Boss Amanda 4

BOSS AMANDA..

(Sangsangi thihna ) 

Ziaktu: Toni Râlte

An rik lâwng lâwng vangin Amanda room atanga chhuakin kan va thlithlai ve a. Officer Pu Zadinga hmaah chuan nula ti ila tleirawl a ni mah ang. Hmel fai veng, hmel erawh tha tia sawi chiam tur ni lo, te fel rin ren leh amah aia sang fê tlangval puitling tawh hi an lo inhnial a lo nia. An sirah chuan an chhungte ni ngei tur an lo ding ţaih bawk. Nula chuan, "Dawt ka sawi chuan Van Pathian ngei hian min tithi nghal rawh se. Min pawngsual chiang em mai" a ti hlaih hlaih a. 

Mipa chuan muang cherh chawrh hian, "I duhthu ngeia ka bawhbet chung leh min ţhut chung khan min pawngsual i la ti ngam chu a nia! Thla 8 chhung kan inngaizawng tawh a. Pawngsual i ngaih lohzia kan hria e" a lo ti ve a. 

Thil awmzia ka man ve ruak mai. Heti ang case hi a awm zeuh zeuh. India danin hmeichhia a humhalh nasat tawh vanga remchanga hmang ta mai hi mizo zingah pawh an awm ve ta tlat. Mipa ka nih vanga hmeichhia ka va demna lam ni loin, an duhthlanna ve vea sex an hman pawn hmeichhiain, "Min pawngsual" a tih miau chuan, mipa tan ţan ngaihna a vâng viau ang. 

"Dawt sawi suh. Nangman anih kha min ngaizawng. Ka duh ve lo che, min zar reng a, min zui reng a. A tawpah min pawngsual ta a nih hi" tleirawltê chu a la naupan hmel nen boruak a ngam zêk mai. A ţawngkauchheh hrim hrim pawh puitling ang chiah a ni. A sam sen thar chu a tawi mût a, a pheng deuh bawk. A mitmeng a ling hlar a, a tawng pah chuan kut zaizir a hmang nasa hle bawk. Mipa erawh tshirt dum a ha a, jean paw dal lam ha lehin mizo chapal dum a bun bawk. A pangngai hmel viau thung. A thin erawh a rim ve hle tih a lang. 

Pu Zadinga chaun, "Ngawi tawh rawh u. Heti ringawt chu a dik lo. Tlangval, pawngsual case chu i awrh rih a ngaih hmel. Puh i ni miau si a. Thuhretu i nei si lo.., " a ti ta a. 

"Ani pawn thuhretu a nei bik em ni? " a lo ti ve khauh. Pu Zadinga chu a ngawi ta reng a. 

"Thuhretu ka mamawh lo. Keimah hian ka chiang ve tawk e" a rawn ti leh sak sak. A aw lah chu a bengchheng chi ang kha a ni lehnghal. 

"Ka pu, ani hi pawisa i chawitir loh pawn tâng ngei ngei rawh se" Tiin Pu Zadinga a melh a. A chhungte niawm tak chu kal hnaiin, Ni e, Sir, FIR chu kan lo ziak lut phawt ange" patling kum 60-67 awm vel tur hian a ti ta bawk a. Amanda-in min lo kheuhin, "Coffee va in teh ang" a ti a. Kan buaina a ni ve lo bawk nen. Kan kalsan ta a. Tlangval kha engtin nge a awm tak zel ang tih erawh ka ngaihtuah rauh rauh mai. 

"Kha pa kha ka khawngaih" tiin Amanda bulah ka sawi chhuak ta nghe nghe a. 

"A pawi ngawt mai. A tâng awm sia" a lo ti ve. 

Khami ni atang khan ni 2 a liam leh tawh a. Kha tleirawl medical test an neihsakah kha tlangval chi kha hmuh a ni ta miau si a, pawngsual tiin tleirawl lah a ţang tlat bawk si. Tihngaihna awm hek lo le, Central jail-ah chuan a luh ve phawt a ngaih hmel. Mahse, vanneihthlak takin bail theih a ni dawn a niawm e. Tin, cheng 10000 a chawi dawn bawk. Tlangval hming chu Rempuia a ni a, tleirawl kha sangsangi a ni. Rempuia rilru chu na teh mah se; tihngaihna a awm rih si lo. Ka khawngaih khawp mai. 

Case tharlam em em kan nei lem lo. Inrukbona tenau ti mai ang, nula leh tlangval inngaizawng inru chungchang kan buaipui a, an nu leh pate induh loh tawnna vang mai mai a ni bawk a, Amanda pawh a phur tehchiam lo hle. Thla thar ni 5-naah chiah thil danglam tak kan hmachhawn ta a ni. 

Amanda-in min lo call a, ka tlai exer la zo, ka hah hle laiin a ni nghe nghe. 

"Ramhlun venglaiah lo phei rawh. " a rawn ti teh tawp a. Kei lah thaw huam huam chungin, "Ngati nge? " ka lo ti hû. Dawhtheih hmel vak loh hian, "Ruang an chhar" a rawn ti ta a. Tualthahna lam kan hre khât ta deuh a, ka bo hûin ka hria. Ka inbual sawk sawk a. Chaw pawh ei ta lem lo chuan ka inţam chhuak nghal. Address a sawina hmun ka va thlen chuan mipui an lo tam tawh viau mai. Khua a thim tawh thung. Amanda chuan min lo hui vat. Mipui nawlpui luh theih lohna hmunah chuan ka lut ve ta zauh a. 

Building lian vak lo, a ban concrete, a bang leh a dang chu assam type-a sak a ni a. Ruang hi a room tukverh bula hmuh a ni. Ka va hmuh ve chuan ka ding chawt. Mak ka ti lutuk chu ka thaw thei lo lek lek hial! Kha nula Sangsangi ngei kha a ni tlat! A landan chu a rapawm lek lek bawk. A ban veilam banrek chu a vein zai chah a nih vangin a thi nasa tih a hriat, mahse a thisen chu a khang deuh tawh thung. Kawr fual chhingte rawng êng a ha a, a mut dan chu a dawrh deuh vangin a kekawrte pawh a lang thei. A malpui pahnihah pawh thil zum taka vihna hnuhma a awm. A hrawkah zai a ni bawk a nih hmel, chunglam melhin a meng pual hrû a. A ban dinglam chu a phar hiang bawk. A nu niawm tak nute lam ngo ving veng chu a ţap faih faih a. A fanu thih dan chuan a ţhawng ve khawp ang le.. 

Duhtawka ruang a zir chian hnuah postmortem turin an phur chhuak ta a. Keini erawh kan la cham bang. 

"A chhungte biak ka va duh em" Amanda chuan a ti a. Sangsangi nu leh putea bakah a nau mipa lian ve deuh tawh te nen room lehlamah kan lut ta diak a. Sangsangi nu chu a ţawng tha thei der lo. A inhnit faih faih reng a, a la upa tehchiam lo tih a lang reng mai. A putea erawh Stationah khan ka hmu tawh a, palian tak, hang lam hmel rum zet a ni. A nau erawh a dawldangin a mitmeng chu a ngui kher mai. Rawlthar hmel chhe lo tak erawh a ni. 

"Tu nge i nih khah.. Ka pu" Amanda chuan Sangsangi putea chu a melh ralh a. 

"Lalnunmawia ka ni a. Sangsangi nu hi ka farnu a nia, hei hi ka in a nia, ka hnenah an lo cheng ve a ni. Hei hi Lalthanpuii a ni a, Sangsangi nu chu a nih hi. Chuan, hei hi Ramthanmawia niin Sangsangi nau a ni. Tizawng hi kan ni e" a lo ti dam dup a. A aw pawh a pelen ang ngeiin a thum hle. 

"Aw le, ka lawm e. Zawhna thenkhat zawh che u ka duh dawn a. A remchan dan angin min lo chhang mai dawn nia aw. Sangsangi ruang in hmuh dan kimchang ka va hre duh ve" Amanda chuan nem thlap hian a ti a. 

Pu Nunmawia bawk chuan, "Hei a nu hian a va hmu a. Chhunah kha chuan amah Sangsangi hi a chhuak a, keini pawh kan awm lo. Kei hi a hmingin Schoolah 4th grade hnathawkin ka awm ve a, Rama hian school a la kal ve bawk, Sangsangi nu hi saw kan kawt maiah sawn eichawp dawr a nghak ve bawk. Chu chu kan eizawnna a ni mai. Sangsangi lo hawn lai pawh a nu hian a hre lo va, eirawngbawl tura ina a va haw chuan Sangsangi hi a lo inbual mek a niawm e. A hnuah Maian te pawh a hihpui leh a, chutih lai tak chuan phone call a dawng a, "Ka chhuak lawk dawn" tih leh chhuah a rual nghal a, Kan hawn thleng pawn a lo la haw lo. Zanriah kan ei dawnin a nu hian a call a, a ring quit thak. Chaw ei kan siam lai takin sangsangi room lam chu a ri ta deuh khet khet a, Anu hian, "Ani hi kan hriat loh lai hian a lo haw leh reng tawh a niang" tiin a va en a. A ruang a va hmu ta mai a ni. In hriat angin hei Sangsangi room hi kawngka hran a awm a, kan hriat loha chhuah leh lo hawn hi a nei fo hrim hrim a ni" a ti ta charh charh a. 

"Aw.. Mate, a va mak em.. Hetiang tur hian ka ring ngai lo asin. I nu hi min thawng em mai" Sangsangi nu Pi Thanpui chuan a rawn ti chhuak hlawl a, a tap nghal hlawp hlawp bawk. 

"Thawm dang engmah in hre tawh lo em ni? " Amanda chuan a ti ta daih a. 

"A ruang kan va hmuh khan kan hamhaih lutuk a. Engmah kan ngaihtuah chang tawh lo a ni ber. Mahse, a kawngkapui erawh a lo inhawng" Pu Nunmawia chuan a ti a. 

Amanda te nen Sangsangi roomah bawk kan va lut leh a, tukverh te chu a thlek vang vang a, Kawngkapui te chu a va hawngin a lut chhuak bawk. "Sangsango room hi a biru ve deuh bawk a nih hi. Tu khawkhain a room kawngkaa lut hi an hmuh a rinawm loh" tiin a phun mawlh mawlh a.

"Ka pi, Kei chuan kha pa bak kha a nih ka ring lo" Ramthanpuia'n a lo ti khauh. Kan melh ţhap mai. 

"Tu maw? " Amanda chuan a lo ti vat. 

"U Rempuia kha mawle. Ka u pawngsualtu kha" a ti ta a. 

"Jail-ah a tang a ni lawm ni? " ka lo ti vat a. 

"Tang tawh nang. Police ho hian in chhuah hma em alawm" hrethiam vak lo hian a lo ti a. An bail a nih ka ring nghal. Chutia a lo chhuah tawh chuan a va rinhlelhawm angreng si em.. Phuba lak nan a that te pawh a ni maithei. 

Inleng an tam tak em vang leh kan ril a tam tak viau vangin kan haw ta phawt a. Amanda inah chaw ka ei leh tak ngawt kha. Chawhmeh lah hi siamchawp a ngai ve ziah. Sa hring eng emaw tal hi chu a kawl ve reng zel. A siam peih thin lo niin ka hria. 

"Sam, hnuchhui hi chawlhsan la; chef-ah inlet daih rawh" chaw kan ei laiin a ti thut. Ka ngei ţêp. 

"Chu.. Kan inneih hunah pawh cook-ah ka va ţan mai hmel ve" tiin ka uang a. 

"Kha chu chiangsa. Nau awm nen" a lo ti salh. Ka melh rum nghek ringawt. Ani lah mawi zetin a lo nui thung. Dar 9 a la ri lo deuh a. Zanriah ei kham chuan Rempuia hmu turin kan chhuak ta a. Sangsangi te veng thenawm lawkah an awm a, Sangsangi te ai chuan an khawsak a that hmel deuh. A nu leh pa bakah a u leh a nau hmeichhiate nen an khawsa a. An phuisui hmel viau mai. Ani pawh a lo awm mial a. Min hmuh chuan a phâwk deuh. Mahse, a lo ringsa nge, "In lo lan ka ring reng a" a ti sup a. A room lamah kan lut ta diak mai. 

"Vawiinah eng nge i tih? " bultan nan Amanda chuan a ti ta phawt. 

"Ka patea te insaknaah ka va pui ve.. Venghluiah" a lo ti a. A inrintawk hmel viau. 

"Chuta tang chuan i kal chhuak leh miah lo maw? " a lo ti leh a. 

"Aih, dar 5-ah in ka thleng. Chuan Sangsangi thih thu ka hre ve nghal" a lo ti leh chat. A sawi dik ka ring. 

Sangsangi phone kan hmu zo ta miah lo kha a pawi. Eng nge maw chen chu a hriat ve theih thin a nia. Khawiah emaw a thattu hian a paih emaw a kawl a ni maithei. 

"Jail atanga i lo chhuah hnuah Sangsangi nen in inbe leh reng em? Engkim han sawi vek teh" Amanda chuan a ti ta sauh sauh a. Rempuia chu a thu tha a, "Be lo ti ila, aman min lo bia. 'Ka duh vang a ni lo, ka nu ten khatianga ti tur khan min nawrlui tlat a ni' tiin thupha a rawn chawi a. Ka chhang let lo. Biak tumna ka nei tawh lo hrim hrim a. Khati khawpa mualpho leh naa min siamtu a nia. Hmuh phei chu a hnai lo mai" Rempuia chuan a ti ta hmiah a. Ka lo bu ve nghut nghut ringawt. Dik tak chuan a rukin ka ţan a ni ber mai. 

"Phuba lak erawh i chak hlein ka ring a" Tiin a han thawi kual a. 

"Phuba lak chu ka chak khawp mai. Mahse, ka lak hmain chunglamin min laksak ka ti mai. A thihna hian min thawng ve lutuk naa dik taka sawi chuan khawngaihna ka nei miah lo" a ti ta khawl mai. A rilru tur ka hrethiam khawp mai. 

Rempuia nu thingpui lo chhawp chu kan in khalh khalh hlawm a. Amanda pawh hian zep loh chuan a ringhlel hran lo niin ka hria. A thu zawh dan atang hian. 

"Anih rinhlelh tur awm te i hre lo maw? " a ti a. 

"Hre chiah lo. Mipa hi a kawp ve nasa a. Chung zinga tu emaw ber chu an ni maithei.. " nuam ti vak lo hian a lo ti a. 

"Sawi chu a nuam chiah lo ang a. Sangsangi nun dan leh in intawn dan vel te min hrilh thei ang em? "Ka hriat chak em em a zawt ta. Ka beng a parh nghal hûrh mai. 

"Hrilh thei e. Nia, Sangsangi thiannu Ateii leh ka farnu saw an inkawm ve thin a, vawikhat Sangsangi nen an rawn leng a. Khata tanga inhria kha kan nia. Chhe lo ka ti reuh a, a zei hawi bawk si. Naupang erawh ka ti deuh. Amah zawkin whatsapp-ah min lo bia a, Ateiin ka number a lo pe ni ngei tur a ni. Kan inbe chho ta zel a, ka rin aiin a ngam huaiin experience ngah em em tawh angin a awm tlat a ni. Chu chuan min tiphur ka ti mai. A zei reuh bawk nen, a zunah ka uai ta der a. 

Ani pawn min duh ve viau chuan ka hria. Ka phur chhuak fo va, an inah a roomah ngei pawh vawi thum lai ka riak tawh. A room khuan kawngkapui hran a neih vangin kan lut hmiah hmiah thei a ni. Thla 8 zet kan inzui ve takah chuan ka nupui tur angah ka ngai deuh tawp. Ngaihzawng hi ka nei rei ngai meuh lo va, ani kha a rei ber a la ni. Mahse, zep loh chuan buaina neuh neuh kan nei fô mai. Mipa dang a be nasa lutuk leh zana ka hriat loha a lo chhuak daih zel te chu hrehawm ka ti a. Ka hauh lahin a inchhir thei em em a, han thinrim vak ngamawm loh hian a awm thiam. Kum 18 lek a la ni a, kei aiin a dai zau zawk niin ka hre thin. A chhungte lam atangin harsatna kan tawk ngai lem lo. A nu pawn min be tha ve lutuk. Mahse, sawi tawh angin pawngsualah min puh ta miau si a. Khami zan khan a roomah kan riak dun leh a, zing dar 2 velah a putean kawngka a lo kik a, a ko bawk. Hlauthawng takin kawngkapui lehlam atangin min chhuahtir a. Ka haw nghal. Zingah khan tikhan min rawn hruai ta mai sia, ka hrilh hai teh asin. Mahse, kan inzui dan leh amah hre chiangte chuan min dem loh bakah khing let tur ten min ti hial a, ka pa hi a hmingin kohhranah rawngbawltu a ni ve si a, hmingchhiatna chu nakinah a la reh ve mai ang, thudik chu Pathian leh nangmah hrechiangtu ten an hre tho a tiin tuar zawk mai turin mn ti a. Kei pawn khin let kha ka duh em em hran lo. Ka thin erawh a rim khawp mai.. " Rempuia chuan a ti ta dap dap a. Tlangval pangngai tak chu a ni e. Sangsangi chu nasa ka ti angreng khawp mai. 

Amanda chuan, "A putea chuan a duh lo hran bik lo che em ni? " a ti a. 

"Duh loh pawh ka hre lo. A tawng tam lem lo va kan inbe khât. Ka tana awm nawm lohna tur ang chuan a awm ngai lo. Ka sawi hmaih bawk, Sangsangi khan ka fa a titla tawh bawk. Ka hriat miah lohin.. Ka hriat tirh chuan kar hnih chhung ka be lo nghe nghe. Mahse, aman tihtakzeta min lo biak leh ngaihdam min dil nasat em vangin kan tha leh" a ti a. Ngaihtuah a tithui angreng. 

Kan awm rei ta bawk a. Hawn lam kan hnaih ve ta a. A tul huna koh mai theih tura awm reng turin an inchah a. Kan inkhalh hawng ta a ni. 

Sangsangi ruang an vui zawh lamah an inah bawk kan zu tâp leh a. A phone pawh a call tlang theih tawh loh. A baterry a low a ni maithei. A nu chu a mipa kawp thinte a hriat theih chin kan zawt ta tawp a. Hriat a lawi a lo nei mang lo. A nau zawk chuan pahnih chu a lo hre hlauh. 

"U Rempuia nen an nih lai pawh khan a kawp ru reng thin. Ka u kha a lerh tih ka hria. Mhase, ka ngai khawp mai" a ti ta reuh a. Sangsangi kawp thin mi pahnihte hmu tur chuan kan chhuak zui nghal. 

Pakhat chu Kima a ni a. Electronic dawr changtlung tak neiin amahin in a luah a ni. Pathlawi a ni nghe nghe. A fate erawh an nu bulah an awm thung. A lo fel duam duam viau. Sangsangi vuinaa a kal lo chu a mak ka ti deuh. 

"Kal ve tur chu ka nia. Mahse, bungrua a lo thleng thut sia, ka nauten an buaipui hman meuh si lo. A hranin ka la râl mai ang ka ti ta a nih kha" a ti thluam a. Rethei zawk zawk a ni lo tih chu a inchei dan atang pawn a hriat hle. 

Sangsangi nen an chungchang kan han zawt a. 

"Inngaizawng kan ni lo. A thiannu nen kan inzui thin zawk. Chuta tanga inhria chu kan nia. Sangsangi tê kha a fel reuh viau naa chak lohna a nei ve a, gold digger kan tih ang type hi a niin ka hria. Min hmelhriat atang chuan ka bialnu tel loin a rawn leng ta fó mai a. Zan khat ruah a sur vak tumin zu kan in dun a, amah a sihhnip riaua ka hriat vangin mipa ta na nâ na chuan ka risk e ka tia. A lo hmin hneh viau si. A zei hrep lehnghal. Chumizan chu ka inah a riak nghe nghe. Khata tang khan ka lakah a ngampa zual a. A thiannu chu kan thlim ta zak zak mai a ni. Pawisa min dil fo a, ka pe ve mai zel. Thawk khat lai phei kha chuan ka dawra thawh min dil a, chu em zawng ka intatlut thuk lutuk dawnin ka hria a. Ka remti ta lo. 

Zan reia lo kal mai te hi a ching a. An chhungkaw background engmah ka hre lo. Mak ti ru chung si khan ka lo hnar thei chuang lo. Mahse, a thih hma thla khat vel atang khan a reh ta daih a. Ka va biak pawn a buai thu bak a sawi ngai lo. Ka be zui ta lem bawk si lo va, tikhan a thih thu khan min deng ve ta chauh a ni" Kima chuan a ti ta mawlh mawlh a. Ka rin ang zelin sangsangi chu a la awm. A nikhua vak lo hle mai. 

Kima chu rinhlelhawm vakin ka hre lo. Amanda pawh chuan zawhna a ngah lo hle. Pakhat kan hmuh tum hi Tluanga a ni a. Zarkawtah ani pawh hian hardware dawr a nei a niawm e. Nupui nei lai a ni thung. Mahse, a zin lai a lo ni thung a, Sangsangi thih hma ni 2-ah khan bungraw la turin a lo zin daih. 

"Ani chu biak kher a ngai dawn em ni? A zin daih bawk si" ka ti nuah nuah a. 

"A zin daih hian min tiringhlel zual" a lo ti thung. A la hma tho tiin Sangsangi te inah kan chhuk leh a. A room chu an khawih danglam vak lo bawk a. Amanda nen chauh kan hai ta a. Eng nge kan zawn ka hre lem lo. A mattress hnuai chu a keu mual mual a, note bu chhah vak lo, a kawm pawl tak zet hi a rawn phawrh hlawl. A khi sak bawk. 

A keu nghal puat puat a. A laihawl velah a tawp chat. 

"Sam, ka beisei ang chiah a ni. Hei en teh le.. " tiin a kawk va a. A kawhna lai chu ka va bih ve, kutziak sin nalh tak hian, "Ka duh ka hmuh hma loh chuan ka bei zel ang. Hmelphak, i hre dawn alawm.. I mualpho dawn khawp mai. Tu nge ka nih i la hria ang" tih thu hi a lo inziak a. A awmzia ka bó! 

Ka mitmeng bo zia hriain, "Sangsangi hian tu emaw a mi kawp chu a blakmail a nih a rinawm. Hei hi ania ka beisei ruk. Kima kha ka ring thut thut a, mahse, a bialnu nen an la inthen loh vangin a la fihlimah ka ngai. Tluanga ngei hi a ni kan bitum tur chu" tiin a mitmeng a nung sar mai. 

Rooma kan awm laiin a putea kha a lo lut ve a. 

"Eng nge kan an awm le.. Ka tunu thattu chu min zawn hmuhsak thei ang em? " nelawm tak hian a ti a. 

"Ka beisei.. Chumi hmain i tunu kha hmeichhe nungchang tha zawk zawk a ni lo tih chu i hre tho ang tiraw" a lo ti hmiah a. Ka lo ìp deuh. 

"Ka hria alawm. Ka hre vek. A nu bulah pawh ka sawi thin. Mahse, a awih duh tlat lo va. Keiin ka zilh lahin a lo huatpui tumhrang bawk si. " Pu Nunmawia chuan a ti ta hlauh a. Ka thep suai suai mai. 

"Tunah hian kha a nungchang kha a thihpui ka tih chuan a na deuh maithei. Mahse, a nih ngei ka ring" Amanda chuan a ti ta sap a. 

Pu Tluanga chu a lo hawn veleh station-a lo kal tura hriattir a ni a. A rawn punctual viau mai. Ka hmuh tum loh deuhin ka hmu. A ngo vuah mai a, a la upat hmel loh viau bawk. Amanda chuan, "Sangsangi thih laia i zin vang khan fihlim theiah i lo inngai a ni maithei. Mahse, ka rinhlelhna che a zual sauh zawk" a ti nghat a. A hmel pawh a nelawm vak loh. 

"Eng nge sawi i tum? " a lo ti let hâ. A zâm hmel vak loh. 

"Sangsangi khan a blackmail che a, a lak atanga tal chhuahna kawng awlsam ber i zawng ta ka tih hian ka sawi sual em? " a lo ti ve salh. 

"Aw i sawi sual. Min blackmail tih ka pha lo. Ka zin haw veleha tifel turin kan inchah bawk. Mahse, tu emawin a lo that ta a nih kha" Tluanga chuan a lo ti nghet charh. 

"Tu emaw chu i tirh a ni ti ta ila" hahdam hmel zet hian a ti leh a. 

"A teuh lo. Thah duhna rilru ka pu lo hrim hrim. Ka khawngaih zawk. A chhan chu ani kha ka fanu a ni asin" a ti ta mai a! Ka zuangtho lo chauh. Amanda pawh a nghing ve dawt tih a hriat. 

Pu Tluanga chu a nui hul hak a. A heh chu liak zauhin, "Ni e, mak in ti ang tih ka ring. Sangsangi kha ka fanu a ni. In ngaihdan anga nula leh tlangval inkawp anga inkawp kan ni lo. Ka fanu a ni tih ka hriat hmain a pa ka ni tih a lo hre tawh a. Min rawn zawng chhuak ta a ni. Keiin nupui fanau ka lo nei tawh a, ka tleirawl lai fa a ni tih ka nupui leh faten an hriat ka duh si lo. Chu chu buaina lo intanna a ni ta a ni" a ti ta malh malh a. 

Amanda chuan, "Sawi vek rawh" a lo ti zawi sap. 

"A nu nen sawn tleirawl kan nih laiin kan inngaizawng a. Mahse, shillongah lehkha ka zir tak daih vangin kan intha then ta mai a. Ani chuan naupangtein pasal a nei a, sangsangi û kum 2 a nih laiin kei Zoramah ka rawn haw ta a. Mi nu a lo nih tak daih si avang chuan ka rilru a na ve hle. Mahse, ngaihzawng ka nei ve leh ta mai a. Vanduaithlak takin ka ngaihzawng kha an pa te unau zinga a naupangber a lo ni a. Kan inhmu fo lo thei ta lo. Tleirawl lai ngaihzawng tih takah kan la intheihnghilh tak tak thei si lo va, tichuan, kan inhnimhnai chho zel a. A rukin kan inhmu ta hial a ni. 

Tah chuan insum zo loin kan mu dun ta a. Vawikhatin vawihnih a hring tih takah kan chesual ta fo a. Mahse, lemchan a thiam em vangin an ringhlel ngai lo. A pasal a boral ta thut. Min ţhawng khawp mai. Ani pawh chuan a tuar ve hle. A rukin ka hnem mawlh mawlh reng a, chutiang a lo nih takah chuan neih mai pawh ka hnial ta lo. Ka bialnu an pa farnu pawh ka then ta reng a. Mahse, inhmuhna chhuanlam a van phah. An pa boral atanga thla lina velah nau a pai ta a. A pasal chhungte tan chuan a na viau ang. Uire ang kha a la ni miau si a. Kei chuan neih ka duh ta a. Ka chhungte bulah ka'n sawi chu ka sawi hma ka ngai rum rum mai. An phal loh dan chu rapthlak zawk a ni. Ka pain Ka nite bul Goa-ah min thawn nghal vang vang. Ka la naupang bawk nen, ka pa thu kha ka hnial ngam meuh lo a ni. Tichuan, Thanpuii chu a nuta bulah a khawsa ta a. Pu Nunmawia hi a vanduai a, tuai nisi lo hian a pa thei tlat lo mai. Nupui pawh an nei ve ùk a, a nupui bedawngin a chhuahsan leh tawp a ni. Thanpuii nu leh pate hi a kum zawn deuhthawa an boral vangin a nuta bak belh tur a nei bik lo. An unau hi pali niin Thanpuii hi a naupang ber a. A u chiah Nunmawia niin, an u te pahnih erawh chhim lamah chhungkaw dinin an awm tawh a ni. An inpuiah an unau chuan an khawsa ta a. Sangsangi pawh a lo piang ta. 

Goa-ah chuan ka ni thiannu fanu hian min atchilh thaw thang a. Rinawm taka awm erawh ka tum ve tlat. Mahse, zan khat chu ka pain, "I bialnu chuan i fa pai chungin pasal a nei ta mai" a rawn ti a. Thanpuii biak pawh dan ka hre si lo. Ka manganzia leh rilru natzia chu aw.. Tichuan ka beidawng chho chuan ka ni thiannu fanu chu ka kawp ta a. Rei kan inngaihzawn hmain kan inru ta ringawt a. Ka pa te remtihnain kan innei ta a ni. Ani chu tuna ka nupui saw a ni nghe nghe. Goa-ah ka awm rei hman, hna te ka lo nei ve nen. Kan fa naupangber kum 2 anihin Mizoramah kan rawn chuang chhuak leh ta chauh. Phaia awm thang ka nih vang hian phaia awm kha hrehawm ka ti lem lo bawk. Chutah chuan Sangsangi nau saw a lian fu tawh. Kha vang khan ka pa thusawi chu a dikah ngaiin pasal neiin fa pawh an nei hman ang a, an inthen leh aniang tiin. 

Kum rei tak inngaihven lem loin kan awm ta a. Dawr te ka hawng a. Ka hlawk chho ta viau. Tichuan, Sangsangi khan min rawn zawng chhuak ta hlawl a. Ani hi chu ka fa a ni chiang a, ka pawm thlap. Mahse, kan nu saw tih takzeta ka lo hmangaih tawh vang leh tihnat ka hreh em vangin fa ka nei tawh tih hrilh kha ka ngam ngang lo a ni. Chutak chu Sangsangi a thinrim em em a, min vau nan a hmang ta a ni. Cheng nuai 20 ka pek chuan ka fa a ni tih a sawi loh tur thu a sawi. Eng rilru nge ka put ka hre thiam lo. Ka lo remti hmiah bawk.. Hetia a thi tih ka hriat takah hi chuan ka inchhir takzet a ni. Ti nge ka fanu a ni tih sawi kha ka hreh tlat le " Pu Tluanga hmelah chuan inchhirna a lang thei tak tak. Sangsangi nen pawh an inan deuh hi a… 

"A thi tih engtin nge i hriat? " Amanda chuan a ti a. 

"News atangin ka lo hre ve a. Rawn haw nghal rum rum ka duh hial asin" a lo ti a. 

Pu Tluanga lakah chuan han hmehbel theih tur eng vak a awm ta lo hle mai. Mahse, Pawisa hian thil a tithei em a. Ani pawh a tul thuta koh mai theih tura inchah chungin a haw ta phawt. Amanda a inngaibtuah leh ta veng veng mai. A kual thui riau mai. Rin ai takin a khirh zek dawn anih hi. 

Amanda chuan ka hriat lohin hna a thawk leh a ni maithei. Ni hnih vel chu a reh leh hmak. Biak buai ka duh lem lo. Sangsangi thihna chuan ka ngaihtuahna a tibuai. Dik tak chuan rinhlelh tur reng reng ka hre lo a ni e. A chet duhdan han en chuan call girl ni chiah si lo, han inzawrh zeuh hreh lo a nih hmel a, chutiang khawpa sum mamawh chuan eng harsatna nge a tawn ang? An chhungkaw khawsak dinhmun kha chuti em ema harsa a nih hmel si loh. Amah Sangsangi hian pawl sawm pahnih thleng chauh lehkha a zir reng reng a. An sawi hmangin beutician nih a tum a, mahse, a nuten an remti lo niin an sawi. Thian a nei nual naa, han kawm thuk tak tak ang kha a nei lo a nih hmel. A nau sawn tunah class Xii zirin science subj a la a, Doctor nih a tum hle tih an sawi bawk. An unau hi pa hrang mah nise, an inngeih a, Sangsangi phei hi chuan a duat ve hle tih thlengin an sawi. A nau pa hi tu nge tih hria an awm lo. Chu chu thilmak tak a ni. Sangsangi nun han khaw lo ta viau pawh chu dem lohna chin ka nei deuh, a nu atanga a chhawm te pawh a nih theihna lai a awm ve tlat! Pasal boral hnu lawka nau pai, chumi hnuah pa hran atanga nau pai leh bawk chu hmeichhe buanchaklo tak a nih a rinawm angreng. Mahse, kan lo sawi ve tur phei chu a awm lo va. 

"Sam, zanin chu chaw lo ei leh la.. Vawk kawchhung ka lei a, siam teh" a ti leh ngawt a. Kei lahin ka lo chak sakhai ve bawk si. Phur takin ka zui leh ta duan duan mai. Ka bialnu in kan thlen chuan ka che leh nghal sawk sawk a. Ani a inbual thung. 

"Sam, towel ka ken luh theihnghilh daih.. Min lo pe lawk mai" a rawn ti láng lang a. Ka chemte ken chu dahin a towel chu ka va laksak a, a kut a rawn dah lang vâ. Uan ka chak pek a, "Rawn la ta che" tiin ka pe duh lo lui tlat. A kut chu tichein, "Vat vat" a rawn ti. Towel pek pah chuan kawngka chu ka kuai kau hlek a, ruak vekin a lo awm. A saisir zawnga a din vangin a pawimawh lai ka va hmu lem lo. 

"I hre viau ang" a ti fak a. Na zetin kawngka a khar nghal. Ka khi ţhaw ringawt. A inbual zawhah ka inleih tleng ve zuai a. Zanriah kil hmain wine kan lem dun. 

"I van nalh nichin khan" ka ti a. 

"I ngaihtuahna bawlhhlawh zet kha ka mamawh rih lo ania. A hun takah chauh ka tih kha" a ti a. Thinrima sawi a ni hran lo bawk. 

"Mahse, ka bialnu hi ka duh hun huna fawh ve theih ka duh" ngampa min ti ang em aw. 

A hmui a rawn tipawrh a, "Khaa" a ti.. Kei lahin hun remchang bawhpelh hlau zetin ka lo fawp hmiah. Minute khat vel zet chu kan inkeih ve awm e. Ani pawh a thaw a rang hman. Mahse, a ngaite bawkin a inla hrang leh daih. A timing hi a hre chat chat a nia. 

Zanriah kan ei laiin, "Thilmak deuh i hre duh em? " a ti a. Chaw chu a thial tâwlh tâwlh a. 

"Umm" ka lo ti hmuk. 

"Ramthanpuia saw Pu Nunmawia fa a nia" a ti ta a. Ka chawhmeh hawp lai ka hak phah. 

"Nia, a pa thei lo kha an ti sia.. Mahse, thiamna hi a sang tawh a. A lo pa thei chiang anih saw. Saw vang sawn alawm nupui pawh a neih tak loh" a ti ta zel a. 

"An va tenawm unau em" ka lo ti hluai. 

"Chutia tlangzarh lung lung chi a ni lo. Anmahni phei saw chuan an thih ni thlenga zep an duh ang. Mahse, Pu Nunmawia doctor pan thin hian min rawlruk zauh a ni. Sangsangi thihna atana pawimawh tura a ngaih vangin. Hria anga lan pawh a ngai lem lo ania. Mahse, sangsangi thihna nen a inzawm erawh ka ring ta deuh " a ti ta duah a. 

"Mahse, tuin nge that ang? Engvangin nge an thah ang? " ka ti hû a. 

"A tu berin nge kut thlak ang ka hre bik lo. Mahse, i hriat tur chu khamini Sangsangi thih ni khan Pu Nunmawia chunschoolah a awm ngei a, ban hunah tak a bang bawk. Mahse, Ramthanpuia erawh chawhnu class a kal lo a ni" a ti ta a. Vawk thithun hmawm zauh pah chuan, "Chuan.. A nau chuan a that tihna mi? " ka lo ti liam leh puat a. 

"A nau mai a ni lo, a nu pawh dawrah dar 1 thleng bak a awm lo.. Tin, an thenawma an putar sawn Sangsangi chu dar 1 bawr velah ina a haw lai a hmu bawk" ti a. Antam tlak tui a hawp pûk a. 

"Mahse, an sawi dan te chuan in a chhuahsan leh an tih kha"ka lo ti nghek. 

"Chu chu tuin nge hmu? " a lo ti hmiah. Ka dang der mai. 

Thawh pahin, "Thahna chhan tur an nei si lo va" ka ti leh hram. 

"Chutak chu kan ngaihtuah tur a ni. Ngaihtuah teh, an inah ngei ama roomah ngei a ruang hmuh a ni. Thawm an hre lo va, zan tlai tawh taka thil thleng lah a ni hek lo. An thenawm te pawn tu emaw tal chu an hmu tur a ni. A tira a ruang an hmuh dan an sawi atang khan ka ngaihtuahna a buai daih tawh" a ti nghat nghat a. A'n sawi takah chuan kei pawn ka hrethiam ruak mai. A dik, tu emaw mi dangin that daih nise engtin nge a ruang kha a roomah a chhungte hriat loha a dah luh tak ang?! 

"I man mai dawn em ni? " ka ti a. 

"Aih, naktukah Doctor ka hmu leh phawt ang" a lo ti a.

A tukah chuan kei chu chawlh ka la a, a chhan pawh ka nuteii fanu pasal neih ni a nih vang a ni. Amanda chin erawh ka hre chak zek zek mai. Han sawi hluah chi ni si lo hian min kap ve reng mai. 

Zan dar 8 a ri dawn hnai a, Mo lawmna atangin ka haw a. Ka inthlak fel chiah tihin Amanda aw ka hre thut. Ka nu nen an inbe hlut a. Ka va chhuak vat. 

"Hawh le.. I zuk man ang hmiang" nui chungin a ti a. 

Dawhkan kilin kan thu kual leh pap. Pu Nunmawia, Pi Thanpuii leh Ramthanpuia te chu a indawtin an thu ţhâm a. An hmel chu hmuh a nuam fahran lo hle. 

"Tu berin nge sawi dawn che u" tiin a melh kual a. Pu Nunmawia chuan dawhkan a beng ri thak, "Ka tunu chu engvangin nge ka thah ngawt ang a. Nang hian man tur dang i hre hlawl lo em ni? " a ti vin thak a. A meng sen râm mai. Amanda chu a lo khi sak. 

"I thah chhan tur ka'n sawi lawk dawn em ni? " tiin a thut dan a siamrem a. 

"Pu Nunmawi, i farnu laka i fapa Ramthanpuia hian hun eng chen nge a la neih? " a ti zawi sap a. Pi Thanpuii leh Pu Nunmawia chu an phawk kher mai. 

"Eng.. Eng thu nge i sawi hi" Pu Nunmwwia chuan a ti nghek a. 

"Khatia uan kualna hun ka nei lo a nia. Ni e, i farnu lakah fapa i nei a. Ramthanpuia hi i fapa a ni. I hmangaih em em a, nupui pawh i nei duh ta lo reng a. Amah hian i fapa a ni tih a inhre hauh lo thung.. " tih pahin Ramthanpuia chu a va melh a.. Ramthanpuia chu a hamhaih hle tih a lang. A dawldan sa nak a laiin a dâng zual sâwp sâwp ni hian a hriat. A nu leh a putea chu a melh tawn chhen bawk. 

"In pahnih chiaha in thuruk a ni a. In doctor chiahin a hriatpui che u. Unau in nih miau vangin tuman an ringhlel hek lo che u. Nupa ang maia inkhawsak dun dan erawh ka sawi lo mai ang. Tichuan, Sangsangi chu i tan fahrawn ang a lo ni ta a. A lang apau chuan i duatin i ngaihsak hle. Mahse, i tan chuan hmanrua a ni. Khati taka Sangsangi sihnip chhan pawh kha ka rin dan chuan nang hian a tetlaiin a chungah thil tha lo tak i ti a nih ka ring tlat.. 

Hun a kal zel a. I hna saw a nghet lo a nih vangin inkhawsak a sang thei lo. Chuvang chuan Sangsangi pawh school in kal zawmtir ta lo va. Ruahmanna i nei ta a ni. Mi hausa ngaizawnga an sum eisak turin.. I vaua i hrem nasat theih em vangin a ti lo ngam lo. Mahse, bialpa a tawng ve ta a

Rempuia kha. Kha kha chu a tan a hlu em em a, mi hausa a ni ve lo thung. Mahse, nang erawh chuan i vaua i hrem zel avangin Rempuia ngaizawng chungin mipa dang a kawp tho thin. Rempuia chuan a neih mai i hlauh tak avangin ruahmanna tenawm in siam ta a. Pawngsualtu anga lantir turin. Sangsangi kha engtiang chiahin nge in vau ka hre lo. Khati khawpa a ţang thei kha. Rempuia chu in duh ang takin in kaltir thei ta a. Pawisa in hmu ta bawk. 

Tichuan, Sangsangi pa dik tak hausakzia in hre ta a. Ruahmanna dang in siam leh ta vat. Sangsangin a pa a hmuha a hriat khan a lawm em em a, mahse, a tih duh miah loh tur in tihtir piah lamah a thluak insuk sak ta a. Pu Tluanga chuan amah Sangsangi duh lo leh phatsan anga sawiin, zawi zawiin a rilru in hneh chho va. A pa kha a haw ta reng a nih kha.. 

Engvanga sum kha mamawh ngawih ngawih nge in nih tih hi ka chhui rei viau. Ramthanpuia landan avang hian ngaihtuahna dang ka nei a, doctor ka hmu kual ta nual. Ni e, vawiinah khan ka duh tak ka hmu ta a ni. Ramthanpuia kal hi thlak a lo ngai reng a, mahse, a petu tur hmu mah ula, a senso a turu lutuk. Chuvang chuan a lo nia, khati taka pawisa in lo mamawh ni… a dik tiraw.. Ee.. Ka pi, khatin lo inhup suh. I fanu i rilarah ngei i that thei anih chuan, ka thusawi hi i ngaithla ngam ngei tur a ni. Khai le.. I fanu chu engtin chiah nge in thah tih min han hrilh teh u le.. " Amanda aw chu a vawt raih mai. 

Boruak a reh hle, a ngawi dûk a ni ber e. Pi Thanpuii chuan a aw a thian kâwk kâwk a. Harsa tih hmel zet hian, "Ni e, ka fanu kha thah ka tum bik lo asin. Khaminia a lo haw khan thinrim takin min rawn ko va, U Tluanga nen kan chungchanga thudik kha tu emaw hnen atangin a lo hria ni ngei tur a ni. Kan sawi dan nen a inan loh vanga thinrim a ni. Tin, Rempuia a kalbo tak atang khan luhlul a chhuah thin, a rilru hi a paukhauh ka ti mai. 'Ka hmangaihber pawh min hnawhbosak tawh a. In thu ka awih rengna chhan tur ka hre lo' a ti thin. 

Tichuan, kan inhnial ta vak a. Khatih lai tak khan Mama hi a lo haw a. A nawmsam loh vangin. Sangsangi thinrim chuan in chhuahsan a tum a. A pa bula awm a tum a ni. U Tluanga erawh a zin lai a ni a, a lo hawn veleh cheng nuai 20 inpe tura inrem an ni tawh. Chuvang chuan in a chhuahsan kha a rem lo a ni tawp. A rooma a insiam mawlh mawlh lai chuan tihngaihna dang ka hriat tawh ngang loh vangin talhtumin a hnunglam atangin ka hlap ta a. A tlu nghal thlawrh. Mama hi a rawn kal vat a, "Min thah a tum a, tihian ka ti ta mai a ni.. Khawiahmah sawi suh ang che' ka ti a. Kan inhnial kha a hriat ve vek vangin mak a ti lem lo. A thawmhnaw siamsa chu ka dah fel leh vek a, a harh thei mai si lo. A mar erawh a la awm. Ka u hi ka be ta a. A lo hawn hun nghak turin min ti a. Ka lo nghak ta ngawt a ni. A lo haw a. Ruahmanna kan siam a. Lo harh leh ta se engkim sawi chhuak ta se.. Kan mualpho bakah jail te hial kan tang thei tih kan hria. Anihna takah chuan ka fanu kha kan zuar a ni ber a, kha ringawt pawh kha dan bawhchhiatna a ni tawh. Ka u chuan room kawngka a kalh sauh sauh a. Mi kut tuar ang thei berin a nghaisa ta a ni. Mama erawh a roomah a awm thung. A û room nen a inhlat vangin engmah a hriat ka ring lo. 

A sarhu lai a nih vangin engmah kha ka pawisa zo tawh lo a ni ber. Ka fapa hi ka hmangaihin dam chhuak se ka duh bawk si a. Sangsangi kha ka tan chuan a hnawksak tawh a ni ber. Engkim a hre ve zul tawh bawk si a, a nau hi a putea fapa a ni tih hre ta phei se chuan thi sa tluk kan ni mai. 

Tikhan ruang kha ka va hmu a. A nau hian min rinhlelh kan hlauh em vangin a ruang kan hmuh rualin, "Rempuia a ni ngei ang. Phuba a la anih hi" kan ti a. Ani pawn a ring chawpchilh ve nghal niin ka hria.. Chu zawng chu a ni e" tiin a sawi ta a. 

Amanda chuan a kut chu dawhkana tlir zaih zaih chungin, "In fapa Ramthanpuia vang hian alawm ngaihtuahna thar ka neih tak… sangsangi thih nia in inhauh hrep thu kha ama min hrilh hi a nia.. " a ti a. An fapa chu an melh a, ani lah pawisawi lo zetin khaw dang a lo hawi daih. A lainatawm ngei mai. 

"Sam, kan bulhnaia mi te ngei hi kan tan an hlauhawm thin reng a ni. Chuvang chuan nang pawn tumah ring suh. Nangmah chiah inring ang che" a ti sap a. A motorah a lut a, chak zetin a tlan liam nghal. Ka ding reng a, ni e, tualthahna case hi ka lo hre ve nual ta. Mi hrang daih ai chuan an thisen zawmpui te ngei hi an lo ni zawk zel thin.. A mak a, a mak lo bawk. Kan hmelma te ai chuan kan lamhnai ten min tina zing fó zawk si a. 

(Ka ziak khat ta deuh a. A va harsa ve 😏