A tel lovin. 5

A TEL LOVIN… (chapter- 5)

Ziaktu : Toni Râlte

(Story chhiar hmain thil ka lo sawi lawk. Ka blog hi Adds click theih ang khan a awm ve tawhin ka hria a. Adds a lo lan khan min click sak theuh turin ka ngen che u aw. In click chu ka ring sa tho naa.. Ka sawi ve hrim hrim 😊😍😘

"Engmah sawi suh aw. Engmah. Kan chhungkua kan mualpho bakah i nu nen kan inthen phah ang a. Nu nei lo i ni dawn asin. I duh duh ka leisak ang che. Engmah i sawi tur a ni lo" tiin a pa chuan a ti mawlh mawlh a. Ani erawh a khum kilah a tawm tlat. A khur zawih zawih bawk. 

"Doctor kan hmu vat dawn nia. I nu bulah pawh engmah sawi suh aw. Bawihte, engkim kha theihnghilh vek rawh aw" a hma aia nem zawk hian a rawn ti leh a. A fanu meng bial kal leh hlauthawng em em chu a melh ran bawk. A fanu rilru chu chhiar a tum a ni ber mai. 

"Mahse, pa, police kan mantir dawn lo mi? " Arini chuan thlabar zetin a ti ta a. Pu Thanga chuan verther hmel zet hian, "Ka la mantir em em ang. Tunah chuan a tlanbo tawh alawm" a ti a. Arini chuan a awih nge awih lo a melh ran bawk. 

"A nu tal ka hrilh dawn" tih leh thawh a rual a, khum atanga a chhuk chiah chu a pa chuan a lo chelh nghal chawt. A meng rum nghal, "I nu saw lungphu tha lo a nih saw.. Hetiang thu a hriat chuan a thi a ni mai. I nu thih i duh a nih chuan va sawi rawh" a ti ta fak mai. Arini a ding chawt a, a hmui a pet fan fan. Kum 12 chauh a la ni. Huaisenna a nei hauh lo. Ţhanthi êm pawh a la nei si lo va. 

"Tihian fel deuhin awm la, ka ngaihtuah dawn che alawm. Tunah rih chuan hei inthlan kan hmachhawn mek a, hetiang thil Zoram mipui ten an hriat chuan ka tling dawn lo. Chuvang chuan i pa hi min hmangaih anih chuan, tuma bulah sawi suh. Ka la chingfel em em ang, i hrethiam tiraw" tiin a fanu samah chuan a zut thuak thuak a. Arini chu a ţah a chhuah hmel hle. 

A pa thu ang chuan a ngawi ta. Ngawi lo zawk se a chhungril nâ leh thinrimna chu a bo duak awm si a. Ni e, khatih lai hun kha a tan chuan hun thim ber a ni tlat! Thil thlen dan chu hetiang hi a ni. 

A nu leh a û te, Lungleiah a nu nu leh pate inneih Anniversary lawm turin an phei a. Ani Arini erawh an zirlai a laklawh deuh vangin a kal ve lo. A lo châk em em lo bawk a. A chhan pawh a nu û a putea fanu Tluangi a rualpui hian a ngeih tlat lo va, nuam a ti lo. Khatihlai kha chuan naupang duhawm tak, pawisawi lo, lehkha zir nuamti em em a ni thin. Thian pawh hmeichhe thian vek a nei a, kawnga ring zet zeta an nui thin chu mi tana an ngeiawmna a ni mai awm e. A chhungte lakah a tlatlumin a sawi tawh chu tihsak loh a ni ngai meuh lo. Mahse, amah khan mamawh a ngah lem lo va, thil awh leh it ngawih ngawih a nei hek lo. An hma lawkah inthlanpui a awm dawn a. Chutah chuan a pa pawh a ding ve leh dawn a ni. A tette atangin hei hi chu a tan a mikhual lem lo. Chutih lai chuan mikhual leh mamawh neite lo kal thin pawh a la hmumawh tehchiam lo va, a zahzum thin vangin a roomah a tawm daih thin. 

An nula awmpuite leh a pa bakah an driver hlun te nen an awm a. A nute chu kar khat lai an cham dawn vangin a khua chu a har lawk ru viau thung. School a kal a, an test result a chhuak a. An class-ah a sang leh ta ber. Zangkhai takin a haw a. In a thlen chuan a pa te roomah chuan a pa leh tu emaw an lo inkawm mek a. Nidanga an inleng ang thoah a ngai. A hnuah a pa chuan a rawn ko va. A pa roomah chuan a va lut ve a. Amah aia ûpa Mipa sang lam, hmel chhe lo tak hi a lo thu a. A hmel a nelawm hle. 

"Hei hi ka best friend Thingtlanga awm fapa a nia. Kan inah a lo awm rih dawn a. Rinawma a nih hi. I û dawn nia" tiin a pa chuan a hmelhriattir a. An inchibai a. Û mipa pakhat chiah a nei a, a lo lawm ru viau. A u Mama lah a buai bakah he lamah a awm tlem si a. A pa chuan a room tur te a kawhhmuh a, tichuan, Rinawma chu a lo awm ve ta. A nute zin chhung pawn khawhar lo takin a awm theih phah a. Rinawma chu a felin mi biangbiak a thiam hle a; a nui sâng reng bawk. A nute an lo hawn pawh chuan a pain a lo hrilhsa tawh vangin mak an ti lem lo va, an be thain an welcome tha viau. Arini nen chuan an in thlau lutuk lo bawk a, an inkawm thei ber. Thla khat dawn an chenho hnuah phei chuan an inbuan thial thial zel tawh a, Rinawma lah a kum phu lohin a la naupangchhia a. A pa thianpa Pu Sawma te wholsale dawrah a thawk ve ta bawk. In lamah mipa tih theih tur ang a ti zung zung zel bawk a, Arini nu Pi Veni paw'n a fak hle thin. Inthlan nan thla khat chiah a awm tawh ang tihim Arini chungah vanduaina rapthlak tak a lo thleng ta a ni. 

Zirtawpni a ni a. Arini te school pawh school vel tifaiin chawhnuah an bang ta a. Hostel-a awm reng reng thin a ni a, chumi kum chu a hri a tha lo deuh a, a dam loh deuh fo vangin kumin chu in atangin kal mai rawh se tiin an la chhuak a ni. Tichuan, in a rawn thleng a, a u Mama chu phaiah a chhuk tawh a, Nancy erawh inneihnaah a kal. A nu pawh A pa thiante nupuiho kilkawiin inthlanna atana tul leh pawimawh sawihoa ruahmanna siam turin a chhuak bawk. 

Roomah lutin a insil thuak thuak a. A ke vel a hruk mawlh mawlh lai chuan Rinawma a lo lut a. 

"I kal na nge? " Arini chuan a lo ti var a. 

"Umm ka chawl a. Vawiin chu" tiin a bulah a thu a. A hmel chu a dik lo, eng emaw rui a ang. A ngui bawk si. Arini erawh naupang ta nafam chuan a lo chìk lem lo. 

"Noodles in con ila, ka ei chak e. Ka siam ang" Arini chuan a ti a. 

"Nia, kan ei dawn nia. Chumi hmain thil dang ti ang" Rinawma chuan a lo ti a. Arini tawng hma chuan a tho vut a, kawngka chu a va kalh ta rap a. Arini chuan mak a ti deuh. Rinawma chuan a kawr a hlip a. Khumah chuan a bawkkhup a. "Ka hnungzang min malis la, noodles chu ka lei ang che" a ti a. An inmalis fo vangin Arini pawn thuawih takin a malis ve mai a. 1min vel an inkhawih hnuah Rinawma chu a rawn zangthal thut, Arini a tla tep nghe nghe. Arini chu a kuah bet ta tlat a! Arini hamhaih chuan engmah sawina chang pawh a hre lo. Khumah chuan a keuhthlu a.. "Unau tak tak kan ni chuang hleinem. Ka îtna che a rei tawh lutuk" tiin Arini chu a fawp ta mai a. Rang zetin a lo namkiang dâwrh! Mahse, Rinawma chuan Arini tshirt chu a hlim chho pawp a, a kekwr kawng a dap nghal. 

'I va zak lo ve a. Kal teh" Arini chuan ţang zetin a lo ti nghek. Rinawma'n a rawn fawh rual khan zu rim a nam tih a hre nghal bawk. A tal aih aih a. 

"Inah tumah an awm lo. Awmpuite pawh an chhuak vek. Tumah chhan tur che an awm lo" tiin a bawhbet leh a, mahse, chutimaiin a hneh lo. Arini chu a sapatal a, bed sheet te chu a chuar ten tun mai. A au nghek nghek a, an nula te hming a lam thul. Awmzia a awm miah lo. A mangang tawh takzet a ni. 

"I va luhlul rei e" tih leh Rinawma chuan rawn hnek a rual ta a. A khawhmuh a thim mup mai. Mahse, a la tal aih aih tho. Tunah phei chuan a rak tawh lo. Ngawi rengin an inelh dun ngat ngat mai a ni. Rinawma chuan a rawn hnek leh dawp. A chau ta hnawk mai. A taksa chu a zawi a ni ber mai. Mittui tla chungin, "U Rinawm, ti lui suh. Khawngaihtakin" a ti ngawih ngawih a. Ramsa ang mai a ni. Arini taksa zawi lai chu remchangah hmangin hrui a la sauh sauh a. A phuar ta hmiah mai. Chutah dimna tel hlek loin a awmna te fanu thianghlim tak chu a pawngsual ta! Arini a chhe ta vek mai. 

A zawh felah a phuarna chungawi rengin a phelh a, a kal chhuak leh daih. Arini chu a chechang eih lo. Chunglam melhin a ngawi reng ringawt. Sex education an lo zir silawn tawh vangin tunah khan a virginity chu hnehchhuh a ni tih a inhrethiam. A pawi turzia erawh a la hre phak lo. Thawm a hre ta a. A pa leh Rinawma inbe thawm niin a hria. Rang takin a tho va, a rak ţhawt. A serh natzia chu aw.. A pa chu a rawn lut ta hlauh a. A fanu chu a melh tlawk tlawk. 

Mahse, chu politician duham tak chuan a fanu chu a ka ang lo turin a vau bet ta zawk a. Chumini la la chuan Rinawma pawn an in a chhuahsan nghal. Tlaiah a nute an lo hawng a. Arini hmai duk leh vung bar chu an rawn hmu ta ngei. Zawhna a awm ta vat. A chhan hma hmain, a pa chuan, "Kan Rinawma pek khan zu a lo rui a, ani hi pawisa a lo dil a, pek tur nei hek lo. A lo hnek a nih kha. Ka hnawtchhuak nghal" a lo ti zung zung a. Arini zawk chu a hrilhhai hmel kher mai. A nu leh a u chu an thinrim khawp mai. FIR thehluh a ngai a nih hi tiin an insawh a. Chu pawh a pa chuan, "Tun ang ka dinhmunah chuan thil engmah thleng suh se. Inthlan zawh lamah kan chingfel dawn nia" tiin a khap ta a. Ţan a na ve bawk nen. An ngawi ta rih. 

Inthlan a zo va, a pa pawh a tling ta ngei e.. Mahse, Arini lam reng a ngaihven ta lo. A fanuin pawngsual a tawk tih a theihnghilh hmak thei chu a mak takzet a ni. Arini lah in engmah sawi tumna a nei tawh si lo. A ngawi tlawk tlawk ringawt. A rilru natna leh zahna chu a inchher chhuan ûr tawh a. Khawi hmunah pawh awm se; a confi thei tawh lo. A hma ang khan a nui thei tawh hek lo. A thiante tupawh chuan, "Arini hian mipa a mutpui" tia an sawi a hlau a. A zirnaah pawh a tlakhniam phah hle. A nu leh pate lah an buai si. Mal takin a tawrhna chu a tuar ve ta ngat ngat a. Rinawma erawh a reh ta vang vang mai. 

Kum 14 a nihin Thanthi a nei ve ta a. A taksa pawh a rawn nalh chho a, an schoolah pawh startu a nei ve ta fo. In aiin hostel nuam a tih zawk vangin Hostelah an dah leh a. A dam that loh pawn tumah a hrilh ngai lo. A tuar tawp. High school a kal chhung zawng hostelah awmin, chumi hunah chuan a rilru pawh a rawn danglam chho ta a. Thil hrthiam chho ve zelin, a pa huatna in a khat ţan ta a ni. Rinawma pawh a hmuh hun huna that turin thutlukna a siam riap mai. A pa erawh a pa a ni tlat a! Thisen chhuahsak ai chuan a rilru tihretheiha tihmualpho a tum hmiah. Fanu fel tak nih hi a tum lo tawp a ni ber e. Tin, a rilru timangang em emtu a awm a. Class X an zir laiin zan khat chu a taksa hnuailamin a rawn tur a, engmah a eiin a in awm a hre si lo. A tirah chuan mak a ti a, rapthlak te pawh a ti. Mahse, thanthi neih hmaa pawngsual tawkte awm dan an sawi thin a hre chhuak a. A ngaih a tha ta lo. Frank taka, "An hur hlen duh" tia an sawi ang kha a ni dawn niin a inhria a. Tunah mipa mamawhna a nei mek si. Mahse, vanneih asiamin a thleng leh ta lo va, an exam zawh ina a awm hnuah a chhuak leh. Mahse, a la inthunun ve zel. Matric a pass a, Higher secondary a kal ve takah khan a pa laka phuba lak hna a tan chho ta a. Class Xi lek a nih laiin a duhthlanna ngeiin mipa a mutpui ta hmiah mai. Bialpa em em a nei ngai lo va, mipa thian a ngah telh telh. Zu a in thei a, damdawi erawh a bar zeuh zeuh chauh. Zan a chhuak fo a, ni e, amah ngei hian sex hman nuam a ti! Tin, a pa runluihna hmanrua atan a hmang tlat bawk si. A nun hi a vai a, a bawlhhlawh a, amah leh amah inten ngawih ngawih chang pawh a nei. Mahse, darthlalang hmaa inen chungin, "Ka ti zel ang. Duh leh ka thi mai ang" tiin a infuih thin. Bialpa pangngai taka neih a duh lo va, star erawh a nei ve. Mahse, chupa chu amah aiinna chapo ve khanglang a, a thunun theih loh tur mipa a ngaizawng duh lo. A nun hman zel dan tur a hre lo va, a tlachawpin a nung ve tawp. A chhungkua ten an zilh chamchi a, a nu hi chu a khawngaih thin. A chhan dik tal hre ta se a pa ang tho a ni angem tih erawh a hre lo. A nuin a hauh chang chuan, "Nu, a zo tep" a ti ringawt thin. Mahse, a pa dam chhung chuan a zawh theih a ring lo. Lehkha erawh a la thiam reng a, mi dangin an hmuhsit a duh loh bur vangin titha ber nih a duh a, a tum thin. Mize sual leh chapo tak hi a tan chuan invenna a ni. A hloh phal lo. Miin a chhungril nun an hriatsak ang tih a hlauh vangin thinlung takin tumah a kawm ngai lo. Amah hi a inveng reng a ni ber e. 

"Rinsangi chu Pu Ramte'n Selection test a titha bawk sia, attendence kha chu sawi buai lo mai ru" a ti a nih kha Principal chuan a staff te bulah a ti a

Madam Muani ngaihdan ni ta lo chuan, "Anih chuan Hruaia leh Elizi saw kan titla bik thei lo vang. An ni phei chu dam loh harsat vang a nia. Selectionah an tichhe em em hran lo bawk a". A ti hmiah mai. 

Mi dang chuan an lo support dual hlawm a. Pu Sawma tan pawh tihngaihna a vang angreng. Pu Ramtea intithu lutuk hi a kham rukna a rei tawh. Mi lian leh hausa a pâk thei si. 

"Hm.. Sawi tam lo ila, an vaiin exam rawh se" a ti ta a. Pu Ramtea hriattir leh kher a tum hran lo. 

Arini chu office-ah a rawn pen lut chhat chhat a. Miss Jenny lam chu hawiin, "Attendence-ah ka tla a ni lawm ni? Engvangin nge exam form ka fill up ang. Private in ka exam peih lo" a ti nghat a. 

"I titha si a, kan ngai dam che a nih kha" Jenny chuan a lo ti tha ve mai a. 

"Ka pa sawi vang a nih phei chuan ka pawm lo a nia. Ka exam duh lo" a ti leh fak. 

"I pa vang a ni hleinem. I titha em a, kan school tihmingthatu atan kan duh che alawm" nem. deuh zawkin a lo ti a. Arini chu ngawi rengin a chhuak nal nal. A rilru a buai hmel hle. 

Ruatfela leh Judy inkar chu an inpawh loh sa tawh nak a laiin an inhlat zual hle. Phone atang phei chuan an inbe ngai meuh lo. Judy mize dang thut chu mak a ti tho nain, rilru dang a pu a nih phei chuan a lawm ru hle zawk. Mahse, a rilru kap tlattu thil pakhat erawh a awm. Mami kha.. Sex an hmang ngei chuan a hre si. Engvangin nge khati em ema a ruih ni?engmah hre lo khawp hian a lo ruih theih hle tih a hrechhuak chiang khawp mai. 

Mami lah chuan eng a sawi lo va. Whatsappah lah a rawn be hek lo. Amah Mami khan a rawn pan tih chu a chiang a. Nula fel tak niin a hre si. Mahse, han kamnama han ruih tawh chuan kan harhfim laia kan tih ngam loh tha tha hi kan ti leh tlat zel bawk si. Eng em a ni lo vang tiin a inhnem hram hram a ni ber. 

A in chungpain zo ar a rawn lei haw a, chaw eiah an sawm ve. Lawm takin a han ei a. Mami nen an inbe mang lo, in chungnu chu a ţawng suam suam ringawt. Ani hi zawng a chak lohna chu mi rêl a peih viau hi a ni ber. Thenawm khawveng rel loh a hleih pawh a nei meuh tawh lo. MHse, an rawn len luh chang chuan tha takin a lo dawngsawng leh tho va, nu sual tak chu a ni lem lo. Mi tanpuina lamah te hian a thawh hlawk viau lawi si! Aaa.. Hmeichhia zawng sawi neuh neuh leh rel sur sur hi an hrat ve bawk a ni e. Chaw ei khamah tihtur em em a nei lo bawk a, a thu khawmuang ve a. Thingpui hângte an han in leh te te a. Mami no rawn seng chu a nu ta pek chuan, "Lalmami hi i hnute a kawh riau, nau pai te pawh i ang alawm le" nui huah huah chung hian a lo ti a. Mami chu a tûm vuau mai. Ruatfela nuih pawh a za lem lo kher mai. Chhuanlam siamin a haw ta vat reng a. A inngaihtuah nasa hle. Mami chu rai ta se, a fa a ni hman dawn mawni, an chetsualna kha a la rei si lo ti ten a inngaihtuah. A ma tawkah a buai ve khawp mai. 

A kawngka rawn sawi dawt dawt thawmin a tiharh a. A phâwk hru mai. Sana a en vat a. Zing dar 3:20 chiah chiah a ni. Chutiang hunah tu tak ni ang maw? A ngaih a tha lo ru hle. Kawngka lam a rik reng si vangin a va hawng ta a. A thil hmuh chuan a hnungtawlhtir dawrh mai. Makti em emin a en ta ngawih ngawih a. 

A awm bawr vel thisena bual khat vek leh thawmhnaw ţet phung hian Arini a lo ding reng mai. Ruatfela chu a hamhaih vek vangin a ding ngil ut ringawt. Arini zawk chu thei leh thei lo hian a rawn lut a. Ruatfela a harh chiah, kawngka chu khar leh vatin, "Eng nge awmzia? " a ti ta mawlh mawlh a. 

"Min hmuh hian i hre mai lo em ni? Hliam ka tuar a nih hi" a lo ti hrâwk a.. Amah chuan a kawr chu harsa ti fe hian a hlip a. Puih nachang a hre lo. 

Mahse, a hnuah chuan tui a va lum ringawt. Lapua a lo nei mai si lo, a kawr a hak vak tawh loh a va zai thler a, thisen chu a hruksak ta a. A dar kak duai chu a hmu ta. A kak zau angreng viau lehnghal. Ţawng lem lo chuan a buaipui zung zung a. 

Bathroomah nawrlutin a hliam lai chu an tifai a, a kekawrah pawh thisen kai vek hek, a hlip a, towel a veng tawp. Bra pawh a phelh daih. Engmah a pawisa tawh lo a ni ber ang chu. Ruatfela chuan chuti ringawt chu dik dawna a hriat loh vangin, "Damdawiin pan ang" a ti sap a

"Damdawiina awm ka duh loh vang alawm ka lo pan che" a lo ti hlar bawk si. A va khawlhkham thin tak. 

An han intifai zo a. A boxer a haktir a. Kawr erawh a la ha lo. A pian chu nalh reuh tak a ni. Mahse, chuti lam hawiin Ruatfela chuan a thlir lem lo. Tuilumah chi a al a, a hliam chu a dehsak ta a. A thip viau ang. Damdawi lah a nei pachhe angreng si. Parawl hi chuan chet a ho duh ve bawk a ni. An deh zawhah, "Ţhui rawh" Arini chuan hmalam bih ngur chungin a ti zawi ta sap a. Ruatfela chuan makti zetin a melh hâw a, "Ka thiam lo" a ti hluk. 

"Thiam a ngai lo. Ţhui tawp a ni mai" nem deuh zawkin a lo ti leh a. Ruatfela chu a thinrim lek lek, "Damdawiinah kal ang. " a ti vut a. A ding hluai bawk. 

"Anih chuan min thihtir mai rawh" a lo ti nghat. A maimichhing vang vang a. Ruatfela chuan a hruai lui thei dawn chuang lo tih a hrethiam. Rilrua tawngtai mawlh mawlh chungin hriauah la a thil ta. Arini chuan, "I verandaah sawn whisky tlem a awm. Va la la, i hnawih dawn nia" a ti a. Lehzel chuan. A va la a, no khat awm vel chu a ni mai thei. A ngaihtuah kim angreng hle. Nge a in tur zawk pawh a hre thiam tawh lo e a.

Khur dar dar chungin Arini dar hliam chu a chul a, hriau chu bati-ah a hliau hlek a. A thil tlang ta. Arini chu a rak eih lo. A kut a dam dawn loh tehlul nen. Eng emaw ti ti chuan an inthui zo ve ta hram e. An zawh meuh chuan Arini chu a dâng vek. Ruatfela lah a thlan hluam bawk. An thaw huai tho e. 

Nachhawkna a eitir a. Bandage takngial pawh nei hek lo, puanin a thuina lai chu an tuam a, kawr a haktir bawk. Khum pakhat chiah a awm si. Ruatfela chuan, "Thil thlen dan vel chu naktukah min hrilh dawn nia. Mu phawt ang. Ka khumah mu la, hetah ka mu mai ang" tiin thutthleng seiah chuan a thu a. Engmah sawi lovin Arini pawh chu a kal ve mai. Nachhawkna khan a chhawk em ang chu. Ruatfela erawh a muhil zui tawh lo chiang kher mai. Arini thil tawn a hriat chak bakah he nau hi a mak a ti telh telh. A in te thleng thlenga a lo hria chu mak a ti. Zing khawvar tawh hnuah a chhing ve thei hram. Artui kan rim nam chêk chêkin a kai harh a. A hawi vut. A choka tereuhte-ah chuan Arini chuan artui a lo kang sar sar a. Nizana a hliam tawrh ngaihtuah chuan a hmel chu a lang tha hle. A harh tih a hriat rualin a rawn melh vat a. 

"School kal i duh awm sia. I eitur ka lo siam a" a ti sap a. 

"Ka kal lo vang. Nilengin i thusawi ka ngaithla dawn" Ruatfela chuan a lo ti hmiah. Arini tawng tum ang ziau chu a va melh nghek a, Arini pawh chuan engmah a sawi ta lo. 

Arini phone a ri ral ral a. A va la, "Aw" a ti mawl tawp a. 

"Ka lo haw rih dawn lo. Ka tha tih hria la a tawk mai. Min lo be tawh suh" a ti hmak a. Phone a dah zui khap. 

"Chaw ka chhum thiam lo va. Chhum mai la" Arini chuan a ti zui zat a. Ruatfela chuan ner sak chungin, "Ka ring rengah" a lo ti nghut. Arini nui sak erawh a hmu hauh lo. 

Tukthuan an ei laiin Mami'n kawngka pawn atangin a rawn au lang lang a. Rang zetin Arini chu roomah a nawr lut nghal. Kawngka chu a va hawng a. 

"Chaw i ei tawh law. Hei arsa thing kha" tiin thleng a rawn pe a. A nui lo va, a tûm hek lo. 

"A va lawmawm ve. Lo ei ve la" a lo ti vat a. 

"Aih.. Chuan, titipui kha i neiin ka hre sia" tiin a hawi kual a. 

Hlauthawng ru tak hian, "I hriatsual a niang. Tumah an awm lo" a lo ti ve vat. Mami chuan filter tui chu a in khalh khalh a. 

"Nizana ka nu thusawi kha i lo ngaihtuahzui deuh dawn nia" tih leh chhuah a rual nghal. Ruatfela ang zuau pawh a tawp leh daih. 

Room-a tawm mek Arini chuan bang awng kar atanga Mami chhuak tur bih ran ran pahin, "Ka la bitum ang che. I melh dan kha ka duh lo" a ti vawt raih a. 

(Tawk leh phawts 😍