Drose 13

D'ROSE… (Chapter- 13)

Ziaktu: Toni Râlte

Zanriah an ei khamah chhungkaw inkhawm an nei a. An zawh hnuin roomah an lut bo leh diak. Drose chuan lehkha zir tur chu a hmaah a pharh diai a. A rilruah erawh tlaia Rinmawia nen an inkuah chawt lai kha a awm daih. A inthing nawk nawk a. Rinmawia dehna lai te chu a'n khawih vel. "Ti nge le? " a inti hû a. A zirlaibu chu a bih lui ngat ngat. A phone a rawn ri a. Number hriat loh aţangin. "Hello" a ti liam puat a. 

"Ka fanu, i ţha maw?" a aw fiak tak khan a rawn ti leh ta. A kâng deuh awk a. 

"Ti nge min lo biak? " a ti let a. 

"Ka lo bia ang che ka tih kha. Lehkha i zir em ni? " a rawn ti a. 

"Aw zir dawn mek. " a ti ve mai a. 

"Inhmuh leh i châk em? "

"Châk pawh ka hre lo. nu bak nu ka nei lo" a ti hmuk. 

A rawn nui har har a., "I tan chuan rin a har dawn êm a ni. Ka hre thiam che. Mahse, i rinhlelhna kha fiahin a la awm zel ang. Naktukah i nu bulah chuan, 'Nu, ka tetlaiin rukbo ka ni tawh em? ' han ti chhin teh aw. " a rawn ti a. 

"Ka rilru tihbuai i tum anih kha" a ti hluk a. Phone a off zui nghal daih. Mahse, lehkha a zir lui thei ngang lo. Ni e, a ât tawh sa nak alaiin a nu anga inchhal nu avang khan a rilru a buak zual mah mah a ni. A nu fa nih a duh. Diteii leh Dinfela fa chiah nih a duh. Zan dang aiin a mu hma a, a muhil har thung. 

"Mampui, i û hi ti nge a va tho har ve. Kai tho rawh," Diteii'n a ti lâng lâng. Thuawih zetin Mampuia chuan a û room kawngka chu a kik dawt dawt a. "Û, tho rawh. A tlai tawh" a ti a. Kar loah Drose pawh a rawn tho ve mai. A ham bai bai a. In hnuaiah a rawn chhuk ve. 

Rinmawia chu a lo thar leh vûk tawh a. Chanchinbu a lo chhiar. Drose'in a hmuh chuan a lai ringawt. A melh duh lo lui tlat. A ha te nawtin a inphihfai a. School kal turin a insiam zui nghal. Tukţhuan an kil laiin a nuin, "Tumah rawn hawn tlai awih loh. I pa Bena'n chaw a rawn ei dawn. Ka best friend a nia" a ti sar sar a. A phur hmel kher mai. 

"Jail tang kha maw? " Drose chuan a lo ti leh hû. Diteii hmel a thim deuh, "Umm, mahse, a sual vanga tang a ni hleinem" a lo ti vat a. 

"Mi fel ho chu jail-ah an tang ngai lo" Drose chuan chimawm a chhuah. Diteii chuan a rawn dinchilh a, "Zoi, ka best friend khati angin i sawi tur a ni lo. Nang phei chu a duat nasa che a nia. I tet lai chiah a hmu hman a. Lian a ti tawh ngawt ang che" a ti dam thlap a. 

Drose chuan thil hre chhuak niawm takin, "Taka Nu, ih ka tetlaiin miin min rubo tawh mi? " a lo ti hluai. Diteii a ding ngil awt mai. 

Rinmawia chaw bar tur pawn a ţhulh leh tawp. Phir unau te lah an lo phâwk hrû bawk. 

"Khawi aţanga i hriat nge" a nu chuan a ti zawi raih a. 

"Ih, miin an sawi a" a ti niah niah a.

"Zaninah kan sawi dun dawn nia" a nu chuan a ti ta a. A zawhna erawh a chhang ta lo. Chaw an ei kham a. Rinmawia nen bawk an inphur leh ta. Sik hlau zetin a hlat lej duai, Rinmawia lahin nghal a chhuah pek a. A break thut thut, Drose chu a bu leh dâwrh ţhin. A tawpah a ning ta deuh aniang. 

"I khalh thiam lo mi? Ka lo khalh dawn mi? " a ti ta vak a. Rinmawia a khi sak. 

"Ka phurh hi nuam i tih ruk êm kha" a ti a. Drose a ner sawk. 

"I â tawh nih chu" tih bak sawi tur a hre lo. Rinmawia chuan a sawi dik lo hran lo. A rukin nuam a ti ve reng. Mahse, nuamti anga lan a duh lo. 

"Bialpa te hi i lo nei ve ange aw. I la naupang rapthlak si" a rawn ti leh. A tukhum zawna lei chhuah zauhin, "I zak lo. Nangmah khan bialnu i nei anih kha. A hmel chhe ngawt ang i bialnu chu" a ti ta zêk a. Rinmawia a nui hak hak. An school thlen hmain a chhuk leh. 

"Tlaiah chuan min lo nghak ngei ngei tawh rawh" a ti a. A chhang lem lo. 

Pu Vanlala chu a ţhianpa unaupa thihnaah kal turin a chhuak a, Thiangi erawh a pa te hnena thil thawn turin a chhuak thung. Zari leh Pi Zawmi chiah an awm leh tawh. Zari lah a tihtur a tih zawhah a roomah a awm daih a. Pi Zawmi pawh lehkhabu a chhiar. Dar 12 rik dawn velah chuan door bell a rawn ri ral ral a. Zari chuan a hawn mai loh vangin Pi Zawmi chu phun hluk chungin kawngka hawng turin room aţangin a chhuak a. Zari chu a muhil a ni maithei. 

Kawngka kalhna chu hawngin a hawng a. Tumah a hmu lo. A hawi vel a, tumah an awm lo. Khar leh mai a tum lai chuan a phên aţang chuan kut hian a rawn pawtlet ve a. Amah a rawn lang nghal zat. Pi Zawmi nen chuan an inhmachhawn ran mai. 

"Ka nu, i dam em? " chu hmeichhia chuan a ti vawt raih a. Pi zawmi chu a tarmit phènah chuan a meng phâwk kher mai. 

"Nang.. Nangmah maw? " a ti bah nuai a. Chu hmeichhia chu a nui sâwng a. "Ni e, keimah. Ka rawn let leh e. Min lo mikhual dawn em? " a ti ta a. In chhungah a lut zui nghal. Pi Zawmi chuan khur dar dar chungin kawngka chu a khar a. A kalh nghal bawk. An nupa roomah chu hmeichhia chu a lut zui nghal a. Ani pawn a um zui ve nghal. 

Khumah chuan hahdam hmel zetin a ţhu a. 

"Hetah i lo kal thei hleinem.. Eng nge i lo tih dawn? " Pi Zawmi chuan a ti a. Tlem chuan a pangngai deuh tawh. 

"Ka ngai lutuk che a. Tin, nakina ka chen lehna tur hi rawn fan kual ka châk a" a lo ti a. 

"Tete, mi dangin an hmuh che chuan kan chhe vek a ni mai. Lo kir tawh lo mai tur alawm. Awm tir ve mai mai tawh rawh. A tawk tawh" a ti ta hlak hlak a. 

"Nu, khatin min zilh suh. Ka nghah rei zia i hria a ni lawm ni? Ka hrilh che kha. Ka rawn let leh dawn tih ka sawi kha. Tun hi a hun chiah a ni. " a lo ti thung. A hahdam hmel hle bawk. 

"Eng nge tih i tum? " Pi Zawmi chuan a ti ta nge nge a. 

"Drose hi ka taah ka siam ang a, a nu hi ka la dotir dawn a ni. Tichuan, a fanu vanga rilru hah leh na reng rengin Diteii chu a ral tawh ang. Tichuan, kei hian a ai ka awh dawn a ni" a ti fak fak a. A mitmeng pawh a hlauhawm leh tawh kher mai. 

"Min hnuk lut tawh hlek suh ang che. Ka fate rinna hlawhchhuak tur hian kum tam ka tuar tawh. Tunah min ring chauh a, min rinna hi ka tichhe thei tawh lo. Chuan, ka theihtawpin ka bei let tawh bawk ang che. Diteii pawh thudik ka hrilh vek ang. Min huat leh min hua a ni mai. An rilru i tihnat leh dawn ai chuan eng pawh ka ti mai ang" Pi Zawmi chuan tumruh zetin a lo ti ve tlat mai! Chu hmeichhia chu a ding khawng lah a, "Nunui thihna kha a rei tawh viau a. Mahse, i pasal leh Dinfela hian Nunui hming kha an la theihnghilh hauh lo vang" a ti zawi raih a. Ngeiawm zetin a nui bawk. 

Pi Zawmi chu a inhum ruh a, "Aw ti rawh. Sawi vek rawh. Pawi ka ti tawh lo. Nang ang fanu lak tlak loh lutuk ka neih vang hian anchhia ka inlawh tawh. Diteii te lak aţanga i inthiarfihlim lo a nih chuan keimah ngei hi Police te kutah inpein thudik ka puang ang" a ti ve ta hmiah. An inhmachhawn ran a, an inmelh ngat ngat bawk. 

"Ka nu i ni lo em ni? " a ti nghat a. Lungchhe hmel a pu nghal bawk. 

"Diteii pawh hi ka fanu a ni ve bawk e" a lo tihsan a. 

"Ka duh loh thleng ti turin min nawr lui suh. Pawisak engmah nei lo ka ni tih i hriat kha. Zodingpuii lam i ţang zawk ang maw? " a awki chu a ring lek lek. 

 "Zomuanawm, i lam ka ţan vanga thil thleng zawng zawng kha ka theihnghilh bik ring suh. I thisen zawmpui ngei, i unaunu ngei îtsìka tual pawh that duh, mahni hma i sial luat vanga awihawm loh khawpa i chetna zawng zawng hretu ka nih hi. Nge ka fanu hi i ni tak tak lo zawk? I lamah hian ka ţang thei tawh lo a ni e" Pi Zawmi aw chu a chang kher mai. Teteii chu a ţhen sawk. 

"Anih chuan i thih a ngai dawn anih chu" a ti ta a. Pi Zawmi chuan, "Heti ang em ema rilru chhia leh huatnaa khat hi ka fanu chu i ni si a le.. Setana pawhin em ema a ti ang che. Thurawn ka pe ang che. Thudik engkim sawiin Diteii te bulah ngaihdam dil la, he chhungkuaa hmun i la chan ve chuan lo lut la, an ngaihdam theih loh che chuan, tuna i awmnaah khan lungawi takin awm rawh. Pasal te neiin fate nei ve rawh. Mi tina reng renga dam reng ai chuan thi zawk mai rawh" a ti ta hmiah mai. 

Teteii paw'n a nu ţawngkam chu mak a tih hmel hle. A nu mitmenga tumruhna chu palzam mai chi a ni lo tih pawh a hre bawk. 

"Ka lo kal leh ang. Tunah chuan ka tihtur i hre ta bawk a. I theih ang angin min dan chu i lo tum dawn nia. Nu leh fa kan inbei ang a a ni mai alawm" tiin room chu chhuahsan a tum a. 

"I piangsual tawh takzet a nih hi" a nu in a tih ri chu hriain a hawi let a, "Zodingpuii mittui chauhin min tidam ang" a ti sap. Ngawi rengin a chhuak ta a. 

Pi Zawmi chu khumah a ţhu hnawk. A chau hlauh hluah mai. A fanu Zomuanawmi Teteii kha a la thi reng reng lo tih Diteii ten hre ta se engtin nge an ngaih ang le?! Kha Teteii, huatnaa khat, îtsîknaa khat kha a la danglam lo tih hre ta bawk se, Diteii te rilru chu a va thlamuang dawn lo èm. Mak a ti. Teteii thih leh dam thu ai mahin, mahni unau ngei heti taka a haw thei leh a itsik hi khawvelah a awm theih a ring lo. Mahse, a tak ngeiin a hmachhawn miau si a. Awihawm loh khawp ni mah se, unau inkarah pawh a lo thleng thei teh meuh mai tih a hre chiang ta hle. Tin, tuna Diteii tihnat a châk zualna em em chu Diteii chuan nun thar neiin, chhungkaw duhawm tak a din bik a, ani erawh hming thar leh hmel thar nen, inveng leh zalen lo reng rengin hun a hmang a. A mipa duh leh neih a duh ngawih ngawih kha a laizawnnu chuan a nei ta bawk si a. In leh ro, ro zawng zawng nise, an kutah a awm mai dawn bawk. 

"Kha tih lai khan lo thi tak tak se a ţha tur" Pi Zawmi chuan a ti sap a. Teteii a thi lo tih a hriat nia a thihdan teuhzia te a ngaihtuah kir a. Kha mitthi kha Zomuanawmi ni lo vin Zomuanawmi anga siam danglam leh chei chawp a ni tih hi Pi Zawmi hian ruang an kil laia kha hmeichhe ban a chul sak khan a hre daih tawh. Teteii chuan a ban veilamah kutchuk lian vak lo a nei a. A vun ngo vang erawh chuan a lang chiang viau thung. Mahse, kha hmeichhe banah khan chuti ang engmah hmuh tur a awm lo. Pi Zawmi chuan a rinhlelh vanga a ban kha en a ni hran lo. A chul a chulna lamah a'n en chîk khan a hmu tlat lo a ni. A fanu chu a hrechiang viau si a. Ngaihţhat nan tiin a ban lehlam pawh a en vat. A hmu chuang lo. Tah khan thil dik lo a awmin a hre ta a. A hmel erawh Zomuanawmi hmel nen danglamna a tam vak lo hle. Pi Zawmi erawh rinhlelhnain a khat tawh thung. 

Mahse, Teteii thawm riva reng reng a hriat zui tak loh vang erawh chuan "Zu leh ruihhlo dang a ti nasa si a. A vun te a chhe tawh a, ka hmuh sual a niang" tiin a inhnem a. A suangtuahna atthlak tak tak te chu bansanin Teteii chu a vui liam ţan a. Sualin ţangkaina nei lo mah se; Teteii kha a fanu a ni ve tlat si a. A tawrh pawh a tuar na ve thlawt a ni. Mahse, Drose a rawn piang ta chiah a.. Teteii ngei chu a rawn lang a nih kha.. Zari'n, "Pi.. Thingpui lo in rawh" a rawn tih lang lang ri chuan a ngaihtuahna atangin a rawn kai harh a. Inthing nawk nawkin a ding chhuak a, "Diteii hnenah engkim ka sawi a ngai" a ti sap a. Thingpui in turin room aţang chuan a chhuak ta a. 

Drose school bang pawh stepah a chhuk thla ve leh chhat chhat. Rinmawia a nghak ang nge nghak lo vang tihah a buai deuh. A nghah loh chuan taxi fare a nei miah lo. An in thleng hi Rs 100 lai a ni ve a, Rs 100 pawh a nei daih lo. Hausa viau e ti lo hian a nu hian an hman khawp bak a pe ngai tlat lo a ni. Tin, amah lah hian hmanna tur hi an hre lo laileng khawp a, sweet te a lei ţeuh ringawt a. An ţhenawma naupangho sem te chu a nuam tihzawng a ni mai. Engoawhnise, Rinmawia chu nghah mai ţhain a hre ve aniang, park lam a pan ta a. Rei a ţhut hmain a lo thleng ve mai. A rawn khi sâng a, a lo lai leh ringawt. 

"I van rei" a ti ringawt. A rei tawp si lo va. 

"Min va nghakhlel tawh awm em em" a lo ti khauh. Chhiatkhum leh pahin, "A teuh lo mai. " a ti vak ringawt. Ngawi rengin an inphur haw ta vang vang mai. Diteii te erawh an la haw lo va. A naute erawh an bang tawh. A inthlak a, inbual hmain an kawmthlang putar Radio hlui zet tawh chu siam ţhat tumin a chhawp hnawk leh rum mai. A buai ve takzet a ni. 

"Ţek ţek mai a" Rinmawia aw a hriat chuan a hawi chhuak vat. 

"Eng nge" a ti hluk. 

"I siam chhe zawk dawn anih kha" ngeiawm zetin a lo ti. 

"I hre mai ang. Mizorama mechanic lar ber ka la ni dawn. I bike pawh saw ka la ţhiat ang" a lo ti lung lung. Rinmawia nuih a za telh telh. Drose biang tai tèk leh a hmui ro lek lek sen hlar si te chu a cute ngawih ngawih. A sam erawh a phiar kak leh thân a. A half pant dum chu a awm duhdah vangin a inhlim chho thui deuh bawk a, a chawn leh malte var hai leh mam hen te, a tshirt banin a khuh bak a ban ria chum bat, hmul thiin a bawh chiat te chu a hmuhnawm riau. Mahse, a mawl êm a ni. 

"Min en reng suh. I lerh ami? " a lo ti hlur a. Rinmawia pawh a phu zuk. "I hmuhnawm reuh êm alawm " a ti zauh a. A kal nghal daih. Drose a hrilhhai letling. Mahse, Rinmawia'n hmuhnawm a tih vang chuan nuam a ti ve ringawt. Chu chu a chhan a hre lo. Nia, a hre lul lo vang kan naui hian. 

Diteii pawh a lo haw a. Bena erawh Dinfela'n a rawn hruai dawn thung. Chawhmeh a rawn lei haw nual. Pu Vanlala a rawn haw bawk. A rukin a tunu chu chocolate a pe zauh. Heti putu reng hi an nia. Diteii pawn a hai hlek lo. A hau peih tawh lo….. 

"I radio ropui deuh kha dah ţha rih la, I U Zari nen salad va siam r'u" a nuin a rawn ti a. Hnial ngam hek lo. A inbeng fai thuak thuak a, Zari chu a pui nghal. 

"U Zar, in khuaah i haw ţêp tawh lo mi? Haw tawh la ka ti, ngati nge han ti teh" a ti sar sar a. Zari chuan, "Ngati nge" a lo ti vat. "Ka zin ve châk. I hawn dawnah Drose hi lo zin ve rawh se, ka veng tlat ang.. Ti rawh aw. I tih loh vaih chuan, U rinmawia i star thu ka sawi ang" a ti zawt zawt a. Zari a hawihai kher mai. A nuih a za bawk si. An hnungah a nu a lo ding reng chu niin, "I chhe zawt zawt e a. " a lo ti hlak. Drose a ngawi chiang kher mai. Thiangi leh Zari an nui khur char char. 

An inbual fai tawh hnu lamah Dinfela leh Bena pawh an rawn haw ve ta. Bena chu a patling khap mai. A fai vung roh a, a hma ai mahin a hmel tha zawk. Diteii chuan a fate a ko a, "Apa Bena a nih hi.. Ka best friend aw" a ti a. A hlim hmel khawp mai. 

"A pa Ben, ka hmu che chu ka lawm hle mai" Phir unaute chuan an ti a. Bena pawh a lawm hmel kher mai. Drose nen chuan an inmelh dun vang vang a. "Apa Ben, ih, Jail ah khan ti nge i tan? " a ti leh ta pek! Diteii a sen ţâwn ţâwn. Zilh loh fa ang maia Drose awm ziah hi hahthlak a ti fo. A nuin a melh nat êm vangin, "Tak taka ka ti mai mai nih kha. Jail chu a nawm hmel ka ti, ka thiannu pa pawh a awm a. Nuam a tih hmel tawp a. " a ti niah niah a. A nu melh leh zukin a kal dawn daih. 

"Hre thiam teh. A ât dan hi pui tak a ni. I la hre chho zel mai ang" Diteii chuan a ti a. Bena chuan, "A nu a chhun anih chu" a lo ti khauh. A nui duh der lo lehnghal. Diteii chuan phâwk lek lek hian, "Benjamin, " a ti ţhat a. 

"I la naupan lai kha ngaihtuah la.. Nang aiin a pui hret dawn a nih kha" tiin a nui chhuak hawk hawk. Diteii pawh a nui ve sak mai. A dikna chen a awm. Mahse, amah anga pa hrek hrawk nihtir erawh a tum lem lo. 

Zanriah chu hlim takin an kil tlang ta a. Bena pawh a titi suam suam a. An hre vek tawh tho tiin Jail-a a awm laia chanchin maksak zet zet te a sawi a. Ngaihnawm an ti hle. Pi Zawmi erawh a ngui riau hian a hriat a. Chaw pawh a ei tam lo. "Nu, i nuamsam lo deuh mi?" Diteii'n a ti nghe nghe. 

"Ka tha.. Tun lai ka chaw ei a tui tlat lo" a lo ti mai a. A rilru erawh chuan, "Zaninah engkim hrilh thei che ila aw" a ti thung.. 

Chaw ei kham lamah pawh an inkawm zui zel a. Naupangho erawhin lehkha an zir. Drose chuan an assignment chu a hrethiam chiah lo, Anu zawh dawnin an la inkawm tui si. Anu Thiangi ten an hriat a ring bik si lo. Rinmawia chu zawh tawp a rilruk ta a. A room kawngka chu a kik dat dat a. A rawn hawng vat. Drose a hmuh chuan mak a ti deuh. 

"Enteh, hei min lo hrilhfiah teh a" tiin an zirlaibu chu a kawk a. 

"Lo lut la" tiin kawng a kian a. Dawhkan chu kil dunin an inhrilhfiah ta a. Mathematics chu Rinmawia thiam ve zawng tak a lo ni bawk nen. A sawi awlsam thiam phian lehnghal. 

Drose pawh a bu nghat nghat mai. 

"Ka rin aiin i thiam" an inzirtir zawh chuan a ti a. A nui bawk. 

"Thiam loh ka nei lo" uang pahin a lo ti ve. 

"I over leh si" a lo ti hlak. 

"Min lo zawt zel dawn nia" a ti a. Drose kal tur chuan Khum bula Guitar intung chu a melh zawk a. "Ih, U Rinmawi, guitar i perh thiam ami? " a ti hluai a. 

"Thiam ve sawlh sawlh" a ti a. 

"Yess.. Min zirtir thei. Chuan thil siam ka zirtir ve ang che. Naktuk tlai aţangin kan zir nghal ang. Mahse, anu te hrilh suh aw. " a ti nghal zung zung a. 

"Zirtir e a.. Mahse, thil siam kher chu ka zir ve peih lo. " a lo ti a. 

"Anih chuan, pawisa ka lo khawl ang a. Min zirtir man ka pe ang che. " a lo ti. Rinmawia a nui hawk, "I â siah. Man neiin ka zirtir peih lo che" a lo ti a. Drose pawn a hrethiam aniang, nuih sak pahin, "U Rinmawia hi a fel eee.. " a ti a. Rinmawia bia pawh a ang lo. Engmah sawi hman hmain a chhuak nghal daih. Rinmawia chu khumah a thu thla a. Tukverh inhawng aţanga thla lo lang thlir pahin, "A la naupang si a. Van buaithlak tak" a ti zawi sup a. 

Bena haw hnuah Diteii chuan phir unaute a va mang ţha a. Chumi zawhah a fanu room kawngka a kik dat dat. Mut kawr ha vek tawhin a rawn hawng a. 

"Inbiak kan ngaih kha" Diteii chuan a ti sap a. 

Khumah an ţhu dun a. "Bawihte, tukina i zawhna kha tu nge hrilh che min han hrilh teh le" a ti dam diai a. 

"Ih, kha nu khan. I nu ka nia titu khan" tiin a hma zana an inbiak dan kha a hrilh nghal a. 

"Ka hrethiam e. Tuna ka sawi tur hi ngun takin lo ngaithla rawh aw. " tiin a tetlaia a bo dan zawng zawng chu a hrilh ta vek a. Drose chuan a chang leh a chal a lo chuar nâng nâng a, a chang leh a kut a lo elh nghek nghek. 

"Min rutu chu tu nge i hre lo maw? " tiin a nu chu a melh kiau a. 

"Lalrinawmi a nia. Mahse, engvanga ru bo che nge anih ka hre lo. Kan hloh hlen dawn che emaw kan ti a. Mahse, Pathianin min rawn chhanhimsak leh ta che a ni.. Chuvang alawm kan hmangaih em em che" a nu chuan a ti a. 

"Nih leh ti nge ka naute hi an pian har em em? " a lo ti leh. 

Dawhthei zetin Diteii chuan, "Nangmah kha kan khalh fal ta deuh che a. Kei kha i pu sumdawnna khawihin ka buai chho ta bawk si nen. I pa nen kan sawi dun a, fa neih rih loh kan titlu a. Kan remtih dun hunah i naute hi ka pai leh ta a ni" a ti a. 

"Nu, ka nu i ni tak tak tiraw? " a ti leh hlawl. Diteii chuan a lua chul heuh heuh pahin, "Ka naupan lai chuan nangmah ang chiah hian hmeichhe rilru ka pu ngai lo. Ka sam pawh a sei ngai lo. Min chhun ang a, i pa ve vak ang tih kan hlauh vangin i sam pawh ka zuahsak zel che a nih hi. Mahse, ka fanu i nih miau vangin rilru leh miziaah chuan min chhun ta khawp anih hi" a ti ta a. Drose chu a muang suai suai mai. 

"Mu tawh rawh. Thil ngaihtuah vak vak tawh suh. Engpawh hria la, min hrilh zel tawh ang che. A vawi hnih nan ka chân duh tawh lo che ania aw" tiin a fanu chalah chuan a fawp zauh a. A chhuahsan ta a. 

Drose phone a ri nghal zat. A ner sak. "Hello" a ti bung nghat a. 

"Ka fanu hi a mu tawh em aw" a rawn ti a. 

"I fanu ka ni lo va, Diteii fanu chauh ka ni. I fanu nih ka duh bawk lo. Min lo be tawh suh. Mang tha" tiin phone a hmet hlum nghal. 

A phone melh vang vang chungin, Teteii chuan, "Diteii fa chauh i ni em tih chu kan hre zel ang chu. I nu û ropuizia hi i la hre dawn chauh e. " a ti sap a. A phone chu hmet eng lehin number pakhat a hmet chhuak a, "Naktukah ngei ngeiin aw. I hlawhchham tur a ni lo. I pawisa tur pawh ka dah fel tawh e" a ti a. Lehlam ami chuan.. "Aw le, ka hlawhchham ngai lo" a rawn ti sup a. 

A khum bul dawhkan chunga thlalak chu melh vang vangin, "Nu, min ngaidam ang che.. " a ti a. 

A rilruah thisena inzawmna zahawmzia leh hlutzia lam aiin khang kum tam tak hmalama a tawrhna leh thlauhthlak leh hnawl nia a inhriatna te an lian daih zawk a ni. Chhungkua atanga hrang bik leh a chanai leh chanvo tur zawng zawng chhuhsak niin a inhria a. Engmah lo anga ngai tute chu dim a ţulna a hre lo. A chang chuan, "An thisen zawmpui ka ni ve lo aniang" tiin an laka a rilru put a hriatthiam theih loh vangin a ti fô. Huatna leh khaknaa a khat reng bik chu hrehawm tia rumpui chang a nei ve fô! Mahse, a chhungrilah nawr tu a nei si thin a. Thinrimna leh huatna avangin engmah pawisak a nei tawh ngai lo. A nu thusawi, "I piangsual tawh takzet a ni" a tih te kha a dik lo a ti ngam lo. Nun phung pangngaia nun a thiam tawh lo. Eng emaw pawh ti se, uchuak taka tih zel duh mi a ni tlat. Chu chu Zomuanawmi nun a ni. 

"Zan lai laiah eng nge maw i ziah mawlh mawlh le? " Pu Vanlala chuan phak chuapin an nu kun ngur ngur chu a zawt a. Pi Zawmi a phu zawk. Nui lui tih hriat zet hian, "Pathian thu ka ziak lawk alawm. Ka rilruah a rawn lut thut a. Va mu rawh. Ka zo ţêp" a ti a. Pu Vanlala pawh chu phun nuah nuah chungin a mu ve mai. 

Pi Zawmi chuan a ziak zo ta aniang. A thil ziah chu a melh ran a, za hauh loin a nui leh. An room chu a melh kual leh a, an pa muhil lai chu thlir leh vawng vawngin, "Paa, i chungah hian ka va lawm em.. Khawvel mipaah i rilru hi a tha ber awm e. I nupui hian ka kalsan hunah che chuan, i va mal dawn em.. Mahse, he lehkha hi i chhiar hunah chuan min huat ngei ka beisei. Min haw chunga i dam kha a ţha zawk. Min ngaidam miah suh ang che" a ri rilru mawlh mawlh a. 

A chhan chu a rilru chhungril takah naktuk zanah a pasal bulah hian a mut leh a ring tawh tlat lo a ni. A fanu hi a hrechiang tawk tlat..!