D Rose 6

D' ROSE… (Chapter - 6)

Ziaktu : Toni Rãlte

"A hming i sa thawt thawt a, ka phuah ve duh asin" Diteii'n anpa bulah a ti tân tân a. 

"Neih leh hunah i phuah ve mai dawn nia" a lo tih san. An fanu chu an en ning thei lo a ni ber e. A hmel ţha si.. Sam erawh a nei meuh lo. Kar khat hnuah Diteii pawh a chhuak ve thei ta a. A hawn tuk tlaiah chhungkhat hoin chaw an ei khawm. Lawma te pawh an rawn tel thei a. Pu Vanlala unau neihchhun, a dam awm chhun te chhungkua nen. An hlim ve dar dar khawp mai. Duati lahin a nau chu a en ning thei thlawt lo. A chul deuh reng a. A tiharh leh nge nge ţhin. 

Zaia pawh a la fel thar thar viau. Mahse, rilru nawm lohna riau a nei tih en chîk tan chuan a hriat theih. Ruati pawn a chhan a zawt tawh. Mahse, a la sawi thei rih tlat lo. Chhungkua an lo buaiin an lo chhangchhe ve rih bawk nen. Ruati pawh amah chauh a lo ni bawk nen, a buai ve riau mai. An chaw ei khawm niah erawh Zâmi'n a pui thei a, a zia tak a la awm. Awmpui pakhat chu lak belh leh a ngai dawn a ni. Pi Zawmi lah a nerve ţha lo a chhuak leh si a, a che hleithei der lo.

Tukţhuan an kil laiin Zaia chuan, "Awmpui hi pakhat chu lak belh a ţha lo maw? Diteii leh ka nu an che hlei thei si lo va, Ruati hi a hah riauin ka hria" a ti a. 

"Nia, keipawh ka lo ngaihtuah mêk a. Nang man i lo zawng thei mai ang em le.. Kei ka buai ţhin sia" Dinfela chuan a lo ti var a. Ţha an ti tlang a nih hmel. 

"Chuan, vawiin chu min rawn zui tawh la, hna i khawih loh chuan nakinah i bil lutuk ang e" Pu Vanlala chuan Zaia chu a melh a. 

"Umm nia, zui tawh ang che. Mahse, ka nileng hman lo maithei aw. Chawhnu lamah kalna tur ka nei a" a ti a. 

Pu Vanlala hian a mumang kha a hrereng, Zaia pawh a chîk ru ve reng mai. Mahse, Diteii nau neih hlim chhawnah kha chuan an buai ve deuh bakah amah Zaia hi a chhuak deuh reng a, a kalna a sawi ngai bawk si lo. Diteii a lo chhuak ta bawk a; tunah chuan chîk zawka beih leh a ngai tawh dawn a ni. A rinhlelhna lah a zual telh telh bawk. 

"U Lawm, Enteh, Duati lemziah hi' Zami chuan an pa chu a hmuhtir a. Duati chuan thiam lem lo tak hian milem a lo siam a. An chhungkaw lem a ni. Mahse, chu chu an mit latu ber a ni lo. A hnuaiah hawrawp chhe zeta, "Khaw nge a nu tak tak leh apa tak tak hi an awm le? " tih thu a ziah chuan an thinlung a khawih che tlat. 

"Duati hi engkim hrilh vek chi a ni mai lo maw? " Lawma chuan a ti ta a. 

"A la naupang lu deuh lo maw? " Zami chuan rilru hah hmel zetin a ti a. 

"Mahse, kan rin aiin a fing si anih hi.. Hrilh ila a ţhat ka ring" Lawma chuan a ti a. Zami pawh chuan kawng dang an nei tawhin a hre lo bawk a. Duati rawn haw chu a thlak zawhah thingpui a intir a. 

" pa, ngati nge i van lo haw hma" Duati chuan a ti a. 

"Nia vawiin chu ka chawl alawm.. Bawihte, thil hrilh tur che ka nei a. Ngun deuhin lo ngaithla rawh aw" a ti a. Duati chu a ţha ţha sauh sauh a. 

"Ih maw, Duati, keimahni hi i nu leh pa tak tak kan ni lo va. I nu chu ka û a nia, Chuan thla 7 lek i nih laiin a boral a, chumi hnu lawkah i pa pawh a boral ve leh ta a. Chuvang chuan kan bulah i awm ta a ni. Tunah chuan i nu leh pa kan ni tawh a. Mi dang tumah nu leh pa dang i nei tawh lo aw.. I hrethiam em? " dimdawih deuh hian a ti ta dap dap a. Duati mitmeng lian kel kawl chuan a nu leh pate chu a melh tawn ralh ralh a. 

"Umm.. " a ti ringawt a. 

Zami chuan, "Bawihte, nangmah lo chu neih kan nei lo, tin, nang pawn kei ni aia hmangaihtu che i nei dawn lo bawk. Nangmah chiah hi kan fa neihchhun i ni tih hria la, fel takin awm rawh aw" a ti a. A fanu chu a va kuah bawk. 

"Nu, nangmah lo nu neih ka duh lo" a kum ngaihtuah aia puitling hian a ti ta reuh a. Lawma te nupa hnuk a ulh khawp mai. Mhase, anmahni uap rengtu, an thin titâwt rengtu kha a bo ta bawk a. Thawven khat chuan an thawveng ta e. 

Zaia phone a ri ral ral a, "Aw hello" a ti puat a. 

"I ti tawh em" a rawn ti nem thlap a. A ner sawk. 

"Rokhawlhna ka nei zel. Niminah lah ka tihna turah ka hmelhriat an lo awm sia, ka ngam leh lo va. Vawiinah va tih ngei ka tum aw" a ti ve mai a. A hmai chu a thim deuh mâk mai. A mood a fuh chiah lo tih a lang. 

"Aw a ţhat chu.. Chanchin min lo hrilh leh dawn nia" a rawn ti a. Phone a dah nghal. 

Kawngka bula Ruati lo ding reng chu a va melh zawk a, "Min enthla law? " a ti hmuk a. 

"Awmpui chu i la hmu lo mi? "Hul hak hian Ruati chuan a ti a. 

"Hmu lo. Vawiinah ka lo zawng leh ang" a ti a. A inthlak nghal bawk. 

"I awmdan hi ka hrethiam lo a ni. Ti nge hetia i awm tlat le? " Ruati chuan mangan hmel fê hian a ti a. 

"Nakinah ka la hrilhfiah vek ang che.. Tunah chuan lo nghak ve rih la" a ti a. A aw pawh a nelawm ta deuh. 

"Aw le" a ti hmak a. In hnuaiah a chhuk zui nghal hmawk hmawk. A beisei dan angin engmah a thleng lo, A beisei dan chuan Heta Zaia a rawn awm takah chuan an innei vat ang a, in leh lo an rochun nghal ang a, khawsak pangngai takin an khawsa ve ang tiin. Mahse, khami zan hmeichhe pakhatin a lo call-a a tuka an va inhmuh aţang khan Zaia awmdan a danglam vek. A bialnu ang pawn a en tawh lo ni berin a hria. Han khawih leh han kuah tih te a nei ngai tawh lo va, a roomah a ko chho ngai tawh hek lo. Zaia chuan a phatsan ta niin a ngai a, a lo puih vang khan a inchhir ţan mêk tawh a ni. 

"Ka Drosetê, hmel ţhate, i nu tih lohah chuan ka hmeichhe duh ber i ni.. "Tiin a fanu chu a fawp kual dan dan a. Diteii inbual zo chuan a nuih tawp. A fanu a atchilh lutuk hi a thîk lek lek hial. Zanah te hian a buaipui ve hman mang lo, Dinfela hian thawh phan pawh nei loin a buaipui nghal mawp mawp zel a. Amah lah nau han khawih vel a zei tehchiam lo bawk nen, a leh awl phian mai. 

"Vawiin chu Au Lawma te inah ka zuk lenpui ve teh ang. U Zâmi'n a sawi reng a" Diteij chuan a ti a. 

"A hritlâng ange aw" a lo ti. Diteii'n a ner khum tawp. 

"Tlang hrileng te hi chu a kai tur alawm.. Naute uluk leh lutuk chu an hrisel thei lo an tia lawm.. Em em che hian" a ti a. Dinfela lah chuan, "A la ţawng thei si lo va, a pum te hi na ta se, engtin nge niang le" a lo ti a. 

"I va han over tak" an nuin a tih chiam pawh chu engah teh vak a ngai lo. A fanu chu a neihchhun a ni tlat. 

"I thisen test chu engvanga duh nge i nih le..? "A hmaa counsellor chuan a ti fiah kâk a. A nu tê viau naa a zahawm ru riau. 

Zaia chuan a hmai a tuai pâwk a, "Ka sex hmanpui hi a positive a ni" a ti ta a. 

Counselling an han inpe malh malh a. Zaia lakah awmzia a awm lutuk tawh lo. Kha chen kha mut mawh hnar mawhah a lo nei tawh a, a lo Positve a nih pawhin huaisen taka hmachhawn a tum tawp tawh a ni. Tin, a positive a ring bawk. A tihchian nan a test chauh zawk a ni. A chanchin chu muangchangin a sawi ta a. 

"Ka ţhian pakhat hian eizawnna mumal nei lo va ka awm chu min khawngaih deuh nge, 'Hna nuam tak, hlawh ţha bawk si i duh em? " min ti a. Ka lo lawm viau mai. A tawi zawngin sawi ila, ka hna chu hna ril tak, tlangzarh lung lung chi a lo ni hauh lo mai a. Khawpui mi hausa nu ho, an pasal te duhkhawp lo ho mutpui hi a lo ni a! Ka nuih a za angreng hle. Ka hriat tirh chuan. Mahse, chuti ang hnaa inhnamhnawih ho min han hrilh takah chuan ka ngai thutak ta viau a, ka lo ralkhat hriat ve te pawh an tel nuk mai. Tichuan, ka hna hmasa ber ka thawk ta a. Aizawl mi hausa ho lo hausak zia hi aw.. Sum hmanna tur hi an hre hlawl lo ni berin ka hria. 

Kei chuan hmeichhe chi hrang hrang mutpui ka duh ve lem lo. Hmeichhe pathum mutpui bik ka nei a. An pasal te eiruk zarah hlawh chhete ka lo nei ve thin anih ber chu. Thla tam ka thawh hnu chuan kan inpawh ţhain kan innel tawh viau a. An duh hunah min rawn ko mai a, a tlangpuiin an inah kan inhmu ţhin. Eng emaw chhuanlam hmang ten. Hotelah hian vawihnih khat bak ka la hmu lo. An pasal te awm loh lai a ni tlangpui a. Lehlamah inţhen ai chuan tiin uire an thlang zawk a ni mai. A dik lo tih hre mah ila, thil hrehawm zawk zawk a lo ni lem lo bawk a, hlawh ka hmu ţha a, thil eng emaw min leisak fó bawk nen, tiang chuan nuam ve pangngaiin ka awm ta a. 

Mahse, ka pa ka hmu chhuak ta thut si a. Ka pa inah ka awm ta a. Ka sumdawnna chu sim ka duh ta a ni. Min lo koh pawhin ka sawi mai zel a. An tum lui bik lo. Tihmualpho kher erawh ka tum bik lo. Mahse, ka ngainat ber pakhat chuan min hmuh a duh thu a sawi ta a. Ka va hmu ta a. In mutpui lam a lang ta lo. Ani chuan an pa rilphir an zaina lamah a thisen an test a, Hiv hrik an hmuh thu a lo sawi ta mai a. Ani pawh chu an lo test ve nghal thu leh amah pawh a positive thu a sawi a. Kei chu ka fihlim bik a rin loh thu leh in test ve tura min duh thu a lo sawi ta a ni. Ka sumdawnna kha tenawmin rapthlak viau mah se, He natna hi ka lo ngaihtuah ngai miah lo. Kai ve thei turah pawh ka lo indah lo va. Mahse, min chenchilh ta chu a nih hi..," tiin

Zaia inpuanna hi a rapthlak ngat ngat khawp mai. Thil awm thei leh ni tur pawha kan ngaihruat thiam loh kha a tak ngei a lo ni tlat si. A rin ang chiahin a lo postive ta chiah a. A rinsa a nih vangin a ţhawng em em lo. Mahse, kaihhnawih a va ngah tehlul êm. Amah ngei pawn tu hnen aţanga a kai nge tih a hre thei si lo, Kha a mutpui ţhin pasal aţanga a kai pawh nise, hmeichhe pahnih a la mutpui ţhin chèu. An ni khan an pasal te an kai ve ngei ang a. An pasal te lah sex-ah an fihlim lo nasa si, nula naupang tete nalh tak tak han fawrpui mai an uar si a. A va darh nasa dawn êm.. 

Condoms hman kha ţul a lo ti lo va, fiamthu deuhin, "A nuam lo em mai, a kawr chhanah chuan" lo ti ţhin a ni. A ngaihţhatna chuan kawng hlauhawm zawkah a hruai lut ta chu a ni si a. Ruati ngei pawn a kai tawh ngei ang le. CD an hmang ngai der si lo.. Mi tam tak ngaih dan hi a mak fô! Condom hi HIV lak aţanga him na atana hman ai mah chuan, nau pai loh nana hmang hi an tam zawk em mawni aw tih tur a ni. Hei hi kan âtna lai tak pawh a ni. Thil a lo pawi zo vek tawh ţhin si a. 

A hmeichhe mutpui tawhte chu msgin thil awmzia a hrilh ta vek a. Pawi a ti ve khawp mai. 

"Dite, Drose hi a thawk dan a dik lo tlatin ka hria. Enteh, a thin zawn hi a khuar dûk mai" Zami chuan a naute pawm lai chu a chul kual a. Diteii chuan a rawn en ve vat. A thaw sâk sâk a, mahse, a thaw chu a sak tlat hian a lang. A thawk zawng chuan a thin zawn chu a khuar dûk dûk a. An ngaih a ţha ta lo tawp mai. Hmanhmawh deuhin a hawnpui a, anu a pun nghal. A nu pawh chuan thil dik lo awm tlatin a hre ve. Naute erawh a ţap miah si lo. Dinfela a va bia a, damdawiia an kalpui thu te.. A rawn hlauthawng ngang mai. A rang arangin a rawn thleng phei ve nghal vat reng a. Doctor in a han en chuan, 'Septicemia' a lo ni reng mai. Dinfela hmel chu hmuh theih khawpin a dur nghal. Mawhpuh tur chu awm se a khawih hrep duh hial ang. Naute pawh an admit zui ta bawk a. Lehlamah an kalpui hmaa a zia tak a la awm e. 

"Hello.. Aw.. Ka ţawng i hre thei em? Lungzo khaw vcp a ni em aw? " Pu Vanlala chuan a ti a. Lehlam ami lah chuan a ţawng a hre ţha thei lo nge a rawn hello nghek nghek ringawt. A off a, a call ţha leh ta a. 

An inbe thei ta hram e. 

"Ka rawn biak nachhan che chu, thil zawh che ka duh deuh a mawle.. Kum 30 vel liam taa ami daih a nia. Tlanmawii i hre ngai em? Apa chu Lianthanga a nia.. " Pu Vanlala chuan a ti a. 

A reh deuh vang vang hnuah, "Tlanmawii chu ka hria e, kan aia û hlek a nia, eng nge ni ta? " a rawn ti a. Khaw khat vcp a ni bawk a, biak a nuam viau mai. 

"A boral tawh ni khan ka lo hria a.. "

"Aw boral daih tawh e.. "

"Anih a fapa kha a la dam ve em? Fapa kha a nei a ni lawm ni khah? " Pu vanlala chuan a'n vehthlem ţan a. 

"Ee.. A fapa kha maw, A lainatawm reuh asin. A nu boral hnu khan a putea te inah a awm a. A rethei si, mahse, a vanduai nge vannei pawh ka hre lo, an lui kalnaah a chesual a, a nu thih aţanga kum 3naah a boral ve ta a nih kha" a rawn ti ta a. Pu Vanlala a thaw hawk. 

"Engtia chesual nge" inpetruh chungin a ti a. 

"Tuiah a tla a, tui len lai a lo ni kher nen, a ruang pawh kan zawng rei angreng alawm.. Mahse, ni 4na velah kan hmu ta a. A thi ropui teh asin" a rawn ti a. 

"A lawmawm e ka hriat duhte min hrilh a. Ka'n insawi ange, Tlanmawii fapa pa kha ka nia. Ka fa a pai tih hre miah loin hei chen ka lo awm a. Hmanni deuh khan ka hre chhuak a, ka rawn ngaihven ta a nih hi. A zia lo hle mai.. " Pu Vanlala chuan a ti ta nge nge a. 

"Anih chu mawle, a zia lo hle mai. Amah Tlanmawii tak pawh kha a khawngaihthlak, a dam rei lo hlauh zawk a.. An lainatawm nufa a nih kha a" a rawn ti ve a. 

"Anih leh kan inzawt ta sa sa, Zairemmawia i hre ngai em? In khuaah khan. Tlangval kum 30-34 bawr vel tur" a ti leh a. 

"Zairemmawia.. Ka van hre teuh êm.. Hman deuhah kan Zairemmawia kha chu a nih hmel si loh a" a rawn ti a. 

"I hriat chu eng ang mi nge ni reng reng.. " dilchhut zet hian a ti ta a. 

"Aa.. Tlanmawii nuţapa fapa a nia, mahse, a sual hma a. A chhungte a tirethei khawp a, Tlanmawii fapa chetsual ţum pawh khan amah nen hian ania luiah khan an kal ni. A nu leh pate a tirilru hah ţhin khawp a, engtik kum nge ni ta ka hre lo, khami kum khan khua a chhuahsan ta daih a. Vawi hnih vel chu a rawn haw. Chubak chu a chin ka hre ta lo a ni" a rawn ti ta a. Pu Vanlala lawm lutuk chu a phi chung mai. 

"Aw a lawmawm lutuk e. Ka lawm takzet e aw. Ka la rawn be thin ang che. I rawn zin hunah pawh mjn rawn zawng chhuak dawn nia" tiin a adress te a hrilh vek a. An thusawi chu tuma bula sawi lo turin a ngen bawk a. Phone an dah ta rih. Thawven khat chuan a thawveng deuh ta e. Ukil hmuh vat a ngai ta. 

"Ka nautê hi aw.. Bang tawh rawh le.. Akhaih.. Khatin an ţap vak vak ngai lo" tiin Diteij chuan a awi hlah hlah a. A taksaa damdawi chi hrang hrang thun luh a nih tak fôah chuan a taksa chuan zo hek lo, a cher ţhiak a, a tlei lo chho ta viau bawk. An nupain an vil chawt mai a ni. Dinfela lah a hnaah rilru pe thei hek suh. 

Chutia an inawih hnûp hnûp lai chuan Malsawmi leh a ţhiannu an rawn lang ve hlawl mai. An beisei lo teh asin aw. 

"A zia lo em mai. In lo dam lo reng a. Dina pawh min lo hrilh ve tur a nia" a ti nghal bawrh bawrh a. Diteii te tan huatna tur engmah awm lo angin a khawsa thiam. 

"Nia ka lo hamhaih deuh a ni. Bakah na chhia em em kan ni lo bawk nen" a lo ti ve mai a.

"Naute a la ni bawk sia, eitur pawh kan rawn lei lo.. Khawi maw ka lo pawm ve chhin" tih leh Diteii kut aţanga lak thlak a rual nghal a. Lo phal loh chiam kha dikin hre hek lo. A hahin a chau ve tawh bawk nen.. A pe ta nge nge a. Zei zet hian a awi hliau hliau a, Drose chu a chhing ta diar diar mai. 

"In nu hian nau khawih a la zei vak lo a nih hi… pro-in kan khawih chuan a muhil siai siai mai alawm" a ti a. A nui bawk. Diteii mu tlem, thinchhe bawk si chu a tùm bûr mai. 

"Nia a zei vak lo. Mahse, theihtawp a chhuah ve ania" Dinfela chuan a lo ti a. An nu thlavang chu a la hauhsak ve ţang ţang mai. Naute chu khumah an mut a. A muhil tui reuh hle. 

"Hawh, thil ei teh ang. Kha i ei tlem anih kha a hriat reng, i cher kuam alawm.. Diteii'n naute lo awmpui se.. Lo kal rawh" Tiin Dinfela a tur tho nghal. Diteii erawh a mu saisir a, eng thu mah a sawi lo. Dinfela chuan an nu mitmei a veng si, Diteii lahin a rawn melh duh der si lo. Malsawmi te lahin an pawt ţung tawh bawk si, phur lem lo deuhin a zui ve ta nge nge a. 

"Din, ngaih loh lamah ngai miah lo la, Naute khan a va chhun lo che em em.. n deuh a nei, ka hrechhuak mai thei tawh lo.. " Malsawmi chuan eitur chawh pah chuan a ti sar sar a. 

"Min chhun ve êm kha.. A nu a chhun hi a ţha alawm" a lo ti a. 

"Aa.. Mahse, a ngaihţhatthlak loh e.. Mahni faten min chhunna reng nei lo ta se.. " tiin a han ngaihtuah kual lui a. 

"I ho em mai a. Chutiang ka ngaihtuah peih lo" a lo ti hmuk. Malsawmi zia a hriatchian tawh vangin eng atanmah a ngai lo. Game ţhing lutuk a play chu a khawngaih lek lek zawk. Eitur an ei zawh rualin a ding a, "Diteii a buai takin ka chho ang. Eiman chu ka lo pe mai ang" tiin biak hman rual lohin a chhuak nghal vut. 

Malsawmi ţhiannu chuan nui chungin, "Thang khatna chu a flop phawt " a lo ti zauh a. 

Tumruh zeta Dinfela kal liam thlir pahin, "Hnehchhuh a ngaih pawn ka hnehchhuh mai ang. A nunah sawn kei aia pawimawh an awm ka phal lo bur" a ti chhum hmak a. 

"I titau mi? " an pain a rawn tih chuan a harh zawk. A lo chhing sek a nih dawn hi.. 

"Tau lo ve. I puar maw" a ti a. 

"Puar a ni mai. Zuk ei ve la.. Ka lo awm ang" a ti a. 

"Engmah ka ei châk lo. Ka fanu hi dam se ka duh a ni mai" a ti nghat a. 

"A dam dawn alawm.. Chuan Malsawmi hi chu engah mah ngai suh aw.. " a ti a. 

"Ngaih ropui tlak a ni hleinem" a lo ti ve mai. Diteii ţawngkam hi Dinfela hian a lawm thei. A lo khi leh vur vur tawh. 

"Ruati, lo chho lawk teh" Zaia msg chu a chhiar nui sak a. A mamawh leh ta a ni maw. 

A tihtur a ti vat vat a. A chho zui nghal. 

Khumah a lo mu zar a. Chunglam a lo melh ngat ngat. 

. "Eng nge" a ti tâwng a. 

"I thisen kha test ang che" a lo ti a. Ruati a ding chawt. "Engvangin maw? " hlauhthawn hmel zet hian a ti a. 

"A chhan chu ka positive alawm" a ti ta a. Ruati chuan a hmai a hup tawp. Biak zui hman lohin a chhuk thla ta chawn chawn a. A ţhawng teh thut êm bawk a ni. 

Pi Zawmi leh Diteii nî an inbia a, A fanu college kal tur chungchang an sawi a. Hostela dah dawnin a hautak si, a putea te ina awmtir a phal chiah si lo. Chung vel chu. 

Pi Zawmi chuan, "Engah nge hman hmanah in lo sawi loh? Min pui tur kan mamawh ngawih ngawih a. Rawn chho rang rawh se.. Hetah kan bulah awm se, engkim kan tumsak vek ang. Mahse, kan nula hi pui ve zeuh zeuh se la.. Kei ka che ţha thei tawh si lo va, Diteii lah nau nen engmah a tithei tawh bawk si lo" a ti ta zung zung a. Diteii nî pawh a thawveng huai e. Diteii bula a awm chuan a rethei lo vang tih a ring. Pi Zawmi lah nu sual a ni hek lo. 

Pu Vanlala pawh fimkhur takin a che ve reng a, Zaia bumna lak atanga fihlim chu a tum bur mai a ni. A fapa a ni lo tih a hre tawh a, a in leh loa a chen ve reng nachhan tur pawh awmin a hre lo. Mahse, Tlanmawii vua leh vangte a lo nihna laia Tlanmawii laka a bat tlakna tur pawn rei vak lo lo tuamhlawm chu a tum tho va. Pa sual leh kheuhbeuh tak zanwg ni se a hnawtchhuak nghal mai thei. Mahse, buaithlak ve tak chu a lehkha pawimawh a kawl tlat chu a ni. Lak letsak dan a zawn a ngai ang. Tumah a hrilh thei rih bawk si lo. Dinfela pawh hrilh duh viau mah se, an naute vangin a rilru a hrehawm tawk tawh rih.. Tihbuai a duh rih lo. 

Naute pawn hma a sawn chho ve zel a, in lama enkawl turin an inla chhuak ve thei ta hram e. An ţhiante leh chhungkhat ten an rawn kan awl lo bawk a, hrehawm lutuk chuan an va awm lo ve. 

"Dite, Puia te an inţhen! " Dinfela rawn haw chuan a ti a. 

"Ngati nge? " a lo ti hluai. 

"Ngaihzawng a lo nei pek alawm, Puia'n" a ti a. A thawmhnaw. ahlip nghal mawlh mawlh. 

"Ti nge Baby pawn engmah min rawn hrilh loh le.. " Diteii chuan a ti niah niah a. 

"A la hlim chhawn deuh a, chuvang a niang.. A rawn hrilh em em ang che" a lo ti a. 

Diteii chuan pawi a tihpui hle. Fa pahnih lai an nei ve tawh bawk si, Baby te chhungkua hi khawsa nuam fahran an ni bik lo lehnghal. Puia chu hauh hrep a tum khawp mai. Ngaihzawngte lo neihsan reng reng. A chhehvela thil thleng te hian amah an kaihhnawih ve zel chu a mak a ti fô ţhin. Tihtheih lah a nei der si lo. 

Chhum chu a let but but a, a khat tawkin ţek a tla deuh reng bawk. Ruah mal hraw zet zet hi tam mang si lo vin a tla phuar phuar reng a. Corridor thim ruih mai tawpah chuan hlim thla a rawn lang a. Duty te pahnih lah an muthlu bawrh bawrh mai. Him tawka an hriat vang a ni mahna. Chu hlimthla, kawr var suit-a inthuam chu a pianhmang a rawn lang chiang a, mipa a ni tih chu a hriat. A sang lem lo naa a taksa chu a khat ţha viau. Thawm dim êm êmin corridor chu a zawh zel a. Duty post a kal pelh dawn chuan bawkvak titihin a kal a, pawn lama ţek tla leh ruah tla thawm chuan a thawm chhuah tur pawh a rawn chhilh bo titih a, vannei a inti kher mai. Kawngkapui chu a thleng phei thei a. Pawn lam chu a thlir vang vang a, kawl han phe zawk zawk avang chuan thim viau mah se, hmun ţhenkhat chu a va hmu thei. Kawngkapui kalhna chu kutlawnga tihchhiat chi rual a ni lo tih a hria. Zawitêin a phei leh ţhem ţhem a. Duty lo awm hmasa zawk taksa chu a mel kual dan dan a. A kawng bawra chabi bawr inkhai chuan a mit a la rang hle. Thawk la kâwkin theihtawpa dimin a zuk ban de de a. Duty chu a phu zuk. Rang takin a ţhu tlum nghal. Mahse, a tep chuap chuap a, a muthlu zui leh nghal. Chabi bawr chu a zuk dap leh rek rek a, thawk pawh thaw ţha ngam mang lo va a beih hnuah a phawi thei ta hram e. Thim zingah chuan a khi sak mai. 

Kawngkapui kalhna chu a hawng ta ruau mai le.. Ruah chu rin aiin a lo tam tawh aniang, a rawn theh huh nghal ţhawt. Rang taka chhuak zauhin, chabi bawr pawh chhuatah a theh thla a. Kawngkharpui chu a khar ri leh khap. A zalen ta. A hmazawnah a kal pawp pawp a. Khawvawt a hre lo. An awmna hmun chu a fal êm vangin in dang ding a hmu lo. A pawisa lo. A kal pawp pawp ringawt mai. Dar engzat nge tih lam a ngaihven hek lo. Gate lian zet a lo awm ruau a. Tumruh zetin a lawn liam thei mai. Tunah chuan tuman an thunun leh tawh lo vang, ama duhdanin a awm tawh ang a. A duh duh a ei ve thei tawh bawk ang. Ni e, A zalen tawh miau a. 

Zing dar 6: 12 a ri chiah tihin Diteii phone a ri ral ral. Harh chiang mang hlei lovin, "Hello" a ti phak chual a. 

"Dite, ka rawn tiharh che a, pawi ka ti lutuk. Mahse, i hriat ve ka duh sia. Bena a bo" Bena nu chuan a rawn ti ta a. Diteii a thu chhuak hlawl mai. 

Ni e, Bena kha Shillong lama a awm tak avangin han kan ngaihna a awm rih lo va, chanchin erawh an ngaichang ve reng. A ţha chak viau tih thu te an hria a, an lawm tehlul nen. Tunah Assylum chhuahsanin khawiah nge a kal tak ang? A ţhian ţha ber hi englaimahin a theihnghilh ngai lo. Buaina dang bawk maw.. Dite… 

Diteii nî fanu Enkawli pawh a rawn chho ta bawk a. Ruati pawh a zangkhai ve ta deuh. College an la ţan chiah lo bawk a, Dinfela'n a va bazarpui a. A neih phak tura a ngaih loh ţha ţha a nei ta. A hlim ţan kher mai. Enkawli hi nungchang ţha tak, ze zawi lam, ţawng tlem tak a ni a. A zakzum angreng viau bawk. Dinfela hian a besâwm peih a, a tlangnel ve thuai ang chu. Ruati erawh Zaia vangin rilru mumal pu hleithei loin a awm a. A thin pawh a chhia. An chhungkhat a nih vangin Enkawli lakah lal han hrawt vak chi a ni bawk si lo, a ippik hluah hluah mai. A thisen pawh a la test tir ta lo. A inngaihbel nge mawni a dam ţha lo tlat ten a inhre thul. Amah chu a ngui a ni tawp mai. Zaia lah a pa zuiin sumdawnna lamah a liam nitin ve tawh a, eng thil nge a la tih zel dawn tih chu a chunga thuneituin a la rawn hrilh ang chu. Pu Vanlala pawn a rukin ukil a hmu tawh a, an sawi fel chu a ni deuh mai. Mahse, lehkha pawimawh, original ber kha an hmuh vat erawh a ngai. Zaia hi a fin viau chuan kha lehkha hmang khan a la thunun thei tlat. Hnung lama mit nei râna an chet a ngai dawn a ni. 

"Au D, bawihteii chu ka lo paw dawn mi? " Enkawli chuan a ti lang lang a. Puia te nupa inţhêţhu vangin an project lamah Diteii'n hna a ngah phah ta si. 

"Umm lo paw lawk mai ta che aw. A muhil har lo vang" Diteii chuan a ti a. Enkawli chuan a paw zui nghal a, in hnuaiah chhukpuiin a awi dah dah a. Bathlar lama a va chhuah chuan Ruati hian phone-in tu emaw a lo be mek. Ngaihthlak a tum vang pawh ni loin Ruati ţawngkar insum loh vangin a hre lo thei lo, "Amah Kan Zairemmawia liau luau hi alawm.. Engmah a sawipui theih loh. A pa lem lem hian a hneh tawh aniang. Kan lam ţang pawh a ang tawh lo" a ti hlaih hlaih a. A boruak avangin Ruati hi a insum hlethei tawh lo a ni ber mai. Lehlam ţawng erawh Eni chuan a hre thei tawh lo. Mak a ti ru angreng hle. A pa lem han tih chu.. He ina a luh phat khan an chhungkaw kalphung leh an nihna an hrilh vek kha a nia. Zaia pawh an upa ber angin an sawi kha a nia. Pu Vanlala hi a pa tak tak a ni lo mawni le.. A ti rilru a. Mahse, ţawng tam lo tih takah engmah a sawi chhuak lem lo. 

Chumi zan zanriah ei kham chuan Zaia chu a insiam a, khaw nge a kal dawn tih tuman an hre lo. Ruah a sur seng seng a, kal loh mai awm, a pawimawh ngang aniang e. Motor a khalh thiam loh vangin an driver a va inthlahtir a. An diriver hi Kima an ti mai a, a pa vai anu mizo niin Dinfela te in hnuai ber hi an luah nghe nghe. A felin a zuan a zang a, mizo ţawng pawh thiam tak a ni. Zemabawk lamah tlanin hmana Pu Vanlala a kohna hmunah khan an ding ta a. 

"Kima, tikhan haw vang vang la, kei chu ka riak nghal dawn. Zingah ka lo haw chauh ang.. " tiin Zaia chuan a thlah a. Kima pawh íhe loin a tlan haw leh nal nal. Hotel lian lem lo, hlui tawh lam pan chuan a phei a. A reh viau. Ruah hmi chuan a rawn nan seng seng a. A vawt erawh a ti lem lo. Room no. 037-kawngka chu a kik dat dat a. Reivak loah a ri rak a, a rawn inhawng nghal. 

Kawngka lo hawngtu chu melhin, "Ka rei em? " a ti a. 

"A hun takah i lo thleng e.. Tu nge hmu che" a lo ti a. 

"Driver kha a ni mai. Mahse, ka tir haw nghal" a lo ti sam êt a. A pheikhawk phelhin chhuatphah dûpah chuan ke lawngin a tei vel a. 

"Report kimchang ka duh" khuma ţhu fel than chuan a ti sap a. 

Chairah ţhuin, Diteii nau neih aţanga a tun hun thleng, hriat atana pawimawh ho chu a sawi ta zung zung a. A thisen thianghlim loh thu pawh a zep tel zauh. 

"Naute chu a ţha zel maw? " a ti a. 

"Umm ţha tawh aniang. Buaina an nei tawh lo" a ti a. 

"Lehkha chu hmun himah a la awm ngei em? Ka kutah dah rawh ka ti mawlh mawlh a, min la ringngam lo chêu em ni? " A hmaa ţhu chuan a ti chang fak a. 

"Zep loh chuan buaina ka tawh thut pawha ka vauchher ve tur neihchhun a ni tlat a. Tu kutah mah ka dah ngam lo" Zaia chuan a ti ta a. 

"Aw le, i tihtur kan sawi dun a ngai. Hna i thawk lo rei tawh. Tunah chuan an ngaih a ţha tawhin i lakah rinna an nghat ngam tawh bawk a. Kan chet vat a ngai. A hmasa berah saw in chhungah sawn thu kan neih vat a ngai.. I hrethiam em? " chiang fek fawkin a ti a. Zaia chuan va melh ralhin, "Chu! Pu Vanlala saw a thih a ngai i tihna em ni? " a ti zawi raih a. 

"A la dam tlat chuan rorelna a keng kawh tlat dawn.. "A lo ti a. 

"Dinfela te nupa laka chet kha i duh dan emaw ka lo tia" hrethiam lo takin Zaia chuan a ti a. 

"An nupa laka ka duh tawka ka chet dawn chuan anmahni hliahkhuhtu saw ka phumbo phawt a ngai alawm" a lo ti thung. 

"Anih thil dang? "

"Tual thah hi i thisenin a ngam lo tih ka hai lo. Chuvang chuan a aia hautak lo zawk ka tuksak mai ang che. Naute saw ka kutah i rawn dah tur a ni. Tin, i natna kawl lai kha Zodingpuii thisenah i thun ngei tur a ni. A chiang em? " mitmeng de sawr sawr hian a ti ta a. Zaia meuh pawh a zãm lek lek. A hmaa ţhu hi a lo la hrechiang lo hle niin a hria. Heti taka nunrawng leh Diteii a haw em em chu a chhan ţha tak a awm a ring. 

"Ka lo tum ang. Mahse, kan intiamkamna kha i hre reng tur a ni. Nangin i tichhia anga, keiin in leh rosum ka chang ang tih kha" a ti nawn leh sak a. 

"Ka theihnghilh lo ve.. Rosum leh in chu ka tan engmah a ni lo. Ka duh chu i hriat kha" tih pahin verther zetin a nui ta ver ver a. Zaia chuan a melh rei duh mang lo. 

"Nu ma, Bena chanchin chu in la hre lo maw? " Diteij chuan a ti a. 

"Hre rih lo. Mahse, hei a û te hian engmah an lo la sawi lo va, thuthar a awm veleh ka rawn hrilh hmasa ber ang che" a rawn ti a. 

Diteii chu a ţhu hnawk, "Lalpa, venghim la, him damin rawn hruaikir hram ang che aw" a ti sap a. A tleirawl laia Biak in a tlawh loh vang vang kha pasal a neih hnu hian a bo ta a. A pasal duhtak vangin Pathian chu a hmelhriat chho leh ţan chauh a ni. 

"Zaia hi nizanah hetah a riak na nge? " Pu Vanlala chuan a ti a. Chanchinbu a hlam mêk bawk. 

"Umm A ţhiante inah a riak a" Ruati chuan a lo ti vat. Zaia lo hawn chu a nghakhlel tawh nasa. Chet lak vat vata a nih tur ang nih vat a duh tawh a ni. Zaia chu ring zo chiah tawh lo mah se, lem a chan ve deuh pawh a ngai dawnin a hria. Enkawli bai siam tui ti taka hawpin, "Eni admission pawh vawiinah va tifel ila a ţha ang." Dinfela chuan a ti a. Enkawli nen an inzui chhuak leh dawn a ang. A farnu ang riakin a chan a, Dinfela hian a duat viau a ni. 

Pu Vanlala leh Kima te pawh dawr lam panin an chhuak mèk, Zaia an tawk nghe nghe. 

"Nizan U zaia kha nula a riahpui chiang" Kima chuan a ti a. A ţhen sak bawk. 

"Nizanah i hmu mi? " Pu Vanlala chuan a lo ti hû a. 

"Ka va thlah alawm.. zemabawkah sawn.. Hotelah a lut a" Kima chuan a lo ti mai a. Pu Vanlala chu a lo bu nghut. A ngaihtuahna erawh a dang daih. Indona an ţan chho dawn nia hriatna a nei a. A la dam ve ţek ţek chhung chuan a chhungkua chu venhim a tum ruh hle. Zairemmawia hi a duh danin a awm lo vang a ti rilru nuah nuah a. 

Diteii pawh laptop hmaah ţhuin a buai ve leh hle. Sangzuala a rawn phei thei dawn hlauh a, eng emaw chenah a pui thei ang a, a zia deuh ang. Nau a lo ţap, hnute a va pe leh tê tê a. Ruati a rawn lawr vat. "Ka lo awm ang" a rawn ti a. Ngaihţhat lohna pawh nei lem loin a lo puaktir mai. In hnuaiah a chhukpui a. 

"Tihian chhuahpui la, taxi i hmuh veleh kalna tur ka sawiah khan i kal dawn nia" Zaia'n a ti ru zauh. Tuman an hmu lo. Tumah inhnuaiah an awm lo miau a. 

Ruati chu a chhuak ta a. Gate a kal pel chiah tihin Dinfela car a rawn lang thut. A va phu chiang tak. 

"Khaw nge i kalpui dawn? " Nelawm tehchiam lo hian Dinfela chuan a ti a. 

"Ka lenpui mai mai" a lo ti bah nuaih a. 

"Lo haw pui rawh. Tun ang boruak inthlak lai laia" a ti hmuk a. Ruati tan letpui loh ngam chi a ni lo. 

Naute chu Dinfela chuan laksak nghalin, roomah a chhohpui. 

"Hre rawh. Ka fanu awm tur hian mi dang ka ring zo lo. I awm peih lo anih chuan engvangin nge i hrin? " Diteii hnathawk lai chu a va ţawng khum ta sak sak mai. A lo hrilhhai tawp. 

"Ti nge i lo let leh? " a ti daih! 

"Eni'n a document a theihnghilh a.. Kha Ruati'n chhuahpui a lo tum a. Ka duh lo ka tih kha" a ti leh a. A vin lek lek. 

"A chhuahpui dawn tih ka hre lo. Ka buai sia, ka lo awm ang a tia ka lo awmtir ve mai mawle.. Ka tihpalh" a lo ti thliam a. Diteii nge nge.. Dinfela tan pawh thinrim chiam a har ngawt anga. Drose chu a muhil sâk sâk a. Khumah a mut a. A fawp zauh bawk. 

"Taka, papa, Sangzuala a lo kal dawn a. Hna kan thawk dun dawn a. Remtih lohna te i nei em? " Diteii chuan a ti a. 

"Hehe.. Ka ring tawk che alawm.. Malsawmi game-ah ka awk lo vang" a lo ti dam thlap. An hmuia in chuks zeuhin an inbye bye ta a. 

"Lehpekah chuan kan hlawhtling tawh ang" Ruat'n a ti bai bai a. Zaia a meng rúm hle. 

"Ka kutah dah rawh" A lo ti hmuk a. 

Ruati room bula Pi Zawmi ding reng chu an hmu hauh lo. 

(A tawk rih aw 😢