Drose 20

D'ROSE… (chapter - 20)

Ziaktu : Toni Râlte

"Ani sawn ka pa a that a. Tisawn i enkawl a maw? Eng nge thleng a?! " Zothansanga chuan a û Malsawmtluanga bulah a ti lawng lawng. Mala chu chairah a thu hnawk a, thawk a la vang vang phawt. A hahdam hmel deuh hnuah, "Ani saw ka hmangaih a ni" a ti ta a. Zothana a lo ner sawk. 

"I hmangaih emaw hmangaih lo emaw ka pawisa lo ve, ka pa a thah vanga hremna chu ka pe dawn khawp mai" a ti chang fak a. A kut a hum ruh bawk. 

"I ti lo vang. I ti miah lo vang" a û chuan a lo ti zawi raih. 

"Ka ti mawlh ang, eng nge ka tihtheih chu i hre dawn e" tiin cho hmel zetin a û a melh. 

"Unau kan ni tih theihnghilh a ngai dawn anih chu" Mala aw chu a thûk kher mai., Zothana chuan a chal a dawm a, "Hmeichhe lepchiah leh ka pa tar tawh tak hmei kha i hum a maw? Nge nang pawh hi ka pa thihnaah khan i lo inhnamhnawih ve zawk? " a ti a, a awki a sang hret bawk. Mala a rawn ding zawk, A nau chu a beng ta a. Zothana chu zawi muangin a rawn hawi chhuak leh, kut thawh erawh a tum hmel lem loh. 

"Ka nau, ka tihpalh. Mahse, khatiang thu kha sawi tawh ngai suh ang che. Saw hmeichhia saw hmeichhe lepchiah a ni lo. Tin, ka pa thihnaah tel vena ka nei lo. Teteii thah a ni lo, a thunun hneh loh amah chenchilhtu thah a ni zawk" a ti ta a. 

Zothana a lo nui lui sak. "A va tha ve aw.. Hehe, chuan, saw nu saw pawisawi lo a lo ni reng anih chu.. A lawmawm hle mai" ngeiawm zetin a ti a. Room kawngka lam a pan nghal bawk. 

"Ngawi lawk Zothan" a û in a rawn tih chuan a ding chawt a. 

"I tina a nih vaih chuan i û hian engpawh ka ti dawn tih hre reng ang che" a ti vawt ta raih a. Zothana chu a nui leh sak. 

"Zothansanga pawh i lo hriat tawh ţhin kha" a ti ve hmak. A chhuak zui nghal. 

Mala chu hah hmel zetin chairah chuan a thu leh a. Hun kal tawh a mitthlaah a rawn lang zut zut. Ni e, apa in haw turin a chah haw a. Mizoram leilung a rawn rah ni kha a nuna thil pawimawh ber thlenna ni tur a ni tih a hre bik lo. Ral khat atangin a pa nupui neih thu a hre ve a. A nu kha a boral hma êm a, nu tel lo va puitling taka chher chhuaktu a pa chu a zah em em. Nupui a lo nei anih pawhin pawi tihna a nei lo. Chutihrualin a neih rosum îta nei ringawt a ni ang tih a hlau ve tho. A pain driver a rawn tir thlap a. An in pui lam panin Lengpui Airport atangin an tlan ta vang vang mai. In a thleng a, a pa chuan a lo lawm hle mai. A hmuh tum aiin a pa chu a lo la lang tar lo va, a hrisel hmelin a thothang a that hmel viau. A rilru te tein, "A nupui chuan a enkawl tha viau a ni ngei ang" tiin a ngaihtuah a nih nghe nghe kha. A pa chuan an nu chu koin, "Ka fapa chu a lo thleng e" tiin. An room kawngka chu rawn inhawngin, awmhmun kawr nen a pa nupui chu a rawn chhuak ta a. Malsawmtluanga chuan a phone ken lai chu a thlauh lo chauh! Chu hmeichhe hmel a hmuh ruala ţêk chhawk chu eng nge a nih a hre lo. Mipa kha a pa leh a nupui hmaah chuan a khur hial anih kha. An inchibai a, a taksa a va deh ringawt pawha a danglamzia kha. Tun thleng hian a la feel thei. 

Nui sângin a lo dawngsawng a. Mizo hmeichhe zingah a hmel tha ber leh nalh ber a ni kher lo vang, mahse, Mala mit leh thinlungah a danglam lawtlak si! Mahse, a pa nupui a ni tlat! 

Kar khat chhung deuhthaw chu a hmu zui lo. A chhan chu a pehhel zel vang a ni. A hmuh chuan a khawih duh mai dawn si a. A pa rilru tihnat a duh lo. Kar hnih a awm tawh tihin zan khat chu a pa chu sumdawnna thilah a zin chhuah thut a ngai a. An nu a hruai lo thung. Mala erawh chaw a ei chhuak a, a pa a zin tih a hre lo. Dar 9 velah a haw a.. A intifai mawlh mawlh. A rooma a va luh leh chuan a ding chawt. A khumah chuan a pa nupui Teteii chu mut kawr nen a lo thu ran mai. 

"Eng nge ni ta? " a ti lawi rût a. 

"Min hua em ni? I pa nupui ka ni hi i lawm lo em ni? Ti nge min pumpelh zel mai a? " a lo ti hmawk hmawk a. 

Mala chu a lai deuh. "Haw lo" a ti nghut a. A bak sawi tur a haihchham. 

"Anih chuan min koh i hreh viau em ni? Ka nu han ti teh" tih pahin a rawn ding a, a bul chetah an hmai a inhnaih kher mai. 

"Ka.. Ka thei lo" Mala chuan a ti tham ţuak a. Kal sawn tuma a pen chiah chu a banah a pawt ta tlat! "I thei lo. Ni e, kei pawhin ka pasal fapa i ni tih hi theihnghilh ka duh fô! " a ti ta sap a. Mala lungphu chu rang tak a ni. A thaw tha thei lo hial. 

A thlah a, "A pawi khawp mai. Hun dik loah kan cheng a ni" tih pahin room kawngka a hawng a. Mala a che nghal zawk. A va ban a, a pawt let lawp. Hnai taka inmelhin mitmeng thûk lutukin an inmelh dun ta vawng vawng a. Thil chu a thleng zui ta mai a nih kha. A tukah inthiam lohna nasa tak nei mah se; zan a lo nih leh meuh chuan, room leh khum an inţawm leh ta zel mai. Inthup viau mah se; pa a zawnga pa fing ber a pa chuan a hre chhuak ta nge nge a. Mahse, thinrim hmel engmah a lantir hauh lo. Chu tak chu Mala ngaih titha lo tu a ni. A pa sumdawnna a hria a, a nunrawnzia leh a kawng daltu te a dah that fo dan a hre ve. A vaiin a la hre lo zui! A hlau a ni. A tan ni lo vin Teteii tan chuan a hlau! Tlanbo dawn se a rawn zawng hmu rang dawn lutuk. Kawng pakhat chiah an nei. Mhase, chu chu a ti thei lo. A ti ngai lo vang. 

"Mala.. Mal' Jo aw chu a ring viau. A phu zawk nghe nghe. 

"I va ngaihtuah mûk awm ve.. Teteii chu a muhil aw. Phei ka tum a, zanin chu ka chawl ang. " Jo chuan a ti zung zung a. 

Mala chu a ding a, "Jo, hman atanga tun thlengin kan chhungkaw tan hian i hlu thin. Aw le, zanin chu keiman ka lo buaipui ang. Va chawl hahdam rawh" a ti a. Jo chu a chhuak zui nghal. Mala pawh hnathawk te a ban tak vek avangin ei tur siam turin choka lam a pan ta nghal a. 

Dinfela te pawh tluang takin Vellore an thleng thla a. A hmaa an lo kal fô tawh vangin an thlenna thin ah an thleng leh a. Pi Zawmi erawh a ngui ruai mai. A rilru chu Mizoramah bak a awm thei mawlh lo. A lo dam ang em? A danglam leh ang em tih chauh bak vei dang a nei thei meuh lo. An nu awm dan chu Pu Vanlala pawn a hai hlek lo va. Han kawm hlim vel pawh a tum lem lo. An nu chu a haw lek lek tawh zawk. Hei chen an lo cheng dun tawh a, rinhlelhawma a awm fô chu a ngaihdan a ni vak tawh lo. Tar alama inthen chu thil tih chiah a ngai chiah si lo va. Dinfela bulah erawh eng mah a sawi duh rih lem lo. 

"Vawiin hi eng ni nge i hria em? " Zothana msg chu Duati chuan hre thiam vak loin a chhiar a. "Friday a ni lo mi? " tiin a reply. 

"Friday a ni satliah lo. Ka birthday a nia" a rawn ti a. Duati chu a khi sak, "Happy Birthday.. " tiin a wish nghal var a. 

"Wish ringawt chu a tawk lo. Zanriah min kilpui hman ang em? " a rawn ti a. 

A nu a hrilh vat. Zothana chu a ngainatawm em vangin leh mipa tha tak nia a hriat vangin a nu pawh chuan a lo remti ve mai. A pa erawh a awm lo va. 

"A pawi hleinem" tijn a va chhang ta a. 

"Okay, dar 5-ah ka rawn lam ang che" a rawn ti a. Duati pawh chaw eia chhuah a nei khât ta bawk a. A phur ve hle. A chungah Zothana chu a tha em a, eng emaw tal leisak ve ngei pawh a tum. 

A inchhawp hnawk leh rum a. A kekawr a thlep chhing sauh sauh a, motor hnuaiah a lut leh ta kût kût mai. Mechanic tam takin an siam that hleitheih loh, paih mai aia workshop-a hralh mai tura a puin a dah mai mai chu ani tehlul chuan a siam tha thei dawn em mawni le.. Mahse, rin aiin part hming leh a zeizia chu a hre viau lawi si. A nu pawn a hau duh tawh lem lo. Kar hmasa khan a naute room-a mini fridge kha a siam tha ve hmiah bawk a. Mampuia cycle phei chu zing karah a siam thatsak vek. Rinmawia chuan in a tangin thlir reng a, "Ka nghak upa dawn che chu a ni sia. Min patil san daih chuan aw" a ti rilru char char. A bialnu tur tuizawng chu tuipui harsa a tihzawng tak a ni. Mahse, a sawisel hreh ve bawk si. Diteii'n, "Thingpui va in rawh" tiin a ko lang lang a. 

Motor hnuai atangin, "Lawk, ka laklawh. " a rawn ti lauh lauh. 

A hnu feah a rawn chhuak a, a bal viau. Rinmawia nen dawhkan kilin thingpui chu an in dun a. 

"Sundayah leng ve ila" Rinmawia chuan zawi supin a ti a. 

"Khawiah.. Hmannia min kalpuina kha chu ka peih tawh lo" a lo ti a. 

"E tih dan ka hria. Aizawl hi fang ila" Rinmawia'n a ti thut! 

"Inngaizawng lo angin aw" Drose chuan a ti hram. Eng rilru tak pu ang maw.. A remtihpui ngawt mai loh chuan. A bialpa deuh reuh tan hi chuan a hahthlak lam a ni ve thin ta ve ang. 

Bena pawh registration te a tifel thawkhat ta a. A service tan ve dawn ta. Diteii nen an inbe fô a, Diteii chuan a hnena thawk turin a sawm ngei a, mahse, Châk chung chungin a hnar ve hram e. Thiante puihna ringawta damkhawchhuah pawh chu a inthlahrung ve tawh aniang e. A sevice ni hmasa berah chuan Rs 300 a hlawh ve a. Tlem a ti teng tawng viau naa a lawm tho mai. A ti chho ve zel ang chu.. Enkawli nen pawh an boruak a la tha ve zel e. An innei har lutuk tawhin a rinawm loh. Han inkhawl ve phawt se la.. 

"I nalh hle mai" Zothana chuan chiang taka melh chungin a lo ti a. Duati a lai deuh. A nui sak a. Zothana car-ah chuan thu lutin an zanriah eina tur lam pan chuan an tlan chhuak zui ta nghal a. 

Dawhkan an kil tawh hnuah, "Happy Birthday" tiin gift a pe nghal a. Zothana chuan naupangchhia takin a lo hawng nghal. Nectie smart zet, rawng pawl duk, changkang zet a lo ni. "Ka duhzawng i hre hle mai" tiin lawmthu a hrilh a. 

"I sawi har lutuk a, ka inlei hman lo alawm.. Lehpekah chuan kha aia tha kha aw" Duati chuan a lo ti a. 

"Ka bula zanriah i ei hi thilpek hlu ber a ni tawh hrim hrim" a lo ti thung. 

An eitur order a lo thleng a. Ei pah chuan Zothana sumdawnna lam an sawi dun a. Fiamthu titakin Duati chu thawk turin a sawm leh. 

"Ka thawh châk tak a ni. Ka duh maithei a ni" a lo ti a. 

"I duh ngei ka beisei a ni. I mizia hian a rem sa thlap" a lo ti ve a. Zothana chuan Duati thlenga kaikuang chu lain, a kheh mual mual a. Khehsa thlapin Duati hmaah a chhawpsak leh. Duati chuan Tluanga a hre chhuak zawk. Vawikhat a pangchang ve deuhin sangha an hmeh dun tumin, "A ruh si" tiin a ruh paihfai turin a nawr fiam a. 

"Over em mai a" tiin a lo chhang hmuk a nih kha. Zothana nen an danglam leh ta. 

An eikhamah Wine an lem dun ve a. Duati vawi khat inna a ni. Tui a ti viau. Ruih erawh a hlauh vangin a in tam duh lo. Chutia hlim taka an titi siam siam lai chuan, "Wow! Kan Duati chu! A va hlim ve aw" Tluanga aw hian a rawn ti ta mai a. An hawi rual ţhawt. Ruih hmel fe hian an hma zawnah chuan a lo ding bu lâk lâk a. 

An chhang lo. Tluanga zawk chu a rawn phei chhat chhat a. A nectie te chu a tla pur a, a lu lah a thur bâm bawk. A tlakchhiat hmel kher mai. A mu tlem tih hriat takin a mit lah chu a val kulh bawk. 

"Hei hi maw ka aiawhtu chu" tih pahin Zothana a kawk a, Duati a melh thung. 

"U Tluang, buain kan duh lo". Duati'n a lo ti fak. 

"Huh.. Buaina chu a thleng der tawh alawm. Ani hi eng nge kei aia a thatna.. Hetiang tlangval vak rawlai, pate thawhchhuaha chapo satliah nei tur chuan i hlu mah mah e ka duat.. Hawh, thil sawi lawk teh ang" tih pahin Duati kut chu a la ngawt a! Duati chet hmain Zothana kut a rawn lawr zawk. Tluanga banah vuanin, "Ţhianpa, duhtawk teh.. " a ti nghut. 

"Ve a.. Ani hi ka nula a nih hi aw" Tluanga chuan sehchilh deuh hian a lo ti a. 

Duati a tho, "U Tluang, i nula ka ni awzawng lo ve. I bialnu hlui erawh ka ni. Nang hian ka nula tia sawi theih turin ka chungah eng thil mah i la ti lo ve" a ti chang rât mai. Awm ve dangten an rawn thlek ha ha hlawm si. Zothana chuan Duati kaiin, "Ennawm ni tur khawpin pawi i sawi lo ve. Kal ang" a ti a. Duati pawh a kal ve mai. Tluanga chuan Zothana chu a hnunglam atangin a tukhum chu a va beng zui kher a. Mipa inti ve tan chuan paidam harsa ber pawl a ni tlat! Muangchangin a lehhawi a, "Tharum thawh ve tlak pawh i nih lo tehlul nen, buaina chu i va cho ve mawle.. Pawnah sawn sawifel ang hmiang" a ti dam thlup. Duati zak leh thinrim a sen ap ap tawh. Ngeiawm zeta nui chungin, "Duati hian min hmangaih ber tih hi lo hre ve mai mai teh aw" Tluamga chuan a ti a. 

Zothana chuan nui chung ve thoin, "A lo ni thin a ni maithei. Mahse, tunah chuan ka ta liau liau a ni tawh e. Ani hi hmuh emaw biak emaw tum buai tawh suh. Ka nupui hual a nih hi" a ti ta a. Duati awmngaihna hre lo chu a khawngaihthlak hle mai. Zothana'n a rawn kai a. Hotel chu an chhuahsan ta. Manager a rawn lang zui ve zat. Tluanga chu an theh chhuah ngei a rinawm. 

"I tha em? " Zothana chuan hmalam bih chungin a ti sup a. 

"Ka thain ka hria" a lo ti ringawt. A zak êm a ni. Zothana hian a hmusit ngawt ang. Khatiang mihring che thing lutuk kha a bialpa hlui a ni tih a hre tawh si a. 

"A rilru a buai em a nih kha. Harsatna lian tak a nei a nih hmel" Zothana chuan a ti a. 

"Sawi tawh lo vang" a lo ti hmak. A maimichhing a, "Engtin nge khatiang mipa cheap lutuk kha ka lo hmangaih theih" tiin a inngaibtuah. An in an thleng a. 

"I mood a chhe em mai. Ka lo lut ve tawh lo mai ang. Mahse.. Hei hi hria la ka duh. Zanin atang chuan ka bialnu i ni tawh tih hi" Zothana chuan a ti hmiah mai. Duati a lo hamhaih thung. 

Ngawi rengin a chhuk a. Lehhawi miah loin inah a lut. Zothana chuan a thlir liam a. Ina a luh fel hnuah chak zetin in lam panin a tlan chhuak ve nghal a. 

"Mal, ti nge min thihtir mai loh? " Teteii chuan a ti sap a. A mittui a tling piau bawk. A hmel dawldang zet leh a heh ro zet te chuan a dam lo tih chu a pho chiang viau. A kut zawi nen humsak chungin, "I thih daih ten engtin nge ka awm ang? " Mala chuan a ti a. 

"Nangmah i inkhawngaih vang ringawtin min hrem reng lo la. Dam reng tlak ka ni ve lo alawm" khawngaihthlala zetin a lo ti leh. 

"I â lutuk, tumah hi thi tlak kan awm hleinem… i dam tep alawm. Tunah phei chuan i taksa chiah hi enkawl a ngai tawhin ka hria" a lo ti leh thluam a. 

"Mi â chu nangmah. I pa thattu min la enkawlin engkim min la tihsak ania. That chhuah vak hi a ngai lo asin" Teteii chuan a ti tham chhal a. 

"Sawi tawh suh. Khawngaihin.. " Mala'n a lo ti vat. Teteii biang dai dakah chuan a fawp zauh a. Ngawi rengin chunglam melhin an mu a. An ngaihtuahna erawh a inang tehchiam lo. Teteii chuan a chhungkaw hlui ngaihtuahin an lo la pawm thei ang em tih bak a ngaihtuah hlei thei meuh lo. 

Mala erawh chuan a pa thi turin a rawn melh ţâwk ţâwk hmel kha a lo mitthla daih. Ni e, a pa khan engkim a hre ta si a. An ni lah sim a hnèkin an inthlakhlelhna chu a pung deuh deuh si a. A pa chu zin chhuak tura insiamin Teteii pawn a insiampui a. Khawiah nge a zin dawn erawh a sawi hauh lo. An pafa chu an inbe ngai meuh lo. Mala phei chuan hmuh loh hram dan a zawng thin. A pa chu a zah ngawih ngawih a, mahse, Teteii avangin a zah zo ngang thin si lo. 

A pa zin chhuah zanah Teteii'n a room a rawn ţawm leh nghal zat. Nuihna leh duhthusam nen hun an hmang dun a. Engkim an sawi dun thin. Hmabak nei lo chung chungin suangtuahna an nei a, duhthu lah an sam nuam hrep… chutia enghelh leh dipdaltu nei miah lo va hun an hman dun lai chuan, Room pawn lam atangin a pa aw ngeiin, "Tete, lo chhuak lawk teh a" a rawn ti ta mai a! An va phu chiang tak em. Hlauthawng zetin Teteii a va chhuak a. Hnathawkho erawh in hnuaiah an mu a. A reh hle. 

An nupa roomah lut dunin an reh vang vang mai. Mahse, hai rual lohin an inhau tih chu Teteii awki san dan atangin a hriat theih. Mala chuan awmngaihna hre loin a lo nghak ve tawp. Amah a inhua a, a inten hluah hluah bawk. A pa chu ngaihdam dila Mizoram chhuahsan leh mai tur em mawni aw a tih ruk mek laiin a pa chu a rawn lut ta hlawl mai. 

"Ka fapa, min ngaidam ang che. I pa hian zak taka thih ka duh lo a ni" tih leh a chal dara silaia rawn tin a rual ta a. Mala chu a hamhaih luatah hlauh nachang pawh a lo hre lo. A pa chuan harsa tih hmel zetin khur chungin silai cheng chu a hmet ta a. Mahse, a ri dûp. A pa chuan ceiling a han kap ta daih anih kha. Mala hmaah chuan a bawkkhup zawngin a tlu ta a. A pa hnungah chuan Teteii ngei mai chuan khur dawt dawt chungin silai a lo keng a. A pa a tluk hnuah silai chu thlauhin a hmai hup chungin room a chhuahsan ta kha a nia.. Mala hrilhhai zia leh chet lak dan tur a haihchhamzia kha. A hmangaih em em chuan amah vangin a pa a that ta tlat si a! A nunna a rawn chhanhimsak a. Mahse, a pa nunna lakin a awm thung si. Thil thleng theia a rin ngai loh, thawnthu leh film-ah chauh awm tura a lo ngaih thin chu an chungah a thleng ve tlat si! 

"Mal, i muhil elo? " Teteii kut vawt thler chuan a hmai a rawn khawih a. A ngaihtuahna ram atangin a harh nghal zawk. 

"Chhing sek" a ti ve mai a. 

"Zothana a lo haw aniang. A birthday a nih kha.. Va wish ve ta che" a lo ti a. Mala chu a tho a. 

"Lo mu hahdam rawh. Ei tur ka rawn la ang" tih pahin Teteii chalah a fawp zauh a. A chhuahsan ta a. 

"Hei hi khawi veng nge" Drose chuan a ti hû hû a. 

"Aizawl khua zawk pawn i hriat loh chuan ka hre bik lo. Dawr hmingho kha chhiar la, a inziak ve thin" Rinmawia chuan a lo ti a. 

"Eee.. Chawnpui a nih hi.. Kan bo ange aw. Kei chu haw dan ka hre tawh miah lo" Drose chuan a lo ti. Rinmawia pawh a buai deuh tawh. An tlan kual vak sia. Hawn kawng ber a hre tawh lo. 

Waiting shed lo awm hmasa berah bulah chuan dingin an thu chawl ve a. Drose chuan wai wai leh lays chawhpawlhin a siam mek. Ni a sa ve deuh bawk si, a tai hlar mai. 

"Kha ei ang" tiin a rawn dah hnai a. 

"Kum 16 tlin hnu khera inngaihzawn kha a ho ka ti e.. Kei chu" Rinmawia chuan a ti a. A thil siam thial niap niap pahin, "Nih kum 15" tih pahin a kut zungtang panga chu a pharh a. Rinmawia nuih a za. 

"Ti pawn inngaizawng ang kan ni tho sia ka tia" a ti a. 

"Ka sawi awmzia kha chu maw.. Ih, infawh vel te kha chu kum ka tlin hma chuan ka duh lo va" a lo ti niah niah. Tlawn titihin a nuih bawk. 

"Bialnu te pawh fawh theih loh chu a" titau awki hian a lo ti ve si. Drose chu a ngui nghal rawih. 

"Infawp kher lo in a inngaihzawn theih loh mi? " a ti hû! Rinmawia a nui hawk hawk. 

"Mawli, a theih loh tu nge ti? A nuam ve a. Infawh kha. Huiham.. I bulah ka awm tam lutuk a. Ka mawl ve vek tawh" a ti a. Drose samah a tuai pah bawk. 

An ei zo a. Haw tawh mai an tum. Mahse, khawi lamah nge tlan tur an hre si lo. Veivak lah an awm thei hlek lo lehnghal. 

"Anu call mai ang" Drose chuan a ti a. Rinmawia lahin Diteii a ngaih that loh a hlau ve si. Mi kawngkal an nghak tawp. An vanneih asiamin zu rui pahnih an rawn inzui phei mial a. Hlau chung chungin an lo zawt a. Zaizir nen an han inhrilh ta a. Rinmawia chuan a hrethiam mai. Lawmthu te an sawi hnuah an inkhalh chhuak leh ta a. 

"Mawl min ti ngawt ang" Drose chuan a ti sar sar a. 

"Kan mawl alawm" a lo ti hmuk. A tukhum a chhiatkhum leh hrep kha.. Rinmawia lahin a hmu thei si lo. 

 

"Bena, min tlawmngaihsak hram a ngai dawn a ni" An thenawm nuthlawiin a rawn ti lut a. Ani chawhnu inkhawm bang thlak pawh a la inthlak lo. 

"Eng nge ni ta? " a lo ti vat. 

"Ka bungraw chah kha Thenzawlah an lo phur tlang daih a, ka hmingpui kutah an lo dah ringawt a. Keimah emaw tiin. Naktukah ka hmingpui nu chu a zin chhuak dawn sia, mi dang kuta dah ka duh vak si lo. A tam tam ve deuh bawk nen, a bo ka hlau ve bawk sia.. Pawisa chu i tih ang ang a ni mai. Min va lakpui hram mai teh" a ti a. A ngenngawl angreng si. Thenzawl kal nan chuan a tlai lam tawh chu a ni. Bena chuan hnial a hreh viau naa, "Naktukah sumo velah a thawn theih loh mi? " a ti a. 

"Thenzawl sumo driver ho an nuar a, an tlan dawn lo. Chu tak chu lawm kan buaina. Min pui mai teh. Bungraw chah ho lahin min rawn be sek tawh si" a ti leh a. Maliani hian online shopping ti vein direct-in an rawn thawn mai zel a. A hlawk ve phian bawk. 

Bena chuan a û te a rawn a, inthenawm an ni si. Tlawmngaih mai chu a ngaih hmel. Inthenawm e ti lo hian an inlenpawh tehchiam lo va, Maliani phei chu inah a awm tam bik lo va, an in hmuh changa inbiak zauh bak a hrana han inkawm an nei lem lo. Bena chu a insiam ta nge nge a. A phur tehchiam lo hle. 

Kal lamah chuan an titi tui ta phian a. Maliani chu kawm a nuam fú roh a, tawnhriat a ngah bawk a. Sawi tur a hre phian mai. Bena pawh a tira a phur lohna pawh a reh chho ţan. Dar 6 velah an thleng a. Bungrua chu an han load zung zung a. Maliani chuan "Kan zan tlan dawn sia. Chaw ei sa mai ang" a tih tlat vangin hotelah chaw an han ei te te a. Dar 8 rik ţêpah an chhuak thei hram. An titi leh mial mial a. Sialsuk an thleng dawn hnai tihin Maliani chuan, "Chawl lawk ang" a ti ta tlat! A hire tu a ni si a. Bena pawh a ding ve mai. Kawng bula râp in lo awmah chuan Maliani chu a va lut zauh a. A rawn let leh lam chuan Local um khat a rawn hum chhuak ta mai a. 

"Lem hlek ka duh. Ka chau deuh sia" tih leh dispo cup-a thlit a rual nghal a. Bena chuan a khap duh lem lo. "Buh zu a nih hi. A tha teh mai ania. Lem ve hlek la" a rawn ti zui. 

"Aa.. Ka muthlu palh ang" tiin a lo hnar. No 3 dawn a in hnuah an tlan leh ta a. A kai phur a rawn tawng leh tan a. Bena tan chuan a ninawm lek lek. Zai a play ta daih a. A hnuah chuan a muthlu deuh nge a ngawi ve ta a. Mahse, Aizawl an lut dawn hnai tihin "Ka luak a chhuak" tih leh luak a rual nghal a. Bena a ding vat. Kawng sir zau laiah a park a. Maliani chu a chhuk a, a va luak bârh bârh mai. Tui te pein a buaipui ve a. Han tih vak ngaihna a hre lo hle. An thut leh hnuah khalh leh mai tuma a motor a start tur chu Maliani chuan a rawn khan ta nulh mai. A nu lian roh si, a chet theih der loh mai. Motor vei vak a tlem pharh lehnghal. 

"Hmanhmawh vak lo teh" a rawn ti no ngher ngher a. Bena bengah te chuan a rawn thaw lum hiam hiam ta mai. Steering chu a hum ngawt ngawt. 

"Malian, tiang chuan awm suh" a ti lawi rût a. A ngai pawimawh lo nasa. Maliani hi a nulat lai pawha sihhnipa sawi ruk kha a ni ve hrim a. A han thlawi zui ta bawk nen, fa pakhat chiah neiin a khal nalh si. A hmel lah a chhe hran si lo. Bialpa paeh a hmu zo viau thin. A rui kha a la reh chiah lo bawk nen, Bena chu a fiah a ni ber mai. A kap zawn te chu a rawn khawih thuak thuak a. Bena lah rei tak chhung jailah hun a hmang a, Enkawli nen lah thianghlim takin an inkawm si.. Mipa a lo ni chhap nen. Hmeichhe khal nalh takin a nawk a nawk takah chuan a insum zo lo lek lek ta mai. Mahse, A best friend Ditei'n a chah ngun deuh, "Mi chi hrang hrang i phur kual dawn a. Mipa i ni bawk. Hei hi hre reng la ka duh. I mi phurh te khan an hre vek lo che a, nang pawn i hre vek lo. Chetsual palh theihna remchang pawh awm se, 'Hiv hi hmelah a lang chhuak lo' tih theihnghilh suh. Condom hman ngai lo turin i insum thei bawk ang. A chhan chu Enkawli hi i hmangaih alawm.. Kei pawn ka ring che" tih thu kha a bengah a rawn ri nawn ta vang vang mai. A aw a thian kâk a, "Malian, ka'n ţawngţai ange aw" tih leh ţawngţai a rual ta mai. Maliani makti lutuk leh hrilhhai lutuk chu a khawngaihthlak zawk hial mai. Benjamin chuan mipa a nih angin thlemna chak ber chu a hneh thei ta. Driver thenkhat pawlawh deuh, an passenger hmel keu deuh, sihhnip si te laka an tlawm duai duai laiin ani erawh chuan Pathian chakna nen a hneh ta. A inchhir pawh a rinawm loh. A chhan chu thla 4 liamtaah khan Maliani hian a rilphir puakkeh tep vangin zai a tawk a. Chutah chuan a thisen test resultah a lo positive tlat a ni. Hiv vang pawh ni lo in Enkawli tan leh Pathian vang pawhin Bena hian a hneh kan ti thei ang. A phenah Diteii a la awm chêu bawk. A vannei teh e. 

"Happy Birthday" Mala aw chu a fiah kher mai. Zothana chuan a nectie chu a phelh thawl a. Lehhawiin, "Ka lawm e" a ti nghut. 

"I hlim hmel hle mai" Mala chuan a lo ti leh a. 

"Thil pakhat ka ti leh ang a. Ka hlimna a kim chiah ang" a lo ti thung. A thusawi awmzia chu Mala'n a hai miah lo. An unau chuan an inmelh ta ngawt ngawt a… 

(🙄😌😍😈😆😎😋😭😃😏😃😇