D'ROSE.. (Chapter - 25)
Ziaktu : Toni Râlte
Zanriah an ei laiin, "Hlimi hi khawi veng nge khah" Pu Vanlala chuan a ti satliah a.
Diteii chuan, "Dinthar a ni lawm ni? " a lo ti a.
"Nih chu a.. Ani hi eng nge an chhungkaw dinhmun ni ve re re le? " a ti leh a.
" Ka hre chiang chiah lo. Kan nau pakhat min kawhhmuh kha a nia, nurse a ni tih bak. Ngati nge? " Diteii chuan a pa chu a melh a.
"Aa.. Ka ti mai mai. Ani hi a felin a thothang a tha a; kan chhawr fuh viauin ka hria" a lo ti ve mai. Thu dang an sawi ta a. Drose chuan Teteii melh run run chungin, "Anupui, eng thleng nge i awm dawn? " a ti a. An melh thap.
"Ka hre lo le" a lo ti zawi sap a. Pi Zawmi ngaih dan a ni leh ta pek lo, "Nang hi i chimawm mah mah. Hetah a awm reng tawh dawn" a lo ti fak a.
"Kan chhungkaw mi angin maw" a lo ti hâ. Diteii'n mitmeiin a khap vat. A hre thiam der si lo.
"Kan chhungkua a ni tawh alawm" Pi Zawmi bawk chuan a lo ti a.
"A ni lo e a" tih leh kham a rual nghal. Teteii inthlahrung hmel chu Diteii chuan a khawngaih hle. Mahse, zanriah ei laia inhauh leh in hnial hi a duh ngai loh vangin a ngawi rih tawp. Drose mize dang ta riau chu a ngaihna reng a hre thiam lo.
"Drose, nang chu i tizahthlak thei e. Nupuii kha khatia tih loh tur ania" lehkha an zir dun laiin Rinmawia'n a ti a.
"Ka ti ang. A ninawm. A awm ve hi ka duh lo. A sual hmel si" a lo ti hmak.
"Hmm.. Kei pawh min ning a ni maw? Mikhual ka ni sia" a lo ti vat.
"I â mi? Nangte chu.. " a ti riat niah niah a.
"Eng nge kei chu? Ka danglam bik a mi? " a lo ti leh vat.
"Danglam lo. Mahse, i danglam.. Aa.. I hre ve reng. Ka ning" a ti hlak hlak a. Rinmawia nuih a za leh tawh. He nau bula awm hi nuam a ti takzet a ni.
Mala phone chu a ri tlang tlang a. Pi Zawmi a lo ni!
"Aw.. " a ti thum chhak a.
"Mal, keimah Teteii aw. Buaina ka tawk a" a ti nghal tâwng.
"Eng buaina nge? I tha em? " a rawn ti nghal vat.
"Buaina lian deuh a nia. Ih, pawisa ka mamawh a, tam tham ve deuh hlek" a ti ta a. A inthlahrung kher mai.
"Umm sawi la" a rawn ti a.
"Ih maw.. Englo a nia. Ka nu nen sumdawnna bultan ve kan tum a. Ka pa tihbuai kan hreh si a, nakin zelah he inah hian chanvo kan la neih loh takin kan intunnun nan bultanna tur ka mamawh sia" a ti zung zung a. Pi Zawmi'n a lo melh kar.
"Engzat nge i mamawh? " a rawn ti sup a.
"Ih.. Nuai 5-7 vel a niang. Puitham deuh hleka tih kan duh si a" a ti a
"Hei sumdawnna bul tan chhoh ve ka tum si a, kan thawkho thei reng ang chu.. Keiin bul ka tan ang a, nang nin a enkawlna lam in thawk thei ang a" Mala chuan a rawn ti a. Teteii a maimichhing diar diar.
"Aa.. I nau te ngaihdan a ni lo thei alawm" a lo ti.
"An ni pawh an kal hrang a. Buaina tur a awm hleinem" a rawn ti hram a. Teteii plan a flop dawn a ang hle.
"Thawh dun ka duh lo ni loin, keima puala tih ve ka duh si a" a ti leh a. A beidawng tan tawh.
"Nia, a tha reng. Mahse, tihian ka sumdawnna hi han tan chho ila, inneih te pawh kan tintuah mai dawn lawm ni? " a la rawn ti cheu! Teteii thin a thawk ta nge, "Malsawm, ka tan pawisa i ui em ni? " a ti vin thak.
"Ka ui ngai em ni? Tunah hian i hriat ve lohin ka tla chhe mek asin. Ka pa min hnutchhiah lah Zothana nen kan insem tawh a, ka share a zo titih tawh. Kan in lah Zothana kutah a awm bawk si a. Ka dinhmun that lai ni se nuai 20 pawh ka theh chhuahsak ang che. Tunah hian a tlem berah nuai 30 ka mamawh a. Ka share hian a daih lo va, Zothana pawisa ka hmansak zawk anih hi" a rawn ti ta duah a. Dawt a sawi a rinawm loh.
"In saw Zothana kutah a awm maw? " Teteii chuan hrilhhai zetin a rawn ti a.
"Kan te ber Dina kutah a awm a. Mahse, ani khan Zothana hnenah a hralh ve leh daih alawm.. Ani chuan in a mamawh tawh lo va" Mala chuan a ti a.
"Upa ber i ni a,i share a va tlem bik ve" Teteii chuan a lo ti chang rât.
"A chhan i hria alawm. Ka pa nupui i nih tawh kha" a rawn ti hrâwk! A lungawi vak lo a nih hmel.
"Aw le, ka hre thiam alawm. Ka tibuai che a. " dam zawkin Teteii chuan a ti a. Phone an dah. A thaw halh a, "Mala chuan neih a nei tawh lo" a ti hnual râwih. Pi Zawmi lah a lo za ve sek. An mangang nufa ta khawp mai. Blackmail tu lah khan a rawn be chhen bawk si.
"Naktukah ka ac-a awm zawng zawng ka va la chhuak tawp ang a. A bak chu Diteii ka dil mai ang. " Pi Zawmi chuan a ti ta tawp a. Teteii a lo thaw halh. Chutiang sum tam tham an dil chuan zawhna an dawng ngei dawn. Chu lai tak chu an buaina a ni. Eng chhuanlam nge an hman tak ang? Tu nge blackmail tu hi ni reng reng ang le.. Engkim a rawn hre chat chat vek bawk si a. Pi Zawmi phei chuan an pa thiltihah a ngai lek lek tawh. Ani hian a diary kha a lo chhiar thuak si a. Fiah nan hetiang hian a ti aniang tiin. Mahse, Teteii erawh chuan a ring lem lo. Tu emaw anmahni hre ru tu thiltih a nih a ring.
"Engtin nge min lo biak ngam zawk? " Duati chuan a ti nghat a. A phone chu a hmet thi nghal hmak. A rawn ri leh nghal zat. Vawi 7 lai a ring ral tir hnuah, "Insawifiahna hun chu pek a pawi hleinem" tiin a vawi 8na chu a laksak ta hram a.
"Dah tawh suh. Thil ka sawi ve lawk ang" Zothana chuan a ti nghal.
"Sawi rawh" a ti hmuk.
"Duati, a dik alawm. Hmeichhe riahpui tumin ka kal ngei a. Mahse, kan riak dun ta lo. A chhan hi hria la ka duh a. Mahse, ka hrilh thei rih si lo che a" a rawn ti dam dap a.
"Sawi fiah theih loh buaina maw.. Hehe.. " ti el lek lek hian Duati'n a lo ti.
"I awih dawn chuang lo tih chu ka hria. Ni e, Duati, inthen hi a tha e. Tikhan min hua la, buma phatsantu ah che min ngai rawh aw. Kha kha i tan a tha" a rawn ti leh lawi si! Duati tan awm dan thiam a har ngei mai.
"Ni e. Inthen ila" a ti ve ta tawp.
"Mahse, ka hnuaiah chuan thawk tho rawh aw" a la rawn ti hram.
"I thisen a sang mah mah" a lo ti hmak. "Ka dah ania. Inbiak tawpna ni rawh se" ti lehin phone a dah nghal. Lukhamah hmai phumin a khur ngawt ngawt a. Zothana laka a lo luangliam hman viau chu a inhua! Nep a inti takzet. Tluanga nen kha ti khan an kal hrang a, tunah mipa dang vangin a na leh mek chu a ni si a! Chu chu a duh lo. A zak! Lerh a inti a, lelo a inti bawk. Mahse, chumi avang ringawt chuan a na lo thei chuang si lo.
Puia te nupa leh an fanu Senteii te chuan damdawiin an pan mek a, an fanu nau pai chu a la paih ngam awm em tih Doctor rawn phawt an duh a ni. An doctor hmuh tum pawh a lo thu tawh a. Baby chuan a fanu chu kaiin a lubpui a. Thil awmzia a sawi dap dap a; A la naupanzia leh a fa paina in a neih duh loh thu leh a hmakhua avanga paih an duh thu te.. Doctor chu a bu nghat nghat a. Senteii chu zawhna eng emaw a zawt a. Khumah chuan muttirin an en kual a, Ultrasound-a en a la ngai dawn a. A tuk atan appoinment an siam ta a. Senteii chu a thau ngai lo hrim hrim a, a cher zual ngei mai. A vun pawh a dâng bai mai a. Rei tak chhung inthup reng reng leh rilru hah renh rengin hun a lo hmang tawh thin a lo ni bawk a, a lan dan danglam lutuk chu a awm ve reng mai. A khawngaihthlak letling zawk. Baby te lahin paih an tum nasa mai si a. Ani erawh a ngawi reng tawp. A nu leh pate a hlau ve bawk si, mahse, a chhungril takah erawh naute chu neiha enkawl a chãk. Mi dangin an sawi dan tur a care ve lem lo.
"Puia te fanu Senteii khan nau a lo pai reng alawm le.. Mahse, a hriselna a nghawng vangin an paihsak dawn a ni awm e. " Diteii chuan mut hmunah an pa chu a hrilh malh malh a.
"Drose aiin a upa hlek chauh kha a ni si a, a va mak ve aw" Dinfela chuan a lo ti vat a.
"Tun lai thangthar te zingah hian sex hi mikhual hek lo. Nu leh pa hi kan pawimawh khawp asin. Kan Drose te hi a â si a, bum a awl dawn si. Ka hlauthawng fó thin" Diteii chuan a ti sap a.
"Adik ve reng mai. Mahse, i zirtir ngun bawk a. Ka lo hlauthawng ve vak hleinem. A hunah chuan a fing ve kur maithei asin. Rinmawia zawk hi hrilh ngun a ngai dawn anih hi. An inzawm ngheh ve hmel si" An pa chuan a ti a.
"Ka hrilh tawh. Mamawia hi chu ka ring tawk viau. Eng emaw palh thut an tawk a nih loh chuan.. E chuan, ti daih ila, ka nuin pawisa min dil a" Diteii chuan a ti hliai a.
"Eng zat nge.. Teh tlat chuan" an pain a lo ti var. Nupa an ni bawk a, engmah a ruk arala thil tih duh lo an ni bawk nen.. Engkim hi an inhrilh tawn vek zel a ni.
"Nuai 6 lai a nia. A tam tham angreng sia, eng atan tak hmang dawn ni maw ka tia. Ka zawh kha chuan, "Teteii hi heti mai hi a ni tawh a. Sumdawnna eng emaw bul tansak ve hi a tha ka tia' a ti mai a. " Ditei chuan a ti a
"Aw kan sumdawnna a awm reng alawm le.. Ka nu pawh hi a inla hrang mah mah a ni. Ka pa te nena sawiho chi a nih chu" Dinfela'n a lo ti nghut. A chhungrilah rinhlelhna a awm tlat! A chhan a hre bik lo.
"Ni e, kei pawn ka pa hriatpui loha pek ngawt kha ka ngaingam chiah lo va. Naktukah ka lo sawipui leh ang e" an nu chuan a lo ti leh thliam a. An inkuah thawk a. Mutthilh tumin an chhing ta vang vang a.
"Nuai 5 ka pe phawt che ang a, a bak chu min hre thiam rih la" Pi Zawmi chuan ţawng rin hlau deuh hian a ti sar sar a. Lehlam ami lah chuan, "A theih loh. A kim thlap ka duh. In hausakzia ka hria alawm. Nuai 10 lek chu in tan a harsa lo. A nih loh chuan in pa number ka hmet chhuak dawn e aw" a rawn ti chang fak a. Pi Zawmi chuan, "Aih, be suh khawngaihin. Ka lo ngaihtuah leh ang" a ti chul a. A thaw te chu a hahin a hria. A awm a dawm vang vang a. A mittui a hnâm bawk. "Buaina hian min kalsan thei dawn lo anih hi" a ti sap a. An pa bula inpuan law law mai tur em mawni zawk tih te thleng a ngaihtuah tawh. Mshse, a fanu nen rethei taka vahvaih chu a ngaingam thlawt si lo. A mang a ang takzet. Ţawngţai dan a hre lo va, Pathian a au ngam lo pawh a ni mahna. A sarhu lai khan lo sawi ta zawk se, Teteii pawh a tang ang a, engtin emaw an inla chhuak leh daih tawh zawk awm si a.. Inchhir a sawt tawh der si lo.
Senteii chu Ultrasound chuan an han en ta a. A luhai lutuk chu a mu vir lek lek, a HB leh BP te an han check leh a. A hniam dan chu a mak zawk. Doctor pawh chuan, "Engtin nge i la kal theih zawk? " a ti hial a ni. Chutiang khawpa a taksa a chak loh vang leh nau chu a len tawh deuh vangin paih ngam chi-ah an ngai ta lo. Baby thin a rim hlur mai. An thenawm khawveng bakah Kohhrana a rawngbawlpuiten an sawi ruk dan tur a ngaihtuah chuan a â lo chauh! A fate a enkawl tha tawk lo tih chu a inhre ve kur tho, mahse, pumpelh theih a duh takzet a ni.
"Damdawi ei tha rawh se. Nakinah a nau tan bakah amah thleng hian a la hlauhawm thei a nia. Thisen pawh test nghal rawh se" Doctorin a tih vangin Thisen pawh an test a. A tukah in check up leh paha result ngaihven turin an haw leh ta phawt. An hawn kawngah Baby chuan a fanu chu a hau leh hlawih hlawih. Senteii erawh a ngawi reng a. "Tu hi nge maw i chhun ni? Nulat hre hma lutuk" a ti tân tân a. Senteii chuan a mit khap fak fak chungin, "Nu, mualpho i hlauh vang ringawta nunna lak chu Pathianin a phal lo a niang. Nangma tan vek i ti anih hi. Kei chu min ngaihtuah lo. I hming thatna leh lansarhna a bo tur hi i ui em vang a ni" a lo ti ta hmiah mai. A kum phu lohin tawngkam a thiam zêk mai.
"Ngawi mai mai teh. Nang khan fa hring la, keimah bakin ka enkawl leh dawn lo che u. A la hun lo em a ni" a lo ti ram hmak.
"Ka hria alawm. Ka tisual tih chu. Mahse, Nu, thil ka tisual tawh a. Ka tihsual rah lehzel tawrhtir chu eng nge a tulna? Vanram ka kai loh phah maithei sin. Chu chu i duh ami? " a lo ti ve zel a. Baby chuan chhan mai dan tur a hre tawh lo. A fanu thusawi chu a dik a ti bawk si. Mahse, a lung erawh a awi thei chuang lo.
"Ti nge i nu chuan nang a dil daih che aw" Pu Vanlala chuan a ti sup a. A inngaihtuah nasat hmel kher mai.
"Tihbuai che a hreh vang niin a sawi a. Ngaihdan ka la siam thiam chiah lo. Chuvang ania ka hrilh che" Diteii chuan a ti a.
"Kei pawh ngaihdan siam harsa ka ti hle mai. Sumdawnna bul han tan nan tih chu, ka sumdawnna pawh an chhunzawmin share ka pe ve thei reng si a. Ka ngaih a titha tlat lo mai" Pu Vanlala chuan a ti leh a. A rinhlelhna kal kual leh a zeldinna chuan hmun tin a fang a ni ber e.
"Chutak chu lawm. Anmahni nufa puala tih ve an tum nge kan pa phei chu a lungawi chiah lo va" Diteii chuan a ti sap a.
"Keiman ka lo bia ang e. A pasal ka awm ve reng a. Chutia nupa inkara zep neih chu ka duh hleinem" a pa chuan a ti ta a. Diteii pawh a bu nghat mai.
Pu Vanlala chu roomah lutin an nu lo luh hun a nghak a. Teteii roomah a kal leh a ni ngei ang. A fanu hi a buaipui mah mah tih chang chu nei mah se; fanu na nâ na chu a hriatthiampui ve tho bawk. Amah hi chuan a hma anga pawh taka Teteii biak leh hnaih hi a la thei rih lo tlat! A lang apau chuan a be chhe chuang lo naa, a hun tawn mak tak avang hian Teteii chu rinhlelhnain a la khat a ni deuh ber mai. An nu chu a rawn lut ta chiah a.
"Nui, eng emaw sawi dun lawk ang hmiang" zaidam takin a lo ti a.
Pi zawmi a hlauthawng nghal. "Umm sawi la" chu a ti ta tho va. Khumah a thu ve nghal.
"Diteii hnenah pawisa i lo dil tih ka lo hria a. A tam tham angreng si a, eng atana hman nge i rilruk ber a? " theihtawpa inthununin Pu Vanlala chuan a ti a.
" Nia.. Kha kha maw.. I hriat ka duh loh chhan chu ka inthlahrun vang a nia. Teteii hian min tibuai zing ve tawh si a. Englo a nia, tihian kan khawsa ho leh ta si a, Dina leh Diteii chu an ngaihtuahawm lo va, an fate lah an enkawl hneh em em tih a lang reng a. Teteii mawlh hi lo dam thain lo tha chhuak leh se, eng kawng nge a zawh ve tak ang tih ka ngaihtuah thin a. Ka mangang thin. Eizawnna eng emaw tak ka ngaihtuahsak loh chuan ka tia" Pi Zawmi chuan an pa melh miah loin a ti ta zung zung a. A rin aia dâwt sawi a awlsam avang chuan a inthiam lo ru deuh. Mahse, a ţul miau si a.
"Chutak chu lawm la hriatthiam loh. He chhungkaw zing ami ni lo awm takin i ţawng a. Min dil anih phawt chuan ka sumdawnna atangin a share pawh sahthlak ka hreh lo va. Mahse, a rul arala thil i lo ti hi a mak ka ti" Pu Vanlala chuan a ti ve ta hmiah a.
"Nangman chanvo a nei thei tawh lo i ti si a. Ka sawi hreh em a ni" a lo ti zawi sap a. Pu Vanlala pawn a hmaa a thusawi kha a hre chhuak nghal.
"Ka in leh lo leh ro chungchang alawm ka sawi. A eizawnna tur leh a kal zel dan tur chu hlamchhiah ka tum a ni hleinem. Ka mawhphurhna tho a nia" a ti ve mai a.
"Kan sumdawnna ang hi chu a tuipui ve lo va. Thawmhnaw lam te hi a tui a" a lo ti a. A inthlahrun hmel hle.
"Engpawhnise ngaihtuah that a ngai a nih chu.. Tunah dam pawh a la dam chiang lo a. Tuna lo buai chung kha a tul berin ka hre lo" pu Vanlala chuan a ti ta a. Pi Zawmi chuan Diteii a hua. Engvanga a pa hrilh ve kher kher nge maw a nih le.. A rinhlelh a hlauh vangin 'I pa hrilh suh' a ti ngam si lo va. Tunah a hrilh ta tho si. A beiseina de ve ve pawh a mit leh ta sulh mai.
"I exam tur chu i thiam maw? " Tukthuan kil tura a kal chu Rinmawia'n a lo ti a.
"Thiam mai mai lo. " a lo ti hmuk. A nu chuan nui chungin, "I fail kan lawm leh dawn tihna mi? " a lo ti vat.
Ner nâwng chungin, "Ka fail lo vang. Promise.. " a lo ti. Diteii chuan chaw khawrh pahin, "2nd i phak chuan i awh ber ka lei ang che" a ti a.
Drose chuan inngaihtuah vung vung chungin, "Awh hi ka nei ve ngai lo reng reng. Eng nge ka awh ang? " tiin a naute a melh. A naute lah an lo hawi hû hû ringawt.
"Bike ka duh leh si" tiin a khi sak a.
"Kum i la tling si lo va" Rinmawia'n a lo ti zauh.
"Ka hmel leh pian hian kum 18 ka support tawh hrim hrim" a lo ti hlar. Diteii leh Rinmawia an nui tawp. Han en mai paw'n kum 18 a la tlin lohzia chu a hawiher atang pawn a lang chiang si.
"Huiham.. Nu, ti nge min neih vat loh a.. A pa nen in inneih hma te khan min lo nei tawh ta che. Mi pawh an nu leh pate inneih hmain an piang tawh" a ti leh a. A hmel a ngui nghiai bawk.
"Eee.. A u chu, hmanah khan 'Anu te inneih lai ka hria. Flower girl-ah ka tang a. Anu chu a nalh tawp' te kha i ti sia" Tetea'n a lo ti khauh mai. Rinmawia'n a antui hawp lai a hak phah. A khuh nghek nghek a. Tui a va in.
Rum zeta Tetea melh pahin, "Ka mumangah ka tih mawlh mawlh kha. Mumang leh real life a inang a mi? I mawl siah" Drose chuan a lo ti nghek a. Mampuia chuan, "Mawina mumang tih a sawi lo tiraw? Tete" a lo ti ve bawk. Drose chuan zah hmel deuh hian, "Aa.. A ho em mai. Ka tihder mai mai che u nih kha. Bawl nuam rual in ni ve a. " tih pahin mai kan chu a chawm mual mual a. Teteii leh Pi Zawmi an rawn inzui phei ve a.
Teteii chu Drose bul chiahah a rawn thu. Drose a tum nghal hmak. Diteii'n chu chu a hmuh hmaih hlek lo.
"In exam. Dawn mi? " Teteii chuan nelawm zet hian a ti a.
"Umm" a lo ti hmuk. Teteii bula a awm apiangin a mood a chhe ziah tih chu a nu leh Rinmawia'n an hria. Pi Zawmi pawn a hre maithei.
"I pass ang em? " a ti leh a.
"Exam a hmaa" a lo ti leh hmak. Diteii chuan, "Aia upa chhan dan tur ka hrilh ngai lo che hi a ang thin" a lo ti zauh. Thiangi leh Zari an awm lo bawk a. Chaw ei laia hauh chu pawi a ti lo.
"Aia upa nazawng hi zah tlak ni hek lo" a tawngkam hman duh dan te chu mak tak a ni. Rinmawia pawh a ka hó mai. Drose chu a kham nghal a, a kut a sil laiin a bulah a nu a lo kal a.
"Hrem leh i duh em ni? " a ti zawi sap. A nu chu a inthunun tih a hria. A nu tihthinrim chu a duh bik lo.
"Duh lo" a ti ve mai a.
"Anih chuan ka sawi kha hre reng ang che" a nu chuan a ti chang fak. Drose chuan a chhang tawh lo.
"Eng a?! Eng maw? Ka fanu hi a positive a maw? " Baby chu a auin a au a ni ber. Counsellor chuan zaizirin a khap a. Mahse, a insum thei meuh lo. Senteii lah a kun ngawih ngawih bawk si. Ni e, a thisen test result kha a positive tlat a ni. Baby zawk chu a buai chhe der mai. Mak a ti awih harsa a ti. Mahse, a chiang si. A nau pai erawh an la chhan hman maithei tih chauh a ni.
"Sente, tunah hian i sawi a ngai a ni. He natna hi a darh zel loh nan pawh. Tu hnen atanga i kai nge nia i hriat? " Counsellor chuan zaidam zet hian a ti a. Senteii chu mit sen râm chungin a hawi chhuak a. Thih mai châk hmel a pu hial mai.
"Amah kha a ni ang. Ka nau paina pa kha" a ti sap a. A kut a hum ruh a, a heh a pet fan fan. A mittui chu dan rual lohin a rawn luang ta zung zung mai.
"Ka ring lutuk asin.. Ih, ka thiannute driver a nia. A fel lutuk. Min duat sia.. " a ti thei ţâwk! A ţap ta hlawp hlawp a. Baby chuan a melh reng ringawt. Counsellor zawk chuan a va pan a, a kuah ta hle hle a.
"A pawi a ni. Pawi tak a ni. Nulat i hre hma lutuk hi.. Kan chhe ta vek mai" Baby chuan a ti chiam chiam a. A ţap pur bawk.
Senteii hian engkim sawi duh nise chuan Baby te nupa hian dem an hlawh zawk maithei. An fanu chu an dem vak ringawt a, tel vena an nei tlat a ni. An fanu chu an ring tha leh lutuk a, Senteii hi chut lek lek, tawngtam lo tak, lerh nachang pawh a hre lo ang tih tur khawp a ni. Lehkha a thiam em em bawk. Baby hi nu sual chu a ni lo, mahse, a fate zilha thu tha leh zirtir nei tha han hrilh melh melh chi a ni lo va. A duat em em ringawt a. An duh leh awh zawng leisaka pek chu hmangaihnaah a ngai deuh tawp ringawt. Puia zu nghei hnuah Kohhran an bel nghet ve ta deuh a, an Kohhran an tlem deuh bawk a, an langsar thuai mai. An chhangchhe tawh lo bawk nen, Baby pawh a inhawlh lawr ta viau a. Hruaitu atana thlan te a ni ta hial a. Chu chu hlawhtlinnah a ngai deuh nge a atchilh titih a. Awmpuia a la a, in lam chu awmpui kutah a dah titih tawp. Chhuahna neuh neuh an lo ngah a, in chhung a uap hman ta meuh lo. Puia pawn a khap ve fô! Mahse, inhauhna a thleng zel si a. Ngawihah a tlak ta ngawt zel kha a nia.
An fapa te pawh a ruka ruihhloa inhnamhnawih zeuh zeuh an ni chho va. Puia lah a zin chhuak deuh reng a, a in chhungkhur dinhmun a hre mang lo tih theih a ni. Senteii chu sawi tawh ang khan a chut deuh roh vang hian ngaihzawng pawh a ngaihsak lem lo va. Star te chu a nei ve bawk e. Mahse, a mizia hi amah ngei pawn ţhing a ti a, a zahpui thin. Mipa tuman an duh ve a ring ngai lo. Mahse, ni khat chu a thiannu ve ber Sangpuii te inah a leng ve a. An hausa in an in pawh a ropui ngei mai. Vai ho angin an chhungkua pawh an hung viau. An awmho vek lehnghal. Tlaiah Sangpuii pu chuan, 'Driver kha va inthlahtir rawh u' a ti a. An driver chu a pa aia naupang hlek tur, tawng duh deuh nui hmel pu reng a ni a. A be siam ssiam a. Sangpuii nen pawh an inpawh hmel khawp mai. Senteii pawn a ngaina nghal mai. Chumi hnuah Sangpuii nen bawk an bazar leh a, an driver te nen chuan inhmu lehin a thlah haw leh a. Senteii hi a sap hming chu Rosy a ni a. Mahse, chu driver chuan a sap hminga ko loin 'Sente' tiin a ko ta tlat bik a. Sente tia kotu chu a pa leh Sangpuii leh chu pa chiah chu an ni. A kawm hlim thiam khawp mai a, Senteii rilru mil tawka titi a thiam si. Fiamthu a thawh thiam. Bawk si. A bulah chuan Senteii pawh a nui ve reng mai.
Hun a kal zel a, Sangpuii te chhungkaw picnic tumin Senteii pawh sawm ni vein a kal ve a. An driver nen bawk an inkawm leh chawt. Thla te an la dun a, a hlim ve hle. Chutia ngaihzawng anga han enna a nei lem lo, a pa rual zet a nih vangin pa angin a en zawk. Mahse, chumini chuan an zanriah ei hma deuhin sangpuii te nen an pathumin huan chu an fang mai mai a. Serthlum hmun an kal laiin Sangpuii chuan, 'Ka phone ka theihnghilh' tiin a let leh a. An lo nghah chhungin driver chuan, "Ka naute, i va duhawm tak em" tiin a biangah a rawn fawp zauh a. Mipain an fawh vawikhatna a ni. Senteii zak lutuk chu a bing chuk chuk mai. A ngawi reng ringawt. Chu pa chuan a duhzia leh a veizia a sawi zui lem lo. Mahse, an hawn dawnah Senteii no chu a la a. Hawn kawngah pawh a mize ngai angin fiamthu thawh lehin Sangpuii a nui bawk bawk reng a. Senteii erawh a tak ran thung. Mak tihna hlira a khah vang a ni maithei. Khata tang khan a rawn be zeuh zeuh zel a, eitur tui deuh deuh te a lo thawn thin bawk. Senteii chu a zak a, chhan let dan pawh a hre ngai lo. A upa bawk si. Mahse, thawnthu a chhiar tam zawkah hian mipa hi an upa fang zel a, chu chuan a ngaihtuahna hruai kualin Sangpuii te driver chu a vei chho tan ta a ni.
Tawnhriat engmah a la nei lo va, hrilh hriaa titipui ber tur a nu lahin hun a nei ngai si lo. Amah te chuan a nghet ve bur ringawt a. A suangtuahna tam tak te avangin a hun chu nuam takin a hmang chho ve nawk. Nawk a. Chu pa nen chuan awm dun chang nei mah se, a felin a insum thei em em a. Fawh pawh a tum ngai lo. Senteii rilru chu a hneh tial tial a, fa duat taka duattu na nâ na lakah chuan Senteii chu a tuiral chho ta a ni ber mai. Sangpuii birthday an lawm zanin a thlah haw leh a. Mahse, WB road-ah a tlanpui a. Senteii chuan a hlau deuh naa a bula thu chuan a thlamuan tho mai. Chutah chuan a nia sex kha an hman tak ni. An han infawp ve ta a, Senteii zak lutuk chu a khur char char, mahse, a thiam si a, duat em emin a khawih a. Ani engmah hre lo, sex lama zirtirna dawng ngai bawk si lo, a thawnthu chhiar leh a movie en thin te atanga a lo hriat ve sex chu thil hrehawm zawk zawk a ni lo tih te a hre ve si. A pawi thui turzia ngaibtuah turin a kum a la tam loh bakah chupa lakah chuan a hmin hnehsawh bawk si. A duhthlanna ngeiin thiam lo leh zak em em chungin a inhlan ve ta mai kha a nia.
"Ka naute, ka nei ngei ngei ang che. Kum i tlin veleh ka ru daih ang che" tia a han thawi kual chuan Senteii thla chu a muang huai huai mai.
Chu pa lak atang ngeia Hiv kai a ni tih chu a chiang reng mai. Chuvang chuan Puia te nupa pawh chuan chutia an fanu nun tichhe vektu chu hriat ngei an duh a. Tin, Sawn man te pawh thin a ngai ve bawk nen. Senteii chuan zep nei miah loin engkim a sawi ta vek bawk a. Puia thisen zam a pawng ţawlh ţawlh mai. Senteii phone-a an thlalak dun a hmuh phei chuan a sa chhuak vek. A nupui te hriat lohin Number pakhat a hmet chhuak a. Bathlarah a va be ta daih.
"Hello, Dite, a ţhawng viau maithei che. Zairemmawia a lo kir leh tawh. Ka fanu nun a tichhe vek ania" beidawng ngawih ngawih hian a ti ta a.
Drose chuan a pen a seh a seh a. A hawi hruk hruk bawk. A piah lawka an class-a a thiam pawl ni thinin lehkha thema entawn tur a ziah a phawrh ru zal zal chu a va hmu leh pek. A thin a so thut. A ding uaih tawh a, mahse, hêktu nih chu a hreh leh si. A thu leh riai riai a. An sirin a lo hmu hman si, "Drose, eng nge mamawh i nei em ni? " a lo ti vat. Nuih tlawn titih hian, "Ka mawng a kham lutuk a" a ti a. A thu tha leh nghal.
Question chu a han chhiar leh thin. A thiam a rawn kal mang tlat lo. A fail chuan Rinmawia a zah si. A nuin 'Bialpa i neih vang a nih kha' a ti bawk ang a. A â mai dawn. A thaw te chu a sa phat phat a. Entawn ho lah a hmu thei bawk si. A ţah te a chhuak.
"Hmm.. Ka chhang ve tho ang" tiin an phuahchawp ţan ta a. Entawn ai chuan a tha zawk tiin a infuih ve mawlh mawlh bawk. A rilru lehlamah erawh, "Sir lah hi dinglam hawi he hu ta che. Hmel chhe leu luau sia, entawn ho hi man ve ta che. I hawi vak vak ringawt mai" a ti ve nasa. An sir chu a tâwng a tâwng ringawt. Chutih lai tak chuan, a rilruah a nuin a tet laia a vawntir Bible ami chu a hre chhuak ta zawk mai. "Thil ţha lo titu te avangin intilungngai duh suh la, fel lo taka ti te chu awt hek suh" tih thu kha.. Mak deuhin a thep suai suai mai. A thiam phah lo naa.. Rilru nuam deuhin a risk thei ta tal a. A zia tho mai.
"Nu, Teteii kha ka lo be lawk" Diteii'n a tih chuan, Pi Zawmi chuan Teteii chu phone a pe nghal.
"Tete, Zairemmawia nen hian in inhmu tawh em? A lo let leh tih hi i hria em? In lo thawk dun leh reng zawk em? " Diteii pawh a ni ang lo takin a ţawng hmawk hmawk mai.
Teteii hamhaih hmel chu Pi Zawmi chuan mak ti zetin a lo thlir ringawt.
"Aih, teuh lo. Ka hre teuh lo mai. Min rawn be pawp miah lo" a ti a. A hlauhthawn hmel viau bawk.
"Anih chuan fimkhur a ngai anih chu. Chhan nei loin he khawpuiah hian a rawn kir leh lo tawp ang" Diteii chuan a ti a.
Phone an dah hnuah, Teteii chuan hmalam melh ngar ngar chungin, "Kan Zairemmawia vek maw lo ni le.. Tu nge a thawhpui ang aw… " a ti sap a. Pi Zawmi a lo meng phawk kher mai.
"Ni e, amah vek a nih hi. Tuna min blackmail tu hi. Hrep taka, zawngkhawroa chu engmah ka tihtir lo vang. Ka lo that lo kha lawm hle tur a nia sin le" Teteii aw chu a fiak thak mai.
Pi Zawmi chuan, "I tha em? tete' ngaih that loh hmel zet hian a ti a. Mitmeng de sawr sawra a nu melh chhoin, "Zairemmawia tan chuan Lalrinawmi kha ka la nih a ngai tlat" a ti vawt raih a.
Room pawna ngawi renga ding mek Hlimi chuan a phone phawrh vatin msg a type nghal zat.
"I awm tih an hre tawh" tiin.
(A sei. Ve telh telh mai ang. Ka kut a kham aw 😢
Comments
Post a Comment