Drose 7

D'ROSE.. (Chapter - 7)

Ziaktu : Toni Rãlte

"In pa hi chuan a duh ve ngawt mai che" Sangzuala chuan a ti sup a. 

Diteii a lo nui hak hak, "Kei pawn ka duh alawm" a lo ti mai a. Laptop lam a bih leh daih. Hna hautak zual an han thawh zawh takah chuan thingpui in chawlh an nei a. 

"Khaw nge Ruati hi a kal daih le" ti nuah nuah chungin chhang bawm chu a hawng lawr a. In hnuai sitting roomah Sangzuala nen chuan thingpui chu an in dun a. Pi Zawmi pawh a lo chhuak a, an pathum chuan titi phungleng an sawi mai mai a. 

"Nu, U Zaia hi a chhuak leh mi? " Diteii chuan a ti a. 

"Ka hre miah lo. Ruati pawh hi khaw nge a awm ni? " Pi Zawmi chuan a lo ti a. An sawi lai mekin Ruati leh Zaia chu an rawn inzui lut hlawl, an lo ţhut ţhap vang chuan an lai deuh nge an hmel chu a pha dâi mai. 

"Kan chhuak lawk a. Ruati, Thingpui min lo siam ve" zaia chuan pangngai deuhin a ti a. Ruati chuan a va siamsak nghal. An bulah Zaia chu a rawn ţhu ve a, "Ka hriat hnu i va ang êm" tiin Sangzuala chu a melh vung vung a. 

Diteii chuan Sangzuala a nih thu leh a hnathawhte a sawi luam a. 

"Tenu-i i hre ngai em? " Zaia chuan a ti a. 

Sangzuala chuan, "Tenu-i… " tiin a chhing diar diar a, hre chhuak thut niawm takin, "Hria e.. I hre ve law.. " a ti hluai a. Zaia chuan nui chungin, "Diteii nen an inang tiraw? " a ti a. Diteii a melh zauh bawk. 

Sangzuala chuan Diteii thlek ve hâw pahin, "Nia an inang deuh. I sawi takah chuan, an ngah chu hmel ţha tihna" tiin a'n tlip nghal zaih a. Diteii nuih a za hle. 

Drose ţap ri a hriat rualin in chungah a tlan chho nghal. Zun a lo cheh ţeuh mai. Diaper hi zan mut dawn tih lohah chuan a hrentir ngai mang lo va, a taksa a no sia, a lâwn a hlau aniang. A zun huh te chu a thlak a, "Tètè hne rawh aw" tiin a kawr a hlim nghal a, Drose chuan a hne dawk dawk mai. Chutia hnute an inpek lai chu kawngka bula ding chungin Zaia'n a lo thlir reng mai. A mitmeng verther zeta ítna pawh hmuh hmaih chi a ni lo. A rilrua awm erawh amah chauhin a hria ang chu. Drose chu a muhil leh siar siar tawh. Mut a duh reuh a, a zia viau. 

"Ka nautê hi chu aw.. A va duhawm tak" ti sapin a fanu chalsam chu a chul thuak thuak a. 

Pi Zawmi chuan Ruati chetla chu a en chîk mah mah a ni. Amah Ruati erawh chuan a hre lo hlauh. 

"Pi, U Zaia khan bawngsa a ei chak thu a sawi reng sia, siam ila zanin chu" Ruati chuan a ti a. Pi Zawmi a khi sak ringawt. Zaia leh Ruati inpawh dan ringawt pawh hi chhui tham a tlingin a hria. Mahse, an pa bulah lo chuan khawiahmah la sawi loh hram a duh. An nupain an chîk ve mai ang chu. 

Zanriah an ei laiin, "Naktuk i nu check up a ni sia, kei hi Selingah kal ka ngai tlat mai. Mama, nangman i han hruai lawk mai dawn mawni le" Pu Vanlala chuan Dinfela a en a. 

"Umm a ţha lawm.. Ka lo hruai mai ang.. " a lo ti a. 

"Kei chu he lamah buaipui tur ka nei sia, ka rawn kal lo mai ang" Zaia chuan a pa a melh a. 

"Nia, he lam i lo buaipui mai dawn nia" A pa pawh chuan a ti ve mai a. 

Enkawli Admission an la fel ta bawk a, amah Enkawli pawh a hlim ţan viau. A ţawng hluah lo naa a pheikhai zan danah buaina a tawk lo tih a lang reng mai. An chaw eina thleng chu sengin a sil nghal a. A awm ve aţang hian Ruati hian a ring thiam riau mai. Chaw ei kham veleh tihtur dang a sawi a, a chhuah daih loh leh Drose a pawm ţhin. Eni chu mi thatchhia a ni lo bawk a, phun nawi loin a ti ve miah miah zel a, a tihtur a nihna chen pawh a awm ve bawk. Zan dar 8 hnu lamah chuan in chu a reh leh ţhap tawh. An room ţheuh hi nuam an ti hlawm khawp aniang e. 

Eni chuan a zirlaibu lei tharho chu a keu kual mai mai a, phone. a bih pah zauh zauh. Ruati nen an room hi plywood hmanga pindan a ni a. Thawm a hriat theih viau. Ruati chuan phone-in tu emaw a bia a. A ţawng a insumkar lem lo hle. 

"Umm, pawisa chu ka lo thawn dawn che nia, a thuhrimin min tur et et suh. Pek loh che ka tum pawh a ni si lo. I mak em mai" a ti hlak hlak a. 

Lehlam ţawng erawh a hriat theih loh. 

"Ve che a, min hrechiang lo anih kha. I rin aiin ka nasa ang aw. Tihtheih ka nei lo emaw i ti aniang e, nanga pawisa nuaikhat lek kha chu eng lai pawn ka pe chhuak thei tih hre rawh. Naktukah ka lo pe ang che" a ti leh tâwn tâwn a. 

Eni chu a lo îp deuh. Ruatu chu awmpui ve mai a ni sia a. Chutiang tiang sum a neih a ring si lo. Tu emaw pawisa a puksak a ni ngei ang. Ruati chuan phone a dah a, tu emaw a call zui nghal. 

"Pawisa ka mamawh. Nukuma ka puksak nu hian min ţhing nasa tawh lutuk a, tih dan tur lo ngaihtuah ve teh. Anih loh chuan engkim ka sawi chhuak dawn ania" a ti a. Tlem chuan a aw a zawi deuh. Mahse, Eni chuan a hre pha tho. Tu tak bia ang maw.. 

"Thil ka tihsak tam tawk viau che, tunah pawisa tlem azawng ka dil che a, chu pawh min tihsak thei lo a nia. I hre viau ang. Ka ning tawh. Zairemmawia lah rintlak mang si lo. Engkim ka sawi vek dawn" a ti hlawih hlawih a. Phone chu a dah aniang. A reh ta veng veng mai. 

Zing dar 3 velah Drose chu a rawn ţap chhuak hlawl mai. Dinfela a harh leh hmasa zawk a. A pawm vat. Ek a cheh aniang a tia an en a, a lo cheh bawk si lo. Chung lam melhin a ţap ngèk ngèk a. Diteii pawh rawn harhin, hnute a pe zui nghal a. A la hne duh lo zui! An nupa chuan an inmelh reng ringawt. 

"Na a nei mi le? " tiin an han dap chiam a. Chuti ang a neih awm pawh hriat a ni si lo. Diteii chuan pawm chungin a awi ta dârh dârh a. 10 mins vel lai a awih hnu chuan a chhing ta diar diar a. Dinfela pawh a la muhil chuang lo. Khuma a mut dawn lai chuan, "A sirah mut rih teh. Ka kuah khãt tawh em mai che" a ti sa sa a. Diteii pawh chuan thuawih takin a mut ve mai. A muhil nghet ta maw tihah a mu thla ve chauh a. An pa nen chuan an inkuah rial a. 

"Nichin ka mutthilh lai khan mumang mak deuh ka nei a. Bena ka lo hmu a" Dinfela chuan a ti a

"Engtin" a lo ti hâ.. 

"Dùmah hian a lo tâng a, nghakuai chiahna hian lak chhuah ka lo tum a, mahse, a lo ban fuh thei miah lo. Chutih lai tak chuan hmeichhe pakhat hi a rawn lang a, mau sei ve deuh a lo keng a, Bena chu a pawt chhuak a" a ti a. Diteii chuan mak a lo ti viau. 

A kawr bah hrut liam pah chuan, "Bena lam chu duhtawk ila, ka ngai che" Dinfela chuan a ti thawp sut a. 

"Kei deuhin" a lo ti ve a. Hnai taka inmelhin thúk takin an infawp ta mial mial a. Diteii inhliam atàlângin nupa nun pawh an hmang ngai meuh lo. Chuvang chuan an duhthawh kher mai. Drose lah a mutui nasa si a. 

Enkawli rak tuar tuar thawm avang chuan Pu Vanlala te nupa chu an tho chhuak hlawl. Hmanhmawh zetin an va chhuak a. Eni chu khur zawih zawih chungin Ruati room kawngka bulah a lo ding. Khum lam chu a kawk bawk a. Pu Vanlala te an va luh nâk chuan, Ruati chu khumah a vang zawngin a lo mu kák huang a, a hrawk chu a thler hawk mai. Thisen erawh a lo khang tawh. Mahse, thisen rim erawh a thang nghur mai. A tu mai pawh chu an hamhaih vek. Pi Zawmi lah taksa chak lo nen a uak tuar tuar a. Dinfela te an rawn chhuk ve ta bawk. Ruati chu khawih danglam loin police an call ta phawt a. Zaia'n a rawn hmuh ve chuan luh a tum nghal a, Dinfela'n a lo dang. 

"Police ho tan hnuhma hi a pawimawh dawn" a ti nghut a. Zaia pawh a tawlh kir ve mai. A hmelah chuan mak a ti tih a lang reng mai. Ruati nen an lo inpawh ve bawk nen. A mak takzet a ni. Pu Vanlala ngaihtuahna pawh a buai map map viau. A in chhung aţangin accident vawi hnih a thleng ta. Teteii kha chu a in aţangin a ni lo zawk a. Amah pawh rinhlelh a la kai lo vang tih a sawi theih loh. Police an lo thleng a. An han en fel a, ruang pawh posmortem turin an phur chho ta bawk. Amanda zin lai a ni hlauh a, Ruati case chu a la thei dawn lo anih hmel. Diteii chuan la se a ti hle naa a thu a ni bik si lo. 

Ruati chu hrai ruih a ni phawt a, hrai ruih tihah mutthilhna hlo hmanga mutthilhtir niin engmah a hriat tawh loh hnuah thah a ni tih a chiang ta. A hrawkah zai a ni a, a thin hnunah vih a ni bawk. Lo sual let emaw bei let emaw turin Ruati chu a harh ţha miah lo niin a lang. A tirah khan an hamhaih atalângin kawngka pui kha a inkalh leh kalh loh an sawi thei tlat lo. Tu emaw rawn lut ruin a rawn that a ni thei, emaw chu in chhunga cheng chuan a that a ni thei bawk. Ruati ruang chu an khua Lawngtlai lama phurh phei dan tur Pu Vanlala chuan a ngaihtuahsak vek a. Mahse, a thu hriat chu mak a ti viau. A ruang nghahna tura a ngaih a nu ú a putea chuan, "Khalamah khan inphum mai rawh u. Kan tan chuan a thi tawh. Ka in chhung hi a thi emaw a dam emaw a rawn rah ka remti tawh lo" a rawn ti hmiah si. Tihngaihna awm hek lo. Ruati chu an in aţanga vui a ni ta a ni. A lainatawm reuh khawp mai. Chhungte duh loh a ni ringawt pawh chu a khawngaihthlak takzet. Amah mikhual chan chang a lo nihnaah vuinaa kal pawh an tam lem lo hle mai. Ruati zawng a vanduai a ni e. 

Ruati thih sarhu lai chuan eng em em tihtheih ni hek suh. An awm deuh tawp mai. Zaia erawh a chhuak deuh reng mai. A nawrtu hi a hmanhmawh tawh si a, ani lahin hun remchang a la hmu mai thei si lo. Diteii leh Dinfela nun erawh a hma aiin a hlimin an inpawhna a ţha zawk a. Naute vangin an inkar boruak chhe tur anga ngaih pawh thawi dam a ni lehzel ţhin. Malsawmi a rawn chimawm ngam meuh tawh lo va, Dinfela erawh a rawn be zeuh zeuh. Amah Dinfela hi beisei awmin vawi khat lek pawh awm se, zak map lo va rawn lawr tur chi a nia! Mi dang pawh a hmuh zawh awm tehlul nen. 

"Dite, Bena kan hmu ta asin" Nu Ma-in a rawn tih chuan a rak hlut. A hnukte lam a ulh. Tlaiah an nupaa va len phei an tum nghe nghe. Bena chu khatia hmalam pana a kal mawp mawp kha a inkal khawvar ţhak a. Lodge pakhat a pawh hlawl mai a, lo thawkte chuan Assylum aţanga lo tlan chhuak a ni tih an hre nghal mai. Mahse, a ţawngkam leh a zawhna te a pangngai vek vangin tih dan tur an vai viau mai a. Bena lahin a chhungte biak pawh ngaihna a hre tawh si lo. Lodge nghaktu chu pa fel deuh mai a lo ni a, chaw te ei tirin thawmhnaw te pawh a pe nghe nghe. An han inkawm inkawm takah chuan Mizo a nih thu te chu an hre chhuak thei ta a. A mizo hmelhriatte a be pawp ta a. Bena chu la hre ngai lo mah se; mizo an nihnaah an rawn tuam hlawm a. An in lamah la pheiin zawhna tam tak an zawt. Assyluma kir leh a duh loh bur vangin Mizorama thawn haw dan an rel a. Chutih lai tak chuan Bena ú te khan Shillong khawpuiah an lo zawng ve mek bawk. A thlalak entirin mi kal vel chu an lo zawt tawp mai a ni. Vanneih asiamin Bena kawltu Mizo ţhianpa Khasi dawrkai hi an zawt hlauh mai a. Ani chuan a ţhianpa te ina cheng thar nen inang a tih thu sawiin an inbe pawp kual thei ta hlauh a ni. A kawng a thui naa a tawpna a hlimawm tho e. 

"Lal Ben, eka, ka va ngai che ve" Diteii chuan a kuah nghal chung chung a, naute a paw bawk si. A rem ţeuh lo hle. 

"Zodingpui, ka ngai fê che. Ka mumangah ka hmu nasa thei tawp che.. Ehe! Hei hi i fa maw? " tiin Drose chu a melh a. A mitmeng fim tak leh a hmai fai zet chu an hmuh lohna a rei ta. Tunah chuan a pangngai tak tak ta niin a lang. Dinfela nen pawh an inbe thei viau. Naute chu a pawm a, a fawp thul. 

"Diteii meuh paw'n fa a neih chuan keipawn ka nei ve vat ang. Nupui min zawnpui la" a ti fiamthu a. 

"Hmm.. I la nau lutuk.. Ngawi mai mai rawh. Lehkha te i zir leh phawt ang chu" Diteii'n a lo ti a. Zanriah an ei ve nghal dawn bawk a. An hlim a, nuam an ti. Boruak chu a zang vah mai a ni. 

Zanriah ei hma deuh chuan Bena roomah an inkawm a. An chhung khat te pawh chaw ei turin an lo kal ve nak nak tawh. Dinfela chu an hna thilah an rawn call vangin a va tifel zuai dawn a, chaw ei hmanin a rawn kir leh dawn a ni. Khumah Drose chu an mut a, khum tlangah an pahnih chuan ţhuin an nunhlui an sawi dun melh melh a. 

"Ben, i ţha hi ka lawm ngawih ngawih. Ka laizawnnnu chungah khatiang khan lo che tawh mah la; i dam hi thinlung takin ka lawm.. Ramthari chuan a kalsan tawh tak tak che tiraw? " Diteij chuan a ti ta phawng a. A hlauthawng êm a ni. 

"Ka laizawn a?! Eng nge i sawi awmzia? Dite.. " a lo ti hú mai! 

"Aw.. Sawi kher a ngai hleinem. Teteii chunga i thiltih kha nangma duh vang a ni lo tih ka hria alawm" a lo ti dam diai a. 

Bena a ding thut, "Ngawi teh, Dite, i sawi awmzia engmah ka hre lo. Teteii chu a ţha em? A la sual reng mi? " a ti ta a. Diteii a meng phâwk kher mai. 

"Eng nge i hriat? Teteii chu a thi daih tawh lawm.. Nangmah kal tlangin Ramthari khan a that alawm.. " zep nei lem loin a ti ta hmiah a. Bena chu a per dat dat, "Zodingpui, chutin min puh suh.. Teteii ka that awzawng lo. Teteii'n Ramthari a that zawk alawm.. Mai maia.. Teteii chu thah kan tum ngei.. Aw.. Ni e, i lakah a sual em em a, hmeichhe sual tak a ni. Kha vang pawh khan ka ngei ve hrim hrim. Mahse, Dite, ka ţhian ţha ber i ni a. I thisen zawmpui chu ka that thei ngang lo a ni" a ti ta a. 

Diteii a ding ve hluai, a khur deuh bawk. "Anih chuan tu thah nge ni ta ang le.. " a ti vin ţhak. 

"Ka hre lo. Kei chuan ka that lo" a ti ta tlat! Mi dang a thah lai te, a thah dan te a hre vek si. Teteii that lo anga a ţang tlat chu Diteii ngaihdan pawh a ni vak lo. Mahse, an inhnial chiam hmain Dinfela a rawn lut a. Thu dang an sawi ta rih. Diteii leh Bena rilru erawh a nuam ta hauh lo mai. Zanriah pawh an ei tam lo hle. Dinfela pawn a chhan a zawt, "Ka la puar lutuk a" a lo ti mai a. Hawn vat vata Dinfela bula a buaina te chu sawi a châk tawh. 

Dar 7 velah in an thleng a. An intifai vat vat. Drose erawh Enkawli'n a pua a, chhunah a mu nasa sia, a harh kar mai. Pu Vanlala hian a atchilh si, a lawm thiam vak bawk si lo. Pi Zawmi chuan a lawm hluah lo naa a ngaihsak em em tih Diteii te nupa pawn an hai lem lo. 

Bena nen an inbiakna zawng zawng chu kimchang takin an pa a hrilh ta vek a. Mak a lo ti ve viah. Mahse, "Aa.. A harh chhuak leh tawh si a, a vengthawng bawk si che nen, i laizawn that anga awm kha a hreh aniang. Nang pawn sawi chhuahsak tawh lo la, hrehawm a tih ve dawn nak alaia" Dinfela chuan a ti a. Diteii ngaihdan pawh a ni. Mahse, mak deuhin a thinlung hian Bena khan dâwt a sawi lo nia hriatna a nei tlat! Fiahna erawh engmah a nei hauh lo thung. 

Pi Zawmi paw'n an pa bulah Ruati leh Zaia inbiak dan kha a hrilh tawh a. A hrilh zan ber khera Ruati thi kha mak a ti viau. An pa tih anih erawh a ring hran lo. Zairemmawia lakah chuan fimkhur ţul hian a hre tlat a ni. 

(A tirah a kual dawn tih ka sawi lawk tawh a. Diteii ten buaina an tawk fô hi in lo hlauthawng ţhin a. Buaina tawk lo se ziah tur ka hre nang 😁😂 -TDR) 

Ruati awm ta lo chu Enkawli chuan a ai a awh hneh rih bawk a. Bakah Pu Vanlala chuan awmpui lak sual leh a hlauh tawh êm vangin awmpui lak leh lam an sawi rih lo. Ruati thihna vangin Seling lamah a kal thei ta si lo va, hnain a hmuak nasa tawh. Vawiinah hian kal a tum nghe nghe. Zaia erawh dawr lama kal a tum thung. Diteii pawh in lamah hna thar a buaipui leh mêk. Awm mai mai hi a ning ţhin si a. 

Seling lam panin an tlan ta par par mai. Kima chu a titi barh barh a. A pu nen hian an innel tawh bawk a, engkim a hrilh ve ngamna a ni bawk. Pu Vanlala felzia leh Aizawl mi lian dangte ang a nih lohzia a hrethiam ve bawk nen, an chhungkaw in tunnunna an ni ve chiang alawm. Seling thlen hma deuh kawng chhuk an tlan lai chuan Kima chuan hlauhthawn hmel zet hian, "Pu, zuangthla rawh. A break a fail" a ti ta tuar mai. Pu Vanlalla a lo hamhaih. Kima lah chuan, "Hmanhmawh rawh " a rawn ti leh. 

"Kan pahnihin le" a ti hram. Chumi rual chuan kawngka chu hawngin a lum chhuak nghal. Kima chu a au zui tuar bawk. "Zuangthla vat rawh"tiin. Kima pawh chuan a pu thu a hmu bawk a, thih chu a la duh chiah lo nen, hmanhmawh zetin a zuang thla ve ta nghal a. A vannei chiah chiah kher mai. Motor chu kar loah kham sang zetah a lum thla ta rum rum mai. Kima khan kopang sut a tum reng, a herh nasa, mahse, chet lakna hman a nei tawh lo tih a hriat vang ania a pu kha zuang chhuak tura a lo tih ni… 

"Kima, i ţha em? I harh em? " tiin Pu Vanlala chuan Kima chu a sawi mawlh mawlh a. 

A rawn rum ţiah ţiah. A ban a bawh ulh bakah, a chal a sawh na deuh a lo ni. A rawn thi nghal ţiam ţiam bawk. An putu chuan an inbuaipui a. Pu Vanlala chu a ban dinglam a pilh hrut tih loh chu na em em a nei lo. Motor an lo chang ta tawp a. An motor break fail ringawt chu mak an tiputu viau mai. Lehlamah an chhuah dawn hian Kima hian a check ziah ţhin a, tukin erawh check a tum lai takin Pi Zawmi'n pot sawn kual turin a lo tir leh sia. A check hman ta lo kha a nia. Motor a lo tlan hlauh, thil awmzia hrilhin Seling lama kal ta lo chuan, Aizawl lamah an let leh ta a. 

Dinfela ten thil awmzia an han hriat chuan mak an tih viau rualin a pate chu vannei an ti bawk. Khamah khan lum ta se, an ruang pawh hlawm a harsa viau ngei ang. Tlaiah Pi Zawmi'n zo ar a leitir a, an thla a hualsak nghe nghe. Zaia a lo haw a, a pate tawhsual tawh chu rawn hre vein, "Tu emaw thiltih a ni ngei ang" a ti tân tân a. A insehruh ţeuh bawk. "Ka pa, hmelma i nei a ni lo maw? Ni dangah pawh ţha reng si, tun ataka han fail tlat chu a mak em mai" a ti leh bawrh bawrh a. Tumah an ţawng zui lem lo. Kima pawh a zia chho ta viau e. Vai ho hi chu lehlamah an tuar hi a zuau bik ve bawk ţhin a.. 

"Dite, ka rilru a na em a ni. Khum khata kan mut dun reng lai ten a rawn video call ngam. Khatiang khawpa hmeichhe huaisar kha ka la hre ngai lo. Amah Puia hian a zir hle tihna a ni mai. Chuvang chuan a bialnu va tãwng chiam ai chuan tiin ka chhuahsan ta mai a ni. Va hauh pawh a ngai lo aw. Kei chu tihian ka tawp hmak e" Baby, puia nupui msg chu Diteii chuan a chhiar a. A hmel a dur hle. Puia hmel a mitthla nghal a, a inhmeh lo hlein a hria. Mahse, Mipa hi chu an lo mak em a nih hi. 

An pa bulah Baby vuivaina chu a hrilh ve siam siam a, a tawpah, "Kei pawh ka hlauthawng ţhin. I luck sia, i sual si lo va, an zuam phah zel che sia.. " tiin an pa a melh kar a. 

"I â em mai a. Phatsan phal chi i nih loh hi. Bakah ka fanu hi e.. Ka uiresan phal teuh lo" tiin an nu chu a pawm thawk a. 

"Mahse, zu te in lo in a. Pawisak in nei tawh lo ţhin" a lo ti hlar a. 

"Zu te chu eng emaw chang bakin ka in ngai hleinem. Hetiang lam kawngah chuan min ringhlel tawh suh aw khawngaihin. Keimah vanga i rilru hrehawm ringawt pawh hrehawm ka ti.. I ta chauh ka ni alawm" thutak zet hian a ti thawp sat a. Diteii hmui fawh rem zet chu a fawp nghal.. 

"Ka hmangaih che" Diteii chuan a ti sap a. 

"A aia tamin ka hmangaih che" ti vein Drose mutthilh lai remchangah hmangin nupa nun an hmang dun leh ta. An tih hnuhnun apiang hi a nuam ber ziah mai. Sex hian nupa nun a va phuarkhawm si êm… 

Zairemmawia erawh bathlarah dingin thla bial kulh chu a melh ran a. A inhumruhin a insehruh kher mai. "A lehpekah chuan a tlawlh tawh lo vang" a ti nghut a. A phone ri mek chu a phawrh nghal zat. 

"Aw" a ti chhum hmuk a. 

"I hlawhchham tih ka lo hria a" a rawn ti chang rât. 

"Lehpekah chuan ka hlawhtling tawh ang" a ti a. 

"Police lamin Ruati thihna an chhui rih mek si a, chawl rih rawh. Chet pelh zeuh pawh a pawi aw.. " a rawn ti a. A aw chu a nem ta deuh. 

"Naute chu ruk chhuak hram ka tum ang a, mahse, Diteii erawh ka hneh lo vang. Lungawi mai rawh" Zaia chuan a ti bul bul a. Tuman an ţawng an hre pha lo tih a hriat vang nge a thawveng angreng hle. 

"Ni e, Naute ka kuta a awm phawt chuan, phuba ka laah ka inngai mai ang. Hlawhchham ka duh tawh lo ania" a rawn ti a. 

"Aw le, mahse, i sawi ang khan nghak leh hlek ang aw" Zaia chuan dawih aw hlekin a ti a. 

"Aw le.. Hun kan la ngah alawm" tiin a nui har har a. A dah nghal. 

"Tu nge maw anih chiah le? " Zaia chuan a ti sup a. 

Pu Vanlala pawh an nu thurawn angin a awm hahdam ta rih. Drose nen an inawm nileng deuhthaw a ni ber. Zaia room a ching let vek tawh a, lehkha a hmu lo. A beidawng angreng hle tawh. Kawng dang zawn mai ţhain a hre tawh hial. Ruati thihna chhuitu te an rawn lang zut bawk a. An thawk muang angreng hle. An chhungkaw mimal tin chu an kawm vek a. Rinhlelh tur reng an awm si lo. Mahse, Enkawli thusawi chuan beng a verh ta deuh. A thih zana Ruati'n tu emaw a biakna kha Eni chuan a sawi chhuak a. A thihna nen a inkaihhnawih hmel êm bawk a ni. Mahse, vanduaithlak takin Ruati phone an hmu zo tlat lo. A room an lepse tawh. An hmu zo ngang lo. A awmzia chu tualthattu hian Ruati phone chu a la tel tihna a ni. An rin danin Enkawli sawi ang khan pawisa a va dilna khan a that a nih an ring ta ber. Ruati khan engkim a sawi vek tur thu a lo sawi si. Chu chu ngaingam loin a that ta mai anih hmel. Mahse, tu nge ni ta ang?! 

"Hmela, i va rawn leng duh lo tak.. " Diteii chuan Bena chu a melh rum ngang mai. 

Nui ho chungin, "Hei ka lo len hi.. Tak taka inleng kan nei ve reng sia" a ti bawrh bawrh a. Thil a ei ţha chho ţan bawk a, a maih kâng mai. A vun a ngo lam a ni bawk a, Bena chu hman ang khan a rawn hmel ţha leh vuah tawh a ni. In hnuaiah an inkawm a, Drose pawh a tlei hrat hrat viau. 

Enkawli a lo haw a. Diteii thingpui lum chu a siam nghal, "Eni, hei ka best friend Bena a nih hi.. Ben, Enkawli a nia, ka nî fanu" Diteii chuan a ti zunh zung a. Enkawli chu lai zetin a nui. Bena pawh chuti tho. An inkara awm Diteii chuan an pahnih chuan a melh zauh zauh a. A rilruin, "Hmm.. Awm a awm chiang mai. Ni daih ru" a ti a.. 

Eni inthlak chhung chuan Bena chuan, "A van chhe lo reuh. Ka duh chi.. Min tihpui thei" a ti ta roh a. 

Diteii rinsa a nih vangin mak a ti lem lo. "Fel takin han awm phawt la, ka makpa tur hi chu ka duhtui viau ania" a ti a. An nui dun vak vak. 

Chutihlai tak chuan Pu Vanlala te nupa room aţang chuan pi Zawmi a lo chhuak a. Bena chu rawn be ve luamin, "Lawma te inah ka zuk leng teh ang. Thil sawipui duh ka nei tlat. Naute hi ka hruai daen ania" a ti a. Diteii pawh a lo bu nghat. Pi Zawmi chuan naute chu puain "Exer a ni mai. A hla lo bawk a, kein ka zuk kal ang e. Tlaiah duh leh Kima'n min rawn lam se" a ti a. A chhuak zui ngjal. An motor kha an la chhuak thei naa.. Hman zui tlak a ni lem lo. Insurance an lo tifel hman hlauh a. A zia deuh e. A thar an la leh nghal a ni. 

Bena chu a leng nileng deuhthaw a. Enkawli eraeh Bena len chhung room aţangin a chhhan ngam lo. Diteii nuih a za hle. 

Tlaiah an lo haw liam liam a. Diteii leh Eni'n eirawng an bawl. Dar 5:30 velah Kima chu a pi hruai turin a tir a. A tlai ve lam tawh nen. 

"Dite, ka pi a awm lo. Lawma te inah a kal lo" Kima'n thaw hlawp blawpa a tih chhan Diteii chu a meng phawk kher mai.. 

'Maw? Eng a? ' tiin a nu a call nghal. Switch off!