Drose. 18

D'ROSE… (Chapter- 18)

Ziaktu : Toni Râlte

"Tu nge ka nih i hria alawm.. Teteii, Zomuanawmi ka ni" thle tawn sek hian Teteii chuan a ti a. Zothana chuan Mala chu pawm kangin, Sofa-ah a muttir mek. 

Jo chuan, "Teteii i ni lo. Ka be duh che. I hming ka hre duh" a ti leh a. Teteii chu a nui awr awr. Ţhenkhat chuan hmu se; ramhuai hnathawhah an ngai ngei ang. MPD hi Doctor chuan ramhuai hnathawhah ngai lo mah se; mi nawlpui tan chuan ramhuai a inhnamhnawih ve rinna kan nei vek awm e. Natna maksak tak zawng a ni chiang e. Khawvelah hian zaah 0.2% in an vei niin an sawi. 

Jo chuan, "I la sawi khawp ang… " a ti zawi sup a. Beidawnsan a tum loh hmel viau mai. Teteii erawh a nui awr awr kha a tawp a, chauh hmel zetin a mu meng reng. Teteii zawk kha a rawn let leh tawh tih Jo chuan a hai lo. 

"Lalrinmawi, i timak ve khawp mai. A duh ve tehreng che nen" Jenny chu a pawr angreng hle. 

"Ka tihpalh. Ka duh lo pawh a ni bik lo" a lo ti a. A inthlahrun hmel khawp mai. 

"Eng nge a chhan? Lehkha zir tih te chu chhuanlam a tling lo em mai" a ti leh. 

"Dik tak chuan ka rilruah hmeichhe pakhat a lian zawk a" a ti ta tawp a. Jenny a ner sak. "A tirah khan sawi ta che. I va mawl ve" a ti ta zêk a. 

"Min duh ve tih ka la hriat loh vang ania. Pawi ka ti lutuk, mimi chu ngaihdam min lo dilsak rawh aw" Rinmawia chuan a ti a. A chhuak zuk daih. Last period a off tawp. Drose in a lo nghahna thinah khan a lo nghak ve thung. Biak a duh si a. 

Darkar chanve hnu velah a rawn phei hnalh hnalh a. Rinmawia a hmuh chuan a ding det, Rinmawia zawk chuan a va pan ta a. "Ka lo nghak che a. Haw ila" a ti a. A nui bawk. Drose chuan ei loh hmel zetin a rawn pan ve tho. Ngawi rengin a bike hnungah a ţhu a. Rinmawia pawh a tlan zui nghal. Mahse, in lam panin an tlan awzawng lo mai. Drose a hawi hû hû. 

"Hey, khaw nge kan kal dawn! " lungawi vak lo hian a ti a. 

"Sawtah" a ti ringawt. 

Drose chu a ngaihna hre lo zetin a hawi a hawi ringawt. Uniform nen a ni bawk si. Rinmawia chuan WB road lamah a tlanpui ta a. Drose kal vawikhatna a ni. A leng ngai lo va, Aizawl hmun a hre vak lo. Hmun fál lai deuhah a ding ta a. Drose pawh a chhuk ve mai. 

Kawngsir remchangah chuan an inzui phei a. "Eng nge a? " a ti pawr hlar.. 

Rinmawia chuan thlang lam a hawi vang vang a; Muangchanga Drose lam rawn hawiin, "Ka single tawh" a ti sup a. 

"I single a ni mai lawm" a lo ti vei hmak. A koki pahniha a ban nghatin, "Drose, min duh a ni lawm ni? " a ti ta tawp! Drose a ding ngil awt a, a khur ru nghal. A lungphu pawh a rang leh kher mai. 

"Engvangin nge ka duh ringawt ang che" a ti chiam a. Mahse, a awmdan chu a danglam vek. A chiâi ru takzet a ni.. 

"I awm dan aţang hian ka hre vek alawm.. Chuvang chuan Mimi pawh ka ţhen alawm" pangngai deuhin Rinmawia chuan a ti a. 

"Ka.. Ih, ka duh lo che asin.. Ka û i nia. Bakah naupang ka la nih hi. Class X pawh ka la pass lo. Anu ten an phal lo hrim hrim" a ti ta niah niah a. 

"Min duh lo maw? Tak tak em? Min duh nge duh lo" Rinmawia awki chu a sang hrat. Drose chuan awmngaihna reng a hre lo. A hawi a hawi a, a kut a elh a elh bawk. 

"Aa.. u Rinmawi, haw ang. Apu ten min lo ngaihtuah tawh ang" mangan hmel zet hian a ti a. 

"Sawi phawt la, min duh nge duh lo" A ti tlat mai si. Rinmawia pawh hi a zâm ve em em tho. Mahse, mipa a nia, a inthunun thei deuh a ni mai. 

"Ka.. Ka hre lo. Aa.. Ka duh lo che. Ngaihzawng neih ka duh lo. " a ti bah nuaih a. 

"Aw le.. Min duh loh chuan a tawk. Bialnu ka neih leh hunah thinrim tawh miah suh" a lo ti leh fak. Vau te pawh a ang lek lek. Drose chuan chu chu a ngaingam chiah bik si lo. A rilru chu insual nasa tak a ni.

"Ih, ka upat hun nghak la" a ti ta ringawt a. Rinmawia nuih a za ta deuh. 

"Upat kher a ngai em ni? "

. "Ngai e, kum 14-ah tu nge bialpa nei ngam ang a" tlema awki sang deuh hian a lo ti a. 

"Tih dan ka hria. Kum 16 i nih hunah inngaizawng ila, tunah hi chuan ngaihzawng nei lo ve ve ila". naupang chhia zetin a lo ti ve. Drose chu a bu ta nghat a. Inhrethiam tawn takin an haw ve ta vang vang mai. Tunah chuan inngaizawng ang tho an ni ta. 

Diteii te pawh Aizawl an rawn lut ve mêk a. Nizanah khan thil eng emaw a thleng pek a. Saii in lamah an nupain an va leng ve a, inleng neuh neuh pawh an awm. An inpawh hlawm phian a. Rei vak lo an thut hnuah hmeichhe pakhat, sam kir chhup mai, nu lian lam hi a rawn leng lut ve a. A inchei nalh angreng viau. Mahse, rim dang a nam ve deuh a, a ţawng pawh a sehchilh nak mai. Diteii te nupa chu melh vang vang pahin, "Mate, I lo vei em em kha ka hrethiam khawp mai. A chhe lo em anih hi" a ti ta hlawl mai a. Inleng dang te chuan an hrethiam chiah lo maithei. Mahse, Saii leh Diteii te nupa chuan an hre thiam kher mai. Saii chuan a khap vat. Mahse, a zu in kha engtin tak thawk maw.. Sawi zui a chak tih a lang reng mai a. Dinfela chu hnai mangkhenah a rawn melh thul. Dinfela pawh a lai lek lek, Saii mangang ru lutuk chu khawngaihin Diteii chuan hawn a rawt ta tawp a. Dinfela'n a lo thlawp zat. Kawngkabul thleng Saii'n a rawn thlah a, "A zia lo takzet a ni" tiin Diteii a melh a. 

"A ho lutuk. Kan ngai haw lo. " nelawm takin a lo ti a. Dinfela erawh a ţawng ve lo. Hotel an thlen hnuah an sawi dun leh a, Saii zak lutuk an khawngaih thu an sawi tam ber. Saii pawh a mutui lo ve khawpin a rinawm. 

In an thlen chuan Zari'n rawng a lo bawl mek a, pi Zawmi'n la a lo phiar thung. Pa ber eraeh a chhuak a ni maithei. 

"Drose, i nute an lo haw" Zari'n a tih lang lang ri a hriat rual chuan a tho vat a. Hmanhmawh phelengin in hnuaiah a tlan thla. Tetea te unau nen an inpawm chawt. An lo inngai hman hle a nih hmel. Mampuia'n chocolate a hawnsak a, Tetea erawh chuan marble nalh zet zet a hawn thung. A lawm thiam kher mai. A nu chuan, "I lo ţha maw? Chaw i ei tha vak lo ni maw? " a lo ti a. Va pawm pahin, "Tha e tha e" a ti chung chung a. A pa a rawn lut ve chiah, "Ka naute chu i lo thanbelh chiang" a ti a, an inkuah nghal. Rei lote chhung an zinsan hlan pawha a khawharzia kha a mak! Bakah Rinmawia nen boruak eng emaw kha an lo nei ve bawk si. Tunah chuan a kim ta e. 

Duati te doctor va hmu pawh chau zetin in an thleng a, damdawi hnawih tur leh ei tur a chawh a. A dampui vat ang chu maw.. Tluanga nen an la inbe leh lo va, biak châkna a nei hran lo. Doctor nen an inhmu zo chiah tihin Zothana'n a lo call a, chanchin a rawn zawt ve. A ngaihtuah lutuk chu Duatj a inthlahrung angreng. A thiam loh vek pawh a ni si lo. 

"Zaninah lo len i phal em! " Zothana msg chu a chhiar a. A chau viau naa a ngaihtuah ve si. Han hnar kha remchang lovin a hria a, "phal e a" tiibna reply. Tluanga vangin mipa dang hi a be tha peih vak lo. Mahse.. Zothana chuan a ngaizawng hran lo bawk a. Lo kawm ve mai mai kha pawi a ti lem lo. 

Zanriah an ei khamna a la rei vak lo tihin Zothana chu a lo thleng nghal mai. Eitur eng emaw a rawn lei nual lehnghal. Duati chuan, "A ngai lo sin. I insêng nasa tawh si" a lo ti vat a. A nui ringawt. Duati bula ţhut pah chuan, "I scooty pawh naktukah a lak chhuah theih ang. Vawiin lamah an buai deuh a, an zo hman lo a ni' a ti a. A rim chuan Duati lung a tileng deuh, a chhan a hre lo. A perfume chu a rimtui tawp. 

"I va fel ve, i rawn leng leh a. Hei ani pawh damdawi te a ei ang a, kan hnawih bawk ang a, a tha vat mai ang" Zami chuan a lo ti luam bawk a. Lawma erawh chuan Sittiong roomah news a ngaithla thung. A lo patlling ve ta viau mai. A dulte a tikiar ve tawh lehnghal. Zami chuan thingpui sen hâng no a va pe a, Zothana pawh a thlit ve nghal. 

"Chuan, class i kal theih loh phah awm sia.. A pawi e" Duati melh chungin Zothana chuan a ti a. 

"Aa.. Tun lai chu kan kal tha vak lo hrim hrim a, a zia reng. Chawlh ka mamawh tho alawm" a lo ti a. Zothana ei tur lo ken chu phawrhin thenkhat chu a hawng a, a ei pah zauh zauh. Zanriah ei kham chauh mah se.. 

"ka thlah hreh chuang lo che a nia. University bul lawkah khan hna ka thawk dawn a.. " Zothana chuan a ti leh a. 

"A ngai lo. Chawlh ka duh zawk alawm. Ka thianten pawimawh chu min hrilh thei tho a" a lo ti niah niah a. Zothana chuan a melh reng, a va melh ve chiah a, a lai deuh. 

"Ti nge min en reng? " a ti a. 

"Hmuh i nuam" a lo ti nghut. Tluanga mizia leh Zothana mizia chu thil kal hrang daih a ni. Tluanga chu a ţawng duh a, sawi tur a hre bawk. An titi tui viau zel reng a. Zothana erawh tawngkam a thiam loh bakah sawi tur a hriat loh hmel thei viau. Amah Duati lah sawi tur haihchham ve thei tak a lo ni bawk nen.. Mahse, an inkawm thei ve tho mai. 

Bena pawh Kolasib atangin hlim takin a rawn haw ta a. Thil tam tak an sawiho a, Kum thar lamah chuan inneih te pawh an tintuah thei ve turah an ngai. A rin ai leh a beisei aia an dawnsawn that vangin a lawm takzet a. Eni chu a ngaisang takzet bawk. Mahse, buai rukna a nei a. Hna mumal a nei tlat lo chu a ni. Jail tang chhuak te chu tu'n an chhawr duh a ring lo va, a qualification lah a chuti lua si lo. An chhungkua khawsak harsa tak ni lem lo mah se; nupui nei ve ta ngawt se, a chhungte chawm tura neih ngawt kha a thil hreh ber a ni ve a. Eni'n hna nei mah se; eng emaw ti tala thawh chhuah neih ve chu a duh takzet a ni. A chhungte bulah pawh a sawi a. An upa ber pa ber anga an en chuan, "Taxi te hi lei ila, i khalh ve duh mai lawm ni? " a ti a. Bena chuan a hreh lem lo. 

Bena pa hi Shillonga a awm lai khan a boral tawh a, a nuin hmeithaipuiin, a nu pawh Jail-a a awm lai khan a boral a. A ruang pawh a hmu ve ta lo. A nu chu a nuna pawimawh ber a ni a, a hmangaihzia leh a tana a hlutzia a hria. Jail atanga chhuah a chak loh chhan pawh a nu in a lo hmuak tawh lo tur kha a nia. Unau zinga naupangber ni bawk, an lo buaipui hrep tawh kha a nia, a u te pawn an duatin a theih chen chenah enkawla dawmkan an tum ve reng a. A vannei angreng viau. Tunah hian an upa ber te chhungkua nen an chengho a. An monu lah an unau ang chiah a nia, Bena chu nau ang tak takin a en a ni. Bena u chiah erawh an Lungleiah hna a neih vangin an insawn phei ta rih a. Ani pawn a theih chen chenah a nau chu a ngaihtuah ve khawp mai. 

Bena u nupui Tei chuan, "Diteii te hi be ve renh reng la, taxi khalh i hreh paw'n, an sumdawnnah sawn hna ruak te pawh a lo awm thei asin" a ti a. 

"Aa.. An sumdawnna ka tihminghliau palh ang. Ka sawi anih chuan min thawhtir dawn chiang sa. Chuvang chuan taxi chu min leisak u la, ka'n khalh ve chhin phawt ang e" Bena chuan a ti a. A sawi dik reng bawk. Diteii chuan hna a pe dawn chiang tih a hria, mahse, pur buai a duh lo. A nihna a inhre ve a, Convicted a ni tih hi englaimahin a theihnghilh ngai lo. Chuvang chuan amah hmangaiha duhsaktu te tan hnawksak loh theih dan ber tur a ngaibtuah ve a ni. 

"Hei hi D' Key.. Chuan hei tihian.. Aw hei hi C'Key" tiin Rinmawia chuan guitar chu a hmet kual a. Drose chuan a en uluk ngang mai. Vawi hnih khat Rinmawia'n a hrilh hnuah a ti ve thei nghal zel a. Rinmawia paw'n a thiam chak lutuk chu mak a ti deuh. Rinmawia chuan a hnunglam atangin a rawn khawihpui a, Drosein a lo perh thung. Thiam lo zetin a zai pah rat rat. Rinmawia rawn kun hniam leh a sir zawnga a hawi chu an intawk fuh a. A biangah tak Rinmawia hmui chuan a si ta.. A lum pupin a hria. A rang a rangin a tho va. Kawisawi zeta dingin, "Ih.. I chhe siah" an ti ngawt a! Rinmawia za lutukin a nui. 

"Ka tum vang pawh a nih loh kha" a ti a.

"I tum reng. Mipain min fawh vawikhatna" a la ti zui! 

"Hmui pawh a nih loh kha"

"Awii hmui phei chu.. Awii ka zak lutuk, ka chho dawn. " tih leh tlan chhuah a rual. Rinmawia chu a khi vur vur. "A va innocent mai mai em" a ti rilru a. A ngaih a tha hliah hliah mai. 

"Eng a?! Tu maw a va hmuh thin? " tiin Pu Vanlala chuan phonein tu emaw a be mawlh mawlh a. 

Lehlam ami chuan,"Tu nge ka hre lo. Mahse, Pu Dintluanga main building-ah a lut thin chiang" a rawn ti a. Pu Vanlala a sen awp awp. Phone a dah a. Khumah a thu hnawk. Pu Dintluanga chu a hre chiang khawp mai. Putar hausa tak niin kum 7 liamta khan a thi tawh. A fapa Malsawma'n a in pawh enkawlin, eng sumdawnna nge a khawih tih hriat a ni lo. He Pu Dintluanga ngei hi Drose rubotu Lalrinawmi bail tumtu leh ukil pawh rawihsaktu a nih kha mawle. Engkim chu a rawn fiah ta uar uar mai. Chu lai hmunah a nupui pitar hi engvangin nge a kal thin? Eng nge a va tih teh chai ang le?! A hmaia thlan fim chu a huih pawk a. 

"Zawmi, ka rinhlelhna thin che kha a lo dik ngei dawn anih hi" ti zawi sup a. A maimichhing vang vang. 

"Nu, min la chhuak rawh. Heta tang hian. Hetah hian ka awm duh tawh lo. Ka tha vek, dam lo emaw min ti mai mai alawm" Teteii chuan a nu melh chung chuan a ti a. 

Pi Zawmi rilru a buai ngang mai. "I dam ţêp tawh alawm. Tuar hram hram rawh" a ti dam diai a. 

P"Anih Diteii ten min ngaidam thei em? " a ti ta khauh a. Pi Zawmi a îp chawih. 

"Ka.. Ka hre lo. Ka la sawi lo va" a ti niaih a. 

"Min pawm duh tawh lo vang. An fanu ka ru bo si a" tiin chunglam a melh vawng vawng a. 

"An pawm duh ngei tur che a ni. Keiman ka bei dawn alawm.. Lungngai suh. Mahse, an tan i hnawksak tawh tur a ni lo. Chu chu min tiam la.. " a ti a. 

"Umm ka tiam a che. Ka hnawksak tawh miah lo vang" a lo ti vat. Pi Zawmi chu a chhuak a, Malsawma nen an inbiak a ngaiin a hria. 

"Chhuah zalen tawh mai rawh. Ka hruai haw mai ang" a ti a. 

"Ni rih lo ve. A dam ţêp, alter kan be tawh a. A la insawi duh lo va, engvanga huatnaa khat nge a nih hriat kan duh. Heti ringawta i hruai chuan nakinah i tan pawh a la hlauhawm dawn asin. Tin, i chhungten an pawm thei kherin ka ring lo" Mala chuan a ti dam thlap. 

Pi Zawmi chuan, "Khawngaihin I pa diary chu min pe tawh la. Ka fanu tak tak a ni em tih pawh ka la chiang ngam lo a nih hi" a ti tham chhal a. 

"Aw le, lo nghak lawk rawh" tih leh pindan pakhata luh a rual nghal a. Diary a kawm dum a rawn keng chhuak a. Pi Zawmi kutah chuan a hlan ta a ni. 

"I nu hi tun lai a dik leh tlat tawh lo. Enzui deuh a ngai a ni. Ka ngaih a ţha lo" Pu Vanlala chuan a ruk deuhin Diteii bulah a ti a. 

Diteii chuan, "A va mak awm ve aw. Ka lo ngaihven ange" a lo ti a. A nu vanga buaina neih fô chu zahthlak a ti lek lek tawh. Inah te awmin mi dangin awm ve mai mai se.. Engah nge rinhlelhawma a awm fô ni. An pa pawh a hrilh a. Dinfela erawh chuan, "Aa.. Ka pa pawh a upa ve tawh a, a ngaih a tha lo hma ve bawk a niang" a lo ti a. Han rinhlelh vak chu a duh lem lo a nih hmel. Diteii ngaih erawh a tha meuh lo. 

Sunday a ni bawk a, khua a thain ni pawh a sa vawl vawl viau. Pi Zawmi chuan a luhai chhuanlamin a inkhawm lo. Mahse, Diary chhiarna hun a duh vang a ni ngei ang. An pa chuan ngaihţha vak lo chungin a kalsan a. Pi Zawmi chiah inah a awm. Thiangi pawh inkhawm lo vin an khaw mi te in luahah a leng. 

Pi Zawmi chuan, Room kawngka a kalh ţha te te a. A tarmit vuahin, rem taka khuma ţhu mu chungin, Pu Dintluanga diary chu a chhiar ţan ta a. 

"Hmeichhe danglam tak a ni. A changin pawisawi lo tak angin a lang a, a chang erawh chuan ramhuai ang maiin a khawsa thung si. Kan intawn dan erawh a dangdai viau. Ka sumdawnpui Pu Thangluaia nen kan inhmuh ţumin room lehlamah hmeichhe thinrim awrawl kan hre ta a. Room service ten an va kik vat. An thawm a rin êm vangin keini pawh kan chhuak ve hial a. Chutah chuan a ni Zomuanawmi chu ka hmuh tak ni. Kekawrte leh kawrhnuai nen, ke lawng chauhin room atang chuan a thawmhnaw pawm ţûn chungin a lo tlan chhuak a. Ruih erawh a nei tih a lang. A ţap par a, a mit hnawihte chu a biangah a dum thla nguai mai. A rapawm lek lek. Mipa lian lam, hmel nelawm lem loh tak a rawn chhuak ve zat bawk. An pahnih chuan an indinchilh ran a. Kan lo thlir ţhap. 

"Min khawih hlek suh. Tu nge i nih ka hre hlek lo a nia" Hmeichhia chuan a ti hlak hlak a. Mipa chuan nui sâwng chungin, "Ka hmei i nih kha. Khatin mi dang awm laiin lemchang suh" a lo ti a. Hmeichhia chu rawn tawlh hnung hret hretin min rawn su deuh thuak a, "Ka tihpalh aw. Khawngaihin min pui rawh" a ti ta ngawt a. Kei lah chu a ngaihna hre lo zetin ka lo ding ngawi reng. 

"Ka pu, ani saw ka hre ngai lo tak tak. Police koh pawh ka ngam sak. Ka muhil a, ka harh chuan ka bulah a lo mu ve ringawt. Min lo phelh mek a. Min pawngsual a tum a ni.. Min pui rawh" a ti ta mial mial a. Mipa chuan, "Zomuanawm, dawt muhlum sawi suh. Ka duh hun huna ka bawhbeh theih i nih kha" a rawn ti. A dik dawn lo tih hriain, tlangval chu inbengdai turin ka ngen a. Hmeichhia chu roomah ka thianpa nen chuan kan luhpui ta a. A inha fel a, a chanchin te kan han zawt a. Fel takin min chhang ve mai. Ks a ni ang a, kha pa kha a duh loh zawngin a khawsa a nih ka ring ta deuh. Mahse, a tang na ve viau bawk si. A ngaihna tak pawh kan hre lo. 

Tichuan, hotel kan chhuahsan pawh chuan min zui ve zel a. A mi zuam zawng ka ni teh chêk emaw ni "Ka pu, inah ka haw peih si lo va, zanin chauh chu i inah min riahtir thei ang em? " a ti ta a. Ka remti vak lo nain a ruih hmel si a, tawhsual te a tawk palh ang tih hlauin ka in lamah ka phur ta ringawt a ni. Ka fate an awm lo bawk a, tin, hmeichhia hi chu ka inah an mikhual lem lo bawk. Mahse, ani hi chu hmeichhe dang ka hruai luh angin ka hruai ve lo. Riak tur satliah chauhin. A chhan chu ks ka mutpui ngai lo a ni. 

Tichuan, ka inah chuan room ka pe a, a riak chu a ni mai. Zinga ka thawh chuan, a lo la tho lo. Eisiam hnenah chaw eitira haw tir turin ka hrilh a, walk turin ka chhuahsan ta a. Ka let leh chuan chaw a lo ei mek. A lan dan pawh a ziaawm ta deuh. Nula hmeltha tak, pian nalh tak a lo ni a. Zanah kha chuan a lo bal ţawp deuh nen, a langsar vak lo a nih dawn kha.. A bulah thuin chaw ka ei ve nghal a. 

Zan lama a zahzum leh inthlahrung ang dêk khan a awm tawh hauh lo. "I hausa tih ka hria. Hna min pe ve rawh. Engpawh. Tha takin ka thawhsak ang che" a ti siam siam a. Hmeichhe tam tak tih fo dan a ni. Mahse, ka sum ît vanga sawia min tlawn an ni tih ka hai ngai lo. 

"Ka nei miah lo" ka ti a. Min ngen nasa, ka tuang ka tichhah tlat. Chaw ei khamah sumdawnna buaipui turin ka chhuahsan a. Haw turin ka hrilh bawk. 

Khami hnu kar khat atang khan Teteii chu nitin deuhthaw a rawn lang ta ziah mai! Hna dilin! Ka mutpui a beisei em ni zawk tiin ka ngaihtuah fo. Hna a mamawh tak tak pawh a ni thei tiin ka ngaihtuah tho bawk. A tawpah ninawm ka tih tak avangin ka inah chuan maid angin ka la lut ta a. A thawk hreh hauh lo. A rilru dik tak ka lo hre lo êm zawk a lo ni. 

Teteii chuan lungawi takin maid hna chu a thawk a. A chhungkaw chanchin ka hre lo va, ka zawt ngai hek lo. Chutih lai chuan model pakhat ka kawp thin a. Ka ina ka hruai luh chang chuan Teteii chuan chhuanlam siamin bikbona a dap ziah. A hnua ka hriat leh danin ani pawh super model hial a lo ni tawh a, mahse, a tlak chhiat tak vangin a modelpui te a lo hmu zak thin a niawm e. Zan khat chu ruah a sur nasat deuh vangin a haw lo va. Riahna tur a tam a, riak mah se pawi tihna ka nei lo. Ka inah hian hnathawk mi 6 ka chhawr a, a tu amah chu ka biain ka hmu zen ngai lo. Ka asst. Hian a lo enkawl mai thin. Hmeichhia ka riahpui loh zan niin Whisky ka lem hlek hnuah Zokhawthar atanga bungraw lo senghawi tur ka ngaihven a. Ka biak kual mek laiin ka room kawngka a rawn kik a. Ka va hawn chuan Teteii chu a lo ding ran a. Phone dahin, "Buaina i nei em ni? " ka lo ti a. 

"Ka buaina chu nangmah i ni" a ti ta mai a. A ngaihna hre lo taka ka melh reng lai chuan, kawngka a va kalh a. Ka hmaah dingin a thawmhnaw chu a phelh ta mai. A nui sang bawk. A awmdan avang chuan ka hamhaih deuh a, a beisei erawh ka hria. Chuti na na na chu tiin rilru ka siam ru nghal. saruak ngal ngata ka hmaa ding nalhzia ka hmuh chuan mak ka ti takzet. Ka lo kai ve sek bawk nen, ka kuah nghal chawt. Khumah kan inbawh ran a. Chutah chuan a ni Zomuanawmi danglam bikzia ka hriat tak. Ani ang em ema zei leh min hneh thei hmeichhia kha ka damchhungin ka ka tawng lo va, ka tawn leh ka ring hek lo. Engkim chu a bu ang thlapin a ti ni maiin ka hria. Min eizo ta vek mai. A tel lo va awm thei lo turin min thunun a ni ta ber mai. Zan khuain ka bulah a awm zui a. Ka awm nghenga bei tlan chungin, "Tumah.. Tumah reng reng I mutpui tawh tur a ni lo" a ti ngher ngher a. Ka hmin chiang kher mai. Mi dang mamawhin ka inhre ta hauh lo. Chu chu a danglamna a ni. 

Mahse, mi mawl tak ka ni bik lo va.. Teteii chu ka chhui ru ve tho. An chhungkaw mizia leh eizawnna pawh ka hre ta. A mimal nun pawh ka hriat theih tur chin chu ka hre ve vek. Nau a chhiat tawh tih pawh ka hre zui. Iaina chhete mah ka nei lo va, nau a chhiat vanga ruihhlo lama tlan ta a nih ka ring bawk.. Maid ringawt nihtir chu ka tum ta lo. Ka sumdawnna hi sawrkar phal loh, mahse, man chhuah hleihtheih loh a nia. Chuta hnim phum vea a fin kherekna chu hman tangkai ka tum ve tho. Ani pawn a hreh lem lo khawp mai. Tichuan, kan tan a thawk zui ta a.. Mahse, a hmeichhiatna hmanga hlawkna tel tir erawh ka phal hlek lo. A duh bik hek lo.. an inah a haw ngai mang lo. A chhungte pawn ngaiah an nei tawh a ni maithei. Buaina a nei ngai lo. Mahse, a ruih chang hian a laizawn leh a pa fa bik a huatzia a chham thin. "An mittui a tlak hunah ka nui ang" tih thu hi a sawi zin ber a ni thin. 

Hun a liam zel a, zan khat chu a rawn kal lo va. Ka call dawnin a switch off tlat bawk si. Zan dangah chuan a chin tur min hrilh ziah si. Mak ka ti angreng viau. Mipa dang a hmu ta mai em ni ang tih te ka ngaihtuah a. Ka awm a nuam lo ru hle.. 

Mahse, zing dar 2-ah min rawn kai tho ta hlawl a. A mit a sen vek a, a thawmhnaw a thler hnu bawk. A taksa hmun thenkhatah leh a thawmhnawah thisen a kai nual bawk. Thil awmzia ka zawh hmain, "Ka thih a ngai.. Ka thi tur a ni" a ti nghal ringawt a. A ngaihna ka hre lo kher mai.. 

"Kha nu kha ka that a ni.. A thi tawh. Ka kut ngeiin ka that a ni. Chuvang chuan ka thih ve a ngai.. " a ti a. Zomuanawmi ka hriat thin nen an danglam ta hle. A khur zawih zawih a. A mangan hmel ngawih ngawih..

"Ngati nge i thah? " tia ka zawh lahin "Ka hre lo ka that tih chiah ka hria" a ti ringawt. Nunrawng tak ni si, chutia hlauhlawpa a awm chu mak ka ti deuh. 

Darthlalanga in melh vang vangin a nui ta sak a. Min rawn melh lehin, "Eng emaw chu kan tih a ngai a ni" a ti zawi ta raih a. Tuna ka hmaa ding hi chu nichina hlau hlawp em em kha ni lo vin nunrawng leh khumlaizawla zei taka ka uite nj thin kha a ni leh tawh.. Tichuan… "

"Nui, Nui" Pi Zwmi chuan rang takin diary chu a thukru nghal a. Thawk la kawk kawkin an room kawngka chu a va hawng a. Chîk fêin an pain a lo melh kal mai. 

. "In va bang hma ve" aw lawi zetin a ti a. 

"Kan bang tlai zawk ka lo tia" tih pahin a inthlak nghal sawk sawk a. 

"Thingpui ka va lum ang che aw" tih leh chhuah a rual nghal. 

Pu Vanlala chuan enzui vawng vawng pahin, "Ka hrechhuak ngei ang" a ti zawi sup a. 

(Tawp leh ta..