Drose 15

D'ROSE.. (Chapter- 15)

Ziaktu: Toni Râlte

" u Duat, i bialpa khan nupui a nei dawn maw? " Drose chuan a ti hû a! Duati a lo khi sak. 

"Umm nei daih dawn. I ui em? " a ti a

"Teuh lo, perek a ang si ka tih kha. Ih, a pa anga hmel tha hi ngaizawng tawh rawh" a ti niah niah a. Duati a nui dir char char. 

"Nia, min zawnpui la" a ti a. 

"Ka thiam ve lo. Mahse, U Rinmawia kan zawntir dawn nia" a la ti tak deuh deuh. A nuin thil ei tura a rawn koh vangin in hnuaiah an chhuk thla a. Pangbal chhum an chhawp thûr mai. Mi lian chhungkua e ti lo hian thil zo deuh deuh, mizo thlai leh thei ang pawh hi an ei nasa. Diteii rilrem zawng tak a ni pek a. Banê chhum te hi tui an ti hluam hluam viau. Chawhmehah pawh an ei changkang falua lo. A hun leh a hmun chu a awm ve bawk a. Pangbal pawh chu tui tizetin an ei hlawm a. Drose paw'n tui a ti leh viau mai. Rinmawia pawh a rawn lang ve a, "E nu taka, U Rinmawia hian guitar perh min zirtir dawn ania aw. Ka sawisa.. Mahse, Weekend-ah chauh" Drose chuan a ti zawt zawt a. 

"Hmm.. A ţha lawm. Anih eng nge i zirtir ve dawn" a lo ti a. 

"Motor siam a ni mai" a ti! 

Rinmawia leh Duati hi an la innêl lutuk lo va, mahse, an han titi ho takah chuan an inkawm thei fú mai. 

"Naktukah farm-ah kan kal dawn a. Naktuka in tihtur zawng zawng kha vawiinah ti zo vek ang che u" Diteii chuan a ti a. Naupangho an phur kher mai. 

Zanah Drose leh Duati an mu dun a, an titi leh nasa mai. 

"Bialpa te hi i lo nei ve ngawt ang e aw" Duati chuan a ti a. 

"I zak em? Ka nei peih bawk lo" a lo ti nghek. Duati chuan nui chungin, "Mamawia kha i melh zing riauin ka hria" a ti a. Drose lungphu a rang ngei mai. "Unau alawm kan nih. Bakah a lerh si ka duh bawk lo" a lo ti leh hlar a. 

"Amah pawh khan a melh zauh zauh che. Zep duh suh. Ka hre vek" Duati lah chuan a dâwp thiam si. 

"Aa.. Chutiang a ni lo. ih, dik tak chuan ka hre thiam lo. A lerh ka ring" a ti nuaih a. Duati a lo nui kur kur. A nau chuan Rinmawia a star tih a man thiam ve vek. Mahse, a star tih pawh a inhre thiam leh tawp nang. Mawl si.. 

Phur takin farm lam panin an inphur thla ta a. An rak teng tung mai. Pu Vanlala te nupa pawh an kal ve. Lawma te nupain an rawn zawm leh bawk. Drose chuan Aizawl pelhah Rinmawia chu bike khalh a dil leh pek a, a lo phal ve mai. A mipa zawk a hnungah a ţhu ût mai. Drose chuan a khalh thiam zêk lehnghal. Rinmawia chu a uang leh pek a, Drose kawngah tak a kuah nghet charh mai. A lo phu uih a, "I â mi" a ti vin ţhak. 

"Tlak ka hlau alawm" a lo tihsan a. 

"I zak lo, min khawih i chak vang a nih kha. I lerh lutuk" a ti. Hmalam en a ngai bawk si. Rinmawia lahin a thlah duh der si lo. A hnuah chuan Drose pawn engmah a sawi ta bik lo. A tira a lungphu dup dup pawh a ziaawm chho ve ta deuh. 

Farm an thleng a, naupangho chuan tui chen bak an ngaihtuah leh tawh lo. Phir unau te lah a harha harh ta ngang chu an inphelh sawk sawk a, an zuang thla nghal pup pup. Diteii a ner sawk. Mahse, a hau ta bik lo. Puitling lamin ei rawng an bawl a. Pu Vanlala leh Pi Zawmi pawh inkai rialin an huan chu an fang kual a; an tlawh khât ta deuh bawk a ni. Mahse, a enkawltu ten an enkawl tha bawk a, thei leh thing te pawh an lo duah tha viau e. 

Zami leh Diteii an titi nasa. 

"Dik tak chuan Tluanga chhungte hi ka lo huphurh ruk sa an nia, hetia an inthlah fel thei hi amah Duati khawngaih viau mah ila, ka lawm tho mai. " Zami chuan a ti bawrh bawrh a. 

"Ni e, bakah innei ta pawh nise; Hetiang hi an la thleng ve leh thei tho, karah fate an neih tawh phei chuan a khirh vek tawh thin.. Duati pawh a dam mai ang. " Diteii chuan a lo ti ve luam a. 

Drose pawh a hleuh leh pup pup mai. Rinmawia erawh pool sirah kekawrbul nen a thu reng a. Duati chuan, "Lo kal ve rawh. A nuam reuh tawp" a ti a. 

"Aa.. Ka peih rih lo. Nakinah " a lo ti mai a. Tui a hleuh thiam lo tih sawi chu a duh bik thak lo. Drose phei chuan a nuihzat leh dawn si. Pool chu a thuk reuh si a, a cheng ngam tlat lo. Tetea chu a nuin a rawn ko vau vau a, a damdawi ei a hun a lo nia. Tui atanga chhuakin a han ei vat vat a, kekawrte nen a rawn tlan thla leh tar tar mai. Rinmawia thu reng chu bawhin, "Aù Mamawi, paw chungin min lo hleuhpui" tih pahin a nam pah a, Rinmawia lo thu nghet vak lo nen, an tla dun ta. 

Tetea chuan a hleuh zui nghal, Rinmawia eraeh buai zetin a inhai pup pup, an tlak thlakna lah puitlingho chenna tur lai a lo ni si. A pil chiah chiah vel ang, a buai ta tlat. A tirah a tider emaw tiin an nuih san mai mai a. Mahse, Duati chuan, "A tla anih saw" a ti ta chul a. Drose a hleuh phei vat, a va dwm a, a hneh meuh si lo, Duati leh a nauten an rawn pui ve ta vat a. Eng êm ti loin an hnuk chhuak thei hram. Dinfela leh Lawma lah huan chhakah an kal daih si a. Hmeichheho chokaah an awm bawk si. Rinmawia chu tlem a tlemah a thi lo chauh a nih ber chu. 

A thaw hlawi hlawi a, tui a lem hman teuh bawk nen, a chauin a luak a chhuak ngei mai. An hual thap bawk si. 

"Ngaihdam dil rawh.. Tete" Mampuia'n a lo ti vat. Tetea chuan inthiam loh hmel takin, "Au Mamawi, min ngaidam rawh. Tui i hleuh thiam maw ka tia" a ti a. Rinmawia a nui. A thinrim lo tih chu a lang reng mai. Drose chuan ngaihtuah hmel. zetin, "I thaw tha thei em? " a lo ti! 

A thu chhuak a, a rit lûk mai. "Umm thaw thei" a ti ve mai a. 

"Tui hleuh zirtir i ngai anih kha.. " a la ti zui. Duati'n a sik zauh, "Nge min sik suh. Ania lawm. Mipa si tui hleuh pawh thiam loh.. " a la ti hram. An nui ta tawp. Rinmawia pawh chuan a ngai haw hran lo. Mahse, a tet laiin thingtlanga a pi te khuaa an zin tum khan luiah a thiante zuiin a kal ve a, tuiah a tla tawh a, a thi ţêp a ni. Khata tang khan tui hi chen a tum ta vak lo. Kawng thlengte chu a dai ngam ve mai. Dem ngawt theih pawh a ni bik lo ve. 

Chhunah thei tui leh snack an ei a. Rinmawia tui tlak thu chu aman sawi chhuah a phal loh vangin an sawi ta bik lo. 

Dinfela te pawh an lo chhuk ve tawh a. Chawhnu lamah hall-ah lut khawmin an intihlim leh a. Pu Vanlala te nupa leh Dinfela leh Lawma ten checker an khel a, Diteii te ho an lo inbonus. Naupangho erawh an lo in police thief.. Anmahni ve te te chuan an hlim ve viau. Duati pawn a na a theihnghilh thak mai. Khaw thim hmaa hawn an duh vangin zanriah eraeh an ei hma a, tlai leh puar taka an ei zawh hnuah in lam panin an haw leh ta a ni. Rinmawia a chau tho bawk a, Drose'in bike a khalh leh. 

A thim lek lek tawh a, boruak a dai viau bawk. Rinmawia chuan a kuah leh thân bawk. 

"Vawiin kha ka lawm e aw. Min chhan a" a beng bulah a va ti sup. Drose chuan za a tih vang nge a mur uai mai. 

"A ho em mai" a lo ti a. 

"Ho nang aw.. Ka nunna min chhanhimsak alawm" thutak fê hian a lo ti a. 

"Nia, guitar min zirtirna tur man anih kha" a lo ti. Rinmawia chuan, "Man neia zirtir che ka duh lo" a lo ti thung. Kawng tluanin an inhnial mawle. Tlawm zawk nih chu an tum lo dun khawp mai. 

Pi Zawmi erawh chhuna a call dawn khanna rilru a tibuai takzet a ni. Tihlan a hreh vangin a intihlim lui hram hram thung a. Ni e, call a dawng a, Teteii number atangin. Mahse, mipain a lo ţawng thung, "Ka pi, i fanu hian dam lohna nasa tak a nei a. Enkawl tur doctor ka rawihsak tawh a. I remchan chuan naktuk tlai dar 3-ah ka hrilhna hmunah che hian i lo kal dawn nia. A thi emaw a dam emaw rawn hmu hrim hrim rawh" tiin. Teteii chuan eng natna nge a neih tak ang? Hmanah khan a thi tawh a. Ni e, mi ngaihah chuan mitthi a ni tawh. 

Mut hmunah chuan Teteii nen an intawn leh dan khana chhuikir ta neuh neuh a. 

Ruang taksa a hmuh atanga a ngaihthat lohna kha hun a rei takah chuan ngaiah a nei chho va, a beisei angin Teteii a rawn lang ta mai bawk si lo. Diteii te an innei a, chhungkaw pangngai tak an ni chho ta anih kha. Drose a pai tan chiah tihin thil danglam a rawn thleng ta chiah. Zairemmawia a rawn lan khan ngaihthat lohna a nei ru daih tawh. Ruati nen an inbiak rukna a hriat tum phei kha chuan, a lo hlauthawng ve em em tawp. Pu Vanlala'n thudik a puanchhuah hma ni chiah khan, lehkha pakhat a dawng ta nawlh a. 

Chutah chuan, "Nunui thih dan hretu ka la dam e" tih chiah a inziak. A hlau ta em em a. A tirah Zaia a nih a ring. Mahse, aniin Nunui thih dan a hriat ve daih thu a awm si lo. Teteii nen chiah thudik an hria. Anih chuan, Teteii khan a thih hmain tu emaw a lo hrilh em ni ang? A ngaibtuah thiam lo. Pu Vanlala'n thudik a puang ta a. A lo rin ang ngeiin Zairemmawia chu pu Vanlala fa a lo ni lo. Mahse, khatih lai khan buaina a tawk chho ta mawlh mawlh mai. 

Vauna lehkha a dawng zut a. Nunui thih dan dik tak puanchhuahah an rawn vau a ni ber. A hnuah phei chuan Drose ru bo tura thupek pek a ni ta hial a!  

"I rawn chhuahpui ringawt ang. Chubak engmah i tih a ngai lo.. I ti lo anih chuan, in pa ka be nghal ang. Nang chu vakvai tur i ni e" tih thu avang khan rei tak a inngaihtuah buai a ni. A tawp atawpah a pasal fanaute a thlakhlelhna a lian ta zawk a. Drose chu an lo ru a nih pawhin police te nen tangkawpin an hmuh leh mai a beisei bawk. An duh dan ang ngeiin a chhuahpui ta a nih kha.. 

Khatah khan hmun pakhatah hruaiin, chutah chuan a ni a damchhunga a nun tibuaintawh tur a tawn tak. Hmeichhe hmel tha tak lian thelh thawlh tak a rawn lang a. A hmaah thuin a rawn melh vawng vawng. 

"Ka nu" a ti ta sap a! Pi Zawmi a lo khur thung. 

"Teteii ngei kha ka ni e. Khawvel mithmuha mitthi ka nih tawh vangin ka hmel hi siam danglam a ni. Mahse, keimah kha ka la ni reng. Ka zinkawng zawng zawng kha ka hrilh thei rih lo che. Naute pawh hi hawnpui rawh" a ti anih kha. Chu nu thusawi chu rin duh miah lo mah se; a thinlungin a ring tlat! Chu tak chu a ni mak a tih em em. 

Naute rukbo a lo duh leh bawk si lo. Hrethiam lo taka a awm hnuah chhuah mai a tum a. Mahse, kawngka a pelh hmain, "Ding rawh" a rawn ti ţhawt. Teteii aw pawh a ang lo. A va hawi phei chuan thinurna hlira khat mitmeng hian a lo melh let ve a. A hmel pawh a thim nghal vek in a hria. 

"Naute kha ka ta a nih kha. Khawiahmah i kalpui dawn lo" a lo ti ta mai a. Nichin lawkah a hawn theih tur thu sawitu bawkin hawnpui a phal leh ta lo. Mipa pahnih an rawn lut a, naute chu an la ta anih kha.. 

"Teteii i nih takzet chuan i unaunu fanu hi ka hawnpui min phalsak rawh.. Khawngaihin" tiin nu zawkin a fanu hnenah khawngaih a dil a. Mhase, ngeiawm zeta nuiin, "Aih, he naute hmang hian in chhungkua saw ka vaw darh vek dawn" a lo ti hriam hraih a. Nunrawng hliah hliah hmel a pu bawk. Naute chu an chhuhsak ta a. Ţap zawih zawih chungin a ngen, a hlawhchham ta si. 

Tichuan, tikhan an in thlen dawn thleng khan an va thlah leh a. A fanute leh a pasal lakah ngei lem a chang zui ta anih kha. Amaha a awm changa a ţah nasat ţhinzia tuman an hre si lo. Teteii kha a la dam tak tak a nih chuan engtin nge? Tu nge pui? Tih te hriat a duh. Mahse, ani erawh a reh leh hmak si. Mahse, Drose chu an hmu leh ta kha a nia! Kha te kha a ni pawn mak a ti. Ti nge khatia an hnutchhiah leh mai si le tih a ngaihtuah ve nasa. Teteii lah a reh veng veng si. Zairemmawia an man a, Teteii an man ve leh. Hlauhthawn chikimin a lo hlauthawng ve ringawt. Mak deuhin Teteii khan a hum ta daih! Engahmah tel vena nei lo ang maiin a sawi anih kha. Tah khan a fanu a ni tak tak aniang tih rilru a pu chho ţan. Mahse, fiahna a nei chuang lo. Jail-ah a tang a, a tan zuk kan ngamna chi ni hek lo. Englaimahin a rilruah a thi lo tluk a ni. 

Mahse, kum a liam a, a rei ve zel a. An chhungkua an pungin, Drose pawh a tleirawl ve ta hial mai. Teteii chu a thi tawh emaw a kal bo tawh emaw a nih ringin a ngaihtuahna atang pawn phumbo a tum ve ţan ta a. Theihnghilh hlen erawh a thei lo. Drose hi a hmangaih lo a ni lo, a ngainaa han duata kuah te a châk thin. Mahse, a tetlai thil thleng vang khan a lakah a inthlahrungin a hnaih tha ngam hlawl lo a ni ber. Drose pawn a nel vak lo reng a. A chantawk tih a hria. 

Tunah Teteii chu enkawl ngaiin a awm chu a nia! Eng natna tak vei ang maw?! 

"Nuuu, khaw nge ka chocolate zawng zawng khi" tum bûrin a ti tân tân a. 

"I nau te ka pe a nih kha. Chocolate i ei tawh rih lo vang. Duh aiin i thau dawn" a nu chuan a lo tihsan. 

Drose a ţap lo chauh, "Vanlalmalsawm, rawn kal teh u, ka chocolate kha in ei zo hman em? Khawi maw" tiin a naute roomah a lut nghal. An ni lah uniform nen an lo induang thlap tawh a. 

"Aw eizo tawh" Tetea'n a lo ti. A naute khumah chuan thinrim zetin a mu tau sawk. A pawnfen a pawt phelh, chhuatah a paih. A nectie a theh thla bawk. Underpant nen, mawza sei nen a mu tung mai. A naute chuan an thlir reng ringawt. A nu a lo lut a, chhuata a pawnfen leh nectie chu chharin, "Titau ziah suh. Kha feng vat rawh. In tlai dawn" a ti a. 

"Nu, ka pian hi a la nalh reng asin. Ngati nge i lo pek kher kher a. Ka mood a chhe laklawh tawh. Ka kal dawn lo" a lo ti bur mai. 

"Chocolate vanga school ţhulh te chu a, a ho mai mai. Kha lem inbel rawh le.. I U Mamawia pawh a inpeih tawh nia" a ti dam diai a. 

"Ka duh lo. Ka duh chuang lo. Ka chocolate kha pain a manto ber ber min leisak an nih kha.. Ka ui asin. School kal dawna ka ei loh chuan lehkha ka zir tha thei ngai lo" ţap ţuau in a ti leh. A nu pawh a thaw hawk ringawt. A pu a lo lut, an thlem ve sateh. A sâwt chuang lo. A pa erawh zing karah Hnahthiala zin turin a chhuak tawh. 

"A dang ka lei ang che kha.. In ha rawh le.. " a nu chuan a ti leh. 

"Aih, pa lei ang chiah chiah ka duh" a lo ti leh tlat! A va khawlhkham thin em… a ha lam a sawisel deuh fó vangin a nu hian chocolate ei a phal vak tawh lo va, Doctor ten an lo khapsak bawk nen. A thau phei zawng a la thau em em lo. Mahse, a thau tih chhaunlama a hman loh chuan a ha na thin lai kha "Phawi mai ang u" a tih leh a hlau a ni. Chocolate a ei theihna a nih dawn phawt chuan a ha chu phawi daih pawi a ti si lo. 

"Zochhuanawm, ka thin a rim palh ang e. I insiam dawn nge dawn lo" vin ţhakin a ti ta a. A reh dâk mai. Drose chu mittui hru chawt chawt chungin a lo tho va, tum bûrin pawnfen a feng a, a nectie pawh a awrh ţha nghal. "I hmai kha va phih rawh. " a nu chuan a ti leh a. Awih lo ngam hek lo. A va phih leh. Make up a hmang ngai chuang lo va, a rei lem lo. 

In hnuaiah phur lo zetin a chhuk thla hnak hnak a, Rinmawia'n a lo nghak ran. Chaw erawh an ei tawh. 

"Hlim tawh la" Rinmawia nen an inphurh lai chuan a rawn ti a. 

"Ka thu thu" a lo ti vei hmak. Rinmawia pawn a be zui tawh lem lo. A chhukna tur a thleng a, ngawi rengin an kal hrang nghal. A mood a off bawk a, zirlaiah pawh rilru a pe tha thei meuh lo. A nu chu a ngei a, a haw bawk. Tleirawl lai chuan kan nih ve thin kha maw.. Mahni thu duh hun lai, tha ber leh fing bera inngaih hun lai kha a ni miau a.. 

Tluanga leh hmeichhe pakhat chu an thu dun ran a. Hmeichhe dul chu a puak ve deuh âk tawh a. Duati aia a thlan zawk ngei chu a nih hmel. La innei chiah lo mah se, innei tura inberem vek tawh an ni bawk a; vawiinah pawh inentir turin an kal dun a ni ngei ang. An thut dun mek na bulah chuan Lawma leh Duati an rawn thu ve chat. A tirah an inhmu mai lo. Lawma han hawi deuh chuan a va hmu ta thut a, Duati lam a hawi vat. A lo la hmu lo a ni maithei. Tluanga pawn a rawn hmu nghal. Engpawhnise. anih nih an ni tawha tiin polite chhuahin, "Pa Lawm, i incheck up dawn ni maw? " a va ti a. Duati a rawn hawi rang kher mai. 

"Aw a nih hi.. Nangni in inentir dawn nge? " a lo ti ve luam a. 

"Aw hei ka kalpui a, " tiin an nu chu a kawk zauh. Duati erawh a ngawi reng. Rei vak loah Duati te chu Doctor roomah an lut a. Tluanga te pawh koh an nih angin room pakhatah an lut zui ve nghal. Nau pai lai chuan thisen test a awm ziah tih kan hriat kha. Tluanga bialnu ti tawh mai ang kha pawh a vawi khat nan an test a ni. Counsellor hmaah an thu dun ran a. 

1min vel a ngawi vang vang hnuah, "Pawi ka ti khawp mai. Hiv hrik kan hmu tlat mai" a ti ta a. Tluanga chu a tho kang uaih. A inthunun leh hram. An nu chu a melh run run a. Hmeichhia erawh chuan mak ti hmel pu vak lo. Mahse, a ţhawng ve tho tih a lang. 

"Kha pa ngei kha a nih chiah chu.. " a ti zawi sap. Tluanga chuan, "Tu kha pa maw.. Eng nge a awmzia? I positive a maw? " a ti nghal sek sek a. Counsellor chuan a lo khap. Chutah Tluanga thiannu chuan muang fan raih hian, "Mahse, kha pa pawh kha a ni kher lo maithei" a ti leh! A ngaihtuahna a buai leh tih a lang. Mipa a mutpui nual tawh tih chu a lang reng mai a. Tu hnen atang bera a kai nge tih a sawi thei lo. Hriat ni bik hek lo. A dik adik chuan a nu nen chauha khawsa, damdawi vawrh thin an ni a. Regular takin zuar lo mah se, a hlawm ten an pek zauh zauh vangin an nei èm reuh thung. A nu lah nu thlawi, hna hrâm thawk lem lo, zu pawh lem ve thei mai a lo ni sia, a damdawi leh a sum ît vanga lo hmu tai tawk a haihchham. Teuh lo. Nupa ang deuha chenpui te pawh a nei fô! Tluanga a rawih chhan pawh a damdawi zawrh chungchanga man a tawh vang a ni. Tluanga hi advicate a ni miau a. Chuti ang nu a neih vang leh an eizawnnain a zir miau loh vangin Tluanga thiannu Asangi pawh chu nula nungchang tha tak a ni ta lo thuai a. An nufa chuan mipa an riahpui ta zeuh zeuh a, lut chhuak an tam thin si. Ngaihzawng em em ni si lo, zan hnih khat han kawp zuai te a nei zut mai a. Amah ngei pawh hian tlem lai deuh khan damdawi a khawih ve zauh. Mahse, Zu ah ţuan ta zawkin, damdawi chu a thlah ta rih a. Tluanga a rawn lang a, a hmuh phat atangin a star riau mai a, a zahawmin a ni deuh khup bawk nen. Mahse, Asangi chuan mipa chak lohna a hre tawh a, tumah hi a huphurh tak tak hran lo. Engtin tin emaw hnimhnaiin Tluanga pawh a mutpui thei ta mai kha a nia! A rin loh deuha nau a pai ve tak si ah chuan a rilru pawh a tha zawngin a siam rem chho ve mek a ni. Mahse, Hiv positive a ni ta tlat! Chu chuan Tluanga rilru a tihel daih thei. Chu chu ani chuan pawi a ti ber ngei ang. 

A dik, Tluanga chu a thinrim a, a rilru a na ngawih ngawih bawk. A fimkhur loh man leh a insum theih loh a tuar tih pawm ngam chiah si loin puhmawh tur a dap char char mai a ni. Ani pawn a thisen a test ve ta nghal. A ippik hluah hluah. A rinawm lo chu a inchhirin ban a chen ta hial mai. 

An haw dawnin Duati te pafa lo phei mek a va hmu lehnghal. Thih daih a châk rum rum hial. Duati chu a tan beisei chi rual a ni ta si lo. A fimkhur loh man chu a tel mawlh mawlh dawn annih hi. Asangi te chhungkaw zia a hre vek, an nun tladahzia pawh a hai lo. Asangi hmel mawina leh sihhnipna chuan rinawm taka lo nghaktu a bialnu a theihngjilhtir a. A phatsan ta kha a nia. A rinawm loh rah chu a rin aia hmain a seng ta a nih hi. Han hnar ve mai se tunah pawh Duati nen an la nui dun ker ker tur a nia. A lainatawm rualin a chawh tia diriam duhtu pawh dem ngawt theih a ni bik lo. 

Rinmawia leh Mimi chu an thu dun ran a. Sawi tur a hre si lo, a kut a elh a elh ringawt. Mimi zawk chu a rawn ţawng ta a. Chu chuan boruak siamin an titi thei ta deuh. Zan tin an intext ve ziah naa, inngaizawng an ni si lo. Mimi tan pawh awm dan thiam a har riau ang. A hmeichhia zawk a ni bawk si a. 

"Bialnu i nei mi? " pehhel deuh takin a ti ta nge nge a. 

"Nei nang" a lo ti ve mai. 

"Nih chuan i duhzawng ka ni lo mi? " a ti ta tawp mai. Mimi hi hmeichhe zak lo tawp chu a ni bik lo. Rinmawia hi a lo vei rukna a rei ve tawh em a ni. 

"Ni e" a ti leh ringawt. 

"Anih te chuan ti nge? " Mimi chuan a melh kal lehnghal. 

"Ka hre thiam bik lo. Ka zakzum lutuk a, nakinah min duh leh lo ang tih ka hlau aniang" a ti tawp. A thian ten hria se an nuihzat ang chu. 

Mimi pawh a nui deuh, "Ka duh reng ang che" a ti sap a. Rinmawia pawn a rilru nuam lo ru deuh thup chungin a lo nuih let ve. Bialnu a nei ta reng mai. 

Pi Zawmi chu a hawi vat vat a. A hmelhriat hnaivai an awm lo tih a hmuh chuan motor lo dingah chuan a lut ta zauh a. Mipa hmel tha angreng tak a lo thu.. "Kal nghal ang aw" a ti thum chhak a. Pi Zawmi a bu nghat. An tlan nghal. Aizawl tlak lam veng pakhatah tlan in, veng mawng lama building lian zet lo toh lurh ah chuan an tlan lut ta a. Corridor an zawh zar zar hnuah kawngka pahnih a lo awm a. Pakhatah chuan luhpuiin, thutkhawmna pindan ni mai awm a ni. Chumi pindanah tho chuan pindan dang a lo awm leh a. Tah chuan lutin khum zau angreng taka Teteii nia insawi lo mu reng chu an va hmu ta a. 

A lu-ah chuan thil eng emaw ni a lo invuah fer fur mai a. A taksa erawh a ban pahniha an hren beh tih loh hnuhma a awm lem lo. A muhil nge a maimichhing a, a hmai chu a dâng hle. Hmana Teteii hmel tha tak hmel kha a pu tawh lo va, mahse, Pi Zawmi tan chuan a la hmel tha tho mai. Doctor thuama inthuam pate takte hi a lo lut ve chiah a. 

"Eng natna nge a neih a? " Pi Zawmi chuan a lo ti nghal. 

"Ka la test mek a nih hi.. Mahse, hlauthawng suh. Ka enkawl dam em em ang" a patet ai maha aw thum lam hian a ti a. Pi Zawmi pawh a muang ve huai mai. 

Amah hruaitu khan a hruai chhuak leh a. "I fanu hi i duh hun hunah i rawn hmu thei ang. Mahse, min hrilh. Hmasa zel dawn nia" a ti dam thlup a. Fel a ti ngei mai. 

Pi Zawmi chu driver dangin an va thlah leh a. An inhmuh chhung rei lo teh mah se; a ngaihtuahna a luah khat vek mai. 

Teteii mutna pindanah chuan Doctor leh tlangval kha an inhmachhawn ran a. 

"MPD a nih theihna tur a awm a. Psychosis nia lang thei thil a awm bawk.. Ngaihpawlh theih tak, hrang bawk si a ni a. Hun ka la mamawh deuh ang. Mahse, ka enkaw dam em em ang " Doctor chuan a ti sup a. Tlangval chu a lo bu nghut nghut. 

"Kei chuan hmeichhe pangngai tak nise ka duh ber" a ti dam ruih a. Teteii chu va melhin, hmangaih hmel em emin a thlir vawng vawng mai.