Drose 4

D' ROSE.. (Chapter - 4)

Ziaktu : Toni Râlte

"Dite, he lai scene hi ennawn leh a ţha lo maw? Han ngaihtuah la, a climax kan awmtir loh chuan a entu te hrilh kan tihai palh ang" Puia chuan Diteii ngawi rauh rauh lai chu a rawn be buai a. Inthing harh nawk nawkin, "A.. Aw. Aw ka lo en ţha leh ang e" a ti bah nak a. 

"I ţha em? " Puia chuan ngaihtuah hmel zet hian a ti a. 

"Ka ţhain ka hria" a lo ti duh lek a. Script chu lain puan in kaih lamah a phei a. A tirah ţha tia an pawm tlan vek tawh tuna an sawisel leh chu a mak a ti deuh. Mahse, nia eng film pawh eng thawnthu pawh a climax awm lo hi a dik lo ve bawk a ni. A rilruah script a lut eih lo thung. Dinfela char char a ngaihtuah. A lo kal tak tak ang em le tiin nghak deuh roh, nghak anga lang duh si loin a awm a. A ning hle. 

Pawn lama ri hak avang chuan a rilru kal ding ve ţan pawh a bo leh duak mai. Thawh erawh a tum lo. A beisei ruk ang ngeiin a puan in kawngkaah chuan hlim thla a rawn lang a. A pasal ngei a ni. 

Mitmeng thim lek lek, pawr fap hian a rawn lut a. A lo melh duh lo lui ve tlat. 

"U Maheri chu eng nge a an? " a ti satliah a. A bulah a rawn ţhu hnawk. 

"A ţhat ka beisei" a ti zawi sup a. 

"Eng nge i lo tih dawn? " nelawm chiah lo hian a ti leh a. 

"Fiahna zawng turin ka lo kal.. Dite, a hrehawm. Engkim hi sawi dun ka duh. Nupa kan ni tawh a" hah hmel zet hian Dinfela chuan a ti a. 

"Sawi dun tur a awm em ni?" a lo ti leh hmak. Tlawm nghal kha a duh bik lo. 

"Awm e.. Tam tak a awm. Ka hriat châk ber ka sawi ang aw.. Hmana i pum nat ţum khan nau tihtlakna i lo ei em ni? " a ti ta hlawl a. Diteii a meng phak kâwk. 

"I tihsualah min burbun tum suh. Malsawmi nen inruahmanna vek a ni lawm ni? " a ti ve ta sak sak a. Dinfela a lo hrilhhai leh thung. 

"Malsawmi nen kan inkarah hian engmah a awm lo. I rilru en nan ka kawp lui mai mai anih hi.. Engahmah i lo ngai lem si lo va.. Dite, min hmangaih tawh lo em ni? " a ti ta thlâwt a! 

Chu meuh erawh chuan a khawih dan a dang ve ta deuh aniang, Diteii pawh a ngawi dat. 

"Papa, ka hmangaih lo ngai che em ni? Nangmah zawkin kan naute lo piang tur hi i duh lo va, malsawmi nen min tihtlaksak in tum angah ka lo ngai asin" a ti dam thlap a. An inmelh tawn reng. An mitmenga hmangaihna thúk zet la chàmbang chu an haider thei lul lo vang. 

"Doctor khan a rukin min hrilh a. Nau tihtlakna i ei vanga i pum kha nâ niin a sawi a. Ka na em a, engmah ka sawipui ngam bawk si lo che a. Khatiang kha i tih duh ka ring bawk si lo.. Ka hrethiam tawh lo a ni" tiin a helhkam lian ber chu a sawi ta hmiah a. A thawl hawk ngei ang. 

Diteii a chek tlak tlak, "Awii a teuh lo e.. Nau pai duh lo ila i hriat miah loh pawn ka indang ve thei alawm.. Fa i awt a, i awhna aia nasa hret khan ka awt ve tho asin. Engtin nge ka naute chu ka thah phal ang a? " lungchhe aw lek lek hian a ti ta a. 

Dinfela chuan zawi deuh sup hian, "Anih chuan i naute piantir duh lotu an awm a nih chu.  Tu nge anih ka zawng chhuak khawp ang" a ti a. A insangmar nghal hle. 

"Ngawi rawh.. Fimkhur taka kan chet a ngai a nih chu.. Khami tlaia ka thil eiah khan damdawi an pawlh a ni maithei. Thil dang engmah ka ei si lo" Diteii chuan chhing deuh dair diar hian a ti ve a. An ngawi dun vang vang. 

"Dite, U Maheri a ni thei mai ang em? Mahse, ani ber kher chu ka ring lo lulai lutuk.. Taka Hriati hi.. Ni dawn tak.. Ti nge ka lo ngaihtuah chhuah miah loh le.. Hriati a ni thei tlat" Dinfela aw ah chuan phurna hriatthiam hleihtheih loh a lang tel. 

"Maithei, mahse, Hriati chuan engvangin nge ka naute chu thah a duh ang? " a lo ti khauh a. 

"Chutak chu kan ngaihtuah tur a nih chu.. Tun hnuah Umaheri thil siam bak engmah i ei tawh tur a ni lo.. Ni leh lo, ani chu a dam lo si a, keiman i eitur ka siam zel tawh ang" a ti hmawk hmawk a. A nupui chu a hmangaih zual sauhin a inhria. Kha chen an lo inup ţâng ţâng a. Tunah an baw dun ta hawk a. An dam dawn ţan e. Nupa nih chuan inpawh taka engkim sawi dun hi a fuh ber reng a ni. 

Puia a rawn lut ve a. An titi nel nual a. Zan a rei ta bawk si, "I haw dawn lo mi? " Diteii chuan fiamthu deuh hian a ti a. 

"Haw se min duh mi? " a lo ti ve thung. Mutna an siam a. Inkuah rialin an mu dun a. Zawite tein an thu inhmuhfuh loh vanga an tawrhna te an sawi dun melh melh a. Nupa tuak thar ang maiin an inhmangaihna pawh a pung leh ta sauh mai. 

"Chet i tum em ni? An hria ang e.. Kan inhnaih hlawm si" Diteii chuan an pa in a bawh run lai chuan a ti sar sar a. 

"Nupa kan nia, hria ang hmiang. Puan inah kan la ti miah lo.. Ka châk tlat.. Hawh ti zuai ang" a ti sur sur a. Diteii nuih a za ta tlat. A dir char char a, Dinfela posi a lai tawh bawk si. Diteii dul a lo puar ve ţan bawk nen.. Puan in chu a che det det a. Mahse, tuman engmah an hre lem lo. 

An haw veleh naute chunga khatiang thil titu hriatchhuah tumin an buai nupa ta hle a. A chhan chu nakin thlenga la hlauhthawnawm a nih vang a ni. 

Duati birthday a lo ni ve leh ta reng mai. Rin loh karin hun hi a liam chak ve zêk a. Diteii pawn Duati tan Barbie set, manto tak leh suit nalh zet mai a leisak a. Dinfela thungin Teddy bear lian zet a lei thung. Tlaiah an chhungkuain an chhuk thla ta dial a. Alice te chhungkua pawh an rawn lang ve thei e. Ţhenawm hnaite bak mi dang an sawm tehchiam lo bawk a. A nuam tawk viau mai. Maheri pawh dam ţha vak lo chungin a tel ve thei a, Duati nen hian an innel ve viau hman tlat a ni. Zuia nen engkim sawi dunin Maheri dam ţha deuh se inneih an tum ta mai a ni. Zuia a inthiam lo em em a, amah vanga a bialnuin natna tihdam theih loh a nei ve chu a damchhunga a awm tinuam lo tur a ni ngei ang. Maheri eraeh Pu Vanlala ten an fuih nasa bawk a, a chantawk khuarel chu lungawipui a tum ve thei ta a, Damdawi a ei ţhat phawt chuan a thi mai dawn lo tihte a hre ve bawk. Mahse, an natna erawh vantlang zingah thup a la ngai dawn thung a ni. Mizo a nawlpui ten kan en dan a la dik tawk tlat si lo va.. 

"Pu, sawti laiah sawn ka ú te an awm a. Ka va tlawh ve lawk aw. Ka rei lo vang" Hriati chuan Pu Vanlala chu a dil a.

"Aw.. Va rei lo la, hei hun serh a hun ţêp aw" a lo ti a. Hriati chu a chhuak zui nghal. Dinfela a chhuak ve nghal zat. Hriati chu Lawma te ţhenawm lawk a hmaa an lo intihbuaipui hrep tawh Sanga te inah a lut ta a. Dinfela chu a bu nghut nghut mai. An rin loh lam daih thil a ni naa a ţhawng lutuk hran lo. Rei awm loin Hriati pawh a rawn let ve leh mai. Dinfela chuan, "Hriati, I va kalna te nen khan engtia in chhung nge in nih a? " Dam thlap hian a lo ti a. 

"Ka pa û fapa a nia, Au Sanga saw.. In ina ka lo awm hma pawn an inah ka awm ve reng tawh alawm" a lo ti ve mai a. Rinhlelhawmin a awm duh miah lo. 

"Anih chu a.. I U Lawma te nen an intihbuai kha i hre ve em? " nui pahin a ti a. 

"Hria e. A zia lo tak tak a ni. Au Sanga hi chu a insum thei lo lutuk a, zu a in ve thin bawk nen" a lo ti leh thliam a. Hunserh an hman dawn vangin an kal hrang ta a. 

Hunserh chu Lawma te bialtu Upa in a hmang a, a hmang tawi thiam kher mai. Ţhenkhat hunserh hmang hi chu an tlak duah zel a, pass lawm a ni emaw, birthday lawm a ni emaw pulpit-a ding anga inngai hi an awm châwk!  A hun leh a hmun thliar thiam hi a ţha fó reng a ni. 

Chaw an ei a, Lawma te inbuatsaihna a ţha bawk a, chawhmeh lam pawh an hnianghnar e. Duati pawh a mawi. A birthday cake erawh Alice-in a tumsak thung a. Duati nen an lo inkawl rei bawk a, an inngai nufa kher mai. 

Lawma chuan naupang lo awm vete zinga a lian deuh chu, "Kha hei hi I Pa Sanga te va pe rawh. An rawn ei hmel si loh a, inthlim ngawt zawng a nuam lo ve" tiin chawhmeh chi thum lai fel taka pack thlap hi a pe a, a va pektir. Huatzuina a nei tawh lem lo naa hman anga awm leh chu a theih a rinawm tawh loh. Dinfela leh Diteii erawh chuan Hriati chu an enthla ru reng a, fiahna nei lo mah se; Hriati bak rinhlelh tur an hre tawh lo. A nih ngei pawh a rinawm. 

Zanah cake an zai a, an hlim dar dar kher mai. Maheri leh Pu Vanlala te nupa erawh an haw tawh a. Hriati pawh a ú te inah a leng leh daih. Chung te chuan an rinhlelh a tizual sauh mai. An hawn dawnah Dinfela'n a va lam a, mi ţawng ngaihthlak chu hreh viau mah se; an tan a pawimawh êm vangin kawngka bulah chuan a ding vang vang a. Sanga chu a ruih hmel viau, a ţawng danah. 

"I telh tam lo aniang chu.. Telh vek tur alawm.. Tunah chuan a chhe thei tawh lo vang. A nih tur ang a ni vek tawh. A neih hunah tih dan tur kan dap leh mai dawn nia, nangmah bak tu nge nau awm tur chuang" a tih ri chuan Dinfela a nghawng dawt mai. Thinphu dup dupin a lo ngaithla ran a. 

"Aaa.. Ka hlau tawh ania, min ringhlel ang.. U Dinfela hi a fin hmel bawk si.. Ka ngam tawh lo" Hriati chuan a ti niah niah a. 

"Zawng Lawmzuala te hi ka lakah thei an inti em a, eng nge ka tihtheih entir ve an ngai a ni. Ka awm mai mai dawn lo, An fanu phuahchawp Duati pawh saw engtin emaw ka la ti khawp ang" tiin a inhrosa chiam chiam a. An nu chuan, "Tawng zawi ve teh, i ruih lah hian i chham hrep zel a, ţhenawm khawveng nei kan nih hi.. Va mu rawh" a lo ti hlaih hlaih a. An pa chu a venthawn ve hmel hle mai. Thudik a hre ta bawk a, Dinfela chu a kalsawn leh a, Hriati chu an hawn tur thu call-in a hrilh ta zawk a. Rei vak loah Hriati pawh a rawn phei a. Danglamna engmah lantir lo vin an haw chho ta nghal a. 

In an thlen rual chuan, "Tlai deuh tawh mah se, chhungkua ţhukhawm lawk ang u" Tiin Dinfela chuan a chhungte a be kual a. Pi Zawmi phei chu a lo mu tawh a. Maheri eraeh Zuia a haw deuh chiah a, a lo la mu lo thung. 

Sitting room-ah chuan an ţhu khawm ta ţhap mai. 

"Hei, thu pawimawh deuh sawi tur ka nei a. Pehhel lo vin ka sawi mai ang. Hman deuha Diteii nau chhiat ţhelh chunhchangah khan thil felhlel a lo awm reng a. A eiturah nau tihtlakna damdawi pawlhsak a lo ni a.. Kan han chhui tak hnuah chuan Hriati thiltih vek hi a lo nia!  A chhan pawh Lawma te nupa buaina hmanni deuha an buai vakna kha, khata tibuaitu Sanga kha a cousin a lo nia. Lawma chunga phuba lak duhna vangin Hriati hi an lo hmang ţangkai a lo nia. A pawi takzet a ni. Nau kha tlain thi ta se chuan, Hriati, Police hmel i hmu ngei ang. Mahse, an chhan hman ta hlauh a. I vanneihpui ta a ni. Chuvang chuan, zanin chu i riak thei ang a, naktuk khawvar rualin i chhuak dawn nia" Dinfela chuan a ti ta fak fak a. Hriati chu an melh ţhup mai. Tumah a en ngam lo, a hmai a hup a, a ngik faih faih. A la naupang ve bawk nen.. 

Maheri thik a thawk ta nge, "Nang hi maw lo ni, hrehawm ti em emin ka lo awm phah a, eisiamtu kan nih vangin min ringhlel angem tiin.. I va zak lo em em ve.. Engmah thiam nei lo, zirtir chawp ngai chutah pawh la zelthel em em zui.. Heti khawpa i nawmna hi i hmu tawh dawn lo ania.. Ka beng chak hle mai che" a ti hlak hlak a. Pu Vanlala erawh a ngawi ta rih. A fapa thu chu thutawp a ni tih a hria. 

Diteii chuan, "Hriati, i tan riah leh pawh a hrehawm tawhin ka ring a. I duh leh va insiam la, I U Dinfela'n i ú te inah a zuk dah dawn che nia.. Kei chuan ka huat loh tehlul che nen, ka naute thah i tum kher hi a pawi ngawt mai. Eng ang pawn sim mah la, ka ring thei tawh dawn lo che a ni"a ti dam thlap a. Thinurna nei miah lo ang maiin a hmel hmuh pawh a nuam e. Hriati pawh engmah sawi tawh lo vin a insiam ta mawlh mawlh a. A mittui a hru zauh zauh bawk. A insiam zawhah Dinfela'n a zuk thlah leh thlap. Maheri a mal leh ta. 

A tukah tukţhuan an kil laiin, "Maheri a mal dawn sia, kei lahin ka pui thei si lo, Diteii lah a rit ve ţan si, awmpui dang lak leh mai chu a ngai a ni… " Pi Zawmi chuan a ti a. An pawm tlang hle. 

"Ka huphurh hran lo, mahse, pasal ka nei ve daen sia, ka awm loh hunah pawh in rinngam tur, engkima ka ai awh zo in zawng dawn nia" Maheri chuan a lo ti ve a. A sawi dik chiah. 

"Zawn vak ngaihna pawh ka hre ve lo kei chu.. " Diteii chuan a lo ti a. 

"Kei leh Maheri'n kan lo ngaihven dawn nia" Pi Zawmi'n a ti a. An ngawi tlang ta rih. 

"Khawvel hmeichhe rai puar zawng zawngah hian nang aia rai inhmeh leh hmel ţha hi ka la hre lo reng reng" Diteii inbual zo lo melh chung chuan an pa chuan a lo ti a. A lai leh ringawt. 

"I chhia" a'n ti ringawt ah!  Dinfela'n a lo lawm leh tumhrang. An nupa hlimna rawn kir leh chu an chen ve hle a ni. Diteii hian sex hman a duh vak tawh lo naa an pa tihlunghnur hi a hreh ve ţhin si.. A dawh leh nge nge ţhin. Dinfela hi a lo insum hleithei lo nen.. Hahthlak. 

Zing tin an nupain an walk a, a la inzo lah lah viau mai. A hna pawh in lamah a thawk tho va, vah chhuah vak kha an pain rem a ti chiah si lo. Maheri a pui zauh zauh bawk. Awmpui tur lah chu an vâng phian a. Tunlaiah mizo ngei awmpui tur chu an khât ve pharh tawh, Singapore leh China, macau tih velah an liam sung sung a, sum a lo tam zawk nen, Mizoramah chuan hlawh a beitham si a, chhungkaw chawm nan leh chhungte puih nan pawh a rintlak lem loh ve bawk a ni. Mizo te kan taima chho ve zel a, mahni inchawm zo lo Ţhalai nih hi kan zak chho zel dawn ni te pawn a lang. Hei hi thil ţha tak a ni. 

"Awmpui ka hmu e.. Ka rawn hruai haw mai dawn aw" an pa in a rawn ti teh tlat a!  Mak a ti deuh. 

"Aw a pawi hleinem" a lo ti ve mai a. A nu leh Maheri a hrilh ve nghal. 

"Dinfela hmuh anih chuan a sual lo vang. " Maheri chuan a lo ti a. Ani pawh a pasal neih tur lamah rilru a seng ţan a, a buai ve thei viau. Thuam chhawm lamah chuan engmah lungngaih tur a awm hran lo. Mahse, a rilru kap tlattu chu fa nei se, a fa chu a natna vei mek lak atangin a him thei ang em tih a ni. Vawikhat pian ve manah fa pakhat tal neih chu a duh ve si. A inngaihtuah sual chang chuan thih te a chak rum rum fó!  Nula awm tha duh lo pawh a ni lo va, a bialpa nen vawi hnih khat sex an hman vang ringawta a positive bik chu vanduai chungchuangah a inngai thin. A ni ve bawk a.. Khawvel hi a fair lo fô!  Ţhenkhat fa awt ngawih ngawih an awm laiin, ţhenkhatin duh loin an lo titla thul. Ţhenkhat sex an hman vawikhatnaa rai nghal mai, miin an hmuh khaw loh zawh tak an awm laiin vawi tam sex hmanga rai duh hauh lo inveng thiam an lo awm bawk a. Nula awm chut chut an hur duh tih te chu tih mai mai, tawnhriat an neih loh vang te, inven an thiam loh vangte a ni fô zawk. Khawvel a ni miau a. 

Dinfela chuan an awmpui thar chu Mike-a hmuhsak niin a sawi. Chhim lam mi a ni a, nula pangngai tak a nih hmel. Pu Vanlala te chhung hi chu mi va ti huam chi an ni lem lo va, an ina tlangnel apiang an nuamsa a ni mai. An awmpui thar Ruati pawh chu an lo be teh chung lo va, Dinfela'n,  "I in anga i ngaih tak tak hunah nuam i ti chauh ang" a ti lawk sa thlap. Diteii erawh chuan a lo chiau au ve tho. 

Maheri te inneih a hnai tual tual a, an buai ve ţan. Diteii rai puar ţeuh tawh te nen an va bazar a, mo kawr pawh a nalh kher mai. Maheri hian lawmthu sawi ngaihna pawh a hre mang lo. Pu Vanalal te inah awm lo se chuan tiaang hi a nei thei dawn der si lo. A hnukte a ulh lek lek hial ţhin. Zuia pawh a phur ve surh surh khawp mai. Khatia an natna an hriatchhuah tak atang khan an inhmangaih sauh emaw tih tur a ni. An chhungten an hriatpui tawh bawk. 

An awmpui thar Ruati chu a tlangnel hma hle, titi hluah chi, nuih duh deuh a nia. Diteii nen pawh an inmil viau mai. Maheri pawn Hriati ai ngawt chuan kaihhruai pawh nuam a ti zawk. Mi tihlawm a thiam reuh si, pawi a sawi lo bawk nen, a chhungkaw tharah chuan kar loah a tlatlum nghal thuai a ni. Maheri ţhian tur ber kha a hna vangin phaiah koh a ni ta si, ţhian kawm tam ta lo chu ţhian dinpui tur a vân ta riau. A tawpkhawkah Ruati chu an ngen ta tawp a. Ani lahin a lo châk sakhai bawk. A hlimawm ţan e. 

Inneih ni chuan mi pawh an ţhahnem ve khawp mai. Mi nun ţha ve ve an ni bawk a, lawmpuitu an ngahin Zuia phei chu a thawhpui te lamin an rawn chawimawi thiam hle mai a. Inneihna ropui ve tak a ni. Pu Vanalala te lam lah an neihin a tlin bawk a, engkim a ţha ber duh zel mi an lo ni bawk nen, inneih chhimtu te sawi hat thamin Maheri chuan ropui takin pasal a nei ve ta a ni. 

A han awm ta lo erawh in chhung a reh dúk hian a hriat a. Ruati lah a awmna a la rei chiah si lo. Mahse, Maheri ai chu a awh zo dawn hle chuan a lang e. Diteii pawh nau neih a hnai chho ţan a, a dul pawh a rit sawtin in hnuai leh in chung inkalpawhna step phei chu muangchang deuhin a kal a ngai tawh. Nau puan leh mamawh tur zawng zawng an lei vek tawh bawk. Inring phên phâwn tawh tak an ni. 

Hetih lai mek hian Dinfela chu hna vangin Kolasib-ah zin lawk a ngai a. An nu nau neih hnai tawh nen, ni 3 vel lek zu cham pawh a hreh angreng hle. Mahse, Diteii'n kal tura a nawr vangin phur vak lo chungin a insiam a. Diteii chuan a ni thil tur a thawn bawk. Rai lo se chuan a kal ve mai tur hi a nia. Inngai tak chungin an invai liam ta a. Tluang takin Kolasib chu a zuk thleng thla a, Diteii ní te pawh a tlawh nghal var. An ina thleng turin an nawr naa a hnathawhna lamah thlen in tur an lo dahsak diam tawh si a, lehpeka thleng tawh tura intiam chungin a chhohsan leh ta a. A thlenna chu a nuam viau, unau hmeichhia hlir pali an ni a, an zuan a zângin an thothang a ţha si. Thawhpui dang thleng te pawn an fak khawp mai. In chung berah an room tur bik an dahsak a. Dinfela chu in hnuaiah a chhukthla mang lo tihtheih a ni. Diteii a be awl lo va, a thlenpui te phei chuan, "Diriallova ' an ti tawp. A ngai haw duh lem lo. 

An hawn a lo hun dawn ta reng mai. Training chhete an inpek bakah bungraw supply vel chungchangah an inbia kha a ni bawk a. Hun an duh rei vak lo ve. An hawn dawn zanah chuan an thlenna nula upa ber dawttu Thiangi chuan a pu te ina kalpui lawk turin a sawm a. Bakah Diteii ní khan an núl lama an chawhmeh te kha hawntir a duh ve bawk nen, va lam pah a remchang tiin an chhuak dun ta a. Diteii ní te inah an kal hmasa phawt a. A lo fun lawk diam tawh a, Thiangi te nen an veng a lo inhlat bawk nen, an lo inhre lutuk lem lo. Rei mawi tawk an ţhut hnuah an chhuak leh ta a. Thiangi pute in lamah an tlan leh nghal. Field an tlanpelh dawn chuan, "Ding lawk ang" Thiangi chuan a ti a. A ding ve mai. 

Ruah hmi a tla siar siar a, chhum a zing deuh bawk. Veivak an awm lo tihtheih a ni. Thla a eng mang bawk si lo. 

Thiangi chuan a bag ah, bazar bag a ni mai ang chu.. A zen rak rak a, Blenders a rawn phawrh nawlh mai. Dinfela pawh a phu deuh zuk. 

"Sawtah chuan a tih ruk theih si lo va, chuvang alawm kalpuiah ka sawm che. Ka rinngam vang che ania. Sawi suh aw" a ti sar sar a. Dinfela nuih a za deuh, "Ngah nge maw ka sawi ngawt ang le" a ti ve mai a. Thiangi chuan disposable cup phawrhin a thlir nghal a, "Ka thlit kep ve ang che aw" a ti a. Dinfela chu a tîm deuh, mahse, no hnih khat lek te chu Aizawlah pawh han lem zeuh chang a nei fô alawm le tiin, "Aw no hnih vel ka insak ve ang che" a ti a. A sehhmeh tur pawh Thiangi chuan a lo intum thlap, engkim a ruahman sa vek tih a hriat. An unauah pawh a phawk ber leh hram tlahawlh thei ber kha a ni hrim a. An chhungkaw black sheep a ni ve maithei a ni. An in dun ta pap pap a, mi veivak an awm bawk si lo.. An free hle. 

"E taka, Thiangi, hmana a bialnu thattu kha a la dam em? " Dinfela chuan a ti a. Chana a hmawm zauh zauh bawk. 

"La dam ve e.. An in ka kawhhmuh dawn che nia.. " tih pahin a phone ri cher cher chu a la a, "Aw nu, hei U Dinfela hi an nu nî te inah ka kalpui leh a, chawhmeh vel hawn a tum sia, kan la nghak.. Kan rei deuh ang aw.. Khua hi fan a châk ve bawk sia" a ti nghal zung zung a. Dinfela lawmzawng tak a ni. 

"Chuan, anih a bialnu kha ti nge a thah le? A hun lai khan a lar sia, mak ka lo ti ve tawp" Dinfela chuan topic ngai bawk a rawn thawh leh a. 

"Ka hre ve lutuk lo kei pawh ka la nula bik lo va.. An sawi danin kohhranah nihna a nei sia, a bialnu kha a rai bawk si, mualpho a hlauh luatah a that an tia. Ka hrechiang lo, a phênah thil dang pawh a awm maithei" a lo ti liam leh puat a. Vei nei hmel a pu lo ve khawp mai. 

"Chuan a bialnu kha hla ve deuh hlekin kan inchhung alawm.. A thih khan kei chuan ka awih thei lo reng reng. Ka khawngaih asin aw.. Ih, ka naute phei chuan a thah dawna kan ina a rawn pen pawn a chemtê pawh an hmu a niawm e.. Mahse, an ringhlel lo hrim hrim.. A hnuah an han hlau leh hnuhnawh a.. Hmangaihna hi chu a mak eee tiraw? " a ti leh daih. A inkahpah lo bawk sia. A dose a sang vak lo a nih hmel. 

"Mak ngawt mai. Bialpa i nei lo mi? " a ti a. 

"Nei ve ţhin e. Ka peih tawh lo. Mipa chuan sex chiah in duh" a'n ti thâwr a. Dinfela a nui tawp. 

"Ania lawm, bialpa pathum ka nei tawh. Sex ka hmanpui vek tawh. Mahse, ka damchhung hun hmanpui tura rintlaka khawsa duh tumah an awm lo. Sex an hmu a, an lungawi a. Mi dangah hmuh an tum lehzel.. Chuvang chuan pasal nei lo va hetia awm mai mai hi ka duh zawk" Thiangi ţawngkam chuan ngaihtuahna a tithui viau mai. 

"Mipa zawng zawng kan inang vek lo asin.. Ţhenkhat sex hmang miah lo inhmangaih chuang si lo an awm laiin, sex hman vanga danglam chuang lo inţhen thei miah lo an awm ve tho alawm" Dinfela chuan a ti a. Zu chu a in zeuh zeuh bawk. Vawikhata tlak ve pup chi a ni lem lo. 

"Mipa hian hmeichhe virgin in duh tiraw?" a ti leh hlawl. 

"Duh e, mahse, kan hmangaih phawt chuan virginity kan ngaipawimawh ber lo. Mipa, virginity-a buai buai ho hi a tlangpuii hmeichhe khawih chhe hreh chuang lo, mahni pawh invawng bik lo an ni duh khawp mai" a lo ti ve mai a. An ngawi dun ta rauh rauh. 

"Mahse, maw.. Mipa hi in mak!  Inngaihdanah chuan hmeichhe fight chu thil thiang, hmeichhe zu rui ngat phei chu pawngsual pawh phû-ah inngai a. Chumi lo danga lo insaseng tur chuan min beisei lawi si.. A ngaihna ka hrethiam lo che u" a ti leh tân tân a. 

Dinfela chuan thutak zet hian, "Ka tel ve hauh lo ania.. Kei chuan tuna i zu in pawh hmuh danglamna che ka nei lem lo. I in duh a, i rui châk a ni ve mai. Mahse, hmeichhe ţhenkhat zu rui hi chu mipa hmaa han pauh târh târh te hi an hreh lo thin a.. A ho, sawi tawh lo vang. Intiharh rawh.. Haw dawn hnai ang" a ti ta a. 

Thiangi pawh chuan, "Umm ka duhtawk. Ka kai nuam tawk chiah e.. Number te inpe ve ang, nakinah ka lo zin hunah i show ve thei.. I bulah chuan ngaihngam takin ka in ngam a.. Ka lawm e" a ti a. Number te inpe tawnin an han intiharh a. Thiangi pu te inah pawh kal ta lo chuan an haw leh ta daih a. 

Zing dar 6 velah amahin a inkhalh haw leh ta vang vang mai. A nupui a ngai tawh. Kalkawngah pawh a chawl khawmuang vak duh lo. Chauh pawh a hre lem lo. Kawngtluangin Mafaka Khiangte Pasalţha thawnthu ngaithlain Aizawl pawh a lut dawn ţan ta. 

An lo ding khawm deuh laih a, motor accident a awm em mawni ti rilru chungin a ding ve nghal a. A va chhuah chuan min10 rual Malsawmi a va hmu nghal. Mak a ti angreng. A va pan hnai a. Malsawmi motor leh tleirawl hawklak rual car an lo insu a lo nia. Malsawmi motor chu a chhe angreng viau, a lo ang hlak hlak bawk. 

"In chawi lo anih chuan ka thleng sang viau ang. Nangni zu ruih hrikthlak nana ka lei a ni lo ania" a lo ti hlaih hlaih a. Dinfela a rawn hmu ve, a tawp chawt. 

"Enteh, hei ka motor hi an rawn su ringawt a. A chhiatzia hi.. Engtin nge ka tih ang hma min lakpui teh" a ti nghal chúl a. A tira induhtawk tak hmel kha thlakin khawngaihthlala deuhin a awm leh daih tawh. 

. "A zia lo hle mai. Police in be tawh em? " a ti nghal a. 

"Be lo, ko rawh kan tih pawn a ko duh hleinem. A chhan chu a thiam lo zawk ania, Side la lo vin a rawn tlan a,a tlan chak bawk si, hriatpuitu kan nei thlap e" Tlangval tir lam sa ţha nelh nawlh hian a lo ti var a. Malsawmi chu a zm deuh hlekin a hriat. 

"Side ka la emaw la lo emaw in rawn tlan chak ve tho" a ti nawi ta mai mai a. Dinfela pawh chuan Malsawmi zawk chu a thiam lo zawk anih a ring nghal. 

"Engpawhnise, hei a chhe viau mai sia, chutia inkaltir ngawt chu a fel lo vang. Tihian chho ila, sawifel dan ngaihtuah rawh u. Nangni lam chu in chhe vak lo a, inberem teh u" zaidam takin a ti a. 

"Nia, chawi sak loh pawh kan tum hran lo. Mahse, a pawr em a, kan ngei ve deuh a ni. Mahse, a vai vaia chawisak chu kan tum lo ania" Rawlthar bawk khan a ti leh a. Malsawmi motor chu a thla lain, kawngsir zau laiah a side sak a, "Ka motorah lo chuang phawt rawh. I motor saw chu nakinah i naute i laktir dawn nia.. I khalh ngam rih ka ring si lo" a ti a. Íhe loin a zui nghal. Kolasiba a zin thu te a sawi luam a. 

"In nu i ngai tawh awm" a ti har har a. 

"Ngai ve tawh e" a lo ti ve mai. 

"Min rawn be leh tawh ngai si lo va, min mamawh tawh lo anih hi ka lo ti rilru a" a ti leh a. 

"Ţhian kan ni reng dawn alawm" a lo ti daih. 

Ngawi rengin an tlan ta mawp mawp a, Malsawmi chuan thla a la zeuh zeuh. Dinfela chuan hnial a duh viau naa a accident hlimte a la ni sia, a khawngaih ve deuh. A venthawn ber chu Diteii a ni. Malsawmi chu Police station thleng a va thlah a. Han awmpui duh viau mah se, an nu a hmu chak tawh si, bakah chawhmeh a phur nual bawk nen.. a kalsan ta zawk a. 

"Ka lo haw e" tiin room kawngha a hawng nghal. An nu chu a mah hnungchhawn zawng hian a lo ţhu a. A rawn hawi duh miah lo. 

"Nui" a ti nghat a. 

A chechang eih lo. 

"Naute.. " tiin a va pan a. A kokiah a va khawih a. Zawi muanga inherin, "I va hmang nuam bawk maw" tiin a phone a lekkang a, Malsawmi nen a motora an ţhu dun, amahin a lak sek kha a rawn lang a.. 

"Ka sawifiah thei" a ti hrãwk a. 

"Hei pawh hi maw" tiin Malsawmi'n a caption-a a hman, "With Darling.. " tih chu a kawk chat a. A hmel a thutak kher mai. 

"Dite, ka ngaih tehlul che nen.. Engmah khatiang a thleng lo" a ti sup a. Kuah mai a tum. 

A che sawn rang kher mai. "Nau nei ţêpin heti khawp hian ka awm a. Tiang khan min lo la thlim thei ania" a ti ţuau a a. A ţap tawp. Zaidam zetin a va kuah thlawp a. "Engmah a ni lo. Engmah a thleng lo. A motor an sutsak a, ka rawn phur ve mai a ni. Nangmah ngeiin i la fiah dawn nia' a ti nghet charh a. Diteii pawh chuan a lo ngai ve tawh bawk nen, a rawn kuah let ve ta zãn a. 

Chutihlai mek chuan Dinfela phone-ah msg a rawn lut, "Thleng tawh em? I va'n ngaihawm' tih a rawn lut a. 

In hnuai lama ei rawng bawl mek, an nula phone a ri ve mèk bawk. "Hello" a ti zawi sap a. 

"Zaninah chuan aw" lehlam ami chuan a rawn ti fiah kâk a. 

Ruati chu nui deuh sakin, "Tehreng mai.. Tichuan, i intiam tawh ang khan.. Kei hi awmpui satliah  ka ni tawh lo vang" a ti sap a. Lehlam ami chuan, "Zaninah min lo ngaichâng tawp rawh" a rawn ti leh a. An inbiakna chu an titawp ta a. Eng nge zanin chu?!! 

(Tun lai chu ka thau tawh nak alaiin ka thau zual dawn aniang.. Ka mut a chhuak reng zel a.. A sei loh pawn lo lungawi ve hram mai teh u)