Drose 22

D'ROSE… (Chapter- 22)

Ziaktu : Toni Râlte

Enkawli pawn nikhua a la hre lo. Doctor ten kal mai tura an rin laiin Pathian khawngaihna changin a dinhmun a rawn ţha leh hret. Bena chuan a kalsan hlei thei lo. Diteii te pawh zan khat an riak a. Tihtheih vak awm hek lo, a tukah an haw leh phawt. Hnain a hmuak zel bawk si nen. In an thleng chu an chau nupa viau, dam lo menpui leh han enkawl hi a chauhthlak ve êm a ni. Chawhnu lamah an thleng kha a nia. An intihfai meuh chuan zanriah ei a hun dawn ruai. Diteii'n a sam a chhem ro lai takin Thiangi'n, "Diteeee.. Inleng i nei" a rawn ti lâng lâng a. Dryer chu dahin phur fahran lo vin in hnuai lamah a chhuk thla nghal. Sitting roomah chuan Mi pakhat hleitling zet zawt, a hmuh tawh hnu ang deuh hi a lo ţhu ran mai. Diteii a hmuh rual chuan a lo ding nghal zat. A kut phar chhuah pahin, "Malsawmtluanga ka nia, Ka hmu che chu ka lawm hle mai" a ti thum chhak. Diteii chuan a an deuh kha a hre nghal. Zothansanga nen khan an inang viau tih chu.. 

"Eng nge ni ta? Thu rawh.. Thu rawh" tiin a lo dawngsawng vat a. A nui sâng bawk. A pawimawh viau a nih hmel. 

"Eng lo a nia.. Dite, thil pawimawh tak sawipui tur chea lo kal ka nia. Min hre ngai lo vang. Ka pa erawh i hriat ka ring. Pu Dintluanga a nia. " Malsawma chuan Diteii melh ran pah chuan a ti a. Dinfela motor check zo a rawn lut ve mêk. An nu leh mi pakhat muk zeta lo thu dun a hmuh chuan mak a ti deuh a. Va tihbuai loh law law tumin in chung lam a pansan zui nghal. 

Diteii chuan, "Pu Dintluanga.. " ti sapin chunglam a melh a. Chutah thil hre chhuak thut niawm takin a rawn meng kâwk. "Ehee..! " a ti nghal tuar. Mala chu a khi suk. 

"Eng thil nge min sawipui duh chu.. A va mak ve" Diteii chuan pangngai deuh zawkin a ti ta a. Thiangi'n an in leng chu thingpui a rawn pe a. A kalsawn zui nghal. 

"Thil tam tak sawi a ngai dawn a. I hun ka la peng nasa dawn hle a ni. Ih maw.. Dite, I û, i laizawn Teteii kha a la dam ti ta ila, i awih ang em? " pehhel lek lek hian Mala chuan a ti a. Diteii a thu tha a, "Engvangin nge ka awih ang. A ruang ka kil alawm" a ti a. 

"Ni e. In tan chuan mitthi a ni tlat! Mahse, Teteii kha a la dam tlat a ni" Mala chuan a ti zawi raih a. Diteii awm dan danglam miah lo chuan a tihrilhhai letling. Mak ti hmel a pu eih bawk si lo. 

"Teteii hming hawhin kan inah buaina rawn siam i tum tihna em ni? " a ti ta khauh a. Mala a hamhaih hle. 

"Min ring lo hle a ni maw? Hmm.. A awm ve rèng e. I demawm loh. Mahse, ka thusawi hi ngun takin lo ngaithla la, zawhna pawh nei rih lo la.. I ngaihthlak zawhah ngaih dan i siam chauh dawn nia" Mala chuan a ti a. Thingpui a in zo te te a, muangchangin Teteii nen an intawn dan leh a pa diary atanga a thil hriat zawng zawng, Teteii natna leh enkawl a nih mek dan te.. Engkim zawng zawng chu chipchiar takin a sawi ta vek a. Zanriah ei a hun tawh naa Diteii chu a la laklawh si vangin an nghak ţhap. Mala lah chu a hmanhmawh lem si lo. Mala thusawi zawng zawng a ngaihthlak kim barh hnuah Diteii hmelah chuan mak tihna leh rinhlelhna a inlar chhawk zut zut a. Awm dan thiam harsa a ti kher mai. Mala lah chuan dawt sawi hmel a pu mawlh si lo. 

Diteii chu a ding hluai a, "Papa.. Lo kal lawk teh" tiin An pa a ko nghal. Mala pawn pawi a tih hmel lem loh. 

Dinfela a rawn thu ve. Mala chuan a tlangpui a lo sawi leh zar zar. Dinfela pawh phâwk tak a ni. Ani chu mipa a ni bawk a. Dawt a nih rinna a nei deuh nge a chiâi lutuk lo. Mahse, mak erawh a ti tih a lang. 

"Teteii chuan in lo pawm leh theih a beisei ngam lo naa.. Rilru buai leh hah reng rengin hun a hmang a ni. A sulhnute vangin a inchhir a. A inhua. Hmuh leh che u a châk em em bawk" Mala chuan a ti dam thlup a. 

"Ka.. Ih, ka hre lo. A la dam tak tak maw?! " Diteii chuan a lo ti bah nuaih a. 

"Hmana Teteii hmel ang kha pu tawh lo mah se; Teteii tho kha a la ni e. A bulah ka hruai thei ang che u" Mala chuan a lo ti a. 

"Ngawi teh, min bum lo tih engtin nge kan hriat ang? Thil mak tak tak hi kan tawng fo va. Ngaiah a neih theih hlek loh lehnghal. Rin harsa ka tih zawng tak a ni" Dinfela chuan a lo ti chang fak. 

Mala chuan, "Ni e, min rinna chhan tur hi in nei miah lo. Mahse, in nu ber pi Zawmi hian engkim a hria. Ka pa diary pawh a kawl mek a ni" a lo ti a. Diteii chuan mak a ti lo. A nu awm dan a ngaihtuahin. Dinfela erawh a la khauh fung fung hle. 

"Dite, i fanu rubotu Lalrinawmi taksa bung kha en chîk ni ula chuan ngaih that lohna in nei ngeiin a rinawm. Lalrinawmi ngei kha Zomuanawmi a ni tlat si a" Mala chuan a ti a. 

"Kei chu engmah ka hre thiam tawh lo. Hmalak dan tur pawh ka ngaihtuah thiam hek lo. " Diteii chuan rilru buai zetin a lo ti a. 

Mala chu a ding a, "In hun ka rawn khawhralsak che u a. Pawi ka ti. Kha thu sawi tur khan ka nghak rei tawh bawk a. Ka thawl huai mai. Ka haw ve phawt ang e. Hei hi ka card a ni a, eng emaw hriat chian duh in neih chuan min lo be dawn nia.. Teteii chuan a lo nghak reng ang che u" a ti mawlh mawlh a. A chhuak zui nghal. Han thlah mawihnai pawh an tum lem lo niawm tak a ni. Amah Mala pawh a vui hran lo vang. A hmangaihber tana a tihtheih chu a ti zo taah a ngai. Kha tiang bak chuan tih dan tur dang a hre tawh lo. 

Zanriah pawh an nupa chuan an ei tui tehchiam lo. Mi dang laka thup rih an la duh bawk si a. Tin, pa ber Pu Vanlala pawh biak a ngai ngei ang. Teteii chu a la dam tak tak anih chuan hetah an lalut leh ang nge a awm awmin an awmtir dawn tih pawh an la ngaihtuah thiam lo. Dinfela chuan chenpui tawh loh a duh rilru.. Buaina bak a thlen ngai si lo va, an chhungkaw hlimna chu engmah lo maiah a rawn chantir leh a hlau èm a ni. Diteii tak pawh inngaihtuah buai tak a ni. Teteii chu la dam se a tih rilruk laiin hlauhthawnna namèn lo vin a tuam reng bawk si. Hmana a fanu rukbosaktu hian ruahmanna dang a nei leh mai ang em? Teteii a lo nih tak tak loh phei chuan… 

"I hman tawh em? " Zothana aw a hriat rual chuan a khi sak. A sam chu a tuai leh thuak a, "Hmm.. Hman a ni mai" tih leh pindan chhuahsan a rual nghal. Zanin tlaiah Zothana'n an ina chaw ei turin a hruai dawn a ni. A û te nupa nen an awm tih chu a hria. A zâm angreng. An lo dawngsawng tha ang em tihah a buai bawk. Zothana nen an in lam an pan mek lai te chuan helhhawlh leh zauthau angin a awm. Tluanga nen an inzui lai khan an inah vawi hnih lai chu chaw a ei ve a. Hetiang em em hian a zâm ngai lo. Tluanga chhungte nen kha chuan an inpawh tawh sa ve bawk a. Zothana chhungte erawh tu nge an nih a hre si lo. 

"Nitin hian i nalh telh telh a nih hi" Motora an thut hnu chuan Zothana chuan a ti leh a. Duati a khi var var. 

"I u te chu ka hmu chak tho sia, ka zâm bawk sia" a lo ti daih. Zothana chuan, "Zâm suh. An lo dawngsawng tha viau ang che" a ti a. A mitmeng chu a nelawm loh thut! Duati erawh chuan a hmu ve lem lo. Hmalam a melh vangin. 

Zothana te in an thleng ta. In ropui tak a ni. Duati a zâm zual sauh. 

"Hei Duati chu le" Zothana aw chu phurna hlir hian a khat a. Duati a lo ìp chawih thung. 

"Ka hmu che chu ka va lawm em" Zothana û, mipa sang zet chuan a lo ti dam thlup. Mahse, Duati chuan a hmel leh mitmeng chu a lem riaua hriatn a nei. 

"Ka nupui rawn hmu ve lawk ta che. A dam lo mek a" a ti zui a. Duati a bu nghat. Mala chuan kawngka hawngin, "Tete, hei leh Duati chu" a ti thum dut a. 

Khum zaupuia hmeichhe lo mu chu a rawn inbeng kâng a. A hmel chu a chhe hauh lo. Mahse, a chau a, dam lohna nasa tak a nei tih a hriat hle. Duati chu a rawn nuih hram hram a, a mitmeng erawh lungngaihnain a khat thung. 

"Duati… duati" tiin a phun sep sep a." Hei hi ka u nupui Teteii a nih hi" Zothana chuan a lo ti var a. An inchibai lai chuan Teteii chu a khur nasa hle. Duati chuan mak a ti viau. 

"Duati.." tiin a phun leh sep a. Eng emaw sawi zawm duh hmel a pu, mahse, a hrawkah hnawhtu awm ang maiin a chil a lem khawlh. Mala'n a thutpui ta vat a. 

"A dam lo va. Mahse, a hmu chak lutuk che a. Chuvang a nia ka hruai che. Tirawh, i chhuak tawh ang" Zothana'n a tih chuan Duati pawh chu a chechang ve hram a. Teteii va melhin a nui sâng a, "Lo dam vat rawh aw.. Ka lo ţwngţaipui ang che" a ti sap. An chhuak ta a. Pindan chhung uapzia leh boruak rihzia kha Duati chuan mak a ti ru ngawih ngawih. An zavai khan lemchang an ang a ti. A chhungrila ngaihthat lohna erawh a thup ve hram hram thung. 

"Ka pa, in lo haw phawt chu a ngai a ni. Chhungkua sawi fel a ngai tlat! A tak tak a ni lo anih pawhin ngaihthah ngawt chi a ni chuang lo.. Ka nu pawh kha kan biak a ngai" Dinfela chuan Pu Vanlala a be mek. Engkim a hrilh vek tawh. Pu Vanlala rin loh lam daih a nih vangin ani erawh a ţhawng hle. An nu buai rukna chu a hre ta chiah a. Mak a ti thlawt! Pi Zawmi erawh a inbual daih thung. 

"Nu-i, hawn i châk tawh si a. Ticket ka book zo chiah e, ni 2 hnuah kan haw dawn anih chu" Pu Vanlala chuan an nu inbual zo chu a lo hrilh nghal. Pi Zawmi chuan, "Tak tak maw. A van lawmawm dawn ve" a lo ti chul a. Thil thleng eng emaw a awm anih a ring nghal. Mahse, an pain a sawi loh chuan sawi chhuah a tum hran lo. Teteii te a be pawp thei tawh lo va, chanchin engmah a hre si lo. A rilru a buai ru em em a, chutih lai kara an hawn tur thu han hriat chu a lawmawm dangdai viau ang. 

"I va ţawng leh duh tawh lo ve.. I titau leh tawh mi? " Rinmawia chuan a ti lawng lawng a. Drose chuan, "Tau lo. Tau deuh tho.. Nizanah min mutthilhsan anih kha" a lo ti a. 

"Ka chau em alawm.. Ka sawi sa tho kha"

"Chupawh nise, inmangtha ve tal tur" inla puitling zet hian a lo ti hlar. Rinmawia pwh chuan zai dawh deuh hian, "Yes boss, ka lo hre tawh ang" a lo ti sup a. Drose pawh a nui ve leh thei ta. Tihthinrim a awlsam rualin tih lawm pawh a harsa lem lo. 

Gate bula Zorina lo ding a hmuh chuan a ner sak. A lo be leh ngei awm si a. Kal pelh mai tuma a pelh mek lai chuan, "Zochhuan" a rawn ti dût a. Tuman Zochhuan tiin an ko ngai lo. 

Chhang loin kal pelh a tum leh a, a banah a rawn vuan chat. "Ka bialnu i ni dawn tho tho" sehchilh deuh hian a ti leh a. An bulhnai ami ten an rawn melh ţhap tawh. Drose chu a sen ţân ţân a. 

"Min thlah vat rawh. I zak lo em mai" a ti hlar a. Kal sawn a la tum ve ţang ţang bawk. 

"Zak nang.. Kan schoolah chuan tumah ka zah lo.. Ka bialnu i ni dawn.. Chu chu ni mai" Zorina chuan ruih a nei mawni zawk ni. 

"Zorin, i hmelchhia, ka duh lo che. Bialpa ka nei " a ti ta nghek a. A ban chu vai lawpin chak zetin an room lam a pan ta nghal a. Zorina tana a zahthlak turzia leh tlawmthlak turzia chu.. Mahse, a che over ve hret a ni. A chantawk leh phutawk a hmu ti mai ang. Mahse, Zorina hi mi mak tak a ni a, zak hmel a pu lem lo. A tumruh hmel sauh zawk. Zawi supin, "I va tlawm dawn chiang tak" a ti a. In chung lam a pan ve nghal zat. 

Pu Vanlala te lo thlen hma chuan Dinfela te chuan eng ruahmanna mah an siam duh lo va, Mala pawh an be hek lo. An rilru erawh a kap ţûn reng a. Awm nuamin an awm meuh lo. An fimkhur sawt bawk. Drose phei chu a chhuah dawn hlek pawn zuitu a nei zel. A vawi hnih nana hloh leh chu an ngaingam lo hle a nih hmel. Amah lah a â si a, an veng run chu a ning bawk. Rinmawia erawh chuan rilru tihhrehawm nan a lo hman phah thung. A rin dan chuan amah vanga Drose chu veng uluk sawt an niin a hria a, Drose bialpa atan an duh lo a nih a ring. Chu chuan a awm a tinuam lo va, in chhungah pawh a zûm dûk phah. Dinfela te lah hnaah an buaj ve reng nen, Rinmawia lam an lo ngaihven bik si lo. An in chhung chu a eng emaw ti nawm loh phah riau. Thiangi leh Zari tak pawn Dinfela te nupa enghelh nei tih hriat taka an awm chu an hai bik si lo va. An hlim loh phah ve vek. Phir te leh Drose te erawh chuan engmah an hre thiam ve lo a nih hmel. 

Pu Vanlala te an lo thleng ta. Naupangho an ri chel chul a, Drose phei chu a sahawk nasa hle. A puin thil a rawn hawn nasa bawk si. A vir kual chhen mai. Zanriah chu hlim takin an kil ho va, engkim chu a pangngai vek. Zanriah ei khamah in chung sitting roomah pu Vanlala te nupa leh Dinfela te nupa chu an thu khawm ta khar mai. 

Dinfela chuan a chin chhuakin engkim a sawi ta zar zar a. Pi Zawmi chuan a kut a lo hum ngawt ngawt. A thuruk chu puan chhuah a ni ta si a. A rin loh lutukin Dinfela ten an hre ta si. Mala chet dan chu mak a ti ru viau. Engmah a rawn hrilh ve bawk si lo. 

"Naktukah kan paliin Teteii nia an sawi chu va hmu ila, a lo ni ngei anih chuan heta lak luh leh lak luh loh chu in nupa thutlukna ni rawh se.. Ka inrawlh dawn lo. " Pu Vanlala chuan a ti ta dap dap a. Dinfela te pawn an hnial lem lo. Zan 3 chhung zet an nupain muthmunah agenda pakhat chaiin an meeting reng a, thutlukna mumal tak erawh an siam thei lo. Diteii'n Dinfela mitmei a veng a, Dinfela lahin Diteii a vengthawng ve bawk. Buai ru tak an ni. 

"Amah Diteii ngei va hmuin engkim ka sawi tawh a. Tunah chuan chet lak ngaihna a awm tawh lo. Phuba chu theihnghilh mai rawh" Mala chuan Zothana melh chungin a ti sup a. 

"Ka hria alawm. I va hmu tih ka hriat vang alawm ka ruahmanna ka thlak tak" a lo ti chang fak.. 

"Eng thil maw" a lo ti vat a. 

"I hriat ve ţul se chuan ka sawina a rei tawh ang" a lo ti thung. 

"Ka nau, duhtawk teh ang. He thil hi khawngaihin enliamin awmtir ve mai mai teh.. " beidawn hmel angreng deuh hian Mala chuan a ti ta a. 

"Ka kut ngeia a nunna saw chhah ka duh fo! Mahse, ramsa ni loin mihring ka ni a.. Ka insum leh thin. Aw le, ka û i nih angin ka zah che a. Teteii saw heta tanga i chhuahtir a nih chuan ka duhtawk ang. He inah hi chuan a cheng thei tawh lo vang" Zothana chuan hriam zetin a ti ta a. Mala chuan a dar a san zauh, "Chu zawng Diteii te thutlukna tur a ni. An ni hian duh lo se tu chuan nge tuamhlawm chuang ang" a lo ti a. 

"Tuamhlawma enkawl i duh a nih chuan, i chhuahpui thei alawm. Ka pa lu nghahna hmunah ni lo.. Hmun dangah aw" Chiang fê hian a lo ti. Mala pawn sawi tur a hre tawh lo. 

A phone a rawn ri ve ta chiah. "Hello" tiin room atangin a chhuak zui. 

"Ka be zo chiah e. Chawhnu dar 2-ah min lo beisei dawn e" Diteii chuan a ti a. Pu Vanlala chuan, "Police hruai tel chi a ni ang em? " a lo ti a. 

"Engvang chuan nge i hruai ang a. Tu nge an va man ang a" Pi Zawmi chuan insum zo loin a lo ti hrâwk. Diteii chuan a nu chu a melh kãwk a, "Hmana Teteii bawk kha a la nih chuan, Police chu kan mamawh alawm," a ti ve hmak. Pi Zawmi a ang zuau.. Mahse, a ngawi leh daih. Diteii a zah ve pawh a ni mahna. 

"Tete, hawh leh.. Ka bual ang che aw. Vawiina lo kal tur te hi i tan an pawimawh ania.. I chhungten an rawn hmu dawn che" Mala chuan duat zetin a chul heuh heuh a. Teteii mitmeng ngui zet chu a rawn harh kâwk mai. Thei leh thei lo va thu chhuakin, "Mal, dawt i sawi lo tiraw? " a ti tham chhal a. 

"Diteii nen kan inbe zo chiah e. Hawh.. Inbual rawh aw" tiin khum atangin a kuah thla a. Teteii pawh a insangmar nasa hle. A rilru erawh insual nasa ngat ngat tak a ni. A hlau a, a zauthau, a helhhawlh bawk. A tah te a chhuak ut ut bawk. 

A û te pahnih inbual thawm ngaithla chung chuan Zothana chuan, "A ma inah ngei a laichin ten hremna pe se, kei chuan ka kut ka sil thei tawh ang" a ti vawt raih a. A mitmenga eng emaw lo lang zawk chuan a hmel pawh a tinelawm loh vek mai. 

"Lo kal r'u.. He lamah" Mala chuan hlim hmel takin a lo dawngsawng a. Diteii te erawh an ngawi reng ringawt. Boruak chu a rit lu deuh a ni. Teteii room kawngka chu Mala chuan zawi muangin a hawng a. Pi Zawmi a lut hmasa ber. A fanu cher kuam leh chauh hmel em em a hmuh rual chuan a chhing sawk. Mahse, Ditejj te vangin a insum hram hram. 

"Tete" Mala chuan a ti zawi sup a. A rawn meng diar diar. Khum sira mi panga lo dingte chu a mal tetein a melh kual a, Diteii chu a melh rei bik kher mai. A kut cher thiak chu a lek kang a, a vun dul hnuk kara a tatoo chu kawkin, "Dite, keimah ka ni" chau aw zetin a ti a. Pi Zawmi a lo in sût hraih.Diteii pawh Teteii tatoo a hmuh rual chuan a mit sulh a ni ber, a va pan hnai a. 

"Tete.. Eng vang nge? " a ti tawp. Sawi tur a hre lo. Dinfela leh a pa erawh an ding ngawi reng. Pi Zawmi chuan ţah aw ţiau hian, "Ka fanu" tiin Teteii chu a zuk kuah nghal a. Teteii chuan thawk la hawkin, "Tunah chuan thlamuang takin ka kal thei tawh ang. In laka ka thiltih zozai te kha ngaihdam zawh chi a ni lo va mahse, ka hun tawpa in hmel ka hmuh leh vang pawh hian ka thla a muang a ni. " a ti sep sep a. A meng tha peih lo kher mai. 

"Chutiang sawi suh.. I kal dawn lo. I dam leh dawn" a nu chuan a ti vat a. Diteii pawh khumah a thu thla, "Tete, i thil tih tawh te chu siam that theih a ni tawh lo alawm.. Mahse, tunah hun tha kan nei leh taah ngai ang aw. Khang i tihsual zawng zawng siamthatna hun i la nei a nia. Chuvang chuan min kalsan thei lo. I bâ i tlak a ngai" a ti mawlh mawlh a. Pu Vanlala chuan Diteii chu ngaihsan hmel zetin a lo thlir reng. 

Diteii bawk chuan an pa melh chhoin, " Papa, ka laizawn neihchhun a ni tawh a. Rem i tih chuan kan inah lak phei ka duh a ni" a ti ta a. Dinfela rilru a buai kher mai. A nupui ngenna chu a zah em em, mahse, Teteii mizia zawng zawng hre chiang tawhtu a ni a, rilru sakhat tih takah rin leh mai harsa a ti a ni. Nakinah an chhungkuaah buaina thleng leh ta se, a fate thlengin a ngaihtuah kai vek. 

Diteii chuan a rawn melh reng a, "Rem i tih loh pawhin ka dem lo che.. Eng pawh ti rawh.. I kutah engkim a awm e" a ti leh sap.. 

Teteii chuan Dinfela chu thei leh thei loin a melh ţãwk ţâwk a. "Khawngaihin" a ti tham ţiak a. A maimichhing leh daih. Dinfela tan han khauh tlatna chi niin a lang ta lo. 

"Aw le,. Ka nupui ka hmangaih em em duh dan angin Teteii hi lakluh ka remti e. Mahse, chuti maia awlsam a ni dawn lo va, thenawm khawveng te bulah Teteii a la dam tih kan sawi dawn nge tu emaw angin kan sawi dawn tih pawh sawiho a ngai ngei ang. Zanin chu Teteii hi hetah lo riak leh rih se.. Chhungkua kan lo meeting leh phawt a nge" A ti ta dap dap a. Pu vanlala pawn a pawmpui hle. 

"Saw pa sawn ti nge a lo nghah ve ziah che a" Rinmawia chuan a ti pawr hlar a. 

"I thìk a mi? " a lo ti vat. 

"Thik rawh i tih kha" a lo ti thung. 

"Nia, thik tlak alawm. Mahse, ka ngei teh mai a nia. A zak lo si" a lo ti leh a. 

"A biak ngamin i awm a ni mai. Be tawh lo tawp la a châg reng peih lo ang che" Rinmawia hian a thìk ve tak tak a niang. 

"Ka awm lo e a.. A zak lo ve hrim hrim alawm.. Ninawm" a lo ti hlar a. Thîk tura a duh em em an thîk chu a ngai thei leh chuang si lo. A khirh thin teh e. 

"Duati.., thu pawimawh tawp khawk ka sawi dawn a. Lo ngaithla uluk hle rawh aw.. " Zothana chuan Duati kuta vuan chungin a ti a. A thutakzia chu a hmelah pawh a lang thei. Duati pawh a serious kher mai. 

"Umm sawi rawh" a ti a. 

Zothana chuan muangchang hian, "Ka u Nupui ka tih kha a nihna dik takah chuan i nu nau, i nute Diteii û chiah a ni. Khatin lo meng phar suh. Ni e, thi daih tawha an ngaih a ni. Nang phei chuan engmah i la hre ve lo ang. Mahse, a thi lo va, a la dam reng a nih saw. Tunah hian I nute Diteii te saw bumin an in chhungah luh leh tumin theibtawp a chhuah mek a. Diteii te rilru thatna hmang tangkaiin kaw dang hreuh a tum mek a ni. Chu chu Diteii te bulah eng ang pawn sawi mah la; an awihsak lo vang che. A chhan chu Teteii tluka lem chan thiam an awm loh vangin. Chutah tak chuan i pawimawh ta a ni. An inah i cheng ve si lo va, i tihtheih awm chhun chu i nau Drose fuih saw a ni.. I thu a awih a, a zah che a. Engpawh sawi la a ring dawn. Ani sawn an chhungkua a chhanhim a ngai ang. Nakinah a chet dan tur chu kan sawipui dawn nia. Chuan, Duati, tuna ka thusawi hi i nu leh pate pawh hrilh rih suh aw. Teteii hi a fing èm a, khawiah pawh beng a nei a, kan thiltum hi a hriat vaih chuan kan hlawhchham a ni mai.. " a ti ta mawlh mawlh a. Duati mitmenga mak tihna inlar nasa lutuk chuan khawngaihthla te pawh a la zawk e a. 

"Engmah ka hre thiam lo" a lo ti. A hre thiam miah lo tih a lang reng mai. 

"Lungngai suh. I la hrethiam dawn chauh.. Tunah chuan min ring la a tawk aw keimah chiah min rin a ngai" Duati kut hum nghet sauh chungin a lo ti a. 

"Ka buai nuaih mai" Duati chuan a ti niah niah. 

Zothana chu a khi sak a. "Hmanhmawh suh.. Muangchangin i hre thiam chho mai ang" a ti dam ruih a. A rilru erawh chuan, "Drose leh nang hian ka hna min thawhsak dawn a ni.. " a ti thung… 

(Huiham..