Drose 14

D'ROSE… (Chapter - 14)

Ziaktu : Toni Rãlte

Traffic Jam hi a reh tak tak thei lo a nih hi maw. Drose leh Rinmawia inphur pawh an tlan hman meuh lo, an ding zut mai. A classmate te a hmu zut lehnghal. Nuam lo a ti nasa. Mahse, 'Min zawh pawn ka û ania ka ti zel ang' a ti rilru a. A chhukna tur an thleng ve hram. "Min lo nghak ang che" Rinmawia'n thupe aw deuha a tih chuan, "I zak lo" a lo ti hlar a. A kal nghal nal nal. A hlauh ang ngeiin, 'Drose chuan bialpa a nei a, an inphur' tih chu a darh ta thuai a. Sawi a kai bik chhan pawh tuman bialpa nei tura an ngaih loh vang a ni. Hmeichhe ena en lo an tam zawk miau a. Tin, an la naupang tlang êm a, bialnu bialpa tih vel chu an tan a la mak ve deuh bawk. 

"Ka û anih kha. In sawi peih. " a lo ti vin ţhak zel a, mahse, chhaih nuam an ti telh telh thung si. A tawpah phei chuan, "Hm.. Ni mai teh se. Ka ning, min thìk anih kha" te an tih tak ngawt kha. A rilru chhungrilah erawh Rinmawia an dem fiam vel chu nuam a ti hian a inhria a. Nuam tih loh a duh thung si. A khawlh thei.. 

Pu Vanlala chu chhuak turin a insiam malh malh a, an nu pawh a sawm ve naa a peih tlat si lo. An sumdawnna a va tlawh ve leh dawn a ni. Diteii kuta engkim a awm hnu khan sumdawnna lam a ngaihven ta vak lo va, chawlh hahdam a lo thlahlel ve bawk nen, vawiin erawh thawktu thar an lak te rawn kal ni tur a ni bawk a. Va tlawh ve a rilruk a ni. 

"Lo kal ve hram mai tur a nia aw. Ina tawm tlawk tlawk hi nuam i ti miau si a" an nu chu a ti bawrh bawrh a. Pi Zawmi chuan a la phiar lai singsak pahin, "Ka zo lo deuh alawm. Motor khu nen, rik hut hut ka tlin meuh tawh lo a ni" a lo ti ve mai a. A hmel chu ngun taka en chuan a ngui tih a hriat theih. Engvanga ngui nge tih eraeh amah chauhin a hria ang chu. 

"A nih leh le.. Ka kal ange aw. Ka lo haw har lo vang" tiin an pa chu a chhuak zui nghal a. Pi Zawmi chuan, "Paa.. Lo let leh lawk teh" a ti vak a. A rawn let leh vut. 

"I kal hmain ka biangah hian min han chuk reng reng teh" nui chungin Pi zawmi chuan a ti a. Pu Vanlala a mengphawk hle. Thuawih takin an nu biangah chuan a chuk zauh a. Pi Zawmi a lo maimichhing. "Paa, kan lo upa ve ta a. Mahse, nang ka nei che hi ka la inchhir ngai lo ania aw" a ti sap a. An nu awm dan chu mak a ti deuh. A ngaih pawh a ţha lo lek lek, "Nui, eng nge a awmzia? Awm te pawh i tinuam lo ve a" a ti ta chiah a. 

"Aa.. Nizanah ka ngaihtuah a. Ka tan hian pasal ţha tak i nihzia ka chiang thar leh a. Ka ngai riau che alawm. Ka chhuang hle bawk che" a lo ti a. An inneih tirh lai ang mai hmel kha a puin an pa chuan a hria. 

"Kei pawn ka nei che hi ka inchhir ngai reng reng lo. Ka hmangaih che alawm" a lo ti ve a. Innei thar hlim ang maiin an inmelh vawng vawng mai. Harh chhuak thut niawm takin Pi Zawmi chuan, "Kal tawh rawh. I tlai ang' a ti sawk sawk a. Pu Vanlala pawh chu zawi muangin a pen a, hawi let lehin, "Thil tui deuh ka lo hawn ang che" a ti a. An innuih dun sak. A chhuahsan ta a. 

Thiangi chuan thawmhnaw a su mêk a, a zai pah rât rât. Awmpui anga chhawr tura awm ni lo mah se; amah a taima hrim a, engmah ti lo va awm mai mai hi a thiam meuh lo a ni ber. Zari erawh in chhung a tifai a. A ni pawh hi ngawi renga che mawlh mawlh reng a ni. He chhungkaw zia hi a hre hnehsawh ve tawh viau, Diteii a ngaisang em em a, Diteii ang nih a chak ţhin. Hmanniah an Album hlui a hai chhuak nawlh a. A pite room a tihfai ţumin. Diteii te unau niawm tak thlalak a hmu fuh a, Diteii û chiah niawm tak pawh kha hmel ţha a ti zet mai. Ti nge hetah a awm ve loh le? Pasal a nei aniang tih dawnin rawn len ve ţhin awm tak. A chanchin an sawi a hre ngai lo. Lawma chu a hre ve viau, mi dang pahnihte erawh kha chu khaw nge an awm a hre lo. Zawh kher a ţulna a hre lo bawk nen. 

Hetih lai mek hian Pi Zawmi phone chu a ri ral ral a. A lo call tu a hmuh chuan a ner sak. 

"Hello! " a ti zawi sap a. 

"Duhthlan theihna hun ka pe leh hram ang che. Kei nge amah kha" a rawn ti nghal a. An inhriatchian hmel kher mai. 

"Amah" a ti hmak. A reh vang vang a, a rawn thaw hawk. "Ka nu, inchhir suh ang che" a rawn ti vawt ta raih a. Phone a tût zui nghal. Pi Zawmi chu a maimichhing a, "Dite, hmaichhana engmah ka hrilh theih loh che avangin min ngaidam ang che" a ti a. A âwm chu a dawm vang vang mai. 

"Zodingpuii ka ni a. Dite tiin min ko ţhin. Vawiina lo thawk tharte ka lo lawm vek che u a, lungrual taka kan thawhho ka beisei tlat a ni. In duh leh mamawh sawi hreh lo ula, kan theih ang angin kan inpeizawn tlang zel a niang chu.. " tiin hnathawkte hmaah chuan dingin a inhmelhriattir a. 

Thawk tharte bakah thawk mêk te chuan an pi chu ngaihsan hmel takin an thlir doh doh mai. Pu Vanlala pawn a sir aţangin a famo Diteii chu chhuan hmel takin a lo thlir ve bawk. An sumdawnna a lian ve zel a, an sahbawn siam thar pakhat phei chu ram dangah an thawn chhuak nasa hle tawh. Tin, an thil siam chhuah dangte pawh enchhinna neih mek zel a ni a. Mizoram chhungah chauh pawh an hlawk ve viau tawh a ni. Pu Vanlala thawhrimna an seng chho mêk zel e. 

Diteii chu a office-ah lutin lehkha pawimawhho chu a endik nghal char char a. A pa a rawn lut ve. 

"Dite, ka chhuang khawp mai che. Nangmah vangin ka hming ka chher belh zel chu a nia" a ti a. Diteii'n thingpui a chahsak nghal a. 

"I thawhrimna vek alawm la ni. Lo ti ţâng ţâng lo la chuan, kei tehlul chuan engtinmah ka tithei awm si lo va, i lo fing ngawt mai" a lo ti a. 

"Taka thil dang daih, tukin i nu awmdan kha ka ngaih a ţha thei tlat lo. Min ngaih hmel riau a, a awmdan kha a dik lo" Pu Vanlala chuan a ti a. Amah pawh a inngaihtuah mûk hmel hle. 

"Engtin nge a awm a? " ngaihtuah hmel takin Diteii chuan a lo ti vat a. 

Zinga thil thleng kha a sawi chuar chuar a, Diteii paw'n mak a ti angreng viau. 

"Chuan, nizan khan Pathian thu ka ziak e a tia. Rei fe kha a meng bawk a. A dik tlat lo" a pa chuan a ti zui zat a. 

"Ani hi a ruk hian a lo hrisel lo viau mawni le. Phai lah in la pan rih si lo va, zu kal vat a ngai anih chu. A khua a har ve thin si a. Keini lah kan chhuak vek zel bawk nen.. Sawiho a ngai anih chu" Diteii chuan a ti a. Rei tawk fang an titi hnuah pu Vanlala pawh chu a haw ve ta a. An nu a ngaihtuah deuh bawk nen. A hmanhmawh riau mai. In a thlen chuan an nu chu a lo muhil a, a thaw huai mai. A chalah a zuk fawp ta zauh a. 

Dinfela pawh a buai leh viau. Ani hi a kai sang telh telh a, a buai tulh tulh mai. Mahse, a nuam tihzawng kha a ni miau a. Chhun chawlh lai chuan, Nizan lama an nu nen an titi dunna te kha a ngaihtuah leh a. 

Diteii'n Saii nen a hmuh dun thu leh engvanga dâwt sawi nge a nih a zawh khan a hamhaih lek lek. A nupui laka rinawm lo angah a inngai hman hial. Mahse, thil nih dan dik tak dâwt tel miah lo va an hrilh takah chuan a lo awih ve mai. A pasal hi a ringtawk bawk a. Nupa chu pumkhat an nih angin an inkarah dâwt tel lo se, rinhlelhna pawh a awm lo ve mai. Pa a nih hnua thlemna a tawk fo chu mak a ti. Mahse, Diteii a lo hmangaihzia leh a tana a inserhzia tichiangtu an lo ni ve zel a. Diteii ai mahin a lawm zawk hial awm e. Tunah chuan chhungkaw pa ang tak tak a lo ni ta bawk a. A rilru pawh a patling ve ta viau. A nupui fanau te aia pawimawh a nunah an awm meuh lo. Drose ngat phei chu rukbo a lo nih tawh vang nge a thinlungah a tla na bik a, a duat hluah thiam lo naa ngaibtuah tak a ni. A bula a ngen leh awh zawng a sawi tawh chu tihsak loh theih lohah a ngai tawp mai. An nu pawn a khak tawh nghe nghe. Mahse, a fanu neih chhun tana insèn te chu pawi a ti teuh lo.

"Rinmawi" a phu zawk. Aw lo chhuahna lam chu a hawi nghal a. An class ami Jenny a lo ni. A nui var var a. A rawn pan mek bawk. A lo nuih let ve tawp. An inhre ţha em em lo naa class khat na nâ na chu an inhre ve a ni mai. A bulah a rawn ţhu a. 

"Khaw nge i ţhianpa? " a ti zui sap. 

"Vawiin chu thil tihfel tur a nei aniang, a rawn kal lo" a lo ti ve mai a. 

"Thil hrilh tur che ka nei a" Jenny chuan a chewing gum ţhial ţâwlh ţãwlh chung chuan a ti niap niap a. 

"Umm sawi la" a lo ti dat. 

"Mimi hi i hria em? " a lo ti daih. 

A'n ngaihtuah hlek a. Jenny thiante pathum zinga ngo ving veng, lian lem lo, mahse, cute deuh kha a ni tih a hre chhuak nghal. 

"Aw " a ti a. 

"A star che a.. Ni daih ula, a fel a nia aw. A lerh lo bawk si" a ti nghal zung zung. Rinmawia a lai viau. Chhan dan mai a hre lo. 

"Aa.. Min duh tak tak awm lo em mai" a ti nghut. 

"Hmm.. Hmeichhia zawkin kan sawi hmsak chuan kan ti mai mai lo tih hrethiam rual i ni ve tawh.. Ni ru aw" a ti leh tawp tawp. Rinmawia a khi hui ringawt. Mimi chu a chhe lo a ti reng, mahse, bialnu neih pawh chu. A zei si lo, an hmuhsit a hlau deuh. 

"A man min hrilh se" a ti lawi rût a. Jenny chuan nui chungin, "Huiham, aw le, i number min lo pe rawh" a ti a. Number an inpek zawhah an inkalsan. Rinmawia chu engtin emaw. a awm. Mahse, Drose a ngaihtuah chhuak thut! A awm chu a eng emaw tinawm loh. A awmzia eraeh a hre lo. Ani chu a nau alawm tiin a ngaihtuah a. Mahse, amahah inthiam lohna a awm tho. 

"Aw dite, i buai em? " Bena'n a rawn ti a. 

"I tante chuan ka buai ngai mi? Ka pu" a lo ti let. 

"Hmm.. Zodingpui, over lo mai teh. Hei Kolasib-ah ka chhuk dawn. " a rawn ti leh a. 

"I zuk in palai thawr dawn tihna mi? " a lo ti zauh. Bena a nui kur kur, "Aman min lo bia a, a chhungte nen inhmelhriattir min tum a. Ka zâm eee" Bena chu a zâm tak tak. 

" Amah a confi anih chuan engah nge i zam mai ang bawiha, Benjamina mi chak i nih kha. Ţha deuh khan aw" tiin a lo fuih a. 

Rei tawk fang an inbiak hnuin an dah ta hram. Bena chu a ngaihtuah ru ve hle. Mahse, Enkawli a chhuang, rinawm tak a lo la nghak fan fan thei chu.. Innei thei ngei se a duh, amah pawh a la ţangkai viau dawn tih a hai lo. A nìte bulah eng emaw chu a la sawi ve a ngaih hmel. 

A nu kha a ngaibtuah ru viau a, mahse, a pain chanchin a rawn hrilh leh takah chuan a muang huai a. Hna pawh nuam ti takin a thawk zui leh kha a nia. Dik tak chuan a fanu vang hian a rilru a nuam hauh bik lo. A fanu lo hmua lo be thintu hi tu nge a nih tih hriat a ngai a ni. An pa nen an sawi dun zuai tawh naa han sawi vak tur a awm si lo. Police pun a ngai leh nge nge dawnin a hria. Kha nu kha a lo let leh tak tak a nih chuan, an chhungkaw vanram saw hremhmunah a chang leh mai ang. Chu chu a thlentir thei lo. 

"I va'n rei em em. Ka haw san ţêp che ni" a lo ti tân tân a. Rinmawia a khi suk duh chauh. In lam panin ngawi rengin an inphur leh a. Drose a tau tlat. Rinmawia mood lah a fuh phian bawk si. An in chu kha thei der lo. In an thlen rualin in chungah a chho nghal. Khumaj a bag theh thlain a pawnfen a kek thla nghal bawk. Skin tight nen a ding to a, a kamiz a hlip leh. A tum bùr chhan a awm. Chawhnuah staff meeting vangin an bang hma a, darkar hnih dawn Rinmawia kha a nghak! Chu chu a thinrim ringawt. Hawnsan lo va a lo nghak kha a inngei. Zak lo a inti bawk. Amah leh amah a intauhsan a ni ber mai. A inbual nghal a, a nu sawi fó angin, "Thinrim lai chuan zai vak vak ila, a reh hma" a tih kha hmang tangkaiin inbual pahin a zai leh nghek nghek. A room dawt chiaha awm a nauten an nuihzat leh ang chu.. A inbual zawhah fai sarin in hnuaiah a chhuk. A pi leh pute nen thingpui an in a. Chhangthawp bawk a khel leh. Chhang tuihnai leh changkang te hian a pumpui an tipuar ve lo nge chhangthawp a neih chuan a duhtawk. 

"Pu, phai chu" chhang ţhial nuan nuan pah chuan a ti a. 

"I nu ka lo sawipui leh ang" a lo ti boh a. 

"Nawr ve ang che. A sual si, a phal leh dawn lo ania" a lo ti a. Rinmawia inbual zo a rawn lang ve chiah. Thingpui a va insiam ve nghal a. An zingah a rawn ţhu ve. Pu Vanlala hian a duat viau a, an inkawm thei fú bawk. 

"Mamawia nen hian min kalpui ula a tha ang. Nangmah chauh chu ka ring zo lo deuh che" apu chuan a ti a. Drose a ner sawk. 

"Ka hreh hran lo. " Rinmawia'n a lo ti bawk. 

"Ani kal ve a ngai lo. A ţul lo" a lo ti hlar thung. 

"Tihdan ka hria. Ka naute, Mamawia nen hian innei daih ula, in upat hunah" Pu Vanlala'n a ti ta pek! An pahnih lai dun lutuk kha Pi Zawmi chuan a lo man thiam nghal. Mahse, an zah a hlauh vangin eng a sawi duh lo. A langah chuan Drose chuan, "Ka duh bawk lo, a lerh si" a lo ti hmak a. Rinmawia lahin, "A â si, ka duh bik lo" a lo ti bawk. Induh lo tawn anga lang, a ruka inhìp tawn si an nih tak ber chu. 

Zanriah ei khamah Mathematics-ah thiam loh a nei leh tlat! A nei fô dawn ni pawhin a lang. Rinmawia roomah an thu dun leh der tawh. Diteii te lah an lo lawm em em a. Chutia an unaua an inzirtir thei leh a hrana tutor rawih ngai lo chu.. An ni lah lehkha inzirtir siin an rilruah thil dang a lut ve tlat si. 

Insi rialin an thu dun a, Rinmawia'n a sawi fiah mawlh mawlh. Drose pawh a bu nghat nghat. A lehkhabuah zuk ziah a tum lai tak chuan Rinmawia'n number pakhat kawh a lo tum ve chiah. An kut chu a insi ran a, laksawn mai an tum hauh lo lehnghal. A hmeichhia zawk na nâ na chu a lungphu a rang leh tawh. Rinmawia pawh eng ual a ni lo. Drose chuan a lasawn ta nge nge a. Rinmawia pwh en chuang lo chuan, "Ka thiam tawh reng. Ka chho dawn" tih leh thawh a rual nghal. Rinmawia'n a lo pawt ringawt. Amah pawn a che rang lutuk kha mak a inti. 

"Ih.. Guitar kha i zir duh ta lo mi? " a ti ta ringawt a. 

"Duh e, weekend-ah aw" a lo ti ve mai a. Hreh zetin Rinmawia'n a thlah. Drose a chhuak nal nal. A room a thleng a, a hah vekin a inhria. Khumah a let tawp a. Zak lo hi a inti ngawih ngawih. A kum zat te a chhut a, "A nu te hian ka kum hi an chhut dik lo aniang. Kum 18 ka ni tawh ang. Ka zak lo em mai" a ti tawp! Romantic movie te hi a en ve ngai meuh lo va, You tube-ah pawh thing kit lai te, rul man dan te a en thin. A en tam ber erawh tupawn an hai lo vang. Mipa lam hi a ngaihtuah ngai lo tawp. Ngaibtuah rual pawh niin a la inhre lo bawk a. Mhse, Rinmawia a lo lang a. A mipa hnaih ber ni ta na nâ na chu a rilruah a tla na a ni maithei. A upa ve zel ang a, a danglam ve mahna le.. 

Rinmawia pawh Mimi khan a rawn be ta ngei a. Chhan dan tur a hre si lo. Drose vangin a chhang hreh vek tawh. Mahse, Drose chu ngaihzawn rual niin a hre si lo. Bakah Diteii ten an ring em em a, unau tiin an ngaih a tha a. Chuta kara lo ngaihzawn kual kha amah a inthlahrung. Mahse, Mimi chu a chhang ta chuang lo. 

"Min hnaih suh. Min kaltir rawh" tiin a tal aih aih a. A hmel hmuh hleih theih loh, hlim thla lian leh chak tak chuan a rawn hnaih zel si. Kalsan turin thahrui renh reng a nei si lo. Hlimthla chuan a rawn bawh ta a. A eu âwrh. "Khawngaihin" tiin a au ţial ruan a. A harh nghal zawk. A ţhu chhuak nghal hlawl a, light a on nghal. A thlan hluam a, bed sheet chu a chuar ten tun mai. A tal nasa hle a ni ngei ang. A lung chu a phu dut dut a. Hlauhna nasa tak chuan a rawn tuam nghal. A kut a hum ruh a, a heh a pet fan fan bawk. 

"Min kalsan rawh" a ti tham ţiak a. A muttui a rawn luang nghal bawk. A hma zawn chiaha darthlalanga a hmel chu va enin, a muttui chu a hru a. Darthlalanga amah chu a rawn ţawng chhuak nghal. "Kan hmachhawn zel ang.. " a rawn ti ta a. Teteii chu a lo îp châwih. Engvangin nge phuar a nih tlat? He thil hi a hne tawh. Ti nge hmanah khan an thihtir mai loh? Amah chenchilh rengtu hi a hua a ni. 

A tho va, a va inphihfai tawp. Room aţanga chhuakin, Chokaah a lut a. Fridge hawngin tui vawt chu a in khawlh khawlh. Beer lo awm chu hawngin a in zui nghal zat. Mipa a rawn kal phei a, "Eng nge thleng a? " a rawn ti. A ngaibtuah hmel viau. 

"A ngai ang kha a ni mai" a lo ti zawi sap. 

"Doctor i hmuh hi chu a ngai a ni. Heti ringawt chu a dik lo. I thi mai ang" a lo ti a. Ani pawn beer chu a in ve nghal. 

"Thih chu a nuam zawk ang" a lo ti a. Hmun dang a melh daih. 

"Tete, nangmah i ni tihah chiang rawh. Inthununtir tawh suh. Ka sawi ang khan ti mai rawh. An hnenah ngaihdam dilin inhriattir tawh mai rawh" a lo ti a. Teteii sam chu a chul pah bawk. 

"Ka thei lo. Min huat dan tur i hria alawm. Ka thiltih tawh zawng zawngte kha keima tihah an ngai vek ang. Ni e, keimah vek ka ni tho si a" a lo ti sap a. A aw chu beidawnnain a khat. 

"I inhnehtir mah mah a ni. Kha Doctor kha that lo la chuan i dam tawh tur" a lo ti dam thluam a.  

Teteii chu hul hakin a lo nui. "Mihring vanduai ber chu ka lo nih hi. Piang lo tawp ila a tha tur.. Tunah chuan keimah ka ni tawh lo, amah vek in engkim a ti tawh." awmze nei lo zetin a ti a. Mahse, a bula ding chuan a hrethiam tlat! Teteij chu a tho va, "Muhil lo mah ila, mut hahdam ka mamawh" a ti nghat a. Room a pan nghal. 

Mipa chuan a phone a phawrh a. Number pakhat a dial nghal, "Aw i la mu lo maw? Tunah chuan ka thei tawh lo. Ka enliam thei tawh ngang lo. Khawngaihin ţanpui rawh" a ti nghal bawrh bawrh a. Lehlam ami chuan, "A rawn zual leh deuh em ni? " a rawn ti a. 

"A nasa leh telh telh tawh. Damdawiina hruai chi a ni si lo. Eng pawh ti rawh. Kei chu ka beidawng tawh" a ti a. A hmel chu a ngui hle. 

"Aw le, tu emaw ka'n bia ang e" tiin lehlam ami chuan phone a dah a. 

Tu emaw ni a call zui nghal, "Ţhianpa, case thar i nei. I lawm ngawt ang. Multiple Personality Disorder bawk a ni e" a ti zawi sup a. 

Lawma te chhungkua pawh an la hlim tlang ve zel a. An in pawh an sa thar bawk a, nalh reuh tak a ni. Zami lah sumdawng thiam tih takah an vengah na nâ na chuan a hlawk ber pawl a ni tawh a. A dawr pawh a zauh belh zel reng a. Duati erawh zirna chhunzawmin a la bei ve hram hram a. A bialpa nen pawh an la nghet fú! Mahse, tlem lai deuh atang khan a bialpa chu a danglam deuh riau hian a hria a. An hna lamah a buai deuh aniang tiin a inhnem a. Mahse, a man a biak loh chuan rawn biak a tum ta vak lo. Duati lah a zei hawi vak lo chi a lo ni si. Va biak hmasaka han titipui vel a thiam vak si lo. Nghet deuha lang siin an derthawn ru ta viau. A rawn len khât tak vangin a nu pawn a zawt tawh nghe nghe. 

Ani pawn a chhan a hre bik hauh si lo. Zan khat erawh a rawn lut ta hlawl mai. Duati a lo hamhaih lek lek. A rawn hrilh sa bawk si lo nen. Lawma te nupa erawh khawhar ina kal turin an chhuak tawh a. Duati bialpa Tluanga chuan, "Thu pawimawh deuh sawipui che ka duh a" a ti nghal deuh tawl. A pawimawh hle a ni ngei ang. 

"Umm sawi la" a lo ti ve mai a. 

"Kan inthen a ngai" a ti ta a. Duati a lo meng phar deuh. 

"Engvangin maw? " a ti hû a. 

"Pawi ka ti lutuk. Hmeichhe pakhatin ka fa a pai a" a ti ta mai! A fiamthu a ni ringin Duati chuan a thlek hâw a. 

"Nia, Duati, ka tihpalh takzet a ni. Kan hna thila min ruaitu fanu a nia. Tum loh deuhin kan chesual ta hlauh a. A rai ta mai bawk sia. Pawi ka ti lutuk" Tluanga chuan a ti mawlh mawlh a. Pawi pawh a ti ve tak tak niin a lang. Duati chuan sawi tur reng reng a hre lo. A rang mah mah. A mi rin em em, a rin êm vanga a ngaihţhatna khan a lo bum reng si a! Chu pawh inbumna satliah mai a la ni lo zui! Mipat hmeichhiatnaah kher kher lehnghal! A la hamhaih êm vangin na pawh a la ti meuh lo. 

"Chuan in innei daen mi? " a ti a. 

"Umm, ka pa ten fate tihfahrah an remti si lo va" a lo ti a. 

"I nei duh a maw?! " a ti hluai. 

"Ka neih mai loh chuan, ka fa a fahrah dawn si a" a lo ti a. 

Duati chu a nui sak,, "Neih. Mai hreh hmel i put loh danah in chesual ngun hle tihna a nih chu. Sex hi tihpalh a ni lo. Duhthlanna a ni" a ti chang ta fak a. Tluanga chuan a kut vawn sak a tum a, a lo paih thla hmak. 

"Ka tum reng vang a ni lo tak tak, Amah khan min lo duh sa aniang, kan free si a, kan mu dun ringawt mai a ni. Ka bum lo che" a la ti ve ţâng ţâng. Duati a hel tul tulh thung. 

"Nei ngei ngei ang che. Kei chuan mi dang ka la hmu ve mai ang ka la naupang lawm. A dik, fate chu fahrahha siam loh tur.. Nei ang che. Chuan, tihian kan tawp hmak ang. Min rawn be tawh lo la, kei pawn ka be tawh lo vang che" a ti hlak hlak a. A khur deuh. A thinrim êm a ni. 

Tluanga chu a ngawi ta reng a. Insawithiam vak sâwt hek lo. 

"Min chhuahsan tawh mai la. Mut ka duh" Duati chuan. ati ta hmiah a. Tluanga tan han awm zuina chi ziazang a ni lo. 

"Min ngaidam em? " a ti hram a. 

"Ka hmangaih êm che avangin ka ngaidam thei lo che a ni. Min hrethiam dawn nia. " a lo ti hmiah. Tluanga a hrilhhai hle. Ngawi rengin a chhuak a, Duati chuan thlah pawh a thlah lo. A roomah a lut a, khumah bawk thlawpin a ţap khur ngat ngat. Lukham chu a sawk tâwn tâwn a. Engtin nge kha tiang kha a thlen theih? Kum 2 leh a chanve dawn chu rinawm takin an lo inzui ve tawh. Hretu tam tak an awm bawk. Innei tura vantlang ngaih an ni tawh bawk. A bialpain sâwn a thlaksan tih miin an hria ang. Ani chu a lo zak thung ang. Tunah pawh a zak tawh. Tluanga hian fight ve zauh mah se, a nu leh pa te zilhna hre rengin virgin ngeia pasal neih a tum a, a hnar thei zel. Tluanga pawn a tum lui ngai tawh lo. Heng vangte hi em ni ang a lo pelhe tak? Tum loh deuha chesual hi a awih hlawl lo. Tumna tel loin a chetsual theih loh. Accident a ni lo. Duhthlanna a ni tlat! A bialnu tan chu hmeichhia chu a lo hnar thei lo chu a nia! 

A sarhu lai a ni bawk a. Thinrimna nen a tuar bawk a. A natna chu a zia tak a awm. Mahse, kar khat a ral a, Miin an hre ţan a. Pawn chhuah a hreh ţan. A maha a awm tam tak hunah chuan khawharna namên loin a rawn tuam ţan a, phatsan a nih vanga mahni inkhawngaihna nen. A nu ten hriatpui mah se; tuar ber anga lan a hreh ve bawk si. A va hah ţhin tak êm.. 

Diteii'n a lo call ta chiah a, "Ka naute, tun weekend chu i nauten an ngai che aniang. Lo chho ta che" a rawn ti dam diai a. Engkim a lo hre ve vek tawh tih a hai lo. A nu ten an nawr nasa bawk nen, mahnia awma inngaihtuah veng veng châk viau mah se; a nuteii te ina weekend hmang tur chuan a insiam ta a. A tawrhna pawh a zia ve maithei asin. 

" u Duati a lo thleng.. " tia rak chulin a nau Drose chuan a lo pan dawr dawr a. A lo nui lui tawp. He nau thawveng zet bulah a tawrhna a hrithla dawn chu a ni sia!  

Diteii pawh a lo chhuak ve a, a dam leh dap mai. Duati hmel tla kuam leh mut kham lo hmel chu hai hek lo, "Lo chim buai lutuk lo ula, au Duati hian chawlh hahdam a mamawh rih a nih hi" tiin a fate chu a lo khap a. Drose roomah a innghat ve. Ni danga an tih fô dan a ni bawk a. Drose tihtur a pek hlanin Diteii chu a va lut a. 

Duati chuan a lu a lo hru hul mek a, "Thil sawi dun te i duh em? " a ti sap a. 

"Sawi tur pawh ka hre lo. I hriat vek kha" a lo ti ringawt. Diteij chuan, "Hei hi hria la ka duh. Mi rinawm lo i kaltir tak vang hian lawm la tih hi. Nakina i natna tur i pumpelh tihna a nia. Duati, thil thleng kha a pawi em em, mahse, tupawh hian kan hmangaih che a, i hlim hi kan duh em em tih hrereng rawh aw. Hmeichhe chak tak i nih kha" a ti dam diai a. Duati lung a lo chhe deuh. A nuteiin a duatzia leh a ngaihhlutzia a hria alawm. 

"Nia, ka tuar dam ve mai ang" a ti ve tawp. 

"Hun hi a pawimawh. A hun lai a nia, tunah chuan tuar la, ţap bawrh bawrh rawh. Intihchhela inlak sehhel vak a ngai lo. A rukin i tuar dawn tho. Chuvanv chuan tuma mitmei veng loin i thiam dan danin tuar tawp la. Mi nep leh tlawm ber ang pawhin khawsa rawh. A pawi reng reng lo ania. Mahse, mi rinawm lo tan hmun siamsak tawh lo thung la, hun hian i rin aia hmain a tuam dam ang che. " Diteii chuan a ti ta dap dap a. Duati chuan a ngaithla uluk kher mai. Dik pawh a ti bawk. Ni e, a tana mipa hlu leh a hmangaih em em khan a mittui chu a phu ve alawm. A lakah tisual mah se, a tana a lo hlut tawhna te ngaihtuah chuan a tana hun reilote peka mawihnai taka thlah liam chu a phu ve e. 

"Te, ka dam ang. Ka tum ang.. Min ring rawh" a ti nghet charh a. A nui sâng bawk. Diteii chuan, "Ka hmangaih che" tiin a kuah a. A hnungzangah a chul hliau hliau bawk. Duati erawh a ţap mêk thung. 

"Û, khu nu khu a la ding char char mawle.. Nichin aŧang khan" Mampuia chuan gate lam chu a kawk a. In chungah an infiam mek a ni. Drose chuan a zuk en ve vat. Chu nu zet chu! Kha nu ngei kha a ni. A nu hrilh tuma hmanhmawh zeta tlan thlak a tum lai tak chuan, hmeichhia chu a kal sawn daih. Drose chu a ding chawt a. 

"Ti nge hetia a awm reng le? A â a ni ngei ngei ang" a ti a. 

(Tawk leh aw)