Drose. 24

D'ROSE…(Chapter - 24)

Ziaktu : Toni Râlte

Hlimi chuan a phone chu dahin, "Ka hausa dawn ta" a ti sap a. 

Exam a hnaih tawh vangin Drose leh Rinmawia pawh an inbe tam tawh lo. Zanah darkar khat chiah phone khawihsak phal a ni si a. Fail a hreh ve khawp mai. A chhan pawh Rinmawia'n a hmuhsit a hlau thiam ve tlat. Rinmawia erawh mipa a ni bawk a, a zir tehchiam lo. Amah mi bright ve tak a lo ni bawk a. Guitar a play loh leh Thiangi te ho nen game an khel thin a. Naupang pahnih ten an ngaina a, an zui deuh chhen bawk nen. Exam zawhah Shillongah a chhuk zuai dawn a. Drose a ngai lawk hle. He nau hian zûn chu a nei ve chiang alawm. 

"Chhuah i tum em ni? " Zothana chuan Mala hnenah a ti a. Mala chuan a kawr nghawng siam that pahin, "Teteii ka va hmu ang e" a ti a. A sam a tuai puat puat. 

"I ngai hle a ni maw" a lo ti zawih raih. 

"Ngai lo ila, a mak zawk dawn lo em ni? " a lo ti ve mai. 

"Duati saw neih ka duh a, mahse, a thisenah sawn Teteii thisen a tel ve tlat si a.. A pawi khawp mai" Zothana chuan a ti a. 

Mala chuan a nau chu chiang taka melhin, "Anih chuan i hmanrua chauh a ni tih hria se, nat dan tur i ngaihtuah ngai em? " a thawp sup a. 

"Chu chu ka buaina a ni. A nâ a nih pawn tidam thei tur ka ngaihtuah mai ang" a lo ti a. 

"Hmangaihna hi i tan infiamna ang lek a ni em ni? " a lo ti nghek. 

A nui a. "Duati vanga ka ngaihtuahna chawlh lohzia hria la, tikhan i ţawng hauh lo vang" a ti a. A chhuak zui nghal. 

Enkawli pawn ziaawm lam a pan chho hret hret a, Bena chu a thawmhnaw a keng tlem si, a han haw leh phawt. A thawmhnaw dang nen Kolasib a pan leh nghal. Khap chi ni pawhin a lang lo. Eni chhungte lam pawn an makpa chei titih tawp. Eni lahin a lo thlahlel ve bawk nen, an inawm chawt mai a. Eni chhungte an leh awl ta phian. 

"Dam vat la, innei teh ang" Bena chuan a ti sar sar a. 

Eni taksa lang thei chin chu tui lumin a hruksak pah a. 

"I va hmanhmawh ve " Eni chuan a lo ti sap a. 

"Hmanhmwwh tawh. A buaithlak.. Ka hlauthawng vek tawh" Bena chuan a lo ti mai a. 

Eni chu a nui ringawt, "Ka la hmel chhe si" a ti a. Bena a chek hluk, "Kha ai khan hmel ţhat belh tawh lo mah la a pawi lo" a lo ti a. Eni chuan hriatthiam loh hmel deuhin a lo melh kâwk, "Kha aia i that leh chuan ka chang lo palh ang che" a ti ta a. Eni pawh a khi ve sak mai. 

"Drose, hmanhmawh ve ta che" Diteii awin a rawn tih chuan, "Aw ka hman dawn" tih pahin a bag a la a. A room a chhuahsan nghal. A zuk chhuk chuan Teteii leh Pi Zawmi'n dawhkan an lo kil dawn mek a. A chair-ah Teteii thut a tum mek tihin, "Ka thutna a nih kha. Thu suh" Drose aw chu a chang kher mai. 

"E aw ka tihpalh" Teteii chuan a ti sap a. Pi Zawmi chuan, "A ho ee.. Thutna bik a awm hleinem" a lo ti vat. 

'A awm. Ka thutnaa ka thut loh chuan ka chaw ei a tui lo" a lo ti hmak. 

"I va sual reuh e" Pi Zawmi chuan a ti leh kher a, "Nang pawh i thutnaah i thut ve tho kha" a lo ti ve leh hlar. 

Diteii'n, "Drose" a lo ti ţhawt. A ngawi ta a. Chaw a ei mial mial. Mi dang pawh an ngawi ţhap. A kham pah chuan, "Kan mikhualnu vang vek" a ti leh sap. Diteii erawh sitting rooma a awm vangin a hre lo. Pi Zawmi chuan rum zeta melhin, "I va zak lo tak" a ti ve leh hlak. Drose chuan a chhang zui lo. Rinmawia pawh a rawn kham a, reivak loah school panin an chhuak nghal. 

"Khatin mikhual an ti ngai hleinem. Tha deuhin be tawh rawh" Rinmawia chuan a ti a. 

"Engmah i hre lo nih kha" a lo ti tûm bûr. 

"Ka hria maw hre lo maw.. Mikhual chungah that chhuah tur" a lo ti leh nghut. 

"Ninawm" a lo ti hluk. School an thleng a, ngawi rengin a chhuk. 

Pu Vanlala pawh a thianpa te sumdawnna kum 20 tlin lawmnaa kal turin a insiam mek a. In lamah a awm tlem viau, pawn lam nuam a tih zawk danah in chhungah a awm tinuam lo an awm tihna a ni mai. An nu phone a ri ral ral a. "Nui, i phone" a ti a. 

Pi Zawmi erawh Teteii roomah a phusa daih si. Lo call tu chu number ringawt a ni a, "Hello" tiin Pu Vanlala chuan a laksak a. 

A reh vang vang. A dar san âk chungin phone chu a hmet thi a. An room chu a chhuahsan zui nghal. Pi Zawmi a rawn lut ve chiah. A phone pawh a ri ve leh kher.. "Aw hello" a ti a. 

"I fahrawn Nunui thih chungchang hretu ka awm tih hria la, i pasalin a hriat i duh loh chuan Rs. Nuai 10 in ka ka i hup thei ang" mipa aw thum lam hian a rawn ti ta mai a! Pi Zawmi a tlu lo chauh. An pa a awm hnai em tih a en nghal, a lo chhuak daih tawh a. A thaw huai. 

"Tu nge i nih? " a ti a. 

"Tu nge ka nih a pawimawh lo. Kar hnih chhung hun i nei. I duh i thlang dawn nia" a rawn ti hniam leh ruih a. 

Phone a dah hmak bawk. Pi Zawmi chu khumah a thu hnawk a. A hmai a hup tlawk tlawk. Buaina bawk maw. Mi chhungkua hian heti ang buaina hi an tawk ve ang em le? Teteii thih atang khan a rilru hi a chawl ta lo reng reng a. Thih daih a chak ta ber mai. Mahse, thi ta se, Teteii hmangaihtu pakhat a kiam dawn tihna ania. A fanu saw engtin nge a awm tak ang? Rs. 1000000 chu engtin lêk nge ani hian a neih tak ang?! Amah chu kutthlaktu ni lo mah se; hriatpuitu leh zeppuitu a ni miau si a. An pain hre ta se, a hnawtchhuak dawn. A hnawtchhuak lo a nih pawhin jail-ah a khungtir ang. Tar alamah chuti ang buaina chu a ngaina hlawl lo. A fanu avang pawh sawn chinfel chu a ngai. Amah aiin a tuar zawk dawn si a. A rilru hah lutuk chu a â mai dawnin a inhria. Engtin nge an thuruk chu kha pa khan a lo hriat theih?! 

"Hlimi, lo va chhuak lawk ta che. Teteii hi thil sawipui lawk ka duh a" Teteii rooma a luh chuan a ti a. 

"Aw le" tiin Hlimi a chhuak zui nghal. Teteii pawh enkawl chiam a ngai tawh lo va, jection leh a hun taka damdawi ei tir a ni deuh mai. A chang hian a luhai zual laiin inthiarpui a ngai leh a ni mai. 

"Tete, buaina lian tak kan tawk" Pi Zawmi chuan a ti nghal a. 

"Eng buaina nge" tiin a thu chhuak a. 

"Nunui thih dan hretu an awm a. Min lo bia a. Cheng nuai sawm an phut a nih chu" a ti zawi sap a. Teteii a phâwk kher mai. 

"Engtin nge a hriat? " a lo ti nghek. 

"Ka hre lo. Chu chu lawm mak ka tih em em. Tu emaw hian min enthla a ni thei ang em? "Zawt pawh ni chiah si lo hian a lo ti a. 

"Mala takngial pawn a hre lo asin.. Nang leh kei chiahin kan hria.. A va mak ve" tiin chunglam a melh vang vang a. 

"I pa hian a hriat chuan thi ang tluk kan ni mai" pi zawmi chuan ngui zetin a ti a. 

"Ngawi rawh.. Nu, ka lo ngaihtuah ang. Ka ngaihtuahna hi a tawi mup a, ka lo insawrbing ang a, kawng dang a awm ngei ngei ang" khawngaihthla la zet hian Teteii chuan a ti a. 

Pi Zawmi erawh a beidawn hmel kher mai. An buai nufa leh dawn chiang a ni. 

Puia leh Baby chu an inkawk sawk sawk mai. Baby chu a khur zawih zawih mai. Chuti taka a thinrim chuan chhan tha tak a nei ngei ang. 

"Nu i ni a, i hlawhchham a nih kha. Kei chu hna vangin ka chhuak reng a, i fate pawh i veng hneh lo a nia. Nangmah vang a nih hi" Puia chuan a ti khur dat dat. 

"Ina i awm chang pawn i ngaihven ngai chuang hleinem. In lamah hian ka buai ve asin. Chutin ven run chi an ni lo. ". Baby'n a lo ti ve hlak hlak bawk. A thinrim viau vang ni maw a ţawng tha thei meuh lo. An pa chuan a puh chhe hle a ni mahna. 

"Ka zak a ni. Ka zak.. Engtin nge thenawm khawveng ten min sawi ang? 'An fanu neih chhun kum 16 mi chauhin sâwn a pai' tiin min sawi dawn chu a nia" Puia chu khumah a thu hnawk a. A indawmkun reng mai. Baby chuan, "Titla ila a ni mai. I thianpa Doctor kha bia la, paih a ngai a ni mai" a lo ti tân tân a. Ni e, an fanu neihchhun an milai chuan nau a pai tlat a tin ni. Tu fa nge tih lah a sawi duh thak lo lehnghal. Thla 3 lai a lo ni tawh lehnghal. Baby hi a buai ve theih vang leh nu inchengvawng tak a nih lem loh vangin a fanu chu a lo chìk lutuk lem lo va. A hriat loh karin a fanu chuan nulat a lo hre hle a lo ni. Amah a lo inthup ve bawk nen, an hre chhuak tlai khawp mai. An hriat chhuah dan pawh a luhai reng leh a khawsik ser ser reng chu an thenawm nurse an rawnsak satliah mai mai kha a nia. A nat dan leh a awm dan an han sawi chuan Nurse chu a serious ta riau a. "Ani hi nau a pai te hi a ni lo maw" a ti ta hlawl a. Baby phei chu a nui tawp. A awih lo lutuk kha. Mahse, Puia zawk chu a ngaih a tha ta lo va, a fanu chu a dâwp ta a. A fanu chu a luhlul angreng a, engmah a sawi duh lo. Mahse, a nau mipa in a û pawhdawha pendrive a la tur chu test kit a hmu ta a. Ani phei chuan a hre thiam lem lo. Mahse, Puia te chuan an lo hmu ve si a. Chu test kit-ah chuan a lo positive vâ mai. Zep rual ni ta hek lo. A fanu pawh a inpuang ta a ni. Baby chu a thawng kher mai. A rin loh leh suangtuah ngai hauh loh thil chuan a tihamhaih vek. Puia lahin amah a mawhpuh daih lehnghal. Chu chuan a rilru na sa kha a rawn tisosang zual a. An inhauh phah ta hrep a ni. 

Class Xi zir lai mai a la ni a, an tan chuan a mak ve bawk a ni. "Tu nge a pa? " tia an zawh lahin chhanna mumal a pe thei reng reng lo mai. Puia thinthawk thutin a beng ta nghe nghe a nih kha. A fanu chu naupang mai maia a ngaih laiin sex hmanna chang a lo hre ve tlat si! Amah a lian uaih bawk i a. An nupa chuan agenda lian tak an nei chu a ni ta reng mai. 

"Tihtlak ringawt chi pawh a nih loh saw. Thla thum a tling tawh ania. A nunna thlengin a hlauhawm thei asin" Puia chuan a ti a. 

"Nih chuan a nihna ang anga kan pawm a ngai a nih chu" Baby'in a lo ti hmak. Puia pawh ngaihtuah muk hmel zetin a ngawi ta reng mai. 

"Drose, min lo nghak lawk. Thil pakhat chiah ka sawi ang" Zorina a ni. Rinmawia a lo la thleng lo bawk a. A ding ve det. 

"Engkimah ka tihpalh aw" Zorina aw chu a fiah hle. 

"Eng thilah" a lo ti hmuk. 

"Ka lo tibuai reng che a. Min duh ve mai ka lo ring a" a ti chuai raih. 

"A ho e " a lo ti ringawt. 

"Ti nge min duh theih miah loh? " Zorina chuan beiseina san hmel zetin a lo ti tha leh. 

"Ka duhzawng i ni lo a ni mai lawm" a lo ti pawr hlar. 

"Ka hmel tha a, kan hausa bawk a, ka luck bawk a. Eng nge min duh loh chhan" a beidawn hmel deuh. 

"Bialpa ka nei alawm" a ti ta a. 

"Tu? " a lo ti hâw. 

"I hriat ve a tul lo. Kal tawh rawh. Saw ka u a lo kal ania" a lo ti vat. Rinmawia lo tlan phei mek chuan Drose te pahnih lo indin chilh ran chu a rawn hmu a. A ner sak. Zorina thik chu tlawmah a la na a, a rilru tak chuan a thik ve reng. Drose chu a la naupan bakah a â si a, zei deuhin an chhuhsak daih a hlau ve tho. 

"Û i neih loh khaa.. I bialpa tiraw? " Zorina chuan a lo ti hmawk hmawk. Drose hmanhmawh tawh, Rinmawia mitmei veng bawk si chuan Bike-a lawn pah chuan, "Aw aw aw.. Ninawm lutuk" a ti hluk hluk. An tlan zui nghal. Zorina chuan a thlir vang vang a, "An inah a awm in ka hre bawk sia. " a ti nuah nuah a. 

Pu Vanlala te pawh an hlim ve dar dar viau. A thianpa hi a nupui hmasa a neih pawh khan a thianah a hmang nghe nghe. Hetia an sumdawnna a lo hlawhtling ta ve ve hi a lawmin a thla pawh a muang hle. Zanriah ei hma deuhin bathlarah pa ho mi 7 dawn chu an inhung chhuak a, an titi laih laih. Thingpui sen hang an rawn pe a, a rawn dahtu chuan, "Pu, ka piin Pu Lawma te va lam a ngai a tia" tiin inneitupa chu a bia a. An awmpui a ni ngei ang. 

Pu Dawnga chuan, "Lam kher eng nge maw an ngaih le aw.. Hmm.. Driver kha lo be mai ru" a ti liam puat a. 

Nula chu a kal kiang nghal. Rei vak loah an driver leh a nupui an rawn lang a, Pu Vanlala hnungchhawn zawngin an ding thung. Driver chuan, "Pu, Scorpio zawk saw ka lo keng dawn mawni le.. Bolero saw check a ngai deuh a" tiin Pu Dawnga chu chabi a dil a. Chu pa aw a hriat rual chuan Pu Vanlala chu a inher zawk a ni ber. Zairemmawia nen an inmelh ta ran mai. A hmel ringawt atang chuan Zaia kha a ni ta lo mawni tih mai tur a ni. A lo danglam tawh em a ni. A lo lang upa ve tawhin a inzuah buk viau bawk si a. Mahse, a aw hi hriat leh chhinchhiah a awl aniang e. Pu Vanlala chuan a hai hauh lo. Zaia pawh chuan a la hria tih hriat takin a awm dan a danglam nghal. A ţi nghal dûi mai. Pu Vanlala erawh chuan a thiante mitmei a ven vangin engmah a sawi hran lo. 

An kal hnuah, "Kha Driver i va chhawr fuh hmel ve, nang hi i hmu thei a. Ka driver saw a fuh vak lo va, a dang hi ka melh ve reng a". Pu Vanlala chuan a ti a. A driver hlun Kima kha fapa ang deuhthawa a en vangin a sumdawnnaah share tlem a pe ve a, tunah chuan an changkang tawh hle. Driver thar lehin a sawi ang deuh khan a fuh lutuk lo. Zu a duh ve riau a. Thlak a tum rilru ta rêng a ni. 

Pu Dawnga chuan, "Nia, ka vannei. Mawia hi kan nu hmuh a nia, kan inchhawr fuh dawn khawp mai. A zuan zangin a tlawmngai a, kan in hnuai ber khu a luah bawk a. Thla 2 chiah kan la inhrawn naa a fel riau chuan ka hria" a lo ti a. Thu dang an sawi takah chuan a sawi zui ta rih lo. A rilruah erawh Zaia chuan eng emaw plan a neih a ring ru tho. Pu Dawnga nupui nen an inhriat dan te a zeldin kual a, Zaia eizawnna tenghneng zet kha a hre chhuak lo thei lo. A thianpa nupui chu a him a ring ta hauh lo. Amah ang thoin Dawnga hian nupui a sûn ve tho va, tuna a nupui hi amah aiin kum 17 dawnin a naupang a ni. Fa pawh pakhat an nei a. A la upa lutuk lo a, amah nu te ngo ving veng, tar har chi kan tih mai ang kha a lo ni bawk nen. A ngaihtuahawm angreng khawp mai. 

"Vawiin eng nge i lo an le? " Diteij chuan Teteii chu a melh a. A nelawm hle. 

"Ka tha reng. Ka lu a hai leh deuh a. Chu chu ni mai. " a lo ti ve mai a. 

"Drosei pa nen kan lo sawi dun a, kar thar lamah ka pa te Vellore kal rual hian zuk kal ve la kan lo tia" Diteii chuan a ti a. 

Teteii chuan a mit a khap sek sek, "Heti taka ka chunga in thatna hi ka dam chhung pawn ka rul zo tawh lo vang che u.. Ka dam tawh alawm. Thil ei tha ila ngai ka awh leh mai ang. Kal ve khan a hautak dawn em mai" a ti a. 

"Dam hi a hlu ber alawm. Dam nan alawm kan thawh le.. In zuk kal dawn nia" Diteii chuan a ti a. Pi Zawmi a lo lut ve chiah. 

"Dite, i lo haw tawh ni maw.. " tiin a fanu chu a be ve nghal a. Diteii chuan, "Vawiin chu hna kan zo hma a. Laklawh leh ai chuan tiin kan bang ta mai" a lo ti a. 

"Drose hi zilh a tha lo maw? Nichin a rawn haw te kha, Thingpui kan lo in a. A rawn kal thawr thawr a, 'Kan mikhualnu hian ka chhangthawp dah that a lo ei a ni maw' a ti leh a. Teteii tan a nuam dawn lo em mai. A la â tih chu kan hre vek tho va, mahse, a ni em em lo lutuk" pi Zawmi chuan a ti ta mial mial a. 

"Ehe..! A va sual thin tak. Ka lo zilh ngei ngei ang. Tete, nang pawn lo hre thiam hram hram rawh aw.. A mawl dan hi a chhah lutuk" Diteii chuan a ti nghat nghat a. A chhuak zui nghal. 

"Nu, pawisa chu engtin nge kan neih ang aw? " Teteii'n a ti nghal sap. 

"Ka hre lo. Ka ac-ah hian nuai 4 vel chu a awm ang a, i ac-ah tihtham i nei em? " tiin a lo zawt a. 

"Mala'n a hria ang. Ani khan engkim a khawih vek a. A lo kal leh hunah ka lo sawipui mai dawn nia" Teteii chuan a ti a. 

"Mahse, la chhuak ta ila, i pa hian hre ta se; kan hmanna a hre duh ngei ang a.. Ka buai lawk.. Kei chu" Rilru hah tih hriat ngawih ngawih hian a ti a. 

"Mala hi ka dil mai dawn em ni ang? " Teteii'n a lo ti. 

"Ni lo ve. Khati khawp khan i tibuai tawh a. Ani pawn neih a nei tawh bikin ka ring lo. A pa sum dahsak tih loh chu. Nangmah enkawlin a hun zawng zawng a hmang ringawt a nia. " a lo ti a. 

"Zothana nen hian a pa ro kha an insem a. Neih chu a la nei ve viau ang. A tawpkhawkah Mala chu kan pun mai dawn nia. " Teteii pawn a lo ti ve a. Pi Zawmi'n call a dawng, "Aw Hello" a ti vat. 

"Eng nge i thutlukna ni ta le? " kha pa bawk khan a lo ti a. 

"Pawisa chu ka pe ang che" pi Zawmi chuan a ti ta a. Hlimi rawn lut mek a hmuh vangin, "Nakinah kan inbe dawn ni" tiin phone a dah nghal. Hlimi chuan Teteii chu a jection a. A tawng leh siam siam. Teteii leh a nu rilru hahzia leh buai rukzia a hre der si lo. 

"Drose.. Drose" Diteii aw chu a fiah kher mai. Drose inbual zo chu a rawn chhuak chiah a. 

"Nge" a ti a. 

"Inthlak vat la, min rawn hmu ang che" a ti a. Thil dik lo a awm leh a ni ngei ang. Hlauthawng ru deuhin a inthlak a. " U Rinmawia vang a ni angem le.. Ni lo hram se, a zahthlak thei si" a ti rilru a. A thinte chu a phu dup dup mai. A nu te rooma a va luh lai chuan a nu chuan a lo nghak ran tawh a. A hmel a nelawm loh vangin a hau dawn a nih a ring nghet bur. 

"Thu rawh" a lo ti hmuk. Ţi zetin a thu a. 

Vawiina thil thleng chu sawiin, "Mikhual anga i ngai tlat hi ka duh lo va, tin, i chaltlai mah mah bawk. Eng vangin nge i ngeih tlat loh? " a tih zawm a. 

Drose a ngawi ran ringawt. "Ka biak che chu" a nu chuan a ti vin leh ţhak. 

"Chhang a awm teuh a. Ti nge ka chhangthawp kher a ei. Tuman min eipui ngai lo" a lo ti a. 

"I chhangthawp bik a ni lo. A ei ve châk a ni mai. Ka thiannu a ni a, ka unaunu ang chiah a ni. Hetianga i ngeih loh zel chuan engtin nge kan bulah hlim taka a chen ve theih ang. Hei hi ka zirtir dan che pawh a ni lo reng reng" Diteii chuan awka nem deuh hlekin a ti a. 

Drose chuan a kut tin sih niap niap pahin, "Ka ngei a lawm. A hmel te khu" a ti ringawt. 

"Hmel ngei neih loh tur.. Rilru zau tak put tur a ni ngai"a nuin a lo ti leh vat. Duati thil hrilh kha sawi chhuah a tum hman zuau tihin Diteii phone a ri ta hlauh. Dinfela a lo ni a. "Kal la, tha takin awm tawh ang che" tiin a fanu chu a hrilh a, an pa chu a be zawm nghal. Drose pawh a roomah a lut a, a phone a en mai mai. Duati thusawi zawng zawng kha a ngaihtuah pah a, "I nu tan pawh hian a la hlauhawm thei. Nakinah in atanga in chhuah thut te pawh a la ngai thei. Chuvang chuan i nute hriat loh turin a lakah chimawm takin i khawsa dawn nia. Tichuan, a duhthu ngeiin a chhuak mai ang" tia a hrilh te kha. Kha kha a dik em dik lo em tih hre turin Teteii pawh a la bel chiang chuang lo. Duati kha a ring hlawm tawp a ni ber. 

Oscar Hotel room no 043-ah chuan Zothana leh model chhe lo zet chuan zu no an dawm dun ran a. Hmeichhia chu a kai ţan tawh tih hriat takin a phul vei hlut a. Zothana erawh a tak ran mai. Duati nen inthenna thu an la sawi lo naa, amah Duati vang thoin hmeichhe dang a kawp chho a ni ber. Ni e, a pa thattu thisen zawmpui chu engtin nge nupui atan a neih theih ang? Zantin khuma a mutpuia a fate hial hrinsaktu tur hmeichhia chu a pa thattu nen inlaichinna an nei tlat si. Chu thuruk chu Duati'n hre ta se, hrehawm a va ti dawn em. Duati vangin a nun a loose riau a, inthlahdul a tum luatah a peng thui hrat. Hetih lai karin Duati chuan a lo thlahlelin a lo ngai ve em em tawh a. Chu tak chu Zothana tana thil harsa tawp a ni. Harsa takin Duati thinlung a hneh a. Tunah a harsa chung chungin bansan a tum leh chu a ni si a! Awmngaihna tak pawh a hre lo. 

"Rosy, in tawh rih suh. I kai mah mah dawn. Kan che thei lo palh ang" a ti sup a. Chet nat a tum hmel angreng. Rosy chuan meng si sap chungin, "Lungngai suh.. Ka zu in hian engmah a nghawng lo vang" a lo ti sar sar. Room service-in an eitur chah a rawn dah a, an ei dawn lai takin Duati'n a lo call.. 

"Aw.. Ka buai rih a. Hei kan meeting a". A tih mèk laiin, Rosy rui lungpuam, huatthu chhe ţan mek chuan ring leng lawng hian, "I meeting awzawng lo ve aw. Ka bulah, hetah hotelah a awm. Ka bialpa a nih hi.. Lo be tawh suh" a ti ta mai. Zothana a kal kiang vat. Mahse, Duati'n a hriat tur chin a hre hman vek. 

"Aw le.. Nuam takin hun in hmang dawn nia. Mang tha le" a rawn ti sap a. A dah nghal. Zothana chu khawng zetin a ding a. Rosy chu a melh ngawt ngawt bawk. Eng nge a tih ang tih a ngaihtuah mek. A bing mup a ni ber. Duati rilru na lutuk tawngkam khan a chhungril ber thlengin a nghawng phak. A che hrut a, "Rosy, haw ang' a ti chang fak. 

"Kan riak dawn lo maw? " a lo ti nghek. 

"Dawn lo. Tun atang chuan nang leh kei hi kan inhmu leh tawh lo vang" a lo ti hriam hraih a. Rosy hrilhhai hmel chu nuamti zetin a lo thlir hmiah. 

Duati erawh khumah a bawk thlawp a. A ţap mèk. Engtin nge khatiang kha a thlen theih? Engtin nge a thlen nawn leh theih? Zothansanga khan a duhin a duat ve viau si a! Tunah bumin hmeichhe dang bulah a awm mek a ni si a! Tluanga'n nasa theihtawpin a lo bum tawh a. Tunah Zothana a ring ve ţan dawn chiah a. Ti hi an ni leh a. A mak! Hmangaihna hi a tan a awm ve lo a niang. 

"Hun min pek belh rawh. Ti ringawt chuan, ka nei thei rih lo" Pi Zawmi chuan a ti lawng lawng a. Lehlam ami chuan, "Ni 3 ka pek belh ang che. I rawn nei kim ngei tur a ni" a rawn ti vawt raih. Pi Zawmi a thaw hawk. Engtin nge a tih tak ang? Teteii innghahna ve ber Mala lah sumdawnna bultan turin Malaysia -ah a liam chiah. Hmanhmawh taka a kal vangin Teteii pawh a rawn mang tha hman lo. 

"Tete, engkim hi hrilh zawk mai ang. He mihring hian min blackmail zui zel tho ang" Pi Zawmi chuan a ti a. 

Teteii chuah hah hmel zetin, "Ti chung pawn min lak luh an hreh laiin, Nunui ka that tih an hriat chuan jail-ah a vawi hnih nan ka lut leh ngei ang" a lo ti a. Chu chu an ngaingam si lo. Awm dan tak pawh an thiam lo. 

Hlimi chu tlai dar 5:30-ah Diteii te in atang chuan a chhuak a. An in chhak waiting shed-ah chuan thuin tu emaw a nghak mek a ni. 

Bolero a rawn ding dawt. Hmanhmawh zetin a thu lut a, an tlan zui nghal. 

"Eng nge chanchin? " a bula thu chuan a lo ti a. 

"An buai nufa tawh khawp mai. Kawng a a awm dawn chuan ka hria" Hlimi chuan a ti sap a. 

"A that chu.. Pawisa kan hmuh veleh Shillongah chuan chhukin, thlamuang takin kan awm thei tawh ang" a lo ti a. 

"Nia, lemchan hi ka hne tawh" Hlimi chuan a lo ti ve vat. Kawngkawi an pelh dawn chiahin Pu Vanlala motor a rawn tlan ve chiah. Hlimi te chuan an hmu ve lem lo. Pu Vanlala erawh chuan a hmu chiang kher mai. 

"Zairemmawia leh Hlimi chu engti tiha inkawp nge maw an nih le? " a ti zui vawng vawng a.