A Tel lovin. (1)

A TEL LOVIN… (Chapter - 1)

Ziaktu : Toni Râlte

"Sangsang Sumo-ah ka rawn thawn kha aw" a nu chuan a rawn ti lâng lâng a. 

"Aw ka lo lam dawn nia, chuan ka pa chu eng nge a an zel" Ruatfela chuan a ti a

"Hei a zia ve ţan e, nimin tlaiah a kawng a herh leh pek a, kha khan a tizualkai deuh a lawm" a nu chuan a rawn ti a. Eng eng emaw sawiin an titi hlut a. An dah ta a. 

A in chhung tetakte chu en kualin a chek hluk. Aizawl chhuah lam veng pakhatah in luah vein, thla khatah Rs. 2000 lai a chawi ve a. Mahse, a tlawm pawl tak a la ni zawk. Choka, sitting room leh bedroom a awm hrang ve thlap a. Mahse, a lian lo hlawm angreng. Amah Ruatfela Thenzawl khua niin, Aizawlah hian hnathawkin a rawn awm ve a. Hnathawk tihah hna sang erawh a ni lo. A pa lama an chhungte hla tawh tak Schoolah English teacherin a awm ve a. Higher Section lam an ni tawh a, a zia zia chu a awm. An thawhrim ngaihtuah erawh chuan an hlawh a beitham viau mai. Dik tak chuan a qualified lo zawk a, tunah hian M.A (Eng) IGNOU-atangin a zir leh mek. An khaw lamah han thawhna mai tur a neih loh bakah Aizawla han awm ve kha han zin nikhua pawhin thlen in chungchangah an buai fo si a. Inhlawhna tha zawk zawn pahin a rawn awm thla ve râwih mai a ni. Lehkhathiam tak a ni thin a, Matric phei chu top ten-ah a lang ve hial. Mahse, sawi leh sawi hnu, an chhungkaw harsatna vangin zirna sang zawk a bei thei ta lo va. B. A a zo hram thung. 

An unau hi paruk lai an ni a. Ani hi a upa ber a ni. A la upa lo viau, an te ber phei chu naute ang tak tak a la ni nghe nghe. A pa hi mistiri a ni a, hna a thawh theih chuan an khawsak a ziaawm ve reng. Mahse, thla hnih kalta khan a insak atangin a tla pek a, a silawng rei viau. A nu hi nu hrisel tak a ni hlauh zawk a, leipui te neiin a thlai thar ang ang a zawrhna chu an ei a ni deuh ber mai. Chuvangin Ruatfela'n Mizoram khawpui ber Aizawla zirtirtu hna a hmu pawh chu hnar phal chi a ni lo ve bawk a ni. Ruatfela nau chiah mipa hi vanduaithlak takin kum 12 anih laiin khawsikpuiin a man a. A na ta vak a. Chu chuan a thluak khawih pawiin ramtuileilo in a awm phah ta a. A ke a bai bawk. Han en mai chuan a pangngai viau. Mahse, biak thui hian a pangngai lo tih a hriat thin. Hna hram thawk chi ziazang a ni si lo va, mahse, a kut a lo themthiam hlauh a, thlangra te, êm te, herhsawp leh a dangte a siam thiam riau a. Sum a lalut ve hlek hlek thei. Chumi nau leh chiah hmeichhia chuan kum a tling dek dek tihin sawn a pai ta hlauh a, mahse, a fa paina nen an inrem thei ta hlauh. Chumi nau leh chu hmeichhia bawk niin an khuaah pawl 12 a zir ve mek a. A naute pahnih mipa ve ve te pawh school an la kal. Chuti ang chhungkua chu an nih vangin Ruatfela rilru chu a puitling lo thei lo. 

A in luahna te hi an fel angreng a, an hausa falua bik lo naa an khawngaih zawng tak a ni teh chêk ang chu. Phal takin an lo luahtir ve mai. A awmna atangin an school a hla lem lo bawk a. Kein a kal thin. Ruatfela pa hi a tlangval lai chuan Thenzawlah amah chen pha an awm lo va, Ruatfela pawn a rawn chhun ve chiah. A lian thelhthawlh viau, 6ft chiah chiah a ni. A thau vak lo thung a. Mahse, ram hna a thawh nasat thin vangin a taksa chu a inphut mawi tawk viau thung. A hâng chhe lo naa ngo hluak erawh a ni lo. Hmul a ngah lo lutuk chu pa lo a tih vangin hmulthi te ziat chiam thin a. Tlem chuan a hmul phurh ve ta deuh. A hmel hi tha tia sawi tur ni si loin, a chhia tih ngawt chi a ni chuang lo. A mitmeng a lian a, a mitmu a dum kharh bawk. A kum aiin a lang upa zawk zel a. A kum an ring sual fo reng a ni. 

A nuin chawhmeh a lo thawn a, chu chu school banah lam haw a ngai dawn. A nu hian a ngaihtuah khawp a, hnephnawl eng eng emaw hi a rawn thawn fo mai. Ani chawhmeh em em lo pawha a ei tui theih tehreng nen. Mipa na nâ na chu a in pawh a felfai thlep thlep lem lo. Bungrua a ngah lo êm zawk a. Thian tia sawi tur a la nei vak lo. Schoola a thawhpuite lah veng dang an ni hlawm ţhûm a. An in chung tlangval nen hian an inkawp ve zauh zauh a, mahse duhzawng inang ta lo chu an inzui reng thei lo. An inchung tlangval Muantea hian zu a duh ve hleuh hleuh êm a, Ruatfela pawh hian han lem ve zawk chang chu a nei nain, a luhchilh ve lem lo. Tul lo va sum khawhral hi a duh bau lo va, a hlawh pawh Sawma pakhat a dah hran hnuah a tam zawk hi a chhungte a thawn ngei ngei. Ani chu a hautak lem lo bawk a. Ngaihzawng nei hmanin a khawsa meuh lo tihtheih a ni. Nei ve duh nise, an thawhpui Judy hian tihtakzetin a ngaizawng. Mahse, a dinhmun vangin neih tul a la ti chiah lo. An khuaah te kha chuan a nei ve fó mai. An dinhmun phak tawk te te kha a nei tlangpui. Khawpuiah chuan ngaihzawngte tilawm tur pawn sum neih a ngai zel tawh a. Khawi ilo vah chhuahnaah lirthei neih loh chu inthlahrun a na thei si. Chung chu a hre ve kar a. Single rih mai chu a duhthlanna a ni ta rih. 

Tukthuan a ei vat vat a. Dailuah leh Alu a kan pawlh a, a chawm bawk a, a hawp mai bawk. A puar ve tho mai. A ei zawhah a insiam nghal a. Thawmhnaw hi a ngah lem lo. Hmanniah an student nghal fal deuhin, "Sir hi i pheikhawk ngai hlir i bun a" a ti pek a. A zak khawp mai. Hlawh a lak rualin sneaker tlo tur a lei ve nghal rap. Lan dan leh inchei dan te hi mi dangte min tehna a lo ni ve fó si a! 

School a thleng a, first period a la nei zui! A intuai mam leh thuak thuak a. Class XII roomah a lut nghal. Rual takin an lo wish leh dual dual a. Naupang hian an ngaina viau, lecture pek dan tawk a thiam bawk nen. Tin, a mood a off pawn naupangho hmaah a tilang ngai lo. A hlim sâng reng thei chu an ngainat chhan a ni ngei ang. A'n hawi kual chuan mi thar a hmu ta tlat! Hmeichhe tlar hnung ber kil berah chuan tleirawl kum 16-17 mi awm vel a lo thu khar a. An inhriatchian hlawm tawh vangin mi thar chu a langsar lo thei lo. 

"Mi thar kan nei a ni maw? " a ti a. A va nuih sak. 

"Introduction han pe ta che" a ti zui nghal a. Tleirawl chu a rawn ding chhuak ţaih ţaih a. Confi zeta hawi kual pahin, "Lalrinsangi ka nia, Arin tiin min ko thin. Chanmari atangin ka lo kal" a ti fiak thak a. A aw chu a ring angreng. 

"A lawmawm e, thu rawh le" Ruatfela chuan a ti a. Kum laklawha school rawn ţan chauh chu eng emaw tak anih a ring. Principalin a la sawi ang chu maw.. 

Nuam ti zetin class chu a la chho va, naupangho pawn an melh leh ţhap. Arini erawh a kun chal reng a, mi thar a nih vangin han hauh nghal ngawt kha dikin a hre chiah si lo. 

"Saw mi thar kan lo nei reng a ni maw" a class la zo, office-a a luh chuan a ti nghal a. 

An miss Mapuii chuan, "Aw ni tak. Ka lo sawi theihnghilh daih. Lalrinsangi a nih kha.. " a lo ti var a. 

"Ti nge a va ţan tlai bik ve" a lo ti nghut. 

"Nia, an school atangin an hnawtchhuak an tia. Mahse, a chhan a ho viau chu an ti, Pu Ramtea (an school neitu) te nen hian an inchhung ve deuh aniang. A rawn inadmit thei ta a nih saw" zep lem loin Mapuii chuan a lo ti ve mai a. 

Engvanga hnawtchhuak tak ni ang maw Ruatfela chuan a ti rilru a. A hmel kha a inno fahran lo tih chu a hre mai. A kawlhsen hmel angreng. A mitmeng a thip bakah a hmui pan hlengte khan a tilang thinchhia. A ngo hle tih erawh a hre thei. 

An sir Sawma chuan, "An hausa teh mai a nia. A pa pawh kan Minister hlui Pu Liansanga ngat kha a nia" a lo ti ngal ngal a. 

"Ka hre miah lo chung vel chu." Mapuiin a lo ti thung. 

Tiang chuan Arini pawh a school tharah chuan a kal chho ve zel a. Mi thar mah nise, a zâm loin a chapo riau a. Ei loh a hlawh nghal pang. Thian pawh a nei thei lo rêng a. A thutpuite nen pawh class pawn lamah an inbe zui chuang lo. Zirtirtute pawn an hau ta fô! Zirtirtute hnial a hrat bawk si, thil lah chu a hre ve zul roh a. Zirtirturte khak sual a hre thei zêk. Ruatfela chiah a la hnial lo. Ani hi chu a fimkhurin a inenlawk nasa thei bawk a. Hnialna tur a awm ve vak ngai lo. 

Thil lian tham a thleng ta nge nge a. Arini chuan a thutpuinu Rebeki kut a lo thlak hrep mai. A rawn zualko ta nge nge a. A hnar a thi hnu a, a sam a thur bâm bawk. Teacher te pawn mak an lo ti nasa. A vawikhatna a ni miau a. 

"A bag kha bench-ah a dah tlat a, a chep angreng sia, desk hnuaiah hian dah ve la ka ti ringawt. A bak engmah ka sawi lo, min rawn beng nghal ringawt" Tiin Beki chu a insut hlap hlap a. Miss Mapuii chuan rang takin Arini chu a va ko nghal. Zam eih loin a rawn lut hnalh hnalh a. Zirtirtu rual chuan an melh thap a, engahmah a ngai lo a nih hmel. 

"Engvangin nge ani hi kut i thlak ringawt? " Mapuii chuan a ti chang fak a. 

"Ka pawi a sawi a ni mai" a lo ti hmiah. 

"I pawi a sawi lo, desk hnuaia i bag dah chu a har viau em ni? Engvangin nge kut i thlak kher? I va kawlh ve" nelawm loh zetin Miss Mapuii chuan a ti leh a. 

Melh kal chung hian, "Ka pawi a sawina a rei tawh. Min relna zawng zawng ka hre leh vek, ani hian min sawina chhan tur a nei lo. A thaw uih uih nen" a ti ta pek a! Thenkhat an khi ru suk. 

Rebeki lah a ţap titih tawh si. Principal hnenah an tir ta tawp a. Arini ngenzia chu an sawi zui nak nak. Principal lah chuan engtinmah action a lo la lem lo. A chhan pawh School neitu hian Arini chunga engmah ti lo turin a kut a lo phuarsak diam tawh a ni. Nie, mi hausa leh rethei inkar chu a danglam telh telh dawn. Kha thil thlen atang phei kha chuan Arini chuan huat a hlawh zual a, amah lah chuan pawi a tih hmel em em bawk si loh. 

Amah in a tla hrang nalh a, a thil eng emaw khawih hlek pawh a duh lo bur. Tupawh chu a look down vek a ni ber. A mizia chu mil a har ve bawk em a ni. Term exam a ni ta. Exam chawlh erawh an nei rei lem lo. Ruatfela'n answer sheet a'n check chu mak a ti viau. Mi thar ber khirh bawk si Arini chuan a subject-ah 89 lai a hmu ta tlat! A hawrawp a nalhin tihsual zeuh a nei mang lo tihtheih a ni. Result an buatsaih ni pawh chuan mi dang pawh chuan mak an tih thu an sawi ve sap sap mai. Chiang takin Arini chuan pakhatna dinhmun a hauh ta vang mai. Lehkha zir a thatchhiat hmel tehlul nen. 

Kar khat an chawlh ve zuai avangin Ruatfela chuan hawn ngawt aiah tiin an thenawmte insakah inhlawhna a dil ve a. Vai mistiri helperah a ţang kar tluan, mahse, a hlawh a chhe lem lo. Sawma pakhat a dah hran leh hnuah a bo a bang awm lo vin a nute a thawn leh nghal. 

"U Ruatfel, tlaivar ve i tum em? "Zanriah a ei laiin an in chung nula in a lo ti a. A u fapa harh zet a rawn hruai tel bawk. 

"Ka hre chiah lo. Ka chau riau mai a, tlaivar em lo in va lan ve zawk chu tha ka ti" a lo ti a. An in atanga hla vak loah tlangval pakhat a inawkhlum a, lumen a ngai a ni. 

"Nia, kei pawh naktukah Chaltlangah ka u te puih an ngai dawn sia, tlaivar chu ka peih vak lo. Min lo sawm la" a ti puat a. Mami hi nula khal zet, nuih heh deuh a ni a. Ruatfela nen pawh an inpawh ve viau tawh. 

"Umm, Muantea a kal dawn em? " a ti a. 

"Ani te chu Mat-ah sangha man turin a riak daih alawm. Ka pa phal lo chung a kal leh kha" Mami chuan a lo ti hlak hlak. A nuam tih ber kha a ni miau a. 

"Aw le, nih chuan kal hma ila, ka lo sawm dawn che nia" Ruatfela chuan a ti a. Mami pawh a nau kaih nen an chho leh nghal. A hnathwwhna lamah a chau viau naa han lan loh a hreh ve deuh si. Phur vak loin a insiam a. Khua a vawt lek lek, chhun lamah ruah a sur bawk nen. Mami nen chuan mitthi in lam an pan dun ta a. Mitthi in thlen hma hian tuikhur a awm a, mahse, a ţawp angreng. Addict ho hian an hmang tangkai viau. Tuikhur zawn an thlen chuan Ruatfela chu a ding chat. Tuikhur bula lung remah chuan Arini leh mipa amah ang rual vel tur hi an lo thu dun a. An ni pawn an rawn hmu. Street light a lo eng bawk nen. 

"Arin, hetah eng nge in tih? " a ti khawmawi a. 

Ner sak chungin, "Kan leng. Hetah chuan kan sir i ni lo ania " a lo ti chang rât. Ruatfela chu a lai lek lek. 

Biak leh mai dan tur a hre si lo va, an kalsan ta ringawt. Mami chuan, "In student a mi? " a ti sap a. 

"Aw nih kha" a lo ti ve mai. 

"A va nasat hmel ve" a ti hlak a. Ruatfela a nui ringawt. Exam chawlh lai a nia, an enjoy ve aniang a ti rilru a. 

Mitthi chu thalai a lo ni bawk a. An lo awm nual tawh. He tlangval thi ta hi Johny-a a ni a. Hetia a inawkhlum ta mai hi khawtlang mak tih a hlawh hle. Mi fel tak, zuk leh hmuam pawh ti ngai lo a ni a. A chhan tur awm ang an hre thiam lo kher mai. Uitu leh suntu a ngah bawk a, ţap ri a khat deuh reng mai. Ruatfela te pawh a tlar hnunglam chuhin an va thu ve a. Zai a nuam chho viau bawk. Mihring nunna hlutzia a ngaihtuah neuh neuh a, a nau chiah Zawmpuia khawsikpui vanga a thih lek lek lai te a chhuikir a, theihtawp chhuahin neihthinglungkhawmg takmeuhin damna run an bel a. Chutih lai kara nunna hlutzia hre lo lêka mahni nunna chhat mai te chu a dem lek lek. An harsatna a hriatpui lem lo bawk nen.. 

Zing lam dar 1 a ri hnai a, thingpui an rawn sem lai takin Ruatfela te hma chiahah chuan Arini leh nichina a bula lo ding mipa te kha an rawn lut ve hlawl! Arini chuan phone a kheuh nghal char char. Hla a hre vak lo pawh a niang. Ruatfela chuan mak a ti ru viau. Ani ang rual mitthi ina kal an la awm si lo. Thingtlangahte chuan kal rual chu an ni ve reng, khawpuiah erawh thalai an la tam bakah Arini te ang chu naupang anga la en an ni mah zawk. Lian uaih mah se.. 

Thingpui a ban mek laiin mi pakhat hi a rawn kal tlang thut a, a thingpui ken chu a pial thut a, a baw ta. Arini hnungzangah tak a buak ta a. A ding uaih. A sa deuh bawk aniang. Ruatfela chu rum em emin a melh a, ring leng lawng hian, "I rui mi a. " a'n ti piap mai a. Ruatfela chuan a hnar a hmu lian ngei mai. Mi zawng zawngin an thlir thup bawk si. 

Mahse, a rawn sutupa khan, "Ka thiam loh a nih kha, ka hmanhmawh lutuk a" tiin bengdaih a lo tum ta vat a. Arini chuan chu pa lam chu hawi lehin, "Mawl lutuk" a ti hluk a. Thutphahah a thu chawrh. A tum nghal bûr mai. Mami chuan nasa a ti ngang aniang, Arini hriat phak ngei tur hian, "In student a ni lawm ni? A va zak lo rem rem ve. A mawl hle bawk aniang" a ti ta hmiah a. Arini a rawn lehhawi rang viau, "School a ni lo aw he lai hmun hi. Ve mai mai a che. " a rawn ti bak hlar. A tawng ring vak lo va, an bul hnai ami te chiahin an hria. Ruatfela chuan Mami chu a khap ta vat a. Thingpui in zawh hnuah hla 6 vel an sak leh hnuah an haw ta daih a. Hawn kawngah Mami chu a ang hlak hlak mai. "Khatiang hmeichhia kha hriat pawh ka la hre ngai lo e a.. A va chapo em em ve leh" tiin. Ruatfela pawh chuan, "A pa hi ex minister a nia, chapo pawh a awm ve reng mai" a lo ti dam dup. A rilru erawh chuan Arini chu ţhuai nawk a chak ve hle. A school naupang mai maiin khatia chaltlai lutuka a be ngam kha amah pawh a inenlet hial! Zah ka phu lo aniang tiin. Mahse, Arini mizia a hriatsa deuh vangin a inthiam lohna a nasa lem lo. 

School an ţan leh ta. Kum tawp pawh an hnaih chho leh ta viau. Ruatfela chu phur takin a kal leh thoh thoh a. Thawhpuite nen an han inhmu leh chu a hlimawm ve reng reng mai. Judy chuan a lo be nghal sar sar. Judy hi a hmel chhe hran lo, a te ve deuh a, Ruatfela aiin a upa hlek bawk. A sam a tan hmarh a, naupang fel deuh a ang. Langsar si lo hian Ruatfela chu a care thei hle, an inah pawh vawi hnih lai chu a va leng ve tawh. An fel chhungkua viau mai. Mahse, han iaina chhan tur awm lo mah se; Ruatfela hian amahah kim lo awmin a hria a, aw a la pawh duh lo tawp mai a ni. A be chhe chuang lo a. 

Class XII room-ah a lut a, an school hi Arts lam an tlem zawk a. Science leh Commerce hi an tam. Science stream-ah hian top ten-a lan chang an nei fô mai. 

Arini pawh a lo thu leh khar mai. A sam dum hlap chu sang zetah a ţawn kawh a, a hmai ngo zet chu a langsar hle. Ruatfela chuan thahnemngai takin lecture a pe mawlh mawlh. A ţawng mawlh mawlh laiin Arini chuan a note-ah hian eng emaw a lo ziak mial mial a. Ruatfela chuan thungrulh a duh ve deuh ve, "Lalrinsangi, eng nge i ziah? A pawimawh viau em? " a ti chang fal a. Arini a rawn hawi chhuak rang hle. 

A ding a, "Ka ziak mai mai" a ti sap a. 

"Ka class-ah chuan ngaithlatu leh zawhna nei chiah ka duh. Zawhna nei ka tihah khan zirlaibu nen inkaihhnawih ka tihna a nia" Ruatfela chuan thutak zetin a ti a. Arini chuan a hmui tisawiin, "Sorry sir" a ti sap a. Pawisawi lo zetin a rawn melh. Han hauh vak theih ni hek lo. A thuttir ta nge nge a. Mahse, khatia a han dintir vel kha chuan nuam a ti ru tih a inhre reng. School a ni tawh miau a.. 

Lunch break laiin Arini leh an class ami Mesaka an rawn inzui lut a. Mesaka mitko chu a kak hnu mai. Arini biang dinglam pawh a duk deuh. An class CR a rawn lut ve nghal zat bawk. 

"An insual a" a rawn ti! An lo thaw hak. He hmeichhia hi a pui mah mah a ni. Miss Mapuii a kal loh vangin Ruatfela chuan a lo buaipui a. 

"Eng nge in intihbuaina bul. " a ti a. A inla nelawm loh hle. 

Mesaka chuan, "Tiffin a ei laiin kan infiam a, duster-in ka vawm fuh palh a.. Chu chu a rawn kal a, min rawn hnek nghal ringawt" a ti a. A thaw sûk sûk bawk. Mesaka hi harh ve tak, mi pawi erawh sawi ngai lem lo a ni. 

Arini chuan rum zeta lo melhin, "Min vawm lui anih kha.. Ka hmaiah pawh chalk a kai bawk. " a lo ti hlar a. 

"Aw le, naupang in nia, eng emaw chang chu a awm ang. Principal bulah ka sawi lo mai ang. Rinsangi phei chu i hmu tawh lehnghal. Tun laiah lo insual kha a thing tawh. Vawi khatmah ching tawh suh u. Ngaihdam indil ru" Ruatfela chuan a ti thak thak a. 

Mesaka chuan zawite hian, "Min ngaidam rawh" a ti sup a. Arini chu Ruatfela'n a va mitmei ve a, mahse, "Sir, ka dil lo zawk ange. Thinlung taka ngaihdam indil loh chu a ho tlat. Chuan, ka la ngaidam thei lo bawk. Tihian min awmtir mai rawh" a ti ta hmiah mai. Ruatfela a dang titih. An sir pakhat Zotea'n a lo chhan vat, "I va kawlhrawng reuh ve. Eng ang mi nge i nih? I pa nihna te leh in neih rosum vanga hlau viau turah che min lo ngai a nge. Chutiang kan ni ve hlek lo a nia. Ngaihdam chu dil rawh" a ti ram ta hmak hmak a. Arini chuan a mitmenga huatna tel chungin, "Ka tihpalh" a ti zawi ta sap a. An inchibai tir leh hnuah an chhuahtir ta a

"Saw tiang te lo admit reng reng, an school atanga an hnawhchhuah chhan pawh thil dang vang a ni lo vang. Chapo reuh lutuk mai" Zotea chuan a ti nang nang a. Hmeichheho in an lo zawm tliar tliar. Ruatfela erawh tawngtam lo tih takah a ngawi daih. Arini mizia chu mak a ti. A ngei tho naa, a lainat tel bawk. Engvanga lainat ringawt nge a nih a inhre lo. 

An school bang, in a luh rualin a nu call a lo kal a, a chhang nghal. "Mama, hei Atea hi a kaih vak mai a. Tunah chuan damdawiinah kan awm mek. Rawn hrilh loh che kha thain ka hre lo va. Tunah tak chuan an jection a, a zia deuh e" a rawn ti a. A thlabar hmel angreng. Ruatfela chuan hlauthawng takin, "A va han pawi ve aw, Aizawl lamah te rawn kalpui theih nise, khalam chu inenkawl dan vak a vang sia.. " a ti a. 

"Nia, zanin hi kan han ngaichang rih ang a, a tul anih leh kei leh Mampuiin kan rawn kalpui mai ang. I pa a zia ta hlauh a, a lehlamah chuan a zia tak a awm e. I rilru te kha i lo tihah a nge aw" a rawn ti leh dap dap a. A nu thin hi chu aw. Atea chu a nau chiah, rilru lama chiang vak lo kha a ni. Hetia kaih hi a ching fo reng a, ngaia neih erawh a har deuh a ni e. Rilru helhkam ţûn chungin rawng a bawl a. In chungten an pek, samţawk chu a chhum tawp a, Dal kangin, artui a fry leh mai ang chu. A inbual lai chuan Arini a mitthlaah a rawn lang dawt! Amah pawn mak a inti. A kawlhin a huaisar si, milian chhungkua an ni a, zirtirna a dawng tha vak lo em mawni dawn ni. Hetiang nungchang a nei tlat hi. Zanah erawh a tuk atan a inbuatsaih a. A nute a call zeuh zeuh bawk. A nau pawh a muhil thei tih a hriat takah chuan a awm a nuam huai mai. 

Office a thlen chuan dawhkan pakhat an lo kil bial laih. "Eng nge a? " a ti lut a. 

Sir Puia chuan, "Hei Zotea hi an rawn ban ringawt? " a lo ti! Ruatfela a ding chawt. 

"Engvang chuan" a ti nghek. 

"Heta an ziah dan chuan naupang lakah tawngkam mawi lo a hmang tih a nia" Miss Maremi'n a lo ti var. 

Ruatfela chuan awki sang lek lek hian, " A va awihawm lo tak" a lo ti hluai a. Staff dangte pawh chuan awm an tih loh thu an sawi ru sep sep. Rin dan leh ngaihdan an nei ru ţhûm. An sawi chhuak lo thung. An school neitu Pu Ramtea thu ang veka kal an ni miau a! Principal Pu Siama pawn thu a nei tehchiam lo tlat! Minister hlui fanu zualko chuan nghawng a nei thui hle a ni mahna le. 

Zotea thlahna hun hman an rawt a. Amah chuan rem a ti lo nasa. Tin, hetia ban a ni ringawt hi a lawm lo tho naa, "Thil dik lo tak an tih vang hian eng emaw tak zawng an la tawk khawp ang" a ti hmiah. 

Lehlamah ani chu computer a thiam tel bawk a, hna dang chu a huphurhawm lem loh. An hlawh a tam falua si lo va, a bang pawh chu a thawventhlak huai zawk maithei. Mahse, warning pawh pe eih lo va an ban nghal ngawt chu a fuh lo. Principal pawn Zotea mitah a en ngam meuh lo. Ani chu hmanrua mai chauh a ni si a. 

Ruatfela ngaihdan pawh a ni lo nasa. Amah mi ţawngtam lo a nih vang erawh chuan eng em em a sawi lo. Zotea nen phei chuan inkawm thei ve tak an ni a, a rualpui awmchhun a lo ni bawk nen. Pawi a ti a, a tui loh phah vek. Tin, Arini chu a ngei takzet bawk. Mahni student ngei tlat chu a dikin a hre chiah si lo, mahse, a nungchang leh mizia mi chungtlak zet chu a kham thawkhat. Amah ai mah chuan hmeichheho chuan an ngei zual, awmkhawm let letnaah chuan an sawi sap sap zel. Principal tak pawh hian a ngei ru ve ngawtin a rinawm. Pu Ramtea a thu vet vet bawk si. 

"Sir, he lai hi ka hrethiam chiah lo" tiin an class-a nungchang zawiawi ber Nunpuii chuan a ti a. Ruatfela chu a phei nghal vat. An han inhrilhfiah a. 

"Sir ka zo" Arini aw in a rawn ti lauh. A va ensak a. A lo tidik leh thlap, a thiam chak si, a thiante zai a ngaih hun a awm lo thei lo va. 

"Umm i thiam tawh tho bawk a, i haw thei ang. " a ti ta a. Arini chuan, "Ban a la hun hleinem" a lo ti hap a. 

"Last period a nia, i bang thei. I thiante hi en pui an la ngai a. Tihtur i nei tawh rih lo" Ruatfela chuan a lo ti fak a.. 

A bag a la a. Chhuah pah chuan, "Inla thu ve siah" a ti leh kher. Ruatfela bengah a ri ring viau mai. Mi dangho pawn an melh ţhap. 

"Ding teh" a ti hrâwk a. Arini a ding chawt. 

"Eng nge i sawi kha.. Tuna i sawi kha zirtirtu te bula sawi tur a ni em? " nelawm loh zet hian a ti a. 

"Ka be lo che keimah leh keimah ka inbia" a lo ti ve sak. 

"I nungchang chhe lutuk hi hrem i ngai anih hi. I thutnaah va thu rawh. Mi zawng zawng ban hnuah i bang ang" mitmeng nelawm loh zeta melh chungin Ruatfela chuan a ti zawi ta sup a. A hmel landan a tak em vangin Arini chuan a su lui ngam bik lo nge, a va thu leh ta hnawk a. Ngaihsak zui miah loin mi dang ho chu a ensak ta daih. Arini chu a thu ve ngar ngar. An bang pheuh pheuh a. Ban dar pawh a ri ta hial mai. An bang kim ta. Arini erawh amahin a la thu ngal mai. 

A kekawr ipte zen chungin a va pan hnai a. 

"In hausa ka hria, i pa nihna pawh ka hria. Chumi anih vang chuan hetah hian lalber i ni lo tih erawh hria ang che. Zirlai naupang i ni a, in zirtirtute hi nangni aia rethei leh changkang lo pawh kan ni a ni thei. Chumi anih vang chuan min hmusitin min kalpah thei tihna a ni lo ania. I mizia hi i sim vat lo anih chuan eng emaw tak chu i la tawk khawp ang" a ti ta hmiah hmiah mai. A thinrimna a lo up khawl tawh bawk a. A zahpah peih lo. Pu Ramtea'n ban daih mah se pawi tihna a nei tawh lo. He hmeichhe naupang hian an nun a tikhawlhkham tlat. 

Arini chuan a rawn melh kal a, a kut zungtang a elh niap niap bawk. 

"Ka mizia hi ka zir chhuah a nih hi" a ti ta sap a. Ruatfela chuan a hre sual emaw a inti hial. 

"I zir chhuah duh mizia chu a va tha lo ve" a ti a. Tlemin a aw a dam deuh. 

"He tiang mizia hi nei lo ila chuan ka thi daih tawh ang" a la ti ta deuh deuh. 

A mak a ti telh telh mai. 

"Engvangin maw?" a ti hâ a. A rawn ding chhuak a, "A chhan ka sawi thei lo. Mahse, phuba lak nan he mizia hi ka neih a ngai tih hria la a tawk mai. Chuan min en liam ve mai rawh. Ka chhuak tep tawh tho. Khawngaihin" a ti tham chhal a. Khawngaihin tih thu te a sawi ve! 

"Aw le.. Engpawhnise, i mizia chu i duh chuan lo nei zel la. Mahse, chaltlai leh hnuai chhiah taka mi dang biak sim tawh ang che. A chiang em? " a ti ta khawl khawl a. 

A bu nghat. "Ka lo tum ang" a ti sap a. Ruatfela chuan, "Haw rawh" a lo ti sup. Ngawi rengin Arini chu a chhuak ta hnak hnak a. A thin a rima a hauh hrep dawn hian ti nge maw a lo nem zel reuh ni.. Mipa dang kut a thlak ang te khan kut thlak han tum se han in nuai rep rep te a chak deuh asin mawle.. Mahse, zirtirtu a ni tak alawm.. A zirlai naupang chunga chutiang rilru a pu ta mai chu nep a intiin a inzahpui. 

"He naupang chhungril nun hi ka hriatsak ngei a ngai a ni" a ti rilru a. 

A phone a rawn ri ral ral. A nu a lo ni. 

"Mama, i nau kan rawn pheipui mai dawn e aw.. Hei kan rawn chhuak dawn chiah e" a rawn ti a. A bengchheng hle. 

"Aw le, ka lo hmuak ang che u" a ti a. Hmanhmawh zetin school a chhuahsan.

Hmanhmawh zeta an sir kal liam chu thlir zui vang vang pahin, "Tu nge maw i nih teh hrep le?! Min thunun i tum ve chu a ni si a.. " a ti zui sap a. Ner nâwng chungin a scooty a start a. Chak zetin a inkhalh liam ve nghal. 

Hringnunah hian kan hmelma te aiin kan hmangaih leh ngainat te hian min tina zing zawk. A chhan chu kan hmangaih miau a!