Drose 21

D'ROSE… ( Chapter - 21)

Ziaktu: Toni Rãlte

Pu Vanlala sugar a san hret vangin leh Pi Zawmi nerve lam treatment lak rei ngai nen, pu Vanlala te chu an cham rei a ngai ta si a. Dinfela a hna chawlhsan rei kha a tihchi si loh, thla 3 dawn an awm a ngaih dawn vangin a hawnsan lo thei lo. Amah Pu Vanlala'n a zuam tho bawk a, a hawnsan rih ta mai. Diteii pawh an sumdawnna lamah a buai zual a, a phar buai angreng hle. Fa pathum chauh a nei a ni bawk a, a la naupang si, a nalh tulh tulh emaw tih tur hi a ni a. A hnathawkte hian a rukin an hisap fô mai. A takah erawh an chhaih ngam lem lo. Amah hi nelawm tak si hian a zahawm tel tlat a. Fak pawh a hlawh ngiang reng a ni. 

Teteii erawh a dinhmun a ţha lo chho riau. A rilru lamin a uairih vang nge a taksa thlengin a nghawng a. Thil a ei tha bawk si lo. Mala rilru a hah thei viau. Zan khat phei chu a ţawngvai bial bial a, "Dite, mawh Dite, khawngaihin" tiin a thle tawn sek a. Mala'n a kai harh a, "Eng nge thleng? " tiin a kuah vat. 

"Diteii'n min vih a lo tum a" tiin a thlan fim a bawl ţawk ţawk. A hah hmel hle bawk. 

Mala chuan thutak deuhin, "Keimah hian i nau chu va hmuin ka va titipui dawn em mawni le.. Ani chuan a lo pawm leh theih ngei che ka ring a ni" a ti dam thlup a. 

"Aih, min pawm thei tawh lo vang. Thil thleng a tam tawh lutuk a ni. " tiin a lu a thing nar nar a. Mala pawh a beidawn hmel hle. Ani pawh mut a hmu tha lo nen a mitkhur a thuk dãk a, a thu that bawk. A nau lakah Teteii venhim a ngai bawk si. A rilru a chawl meuh lo. Zothana chuan engtiangin nge chet a lak dawn a hre lo va, mi fing tak a nih vangin inven reng tluk a awm lo tih a hria. Teteii a hmangaihna lah a ni telin a pung tial tial mai si. 

Zothansanga erawh Duati bialpa a nih hnuah a hna nen a buai ve viau. Tar enkawlna in a sak mek pawh an sa chak bawk a, an sa zo lek lek tawh. Advertisement te pawh tichhuak tawhin call pawh a dawng nual tawh. Mizorama a vawikhatna anih miau avangin mi ngaihven a hlawh zêk a, tar ho tan malsawmna a nih ngei a rinawm. Duati chuan a lakah rilru a la pe pumhlum thei lo tih hre renh mah se, beidawn a tum hauh lo. Duati chanchin pawh a rukin a chhui nasa. A duh aia tam a hre tawh. A ta liau liau ni turin a bei nasa viau; amah Duati paw'n a be chhe lo. Mahse, Tluanga bumna khan a la nghawng êm a, mipa dang laka rilru pek a la harsat deuh zawng a ni. Zothansanga chuan mut hmunah a pa phuba lak dan tur a suangtuah fó a, zan khat a rui deuh phei chu a inngaihtuah lungpuam a, Teteii chu va luhchilh a, va rehhlum hial a nâp hman. Mahse, inngaihtuah harh leh vatin, a nunna zuah sia chu a nun chu hremhmuna siam a rilruk ta zawk a ni. An unauah a naupang ber a ni bawk a, a pa khan nu tel loin a enkawl seilian tih theih a ni. A pa sumdawnna kha a dik tawk lo tih hre mah se; a hnualsuat ngam lo. Amah enkawla nu leh pa nih fâwm tu chuan sumdawnna tenawm ber pawh khawih se a ngainepin a hmusit thei ngai lo vang. Dr Jo ngeiin, "I pa chu a sumdawnpui tu emawin a hnunglam atangin silaiin a kaphlum a ni" tia a hrilh vang khan a pa thih danah mi dang an inrawlh a lo ring ngai lo. Mahse, a pa nupui, a u bialnu ni ta Teteii ngejjn a kap hlum tih a hre ta si. Dr Jo pawh a u te lamtang a ni tih a hriat atang khan a ngainat a tlahniam tawh a. A hmel pawh a hmu peih meuh lo. 

"U Rinmawi" Drose msg teh tawp chu! 

"Eih" tiin a reply nghal zat. 

"Min ngai em? " ve ngei chuan. 

"In khatah kan awm hi" Rinmawia chuan a ti a. 

"In khat pawh nise, in hnuai leh in chung a nia" a la rawn ti hram. A bialnu hian a kum a thansan tih zawng hai rual a ni lo. 

"Lo chhuk la" tiin a reply a. 

"I zak lo.. Naktukah maw.. Aw ti rawh" a rawn ti a. Rinmawia chuan khi suk chungin, "Aw" a ti a. 

"Kan bang hma dawn a, lo bang hma ve la, ih, bazar ang. " a rawn ti ta a. 

"Yes boss" tiin a reply. Smiley a rawn dah tuar.. A ho thei. 

Diteii chuan an pa dar hmehsak pah chuan, "Friday hi Duati birthday a nia. Au Lawma'n lawmsak leh a tum a. Hun i lo insiam thei ang chu tiraw? " a ti siam siam a. 

"Hotunu berin i tihte chuan" a lo ti a. A rum ţuah ţuah bawk. 

"Kan Lalduati pawh pasal nei rual a ni ve ta reng chu a nia. A pasal tura kan ngaih lah tikha an ni leh ta si a. Mipa tha deuh tawng se ka ti ngawt mai" Diteij chuan a ti leh a. 

"A tawng mai ang. A fel reuh em mai. " an pa chuan vei nei lem loh hmel deuh hian a lo ti a. 

"E taka, i lo chìk ve emaw.. Kan Drose leh Mamawia hi an inmelh dan a dik tlat lo ania" A rilrua a vei ruk a sawi ta nge nge a. An pa dar chu a hmehsak pah reng bawk. 

Dinfela chu a rum nghut.. "Maw..?! Eng nge a awmzia? An inhua i tihna mi? " a lo ti hú,! 

"Inhuat loh lutuk vang zawk mawle" Diteii chuan a ti sap. 

"Khai a! An lo inngaizawng i tihna mi? " tih pahin a mu zangthal nghal. A phâwk hrû bawk. 

"Ka la chiang ngam lo. Mahse, inzawmna eng emaw tak chu an nei tih ka chiang. An pahniha an awm dun hian kan Drose hi a chet buai viau loh paw'n a thinrim ziah" an nu chuan a ti ta a. Dinfela chu a chek leh hluk.. "A va zia lo ve aw. Mamawia pawh naute ngaihzawn reng reng. ". A ti nuah nuah a. 

Diteii chuan, "Nang pawn i nau i ngaihzawn tho kha" tih pahin awmze nei zetin a melh a. 

Za lo zeta nui chungin, "Aa.. Keini chu a dan a dang alawm" a lo ti a. 

"Mamawia ringawt kan dem thei lo vang. Bawihteii pawh a lo inhawng ve tihna a ni mai" Diteii chuan a ti a. 

"Ni ve tho mai. Class X em pawh a la pass si lo va, nangman titipui teh. Mamawia ka hnawl tihna lam ni loin, a kum a la nau deuh em mai" an pa chuan a ti a. Diteii pawh a bu nghat mai. 

Duati piancham a lo thleng ta. Diteij te chhungkua pawh phur em emin an inkhalh thla a, Lawma paw'n mi a sawm zau lem lo. Diteii te lam atang chuan Puia leh Mike-a te chhungkua bakah Bena a sawm tel ve a. Alice-i te chhungkua pawh an rawn tel thei. Duati thian pali nga an awm bawk. Zothana pawh a rawn kal ve ngei ang le.. 

"Au Duat, mi pakhat sang deuh a lo kal a, khaw nge a ti che" Drose chuan Duati room kawngka hawng chungin a ti lang lang a. Ani Duati a lo inchei ve mek lai a ni. 

"Aw ka lo kal" tih pahin mascara chu a inhnawih thuak thuak a. Darthlalanga inthlek leh zauhin room atang chuan a chhuak a. A rilruah mi pakhat a rawn lang. Zothansanga. A beisei ruk ang ngeiin a lo thu khur mai. Zami nen an lo titi mek. Nui sang chungin a va pan ve a, Zothana chuan gift a lo pe nghal zat. Aw thawp sutin, "Happy Birthday.. I nalh kher mai" a ti a. Duati'n lawmthu hrilhin a thiante leh a chhungte nen a inhmelhriattir ta nghal a. Diteii leh Zothana an inchibai lai chuan Zothana chuan, "I hming hi chuka hre ve alawm.. Ka hmu che chu ka lawm hle mai" a ti a. Diteii pawn a lo nuih sâng mai. 

"Û, eng nge i tih a? " Tetea rawn tawng thut chuan a tiphu chiang kher mai. Tetea hnungchhawn zawnga thut that pahin, "Engmah ka in en mai mai" a ti a. A che vel chu a laih hmel hle. Tetea lah nghal ta ngang a ni bawk a. 

"Ehee.. I inchei a ni maw.. " tih leh Drose hmaa va din a rual nghal. A û a hmuh rual chuan a ding tawp chawt. Makti zetin a û chu a melh ta reng a. 

"Û, Tuarpuii i ang tawp. Mampui, A û hi lo en ve teh. A mak tawp" a ti nghal lûng lûng a. Drose'in a hmui a lo hup. 

"Valalmalsawm, ngawi rawh. Ngawi hmak rawh. Ka vèl dawn che" a ti tân tân a. Tetea chu a tal aih aih. Mampuia leh Rinmawia an lo lut ve chiah. Drose chuan a hnungchhawn zel si. Rinmawia ngaihtha lo chuan a kuai her lawp a, an inhmachhawn ran mai. Drose hmel a'n hmu chu a meng phawk hrû mai. Chutah za lutukin a nui ta chiam mai. Drose awmngaihna hre lo chuan a kut tin a sik niap niap a. Tetea a tlan chhuak vat. 

"Nuuuu, a û hi a mak tawp" tiin a nu a la ko zui. Drose a ţap lek lek tawh. Mampuia, ze zawi awi na nâ na chuan, "Û, mawina i nalh tawp" a ti ta reuh a. Drose erawh chuan Rinmawia melh rum pahin, "I hria maw.. Ka nalh em chu.. Mampuia pawn nalh min ti" a ti vin ţhak. Rinmawia pawh a nui tawp tawh. Diteii leh Duati an rawn lut. A fanu hmel a hmu chu a chek hlak. Ni e, Duati make up ho a hmuh khan a inchei ve châk tlat pek a. Duati lahin make up a lo ngah phian si. Thiam mang hlei loin a duh duh chu a lo inhnwih ve chiam pek a! A hmel a mak em bawk a ni. 

"Khai.. Ka naute, inchei i chak te chuan min hrilh ta che" Duati'n a ti nghal bawrh bawrh a. A nuih za tho mah se; a nui duh lo. Diteii chuan a fanu melh chungin, "Va inphihfai rawh" a ti sap a. Thuawih takin bathroomah a lut nghal. Hunserh a la hun chiah lo bawk a, Diteii chuan, "Duati, tetea te hi zu chhukpui la, Mamawi, nang chu la awm teh aw" a ti a. Titipuina hun remchangah a ngai a ni mahna. Rinmawia chu a lai deuh, thil eng emaw a thleng a ni ang tih rinna a nei bawk. 

Drose a rawn chhuak a. A hmaj a hru hul mawlh mawlh. 

"Bawihte, tah hian lo thu la, Mamawi, nang pwwh" Khuma thu chungin a nuin a lo ti a. Drose pawh chuan a ngaihna a hriat loh hmel viau. 

"Aw le.. Thil eng emaw sawipui duh che u ka nei a. Ih, in pahnih hian in inngaina tih ka hria. Inngainatna bak thil dang a awm em? " Diteii chuan a ti ta a. Drose leh Rinmawia an inmelh zawk. An zak lutuk chu an kun nghal daih bawk. 

"Mamawi, nang mipa zawk i ni a. Thudik han sawi teh le" Diteii chuan a ti leh a. In hnuai lam thawm bak thawm dang a awm lo. Rinmawia chuan thawk lak hawk pahin, "Ka tihpalh a ni. Ka thiam loh vek a ni e" a ti zawi raih a. Diteii chuan a lo rin dan kha a dik a ni tih a hre thiam nghal. 

"Eng chena thui nge in kal tawh" a ti a. 

"Chutiangin inngaizawng ang pawn kan awm lo. Ih, amah khan kum 16 ka nih hunah kan inngaizawng dawn nia a ti tlat a. Ka nghak ve tawp" Rinmawia chuan a ti niah niah. Diteii nuih a za deuh. 

"Nia, nu, kan inngaizawng lo reng reng. Ka la naupang sia, bialpa neih ka duh lo alawm. Mahse kum 16 ka nih hunah chuan ka nei ve thei tawh ang" Drose chuan a nu pawh en chuang lo chuan a lo ti a. 

"Aw le, a tha alawm. Nitin in chhuak dun ziah a, thil thleng thei a ni a, ka hre thiam. Mahse, ni e, Drose hi a la naupang êm a, tunah rih chuan in inngaina a nih pawhin fel tak leh thianhhlim takin inkawm ula. Kum 2 bak nghah a ngaih tawh loh chu.. Mahse, Drose, ka sawi fo thin kha i la hria em? " tiin a fanu chu a melh a. 

"Um. Hria, bialpa neih pawn sex hmanpui loh tur. Inneih hnuah chauh" Drose chuan a lo ti nghal zat. 

"Mamawi, nang pawhin chu chu hria la aw. Tun lai khawvelah chuan sex hi mipa tan game a ni a, hmeichhe tan tlakna a ni. Mahse chutiang rilru chu i pu lo turah ka ngai. I pa Dinfela hi virgin in ka nei a, vannei a intihzia leh a hlimzia hi vawiin thlengin a sawi bang thei lo. Nang pawhin ka fanu hi i duh takzet a nih chuan, ka thuchah che hi i hre reng tur a ni". A ti ta dap dap a. Rinmawia pawh a lo bu nghut nghut, "Tiang lamah kha chuan ka ngaihtuahawm loh. Fawh pawh kan la infawp lo" a lo ti! 

"Mawina Nu, hman zanah ka biangah a fâwp". Drose chuan a lo ti. Diteii pawh a nui tawp. A fanu rilru thianghlimzia a hriat phah a, Mamawia pawh rinngam a ni tih a hai ta lo bawk. 

Duati Birthday chu a tu a pawn hlim leh tlai takin an hmang ta ti mai teh ang. Tluanga pawn gift a rawn thawn ve vang vang a. Duati pawn lawmthu a va hrilh ve ta tho. Zothana leh Tluanga a compare fó va, Danglamna tam tak an nei. A changin Tluanga a buk rih zawk chang a awm a, Zothana buk rih chang a awm bawk. A rilru a la siamfel thei chiah lo va. Zothana bula awm nuam a tih rualin ngaihngam lohna riau a nei fó! A chhan a hre si lo. A chanchin lah a hre tlem viau bawk si. Han zawh tawp a hreh ve deuh bawk nen, nakinah hriatchian a la tum ang chu.. 

Mike te chhungkua pawh an la hlim tlang ve zel a. Damdawi a ei tha bawk a, a thau mum kâng mai. Akimi pawh a sar vuah a, a rilru a hlim tih a hriat reng. An fate lah an lianin an hmel tha si, an fanu leh Drose pawh an inclose viau. Mahse, Kan Drose hi zawng kawm nel tak tak a har ve ang, a tui zawng leh a sawi duh zawng hi a danglam nasa si a. Puia fapa naupang zawk nen an inkawm thei phian. Ani pawh Drose nen an tuizawng a inang deuh a, mahse, Drose aiin a hre tlem daih zawk. Puia fapa upa zawkin a star lehnghal. Mahse, a mizia hrechiang se a star rei kher pawh a rinawm loh. 

"Hawh lem, ka bual ang che" Mala'n Teteii chu a pawm tho va. A rihna a tlahniam nasa a. A zâng kher mai. A taksa ruak kângah chuan sahbawn hnawihin a chul heuh heuh a. Teteii pawh a dam sawng sawng mai. Engtin nge he pa nen hian heti taka hmangaihna khura an tluk luh theih tih a ngaihtuah thiam bik lo. Mala aia a tana hlu chu a nu chiah a niawm e. A thawmhnaw a haktir laiin Zothana thawm an hria a. 

"Ka hmu khât hle mai" Teteii chuan a ti tham chhal a. An boruak engmah a hre ve lo. Mala hian a hrilh duh lo. A nat zual phah a hlau si a. 

"Ni e, a buai ve êm a nih hi" a lo ti mai a. 

"Zanriah te hi kan kilho ngai tawh si lo va. In khata chengho si hi" a lo ti leh. 

"Ani chu a ei chhuak deuh reng a, a lo haw tlai thei bawk si" Mala'n a tih mek laiin Zothana a rawn lut hlawl. 

A phone hmeh pahin, "Ka bialnu thar hi hmel tha in ti em? " tih pahin Duati thlalak fiah zet chu an hmaah a va hmet chhuak a. 

"Awiii a va'n hmel tha reuh ve. An deuh a nei" Teteii chuan a lo ti chul a. 

"Kei pawh vawiinah a nuteii ka hmu a, an inanzia ka hre ve chiah alawm" Zothana chuan a lo ti var a. 

"Awii tu nge a nuteii chu" Teteii'n a lo ti vat. A mitmeng chu engtin emaw a awm bawk. 

"Diteii a nia.. Tu nge a hming pum kha aw.. E.. Ih, Zodingpuii" Zothana chuan Teteii mita melh chungin a ti thawp sup a. Teteii erawh a lo meng phawk kher mai. Mala pawh a bang lo. 

"Diteii maw? " a ti ţhawt. Zothana a bu nghut. "I hre ngai em? " a ti zui. 

"Hre thin" a ti sap a. A melh ngai a melh vang vang ringawt. Mala chu a ding thut a, "Zoa, sawipui duh che ka nei tak asin. Sumdawnna lam.. Hawh inbe lawk ang" a ti a.A chhuak zui vut. Zothana pawh chuan a zui chhuak nghal. 

"Heng hi i ruahmanna vek tiraw? A dik em? " Mala awki chu a sang lek lek. 

A lo nui a, "A tirah chuan ni lo ve. Mahse, Duati hi tu nge a ni tih ka hriat chian hnuah chuan.. Aw ruahmanna ka siam zui ta a ni" Zothana chuan a lo ti hmiah. Mala a ner sawk. 

"Ti miah suh" a ti tuar. 

"Duati chu ka tina dawn reng reng lo. Ka hmangaihin ka hria. Ani pawn min hmangaih hun a la awm ang a, tichuan, A nuteii pakhat zawk hi ka la hmelhriattir ang. Dangdai takin" Duhthawh zetin Zothana chuan a ti ta a. 

"A nuteii pakhat zawk haw turin tiraw? " Mala'n a ti chang fak. 

"Maithei.. Chuan Anute Diteii thinlung pawh a hneh zui ang a.. " A nau chuan a lo ti a. 

"Tichuan, a chhungkuaa kir thei tawh lo turin saw hmeichhe rethei tak saw i siam ang a.. " Mala aw chu a khur deuh. 

"I hre thei hle mai" Zothana chuan ngeiawm zetin a lo ti. 

Mala chuan a kut a hum ruh a. Zothana melh chungin, "Tuna a tawrh pawh saw a na tawk tawh viau e. A duhthlanna a ni lo tih ka sawi tawh bawk. I che lui zel. dawn anih chuan, ka awm mai mai bik lo vang" A ti fiah kãk a. 

A nectie phelh thawlin, "I nupui nihtir vat vat la, rilru dam deuhin thihtir vat zawk la, a tan pawh a tha zawk" Zothana chuan a lo ti thung. Mala chu rum nghut chungin a chhuak ta daih. Zothana chu chair-ah a thu hnawk a. Duati a mitthla vang vang. "Khawvel hi chu a zìm teh e. Ka pa thattu thisen zawmpui ngei ka hmangaih chu a ni si a" a ti vawng vawng a. 

Zanriah an ei laiin, "Nu, Au Duati ang hian ka la hmel tha ve ang em? " Drose chuan a ti a. Bawrhsaiabe chhum chu a seh sawk sawk bawk. 

"I hmel that em kha" anuin a lo ti.

"Au Mamawia pawn, 'Khawvelah i u a hmel tha ber' a ti" Mampuia'n a lo ti ta mai. Drose chuan a kein Mampuia ke nia a hriat chu a va tlawh nghek a. 

"Aiiah.. Nu, A û hi min rawn tlawh vak ringawt," Tetea'n a lo ti a. Rinmawia zak lutuk a kham mek bawk. Diteii leh Dinfela an innuih tawp. Thiangi ta pek chuan, "Ka rin ang chiah.. Mamawia hian a starin ka hre rengah" a la tizui. 

"In hmel chhia.. " tih pahin Drose a kham ve hmak bawk. 

"Eh.. Eh.. A u leh au Mamawia hi an inngaizawng chiang" Tetea'n a rawn ti ta bawk nen. An boruak chu a danglam kher mai. Rinmawia a roomah a lut a, Drose in chungah a chho nal nal bawk. 

"An la innei maithei ni" Dinfela chuan a ti sup. 

Zorina chuan Drose school bang a lo chang ran mai. An ban hmasak zawk vanga lo nghak a ni. A msg a reply duh tawh ngai lo va, Schoolah nise a be lo mai pawh ni loin a hmu lo der zel si! Ani lahin tleirawl atchilh lai tih takah a duh telh telh mai si. Drose rawn phei hnak hnak a hmuh chuan phur zetin a lo vai a, "Ka lo nghak che a" a ti nghal zat. 

"Ti nge min lo nghah ve ngawt? " a lo ti a. 

"Ka hmu chak che a. Bakah ka thlah châk che" a ti a. 

"Thlah ka ngai lo. Ka u a rawn bang ţêp" a lo ti hul hak. 

"Ti nge i awmdan hi a mak tak em em a. Min be duh tawh bawk si lo" Vui awka deuh hian a ti a

"Biak reng i ngai mi? Thian pawh kan ni lo va" Drose chuan a lo ti leh. 

Zorina a chek hlak, "Min duh ve maw ka tia" a ti lawi rût a. 

"Bialpa ka nei duh lo" a lo ti tawi tâk. 

Rinmawia a rawn thleng ve chiah, "Nih phawt aw.. " tih leh Drose chuan bike-a chuan a rual nghal. Zorina chuan, "Û pawh i neih loh khaa.. I bialpa ni maw? " a ti vak a. 

"Ka û lem lem a nia.. " Drose chuan a ti a, Rinmawia hriat phak lek hian, "Bialpa ang deuh reuh pawh a ni" a ti zui sap. Rinmawia bengah a ring viau. An in thlen dawnah Drose chuan, "Zorina kha thìk ve ta che. Ti nge i thik loh? " a ti bul hmuk a.

"Thik chi mi? " a lo ti let hû! 

"I mawl ve sia, min ngaizawngtu a nia, thîk ve tawh rawh. Zei lo lutuk mai" a lo ti hlak hlak. Rinmawia za lutukin a nui huk. Drose lah a tum bâr si. An inthlem rei êm lo vang chu.. 

"Paa, kei chu hawn mai ka duh tawh êm mai. Ka dam phah pawn ka hre lo" Pi Zawmi chuan muthmunah a ti sar sar a. 

"Doctor berin hawn a la phal si lo va. Hawn ringawt kha kal leh a ngaih khan a buaithlak alawm" Zaidawh deuhin Pu Vanlala'n a lo ti a. 

"Aa.. Naupangho ka ngai tawh alawm. Nang pawh i tha tawh tho si a.. Dil mai teh" a ti leh a. 

"Naupangho aia ngaihpawimawh i nei zawk a ni lo maw? " an pa chuan a ti ta a. Pi Zawmi chuan insiam rem pahin, "Ti hian ti ziah suh. Min rinhlelh hi bansan ve tawh teh. A ni em em lo lutuk" a ti hlak hlak a. 

"Rinhlelhawm lo hi chu kan ringhlel khat asin. Nui, sawi zawk teh. Engkim.. Thil pawi tawpkhawk pawh nise nupa kan ni a, inhriatthiam theih loh thu a awm hleinem" nem takin a lo ti a. Pi zzawmi a inngaihtuah buai hle. 

Hrilh mai a duh rum rum. Mahse, Nunui chungchang kha sawi tel ngai ta se emaw nakinah hrechhuak leh ta si se.. An pa chu a hlau a ni. A zep hlen theih a rin loh, mahse, a sawi chhuah ngam si loh vanga a nun retheihzia hi hria se a ngaidam vek duhin a ring hial. A huaisennain a tlin ngang si lo. 

"Chutianga sawi tur ka neih awm ka hre lo.. Muhil ang" a ti hmak a. Light a off zui hmiah. Pu Vanlala chuan a rilru tete in, "Han sawi mai la aw.. Ka nupui i nih angin ngaihdam mai che ka hreh loh nen" a ti a. Lehlam inhawisan ve. Vein an ngaihtuahna inang lo tak khawvelah chuan an cheng dun ta melh melh a. 

"Bena..Tun mai khan Enkawli a accident a.. " Enkawli Pa aw a hriat rual chuan a zuang tho nghal zawk. A khur ru der der bawk, "Maw.. Engtin " a ti nghal vak a. 

Enkawli pa chuan rilru hah hmel zetin, "Tunah chuan Doctor ten an bawihsawm mêk.. Hello.. Hello" tiin Enkawli pa chu a au vak vak a. Signal a chiang tlat lo. Bena chu a inthlak. sawk sawk. Zan dar 9 a ri ţêp. A û te nupa bulah, "Kolasib-ah ka chhuk dawn. Enkawli a dam lo" tih leh chhuah a rual nghal. A ù te pawh an hrilhhai hmel hle. Bike in a kal a, a tlan chak kher mai. Mahse, kawng a chhe si, Dar 9:05 velah a tlan chhuak a, kawng chhiat luatah dar 12 rik hma hlekin a thleng. A tlan chak dan leh a hmanhmawh ngaihtuah chuan thleng har a inti kher mai. Hospitalah a lut nghal rawp. An lo pungkhawm deuh liai a. Eni pa a va hmuh chuan, "Eni chu eng nge tunah a dinhmun" a va ti chawt. Ngui zetin a rawn melh a, "A thaw chauh kan en a ni ber mai. Aizawla in phurh chhoh pawh kan ngam ta lo" beidawng zetin a ti a. Bena a ţêk chhawk. Eni chu ICU-ah an dah lut tawh a. Darthlalang phên atangin a va thlir, awmngaihna a hre lo. Doctor lo chhuak bulah chuan, "Doctor, khawngaihtakin a kut saw min vawntir rawh. Pathian hmingin ka ngen a che" a ti tawp. Doctor chuan a melh vang vang a, a khawngaih ve ngang aniang. "Umm va lut rawh. Intipachang hram hram rawh aw" a ti a. Bena mittui a hnâm sawk. 

Enkawli kut vawt thler chu a hum a. A lu chu an tuam var lûk a. A nghawng chu an cher khawng tlat bawk. Engtia chesual nge a nih tih lam a ngaihtuah lo, a ngaihtuah hman lo a ni zawk. A duh ber leh a hriat duh chu Enkawli chu a dam leh tur a ni tih chauh a ni. 

"Eni, i thi dawn lo ania. I thi thei lo.. " a ti mawlh mawlh a. Pawn atangin Eni nuin tap chungin a lo thlir bawk. 

Enkawli hla zir zo, scooty-a a haw kha truck lo tlan nen kawng zim laiah an insu a lo ni. A leng lawp a, kawng thlangah a tla thla nghal rawp rawp. A scooty phei chu Truck chuan a chil zui a, a chhe hneh viau. Enkawli chu a tlakna kha a lo awih bawk nen, a lumna lamah a insawh nasa a, a thlang kawrte kama lungpui lian lutuk lo ah a lu a zu sawh zui bawk nen. An zu chhar lai pawn engmah a hre tawh lo. A thi tawh emaw an ti hman hial a! Mahse, a mar a rawn phu leh det det a. Hmanhmawh takin Damdawiinah an chhohpui ta nghal a ni. Truck driver lah a rui miah lo va, mizo a lo ni bawk nen. A mangang takzet a ni. 

Zan khuain Bena chuan a thutpui a. Eni chu a harh eih lo. Thawk erawh a la thaw ve hram hram e. A tuk zing dar 8 velah Diteii te nupa an rawn lang ve ta bawk. Eni chhungte leh Bena te hamhaih atalângin chanchin an lo hrilh lawk lo va. Hre hma se chuan a zan azanin an rawn kal ve ngei ang. Diteii chuan Bena chu a hnem mawlh mawlh reng a. Eni chuan engmah a hre lo, kal pawh nise a thlarau a chawl hahdam dawn. Bena zawk chu a ngaihtuahawm em em a ni. Amahin a phun mawlh mawlh reng a. A normal hlawl lo a ni ber e. 

Hetih mek lai hian Teteii pawh mutthilhna damdawiin an jection ve mek a. A mutthilh mai loh chuan a ngaihtuahna khawvel a chhuahsan thei si lo. Chu chuan a phur a tirit lutuk a, mi â ang maiin a khawsak phah a. Mala te tan pawh enkawl a buaithlak em a ni. Zothana'n a û Mami fanu Duati thlalak a hmuhtir atang khan a buai zual a. Khati taka Duati hmel tha ta khan a lung a tilengin, a chhungkua a ngai ngawih ngawih a ni ber e. 

"Zothan, Duati kha lo hruai rawh aw.. Ka lo chibai ve ang e" mutchhuah hmel zetin Mala chu a melh a. Zothana emaw a ti a ni ngei ang. 

Mala chuan rilru nat hmel takin, "Tehreng mai. Ka rawn hruai ngei ngei ang" a lo ti a. Teteii chu a muhil nghal riai riai. 

Mala a chhuak a, Zothana chhuak tur chu au zuiin, "Khawngaihin Duati rawn hruai ta che. " a ti dam thlup. 

"Teteii vangin maw" a lo ti a. 

"A hun tawpah tal chuan a laina tu emaw ber kut a vuan ve thei lo vang maw? " a lo ti daih. Zothana chu a ngawi vung vung a. A hnuah, "Ka lo tum ang" a ti sup a. A chhuak zui nghal. 

"Mal, nangmah ngei hian Teteii chhungte hi be pawp la a tha lo maw? A nunna saw kan chelh zo lo mai ang tih a hlauhawm. A rilru sawn a taksa a hruai khaw lo zo dawn" Jo chuan uluk zetin a ti a

Mala chuan darthlalanga a hmel lo lang chu melh chungin, "Ni e, keimah ngeiin engvangin nge ka va hmuh mai loh ang? Ka hmangaih nunna chhan nan chuan engpawh ka ti ang" a ti ta a. 

(A la tawp hleithei lo. Ning viau mah ula 🤐😏