Drose 19

D'ROSE.. (Chapter - 19)

Ziaktu : Toni Rãlte

"I va ngaihawm ve" Zorina msg chu ner sak chungin a chhiar a. A mamawh ta lem lo viau. Mahse, a lo hman tangkai tawh vangin a inthiam lo ve deuh a, "Ka ngaihawm loh em mai a" tiin a reply ve hram. Rinmawia nen guitar inzirtir leh turin in hnuaiah an chhuk a. Tetea te pawh an rawn kal ve. 

"SS kal lai khan ti nge i hawi vak vak a? " Rinmawia chuan a ti a. Drose chuan, "Ka zawng che. I haw daih maw ka tia" a lo ti sam êt a. 

"Min ngai anih kha" a lo ti thawp sat. A naute an awm ve si, a lo zak leh, "I va zak thei lo tak. Nang ai chuan ka arpa ka ngai zawk" a lo ti vak. Guitar chu a zai theihna tur tawk a thiam ve sawlh sawlh tawh a. A aw ţhing zet nen a zai rût rût. Hla a hre tlem ngang bawk si. Love song phei chu a hre mumal lo. Nursery rhymes te a sak tak mai mai kha. Rinmawia phone a ri ral ral a. Tìm lek lekin balcony-ah a va chhuahpui. Drose lung a phu leh tawh. An inbe rei zêk lehnghal. Rinmawia chu a lo phei a, "Ih, ka thiante an lo kal a. In in hi an hmu ve chãk a" a ti a. A inthlahrun hmel ngawih ngawih. 

"Lo kal se ni mai lawm. Thingpui ka lum peih lo nia. U Zari leh A'n Thiangi te an awm lo lehnghal" awlsam zet hian a lo ti a. 

"Ka lum mai ang" Rinmawia'n a lo ti. A thiante chu rei vak loah an lo thleng chawpchilh nghal. An ni pawh in chungah chhoin, Diteii bulah an sawi nghal a. 

"Mamawia thiante maw in nih? In va fel ve aw. Lo thu ru. Thingpuite in in dawn nia" a lo ti sawk sawk a. Mimi leh Jenny bakah Rinzuala leh Sawmi an ni. Rinzuala leh Sawmi hi inngaizawng an ni nghe nghe. 

Drose erawh chokaah a tawm tlat! A naute nen games an khel a. A rawn ngaihsak vak lo. Mimi te chu a tirah an zûm naa Diteii a lo fel êm vangin an ngampa sãwt hle. Jenny phei chu a ţawng phar phar a. Ngeiawm rawng erawh a kai bik lem lo. Diteii chuan thingpui a chhuang a. "Tah khan ti nge in tawm tlat? I U mamawia thiante saw va kawm ve la" Drose melh chung chuan a ti a. 

"Ka peih lo. Ka thiante pawh an ni ve lo' a lo ti hmak. A nu pawn beidawn hmel zetin a melh reng ringawt. 

"Mimi, inpa room te chu fan a phal ang em? " Jenny chuan a ti har har a. Drose a va hawi zawk. Mimi chuan nui seih chungin, "A changtupa hian a phal pawh ka ring lo e a" tiin Rinmawia a melh a. Rinmawia chuan, "Fan tlak pawh a awm lo. A hnawk viau ang" a lo ti ve mai a. 

Diteii te in hi simple taka sak leh an bungrua pawh simple si, changkang tho si vek an ni a. A western kan tih ang type kha a ni. 

Diteii chuan thingpui a siam zo va, "Bawihte, kha va sem rawh le.. I nau ten a hmeh hi va chhawp se" a ti a. Drose chuan, "Ka laklawh asin le" a ti nang nang a. Phone chu dahin a naute pawh an tho ve nghal zat. Tray chu chawiin Rinmawia te chu a va sem ta diat diat a. 

Choka lam pana a kal mek lai chuan, "In awmpui chu a va naupan hmel ve" Jenny chuan a ti zauh. Drose a ding dat. Mahse, Rinmawia chuan, "Nu Diteii fanu a nih saw.. Hei a naute' tiin Tetea te chu a melh pah a. Jenny lai chuan a heh a pet ringawt. 

"Thingpui hi in zo ila, khutah chuan zuk leng ve ila, Rinmawi, nang pawh lo tel rawh aw. ".. Sawmi chuan a ti a. 

"Khawiah maw" a lo ti hú! 

"Aw.. Lalremi dam lo kan kan dawn alaawm.. I lo kal ve a ngai" tih pahin awmze nei zetin Mimi nen a mitmei a. 

"Ka va hman hmel loh. Drose kha thil ka zirtir a" a lo ti nuah nuah. 

"A ho mai mai. Sunday te chu awl ve ni alawm.. " Jenny chuan a lo ti zung zung. 

Rinmawia chu za lo zetin a nui ringawt. Drose chuan games khel chungin an ţawng chu a ngaithla ru ve ran a. Rinmawia a chhuah ve chuan a thinrim hle dawn tih a hre sa bawk. Thingpui an in zo a, no a va seng fel. A sil mek laiin Rinmawia a rawn kal a. 

"Min sawm ve tlat sia, ka va kal ve lawk ang e aw" a ti sur sur a. Chhan pawh a chhang duh lo. 

"Thinrim lo la" a ti leh. 

"Nge ka thinrim ve ngawt ang. Ka bialpa pawh i ni hleinem" a lo ti chang fak. Rinmawia tan chuan kal a phurawm loh kher mai. Mahse, han hnial ţung kha a hreh si, Diteii lahin, "Va kal ve rawh. Sunday hi chu len vahna hun a lawm" a lo ti ve thliam bawk si. Drose thinrimna zawng zawng tuar huam chungin a chhuak ve ta poh a. 

"Nui, ka lakah zep i neih chuan sawi la ka duh. Tun lai i awmdan hi a dik leh tawh lo" Pu Vanlala chuan a ti ta tawp mai. Pi Zawmi inbual zo inthlak mek lai chu a tawp chawt. 

"Zep neia min hriat tlat chhan hi nangma lam dik loh vang zawk a ni lo maw? " a ti ve ta a. 

"A nih tak chu. Pu Dintluanga fate nen in inhnimhnai riau hi a mak ka lo ti deuh a" ngeiawm lek lek hian a lo ti ve hmak. Pi Zawmi chu a lehhawi vat, an pa mita en chung chung chuan, "Min chhui vel e lo? " a ti a. A lungawi hmel fahran lo. 

"Chhui turin i awm aniang e" a lo tih khum hmiah. 

"Nupa kan ni a, hetianga inrinhlelh hi ka duh hauh lo a nia. Ka mi hmuhte zawng zawng i hriat a tulna a awm lo. Kei pawn i mi hmuhte ka hre vek bik lo" a ti hlak hlak a. 

"Inhnial ka peih lo. Engpawhnise, Thawhlehniah phaiah kan chhuk ang" pu Vanlala thusawi chu thutawp a ni. Pi Zawmi erawh a chhungrilah a za et et, Phaia an chhuk chuan rei tak a fanu chin a hre dawn lo tihna a nia. A ngaingam meuh lo. 

"Ka tha alawm. Inentir ka ngai lo' a ti a. Mahse, an pa chuan a thu a sût dawn lo tih a hria. A rilru a hah ta kher mai. 

"Naktuk chu kan institute-in function pawimawh zet kan huaihawt dawn a.. Thu ka sawi ve dawn lehnghal. Eng lam tak sawi ang i maw? Institute kaihhnawih lah an sawi vek dawn si.. Ka buai angreng viau" Dinfela chuan an nu bulah a ti a. 

Diteii chuan, "I va sawi har ve. Naktuk a ni tawh a, inbuatsaih te pawh i ngai a nih chu.. " a lo ti vat a

"Inbuatsaih dawn paw'n eng lam hawi nge ka sawi ang ka hre lo. Fuihna thu lah Pu Rinliana'n a sawi thiam leh dawn si" a lo ti chuai raih a. 

Diteii chu a bula rawn thuin, "Ka hria.. Thalai kal khawm an ni dawn a. An mamawh em em ka hria alawm. Hiv awarness i va nei keuh dawn nia" a ti ta sar sar a. An pa chuan a lo ngaihven kher mai. Chawhnu pum deuhthaw chu chumi lam sawi turin a inbuatsaih ta nge nge a. Nupui hi zawng a nei fuh thlawt a ni. 

Drose erawh khumah a insawh a insawh a. A pute Lawma'n a lo be mial mai. A mood a fuh zan loh vangin pawr deuhin, "Aw" a ti hlar a. 

"Naute, Hei ar betnaah ka kal dawn. I rawn tel dawn em? " a rawn ti ta! A zuang tho zawk. 

"Pute, kekawr ka ha ang a, ka hman aw. Scooty ka lo keng mai ang" a ti zung zung a. Lawma nuih a za hle. A mood off kha mitkhap kar lekin a fuh leh nghal. 

"Nuuu, putea nen ar betnaah kan kal dawn. Eng kekawr nge ka hak dawn" a ti lung lung a. Diteii te nupa an innuih tawp. 

"Kha hei hi ha rawh. I kawr pawh kha thlak rawh. Hei ha rawh" tiin kawr leh kekawr a rawn laksak a. A lo inbel zung zung. A phur takzet tih a hriat. Tetea leh mampuia an lo phur thak ve bawk. "Nuu, kan kal ve duh" an ti a. 

"A hruai duh che u mi? " a lo ti a. 

Drose phur pheng chuan, "Aw insiam ru. In duh leh lo kal ve ru" a lo ti a. Hmanhmawh lutukin an va insiam ve. An unaua an chhuah dawn vang erawh chuan a nute an mangang deuh. Lawma a be nghal a, "Au Lawm, hei a nauten an rawn zui ve dawn sia, i lo ngaihven deuh loh chuan aw" a ti zung zung a. 

Tetea'n ar a pawm a, Mampuia a hnung berah thuin an ving chhuak nghal. Lawma'n a lo nghak ran a. Falkland lamah an inzui thla ta thliai thliai mai. Drose nuam tih ber dawttu a ni a. Rinmawia lam reng a ngaihtuah chang tawh lo. Ar sualhuai hi paruk a kawl mek a, a enkawl uluk bawk a. Pawisa pawh a hlawh ve nual tawh. Mahse, a nu te kuta a pek loh leh a arte enkawl nan a hmang thin. 

Pi Zawmi chu in chungah a pen chho hlawk hlawk a. In chung zawl a thlen chuan a phone chu a hmet niap niap a. A ring ta ral ral mai. 

" ka pasalin min ringhlel tawh a. In ina ka lo kal te pawh a hre vek. Thawhlehniah Vellore-a min hruai a tum bawk. Ka fanu kha ka hmu leh har taeh dawn si a. Eng nge ka tih ang ka hrethiam lo" a ti nghal bawrh bawrh a. A thawk ran danah a rilru a hah hmel angreng. 

"Hahdam deuhin awm rawh. Ka enkawl thei lawm. In lo hawn meuh chuan a lo dam tawh maithei asin. Lo inenkawl tha la.. Dam takin in lo haw leh dawn nia" Mala chuan a rawn ti dam dap a. 

"Ni e, i kutah ngaihngam takin ka dah thei a, a lawmawm. I pa diary pawh ka la chhiar zo lo. Hun thawl ka nei hleithei lo va" a ti a. Tlemin a pangngai ta deuh. 

An pain a veh reng si a, a tan chet lak a harsa telh telh mai. Teteii a la dam tih thu sawi turin huaisenna a la nei thei si lo. A puahkeh mai te a hlau rum rum thin. A chang leh lo thi law law zawk se tih changte a nei thul. A chhungkua bum anga a inhriatna chuan a timangangin mutmu pawh a tuah thattir hleithei lo. Teteii hi chuan a tibuai teh e. 

Drose pawh a au leh nasa. A ţang lutuk thin hi a putea hian a chelh bet fô mai. "Aw ka duang, ka duang.. Comeon.. " tiin a ar sual huai chu a fuih nasa ngang mai. A mah chiah hmeichhia a la awm zui! Engahmah a ngai hran lo. A ar duat lai, "Ka duang' tia a koh ngat chuan a chakpui leh hram e. Mahse, hliam a tuar ve nel nual. Tetea te pawh an hlim kher mai. An haw lam pawh pheikhai a zang teh e. An in kawt an thlen rualin Rinmawia leng haw pawh a rawn thleng ve chiah. Drose chuan a lo ngaihven vak lo. A nu a ko chul a, "Kan chak leh ta.. " a ti lut a. 

A nu pawn a lawmpui thiam kher mai. A pa pawn chhuang zetin a lo kuah leh hnup bawk. An hlim thin teh e. 

An han intifai a, chaw ei a hun ruai. Chaw an han kil chu, Dinfela chuan, Rinmawia lam hawiin, "Mamawia chu zu rim nam thâna ka hriat che le.. I lo in ve em ni? " a ti ta thut a. Drose a lo phawk hru mai. 

Rinmawia chuan inthlahrun hmel takin, "Nia, no hnih ka in ve a.. A zia lo tak tak" a ti ta ringawt a. 

Nelawm takin Dinfela chuan, " Zu te chu in tura siam a nia. Han in zeuh changte chu a awm tur alawm. Experience zel. Mahse, thil reng reng hi a ngawl kan vei tawh chuan a tangkai zawngin kan hmang thei tawh mang lo va, nang pawh tlangval in ni tawh a, in suh kan ti ngawt thei lo che. I in ve a nih pawhin chintawk hria la, in hun leh inna hmun tur te fel takin i thliar dawn nia.. " a ti dam thlup a. Rinmawia tan erawh a zahawm ngang mai. 

"Ka in tawh lo vang tui pawh ka ti lo e a". A ti niah niah a. A dik tak chuan a thiante khan an nawr nasat em vang a ni pakhat a. Mahse, a thiante chungchang erawh sawi kher a tum hran lo. 

"Kei chu zu ruih hi a nawm hmel ka ti." Drose chuan a ti lehpek. An melh thap. "Eng nge, ka in dawn pawh ka ti lo va. Mahse, an han tawng vel vak hian a nawm hmel ka ti mai mai" inthlahrun hmel zet hian a ti leh a. Tuman an sawi pui lo. Chaw eikhamah an han insingsa fel sang sang a. Inkhawm tur ho an insiam bawk. Drose erawh zan lamah hi chuan inkhawm a chikat rih. Kawrfual hak ziah a ngai sia a ning. Vawikhat phei chu a nu bulah, "Nu, ti nge kan inkhawm hian kekawr kan hak theih loh? " tiin a zawt a. 

"Biak In a ni a. Pathian biakbuk a nih vangin kan thawmhnaw zahawm ber ber kan hak luh a ngai alawm,, " tiin a lo chhang a. 

"Mahse, dik tak chuan confi a har alawm. Hmannia Apu Zova thusawi te khan eng nge a sawi pawh ka hre lo. Ka kawr fual kha a tlang a ţet a, a ţeh belh zel ka hlau sia, ka inveng reng a. Tiang kha chuan sermon pawh engmah ka hre lo va. A tha pawh ka ti lo" a lo ti a. Diteij ngaibtuahna a kal thui angreng. A tleirawl lai pawh khan a tihtauh vang chu ni pakhat mah se; pawnfen emaw kawrfual emaw hak a ngai zel khan a ticonfi hlawl lo va, inkhawm lohah a tlak leh zel thin a nih kha. Lehlam zawng taka ngaibtuah chuan, kan Pathian biak buk hi mihringten kan tihzahawm a ni lo va, amah hian a zahawm sa ve reng reng a. Thawmhnaw fai tak hak chu a tha. Mahse, kan neih ang tawk hi fai takin ha lut mai ila, kan thinlung lam a thianghlim phawt chuan eng nge maw a pawina le? Fashion show-na hmunah kan chhuah lek lek tawh chu a ni a. Puan bih te pawh a tha reng, mahse, kekawr te pawh hi hak nuam leh mawihnawi ha lut mai zel ila, confi taka kan inbel theih chuan sermon ngaihthlak kawngah pawh min pui ngeiin a rinawm. Mahse, Mi fir tak, Pathian aia Kohhran rawngbawl thinte hian pawnlam incheina zahawm atangin mi dang an lo teh ve sek si a. Kan incheina vanga Pathian biakbùk zahawma zahawm lo tura an ngaih tlat si avangin mi nawlpui hian kan zawm lo thei lo a nih ber hi maw.. 

Pu Vanlala pawh inkhawm turin a chhuak a. Naupangho erawh a û roomah games an khel leh. Sunday zanah lehkha an zir ngai lo. Rinmawia pawh khawhar takin a roomah a thu ran a. Movie te a en ta vel mai mai. Mimi lah khan bialpa treatin a treat deuh ringawt lehnghal. An inthen tawh reng si a. Drose lahin a ngaihven teh hurh bawk si lo. Awm dan tak pawh a hre lo e a. Mimi chu a mizia a hre chiang telh telh a, a ei lo telh telh. Mipa a ni a, ei loh zawng pe na vak chi a ni lem lo zawk a. Zu te kha a in thei pap pap si a, boruak a ngam reuh phian bawk si. An hawn dawnah lah khan a thiante hmuh laiin a rawn fawp ngawt lehnghal. A zak lutuk kha a sen vekin a ring. Drose in hre ta se a sa teh ang chu… 

Pi Zawmi pawh an room bathlarah chhuak pheiin, light hnuaiah diary chu a pharh leh diai a. A tarmit siamremin a chhiar chin atang khan uluk takin a chhiar ţan ta a. 

" Teteii chuan hmeichhe pakhat inzuar thin a lo that reng mai. Engvanga that nge anih eraeh a sawi thei mai lo. Hei hi ania mak ka tih em em. A thil tih thenkhat theihnghilh zeuh zeuh a nei ziah hi. A chang phei chu kei te hi min hlauh hmel takin a awm thin. Dam lohna a nei a nih ka ring fo. Doctor la hmuh a ngai a ni. 

Tual a that miau si a, hmu tu an awm nia a hriat vang ania a hlauhthawn em em. Chu chu ka puih a ngai dawn ta a ni. Ruang chu car-ah a dah thu a sawi a. Hmanhmawh takin kan pahnihin kan han zawn thla. Hetih lai hian ruah a sur vangin ka hnathawkte chu an reh ţhiap tawh. Tin, in hnuaiah an riah vek avangin engmah an hriat a rinawm loh. A mi thah chu nula hmel chhe lem lo tak a ni a. Teteii nen an intiat vel awm e. Rilru hah zetin kan vei sek a. Tual êm that tur chuan ka ring ngai lo asin le.. 

Chutah rei fe a inngaihtuah hnuah, "Doctor hmelhriat i nei tiraw? " a ti ta thut a. 

"Nei e.. Ti nge? " ka lo ti vat. 

"Ruang hi a hmel chauh hi a thlak thei ang em? " a ti ta a. Ka lo meng phawk kher mai. 

Chutah nem taka min melh chungin, "Zodingpuii leh Dinfela laka ka phuba lakna chu a inţan thei ta. Mitthi angah min ngai se, an hriat lohin keiin kua ka hreuh char char ang. An zavai sawn ka tichhe vek dawn a ni. Tichuan, ka chanvo dik tak ka hmu thei ang. Tin, i bulah i thih ni thlengin ka awm thei bawk ang" a ti ta a. Engmah ka hrethiam lo. 

"He mitthi hi ka hmel ang chiahin I Doctor chuan siam se la.. Kei chu hmel thar min pe bawk rawh se.. Ka hming leh nihna zawng zawng ka thlak ang a. Mi zawng zawngin mitthi anga min ngaih chuan ka tan chet a awlsam dawn em em a ni" tiin a han sawi fiah leh a. Tlem chuan ka pawh ta deuh. Ka tan a hlut em vangin a tih ang ang chu ka pawm a ngai. Nakinah buaina kan tawk ang em tih ka ngaihtuah ngai lo. 

Ka doctor Jo chu ka call ta nghal a. A rawn kal nghal. Ani hi eng lai pawha ka tana rinawm taka thawk a ni a, sum pawh ka vur nasa ngiang reng a ni. Kan remruatna chu kan han sawi a. Ni 2 hun a duh thu sawiin ruang chu a ţawih loh a ngaih bawk vangin chet vat vat kan ngai a ni. Tichuan, ruang chu Jo inah la pheiin a laboratory roomah kan zalh a. A chet dan zawng zanwg hi ka sawi vek kher lo mai ang. A thawkrim bawk a, Surgery chu hlawhtling takin a kalpui thei ta a. Teteii erawh hmel thar a mamawh dawn vangin kan la thukru ta rih. Ruang kha tlangzarh phawt a ngai si a. Tichuan, Ruang chu a thih atanga ni 3 ni zanlaiah Teteii nen bawk phur chhuakin a thahna hmunah chuan hmuh mai awlsamin kan zalh ta a. Teteii thawmhnaw kan haktir bawk. Hetia kan chet vel lai tak hian chhak lam atangin mi pakhat a rawn chhuk ta hlauh mai. Kan chhe ta vek e ka ti rilru hman a. Mahse, Teteii chuan, "Bena, eng nge i tih? " tiin a lo be vat a. Bena chu tu nge anih ka hre ve lo. 

"Ka nau thianpa a nih hi" a ti a. Rilru buaina. anei tih a sawi bawk. Teteii thluak chak zet chuan thil dang a lo ruahman leh hman a. Bena chu ngawi rengin kan bulah a thu ve reng a. Nuam lo tak a ni. Teteii lahin eng teh ualah a ngai si lo. Teteij chu huat hmel takin a rawn melh ram ram thin a, kan intifel zo hawn kan tum lai tak chuan Teteii inring lo lai chu a rawn bawh thut mai. Kan awmna hmun a fal hlauh a, Teteii rak tuar ri chu an hre lo turah ka ngai. Ka va pui vat a. Bena chuan a rek nget nget mai. Teteii chu a meng pual hman tawh. Keia tihngaihna hre lo chuan motora ka wrench chu va lain a chalah chhu ta nghek a. A thal tawp mai. Hmanhmawh takin Teteii nen chuan motorah chuangin kan kalsan ta a ni. Bena kha engtin nge kha lai hmun atanga a kalsawn dan ka hre tawh bik lo. 

Kan tum dan ang ngeiin Teteii ruang an hmuh thu chu a darh ta nghal a. A chhungten a ruang an hlawm dan te.. An vui dan engkim kan hre ve zel. A ruang an phum zawh atangin Dr Jo pawn Teteii hmel thlak turin a hna a ţan ve ta nghal a ni. Tichuan, Lalrinawmi a lo piang ta a. 

Ka bulah chengin ka nupui angin a awm a. Ka fapa te beng hial a thleng ta. An pa putar pui tawhin nupui naupangte a nei tih an hriat chuan an lawm tehchiam lo hle. Mahse, pa ber ka ni miau a. Ka thutlukna erawh an hnial ngam lo.. Pawi ta ber erawh Malsawmtluanga ka ko haw kha a ni… " 

"Piii, a piii" Drose aw a hriat chuan lehkhabu chu a khup vat. Sana a en a, inkhawm an bang dawn hnai tih a hre nghal. Hun remchanga chhiar leh atan tiin diary chu a thukru leh ta a. Room atanga va chhuakin, "Eng nge ni ta" a va ti a. Drose chuan Mampuia kut a lo chelhsak a, a thi zur zur mai. "Ehe! Ngati nge.. Eng nge thleng? " tiin a va pan nghal. 

"Apple ka vel tir a. A inzai a.. A'n Thiangi te an awm si lo va" a lo ti a. A hlauhthawn hmel hle. Pi Zawmi chuan a tuamna tur leh hnawih tur a va la vat a. A tuamsak ta a. Rinmawia pawh a rawn chhuak ve.. 

"Apple te chu nangman vel ve mai ta che" Drose melh chung chuan a ti a. 

"Nia.. Mampui, anu te bulah sawi suh aw" tiin Mampuia chu a tlawn heuh heuh a. Mampuia lah mi ã ni hek lo, "Nih chuan ka cycle min siamsak la" a lo ti ve vat. 

"Lutuk. Naktuk tlaiah ka siam nghal ang.. Mu tawh ru. Anu te an lo haw ţêp ang" tiin in chungah a khalh chho. Rinmawia a la be leh chuang lo. A lu hiat nuah nuah chungin, "A titau leh tawh mi le? "A ti sup a. A bula ding pi Zawmi chuan a hre pha tih reng a hre lo. 

Dinfela chu platform-a lecturn ah chuan a ding a. An nu nen an inbuatsaihna a ziahsa chu a pharh diai a. A hmaa thu thalai rual chu chibai bukna a neih zawhah, heti hian fuihna thu a sawi ta a. 

"Virgin zawngin ban phar rawh u ti ta ila, a tam zawk chu in nuih a za anga, a then chuan, 'Hetiang privacy lutuk te inzawh chi em ni? " in ti ang. Anih leh HiV positive zawng ding rawh u ti leh ta ila, in hawi â viau maithei. Thisen test tawh, thianghlim chu hmun thuma thena hmun khat bak in awm ka ring lo. Ni e, in hrisel a, that lohna in neih miau loh vangin thisen test tir chu thil ţul takah in ngai kher lo vang. 

Mahse, thisen testtir ngai anga inhre lo, a ruka positive hi an kat nuk tih kan hria em? Sex hmang tawh phawt khan in sex hmanpuite kha han mitthla teh u. In hre chiang tak zet em? A nunhluiah tu nge a lo mutpui tawh a, chu a mi mutpui chuan tu te nge a lo mutpui tawh in hria em? Hre kher lo vang.. Chutiangte tuin nge tlangaupui duh ang? Hei tak hi a ni. A risk hi a sang mah mah. Condoms pai zak tlat te in la awm em? In awm loh ka beisei. A bikin mipa ngat phei chu.. Mipa hi kan lo ni bik khawp a! Tawnsabawpah pawh ever ready kan ni deuh ţhup. Chutiang hunah chuan hlauh taka tiin in bung chawt zel nge? Fimkhur takin CD in vuah zawk? Nui ringawt suh u.. 

Sex hi in hmang zel dawn. A hmei apain in la hmang ngei ngei dawn. Tuna la virgin te erawh in thianghlimna kha lo humhim tluan thak rawh u. In inchhir lo vang. Lo inhmang ve tawh, a nawmna pawh tawh te erawh chuan vawiin hi theihnghilh ngai suh u. I chhehvelah khan he natna hian a chenchilh reng tawh che a, i ngaihzawng, Kohhrana inhmang em em, Bial Zaipawl member, veng chhunga tlawmngai leh ruihhloa fihlim anih vang ringawt khan i ngaih ti ţha suh. Lang chhuak si lo vin a lo pai ru reng thei ania. A hun kal tawha a thil vawikhat tihsual khan i nun thleng a vaw chhe ve thei.. Sex-a in fihlim thei ngang lo anih pawhin Condom hi lo hmang tawh rawh u, tichuan, kan ram, kan khawtlang, chhungkua leh mimal nun hi he natna lak atang hian in chhanhim dawn a ni tih hi ka chah duh che u a ni" tiin. Kut beng ri a ring kher mai. Dinfela pawh a inbuatsaih ang taka a sawi theih vangin a lawm khawp mai. 

"Drose, ngawi reng suh. Eng emaw tal sawi rawh" Rinmawia'n an haw lamin a ti mawlh mawlh a. Kal lamah a pa ruala a kal daih vangin an inphur tawh si lo. 

"Sawi tur ka hre lo. Zu te i in a. I ngeiawm em alawm" a lo ti a. 

"Zu ka in vang nge Mimi vang" a ti leh chat. 

"A pahnihin" a lo ti nghat. 

"Chuan i titau leh char char dawn mi? " mangan hmel zetin a ti a. 

"Ka hre bik nang. Ka ning. Ka upat hunah kan tih kha" a lo ti vin leh ţhak. Rinmawia pawh a ngawi ta dûk. Mahse, thawven khat chuan a thawveng tho mai. Drose chuan a la duh ve tho tih a hriat vangin. 

Mimi kha a be zui duh ta miah lo va. College-ah pawh a hel char char. Canteen-a a chawlh laiin Jenny nen an rawn thutchilh leh a. Chutah chuan chiang fek fawkin, "Mimi, bialnu ka nei a. Thian ni zawk ang. Tun chinah chuan thian ang zelin aw" a ti a nih kha.. Mimi chu a ngawi ta hmak. Jenny erawh a thinrim. Rinmawia a ankhum char char. Engahmah ngai lovin a chhuahsan ta daih a. Sual chu a inti ve reng, mahse, Drose ai chuan a thlang thei thlawt lo a ni. Hmangaihna leh inngaihzawnna kawngah chuan mi pathum an tel thiang lo. An tel anih chuan mi pakhat a hlim laiin mi pakhat a nat a ngai. A rualin mi pathum an hlim rei thei lo. Inbumna pawh tel mah se; inman chhuah hun a awm nge nge thin. 

Pu Vanlala te nupa pawh zin turin an insiam tan a. Drose chu kal chak teh mah se, ; term exam a hnai tawh si a, a nuin a phal ta ngang lo a ni. Rinmawia pawh semester exam a hnaih ve tho vangin a kal dawn chuang lo. Dinfela'n chawlh lain a zuk hruai dawn a ni. Pi Zawmi chu a phur hmel vak loh. Teteii bak a ngaihtuah thei meuh si lo va. Teteii thih loh dan a chhiar takah phei chuan a ngaihtuah zual sawt. A natna chu dam vat se, fanu fel tak leh inngaitlawm takin he chhungkuaah hian rawn kir leh se a duh ber. Mahse, a pasal leh fate hian an pawm thei ang em tih chu a buaina ber a ni ta. 

Duati pawh a dam ve tan a. Class pawh kal theih vat a inring chho. Zothana nen an inbe nasa a. Tluanga lam chu a ngaihtuah ta vak lo. Mahse, chanchin eraeh a hre ve zel thung. Inneih kha an thulh ta tak tak a, hmeichhe lam an lungawi viau lo tih te thlengin a hre ve zel. Tluanga chu a fimkhur loh vangin a hua a, a bumna vang pawn a hua. Mahse, a tihsual tawh hnua a fa lehzel a fahrah tur chu pawi a tihpui. A inchhir hle ang tih pawh a ring. Pawm leh tur anga a insuangtuah hian ngaihngam lohna lian tak a nei zel a, Tluanga chu a ten deuh niin a inhre hial thin. Zothana nen inngaizawng angin an inbe ngai lo naa, a khawhar a hnem em em thung. A rawn ngaihtuah em em zel a. A rawn kal theih loh pawn eitur eng emaw a rawn thawn hram thin. An kum a inthlau deuh naa Duati phak tawka kawm dan a thiam ve viau tawh. A nute Diteii duhthusam thin "Tar enkawlna " buatsaih a tum mek a. A hlawhtlin ngei a rinawm. Mizoramah a la awm ngai si lo va. Tunah an sa chho mek a, a building pawh a len hmel khawp mai. Duati pawh a zo ve tep tawh a, Zothana hian fiamthuin, "I zawh veleh i rawn thawk nghal ang" a ti thin. Duati mizia nen a inrem riau ang. A nelawmin a dawhthei si a. 

"Jo, eng nge vawiin lam kan an? " Mala chuan a ti a. 

"Kan tha zel e. A inpuang ţêp ang" a lo ti mai a. 

"A chang chuan MPD a ni lo mawni aw ka ti lek lek. A anpui deuhthaw Psychosi hi a ni zawk mai lo maw? " mala chuan ngaibtuah hmel fe hian a ti a. 

"Ka lo ngaihtuah lai tak. Chutiang anih ngat phei chuan kan enkawl uluk zual a ngai dawn a ni. A mize tha lo zawng zawng saw kan pawmtir a ngai ang a, amah saw kan inhnehtir a ngai dawn si a. " a ti zawi sup a. 

"I hlawhchham ngai lo va, ka ring che" Mala'n a tih mek laiin, Teteii rak tuar tuar thawm hriain a roomah chuan an lut nghal. 

Darthlalang lianpui hmaah chuan a lo ding khur hlawk hlawk a. A thla lo lang chu kawkin, "Keimah a ni lo. Keimah a ni lo" tiin a lo phun mawlh mawlh mai. Jo chuan a va kuah vat a, "Min thihtir mai rawh ru.. Ka ning tawh. He nun hi" tiin chhuatah chuan a tlu sawp niaih a. Mala chuan taka a sama chul pahin," I dam dawn alawm.. I tha ţêp tawh ania.. I hneh a ngai. Nangmah hi inhneh rawh. Tete" a ti dam dap a. Mala melh chhoh ţâwk ţâwk pahin, "I pa thattu ka ni asin" a ti ta a… 

Room kawngka bula lo ding reng Zothansanga chuan a kut hum ruh chungin Teteii chu a lo melh vawng vawng mai.. 

(Muah vek u.