Drose 16

D'ROSE.. (Chapter- 16)

Ziaktu : Toni Râlte

Mathematics an chawh dun laiin Mimi'n a lo bia a. Tîm duiin a chhang. Drose a lo meng râng ve deuh. Mimi lah chu a ţawng tui si. 

"Hei lehkha kan zir a, ka dah lawk ang. Nakinah ka lo bia ang che" Rinmawia chuan a ti ta tawp a. 

Phone a dah hnu chuan, "I bialnu ni maw? " a ti ta chat a. Rinmawia hi dâwt sawi hreh zet a lo ni si. Phat ngaihna hre hek lo, "Umm.. Aman min lo duh hmasa a" a ti ta a. Drose thil ziak lai a chawl det. Mahse, a ziah zawm leh nghal. A ţawng ta renh reng lo va, a chhungrilah eng emawni hnawh up up tu a awm. A hrethiam chai si lo. An zir zo va, ngawi rengin a chhuak nghal. Rinmawia pawh a ţhu ngawi reng ringawt. A thaw te a hahin a hria. 

Drose chho ta chu khumah a mu leh ngût a. Chunglam melhin mit pawh a khap mang lo. Rinmawia hmel lah chu a mitthlaah a châm reng bawk si. "He pa hi ka ngaizawng ami le? " tiin a phun sep a. Bed sheet chu ţham khawmin a insangmar vak. "Ka va zak lo tak" a'n ti leh ringawt a. A tho va, a va inthiar ringawt. A luak te a chhuakin a hria. 

Pi Zawmi chu a phu zawk zawk a, a thle tawn sek bawk. An pa pawh a harh phah nghe nghe. An nu awmdan chu dika a hriat loh vangin a sawi nawk nawk a. Pi Zawmi pawh a rawn harh hlawh. A meng phawk hrû lehnghal. 

"I mumang a ţha vak lo em ni? " an pa chuan a ti dam diai a. 

"Umm.. Ţha vak lo. Thisen ka lo hmu nasa lutuk a" tiin a thaw hawk a. 

"A va mak ve aw. Engmah hlauh tur a awm lo a nia aw.. Muhil leh tawh rwh" an pa chuan kuah pahin a ti a. 

"Paa, Teteii kha i ngaihtuah ve thin em? " a rawn ti ta hlawl a! Pu Vanlala chu a ţhawng deuh. 

"Ngati maw? " a ti a. 

"Ka ti mai mai. Nunui pawh ka ngaihtuah fô mai. Teteii kha a la dam anga hriatna ka nei thin" a ti ta a. Pu Vanlala chuan a tho â maw a ti hman. 

"I harh chiang em? " ngaihtuah hmel zet hian a ti a. 

"Harh e. Ka tha bawk. Teteii kha la thi lo ta se, i pawm leh thei ang em? " 

"Ka hre lo le. A thil tih tawh ngaihtuah chuan, inngaihtuah fe ka ngai ang. Bakah a thi tawh a. A lo nung tawh dawn lo " an pa chuan a ti ta hmiah a. 

"Muhil tawh ang" tiin light a off a. An ngawi dun ta a. 

Bena Kolasib kal pawh, Eni'n a lo hmuak a. An inah a thlentir dawn tihna chu a ni phawt ang a. A hreh angreng hle. Mahse, tumah hmelhriat nei hek lo. Eni chu a nula senior hmel te pawh a lo pu ve ţan tawh a. A che vel leh a ţawngkam pawh a confi tawh khawp mai. Bena chu a zâm takzet. An in an pan lai chuan, "Engkim an hria maw? " a ti lawi rût a. 

"Hria e, ka hrilh vek. I hriat tur chu ka nu leh pa te hi chuan kan duhthlanna an ngaipawimawh thin. Hlauthawng suh" Eni chuan a ti mawlh mawlh a. Tlem chuan a awm a nuam ta deuh. 

An in thlen dawnah Eni chu a kai ding dat a. "Eni, ka zâm êm mai, min lo hmu hreh ve viau lawng maw? " a ti leh a. Eni chuan nuih sak pahin, "Vawiin thlenga pasal nei lo va ka awm nachhan chu hmuh an châk zawk em em a ni" a ti ta a. Bena lungphu erawh a rang tho mai. Zawimuangin inah chuan an lut ta a. An lo kim ţhap lehnghal. An han inchibai kual a. Bena chuan sawi tur pawh a hre meuh lo. Mahse, Eni chhungte an fel khawp a, an lo be siam siam mai. Anihna takah chuan, Enkawli hi a tet laia hrisel lo em em, an chan loh tura an ngaih tawh a ni a. A nulat hnu thleng pawn duat rawn a hlawh bik a, nungchang zawiawi leh pawisawi lo em em anih vangin ani meuhin a ngaihzawn ve chu mi sual takah an ngai thei lo a ni mahna. Bena chanchin a hrilh erawh kha chuan an ţhawng deuh naa, amah Eni'n pasal nei lo va a lo la nghak ţang ţang anih si chuan, lo tihbeidawn kha an hreh a ni ber mai. Bena an han hmuh takah phei chuan mi sual tak niin an hre bik lo. Hlim takin Zanriah an kilho ta a ni. 

"Saii sawmna kha i la hria em? Eng nge i ngaih dan? " Dinfela chuan an nu bulah a ti a. 

"Hria e, va tawiawm chu a tha khawp mai. Mahse, chhungkuaa kal erawh a rem lo vang" a lo ti a. 

"Kan Drose hian a châk leh dawn sa" Dinfela chuan a lo ti a. 

"Sawi loh mai tur, hna vanga zin tur anga insawi mai a tha. A luhlul si a, a buaithlak. Kan pahnih leh Tetea te unau nen va kal ila, zan khat riakin, a tawk mai lo maw? " a ti a. 

Dinfela chuan, "Ţha mai alawm.. Mahse, Tetea te hi an harh angreng sia, an tibuai viau lawng che maw? " a ti a. 

"U Thiangi kan hruai ve mai ang chu ka lo ti. Heta kan hnutchhiah chuan an û hian a lo tibuai leh ang. Ka pa te lahin an enpui hman vek tawh si lo va" a lo ti a. An nupa chuan thutlukna an siam chu a ni ta mai. 

Zanriah ei kham Chhung inkhawm an neihnaah Dinfela chuan, "Hna thilah Lungleiah i nu leh Tetea te unau leh Thiangi te nen kan va zin lawk dawn a, Drose bik kha, fel takin lo awm la, i pi leh pu, i û te kha lo tibuai lutuk lo vang che" tiin a sawi a. An inkhwwm zawhah, "Tetea te pawh in hruai chuan, ka tel ve theih lohna chhan tur ka hre lo" a ti ta chiah reng a. 

"An ni chu i nu nen kan kal chuan ngaihtuah an ngai alawm.. Naute an la nia" a pain a lo ti. Lungawi vak lo chungin a pawm ve thei mai. Rinmawia nen an la inbe miah lo. School a kal lo bawk nen. A be châk miah lo. A lakah a chhan fak sawi tur awm si loin a tau tlat! Bialnu a neih vang ni lo se a duh laiin a bialnu chu tu nge ni ang tih hriat a châk em em danah bialnu a neih vanga tau ngei zawng niin a lang. 

"Bawihte, i la hman lo mi? I û in a nghak reng che nia" Diteii chuan a ti lâwng lâwng a. Roomah darthlalanga inenin, "Ka kalpui peih lo sin le" a ti sap a. Hreh zetin a chhuak. 

Nidangah te chuan an inhnial loh leh an inbe ve zeuh zeuh thin kha a nia. Vawiin zet erawh an ngawi tluan parh. Rinmawia tak paw'n sawi tur a hre lo. Drose chu a zah ve tawp. A lakah a thinrim tih a hria. Mimi a ngaihzawn vang a ni mai ang em tih a ngaihtuah a, a nih ring deuh si, rinngngam si loin a awm a ni ber. Drose chu schoolah pawh a cool kher mai. Ni dangah pawh a harh vang vak ngai lo hrim hrim tho va. Chhun chawlh laiin, Higher section lam an rawn kal leh a. An school hi a chhawng niin, a chungah Higher Secondary lam an awm. Drose chuan a tiffin a ei mawlh mawlh a, Class Xii zirlai lar deuh, Zorina leh a thianpa Faka te an lo lut mêk. An class-ami Julie leh Faka hi an dem nasa tawp a, an lo ni ve a ni maithei. Zorina chu a hawi leh vah mai, a luck bawk a, a inla ve deuh nen, an hausa a, lehkha a lo thiam bawk nen. Bialnu a nei chhe lo thei tawp. 

Drose chu a rawn hmu a., "Julie, saw saw hmannia condom pai an sawi luai luai kha mi? " ring zeta tih pahin a kawk kher a. Julie lah chuan, "Nih saw" a lo ti ve mai bawk a. Zorina chu a nui hak hak a, "A cute tlat.. CD a'n pai riap mai a nia" a ti leh a. Drose chu a melh pah reng bawk. Alu fry hmawm zauh pahin, "Nang khan pai nachang i hre lo anih chuan i mawl hle anih loh pawn i la virgin tihna" a lo ti hmuk. Zorina a nui tawp chiang kher mai. A va pan hnai a. 

"Ka virgin leh gin loh chu test ila" a ti thum chhak. Virgin nih chu a hreh ngang mai. 

"Oh! I virgin loh phei chuan pai ziah tawh rawh aw" a lo ti ve leh salh. Class-a awm ho chuan an ngaichang deuh ţhup tawh. Drose lahin a chaw ei a ţhulh duh thak lo. 

"Ka thu thu. CD pai te chu mi hur tihawm tawk chauh, kei chuan CD pai kher ngai loin ka hriatchian bak ka khawih dawn hleinem, bakah an rai anih chuan ka nei ang. " Zorina aw chu a chang angreng viau. 

A nui hak a, "I mi hriatchian deuhte aţang khan i kai nulh ange aw.. Tuna fa neih te lo tum, class Xii pawh i la pass loh kha" a lo ti chang ve fak. Chaw a ei zo va, a tiffin chu a dah fel a. Tui a in nghal. 

"He nu hian tu nge ka nih a hre lo anih hi.. Julie, lo hrilhfiah rawh aw. Nge a rukin min lo star ve reng zawk.. " Zorina chhan ngaihna hre tawh lo chuan a'n ti ngawt a! Drose a lo nui leh sak, "I chhe lar ve alawm. I hming te chu ka hre ve. Mipa awmchhun pawh ni la, patil ka thlang zawk" tih pahin a tho va, "Ka zung dawn" tih leh chhuah a rual nghal. Zorina chuan a la na ngang mai. Luck inti ve tak, inla value ve em em kha a ni si a. Drose lahin eng teh ualah a lo ngai si lo chu a tlawmla lutuk. A sen ap ap mai. Ţan dar a rik tak avangin Drose lo luh leh hmain an chho ta a. Faka bulah, "Ka bem dawn. Chuan, tu nge ka nih ka hriattir ang" a ti sup a. Faka a lo bu nghut. 

School banah Rinmawia pawh nghak lo vin a pawisa khawl vein taxi a hmang daih. A mood a chhe êm a, in thlen vata, awm hahdam a duh. Pi Zawmi chuan chhuah a lo tum mek a, "Pi, khaw nge i kal dawn? " a ti a. 

"Ka thiante ka va tlawh lawk ange. Ka rawn tlai deuh maithei a, chaw min lo eisan ru aw" a ti a. Drose a bu nghat. A pi nen hian an inbe tam mang lo. A nel tak tak thei lo chu amah pawn mak a inti. 

A nute pawh a tukah Lunglei lama an zin dawn vangin an lo haw hma a. An insiam ve a. Tetea te lah an phur nasa mai. Drose an awhthìk deuh reng lehnghal. Ani lah a mood uih nen, a ngai thei lo nasa. In hnuaia a awm laiin Rinmawia a lo haw a. "Ti nge min lo nghah loh? " tiin a chhuahchhal nghal. 

"Ka peih lo" a lo ti hmiah. Ţawngkam mawi hnai pawh a zawng thei lo a ni ber. Rinmawia a hmuh chuan a thinur tlat zel. Vawiinah Zorina nen an lo khati tawh bawk si. Diteii chuan a fanu awmdan chu a hai lo kher mai. Remchang a zawng ran a. Zanriah ei khama an inkhawm zawhah a roomah a zui lut ta a. 

"Thil dik lo a awm em ni? I hmel a dik tlat lo" tiin a zawt a. 

"Ka ţha" a lo ti nghat. 

"Vawiinah inhauhpui emaw insualpui emaw i nei leh em ni? " a dilchhut thei. 

"Nei lo. Min vil reng suh. Ka tha ka tih chu" a lo ti hlar a. 

"Bawihte, ngaihzawng i nei ve em ni? " a ti thut. Drose a lo îp châwih. A nui lui vak vak a, "Kum 14-ah tuin nge ngaihzawng nei ang a. " a ti chiam chiam. Diteii chuan a fanu chu a ringhlel sauh zawk. 

"I nu ka ni a. Engkim kan sawi dun thei alawm.. Eng nge thleng han sawi teh" a ti dam diai a. A fanu sam a chul nghal. Drose a lungchhe thut. A awmdan mak tak chu amah pawn a ning. Tihreh dan a hre bawk si lo. 

"Nu, ih, dik tak chuan.. Upat ka chak tawh" a ti daih. A nu a lo bu nghat, "Chuan ka upa ve ang a. Mi ka duh leh duh loh te ka hrethiam ve ang a. Ih, duh pawh ka la nei chuang lo va, mahse, ka duh hian ka inhria a. Ka zak em a ni. Duh ka duh lo" awmze nei lo zetin a ti bah nuaih a. A nu chu a nui sak, hre thiam zetin, "Bawihte, i pa in min duh lai chuan i awm ang chiah hian ka awm ve thin. Ka duh a, mahse, ka duh tih ka hrethiam duh lo. Ka zak a, duh loh kha ka duh thin. Mahse, a tawpah chuan ka inthunun thei ta lo a ni" a lo ti keuh keuh a. A fanuin a duh chu tu tak ni ang maw tiin a ngaihtuah rauh rauh bawk. 

"Aa.. Nu, ka tha mai ang. Tumah ngaihzawn ka duh lo. Kum 19-ah bialpa ka nei ang " a lo ti a. 

"Ni e, class X te i pass ve phawt ang a. Tunah chuan kan naute kha i la ni rih. I zirna chiah ngaibtuah kha a tawk rih aw" tiin a fanu chalah a fawp zauh a. An inmang ţha zui nghal a. 

Pi Zawmi kha Zanriah an ei kham hlimin a lo haw chauh a. Chaw a ei tawh thu a sawi. A kalna an zawt lem lo. An pa erawh a ngaih a ţha vak lo. Mahse, thil zawh vak vak kha a hreh ve deuh sia, a ţha en rih. Tun hnaia an nu awmdan hian a ngaih a tiţha leh vak tawh lo. Teteii chungchang a lo sawi ringawt te kha chhan a awm ang em tih a ngaihtuah rauh rauh, an nu hriselna lam vang te pawh a ni thei tho tiin a inhnem thul. An han mu a, an nu chuan eng emaw ngaihtuah a nei tih a lang reng mai. A ţawng mang lo va, helhkam nei run ang hian a awm. Biak pawh a hre lo lek lek. 

"Phai chu pan vat ila a tha ang. I ţha lo tlatin ka hria" a ti a. 

"Tha lo angin ka lang e law? Ka tha reng alawm" a lo ti hâ a. A nui lui bawk. A nuih a za teuh lo tih an pa chuan a hre chiang ve si. 

"Buaina lian tak nei i ang. Kan lakah hian zèp i nei zawk em ni? Hmana Teteii nen inzep dun ang khan" a ti ta nge nge a. 

Pi Zawmi chuan nui hul hak chungin, "Zep tur a awm lo. Engmah. Tun lai chu ka mumangah Teteii ka hmu nasa lutuk a, ka rilru a thar mai mai alawm" a lo ti a. An pa chuan a awih nge awih lo tih a melh kar bawk. A awih vak lo tih a hmu thiam nghal. A fimkhur a ngai dawn tih nen. 

Ni e, vawiinah khan Teteij a va tlawh leh a nih kha. Khumah ngawi rengin chung lam a lo melh reng a. A biak pawhinna chhang hek lo. A hma aiin a lo cherin a lo dâng lehzual bawk. Rei tak dam lo ang mai a ni. Doctor bulah, "Ka fanu hian eng natna nge a vei? " tia a zawh khan a beisei loh lutuk chhanna a dawng a. Kha khan a nghawng êm a ni. 

"I fanu hian chenchilhtu a nei a. Multiple Personality Disorder natna hi i la hre lo mai thei. Tu emaw nen an cheng dun a, a taksa saw an inţawm a ni ber. He natna hi a neihna a rei tawh a. Amah hian a hrethiam lo a ni. Amah chenchilhtu hi ka la be thei tlat lo va, a kal bo emaw a ţawng duh lo a ni maithei. Hming te pawh a nei ve ngei anga, khawi khua nge tih te pawh kan la zawt chhuak turah ka ngai. He a 'Alter' kan tih mai hi a sualin a chimawm em em a. Teteii nunphung zawng zawng a chhe zawngin a kaihruai vek tawh. An inchenchilh rei tawh a, chuti maiin a kalsan a rinawm loh bawk. 

Teteii tihsual emaw in tih zawng zawng kha ngaihtuah let la, amah a ni lo. Anihna takah chuan Teteii hi mi sual a ni lo. A alter hi a sual a, ani hian Teteii hmangin engkim a ti tawp a ni. Teteii naupan lai ngaihtuah la, tuna hetiang fanu sual turu lutuk i nei hi i awih lo ve tho em? Engtik atangin Alter hi a neih tih kan la hre thei tlat lo va. Kan bei zel ang" a ti anih kha. Pi Zawmi chuan chutiang natna te chu a hrethiam ve phak lo. Ramhuai hnathawhah a ngai deuh tawp. Pathian thu hmanga hnawhchhuah theih turah a ngai a, mahse, a lo ni lo deuh. Pathian aia pawimawh chu an awm lo nain, Doctor thiamna pawh a pawimawh em em a ni. Inenkawl chhung pawh a rei viau maithei a ni. Amah Teteii lah chu a vai ruai a, amah leh amah a inringhlel deuh reng bawk. 

"Enkawl dam ta la, ka fanu a la ni reng ang tirae? " tiin zawhna mawlmang tak a zawt a. 

"Tehreng mai. Teteii dik tak a ni tawh ang" a lo ti anih kha. A maimichhing vang vang a. Teteii naupan lai, Diteii a pai hma si laia a duhawm theihzia leh a hlim theihzia te kha a mitthlaah an rawn lang leh uar uar. Khatih lai kha chuan a fanu khan thîkna leh huatna thinlung a nei ngai lo asin le.. Nu hmangaihna chuan eng ang pawn sualin nunrawng mah se, a thlah hlen thei si lo. Pi Zawmi pawh hian a fanu chu a ensan thei ngang lo a ni ber. 

A hawnsan dawnah Teteii hnena hruai thintu Mipa bulah khan, "Ka hriat chak ber hi min la hrilh la ka duh. Engtin nge Teteii hi a thih loh a? Kha ruang khan engtin nge Teteii hmel ang a put theih tih hi? " tiin a zawt a. 

"Hun remchang hmasa berah ka pa diary i chhiar dawn nia. Chubak chhanna ka pe thei lo che" tiin a chhang. Chu chu a ni a helhkham em em leh tihmanhmawhtu chu.. 

Diteii te pawh tukthuan ei khamah an chhuak a. Thiangi a tel ve ta bawk. Lunglei hi an zin khât ve bawk a. Diteii te nupa tak pawh an phur viau mai. A fanu erawh a ngaihtuah deuh. A rilru te kha a buai reuh si a. Dinfela erawh engmah a la hrilh rih lo. Ani hi chuan sawisel leh í nei lem lo mah se, Ngaihzawng neih lamah erawh a khirh ve ţhak thung. A fanu chu a lerh ang tih a hlau a ni ber e. Thenzawlah an inhnawh puar a, rei khaw muang loin an tlan lehnghal. Him takin Lunglei chu tlai dar 3 velah an thleng ta a. Saii'n a lo hmuak bawk a, an hahdam khawp mai. Saii ina innghah chu an chhangchhe sia tiin Saii in bul lawka Hotelah an thleng a. Amah Saii lo book sak a ni nghe nghe. An awm man erawh aman pek vek a tum thung. Diteii chuan a pangngai thei ang bera biak a tum. A chhan chu Saii hi hmeichhe khaw lo leh sual a ni lo tih a hre ve a. Hetiang mizia a neih vang tak hian a ni an pa pawh a ţawiawm ni. Dinfela amah chauha va kaltir kha a chhungrilah nuam tih lohna a nei tlat! Pasal rinhlelh chu a duh lo hle naa, a nihna takah chuan Saii mizia vang zawkin an pa chu ven ngaiin a hria a ni ber. 

Drose leh Rinmawia pawh an inphur leh ta poh. An inbe leh ta chuang lo. An boruak nuam lo zet chu hrehawm an ti ve ve, mahse, boruak siam hmasatu zawk nih an hreh ve ve. Zorina lah chuan Drose chu bem thluk a lo tum ruh nasa mai a. Chhun chawlh laiin a rawn lang ta chiah reng a. Drose pawh a ngaitein tifin a lo inchhawp leh rum mai. A bulah Zorina chu a va ţhu chat a. Melh pawh a lo melh duh lo. 

"Inrem tawh ang" Zorina chuan zaidam zetin a ti a. 

"Kan inhua ami? " a lo ti hú. 

"Haw lo ve. Inhnial tawh lo vang ka tihna a nia. "

"Umm nia" a lo ti ve mai. Chaw a hmuam ţûn bawk sia. 

"Naktuk chu tiffin lo pai tawh lo la, ka treat ang che" a lo ti vei pap. 

" nuin a phal lo" a lo ti. 

"Naaa.. Van ho tak.. Chaw aia tui a tam asin" 

"Buh chhum hi a tui ber ka kaah chuan' a lo ti leh hmiah. Zorina pawh a nui tawp. Drose chu a lawm ta riau. Lian uaih siin a kum a thansan tih a hre ve thiam tlat. 

"I no min pe ve la" tiin bul a han tan a. 

"Min lo biak chhen dawn loh chuan" a lo ti ve mai a. An inpe a. A number. anei ta bawk a. A duhtawk aniang. A chhohsan ta a. Drose erawh telhawng a la hmawm zauh zauh. A chawhmeh duhzawng lah hi maksak thei bawk si. 

Tlaiah erawh Rinmawia a lo nghak ve. Sana a en sek mai. A rei a ti tawh kher mai. Dar 4 dawnah a rawn tlan ta a. Mahse, phurh a nei tlat! A zawn an rawn thlen chuan a rawn melh zawk a, a tlan tlang daih. A hnunga thu chu a hmel chhe lo khawp mai. Drose thinhnûn chu vih sawk ang mai a ni ve ta tlat! A lung a phu dup dup bawk. A hamhaih a, a zun te a chhuak.. A zak ngawih ngawih bawk. Mittui tling pam chungin taxi a ko va, an in lam a pan ve ta nghal. A chau rawih rawih nia. 

A inbual sawk sawk a. A hriat loh karin a mittui a rawn tla ta a. Darthlalanga inmelhin a sam chu a hui kiang a. "Zochhuanawm, i va zak thei lo tak. Kum 14 chiah i la nih hi. Mi mawl kha ni la a tawk. Ti nge tihian i awm a" tiin amah leh amah a inankhum. A ţap dawn takngial. A chhuak daih. 

A inthlak laiin a nuin a lo call, "Nuuuu, min hruai ve mai tur a nia" a ti ţuau a. 

"I ţap e law? " a rawn ti thung. 

"Nu, ih, U Rinmawia kha ka lo nghak ve a. Mahse, nula a phur a. Min tlansan daih a. Min hruai ve mai tur che u a nia' ati bah nuaih. Diteii thinlungah eng emaw ni a rawn lang zawk. 

"I û chu ka lo hau dawn nia. Ngah nge ka naute duat hi a lo tlansan mai mai ni.. Hmm, chaw kha tha takin lo ei la, zanah lehkha zir tur aw. Min ngaih deuh chuan i pute bulah i zuk mu dawn nia aw" dam dapin a ti zung zung a. Drose erawh chuan a heh a pet fan fan. A nu chu a ngai takzet a ni. 

Zanriah an ei. Rinmawia pawh inbual zo tih hriat zetin a rawn kil ve a. Mi dang chuan engkim a pangngai vek angah an ngai ngei ang. Mi pahnih te inkarah erawh meipui a alh mek si. Drose chuan bar hnih vel a bar a. A kham ta mai. A lem lui thei ngang lo. A pu chuan makti zetin, "Naute, tlaiah engmah i ei chuang si lo. Ti nge i va ei tlem ve" a ti a. 

"Ka ril a ţam lo aniang. Chhunah ka ei hnem. Em alawm" a ti ve mai. A ril chu a ţam reng. Mahse, a kaah an zanriah chuan tuina a nei hlawl lo a ni ber. 

Rinmawia pawn nidang aiin a ei tlem. Drose-in a lo nghah ve ţâng ţâng tlai be khera mimi a phur kha a inthiam hlawl lo. An ban tlai deuh vang leh an boruak a chhiat êm vangin Drose chuan a lo hawnsan leh mai a ring deuh a ni. Mahse, a lo nghak si. Hrehawm a va ti tak. Drose hrilhhai hmel kha a mitthlaah a cham reng mai. 

"Mathematics zir i ngai lo mi? " tiin a text ta nge nge a. 

"Aw ngai lo" tih chhanna a hmu nghal. 

"Tlai kha pawi ka ti lutuk. I lo hawn tawh ka rin vang ania" a ti leh. 

"Aw le" tih chiahin a rawn reply. A be zui ngam tawh lo. Mimi lahin a lo text chhen bawk si. An boruak nuam lo sa kha a chhe zual dawn ta chu a nia. 

Zorina msg chu en pawh a en duh lo, moof off nak a laiin.. Rinmawia chu a hua. Tihnat ve a châk. Ankhum te a chak a, mahse, ankhum dan tur a hre si lo. Duh anga lan a duh lo bawk. A inzahpui ru ve ngawih ngawih. A pa phei chuan hria se a haw ngawt ang le.. Tetea te nen an invid call a, zan khat lek an awm loh pawn a ngai. Harhin ninhlei viau mah se, a naute bula awm nuam a ti ber thin

"Û, ih, i chocolate tlem ka ru a. Hei.. " tiin Tetea'n a phawrh nghal. A pain a lo leisak thar zing ami a lo lak ruksak lehpek anih dawn hi. A ter leh at. 

"Vanlalmalsawm, ka va vel daen chiang tak che. " a ti tân tân a. 

Tetea lah mi nghal tih takah, "Û, lo kal rawh… min lo vel rawh.. Lo kal ta che" tih pahin a lam khum vel. Drose a sa teh e. Phone a dah tau daih. A rawn rik leh vangin ner sak chungin a la a, Zorina a lo ni. A reject chiang teh e. He pa ve sek lah hi a ti rilru nghal. Lehkha pawh zir ta lo chuan a mu daih. Thil pakhat a ngaibtuahnaah a lo lut zawk. A nu anga inchhal khan a rawn be leh tawh miah lo. A phone a hmet eng vat a. Number pakhat chu a dial nghal. 

"Hello" mipa awin a rawn ti. Dah leh mai a duh hman, "Khaw nge he mi phone neitu kha" a ti ta zawk a. 

"A dam lo va.. Drose i ni tiraw? " a rawn ti dam thlup a. 

"Aw.. Ti nge a dam loh a? " a ti a. 

"A dam lo ve tawp. A dam veleh ka lo biaktir ang che" a rawn ti a. Phone an dah. A dam loh vang anih chu a reh a ti rilru a. A rilru hmun dnaga hruai kuala a awm chu a lawm. Rinmawia ringawt ngaihtuah kha a hne.. A ning. Mahse, chu! Tunah a ngaihtuah leh tawh. A inkek vak a. "Zoi, muhil teh" tiin a inhrilh a. A saisir a. A inluphup daih. 

Zawitein a tho ţhem ţhem a. Lehkhabu intiang ur chu a ban a, a keu thuak thuak hlawm. Zawn chu a nei chiang alawm.. Lehkhabu pakhat a kawm sen, chhah lutuk lo a keu chuan a bu nghut a. A keu nghal a. 

"Ka fanu Teteii kha a la thi lo! A lo let leh a. Amah ngei a ni..Nunui avanga min vauin a thangkamah… " tih lai a zuk chhiar lai chuan, a hnung aţangin zawi fak fiah tak si hian, "Paa, eng nge i tih? " a rawn ti ta a. A phu chiang kher mai. A lehhawi vat a. 

"Aa.. Ka muhil thei lo va, lehkhabu chhiar tur ka zawng a" tih pahin lehkhabu chu dawhkanah a dah nghal a. 

Pi Zawmi mit meng fiah tak chuan a lo melh kal mai. 

"Anih chu mawle. Kei pawh ka muhil thei lo va.. Chhiar dun ila" a ti a. Mutchhuak hmel a pu lo lah tak a! Pu Vanlala chuan, "Aa.. Mutthilh tum zawk ang. Kan mit a chhe palh ang" a lo ti bah nak a. An nu chu kalpelin khum lam a pan zui nghal. Pi Zawmi chuan a heh a pet fan fan a, dawhkana lehkhabu kawm sen chu a lek kang a, "Ka diary chu i chhiar tawh loh ka beisei ania" a ti dam dap a. An pa erawh a ngawi reng. Chhan dan tur a hre lo a ni mahna. 

A rawn mu ve a. An inbe lo. Boruak chu a uap churh a. Pu Vanlala rilru chu nasa taka tihbuaiin a awm mek a ni. Amah aia buai zawk a bulah a mu ve tih erawh a hre hauh lo vang. 

"Teteii chuan Nunui vangin eng vangin a vau?! " chu chu hriatchhuah a tum ngei tur a ni. A nupui chu hmana Zomuanawmi nu dik tak kha a ni leh tawh tih a hai lo. Fimkhur taka an inveh tawn a ngai leh dawn chu a ni a! 

A pasal chuan eng thleng nge a chhiar hman ang tih ringawt ngaihtuah chunga mutthilh chu Pi Zawmi tan pialtlepa liluh tum ang mai a ni ve tho mai. A lo fimkhur tawk loh vangin a inhau ru mawlh mawlh. Eng nge a tih ang a, engtin nge a insawi fihlim tak ang? A maimichhing a, khum var lianpuia a fanu hmel dang bei mai muhil mek bak a mitthlaah eng thil dang mah an lang thei lo… a inhumruh a, "Ka fanu,chhungkua i nei leh ngei ang. I nu hian a tawp thlengin ka tawiawm ang che. Engpawh thleng se, i dam emaw dam lo emaw i chanvo chu i hmu leh em em ang" tiin a rilruin a fanu a be mawlh mawlh a… 

(Tawp leh ta 😊