A tel lovin 2

A TEL LOVIN.. (Chapter- 2)

Ziaktu : Toni Râlte

Zawmpuia, Atea tia koh ni bawk chu khumah chauh hmel zetin a mu bal a. Khum sirah a û leh a nuin an dinchilh ran mai. Mampuii erawh a û in lamah ei rawng bawlin a haw thung. 

"Nu, ka riahpui mai ang. Tlaiah Mampui'n chaw min lo pe mai se.. " Ruatfela chuan a ti sup a. 

"Awii a kal dan pawh a thiam dawn mi" a nu chuan a lo ti sur sur. An han nui leh rih. "Pek kher pawh kan ngai lo ang. Kei chu artui ka lei ang a, ka puar thei mai ang" a ti leh a. Atea a rawn harh, "Ehe.. Nu, khaw nge kan awm a? " a ti hû mai. 

"Aizawl Damdawiinah i awm ta vang mai. Aizawl boruak i ngeih phei chuan naktukah i dam maithei ni" a û chuan a lo ti var a. Atea chu rawn thu chhuakin tui a in khawlh khawlh a. 

A hawi kual rulh rulh hnu chuan, "An va tam bik ve le" a ti phawng mai. Anu leh Ruatfela chu an nui dun a. 

"A khawharthlak loh ber alawm" a nu chuan a lo ti a. 

"Pa Thlenga te herhsawp tur ka siam laklawh asin le. An uite min pe dawn a. Ka van ui e" a ti leh daih

"I dam vat dawn alawm. I dam veleh i siam leh char char dawn nia" Ruatfela'n a lo ti var a. 

A nu chu a va thlah a, taxi a laksak. Ke chuan a haw thiam dawn si lo va. Ani chuan a nau a riahpui dawn thung a ni. Atea hi ţawng bual bual chi a ni a, a titi deuh reng mai. Chaw a va dawhsak a, amah chuan artui pum hnih a ei a, a puar der mai. Atea danglam vena chu a khawsik hluah hluah lai paw'n chaw ei a ţhulh ngai lo. A ei thei zêk lehnghal. Hei vang hian a taksa pawh a chhe lutuk ngai lo a ni. 

Doctorin ward a rawn fan zawhah mu turin an insingsa deuh nghal mai a. Dar 8 a pel hlek tihin pawn lamah thawm a rawn awm huk. Ţap ri te pawh a tel. Ngaihtha vak loin Ruatfela chu a va hawi phei a, tlangval ni ngei tur hi an rawn zawn lut a, nikhua a hriat hmel loh. Atea khum bula khum awlah chuan an rawn mut a, a ban dinglam chu a tliak a nih hmel, an cher ve a, tin, a chal bawr vel chu a thi nual bawk. A nu niawm tak leh tleirawl hi an rawn inzui phei bawk. Ruatfela'n tleirawl a hmuh chuan a meng phawk kher mai. Arini lek! 

Mi dang pawh an rawn lut nual, Arini chuan tlangval kut chu a vuan deuh reng mai. A bialpa a ni maithei. Ruatfela pawh a rawn hmu ve, a danglam phah lem lo. Doctorin a'n check zung zung a, a jection nghal bawk. 

" A rawn harh veleh nurse in ko dawn nia" tiin a chhuahsan zui ta nghal a. 

Nurse a rawn kal a, "Pahnih khan awmpui u la a tawk mai. Chim huk suh u" a rawn ti a. Arini leh nu tih loh chu an chhuak ta pheuh pheuh a. 

"Sir chu eng nge i tih ve a" a rawn ti a. 

"Hei ka nau ka awmpui a nih hi. Nang zawk i û mi? " a lo ti ve mai a. 

"Umm ka û ang a ni mai" tiin Nu nen chuan an inmelh zauh a. An dam lo ber chu a rawn zi ţelh ţelh a, a rum dat dat bawk. Arini chu a tho vat a, nurse a va ko nghal. A rawn harh chuan, a ban chu na a tih hmel viau. A vung luah bawk si. 

Arini leh nurse chu an rawn phei a, Nurse chuan nachhawkna niawm takin a jection a. "Tikhan a chhawk mai ang. A muhil leh mai ang" a ti a. A phei lehnghal. 

Ruatfela chuan a va thut hnaih ve deuh a. 

"Engtia na nge a nih reng reng a" nem takin a ti a. A nu niawm tak chuan, "Bike-in a accident a nih hi. An tlan chak thin lutuk a" a lo ti var a. 

"A va zia lo ve aw.. Mahse, kha in vannei khawp alawm.. A ban tih loh chu hliam a nei em em lo a ni lawm ni? " Ruatfela chuan a ti leh a. 

"Ni e, hei a vanneihthlak angreng zawk. Nunna kan inchân lo va' a lo ti ve bawk. Arini chuan Ruatfela rawn melh chungin, "Sir, i nau chu a eng na nge a? " a ti a. 

"Hei a khua a sik anih hi. A kaih thin a, ani pawh a zia chho mai ang" a lo ti a. 

Dam lo dang te an mut deuh sap sap avangin bengchhen an hlau bawk nen, Ruatfela pawh mu turin a inpuahchah a, a nau bulah a inthawlh ve mai. Arini te pawh an khum bula khum ruak chu an hauh nghal a, an pahnih chuan phun sep sep chungin an mu dun ral mai. 

Zingah Arini chu Ruatfela te thawh hmain a lo haw daih. School kal a ngai bawk si nen chuvang a ni ngei ang. Ruatfela ril chu a ţam angreng hle. Canteen-ah a va dap a, pawisa lah a lo ak tam vak si lo. Damdawi lei ve reng a ngai bawk si. A nuin a rawn keng em ang chu maw. A nau pawh a tho dam viau mai. Aizawl boruak hi ngeih a lo awl ve bawk nen, a ţawng leh char char mai. Tukthuan an ei khamah A nu leh Mampuii an rawn lang ve leh a. Eitur tlem a zawng an rawn keng a. Mampuii leh Ruatfela hi an unau zingah rau rau pawh inpawh fal bik an ni bawk a. An inthutchilh leh hmak mai. 

"College i kal hunah chuan hetah i awm tawh dawn sia, i lawm awm" Ruatfela chuan a ti a. 

"Nia, mahse, in saw i va tiţawp tak. Nimin nileng khan ka tifel vek. Thleng dahna te kha a khak si" a lo ti niah niah a. Ruatfela a nui hawk hawk. Mipa ta nafam hi chu felfai thlip thlep a lo har ve bawk a ni. 

"Mama, zanin chu ka lo riahpui ve mai dawn mi? Naktuk school chawlh leh ringawt pawh a chi loh ang" a nu chuan a ti a. 

A han ngaihtuah a, chhun lamah a nu awm se, Zanah aman riahpui mai se a ti rilru a. "Zanin chu ka lo riak leh phawt ang. Zingah ka lo haw mai ang" a ti a. Chawhnu her thleng a nu te chu an awm ve a. An nufa za chuan an hlim ve hle mai. An dam lo ber lah chuan fiamthu a thawh zut zut bawk si. A nu te an haw fel chiah tihin Arini a rawn lut a, uniform a la ha. 

"Nu Mapui, eng nge a lo an" a ti nghal sar sar a. School-a a mizia zawng zawng kha a bo vek ni maiin Ruatfela chuan a hria. 

"Hei kan zia sawt khawp mai. A ban hi an zawm fuh lo deuh a, naktukah an titha leh dawn a. A khua pawh a sik leh tawh rih lo" Pi Mapuii chuan a lo ti var a. 

Ruatfela te lam hawi pahin, "Sir, nangni in tha zel em? " a ti a. A nui sâng bawk. An that thu a lo hrilh a. A nau ta pek chuan Arini melh vung vung pahin, "Û, vantirhkoh a nih duh hmel. A va var ve," a rawn ti hlawl. Arini te nen chuan an nui ta hawk hawk a. Ni e, a ngo ve bawk a ni. 

A eitur lo kente chu Atea a pe then ve a, Atea lah a lawm em em bawk. A zia a dang ta lutuk chu Ruatfela chuan mak a ti ngei mai. 

"Vawiin chu i kal si lo va, School a reh tawp" a la ti zui! A nui ringawt. Tlai lam a ni ta a, Arini pawh chu a haw ve ta a. A hawn hnuah Pi Mapuii bulah, "In inchhung khat em ni! " a ti ta tawp a. 

"Chhungkhat lem lo. Kan tan chuan pathian a ni ringawt. Mama hi a sual ve thin a, sawi nuam chu a ni chiah lo. Zan khat a rui sual chuan Arini scooty hi a ru a. Police ten an rawn man ta nghe nghe a. Mahse, Arini chuan a ngaidam ta hmiah a, chhungkhat angin min nei zui ta daih a ni. Mak ka ti asin aw. Mahse, a chhungte erawh chuan mama chu tang se an ti vek. Amah ber hian a phal ta tlat si lo va. Khata tang khan kan inah te rawn kalin kan retheihzia te a rawn hmu a, min pui ta fó a ni. Hei Mama pawh a fel phah ta daih, Arini vang ka ti lo thei lo. Mahse, Nizan khan a thianpa Sangtea'n lenpuiah a rawn sawm a, an va chesual ta hlauh a nih kha.. Arini pawh ka va hrilh ve nghal a, a rang arangin a rawn phei ve nghal a ni. A fel ania he nau hi aw" a ti vawng vawng a. Ruatfela chuan a chil a lo lem khawlh. Mak a ti nasa. Chutiang chu a lo ni takzet a nih chuan Arini chuan mize pahnih a nei anih ngei dawn chu.. 

"Ni e, a fel ngawt mai" a ti ringawt. 

An mutui viau naa, zing lam dar 2 vel bawrah Atea chu a rawn kaih leh ta tlat. Nurse ho an phe vat vat mai. A nu te erawh a hrilh ta lo law law, an rilru a hah dawn si a. Dar 4 velah lungmuangin an mu leh thei ta chauh. Thawh tlai a theih bawk si loh a, mit thial urhin a tho. Zingkarah a nau chu a hawnsan ta a. School chawlh zel kha mimal school a ni si a, a inthlahrunawm ve em a ni. In a thlen chuan a nute pawh kal turin an lo insiam mek a, a inbual sawk sawk a. Chaw ei leh sawk sawkin School kal turin a insiam a. Arini a rilrua a rawn lang leh thut thin chu amah pawn mak a ti. School a thleng a, chanchin an lo zawt nak nak. An felin rawn kan thei lo mah se; a kanna sum te pawh an pe liam liam mai. 

Class XII-a luh chu a chak deuh tlat! A chhan a hre mai lo. Naupangho a ngai tawh a ni mahna le.. 

A va lut ta ngei a. Arini thutna lam a melh zauh. A lo awm khiau mai. Damdawiina a hmel nelawm tak kha a bo leh daih tawh. Thinchhiat hmel fahranin a meng thip leh râm tawh mai. Lecture a pe leh mawlh mawlh a, discussion a neihpui bawk.

"Tun lai issue pakhat hei kan ramri-ah buaina kan tawk leh ta chu a ni a. Hetah hian in ngaihdan hriat a chakawm, in vei pha ve em tih te" Ruatfela chuan an zirlai ngawr ngawr chu boring an tih a hlauh vangin a'n khuh hawng a. 

Mipa lamin an sawi nak nak, "Kan sawrkar nep vang. Tihian nem deuhin an tlawm leh mai ang" tih te.. "Kan ram kan intodelh lo hian nghawng a nei leh ang, vai ho kan hlau tlat, a chhan chu kan intodelh si lo va, silchal kawng a pin ringawt pawn kan buai nghal bakah dawrkai ten thil man an tisang leh ang a. A buai tur chu mi rethei bawk.. Chuvang chuan sawrkar hian inrem dan a zawnpui ang" An class CR patling zet Jerry chuan a ti a. An lo bu ve nghat nghat mai. Ani hi chu a tawngkam te hi a pui ru riau zel. 

"Sir, ka sawi ve duh" a rawn ti fiak thak. Arini a ni. A ding khawng lah a, "Vai hlau hi kan inti ziah a. Intodelh loh hi chhuanlamah kan hmang ziah bawk. Mahse, Central hian min chawm tur a ni ringawt. Hmana indan kan tuma phal lotu an nia, min chawm hi an bâ a ni. Tin, Vaiho tan chuan an customer kan ni a, keini aiin kawng pin hi an hlau fe zawk. A chhan chu sum lakluh an neih tlem phah dawn lutuk. Mizote hian a thlawnin engmah kan dawng lo. Man nei vek a ni. Chuvang chuan keini aia kawng pin leh kan indan hlau chu vaiho zawk. Chuvang chuan sawrkar pawh hian ngam sarhin thu nei ngam se, kan ram chin chu hauh ve tlat ila, insumdawn tawnna tur chu phai chauh lo kan chhehvelah a tam mai. Sawrkar hi a nep bakah mipui hi kan dawihzep tlat zel" a rawn ti ta pap pap mai. Ruatfela chuan a melh reng ringawt. Chutiang ngaihtuah chhuahna chang hria chu hmeichhe zingah an awm hauh lo. Boruak chu a reh dûk mai. 

"A dik kher mai. I sawi tha e" Ruatfela chuan a ti ta hram a. Arini pawh ngawi rengin a thu leh. A sawi zawng zawng kha a dik lohna sawi tur a vang viau. He nau hi an rin ang ngawt chu a ni lo a ni maithei. 

Chawhnu 2nd period a lak laiin a nuin a lo call a, a rawn call nawn sek vangin a ngaih tha lo chu pawnah chhuakin a va bia a. 

"Mama, hei Atea hi a awmdan a dik tlat lo. Khawngaihin lo kal mai teh" thlabar zetin a rawn ti ta a. A nghing lawih. A nu thlaphan dan atang khan a nau chu a kal mekah a ngai tawp. Office-ah lutin thil awmzia a sawi zung zung a, Principal pawn phalna a lo pe thlap. Hmanhmawh a ngaih vangin leh kal ve a duh vang hrim hrimin Judy scooty in chak zetin an tlan phei ta a. A rilruin a tawngtai mawlh mawlh. Zing lamah kha chuan a thain a kalsan dawn thleng khan a la nui chur chur kha a ni si a. Engvang teh thut nge mawni dawn le.. 

An va thlen chuan thawktir tumin an lo bei mek. A nu leh Mampuii chuan inkuah chungin an lo thlir tlawk tlawk. Ruatfela tan pawh tihtheih vak a awm lo. Lo thlir ve ngawt loh chu. A inhumruh nasain a ţang ţeuh mai. Doctor hmela beidawnna a hmuh phei chuan ţah hawm hawm a châk. Doctor chuan zawi sapin, "Mihring kan inchan zo ta lo" a ti ta. A nu leh Mampuii an baw hawk. Atea chu bawhin an ţap tuar tuar a. Mihring nunna hi chhum rei lote lo langa ral leh ang mai a nihzia a chiang viau mai. Judy a lo fel hlauh a, Ruatfela hamhaih leh hrilhhaizia hriain an khaw lama phurh phei dan tur ruahmanna te a zawt zung zung a. Ambulance an hmang thei dawn hlauh e. A nau ruang chu a melh tlawk tlawk a, tukin a kalsan dawna a bye bye luap luap te kha a la rei lo asin. 

"Û, i lo kal leh hunah vaipa mix min lo ken rawh aw" tia a chah te kha nichin lawk a nih kha mawle. A nau duhtak, ramtuileilo a nih tak avanga an duat rawn, khaw miten an hmusit ang tih hlaua dimdawih taka an enkawl thin, kut themthiam em em, mi ngainat kha a awm tawh lo.. A nau vang hian hna sang thawha pawisa thawh chhuah ve ţeuha, phai lama la kalpui te kha a dream thin. Mahse, chung chu a thleng thei tawh lo. 

Judy chuan, "Inthing harh hram hram rawh. Mipa awmchhun i ni si a, ngaihtuah ngai a tam si" a rawn ti a. A harh ta zawk. Mahse, a ngaihtuahna a tawi tûk mai. A in lama phurh phei phawta thawmhnaw te pawh insiam chu an titlu a. A in a zim deuh vangin a in luahna te chuan an ina ruang dah rih chu an lo sawipui a, a hnial lo. An phur phei ta. A nu mawlh chu a ni. Atea hi tuma thik phal rual lohin a duat a, zui pawh an inzui nasa. A enkawl thiamin zo nu mawl te mah nise, a rualbanlohna chu hnual nana a hman loh nan a tihtheih tawk ang tihtirin a fuih kal reng thin. A ţap bang thei mawlh lo. Judy chuan a nute biain Thenzawla zui ve law law a tum ta a. Ruatfela pawh a insiampui vek. A thawhpui tlawngawl deuhte pawn zui ve ngei an tum. Mi hi an lo va thain an lo va fel thin em.. A in luahna te pawn an zui vek dawn. Ruatfela chu a tah a chhuak, mahse, a tap thei lo. A mittui erawh a hru zauh zauh mai. 

Mampuii sawi danin chawhnu lamah khan a riltam thu sawiin chhang te a ei a, chow a ngen leh tlat a, a zuk leisak nghe nghe. A chow ei pawh a ei zawh hmain a kaih leh thut a. Nurse ten an buaipui vat. Ni dang aiin a kaih rei ta tlat a. A thaw ri bawrh bawrh bawk. A rang teh thut em a ni. Chubak a thih dan tak sawi tur a awm lo. A kal tawp mai a ni. Pathianin a angchhungah piangsual tawh lo tura lak a duh tawh a ni mahna le.. 

Ambulance-ah chuan an len vek loh vangin motor rawn thawhchhuahpui te pawh an awm nual. A awmna veng chhungah mi a lawm loh tehlul nen, an thenawm hnaia thalai tam zawk te pawn an rawn zui ve. Khawpuiah tlawmngaihna kan bosal kan tih mek laiin a lo la bo awzawng lo a nih dawn hi. Atea tu khaw khain an hriat loh, pa berh ve te chu ropui takin Thenzawlah a lut ta. Mak tak maiin a ruang lo hmuaktu te pawh an thahnem kher mai. Zan tlai tawh lama thleng an ni naa, an lo awm nghûk mai. Thalai lah a khaw pum zawng zawng an rawn kal emaw tih mai tur a ni. 

Tichuan, a nau duhtak ruang chu lumein thalai te thiam takin an zai tlaivar thak a. Ruatfela thla pawh a muang chho ţan. Lehlam zawnga thlir chuan Atea kha a landan leh a pumrua engkim kha mi pangngai ang vek a ni a, a ke a bai deuh tih mai loh chu. Amah pawh hian a rilru rawn buai leh thut thin hi hrehawm a tiin a zak ve a, tlangval ve nafam chuan hmel duh zawng te a lo nei ve lo thei lo va, chutiang hunah pawh tumah a ngaizawng ve ngam ngai lo. In chhungah nise ram hnathawka chhuak chi a nih loh vangin a inthlahrung a. A kut themthiamna hmang tangkaiin sum tlem tlem a lalut ta hlauh a. A mak ve zia chu heng a sum lakluh atang hian sawma pakhat a dah hrang ngei ngei. Tette atanga an lo hriat tawh leh an chhungkaw tihdan a ni miau a. Ama thil a inlei ngai lo va, a pawisa hmuh ve pawh a nau te tan a hlan ve lehchhawng thin. Chutianga inthlahrung leh mahni inkiltawih reng renga khawsa chu hetia a kal ta mai hi a lehlam takah chuan a lawmpuiawm ti mai teh ang. 

Ruatfela pawn chawlh a la a. A nau thih sarhu chhung chu a nute pawh a uap a ngai ve a ni. An in tha tawh lem lo, lian lem lo taka thalai leh nu leh pa rawn leng tiai tiai thin a hmuh te hian a lung a chhe thin. An khawsak a harsa a, an retheih leh pachhiatzia hretuten tlawmngai taka an rawn hnem chu a lawm lutuk a, a lung a chhe lo thei lo. Judy a fakawm takzet. Thenzawl khaw ho pawn Ruatfela bialnuah an ngai vek. Amah a fingin a remhre si a, a zuan a zang bawk nen eng emaw chet ngai leh mi han kilkawi velah pawh a felin biak a nuam kher mai. Ruatfela nu Pi Lawmi mit pawh a tlung viau aniang, an hawn hnuah, "Mama, Judy i tih kha ngaizawng teh. A fel em mai" a ti hial nghe nghe. Ruatfela erawh a nui ringawt. Ni e, judy lakah bat a nei in a inhria. A rilru pawh a danglam deuh. 

Kar hnih dawn chu a chhungte bulah a awm ve ta rih a. An lo ngai ve bawk nen. Zan khat chu number hlang hian a rawn call hlawl mai. 

"Hello" a ti a. 

"Sir, Arini ka nia. I nau boral chu pawi ka ti hle mai. " a rawn ti ta a. A phu zawk mai. 

"Ehe.. I va fel ve aw. Nia, a pawi tak tak a ni" a ti ve luam a. 

"I lo haw hunah ka râl dawn che nia. Amah kha a fel reuh sia, ka khawngaih e" naupangchhia deuh hian a rawn ti a

"Ni ngawt mai. Thihna hi chu kan thunun thei si lo alawm le" a lo ti nghut. Hrechhuak thut niawm takin, "Eng nge i u kha a an zel" a ti a. 

"Niminah khan a chhuak a. A zia tawh lutuk. Engtikah nge i lo hawn dawn? " a rawn ti a. 

"Ka tum dan chuan kar tharah hian lo hawn chu ka tum. In ngaihawm tawh sia" Uang pahin a lo ti a. Arini nui hak chu a hre thei. 

"Umm lo haw vat rawh. Ka tibuai ang che. Anih aw" tiin a dah nghal daih. Ruatfela chu thim zingah a khi sak. Engvanga hlim ta riau nge a nih erawh a inhre lo. Judy call a lo kal ve chiah, rei ngial an inbe ta a. Bialpa treat-in a treat deuh tawh a. Awmdan tak pawh a thiam tawh lo. Judy lakah chuan a inthlahrung bawk si. 

Aizawl pawh a phei ve leh ta. Chelh reng thu awm hek lo le. A nute chu a khawngaih hle. Eng ni lo mah se; unau zinga upa ber a lo nihnaah an thlamuanpui ve thin si a. A in pawh Mami'n a lo enkawlsak a, a ţawp lem lo. A thlen zan chuan in chungah chaw a ei a. A chau deuh bawk nen, a mu hma angreng. Judy nen an intext zauh zauh. Arini number kha a save tawh a, text erawh an intext lem lo. Va text hmasak kha a hreh ve deuh si. Ani lah a reh zui ve leh daih bawk si. 

Status a en thla dan dan a, Arini status chuan a mit a la viau. 

"Hlen tawh ni ila thlamuang takin ka chawl tawh tur" tihtê mai hi a ni. 

A awmzia a hre lo naa rin dan a nei. A ngaihtuahna a tikalthui angreng hle. A insum zo ta ngang lo va, "Hetiangte chu sawi tawh suh" tiin a va comment ta nge nge a. 

"Mi chuan mi hausa fanu, duh duh nei thei min ti. Ka duh duh chu ka nei thei. Ka duh ber erawh ka la hmu thei lo" tiin a rawn reply. Han biak zui dan a vang angreng, "I tan chuan a nuam ngawt ang. Duh duh neih theih chu" a ti ta ngawt a. 

"A nuam a. A hlimawm si loh alawm" a rawn ti ve leh. Judy'n a rawn call vangin a reply ta lo va. Mahse, a mut dawn thlengin a ngaihtuah zui. He nau hian beidawnna eng emaw tak zawng a nei a ni ngat ang. Zawt ta se a sawi duh a rinawm si loh. Mi sual tak angin a hmu thei tawh miah lo. 

School pawh a kal ve ta a. Naupangho pawn an ngaih tawh thu an lo sawi sap sap. An school bang chu an haw sap sap a. Ani pawh zawi muangin an veng lam a pan. An veng thlen dawn kawng kawia lumehna dawr bulah Arini chu a scooty nen a lo ding a, a va hmu thut. 

Amah zawk chuan, "Sir, ka sawi tawh ang khan ral che ka duh a. Schoolah kha chuan ka pe hreh deuh che a. Kha aw" tiin envelop uk hi a rawn phawrh a. 

A ngai lo tih ngawt dawn chuan a rãl ve a ni bawk si. "Ka lawm e" a ti ta sap a. 

(Naktuk leh a tuk leh ka chawl maithei. Thil buaipui tur ka nei a. Lo hlim ang che u