A tel lovin 8

A TEL LOVIN… (Chapter - 8)

Ziaktu: Toni Râlte

(Ka story hi a link tel lo chuan share ka phal lo a nia. A tilui ka hriat chhuah chuan mi nasa ka ni tih in hria ang 😌

"Engvangin nge i pa lakah chuan phuba ka lak ang a? " Ruatfela chuan a lo ti hluk a. An inmelh na ngat ngat khawp mai. Arini chuan rawn pan hnaih pahin, "A chhan chu i hna aţanga a ban che a vangin" a ti ta a. Chuti teh thuta ranga a hre nghal chu Ruatfela chuan mak a ti angreng hle. 

"Engtin nge chu chu i hriat? " a ti ta a. 

Thawk lak pahin, "Thil ka ngaihtuah chhuak a. Min huatna chhan tur ka hre si lo va, hmanni khan ka pa leh Pu Ramtea an inbia alawm. I chungchang an sawi ang tih rin ngaihna ka hre lo va, tunah khan ka hrethiam chiah" a lo ti a. Ruatfela rilru natna a zual mai mai. Arini laka han inhrikthlak chiam kha thil ni thei ni chiahin hre lo mah se; amah bak inhrosakna tur awm hek lo le.. Tunah thudik a hre zui ta bawk nen. A natzia chu a hmelah pawh a lang thei. A bulţhut chu Arini a ni tlat bawk si a. 

"Keimah vang vek a ni e. Rawn pan lo tawp tur che ka nia. Mahse, keimah vanga i tawrh hi ka phal reng reng lo. Hna dang ka zawnsak ang che. " Nula puitling ang maiin a ti khawl khawl a. Ruatfela chu beidawn hmel zetin a nui hak. 

"Kal la, rawn kal leh tawh lo la a tha a ni mai. Nang leh kei hian inzawmna nei lo ila, buaina ka tawk lo a ni mai" a ti chang fak a. A dawngsawngtu tan chuan a na khawp ang. Mahse, Arini hi chu a chhel vek tawh, tawngkam dengkhawng tak tak te chu a kalpah vel mai mai tawh. A pa chu a hua a, beih let ngei a tum. 

"Aw ka kal ang. Mahse, keimah vangin tuman an hna an chân ka duh bik lo. Ka theihtawp ka chhuah ang" ti chungin a hnungtawlh a, kawngka bula din leh det pahin, "Tluang deuhin i haw dawn nia" a ti sap a. Auh hman lohin a tlan chhuak ta. Ruatfela chu a thu hnawk. A nu te bulah eng nge a sawi ang le.. Pawisa chu a hawn ve nual dawn a, anmahni tawkah chuan singkhat pawh hi tam tak a ni. A pa hnathawh that lai kha chuan Sing chuang fe an kawlin an la lut ve fo. Mahse, tunah chuan an vanduaina a la kal tluang rih tlat si a. A nu leh pa buaina a chinfel theih hun hunah Aizawlah hna dang zawngin a phei leh ang tiin thutlukna a siam ta ngawt a. A nau Mampuii lah college a kal thei ve tep tawh si a, a chawm a, a enkawl a ngai dawn tih a hai lo. Buaina a va ngah tak. Mami lah a rilruah a rawn lang ve sek bawk. Chumi zan chu zanriah pawh ei lo vin a mu daih. Ţah êm zawng a ţap lo. 

A tukah a naute thawmhnaw tur leiin a bazar thuak thuak a. Judy a ngai deuh, mipa a ni bawk a thil mawi leh nalh a hre vak si lo. Hmeichhe thian han sawm mai tur a hre bik si lo. A man tlawm tlawm a zawn a ngai bawk si. A naute thil a leikim hnuah a nu tan kawrlum phiar Rs. 750 man chu a leisak ve a. A lawm leh ngawt ang. A pa erawh smart shoe an sale chu a leisak thung. Ama tan erawh kamiz chiah a lei. A mamawh loh vang ni lovin pawisa tlem azawng a nu kuta hlan a duh si a. 

Ticket te a la ta nghal a. In a thlen meuh chuan a thim dawn ruai tawh. Mami nuin "I haw dawn sia, zanin chu lo ei rawh" a tih vangin a inbual hnuah a han chho va. Mami chuan a sam a lo khuih mek. A dâng bai mai a. A khawngaih ru deuh. A chhungte tal hian hre tawh se, a zia tur. 

Arsa an hmehpui a, chhunah engmah a ei lo bawk a. A ei hnem fu mai. Chaw ei kham thingpui hang an in lai chuan, Mami nu chuan, "Mami hi a cher i ti ve em? " a ti a. Mami a ner sak. 

"Ti ve reng. " a lo ti ringawt. 

"In ninawm. Ka cher duh a ni mai" ti hlak chungin roomah a lut daih. A rilru hrehawmna chu Ruatfela chiahin an hriatthiampui si a, a hrehawm ve khawp ang. Ruatfela lahin neih a tum hmel si loh. 

"Khawvelah hian i thu ber lo va, i chak ber lo tih hre rawh. I pawisawi miah lo chu tisawn a hna atangin i bantir a. Khawvelah hian i va sual ber tak, i thih hnuah pawh i thla a hrang ngei ngei ang" Arini chu a auin a au a ni ber. A nu leh a u te nupa pawh an awm. Mak an tiin engmah thil awmzia hre ve hek lo. Arini lah a khur hlawk hlawk si. Ni dang ang lo takin a mittui a parawl kiang bawk. 

"Ka bantir lo. Ramtea'n mi dang a hmuh vang alawm" a pa chuan a lo ti thluam a. Thinrim hmel erawh a pu lo. 

"I lo lan hma khan rei tawk a thawk tawh. Nangman ban turin i va ti anih kha.. Hrilh leh rawh, kan schoola a rawn thawh leh dawn loh chuan ka exam lo vang" Arini chuan a ti ta a. A pa chuan a melh kâwk, "I sawi ngam zawk e a. Fanu i nia, pa zawk angin min nawr suh. I tana tha lo tur ka ngaihtuah lo tih hria ang che. Tin, Ruatfela pawh a thawk duh kher tawh lo vang. " A pa chuan a ti ve a. Mi dangin an thlir ţhap. 

"Anih chuan hna dang pe rawh. Hre rawh. Hna dang i pe lo a nih chuan ka thi ang. " a ti piap mai. Chutiang em em chuan nidangah a ţawng ngai lo. A nu chu a ding a, "Bawihte, engmah a awmzia kan hre ve si lo va, eng nge thleng? Thih thu te i sawi" a ti nem thlap a. Arini chuan ţap ţuau chungin, "I pasal, he ramhuaipa hian kan sir a bantir alawm. Ka riahbo khan a inah ka riak a, chu chu min ru emaw a tia. Ani kha awm lo se ka thi tawh ang. " a ti ta a. A nu leh mi dang chuan mak an ti kher mai. An in chhungah hian thil zawng zawng an sawi ngai lo reng a. Mahni theuh hian thuruk an nei theuh tihtheih a ni. 

"Paa, i bantir a mi? I tidik lo hulhual a nih chu.. " a nu chuan an pa chu a melh a. 

Pu Thanga lah chu a thu ngawi run a, a melh ngai a melh tlat. 

"Ka bantir lo tak tak alawm.. Ramtea bulah khan a chanchin ka zawt satliah ringawt. A bak engmah ka sawi lo. Amah Ramtea khan MA (Eng) a hmuh thu a sawi a, chu chu a ni mai. ". A ti a. Dawt a sawi hmel loh. 

"Bawihte, i pa chuan a bantir ka ring lo. I pa i hua tih chu ka hria, mahse, hetiang em em chu a ti ngai bik lo a nia" a nu chuan a fanu melh chung chuan a ti a.. Arini chuan ner sak chungin a room a pan nghal. An monu chuan zawi sapin, "An sir thlavang hauh vanga mahni pa te han ankhum piap piap mai chu" a ti sap a. An pa chuan lo hre phain, "Ka farnu mizia i la hriat loh vang a nih chu" a lo ti thung. A dik adik chuan inankhumna te hi chu chu in chhunga thleng reng thin a ni a, an awmpuite thlengin ngaiah an nei tawh. Chhungkuaa han inkawmhlim leh titi an nei ngai lo, Arini leh Mama hi an inpawh deuh a chu zawng chu. Arini leh a pa inngeih lohzia an hre vek. A chhan erawh an hre lo. An ngaihdan chuan an te ber a ni a, an lo duatsual ve deuh a ni tih a ni mai. Chubak thil dang engmah ngaihtuah chhuah ngaihna an hre lo. 

Pu Thanga pawh a inngaihtuah buai ve deuh, Ruatfela kha ban turin a ti lo naa, MA (Eng) a thianpa fanu a kawhhmuh miau si a. Bantir ang chu a ni tho mai. Arini hi a thinrim dawn tih chu a hre sa tho nain a palluih theih mai a ring a. Hmeichhia hi chu han sual ve viau mah se; pal luih theih chin hi an awm ve a. A nem hma zawk an lo ni ve thin bawk nen. Mahse, Arini khan thih thu te thleng a sawi a, kha khan a rilru chu a tibuai deuh. A fanu awmdan leh a piansual ruk dan zawng zawng hi a hai hauh lo. Zan tam thinthia muttir thei lo fotu a ni reng bawk. A fanu hian a thuruk a puanchhuah rualin amah pawn tel vena a nei tih leh a thuruk dang hailan a la ni cheu dawn tih a hai lo. Chuvang fo a nia, Arini hi han ngam viau thin mah se, asawi tawh leh duhdan chu tihhlawhtlin zel a duh thin ni. Tun ţum erawh a chesual dawn a ang hle mai. A fanu piansual rukna a hriat vang ania Ruatfela laka a hlauhthawn. Mipa leh hmeichhe innel tak chuan tih loh lohte tiin, loh theih loha inneih hial te ngai se, Ruatfela Thingtlang tlangval chu an chhungkaw dinhmun nen ngaihtuagin a iai êm a, chutiang a thlen hmaa chinfel dan a ngaihtuah ta reng a nih kha. A hmanhmawh mah mah pawh a ni mahna le.. 

Ruatfela pawh bet lo zetin sumo-ah chuan a thu ran a. An khaw mi ten an biak pawn a rul mawi tawkin a chhang mai a. Nawm loh rukna zawng a nei chiang a ni. Nizan khan Arini msg a dawng a, "Sir, hna dang i hmuh loh chuan thih ka tum asin" a rawn ti a. A rui leh angah a ngai a, a chhang duh lo. Mahse, zingah a mut tawh hnua Arini lo thawn chu a hmu leh a. 

"Ka ngai ngawt ang che" tih hi. Thih thu a sawi zo chiah a, a ngaih tur thu a rawn sawi leh a. Ngaihthatna chi a ni vak lo tlat a ni. Ruatfela lah tlangval rilru tluang tak a ni si a. Arini chu a tan zirlai naupang pakhat ve mai mah nise, a ngaihtuah lo thei lo tlat a ni. 

An khua pawh tluang takin an thleng ve ta. Tlem chuan a rilru a nuam deuh. A chhan pawh phone call thinţhawng deuh emaw Arini kaihhnawih news engmah a hmuh loh vangin. 

"A û" tiin an teber a rawn tlan tar tar a. Ruatfela'n a lo pawm chawt. An inngai ve tawh bawk a ni. A nu leh a farnuin a thawmhnaw chu an ak a, an in tha vak tawh loah chuan an lut dial a. A pa erawh hmuh tur a awm lo. A thil hawnte chu an han chinglet a, naupang pahnih lah chu an rak chel chul mai. Thil thar neih hi zawng puitling chen hian nuam kan ti a nih hi. A nu pawn a kawrlum chu duh hmel takin a chul a chul mai. Mahse, ngun taka en chuan nguina a nei tih erawh hai rual a ni lo ve. Ruatfela chuan a hrethiam vek. An intihfel hnuah a inbualfai a, zanriah an ei zui nghal. A nu bai siam ngei a han ei leh thei chu manhla a ti ngei mai. A pa chungchang erawh an la sawi miah lo. Naupang an awm ve si a. 

Naupang awm loh hlanin a nu nen chuan an titi ta a. Tunah a pa chu Rinpuii inah a khawsa tih a chiang tawh a, engtia chet lak tur nge tih erawh an haihchham nufa hle. 

"Engpawhnise, Nu, naktuk zing karah keimah ka han kal pawp mai dawn mawni ka ti. Kei chu zah te pawh min zah ve deuh ang a" Ruatfela chuan a ti a. 

"Ka hrethiam bik lo. I ni te pawh an rawn kal tawh a. An ngei ve khawp chuan ka hria. I ni te nen sawiho leh chu thain ka hria., " a nu chuan a ti a. 

"Anih leh lo kir leh dawn ta se, i pawm leh thei ang em? " Ruatfela chuan a ti ta a. 

A nu chu a ngawih vang vang hnuah, "I pa hi kan inneih tirh atanga vawiin thlenh hian tun tuma a chetsual bak hi ka lakah engmah tihsual a neih awm ka la hre lo. Tun tum pawh hi zu a in ve vang a niin ka hria. Ka fate pa a ni a, thinlung chu na hle mah se, a inchhir a, a sim dawn phawt chuan nangmahni avang pawn ka pawm leh thei mai ang. Nang pawn i pa hi demin a lakah thinrim lutuk suh, mihringte chu chesual ve thei vek kan ni a. Rinpuii lah pawisak a lo nei vak tawh si lo nen, zu nen a han vehthlem chuan i pa te ang mize tha leh tluang lutuk chu a hneh a ni mai. I sawi thin kha nang pawn, mihringte hian kan damchhung hian kan laka tisualte chungah chuan chance vawikhat tal pek leh hi chu an phû ve alawm i tih thin kha" a nu chuan a ti ta dap dap a. Ruatfela pawh a hmin hle. A nu ngaihtuahna puizia leh chhelzia a hriat takah chuan a hmangaih sawt mai. A pa pawh a dem tho nain a hma ang em em chuan a thin pawh a rim tawh lem lo. Zah erawh a zahthlak deuh a ni. Fapa tlangval pui a neih tawh hnua chutianga a han khawsa chu.. 

Zingkarah a ni te pahnih leh an pasal te chu a va tlawh a. An veng inang hek lo a rei ta phian. A nite chuan a thutlukna ang ang an pawm thu an lo sawi. A thiantha ber Kima pawh a rawn bawk a. An han sawikhawm hnuah amah ngei chuan a pa chu han hmuha han kawm a tum ta a ni. Eng nge a sawi ang tih erawh a hre lem lo. 

Arini hliam pawh a dam fel ta bawk a. Apa laka a thinrimna hrikthlakna tur hun a inher chhuak leh a ni ber. Inah a awm ngai mang lo va, Christmas kawr tih velin a ngaihtuahna an luah pha ve lo. Harhfimin a awm ngai mang lo. Ruatfela chu a ngaihtuah fo, a be ngam tawh si lo. Aizawlah a lo let leh ang em tih ngawt a ngaihtuah thin. A pa chu hna eng emaw ngaihtiahsak turin a kar reng a, mahse Ruatfela mizia a hriat vangin a sawipuina vanga thawh chu a duh dawn lo tih a hre ve kar. Chuvang chuan fimkhur taka chet pawh a ngai ngei ang. A u Mama te pawh an haw thla tawh a. Christmas pawh an hmangho leh dawn ta lo. 

"Ruatfela thawh awm chi chu i u te hian an nei ang. Be rawh" a pa chuan a ti a. A pa nen hian an inhrechiang tawh bawk a. Thinrima indawr hun leh pangngai taka indawr hun an hre dun tawh viau. Ruatfela vang chauhin a pa hi nem takin a dawr hram hram. Thinrima a den vaih chuan a pa amah ang chiaha mi butut chuan engmah a tihsak duh a ring bik lo. Chuvangin thiam taka nawr a ngai tih a hria, "Hna dang i hmuhsak phawt chuan ka exam ang. Top tenah ka lang ang" ti ang zawngin a dawr ve a ni. A chapona hian a tuar thei lo fo. Mahse, Pu Thanga tan Ruatfela han chhawrna tur chu a vâng ve em a ni. Tin, pu Thanga hnuaiah chuan Ruatfela hi a thawh duh a rinawm loh. 

"Nangman ka u te chu be rawh" a lo ti hmak a. Nancy nen hian inpawh tho mah se, a pasal vang hian an inmihran thawthang a ni tawh a. An laka khawngaih va dil chu a tum lo hul hual. 

"Ka lo sawi dawn nia. Chuan i sawi tawh ang khan i exam ngei tur a ni ang" a pa chuan a ti a. A lo bu nghat. Mahse, A u ten Ruatfela chu hna pe ringawt mah se, a thawh duh theih nana eng emaw thup chu a ngai dawn a ni. 

Rinpuii te in lam pan chuan a kal hnak hnak a. A rilruin a ţawngtai mawlh mawlh bawk. 

Kawngka chu a kik karh karh a, Hmeichhe aw hian, "Lo lut rawh" a rawn ti a. Kawngka chu hawngin a pen lut ta. Sitting room thutthleng seiah chuan a pa leh Rinpuii chu duhdah zet hian an lo thu mu deuh a, choka thlanglam thutphahah Pu Tlanga a thu bawk. An rawn hawi thap a, Pu Lawma chu a thu chhuak nghal. Rinpuii pawh tha tak chuan a thu ve nghal a. 

"Pa" Ruatfela chuan a ti a. 

"I lo haw ni maw? Lo thu rawh" a pa chuan aw lawi rût hian a lo ti a. An ep chiahah a thu ve nghal. Rinpuii chuan a ngaihna hriat hmel vak loh hian a melh tawn sek a, "Ka fapa upa ber a nih hi" Pu Lawma chuan a ti sup. 

"Ka pi, ka pa hi ka lo be lawk ang chu" Rinpuii tawng hma chuan Ruatfela chian a ti ta hmiah. Rinpuii tawng tum pawh chu a ngawi leh daih. Ruatfela mitmeng takzet chu do ngam lo ni awm takin zawi muangin a inthiarfihlim ta a. 

"Hetianga i awm hi ka ring miah lo asin. Ti nge a? " Ruatfela chuan a pa a melh kar a. A fapa mah nise, Pu Lawma chuan a zah kher mai. 

"Ni e, a pawi ngawi mai" a ti ringawt a. 

"Lo haw leh rawh. Ka nu leh ka nauten an nghak reng che sin. Hetianga awm rual pawh i ni tawh lo. Ka nu leh i fate hi min thlauhthla vek thei lo vang, chutiang mi i ni lo" Ruatfela chuan hnukulh lek lek hian a ti ta mawlh mawlh a. Pu Lawma chuan a chil a lem khawlh, "I nu chuan min haw ngawt ang" a ti a. 

"Haw lo. Nat chu a na khawp mai. Mahse a haw lo che. Lo haw rawh. Zahthlak pawh i ti lo em ni! " a rawn ti leh khawl khawl a. 

"Ni e, zanah ka rawn haw dawn nia. I nuin min lo pawm leh theih phawt chuan. Mama, ka zakin hrehawm ka ti lutuk asin. Kan laklawh kual ta vek anih hi" a ti ve ta a. Mahse, Rinpuii a rawn lut a. Rinpuii mitmei a veng te chu Ruatfela chuan na ti zetin a melh vawng vawng. 

"I pa hi rawn hruai i tum deuh em ni? " Rinpuii chuan a ti a. A aw chu a fiak lek lek. 

"Aw tum e" Ruatfela chuan a ti ve mai. 

"In va zahpuiawm tak, a duh tawh lo che u a, ka bulah a awm ni na nâ na a, in mak teh fo em mai" a ti ta hlak hlak a. A thinchhiat hmel kher mai. 

"Ka pa a ni a, chu chu ka buaina a ni. Hetia mi pasal laksak hi a zahthlak fe zawk lo maw? " a ti ve ta sak a. A zahpah duh bik lo. 

"U Lawm, anih chuan i duhthlang rawh. Kei nge i nupui.. Kei chu hetianga buai hi ka peih lo.. I duh thlang la, i haw duh chuan ka dang lo vang che. " Confi zet hian Rinpuii chuan a ti ta a. Ruatfela nen Pu Lawma chu an melh ran mai. 

A heh a liak a liak ringawt. "Ni e, ka pa, i duhthlanna chu keini pawn kan zahsak ang che. Mamawh zawng kan mamawh khawp che a. Mahse, he nu hi i thlang ta zawk anih pawhin kan zahsak ang che. Kan rawn lang tawh lo bawk ang" Ruatfela chuan a ti ve ta bawk a. 

A tawp a tawpah Pu Lawma chuan, "Mama, min ngaidam mai rawh aw.. I nu pawh ngaihdam min lo dilsak dawn nia. Ka lo haw lo mai ang e" a ti ta nge nge a. Ruatfela a tliak hnâwp a ni ber mai. A kut humruhin a nui lui a, "Aw le.. Ka pa.. I dam reng dawn nia. Kei leh ka naute bakah ka nu chu rawn ngaihtuah miah suh. Mipa fa i nei alawm.. Ka damchhung chuan an rethei bik lo vang. Anih leh le.. " tiin mittui tling pam chungin a chhuak ta hnak hnak a. Pu Lawma a hawi phe ve ruai mai. 

A duh ber chu a nu awm nghenga ţah hawm hawm a ni. Mahse, mipa a ni a, a ţap lo vang. A mawhphurhna sanzia a hre chiang a, "Lalpa, min damtir reng rawh aw. Keima tan ni lovin, an tan" a ti mawlh mawlh mai. In chhunga luh chu thih hrehin a hreh. Nghakhleka taka lo thlirtu a nu bulah eng nge a sawi tak ang le? A pa chuan a chhungkua aiin nuthlawi a thlang zawk tih sawi chu harsa tak tur a ni. A intipachang a. A va luh chuan Mampui'n vawkchaw a lo chan mek a, a nu erawh chuan bal a lo thianfai mek. 

"Nu" tiin a thu hnawk. A hmel landan chuan a hlawhchham tih a pholang vek mai. A nu pawn chu chu a hai lo. 

"Min ngaidam rawh aw. Theihtawp ka chhuah ve asin" tih leh Ruatfela chuan a hmai hupa ţah a rual nghal. Mampuii chuan a vawk chaw chan lai dahin ţap chungin khum lam a pan nghal bawk. A nu erawh muangchangin a lo tho a, a fapa hnungzanga chulin,, "A pawi lo mama, tihsual engmah i nei hleinem.." a ti mawlh mawlh a. Mahse, a mittui erawh a dang zo bik lo. A tawpna an thleng chu a ni ta der si a. Pa nei lo, hmeithai an ni ta. 

Naupang pahnihte erawh chuan engmah an la hrethiam em em lo va, "A pa hi a lo haw har tawh e" tih bak an sawi ngai meuh lo. Mahse, chumini tlai ber kherah chuan an te ber chu a rawn ţap lut a, Mampui'n a lo dawngsawng vat. 

"A pa kha Papuia te dawrah khitah vengchhak ami Rebecki nen an lo kal a. Ka ko vak vak a, an kal daih" tiin. A hma khan Pi Zuali hian, "I pa chu vengchhakah hna thawk a" tiin a lo hrilh tawh a. Ni dangah pawh zan riaka khaw danga thawh chang a neih fo vangin mak an lo ti lem lo. Mahse, chumi tlai ber kher chuan Rinpuii fanu nen pa ber lah thil an lo lei kher si.. Ruatfela thin a rim ta tlat. 

"Mai mai a, a inzahloh thlak hle mai. Kan inhmu chauh a, langsar takin a nupui thar fa a rawn chhuahpui ngam a nia. Engahmah min lo ngai lo a nih hi. Tianga min mamawh lotu chu engah nge kan pur kan pur bik ang le.. Nu, ka awm alawm. Kan dam anga, Pathian zarah kan nghei lo vang. Ka pa hming hi tuman vawikhat pawh sawi tawh suh u" tiin a melh kual a. A thinrim hle tih an hriat vangin tuman an chhang ngam lo. 

A tukah a pa bungrua an lakhawm a, a pa thiante bulah, "A thawmhnaw ho hi rawn la rawh se" tiin an chah a. Tlai lamah a thianpa Dawnga'n a rawn laksak. A fel ta duak e. Buaina ruk erawh an nufa chuan an la nei. In leh lo hi an pa hmingin a la awm tlat si a. Nakinah an rawn chuh mai an ring. Rinpuii lah sumdawng thiam, phakar tak a ni si a. Ruatfela chuan chinfel dan tur a la ngaihtuah mai thei bik lo. Rilru a va chawl lo tak em. A nu chu a khawngaih ngawih ngawih. A hmel te chu a hmu tar sawt hian a hria. A hna atangin an ban tih pawh sawi rik ngam ni hek lo. Apawisa hman ban a la hawnte chu a nu hnenah a thehlut vek kha a nia, kha khan Mas chhunga an khawsak relna chu a la daih thei mai ang a. Kum thar lamah engtin tak khawsak rel ang maw.. Ruatfela chu a rukin a hui pap pap reng mai. 

Arini pawn chet a la ve reng bawk. A pa chuan a u te chu a biaksak ta nge nge a. Nancy te hian Resort changtlung tak tak an nei a, an pa hian hotel lam a khawih bawk. Aizawlah chuan a lian pawl an ni ve a. Chuvang chuan Ruatfela hna tur pawh chu an neih theih mai a rinawm. 

"Aman rawn sawi fiah se" tiin Nancy chuan a pa bulah a lo ti a. Loh theih lohin Arini chuan a u chu a hmuh a ngai. A rilru te tein, "Sir, tu nge i nih le.. Nangmah vangin khawngaih ka dil dawn ania" a ti rauh rauh mai. Mahse, a mawhphurhna niin a hre ve bawk si. 

"Kan sir a nia, mi fel tak, mahse, MA a la pass loh vangin an ban a, a khawngaihthlak lutuk a. Chuvang chuan hna pe ve ru" tiin a u chu a nawr a. Nancy chu Arini aiin a hmel tha fe a, inchei a thiam bakah a lang zahawmin a fing bawk. 

"Ti nge a khawngaihthlak" a ti khauh. 

"Thenzawl khua a nia, ih, hmanah pawh a nau a thi a. An hausak vak hmel loh a. A nu te a chawm ve a. " Arini chuan a lo ti niah niah a. A nau hian a khawngaih hi vawikhatmah a la dil ngai lo tih Nancy chuan a hria. Chutiang taka a tana pawimawh chu tu tak ni ang maw? A ngaizawng zawk em mawni le.. 

"I bialpa em ni? " a ti ta a. Arini a ţeu hlar, "Keite chu min duh teuh lo. Bakah a zirlai ka nih hi. Kan sir a nia, fel ka ti ber a. " a lo ti ve tlat. Nancy chuan engmah a hai hran lo. A khi sak a. 

"I û ka lo be dawn nia" a ti a. 

"Biak kher a ngai lo. A tel loin engkim i ti thei. Ti mai rawh. I nau ka nih hi. " Arini chuan a lo ti ve leh tlat. A u pasal Vikram chu a ngaina lo a ni satliah lo, a ten a ni mah zawk ang. Chuvanv chuan chu vaipa hnen khera khawngaih dil chu thih hrehin a hreh. 

"Anih Chuan Tanhril-a kan resort khu enkawl se.. Nge Abigail Hotel saw a enkawl zawk dawn. Hotel management engmah a hre awm si lo va" Nancy chuan a ti ve ta a. 

"Thiam loh a nei lo. A fing a, a smart em em bawk. A tlin em em ang. Resort chu enkawltir rawh. Nuam a ti zawk ang" A lo ti zung zung a. A mitthlain Resort-a Ruatfela che tla tur a hmu zut zut zui. 

"A mak tehchung thin. Khaw pawn daiha awm te chu a peih dawn em ni? " a lo ti a. 

"Peih ang. Chuan, U, hlawh kha tha ve deuh hlek, inpek thin aia tam aw" a u chu tlawn titihin a melh ralh a. 

"A tha alawm.. Chuti taka i buaipui te chu tha takin ka lo dawngsawng dawn nia. Kum thar ni 20- atangin rawn thawk thei se. Nangman i lo hrilh mai dawn nia" A ti ta a. A u chu a va kuah thuak a, "Û tha ber i ni" a ti sap a. Nancy chuan hmanlai hun a hre chhuak zawk. A nau hian hetianga a pawh leh a kuah tawh lohna hi a rei tawh asin aw. A tet zual lai kha chuan inchhangbung an ni bawk a, a lenna leh khawi i loah te a zui det det thin. Mahse, a mizia a hloh ta vek a. Tupawh a hua emaw tihturin a nau chu a awm ta kha a nia. Tunah mipa pakhat vangin a der tel miah lo va a nau nui hmel a hmu leh a. Chu mi pakhat chu a hmuh chak zual phah sawt mai. 

Arini chuan buaina a nei. Engtin nge Ruatfela chu a hrilh tak ang? Aman a hrilh vaih chuan a hnawl ang tih a ring thiam. Tupawn mahni tawkah chapona kan nei vek si a. Tin, Arini û te hna thawhsak chu a duh kher ang em? Chu pawh thup hram zel a duh fan.. A rilru a buai ve mam mam hle. A pa bawk a pun leh mai ang chu. 

A pa bulah, "Pu Ramtea hrilh la, hna a hmuhsak thu hrilh turin hrilh rawh" a ti ta a. A pa pawh chuan intihlungawi hun a ni tih hriain thuawih takin Pu Ramtea chu a hrilh ta vat a. Mahse, Pu Thanga fanu te hna a ni tih eraeh sawi lo turin an inhrilh thlap. Ruatfela an buaipui lutuk chu a mak angreng hlr mai. Arini vang liau liau a ni. 

"Mama, i phone a ri" a nuin a thing ek lai chu a rawn ko lang lang a. A thlan hru pawk pawk chungin in chhungah chuan a lut a. Pu Ramtea a lo ni. Mak ti angreng deuhin a la a, "Ee.. Ruatfel, in dam a maw? I pa te an dam em? " a rawn ti luam a. A rul tawkin a chhang ve mai. 

"Hei hna atangin ka chawlhtir si che a, nuam ka ti thei ngang lo va, ka thianpa ten hna ruak an nei hlauh a. Ka lo sawipui che a. I laka thupha ka chawina ni pah fawmin, khawngaihin thawk hram ta che" a rawn ti a. Ruatfela chuan roomah a luhpui nghal vat. 

"Eng hna nge ni a? " a ti a. 

"Resort-ah a nia. Tanhril-ah. A lar viau kha maw.. Hlawh pawh a tha e. Thla khatah 23000 a nia. Hah erawh i hah deuh maithei. I duh ang tiraw? " a rawn ti a. Ruatfela chuan a awm a dawm vawng vawng, a ţawngtaina chhanna ni ngeiin a hria. Pu Ramtea chu a ngei rilru viau naa tunah chuan ngeina reng a nei tawh lo. Arini kaihhnawih a ni tih engmah hre ve hek lo. An intifel chu a ni der mai., january ni 20- atangin a thawk dawn ani. Mahse, eng ber nge a thawh ang tih lam chu a hre bik hauh lo. Room lam nge eng nge engmah a hrethiam lo. Mahse, hlawh chu a tan a tha. A thawk ngei tur a ni. 

A nute bulah erawh, "Hlawh tha zawk hmuhna a ni sia. Ka insawn ta mai" tiin a sawi. An awih ve mai bawk. Rilru hahdam deuhin chumi zan chu a muhil ve thei ta. 

Urlawkni a ni ve ta reng mai. Mi tinte chu Lal piang chibai buk turin an inbuatsaih mup mup a. Tupawh chu an rilru a hlim emaw tih tur a ni. Ruatfela te chhungkua pawh an pa tel lo chuan an khawsa ve zel a. A nu ţap ru lai hmu fo mah se; intipachang hram hram zelin, a nu natna chu haider hram a tum rih a ni. A hnem thiam lo va, tihtheih a nei lo. Tawngtaipui mai loh chu. Judy te chanchin pawh a hre ve a, kum thar lamah an innei dawn a niawm e. A lawmpui khawp mai. Arini erawh a reh vang vang mai. Amah vanga a buaina tawh te a ngaihtuah chuan a haw lek lek naa an chen dun chhung reilotea Arini ze ngainatawm tak kha a theihnghilh bik lo. Urlawk tlaia an chhang den lai chuan call a dawng a, in chungpa a lo ni. 

"E.. Hei, Ruata, Mami dinhmun a tha lo khawp mai. Damdawi a lo bar a, tunah damdawiinah a awm mek. A la harh lo va" a rawn ti ta mai!, a suk ken lai a thlauh thelh a ni. 

"A va mak ve. Ti nge chutia a awm" a ti nghek a. 

"Aa.. Sawi nuam chu a ni lo va, nau a lo pai reng a lo nia. Naute erawh an chhan hman ta lo a ni e" a rawn ti a. A bing mup mup mai. Tel vena a nei lehzel bawk si. Mami chu aw.. A rilru hah lutuk in kawng awlsam nia a hriat a lo zawng ve tawp a nih hmel. Ruatfela chuan a khawngaih em em a, chutihrualin engvangin nge tikhan a puh mai le tih ngaihdan a nei. Thudik a hre thei mai bawk si lo. Mami tan a tawngtai ve nasa khawp mai. 

Mi sawi danin a pa leh a nupui chu an rui chhe thei viau a niawm e. Amah chuan a la hmu ve lem lo. A pa chu a pa a nih miau vangin a khawngaih fo. A phatsanna vang erawh chuan a haw lawi bawk si. A harh chhuah hunah a inchhir dawn hian a hre lutuk a, mahse, a tlai tawh maithei.

Zai khawmna lamah pawh a lang ve meuh lo, kumin chu kum dang ang ni hek lo le. Kima bialnu Ateii an rim tlut tlut ringawt. Bialnu neih tumna a nei tawh rih lo. Pa chan a chan tak avangin chutiang lama a rilru pek vak chu tul a ti rih lo a ni ber. Startu zawng a haihchham bik lo ve. 

Ni 30 zanah an chhungkua leh Kima te nen chhang an kang mai mai a. An hlim ve phian. Kawngka an rawn kik dat dat a, Mampui'n a va hawn chuan a pa a lo ding reng mai. 

"Ehe" Mampuii chuan a ti a. An va hawi ţhap 

A rui chu a ding bu leh lûk lûk thin a., "In lo dam maw.. Ka fate u" a ti a. A rawn pen lut nghal. 

Naupang pahnihte chaun, "A pa i lo va haw har em em" an lo ti a. Kima bula thutna awlah chuan a thu thurh. 

"Min lo ngai tawh em" tiin a ipte a zen ruk ruk a, sweet eng emaw zat hi a phawrh a. A fate chu a pe a. An ni lah an lo lawm phian. 

"Eng nge i lo tih dawn? " pi Zuali chuan a ti hniam raih a. 

"Ka lo kan ve che u. In ngaihawm em a" nui chungin a ti a. Ruatfela ding tur chu a nuin mitmeiin a khap. 

"Kan tha alawm.. Min rawn kan a a lawmawm. Mahse, in nu rawn lan hmain kal zawk teh" Pi Zuali chuan a ti ve ta ngat a. 

"Ka hlau lo.. Ani saw.. " a ti lung lung a. A pa zia hman ami kha hmuh tur pakhatmah a awm tawh lo. Chutih lai tak chuan kawngka a rawn inhawng ţhuai. Rinpuii chu sam thur angreng tak hian a rawn pai lut nawk nawk a. Meng sen rum chungin a melh kual nghal, pu Lawma chu kawk chatin, "Rawn thlawk haw nghal rawh. Vatin" a ti fiak thak a. An ngawi thap. 

Pu Lawma sama keh pah chuan, "He inah hian tihtur i nei tawh lo. Tho rawh. Haw ang," a ti leh a. 

Lawma a tho ţuih tuih. Rinpuii chuan a duhtawk mai lo. Pi Zuali melh chung chuan, "Pitar, i pasal hi rawn thlem fo tawh suh. Eng atan mah a ti tawh lo che. I hria em? Zahpuiawm lutuk" a ti hluk hluk a. Pi Zuali'n a chhan hmain Mampuii chaun, "I va zak thei lo e. Chhuak vat ru.. Vawikhatmah rawn kal tawh suh u. Ka nu hian ka pa hi a rawn be ngai lo.. Ka pa hi keini pawn kan mamawh tawh lo" tih leh nam chhuah a rual a. Mampuii hi kawlh ve angreng tak, a duh lohna lamah chuan tu hmai eng mah zah bik lo a ni. 

Pu Lawma chu a ding dat a, "Eng maw i sawi kha. Min mamawh tawh lo maw.. Lalrindik,han sawi leh teh" tiin Mampuii chhipsamah a va tham a. Pi Zuali leh Ruatfela an tho rual ţhawih. 

"Duhtawk rawh. Ka fanu hi kut hmawr pawn khawih suh. Khaw nge hmana i thinnelna zawng zawng kha a awm tak a. Chhuak rawh u" Pi Zuali aw chu a khal ngen ngawn hle. 

Rinpuii chuan, "I nupui fanaute hian an mamawh tawh lo che anih hi. I in chhung ngei atangin an hnawtchhuak che a nia. Nepa" a lo ti tãwn tâwn a. Pu Lawma rui lah chuan, "A dik.. He in hi ka in a nih hi. Ka in atangin min hnawtchhuak a maw? Nangmahni zawk hi chhuak rawh u., "tiin Pi Zuali chu a va nam sawk a. Ruatfela a insum thei ta lo. A pa kawr awma ţham pahin, "Tharum zawng chuan ni lo ve ka pa.. Ka duh loh dan thlengin min chettir suh. He in hi i awm peih tawh lo va, i chhuahsan tih hre reng rawh. Rawn let leh tawh bawk suh. Nang kha ka pi, ka pa hi lo fuihpawrh tawh suh. In innei tawh a. A bak neihbelh tum suh. I chantawkah khan lungawi ang che. Kal rawh u" tiin a nam chhuak a. Kawngka a kalh nghal rap. Pawn lama Rinpuii ang hlak hlak chu an hre reng. Naupang pahnih chu Kima'n a lo kuah ran a. An thlabar hmel hle. 

"In saw i chhuhsak lo a nih chuan kan inthen ang. I tihtheih pawh ka ring lo. I nep em mai" Rinpuii chuan Pu Lawma melh chung chuan a ti fak fak a. Ani pu Lawma tlawmla bawk si chuan, "Ka in a nia. Chhuhsak an ngai hleinem. Ka ta a nia, min chuhpui theihna an nei lo. Ka hralh daih ang" a lo ti nghut a. 

Buaina chu a la inţan dawn chauh a nih hmel e…