Drose 10

D'ROSE… (Chapter - 10)

Ziaktu : Toni Râlte

"Malsawmi chu engvanga thlang nge in nih? "Dinfela'n inthlak mawlh mawlh chungin a ti a. 

"U puia leh Sangzuala'n an vote tlat sia lawm le. A ho lutuk. Engahmah ka ngai lo" Diteii chuan a lo ti a. Mahse, a chhungrilah erawh nuam tih lohna a nei tho mai. Malsawmi ţawngkam a ngeiawm thei si. 

"Nia, i ţha ber alawm. Bakah i hnuaia thawk tur a nia, i thu thu aw" Dinfela chuan a ti a. 

"U Thiangi hi haw tawh lo se ka ti. Ka rin zawng tak a nia. Chhuah a ngaih hunah pawh hruai ve zel mai ila" Diteii chuan a ti a. 

"Ni ngawt mai. Bawihteii lah hian a ngaina mai siah. Mahse, a pa te hian an lo be ve reng sia. A ma duhthlanna a ni mai" a lo ti a. 

A ni taka, Thiangi chu a felin an in chhung boruak tinuamtu ber a ni chho tlat. A mize zangkhai leh thawveng halh chuan ngeiawm rawng a kai chuang si lo. A taimain a zam a ţha si. Eni tan tak pawh hian hlu tak a ni. An inkawmngeih chho viau lehnghal. Mahse, Dinfela hi zu a chah zauh zauh. Dinfela pawn hre thiam takin a hawnsak ve mai zel bawk. A hun kal tawha eng emaw ser siamsak a ni tawh a ni mahna le. Heti taka zu a duh ve ta mai hi. 

Bena case pawh an han rêl ţha leh ta a. Magistrate in ngun taka a ngaihtuah hnuah Bena chu a dam ta bawk a, hremna hlihsak ngawt thu awm hek lo le. Convict a ni ta. Kum a tling ve ta bawk nen, a hremna hmuh tur tlak turin Central jail-ah phurh luh a ni ta. Enkawli rilru natzia leh ţah nasatzia chu. Mahse, dan chu dan a ni miau a. Diteii te paw'n theihtawp han chhuahpui mah se; tihngaihna a awm ngang lo. Tual a that miau a, mi pakhat mai a ni si lo. Dan hnuaiah ngaihhnathiamna nen a rilru buai kha chhuanlamah an la hmang thei zawk a. Ani lah Assylum aţangin a rawn tlan chhuak ta bawk nen. Kawng dang a awm ngang lo a ni. Enkawli rilru pawh a buai viau mai. 

Diteii te pawh an film thar tur shooting an nei ţan dawn ta. Puia a hman meuh loh vangin Diteii hnuaiah an kal dawn ta chu a nia. A zãm ve khawp mai. Mahse, an lo zah der thiamin an lo hotu en thiam khawp mai. Malsawmi tih loh chuan.. An duh dan tak chuan khawchhak lam, pi pute sulhnu tarlan paha shoot an duh a. Mahse, amah Diteii ber chu nau pawm a nih miau vangin her danglam a ngai ta deuh. Aizawl khaw chhunga chan ngai deuh chu a hma lamah an shoot dawn a. Thiangi pawh Diteii ngen angin a châm thei ta. A pa te pawh Dinfela'n a biaksak a, "Hei khalama in ţul viau loh chuan amah a la tau deuh bawk nen, kan hnenah hian awm rih se kan duh khawp mai. Bakah keini pawn kan lo zilhhau ve ang a" ti zawngin a zuk bia a. Thiangi pa lahin Dinfela kha a lo ngaisang sa tawh nen, "He lamah engmah a ti ngai chuang hleinem. A duh chen chen awm rawh se,he lam chu rawn ngaihtuah suh u". alo ti thliam a. Mahse, chhungkhat pawh ni lo chutia fanute han dah tawp chu nuam a ti vak lo. Dinfela'n, "Chhung khat kan ni tawh a, nangni pawh in rawn veivah chang chuan kan hnenah zel in lo innghah kan duh ania" a ti leh khauh si a. Hnial ngaihna an hre ta lo a ni ber. Amah Thiangi'n hawn a hreh ve tumhrang si. 

"Vawiin chu ţha deuhin aw.. Ka naute" tiin Diteii chalah a fawp zauh a. Diteii pawh chuan, "Umm, nang pwwh aw" a lo ti ve sap. 

"E taka, zanriah rawn ei hman la ka duh khawp mai. Ka ţhiannu kan thawhpui Lunglei lam mi chaw eiah ka sawm si a, eirawngbawl tur kan awm dawn loh vang erawh chuan ka order mai ang. Eni te lah an bang tlai ve si a" a ti zung zung a. 

"Aw le, rawn thlen hman hram ka lo tum dawn nia" a ti a. A insiam ve nghal mawlh mawlh. 

Central Jail lam erawh Bena tan chuan khawvel thar a ni a. A ţah a chhuak ngawih ngawih. A la naupang tih hai rual ni hek lo, a luh ve chhan an han zawt sap sap a. Tual a thah thu sawi chu harsa a ti ngang mai. Mahse, a vanneih asiamin mi pakhat amah aia upa ve fê hian a voh deuh tlat a. Chu pa chu Hruaia niin a senior ber dawttu a lo ni tawh a. Tualthah vang tho va tang a lo ni. A bialnu a thah vangin. 

A thu tawh bawk a, hlauh a nei lem lo bawk nen. Bena tan chuan vantirhkoh a ni ringawt mai. A bulah a tâp ta chawt a. Hruaia chuan Bena a ngainat chhan chu a nau nen inang a tih vang a lo ni a! A nau chu a nau neihchhun a nih vangin a hmangaih a, a duat hle bawk. Mahse, a chhuak mai thei ta si lo va, a nau ai a rawn awh taah ngaiin a duat hlur mai. Tuman Bena chu an tibuai ngam ta lo. Tâng ve rau rauah a vannei ta lel mai. Hrehawm a tihna ber erawh khum ruh lutuka khumfa kara mut chu a ni. An inah duat rawn hlawhin engkim a tui leh nuam ţha ţha chhawpsak ţhin a ni si a. Ei leh inah chuan thil ei tam mi a ni lem lo bawk a, a chhel viau. An chaw dawn ngei ngei pawh a ei zawh theih loh fó vangin Hruaia a puar phah lel zel. Enkawli a ngai a, a zah ru ngawih ngawih bawk. A hmangaih duh a ring tawh lo va, phatsanin mi dang nei mah se, a dem ngam lo vang. Criminal case nei tawh chu a chhungte pawn an duhpui a ring lo hrim hrim. Ramthari kha a hua, engvanga khatia tibuai tlat nge a nih le. A hun lai kha chuan a tel lo khan a awm thei lo thawthang kha a nia. Tunah chuan rawn lang leh pawh nise; huaisen takin a lo hnar thei tawh ngei ang. 

"Bena, i kut kha a kawngah khan dah la, aw tikhan, lawk.. U Malsawm, sawti lam hawi hlek teh" Diteii chuan ţang takin a ti lauh lauh a. Sangzuala te an lo inring ran bawk. 

"Ngawi teh, heti hi chuan a nalh lo. Ka hmel a lang dawn hleinem" Malsawmi chuan a lo ti hlar a. 

"Lungngai suh. I hmelte chu a la lang dawn chauh, tun scene-ah chuan thup rih i la ngai alawm" Diteii chuan a lo ti nem thlap. Tum bâr chungin Malsawmi pawh a insiamrem ve mai. Lar a duh a, a châk bawk a. Diteii hian a tilar em ang chu. 

An break laiin Drose hnute a pe a, hnute hi a heh reuh ania. Thiangi leh Sangzuala chu an inkawmngeih phian a. Nui awr awr chungin thla te an lo va la.. 

"In naute bo lai khan ka lo kal têp a, ka khawngaih ve lutuk che u a" Diteii bula chairah chuan ţhut pahin Malsawmi chuan a ti a. 

"A lawmawm, nia, kan mangang khawp mai" a lo ti ve mai a. Amah melh kiautu a fanu chu a zuk nuih sak a. 

"A rutu khan engvanga rubo nge a nih ang le? "Malsawmi chuan a ti leh a. 

"Kan hre bik lo. A sawi duh si lo va" a lo ti. 

"Khawi maw a hnek zawh tawh kha ka lo pawm.. Ka di hlui fanu chu ka duat alawm" a ti leh kher. Diteii pawh a nui tawp. A pe ve mai a. Diteii hian duh lo a nei vak lem lo. Malsawmi pawh chu a duh ve mai, a lo chhaih thiam phian lehnghal. 

"A hmel hi a ţha ania, apa a chhun a tiraw? Umm a nui te hi a pa chiah chiah.. " a ti har har a. Diteiin a lo thlir reng. Malsawmi chu mi sual tak niin a hre lo, mahse, mahni hma a sial ve ang tih chu a ring. 

An han ţan leh ta a. A film kal phung hi a changtupa ruihhlo ngai, changtunuin a chhanchhuah dan chanchin a ni ber. Sub plot a awm zeuh zeuh bawk. 

"Cut cut cut, U Malsawm, i dialouge a buai tlat. Khawngaihin va en ţha leh mai teh.. " Diteij chuan a ti a. A thin a chhe hlur tawh. Mi dang lah an lo zei lo hlawm riau si. Malsawmi tak chu a ţha dawn viau a, mahse, a ţawng thui mah mah ţhin. Inlak zei a tum luatah. 

"Ninawm.. I va khirh reuh tak. Mi dang pawh hian an ning ngawt ang che" Malsawmi chuan a lo ti hlar a,. 

"A pawi lo a ţha ber ka duh si a ni. Tu pawh hi ka ring che u a, khawngaihin theihtawp chhuah tlang ang u" Zangkhai tak hian Diteii chuan a ti a. Malsawmi chu a tum bûr mai. A hmel ţha teh mah se; a thinchhiatzia chu a fiah angreng hle. 

"Heti reng reng chuan kan chan zawh theih pawh ka ring lo. Intithu ropui si, he laia awm te hi nang aia û deuh vek kan ni ang. Director i nih vang khan ropui ta luaah inngai suh" a ti hmarh hmarh a. Sangzuala'n, "Duhtawk teh.. Va en mai rawh" a lo ti zauh. 

"Ve che nang pawh kha. Diteii uitê i nih kha. Ka ning. Vawiin atan chuan duhtawk ang u.. Ka peih tawh lo hawn ka duh" a lo ti hmiah mai. Malsawmi chu an melh ţhap. Nasa an tiru hlawm hle. Diteii fimkhurna chu ning ve tho mah se; amah an huat phah kher lo. Ţawngkam dengkhawng a hmang ngai lo bawk a, an dawngsawng thiam vek. Malsawmi chu a rawn tel phat aţangin a inla nghal viau a, a langsar ve bawk nen. Tupawh chu a tham lo ni mai hian a lang a. Hmeichhe ţhenkhat phei chuan an ei lo ru tawh hle zawk a ni. 

"Khawngaihin, U malsawm, inbengdai rawh. Tuna kan film chan hi kan tlangzarh hun nghaktu an awm ve nual ania. A ţha thei ang bera kan zawh a ngai" Diteii chuan dawnsawn nuam deuh hian a lo ti a. 

"Changtunu ber ka nia, ka peih tawh loh chuan chawlh mai a ţha zawk ang. Ka mood a dik tawh lo laklawh. Naktukah kha lai scene kha chu ti mai ang u" a lo ti tlat! Diteii chuan sana a bih zauh. Dar 3:12 chiah chiah. Zanriah hi dar 6:30 ah an ei ţhin a. Eirawngbawl a ngai dawn lo va, zanriah ei hmain scene hnih dawn channa hun an la nei. A tan hun uiawmzia hre lo lêka a hnuaia thawk lehnghal a pasal hel ve rengtu Malsawmi ţawng duhdan chu a ngei ve ta deuh aniang e. 

"Sangzual, U puia bia la, a tira kan biak hmasak kha contract kan sign pui zawk dawn tih hrilh rawh. U Malsawm, vawiina i lo kal hah man ka pe che ang a, a lehpekah i rawn kal a ngai a tawh lo vang. A ţha em? " tiin a bag a va la nghal. Pawisa phawrhin, an inremna lehkha kha a pe let nghal bawk. Malsawmi hrilhhai chu a ding ngil ut ringawt. Diteii chu a rin ang a lo ni hauh lo. Dawih deuh leh nem reng tur hmuhin a lo hmu a, bei let ve ngam tura a ngaih loh vang leh a pawimawh ve em vangin a duh amga thil a kal mai a lo ring kha a nia. A teuh ta si lo. A ţah te lam a chhuak. 

"Chutin min ban ngawt thei lo vang. Kei hi he film-a leading role part latu ka nia, chutia min thehchhuak turin thuneihna i nei lo" a ti khur dat dat. A thinrim hle tawh tih a lang. Diteii erawh hahdam hmel zetin chairah a ţhu leh than tawh. 

"Khawngaihin kal mai rawh. Nangni ang hotu hnuaia thawk thei lo, mi zahder nachang hre lo hi kan industry-ah kan mamawh hleinem.. Mi dang movie-a lo va inlan mai ta che. I tling em em ang. Kei nen erawh kan thawk dun thei lo tihah chiang ang" a ti ta dap dap a. Malsawmi tan chuan zahna tham a ni tawh, mahse, a zak duh der lo. Zah tawrh hi a chak ve bawk nen.. Titau chungin pawisa leh lehkha chu a la a. A kal tau sawk sawk mai. Sangzuala paw'n a be eih lo. Diteii ai mahin a lo ngei zawk. A cousin mah ni se.. 

"Aw le, tunah chuan mi thar kan lak tak avangin ni 2 kan chawl leh rih mai dawn nia. A lo inbuatsaih ve theih nan.. Tunah chuan scene dang, changtunu tel ve lohna kan shoot ang. Inring ru aw" a ti ta a. An che nghal sap sap. A hun ţha hi ho mai maia khawhral a phal lo bur. 

"Kan nu te pawh an lo haw ve ţêp ang. Lo ţhu rawh aw. Ka'n inthlak lawk ang e" Tih pahin Dinfela chu in chungah a chho nghal a. 

Saii chu ngawi rengin sitting roomah a ţhu. Pi Zawmi chu an room a ţangin a lo chhuak a. Saii a lo ding vat, "Ţhu rawh ţhu rawh. Mama ţhiannu i ni ang maw? " nelawm takin a ti a. A nui sâng bawk. 

"Aw a thawhpui ka nia" a lo ti a. An inchibai a. Saii chuan Dinfela nen inang lo a ti angreng hle. A pa lamah a kal a nih a ring. 

Dinfela pawh rei awm lo in a lo chhuk ve nghal a, phone in tu emaw a be pah bawk. "Aw hei kan thleng deuh chiah, aw le, umm.. Bawihteii a fel maw.. Ummm, ka fanu a ni tlat alawm" tiin a nui hawk hawk a. An nu a be chiang. 

A nu nen chuan a han hmelhriatir ţha leh a. An pathum chuan an inkawm deuh tawp. Pi Zawmi chuan thingpui hang a va lum sak a. Boruak eng emaw awm mah se; mi hrang laka tihlan vak an tum lem lo. A lan dan mai chuan an inpawh ve hmel khawp mai. Diteii te an lo thleng a, an ri chul mai. Saii nen chuan an han inchibai a. Saii chuan hmel ţha a ti hle. Thiangi hi chu mize mak tih takah a be leh nghal bawrh bawrh, an thlen aţanga reivak loah Eni pawh a rawn thleng chawpchilh ve nghal. Pu Vanlala erawh chuan a rawn be tawh a, an hna a laklawh deuh vangin zanriah a rawn kil ve hman dawn lo a niawm e. Diteii chu a inbual vat vat a, Drose a bual bawk. Vawiina a hun tawn kha an pa bulah a sawi châk viau naa a la hun lo tih a hria. An chaw order pawh an rawn deliver ta a. A chikim zet mai. 

"Lungleia in rawn zin hunah chuan hmun dang in pan bik tur a ni lo aw" Saii chuan a ti siam siam a. Tu pawn nula fel leh smart tak a ni an tiru vek. Zawiawi ni si loin a cool raih a, a titi a zangkhai leh lawi si. Hmeichhe fing tak chu a ni ngei mai. Diteij nen pawh an inkawm thei ta viau a. 

"Dinfel, in nu hi ka hmuhna ka hre chhuak zo lo ka lo ti rilru reng a, ka hre ta, model lar tak a nih ţhin kha. Lungleiah pawh in rawn kal tawh tiraw, Dite" a ti ta hlut a

"Umm mahse, ka lar kher lo ania aw" a lo ti a. 

"Lar ve thawkhat e, chhe lo ka va ti thei tak che.. Ka nau atan ka awt thei tawp che" a lo ti a. An nui dar dar a. Pi Zawmi pawh a ţawng ve suam suam mai. Boruak hlimawm tak hnuaiah chaw hlui an kil tlang thei a. A lawmawm takzet. Zanriah eikhamah pawh Saii chu a la ţhu khawmuang a. Kawm a nuamin titi tur a hre si a. Ţhian ţha tak a ni ngei mai. Pu Vanlala lo hawn thlengin a awm a. Dar 9 dawnah Dinfela'n a va thlah ta a. 

Ngawi renga an tlan dun hnuah, "Pawi tih deuh ka nei a" Saii chuan a ti a. 

"Eng maw" a lo ti hû. 

"Kan inhmuh hun kha a fuh lo hlein ka hria. Mi pasal i ni tih ka hre zui nghal erawh a ţha. Hre lo ni ila chuan ka kherh nasa viau ang che" a ti ta mai a. Mahse, a thusawi dan leh a ţawngkauchheh a zahawm loh phah miah lo. Hmalam a melh ran bawk. 

. "A va mak awm ve" a lo ti ringawt a. 

"Nia, mak ka ti kei pawn. Pasal nei ve tur tho ka nia, ka hmuh phat che khan keimahah danglam a awm tlat, ka sawi thiam dan berin ka mamawh che. ani ber mai" a ti khalh khalh a.

"Sawi tur pawh ka hre lo" Dinfela'n a ti ringawt. 

A heh liah zauh pahin, "Nia, sawi tur pawn ka phût lo che. Tihbuai che u ka tum hek lo. Tun bak hi kan inhmuh leh pawh a rinawm tawh loh a. Mahse, mipa tam tak ka lo hmachhawn tawh. Nangmah ang hi ka la hmachhawn ngai lo. Ka theihnghilh tawh dawn lo che a nih hi" a ti ta a. 

Dinfela chuan, "Inhmuh tawh loh te i sawi, in inneihnaah pawh kan rawn kal ve ang chu, min sawm i tum lo mi? " a lo ti a. 

. "Tum chiah lo. Ka danglam phah ka hlau. Kei chu ka duh tawh chu hauh bur, neih theihna anih chuan zahna bosala che thin ka ni a. Ka lan dan ang hi ka ni bik lo annia. Chuvang chuan, inhmuh tawh loh a ţha" a ti chuai raih a. A hmel pawh hmuh theihin a ngui nghal. Dinfela chuan sawi tur a hre lo hle, a rin loh lutuka Saii'n a lo duh chu a ring pha lo êm a ni. Mahse, Malsawmi nen chuan rank khatah a dah hauh lo. Saii chuan a rilru a phawrh a ni mai a, chuta karah inhmuh tawh loh a duh zui bawk. Tihbuai a tum vang a nih lohzia a hre thiam. Tin, a hmaa Saii a lo ngaihdan, hmeichhe smart tak anga a lo ngaihna kha a zual sauh zawk. Hmangaihna hi duhthlan theih nise kan hmangaih tur hi kan thlang suau suau ang a, a hlu dawn em ni? Saii paw'n mi pasal a ni tih a hriat hmain a lo danglampui tawh a, mahse, kawppui a nei tih a hriat khan inthiarfihlim a tum nghal a ni mai. A hmangaih leh hmangaih loh chu thuhran, a che mawi lo kan ti thei hauh lo vang. Chuvangin kan dem ngawt thiang lo. Mi tu emaw duhlai hi kan va hmangaih thiang, kan lo duhin kan lo vei ru ngawih ngawih thiang. Mahse, kan duhna tiliana a kawppui nen an inkara tlakzeh kan va tum chiah hian thil dik lo kan ti a ni mai. Tu emaw rilru hliam tel a ngai tawh si a. Mahse, Saii erawh chuan chuti ang thil chu pumpelh a tum ta thung. Hmeichhe ţha lo tak zawng a ni lul lo ve. 

A thlen in an thleng a, a chhuk zui nghal. "Muttui aw. Min thlah a, ka lawm.. " a rawn ti sap a. Dinfela pawh ţha takin a mang ţha. A inkhalh hawng leh ta a. An nu bula sawi kher erawh a tum bik lo. Diteii thikthu hi a chhe sawt riau a, inhnial a peih lo. 

Mut hmunah Diteii chuan Malsawmi nen an chungchang a sawi ta a. Amah insawi thiam tum lem loin a nih dan dik tak a sawi chat chat mai. 

"A ţhat chu. A thawh rei peih ka ring lo reng a ni. Hotu hnuaia thawk chi a ni lo, pride a ngah em mai" a lo ti a. 

"Min haw ngawt ang" Diteii chuan a ti sap a. 

"Ani huat mai mai a na lo eee.. Keiin ka huat loh che chuan a tawk reng. Kei chu englai pawn i bulah ka ding dawn alawm" a lo ti a. Diteij tan hi chuan a va nuam ţhin dawn em.. 

"E taka! Naktuk chu Bena ka zuk kan ve dawn mawni ka tia. Eni hi ka hruai ang a. Kan chawl tho sia" A ti hluai a. 

"Zuk kan tak rawh. Kei ka hman meuh si lo, a lo vui tawh maithei a ni. Kan theih ang anga kan ngaihsak a ngai a nih hi" a lo ti leh thluam. 

Thu ho mai mai an sawi hnuah tui takin an muhil ta bawrh bawrh a. 

Rinawmi pawh Pu Dintluanga'n bail chhuah tumin theihtawp a chhuah ve zel a. Mahse, mi hlauhawm anga an hriat deuh vangin an la phalsak rih lo. Naute a rukbo chhan kha thil dang a nih an la ring deuh tlat. Han chhui zui dan erawh a vâng angreng. Jail lam be pawpin, Rinawmi leh Zairemmawia te chetla thlek ngun bik turin an inchah hial a. An lo chîk reng bawk. Mahse, an hmuh phak loh leh hriat loha an lo chetla a nih loh chuan, an mithmuhah chuan inhre awm pawhin an lang ngai lem lo. An lo enzui reng thei bik lo nen. 

"Zanin inkhawm ban rualin.. "Tih thu lehkhathema inziak chu Zaia chuan a chhiar mual mual a. A thaw hawk. Amah la chhuak tura a ngaih ber a rawn tan ve takah chuan a beiseina a bo tial tial a ni ber e. Mahse, a rawn be pawp ta si a, tlem chuan a beiseina mei mit tawh chu a rawn de leh deuh. Rinawmi kuta innghah ngawt bak engmah a ngaihtuah thiam meuh lo. 

Inkhawm chhung zawng chuan Rinawmi chu a va melh deuh reng. Ani lah chu fel ber ang ziazangin thusawitu a lo melh kar mai. A thinlung erawh khaknain a khat si. An bang ta hram e. Rinawmi chu a tawi deuh hrat hrat a. Kawngka bul kilah chuan a ding dat. Zaia pawh muangchuang luiin a pheikhawk chhe si lo te chu a'n siam ţha kual vel a. An chhuah vek tawh hnuah a rawn chhuak ve chauh. 

"Benjamina saw hnaih tum rawh. Ani saw kan hmanrua tur a la nih saw. Kawmngeih ang che. Engpawh ti rawh. I ţhian nihtir la a tawk" Rinawmi chuan a ti sar sar a. Warder a rawn lan tak avangin a kal zui nghal. Zaia chuan ho a va ti tak. A rin dan chuan an chhuah hun tur vel a hrilh a ring a. Tihtur dang a tuksak leh tawh. Mahse, chu nu thuawih loh chu kawng dang neiin a inhre si lo. Umm.. Ţhian siam te chu a hnehsawh ve alawm. Bena chu a huphurh lo khawp mai. A khi ta suk a. 

Zami chuan mumang mak zet a nei a, Duati nen thlanmualah an lo kal dun a, an kal pel ţêp tihin thlan vung thar ber aţang chuan Teremi hi a lo chhuak hlawl mai. "I engkim hi ka la chhuhsak dawn che. Nang pawh ka that ang che" tiin reh hlum tumin a rawn hnaih a, an tlan chhe thei ţhak lo lehnghal! Duati chu a lo rak tuar tuar a, Teremi chuan a rawn rek bet ta tlat. A thaw hrâwk hrãwk a, a dangte chu a ro nghal hulh mai. Duati a ţap tuar tuar bawk… Teremi chuanna rawn rek nghet zel a, a tal aih aih mai. A intal harh ta hlawl. Mahse, rapthlak ti lutukin a meng bial kâwk. A pasal, Lawmzuala ngei mai chuan a lo rek reng mai. Duati chuan a pa kut chu laksawn tumin ţap chungin a lo pawt ve ngat ngat bawk. Zami chu a hamhaih atalângin chet ngaihna pawh a hre lo. A khawhmuh a thim tial tial a, bed sheet chu a ţham tâwn tâwn.. " pa, nu hi thlah rawh. Khawngaih takin, anu tel lo chuan ka awm thei lo" Duati ţawng ri chu hla deuh aţangin a hre vau vau. Mahse, a reh dûk. A hrâwk chu a zang huai hian a hria a. Peih leh peih lova a men diar diar chuan, Lawma'n maktih hmel zeta a lo melh reng chu a han hmu. 

"Zami, zamte, engthil nge ka tih tak? Ni lo, eng nge ka tih hi" Lawma chuan a ti ta mawlh mawlh a. Chhuatah a chhuk thla, a vei ta nghut nghut a. 

"Duati, tui min lo lak mai" Zami aw chu a ri chang chang. 

Tui chu a in khawlh khawlh a. Lawma chevel chu a melh pah ran bawk. Thil hriat chhuah a nei. A damdawi a nghei! Ni e, Drose bo nen, boruak danginna rawn nangching ta si a. Amah Lawma lah a natna a lang chhuak ta vak si lo nen, a lo ngaihtha ve ringawt a. Zami lah a lo ngaihsam ve deuh nge damdawi lam a lo hre chang tawh miah lo. Kar khat dawn damdawi a ei tawh lo a lo ni. A inbeng kang a, zawi zeta ţhu chhuakin, "U Lawm, ka thiam loh a ni. Engmah tihsual i nei lo. Damdawi i nghei vang a nih kha.. Tunah ei nghal rawh aw" tiin damdawi chu a va la a, Lawma a pe nghal. A lo ei ve mai. Duati hlau thlabar chu a kuah a, "Bawihte, engmah hlauh tur. aawm lo aw. Apa hian damdawi a ei theihnghilh a, chuvang a nih kha" tiin a hnem a, Duati erawh a khur ru zawih zawih mai. Lawma sawi leh danin Zami chu Sanga laka uire anga hriatna a nei tlat a, a zeldin chho zel a. Sanga'n amah a huatzia te ngaihtuah kai zelin an lo hetih vang a lo nih hi tiin kar khat chhung deuhthaw kha rilru hrehawm reng rengin hun a lo hmang a niawm e. Zanah khan a mumangah a lo mang phan ta kher bawk si nen, a insum zo lo chu Zami thah a tum ta mai a ni. A chhungrilah amah nawr et et tu a awm bawk si nen. Pawi a tiin hrehawm a ti takzet. 

Zami chuan, "Ka chhiat ber lai leh ka vahvaih lai pawha min tuamhlawma min khawngaihtu hi ka damchhungin ka phatsan lo vang che. U Lawm, i nupui ka ni reng ang" tiin muthmunah Duati nen a kuah a. 

"Zamte, min thunun zel rawh aw. I kutah ka innghat pumhlum tawh ania. Engmah ka ni tawh si lo.. " Lawma chuan a lo ti thung. Duati thakhur pawh a reh ve tial tial a. Lawma'n ngaihdam a dil mawlh mawlh. Apa chu a hma angin a hmangaihin a ngaina leh thei ang em tih erawh chunglamin a hria ang chu.. 

Puia inah an ţhianhoin chaw an eikhawm dawn a. Hetia rawt zeuh zeuh hi a ngai an ti deuh aniang e. Sangzuala leh Thiangi pawh an tel ve. Thiangi hi chu Drose vangin hruai tel loh theih loh a ni ve bawk a. Baby pawh a rawn tel dawn. Puia chuan sawm suh u a ti naa a ţang na lo êm a. An sawm tho. Baby chuan a duh lo viau a, a ţang nasa. Mahse, Ditei'n, "Baby, ngaihtuah rawh. Eng thilah pawh hmeichhe chan hi chu a chhe zawk a ni châwk zel ania. U puia hian thil a tisual a, kan hria, kan ţan reng reng lo. Mahse, a lo la hmangaihzia che chu picnic aţang pawh khan a hriat. A tisualtu zawk anih vangin i hnena han tlawma inchhir anga lan kha mipa a nihna angin a tlawmngai a, a rukin a inchhir tih ka hria. Nang pawn i la hmangaih, tihian in mo te pahnih leh an fate nnen in awmho dul dul a, nakinah neuh neuh a la awm dawn. Chutah chuan i nuta te hian an nupui fanaute an ţan zawk ang. A nih dan tur pawh a ni ve bawk a. I chan hi a chhe zel dawn ania.. Chuvangin i dinhmun hre reng chungin ngaidamtu nih hi hreh lo hram rawh" a ti ta hmiah a. 

"Awii i tawng ve lo va i hrethiam lo anih kha. A bialnu nen min runluih dan zawng zawng kha" a lo ti hlar a. 

"Nia, a hrehawm dawn tih ka hria. Ka tawn atan pawh ka duh lo. Ka hrethiam che. Mahse, U Puia pawh a inchhir mek tawh a. Kan damchhung hian kan laka tisualtute lakah vawi khat chance pek hi chu kan mihringpui an nihnaah a ţul ve lo maw? I theih thlawt loh chuan ka tilui thei lo che. Mahse, kei chu i dinhmun ngaibtuah hian innei leh ula ka duh em em a ni" a ti leh a. Baby paw'n a dinhmun a han ngaihtuah, Diteii sawi chu dikin a hria. Mahse, a thinlung taka Puia ngaihdam erawh harsa a la ti rih. Engoawhnise, hunin a la thawidam ve mai ang em? Hriat va ni suh. Ţhiante an zahawm e tiin a rawn tel ve ta hram a ni. 

Ui an talh a. An ri ve laih laih mai. Naupangho nen an ni nuai bawk si. Nauoangho chu in chung roomah an infiamtir ta daih a. Mipa lamin uisa ei huaina an lo lem ve duh nen. An in tam chuang lo va. Hmeichhe hoin lungrual takin rawng an bawl a. An ri hlut mai. 

Zanriah ei hma si hun awlah an thu khawm dal a. Truth or dare khelh an rawt ta tlat. A va naupangchhia tak. An thu kual pap a, bottle chu Mike'an an tivir cher cher a. Chuti ang chuan zawhna maksak zet zet inzawtin an nui dar dar reng mai.

Dinfela'n Puia a zawh hun a thleng ta chat. A aw a thian kharh kharh a. 

"Puia, Baby hi ţhen hlen i tum em? ". ati ta khauh mai le. Boruak a reh dûk. Puia lam an hawi ţhap. Baby erawh awmngaihna a hre mang lo. Puia pek chuan, "Tum ila nupui ka nei daih tawh ang. Zaninah hian Baby leh kan fate chu hetah an riak ang a, naktukah an bungrua kan va la ang" a ti ta mai. Kut an beng dar dar a, Baby lai leh lawm ru tho bawk si chu a khi a khi ringawt. Lawm deuh anga lan a hreh si,. 

Thiangi'n Baby a zawt ve leh ta. 

"Baby, Puia rawtna kha i pawm em? " a ti ta mai.. Chhei le.. Baby chuan a chil a lem khalh. An melh ţhup bawk si. 

"Fate pain an tih miau chuan… hehe.. " a ti ringawt. Mahse, Puia tan chuan a ring viau mai. A tho lawk a, Baby chu a va fawp ta chut. An lo rak teng tung a. An hlimna chu a kim titih ta. Diteii hmel pawh a nung sar mai. Nupa hlim tak ni se a duh takzet a ni. 

Ditei'n Bena zuk kan tum ni kha Eni'n test a neih hun a nih vangin hruai ve a duh si. A tuk lehah an zuk kan ta a. Bena chu an hmuh tum aiin a lo ţha daih. A lo mum kâng mai. Eni avang chuan a lai deuh a, a inthlahrung ngawih ngwih. 

. "Theihtawp kan chhuah zel a nia aw. I chhuak har lo vang. Bail che an phal vat ka ring" Diteii chuan a ti a. 

"Nia, ka nu pawn a sawi a. Mahse, a zahthlak. Tihian ka tang reng zawk mai ang. A hrehawm chuang loh. Lo chhuak pawh ni ila, miin min hmu mak tawh dawn tho. Mi hmuhsit nih ai chuan heta misual rual an tihte bula awm hi ka tan chuan a hahdamthlak zawk.. Bakah Ka duh ber ka nei thei dawn chuang lo" Eni melh vawng vawng pah chuan a ti ta a. Diteii chuan a lainat kher mai. 

Eni chuan zak si, mahse, sawi duh nei siin Bena chu a lo melh ve reng. Diteii chuan hnawksak nih a hlau a, chhuanlam zawngin a kal kiansan deuh a. 

"Ka lo nghak reng ang che ka phatsan miah lo vang che" Eni'n zawi sapa a tih chu Bena tan chuan rimawi tawp thang a ni hial awm e. 

. "Aa.. Miin an hmuhsit phah ang che. I chhungte pawn min duh lo vang. Kei aia tha i phu. Mipa dang i lo nei anih pawhin ka dem miah lo che ania, min vengthawng suh aw" A ti a. 

"Chuti ang hmeichhia ka ni lo. I lo en tawp dawn nia. Mahse. Thil ei tha la, inenkawl tha rawh aw. I lo chhuah veleh thil ka leisak ang che" Naupangchhia takin a lo ti a. Bena chuan a kuah chak takzet. Diteii a rawn thu leh tawh a. 

"U zaia nen in inhmu ngai em? Chuan bawihteii rutu pawh kha a lo luh ve kha" a ti nghal a. 

"U Zaia chuan min tlawn tawp. Min lo be reng zel. Ka be chhe chuang lo. Drose rutu hi chiang tak pawn ka la hmu lo. A inkal pawh theih si loh a" Bena chuan a lo ti a. 

"U Zaia chu hnaih miah suh. Hlat tum zel ang che. An fing sia, engtin emaw tih che an tum aniang. Hnaih miah suh" Diteii chuan a lo ti hmiah mai. 

"Nia, ka ngainat chi a ni lo hrim hrim alawm.. " a lo ti ve a. Inkan hun a tawp zui ta bawk nen, Inhmu leh vat tura inthlah chungin an inţhen leh ta a. 

"Ka thleng tawh aw. Ka va ngai che em.. Ni lo, ka sawi loh tur ka sawi a ni. Biak loh che hi a har sia, min block mai rawh" Saidingliani msg chu Diteii chuan makti zetin a chhiar. An pa inbual hlanin Application pakhat inthawn a tumna lamah an pa phone chu a check sak ve mai mai a. Malsawmi msg phei chu a open duh lo. A rin loh lutuka Saii msg a hmu ta chu engtin emaw a awm. An pa chuan, "Okay, inenkawltha rawh aw. Inblock kher a ngai hleinem" tiin a lo reply. Saii'n a la seen lo thung. 

Saii nungchang zawng zawng nen inhmeh lo a ti kher mai. Mahse, thil fiah hmaa nat lawka lo inhambuai chiam hi mahni inhremna a ni tih a hre tawh a. An pa chu a ringhlel duh lo. Nat pawh a na lem lo, mak erawh a ti.. 

Hun a kal ve zel a. Rin aiin a liam chak. Puia te pawh an innei fel leh ta. An ţhianho lawm a kim ta viau. Drose pawh a ţhanglian ve zel a. A nulat hunah eng mi tak rawn ni ang maw? Bena, Rinawmi, Zairemmawia an pathumin jail rûn an la bel a. Tibuaitu nei loin Diteii te nupa pawn hun an hmang chho ve thei ta. Saii paw'n pasal a nei ta a ni ngei ang. Malsawmi lah Shillongah a nuteii te bulah awmin, Diteii tan a hnawksak ta vak lo. A beidawng ta pawh aniang e. 

Drose-in kum 3 a tling tihin Bena tih loh Rinawmi leh Zairemmawia te chuan jail an rawn chhuahsan a. Mahse, an rawn lawr miah lo. Tum dang neiin kawng dang an zawh ta nge hriat va ni suh. 

Drose, Zochhuanawmi'n kum 14 a rawn hmang ve ta. Nau pahnih a nei der tawh. A naute chu mipa ve ve niin, Phir an ni. Fa dang nei leh chu Doctor ten an phalsak loh vangin Diteii pawh a insiam ta a. Drose leh a naute chu kum 7 zetin an inthlau nghe nghe. Diteii pawh a nutling a ni ve ta. Khang kum chhung zawng khan buaina leh harsatna neuh neuh chu an tawk lo bik lo. Mahse, chhungkuain an ţangrual a, an hneh mai ţhin. Pi Zawmi hriselna pawh a rawb kang chho a, mahse, a lang tar ve ta deuh. Pu Vanlala phei chu hnaah a kal ngai tawh lo. A sumdawnna chu a mo, a fanu ni bawk Diteiin a khawih ta vek a. Dinfela pawh kaisang chho zelin, a institution pawh mizorama lian ber a ni tawh. 

"Bawihte, khatin awm tawh suh. Ti nge hetia i awm? " anuin a rawn ti lang lang. A pu motor dah ţawl tawh hnuai aţanga rawn tawlh chhuah pahin, "Ka siam ţha dawn ka tih kha" a ti bung nghat a. 

"Thingpui rawn in rawh.. " a nuin a rawn ti leh. 

A naute pahnih pawna infiam mek te pawm luh pah chuan, "infiamna kan ţan leh ang" a ti sap a.