Drose 17

D'ROSE… (Chapter- 17)

Ziaktu : Toni Rãlte

Saidingliani chu a mu meng kar mai. Dinfela hmel a mitthla reng a, Diteii a rawn lang ve zeuh ţhin bawk. Heti taka a thinlunga thi thei lo mipa hi a la tawng ngai reng reng lo va, a pasal kha a hmangaih takzet emaw a lo inti ţhin. Dinfela a hmu ta a, amahah hian thawk a rawn awm ta chat a. Mi pasal ni lo se chuan beidawnsan a tum dawn hauh lo, mahse, nupui neiin a nupui a hmangaih hle tih a hre thei. Mi pahnih inkara tlakzeh kha a duh lo ber a ni lo. Dinfela a hmangaihna aia nasa zawka hmangaihtu Diteii thinlung tihnat kha a ngam ngang lo a ni. Tuna a programme-ah hian Dinfela chiah a lo kal a lo hlau a, a duh dan takin Diteii te an rawn tel ve. A chetsual theihna tur leh a kal filawrna tur daltu an awm a. A che chhe êm lo vang chu. 

Hotel room pakhat khum zau puia nupa tuak khatte pawh an titi malh malh mai. Saii chungchang an sawi ve tho. Diteii'n engkim a hre vek tawh tho bawk a, Dinfela pawn engkim a hrilh ve. Saii leh a pasal inthen dan te pawh. Diteii chuan Saij chu a lainat ru hle. Hmangaih an inţawm chu a ni ta mai si a. 

"I luck ka ti. Pa i nih hun hian i luck zual" uang pah hian an pa bulah chuan a ti a. An pa a khi suk, "Ka chhe lo em alawm" a ti uang ve a. 

"Min phû loh theih nen ka phu tawh lo zawk chein ka hria" a lo ti leh niah niah. 

"Nupui hmel tha satliah lo, fing fel em em, fa enkawl thiam si ka nei hi kei pawh ka inchhuang asin.. Mi hian min awt thei ania aw" an pa chuan thutak zawk hian a ti a. 

"Fa enkawl hi a lo har a nih hi. Fa neih hmaa duhthu kan sam zawng zawngte kha a tak ramah chuan apply a lo har em mai. Phir te hi chu an la naupang a, an khirh lo. Kan Drose mawlh mai hi a ni" Diteii chuan a ti a. A fanuin ngaihzawng lam a buaipui deuh tih chu an pa a hrilh dawn nge dawn lo tihah a inngaihtuah. A sa leh vak ang tih a hlau deuh si. 

"Kan fanu hi zawng a kum a tam ang a, a zia mai ang. Tlan tauhna tur a nei tih a inhre ve kar a, hei vang hi a nih hi. A pu lah hian keh thei dawmin a dawm si a" a lo ti ve a. 

An nu chu a kuah nghet sauh. A mitmeng atang chuan an nu pawn a beisei chu a hai bik lo. Nupa vannei tak an ni. An inneih tirh aţangin nupa nun, an khum laizawlah han induhkhawp loh leh intih taurauna an la nei miah lo va, Diteii paw'n zei falua lo mah se, tlin takin an pa chu a dawl ve zel a, an pa lahin an nu zai a ngai thiam bawk. Hei hian an nupa nun pawh a phuar khawm ţhain, a keng kawh ve pakhat bawk. Nupa ţhenkhat inngeih lo, eng emaw hleka intai rana thinrim hluai thinte hi zir chian chuan, an khumlaizawl nunah lungawi lohna an neih vang a ni duh viau mai. An lungawi lohna chu tlangaupui lung lung chi ni hek lo, thil dang hmangin an chhungril thinurna chu an hrithla a, inhauhna leh buaina lian zawk a kai chhuak fô! Mi thiam zawkte râwna, nupaa thil sawi dun fô hi a fuh thin rêng a ni. 

A larm bengchheng zet chu thophang zetin a hmet tawp a. A mut a la chhuak ngei mai. Mahse, vawiiah test an nei a, school thulh chi a ni lo tih a hria. Phur lo zetin a tho chhuak a, a ham bai bai mai. A'n intifai a, a insiam ţan. Rinmawia nen an inphur lrh ngei awm si a. A va peih lo tak êm. 

"Tukţhuan ka peih tawh aw.. Drose" Zari'n a rawn ti lang lang a. 

Muangchangin a chhuk thla. Rinmawia'n dawhkan a lo kil ran tawh. Ngawi rengin a chair-ah a thu ve. Ţawng pawh ţawngţai lo vin a bar hmiah. A nu a awm chuang lo a ti deuh aniang. 

"Tlaiah min lo nghak leh dawn em? " Rinmawia chuan a ti a. 

"Aih" a ti chhum hmak. 

"I thinrim mi? " a ti ta tawp a. A chaw ţhial lai a tawp chawt. 

"Aw rim e. I tenawm em a ni" a lo ti tawl! Thu han pehhel kual thiam ve hek lo. Rinmawia pawh a chaw lem a sak ţalh mai. 

"Nia, ka tihpalh" a ti ta tawp. An inbe leh tawh lo. Ngawi rengin an inphur a. A chhuk dawn pawn an inbe chuang lo. 

Zorina'n stepah a lo la nghak zui. Kal pelh mai a tum a. A banah a rawn chelh. "Eng nge a? " a ti hâw a. A tum bâr bawk. 

"Ka be duh che" a lo ti sup. 

"Ka hman lo" tih leh tlan chhoh a rual nghal. Zorina chuan beidawn a la tum chuang lo. He nau hi a duh telh telh tlat. Tunlaiah tleirawltê tê pawhin ngaihzawng an nei fur tawh a, an schoolah pawh inngaizawng an kat nuk. Chuvang chuan thil zahthlakah an ngai lem lo. 

Test chu an han nei ta a. Zan lamah engmah zir hek lo, a thiam lo leh ngei mai. Mahse, a ziak ve tho. An class ami thenkhatte chuan an entawn a, a thutpui nu ngei pawn a en char char. Mahse, a nu thurolum, "entawna pass ai chuan, fair taka fail a tha zawk" tih hian a thunun hneh bawk a. Entawn miah loin a ziak ve ţeuh. A pass phak loh pawn pawi a ti hran lo. A zir lo miau a. Rinmawia vang vek. 

"Mimi, inthen mai ang. " Rinmawia teh ngawt chu Mimi chuan mak a tih hmel kher mai. 

"Engvangin maw? " a lo ti a. A ngui nghal vek. Rinmawia chuan mimi hlim lo hmel chu a khawngaih ve leh tho si, "Aa.. A buaithlak. Kei aia tha i hmu em em ang. Kei chu lehkha zir that ka duh a" a ti ta ringawt. Mimi chaun, "Mi dang an awm mi? " a ti ta a. 

A mitthlaah hmeichhe pakhat a rawn lang zawk, Drose ngei chu. Mahse, "Awm chuang lo ve. Keima lamah harsatna ka neih vang a nia" a ti a. Mimi tan chuan a tlawm thlak khawp ang. Mipa zawkin inthen a rawt bakah an bultanna lah ama sual chhuah kha a ni ve bawk si. 

"Min duh thlawt loh chuan a tir khan sawi tur alawm" a ti nghat a. 

"Ka duh lo che a ni lo. Ka sawi tawh kha" a lo ti ve mai. Mimi chu mittui tling pam chungin a kalsawn a, Rinmawia rilru a insual nasa kher mai. A single chu a ni leh ta der mai. A double rei lo ngei mai. 

"Duati, inhmu lawk ang. Khawngaihin" Tluanga msg chu ner nâwngin a chhiar. 

"Inhmuhna chhan tur kan neih ka hre lo ve" a ti hmak. 

"Ka lo nghak ang che. A ngaiah khan" a la rawn ti ngam. 

"Phuihnam i mamawh" tiin a reply hram. Phone a ak daih. 

A sarhu lai kha chuan a na viau, tunah pawh a na lo a ni lo. Mahse, Tluanga a huatna chuan a hmangaihna kha a hliah khuh hneh lutuk. A bumna chiang lutuk leh phatsanna tenawm vang chuan engahmah ngaih lohna chin a nei chho va, a tira hrehawm a tih ber amah a duat anga a nupui tur a duat tur a ngaihtuaha a na lutuk pawh ziaawm lam a pan ve hret hret. A nuteii thurawn ang khan ni 3 vel kha chu Tluanga sûnna angreng deuhin a hmang tawp a, a ţap a, a rum a, thil pawh a ei mumal lo. A taksa pawh a chhe reng a. Mahse, khang a tawrh tlawk tlawkna kha a kian tak hnuah chuan a natna chu a kalpah thei ţan. A dam hma riaua a inhriatna avang chuan, "Ka lo hmangaih tak tak lo aniang" te a ti tawp. Pawi a ti lo. 

A la naupang a, a hmel tha a, duh dertu tam tak a nei ve. Mahse, fimkhur taka thlan a duh. Class an bang a. A ţhiannuin kal kawina tur a neih vangin amahin a haw. A scooty chu hnehsawh zeta khalhin in lam a pan vang vang mai. Drose te ina pen kawi a tum zuau a, mahse, a nuteii an awm loh bakah Drose te an la hawn a ring lo deuh nen a tlang a. Drose te in a kal pel hlawt tihin chak zetin car a rawn tlan chho va, side chu la ve tho mah se; kawng zim lai a nih vangin an intai thuak. Duati chu a tlu ta a. Car pawh a ding dawt. Tlangval lian thelh thawlh a rawn chhuak vat a; "A va zia lo em. Ka tihpalh takzet, i tha em? " a rawn ti vat vat a. Duati chu kai thoin a scooty chu a tun thatsak a. Chhiat zawng a chhe tam lo.

Duati chuan a tlukna lamah a khup a sawh a, a kekawr khup pawh a pawp hawk mai. Lungţhil lai a lo ni bawk nen, lung nawite a kai luai a, a na reuh ngawt ang. A bai auh auh a, "Aw ka tha reng" a ti a. A lung chu a awi chiah lo. Tlangval chuan Duati chu chiang taka melhin, "Pawi ka ti lutuk. Engkim ka tum vek ang. Ka thlah ang che" a ti leh a. 

"A ngai lo, ka kal ve thei mai ang" a lo ti a. Mahse, a car chu Drose te in chhak kawng zau laiah han park ţhain hmanhmawh zetin a rawn chhuk leh a. Duati scooty chu start-in, "Khawngaihin lo chuang rawh. Ka tihtur alawm" a ti dam thluam a. Duati lah a ke na bawk si, a tlawmngai peih ta bik lo va, a chuang a. 

"Engtin nge i chhoh leh ang. I car i dah daih sia" a ti a. 

"Taxi a tam ang" a lo ti sup. Duati sawina lamah an tlan zui nghal. In chhunga a bai lut chu a nu chuan ngaihtuah hmel zetin chanchin a lo zawt nghal a. Tlangval pawh chabi nen a lo lut ve zat bawk. Duati chuan tha takin a nu chu a hrilhfiah a. Tlangval chuan, "Zothana ka nia, ka thiam loh liau liau a ni e. A scooty siamna man saw chu ka tum anga, a inenkawlna pawh.. Ka thianpa hi doctor ania, in duh phawt chuan ka hruai thei ania. A na viau ang. Khup nâ chu a hrehawm si a" inthiam lo takin a ti zung zung a. Mi sual tak zawng a nih hmel loh. 

Zami pawh chuan a hrethiam viau. "Amah pawh hi a tlan chak ve thin alawm. Engmah a ngai lo. A siam man phei chu a to lo tawp ang" a lo ti ve thliam a. Duati erawh a ngawi reng. 

"Aaa ka inthiam ve nan tal pawh min tihtir hram mai rawh u" a ti a. 

"Ka buai si a, i ac-ah ka transfer mai ang aw. Naktukah hian zin chhuah ka ngai si a. Khawngaihin i gpay no min pe thei ang em? " tiin Duati a melh a. 

"A ngai lo kan tih kha. Engmah a ngai lo. Ka thiam lo ve tho alawm" a lo ti. Zâmi'n thingpui a va lum a. 

"A mak e aw.. Min tihtir mai rawh u. A nuam lo" a lo ti ve tlat si. Hrehawm a tih lutuk loh nan Duati chuan a thil duh chu a hrilh ta nge nge a. 

"A lawmawm e. Doctor chu ka lo be daen em? " a ti leh a. 

"A ngai lo, ka hmelhriat a awm ve alawm. Ka lo inbuaipui tawh ang" Duati chuan a ti a. Zâmi'n thingpui a rawn chawi lut. Tlangval chuan hmanhmawh takin a in a. Zami nen an titi. 

"Mizorama ka rawn chhuah chhohna a la rei lo va, Delhi-ah ka awm deuh ngat ngat a ni mai. Mahse, sumdawnna bul rawn ţan ka tum deuh a. " tiin a chanchin tlem a sawi. Zami pawn an hming leh an chhungkaw eizawnna te a sawi ve luam. Pawisa an inthawn fel a, thingpui a inzawhah, "Meeting ka nei si a. Ka hawnsan phawt ang che u. Ka lawm hle mai.. Lo dam rawh aw" tiin Duati a melh a. A lo bu ve nghat. Zâmi'n a va thlah thung. 

Duati pawh a inbual fai a, a khup chu damdawi an hnawih a. A thìp kher mai. A nu pawh a pui peih lo. Zanriah ei hma zawng a mu. Tluanga khan a nghak thlawn ve chiang ang chu.. 

Drose pawh Rinmawia tel loin a haw leh. Thingpui a in laiin Rinmawia a lo haw. A zum dûk hian a hriat. Zari'n a lo bia. Drose erawh chuan kam khat mahin a be lo. Zorina msg a reply nui vur vur. Zorina rawn serious vel chu nawi zet zetin a lo chhang thin a. Chu chu a nuihpui a ni. A nuin a lo call a, "Aw nu, in lo haw mek tiraw? " a ti nghal a. 

"Chu chu nia Bawihte ka sawi tum, naktukah kan lo haw zawk ang. Kan programme a lo rei deuh a, rawn hawn nan chuan a tlai deuh tawh a ni" A nuin a rawn tih chuan a ngui nghal. 

"A mak.. Min ngai ve lo a nih kha" a ti hmak a. Phone a dah nghal. Diteii a buai leh teh ang chu.. 

"Ka chhuak leh lawk dawn a. I pu lo hawn hunah a thiante a tlawh ve lawk' in lo ti dawn nia.. Pi Zawmi'n a ti a. A chhuak nghal. Zari chuan a rilru tetein, "Ka pi hi tun hnai hi tun ang hunah hian a chhuak ve ziah" a ti a. Mak a ti ve deuh. A chhuak ngai si lo. 

"Eng nge vawiin lam a an? " Doctor chu a melh a. Teteii chu a lo thu mu a. A nu chu a lo en reng ringawt. 

"A zia e. A taksa hi a la chau deuh a. A hriatna thenkhat a la hre chhuak thei lo bawk nen. Hmanhmawh taka enkawl chi a ni lo tih i hriat kha" Doctor chuan a lo ti a. Khum bulah va pheiin, "Tete" tiin biang a va chul a, a lo dai diak mai. 

"Hmm" a ti ringawt. 

"I ţhat chhuah hun ka nghakhlel khawp mai. Nangmah dik tak ka hmu duh tawh a ni" dam thlapin a ti leh a. 

A nu chu melh vawng vawngin, "Nu" a ti sap a. Pi Zawmi hnuk a lo ulh. 

"Umm.. I dam ţêp tawh e" a lo ti a. 

"Ka hrereng thin che a" Teteii chuan chau zetin a lo ti a. Pi Zawmi chuan a heh a pet fan fan ringawt. A fanu chuan thil tam tak a lo ti tawh ngei mai. Mahse, a hmangaih a, a hmangaih reng dawn. Diteii ten pawm thei lo mah se; a indanpui mai ang chu. 

Tlangval kha a lo lut a, "I damdawi ei a hun" tiin Teteii chu thil tuiril chawhkawi hi a pe a. A lo in khawlh khawlh. 

"Tlangval, i hming pawh ka la hre si lo va. Ka fanu heti taka i buaipui avang hian ka lawm em em ania.. " Pi Zawmi chuan a va umzui a. 

"Malsawma ka ni a, Mala tiin min ko thei ang. Engmah ka ti hleinem. Ka mawhphurhna a nih vang zawk alawm" a lo ti dam thlup. An inbiak mek laiin tlangval pakhat Malsawma nena intiat rial, inang lek lek a lo lut ve mek a. 

"Meeting boring tak a ni" a rawn ti lut bawrh bawrh. Mala chuan, "Engkim a tha vek maw? " a lo ti vat. 

"Umm tha a ni mai. Eng nge Teteii chu a an? " tih pahin Pi Zawmi chu a melh zawk a. 

"A tha ve zel e. Hei hi Teteii nu a nih hi.. Pi Zawmi" a lo ti ngjal zat a, Pi Zawmi en chungin, "Hei hi ka nau Zothansanga a nia, Sumdawnna thar rawn bun tumin Delhi atangin a rawn chho a ni" tiin a hmelhriattir nghal a. Pi Zwmi pawn a nuih ve sak. 

Pu Vanlala lo haw chu Zari chuan a pi thuchah kha a lo hrilh nghal a. Pu Vanlala chuan engmah a sawi lem lo. Roomah lutin an nu Diary kha a zawng nghal vat vat. Mahse, a vãng ta kher mai. Hmun him takah a thukru a ni ngei ang. 

"Upat tawh alama buaina neih leh chu aw" a ti rilru vawng vawng a. An nu chu a ring zo leh tawh tlat lo. Nunui chungchang kha a ngaihtuah ta fo bawk. A thih dan kha a'n chhut let vang vangin dik lo a awm chuan a hre fó! Mahse, a sarhu lai khan a rilru a buai êm vangin khalam kha a ngaihtuah hman meuh lo anih kha. A tluk palh vang ringawta a thi mai leh a harh miah lo kha zawng thil mak tak zawng a ni. A lu-ah vase-in a delh tih lah kha thil ni thei chu ni mah se; vase kha rit over a ni hran lo, a tirah khan chhui chiantir se chuan hmuh chhuah tur chu a awm ngei ang mawle.. A ti tawh lo laklawh si. 

Zanriah ei hma deuhin Pi Zawmi a lo thleng ve hram. 

"I thiante nen hian in inngai thar riau mai tun lai chu" an pa in a lo ti dam thluam a. 

Nui chungin, "Ina tawm tlawk tlawk ai chuan a zia ve alawm. " a lo ti ve mai. Mahse, an pa chuan rinhlelhna mitin a en reng tih a hai miah lo. Engkim hrilh tawp hi a duh, a'n sawi dawn ûk thin a. A ngam leh ngang thin lo. Mahse, engtikah emaw a la puakkeh mahna. 

"Mamawi, i va ngawichawi ve"Zanriah an ei laiin Pu Vanlala'n a ti a. 

"Aa.. Sawi tur a vâng em alawm" a lo ti bah nak. Drosein a lo melh kul mai. A kham ta daih. A ei lui thei ngang lo a ni mahna. Zanriah ei khamah Pu Vanlala a ţawngţai a. An zawhah an room theuh an pan leh. Drose chuan a zirlaibu a phawrh chhuak ve naa, a rilruah a lut hleithei lo. Rinmawia ber pawh a ngaihtuah lo. Thil hrang hrang a ngaihtuah ve nasa mai. A msg tone a ri ral a, Zorina a lo ni. 

"I chhe lo telh telh.. I cute" tih te mai hi. A ner sak. Mahse, thil ngaihtuah chhuak thut angin a awm, "Min duh ami? " tiin a reply a. 

Zorina lah zam hlek lovin, "Chiang e" a lo ti vat. Drose a lai deuh, mahse, "Anih chuan engtin zel?" a ti ve tawp. A rilru ngaihtuahna erawh a dang daih. Rinmawia tihnat ve a châkna chuan a hruai kual a ni ber. 

"Ka bem dawn che mawle. Ka beidawng dawn lo" a rawn ti ta chiah a. 

"Hmm.. I zak lo" a'n ti hnuhnawh a. Mahse, Zorina chu Rinmawia runluih nana hman a tum ran mai. Chet lak dan tur erawh a hre hran lo. 

"I mu tawh mi? " Rinmawia msg a lo thleng ve thut. Feelings hi a lo nei vat thin. 

"Mu tawh" tiin a reply hmuk. 

"I la thinrim mi? "

"Rim lo"

"Ti nge min biak duh loh" Rinmawia chuan a rawn ti leh. 

"Ka be châk lo che a ni mai lawm" a ti hmak. 

Zorina'n, "Naktukah ka lo hruai ang che aw. Min lo nghak la" a rawn ti thung. 

"Kan in pawh i hre nang" a lo ti ve. 

"Hre chiang e, I Pu pawh ka hria. In in chhak waiting shed-ah khan lo awm la aw" a rawn ti ta zel a. 

"Ka hre lo le.. " tiin a chhang. 

Hmm.. Ka lerh em mai. Ka zak. Lehkha zir tawh ang tiin phone a dah zui a. Ring leng lawngin a chhiar nghal lauh lauh. A zir rei ve phian lehnghal. 

Duati chu mu turin a inbuatsaih tan a. A khup chu a na reuh zêk. A tuka inentir an tum nghe nghe. A mu chiah tihin Tluanga'n a lo call a, lak loh a tum zet a, mahse, êmah a ti deuh nge a pick up sak hram. 

"Vawiin kha ka lo ngjak reng che asin. Ti nge i lo kal loh? " a rawn ti a. 

"Engvangin nge ka lo kal ang? Ka lo kal i ring hrim hrim kha a mak" a ti hlak hlak a. 

"Min hua tih chu ka hria alawm. Mahse, Duat, ka rilru a hrehawm êm a ni. Inneih kha kan ţhulh maithei" a rawn ti a. A thaw a ippik hmel kher mai. 

"In thulh a ni mai lawm. Chutah chuan tel vena ka nei lo. Ka hriat a tulna pawh a awm lo" a ti hmak hmak. Mahse, rei tak lo inzui tawh na nâ na chu a thinlung tak chuan hriatchian châkna a nei ve tho mai. 

"Kan nu tur kha a lo positive a.. Kei pawh ka intest a,ka la clear rih a. Mahse, thla thum hnua test leh tur ka ni. Duati, ka mangang. Positive ta ila, ka thawhpui te leh khawtlangin min en dan tur ka ngaihtuah hian ka ã mai dawn" a ti mawlh mawlh a. A thawk dan atang chuan a rilru a hah thawkhat tih a lang reng mai. 

Duati pawn tlem chuan a beng a hawng deuh, "A va zia lo ve aw. A pawi ka ti hle mai" a ti ringawt. Sawi tur a hre mai lo ve bawk a ni. 

"Nia, a pawi tawpkhawk. Kan society-a Aids vei kan en dan i hriat kha.. Ka chhungte pawh hian an hrethiam dawn lo nasa.. Thih mai te ka châk, ka tihsual thungrulhna hi a na ka ti khawp mai" a rawn ti leh a. Duati pawn a khawngaih ta viau, "I fimkhur lo ve bawk a nih chu. Nang phei chu lehkhathiam, mi fing i nia. CD te hman awm tak a nia. A pawi em mai" a ti ve leh tawp. 

"Ka âikaih aniang, kan chetsual hmasak ber khan CD ka pai reng. Ka hmang lo ve tawp. A chhan ka hre lo.. Ka rinhlelh loh lutuk vang a niang" a lo ti. 

"I châk tawh lutuk anih chu" a lo ti hmanhmawh. 

"Bakah a mah khan, 'min va ring lo awm ve, CD hman te i tum" min tia, a nuam lo ve em alawm" tiin Tluanga a rawn inpuang zut zut.

Duati chuan, "Engpawh nise, i la clear rih bawk a. Fimkhur tawh la.. I lo fihlim ve maithei bawk asin. Tun chinah chuan hmanhmawh uchuak tawh lo la, tuna i chetsualna hi hmanruaah hmang zel tawh rawh" a ti ta melh melh a. Tluanga a huatna kha a bo duak a ni ber. A chhan chu chunglamin kut a thlak hma ve bawk a tin ni. 

"Positive ta lo ila, min pawm leh thei ang em? " a rawn ti ta a. Duati a nui tawp! 

"U Tluang, ka theih ka ring lo. Min hrethiam ang che. Hiv lam ai mahin min phatsantu nen thinlung inhnaih taka kan awmdun theih ka ring tawh lo. A chhan chu rinna che ka neih tawh loh vang a ni" a ti ta khawl khawl a. A nih phawt tiin phone a dah nghal. A maimichhing vang vang a. A thutluknaah chuan a inchhir loh hram a beisei. 

Whatsapp msg a clear zung zung a. Number hriat loh atanga rawn betu chu tu nge le tiin a dp a en a. Vawiin tlaia tlangval kha a ni chiang mai. Zothana kha, " I tha em? " tih te hi a rawn thwwn a. 

"Aw ka tha e. " tiin a chhang a. A data off in,light a off bawk a. Mutthilh tumin a chhing ta vang vang a. 

"U zar, chaw ka ei peih lo" Drose chuan a ti a. Tukthuan ei loh hi a ching a, a nu a awm chuan a ei lo ngam lo thung. 

"I nu ka hrilh ang. Ei rawh" Zari'n a lo ti khauh. 

Drose chuan melh rum pahin, "Tumah hian min ţan ve lo si" a ti nghat a. Na zetin chair-ah a thu. Zari chu a khi sak ringawt. Rinmawia pawh ngawi rengin a ei mual mual a. An inbe lem lo. 

Ke in an kawmchhak waiting shed a pan a. Rinmawia erawh a la rawn tlan chho lo. Rinmawia lo tlan chhoh lai taka lo inphurhtir a châk si. Zorina lah a rei angreng phian. A rawn thleng ve hram e. A beisei ang chiahin Rinmawia a rawn tlan chho mek. Drose leh Zorina indin chilh a hmuh chuan a meng phâwk deuh. Mahse, hmalam a en leh vat. Drose pawh chu a chuang zui a. An tlan ve nghal. Rinmawia runluih chak em em si kha a rilru a nuam huai chuang lo, chutih a hnekin Zorina nen an inphur tih mi dangin an hre tur chu a duh lo leh ta em em a. Rinmawia nen an inphurh changa a chhuk thinnaah chuan ka chhuk duh a ti ta tlat a. Zorina pawh a ding ve mai. 

"Ti nge? I zak ami? " a ti a. 

"Aw.. Ka la naupang sia. Ka duh lo" a lo ti a. Zorina kalpelin school lam a pan. 

Rinmawia erawh rilru na takin classah a thu ran a. Lecturer thusawi chu pakhattemah a hre lo. A hriat chhun leh a hmuh chhun chu Drose leh rawlthar pakhat lo indinchilh chauh kha. 

"A bialpa mi le" a ti rilru a. A bialpa ni ta se nâ a va ti dawn êm.. A bul chu amah vek niin a inhria. Tlaiah Diteii te lo thlen hma ngeia Drose chu biak a tum nghet bur. A roomah pawh a han kal chilh mai aniang chu. 

"Mal.. Mala" Teteii chu a au tuar tuar a. Mala chu a rawn lawr zawk. Teteii chu thei leh thei loin khum atang chuan thawh a lo tum mek a. A va dawm vat, "Eng nge thleng? " a ti dam thlup a. 

"Ka hlau a ni" a lo ti ţiau! A khur zawih zawih bawk. 

A awma kuaha a hnungzanga chul heuh heuh chung chuan, "A tha vek mai ang. Ka awm alawm.. Engmah hlauh tur a awm lo" a ti dap dap a. Teteii chuan, pangchang zet hian, "A hma ang khan min awmtir rawh khawngaihin, a hma ang khan awm ka duh" a ti a. A ţap bawk. Mala pawh a inngaihtuah nasat hmel hle. 

"I dam lo si a.i dam vat a ngai alawm" a ti a. 

Teteii chu a rawn hawi chhuak a, mittui luang ngiai ngiai chungin, "Ka dam alawm.. That lohna ka nei lo. Mal, khawngaihin.. I bula muta i mi kuahna te kha ka mamawh.. " a ti ngher ngher a. 

Mala chuan a lo fawp zauh. "A rei tawh lo vang. I kiangah ka awm reng tho alawm" a ti a. 

"Mahse, ka ngai che lawm.. Ka bulah i mu si lo va" a lo ti. Mala chuan Teteii bek tawn tawna vuan chungin, "I ni em? Teteii i ni takzet em? " a ti ta mawlh mawlh a. 

A kut chu a lo vai per lawp… "Teteii ka nih lohin tu nge ka nih ang a? Keimah ngei ka ni. Tihtur tam tak ka nei. Zodingpuii mittui pawh ka la luantir hleinem. Heti hian min hreng bet reng ringawt a. Ka tha.. Ka ning tawh. Ka tihtur hi min tihtir vat vat mai rawh" a ti ta phiar phiar a. Mala a ding hluai.. A phone la chhuakin, " Jo.. I rawn thang mêk em ni? Rawn hmanhmawh deuh teh" a ti hman chiah tihin a nghawng a thip zawk. Hawi let hman loin chhuatah chuan a tlu sawp nghal. A hnungah syringe hum ran chungin Teteii chu a ding ngil at a. Mitmeng nelawm loh zet hian, "Kan kawng dal tum tawh ngai suh" a ti chang fak. 

A thawmhnaw chu hlipin Almira a va hawng a. Kekawr tlawn leh tshirt dum la chhuakin a inthawlh vat vat. Darthlalang a thla lo lang chu melh zauhin, "A nuam dawn hle mai" a ti sak a. A nui zui bawk. Mala tlu reng chu melh pawh melh loin kawngka lam a pan a. Corridor chu zawhin room atanga chhuahna tur kawngka a hawng chiah tihin Doctor Jo nen an inhmachhawn ran mai. 

"A tawp atawpah chuan kan intawng ta" Dr Jo chuan a ti sup a. Teteii a hnungtawlh nghal. Jo chuan a rawn pan zel si. 

"Engmah tihtheih i nei lo. Min kaltir mai rawh" Teteii chuan mitmeng vawt raiha en chungin a ti a. 

A lo nui huk.. "Tihtheih ka nei maithei" tiin a rawn hnaih sauh a. Teteii chu hma zawnga tlan tum niawm takin hmalam a hawi thut, mahse, Zothana'n a lo dang bet hmiah. A hand cuff ken chuan a kut chu a kalh hnan nghal hmiah bawk. Teteii hmel chu a thip takzet. 

"Nangni ho hi mi tenawm tak ka zalenna rahbeh tum in ni. Eng mah tihtheih in nei dawn chuang lo" a ti chiam chiam a. A tal aih aih bawk. A roomah khalh lutin, phuar chungin dawhkan seiah an muttir ta a. A taksa an phuar vek vangin a che thei lo. Thinrim taka au vak vak bak tih chauh lo chu.. 

"Le.. Tu nge i nih min han hrilh teh? " Jo chuan a ti ta sup a. 

(Tawk leh phwwts)