A tel lovin 4

A TEL LOVIN.. (Chapter - 4)

Ziaktu : Toni Râlte

Kum tawp an thleng leh ta reng mai. November thla an han chuankai meuh chuan boruak pawh a vawt chho ţan a, Ruatfela leh Judy pawh an la inzui ve ta reng mai. An thawhpuite leh naupang thenkhatte chuan an hre tawh nghe nghe. Ruatfela hian nuam lo a ti ru deuh, mahse, Judy hi a confi êm a. Amah zawk hian a lenchilh fô mai. Ruatfela a leng khât angreng si a. Amaherawhchu, mawi lo takin an khawsa ngai lem lo. Fawh zawng an infâwp ve ngei a, Amah Ruatfela ngaihdan chuan a hmangaih lem loh hmeichhia chu khawihchhiat kher a ţulna a hre hran lo. Duh nise hun remchang zawng an ngah thin viau. Ruatfela nu pawhin a lo hre ve tawh a, a lawmin Judy chu mo atan a awt hle tih a sawi chamchi thin. Ruatfela rilru erawh a hriatpui hauh lo thung. Amah leh amah chêp tlata a inhriat vang hian ţhen pawh a tum ve fô, Judy hian a duh lutuk nge ni Ruatfela'n inthen a sawi apiangin a rawn kal vang vang a, hmaichhanah a rawn ţah khum deuh tawp zel. Ani mi rilru tha leh mi dang tihnat hreh ta na nâ na chuan a lo pawm ve leh mai zel a. Hun remchang tak a la awm a beisei rualin chuti taka atchilhtu chu nakinah a la hmangaih chhawm ve mai a beisei ru bawk. Thil pakhat a hriatthiam chiah loh erawh chu Judy nen an inzui chhoh ţan atang khan Arini hian ţawngkam pangngai takin a be ngai meuh lo. Class a rawn kal regular lo viau a, Attendence-ah a tla mai ang tih pawh a hlauhawm. A thiam thei si a, han tihtlak erawh a uiawm duh viau ang. 

December thla tirah an exam dawn a. Tunah chuan an ennawn tawh zawk. Zir tur em em an nei tawh lo. An school hian hostel an la neih loh vangin an sa ve mek a, chawlh a piangin Ruatfela pawh a inhlawhfa thin. Sum tlem tlem a thawkchhuak pah thei chu vannei a inti viau. Inrinni tlai khat an hna a laklawh deuh a, ni dang aiin an bang tlai. Cement work a ni miau a. Vai pakhat nen cement an chawh mawlh mawlh lai chuan kawngpui ah chuan an ri nak nak a, zuk hawithlak hian a lang nghal mai. An zuk hawithlak chuan Arini leh hmeichhe pakhat hi an lo indinchilh ran mai a. An sirah an thiante niawm tak an awm nual bawk. Ruatfela chuan buaina eng emaw tak a awm leh tih a hai lo. Zuk ţhelh chu a sawt a rin loh vangin in rel atang chuan a thlir ve ta reng a. 

"Rawn be tawh lo la a ni mai. Zak thei lo lutuk" Arini lo zawk chuan a ti tân tân a. Arini nrn an intiat viau. Mahse, a hâng deuh. 

"Ve a.. I bialpa kha engatanmah ka ti lo. Amah zawkin min rawn be chhen anih kha. Ka nin nak a lai a" Arini chuan a lo ti hmak a. Chunu chuan, "Ka chhiar vek alawm. I lo biakna hlir, ani chuan reply pawh a reply ngai lo che" a ti ve leh sak. Arini chu za vak lo hian a nui hul hak a. A phone phawrhin a hmet niap niap a. 

Chunu hmaa dah lan vah pah chuan, "Bialpa bumhmang i nei pawh i vanduai tehlul nen, bum mai mai theih i ni hi i va khawngaihthlak tak", a ti rum âl a. A phone ken lai chu chunu chuan chhuhsakin a chhiar niawm tak a ni. 

"I edit a ni mai lawm. A har lo e.. Khatiangte mai mai. Ka bialpa hian keimah lo tumah a be ngai lo"a la ti ţâlh a. 

Arini chuan an bula dingho chu melh kualin a nui hak hak a, "Mawl chhah lutuk. Tihian ti ang. I bialpa khan min block rawh se. Ka lo block ve bawk ang. Inthen suh u. Mahse, hei hi hria la, i bialpa chauh hi khawvel mipa awmchhun pawh nise, ka lo lengtar zawk ange aw" a ti a. A hmaa ding chu hmuhsit hmel zet hian a melh ran bawk. 

"Nang ang hmeichhe sual leh rui reng, hur bawk si hi ka bialpa te ang chuan ui cho tlukah pawh an ngai lo che aw", Hmeichhia chuan a ti a, a swi zo hman ţâwk tihin a biang a ri thlawp. A pai nawk bawk a. 

"Sawi leh rawh. Mi hur ka nih thu kha sawi leh rawh. Ka insual lohna a rei ta bawk a. Ka phur teh mai ania" tiin a va hnaih nghal ruak a. Chunu lah diau hek suh. Arini samah a kek chawt, an insual chu a ni der mai. Anmahni hualtute lah chuan an uipui tui lian thlir vel mai mai si. Dik dawna a hriat loh vangin Ruatfela chu a tlan thla ta nge nge a. A zuk pawt then a. "In va â ve. Insual tawh suh u. Thuin a sawi fel theih. Hmeichhia in ni lehnghal" a ti swk sawk a. 

Arini chuan kut a lo thlak hman nual nge, hmeichhe hnar chu a thi hnu a,a kamsir pawh a thi bawk. Arini erawh a sam a thur em em ringawt. A bitum nu khan hmeichhe insual anga a insualpui vang a a ni. Ruatfela chuan a pawt ţhen a. Arini chu a tal aih aih mai. Chiang zetin Arini mitah chuan a melh a. A sawi tum erawh a sawi ta lo. A chhan chu rum zeta a lo melh let ve vang a ni. An thiante chuan an lo kai hrang ta bawk a. An insual zui ta lo hram. 

"Min lo ţhelh lo la chuan a mitmu ka kawm chhuahsak ang ka lo tia sin" a ti hem mai. Rapthlak tih hmel zetin Arini lam chu a hawi a, "Haw rawh" a ti zawi sup. 

"Nanga inhlawhfa ve satliah thu ka awih chhan tur ka hre lo ve" a lo ti hmak. Ruatfela chu a za zawk a ni ber e. A hmuhsitzia a lang chiang ngei mai. 

"Inhlawhfa satliah hi in sir ka ni tho tih i hriat kha" a ti ve sak a. 

"Hei hi school a ni lo" a lo ti leh ngei, "Ka hria. School a ni lul lo tih chu. Mah se, mi pangngai chuan School chhungah kher lo pawh an zirtirtute an zah thiam thin. Nang hi chu rilru lamah rual i ban pha lo deuh a nih dawn hi" a ti ta siah siah mai. A duh aiin a ţwng tam tih a inhre tho. Mhase, mi rethei berh ve tê pawhin inhmuhsit hi kan duh lo a ni. Chu thu a sawi zawh chuan a hnathawhna hmun panin a chho leh nal nal. Arini phun zui bal bal chu a hre lo. Hriat pawh a duh hek lo. 

Zanah, Arini status ah, "Tu nge ka nih a la hre dawn chauh" tih a hmu a. A lo inngaihbel deuh. An inbiak ngai tak loh vangin a hmaa a lo nel ruk vena kha a bo fai vek tawh. Tunah chuan a chapo lutuk chu a ngei tawh. Retheihna awmzia hre hauh lo va a piang leh tun a thlengte chu lawm a hnêkin mi dang chaldelh nan a hmang chu a ni si a! Pathianin a la vaw hniam khawp ang. 

Arini erawh bathroomah tui herh hawin a tih fo dan angin a ţap leh mêk a ni. A chunga thil rapthlak tak a thlen atang khan zan khat tê mah hi thinthia a mutthilh a la awm awm lo ve. A chang phei chu thlabar takin a harh a, a mang chhia vanga kaihharh a ni fo bawk. Khawvel hmaa phochhuaha a nihna tak chu puanzar a chak thin. Tichuan, anih nih niha thlamuang leh zalen taka awm a duh. Mahse, a pa hian a remtih loh bakah ani naupang la ni ta na nâ na chu a vau bet fo. "Kan mualpho lutuk ang e. Tin, nangmah thlengin an hmusit che ang a, khua kan hawi ngam lo vang. Kan chhungkaw him nan ngawi rih rawh" tiin a khap thin. A pa chu a tet lai atanga duattu ber a ni thin a, a nu ai mahin a ngaina thin. Mahse, khatia a chunga thil a thlen atang khan a pa chu a mi hran ta hmak a. Runluih zawng hlirin a khawsa a ni ber mai. Lehkha a thiam a, mi hausa fanu a ni bawk. Chu ringawt chuan a nun chhungril hlimna a thlen zo lo va, a ruak ngawih ngawih fo. Thian mipa hlir a nei a, a kid te an ni. A lawm loh leh duh loh zawngin an khawsa ngai lo. A duh duhnaah a tir kual thei. A chhan chu sum a ngah miau a. Ruihhlo-a a zuanluh hnuah a nu leh pa ten zilhin, han hau thin mah se, reilote chhunga a natna a theihnghilh ve theihna awm chhun chu a thlah phal lo. A nu hi chu mi nem tak leh dawih tak a ni a, a pa ang êm chuan a hau ngai lo. A pallui thei mai. A pa ber hian a vil run zel a, mahse, engahmah a ngai lem lo. A chhuak lui tho zel. 

A inbual zawhah a inthlak fel hnuin in hnuaiah a chhuak a, an monu Spi chhungten chaw an lo ei dawn a. An nulate pawh an buai viau. "Ninawm teivet" a ti hluk a. Hetiang chaw ei khawm tih luklak hi a ning thin. Miin an chim huk hukte chu a ngaithei lo. A pa Minister lai phei kha chuan an inah leng lut an nei chamchi a, a nu hi a felin a zau em zawk a. Ama lo dawnsawn tur phei chu nise a tu amah an rawn lawr nawn ngam a ring lo. An nula pakhat Thari chuan tomota leh Carrot a chan mek a, Spi chuan ding chungin a vil ran lehnghal. 

"U Thar, khawngaihin ka room khi min lo tihfelsak" Arini chuan a ti sap a. Spi nen chuan an rawn en rual ţhap. 

"Hei a laklawh hi" Spi chuan a ti hlak a. 

"I chhung ten chaw an rawn ei dawn a, nangman khangte chu siam ve rawh" a lo ti hmak. Thari pawh chuan Spi aiin Arini a hlau zawk ni ngei tur a ni. A thil chan lai chu a dah a, a kut a sil a, Arini roomah a chho nghal. A nihna takah chuan Arini roomah chuan engmah hnawk leh tihfel tur a awm hauh lo. Spi a runluih duh vang mai mai a nih hmel. Thari pawh chuan room chhung chu a phiat deuh tawp. A bak han tihfel tur a hre lo. Almira a hawng a, thawmhnaw a inthlep fel hle, a pheilhawk bawmah lah mawi zetin pheikhawk a inrem ţhât bawk. 

Spi chuan Thari chan lai chu a chan zawm a, reivak loah a rawn rak hlut, "Awiii Lalpa leh! Ka tin a tliak. Ka va ui tak. A man a to asin" a ti hluai a. 

"Ho eee, tin mai mai te chu a" Arini chuan a lo ti hlak. 

"Nangmah vang a nih reuh hi. Nang hi i nghal mah mah.. " Spi chuan zam lo zetin a rawn ti hlar a. 

Khik sak pahin, "Mama nen khuta in awm hian chaw in order zel mai mi? Nge Mama'n ei rawng a bawl" a lo ti daih. An monu intihnalh tum lutuk leh che peih lo lutuk chu a lo kham ru hle tawh a ni mahna le.. Pa ber a rawn inrawlh ta vat a. An ngawi ta rih. Mahse, an chhungril indona chu a la inţan dawn chauh a nih hmel. 

"Rini, chhuak suh aw. Kim thap tur ania. Zanin tlai chu" A rooma a chho tur a pa chuan a rawn ti a. A ding dat., "Kan monu thatchhe deuh nu leh pa vang mai maiin kan party ka thulh lo vang. In awm alawm. Kei chu awm ve lo angah min lo ngai mai ru" a ti lang lang a. A û Mama'n, "Arin" a ti hrãwk. 

"Model kher kher te ti nge i neih? Kha nu kha i pasal nge i nupui" a la ti zui. Auh hman tawh lovin a roomah a lut daih. 

Spi chu an hnem laih laih a, "Ani hi chu kan duat sual zo a nih ber hi. A tawngkam te lah hi tu te atanga a zir chhuah nge mawni le.. A ngaihna tak pawh hi ka hre lo ve a" A pa chuan a ti bawrh bawrh a. A chhan dik tak erawh a hre kur si! 

'Hey, lal Judy, i ex ka hmu anua aw " a thiannu Lateii, Singapore-a hnathawk reng reng chuan a rawn ti a. 

"Tu ka ex ber? " khi sak chungin a reply. Lateii chuan pic a rawn thawn nghal a. Judy chu a phu zuk. Amah ngei a ni. Ni e, Kum 7 liamtaah khan ani nen hian khawvel an lo hmachhawn dun thin a, engkimah an intawiawm thin. An chhungte pawn an hriatpui vek. Khatih lai kha chuan Judy pawh a la naupang a, chuti lutukin an inzui chhuak tam lo. Mahse, hun remchang erawh an nei ve fo a. Chutah chuan insum zo lo vin sex an hmang ta hial anih kha. Vawi eng emaw zat an hman hnuah nau a pai tih an hre chhuak ta a. An va mangang dun em. A bialpa lah zirlai ve tho niin, Inneih em chu an ngam si lo. Chutah a bialpa chuan a pa pawisa ruin, a nau pai chu titla turin a ti ta a nih kha. Judy dinhmun kha a chhe ve bawk a, an veng chhungah fak hlawh ve pawl niin Kohhranah nise naupangte ni chungin a langsar pawl a ni thei. A nu leh pa ten an chhuang ve em em bawk. Chutih lai kara sawn han pai kha a ngam ngang lo a ni. Tichuan, tuma hriatpui lohin a nau pai chu a titla ta a. A duhthlanna mah nise, kha khan a damchhung a nghawng ta a ni. A chhungrilah hlauhthawnnain a tuam reng a, a thuruk chu tu emawin a hria ang tih hlau reng rengin a awm thin. Nau a paih atang khan an ni pahnih inzawmna pawh chu a dal ta tial tial a. An inkhikkhak fo a, thikthu bakah an huatthu a chhe dun telh telh. A tawpah phei chuan a bialpa chuan mi dang a kawpsan ta hial a! Judy rilru na lutuk chuan hruihrual a hum hman ţhelh a ni. A tuar em em a, khati khawp khan an inzui rei a, a fa hial a pai a, chutianga a phatsan leh thei mai chu rin harsa a ti a ni. A bialpa lah chuan a rawn ngaihven eih lo. Chu ber chu tawrh harsa a ti zual. Thla hnih thum kha chu a mumal lo chho ta reng a. A chhungte pawn an pui nasa, an hrethiam bawk. Mahse, hun hi a hlu a, a kal a kal a. Judy pawn a sual chhuak ve ta hram. A bialpa kha a hmangaih hmasak ber leh a virgin hawngtu a ni bawk a, a hrereng lo anih pawhin a theihnghilh ngai lo thung. Tunah Singapore-ah a thiante nen Restaurant changkang ve tawk tak siamin Mizoramah a rawn haw ngai ta meuh lo va. Nupui a nei tawh em tih pawh engmah a hre lem lo. A chanchin chu a ngaihven duh lo ve tawp. Ruatfela a tawng a, he pa lakah hian a luangliam hneh viau. A dam thlup te, a tawng tam lo te leh a zei hluak lo te chu a duhna pakhat an ni a. Hna sang thawk lo mah se, a rinawm a, a nghet tih a hria. Pasala neih ngei pawh a tum ruh hle. Mahse, zanin erawh Lateii vangin a hun kal tawh a chhuilet lo thei lo va, a bialpa hmasa Dinpuia chu a ngai thar leh viau. A hma ai khan a lo hmelthain a inphutmawi bawk si. A haw thin taknaa a hmangaihna a la chak zawk tho mai. Hmangaihna zet hi chu aw.. 

"Nu, Class Xii ka pass chuan in intiam ang khan phone chu min leisak ngei ngei ang che u" Mampuii chuan a ti mawlh mawlh a. A nu chuan, "Tehreng mai. I awh ber ka lei ang che" a lo ti vat. Chaw ei an siam dawn hnai a, a naute a ko lang lang. A pa erawh khaw nge a kal an hre lo. A rawn haw ve mai ang chu maw. Chaw an ei lai chuan a pa chu a rawn haw ta ngei a. Mahse, zu rim a rawn nam ta tlat! Amah lah chu a inthlahrun hmel hle lehnghal. Bathroomah lutin a insil thuak thuak a, chaw chu a rawn kil ve. A fate awm laia hauh chu nu ber chuan a hreh deuh nge engmah a sawi lem lo. Mahse, an chaw ei khamah roomah a ko lut a, "Engtizia nge zu i in a? " a ti ta a. 

Ruatfela pa chu a ngawi veng veng. An nuin a zawh sek avang chuan, "Ka hah ve deuh sia, thianten in ve rawh an ti tlat a. Ka'n lem ve lawk anih kha" a ti ta a. An nu chuan, "Thlen nawn tir tawh suh. Naupangho pawn mak an tih em kha" ngenngawl zet hian a ti a. 

"Umm.. A thleng nawn tawh lo vang" a ti sup a. An inhau zui lem lo. 

Ruatfela school bang, Pu Ramtea'n peng kawi tura a tih vanga a peng chu a la hmuh ngai lo pa pakhat hi a lo thu ve a. Pu Ramtea chuan, "Arini pa a nih hi. " tiin a hming a sawi a. Ruatfela chuan a minister lai khan a hmu tawh tak tih a hre leh hnuhnawh. Chupa chuan nelawm takin, "Arini a rawn kal em? " a ti a. 

"Kal lo vawiin chu" Ruatfela chuan a ti a

Arini pa chu a chek hluk, "A mak thin teh e. Ka fanu ve hi zawng. Tihngaihna a awm lo a nih hi" a ti ta mai a. 

Pu Ramtea chuan, "E lungngai renh reng suh. Hei Ruatfela te ho hi an fel a, a pass em em ang. Attendence lam kha chu lo lungkham suh" a lo ti thluam a. Arini pa pawi sawi chu a hlauh hmel angreng. 

Pu Ramtea chuan pawisa a chhiar zut zut a, "Hei i hlawh a. Hostel erawh kuminah kan chhunzawm tawh rih lo vang. A chhung chiah khawih a ngai tawh bawk a" tiin Ruatfela chu a pe ta a. A rin aia hmaa hlawh an lak vang chuan Ruatfela chu a lawm kher mai. "Ka va lawm ve aw" a ti reng bawk a. Pu Thanga (Arini pa) chuan a wallet phawrhin Rs 500 tlang pali a zuk sik chhuak va a, Ruatfela chu pe vein, "Zirtirtu ni chunga i inhlawhfa hi i ngaihsanawm em mai. Kha hei hian ka lo tanpui ve ang che" a ti a. Ruatfela chuan a ngaihna a hre lo kher mai, lak mai pawh a hreh a. Pu Ramtea chuan, "La tawp rawh. I vannei kher mai" a lo ti sek sek si. Zep loh chuan Mampuii exam form fill upna tur an rawn chah a, a pain hlawh a lak theih rih loh vangin, pawisa chu a mamawh viau. Hreh zetin a la ta nge nge a, "Ka lawm e" a ti sup a. 

A chhuak tur chu Pu Ramtea'n rawn thlahin a hnunga beng thak thak chungin, "Arini attendence lo check la, min lo thawn ta che. Naktukah" a ti zawi sap a. Ngaihthat lohna pawh nei lem loin Ruatfela chu a lo bu nghut. Hlim leh pheikhai zang takin a in lam a pan ta thoh thoh a. 

Mami'n, "U Ruat, anu te an zin thut sia, ka u lah a lo haw har leh awm si, Zanin chu chaw lo ei la, riak nghal bawk la" a lo ti a. Eirawngbawl chawp ai chuan tiin, "Aw le" a lo ti a. A inbual fai zawhah in chungah chuan a han chho va. Mami chuan arsa a lo fry mek. An ni hi chu sa hmeh loh lai an nei vak lo, an rawn suah zeuh zeuh bawk. Amah a inthlahrun vang hian ka lei ve tih chang pawh a ngah. 

A phone a khawih vel mai mai, whatsapp-a a luh chuan, Arini msg a lo awm nawlh mai. 

"Sir, attendence-ah khan min lo titla ang che u. Ka exam peih lo" tih thu hi. A va mak e aw. He nu hi. 

"I tlin miau te chuan keini tihtlak ngawt theih i ni lo. Selection i paltlang phei chuan" a va ti a. A online loh vangin a seen rih lo. Judy msg pawh a lo awm leh hman, "Zanin chu ka thiannu a lo haw a, an inah ka va riak ve ange" tih hi. 

"Aw le" a ti leh tawp. Han biak lumlam vak dan hi a hre ngang lo a ni e. 

Khaw thim thet thetah chaw chu an ei a. An ei laiin Mami chu a û in a lo call, "Hei ka thianpa pum a na thut a, Damdawiinah ka kalpui dawn a. Ka riahpui nghal ang. Ruatfela kha riakah lo sawm mai rawh" a rawn ti! He pa chet hoh theihzia hi chu aw. Mami chuan, "A thianpa pum a nat tak tak pawh ka ring lo e a. A chhuanlam mai mai a niang" a ti hlak hlak a. Rin aiin chaw an ei hnem dun phian. Eikhamah tv te an en leh tawp. An en mang lo, an phone an kheuh dun ve ve. Dar 9 rik hma deuhin Mami chu a rawn thu chhuak hlawl a, "Ehe.. Ka theihnghilh" tih leh rooma luh a rual nghal. Mami hi a khal viau a, a hmel tak hi chu tha tia sawi chûk tur a awm lem lo. Amah hi a lerh chi a ni lo bawk a, a luck vak pawn a hriat loh. Nuih a heh em em ringawt. Ruatfela pawn an chhungkuaah a nel hmasak ber a ni. 

Whisky um khat hi a rawn chhuahpui nawlh mai. Ruatfela a meng phawk nasa. Kawngka chu a va kalh sauh sauh a. 

"Vawiinah ka thiannu Lalnuni te an lo leng a, an nei nual a, 500 lekin ka leisak a. A zia tak tak. Ka period dawn sia, ka mamawh tawp.. In ang aw" a ti sur sur a. Zu a in ve thin tih Ruatfela chuan a hre lo hrim hrim. Mahse, tun lai hmeichhia chu a remchan chuan lem ve thei mai hi an tam tawh khawp a. A mak vak lo ve. Ani Ruatfela lah zu a in khât ta deuh a, whisky ngat phei chu a piantirh atangin vawi li chiah a la in. A to si a, an in phak tawk local a ni deuh mai. A hnathawhna taksa rawl a la reh fel chiah lo bawk a. Pawi a ti vak lo. Mami chuan arsa fry kha a va tilum leh sar sar a, bowl-ah dahin a rawn phei leh. No a va la a. A thli ta kerh kerh a. Ruatfela pawn a no khatna chu a lo thawk khat piap a. Tui a ti hran lo. A ner nâwng mai. Mami erawh zu heh tur an sawi ang deuhin tlak ve pup pup lovin a lem sek sek chauh. A titi suam suam bawk. An pahnih chuan an hlim dun ve khawp mai. 

"Judy nen in la tha maw? " Mami chuan sehchilh deuh hian a ti a. 

"Tha a ni mai" a lo ti hmuk. 

"Ka hmuh dan mai mai chuan Judy hi i duh vak loin ka hria" a ti leh a. 

"Duh lohna a awm lo" a lo ti leh. Thudang an sawi zui ta daih a. Zan a rei ta, an kai viau mai. Ruatfela phei chu in ţhang lo tih takah a pai khat khat mai. An han innuih leh rih. Mut an tintuah ta a. An tlangval roomah a mu dawn a ni. A taksain khum a deh rualin a muhil nghal. Mumang maksa zet a nei lehnghal a. Arini nen Arini roomah an lo riak dun a, an lo inkhawih tawn nasa mai. Mahse, a bak a hre zawm vak lo, a chiang lo ruai vek. 

Zinga a harh chuan a lu na tluk tluk chuan a tiner sak. A inbengkang a, thawh an tum chuan mak ti lutukin a meng phawk hrû mai. 

A bulah chuan Mami a lo mu ve reng nia! Eng nge thleng a hre hauh lo mai. A mumang te a ngaihtuah let a, a chal a dawm vung vung. Ni mai mai teh se tiin a tho ta daih. A va inphihfai a. School kal a ngai si, a va phur lo ber tak em.. "Zu ka in leh tawh lo vang" a ti bal bal a. Chawhmeh thing chu tilumin chaw thing chu a chhuang lum bawk a. A ei sawk sawk a, a inah chhukin a intleuh thuak thuak a. School kal turin a chhuak ta nghal. A pheikhai a rit lûk mai. A luakte a chhuah bakah a la kai chhuin a inhria. Whisky hi zawng hetah in la, sawtah va rui rawh tih ang kha a ni ve bawk. Mami chungchang erawh ngaihtuah loh luih hram hram a tum. 

Pu Ramtea chah ang khan Arini attendence chu a la a, a tla! Pu Ramtea a thawn ta nghal bawk. Amah Arini kha chuan tlak kha a duh mai siah. A pa lahin exam tir ngei a tum hmel si. Engtin lek chuan an awm dawn ni. 

Selection test ami tur question an set sap sap hlawm a. Ruatfela chuan awl tê a set. A chhan chu kum tluanin an zir a, an tlak loh kha a duhthusam a ni miau. Tling vek se a duh takzet a ni. Arini pawh school a rawn kal ve mial a! A ngui kher mai. A zia chuan a hma a pha lo ti mai ang, a ngui leh chauh hmel lutuk chu hmuh a nuam lem lo. 

An ban chuan zuitu a nei tih hriain a hawi let a. Arini a lo ni. 

"Ti nge"a ti ringawt a. 

"Ka tla em? " a ti nghat. 

"Aw" a ti bul hmuk a. Arini chu a khi ta sak. 

"Mahse, i exam theih tho ka ring" a ti a. 

"A teuh lo. Ka hmel in hmu leh tawh lo vang" tiin a lo kalna lamah a let leh daih. Ruatfela chuan a thlir zui vang vang a. 

"Mi mak tak chu i ni e" a ti sup. 

(Ka lu na a la reh thei lo reng reng. Ka khuate a tisik a. A hrehawm viau.