Drose 8

D'ROSE… (Chapter - 8)

Ziaktu : Toni Râlte

"Au Lawm, ka nu a rawn kal miah lo maw? "Diteii hlauhlawp awrawl chu Lawma paw'n a hai lo kher mai. 

"Kal lo aniang, Ka bang hma a, Zami'n dawr a nghak a. Inah ka awm reng" a lo ti dam thluam a. Diteii insût hraih ri a hre nghal. 

"Mangang suh. Ka lo chho ang. Kan zawng dawn nia. Eng êm a ti lo vang" a ti a. Phone a dah a. A insiam nghal. 

Dinfela a pawh in a rawn thleng rang kher mai. A tupawh chu an buai. Pi Zawmi lahin a phone a off hmak bawk si. Eng nge thleng ta le..? 

"Papa, khaw nge an awm ang? " ţah aw ţiauin Dinfela a melh. Mipa mah nise; Dinfela pawn awmngaihna a hre meuh lo. Bena te nen an pathumin an ar kawh chhuah ve tawp. Enkawli erawh chuan in a lo nghak a. Zaia hmuh tur a awm lo. Pu Vanlala pawh awmhmunah a buai ve viau. 

Lawma te nen an han insem darh a, khawpui an suar tluan leh. Diteii hmeichhe chak tak kha a men puai a, a mittui a hru zauh zauh. A naute mawlh kha. A ngaihdan chuan tu ten awm an pitu khan an ru bo anih a ring ber. Dinfela rilru erawh a buai, engmah a ngaihtuah thiam vak lo. A fanu chu nungdamin an hmu leh ang em tih chiah a ngaihtuah. Khua a thim dawn ruai mai. An la hmu si lo. Police stationah an lut ta dial a. Darkar 24 ral hmain an zawng ngawt thei bik si lo. Mahse, theihtawp chhuah erawh an tum. Thana-a an awm lai chuan Enkawli'n Dinfela a lo call a. 

"Api chu a lo haw.. Naute a lo haw ve lo" a rawn ti ringawt. Dinfela a ding ngil zawt. 

"Ih, Api chu a ţhat loh hmel tawp. Ţawng pawh a ţawng lo. Lo haw ru, ka hlau ania" A rawn ti leh. Dinfela chuan police ho bulah thil awmzia a sawi a. An case IO chuan a zui haw ve ta nghal a. 

Pi Zawmi chu sitting roomah mangan hmel zet hian a lo ţhu ran a. A rilru a hah hmel takzet. 

"Nu khaw nge bawihteii" Diteii'n a ti nghal. Pi Zawmi chu a chechang eih lo. 

"Mawh.. Khaw nge? " a ti leh tuar. Pi Zawmi chu a rawn ţap chhuak ta phawng a. 

"Ka naute, ka naute kha.. Tu te nge ka hre lo, motorah min nam lut a, chuan ka naute an la daih, kei chu silaiin min tin a.. " tiin a ţap hawm hawm a. Police chuan a ţhut hnaih a. "Hahdam deuh khan awm la, hmanhmawh miah loin thil thlen dan min han hrilh teh" a ti dam thlup a. Enkawli chuan Pi Zawmi chu tuisik a rawn laksak a. A in khawlh khawlh. 

"Umm.. Lawma te in thlen hmain van dumpawl hi a lo ding a, Exer lak pah tiin ke in ka kal hrim hrim a. Chuan ka bulah an rawn ding a, kal pelh mai ka tum lai chuan, Driver bula ţhu hmuihmul buk deuh chuan, 'Ka pi, lo lut lawk teh. Biak che kan duh' a ti ringawt a. Kei chuan ka hlauh deuh vangin kal pelh ka tum leh a, mahse, a hnunga ţhu palian tak chuan min rawn pawt lawp a, Van chhungah chuan min pawtlut ta a. Ka rak tuar.. Chuan an tlan zui nghal. Ngaizel lamah min phur zel a, Kawng peng lo awmah min luhpui a, 'Nang chu eng atanmah kan ti lo che. Naute hi kan duh' an ti a. Kei chu min chhuktir ta a ni. Silaiin min tin reng a, an ni chu Kawngpui pangngaiah an tlan leh ta zel a. Taxi ka lo chang ta tawp a ni" tiin Pi zawmi chuan a chetsual dan chu a sawi a. Awm vete chuan awih harsa an ti tlang hle. A awihawm loh êm bawk a ni. 

"Anih Lawma te in thlen hmaa motora an hnuhluh lai che chuan in bul hnaiah mi dang an awm lo em ni? "Police chuan a ti a. 

"Awm ang. Mahse.. Min ngaihsak lo aniang" a lo ti ringawt. A nawi ru tlat. Dinfela phei chuan a nuhrawn thusawi chu a awih therte lo. Mahse, rik buan buan a hreh si a. 

"Engpawhnise, a rutu te hian an rawn be maithei che u a, engpawh sawi se min hriattir ru aw" Police chuan Dinfela te nupa chu a melh a. An lo bu nghat. 

Pu Vanlala a rawn haw. An nu chu an zawt ve leh. Ani pawn a awihsak chiah lo. Thil dik lo a awm a ring tlat. 

"Zaia hi a la rawn haw na nge? " Enkawli bulah a ti a. 

"Aw.. La haw lo" a lo ti mai a. 

"Ngati nge Chawhma lam khan haw turin a rawn chhuak daih tawh si a" a ti nang nang a. Zanriah pawh Diteii te chuan an ei mang lo. Hmuh theih khawpin an ngui a, an tla rawk rawk mai. Zanriah ei kham aţanga rei vak loah Pu Vanlala chu Dinfela te roomah a va lut ta a. Thil engkim sawifel a ngai tain a hria. 

Zairemmawia chet dan aţangin a sawi ţan a, a lemchan dan leh thudik a hriat chhuah dan te, Ruati thattu pawh amah Zaia ngei anih a rin thu leh Zaia hian thurualpui tu emaw a neih ngei a rin thute a sawi ta mial mial a. Dinfela te chuan mak an ti ngang mai. Naute bona nen pawh a inkaihhnawih deuhin an hria a. Zaia aţang chuan engkim an hriat theih an beisei. Mahse, a la rawn haw tlat lo. Pu Vanlala chuan a call a, a dah busy char char.. A lo hrechhuak vek tawh em mawni zawk le… 

Zairemmawia chu a thaw hawk a. Drose ţap tuar tuar chu a melh tlawk tlawk. 

"Engtia tih nge i tum? " a ti hap a. 

A hmaa ţhu chuan, "Ka fa a ni tawh ang. Tisawn ka enkawl ang a, a nulat hunah a nu leh pate ngei hi ka la dotir ang. Chuan phuba chu ka la tihna a ni mai" a lo ti a. 

"Kei hi engtin nge ni dawn? A fapa ka ni lo tih a hrechhuak tawh. Amah kan dah ţhat hmain engkim a lo hre vek tawh a, tihtheih ka nei tawh lo. Tunah pawh hian police ten min zawng mêk tawh ang" a ti a. A rilru a hah hmel kher mai. 

"I awmbo rih a ngai tawh a ni mai. In leh lo chu ngaihtuah duh tawh lo mai rawh. Dinfela pa hi pa mawl tak a ni lo tih ka lo sawi hmasa lo va a pawi. Tunah chuan i sahimna ngaihtuah a ngai. Khawchhak lamah han thangbo rih mai rawh" a lo ti a. 

"A bul chu nangmah. Ruati a thih aţang khan engmah a kal dik thei tawh lo. Nang pawh hi fimkhur rawh aw.. I hnu hi i thup hlen thei kher lo vang" Zaia chuan a ti a. A vau pawh a ni em em lo. 

A lo ner sak, "Huatnaa khat mihring hian pawisak ka neih vak ring duh suh. Kei chu ka invèng thei.. Nangmah hi kalbo vat la a ţha" a lo ti hmiah. Phone-in tu emaw a bia a, a biak zawhah, "Kei pawh tihian Khawpui hi ka chhuahsan ang. I pawisa tur an rawn pe ang che" a ti a. A tho va, naute chu a pawm nawlh a, a chhuak zui nghal. Zaia chu a indawmkun reng mai. Pu Vanlala'n an khaw VCP a va bia tih leh a chanchin thlengin a zawt tih a hre chhuak tawh a ni. A hriatchhuah chhan pawh a ukil nen an inbiakna a ngaihthlak ruk aţangin a nia. Ta ţang khan hlauthawng reng rengin a nun a hmang tawh. He buaina hnawk zeta hnim piltu hi tu nge anih chiah a la hre lo. Hmeichhe pian nalh tak leh sual tak a ni tih chiah a hria. Engvanga Dinfela te chhungkua haw em em nge a nih a hre hek lo. Ani hi chuan nuamsa taka khawsak theih a duh ber a, chu a duhna chu he hmeichhia hian hmang ţangkaiin a hmanruaah a hmang ta a nih ber hi. A tawpah a cha leh lèl sia! A khawngaihthlak roh phian. A haw ngam tawh si lo. 

"Dite, Pathian kan nei alawm.. Kan hmu leh êm êm ang. Ka naute chu aw.. A ril a ţam tawh awm sia" Dinfela chu a vei nghut nghut a. Khum ban vuanin Diteii a ţap zawih zawih. 

"Ti nge buaina hian min duh em em bik le? Kan hlim ve dawn chauh a, buaina kan tawk zel a. Engpawh ti rawh. Ka naute kha ka duh. Khawngaihin" tiin an pa bulah a inhrithla a. 

Zairemmawia lakah case an file ta a. Amah hmuh tur a awm si lo. An naute bo leh Zairemmawia hi a inkaihhnawih an ring tlat! Tin, Pi Zawmi pawh an enthla ru reng a. Pu Vanlala'n a awmchilh deuh râwt. A dawih aw êm a, an ringhlel tlat a ni. Ruati thihna case lah chinfel a la ni lo cheu! Zairemmawia hi man se thil chu a fel duak an beisei tlat a ni. 

Drose bo aţanga ni 3-niah Zaia niawm tak champhai sumo-a a chuang an hmuh thu report an dawng ta. Rang taka chet lain, Driver an be nghal a. Driver paw'n hawihhawm takin a passenger te bulah chhuanlam mawihnai tak a siam a; an lo nghak ta. Zaia chu a tlar hnung berah a ţhu a, han chhuah dawnin a rem têuh si lo. A ngaih a ţha vak lo naa eng êm an ti lo vang tiin a inhnem a. Pawisaah chuan a lungngai rih lo phawt. kha nu khan a rin aia tam a pe tlat a. Champhai a thleng chho ang a, engtin tin emaw damkhawchhuah a tum ve mai ang chu.. 

Police an rawn thleng ta. Zaia hmel landan chu khawngaihthlak zawk tak a ni. An rawn hling ta chat mai. A tirah a pawr ve viau naa, a pawr rei ngam lem lo. Aizawl lam panin an phur thla leh ta vuah vuah a. 

"Lem i chang a, i pa ni miah lo i paah i chhal a, dik lo takin in leh lo, rosum neihsak i tum bawk a. Kha pawh hremna a nep lo vang. Tin, Ruati thihnaah mawh i phur tih hi a dik bawk em? " tiin an han chhimbudawi kual vel a. A tirah a ţang nasa. Mahse, mak ve deuh chu mipa luhlul leh rawva ve tak te pawh hi stationah meuh chuan, Police awki vangin an zâm ve dûk zel nia. Zaia pawh mi ţha ni lo mah se; police a hmachhawn vawikhatna a ni miau a! A zâm hma kher mai. An dâwp thiam bawk si. Ruati chu a thah a nih thu a puang ta nge nge a. 

"Drose kha khaw nge in dah? Tu nge i thurualpui? " an han ti leh ţan a. Chu erawh Zaia a ţang na ngang mai. Mahse, Ruati a thah theih chuan naupang pawh a ru bo thei tih an chiang. Zaia zâm rukzia an hai teuh si lo. Saihlum pakhatin sava pahnih an perh thla dawn a nih hmel. Beidawn an tum lo kher mai. 

"Engmah ka hre ve lo, naute bo thuah chuan" a la ti ve ţâng ţâng a. A chhan pawh kha nu khan a tâng anih paw'n a rawn chhanchhuah mai theih a beisei a, inpuan loh hram a tum.. Ruati a thah chhanah pawh, "Ka bialnu ania, mipa dang lakah min phatsan " tiin dâwt hmangin a la ţang kawh ve tlat!  

An han chawl det a. Zaia chanchin chu an han chhui zau leh deuh a. Pu Vanlala an ko ta bawk. A han ngaihtuah vang vang a, hmana Zemabawk hotel pakhata Kima'n a hruai ţum kha a ngaihtuah chhuak ta a. Kha khan pawimawhna a neih a ring ta tlat! Kima an ko va, Kima hoin hotel lam an pan ta a. Manager be nghalin, Zaia thlalak chu entirin a hmuh tawh leh tawh loh an zawt a. 

"Hmu fô e.. A rawn kal deuh reng" a ti ta a. Tu nge a rawn hmuh ţhin an han zawt ţan a. Manager chu pa fel deuh a lo ni a, Engkim a hriat ang ang chu a sawi ta vek mai. Mahse, naute erawh a sawi tel lo. A hmu lo pawh a ni maithei. Zaia hmuh thin hmeichhe thlalak chu an nei lo naa, CCTV aţangin a hmel chu fiah lo ruaiin an hmu thei ta. Mahse, Dinfela te leh Pu Vanlala te ngei pawn tu nge anih an hre lo. Hetia police te nen an inbiak mek lai hian, an room service pakhat tuai rawngkai lek lek hian, "Naute chu a awm vein ka hria a ţap ri niawm tak ka hria" a lo ti hlauh mai le.. Kâwl a eng ţan dawn e. Chu room service chuan, "Engmah a order ngai lo, amah hian a rawn lam mai zel. A rooma luh hi a duh lo a niang ka ti tawp. A rawn kal fô va, mahse, a awm rei ngai lo. Zan tak phei hi chu a riak ngai lo tluk a ni. Chuan, nizan hmasa khan a room lehlamah hian order ka pe dawn a. Naute ţap niawm tak ka hre ta a. Naute nei awm ka hre si lo, a room kawngka ka kik a, mahse, naute ţap pawh a bang hmak. Min lo hawnsak lo bawk. Ka kal ve leh mai" tiin. Engkim a chiang ta. Mahse, hotela a lo luh dawnin naute a pawm ngei awm sia, engtin nge an hmuh loh theih? 

Cctv aţanga a landanin hmeichhia chuan bag lian angreng tak a khai lut a, bazar bag ni mai awm hi a ni. Chutah chuan nautê chu a dah a nih ngei a rinawm. 

Chu ni address nia sawi chu, "Lungdai" a ni daih! A hming pawh Lalrinawmi a ni. Tuman an hre lo. 

Mahse, beiseina a sang ta tho. An hmuh theih awmchhun Zaia chu thiam takin an han dâwp leh a. A thurualpui hmeichhia pawh an hmuh tawh thu leh amah Zaia chu engkima a kaikuang a nih thu a sawi tiin Zaia rilru an han dêk kual ta a. Ani Zaia tlangval fingvar lem lo chu a sa phut ta reng a. Tharum hmanga sawitir pawh ngai loin a bul aţangin engkim a sawi ta. Pu Vanlala te rinphak bak a ni. 

Zairemmawia inpuanna chu :

" Kan rethei a, engmah thiam tak tak ka nei bawk si lo. Ka nî fapa Hruaia te nen kan inkawm ţhin a. Hruaia hi a pa chu Aizawl ami anih thu kan hre ve. Unau kan nih angin thu chhia ţha kan sawi dun ve vek zel a. A pa chu Aizawl pa hausa a nih thu a nuin a hrilh dan te, nakinah a tlangval hunah zawn chhuah a tum dan te a sawi ţhin. Engahmah ka ngaihsak ngai lo. Mahse, lui kan kal ţuma a chetsuala a thih tak hial hnuah khan Ka nî hian min ko va. 

"Ka thih hunah Hruaia pa hi lo zawng chhuak la, kan chanchin hi i lo la hrilh dawn nia" tiin Hruaia pa hming leh awmna te, a eizawnna te min hrilh ta vek a. Engtin nge ka ní khan a hriat vek ka hre bik lo. Nu fing tak kha a ni ve bawk a. Kei pawh chuan ka lo zawn hmuh ngei tur thu ka hrilh nghe nghe. Ka nî chu a boral a. Kei ka sual telh telh. Kan retheih vangin ruk ruk te ka ching chho va, kan khua angah chuan ka langsar ta reng a. Ka nu leh pate pawn min ngeih ta lo. Kan inhau hrep a, keia luhlul ngawltawt chuan in ka chhuahsan ta a ni. Ka pawisa ruk hmangin Aizawl ka rawn lut ta a. Ka vakvai rei ve khawp mai. Mahse, thian ka chhar ta a. A bulah ka khawsa ve ta nghal a. Inhlawhna awm ang angah te ka inhlawh ve a. Sawi tawh angin mi hausa nuho call boy ka ni leh ta bawk a. Sum pawh ka nei chho ţan. Ruati kha kan ţhenawm te awmpui a nia, kan inhriat phat atang khan kan inngaina ve nghal tawp. Tikhan kan inngaizawng chho nghal a. Ka hna erawh ka la chhunzawm reng. Ruati bulah chuan mi pakhat zawn chhuah ka duh thu te ka sawi a, amah leh anihna te ka sawi thin. Ruati kha tuna in sawi hmeichhia te nen khan an thawkho vek a lo nia! Engtin nge an inrema an thawhho dan ka hre bik lo. Tichuan, Ruati nen kan target a lo inang reng tih Ruati chuan a hre ta a, amah ruaitu te a hrilh ta vat a. Kei chu min rawn hmu ta nghal a ni. 

Tichuan, ka tihtur leh ka chan tur te an sawi a. Kei lah sum mamawh reng renga khawsa ta chuan ka lo huphurh lo nasa ta mai a. Tiang khan ka vanneihna a kal tluang bawk nen, an inah ka lut thei ta rèng a. Mahse, kha nu khan engvanga an chhungkua hi haw em em nge anih ka hre bik lo. Chuan, Pu Vanlala thah kan tumna a tlawlh takah khan Naute chungah kan ţuan ta a ni.. Tin, kei min dem ringawt a, Pu Vanlala nupui hi kan lamţang anih hi" Tiin. A inpuanna chuan Diteii te chhungkuaah nghawng a nei lian kher ang chu. 

"Khaww nge naute chu? " tih zawhna erawh a chhang thei lo. Hei kher hi chu a hre ngang lo. ani ngei ang. Sawi tur a hre hlawl lo a ni tawp. Mahse, kha nu hmel kha an hre tawh a. A awmna hmun nia a sawiah pawh an enthla tawh dawn bawk. Naute chu engtikawng zawng pawn an hmu ngei ngei ang. 

Zairemmawia chu case chi hrang hrang awrhin Central jail-ah nawr liam a ni ta. A pakhatna chu.. 

Mahse, naute a la bó! Pi Zawmi pawh police in an la lo thei lo. Mahse, nu fing tawh tih takah engmah a sawi duh lo. "Zaia khan min hnuklut ve mai mai anih kha, kan chhungkaw boruak tihchhiat nan" tih bak engmah a sawi duh lo. Zaia thusawi bak fiahna engmah an nei bawk si lo an thu hi a la kal zel em ang chu. 

Diteii leh Dinfela te nupa erawh khawvel danga leng ang mai an ni. An nui ngai lo, hnem pawh an inhnem tawn ngai hek lo. Puhmawh tur an dap a, an inhmu sakhi lek lek tawh. An taksa pawn a tuar a, Dinfela paw'n chawlh a la hial. An chanchin chuan Social media pawh a luah hneh viau. An khawngaih em em vek. An ţhiante pawn an rawn lenpuiin hnem an tum thin. A sâwt mawh khawp mai. 

Kar hnih dawn a ral ta. Chanchin thar ngaichang reng rengin an awm a. In chhung chu a ngui a, hlim nui ri hriat tur a awm ngai lo. 

"Dite, tunah kal ang" Dinfela a rawn lut hlawl. Diteii chu a lo mu zawi hniang a. A meng kar thung. 

. "khawihah" a lo ti zawi sap a. 

"Bethel Centre-ah Bawihteii niawm tak an dah lut" Dinfela sawi zawh rual rual chuan a rawn inperh tho nghal. 

"Dâwt a ni lo tiraw? A dik em? " a ti nghal chul a. Kekawr a ha mawlh mawlh. Dinfela pawh a inthlak nghal. Mi dang pawh hrilh hre lem loin an tlan chhuak nghal. Police pahnih hoin Bethel Centre lam chu an va pan ta a. Chu Centre-a an director chuan police a lo call a lo nia! An zing tho an centre bul vel an tifai leh a, naupang pahnihin parcel chhunga naute an hmuh thu an rawn report a. An va en nâk chuan naute chu a lo awm tak tak a. Tichuan, an la ta mai a ni. 

"Bawihte, ka neihchhun… ka va lawm em.. Lalpa, ka lawm e" Diteii'n ţap chungin a kuah a. Naute erawh a ţap miah lo. A nu chu a melh kiau ringawt. Dinfela insum zo lo mittui hru zauh pawh tu tan dem chi a ni lo. An fanu tel lo va an nun khawharzia kha. An nupa kar pawh a khi lek lek hial anih kha. Police te pawh chuan an lawmpui takzet mai. Mahse, a ru botu erawh ngaihven zui zel an tum tho. Nakinah a la hnawksak zel a rinawm tlat a ni. 

Drose lo kir lehna lawmin chaw eikhawm an siam leh ta rup mai. An sawm zau kher bawk. An neihin tlin miau hek. Duati pawn a kuah ve vawng vawng mai. Amah Drose te reuh chu a hamhaih ve ni maw.. A ţap mang lo, mi chevel chu makti deuhin a thlir dauh dauh ringawt. Chungte chu lainat tawk an lo awm. Engpawhnise, hlimna chu a rawn lêt leh ţan ta chu a nia. Pi Zawmi tih chauh lo chuan thinlung takin an lawmpui vek ang. Pi Zawmi erawh hlauthawng hmel a pu reng a, biak loh chuan tumah a be ngai lo. A pasal nen engmah an sawi dun ngai tawh hek lo. Court-ah a la inlan zak zak reng a. A ţanna ngaiah a la ţang reng bawk. Thil mak tak erawh Drose chuan pi Zawmi a hmuhin a hmel a núr zel reuh chu a ni. Engmah la hrethiam lo naupang te hian hriatthiam theih thil an lo nei ru ve reng em ni dawn? Pu Vanlala hi a lainatawm angreng. Lehlamah a nupui, lehlamah a fate.. Pa ţha tak ngang a ni a, a chhe ber thlentir a duh bik lo. Mahse, Pi Zawmi nen an inkar chuan a hma a pha leh thei tawh ngaiin a rinawm loh. Diteii pawn a nu chu a be ngai lo. A tih tawh lohnaah rilru paukhauh zet a lo ni si a. A fanu hi a nu hian a khawih tawh tur a ni lo tih chu a thurolum a ni bur tawh. 

"Ţawng thei se, amah rubotu te hming leh awmna te sawi thei se" Dinfela chuan a ti a. A fanu chu a melh ngawih ngawih bawk. 

"Ni ngawt mai. Mahse, kan hmu leh hi ka lawm lutuk a, engmah ka ngaihtuah thei lo" Diteii chuan a lo ti a. 

"Mahse, Dite, i tan ngaihthlak a hrehawm maithei. I nu hi rinna pakhatmah ka nei tawh lo va, khawngaihin nang pawh fimkhur tawh rawh aw" a lo ti dam dap a. 

"Lutuk, bawihteii hi ka hmuh phak lohah khawiah mah a kal tawh lo vang" a lo ti nghet charh. An nupa nun rawn parvul thar leh chu a chhawr ber an ni ngei ang. An nupa an hlim chuan Enkawli leh Pu Vanlalal pawh an hlim ve mai. An chhungkua pawh an kâng leh ţan e. 

Hetih mek lai hian Bena leh Enkawli chu ngawrh zetin an inbe tawh. Eni pawn a lo star ru ve ngawih ngawih si a. Buaina leh harsatna an tawh lai te khan Bena bulah a lo inbunruak ve keuh keuh ţhin. Bena pawh a rawn lawr zut reng a. Diteii chuan a hrethiam reng. Mahse, a fiam duh bik lo. Eni a zak thei ropui si a. Tin, thil lawmawm tak a thleng leh ta bawk. Maheri khan nau a pai ve ta hlauh a, vanneihthlak takin naute erawh Hiv lak aţangin a him! An va lawm nupa tak em.. Mahse, fa pakhat bak Doctorin neih a phal lo thung. Tin, Akimi te pawh Mike nen an inbe chhe lo va, Mike pawh inthlahrung chung chungin a leng lut ta zauh zauh. Fate pa fate nu na nâ na chu namnul a lo harsa ve aniang e. Akimi lah pa uapna mamaeh a lo ni chhap nen, Dinfela te chuan inrem leh se an duh khawp mai. Puia te nupa erawh an inţhen hlen dawn aniange, an boruak a reh rih hle. 

Chu in hnuai thim rek rukah chuan mi pahnihn an inhmachhawn ran a. 

"Tunah chuan an boruak saw pangngai rih se, hlim ve rih rawh se. Nakina ka chet dan tur hian thih chak ngawih ngawihin a la siam dawn si a" hmeichhia chuan a ti hriam hraih a. A hmaa ţhu putar lam lek lek chuan nui huah huah chungin, " I awmtir ve mai mai thei lo em ni? Nunphung pangngai neiha zalen taka boruak hîp te hi i châk ve lo em ni? Bansan tawh mai rawh" a lo ti a. 

Mitmeng ling hlar hian, "A teuh lo. Zodingpuii saw a nuih chhung chuan na ka tuar asin. Ka chanpual anih saw.. " a ti khur dat dat a. 

"Huatna thinlung i pai reng vang aniang, i landan pawh a nalh theih loh? " a lo ti zauh. Chu ţawngkam ngeiawm tak chuan a tiphur emaw tih turin chu putar chu a va bawh rawk a, a tho lrh vut. Light a on khep a. A eng ta uar. A thawmhnaw chu a mal tetein a hlip a. Putara chuan a melh reng. 

"Tihian ka la nalh tawk lo chêu em? " a ti no ngher ngher a. Putara chuan a chil a lem khawlh. 

"Atè, Drose ka lo awm dawn a" Duati a rawn lut hlawl. Diteii a lo nui tawp. Toys roomah an unauin an inkhalh lut dun. Duati ten school an chawlh hi chuan a rawn leng deuh reng mai a ni. 

Awmpui thar pawh an la duh ta rih lo. Tihsual leh an hlau tawh. Ruati vang khan Mike lah a lo inthiam lo em em. Mike-a kawhhmuh kha a ni si a. Mahse, engmah a hriatpui miah lo tih an ring thlap. 

Diteii pawh hna lamah rilru a pe chho ţan a. In lama thawh theih tur chi zelin a kalpui ta bawk. A fanu kalsan a zuam mawlh lo. ani ber. Sangzuala nen an thawk dun ta zeuh zeuh. Mahse, Dinfela chuan engmah a sawisel ngai lem lo. Amah Sangzuala pawn bialnu nghet a lo nei ve leh ta bawk a, engkim chu a tluang ve ta purh mai. Dinfela'n picnic a rawt ta a, an ţhian hnaivai tak tak te an sawm ta hlawm. Puia pawn hreh zetin aw a lo pawh ve a, an lawm viau. Baby an sawm tel tih a hre lo a ni maithei. Lawma te nupa pawh an rawn tel thei dawn bawk. 

Khua a thiang vùk a, ni chhuak pawh a ţang ţha viau. Diteii'n drose a thlak mawlh mawlh a. A be pah reng bawk. Puitling leh puitling inbia ang chiah hian a be thin. Tawng fiah lova biak a phal lo. A la ţawng thei lo naa ţawngte chu a hrethiam ve fú tawh. Mike'an Akimi leh a fate a rawn phur a, Lawma te nupa Bike-in, Dinfela carah Diteii te nufa leh Duati, Baby erawh an Sangzuala'n a phur, A bialnu pawh a tel ve tho. Puia chu amahin a lo kal thung. Bena te pahnih bike-in… An hlim tlang kher mai. Spot an thleng a, Bena thaza zual tuiah a zuang thla nghal. Puia leh Baby inhmu thut chu an lai dun kher mai. Boruak siam tum takin mi dangin ţawng an lo inchuh nak nak bawk. Naupangho lah an hlim. Drose pawh music remin awmhmunah a lo su ve at at mai. Akimi leh Diteii'n eirawng an bawl thung a, an titi tui hle. 

Puia a rawn lut a. A huh hluam mai. "Zodingpui, Baby innsawm tih in sawi duh lo va, hmelho, in plan ka hre vek" a ti hluai a. Thinrima sawi erawh a ni lo. Diteii a lo khi var var.. 

"Innei leh ru, inthen hi a tha lo" Akim'n a lo ti vat. 

"Nangmahni kha innei leh phawt ula" a lo ti khauh. Akimi a dang ta. Diteii a lo nui vak vak. 

Sangzuala te eraeh thla lain an buai hle. A bialnu lah inla model ve chi a lo ni bawk a. An hmet zing malh malh viau. Dinfela leh Mike erawh muk deuhin an inkawm a., Lawma leh Zami ten naupangho an infiampui bawk. 

" Nia.. I sawi dik ka ti khawp mai. Hmannia ka damdawi va lam ţuma ka thu hriat pawh khan min deng na asin.. Kan milar zingah hian vei an inphum ru ţhûm hian ka ring a ni. Ka va kal laia Damdawi la ve tho, Nutling pui kha ka va lainat tak. Hawna a nei ta mai si lo va, ka thlah haw a. A chanchin a sawi alawm.. 

Chhungkaw pangngai tak an nia, khawsa thei em em chu an ni lo. An pa hi mistirri a niawm e. Nikum march thla khan chu kan pi chu pile ţha lo a inentir a, zai a lo ngai a. Tunah chuan engkim test a ngaih tawh hi. An han test ta kha a lo positive ta reng sia! A tirah a awih lo ani pawn. Khatiang kha vei theiah a inngai lo bur. Mahse, a chiang si. Tichuan, a pasal an ko a. Ani pawh a lo positive ta chiah. A pasal chu a inpuang ta a. A hma thla 6 liamtaah khan a ţhianpa Thingtlang lama party worker thilti ve thei tak a lo zin a. A contract bill la tur a lo nia. Office-ah te pawh an va inkalpui a, chu a ţhianpa pawisa hmu thawveng pheng chuan han lem hlak a duh a niawm e. Rangvamual lamah taxi in an zu kal ta a. A ţhianpa a phur tulh tulh, driver hnenah nula tlahlang hriat a neih leh neih loh te a zawt chho ta zel a. An driver lah khan a lo hre hnem zet mai. Call girl hoin an hman fô thin a lo nia. Zu chu hmun pakhatah an in rui sauh sauh a. Han kai takah chuan pawisak nei tawh hek lo, pawisa lah a ngah ve bawk si.. 

Nula chu an zawntir ta a. Hotel ţawp ve takah an riahpui ta mai a niawm e. Thil zahthlak tawpkhawk bawk chu hmeichhe pakhat kha mipa pahnihin an beih rawn a nih ber chu. Hmeichhia lahin a lo tlin laileng khawp lehnghal. Kha hmeichhia aţanga a kai nge a ţhianpa aţanga a kai a hre ta lo. Aniin a kai chuan a ţhianpa pawh khan a kai ngei anga, a nupui pawhin a kai ve tawh ngei ang.. 

Khati ang kha kan ni tawh a, Ţhianpa, i rin aiin Hiv hi a darh nasa tawh aw"Mike chuan a ti mial mial a. Dinfela pawn a ngaithla uluk kher mai. 

"Condom hman nachang an hre awm si lo va, an â reng reng, ks mutpui te chuan CD hman tur a nia aw.. A nupui chu a va lainatawm em" a lo ti vawng vawng a. 

"Ka sawi kha, CD hi rai lohna tur hrim hrim emaw ti kan tam tawh a, HIV laka inven nan kan hmang mang lo. Hei kei chu ka pai reng. Tunah chuan ka chhe tawh law law a, mi dang kai darhtu nih hi ka hlau èm a, mipa kan nia, eng emaw te pawh kan tawng thei.. Mi dang in ka hri vei an kai loh nan tihian ka inready thlap" tiin a CD pai lai chu a lek larh larh a. Dinfela pawh chuan, "Diteii pawh hian zuk pai ziah a mawle.. A tirah chuan ka hrethiam lo deuh a. Mahse, kei aiin a lo fing daih mai" A lo ti a. An nui dun hak hak mai. 

"Malsawmi hi a rawn lawr ta vak lo mi? " awmze nei fêa Dinfela melhin Mike chuan a ti a. 

"A lawmawm hei a reh daih a. Mipa mah ni ila, i bulah chuan sawi ta mai mai ila, a hmel pawh hi ka hmu hne" a lo ti nghut. 

"A hun lai kha chuan i atchilh teh kha" lo ti zauh. 

"Hun lai hi a lo awm vek mai. Mahse, Diteii hian a rawn thawidam vek anih hi"

"Diteii hi chu kei aia nau fê mah nise, a nun zahawm leh nelawm tho si hi ka lo chhuang ve thin ngawt mai. Kan Drose pawh hian a nu a chhun chuan i ven ţhat a ngai ang aw. Ţhianpa" Mike chuan a lo ti duah a. Dinfela ngaihtuahna a tithui angreng hle. 

"Nangni pahnih kha.. Tuiah rawn cheng ve ru" Baby chuan a rawn ti lauh lauh a. Puia vang ni miah loin Baby chuan thawveng taka a hun hman ve hun a nih vangin nuam a ti viau mai. 

Khua pawh a tlai lam ţan. Tui cheng erawh an la awm kal reng. Puia erawh chokaah mei zu chungin phone a khalh nuap nuap a. Diteii te tui cheng hlim nui ri chu ngaihthlak nuam a ti viau. 

"Awiii baby a tla, tuiah a tla.. Papa" Diteii awrawl ring zet chuan a phone khawih lai a thlauhtir tawp. A rang arangin a tlan thla.. Eng sawi set set loin a zuangthla thawr.. Baby chu Dinfela'n a lo pawm kang mek zawk a. Puia chuan a va dawm ve vat. Pool sirah an pawm chhuak ta a. A khuh bawrh bawrh mai. Tui a cheng rei nen, a hmui te chu a duk cher.. A chauh hmel nghal rawih bawk. 

Diteii ta pek chuan, "Baby tui tla chu ţhenkhat te an rawn tlan chak hle mai a" a ti ta a. An boruak uap churh chu a bo ngjal duak. Akimi leh Sangzuala te chuan an rawn tuihnih nghal zat. Puia leh Baby lai hmel chu mipa lamin an lo nuihzat thung. 

"I zak lo.. Nang hi" Puia'n a rawn ti sup. 

"I rawn tlan thla tak tak kha chu sakeiin a um che maw ka lo ti hman. I hmanhmawh dan em em em kha" Diteii'n nui tlawrh tlawrh chungin a lo ti leh. Baby pawh a khi sak. Puia lah a lu thak lo pui hiatin a riat nawi ta mai mai. An boruak a pangngai chho dawn e. 

Hlim takin zanriah an kil a, an haw meuh chuan khua a thim tawh. 

"Naa.. Papa, ka tui cheng kha ka chau ve lutuk a.. Zanin chu min hrethiam hram la. Ummm" tlawn titihin an pa chu a nek talh talh a. Dinfela tho kang deuh uaih pawh a mu thla leh riai riai. 

"Hmm.. hahdam rawh.. Ka duat" a ti sur sur a. A biangah chukz zauhin inkuah rialin an ngawi dun vang vang a.