A tel lovin 9

A TEL LOVIN… (Chapter- 9)

Ziaktu: Toni Râlte

Kum thar an chuangkai ve leh ta. Khawvel pawh a kal dan ngaiin a la kal ve reng mai. Ruatfela te hlauhthawn ang ngeiin kum thar ruai an han ţheh zawh atang chuan a pa chuan in chu a rawn hel ţan ta chiah a. Rinpuii lah a fingin thil kalhmang a hre angreng si. A duh dan chuan Ruatfela te in chu a hmun nen lam hralh a, sumdawnna eng emaw lian tham deuh khawih a tum a. Tuna an awmna hi a pa Tlánga a thih hunah chuan a ta tur tho a ni bawk a. Zuk awmthlak kher chu ţulin a hre lo a ni. Ruatfela ni te pawh an thinrimin an unaupa chu an ngei ve khawp mai. Hmundanga an unaute pawh an hrilh ve a, an ni lam pawh Ruatfela te lamah an ţang a ni. Mahse, dan chu dan a ni a, in leh lo chu Pu Lawma hmingin a awm miau si a! Ruatfela te tan chet vak ngaihna a awm lem lo. Hetiang hun hi an la tawk ang tih an hre si lo va. Thenawm khawveng leh a khawtlang ang zawng pawn Pi Zuali te chu an lainatin puih theih an châk, revenue lama an tihtheih a zo tawh bawk si. Chuta karah pawisa an phang tan ta a. Ruatfela lu a hai ta viau mai. 

"Tun thla chhungin chhuahsan u la a tha a ni mai. ' tih chu Pu Lawma thutlukna a ni mauh mai si a. A thian thenkhat te pawn an han zilhhau ve sasawi a, Rinpuii'n a thluak a su hneh tawh lutuk. Bakah harhfimin a awm mang lo tihtheih a ni. Ruatfela te tanchhan ve ber lah, "In a chhuahsan tawh alawm" tih a ni tlawng si a. Tihtheih an va nei tlem ngai em.. 

"Aizawlah hian kan phei tlang diak mai dawn mawni le ka ti" tiin a nu a rawn a. Duhthlan tur a vâng tawh em a ni. Mahse, Aizawlah in han luah mai tur a vang angreng bawk si. A va luah lah an chhungkuaa luah a tan chuan a zim deuh bawk si. 

"Mama, kei chuan engmah ka ngaihtuah thiam tawh lo. Ka innghahna i ni e.. I thutlukna apiang ka pawm ang" Pi Zuali chuan a ti ta tawp a. Ruatfela a zâm viau. Kima bakah a nite a han rawn khawm a, Aizawla phei ve râwih mai chu tha an ti tlang ta a. Thenzawlah la awm dawn se mi in an luah tho a ngai ang a, eizawnna lah an nei nghet bik si lo. Pi Zuali chu taima viau mah se; in lam lo buaipui tur ber Mampuii lah a pass ve hlauh chuan Aizawlah college kaltir a ngai tawh dawn si a. An zavaia awm chu tha berin an hre ta a ni. Ruatfela pawn Mami pa Pu Dinga te chu a be rawn ve a, in luah tur remchang te zawnsak turin ani pawh a lo inhuam thui ve viau. Pa fel tak zawng a ni ngei e. 

Ni 15 a ni ta. Ruatfela te pawh an bungrua te an han siksawiin ken ngai tur te pawh an inkhung tan a. Pu Dinga'n a lo call a, "In luah mai tur a vâng riau a. Mahse, ka fapa ang chiaha ka en che i ni bawk a, i awmna chung luahtu te khan in luah man an pe hleithei bawk si lo va, insawn chhuak mai turin ka tia, an lo hreh lem lo bawk a. Kha mi kha chu a lian ta deuh bawk a, i duh mai ka ring" a rawn ti a. Ruatfela chu a lawm em em naa amah vanga mi dangin an tuar tur chu hrehawm a ti tho mai. Mahse, duhthlan tur a nei lo. Pu Dinga te in hnuai chiah luah tur chuan an inbe fel ta a. Thla khatah 3000-in an luah dawn a ni. Mampuii erawh exam hmachhawn tur a la ni si a, A nìteii te in atangin a exam ve rih phawt dawn a ni. Naupang pahnihte erawh buaipui ngai an la ni si a, kum khat an hloh ve mai a ngai dawn a ni. Ni 18-ah Aizawl lam panin an chhuak ta. Pi Zuali lung chu a chhe ru khawp mai. Kha chen an lo chenna leh khawsakna, thenrual chhia tha an lo neih ve na hmun chhuahsana khaw danga mikhual va nih leh chu phurawm loh tak a ni. A hun tawn rapthlak tak chu mumangah pawh a la mang chhin lo asin le.. 

Pu Dinga in hnuaiah chuan an inchheihrawkhah lut ve ta rup a. Bungraw tihtham em em an nei hran lo. Thutthleng leh thil dang neuh neuh awmsa a nih vangin Thenzawla an thutthleng leh thil dang tihral theih awm chi kha chu an hralh tawp mai. Pawisa nei tawh hek lo le. Pu Lawma unauten tlem tlem an pe ve bawk a, chungte nen chuan nun bul an tan chho leh dawn chu a nia. An han insingsa chho va, Mami pawh a lo tha deuh tawh a, a rawn pui ve lawp lawp. Ruatfela nen mumalin an la inbe lo. A lo cher kuam a, a ngui nghiai bawk. 

Ni 19-zanah Ruatfela chuan Pu Ramtea chu a va be ta a. Rem an lo ruatsa angin Pu Ramtea chuan, "Zarkawt-ah i phei ang a, Abigail Hotel-ah i va inhmelhriattir ang a. I awm dan tur chu an lo hrilh mai ang che" a rawn ti a. A awlsam hmel khawp mai. Ngaihngam takin a muhil ve thei ta. 

Arini pawh chuan Ruatfela te Aizawl rawn phei chu a lo hre ve lehzel a. A helhhawlh tlat lehnghal. Inhmuhtir loh a duh si, a hmu chak bawk si. A awmdan chu a hrethiam lo. Tanhrilah Ruatfela chu a khawsa daih awm sia, hmuhna chance a neih vak hmel loh. Hotel zawka thawk tura a u a lo nawr lo kha a inchhir hnuhnawh hle. Mahse, Hotel chu an hna a khirh bakah zir tur a tam deuh hlek a,Ruatfela tana awlsam deuh tur a zawnsak ve bawk atin ni. School a kal ve leh tawh a. A pa thi awih tak anga lan ve phawt chu a lo intiam ve tawh si nen.. Tul a ti ve tlat. Class a va kal hmasak ber niah an english teacher thar nen an inbakkaih nghal. Miss Julie chu a la naupan hmel ve viau, a ngo in a fresh takmeuh a, a khal viau! Mipa ho in an star nghal renh bawk a. A chezia engkim chu a confi hle. Mahse, Arini mitah chuan ramhuai a ni. An sir zinga a ngainat ber luahlantu leh a hna chhuhsaktu a ni miau a. Mi dangho pawn Sir Ruatfela chu an ngaih thu leh a bang thut chu mak an tih thu an sawi ve sap sap thin. Thudik erawh engmah an hre lo. Miss Julie chuan Writings a zirpui a, MA (Eng) a ni bawk a. A hnehsawh par par hle. Mahse, Arini chuan keuh thluk dan a ngaihtuah ran mai. Ani pawh thiam uluk lutuk a ni ve si a, a chana a han chan takah chuan beihna tur hmanrua chu a hmu ta chat a. A ding a, an miss thar chu a hnial ta a. Dik an inti ve ve si, Principal-in a ko ta nge nge a. Hremna erawh an hmu dun lem lo. Zirtirtirtu dangte chuan Julie bulah Arini mizia chu an hrilh sap sap a. A pa thianpa fanu a ni tih a hre bik hauh lo. Hria pawh nise kawngro a su em em lo vang. 

Ruatfela chu Nancy hmaah a thu ran a. Nancy chuan a en ngun kher mai. A nauin a buaipui em em mipa chu a lo rin dan chuan sar veh vuah, fresh leh no sar a nih a lo ring a. Mahse, Ruatfela chu Thenzawlah khan hna a thawh nasat bakah a rilru a chawl meuh si lo va; a thu that a, a cher deuh bawk. A hmel fang erawh Nancy chuan a dik hle chuan a hre lawi a. 

A hming leh veng te an han inzawt a, qualification nen. A hnathawh dan tur te an sawi dun ta zel a. Ruatfela zam ang aiin Nancy chu a lo felin a lo dawngsawng tha phian mai. Amah a changkangin a zahawm em a, a uap a na tih mai loh chu. Ni 24-ah Tanhril-a insawn thla tur chuan an inbe ta a. A hna pawh a hahthlak vak dawn loh e. Manager ang deuhin a awm ang a, hna sem leh mikhual lo dawnsawn kha a ni deuh mai. Weekend-ah a haw ziah thei dawn bawk. A theihtawp a chhuah ang tih a sawi ve a, Nancy pawn rintlakah a ngai. A hmaa an lo chhawr kha zu a in nasa a, resort-a rawn thlengte nen zu an in hut hut zel a, a zahawm loh bakah an sum hmuh tur mang mang pawh an hmu thin lo. Ruatfela hi chuan "Zu ka in ve zeuh zeuh a, mahse, in tawh loh ka tum" a ti thlap a. A ring riau. 

Pheikhai zang takin an in luah lam a pan a. An veng a thlen hma deuh chuan school naupang pawh an lo bang tawh a, an inpel zut zut mai. Dawr pakhata a naute hmawmsawm tur a lei lai tak chuan, "Sir" tia rawn ko lauh lauh a hria a, a va hawi phei nâk chuan a student hlui te ho an lo ni a. An rawn pan mek, an nui sâng bawk a. A lung a leng ve reuh khawp mai. 

. "Sir, ti nge i ban a? Awii kan ngai tawp che. A reh vek" Seni chuan a ti sar sar a. Mindang pawn, "Dik chiah, ih, kan miss thar chu a inla vel tawp a, in zirtir dan a inang bawk si lo. Sir, lo thawk leh rawh" an ti sap sap a. A nui tawp. 

"Thil dang ka buaipui alawm mawle.. In ngaihawm tawp" a ti ve a. Kawngkal an awm ve reng si a, awmkhawm luih kha thil tihchi ni hek lo le.. An inbye bye ta a. Judy leh mipakhat rawn inphur phei a tawk leh hlawl! An rawn hmu ve lo hlauh! A pasal tur chu a ni ngei ang. Judy chu a lo thau ve deuh tawh nih kha tih a ngaibtuah mai mai. A phone rawn ri mek lak tuma a ipte zen buai kawng en lem lo va a kal chu tu emaw nen an insu chawrh mai. A phone pawh a thlauh nghe nghe. 

"Ka tihpalh" an ti rual ve ve a. An han inhmachhawn takah chuan Arini lek lo niin. An inmelh dun vawng vawng mai. A phone chu a chhar a, "I dam maw? " a ti mawl tawp. A hmaa a lo huatna te kha a bo tawh a niang, han thinrim thar leh a tum pawn a hlawhchham titih tlat! Hna tha zawk a hmuh tawh vang te pawh a ni mahna le.. 

"Sir.. " tih bak a sawi leh pek lo. Hunpuiah a inhmang nasa deuh nge, a hâng lek lek. A hmai te chu a bawl emawni.. 

"Sir, nangmah tiraw? " a ti leh nghek! Ruatfela chuan kawng kal te melh zuk pahin, "Aw.. Ti nge? " a lo ti ve hû! An lai dun lutuk chu a nuihzatthlak zawk. 

"Ka kal dawn. Lehkha kha tha deuhin zir ang che" tih leh Ruatfela chu kal a rual a. A hnunglam atanga en zui vawng vawng pahin ama hriat tham chauhin Arini chuan, "Ka ngaizawng chiang mai" a ti sap a. 

Zanah Mami te inah a han leng ve a. A nute an chhuak daih a, an pahnihin an thu dun leh khar mai. Mami chu a laih hmel reng a, a khawngaih deuh. 

"Ti nge damdawite chu i lo bar vak a? " a ti ta nge nge a. Han pehhel vak dan hre hek lo. 

"Thih ka duh alawm" a lo ti nghat a. 

"Mam, kei chu mak ka la ti reng, tu nge a pa dik tak, ka bulah chuan sawi ve la. Ka sawi chhuak dawn chuang hleinem" a ti ta mawlh mawlh a. Farnu biakin a bia a ni ber. 

"I hre ve dawn chuang lo. A ho em mai" a lo ti a. 

Han zawh luih ţâlh kha nuam a ti si lo va, "Fimkhur tawh rawh aw. Zu pawh in tawh lo la a tha. Ka nau ang chiahin ka en che a nia" A ti ta a. Mami pawh chu a bu ve nghat nghat mai. Tul lo lutuka Ruatfela rilru a lo tihrehawm vak kha a inthiam lo ve em em. Chutihrualin Ruatfela'n timualpho lo va, a ngawi zui thei te chu a ngaisang a. Mipa dangte chu nise a puhna vang ringawt pawh khan an report tawh zawk maithei si a. Nun thara nun bul ţan a tum ve chiang khawp mai. 

A naute chuan Aizawl chu nuam an ti meuh lo. A dik ang, thian ngaina rual an ni a, han kawm em em tur an awm si lo. An khuaah te chuan khawlaiah an tal mai mai a, ramhnuaia an kal chak leh an thianho inthurualin an liam ngawt zel kha a nia. Hetah chuan tuia cheng tur pawn a kalna kawng pawh an hre si lo. An unautê chuan an inkhualtelem ve leih leih a, a nuam tak tak lo. A nu tak pawh a lung chu leng ru tak a ni. Thenawm khawvengte nena chawhmeh insuaha inau tawn reng reng kha an ni a. Bakah anhnah takngial pawh hetah chuan lei zel a ngai tawh a, leipui pawh a nei thei tawh awm si lo. Duhthlan tur kha an nei miau si lo. An la awm rei ang a, an zia ve mai ang chu maw. 

Pu Lawma erawh chuan a nupui fanauten in an chhuahsan tih a hriat rualin a in chu Aizawl pa hnenah a hralh ta hmak a. Han inngaihtuah buaina leh mi dang han rawnna pawh a nei lem lo. An nu tih ang ang chuan a awm a ni ber. An hralhna sum erawh Rinpuii ac-ah an dah ta hmak a. Sumdawnna eng emaw a la khawih dawn niawm tak a ni. Tunah chuan Pu Lawma chuan neih a nei ta lo chu a ni mai. Pawi pawh a ti chuang lo a niang e. Mihring rilru hetiang taka a danglam chak hi chu kan mihringpui te vang bawk a ni. 

"Nu, ka kal dawn aw.. Kar tawpah ka rawn haw ang. Lo inenkawl tha ru aw. Dampuia te saw lo chhuahtir suh aw. Motor a tam si" tiin Ruatfela chu a inak uaih a. A nu pawn kawngpui thlengin a han thlah ve. Mampuii a la rawn phei ve thei rih si lo va, an khua a har nufa khawp ang le. Pu Dinga'n an TV hlui a pe hlauh zawk a. An khuaah khan TV chu an nei naa, cable zawk kha en theih lohin line a chat deuh fo a, an en ngai mang lo tihtheih a ni. TV bak han inawmtleina tur an nei lo a nih ber chu. 

Nancy hrilh angin Hotel lam a pan leh phawt a, chuta tang chuan Bolero-in Tanhril-ah chuan an zuk thlah ta a. Tanhril hi a vawi hnih kalna chiah a ni. Driver chu a fel in a phawk bawk a, an titi thei phian. A pa rual daih a ni naa thian ang chiahin a kawm bawrh bawrh a, Nancy te felzia leh a pasal Vikram erawh a khirhzia a sawi bawrh bawrh a. Vai ho hi chu an khirh ve deuh thin bawk a. Nancy chu a ui thu leh mizo tlangval pawh a hmuh zawh dawn tehlul nen vai kher. anei chu a ngei dawn dawn thu te a sawi a. Ruatfela a tawng ve mang lo. 

"Nancy U Mama pawh hi pa tha tak a ni. Ani erawh phai lamah an inbengbel a, an rawn haw khât angreng. An rawn haw tawh hi chuan a driverah min hmang zawk mah a, a pawk thei sia a nuam tawp" tiin a nui huah huah a. 

"An fel chhungkua hrim hrim anih chu.. Mi hausa thenkhat hi chu an kawm ve theih nen" Ruatfela pawh chuan a lo ti a. 

Driver Pu Thana chuan kuhva hmawm zauh pahin, "An te ber i la hre lo anih kha.. Eee.. Sakei chu neptê, a suala a sualzia chu e.. Sawi hian a siak lo. Hmeichhia a ni zawk hlauh a, mipa phei chu nise tual a that tawh hial ang. A chapoin tumah hi engahmah a ngai lo a ni ber. Nancy te unau ni ve awm pawh a ni lo. A pian tlai ngaihtuah chuan an fa lak anih te ka ring hial thin alawm" a ti leh ta hmiah hmiah a. Ruatfela chuan a tum loh deuhin Arini a hre chhuak zawk. Hmeichhe sual a hriatchian chhun kha a ni ve miau a. 

"A va mak awm ve.. An duat sual ve a ni lo maw? " a lo ti a. 

"A ni ve thei tho. A pa a zah loh dan leh a tawngkhum thin dan phei chu hria la i râp ang. Ka fanu chu nise ka hlap vir nawk nawk tawh ang. Mahse, a pa saw a zaidam viau nge engtinmah zuk ti ngam lo va" a ti leh a. Kuhva a thial sen sung bawk. Tui a tih hmel teh e. Resort pawh an thleng hnai ta a, ral khat atang pawn a lang mawiin a nawm hmel kher mai. A kawng lah an black top vek bawk si. A changtlung viau chu a mak lo ve. 

Gate lian zet a lo awm a. Duty hian a lo hawng vat. A compound pawh a zauin pangpar leh thing mak zet zet a ding nual. Awmze nei taka rem khawm an ni tih erawh a hriat. Swimming pool pawh pahnih lai a lo awm. Building chhung an han lut pawh Ac vek niin a thianghlim kher mai. A chung phei chu a view a thain duhthusam a ni ringawt mai. Room hi a vaiin 20 a awm a. A rate erawh a dang hlek hlek. Ruatfela pawh a room turah hruai niin a pian tirh ata chutiang room nuam leh changkangah chuan a la cheng lo hrim hrim. Nuam tak a ni tih hian hril zo se a tawk mai e. 

Pu Thana chu a let leh nghal a. Ruatfela a khuahar rawih mai. Mahse, hnathawk dangte chuan zahder takin an dawngsawng a, tlem chuan a awm a nuam leh ta deuh. A hmun a nawm em vangin tlei taka a awm theih mai a beisei. Mikhual lo thleng tur an awm leh nghal a. A inbual fai a, Recetion counter-ah lutin enfel ngai te an en fel thuak thuak a, thil harsa tak zawng a ni lo vang. A harsa ber tur erawh a hnuaia thawkte hi amah aia upa te pawh an awm a. Hotu chan chang taka ro han rel chu a ni. A la tih ngai loh a nih bakah mi hmai eng zah chi a ni si a. 

"Rinsang, khawiah maw i chhuah leh dawn a. Exam hnaih tawhzia i hria a ni lawm ni? " a pa chuan a ti tùn tûn a. 

"Ka riak chhuak dawn. " a lo ti hmak. Chek tlawk tlawkin a pa chuan, "Rawn haw tawh suh. A nih chuan" a ti nghek a. A nu erawh a awm lo. Tun lai a nu hriselna dinhmun a tha vak lo va, a inchek up a ni. 

"Aw le" a lo ti mai a. Ruatfela'n hna a nei ta bawk a, a pa laka that chhuah chu a tum ta vak lo a nih hmel. 

"Aw le, in sir Ruatfela ka'n bia ang a, i hming kan sawi lang a nge" Pu Thanga chuan a ti khauh. Arini a ding chawt a, a pa chu rum zetin a va melh. 

"I ka hup dan thar ka hre ve tawh alawm. Tikhuan hna nei loin a vakvai leh ang a.. A hmuhnawm ngawt ang" a pa bawk chuan a ti leh a. Arini a ter at, "Rilru chhe pa, anih chuan be rawh. Khawvel hriatah pawngsual ka nih thu hi ka puang ang" a ti ve ta hmiah mai. Chutih lai tak chuan a nu a rawn lut. A thusawi chu a rawn hre hman vek. Chhuatah chuan dingin a fanu nen chuan an inmelh ta reng mai. Pu Thanga lah a hawihai bawk. An nuin engkim a hre ta. Engtin lêk nge a insawifiah tak ang le.. 

"A tu zawkin nge thil awmzia min hrilh dawn che u" a nu awki chu a chang kher mai. 

An pafa chuan an inmelh ta zak zak a. 

"Pa, tunah chuan engkim sawi a hun tawh e. " Arini chuan a ti ta sap a. Ni e, hre ve vek tawh law law se a a hah pawh a dam deuh tawh ang. A nu chuan na a ti dawn tih erawh a hrethiam. 

A pa te room-a a nu leh pa inzui lut chu thlirin, "A insawithiam leh tho vang" a ti a. A chhuak zui daih. A pain engtin chiah nge a nu chu a hrilh ang tih ngaihtuah zui a duh lo. A na mai mai. Tuna a ngaihtuah chu Zu in nghek a nu mai. A thiante nen an han inhmu a, An kalna thin lam panin an inzui leh dam dam mai. A thian mipa te hi a rinngam te vek an nih rualin han ruih tawh chuan bawh thuak thuak duh tur awm mi chu an awm ve tho. Chuvang chuan rui chhe overin a awm duh lo. Mipa chu a mutpui tawh ngei mai, mahse, mahni thiante em mutpui chu a ten tlat. 

"Khaw nge chaw kan ei dawn? " Johny chuan a ti lung lung a. 

"Hotel kan pan mai dawn nge. Eng nge" Zosanga'n a lo ti vat. 

"Ka ril pawh a tam lo" Arini chuan a ti sap a. Zu chu a lem leh hlak. A pum sa thla vang vang chuan a ngaih a tihthat hmel viau. 

"Ee. e. Ka hre leh si, Lalrin, i u ten an resort an hawn leh tawh kha.. Vawiin atangin. Kal ang u. Tanhrilah zawk kal ila" Phunglung ber Zuala chuan a ti a. 

An lo thlawp kher mai. Arini a ner sak. 

"Falkland-ah kal zawk ila" a ti a. 

"Naaa.. Saw lai chu an pu ber saw a sual emm.. A inla thupuifun si. Ka peih lo. Tanhrilah zawk chuan kal ang u" Sate'n a lo ti ve vat. 

"Tanhrilah chuan hnathawk an la thar a, a fel vak lo maithei ania" Arini'n a ti a. 

"A ho a ho.. Kal ang u" Johny-an a lo ti chung. Hei hi an tih fo dan a ni. Nancy hian a hau ngai eih lo hi a mak! Chaw an zuk ei a, a changin an riah chang a awm bawk. Mahse, an fel vena riau chu Arini room bak an pel meuh lo. Arini room-ah an awm tawp a, an riah pawn an inkhan nulh a, tihdan a awm ve mai zel. A tlangpuiin chaw ei lo va an chhuah hian an kal tlangpui. 

"Exam tur ka ni sia, kei chu haw mai zawk ka duh" Ruatfela hmuh a hreh vangin Arini chuan a ti leh a. 

An nuih tluar tluar.. "Ve che, tikhan i zir ang a maw.. Huizz.. Tho mai teh" tiin an nawr tho a. Phur fahran lo chuan a zui ve ta tho. Ruatfela hmachhawn chu a chak rualin a hreh ru takzet. An rui tawh lehnghal bawk si. 

Gate hawng thawm leh bike tlan thawm vangin a thil ziah lai chu a tawp chawt. Tukverh atangin a zu bih vat a. Mikhual an nei mawni le.. Darthlalanga in en thuakin a room chu a chhuahsan a. Counter a zuk thlen thlak ruala a thil hmuh chuan a tiding chawt. 

Arini nen chuan an inhmachhawn ran mai… 

(Ka p8 a, ka tuar na reuh tawp. Ka ziak hleithei lo. Muah vek u ❤