Drose 9

D'ROSE...  (Chapter - 9)

Ziaktu : Toni Râlte

"Hello, Pu Vanlala maw? Aw hei i tunu rubotu kan man tawh e" Pu Vanlala a ding ngil zawt. 

A rang arangin Diteii te nupa a ko nghal chul a. Pi Zawmi erawh roomah a awm daih. 

"An man e. A va lawmawm em. Kal vat ang u. Heti taka ka chhungkaw chunga buaina duhtu hi ka hmu duh" a ti ram hmak a. Diteii te nupa an insiam nghal. Drose pawh an hruai ve ta mai. Enkawli class a kal tawh dawn si a. Pi zawmi kuta dah ngam chi ni lo chuan. Police station chu an thleng rang kher mai. Officer pakhat chuan a lo hui zauh a. Lock up a panpui nghal. Bang ngheng hian a lo ţhu zawi hniang a. Chhuat lam a melh ran bawk. Ngun taka an en paw'n tu nge anih an hre thei hauh lo. 

"Engvangin nge ka naute kha min ruksak a? " Diteii chuan bar vuan chung chuan a ti khur dat dat a. A rawn melh râw a, a mit a la lehnghal. 

"Tu nge i nih? " Dinfela'n a ti thung. 

Chhan a tum tak si loah chuan Officer chuan a dawhkan lamah a hruai phei hlawm a. An man dan a sawi ta a. A rukin an lo chhui ve reng a. Rinawmi Lungdai khua an han zawng a, chutianga naupang rubo duh tur an lo hre lo. A thlalak fiah vak lo an han entir paw'n tuman an lo hre tlat lo. Anih chuan he nu hian hming lem leh address lem a hmang tihna a ni thei. A kalna tur awm ang chhui a harsat tak êm vangin thang an kam thluah a. A kal fôna hotel lam pawh an be pawp bawk. Mahse, mi mawl a lo ni bik lo va, a kal duh tawh hauh lo. Aizawl khawi laiah emaw chuan a awm ngei an ring a ni. 

Zan khat an round-na lamah tlangvalho lo intibuai chu an va khawm a, a thlirtu mipui zingah chuan an mi duh hmelpu chu an hmu ta tlat! Mipui kha an tam vak lo bawk a. Rang taka bawhzuiin an zui ru a, zan rei tawh lam dar 1 dawnah veng pakhat mawng lam, thlanmual thlang lawka building turu zetah an um lut ti mai ang, a lut lai an hmu ta a ni. Kha nu khan khalai intihbuaina hmunah khan eng nge a tih tih an hre lo. Chu chu a pawimawh ber hran lo bawk. Tichuan, chu in neitu chu Putar hausa zet, a sum hmuhna ber hriat hleihtheih loh, ngaihthatthlak si loh Pu Dintluanga in a lo ni reng mai. 

Pu Dintluanga hian Aizawl veng hrang hrangah in a nei thluah a. A in luah man ringawt pawh chu thenkhat thla hnih hlawh vel a niawm e. Mahse, hetia a rawn lian thut hi tuman a chhan an hre lo. Man ngawt dawna fiahna awm si lo ang kha a ni ber. Kha nula kha Dintluanga inah eng nge a tih ang? A hmeiah a ţang nge a awmpui zinga pakhat. A rukin an veh ta reng a. Pu Dintluanga hi nupui sûn tawh niin fapa pathum a nei a. A upa ber chu USA-ah hnathawkin a awm a, a nau chiah hi Champhai lamah dawr neiin an lian hle bawk. An naupangber erawh Delhi-ah eng hna nge a thawh hriat lohin a tamtal bawk. Chuvang chuan kha hmeichhia kha a hmei or a nupui angah an ngai. A hausa a, hmeichhe nalh tak tak a hruai lut fô! Neih êm chu a nei hlawm lo naa, a nghei ngai mang lo vang. Mahse, mi hausa na nâ na chu an mualpho mawh khawp a, Kohhran leh Khawtlangah sum tam tham deuh deuh a sih chhuahsak fô a, an nin lawm takin an lo dawng bawk a. Sawichhiaa timualpho ngam an awm tlat lo. Hei hi kan zoram kalphung dik tak a ni tawh reng bawk a. 

Invehthlem kual reng chu an ning ta bawk a. An zuk hling ta râwih mai a ni. Pu Dintluanga hian ukil a rawihsak ngei a rinawm a. Thil a tithei si a, a phutawk hremna pawh a hmu ngût lo vang. Chu chu an man dan a ni. 

"Min huat vanga ti ni ta se, amah saw kan hre ngai si lo. Engvanga min haw viau nge a nih ang le? ' Diteii chuan a lo ti chuai raih a. 

"Kan la be dawn alawm.. Lo mangang suh. Kan nula ten an han dâwp anga, a inzep hlen theih ka ring lo. " Police chuan a lo ti a. 

"Aw le, kan lawm takzet, theihtawp min chhuahpui a, naute hmu let mah ila, engvanga kan naute kher rua khalai hmuna hnutchhiah nge anih kan hre châk takzet a ni. Sum duh vang ti dawn ila, vawikhatmah sum a rawn phût bawk si lo" Dinfela chuan a lo ti ve vat a. Police pawh chuan a hriatthiampui kher mai. Drose rutu hmuha man a nih tak avang chuan tlem chuan an thlamuang ta deuh. 

An haw a. Pu Vanlala'n an nu ţhu ngawi reng chu a be nghal, "Eng inzawmna chiah nge in neih ka hre duh a ni. Amah saw kan hre ngai si lo. Eng emaw tal sawi teh. Chutiang anih loh chuan ka inah pawh hian hmun i chang lo ţêp tawh ang" a ti ta hmiah a. 

A rawn melh zawk ringawt. "I sawi dawn lo maw? Kei i pasal leh i fate hi min bum char char tihna a nia. Eng ang nu nge maw i nih le? Nge saw nu chuan a vau bet zawk che em ni? " a ti leh hrãwk. Pi Zawmi mittui chu a tla ta a. A ngaihna a hrethiam lo kher mai. 

"Paa, engmah tih ka nei lo tak tak alawm.. Hei chen i tan ka rinawm a. I fate pawh ka fa ang chiahin ka enkawl ve bawk. Ti nge min rin theih loh? " ngenngawl zet hian a ti a. 

"Rin theihin khawsa hek lo che. I kut aţangin i tunu an rubo ania. Kut pawh tuar loin him pialin i lo haw leh thei bawk.. I thusawi zawng zawng kha rintlak a awm lo tlat a ni" Beidawn hmel zet hian a lo ti a. An nupa kar chu khi thuk tawh tak a ni. Nupa inngeih deuh kha an ni ve ţhin asin le.. Pi Zawmi hian thudik a lo sawi reng nge.. a phènah hian thil dang a awm zawk.. Hriat va ni suh. 

"Eni, I hah si a, awmpui tur kan zawn belh dawn nia. Keiin ka pui hman bawk si lo che a" Diteii chuan tuilum thlit chhuah pahin a ti sar sar a. 

"A ngai pawh ka ti vak lo. Mahse in thu thu, U Ruati ang kha chu ni tawh lo se". A lo ti a. 

"Bena nen in ţha zel maw? " a lo ti zauh. Eni zak chu a sen ap ap a. 

. "Ţha a ni mai. A thikthu a chhe lutuk a" a lo ti ve mai a. A nui deuh bawk. 

"Ţha deuhin enkawl rawh. Bena chu thu a awih thei alawm.. " Ditei'n a tih lai chuan an pa a lo chhuk a. A inchei smart viau. 

"I va'n nalh" an nuin a lo tih chuan a khi var var a. 

"Kan meeting dawn a, hetia smart ve hi a ngai alawm.. Ka kal ang aw.. " tiin an nu hmuiah a chuks zauh. A chhuak zui nghal. 

Pu Vanlala pawh a insiam mual mual a, an nu chu a be leh tawh rih lo. A la hma deuh bawka tiin sitting roomah thingpui hang in in a ţhu leh rih a. Diteii chu koin, "Zanin chu thu pawimawh deuh sawipui che ka duh a. Inpa pawh ka la sawipui tho vang. Programme lo insiam lo la aw" a ti dam thluam a. Diteii pawh a lo aw ve nghal zat. 

Sangzuala a lo thleng a, Library roomah hna an thawk ta thung. Eni pawh a kal tawh. In chu a reh leh ta tlawk tlawk mai. 

"Innei ve tawh mai ula" Diteii chuan a ti a. 

"Ka hnial hran lo. Amah hi laklawh a la inti tlat a. Bakah kan kohhran inan loh hi chhuanlamah a hmang zel a. " Sangzuala chuan a lo ti ve mai a. 

"Awiii a ho ka ti.. Ti ila, an tan chuan a ho lo ve thei tho. Kohhran vanga inneih theih loh hi chu kei ka rilrem zawng a ni ve lo reng reng" a ti ve bawrh bawrh a. Sangzuala pawh chuan, "Ka pa lah kan Kohhranah upa a nih piahlamah Secretary a ni sia, ani Rosy lah a pa hi an kohhran chairman a lo ni ve bawk. Amah hi chuan a hreh em em ka ring lo va, a chhungte ber hi" a lo ti ve a. 

"Buaithlak, a dang zawng mai ila" Diteii'n nui chungin a ti a. 

"Pawi miah lo. " tiin Sangzuala pawh a nui kur kur mai. An thawh dun fô vangin an inpawhin an innel tawh viau. 

"Diteii hi i la naupan nen i puitling reuh ka ti, hmeichhia hi chu fa in neih chuan in puitling zel a. Mipa hi chu puitlin a har a ni" Sangzuala chuan a ti leh daih. 

"Puitling lo nasa, kan pa hi lawm puitling chu. A kum ngaihtuaha a patlinzia ka hmuh hian ka ngei lek lek zawk. Ka pa hian a enkawl thiam aniang" a lo ti ve a. An pa hi chu a chhuang ve bawk êm a ni. 

"Chuan, ti daih ila, kan film tura changtunu atan chuan kan model-i chu i duh tak tak maw.. Kei acting a thiam vak ka ring lo asin" Sangzuala chuan a ti a. 

"Thiam turah ngai ang. A zeihawi reuh alawm. Reuh han ti ila, kei aiin a upa daih tho a.. Han risk ve tawp ila, a lo ţha phian maithei asin" Diteii chuan a ti a. 

"Ka cousin sawn role neih ve min dil fó a, ani saw sap ram return a ni bawk a, a hnehsawh viau ang em aw ka lo tia" Sangzuala chuan a pen tuaivir pah chuan a ti a. 

"U Malsawmi kha maw.. Nia, a hmel ţha a, a zei phian pawh ka ring. Puia hi rawn ve leh ila, in tih dan dan ka pawm" Diteii chuan a ti a. 

"Nia, Malsawmi sawi hi chuan tlemin i danglam ziah. Engmah a ni tawh lo. Ani pawn bialpa a nei tawh alawm. In pa hian a hawi tawh lo vet vet em a, a beidawng tawh aniang. Khati lamah kha chuan lungngai lo la ka duh" Snagzuala chuan a ti a. 

"Ka lungngai pawh a ni lo. Amah zawk hian nuam lo a tih ka hlau a. Chuvang alawm" a ti naa zep nâk emaw Malsawmi a hmuh hian amahah danglamna chu a awm ziah alawm.. A hmel ţhain a nalh si, a la luahlan mai te a hlau a ni. A zak lo bawk si a. Mahse, Sangzuala leh Puia ten lak an rawt paw'n hnial tumna a nei hran lo. 

Drose a ţap a. Rang takin a va la nghal. Hnute a pe a, Sangzuala awm mah se, a hlim lang mai. A ringtawk bawk a. 

"Drose rutu in hre tlat lo kha a mak ka ti." A lo ti thawp sut a. 

"Nia, kei deuh hian mak ka ti. Ka fanu ru bo duh khawpa min hawtu chu hriat ve awm tak" a lo ti mai a. 

"Ngaibtuah vang vang la, i hun kal tawha nangmah haw ngawih ngawihtu i hmelma kumhlun an awm em tih te.. Chu mi chu a lo ni thei reng asin. Tun laia hmel hmai thlak a har tawh si lo" Sangzuala chuan ţhahnemngai zet hian a ti a. 

"Umm pakhat chu a awm a. Mahse, a thi tawh sia" Diteii chuan a ti a. Teteii lo kha chu tihtakzeta amah haw duh tur a hre ngang lo a ni. 

"Nia a mak ee.. Mahse, hunin a la hril ve mai ang" Sangzuala chuan hnem pahin a lo ti a. 

Dinfela pawh an meeting rei bawk a, a mawng a kham ţhûm mai. District hrang hrang aţanga kal khawm an ni bawk a. A hriat loh pawh an awm nual mai. 

"Ka hmuh tawh hnu i ang e" A hnung lam aţang chuan a rawn ti a. A lehhawi chuan nula lian lutuk lo, smart zet, hmel hlim tak a hmachhawn a. 

"A ni maw? Ka common ve alawm.. Kei chu" a ti a. An inchibai zui nghal, "Saidingliani ka nia, Lunglei aţangin ka lo kal. " fel fai takin a ti a. 

"Ramdinfela ka nia, hetah a hmun nghaktu ka nia. Khawi vengah nge i innghah? " a lo ti ve a. 

"Thakthingah ka innghat, ka nuteii te inah. Chuan Delhi-ah i awm tawh em? " a tih zawm zat a. 

"Awm ve reng tawh e, i awm tawh zawk mi? " a lo ti vat. 

"Chuvang anih chu ka hmuh hnu i ang ka tih. Awm ve reng e" tiin a awm kum a sawi a. An awm kum a lo inang chiah bawk. Khawi laiah emaw an lo inhmu tawh a ni ngei ang. Meeting chhunzawm nan darkar chanve a la awm bawk a, coffee in pahin an titi char char. 

Saii chu nula vengva tak a ni a, a hmel chu ţha lutuk tia sawi theih ni lo mah se; a nungchang zangkhai leh confi tak chuan a tilang changkang ngawih ngawih. A vun erawh a ngoin a mam hle thung. Dinfela nen chuan an inkawm thei phian mai. An sawi duhzawng leh an tui zawng a lo inang lehzel bawk a. 

"Nupui i nei tawh mi? " a ti thut. 

"Umm nei tawh e, fanu pawh hmel tha tawk ka nei tawh" uar zetin a lo ti a. Saii a lo nui hawk hawk. 

"I hawn hmain chaw i lo ei ve ang chu.. Kan nu pawn kawm nuam a ti ngawt ang che. " Dinfela chuan a ti luam a. 

"Nia, kan la sawi ţha dawn nia. Thil eng emawah pawh rawn duhna che ka la nei dawn a, i number min pek phal chuan" tiin a number a dil nghal a. Dinfela chuan a pe nghal. 

"Kei pawh pasal neih ka tum ve hnai a, ka hna laklawh vangin a hun kan sawn leh a, kumin Nov ah hian kan ti ve huk maithei" tiin mawi zetin a nui sâih a. 

. "A va lawmawm èm.. Min sawm ve phawt chuan ka rawn kal ve dawn nia" a lo ti luam a. Meeting ţan a hun leh tawh vangin Hall-ah an lut dun a. 

"Sawi rawh. Engvanga naute kha ru bo nge i nih a? Naute pi kha engtin nge i thurualpui theih? " tiin Lady police chuan Drose rutu Rinawmi inti chu a kuai dak âwrh a. A ngawi ngal mai. Mi luhlul ve tak chu a niawm e. Tin, heti ang indâwpna hi a lo tawng tawh fo a nih hmel bawk. 

"Sawi rawh. I sawi dawn nge a chi dangin ka zawt dawn che" Fiak ţhakin a ti leh. 

A nui sak a. A hmel chu a chhe lo, mahse, a mitmenga huatna chambang chuan a tilang nunrawng lek lek. 

"Pawisa ka duh vangin ka ru bo anih kha" a ti ta a. 

"Pawisa chu i va dil chuang si lo ve" 

"A chhan chu ka mamawh leh lo alawm. Ka mamawh leh loh vangin sawti lai hmunah khan ka hnutchhiah anih kha. A. Chiang em? " a ti chang fak. 

"Anih Drose-i pi kha engtin nge i thurualpui theih? " 

A nui hak hak a. "Kha pitar dawihzep zet kha maw.. Thurualpui tlak pawh a nih nek loh kha, thih pawh a hlau hle anih kha, a tunu kha min pe rawk rawk mai alawm. Chuvang chuan ani khan tel vena a nei lo" a ti leh fak fak a. Han inpuantir leh vak ngaihna a awm lo. Mahse, thil dik lo a awm ang tih erawh an ring. A ruka chhui zel zawng an la tum khawp mai. Pu Dintluanga pawh an thlithlai reng tho. Tisualtu ni ve lo mah se; eng emaw chenah a chenpui thiltih chu a hriatpui ve a rinawm tlat. 

Rinawmi inpuanna chu Pu Vanlala te pawh an hrilh nghal a. Pi Zawmi an ngaih dan pawh tlem chuan a dan phah deuh. Mahse, Diteii rilruah erawh, "Duati khu ka awm laia rukbo tur ni ta se, ka thih thlengin ka ţang ang" tih a awm. A tunu nunna a ngaihlu lo chu a lawm lo a ni ber mai. 

Zanriah ei khamah pu Vanlala chuan Diteii te nupa chu a ko a. 

"Hei ka kum a tam ve ţan tawh a. Bawiha lah in ka sumdawnna a tuipui ve mang si lo va, Dite, i hna hi nuam i ti tih ka hre tho. Mahse, Puia te pui pah zeuh zeuh chungin ka sumdawnna hi i enkawl pah thei tho lo maw? Heti maia thamraltir chu ka lo thawhrim tawhna ngaihtuahin ka phal meuh lo a ni" a ti ta dap dap a. Diteii pawh a inngaihtuah nasa khawp mai. A pa rilru chu a hrethiam em em, an pa pawh a hrethiam tho. Nunui kha la dam se chuan a enkawl zui thei mai tur hi a nia. 

"Nia, ka pa, ka lo ngaihtuah ve fô alawm.. Chutin a thamral ngawt thei lo. Zaninah kan nupain kan lo sawi dun ve ang a, naktukah kan inhrilh leh ang a tiraw.. Sumdawn lam hi ka timi tehchiam lo naa inzir theih vek a nia. Ka hreh lem lo, mahse, kan pa hian rilru dang te pawh a lo pu ve thei a" Diteii chuan a ti ta a. Pu Vanlala pawn a pawm khawp mai. 

Muthmunah an nupa chuan an han sawi dun a. Dinfela paw'n pawi tihna a nei lem lo. Mahse, an buaina ber chu an fanu a ni. Nau awmtu rintlak an hre lo, tumah an ringngam tawh lo. Chu ber chu an chai rei nupa khawp mai. An titi tui viau laiin Dinfela phone a rawn ri ta ral ral a. Thiangi a lo ni. 

"Ehe, i va reh em em ve, i dam maw? " Dinfela chuan a ti luam a. 

"In aţangin ka chhuak a, ka pain min hnawtchhuak" a rawn ti ţap ţuau mai. Dinfela a ţhu chhuak vat. Diteii chuan Drose a chul heuh heuh a. 

"Engvangin maw? " Dinfela chuan a ti hû. 

"Zantirah ka ţhianpa Lalawma nen hmana kan zu in naah khan kan va in a. Lalawma bialnuin a lo hre si, kan inah va kalin Lalawma nen tlan dun angin min lo va sawi a. Ka nute an zak lutuk si, ka pa a rawn kal a, min hnuk haw a ni mai. Min hau hrep a, keia rui lungpuam khan ka lo chhang let ve deuh nen, ka pa thin a thawk a, min namchhuak a" a rawn ti a. A ţawng danah pawh a la kai hmel angreng. 

"A va zia lo em aw.. Tunah khaw nge i awm? Khaw nge i riah ang? " Dinfela chuan a ti a. 

"Ka pu te inah ka riak ang a, naktukah Aizawlah ka lo chho ang. Ka nuteii te bulah ka awm mai ang ka tia.. " a ti niah niah a. 

"A pawi hle mai. I nuteii te ina awm a rem loh chuan kan awm aw. I duh hun hunah i lo kal thei ania" nelawm takin a ti a. 

Diteii bulah Thiangi chungchang chu a sawi luam a. Diteii pawh chuan zia lo a ti ve hle. 

"Zu hi chuan ţhatna hi a nei lo a ni tiraw? A in ţhin te hian in fak mawi mai pawh a" a ti sar sar a. Dinfela a khi suk duh chauh. 

"Kei chu hmana ka juice in vanga ka mualpho hrep aţang khan far khat mah ka in tawh lo. Tui ka ti lo bawk si" a ti leh a. Dinfela chuan a rawn kuah thawk. 

"Hei vang hian lawm ka nupui i nih" a ti su su a. A hrawm nghal nawk nawk bawk. An nupa inchhaih thwwm hi an fanu hian a mangphan fô ta ve ang. 

Pi Zawmi chuan a pasal muhil hnar kûk kûk chu melh ran chungin a tho ţhem ţhem a. Ke lawngin an room chu a chhuahsan a. Bathlarah chhuakin van lam a thlir vang vang mai. Arsi chu a pe un a, thla pawh a eng viau. Thlifim a thaw heuh heuh a. A bianga mittui luang ngiai ngiai chu hruin, "Tunah te hian a ril a ţam awm si a. Nge a muhil mek zawk ang le? " a ti sap. Tu tak sawi ang maw? A hnung kawngkapui phèna ngawi renga ding reng a pasal thawm chu a hre miah lo a ni ngei ang. Pu Vanlala chuan lainat hmel zetin a nupui chu a melh vawng vawng a. Engmah a hrethiam lo takzet. Pi Zawi rilru hi a buai ta nge tu ten emaw an bum mêk zawk? Hunin a la hril ang chu. 

Door bell a ri ral ral. Enkawli'n a va hawng a. Tukţhuan ei kham hlim niin mi dang chu an roomah an insiam hlawm nge, an tawm bo leh diak a. 

"Aw lo lut rawh. Eng nge ni ta? " tiin a hmaa nula sang angreng tak, cher lam chu nelawm takin a bia a. 

"Dinfela te in a ni em? " a ti a. 

"Aw ni e, lo lut rawh" tiin an inzui lut a. 

"Amah ka van hmu duh em.. Khawngaihin" a ti leh sap a. Zu ţhing rim a nam deuhin Eni chuan a hria. Leilawn bula ding chung chuan, "Au Din, miin an hmu duh che" a ti lang lang a. 

"Awii ka hmuh hnu i ang eee" nula chuan a lo ti a. 

.. "Kei pawh ka hmuh hnu i ang ve tho ka ti, Kolasib-ah in awm em? " Eni chuan a ti a. 

"Awm chiang e, Kolasib khua i ni ve mi? " a lo ti hlut a. Khaw khat na nâ na chu mak deuh hian chhungrilah a thawh dan a dang ve deuh ţhin. 

Dinfela rawn pen thla pâwk pâwk chu a lo thlir reng a. 

. "Thiangi teh hlawl chu.. I lo va thleng hma ve, Zing sumo-in ni maw i lo chhoh? " a ti nghal zat a. 

Thiangi chuan, "Umm.. Chu chu nia buaina ka nei a. Ka lo pan tawp che. Hei kan khaw mi a lo awm ve lehnghal" tiin Eni chu a nuih a. 

"Nia, Kan nu nî fanu alawm.. Hman zana kan va kalnaa an fanu kha" a lo ti vat a

"Ni dawn tak.. Awii ka hriatna te hi a chhe tawp. Enteh, ka nuteii te kha thla tharah an lo insawn daih dawn alawm. An pa hna avangin Khawzawlah an awm daih dawn sia, ka pa ten min rawn ngaihsak leh hma chu min thleng thei ang em? " Thiangi hi chu tlang taka thil sawi tawp chi a ni bawk a. Thenkhat tan chuan zak thei lo tih a awl viau ang. Mahse, a mah a frank êm vang zawk a ni. 

"Thei tuk e, i duh chen chen awm rawh. Khaw nge i thwwmhnaw? " Dinfela chuan a ti nghal zat a. 

"Pawnah sawn ka dah a" a lo ti a. An va la nghal. Diteii pawh a rawn chhuk ve a, Thiangi nen chuan an inchibai a. A ngainat chi tak niin a hre nghal. A chanchin tlem azawng a lo hre tawh bawk nen. 

"A ţha dawn lutuk, U Thiang, Eni hi class a kal daih zel sia, ka khua a har thei tawp a" a ti siam siam a. Thiangi chu chamrei inring vak lova kal a ni bawk a, titau tlan ang deuh anihna laiah thawmhnaw pawh a lo keng tam lem lo. Ruati room ţhinah khan a innghat ve ta phawt a. Pu Vanlala leh Pi zawmi te pawn an rawn be ve luam mai. An ni chhungkua hi zawng mi va ti hûrh chi an ni lem lo. A tlangnel thiam thiam an nuamsa a ni mai. 

Diteii paw'n a pa sumdawnna a enkawlpui theih thu a sawi thei ta bawk. Pu Vanlala pawh a pheikhai a zang hle. Chutihrualin an nu awmdan chuan a tibuai ru hle tho mai. Hmalak vak dan a hre si lo. Doctor te hi pan pui chi em ni dawn ni.. Amah hian a duh awm bawk si lo. 

Mike-a te nupa pawh khatia an picnic aţang khan an inhnaih sauh a. A riak ta zeuh zeuh. Mahse, sex erawh an hmang lem lo. A faten an ngai ve bawk si. Mike-a nauin nupui a nei ve dawn hnai bawk nen, engtikah emaw chuan a la insawn lut ve rup mai thei a ni. Hetihrual hian Puia te erawh induhtawk takin an la inhawisan ve ngat ngat a. Boruak siamsak tum viau mah se; Baby lo induhtawk ve nen, Puia tlawm hreh laklawh bawk si chuan eng a antir hleithei lo. A fate chhuanlama call zauh zauh erawh puia hian a ching. Baby hi chuan neih leh pawh pawi a ti hran lo, an chhungkua an khawsak a harsa chho ve ta deuh nen, a nuţa te nupui nen an la chengho dul dul a. Mo pahnih bakah naupang 6 dawn han awmkhawm chu buaina neuh neuh a awm fô bawk si. A rilru chu hah ve thei tak a ni. Puia lahin ngaihdam han dil mai a hreh tumhrang a. A bialnu eraeh a thlah hret hret thung. A bialnu hi mi nasa zet, pawisak nei lem lo a ni kher a! Puia tihlawm dan a thiam nasa si. "Mi pa a ngaizawng" tia mi sawina te chu eng he huah a ngai tawh lem lo. Neih ngei a tum bur mai a ni. Mak leh deuh chu a bialnu nu hian Puia chu Baby nen an inneih lai reng pawh khan zuk be chhe ngai hauh lo a mawle! Biak chhiat a hnêkin a fanu nen an chhuak dun leh an riak dunte chu an pa bulah a la phatsak zut zut zui! Khawvel tak hi chu aw… 

Rinawmi pawh Central jail-ah chuan phurhthlak a ni ve ta poh a. A tan hun rei zawng erawh Pu Dintluanga ukil chet dan a zir aniang chu. Bail theih a nih veleh bail a nih mai pawh a rinawm. Jail-a a lut tir erawh a rethei ve deuh. Jail tang ho bulah chuan luhlul leh putar hausa bula inlak no anga awm kual vel kha a lo ţangkai fahran lo va. Jail tang hmeichhe phawkphawhraw pui pui, an tan chhan inang lo tak tak te chuan interview tenau an lo nei ve chhap nen. A'n luhlul leh inla ngeng chuan ngei a hlawh nghal pang. An piai liam liam a, ţhian kawm tur pawh a nei lo. Amah a hmel ţha vawr si a, thìk tawk an lo awm ve bawk nen.. 

Mahse, Hmeichhe ze mak leh huatna thinlung pai a nihna chu thup hlen theih ni hek lo. Zankhat an in card den a, ani erawh a tel ve lo. An ri laih laih mai. An zinga thunei ber Zaui chuan Rinawmi chu, "Nang ka sam ţuak hi lo pawt teh" a ti ram hmak a. A inti lal thiam ve bawk nen, a chakin a nu lian si a, a tan chhan pawh a pasal hi police niin a lo rinawm lo ve zauh nge a hrai rui a, a vit hlum hmiah mai! Chuti anga mahni pasal pawh that duh chu hmeichhe naran tan chuan a hlauhawm viau aniang e, a luh phat aţangin a inti lal thiamin a inti hlauhawm thiam nghal a. Boss berah an nei ta reng a ni. Kid rinawm tak tak, amah anga sual leh chak, hmeichhe nasa ve tak tak pathum a nei bawk si a. An ni ho chuan hmeichhe ward lam chu an vil hneh viau a ni. 

Rinawmi lah chuan, "Nanga sam ţuak pawt tur khawpin i chhiahhlawh ka ni lo ve" a lo ti ve hmiah si. Chuti ang chhanna chaltlai la dawng ngai lo Zaui chu a ri ta phat. Rinawmi lo mil loh sa nen, a tho thut a, "A va mai mai che chuan nang hi i la inla ngeng fô a ni maw? Ka'n hrilhfiah ang che" tiin a va ţham nawk a. Rinawmi a che hman lo. Chhuatah a nam thlu a, mahse, Khawi lai aţanga a ruk chhuah nge hriat ni suh, Rinawmi chuan a kekawr hmalam kawng chu a zen zauh a, chemte lian lem lo tak zum tak si hi a rawn phawrh hlawl. A ding a, Zaui hrawk zawna tin chung chuan, "Thih i duh viau chuan min rawn khawih leh rawh le? " a ti vawt ta raih a. Mi dang an lo ê dual. Warder-in an thawm a hriat an hlau ve tho si. 

"Khanglang a che, ka hlau che emaw i ti elaw" tih pahin Zaui chuan a va bawh ruak a, lo petek zauhin, Zaui hnute chung chu a tai zauh. A kawr chu ţet chiah si loin a sân deuh nghal ruak. Zaui hamhaih chhungin a va kuah nghal a, hnunglam aţangin a rek bet nghal. Chemtea a hrawka tin ran chungin mi dang hmachhawn zawngin Zaui chu a kuaiher a. 

"Tu pawn hre ru. Jail chhungah hian warder bakin thuneihna a nei lo. Angkhat vek kan ni. Tun chinah he kan nu thaui leh a kid te khan lal in hrawt leh chuan ka chemte hmang hian in thisen ka dâwt ang.. Tupawh hi angkhata awm tawh tur a ni" a ti fiak ţhak ţhak a. 

Tuman engmah an sawi lo. Zaui chu a thlah a. A nam phei nghal. Khatia a man beh laia a tharum chakzia kha zaui chuan mak a ti. Mak deuhin chu hmeichhia chu a hlau ru ta riau. Lehlamah Zaui te thianho lo ning ru ve em em an awm thluah a, a rukin Rinawmi chu an ţan ve tlat bawk. Zaui tihduhdahna lo tuartu te an ni tlangpui bawk. 

Chumi zan aţang chuan Rinawmi leh mi dang reng reng pawn innghaisakna leh inhnuaichhiahna an tawng ta rih lo. Rinawmi tlawn pawl an awm a. Ani erawh a zia a ngai reng. Lal hrawta tal chiam a tum hran lo. A duh ber chu chu lai hmun aţanga chhuah a ni. Mipa ward lama a ţhianpa tang ve pawh a hre rauh rauh ţhin. An la inhmu thei miah lo lehnghal. 

"Ka naute hmel ţha hi, awijj a nui leh tawh.. Hmm.. A nui mawi asin" Thiangi chuan duat em emin Drose chu a pawm a, a chhaih nui uar uar mai. Ni 3 chiah an zinga a la awm chhung hian Drose chuan a ngaina tawh lutuk tlat. Duattu leh ngaihsaktu na nâ na hi chu naupang pawn an hai bik lo. Thiangi chu a felin chhungkaw ze zawi zet chu a rawn chawk nung a ni ber mai. Mi pawi a sawi ngai lo va, tumah a rêl ngai hek lo. Eni tan hlei hlei hian a hlu. Zingah a tho hma thei si, Eni tih tur zawng zawng hi a lo tifel diam a. Eirawngbawl a thiam zêk bawk. An chhungkua chuan an hlimpui viau mai. Pu Vanlala meuh pawn, "Haw tawh lo mai rawh. I pa te pawh ka bia ange" a ti hial a ni. 

"Thiangi hi i rinngngam em? Bawihteii awm tur hian" Diteik chuan an pa bulah a ti a. 

"Ka hrethiam lo. A la awm rei lo êm a i ring em? " a lo ti. 

"Kei chu Bawihteii a lawm dan leh chhaih danah hian ka ring tawp. Bakah rin lohna chhan tur a vâng ee" a lo ti a. 

Thiangi a awm ve zel theih dawn chuan, Diteii pawn hna a thawk ve thei reng dawn a ni. Mahse, tihsual leh an hlau tawh êm a. An fimkhur viau. 

Bena leh Eni an inhnial ve bap bap. "Ka be lo. Aman min lo be zel alawm" Eni chuan a ti hlak hlak a. 

"Biak theih turin i awm a ni mai lawm" a lo ti hmuk. 

"Ka ning, thik tur zawng reng mai" Eni chuan a ti hlar a. A tûm bâr bawk. 

"Ka tihpalh, ka duh êm vang che ania.. Hrethiam ve la" Bena'n a lo ti. An sawi an sawi a. A tawpah an nui dun ve leh mai. An nghet ve riau anih dawn hi. Bena hian lehkha a zir ţha leh ta bawk a. Mi rilru chak tak a ni bawk a, a ngaihtuahawm loh. Weekend apiangin a rawn tâp ve chawt ţhin. Drose pawn a ngaina tawh khawp mai. Bena pawn a hmangaihin a duhsak ve em em bawk. Mahse, buaina ruk a nei ve a. A case kha a la fel bik lo, tunah a dam ta bawk si nen, Jail luh mai te a inring thut thut thin a. Eni lahin engkim a kip a kawiin a hre lo bawk. A rukin a mangang thei khawp mai. Ni 3 hnuah court-a kal tur a ni a. Chuta an thutlukna ang ang chu a awmdan tur a ni. 

Door bell a ri ral ral, Thiangi'n a va hawng. Sangzuala leh hmeichhe pakhat nalh zet an lo ding dun a. An rawn lut zui nghal. 

Ditei'n Sangzuala te an lo kal chuan in chungah i lo chhohtir mai dawn nia a tih tawh vangin in chungah a tir chho nghal a. A enzui vawng vawng mai. 

Thiangi hi a pa te pawn an rawn be tawh reng. A la tau laklawh rih ve bawk a. Hawn pawh pawi a ti vak lo naa Dinfela te in hi nuam a ti rih. Bakah a pa tawngkam na zet zet te kha a la paidai hleithei lo a ni e. "Mi hurnu, hur i duh chuan inhralh la, pawisa thawk chhuak law law rawh" a tih kha.. A hriatchhuah apiangin a thinlung a na ngawih ngawih ţhin. 

"Aw lo lut ru" Diteii chuan a ti lang lang a. Sangzuala te chu an lut zui nghal. Diteik hawi chhuak chuan a rawn en ve nghal a, a phâwk deuh hlek.. 

"Hii, Dite, in film thar bera changtunu min nihtir dawn vangin ka lawm e" Malsawmi chuan a ti a. 

Diteii a lo hamhaih deuh….