Drose 12

D'ROSE.. (Chapter - 12)

Ziaktu : Toni Râlte

Khumah a bawk thlawp. A nuin a rawn au lang lang chu a hre reng. A chhang peih lo. Chawhnu lama a thil tawn khan a tichau zual. Kha hmeichhia, a nu anga inchhal nen khan an inhmu ta ngei a. A zâm hle anih kha.. 

"I lo kal thei chu ka lawm hle mai. Hun kan nei tam lo va, ka sawi duh ka sawi zo hman tho vang.. Hei hi hria la ka duh. I tetlai khan ka hnen aţanga rukbo i ni a, i pian hlimin. Tuna i nu leh pate sawn an enkawl ta che a ni. Kum tam tak ka zawng che a, khang kum chhung zawng khan engmah thil dang ti lo vin nang zawn nan hun ka hmang ţhin. Ka kut ngeia ka pawm leh theih nan che hian Pathian ka au ţhin. Tichuan, i awmna ka hre thei ta a, nangmah enkawltu te ka hre ta. Ka ngaihtuah a, nasa takin. Kei chu mi hausa ka ni lo, tuna i nawmsak ang hian ka bulah i khawsa thei dawn lo. Tunah hian sumdawnna ka khawih chho dawn a; engtikah emaw chuan kei i nu dik tak bulah awmin ka fanu i ni tawh ang. Tunah rih chuan tuna i nu leh pate enkawl dan ang che sawn awm rih la.. An ni sawn an hmangaih bawk che. Nang pawn an thu awih la aw.. Mahse, nu leh fa inkar hi chu sawifiah theih loh khawpa thûk a ni. Engtikah emaw kan la cheng dun ngei ang, chumi hma chuan i nu ka ni tih hi theihnghilh ngai suh ang che. Tin, he thu i hnena ka sawi hi tumah hrilh suh. Tuna i chhungte bula i sawi phei chuan, an en dan che a danglam vek ang a. Nun nuamin i awm lo vang.. " a ti anih kha. A sawi chhung zawng a mitah tak a melh a, dawt sawi hmel reng a pu si lo. 

"Ka nu i nih ka ring lo" a ti sap a. 

"Nia, i tan awih a harsa viau ang. Mahse, hote chu maw tuna i naute nen in inthlauhzia saw i hria em? Engvangin nge nau i neih vat loh? " a ti ta a. Drose ngaihtuahna chu a kal thui ve ta hle mai. A mizia hresaa lo zirsa vek tan chuan bum a harsa mawlh si lo. 

. "ka kalsan tawh ang che. Inenkawl ţha ang che. Ka rawn be zeuh zeuh ang che" tih leh kal a rual nghal anih kha. Drose chuan chechang lovin a thlir liam tawp. 

"Inbual rawh.. Ti nge khatia i awm? " a nuin a rawn tih chuan phur fahran lo vin a tho a. 

"I ţha em? I va chauh hmel ve" a ti a. A nu hian a chìk thei si. A ning. 

"Ka ţha reng. Ka chau a" a ti a. Bathroomah a lut nghal. A zai miah lo. Ngawi rengin a inbual. Eng nge awiha awih loh tur a hre lo. Tuna a nu leh pate hi a tan an hlû em em tih chauh zawng a hre ve e. 

A inbual zawhah in hnuaiah a chhuk a. Rinmawia pawh a lo inbual zo ve chiah aniang, a fai sar mai. He pa nen hian unau angin an awm dawn chu a nia! A thei ngût ange maw le.. 

A nuin tomato a chantir a, Rinmawia'n a rawn pui ve zat. Diteii fakawmna riau chu awmpui nei mah se; a fate hi an hunawlah chuan a dah awl ngai lo. Tihtur eng emaw a bituksak ve zel ţhin. An awmpui nih pawh hi a nuam ţhin ngawt ang. Zari hi kum 2 a awmna a ni ta a, a tlangnel tawh viau. Mi zakzum chi a nih vang erawh chuan sawi tur te hi a hre lo ve êm a. Naupangho pawn an nel ve tho. 

"Aiiahhh.. " Drose a rak ţhawt. A lo inzai chu niin a thi nghal ţuam ţuam, Rinmawia'n rang takin a kut chu a chelhsak a, a lu aia sangah a dahsak nghal, Diteii'n first aid bawm a va la nghal bawk. 

"Va sil fai la" Rinmawia'n a ti a. 

A va sil, a thip ve deuh bawk nen, a ţhen nang nang mai. A nu chuan a tuamsak nghal mawlh mawlh a. "Eng nge i ngaihtuah, i inzai theih reng reng? " a ti a. 

"Ka hre lo, ka ngaihtuah ber pawh" a lo ti ringawt. 

A kut vei lam zungpui a ni sia, "Naa, lehkha ka ziak thei dawn lo nih hi, veilamin ka ziak sia" a ti hluai a. "A nat em em loh kha, a ziah theih sawlh sawlh ang" a nuin a lo ti. Rinmawia erawh a ngawi reng. Thiangi bazar a lo haw a, Tetea te a au lang lang. Eitur a hawnsak leh a ni maithei. Phir unau an rawn tlan thla nghal. 

" n Thiangi chu engmah pawh min hawn ve ngai lo a fair lo" Drose chuan a lo ti tùm bâr a. 

"Nula i ni tawh nang chu" Thiangi'n a lo ti vat. 

"Nula tak tak ka la ni lo. Mampui, chocolate kha min lo bun ve" tiin Mampuia ei lai chu a va bansak nghal zat. Diteii a lo thaw hawk. 

"Chocolate te hi ei vak vak suh ka tih kha.. I tetlaia i ei nasat vang ania i ha pawh a rualrem loh" a lo ti a. 

"Mawina, ka ha ţo thuah hi mawi an ti zawk aw. Ih, mi pawn, 'Drose nuih mawizia hi' an ti vek" a lo ti leh hmiah. Puitlingho an nui tawp. Rinmawia phei chuan a lawm zual. 

Zanriah an kil laiin pu Vanlala'n "karlehah chu i pi nen phaiah kan zuk in check up dawn sia, i lo kal ve châk em? " a ti pek a. Anihna takah chuan, hruai ve a chak vang a ni reng si a. Bakah an sap ţawng thiamte a lo hlui ve tawh a, a tunu english hnehsawhzia a hre ve bawk nen. Dinfela te nupain an hruai hman bawk si lo. 

Drose a tho kang nghal awk, "Yes.. Tak tak em, pu, i thu i sût leh vaih" a ti nghal hmaih. Diteii a ner nasa. 

"Chaw kha ei mai mai teh, i kal dawn lo. In test kar a nih kha, school chawlh hi a ţul tawpkhawkah lo chuan ka remti tawh lo" a ti deuh hmak hmak a. An pain a lo thlawp nghal zat. Drose a tum nghal vûau. 

"Nu, School hi inah min kaltir mai r'u, Sandra te pawh an kal chilh mai alawm. Ka ning em mai. Mawh" pangchang zetin a ti leh sek sek ta mai. 

"Sandra chu rualbanlo a nia, a ke a hmang thei lo va, an pan a ngai alawm. Nangte chu i ţha mah mah" a nuin a lo tihsan. Drose a kham tau leh hmak. Huiham, he nau zawng a ngaihna a awm lo a ni e. Pu Vanlala a inthiam vak lo, ani reng reng pawh sawi chhuah kher kha a ţul lo asin le.. Mahse, a tunu chu kal ve thei se a la duh chêu. 

"Ka pa, zuk hruai hman hram che u ka lo tum mai dawn nia. In nupa ringawt chuan in ngaihtuahawm palh ang" Dinfela'n a ti a. Drose chu in chungah a chho mêk. Mahse, an ţawng a la hre pha ni ngei tur a ni. 

"Mawina pu, duh suh, keimah chiah duh rawh. " a rawn ti lâng lâng. An han melh ţhap. "In ninawm" ti leh hlukin a pen chho pâwk pâwk a. 

Zanah lehkha an zir leh hlawm a. Diteii'n phir unau a ţhutchilh leh ran a. Drose erawh a inkalh khum leh tlat. Zanin chu thil dang a ngaihtuah thei vak lo. Kha nu bawk kha a mitthla leh veng veng ţhin. A tho thut a, darthlalangah a va inen a, "Miin i nu i chhun an ti ziah sia. Kei pawh nu nen hian kan inang ka ti bawk sia. Hmm. Kha nu kha a dawthei a niang. Ngaibtuah tawh lo vang" a ti niah niah a. Mahse, ani naupang â tak rilru erawh a tibuai pha takzet a ni. 

Diteii te nupa pawh muthmunah an titi leh a, "Saii khan a rawn be leh che em? "A ti ta hlawl mai. A vei deuh ni ngei tur a ni. Dinfela chuan mak a ti deuh, Diteii'n Saii chungchang a lo hria chu. 

"Be lo. Mahse, hetah a la awm" a lo ti a. 

"Ka ringhlel che a ni lo ania, amah kha ka khawngaih zawk. U Malsawmi te ang mizia chu neise kan buai phah leh viau awm si a" a ti niah niah a. 

Nui hukin, "A dik reng mai. Saii chu a pangngai reuh êm a nih hi, an pa kha ka khawngaih letling zawk e a" Dinfela'n a ti a. 

"Thil dang daih, Bawihteii mawlh hi a ni. Engtia enkawl tue nge ka hrethiam tawh lo. School hi a hne ngawih ngawih si, a sawi ang deuh khan in lamah an vai hian kan zirtir mai dawn mawni le ka ti tawp. A naute pawh hi pawn chhuakvak tam lo mah se, pawi ka ti lo" Diteii chuan a ti dap dap a. 

. "Ka lo ngaihtuah ve tho alawm.. Nia, buaithlak e. Mahse, private-a an exam a ngai dawn a. Exam kha chu nakin zel atan a ngai ngei bawk si. Ka hrethiam tawh lo. La ngaihtuah ţhat tur a ni" a lo ti ve a. 

"Mechanic lam ringawt bak hi a tui meuh si lo. Engpawhnise, Pawl 12 tal hi chu pass se ka duh a" Diteii'n vei fêin a lo ti ve leh. 

"Ni ngawt mai. A upa ve telh telh ang a, a hrethiam chho ve mai ang" an pain a lo ti a. Mutthilh zai an rel ta a. 

A nu Thiangi nawhsak a uniform pawnfen chu fengin uluk zetin darthlalangah a inen a, nalh a duh lam ngawr ngawr aiin a chuar leh chuar loh a en ngun zawk. A inen duhtawk hnuah a bag la chhuakin in hnuai lam a pan thla ta chhat chhat a. Chaw ei an lo siam mek. School kal tur ho bik in an ei hmasa ţhin. Rinmawia pawh a inpeih ve chiah. Dawhkan chu an kil ta ţhap a. 

"Ã û, i ţawngţai ni" Mampuia'n a lo ti vat. Drose a ner sak. 

A ruk deuh hian, "Mahni ţheuhin ti mai ang u" a ti sa sa a. A nu rawn chhuk mêk a hmu zui si, hreh hmel zetin "Ţawngţai ang u" a ti ta nge nge a. An maimichhing ţhap. 

"Aw Lalpa, chaw leh thil tinreng min pek avangin kan lawm e. Vawiinah min veng la, hlim deuhin min awmtir ang che. Isua hmingin kan dil e. Amen" tiin. 

Rinmawia ta pek chuan, "Naupang ţawngţaina lo ten ti ve la" a ti a. 

"Ka thu thu" a lo ti sak. 

Vawksa ti hrang lian angreng tak chu a suak a, Chu chiah chu a ti a awm tawh vangin a naute chuan an ît ve si. "Min sem ve la" an ti a. 

"Mipa chuan a thau ei zel tur, chakna ania, an len hunah phei chuan power an nei thei" tih pahin a hmawm hmiah. An melh ţhap chung chuan a ţhial nuan nuan a. A inthiam vak bik loh hmel. An ei khama an ha te an nawh zawhah kawtah an chhuak khawm ta ţhap. Rinmawia chuan a bullet chu a'n tinung hlurh hlurh a, Thiangi'n a scooty start-in Tetea te a phur zui nghal. Ni dangah chuan Drose a phurh tel loh pawn an driver Kima'n a va thlah ţhin. Tukin erawh Kima leh Thiangi'n phurh an tum lo. 

" n Thiang, min lo nghak ru" a ti vak a. "Kha, I û nen in lo kal dawn alawm" tih leh tlansan a rual. A thinrim ţûn mai. Mipa Bike khalha chuante chu tlawmah a la reuh a, amah hian a khalh thiam tho bawk nen. 

"Lo chuang la" Rinmawia'n a tih chuan, "Pa Kima ka be mai ang" a lo ti a. Mahse, a pa a lo chhuak, "In tlai anga sin, tu nge in la nghah, va chuang ta che" a rawn ti si. Hreh zetin Rinmawia hnungah chuan a ţhu ta a. Sik a hlauh hmel kher mai. 

"Ka phurh chu i va hreh awm ve" an tlan chhuah hnuah Rinmawia chuan a ti a. 

"Chu pawh ni lo.. " a ti ringawt. 

An school thlen hmain a chhuk daih. "Ngati nge? " Rinmawia'n a tih chuan, "Min fiam ang" a ti deuh tlat. Rinmawia pawh chuan a hre thiam ve tho. An ka nau ve bawk nen. 

"Banah min lo nghak dawn nia" tih pahin a tlansan ta a. 

"Nghak bawk lo vang che" a lo ti sap. A hre pha tawh lo thung. 

An Schoolah hian ţhian tak tak tia han zuia kawm bik a nei miah lo tak taka. Hmeichhe dang anga a huho tetea inzui dal dal hi a peih ve vak lo. Class roomah a tawm nileng deuhthaw ţhin. Tiffin a pai ţhin bawk nen. A ţhutpui te pahnih Remi leh Puii te nen pawh chutia inkawm ta lua an ni hran lo. Biak erawh an inbe chhe lem lo thung. A tui zawng sawipui peih an awm vak ngai si lo va, a kawm rei peih ngai lo. Mipa ho lah inla pa chi, hmeichhhe kawm ţha duh lo rual kha an lo ni ve bawk nen. Mal taka awm chu hrehawm a lo ti hran lo bawk a. A nileng ve thei mai zel. 

"Dite, vawiin chawhnu kha Bena lo chhuah hun a nih kha aw" Dinfela'n a ti a. An pa hi chu aw.. 

"Umm ka hria alawm. Sawtah dawrah ka phei lawk ang a, U Puia nen thil en dun lawk tur kan nei a, chumi hnuah ka zuk kal ang ka tia" a lo ti a. 

"Umm zuk kal rawh. Ka rawn tel hman dawn si lo. Thupha min lo chawisak dawn nia" a lo ti luam a. An nupain an chhuak rual thei ţhin a, mahse, motor dang ve vein. In lamah an nulate nen Pi Zawmi te nupa chu an lo intihlim ve ţhin. A changin an inbonus a, an in dawl chuh bawk. Checker leh chess an khel ho bawk ţhin. A dik adik chuan Mizoramah hian tar ho tan intihhlimna hi a vâng rih êm a. Tar enkawlna in te hi a la awm ve si lo. Awm se chuan, an nu leh pa tar ve tawh takte dah tur an awm nual ang. Diteii hian a ngaibtuah fô thin a. Tuna an sumdawnna hi tihrala tar enkawlna din hi a rilruah a lian fô. A location fuh se la, engkim intihhlimna hrang hrang awm thluah bawk se, tar ho kawm hlima chawk hlim thei tur mifel tak ruai bawk se la a hlawk bakah mi dang tan malsawmna an ni dawn tihna a nia. Zan riah kher pawh a ngai dawn lo va. An fate office emaw chhuahbo hlana khawhar taka lo awm ngawt ngawt te tan chuan a hlûin an nunna atan pawh a pawimawh viau ang. Tar dang nen han inkawm khawm theih pawh a hlu viau ngei ang. Engtikah emaw a la ti thei maithei a ni. 

Dinfela pawh office lam a pan ding nghal a. A rilruah Saii a rawn lang leh zauh ţhin.. a va duh ve lam ai mahin, amah vanga a pasal a ţhen nia a hriatna chuan amahah inthiam lohna a neihtir a, thupha chawi ngawtna chi a ni bawk si lo. 

"Sir, hmeichhe pakhatin a nghak che a" a assistant chuan a lo ti var a. 

'Okay, lo luhtir nghal la" a ti a. A chair-ah a ţhu chiah tihin kawngka a rawn inhawng a. Saiingliani a rawn lut ta a. 

"E nang maw? Vawiin i rawn kal hman dawn lo emaw ka tia" a ti vat a. 

"Nia, mahse, office thila dawrtur che pawh ka ni hran lo" a lo ti thliam a. Dinfela hmaah chuan a ţhu nghal.

"Anih chuan eng thilah nge? " a ti a. Coffee a chah nghal zat. 

"A tawp nan rawn hmuh leh che ka duh a. A mawi lo viau naa, hman ang tho khan engmah a la danglam si lo va. Naktukah hawn ka tum a" a ti dam dap a. Dinfela chu a lo thaw hawk. Saii chu a haw lo, a lainat ru viau zawk. Amah a lo duha a lo hmangaih chu a thuneihna pawh a ni lo. Mahse, rem lo a awm miau si a. 

"Nia, sawipui duh che ka nei ve bawk. I pasal i ţhen êm êm kha chu pawi ka ti. Kawng dang a awm ngang lo em ni? " a ti a. 

Coffee an rawn dah a, Saii chuan ţhut ngil deuh pahin, "Ani pawh kha ka lainat asin aw. I awih emaw awih lo emaw virgin ngatin asin ka neih. Mahse, tunah hian ka inpuang ang. Ani kha ka virgin hawngtu a ni a, mahse, ka thinlunga lian zawk chu nang i ni. Nupa nun kan hman apiangin a rukin ka ţap ţhin. Nangmah ni zawk la ka duh êm êm fô a, mahse, chu chu thleng dawn ta se ka duh takzet angem ka hre chuang lo. Kan inţhen chhan tak chu nangmah vang a ni em em lo, amah hi fapa mal a ni a, an inpuiah kan khawsa a, kei ka hna vangin chhuah leh zin fó a lo ngai a. Ani lah hna nei ve tho a lo ni si. Ka pa te chuan chutia an monu chhuak reng chu an ngaih dan a ni vak lo nge hna bansan turin min râwn a, keima nu leh pate nen kan han sawiho a, kei ka tuina ve ber a nih bakah harsa taka ka neih ve a ni si. Ka bansan phal ta ngang lo a ni. Hmalam hun kan hre lo va, nakinah fate neiin mak chhiat te tawk ta ila, mahni pawh inchawm theih loh chuan chhungte tan phurrit kan va ni ringawt dawn a. Kha ti ang thlenga ka thlir vang khan ka hna chu bansan a rem ta tlat lo a ni. 

Ka thutlukna ka hrilh a, an ngawi ta hmak. An chhungkua hi thlahtu te aţanga khawsa ve thei, hausakna chhawm ve zel ang kha an lo ni bawk nen. Ka dem em em hran lo. Kan pa erawh chuan eng a sawi ve vak lo. Mahse, kan boruak a fuh ta vak lo. Dik tak chuan kan inneih hma aţanga hna nei ka ni tih an hria a. Inneih hnua an pawmzam leh thei lo chu ka lai a na ve deuh bawk a ni. Luhlul chhuahin ka kal ve ta zel a. Fa ka pai ta lawk lo nen, an ni tu hmel hmuh an lo chak tawh si. Theihtawp ka chhuah naa ka tilungawi zo ta meuh lo a niang e. Lehlamah keia pawh mo zawk si ka dik bik lo tih ka pawm tho. Sum ka va um lam a ni lo tih erawh min hriatsak se ka duh ngawt mai. 

Zan khat kan chaw ei laiin ka nuin, "Awmpui la ang che. I hlawhin i chawm ang a, a bak chu nangma tan hmang rawh. Nanga hlawh mai mai kha rawn chhun luh pawh a ngai tawh lo" min ti zêk a. Keia tlawmngai ve bawk si chuan, "Ni tuk e. Keia hlawh mai mai tel loin kha chen in awm tawh a. Ka hria alawm. Awmpui pawh ka la em em ang" ka ti ve ta hmak a. 

Ka kham ruala, ka pain, "Nau lah pai thei si lo" a tih zauh chu ka hre bawk a. Vawi tam kan pa nen doctor kan pan tawh tih an hre reng. A thiam lo zawk leh pai thei lo zwk anga min chhal mai chu na ka ti a. 

"Fa neihsak che u pawh hi ka chak lo ve" ka ti pek a. Ka lo insum thei lo ve bawk a ni. Kan ri ta hluai ringawt mai a ni. Kan pa lah a nu naute a nia, a nu thu a kawi a ngila zawm ţhin a ni. Ka thlavâng a hauh lo va, hauh tlak ka ni lo ve bawk a. A zan azanin ka haw ta ringawt. Ka vawi khat tlanna a nia. Let leh tumna ka nei lo ta nghal. Min rawn ko ta bik lo bawk a. Bungrua kan va la a, nuthlawi ka ni ta der mai" tiin A sawi zawhah coffee chu a in khalh khalh a. Dinfela chuan ngaihnawm a lo ti viau. 

"In pa chuan a rawn zái leh miah lo che maw? " a ti a. 

"Aih, kei pawn mak ka ti. Min duh ve lawm lawm nen, mahse, min rawn zar ta miah lo kha ka lawm angreng. Ka lo khawngaih leh dawn si a. Kan inţhen aţanga thla thumnaah nupui a nei nghal" a lo ti a. 

"Fa an nei em? " a lo ti vat. 

"Pali lai an nei tawh. Ka lawmpui khawp mai. Fa an neih takah khan ka inringhlel a, Doctor ka pan a. Kei hian fa ka nei thei lo em ni tiin. Test chikim kan neih hnuah pawh dik lohna chu ka lo nei bik lo. Upain inhamtawng lo an tih hi kan lo ni ve a ni maithei" a ti charh charh a. 

"A pawi hle mai. Mahse, nang hi chu i ngaihtuahawm loh. I nau fapa tan pawh nu ţha ber i ni thei ngei ang" a lo ti dam dap a. A nui sâng bawk. Saii chuan a melh ngawih ngawih ringawt. 

Harh chhuak thut niawm takin, "E tak, ka lo kal chhan ber zawk chu.. " tiin a bag a zen rak rak a. Invitation card mawi zet a rawn lek chhuak a, "In chhungkuaa in lo kal ve ngei ka beisei tlat a nia" tiin Dinfela a pe nghal a. A lo la vat. A khi ta sak a. 

Saidingliani chuan ama pualin Institution a din ve dawn a lo ni a. Chumi hawnna programme-a tel tura sawmna a lo ni. 

"Ka va lawmpui che em" tiin a va chibai hluai a. 

"Ka lawm ngawt mai kei pawh. In chhungkuain aw" a ti leh a

"Kan tum ang. Naupangho phei chu an phur tawh ngawt ang" a lo ti a. Saii chu kal mai a tum ta bawk. Chanmari-ah Dinfela chu hna thilah kal tho a ngaih vangin Saii nen chuan an chhuak dun ta nghal a. 

Diteii pawh Puia nen an inbiak zawhah an hnathawkte tan eitur a lam kawi a, an rawn deliver mai thin naa duh aiin an rei deuh ţhin nen, an phun ziah a. A hman remchang bawk nen. A lamsak nghal ta mai. 

Traffic lah hi a jam reng si a. A motorah ţhuin hmalam a melh ran a. Signal a hmuh rualin a tlan nghal, chutih lai tak chuan an pa car hian a rawn tlanpel ve chiah bawk. Pasalte car hai thu awm hek suh. A miphurh pawh a hmu chiang ngang mai. Saii ngei a ni. Tlemin a lung a tiphu ta det. Traffic police te awm lohna hmun a thlen chuan a phone a phawrh a, an pa a call nghal. 

"Office-ah i awm em? Vawiin chu lunch lo ei la" a ti nghal a. A awkaah engmah danglamna a awm hran lo. 

"Tunah chuan ka awm lo. Hei ka chhuak lawk a. Lunch chu ka rawn ei hman hmel loh ee, programme ka nei si a" a lo ti a. 

"Aw nih chu mawle.. Hei ka let mek e kei pawh. Nih aw" tiin phone a dah nghal. Dinfela assistant a call leh zat, a thiltih chu ţha a ti lo hle. Mahse, chhungrilah a rawn tur miau si. 

"Aw, Ramte, i pu vawiin programme lo sawi mai teh a" zangkhai zetin a ti a. 

A rawn sawi zar zar. Chanmari-a an bungraw lo thleng thar va hmuha report pek bak eng em em a nei lo. Chu pawh darkar chanve-a zawh maithei a ni. Tunah lunch ei nan darkar 2 leh a chanve a la awm. Diteii rilru a nuam ta lo riau. A pasal chu rinhlelh a duh lo. Mahse, Saii rilru kha a hre ve tawh si a, mi fing tak a nih vangin engtin emaw a pasal chu a inhambuai phah a hlau a ni. 

A insangmar hram hram a. "Eng êm a ti lo vang" tia inhnemin an dawr kawtah a ding ta dat a. 

Drose school pawh surprise checking an nei a. Phone pai ru chu an buai leh hle mai. Hmeichheho lah an make up chu thuhrukna an zawng ruai hlawm a. Drose erawh a chechang ve lem lo. Engmah pai ve hek lo. An miss chuan a bag chu dapin, a tawpen jipper chu a hawng a. A pen bawm leh a diary bak a awm lo. A pen bawm chu hawng lehin a ensak leh a. Condom pahnih a lo awm tel ve. An thlir ţhup mai. An miss chuan nui deuh chungin, "Zochhuanwwm, hei hi eng vangin nge i pai? I mamawh em ni? " a ti a. An class ho chu an lo nui ru ţhâ hlawm. 

"Ka nuin min paitir ţhin a. Mamawh hun a awm a tia" a ti ve mai a. A nui miah lo bawk. 

"I nu chuan condom nena mipa mutpui a phal tihna em ni? " a rawn ti leh kher. 

Tlema awki sang deuh hian, "Miss, keini chu ka nu hian sex education leh Hiv awareness min pe nasa a. Tin, Condom tangkaina pawh min hrilh ţhin. Mi tu emaw accident tawk an awm chuan, kha accident tawk khan HiV a pai thei, thisen a chhuah bawk si chuan CD hi glove atan te pawh a hman theih. Tin maw, CD leina nei lo te pawh ka pe tawh. Ka ţhian tu emaw ka hmelhriat loh pawh nise sex an hmang dawn nia ka hriat chuan ka pe bawk ang. A chhan chu Miss, HIV hi kan lan dan leh hmelah a lang chhuak lo va, he lai zing ami te pawh hian kan pai ru reng mai thei. Virgin lo pawh an awm nual maithei. An ni pawh hian pai vek se ka duh. Condom pai hi hmeichhia kan ni emaw mipa kan ni emaw thil zahthlak a ni lo" a ti ta hmiah hmiah mai a. An miss chu a dang lek lek. 

Mahse, "I la naupang a, Condom pai rual i la ni lo. Tin, a zahthlak bawk. Mi tu emaw hnena condom i pek rual khan, 'Zalen takin sex in hmang thei e' i tihna tluk a ni a. Pathian dan kalh a ni" a la ti hram a. 

Drose chuan zam hauh lo vin, "Ka pek loh pawn an hmang tho alawm. An hman dawn rau rau chuan, CD hmang se, naupangtein an rai lo vang a, Hiv an pumpelh bawk ang. Sex hi hmang suh u tiin tlangau chiam mah ila, an hmang tho. Chuvang chuan inven kha a ţha a ni mai" a lo ti ve sak a. 

Boruak a rit ru hle. 

"I nu zirtir dan che hi ka duh hauh lo mai. Nang pawn sex hmang la pawi a ti dawn lo a nih chu" an miss chuan a ti leh a. A awki pawh ngaihno a bei vak tawh lo. 

"Miss, ka tiam a che. Pasal neih hi ka la ngaihtuah ngai lo va, bialpa pawh ka la nei lo. Pasal ka nei ve dawn te anih chuan, Virginin ka nei ang. Chu chu ka nu min zirtir dan a ni. Mahse, keimah ang lo mi tam tak, an nu leh pa ten zirtirna an pek ve loh an tam lutuk a, chungho tan chuan alawm CD ka pai thin. Ka nu pawn ka pa pawn an pai reng thin" a ti ta a. An miss chuan dik a ti tho si, mahse, a student hmaa dang anga lan a hreh si. 

"Office-ah ka hmu duh che. I lo kal dawn nia" a ti ta hram a. 

Drose chuan chhaih zui a tawk ta tho mai. "CD ka la hmu ve miah lo. Hawng chhin ang u" tiin an hawng vel a. "Nang chuan i hmu zing tawh sia, a hman dan pawh i hre vek tawh ang a" ti zawng ten an ţawng khum nasa. 

"Nangni ţawngkam kha engahmah ka ti lo. In peih chhung min chhaih ru" a lo ti mai. Chawhnu lamah chuan chhaih peih an awm ta lem lo. An miss thu angin office-ah chuan a va kal ta ngei a. Eng em em erawh an sawi lo. An sir an classmaster a lo ţhu ve bawk a. 

"Sex education hi chu inzirtir kan ngai reng a ni. I nu pawh a tiţha khawp mai. Mahse, CD pai tur êm chuan i la nau a ni" an ti! Drose a nui tawp. 

"CD ka pai vanga sex hmang tur anga min ngai tlat kha a mak e" a ti ringawt. A bak a sawi tam peih lo. An kaltir leh mai. CD chu a pai ve a ni mai a. Manna chhan tur a awm hran si lo. 

Tam tak nu leh pa hi chuan sex education sawi hi zahmawh sawina angah an ngai a, an sawi zak a, an hreh thin. An fate an rawn thanglian a, sex hman chu tuman zirtir lo mah se; an rawn thiam mai. An nu leh pate hriat lohin porn site an tlawh zut a, an hrethiam ve vek. Sex hlutna leh zahawmna tak an hriat loh si vangin holam takin an thianghlimna an hloh thin. Hei hi a pawi! Sex in a kentel chu nawmna ringawt a lo ni awzawng lo va. Nau pai, HiV a keng tel tlat! Naupangtea sâwn pawm, naupangtea inneih ngai si, nulat tlangval kham lo va inthen leh ta maia nuthlawi leh pathlawi an tam zia te hi.. Thlawi zawng zawng erawh an ni tihna a ni lo. Fa loh vanga thlawi hming pu si lo, nau titla, nulat lai aţanga Ipill addict niawm tak lah an kuh ţûn bawk. Chuta karah Hiv a lo tel ve zeuh zel bawk a. Mahni inringhlel miah lo, intest ngaia inhre lo, a ruka Hiv hrik pai hi kan leng suau suau mai thei a ni. Tikhan an pai tih hre si lo in tu emaw an va mutpui leh mai a! Ngaihtuahna a va tithui si em… 

Rinmawia class bang chu Drose te school kawtah a huai vual vual mai. An bang tawh aniang, a reh ţhap tawh. A lo nghak lo a nih dawn hi tiin a tlan haw ve ta nghal a. Rinmawia hi tlangval sang pui ni lo mah se, a vantlang tawk vel a ni a. A la naupan ngaihtuahin a puitling ve viau, unau zinga upa ber hi chu an puitling viau zel. A hmel tha em em lo va, a hmel chhe hran lo bawk. Tlangval dang aia a specialna a awm hran lo. A vun erawh a ngo lutuk lo va, hang beh tak erawh a ni lo thung. A lerh vak lo nge bialnu pakhat chiah a nei ve tawh. Chu pawh vawi khat chiah an infawp. Bialpa dang a lo nei a, an tawp zui nghal daih. Hmeichhe lam a ngaihsak vak lo. A zei em em bik lo bawk a. 

In a thlen chuan Drose chu a lo awm vâng tawh a. Thingpui leh chhangthawp lian zet a lo ei ţân ţân mai. 

"Min hawnsan daih a, ka nghak ve che sia" Rinmawia chuan a ti a. 

"I rei em alawm" a lo ti ve mai.

"In school piah deuha park-ah khan min lo nghak ţhn la" a ti a. 

"Nia, ka hre lo. Nghak ang" a ti leh puat. Thiangi chuan Rinmawia chu thingpui a lo siamsak vat. A inthlak zawhah a rawn in ve a. 

"Mamawi, nangmah ang deuh kan khuaah a awm" Thiangi chuan a ti a. Alu a vel pah bawk. 

"An ka ngah ve lutuk" a lo ti a. Drose ta pek chuan, "An ngah deuh chu an chhia tihna" a lo ti hmanhmawh. 

"Nang lah hi.. Ei zo vat la, home work ti ang che" Thiangi'n a lo ti a. 

"Aih, mini fridge ka siam dawn. Anu awm loh lai hi chuan ka free ve lawm" a lo ti. Thiangi pawn a chhang zui lo. 

Drose kal hnuah, "Drose zia hi a mak ee, a pa deuhin ka hria" Rinmawia chuan a ti sar sar a. 

"A pianphung hi chu a nu reng. A rilru hi ka hrethiam tawh lo kei pawh" a lo ti ve a. Zari a rawn haw. A puin Veng dangah a tir a. 

Thingpui a insiam ve nghal mawlh mawlh. Rinmawia nen an la innel vak lo. 

Rinmawia pawh thingpui a in zo va, Awm mai mai ai chuan tiin an in hnuai rawng la hnawih zawh loh chu hnawih turin a chhuk thla a. 

"A fel reuh ngawt mai. Thawh hreh pawh a neih loh hmel" Thiangi chuan a ti mawlh mawlh a. Drose a rawn lang leh chiah. 

Zari chuan, "Nia amah pawh hi a chhe lo tawp" tih pahin a nui har har a. Drose a lo phâwk leh hû! "Hmm.. U zar, i lerh. Ka hrilh dawn" tih leh tlan chhuah a rual nghal. Zari'n a um, "Hei, Lal Rose, a chi loh.. Mawli, lo let rawh" a ti tuar tuar a. Rinmawia bulah an inum lut. 

"Eng nge ni leh ta? " Rinmawia chuan a lo ti dam duai a. 

"Ih.. Englo, ka lo pui dawn che a" a ti ringawt. Zari hmel a hmuh khan a khawngaih leh deuh aniang. Rinmawia chuan "I thiam ve dawn mawni le" a ti a. Zari chu a chho leh daih. 

"En ila, i thiam chu ka thiam ve vek" a lo ti nghat. Rawng bur chu hawngin an bun chhuak a, brush an tifai a, an hnawih ţan. Drosei'n rawng bur aţanga thlit chhuah leh tuma va pan lai tak chuan in chunga an hrui zam, an la fit zawh loh a rawn tla thut, Rinmawia'n a lo hmu hman hlauh, rang zetin a va pawm nawlh a, hrui hlawm lo tla thla chu a lo ban nghal. Natna tham chu a ni lo naa, engvanga khatia ti nge anih a inhre bik lo. 

An inkuah ran a. Mahse, a rei lo. 

"Kal teh" Drose chu a tal aih a. Rinmawia'n a thlah zui nghal. Drose lungphu ranzia kha a hre thei. Ama lungphu pawh a dik miah lo. Hrep tak a;! A thil ngaihtuah chu a duh hlawl lo. Drose chuan, aw lawi rût hian, "Ka chho dawn. Ka pei tawh lo" a ti a. A lo bu nghut. 

"He naupang â zet hi ka duh ringawt amawni le.. A teuh lo" tiin a phun bul bul a. 

(Ka kutzungpui a ţhang leh tawh. Mistake a awm leh nual ang 😁😂