Drose 23

D'ROSE…. (Chapter- 23)

Ziaktu : Toni Râlte

Dinfela chuan a chhungkaw ho hmaah, "I nu thiannu pasal nei tawh, vai rama khawsa ţhin chu a dam lo va; a pasal nen an inţhen bawk si a, chuvang chuan kan hnenah a khawsa tawh dawn a ni. Chhungkhat a nei mumal lo va, tha taka in lo dawnsawn ka beisei a ni. Drose te unau phei chuan 'Anupui" tiin in ko dawn nia. Naktukah hetah kan hruai dawn a ni" a ti ta dap dap a. Zawhna a awm dawn lo emaw tih hnuah, Drose chuan, "A pasal chu a van sual em em, a dam loh loh nen, ti nge a then kher a" a lo ti khauh! 

"A dam loh hmain an inthen tawh alawm. Zawhna dang a awm em? " a pa chuan a ti a. 

"Khawi roomah nge a awm dawn? " Drose bawk. 

"In hnuaiah Mamawia room bula mikhual room khu kan luahtir mai dawn nia" a pa chuan dawhthei zetin a lo ti leh a. Drose pawh a bu ta nghat. 

An room theuha an luh hnuah Pi Zawmi chuan, "Ka fanu ang pawn ka enkawl thei dawn lo tihna em ni? " lungawi chiah lo hian an pa bulah a ti a. 

"Kha zawng i thu thu a ni e. Ka fapa thutlukna kha kei chuan sawisel tur ka hre lo ve" a lo ti hmak. 

"Ka fanu a ni a. Thi tawh hnu dam leh ang a ni a, he inah hian chanvo a la nei ve asin. " Pi Zawmi chu a ngampa hret. Pu Vanlala chuan an nu chu chiang zeta melh chungin, "He inah hian chanvo pakhatmah a nei tawh lo. Kan ina a la awm thei hi a lawm tawk tur a ni. Chu chu i pawm thei lo a nih chuan, i chhuahpui thei reng e" a ti ta a. Chu chu thutawp a ni tih pi Zawmi chuan a hai hauh lo. Engmah sawi loin a ngawi ta daih a. A rilru erawh a chawl meuh lo. 

"Drose.. Sava duhawmtê" Zorina msg chu ner sâwngin a chhiar a. "Savatê ka ni lo. Mihring ka nih hi" tiin a reply. 

"Ka tan chuan savatê i ni. I duhawmin i cute ngawih ngawih" A zei teh hrep e. 

"Sava nih ai chuan uitê ka ni duh zawk" Drose chuan a ti a. 

Rinmawia msg a lo lut ve zat.. "Lo chhuk la, maths zir ang" tih chu. A nui sak a. A mathematics bu chu phawrhin, phur zetin a chhuak nghal. An zir dun lohna a rei ve tawh bawk nen. 

"Geometry hi tu hmuhchhuah nge? " beidawn hmel zeta Drose'in an tih chuan, Rinmawia chu a khi suk. 

"Ka hre bik lo.. A har viau em ni? " a lo ti a. 

"Ka byheart leh mai ang. " a lo ti hmuk. A byheart ziah reng a. 

A pen a tuai vir a tuai vir lai chuan a biangah a rawn chuks zauh. A phu uih. A pen ken chuan Rinmawia biangah a va chhun a, "Aiiiiah" tiin a lo inhup nghal. 

A hlauthawng leh si.. "U Rinmawi, engtin nge i awm a.. A thi em? " tiin a va ban a. 

Rinmawia'n nghal a chhuah tlat. "Min khawih suh. Chho rawh. Min duh tak tak lo a nih hi" a lo ti hmak hmak a. Drose hrilhhai leh lungngai hmel chu a hmuhnawm viau. 

"Aih, ka tihpalh. Min fawp kher a nih kha" a ti hlar a. Rinmawia a khawngaih ve deuh bawk si. A va ban leh a, Rinmawia'n a kut a lo mansak thut, a lamah a pawt hnai hrãwk a. Drose chu a hamhaih takzet. 

"Zochhuanawm, min duh em? " a ti sup a. 

"Min thlah teh.. Ka thaw tha thei lo" a lo ti a. A tal aih aih bawk. A hlau a ni tih a lang reng mai. 

"Sawi phawt rawh" a ti tlat si.. 

"I va ninawm tak.. Duh duh duh.. Kal teh.. Chhe siah" a ti hlar a. Rinmawia chuan a thlah ta a. Drose chu a thaw hawk. Rum zetin Rinmawia chu a melh a. "Khatianga i awm leh chuan ânu ka hrilh tawh ang " a ti zui. 

"Bianga fawh ringawt te chu a ho e. I hmuiah khan ka la fawp dawn asin" a lo ti a. Drose a lo chek hlak, "A tenawm eee" a lo ti hliai.. A ngaihna tak pawh a awm lo e a. 

Zothana chuan dim têin a khabe a chawi kang a, Maimichhing chunga lo nghak rantu Duati hmui chu uluk zetin a fâwp a, a thlum dêk dèk mai. Duati pawn a thiam ang tawkin a lo chhang let ve. A zei lo naa Zothana fawh nuam tih chi tak a ni. A hmui a soft si. 

An inthlah hnuah thawk la halhin, "Drose chu i titipui tawh em? " tiin Duati chu melh a. 

"Aih, phone atanga sawi ka duh si lo va, ka lenchilh ang ka tia, mahse, ka la hman lo a ni" Duati chuan a lo ti a. 

"Chet i lak vat a ngai ang. Vawiinah an hruai lut dawn si a" Zothana chuan a lo ti nghut. 

"Mahse, ka hriatthiam loh chu ti nge nuteii te hian an rin tlat le.. Chutiang khawpa sual chu" Duati chuan a ti niah niah a. Engmah chu a la man fuh tak tak lo tih a lang reng mai. 

"Ka sawi tawh kha.. Teteii hi a fing êm a, a lamtangah a siam vek tawh alawm. Lemchan a thiam si a. Diteii te lah mi rilru tha tawpkhawk an ni si, a bum hneh em a ni" Beidawn hmel zet hian Zothana chuan a lo ti a. 

"Ka nu ka hrilh ang a, Nuteii chuan ka nu thusawi chu a awih em em ang" Râwn titih hian Duati chuan a ti a. Zothana'n a lu a lo thing nar nar. "Ni lul lo ve, i nu te pawn an ţan vek ang. Tin, amah Teteii hian a thawi pawha kan chet lak dan a hriat chuan kan hlawhchham dawn ka tih kha. Drose i fuih a ngai a ni tawp. Saw ina nuam ti lo rawk khawpa a awm theih nan Drose hian tihtheih a nei" a ti a. Duati chuan, "Mahse, a mawl si a. A thiam pawh ka ring lo" a lo ti vat. 

"A mawlna lai tak saw alawm tangkai dawn. A chhungte tan chuan a mawl leh ât vanga sual angah an ngai ang. Mahse, Teteii chuan nâ a tiin hrehawm a tih phah tho dawn tlat" Zothana chuan a lo ti vat. Duati pawh a hmin ta a niang. A bu ta nghat mai. Zothana hi a hrechiang falua lo naa a chet dan a romantic bakah a pa riau si a, a ngaina ve ta hle mai. Tluanga chu theihnghilh thei lo mah se; Zothana chu a ngaipawimawh ve tawh viau. A hlim bawk ti ila kan sawi sual awm lo ve. A nu lahin a ngaina bawk si a. A pa erawh chuan engmah a sawi ve vak ngai lo naa a haw bik lo tih erawh a lang. 

"Ben.. Bena" Enkawli aw chu a ri chang chang. Bena chu a hawi chhuak vat. Enkawli meng diar diar a hmuh chuan a rak chhuak lo chauh! A lawmzia chu a lungphu te chu rang tak a ni. 

"Eni,.. I harh tiraw.. Lalpa, ka lawm e" tiin a phun mawlh mawlh a. Eni kut chu a vuan nghet kher mai. Eni chhungte pawh an rawn lang ve vat. An hmel hmuh a nuam khawp mai. Mahse, Eni chu a meng peih chang chang a ni ber. Doctorin a'n check vat a, ani pawh a lawm ve hmel hle. Kal mai tawh tura an ngaih kha a rawn tha chho ta riau si a, ICU atanga la chhuakin Ward pangngaiah dah luh a ni tawh a. Nikhaw hre loin a awm rei viau thung. 

"Ka thi emaw ka ti a" a ti sap a. Bena mittui a hnâm sawk. "I thi dawn hleinem" a lo ti vat a. 

"Ni e, khuma ka taksa mu reng kha ka hmu a, nang pawn ka taksa chu i lo kuah tlat a. Kal san ka tum lai takin mi pakhat a hmel hmuh theih loh khawpa êng hian, "Ka fanu, kir leh mai rawh aw. I kal avanga nun chhe thei an awm dawn ai chuan i kir leh a tha zawk" a lo ti a. Ka mit sulh a. A thim leh ta vek a" Eni aw chu a thâm vek. Chu thu a sawi ringawt pawh chu a chauhpui tih hriat takin a thaw hlawi hlawi mai. A nu chuan, "Bawihte engmah sawi rih suh. I chau em mai" tiin lapua tuia chiah chu Eni kaah a far lut a. Eni pawh ngawi rengin a chhing leh ta diar diar a. Bena erawh mittui tling khat vek chungin a rilruin Pathian hnenah lawmthu a sawi mawlh mawlh mai. Amah vanga Eni chu rawn dam leh a ni tih a chiang khawp mai. Ni e, Eni khan kalsan ta chiah se, a nun a chhe maithei. Jail-a luh leh hial ngai khawp pawn a ni thei. Chu chu Pathianin a hre vek a, amah vang liau liauin Eni a rawn tir let leh angah a ngai hmiah mai. A hma ai zawngin Pathian a hnaih zual sauh mai. 

"Hei le, in nupuii chu.. " Dinfela chuan naupangho hmaah Teteii chu a dintir a, ani chuan chau tak chungin a lo nuih hlawm a. Phir te pahnih chuan a nu lo hrilh tawh angin, "Anupui, i lo awm ve dawn vangin kan lawm khawp mai. Kan lo lawm a che" an ti a. An chibai nghal bawk. Diteii chuan Drose chu a va mitmei a, Drose chuan che chang miah loin Teteii chu a lo melh ngawt ngawt ringawt. 

"Drose" Diteii chuan a ti fiak ţhak! 

"Nang hi à nu anga insawi nu kha i ni chiang. I va'n hmel chhe tawh em em. Hmanah khan i nalh thei sia.. " Drose chuan a ti ta mai a. Dinfela leh Diteii an nghing dawt! Ni e, hmanah khan Drose khan a sawi tawh tak kha le. A reh leh tak daih vangin leh buaina chi hrang hrang vangin an lo ngaihven tawh lo kha a nia. 

Teteii hmelah chuan mak tihna a lo lang nghal. A ngaihna a hriat loh hmel kher mai. 

"Ka.. Ih, min hre sual a niang. Bawihte" a ti tham chhal a. 

"Teuh lo. Nangmah i ni chiang lutuk. Kha i hnar pawh kha nu hnar ang chiah.. " Drose lah a ţang na viau. Dinfela chuan dik dawna a hriat loh vangin, "Drose, i roomah lut rawh" a ti a. Teteii chu kaiin a roomah a hruai lut nghal. Mi dangin an zui ve bawk. Drose erawh a roomah ngawi rengin a chho. 

"I kaltir ta maw? " Zothana chuan Mala room kawngka bula ding chungin a ti a. 

"Kawng dang ka nei si lo alawm le" a lo ti hmuk. 

"A tha alawm. Ti sawn a chhungte bulah thlamuang takin a thi ang a" Zothana chuan a lo ti liam puat. Mala a ding zawk, "Zothansang, nunrawng viau suh. A thihna tura kaltir ka ni lo. A dam nana thlah zawk ka ni" a ti hriam hraih a. A mitmeng a thim khap bawk. 

Zothana chu a nui lui a, "Hmeichhe tha tak i phu alawm ka u.. " a ti sup. A chhuak zui nghal. Mala erawh a ding khawng reng a, a kut a hum ruh hle bawk. Teteii chu a ngai takzet a ni. Amah vanga a hloh leh chân tawh te chu a hre reng. Mahse, pawi a ti lo. Amah enkawl theia a awm kha a lawm tawk. Ni e, a nau sawi ang khan Teteii aia hmel tha leh nalh, fel leh thiamna lamah pawh sang ve tawk tak a hmu nual. Amah a chhe lo va, a pa hliah hliah bawk. Mahse, Teteii a tawn atangin hmeichhe dang lak atangin a inthiarfihlim hlauh a, Teteii ngenna vang pawh a ni lo, amah khan hmeichhe dang laka inhnamhnawih kha a thei tawh tlat lo a ni ber e. Chutiang chiahin Teteii pawh a pa thih hnu atang kha chuan Mala ta chauh a ni tluan parh! In pawh a chhuahsan meuh lo tihtheih a ni. Thenawm khawveng an nei hnai lo bawk a, sawisep an lo kai a nih pawhin an ni chuan an care lem lo. An pahnih khan an hlim tawk em em tawp. Mahse, tunah chuan a hmangaih Teteii duhthusam tihhlawhtlinsakin, A chhungkua te bulah a kir leh ta chu a nia. A hlimin a dam êm ang chu maw.. 

"Ka drose, bawihte, khaw nge i awm? " Drose rooma luh pahin Duati chuan a ti lâng lâng a. Bathroom atangin, "Au Duat, lo awm rawh. Ka inbual zo ţêp" a rawn ti lauh lauh. Drose khumah chuan a thu a, a phone la chhuakin, "Ka hmu dawn mek" tiin Zothana a text a. 

"Good luck" a rawn ti. A nui sak mai. Bathroom kawngka a ri rak a, towel var bihin a rawn chhuak paw heu mai. A tituai hi chu a nalh a ni.. Mahse, a â thung si. 

"I van lo leng duh lo. Min ngai lo si" tiin pangchan a'n chhuah leh nghal ngawt a. A inhru hul pah bawk. 

"Ka buai ve em alawm" Duati chuan a lo ti a. A nu dah chhuahsak thawmhnaw a inbel hnuah cream te a inhnawih thuak thuak a. A u Duati bulah chuan a thu tharh. A rimtui kher mai. 

"Bawihte, thil pawimawh deuh sawi ka tum a. Ngun deuhin lo ngaithla rawh aw" tiin Duati chuan bul a ţan a. "Umm" a lo ti. Duati chuan Zothana sawi dan ang deuhin Drose hriatthiam theih siin a sawi ta malh malh a. Drose chal chuar nâng thin leh maktih hmel zeta a lo ka leh hô thin chuan amah ang bawkin a hre thiam chiah lo tih a tilang. Mahse, a sawi zel tho va. 

"Ih maw.. Chu chu alawm, Khu nu khuan hmanah, 'I nu ka nia' a ti tawh a. Kan gate bulah te sawn a lo ding reng tawh. Ka school bang pawh min lo hmu tawh alawm. Kan ina a lo awm ve ringawt hi a mak ee" Drose chuan a ti ve ta hluai a. 

"Chu tak chu lawm.. A mak lutuk, khu nu khu. Chuvang chuan i nute hriat lohin kan pahniha kan tan rual a ngai. I nuten an titipui tawh che em? " Duati chuan a ti sauh sauh a. 

"Umm.. Nizan khan â pa nen an lo kal a. Min zawt ţeuh mai. Mahse, "Hmanah a rilru a buai tawh a. Chuvang alawm. Tha deuhin bia ang che' min ti daih a" Drose chuan a lo ti a. 

Duati chuan, "I nute chu engmah hrilh tawh suh aw. Kan pahnih chauhin kan hre dawn nia. Ka sawi ang khan i ti dawn nia. Fing deuhin awm tawh ang che" a ti a. A nau chu a ngaihtuah hmel khawp mai. 

"Umm ka ti ngei ngei ang. Eee.. Au Duat, u Rinmawia hrilh ve ila" a ti hû a. 

"Ngai lo, in chhungkua pawh a ni si lo" a lo ti vat. 

Drose chuan phur zet hian, "Ih maw.. Au Duat, U Rinmawia hian ka biangah vawi hnih a fawp tawh sin. A zak lo tiraw.. Mahse, ka haw miah lo" a ti sar sar a. Duati a nui tawp. "I duh hmel ee ka ti" a ti zauh a. 

"Hmm.. Kei aiin min duh zawk aw. Mahse, a inla ngeng ve thei tawp a. Kan school-ami min ngaizawngtu pawh a thik duh lo.. Ka ngei a nia" a ti tân tân a. 

" Thik chi leh chi loh a hrethiam aniang chu.. Mhase.. Hmun falah awmpui miah suh. I hrethiam em? " thutak deuh zawkin Duati chuan a lo ti a. 

"Teuh lo. Ka hlau ve tho aw.. " a lo ti hlar. 

Pi Zawmi chu Tetei roomah a lut zut a. An pa chuan a khap duh lem lo. Lehlamah hriatthiamna chen a nei ve bawk a. Mahse, a rilru kap tlattu thil pakhat a awm. Hmana an nu diary a chhiar ţuma inziak, "Nunui hmangin min vau a" tih thu khan a ngaihtuahna a hruai peng fô thin. Nunui thih danah khan felhlel a awm em ni ang tih ngaihtuahin awmngaihna a hre lo fô thin. An nu bula sawi dawt chu thil tihchi-ah a ngai lo va. Hre lo anga awma engtikah emaw a hriat duh tak a hriatchhuah a beisei thin. Pi Zawmi lah a fimkhur ve bawk si. A diary te kha a paih nge a halral nge hmuh tur renh reng a awm tawh si lo. Mala pa diary phei kha chu an pa hian a kawl tih a hre lo hrim hrim. Teteii hmanga a fanu Nunui thih dan dik tak hre chhuak turah a inngai deuh a, an thah a ni ang tih lam erawh a ngaihtuah pha lo hrim hrim. 

"Come on, ka ţan leh ka ţan. Lee… start" Drose chuan ring leh fiah zetin a ti lauh lauh a. A naute pahnih chu an inmelh ran. Mampuia chuan vawi leh khatah Tetea chu a va bawh thut a, an tlu dun nghal. A bawhbet ran a, Tetea lahin hnuai lam atangin a lo nam ve ţâng ţâng. An û lah chuan phur zetin a sir atangin, "In hnek in thiam em? Aw tikhan.. A tha a tha" a lo ti sauh sauh a. Mampuia'n a u tetea hnara hnek tuma a tin uaih lai chuan kawngka a rawn inhawng a. Diteii a lo lut hlawl. 

"Vanlalchhanchhuah, eng nge i tih? " a ti fiak ţhak. Mampuia a tho rang ngei mai. Tetea lah chuan thinrim zetin Mampuia tho chu a hnunglam atangin a va pawm bet a, keuh thluk a tum. Diteii aw in, "Vanlalmalsawm.. " a ti leh ţhak. A nau chu a thlah rang viau. An pahnih chuan mitmeng nelawm loh zetin a melh dun a. An hnungah zum deuhin Drose a lo ding. 

"In insual nge in inbuan? " Diteii chuan a ti vawt raih a. Phir te chuan an kut an hnung suih nghal zat. 

"In sawi dawn nge ka hrem dawn che u" Diteii'n a ti leh. 

Mampuia chuan zawitèin, "Kan insual" a lo ti ta a. 

"I û i sual a maw? " Diteii aw chu a nelawm loh ta kher mai. 

" û-in 'Phir in ni tho. Upa zawk in awm lo' a tia nih kha. Tetea hi ka ngam ve tho alawm"? Mampuia chuan hlauthawng zetin a lo ti leh! Drose chuan zawitea penin, chhuah ruk dan a lo zawng mek. A hnunglam atangin a nuin, "Zochhuanawm" a ti vin ţhak. A ding châwih. 

"Aw.. Nu" a ti zawi sap a. 

"I naute pahnih i lo chotuah vel a maw?! Eng ang û nge i nih? I naute pahnihah hian tu nge upa zawk sawi rawh" Diteii chuan a ti a. A fanu lam a hawi nghal bawk. 

"Tetea" a ti tawi tak a. 

"Phir an nih vangin upa zawk an awm lo maw? " elsen awki in a rawn ti leh. 

"Englo, an inhnial reng a. Ka ning lutuk a. Insual mai ru ka ti mai a nih kha.. Sual pawh an insual hman lo ang a ni" a ti riat niah niah. Diteiin a kut a rawn vuan chat, mitmeng nelawm loh zeta melhin, "Hrem i ni ang. Nangni pahnih pawh in bang dawn lo. Lo kal teh" tiin a fanu chu room atang chuan a kai chhuak a. A room lam a panpui. Hmanah an tet laiin vawi khat hremna pek a ni tawh a. Chumi ţum chuan a naute pahnih a velh hrep vang a ni. A room an lut a. A nu chuan kawngka a kalh nghal rap. Drose bathroom kawngka bul-a tairaw tiang chu a la nghal zat. 

"I kut dawh rawh" a ti hriam hrâk a. Drose tan dawh loh ngam chi a ni lo. A kut vei lam a dawh a, Diteii'n zak kau zawk khawpin a lo hlap fiak ţhak. A kut chu a thing nawk nawk a. "Lehlam" a nu chuan a lo ti sap. 

Dawih zetin a dawh leh, a hlap leh zawt. "Aaiiah… lehlam aiin i hlap na bik.. Tawk.. Nu, ka sim ka sim" a ti chul a. 

"Bungbu rawh" a nu chuan a lo tihsan. 

"Nuuuu" a ti leh vak. 

"Zochhuanawm" Diteii aw chu a chang kher mai. Drose chuan lehlam hawiin a mawng chu a dawh ta vâng a. A nu chuan a hlap leh ţhawk. A eu zawk mai. 

"I ti nawn leh dawn em? " a mitah tak a rawn en a. 

"Aih.. Teuh lo. Min hlap na thei si. " a lo ti ţuau. 

"Tikhan zanin chu i awm ang. Zanriah chu roomah ka rawn pe ang che" a nu chu chhuah a tum a. "Nu, ka naute kha chu hlap ve suh. An la tê si.. " a rawn ti a. Diteii a ding det, ngawi rengin a chhuak ta daih. Drose chuan a kut phah sen tût chu a pharh a, "A fanu neih chhun ka nia, min duat lo si" a ti niah niah a. "Aa.. Mahse, ka sual em a ni. Ti nge ka mawl em em le.. nu hi ka chhun aniang.. Eee.. A pa zawk hi a niang.. Anu chu a fing leh si" a ti leh sep sep a. Zanriah a kilpui ve dawn loh vangin, "U Rinmawia chuan min ngai teh ang chu.. " a ti leh sap a. A ma tawkah a buai ve hle mai. 

"Khaw nge ka fanu hi" Dinfela chuan chair-a thut pahin a ti a. Rinmawia pawn a zawng rilru deuh renh reng a. A dam lo mi le a ti hman hial tawh. A text a chhang thei bawk si lo. 

"Ka hrem.. Nakinah a zanriah chu ka pe ang" Diteii chuan a ti sap a. Tuman zawhna an nei ngam lo. A fate a enkawl danah a pasal chu a inrawlh ngai lo. Diteii hi a ring tawk a, amah a buai thin vangin in lam leh a fate chu Diteii kutah a dah titih ringawt. A enkawl tha hle tih a hre bawk. Mahse, a fanu tel lo va zanriah kil chu a eitui chiah lo nge a kham hma viau. Diteii pawh a ngawi ran mai. A fanu chu engtianga enkawl chi nge tih a ngaihtuah pawh a ni maithei. 

Teteii pawh a zia ve hret hret a. Nurse an rawihsak a, lângin a rawn kal mai a. Jection ngai leh a tul tul a rawn tihsak thin. Hlimi a ni a. Nula lian thelhthawlh, ngo lam aia hâng lek lek.. Vun mam zet a ni. A hlim thei a, nurse niawm hliah hliah a ni. Teteii pawh chu a kawm hlim thiam riau a, Teteii pawn a ngaina phian. Pi Zawmi'n a vil deuh chawt bawk a. A vanneihzia hi a hrethiam lo a nih chuan hmana Teteii tho kha a la ni tihna a ni ang. 

"Ti nge i nuin a hrem che? " Rinmawia text a hmuh chuan a ngui rawih. A zak ve bawk si. 

"Ka sual lutuk a" tiin a reply tawp. 

"Sual suh" a rawn ti. 

"Nia.. Ka fel tawh viau ang" a ti ve mai a. 

"Ka ngai che" Rinmawia chuan a rawn ti a. Drose zak chu a sen ap ap.. Engtin emaw a awm. 

"I zak lo" a ti leh ringawt. 

"Zak chung chungin ka sawi" a rawn ti lehzel. 

"I chhia.. Muttui" a ti a. Phone a dah daih. A lei a chhuah a, "A tenawm siah" a ti hluk. Mahse, a chhungrila lawmna chuan a awm a tinuam viau thung. 

"Nu, Diteii hian min huat viau i ring em? " Teteii chuan Hlimi chhuah laiin a ti a. 

"Haw em em tawh lo vang. Hrethiam rih rawh. A demawm loh a nia" a lo ti a. 

"Nih leh Nu, ka pa hian Nunui chungchang kha hre ta se.. Eng nge a tih ang? " a ti leh a. 

Pi Zawmi chuan inngaihtuah buai takin, "Ka hre lo. Engpawh a ti duh ang. A fanu kha a hmangaih êm a.. " a lo ti ban chat. 

"Ka thah a ni tih hriain nang pawn min hriatpui tih hre ta se.. Min that ve duh maiin ka ring, nuu, tlanbo mai ang hmiang" Beidawng aw zeta Teteii'n a tih mek lai chuan, Room kawngka pawn lama ding ngawi reng Hlimi chu a khi sak a. Zawitea balcony-a chhuakin, a phone a phawrh a. 

"A chiang ta e" a ti ta sap a. 

(Karleh atang chuan ka dam anih chuan a sei ve deuh turah ngai ang aw 😍