A Tel lovin 7

A TEL LOVIN.. (Chapter- 7)

Ziaktu : Toni Râlte

(Adds mawlh kha 😊😀

Arini a ding hluai, "I sawi ngam zawk e a. Sir hian min ru awzawng lo ve. Keimah ngeiin ka pan aw. Mai mai che hian" zahpah miah lo hian a ti ta sak sak mai. Ruatfela zawk chu a lo lai nasa, sawi tur a bar pawh a hre ve lo. Pu Thanga lah a meng rum ûl si, "I hna hi i chân ka ring. Eng nge ka tihtheih i hre mai ang" Ruatfela melh chungin a ti leh a. 

"Ekhai! Ka pu, ni lo ve. Khawngaihin min hrethiam teh. I fanu hi ka ru lo tih erawh min hriatsak la, tin, zan hnih a riak tawh a. Ka kut hmawr pawhin ka khawih lo e" Ruatfela chuan lungawi chiah lo, tawngkam vin chuang si lovin a ti ve ta a. 

"Lalrinsang, i thawmhnaw la la, chhuak ang. Hetia naupangte si i tal hiar hi a zahin ka zak lutuk tawh. Min timualpho khawp mai. Exam pawh i exam lo vang, home-ah i awm dawn hre rawh. " tiin a fanu chungah a ţuan leh nghal a. Arini lah a diau duh hauh lo. A pa mitah tak melh chung chuan, "Saw lai in ropui, bungraw manto leh changkang pui pui bakah mi lem zet zet bula khawsak ai chuan, he laia maian bai mai mai hmeha chen rih hi ka thlang. Sir hi ka dil vek tawh. Ka cheng rih dawn" a lo ti ta hmiah. Ruatfela a ìp deuh. 

"Awiii zahna tlachhamnu, mi mitmei te hi veng ve ta che. I thuhnuaia awm vek angin mi te hi ngai suh. I chhungkhat pawh ni lo, in zirtirtu bulah i awm ang maw? A teuh lo. Chuan, in sir i chhuan em em pawh hian tel vena a neih vangin a tuar ve dawn. Engkim hi nangmah vang a nih dawn vangin i la inchhir ngawt ta ve ang. Kal ang" tiin Pu Thanga chuan a fanu chu a kai lâwp a. Arini a lo ţeu hlar, a pa kut chu thing thla lawpin, "Putar, ka pa min hmangaihtu ang chuan khawsa vel suh. Hetia i nata i thinrim poh leh ka hlimna hi a nasa sauh zel tih hria ang che. Ka nu chu ka zah, ka hmangaih bawk. Nang erawh ka pa i nih vang hian ka hua che. Ka haw dawn lo. Sir hian min hnawtchhuak pawh nise, inah chuan ka rawn haw rih dawn chuang lo" a ti ta a. Ruatfela chu a rawn inrawlh ta a, "Arin, i pa a ni a. Haw mah la, a thu chu i awih tur a ni. Haw la, tha takin lehkha va zir rawh. Hetah chuan i lo leng fo dawn alawm" zirtirtuin a zirlai a biak angin a bia a ni. 

Arini a ngawi ran a. Mahse, a luhlul tih a hriat ngawih ngawih. Pu Thanga chu a sen ţul a, a hah hmel hluah hluah. He mi te pafa inkarah hian eng nge thleng tih Ruatfela chuan hre lo mah se; Arini hian a pa a ngaina miah lo tih erawh a hre chiang. A chhan pawh a turu hret maithei a ni. 

Pu Thanga chuan nem zawkin, "Haw phawt ila, i duh duh chu i ti dawn nia. I nuin a ngaihtuah che asin. I u Mama pawn a sawi reng che. An haw thla ţêp tawh si a, i exam zawh veleh zalen deuhin khawvel chu i la hmang dawn nia" a ti hluam hluam a. 

"Aw le, ka nu vang chauhin ka haw ang. Mahse, min tiam rawh. Sir Ruatfela chungah engmah i ti tur a ni lo" tiin a pa mitah chuan a melh a. He nau hi mi mawl tak zawng a ni lo. Haw duh ta tlat lo se; a pa lah mi thinbutut, pawisak nei lo ve tak a nih vangin buaina lian zawk a thleng thei tih a hria a, chu buaina chuan Ruatfela thlengin a kangkai dawn tih pawh a hre ve kar. Chuvanga paukhauh chhuah lo mai a ni. 

"Aw engmah a thleng lo vang" Pu Thanga chuan a lo ti a. Thudik a sawi em tih erawh hriat a harsa angreng. 

Arini chuan muangchangin a kawr a hlip a, A pa leh Ruatfela chuan maktih hmel zetin an melh dun a. A dar hliam, an dressing reng, bandage-a tuam chu a lo lang ta a. Pu Thanga a meng phawk deuh. 

"Hei hi ani hian min enkawlsak vek a ni. Damdawiina min hruai pawh a tum. Mahse, ka duh lo va, amah hian min enkawl ta zawk a ni. Chuvang chuan a chungah eng emaw i ti anih vaih chuan, i fanu hian pawisak ka nei miah lo vang" a ti zawi raih a. A pa chuan a chil a lem khawlh. 

"Tu khawihna che nge? " a ti hrâwk a. 

"Zawhna ka chhang peih lo. Chuvanga rawn haw lo ka ni. " a ti nghat a. Roomah a thawmhnaw siamfel turin a lut a. Ruatfela chuan sawi tur vang a ti ngei mai. 

"Ka tawngkam te avang khan min lo ngaidam dawn nia. Ka thinur hian ka insum zo thin lo va, ka fanu i lo enkawlnaah lawmthu ka sawi. Engzat nge i duh? " Pu Thanga chuan a ti a. 

"Pawisa vanga enkawl ka ni lo. Ka zirlai naupang a ni a. Ka mawhphurhna ka hlen mai a ni" Ruatfela chuan a lo ti sup a. 

"Aa.. Thingtlang lam in ni lehnghal a, in buai thin viauin ka ring. I mamawh chuan rawn sawi hreh suh aw" a la ti hram a. Ruatfela chuan chhan pawh a chhang duh tawh lo. Arini a bag nen a lo chhuak a. Ruatfela chu a melh a, "Sir, ka lawm e aw.. Schoolah kan inhmu leh dawn nia" tiin a pa pawh be tawh lo chuan a chhuak zui nghal daih. Pu Thanga pawn a zui ve vut. Pafa maksak ber an la ni ngei ang tih Ruatfela chuan a ngaihtuah zui rauh rauh a. Arini chu buaina a awm ta lo angah a ngai a, thawl khat chuan a thawl ta deuh. Mahse, delhtu a la nei cheu. Mami bawk a ni. 

Tu nge a rawn ang aw.. A hrethiam lo. Mipa mawl tak ni lo mah se; hetiang rai chungchang vel chu a hre tlem ve bawk si. Google-ah a buaina chinfelna tur hmanrua a'n dap khawm a. Sex hman atanga kar khat leka rai lang nghal chu an ván bakah test kitah pawh a lang mai mai lo. Mami berin a puh miau bawk si. Mami chhung ten an hriat hunah eng nge a sawi tak ang le? Ka fa a ni lo ti ta se, sex an lo hman ve miau si chuan fiahna a nei rih dawn si lo. Inneih lam phei chu a ngaihtuah ngam lo. Tunah hian a hmeichhe duhzawng tak nen inlaichinna lo nei pawh ni tehreng se, a dinhmun atang chuan inneih a la ngamawm hauh lo. A chhungte pawh an la inring lo vang. Bakah nupui neih a la duh lo. 

Thenzawla awm mek a best friend Kima a va be ta chawt a. Engkim a bul rat atanga sawiin a mangan thu a sawi ta vek a. Kima chu a rawn nui hak hak, mi mah mangan nak alai chuan.. "Nei la" te chu a la rawn ti ta dah. Mahse, a hnuah thutak zawkin, "A bum che anih chu. A rai sa tawh a, a pa atana puh che a duh vangin a hrai rui che a, i ruih lai hmang tangkaiin a chetsualpui ta che a ni. I fa a ni thei lo hul hual" a rawn ti ta dap dap a. Ruatfela thla a muan phah ta hle. 

"Mahse, min puh miau chuan, insawifiah dan tur a vâng ee" a ti ngui rawih a. 

"Lungngai mah ta che. Thudik te chu a inthup reng thei hleinem. Mami bialpa hlui tu emaw zawn chhuah tum la, anih loh pawn tun hnaia a zui deuh te pawh.. Ta tang chuan a fa paina pa hriat dan a awm ang. " a rawn ti leh a. Kima nge nge, lehkha zirsang leh mi thiam zawng a ni hauh lo. An chhungkaw harsat vangin pawl 10 thleng bak school a kal lo va. Hmeithai fapa a ni bawk. Ram lamah nitin a liam ta zawk a. A taima a, an eikhawp aia tam a thar ziah bakah a farnute pahnih zirna a chawm tel bawk a ni. Ruatfela chuan a thianpa ngaisang ru tak chungin, "Ka van lawm, aw le ka lo ngaihven ru ang aw. Chanchin ka rawn hrilh leh ang che" tiin an inbiakna chu an titawp ta a. Tlem chuan a thawveng ta deuh. Mami bialpa hlui pakhat chu a hre ran mai a. Mshse, chupa chu an veng a mi a ni lo. An inthenna a rei ve leh deuh tawh si a. A fa paina chu a nih a ring lo deuh. Uluk takin a ţawngţai a, tlawm leh zah pawh dawn lovin, "Lalpa, mami fa paina hi keimah niin ka inhre thei si lo va, i lakah thilsual chu ka ti ngei a. Min ngaidam hram la, khawngaihtakin Mami fa paina hi zawng chhuak thei turin min tanpui rawh" a ti ta tawp. A Amen chu a zang riau hian a inhria a. A ngaihbel pawh a ni maithei. Tin, hemi zan hian, "Nupui ka neih hma loh chuan sex ka hmang leh tawh lo vang" tiin a intiam ta hial a ni. 

Hetih lai mek hian, Thenzawl lama an chhungkaw boruak erawh sawithiam hleih theih loh hian a buai ru riau mai. Pi Zuali leipui kal rawn haw leh chu Vengchhak lama a thian tha ve tak Pi Hnemi te nufa nen an innagching hlauh mai a. Khaw khat mah nise, veng hran han nih chuan inhmuh reng hi a lo har a. An ri ta hlut mai. Pi Hnemi fanu tleirawlte erawh a tha a la tha bawk a, "Nu, tlaiah lam kan zir dawn sia, ka kal chak dawn" tih leh ving a rual a. A mawng phe pawh an hmu hman meuh lo. An ni pahnih erawh zawi zawia kalin an titi siam siam a, kawng chanve vel an kal tawh ang tihah Pi Hnemi chuan tìm angreng deuh tak hian, "Ngawi teh, Ruata nu, nimin ka thu hriat hi a dik leh dik loh phei zawng ka hre lo va, mahse, hre ve reng reng la ka tia. Tun hnaiah inpa leh Pu Rualkhuma fanu hian sawi an kai deuh tlat asin.. Thu belhchiandawl a ni em tih erawh ka hre lo va" chawlh det pah chuan a ti ta hlawl a. Pi Zuali pawh a ding dat, "Pu Rualkhuma fanu Dingpuii maw.. Ani te chu pasal nei mai tur a ni lawm ni? " mak tih hmel deuh tak hian a ti a. 

"Dingpuii ni lo, Pu Rualkhuma fa bik kha, thla thum dawn chu he lamah a rawn awm tawh alawm. Pasal neiin Haulawngah a awm a, an pa nen an inţhen nge ni khi a awm rei ta phian. A pa te inah pawh a awm lo, Pu Rualkhuma û Pa Tlánga a fin alawm. A fa kum 4 mi awm vel nen.. I hre thei em ti khan" Pi Hnemi chuan a ti a. 

Pi Zuali chuan a ngaihtuah nge a ngawi vang vang a"Ee aw.. Ka hre leh si e, a nu pawh Haulawng khua Pi Zawri kha a ni lawm ni khah. A lo haw tih ka hre ve hleinem. A va mak awm ve, kan pa nen chuan engtin nge an sawi" ringhlel ru deuh si hian a ti a. 

Pi Hnemi chuan a aw a thian kharh kharh a. 

"Tlansanga lo lengin a sawi a nia. Ani hi kan veng tlangau kan tih mai, thil hre thei zet a ni roh a. A sawi alawm. Pu Tlânga lah saw a tar ve tawh bakah a mit leh beng lo ţha vak tawh lo nen, Lawmawma te chu an free thei ngawt ang. Zan êm hi chu a la riak lo chuan ka hria a.. A ti mai si a. Kei ka lo phawk viau. "I benghawng lo ve sia, tlang hriat an ni tawh. An sawi ru sup sup tawh" min ti zêk lehnghal a" a thiannu melh ran chung chuan a ti ta mawlh mawlh a. Pi Zuali chuan a heh a pet fan fan a, awih harsa a ti mang e. Mahse, sawi a awm tawh hi chu eng nge maw hi chu a lo awm tawh thin. 

"Ni e, a dik ngei em tih erawh hunin hril se, i bul ania han sawi ta mai mai ila, kan pa awmdan hi tun lai chu a dik lo reng reng, zu rim a rawn nam haw ziah a. Zanah hian a chhuak ngei ngei bawk. A thiante nen an indawl mai mai turah ka ngai a, zan a lo chhuak ziahte hi chuvang chu a lo ni aniang a" ngaihtha lo zetin a ti ve ta a. Kal an siam leh a, an sawi dun zel. 

"Inpa chu ringhlel nghal ngawt lovin zawt thuphung mai mai chhin teh aw. Tlansanga sawi zel dan phei chuan, Rinpuii chuan zu te pawh a commission a ni awm e. Amah chu a inthup viau naa sawi a awm tlat! Pu Tlânga pension hlawh ringawt chu a beitham si a, kei chuan a zuar hreh hauhin ka ring lo.. A mak em mai. Lawma hi chutiang mi ni turah ka lo ngai lo lutuk a" Pi Hnemi chuan a ti sap sap a. 

Pi Zuali pawh chuan, "Kei deuh hian awih harsa ka ti. Hei chen kan innei tawh a, han inhauh chiamna leh nupa buaina leh harsatna ang hi kan la tawk lo tihtheih a ni. Atea a boral sarhu lai khan kei ka biak tlak mang lo va, khangte pawh zo takin min chhawm dawl kha a nia. Heti zat fanau kan nei tawh a, tianga a pelhe chu rin a harsa khawp mai. Rinpuii chu a la nula viau emaw ka tia. Kan pa te ang chu duh pawh a duh dawn mawni le" A chhungril na zet chung chuan a ti a. 

"A.. A nula em em tawh bik lo. Ngaihtuah la, Pu Rualkhuma tlangval fa a nia, tunah Pu Rualkhuma te chu putar tia sawi theih a ni tawh ania. Tuna a fanu pasal nei tur pawh a fa naupang ber a ni tawh a. Rinpuii chuan inpa chu a iai lo tawp ang, an sawi danin an pa nen an inthen chhan pawh a uire vang a ni awm asin. Mahse hei chu sawi darh chi pawh ni nghal lo chuan. A nu bulah pawh awm duh lo va, he lama a lo awm ta daih te hi chhan tha tak a awm ang. Khang a vanglai zawng zawng a nu bula awm ania, tun ataka a belh tur ber a rawn tlansan leh hi thil eng emaw tak zawng a ni ngei ang" Pi Hnemi chuan a ti leh mawlh mawlh a. Chutih lai tak chuan Pi Saii te nupa an huan peng atangin an rawn chhuak ve hlawl a, an inbe hlut a, an kalho ta a. An thusawi lai pawh an sawi zawm thei ta lo. 

Pi Zuali lung chu a dam ta lo kher mai. An pa zu in thin pawh hrehawm a tih tawh nak alaiin, upat alama hetiang tawn chu a zah te pawh a zak. Engtiang chiahin nge mi dangin an sawi ang tih a hre lo. A darh nasat tawh a ring. Mahse, beiseina erawh a la nei ve hram hram a. Heti zozai fa an neih tawh bakah in leh lo te pawh anmahni pualin an din ve tawh a. Chuti maia a pasal chuan a paihthlak duh a ring bik lo. Ani zu in ngai loin a han in ve takah chuan Rinpuii zawk hian mitmei a hmuh ang a, mipa ta na nâ na chu a che ve ta maiah te a ngai lui hram hram a. A rilru erawh a na thlawt. Inphatsanna hi zawng a chhan sawi theih pawh nise, sawifiah a nih poh leh a tuartu tan chuan a na telh telh thin si a. 

Pi Zuali hi Chengpui khua a ni a, Kohhran Upa in chhung atanga seilian a ni bawk a. A nulat lai paw'n fak a hlawhin, a nungchang chuan khual a kai ve hial thin. Amah hi a lian lem lo naa a vun te a lo ngo a, hmel tha em em tia sawi theih ni lo mah se; a nungchang vang hian ngaihzawn a hlawhin inleng pawh a ngah thei ngiang reng a. Pu Lawma a hun laia luck ve tak chuan Thenzawl atangin a va rim ve ta ngat a. An han inhmu chiah chu 'Love at first sight' ang deuhin an inhip tawn nghal hle a niawm e. Ngaihzawng nei ngai lo Pi Zuali pawn Pu Lawma chu a vei ve tlat. Pu Lawma thung hi chu Thenzawl khua niin chhungkaw hung tak atanga seilian a ni bawk a. An chhungkaw vanglai ti mai ang, an pem darh hma chuan an zahawmin chhiat thatah pawh an huhâng a na viau zel. Pu Lawma pa te unau hi 11 zet an ni a. Mahse, hna vangte leh thil dang vangin an pem darh ta hlawm a. Pu Lawma te unau pawh hi 7 lai chu an ni. Pu Lawma hi a milai a ni nghe nghe. Mahse, a û te pahnih chu Lungleiah an inbengbel a. A u chiah pawh Buangpuiah pasal a nei. A naute erawh Thenzawlah an la inbengbel ve a, a farnute pahnihin Thenzawlah pasal neiin, an te ber mipa pawn Chamring khua nupuiah neiin in puiah an khawsa mek a ni. Kan han sawi ta duah a, a ninawm palh ang e. 

"Mam, i biak hman em? " Pi Zuali chuan a ti khur dat dat a. Ruatfela chuan a thil ziah lai chu dahin, "I tan te chuan ka hman lo ngai mi? " tiin a uang a. A nu hmel awmdan hmu se a fiamthu kher lo maithei a ni. 

A nu chuan Pi Hnemi thilsawi te chu a hrilh fai ta kêlh a. Ruatfela erawh chuan awih harsa a ti ngang mai. A pa mizia nen a inhmeh lo ve êm bawk a ni. Mahse, sawi a awm tawh hi chuan ngaih tihthat mai hi a har tawh thin. 

"Nu, hei kum a tawp ţêp a. Ka lo haw ve thei ţêp tawh alawm. Lo insum hram hram rawh. Ka pa pawh keiman ka bia ang, in inbiak chuan eng emaw te a thleng palh ang. Lo lungngai lutuk suh aw.. Ka naute phei chu engmah hrilh suh" a ti dap dap a. A nu naute mah nise, a puitlinna kawngah hi chuan a rualpuiten an tluk lo fo reng a ni. 

Mami nena an buai rukna erawh a nu a hrilh ta lo mai. A rilru hah sa nak alaia tihhrehawm belh kha a duh lo a ni ber. A thil ziah tur a ziah zawhah a inbual sar sar a. Khua a thim lek lek. Arini a hre chhuak zawk. A awm ve chhung reiloteah khan eirawng a bawl ve a, tui lem lo mah se, Ruatfela a zangkhai phah ve riau. Tin, in te a tifaiin nawh ngai te a nawt a. A hliam vang khan a khapsak zawk thin mai pawh a. Hmeichhe sual tak niin a hre thei lo. Tin, a pa nen an inbiak dan atang khan eng emaw awm avanga hetianga a nunkhua chhe ta a nih a ring nghet bur. Mahse, buaipui zuia ngaihven erawh a tum hran lo. A mawhphurhna a ni lo tlat. A inthlak tur a suitcase an hawng chu a meng phawk chiang hle. Arini'n pek a tum pawisa thahnem tak kha a lo awm khiau mai le.. A thin a rim lek lek. Arini chuan a lo hnutchhiah ţãlh a nih dawn hi. Pawisa chu a chhiar a, 30000 chiah chiah a ni. Chu chu a thla 3 hlawh a ni. A inngaihtuah buai hle. Arini number chu a hmet chhuak ta nge nge a. 

"Pawisa hi ka duh lo ka ti mawlh mawlh sia. Ti nge i dah tálh a? " awki ngaihnobei vak lo hian a ti nghal thâwr a. Arini chuan zawi te hian, "I naute Christmas kawr lei nan hmang mai rawh. Ka leisak ve a ni mai. Ka damchhungin tumah thawmhnaw ka la leisak lo va, a vawikhat nan min pawmsak mai rawh" a rawn ti a. A aw zawi thawp sat chuan eng emaw ti zawng hian a hneh. A sawi thiam chiah lo. 

"I tha em? " a ti ta daih a. 

"Aw ka tha. " a rawn ti a. Biak zui dan tur a hre tawh lo. Pawisa laksak chu tlawmah la viau mah se; a dik tak chuan a naute thawmhnaw leisak nan chuan a it ve tho mai. A rinawm loh vanga laksak pawh ni hlei lo chu tiin a inthiam ve ta ngawt a. Hlawh a lak leh phei chuan hawn tur a nei ve nual thei dawn a. A rilru a hlim ve leh ta deuh. 

"Kan inhmuh lohna a va rei ta ve tiraw.. I la danglam miah lo anih hi" Dinpuia chuan Judy nuih sâng chung chuan a ti a. Judy chu rilru nawm loh hmel deuh hian a lo nui ve tawp. 

Zanriah ei turin an chhuak kha a nia. Hman kha chu pha tawh lo mah se; inhip tawnna erawh an la nei reng mai. Zanriah an ei zawhah Dinpuia chuan a la chelh a, "Ka pi te inah min kalpui lawk ta che" tiin a sawm a. Judy chuan a nu biain a dil a. A nu lah chuan a lo phal ve mai bawk. Nula senior lam an ni ve tawh a, an ring tawkin ngaihtuahawmah an ngai bik tawh lo ve bawk. Dinpuia nu nu hi Bawngkawn chhimvengah amahin a khawsa a, awmpui an tum pawn a duh lo bur. Amah pitar e ti lo chuan a nei âm reuh a, nurse a ni thin a, pension bakah an pa boral ta pension hlawh te nen nuamsa deuhin a khawsa ve a ni. Ui leh zawhte a vulh nual bawk. Dinpuia hian a duat bakah a pi pawh hian a tute zingah chuan a kuah bik deuh a, chuvangin an va kal tur pawh Judy chuan mak a ti hran lo. Dinpuia car chuan an tlan ta vang vang a. Judy chu a ngawi thei hle. Sawi tur tam tak nei mah se, sawi ţan dan tur a hre mai lo. Ruatfela a hre chhuak zauh zauh bawk. A pi in an thlen chuan a lo inkalh ţhap mai. Mahse, Dinpuia chuan nui chungin, "Ka tihder che nih kha. Ka pi chu nimin piah khan a lo phei a. A nawmsam loh vangin. " a ti ta mai a. Judy chuan engmah a sawi lo. 

In chhung an luh hnuah Ac te onin, hahdam deuhin an thu dun a. 

"Ka ngai thin lutuk che asin" Tiin Dinpuia chuan bul a han ţan a. 

"Awih turin min duh em? " a lo ti ve khauh. 

"I awih leh awih loh chu ka hre lo. Ka sawi phak pawh a awm lo. Mahse, i laka ka thiltih vang khan ka inchhir tawp thei lo. I rilru ka tihnatzia ka ngaihtuah hian khatiang kha ti lo tawp tur ka nia sin" tiin chunglam a melh vawng vawng a. Lo hmangaih em emtu tan chuan awih a harsa hran lo. 

"Keipawn ka theih ghilh ngai lo che" Judy chuan a ti sap a. A rawn kuah thlawp. 

"Tunah chuan nupui neih ka ngam ve tawh alawm.. Engkim ka huam tawh aw" Dinpuia chuan a ti sa sa a. 

"Mahse, inrin hi a harsa tawh em a" a lo ti dat. 

"Ka hria lawm. Mahse, thudik ka sawi vek tawh kha.. Nunhlui chu nunhlui a nia sawi tawh lo vang. Tha deuhin bul kan tan dawn nia" Dinpuia chuan a ti a. An infâwp ta vawng vawng mai. Eng le khaw le, chumi zanah chuan Judy chu Dinpuiah bulah a riak ta ngawt mai! Inru ang chu an ni ta tihtheih a ni. 

"Mami nen chuan kan la inbe zeuh zeuh. Mahse, kan inhmuh lohna a rei tawh e.. Ngati nge" tia rawn reply tu chu Mami bialpa hlui, Apuia a ni. 

Reply dan mai a hre tawh si lo. "Anih chu.. Anih Mami bialpa dang hriat i nei em? Zep loh chuan tunah hian keimah lo hi biak a nei tlatin ka hria a. Ka ngaih a ngam lo a ni. Min pui teh" Ruatfela chuan a type ta zat zat a. A zak deuh. Sim card dang a lei a, an man chhuak em lo vang chu maw. Han spy deuh vel hi a thiam loh zawng tak a ni si a. A che phelh ang tih a hlauhawm. 

"Umm.. Nia, ka hrethiam alawm. Ih, Muanpuia a niin ka hria, a ex hnuhnung ber chu. Mahse, a number ka nei lo" a rawn ti ta a. A fel phian mai. Apuia chu biak zui zel a duh ta lo va, a fel hmel si a, nakinah a la buai phah ang tih a hlau deuh. 

Muanpuia chu hriat chhuah a ngai dawn a ni. A hriat chhuah hunah engtiangin nge chet a lak leh ang tih erawh a hre hauh lo. Kima a zawt leh mai ang chu. A pa awmdan vanga rilru hah nen, a taksa pawh a cher deuh, schoolah pawh a harhvâng lo viau. Judy erawh a rawn kal tawh lo, chawlh a la niin an sawi. Tin, Arini pawh a la rawn lang lo. A la dam chiang lo a ni maithei. 

Mami pawh inthup teh mah se, a nu chu nu thil chìk mi tak a lo ni nge mawni. "I awmdan hi a dik lo" tih te a ching a. "I rai em ni? " tih dawt hreh si hian, pehhel deuha zawhna siam a ching riau. A ni lah tak bawk a, Mami nula khal leh chum lek lek thin kha a cher kâwk kâwk a, a pa leh a û chu mipa an ni bawk a, a cher tih pawh an lo hre kher lo maithei. Chaw a ei tlemin, han uak thut thut te a hrat si. A pum that loh vang tiin a la phat hram hram a. Mutmu a tuah tha vak lo tih lah a mitmengah a lang chiang bawk si. Engvanga Ruatfela chu pawt lut ve mai nge maw anih dawn le.. Chuti khawpa rai no lang tawhah chuan Ruatfela fa a nih theihna chance a awm hian a lang mawlh si lo. 

Englo a ni. An veng chhunga mitthi an awm zanin, Mami chu a thiannu Mazawni nen an kal ve a. Lumen tur a nih vangin an kal hma lem lo. Dar 2 thleng an thut hnuah zunram thiar turin an chhuak dun a. An inthiar lai chuan, Mazawni chuan call a dawng a. A han lak chuan a rak ta hlut a. Mami bulah, "Haw tawh mai ang. Haw ang tih lemah sawtah min kalpui rawh. Zingah kan haw leh dawn nia" a ti ta a. Mami chuan a hre thiam vak lo. 

Mazawni bialpa deuh reuh, ni leh ni lo inkara a dinpui, Tripura-a zin chu a lo haw a. An ni pawh dam lo menpuiin an lo meng ve reng a lo nia! Intihharh nan inhmuh puiah a rawn sawm a niawm e. Drinks pawh a awm dawn a nih awm chu. Mami hi sawi tawh ang khan awm mual mual e ti lo hian a in lam hi a thei zêk reuh a. Chutia lumena tlaivar thak ai chuan han vah harh chu a lo hreh lem lo nen. Mazawni nen chuan mipa awmna lam panin an inkhalh phei ta a ni. 

Mipa chu amaha in luah a ni a, an dam lo menpui te in pawh a hla vak lo. A thianpa nen an lo awm a. Zan rei tawh mah se, tlaivar tura chhuak an nih vang nge an pawisa vak lo. Zu pawh an leklam chho a, Mazawni hi chu a dose a hniam bawk a, a kai deuh mai. A bialpa Hruaia chuan roomah a luhpui ta vat reng a. Hruaia thianpa Opa nen chuan an in dun ta kerh kerh a. Han kai takah chuan an innel ve nghal mai. An titi duhzawng a lo inang chhap nen. An ri bawrh bawrh a. Hruaia te lah chu pawisak nei tawh hek lo, an thawm a ring ţan angreng viau a. Opa nen chuan an nui an nui ringawt mai. Zing dar 4 a ri ţep tihin thutthleng seiah chuan an mu ve ta a. Mu chung pawn an titi reng. Mahse, mutchhuakinna rawn zem a. An muhil ve ta a. Mahse, Khua a la var lo deuh tiha Mami Pentawng thangharh chuan Opa'n a bula thu run chu. ahmu ta a. Zawhna a neih hmain tui a lo pe vat. A in khawlh khawlh a. A zia deuh. Mut leh mai a tum laiin Opa chuan a rawn chul a, mak a ti deuh, "Va mu mai mai teh" a ti hlak a. Thinrim erawh chuan a sawi lo. 

"Ti leh zuai ang. Kha a laklawh" tiin zu no a rawn pe a. Ani lu na tan mek nen lawm zetin a lo thawkkhat leh piap a. A kai ta chhalh mai. Chutah Mazawni ten thawm an rawn nei leh tan. An muhil ve miah lo mawni… Opa chuan chet lak a hun ti niawm takin a rawn hrawm kual ta mai a. A tirah chuan an han inelh ve ngat ngat tak naa.. Ngaihsamna leh an thawm hriat zawng zawng nen, Mami chu a ţang zo ta lo va. An chesual ta mai a ni. Chefuh ti zawk ila a awm zawk mah ang. Khatih lai hun kha Mami thi neih atanga ni 14-na vel tak, raina chance san lai ber a lo ni chhap a. Invenna an kawl der bawk si lo. A bialpa ni lo, a vawikhat hmuhnaa a khawsakpui fa a pai ta ringawt mai a ni. A rai tih a hriat khan inthah mai te a duh rum rum hman a. Mhase, ngaihtuahna thar neiin Ruatfela, a hma atanga a lo star ruk em em chu pawhluh dan a ngaihtuah ta a. Tikhan ruahmanna fel tak nen chet a la ta a ni. 

Mahse, a ngaih ang ngawtin Ruatfela chu a lo â bik si lo va. Anihna takah chuan khami zan khan sex an hmang lo hrim hrim. Amah Ruatfela kha a ruih em vang leh a rilru tluan em vang khan hmang angah a inngai mai mai a ni. Chuvang chuan Mami chu a rilru hah leh mangang lutuk a rum a rum tawh a, a tawngtai ngam si lo. A inhua, a inten bawk. Tihtlak dawnin pawisa a nei si lo. Opa lah an khua Tlabung lamah a haw leh daih tawh a. Biak pawhna tur a hre bawk si lo. Mazawni a pun ngam lo, a chhan chu Mazawni hi a kamtam bakah a ruih hian thil a puang vak zel a. Rintlakah a ngai lo. A naute pai mek chu falak a ni mai dawn nge, a pa ni lo pui chu a pa hmingah a ziak lui dawn.. Engmah a ngaihtuah thiam tawh lo. 

Ruatfela te school pawh ni 2 chiah kal a ngai ta. Aizawla cham rei pawh a tum lo. Bazar ve thuak thuaka a tuka hawn daih a tum. 

"Sir, engtikah nge i hawn dawn? " Arini msg a ni. 

A haw hun tura a ruat ni chu a sawi a. 

"I hawn hmain ka lo kal dawn a. I phal em" a rawn ti a. Ruatfela chu a nui suk, "Phal e" a ti mai a. Lehlamah In chungah a leng ngai tawh lo va, hmun dangah lenna a hre vak lo. A khua chu a har ve deuh. Mami hmuh a hreh em vangin a hel ngat ngat zel. Amah Mami tak pawh a chhuak vak lo aniang, hmuh tur a awm ngai lem lo. 

School an kal tawp niah chuan Pu Ramtea a rawn lang ve a. Hlawh a rawn sem a, an hlim tlang dar dar hle. Judy tih loh chu an kim vek. An ban dawnah, "Ruata, nang chu lo la haw lo teh aw. Ka be lawk duh che" Pu Ramtea chuan a ti a. Ngaihtha chiah lo chuan a lo nghak. An hawn vek tawh hnuah, "Aw.. Kha hei i hlawh aw . Chuan, nakkum lamah chuan hna dang i lo zawng tawh mai dawn mawni ka tia. MA (Eng) pakhat hian min rawn dil ve reng si a. Nang i la zo fel chiah lo nen, kan inhrethiam aniang chu" Pu Ramtea chuan a ti ta a. Ruatfela a nghing dawt! A mitthlaah Arini pa kha a rawn lang nghal. Inhumruh chungin, "Ni e, a tha alawm.. " a ti thei hram. 

Hawn kawngah a inngaihtuah nasat luat vangin motorin a la su ţêp zui! MA (Eng) chuan a dil tak tak em tih chu a hre lo naa, a tlangpuiin MA(Eng) rawn dil thinte chuan hlawh hi a beitham an tih vangin mi dang aia sang lak an beisei thin a. Pu Ramtea chuan a lo hnar zel thin kha a nia! Tunah chuan a hnar duh ta lo pawh a ni mahna le. Kha leh chen a lo thawh vena, a intuamhlawmna leh a chhungten an thlamuanpui vena ber chu a chhe ta rawp mai. A tliak hnawp a ni ber e. Amah leh amah pawh a infuih thei meuh lo. In a thleng chiah tihin a nuin a lo bia a, lungchhe aw zetin, "Mama, i pa chu an sawi ang ngei a lo ni e. Hei zan hnih lai a rawn haw tawh lo. Tihbuai che ka hlauh vangin ka sawi duh lo va. Mahse, ka insum zo ta lo ani" a rawn ti zui! Ruatfela chu a thu hnawk. Ti nge vanduaina chuan a zui zel bawk le? Eng nge tihsual a neih? 

"Sir" a bengchhe ri emaw a tih laiin a lo ni lo. Chawhmeh eng ilo khai bawr ţeuh chungin kawngkaah Arini chu a lo ding ran mai. Arini hmel a hmuh rual chuan thinurnain a khat nghal. Chang khak hian, "Eng nge i rawn tih dawn? " a ti a. 

"I haw dawn sia, chaw ka rawn eipui dawn che a" a ti siam siam a. A thil khai chu dawhkanah dahin a phawrh nghal mawlh mawlh. 

"Chhuak rawh" Ruatfela aw chu a ring lo naa, chang tak a ni. Arini pawh a ding châwih. 

Hrilhhai hmel zet hian Ruatfela chu a melh a. 

"Chhuak rawh ka tih chu" a ti leh. 

"Eng nge a awmzia.. sir" a ti khur dat. 

"I hmel ka hmu peih lo. Nang leh i chhungkua hian ka nun intichhe vek. Vawikhatmah ka hmaah rawn inlan leh tawh suh" Ruatfela chuan a ti khur dawt dawt. Chutiang taka a thinrim chu amah pawhin a la hre ngai lo. 

Arini chu zawitein a pen a, "A chhan ka hre tho vang" a ti sap a. A chhuah hnuah thaw hawk chungin Ruatfela chu a thu leh hnawk. A chal a dawm a. Arini chungah khatiang ti tur niin a inhre lo. Mahse, a thin a tâwt mah mah a ni. A chawhmeh lo ken ho chu a en kual a, vawksa rep, sangha leh thlai hnah leh bawlhlo engilo an ni. Dawhkan nem chuan a ding vang vang a, a kawngka hawng ri a hriat chuan a hawi chhuak vat. Arini chu a rawn pen lut a, Ruatfela mita melh chung chuan, "Ka pa laka phuba la turin i inpeih em? Sir " a ti zawi raih a. 

(Muah leh vek u 😍