A tel. lovin 3

A TEL LOVIN… (Chapter - 3)

Ziaktu : Toni Râlte

Arini râlna pawisa chu Rs 2000 lai a lo ni! Ruatfela chuan zahthlak a tiin, nuam lo a ti angreng hle. He nau hi eng emaw tak zawng a ni e. Sum an nei bawk a, a ren lo hle bawk a nih hmel. Zanah msg -in, "Min râlna kha a tam si a, ka lawm e aw" a va ti a. 

Dar 9 dawnah a seen chauh, "A ho em mai. " a rawn ti. 

"Lehkha i zir em? " tiin a be leh a. 

"Zir ve e. " a rawn ti leh tawp. Biak zui ngaihna a hre tawh si lo, "Muttui le" a ti a. Ani pawn a dah ve nghal. Judy nen ni ang deuhin an awm tawh a. Mahse, a vei em em lo. Mahse, fel chu a ti. Han biak lumlam vak dan a hre si lo va, Judy zawk hian sawi tur a hre zawk thin. 

Arini school kal tur chu a pain a lo ko ding chat a. 

"Nizanah khawiah nge i chhuah? " a ti rum ûl a. 

A pa melh zawkin, "A ngaiah" a ti liam puat! A pa chu rawn kal hnaiin, "Hmeichhia i nih hi inhre rawh. Hmeichhe awmin awm bawk ang che" a ti tûn tûn a. 

"Mipa ka ni lo hi lawm hle rawh" a lo ti sak. Engahmah ngai lo niawm takin kawngka lam a pan nghal. A nu a rawn chhuk ve mek, "Eng nge ni leh ta? " a tih ri chu a hre hman. A pa chhanna erawh a hre tawh lo. A scooty chabi a pain a laksak daih vangin driverin a thlah a ngaih hmel. Ngawi rengin an va inhruai a. School thlen dawnah, "Vawiinah i u Mama a lo haw dawn sia, hlim hmel pu ve deuh la" Driver Zela chuan a ti a. An innel bakah an driver hlun, dam thluam, an chhungkaw zing ami ang a ni tawh a. An mizia pawh a hre hnehsawh hle tawh a ni. 

"Hun a la tam alawm" a lo ti hmuk. Zela chuan engmah a sawi tawh lo. Arini zia hre chiangtu te zing ami a ni ve a, luhlulzia leh a suahsual theihzia pawh a hre ve. Arini pa hi a khawngaih ru hle thin. Mi ngaihah chuan chhungkaw hausa leh awhawm an ni, Kohhran leh khawtlangah an langsarin a pa donate sum pawn sawi a hlawh hle thin. Mahse, a chhunga chengte erawh an hlim vek si lo. Chung zinga pakhat chu Arini hi a ni. Sawi tawh ang khan a pa hi ex Minister niin, a minister lai chuan Food& suppy department a chang a, hminghliauna a nei lem lo, sawi ruk chu awm mah se; a finfiahna nei ta lo nafam chu tuman an sawi zui ta lem lo a niawm e. 

Arini te hi unau pathum niin, Arini hi an naupangber a ni. Nau a pai thei tawh dawn lo emaw tih hnua piang a ni a, a û chiah Rinhluzuala (Mama tia koh) nen hian kum 12-in an inthlau reng a ni. An upa ber Nancy chu engtik kum emaw khan Chapchar kut miss a lo ni ve hial tawh a, mahse, miss a nih atanga kum khat lekah Vai sumdawng hausa zet nen an innei ta mai a! Mi sawi a hlawhin social media lamah pawh sawizui a hlawh nasa ngiang mai. Chapchar kut miss te kha lo ni kher lo nise; a tu khaw khain an sawi zui kher lo maithei. A pasal hi Mizoram lamah a rawn inbun ta bawk a, an colony-ah tho an rawn awm ve a ni. Fa pawh pahnih an nei tawh. Mama erawh Engineer line zawhin a inzir puitlin hnu lawkah Delhi-ah hna tha tak a hmu zui a. A hna hmuh atanga thla 5naah nupui a ru a, a nupui pawh model lar ve thin tak Spi a ni nghe nghe. An han insawi rem a, inneihna hautak leh ropui zet an buatsaih a. Spi pawh thla hnih vel chu Mama chhungte bulah chuan a han awm ve ren rawn a. Mahse, ani pawh Delhi-ah hna a neih ve tho vangin a chhuk zui ve ta nghal a. An nupain in an luah dun ta a ni. Fa an la nei lo thung. 

Arini hi an mal khalh deuh ta ngâwk a. High school thleng boarding schoolah dahin, Higher erawh a hunlaia school thaa an sawiah an kaltir a. Hostel-a awm reng, khuahkhirhna hnuaia kun reng a han zalen takah chuan a buai chho ta chiah rêng a. An school atanga hnawhchhuah a ni ta hial a ni. Mize nû zèm a ni lo va, a hmel pawh tha em em tia sawi theih a ni lo. An neihin a tlin a, incheina leh eng ilo a nei a, a hmuh mawi theih a ni mai. Nancy nen chuan an inang tehchiam lo. Mahse, Arini mize pui lutuk hi tuman an hrethiam ngai lo. A pa chauh lo chuan… a nu takngial pawn a hrethiam lo va, a manganpui thin khawp mai. 

Awmpui an ngah a, guard nen lam. Engkim chu a changkang thei ang bera buatsaih a ni thin. Mahse, Arini chuan chutiang chu engah teh vak a ngai lo. Chutihrualin an awmpui te tan a tawhkhirh em em a, a pawi sawi a hlauhawm tawp. An driver pakhat zawk pawh ama thua ban ngam leh a û te nau awmtu pawh banga nawrbeta reh hlum tum ngam kha a ni ve a. A mood hi a che reng a, a hlim emaw tih laiin a lo thinrim em em a, a lungngai emaw tih laiin over khawpin a hlim leh thin bawk si. An awmpui bang ta phei chuan, "Mi anglo a ni. An haus em a, an hliahkhuh thei mai mai alawm. Ramhuai anih saw" a ti hmiah. Chutiang mizia chu engtia a zirchhuaha a neih nge ni ta ang le… 

School a thleng a, an lo ri leh mam mam. Thian a nei lo bawk a, amahin a kal leh chhat chhat. An class hmeichheho hian an mil lo deuh vek. A chapo lutuk chu an tuar thei lo a ni ber ang. Mahse, an ni aiin lehkha a thiam thung si! A zir ve ngai pawh hian a lang si lo. 

Ruatfela pawh Arini te class-ah lutin lecture a pe leh mawlh mawlh a. Arini chu a va melh leh zauh thin bawk. Ani lah chuan khaw dang hawi lek lo vin a lo melh kiau zel a! A tilai lek lek. 

"Assignment ka pe ang che u"a chhuah hma chuan a ti a. 

"Sir, test zawk ang u. Assignment chu a ninawm" Arini aw a ni. Mi dangho chu an phun sap sap. 

"Test pawh karlehah kan nei dawn tho alawm. Tunah chuan Assignment zawk aw" Ruatfela chuan a ti a. 

An class mipa harh ve tak, Rammuana chuan, "Inla thiam over ang kha" a lo ti hlawl! Arini a sawina a ni tih tuman an hai lo. An nui deuh ţhâw hlawm a. Arini lah diau leh hek lo, "Harh chiah thiam ang kha" a lo ti ve sak. An boruak a dik leh dawn lo va hriain Ruatfela chu a inrawlh ta vat a. Assignment a pek zawhah a chhuak nghal. 

"Harh chiah ka thiam leh thiam loh test ila, mi dang ang kha chuan min ngai ve duh suh" Rammuana chu a ding a. 

"Lehkhathiam lo rapthlak si, eng nge i thiam ve dang? " Arini chuan a lo ti hmiah. 

Rammuana a kal phei, a thianpain a lo chelh a, a chelh hneh lo. A nihna dik takah chuan mipa lam pawh hian an ei loh ruk tlat vangin hmeh mih an tum a ni ber. Arini thu lai chu a va kek tho lawp, a rak eih lo. A sama kek chung chuan a biangah a hnek ta a. A thu hnawk. A mitah mittui chambang a awm lo. A ner sak a, "Ve thit thet che chuan aw.. School banah ti ila" Arini aw chu a chang kher mai.

"Nang hmeichhia hi maw pathian i ni lo. Tuman engahmah kan ngai lo che. Mipa te hi chu min cho duh suh" Rammuana awki chu a ring hle. 

A lo nui hak hak a, "I vaupung chu a na ve hle mai maw.. Ka hlau ikhaw lo che. Min that hial mah la, ka tlawm chuang lo vang" a ti ve fak! An inchhan leh hmain Madam Pari a lo lut ta hlauh a. Mahse, kut thlawn ba duh ngai lo Arini chu engtin emaw tak a chet ngei a rinawm. 

"Zanin chu i lo kal ngei ngei a ngai aw. Ka nau pass kan lawm dawn ka tih kha" Judy chuan a ti sar sar a. Ruatfela chuan phur vak lo hian, "I nau nen kan inthian ve bawk si lo" a lo ti a. Judy a nui har har, "Kei a u bialpa i nia.. Eng nge thil dang la ngai" a lo ti. Ruatfela a ìp deuh. Banah Judy chuan an in lamah tihtur a neih vangin an veng lam panin an inphur phei ta a. Naupangho pawn an hmu. 

"Hmeichhe khalhah te a chuang a. Tuai ze zaw lutuk" Ti saptu chu Arini a ni. Mahse, a tawng ri hre phak an awm lo thung. 

Zanah chuan Ruatfela chuan a thawmhnaw mawihnai leh changkang ve deuh nia a hriat chu a inbel mawlh mawlh a, a rilruin, "Ka va peih tehchiam lo tak.. A nuam lo ve tho bawk sia" a ti mawlh mawlh mai. Judy chhungte hi an fel em em naa lirthei neih ve loh nen va len hi a peih tehchiam lo. Bakah Judy bula a awmrei chuan a ning zel. A ţawng reng leh ama chanchin a sawi zing lutuk thin hi ngaiah a nei thei meuh lo. Mahse, a nau boralna chungchanga a buaipuizia kha a theihnghilh bik lo va, ba rulhna ang deuhah a ngai ni fahmiang, Judy sawi angin a awm ve ta fo mai chu a nia. 

Sawi tawh angin lirthei a neih loh vangin Judy chuan a nau Eric-a a rawn hruaitir a. Inbe mang lovin an thleng phei. Erica chu a tawngtam loh bakah zakzum chi a nia. Tumah a be hmasa ngam meuh lo. Ruatfela lahin sawi tur a lo hre em em bik lo nen. Judy chuan a lo welcome vat, mi dang pawh an lo awm nual tawh a. Thuthmun chu a han rem ve a. Tumah a hmelhriat an awm lo. Judy lah chu choka lamah a kal daih bawk si. 

A ep chiaha thu mipa amah aia naupan hmel hlek tur, sam kir chuat chuan, "Thianpa, khawi vengah nge in awm? " a rawn ti nawlh a. Ruatfela chuan tha takin a lo chhang. 

"Ka zawhna chhan che chu Kuri thiante zingah i tel ve awm ka hre si lo va, Judy thianpa i ni maw? " a ti leh a. 

"Umm ni e" a lo ti leh mai. 

"Judy lah hi a duh duh a lo sawm ve ngawt zel a. A programme pawh a ni mang si lo" Ruatfela hriat theih tur si, zawi deuh sup hian a ti nuah nuah a. Ruatfela tan chuan a nuam lo ngei mai. Judy leh Kuri te chu choka atangin an rawn inzui phei a. Ruatfela hmaah chuan dingin, "Hei Ruatfela chu, Ruat, hei hi Kuri chu aw.. " tiin a inhmelhrittir a. Kuri chuan nui sâng chungin a chibai. A fel hmel reuh hle. 

"Chuan, Thenzawl maw in khua" tih pahin Ruatfela bulah chuan a thu tharh a. Judy erawh roomah a lut. 

"Aw ni e, i lo zin tawh em? " Ruafela chuan a lo ti var. 

"Zin ti ila, Lunglei kan kala kan tlan pelh kha a ni deuh mai. A nawm hmel e" a ti a.

"Nuam ve reng mai. I lo la zin dawn nia" a lo ti ve mai a. A epa thu samkira bawk chuan, "Ee.. Thingtlang lam ho hi Aizawla rawn awm hi in tam ve tawh ngawt mai" a lo ti leh phar phar a. A ţawng mei nei zet chu mi dang pawh chuan an hrethiam, thil dang an lo sawi vat a. Mahse, a rui deuh nge "Thenzawlah chuan hriat ka nei ve tak.. Siami a nia. Kan awmpui hlui" a ti leh deuh ngat. Ruatfela chuan chhan enah pawh a en lem lo. Judy a lo lang ta bawk a. Judy pain zo ar ngei mai panga lai a rawn lei haw a, chu chu an hem hmin dawn a ni. Pass lawm tihah thiantha zual bak a sawm lem lo. Judy nen choka lamah an awm ta daih. A nu leh pate pawh chuan an be ve suam suam a. Amah Ruatfela hi a mizia a dam ruih bawk nen, a tawng pawh a rang lem lo. Judy pa nen chuan an inang hle, chungte chu an swi a, an nui an nui mai. Eitur an peih fel hnuah hunserh tawite, Judy pain a hmang a. Samkira inla polite lah chuan a ţawngţai laiin ring zet zetin Amen a lo pe deuh sek. Eitur an han sem ta a, "Thenzawl tlangval ngei khan min sem teh se" Samkira chuan a ti lung lung a, engvanga Ruatfela chu hmu mawh riau nge maw a nih dawn ni. Kuri chuan, "U Jo, i mawl em mai, ka u bialpa a nih saw" a ti ta hmiah a. Ngawih zui a hnekin, "Judy'in a duh a maw? Huh.. A va duh tuihnai lo ve" a ti leh phur phur. A bula thu a thianpa niawm tak chuan, "Ngawi tawh teh. A ninawm ţèp" a lo ti hluk. An lo kal hmain zu a lo in ngei a, chumi rui lungpuam, chapo kual vel lek chu a lo ni. Anihna takah chuan Judy hi a duh ruk ve vang a ni pakhat. Kuri te nen hian an inkawm lutuk bik lo, mahse, an inah hian a ngampa ve a, an in hrik a ni ve thin. Chuvanga han pawr ngam te pawh a ni ve mahna. 

A thianpa lo khaptu chu melh rum pahin, "A va khanglang a che. Local in ho kha chu ngawi ngam ang u" a ti pawr huar a. A ţawng ring bawk a, choka lamah pawh a tawng chu an hre pha. Judy nu chuan zawi sapin, "Kan Jojoa chu a va tha leh tawh awm ve" a ti sap a. Judy a lo nui ringawt. Ruatfela erawh chu a awm a nuam chiah lo. Zep lohah chuan Jo an tih mai chu ţham deuh nawk a chak ve reng. Mahni tawkah tuman inhmuhsit kan duh ngai lo. Chapona zawn kan nei vek mai. 

"Zanina i whisky in chu i va che na leh ve aw" Kuri bialpa Asawma chuan a lo ti zawi sup. A bulhnaia awm ho an khi ţhaw a. 

"Whisky in phak loh vang mai a" Jo chu a dang duh der lo. Kuri chuan, "In ninawm. Ei zo ula, in chung zawlah han zai ang u" a ti hluai a. An boruak chu a nin zawng tak a ni. Nula fing fel tak a ni reuh a, Judy ai mahin a luck zawk. Ruatfela pawn Judy ai chuan hmel tha a ti. 

Hawn lam a hnaih chho a, thlah a duh tawh bik lo. Penkawina tur ka nei sia tiin chhuanlam a siam a. A inthlahrun vang leh a tlawmlak vang a ni pakhat. Amah chuan dar 10 a ri dawn hnai tihin a haw ve ta a. Khawpui a ni bawk a, veivak an la awm ve nak nak, veng thenkhat erawh a reh ţan thung. An veng a thleng dawn hnai tihin chak zet hian bike a rawn tlan a, an pel fel chiah tihin an tlu ţhuai mai. Ruatfela pawh a phu chiang kher mai. A let leh vat a, kawng laia let reng te chu va panin, "Thiante u, in tha em? " tiin a pui sawk sawk a. Mipa pahnih an ni a. An la naupan hmel angreng. Bike chu a tung ding a, mipa te pawh chu thei leh thei loin an rawn tho va, mahse, a hnunga chuang zawk chu a thu leh hnawk. A ţhen chak chak a, "Ka ke hi" a ti ţuau mai. Ruatfela chuan a pan vat a, a ke ding lam chu a zuk khawih, a lo kawi ngâwk mai. A tliak tih a chiang viau. A khalhtu zawk erawh a kut phah pahnih a thi zur zur a, thler duai mai. An lu lama hliam an tuar lo chu vannei tak an ni. A sarhu lai a ni bawk a, na dang sawi tur an la hre lem lo. A tukah erawh an silawng ve khawp ang le. Khati khawpa tlan chak si an thi lo chu lawmthu sawi ngawih ngawih tur an ni. Ruatfela'n a kuah thawh lai chuan bike pahnih hi an bulah chuan a rawn ding ve dat a. Thil awmzia chu an rawn hre ve nghal aniang, an rawn chhuk vat a. Ruatfela chu an pui nghal. Hmeichhe lo ţawng ri a hriat chuan Ruatfela a ding chawt. "Chak taka tlan kher a ngai lo asin" titu chu Arini ngei a ni. Amah chiah hmeichhia a awm! 

A khalhtu zawk chuan aw khur dat dat hian, "Nia, ka lo kai ve deuh a" a lo ti mai a. Ani pawh a kut chu a scarf-in an tuam ringawt. 

"Engtin nge niang? Ani hi Damdawiin panpui a ngai si a. A ke hi a tliak sia" Ruatfela chuan a ti a. Zawh bik pawh a nei hran lo. Arini chuan a rawn hmu chiang chiah, a phu ve deuh zawk. Mahse, a inthunun vat. 

"Ni e, Sammy, saw lai taxi saw va bia la" tiin a bula ding chu a melh a. Sammy chu a kal nghal, taxi a lo awm remchang hlauh a, an phur chhuak ta nghal. A na a tiin a ţap pur tawh bawk si a. An thian pahnih ten an chuanpui a. Arini te erawh an la khaw tlai a, "Ka kalsan mai ang che u aw. Eng em a ti lo vang" Ruatfela chuan a ti a. Bike khalhtu khan, "Ee.. Aw le.. Kan lawm lutuk, min lo pui hlauh a,kan lawm takzet ania" a rawn ti a. A kut chu na a ti deuh aniang, a then leh chak chak thin. Ruatfela chu a kal ta nghal a. Arini chu biak a tum lem lo a nih hmel. A kal liam hnuah Arini chuan an tlukna bike chu khalhin, Kut thi hnuang chu a phur a, ani pawh damdawiin panpui tho a ngaih hmel e. 

Ruatfela chuan a ngaihtuah neuh neuh, chiang takin zaninah khan Arini kha a rui hle tih a hre thei. A la naupang si a, khatianga mipa hlang bula a rui ngam mai kha mak a tiin ngaihtuahawm hlein a hria. Eng mah tihtheih lah chu a nei si lo. In a thlena a mut thleng pawn a la ngaihtuah, a insum thei ta ngang lo va, "Eng nge in chanchin" tiin a va text ta nge nge a. 

"Kan tha e. Chuan, hei hi hria ang che. Kha lai hmun kha school a ni lo ania" a ze pakhat zawk a lang leh tih Ruatfela chuan a hai lo. A biak zawm duh ta lo va. Judy nen an inmang tha hnuah mutthilh tumin a chhing ta vang vang a. 

A tukah pawh Arini chu a rawn kal ta lo reng a. Ruatfela chuan a hrethiam vek. An va tlaivar hial te pawh a ni mahna le.. Class a la tui meuh lo. Chawhnu lamah ruah a sur chiam a. An ban hma phah. Nihliap a lo keng mai si lo, a nghak ta reng a, Judy pawh chuti tho. Tlema a han deuh hnuah Judy nen chuan a in lam panin an inkhalh haw dun a. Rawn len a tum tlat si a, hnar chi ni nghal lo chuan.. Judy chu towel a pe a, a kawr te chu a hnawm vek vangin a tshirt a va laksak. A lo la ve mai. Thingpui a va lum a, "Chaw ei ve ta mai che" a ti fiamthu a

"A pawi hleinem" a lo ti fel êt. Ruatfela a hrilhhai letling. 

Chawhmeh a nei vak bawk si lo, Judy lah chuan, "Engmah a ngai lo. Alu leh dal a awm chuan a tawk" a lo ti mai si a. Engle khaw le ei ve ta poh se a ni mai. 

"Ruat, i rilru hi ka hrethiam lo fo. Ti nge ka lakah hian rilru i pe tak tak thei lo mi? Mi dang i neih awm ka hre bawk si lo" Eirawng an bawl lai chuan Judy chuan a ti niah niah a. Ruatfela chuan chhan ngaihna a hre lo kher mai. 

"Pek loh pawh a awm mi? A la tantir em a, bakah ka zei lo a" a ti ringawt. Judy rilru hliam chu a hreh ve tlat tawh. 

"Naupangchhia kan ni tawh lo va, engkim chu sawi tlang pawp tur" a lo ti leh a. 

"Ka sawi tlang reng alawm" a ti ringawt. Hlim tak chuan chaw chu an ei dun ve tho mai. Judy hi a fel reuh em a, Ruatfela a lo duh ve takzet bawk nen.. Mahse, inngaizawng pangngai ang chuan an la inpawh tak tak lo. Amah Ruatfela buaina a ni. 

Arini erawh a inbual sar sar a. Zan lama thil thleng kha a hrechhuak. An thiante Lawma leh Muanpuia te accident, an sir Ruatfela ber kherin a lo buaipui kha mak a ti ve hle. Tlem chuan nuam lo tihna a nei. A ruihzia lah kha a hre chiang dawn ropui si! A inbual zo va, cream te inhnawiha a inthlak fel hnuah in hnuai lamah a chhuk a. A pain chanchinbu a lo chhiar mek. A tarmit phen atang chuan a rawn melh kawr tih a hmu reng. A nu erawh a chhuak a ni maithei. 

"Engvang berin maw school i kal loh? " a pa chuan a ti ta ngei a. 

"Ka peih lo va" a ti nghat. A pa a sosan hmain a u mama te nupa bazar haw an lo thleng. An ni lo hawn avang hian an in chhung boruak chu a ziaawm deuh. Mahse, eng emaw a awm tho. Spi leh Arini hi inbah fek fek an nei reng. Arini hi zawng a sual lu deuh a ni. 

"Naute, kha i ta tur" Mama chuan T shirt sen duk nalh zet hi a rawn phawrh a. 

"Ka van lawm" tih pahin a lo ban vat. A u chu a nuih sâng a. 

Spi chuan, "Pa, vawiin tlai chu ka nuteii a lo haw a, chaw kan va ei phei dawn nia aw" a ti sar sar a. 

Arini chuan fridge hawn pahin, "Nimin piahah in lo thleng a, zanriah vawikhatmah kan la eiho lo.. Ka chutite.. Ka chumi khami i ti reng a" a naupan ngaihtuaha puitling hian a lo ti fak! Spi chuan, " Aw a ngai anih hi.. Kan la cham dawn alawm" a lo ti ve leh sak. 

"Va ei rawh u. I nuteii chu eng nge a an reng reng" Arini pa chuan a ti a. 

"A zia chu an tia, chemo chu vawi khat bak khai a ngai tawh lo " Spi chuan a lo ti zang vah a. An room lam panin an kal nghal. 

"Saw putar lah sawn a lo support ziah a. " dwhkana thu chung chuan Arini chuan a ti zawi sap. Chhangthawpah butter tatin thingpui nen a ei a. A pa tui in tur chuan, "Chhuah te kha i lo tum leh a nge.. Ka remti hlek lo ania" a ti nghal. 

A ner sak a, "Muanpuia ka kan dawn" a ti sap. 

"I duh leh naktukah i kan dawn nia. Zan chhuah ka remti tawh lo" a lo ti hmuk a. 

"Kan hria ang chu" a lo ti salh. Tumruh zetin a kut a hum ruh a. A pa chu rum zetin a melh bawk. 

Engvanga hemi te pafa hi inhal em em nge maw an nih ang le… an pafa chauh lo chuan an hre hauh lo vang le… 

Sunday chawhnu a ni bawk a tiin Ruatfela chuan an khaw pa, Pu Rema va tlawh a rilruk a. Judy nen an kal dawn ani. Len pah a ni mai. Pu Rema hi a pa ang deuh khan an insaknaah a tla palh a, a malpui ruh a tikhaw lo va, Kar tirah khan an rawn phur phei a ni. Inchei vak lem loin a kal ta mai. Eitur eng emaw a lei ve a. Judy nen chuan inkai rialin an lut a 

Sunday hi chuan an inkan nasa bawk a. An lo tam viau, Pu Rema erawh an nu nen an lo awm ve khar a, A nau dam loh tum kha a hrechhuak vawng vawng mai. Kantu nei lo bik nih hrehawmzia leh khawharthlakzia kha.. Chuvanga Pu Rema te pawh va kan a ni ve reng reng a. 

An lo lawm ngang mai. An khaw lam chanchinte an sawi hlut a, Amah pu Rema lah a pa te nen inkawmho reng an ni bawk a. An lo innelsa bawk nen. An titi a kal hle. 

"Ehe! Arini teh nawlh chu.. Hetah eng nge i tih ve? " Judy chuan a ti chul a. An ep chiaha dam lo chu Muanpuia kha a lo ni. Arini chu a nui hauh lo, "Ka thianpa ka kan" a ti tawi tâk a. Judy chu a hrilhhai angreng. 

"Eng nge in an zel! " Ruatfela chuan a ti a. 

"Saw i hmuh ve reng saw a tha" a lo ti leh hmak. Judy thinin a diar leh ta lo, "I va chaltlai reuh tak" a ti ta hlak a. 

"Hei hi school a ni lo tlat. U Judy" a la tizui. Judy a sen ţan ţan mai. 

Ruatfela chuan, "A dik alawm.. Va kal tawh rawh" a lo ti vat. An inbakkaih mualpho ang tih a hlau a ni. Arini a rapthlak reuh si a. Rei mawi tawk an awm hnuah an haw ta a. An hawn dawn chuan Muanpuia chu a va hmu ve zuai a, "Lo tha rawh. Kha hmuh pawh i nawm khawp kha" a ti luam a. Muanpuia pawn a lo la hre ve reng niawm tak a ni, "Lawmthu ka sawi hman si lo va. Khaw nge a nu kha le.. Nang awm lo la chuan ka thi maithei ni" tiin a nu chu a zawng kual a. A nu nen inhmelhriattir a tum niawm tak a ni. 

"Aa.. Kan tih ve theih tawk alawm.. Ka lo awm remchang em a nih kha" ruatfela chuan a ti ve mai a. An invai liam ta a. 

"In sir maw" Sammy chuan Arini melh chungin a ti hû a. A lo bu nghat. 

"Be ve ta che" a ti leh a. 

"Ka peih lo" a lo ti hmuk. 

A hriatthiam loh chu engvanga thinrim ringawt nge a nih chu? Tuman a pawi an sawi si lo. Judy leh Ruatfela a hmuh khan a mood a chhe nghal vek. Ruatfela te hawn hnu lawkah a haw ve daih. A thiante chuan a ngaihna an hre lo tlang hle. Hmeichhia ngang a nia, eng emaw a niang tiin an inhnem ringawt. In a thleng a, roomah a lut nghal. Almira a dap rak rak a. Zu ûm a phawrh hlawl.. 

"Ka in dawn che.. I châk lo viau ang" tiin Zu ûm chu a pen keuh keuh a, mahse, a room kawngka an rawn kik dat dat. A thukru vat a. "Aw" a ti lang lang a. 

An awmpui naupang tak, Mamawii a lo ni. 

"U Arin, ka puin saw tah A pu Zuala te inah chaw ei turin lo phei rawh se a tia" a ti sap a. 

"Ka peih lo" tiin kawngka a va khar hnan hmiah. Pu Zuala chu a patea a ni. A ngaina lo. Ngaina lo tak a ni. 

Khumah a thu hnawk a, zu um bawk chu a lek kang leh. 

"Ti nge mipa ka nih mai loh le" a ti sap a. A zu ûm ken chauh lo chuan a thusawi chu an hre lo.. 

(A nikhua sia.. Ka mu daih dawn.. Rawn dah loh ka tum zet a. Ka khawngaih che u a 😆😆 tak taka… muah vek u.