A tel lovin. 6

A TEL LOVIN… (chapter - 6)

(Adds kha maw. 24hrs -chhungin vawi khat a tawk aw. Hmeh nawn tluk tluk chuan a chhe ve thei a. 😊

Ziaktu : Toni Râlte

Mami chhoh hnu chuan ngawi rengin room atangin Arini chu a rawn chhuak a. Chaw chu an ei dun leh. Arsa pawh an tilum a, an chaw ei a tui phian lehnghal. An ei khamah hliam tuar zawk tiin Ruatfela chuan Arini chet ve chu a phalsak lo va. Aman thlengte chu a sil vek. Arini lah chuan a lo thlir veng veng ringawt. An han intihfel hnu chuan Ruatfela chuan kawngka a va kalh sauh sauh a. Arini bula va ţhut pah chuan, "Sawi tawh ila" a ti hap a. 

A lo thaw hawk ringawt. Rei fe a ngawih hnuah, "Nizan khan ka thianpa Zohmaa birthday kan lawm a. Falkland-ah a nia. Chuan, a bialnu Sangsangi leh a thiante an rawn lang ve a. An inhau hrep ringawt. Kei ni chuan kan lo thlir ţhap.An inankhum hrep hnuah an haw ve leh mai a. Kan buai ta deuh nuaih a ni ber. Kan haw ta ringawt a. ITI thlen hma kawng reh laiah Sangsangi te bawk chuan min lo tiding leh a, ruih an nei ve bawkin ka hria. Thian mipa pathum an lo nei bawk a. Kan lo rui tlang hlawm nen, Sangsangi leh Zoa an inhau leh chu kan inphek sual ringawt. Keiin hmeichhe lam ka bitum a, Sangsangi thiannu kha ka hnuk hrep. Mahse, chutia ka sawisak mial mial lai chuan, a tu ber nge ka hre lo chu chuan min rawn vit ta mai a. Vit ti ia, a thuk lo naa a zai kak a ni ber ang chu. Ka thi ta nuai a, Duty an lo lang ta sia. Hmanhmawh zetin kan insaseng ta hlawm a. Kei pawh mahniin ka tlan a, Ka thisen a chhuak nasa si, ina ka hawn chuan buaina hriat an duh ang a, ka thiante pawn an tuar tel thei. Kan rui vek si a, a mualphothlak mai mai dawn si nen, ka rawn kal ta mai a ni. Ka scooty erawh tukinah khan Zohmaa ka laktir. Kan inah a va dah tawh ang" a ti ta a. Ruatfela chuan a awih hreh hmel angreng. 

"I thiante pawh i pan thei tho sia, ti nge kei kher? " a ti ta tawp a. Amah Arini a huphurh vang ni lovin mak a tih vang zawk a ni. 

"Ka thiante pan ila, an chhungten an hre ve dawn asin. Mahnia awm thian ka nei si lo va" a lo ti ve mai a. 

"I pa te chuan an ngaihtuah ngawt ang che" a lo ti leh nghut. 

"Min ngaihtuah a, min ngaihsak chuang hleinem. Chuan, ka tihbuaina zawng zawng che hi chu ka la rul vek ang che" a ti hliai a. A hmel chu a ngui deuh. 

"I ho e a. Min tibuai lo. Mahse, School i chawl rih dawn tihna ania" a lo ti vat a. 

"Kar khat vel bak kal a ngai tawh hleinem.. " a lo ti liam leh puat. Selection test an nei zo diam tawh bawk a, attendence in kawngro a su vak tawh lem lo. 

"Thawmhnaw i hak theih tur hi ka nei si lo va, engtin nge niang aw. Hlawh kan la la lawk dawn si lo" Ruatfela chuan a ti ta a. Arini a nui hak, "A lo thleng ţêp ang, Mike-a ka chah alawm. " a lo ti sam êt a. Ruatfela bula awm rih chu a tum hmel riau. Ani tan lah lo hnar ngawt chu a tihchi si loh. A rilru a buai ve viau. A awm ve reng chuan in chung ten an hre thuai awm si a, Judy ngei pawh rawn len te a la tum leh awm si a. Judy a ngaihtuah chhuah takah chuan, a harh thut. Nizan khan thil eng emaw sawi a duh thu a sawi tak kha mawle. A lo mutthilhsan daih pek a, a inthiam lo ru viau. 

Pu Thanga chu a tei vut vut a. Mama leh Spi an chhuak chiah bawk. Spi thiannu Melody te inneihna hmang turin. Nu ber erawh roomah a tawm a. A fanu vangin a rilru a hah mek a ni. Hetiang fanu a nei tlat hi mak a ti! A tetlai hun a ngaihtuah a. Hetiang mi a la ni ang tih rin harsa khawpa naupang duhawm leh fel kha a ni thin si a. Engtin nge hetiang hian a lo ţhanlen theih le? Vawi tam a zilh tawh, a chhang ngai lem lo va, hauh reng a har thin. An pa hi chuan thinrimin vawi tam a nèk thin a. Mahse, chu chuan a tiluhlul sawt emaw tih tur a ni fô! 

"Pi, Mike-a a lo kal a" an room kawngkaa rawn dak chungin Thari chuan a rawn ti a. 

A va chhuah chuan Mike chu a lo thu fel ât a. An pa Pu Thanga pawh a rawn lang ve nghal zat. Mike a hmuh rual chuan, "Khaw nge Rinsangi" a ti rum nghal hluk. 

"Kan inah a awm a. A thawmhnaw la turin min tir a" tim deuh hlek hian Mike chuan a ti a. 

Pu Thanga a rum nghut. "A duh leh aman rawn la rawh se, rawn haw vat se a ni mai" a ti tûn tûn a. Pi Mali , Arini nu chuan, "Mike, ngati nge in inah chuan a awm? " a lo ti nem thlap a. An pa chu mitmeiin a khap pah bawk. 

"Aa.. Ih, nizan khan kan intibuai deuh a, chung vel vang chuan a lo la haw hreh rih a niang. Thil in zawh vak a hlau a. Nu Mal, a thawmhnaw chu tam pawh a ngai lo. Min hawntir rih mai ru.. Karlehah chuan a lo haw ang" ngen titih hian a ti a. 

Pu Thanga bawk chuan, "Kan Rinsangi tehchai hi chu aw. Zah pawh a zak lawm ni? In atangin ka chhuak te lo tih khanglan.. In a nei lo pawh a ni lo. Mi min ngaihdan tur te hi ngaihtuah ve tur a nia. " a ti bawrh bawrh a. Mike chuan, "Aa.. Pa Thang, hrethiam rih mai ru. Class Xii te a pass ang a, a la sim chho vr mai ang. Tunah chuan a luhlul hun lai a ni bawk sia. Tuman in a chhuahsan tih an hre chuang lo vang" a lo ti var a. A aw pawh a dik chho ta deuh. Pi Mala chu a tho va, a fanu roomah lutin bag lian lutuk lovah a fanu mamawh tur awm ang chu khungin a chhuahpui leh a. Mike chu a pe ta a. 

"Lawkin, Mike, thudik sawi rawh. Rinsangi hian tlangval a um em ni? " Pu Thanga'n a ti leh thut! Mike a nui hawk ringawt. "Teuh lo mai. Mipa chu eng atan mah a ti lo" a ti hluai a. Pi Mali chua, "Lo haw vat rawh se aw. Ka call la bawk se la, i chhungte pawn lo zilh ve rawh se" a ti dam thliam a. Mike chu a bu nghut a, a chhuak zui ta nghal. 

Pu Thanga chuan, "Exam te hi han zo se la, a nun a sim loh chuan home-ah ka dah khawp ang" a ti bung nghut a. 

"Nia, exam hi zo phawt se.. Kei chu Mama Pa, Bawihteii hi a mak ka ti. Hetiang a ni ngai si lo va, a hostel va awm rei lutuk te khan a tikhaw lo zawk nge eng emaw tak chu a nih ka ring. A chhan a awm ngei ngei ang, tianga a awm chhan hi" Pi Mali chuan ngui zetin a ti mawlh mawlh a. An pa a en lo thung. Pu Thanga hmel landan a inthlak zawk. Mahse, a inthunun leh vat! 

"Eng dang vang mah a ni lo vang e, tun lai hri vei pakhat a nih hi. Kan vanduai hle zawng a nih hi.. A û te an han fel nen" tlema nem zawk hian a ti a. An nu erawh a ngawi zui daih. 

Judy chuan a kut a hum ruh a, khur dar dar chungin call lo kal mek chu a pick up ta a. 

"Hello"

"Hello, i va la har ve" mipa aw hian a rawn ti puam ţâlh a. 

"Nia ka laklawh deuh a" a ti bah nuaih. 

"Ka lo haw dawn a.. Chu chu hrilh che ka duh a. Whatsapp-a sawi atan chuan ka ui a" a rawn ti leh a. Judy a chhing tawp. Dinpuia a rawn haw chuan ani hi a tlawm leh mai dawn niin a inhria. Lateii khan a number chu Dinpuia a lo pe chu niin, a rawn be ta fo a. A tirah a chhang tha duh lo nain, a bialpa Ruatfela lahin a be tlem si,Dinpuia a hmangaihna kha la kiam tak tak thei hek suh. A reply ve ta fo a. An inbiak atanga ni 3 na velah phei chuan a danglam ta chiah reng a. Ruatfela lahin a care teh huam si lo.Dinpuia nen an inbe tam telh telh a, ani Dinpuia lah chuan a phatsan loh thu leh nau a tihtlaktir vanga a inthiam loin, amah a huata a kalsan theih nan lem a chang mai mai niin a sawi ta bawk si. Judy chuan awih duh lo viau mah se; a awih tlat bawk si. Ruatfela aiin Dinpuia a ngaihtuah nasa tial tial a, Ruatfela lakah erawh a inthiam chiah lo. 

"Ka lo hawn veleh ka rawn leng ang. Engkim kha siam tha leh ang" a rawn tih chuan a tuiral der! Hmeichhe hmangaihna thukzia leh ât si zia hi chu aw.. 

Ruatfela nu Pi Zuali chuan a maian bai chawh rawk rawk pahin, "I mak lutuk em mai. Hei kar khat dawn chu zu i in tawh a. A dik lo reng reng.. " a ti hlaih hlaih a. An fate an awm lo bawk a. A insumkar duh ta lo. An pa awmdan danglam zel chuan a ngaihdan a pel tlat tawh a ni. A hma zawnga zu in ngai hlei lo, a rawn nam haw fo pawh thil dik lo a nih tawh ahnu hmanah an hnathawhna atanga an chawlhtir lehzel chuan a ngaih a titha tawh meuh lo a ni. 

An pa Pu Lawma chuan, "Ka in tam chuang hleinem" a lo ti ringawt. A tawngkam hman dan chu a huai sârh lo. 

"Mama phei chu ka la hrilh lo, a rilru a hah leh dawn si a. In tawh loh tum teh. Tikha chuan a ngawl i la vei mai ang. Tukinah Pu Thuama'n min rawn bia a, Kâwnah dawr sak a tum a, a rawn sawm che kha.. Nang lah biak hman lohin i lo chhuak daih lehnghal" a ti leh hmarh hmarh a. A hmel pawh a tûm deuh. 

. "Naktuk atangin ka thawk dawn alawm" a lo ti leh sup. Ruatfela pa hi sawi tawh ang khan a lianin khawpui pa niawma mawi hian a sar vuah roh a. A tawngtam lo a, tu pawi a sawi ngai lem lo. A hna a ulukin a fimkhur a, muangchang deuh mah se, mi hian an chhawr duh viau zel. A hnathawhna hmasa atanga an ban chhan kha an nu bulah chuan, "In neitupa thu duh lutuk vang a nia. Kan inhnial thinrim deuh alawm le" a ti mai a. An nu tan lah awih lohsak ngawt chi a ni si lo. An khawsak chu a harsa em em hran rih lo naa an fa naupang lamte an rawn lian zel ang a, in leh lo tharte pawh an puah ve ţan a ngaiin Pi Zuali chuan a hria a ni. Tun dinhmunah chuan Ruatfela pawn nupui nei se, room pahnih chiah a awm a. Tihngaihna a la awm rih lo a ni ber. 

"Behlawi rèp hi rawt ang hmiang. U Thari'n a râwt thin a. A tui tawp" Arini chuan a ti siam siam a. A dar na chu hre lo ang hmiahin a awm. Mike-an thawmhnaw a rawn pek pah khan, lapua leh damdawi bakah bandage te a rawn keng tel a. Tunah chuan tha deuhin an tuam ve tawh. Nachhawkna a ei bawk a. A chhawk rih a ni maithei. 

"An râwt ngai pawh ka hre lo. Rawt ila a ni mai lawm" Ruatfela chuan a lo ti sup a. Alu a vel mual mual bawk. 

"Alu fry ila, anthur rep hi chhum ila, hei hi rawt leh ila a tawk" Inti neitu zetin Arini chuan a ti leh a. Ruatfela nuih a za. 

Chutih lai tak chuan kawngka pawh rawn kik lem lovin Mami a lo lut ta thut mai. A ding châwih a. Arini leh Ruatfela chu a melh tawn sek ringawt. 

" lo thu rawh" Ruatfela chuan a lo ti sawk sawk a. 

Bet lo zetin a thu ve mai. Arini chuan Ruatfela hmel buai nak chu hrethiamin, "Û, in inchungnu fel deuh i tih kha mi? " a lo ti ta vat a. Ruatfela zawk a hawihai. Mahse, hrethiam ve vatin, "Umm anih hi. Mam, hei hi ka nuteii fanu Rinrini a nia. A lo zin lawk anih hi" a ti ta zung zung a. Mami thawk harsa ti zet pawh a thaw huai huai mai. Nui hmel pu chungin, "Awii nupui i ru emaw ka lo ti hman alawm" a ti ta a. Arini a kiai sak. 

Mami chuan, "Ka rawn leng ve mai mai" a ti zui zat a. Ruatfela awm erawh a la nuam chiah chuang lo. 

"Chaw lo ei ve la" Arini chuan nelawm. Zetin a lo ti leh. Ruatfela'n mitmeiin a khap. A ngaipawimawh lo lui tlat! Eng tak chu hria ni maw.. 

"Aa.. Ei lo vang, ka tihek ang che u" a lo ti ve mai a. Eirawngbawl pah chuan an titi ta hlawm a. An inkawm tui phian lehnghal. Arini mizia danglam chak lutuk thin hi Ruatfela chuan mak a ti em em a. A hriat vawikhatna a ni hial awm e. 

Zanriah an ei laiin, "A ngaizawng che a nih kha" a rawn ti hlawl. 

"Tu maw.. Mami maw. Teuh lo" a lo ti hlur a. 

"Hmeichhia ka nia. Ka hrethiam ve lawm le" a lo ti a. 

"Aa.. Min ngaihzawn ka ring lo. A lerh vak lo" a lo ti ringawt. 

"Miss Judy ai chuan a fel hmel daih zawk. Miss Judy hi chu a lerh hmel" a lo ti leh daih

"Ei mai mai teh" Ruatfela chuan a ti leh nghut a. Ngawi rengin an ei dun. Judy nen an inbe ngai mang lo va, an inmangtha tawp a, zingah an inwish leh tawp a. Chubak thil dang a awm meuh tawh lo. Ruatfela lahin zawhna a nei der si lo. Ni e, Judy hi chu a lo duh lem lo khawp a niang. 

Zanah chuan an phone an khalh dun leh malh malh. Ruatfela chuan chutia Arini lo awm ngawt chu nakinah a tan a la pawi thei ang em tih te thlengin a ngaihtuah ve tho va. Amah mi hmai eng zah leh mi tihnat hreh chi a ni si a, chhuahtir tawp a hreh si a ni. Helhkam nei zetin a mu ta a. Mami'n a lo call zui.. A lak chuan, "Msg en teh" a rawn ti a. A dah leh daih. Mami msg a'n chhiar nak chuan a thu hlawl!  

"Ka rai a" tih a lo ni! Chhei le! Eng nge a chungah thleng ta mai le.. Sáwn a thlak tihna em ni ang le. A rilru a buai ta mup mup mai. 

"Tu fa? " a ti hram. 

"Nangmah" a rawn ti zui! A awih hreh mang e aw. An chetsual hun a ngaihtuahin a rai a nih pawhin la lang turah a ngai lo. A buai tulh tulh mai. Ka fa a ni lo tih dawt lah a hreh si, a zu lo in kher kher chu a va inchhir tehlul em. Hmabak a la ngah a, nupui neia fa nei hman a la ni lo. A nu hi nu fir tak, fair ve tak a ni a. "Eng mi pawh nise in fa an pai a nih chuan in nei ang" a ti hmiah thin a. Mami pawh an neih luihtir ngei dawn. Mami chhungte a ngaihtuah a, an ringin an ina riak tur pawha an rinngam em em a ni si. An in luahtu thingtlang tlangval ve maiin an fanu duatlai lakah fa a nei tih hre ta se, an hnawhchhuah duh mai te a ring a. Mut hmunah a hui ta pap pap mai. Arini a awm ve reng tih pawh a hre chang meuh tawh lo. 

"I muhil thei na nge? " Arini chu a mutna bulah a rawn ding dat a. A lo phu zuk nghe nghe. 

"Thei lo" a ti hul hak a. A mutnaah chuan chep zetin a rawn ţhu thla ve. 

"Rilru hahna i nei mi? " puitling deuh hian a ti a. Hrilh vek mai a duh rum rum. Mahse, a zirlai naupang a ni a, hmeichhe dang ang a ni ve lo tih a hre bawk. 

"Nei lo ve. Ka muhil thei lo ve mai mai va mu rawh" a ti nghut a. Phun zui nuah nuah chungin room lamah a luhsan leh ta a. 

Engtin tin emaw chuan a muhil zui ve thei hram. Ngharmut ang deuh a ni mah zawk. Eng emaw hlekah a harh lehzel a, a harh apiang lahin Mami a hre chhuak ziah. A ngaih vang lah chu a ni hauh si lo. 

Room-a mu mek Arini pawh a mu meng kar mai. A taksa za chiai chiai chu thunun a tum hle. Ruatfela'n a deh hlek pawha a lo za chuai zel chu a inten! An zirtirtu a ni a. A tan chuan nuţa ang a ni. Mi ţha tak a ni tih pawh a hria. Mahse, hei pawh chiang takin a hria. A ngaizawng ru em em tih hi. Amah Ruatfela lahin student angin a en tlut bawk si a. School an luha Sir Ruatfela a hmuh phat khan mipa dang ang lo takin amahah danglamna a thlen daih tawh. A aw dam dup te, a taksa lian leh sang tak bakah a hmel landan te chu tha a tih chi leh pa a tih chi an ni. Mahse, mahni zirtirtu te ngaihzawn chu tlawmthlak leh lerhthlak a tih em vangin ama tawkah a inveng ve ran a. A laka a rilru putdan a hriat a hlauh em vangin a do ngat ngat a, chhe tak takin a be bawk. Mahse, Ruatfela'n a haw ve ngai lo chuan amah leh amah a inhnehtir hleithei ngai lo. Khawpui tlangval te angin lirthei pawh a nei lo va, a khawsak a sang ve loin thawmhnaw pawh a nei changkang hran lo. A thiamna lamah erawh a thiam fû a, mahse, Ruatfela ai hian english a thiam zawk a inring tho. Mahse, class-ah a hnial duh ngai lo. A zak hmel a hmu hreh tlat! 

Khatia Judy nen an han inzui takah phei chuan a thinrim a, a rilru a na bawk. Amah leh amah a inhrem a. Inhnemna a tling lo tih hrereng chungin a rui kual a, school nise a kal hreh phah ngawih ngawih a ni. A maimichhing a, A taksain a mamawh em em Ruatfela taksa chu a suangtuah a. A inhumruh nasa mai. Rizai chu a khawkherh a, "Ka hneh thei. Ka thei" tiin a phun sep sep a. Ţawngţai tur erawh chuan chakna a nei lo. 

Office a lut a. An lo kim thap tawh. Judy pawh a lo thu vang tawh a. Nimin lama a kal theih loh chhan erawh groupah a sawi tawh a, sawi leh kher tulin a hre lo. 

"Kan Rinsangi chu rawn kal a tum tawh lo mawni le. Form ka fillup tawh a ti niawm fahranin" Miss Jenny chuan eng emaw ziah mawlh mawlh pahin a ti a. 

"Aniang. A awm ve tho mai. Mahse, a thiam thei a. A zia mai ang chu maw" Sir Tluanga chuan a lo ti a. Ruatfela erawh a ngawi reng. 

Judy chu a va text ve a, "I va ngui ve" tiin. 

A rawn chhang vat.. "Nia ka mut a chhuak" a rawn ti ve mai a. 

"Thil min hrilh tum kha sawi tawh la"

"Tlai banah aw" a rawn ti a. A chhang tawh lo. Class a va la leh a, ngaihbel hleihtheih loh hian a bet hlawl lo. Arini te class pawh an kal tha lem lo. A inah Arini a awm tih hre ta se, engtin tak ngai hlawm ang maw.. 

Zirtirtu dangte pawh an lo ni ve deuh tho va, an inthlahdah tlang tawh chu a ni. Kum tawp lam hi chu inthlahdah a awl ve reng bawk a. Last period pawh an kal rei lo. An bantir ta mai. School thlang canteen-a a ba a pek lai chuan Judy a rawn lut ve a. Ani pawn a pe ve a. An chhuah chuan, "Kal ila" Judy chuan a ti sap a. 

"Khawihah" a lo ti hû!  

"I inah. Thil sawi dun ang" Judy chuan a ti ta a. Ruatfela chu engtin emawni a awm. 

Hreh hmel zetin Scooterah chuan a chuang a. A phone a phawrh nghal. 

Msg a type ru zung zung a, Arini a thawn nghal. A lo hmuh loh teh chuan aw.. 

In an thleng a, An in kawtah Mami'n pangpar tui a lo la pe zui! Ruatfela chuan nuam a ti lo ru viau. A in chu a reh ţhap a. Kawngka a lo inkalh thlap bawk si. Mami zawk chuan, "I nau chu a chhuak lawk. Hetah chabi a dah" a rawn ti a. A hma te khan sawi mai awm. Ruatfela chuan chabi a han la leh te te a. 

"I nau a lo zin alaw" Judy chuan a ti ta chiah a. 

"Umm" a ti tawi tawp. A zawh zui zel a hlau. Thutthlengah chuan insi chuang lo vin an thu dun a. An ngawih dun vang vang hnuah, "Sawi la" Ruatfela chuan a ti zawi ta sup a. 

Judy chuan a chil a lem khalh a. A sawi hreh hmel angreng. Mahse, sawi ngei ţulin a hre ve bawk si a. 

"Zawhna ka zawt phawt ang che aw" a ti leh phawt a. Ruatfela a bu nghut. 

"Min nei ang em? Ni ta zel ila" a ti ta thut! Ruatfela a phu zawk. Chutiang zawhna kher kher chu'h! 

"Ngati nge" a ti daih a. 

"Sawi phawt rawh" a lo ti tlat. 

"Ka hre lo le, hmalam hun sawi theih a ni lo va, Pathian thu thu a ni mai ang chu" a ti ta a. A rilru tak tak a sawi. 

"Anih min hmangaih em? " a ti leh ta. Judy awm dan chu mak a ti hle. 

"Hmangaihna awmzia ka hriat loh vang nge ka sawi mai thei tlat lo" a ti ta tawp. Dawt hrilh ngawt kha dikin a hre si lo. 

"Ka ngaihdan chuan min hmangaih lo niin ka hria. Chu chu ania sawi ka tum. Dik tak chuan i rilru min pe tawk lo alawm" Judy chuan a ti leh a. Thinrim hmel erawh a pu hran lo. 

"Ka hrethiam lo" a ti ta ngawt. Ruatfela thin hi chu aw. Judy chu a ngawih leh vang vang hnuah, "Min dem lo la, inthen mai ang hmiang. " a ti ve ta hmiah a. Ruatfela erawh a ţhawng ve deuh. Mahse, amah Judy zawkin pawi a tih loh phawt chuan pawi tihna em em erawh a nei lo. 

"I thu thu le" a ti a. Tawngkam nem erawh a hmang. 

"Anih chuan ka haw mai ang aw. Thian kan ni reng dawn nia" tiin Judy chu a ding a. Ruatfela pawh a tho ve nghal zat. Kawngka an hawn hmain pawn lam atangin a rawn inhawng a, Arini a rawn lang nghal. Judy nen chuan an inmelh vang vang a. Judy hmelah chuan mak tihna a langsar hle. 

"Miss,i haw dawn mi? Sir, rawn zawh duh che ka nei a, i number ka nei si lo va" Arini chuan a ti thawp sat a. 

"Aw a tha alawm. Lo va thu rawh. Miss Judy hi kan thlah lawk a nge" Ruatfela chuan a lo ti vat a. An chhuak dun ta. 

"I in te a lo hria ni maw? " rinhlelh hmel angreng deuh hian Judy chuan a ti sap a. 

"Umm a vawi hnih rawn kalna a lawm. A zirlai min rawn zawt thin a" a ti liam puat a. 

"Anihte chuan i number chu pek ve mai tur che alawm" 

"Aaa.. A ngai lo. Student ten neih ve kher a ngai lo" a lo ti vat. Judy pawh a ngaihthat hmel ta deuh. Tluang tak chuan an inthlah liam thei ta hram e. Ruatfela chu a single leh ta phawt. Buaina erawh a la ngah dawn chauh a nih hmel e. 

"Miss hi chuan a duh ngawt mai che" buhfai sil pahin a ti lang lang a. Ruatfela a khi suk. "Min then daih alawm" a ti hluk a. Natna erawh a neih hmel loh. 

"Ehe! Ngati nge? " Arini chuan a ti hluai a. 

"Ka hre bik lo. A ho em mai. " a lo ti daih. Inbual turin bathroomah a lut daih. A inbual hlanin Mami a rawn chhuk a. Arini nen an tawngri chu a hre pha reng. Mami chuan a be tha hle. Mami chungchang hi la chinfel chu a ngai tih a hria. Engtia chet lak tur nge tih erawh a hre mai lo. An pahniha sawi dun a ngaih hmel. 

A inbual zo va, "Mam, i scooty-in zanin chu sawtah min va kalpui teh aw" Ruatfela chuan a ti nghal. Arini meng râng deuh erawh a hmu hauh lo. Mami chuan hrethiam takin, "Min lo sawm la" a lo ti vat. Rei awm tawh lovin a chho zui a. Arini erawh a ngawi hmak mai. Zanriah an kil thlengin engmah a sawi lo. 

Ruatfela zawk chuan, "Naktukah haw tawh la a tha ang. A tha lo tlat tiang chu" a ti ta a. Arini chaw thial lai a tawp chawt. Tawng a tum lai takin an kawngka an lo kik a, Ruatfela'n rang takin Arini chu roomah a nawrlut leh nghal. A va hawn chuan a hmaa Arini thawmhnaw loh dahtu Mike kha a lo ni. 

"Eng nge ni ta? " Ruatfela chuan a ti a. 

"Khaw nge Arini" a tih rualin Arini chu a lo chhuak nghal. 

Mike-a chuan a ruckshack chu la thlain pawisa zial mum hi Arini kutah a pe a. 

"Ka lawm e aw.. Mike, chaw ei ve la" Arini chuan a ti var a. 

"Ka hmanhmawh.. Ka kal dawn. John-an min nghak" tih leh chhuah a rual nghal. Kawngka chu Arini chuan a va kalh a. Pawisa chu phelhin a chhiar a. A vaiin Rs. 30000 a ni. Ruatfela chu pek pahin, "Ka awm man" a ti sap a. Ruatfela chuan a melh kâwk, a kut chu vai kiang dawrhin, "Hotel neitu emaw min ti elo" a ti bung nghut a. 

"Ka inthlahrun vang zawk a nia" a lo ti a. 

"Chupawhnise, i pawisa ka mamawh lo ve. Saw.. Va sengfel rawh. Ka chhuak lawk dawn. Naktukah chhuak turin lo inring la" Ruatfela chuan a ti chang fak fak a. A thinrim tih a lang. Engvang nge tih pawh Arinj chuan a hria. Pawisa pek a tum kha a duh lo, ni e, a hmusit angah a ngai a ni maithei e. 

Ruatfela chu a insiam mawlh mawlh a. A chhuak zui nghal. Mami te ina luh pah chuan, "Hawh le.. Min va hruai zuai teh" ngam tlak zet hian a ti a. 

Mami pawh a lo inpeih diam tawh. An chhuak ta a. WBR lamah an tlan a, a vawt sûk tawh. An intuam lum hlauh a, a zia. Hmun reh deuh laiah an ding ta a. 

"I rai tak tak a mi? " Ruatfela chuan a ti ta a. Mami chu a melh ran bawk. 

"Aw" a lo ti sap a. 

"Ka fa a ni lo" a inrin hmain a sawi. Mami'n a rawn melh kâwk. 

"Tu fa nge ni chuang ang" a ti hlar a. A mitmeng pawh a nelawm loh tan hle. 

"Kan chetsual hun ka chhut hian ka fa a ni thei lo. Kar khat a liam ţâwk a nia. Chuti em ema mawl ka ni bik lo kar khatah a la lang lo" a ti ve ta tlat. 

Mami chuan, "Thenkhat chu test kit-a lang hma an awm alawm. Ka zawt vek. I fa a ni" a ti ve tlat lawi bawk si. Ruatfela chu a chek hluk. A vei tuak chhen a, "DNA test i cho em? " a ti ta a. Mami a phu dâwrh mai. 

"Min va ring chhe ve a. Nangmah bakin sex min hmanpui lo" a ti ta nghek a. Ruatfela chuan zaidawh deuh hlek hian, "Mami, ka ring chhia che a ni lo. Tuna i fa pai hi ka fa a nih theih loh dan ka sawi mai a ni. " a ti ta a. Mami a ngawi vang vang, a rawn ţap ta fap fap a. Ruatfela lah mi tha, tumah tihnat duh ngai lotu a ni si.. Awmdan thiam harsa a ti ngei mai. 

"Engpawhnise, Doctor hmu ila, a chiang mai ang. Naktukah kan kal dawn nia" Ruatfela chuan a ti a. 

Mami chuan khur lek lek hian, "Min ring lo a nih kha.. Kal pawh a ngai lo. Tihian ka awm awmin ka awm mai ang" a ti a. A mittui a hru fap fap bawk. Eng han sawi kuak theih ni hek lo, an haw leh ta phawt. Kawng tluanin an inbe lo. 

Ruatfela ina a lut chu a phu chiang kher mai. Arini pa a lo ţhu run a. A bulah Arini chu a lo thu ve bawk. A hmel a hmuh rual chuan Arini pa chuan, "Zirtirtu tha tak emaw i nih ka tia. Hetiang hian maw i lo chet a? Naktukah police hmel hmuh lo inring ang che. Kum tling lo i ruk avang hian.. Pawngsual case i awrh thei" a ti ta hem mai le… 

(A sei telh telh ang. Dont worry 😂