hlimi nghawngah tak vih a rual nghal. Hlimi a vir nawr. Teteii chu mak tih hmel zeta en chungin a tlu ta riai riai a.
"A thi em ni? " Pi Zamwi'n hlauthawng zetin a lo ti.
"Thi lo. A muhil. Ani kha kan hmanraw neihchhun a nih kha. Hawh le, khumah muttir ang" a ti a. An nufa chuan an zawn nghal a. A rit phian lehnghal.
"Tihian naktukah chuan Zairemmawia a buai ve tawh ang. Keini ni lo vin" Teteii chuan a ti sap a. Pi Zawmi chuan a ngaihna hriat loh hmel zetin a fanu chu a melh reng ringawt…
(Kut hian nâ nâ a ti 😥😪
Comments
Post a Comment