Drose 11

D'ROSE… (Chapter - 11)

Ziaktu - Toni Râlte

"Nuuuu, â û hiii" Tetea chuan a ti chul a. Diteii chu toys roomah a lut vat. A thaw hawk mai. A fate pathum chu an lo che hnawk leh tawh viau, chhuatah mattress hlai pui an phahah chuan a naute pahnih nen an lo inbuan leh thial thial mai. He nau hi ti nge hmeichhia anga a awm ve mai loh le?! 

"A tawk, Bawihte, rawng min rawn bawlpui rawh. Tete, nangin in tihhnawk kha tifel la, Mampui, nangin Tetea tihfel zawhah chhuat kha nawt ang che" a ti zung zung a. An tho sang sang. Drose chuan a nu a zui nghal a. A nu chuan maian hih tur a chhawpsak nghal. 

"Nu, maian hi mai tho tiraw? " a ti hû a. 

"Ni lo, maian chu mai hnah a ni mai. Mai chu a rah" a lo ti ve mai. 

"Anih ti nge maipawl hi a pawl loh le? " 

A nu a thaw leh hawk. "Ka hre bik lo. A ţhen chu a pawl alawm" a ti leh mai. 

A fanu maian hik zei lo zet chu melh vawng vawng chungin, "Nula pangngai tak i rawn ni chho thei êm ang chu maw.. Ka tleirawl lai ai mahin i awm ho dawn tlat" a ti rilru neuh neuh a. 

Thiangi khan pasal a nei ve tawh a, mahse, an inţhen leh tawh. A tal ho ta viau mai a. A nu leh paten tihngaihna vak an hre si lo. Fa erawh an nei hman lo hlauh a. Kolasib-a a awm chuan an mualpho zing si, inhauhna lian tham a thleng ziah mai a. Amah Thiangi'n chuti ang nun chu ningin, Aizawlah Dinfela te a rawn bel leh a. An ni lahin an lo thlahlel nasa si. Drose nen phei chuan inkawmngeih tak an ni. Vawiin erawh an khaw lam mi damdawiina awm a va kan ve a. A rei ta phian. Thiangi lo hi nula dang pakhat awmpui an nei bawk a. Thiangi hi chu an nau awmtu ang a ni mah zawk. Naupangin an ngaina bawk nen. An nula pakhat erawh in chhungkhur bakah eirel thlengin a khawih vek a. Diteii hian a pui zeuh zeuh bawk. Ani pawh an veng ami in luah thar an awm a, a va tlawh ve. 

Enkawli kha MA a pass hnuah vanneihthlak takin an khuaah zirtirtu hna a hmu ve hlauh a. A thawk zui ta nghal a ni. Bena vang nge hriat va ni suh, pasal loin hei a leng rei ve ta riau mai. Bena pawh a lo chhuak hnai ve ta. Ani pawh tlangval pangngai, upa lam a lo ni ve ta a. Central Jail lamah chuan thuneihna fawng vuantu zing ami a ni ta bawk. 

"Nu, Ánu Thiangi hi zu rim a nam ţhin" Drose chuan a ti leh phawng mai. A lo sawi hreh ţhin niawm tak a ni. 

"Ni e, i nu Thiangi hi dem loh tur, a vanduai êm a nih hi. Chuan, Bawihte, i rualpui te chu nangmah ang mai mai hi an ni tawh lo asin. Nang chu lehkha i zir thatchhe si, motor khawl thil siam ţhat hna hi bansan la, ţha takin lehkha zir rawh aw. I pa pawh a ngaih dan a ni vak tawh lo a nia" Dam diaiin Diteii chuan a ti a. 

"Lehkha zir hmu chhuaktu hi ka thihchilh châk ngawt mai" a lo ti leh nghat. Maian a hik zo va, "Basket ball ka khel dawn" tih leh in chunga inthlak tura kal a rual nghal. Diteii chuan mangan hmel zetin a thlir zui vawng vawng. Fanu hmel ţha zet a nei a, mahse, hmel ţhat ringawt chu a lo tawk zo lo. A fanu chu a fing tlat lo. A mawl rei ngat ngat hle mai. A naute pahnih nena inbuan thiak thiak te, velh ţah te, a pu motor chhe tawh an dah ţawl mai mai siam bakah an fridge ţha lai reng ţhiah darh te, an store rooma thil hlui zet zet siam ţhat te chu a nuam tih ber a ni. Ţhian a nei lo a ni ber. Mizorama school ţha ber pawla an sawiah a lut ve, lehkha a thiam hlawl lo. Mahse, an zirtirtute thiamna vangin pawl chu a sawn ve hram hram a. An class-ah a tichhe ber a ni ziah. A huai êm êm ringawt. Mipa pahnih a insualpui tawh vangin Dinfela te nupa pawh koh an ni tawh. Kum 10 vel a nih lai kha chuan a pa hian a lawm thei viau a. Mahse, tunah chuan a mangang ţan. Sawi awm leh awm lo a hre lo va, ri phawng chi a ni. Miin an lo dawnsawn danah buaina a nei lo. A sawi duh a sawi chuan a duhtawk. A nu leh pate hian an zilh lo a ni bik lo, mahse, mi danglam a ni tlat. A nu leh pate an thinrim tawh chuan a ngawi tlat a, hauh hleihtheih lohin a awm thiam. Sawisel leh î a nei ngai mang lo. Thawmhnaw pawh a nuin a leisak bak amahin awh nachang a hre lo. Kum 14 a nih thlengin a nuin a inbual zawha a hak tur a la thlansak. Naupang angin a la khawsa a, mahse, a lian ûr tawh lawi si. A hmel zawng a ţha thlawt mai. A vun pawh a dik. A nu tleirawl lai angin a pa ve ţung lo. A pianzia engkim a kal dan te pawh a nu zêm lawi si! Diteij rilru hi a va tirethei ţhin tak. An duat ve bawk si, a pi leh pute phei chuan keh thei dawmin an dawm a. An bulah a hauh theih loh.. Mahse, Drose hian a pi hi a nel hleithei tlat lo. A tetlai thil thleng kha a hre awm tawp si lo va, a mak ve ngawt mai. 

Phir unau te erawh an harh em em ringawt. Tetea hi a chhuak hmasa zawk a ni a. Mampuia aiin a ã zawk. Mahse, tharum a ngah a, inbuan te hi a thiam turu. Mampuia erawh ţi dêk mai, dawih ve deuh tak a ni a. Mahse, a fing thung. A thluak hmangin a û chu a thunun thiam zel. An inngai dun em em a, han inhauh pawh hi an nei vak lo. An û hian a vel ţap zing mai pawh a! 

Amah chauhin Basket ball chu a khel tlauh tlauh a. A ţang ve em em ringawt. Gate lamah a ball a tih lum vangin chhar turin a kal a. Gate pawn lama amah lo kotu chu a va en nghal.. A nu ang tiat vel, nu inchei nasa deuh, hmel ţha tak a ni. A rawn nuih sâng a. 

"Drose, i lo va lian tawh ve" a rawn ti fiak ţhak a. Chu nu chu a hre ve der si lo. 

'Tu nge i nih? " a ti ta a. 

"I nu" tih leh kal sawn a rual nghal. Drose chuan a va en zui a, mahse, motor-ah lutin an lo tlan dawn mek tawh. A ding ta reng a. Mak a ti ve deuh. Kha nu kha a la hmu ngai lo hrim hrim. 

A inkhel tui ta nek lo. In chhungah lutin, Gym roomah a chhuk zui nghal. Darthlalang lian zet hmaah chuan dingin a kawr hak lai chu a phelh a. Tawnzau nen chauh chuan a awm a. A sam chu a dum hlap a, a kawng thleng vel hnawk a ni. Mahse, englai pawn a phiar tihtheih deuhthaw a ni. A kawng fek rât leh phiar ţang te, a mawngbawr khal zet te chu a thlir thla zel a. 

"Ka nalh ve reng hi" a ti sap. A rilruah eng nge awm a hriat chuang loh. Exer a la zui nghal. 

Dinfela a lo haw a. Thiangi'n a rawn zui lut bawk. Tetea te unau chuan an lo bawh leh hiang hiang a. A thil hawnsak chu a pe nghal. 

"Khaw nge i ú" Mampuia melh pah chuan a ti a. 

"A roomah a niang. ' a lo ti fel leh ât mai. 

"Sa i va rawn lei tam ve, ti nge? " an nu chuan a lo ti zat a. 

"Nia, naktuk tlaiah hetah ka thawhpui ten chaw an rawn ei dawn a. Rawn hrilh hmasak che a ţhat nen, ka buai lutuk a, ka theihnghilh leh daih" an pa chuan a ti a. Diteii pawn engmah a sawi zui lem lo. Pu Vanlala te nupa khawhar in leng pawh an lo haw ve ta bawk a. An nula erawh chaw ei khama lo hawn a tum thung. An han intifai sap sap a. Chaw ei an peih nghal. Drose pawh sam huh hnuangin a rawn kil ve. A pain a khak leh pek, "Chaw ei chhung tal chu i sam kha kilh bet rawh" tiin. Thuawih takin a kilh bet ve leh mai. 

"Nu, nichina ka inkhelh lai khan gate-ah sawn hmeichhe pakhat a lo ding reng a. Nangmah ang tiat vel. Min lo bia a. Tu nge i nih ka tia, I nu a tia" Savun kan puah ei ri rep rep chung chuan a ti a. 

Dinfela leh Diteii an inmelh zawk. "A hmel i hmu chiang em? " a pa chuan a ti vat a. 

"Chiang ve tho. A inchei rapthlak. Mahse, a hmel ţha reng" a lo ti liam leh puat a. Diteii chu ngaih ţhat lohin a khat nghal. Dinfela erawh mipa a nia, a chiái em em lo. 

"Taka Dite, naktuk kha i Û zai hun a nih kha.. Kei ka buak viau mai sia, tlai lamah lah heta chaw ei an ti bawk si. Lo tel ve thei la ka duh ania aw" Dinfela chuan a ti a. 

"Nia, mahse, rawn haw hman hram ka tum dawn nia. Eng va tihtheih a ni chuang hleinem" Diteii'n a lo ti ve a. Pi Zawmi chuan, "Kei pawh ka kal ang. Lawma hi ka ngaihthah deuh emaw a inti deuh a, kei atak pawh hian ka lo ngaihsak ţha tawk lo nen" a lo ti ve luam a. Pi Zawmi case hi a fel tawh anga ngaih a ni. Diteii te pawn an ring ngam ve deuh tawh. A tar ve deuh tawh bawk a, a hlauhawm em em an ring tawh lem lo. Drose chuan, kham pahin, "Ka kal ve awm e kei pawh. Aputea te chuan min ngai êmmm" a ti nang nang a. A pa ten school chawlh an phal dawn lo tih a hriatsa vanga chutia ti lawk sa chu a ni. A rin ang ngeiin a nuin, "School i kal ang. Kei leh i pi kan kal ang a a tawk" a lo ti chiah reng a. 

"Aih, ka kal ve duh. Entirnan; lo zai hlum ta hlauh se, a dam lai hmel hmuh ka duh alawm" a ti hlar a. A mizia hre sa vek an ni bawk a, a ţawngkam chu ngaiah an nei nge mak an ti hran lo. Pu Vanlala erawh a khi suk. 

"Kei pawh Dite, ka lo kal ve ang. In lamah Zari a awm dawn tho va, Tetea te ka thlah zawhah ka rawn tlang dawn nia" Thiangi chuan a lo ti ve bawk. 

Lawma natna kha a upat ang zelin a zual ve zel a. Damdawi ei ţha viau mah se; tawrh hleihtheih loh hun a awm ta a. Phai lam an pan zak zak hnuah brain tumor a nei tih hriat chhuah a ni leh ta zel a. La zai dam theih an beisei vangin an zai dawn a ni. Zami a fakawm, engkimah a pasal chu a ţawiawm a, a phatsan eih lo. Duati pawh a nula chu a ni ve mai a. Nula hmel ţha zetah a chhuak. Drose nen an zia a letling hlauh thung. Nu zêm, rilru nem tak, fing tak, mi pawisawi lo leh mi ţanpui nuam ti tak a ni. Zami enkawlna a fakawm takzet. An mal khalh naa an duat sual zo lo a ni ber e. 

Zan lamah hi chuan chhung inkhawm an neih zawhah an room ţheuhah an lut bo leh diak zel a. Tetea te unau erawh Diteii hian an zir tur a enpui thung. Drose erawh a room kawngka a kalh nghal hmak zel. "Nula ang ka ni tawh a. Engkim hi ka duhthlannaah dah tawh ru, min tihluiha min nawr luih chuan engmah ka thiam thei lo" a ti hmiah si a. Lehlamah lehkha hi chu tlem tal a zir ve zantin tho nen, an va enpui tawh lem lo. Privacy inzahsak hi an thupui a ni ve deuh bawk. Dinfela paw'n zu a in ngai tawh lo va. An kohhran ţhalai pawlah pawh hruaitu a ni ve ta hial mai. Diteii erawh a fate vangin a inhawlh lawr vak lo. Nu ţha nih tum tan chuan pawn lama va tal tam chi ni lo chuan.. 

"Vawiina bawihteii hmuh nu kha tu tak ni ang maw? ' mut hmunah Diteii chuan a ti sap a. 

"Hmana ru botu kha a nih i ring deuh em ni? " an pain a lo ti dam thluam a. 

"Ring deuh. Mahse, an reh rei tawh si a, tun ataka rawn lan leh chu a mak em a" a lo ti a. 

"Kan fimkhur hi a la ngai dawn chauh. Kan fanu hi kan chân nawn thei tawh lo" Dinfela'n a ti a. Diteii pawh a lo bu nghat. Inkuah rialin mutthilh zai an rel ta a. 

"Engkim ka pe che a. Engkim i nei a. Ti nge i la hlim theih loh chêu?! " Mipa lian thelhthawlh tak, hmel ţha tak chuan amah hnungchhawn zawnga ţhu hmeichhia chu a melh ran a. 

"Ka duh ber ka hmuh hma chuan ka hlim ngai lo vang" a lo ti hul hak. 

"Mahse, phuba lak hi hlimna a ni ber lo" a lo ti sup a. 

"Zodingpuii mittui a far hunah a der tel miah loin ka nui ang" a lo ti leh hmiah. 

"Hmm.. I huat chhan i sawi duh si lo, ka ngaibtuah peih lo e a. I duh duh ti rawh" titau tih hriat zetin a lo ti ngal ngal a. Room chu a chhuahsan zui nghal. Hmeichhia chu a khi sak a. Darthlalanga a hmel chu va melhin, "Hna kan chhunzawm tawh ang" a ti vawt raih a. 

"I uniform ha rawh. School i kal dawn" a nu aw ki chang fak chuan a tidanglam eih lo. 

"Putea'n min ngai alawm" a lo tihsan. 

"Vat vat, I nu Thiangi a inpeih têp a nia" Diteii biang chu a tai hlar mai. 

"Nuuu, khawngaihin, putea ka hmu duh alawm" ngenngawl zetin a lo ti. A school kal peih loh vang a ni reng si a. 

"Ni e, Dite, vawiin na nâ na chu chawl mai teh se.. Lawma pawn a ngaih ve êm kha mawle" a puin a lo ti.

"Heti zel hi in nia. Ka pa te pawh naupang ka hauh laiin inrawlh tawh suh u. In tihluhlang zo vek zel. Anih chuan vawiin chu i lo kal ve thei ang" a ti ta nge nge a. Drose chuan a nu chu a pawm chunh chung. 

Diteii car-in a pi te nen an chhuak ta a. Damdawiin an thlen chuan Duati nen an inpawm vat. A û hi a ngai ţhin a nia. Duati pawh hian a ngai tho mai. Lawma chu inzaina kawr an haktir mek a. Zami chu a zâm hmel angreng. Diteii chuan tihtur ngai ang te a ti zung zung a, Pi Zawmi'n Zami a fuih mawlh mawlh thung. Operation room-a an nawr luh dawn chuan, Drose chuan a va pan a, "Pute, hlau miah suh aw. Thi miah suh ang che. I thih vaih chuan kan inbetnaah khan i chak lo tihna a ni mai" a va ti leh hrâm! Nurse ho an lo nui tawp. Lawma paw'n chau chung chungin a rawn melh ţâwk ţâwk a. " Ka naute, i lo kal chu ka van lawm. Thi dawn lah lo ve.. Lo en reng rawh" a rawn ti tham chhal a. Diteii hnuk a lo ulh thung. Drose leh Lawma hi an inputu fuh khawp a, Ar sual huai an khawi dun ve ve a, an inbet nasa ţhin.. Duati ai mahin Drose hi a duat zawk emaw tih tur a ni. Duati pawn a thîk chuang lo. Lawma chu an nawr lut ta a. 

"Duati, i nau nen khan hei lehkha ami ang hi zuk lei lawk ru" Diteii chuan a ti a. An kal nghal. Step an zawh thla zai zau a, an zawh tawp ţêp tihin mipa leh hmeichhia an tawk a. Drose a ding chawt. Hmeichhia chu a melh vang vang a, "Nangmah i ni tiraw, nimina kan gate bula lo ding kha" a ti chawt a. Chu hmeichhia chu a nui sak. Mipa erawh a ngaihna a hriat loh hmel viau 

"Ni chiang e. Ka la rawn hmu leh ang che. " a ti dam thlap a. An inzui chho leh nghal. Drose chu Duati'n kaiin, "Hmanhmawh ang, Ateii a thinrim ang" a ti a. Drose pawn a zui ve hnuang hnuang mai. 

"Saw ngei saw Zodingpuii chu a nih saw.. A dam ve chhunga ka nun tihlim thei lotu chu" Diteii te hmuh theihna laia ding chung chuan a ti sap a. A bula ding chuan, " Engtia hmalak nge i tum? " a ti sup. 

"A fanu duatlai aţang hian bul ka ţan dawn mawle" a lo ti hul hak a. An kalsawn zui nghal. He nu Lalrinawmi hi tu nge maw a nih chiah le? Amah han chhui zui tur an awm ta mai si lo. Engvangin nge zalên taka a la vahvel theih? Diteii te chhungkaw tan chhum dum a inzar leh ţan chu a ni mai lo maw? Hmana a naute rukbo kha rukbo nawn leh a tum nge hmanraw dang hmangin a vehthlem zawk dawn? Tu nge hria.. A mah chauh lo chuan. 

Diteii te chuan an nghak ngat ngat a. Dinfela'n chanchin a rawn zawt zeuh zeuh. Duati te unau erawh an ti leh malh malh a. An sawi duhzawng a inang vak lo naa unau na nâ na chu an inkawmngeih ve em em tho. Diteii chu zun zung turin a tho va. 

A zun chhungin a ţhutna bulah chiah Lalrinawmi a rawn ţhu chat. Drose nen an inhmatawn siah mai. Pi Zawmi erawh Zami nen a piah deuhah an titi mial mial a, a rawn hmu ve lem lo. 

"Naktuk school banah. In school thlang field bulah " a ti sap a. Duati chu a lo meng phawk kher mai. Drose erawh a danglam mang lo. Diteii rawn phei mek a hmuh rualin Rinawmi chu a kal kiang zui nghal. Duati chuan, "Ateii hrilh ang" a ti a. Drose chuan, "Aih,hrilh suh.. Sawi miah suh" a lo ti chang fak. Duati paw'n a tum lui lem lo. Lawma chu a nghaktu te tan an zai rei ta hle mai. Dinfela a rawn lang ve chiah tihin an zai zo ta hram. An hlawhtling nia an sawi tak avangin an thaw huai mai. Amah Lawma erawh a la biak tlak loh a. Cabin an book a, an nawr lut ta a ni. Tlai lama a thawhpuite chaw eipui a ngai si. Diteii te nupa leh pi Zawmi te chuan an hawnsan ta phawt a. Ngaihtuahawm lutuk a ni lo bawk nen. Drose erawh zanriah ei hmana haw tura inchahin a la awm ve a. Apiteii nen an titi barh barh, Zami hian a bawl thiam riau a. Ngainat pawh an inngaina. 

"Pite, zep miah loh chuan, lehkha zir hi ka ning. Mechanic ka ni duh" a ti leh hlawl a. Apiteij bulah hian a inhrithla ve ţhin. 

"Machanic ni tur paw'n tlema zir san ve hlek chu a ngai alawm. Pawl 10 tal pass rawh. I nute pawn an hnial ţung lo vang che" a lo ti a. Duati a lo nui char char. A nau nen an ze inang lo lutuk hi a hlimpui letling. 

Duati nui a hmuh vang chuan, "Mawina pite, Au Duati hian bialpa a nei ania aw" a ti ta thut a. Duati a nui tawp chiang kher mai. "Zochhuanawm, i zak em? Min hêk ziah suh" a lo ti. An thinrim tak tak lem lo. 

"Nge i nei alawm. I bialpa kha perek a ang si" a la tizui! Zami pawh a khi ţhâ mai. Duati bialpa hi a hmel ţha lem lo naa mi fel tak a ni a. Hna nghet nei a ni bawk. Drose hian a sawisel mai pawh a ni. 

"Nangte chu bialpa pawh i la hmuh ve loh kha" Duati'n a lo ti hlar a. 

"Hmm.. Bialpa ka nei peih lo. Bakah anu sawn a phal pawh ka ring lo" a ti chuai raih. Ani leh ni lo angin a ngui vel tawp. Zami chuan, "Zirlai i la nia, high school êm pawh i la chhuak lo va, bialpa lam chu ngaihtuah rih loh tur, i nu hi chu i chhun mah mah a nih hi" a lo ti a. 

"Awii a khirh si, chhun pawh ka duh lo" a lo ti hlak. An nui leh rih. 

A nu hi tiang hian han ti ţhin mah se; a ngai ber tho zel. A nu tel lo chuan ni khat pawh a awm hleithei lo. Vawi khat Diteii hi sumdawnna vangin phaiah a zin a. Ni khatna chu a tuar thei. Ni 2-naah a nu a zuk vau ţan. "Ka ngai che" tih a hreh si, "Ka naute an harh si. Ka ning. Min hautu an awm si lo va. Ka awm thiam lo. I lo haw vat loh chuan ka naute ka vel char char ang" a zuk ti chhen a. A tum aia hmain Diteii pawh a hawn hma phah ringawt a ni. Khawl thil a mamawh apiangin a pu a bel a, eitur a mamawhin a pa. A nu hi chu engah mah a pur vak lo. Mahse, a ngai ber tih eraeh an hre vek. 

Diteii te pawh an han inbuatsaih zung zung a. Thiangi kha Tetea te an ban hma vangin Hospital a rawn tlawh ta lo law law a. A inbual fai sar hnuah lem hnih vel a va lem zuai a. Phur zetin rawng a bawl surh surh mai. Naupangho erawh in chungah an dah. An harh si. A buaithlak. 

Dinfela thawhpuite pawh an rawn lang tan a. Diteii hriat hnute pawh an awm. Saidingliani a rawn lang ve leh hlawl mai. A hmel a la paih vak lo. Mahse, tlemin a thaunta deuh. A nalh zakw emaw tih tur a ni. A smart ngaiin a la smart reng tih a hriat. A nui sâng reng a. Biak a nuam hle a ni. Diteii paw'n hman lai thil kha chu sawi chhuah ţul a ti lem lo. 

"Saii, fa engzat nge in neih ve tak? " Dinfela chuan a ti a. 

"Kan nei ta lo.. Hehe, kum khat hnuah kan inţhen leh ta mai. Mahse, ka nau te fapa hi ka awmpui a. Ka fa ang chu a ni mai" a lo ti dam thlap a. Dinfela thinlung a khawih ve zawk mai. 

"A va zia lo ve. Pasal nei leh vat rawh. I la nula alawm" Diteii chuan a lo ti ve vat a. 

"Ka tum ta vak lo. Mahse, Pathian thu thu" a lo ti a. Diteii rilru a kal thui angreng hle. 

Drose pawh a rawn haw ve, a nuin inbual turin a nawr chho nghal. A thawmhnaw hak tur pawh a dah chhuahsak leh thlap. 

A inbual pah hian a zai nghek nghek zel a, zai thiam anga inhriatna hi a nei ve roh a. A aw te chu a'n ti fâwn hlawrh hlawrh a, a naute hian a rukin, "Bengchheng thei sia" an ti ţhin. Mahse, tun ţum a inbual chu a ngawi reng mai. Kha hmeichhia a nu anga inchhal kha a mitthlaah a châm reng. A hmel ţha tak leh pian nalh tak te kha. 

"Ehee! In rawn tel theih pawh ka ring lo va, Dite, Rina te.. " Dibfela chuan a ti lawng lawng a. Diteii pawh a rawn lang vat. Dinfela thawhpui te zingah Rina nen hian an innel ve ber a. An nu Sangi nen pawh an inkawm thei fú. Kumtirah Shillongah an nu hna vangin an pem ta kha a nia. Tunah rin loh takin an lo zin a, Dinfela hian a lo sawm ve chat a ni. An chhungkuain an rawn tel thei lehnghal. 

"Kha chu khawih suh. A û in a hau ang che" Mampuia ţawng ri a hriat rual chuan Rina fapa Rinmawia chu a phu zawk. An bathlar zau zetah intih thawven tumin a tei chhuak a, Bathlar kil lamah pher chungah tv leh mini fridge a lo let bul mai. A part ţhenkhat a lo let phung bawk. Chung chu rem ţhat tuma khawih a tum lai takin Mampuia'n a lo khap a nih kha. 

"Lo kal teh, mama, i va fel ve" tiin Mampuia chu a hui a. 

"Tu nge i hming? " a ti sup a. 

"Vanlalchhanchhuaha, mahse, Mampui min ti thin" fel takin a ti a. Chutih lai tak chuan Tetea a rawn tlan chhuak nawlh, hlau hmel a pu bawk, a hnungah Drose chu a rawn lang ve zat, "Vanlalnunpui, ding rawh. Ding rawh ka ti em? Khawi lo la vat rawh" a ti tuar tuar bawk a. Tetea chu tlan zelin mampuia te bul a va thleng a, Rinmawia hnungah chuan a ding ta hle hle a. 

"Lal Tete, rawn kal rawh. Khawi ka thil kha" tih leh rawn phih a rual a. Rinmawia lah engmah hre ve hek lo, a kut lo laksain a paihsak a. "Khatin naupang an ti ngai lo" a ti nghut a. 

"Ka nau te an nia, ka duh leh ka vel ang. Lo inrawlh suh" a ti hlar a. Tetea chuan a kut rawn phar chhuakin, "Kha.. I uikawm si" a ti ţuau a. Marble lian zet, nalh zet hi a keng vâ a. Drose chuan a lo la vat. Rum zeta melhin, "Nang pawn i nei ţeuh, ka ta kher i awt zel anih kha" a lo ti leh hluk hluk. An bula ding ve reng Rinmawia nuih chu a za ta tlat. A lian ve uaih tawh si a, marble mai mai vanga chutia nula a pumpa a awm chu mak pawh a ti. A pa Dinfela fanu a ni ngei ang le.. Anu Diteii nen an inang tlat. 

"Eng nge i tih hetah" A nui hmel kha a lo hmu ni tur a ni. A aw pawh ngaihno a bei vak lo. 

"Ka tei vel mai mai.. In in hi a nuam em a" a lo ti ve mai a. Rinmawia hi Diteii aiin kum 5-in a upa. Mahse, Diteii aiin tlem chauhin a sang. 

"He lai chu ka hnathawhna hmun ania, awm ve vak ka phal hleinem" a ti leh hmak a. Huat enah pawh a en lo. Tetea leh Mampuia chu kaiin, "Hawh u, in in hi fang ang u" a ti a. An kalsan ta daih. Drose chuan an hnunglam aţanga rum zeta melhin, "I chhia nih chu" a ti zawi sap a. 

"Bawihte, lo kal teh.. " tiin a nuin a rawn kai a. An inlengte ho hmaah dintirin a fanu a hmelhriattir a. A chhuan hmel hle. Heti ang vel hi Drose chuan a ngaina ve lo mahse, a nu tihzah a hlauh vangin a nui lui ve hram hram. Rinmawia te pawh an rawn lut chiah. "Mamawi, lo kal teh.. Hei i nau a nih hi aw. Zochhuanawmi annia, mahse, Drose tiin kan ko ţhin. Bawihte, hei i û tur a nih hi Rinmawia, U mamawi i ti dawn nia" Diteii chuan a ti zung zung a. 

A rilruin, "Ka û awm lo em mai. A sual si" a ti a. A langah chuan a chibai ve mai. Rinmawia paw'n a nuih sâng mai. 

Chaw pawh an peih ta a. Naupang lamin an ei hmasa. Thiangi chawhmeh siam thiamzia hahìpin an sawi hlawm kha. Ani pawh a hlim ve kher mai. Zari salad siam pawh an fak tho. Dar 9 dawnah an ţin darh chauh. Lalrinmawia pa leh Dinfela chu muk zein an inkawm a. 

"Nia, i hriat angin kan zik hi a bul angreng a, Chhungkhat tak tak anga han belh tur an awm mai si lo. Hetah a zirna a laklawh angreng si a, hostela han dah ngawt hi zep loh chuan ka ngaih a ngam zân lo a ni. An free si a, nun insiam lai a ni si. Ka buai ru thin khawp mai" Rina chuan a ti mawlh mawlh a. Rina te hi Thingsai khua an ni a, an nu Sangi lah Thenzawl daih a ni thung. Mahse, Aizawla intawng an ni a. Rina hna vangin Aizawlah an rawn awm a, Sangi hi nurse a ni bawk. Mahse, Sangi hi Shillongah hlwwh ţha zawk hmu tura sawm a ni a, fapa hlir pathum an nei a, an nakin hun ngaibtuahin sum an la mamawh dawn chauh si a, an hnar phal ta lo a ni. Rina pawh a thawhna tur ngaihtuahsak a ni dawn tho bawk nen. Shillongah an pem thla ta kha ania.Mahse, an fapa upa ber Rinmawia hi College a kal laklawh si, hostela dah ai chuan tiin Sangi a tanga an chhungte hla ve tawh tak inah an awmtir a. A nuam a lo ti vak lo ni tur a ni. A sawi chiam lo naa miin a pate an lo hrilh a. Rina a buai ta deuh a ni. Chhungkhat laina hnai tak tak an nei si lo. 

"Thianpa i timak ka ti zawk ngawt mai. He tah a duh duh danin a awm thei reng a. Ka fapa upa ber ang a ni mai dawn a. An college lah Drose te school nen a inhnaih bawk si, an inhruai unau thei dawn a. A tha dawn lutuk.. Hetah awm rawh se.. " Dinfela chuan a ti sauh sauh a. Rina a inthlahrung viau naa Dinfela chuan a nawr et et si. Sangi leh Rinmawia chu a ko a, an han sawiho leh a. Rinmawia pawh chuan a lo hreh vak lo. Dinfela leh Diteii te nen an innèl ve deuh sa nen. A awmna hmasa ai chuan a zia daih a ring. Naupang harh zet zet leh nula â zet an awm bawk nen. A phurawm phian ang. 

Diteii'n a lo ngen ve bawk nen, Rinmawia chu a tuka rawn lut turin thu an titlu ta a ni. 

Tukţhuan an ei laiin, Dinfela'n Rinmawia chungchang chu a sawi a. "bawiteii pawh i û nen in kal thei ang, Bike a nei a. A hrana thlah zel che kha a buaithlak ve ţhin.. " a ti a. 

"Bike min lei duh lo anih kha.. " a lo ti hlar. 

"I la khalh thei chuang lo" a nuin a lo ti. 

A ner sak ringawt. "Kha pa kha a nih chuan, ka û chuang lo vang" ama hriat tawk lekin a ti sap a. 

Mahse, kha pa ngei kha a ni si a. 

Tlaia a school bang chau zeta a haw chu sitting rooma Rinmawia lo ţhu chu a hmu ta a. A meng râng viau. 

"Nangmah maw? " a ti hâw a. 

"Umm keimah. Ka nau i ni tawh" a lo ti thliam. 

"Keiman bike ka khalh zawk ang" a lo ti daih. Biak leh hman lohin in chungah a chho nghal. 

"Hmeichhe mak tak chu i nih hi a" Rinmawia a phun sup…