D Rose 5

D' ROSE.. (Chapter - 5)

Ziaktu : Toni Râlte

"Min bual la" pangchang fê hian Dinfela chuan a ti a. 

"Awii rai puar nen.. A hahthlak thei" ti chungin bathroomah an innawr lut a. Engkim an inhrilhfiah chiang tawh bawk a, an hlim dun leh tawh viau. Thiangi nen an inkawm dan te pawh nakinah buaina a la awm palh hlauin a sawi nghal vek bawk. Diteii pawn rilru tê a pu bik lem lo. An inbual zawhah zanriah ei turin an chhuk thla ve ta a. Ruati chu a ţawng duh leh par par viau. A pi leh pute a tilawm hneh si a, hmeichhe mak tak zawng a ni e. 

Zanah movie an en dun a, Diteii ei theih a chhuak ni maw, eitur an inchhawp leh hnûr mai. Dar 9 bawr velah Dinfela zin chau ve bawk nen, mut zai an rel ta a. Rai puar lai chuan an zung reng si a, Diteii paw'n bucket a inchhawp tawp. Inleh kual pawh a tan thil harsa a ni ţan tawh a, an pa zin chhunga hrehawm a tih ber pawh mut kha a ni.

Thawm dim zetin a kal ţham ţham a, kawngkapui chu a va hawng ri rak. In hnuaiah hian a pi leh pute room a awm avangin thawm dim a ngai tho mai. Kawngka bula lo ding ran chu a rawn lut ta vat. Ţawng lo vin mitmeiin an inbia a. Kawngkhar chu an khar leh nghal khap. Syringe a lek vú a, Pu Vanlala te room kawngka hnuaia awng aţang chuan syringe chu a kap lut ta a. An mutui viau a nih hmel. 

10mins velah kawngka kalhna chu thirzai cher khawng hmangin a hawlh rak rak a, a inhawng thei ta. An va luh chuan an nupa chu an lo muhil tui kher mai. Pu Vanlala phei chu a hnar kúk kùk mai. An Almira chu panin a hawng a. Ruati chuan safe chabi a zawng thung. Pi Zawmi lukham hnuai chu dapin chabi bawr ţhahnem tak a rawn phawrh ta nawlh a. Safe chu an hawng ta. Pawisa tih tham a lo awm lem lo. Mahse, an duh ber zawk chu House pass document leh pu Vanlala sumdawnna lehkha pawimawh te an ni. Chung lehkhate chu Ruati ţhian chuan a ak ta hmak a. Pawisa clip chu a ak nghal bawk. Thawm pawh dim em em lo vin Almira chu an khar leh ta a. Inhrethiam tawn taka innuihin Room chu an chhuahsan ta nghal a. In chung lama chhoh leh an tum zet naa hun dang atan an khek nge let lehin Ruati roomah an lut dun ta a. 

"Nizan chu ka va mutui tehreng em.. Mumang bo ţhak khawpin alawm le ka mut le" Pi Zawmi chuan thingpui in pah chuan a ti suam suam a. Ruati a lo khi sak. 

"Pi, ka pu hi a kal leh tawh mi? " a lo ti a. 

"Umm, zing tawkah khan a tho va, hna laklawh kan nei a,a tia a chhuak ta a nih kha" a lo ti ve mai a. Diteii te an rawn lan takah chuan titi dang an vawrh ta a. 

Ruati hian eng nge a tum ni ta ang? Tu nge a thurualpui kha le.. Ruati chanchin hi chhui fê tham a awm a. Mahse, chhui vek sen erawh a ni lo vang. Mahse, Diteii te hringnunah pawimawhna a neih tak miau avangin a remchan dan anga a chanchin hi la thlur bing deuh pawh a la ngai mahna le.. Hmeichhe naran zawng a ni hauh lo tih a lang reng mai. 

Pu Vanlala chuan a hnathawkte vilin a khat tawkin phone a hmang zeuh zeuh a. A sumdawnna huang tihzauh zel a duh bawk nen, duhâm hian chinlem a nei thei meuh lo a ni e. A tu leh fate lo la piang tur a ngaihtuah vang pawh a ni ange. A number hriat loh aţangin call a dawng a, "Aw hello' a ti dam thlup a. 

"Pu Vanlala maw, sumdawnna chungchangah biak che ka va duh ve mawle. Hetah Chhim lam aţangin a nia. A rem chuan hmaichhana inbiak ka duh a" a rawn ti a. A aw aţang chuan a puitlin hmel viau mai. 

"Aw a va lawmawm dawn ve. Vawiinah hun ka neih theih ka ring, chawhnu lamah" zangkhai takin a ti a. A sumdawnna darh zau zel tur chu a lawm ru hle. 

"Anih chuan dar 2-ah ka staff pakhat ka rawn lamtir ang che aw. Hetah ka thlenna hmunah inhmu mai ila" a rawn ti a. An sumdawnna hi dan phal loh a ni hran lo bawk a, hlauhthawn vak tur a hre hran lo. Amah a rinawm miau vangin mi dang pawh a rinng hma. Hei hi a chak lohna tak pawh a ni awm e. 

"A pawi hleinem" a ti ve mai a. An inbiakna an titawp zui nghal. 

"I va buai awm ve" kawngka bula Malsawmi ding reng chu a va en a. 

"Buai ve tho mai. Neuh neuh hi a tam ţhin a. Lo ţhu rawh" ţha te chuan a ti ve a. 

A rawn ţhu tharh. A inchei nalh lehpek hle, a rimtui viau bawk. 

"Lunch ei ila.. Ka treat ang che. Nimin vanga ka lawmthu sawi nan" zei zet hian a ti sar sar a. 

"Ka lo chah mai asin. Ka ei chhuah hman ka ring chiah lo va. " a lo ti thung. 

"Anih chuan min chah kep la, hetah kan ei dun ang a a ni mai lawm" a ti leh har har a. Dinfela tan lo hnial ţun kha thil mawi ni hek lo. A chah kep ta nge nge a. 

"Taka D, hna ka zawng ţan ve leh a, Zirtirtu nih ka peih si lo. Min chhawr ve mai la" a ti no ngher ngher a. Pangchan pawh a lo la thiam reng a nih dawn hi. 

"Hna ruak ka nei chiah lo.. Bakah central lam nen kan inthlunzawm aţang hian ka thuneihna a tlem tawh riau a" nui chungin a lo ti a. 

"Nang zawng i hlawhtling ta chu a nia.. I tuina ber a ni bawk nen. A nuam ngawt ang" khawngaihthla la deuh hianna ti leh a. 

"Awihawm loh em mai. Kan la hautak dawn chauh alawm.. " a lo ti leh mai. 

"Tikhan lo ţhu rawh aw.. Hna kan thawk lawk ang e" a tih zawm nghal zat a. A computer lam hawiin data lak khawm hna a thawk zui nghal a. Malsawmi tan pawh han biak zui vak ngaihna a awm mang lo. Phone khawihin a lo ţhu ve reng ringawt. A zak chuang ţhak nang. 

Kawngkhar a ri rak. Diteii a lo lut hlawl mai. "Lunch ka rawn leisak che a, ka inentir zo ina hawna va mut teh tawp kha ka peih lo a" a rawn ti lut nghal bawrh bawrh. Malsawmi lo ţhu reng a hmuh chuan a ding chawt. Ani Malsawmi lah chu intineitu zetin a lo hawi pir vah lehnghal. 

"Ee… eng nge i lei. A va tui leh dawn ve.. Hawh, tah hian ţhu teh" Dinfela'n a ti nghal zung zung a, Malsawmi lam hawiin, "Mali, hei hi kan nu Zodingpuii Diteii chu a nih hi.. Naute, hei Malsawmi ka ţhian hlui ka tih kha" tiin a inhmelhriattir nghal a. An inchibai pah chuan an inmelh kal mai. An intiat dun viau, vun rawngah Malsawmi a ngo hlek thung. Mahse, thlan tur zawk nise Diteii hmel pawisawi lo tak chu an thlang fur ngei ang. 

"Awiii i awm ve tih ka hre si lo va, ka lo lei kep lo che. Ka'n chah leh mai dawn mi" Diteii chuan a ti thliam a. 

"A ngai lo. Inpa khan min chahsak tawh alawm.. Lunch i leisak dawn tih a hre lo nge lunch eipui turin min lo sawm a. A ţha vek mai, kan eiho anga a ni mai lawm" Zam lo fè hian a lo ti a. Dinfela a meng nur deuh. Mahse, han inchhalh êm chu niin a hre lo. Diteii chu a thinrim ang tih a hlau viau. Mahse, a inthup ve nge a titi bawrh bawrh reng mai. 

Dinfela lunch chah a lo thleng ta bawk a. An pathum chuan an ei ta hlwm a. An boruak rit angreng tak chu hre lo niawm takin Diteij chuan a be bawrh bawrh mai. 

"Dite, inpa first love ka ni tih chu i hria ang tiraw? Awii min duat theihzia aw.. Tun hnu hian bialpa ka neih tui loh phah vek zel. In pa i nei hi vannei inti hle rawh" Malsawmi chuan sa ti hmawm zauh pah chuan a ti a. 

"Umm a fel alawm kan pa hi chu, a ex te reng hian an ngai thei em mai " Diteij chuan a lo ti a. A nui hawk hawk bawk. Dinfela awm dan tur hre lo lutuk chu a lainatawm zawk. A khi ve suk suk ringawt. 

"Enteh maw, kan nih lai chuan thil kan ei dun te hian min barh kher zel ta a nih chu.. A motora chuan dawn paw'n keiman kawngka hawnga ka luh hian min chhuahtir leh a, ama hawn kher hi a duh zel. A over thei ania" tih pahin awmze nei zet hian Dinfela chu a va melh a. Diteii lah diau duh bik lo, "Ani ve tho maw.. Tun thleng hian min bual loh chuan a titau dawn zel. A ngaihna awm lo. Ka rai puar hnu ka rih tawh hnu te hian mut dawna khuma min pawm phei te hi a la sim duh si lo va, kan pa hi chu a romantic chiang alawm" a ti ve leh sak sak a. Thinrima sawi a ni hauh si lo. 

Dinfela chuan, "In ninawm. A tawk. Ka chungchang ringawt in sawi le" a lo ti hlur a. An nui hak hak hlawm mai. 

"Chuan, Dite USA -a ka awm lai khan i thlalak ka lo hmu ve ţhin a. Tiang hian i nu ang tih ka ring phak miah lo. Bialnu engzat nge i neih hman? " Malsawmi chuan a ti kha fak a. Elsen leh runluih rawng a kai tawh. 

"Bialnu ka nei hman lo he pa hian ka hun pum kha a chang tawp. Min eizo vek a ni ber mai" a lo ti let ve hmiah. Dinfela chuan Diteii chhanna chu a lawm kher mai. 

Boruak inep run karah lunch chu an ei zo ve ta hram. Malsawmi pawh a chhuak zui ve ta hlauh a. An thaw huai mai. 

"Ka nupui i ni hi ka va lawm tak" tiin a biangah a fawp a. 

"A zia ka hre tawh a, ka lo thîk ve em em kha ka zak. Thîk tlak a nih nek loh kha. A â em mai" Diteii chuan a ti ta zêk a. 

"Ni chiah e, thîk tlak a ni lo. A khawngaihthlak zawk" An pa chuan a ti a. An infawp zauh. Driver koh buai ai chuan tiin Dinfela chuan a nau pakhat a va thlahtir a. A hnuaia thawk ten Diteii an fakzia leh fel an tihzia a hriat te hian a hlim veng veng ţhin. Ni e, an nu tluk hi a hmu tawh lo vang. 

Pu Vanlala chuan a hmaa ding chu a hmuh tum loh tak a ni tih a hria. A ngaih dan kha chuan amah ang rual vel, pa ûn ve lam a ni a ring kha a nia. Tuna a hmaa ţhu erawh tlangval, a fapa rual pui awm vel lek a ni. Zemabawk daia hotel pakhatah an inhmu mêk a ni. 

"Min supply zat zat theih dawn chuan inbiak rem mai ka duh a. Tunah pawh hian bungraw thenkhat chu hawn nghal ka duh ang" Zaia inti chuan a ti a. A ţawng dan chu a patling angreng. 

"Thil harsa a ni hleinem.. Chungte chu. Phone kaltlang pawh khan a sawi vek theih alawm" Pu Vanlala chuan a lo ti a. Roomah chuan room service ni mai awm form ha hi a lo lut a, an thil inna vel chu a seng hawi a. Pu Vanlala hnungah kalin Zaia mitmei a hmuh rual chuan Pu Vanlala nghawng a thip zawk. A phu uih hman chauh a ni. A nghawngah syringe a bur vã mai. 

"Eng.. Eng nge thil awmzia? " a ti tuar a. Zaia chu a ding chhuak a. Pu Vanlala chu a zawi nghal hnawk. A rilru eraeh a fim viau lawi a. 

"Pu Vanlal, tunah hian deal lian tak kan siam dawn a ni. I nunna nena inzawm anih avangin ka sawi tur hi ngun takin i lo ngaithla dawn nia.. 

I lehkha pawimawh ka kawl a, tunah hian. Engtin nge ka kawl theih tih chu ngaihtuah lo mai la..tuna i chenna in saw a neitu nihna neih ka duh a. A chiang em? Tin, i sumdawnna hi i thih hnuah chhawm ka duh bawk. I ngaihtuahna ka hria, thil dik lo ti angah min ngai a ni maithei. Mahse, i duhthlanna leh i signature nen thlapa kalpui ka nih dawn vangin ka tan hlauhthawntur a awm lo.. " a ti ta fak fak a. A nelawm loh ţan viau bawk. 

Pu Vanlala a chiâi vek. He pa hian engtin nge chutiang chu a tihtheih? A ngaihtuahna a chawmawlh vek tihtheih a ni. 

"Tu nge i nih? " a ti hrãwk a. Mangang zetin a melh bawk. 

"Min hre lo vang. Thawnthu pakhat ka sawi ang a, i hre chhuak thei mahna.. Hmanah Chhim lamah i lo zin a. Chutih lai chuan i sumdawnna hi eng teh ual a la ni lo nen, sumdawng vakvel satliah i la ni. Tichuan, khaw pakhata i thlen in nula nen chuan in lo hmelduh ta a. Tawktarh hrang hrangin i thlem a, i thlem thlu ta. I hnenah a intulut a, vawi tam in chesual anih kha.. Tiamkam nei chungin i hawnsan a. Mahse, rawn lan tik ni i nei ta lo. I kalsan tak hmeichhe rethei tak chuan i fa a pai ta a. Sâwn man dil an rawn dil dawn che a, nang chu nupui nei lai i lo ni reng tih an hre chhuak ta a. Mualpho ai chuan tiin sâwn man pawh dil lo chein hehilin an lo let leh ringawt a ni. 

Tichuan, i bum thluk hmeichhia Tlanmawii chuan fapa a hring ta a. Rethei leh harsa takin an khawsa nufa ve ta. Tlanmawii nu leh pa te thih hnuah phei chuan a nuţain an nufain an hnawtchhuak a, khaw dai fèmah rãp in chhetê luahin an khawsa ta rek rek a. Nu chuan a theih ang anga hna thawkin a fapa chu a enkawl ve a. An harsatna tawh zozai hi thawnthu sei tak a ni. Mahse sawi kher a ţul lo. A fapain kum 16 a rawn tlin chuan Pi Tlanmawii chuan natna khrih tak a vei ta tlat mai a, a thi thuai dawn tih hriain a fapa bulah chuan i thlalak hnutchhiahin zawng chhuaka i hnena cheng turin thu a râwn a. A chhan chu chulai hmunah chuan a rethei êm a tin ni. Rei lote hnuah Pi Tlanmawii chuan khawvel a chhuahsan ta a ni. A fapa chuan tumah belh tur leh nghenchhan tur a nei ta lo. A pa zawng chhuak tur takngial pawn zinna tur sum a nei lo. A la naupang si a. Retheihna leh sualna chu a inzui chãwk an tih angin chu rawlthar pawh chuan a nun beidawng leh khawhar vangin sualna kawng a zawh chho ţan a. Ruk ruk leh mi tihnat chu a nunah a bet chho ta reng mai. Vawi tam jail, -ah a lut a, ngaihsaktu a nei ngai lo. Neih a nei ve chuang lo tiin ama duhdan ang takin khawvel a hmang chho ta mawp mawp a. 

A suahsualna vang leh mi ţihkhai a nih tak avangin khua a tanga hnawhchhuah a ni ta hial a. A ruk khawmsa sum hmangin Aizawl hi a rawn thleng ve ta hlawl mai. Tichuan, a nuna ser bet reng, nitin zantina hliam ţhintu a pa zawn chhuah hna chu a thawk chho ţan a. A pa chu sumdawng hausa tak a lo ni tawh a. In ropui takah chengin mi zah a kai hle tawh tih a hre ta. Phuba lak duhnain a khat a, a bei a. A kal kawng pawh a thui teh asin. Amah puiturin a anpui tak hmeichhia a tawng ta hlauh bawk a.. Hna chu an ţan chho ta a. Tun hi an thleng ta a ni.. 

Pua, kei hi i fapa Zairemmawia ka ni e" Tiin a sawi ta phiar phiar mai. Pu Vanlala chuan sawi tur reng a hre ta lo. A kha a chih a, a rilru a mang vek mai. 

"Eng emaw tal chu i sawi dawn law'm ni? Ka pa" a rawn ti zawi raih a. A mitah chiang zetin a melh bawk. 

"Fapa ka nei tih ka lo hre lo a ni" a ti bah nak a. 

"Kha zawng ka hrethiam che. Fapa i nei tih i hre lo, an hrilh lo miau che a. Mahse, I bum tak hmeichhia kha.. Ka nu khan nangmah vangin harsatna tam tak a tawk a, a nun pum deuhthaw kha hremhmunah i siam asin. I rawn ngaihsak hlek lo naa ani chuan a hmangaihna che kha a tar hlumpui ţhak a, a thih dawn thlengin a phatsan lo che. Engtin nge pawm lai nei chung khan i mutpui theih? Kha kha ka laka ser i hnutchhiah chu a ni" Zaia chuan thinlung na tih hriat zet hian a ti leh sak sak a. 

"Min ngaidam rawh.. Pawi ka ti lutuk"

"I tlai tawh. Tunah chuan ka nu laka i thiltih zanwg zawng i rulh letve na hun a thleng tawh.. "Tiin a vei nghut nghut a. 

"Hetah hian i hming i sign ang a, a tawk mai aw" tiin lehkha phek pahnih a rawn la a. Pu Vanlala rilru a mangang ta kher mai. 

"Khawngaihin tiang hi chu ti suh. Ka tu leh fate engtin nge an awm ang? " ngenngawl zetin a ti a. 

"Chu lam ka ngaihtuah lo. I fapa chuan a chhungkua a chawm thei. Kei hi i fapa ka ni ve lo em ni? Neih engmah ka nei lo asin" ti el lek lek hian a ti a. 

"Tuna ka in saw chu ka fapa tan ka dah tawh. Ka in dang ka pe zawk ang che. " thlem titih hian a ti a. 

"Aih, tuna i awmna ngei saw ka duh a ni. Tin, i sumdawnna pawh" verther zet hian a rawn melh a. 

"Sumdawnna chu a vaiin ka pe thei lo vang che. Ka nunna pawn tuar dawn mah se, ka thei lo. Hmun thumah ka ţhen mai ang. Ka nupui tan, ka fapa tan leh i tan" Tlem chuan a inringtawk ta deuh. Zaia chu ngeiawm zetin a nui a. 

"Mi sual tak ka ni lo va. Ka pa i nih bawk avangin ka pawm thei vek e. Mahse, thil pakhat i la tih a ngai. Kei hi i in chhungah min lalut tur a ni" a ti ta a. 

"Aw le.. Ka fapa i ni a, kan bula i awm a ngai alawm" a lo ti var a.

"Ka rin aiin a khirh lo hlauh e. Chuan, in chu ka hming chuan dah ang che. Tin, i rokhawmtu ka ni nghal dawn tih theihnghilh lo la" Zaia chuan a ti a. A phur hle tih a lang reng mai. 

"Rokhawmtu zawng ka nihtir thei lo vang che. Hei zawng kan inah i lo chen ve huna sawi ho turah pawh a dah theih ang chu. Ka fapa i ni a, rethei takin i awm dawn lo" Pu Vanlala thung chuan a ti a. 

"Putar, ka thu ang chuan ti mai rawh. Sumdawnna chu i duh angin sem la, in leh i ro khawmtu erawh keimah ka nih ngei a ngai. Thuneihna fawng vuantu ka la ni dawn a ni. Sign rawh" tiin a rawn dah hnai a. 

"Kan ina a lo awm anih chuan kawng dangte pawh a la awm ang a, ka ukil pawn tihdan a hre mai ang" ti rilru chungin Pu Vanlala chuan a sign ta nge nge a. Hei hi a tawpna a ni lo tiin a inhnem ru mawlh mawlh thung. 

"Chuan, naktukah ka rawn insuan lut ang. Zaninah ka chungchang in lo sawiho dawn nia.. Chuan, police i pun emaw eng emaw a thleng anih chuan, i nupui leh i fate sawn an tuar ang. I rin aiin ka hlauhawm ang aw" Zaia chuan a ti leh ta chher chher a. Pu vanlala a bu nghut ringawt. 

Pi Zawmi chuan an pa lo haw chu nidang ang lo riaua hriatna a nei a. A ţha em tih a zawh lahin a ţhat thu a sawi zel bawk si. Zanriah lah a ei tlem viau bawk. 

"Han intifel ula, Ruati tel loin in chungah in hmu khawm lawk ang u" Pa berin a tih vang chuan an insengfel vat vat a. Dar 7-ah chuan an ţhu ţhap mai. Pu Vanlala chuan a aw a thian kharh kharh a. Sawi duh nei, sawi hreh si hmel a pu. 

"Pehhel loin sawi tawp rawh ka pa.. I hmelah a lang vek" Diteii chuan a ti ta tawp a. A han insangmar a, "Umm nia, sawi loh theih loh a ni miau si a.. Ka sawi mai a ngai anih hi.. "Tia bulţanin chhuna a thil tawn zawng zawng chu zep nei lo vin a sawi fai ta leng a. Dinfela chu a ţhâwng deuh dawt. A pa chuan fapa dang a lo nei reng tih a hriat chuan a lawm angreng zawk. Mahse, Pu Vanlala chuan rokhawmtu leh in leh lo chungchang kha chu a la zèp rih thung. Dinfela hian a awt lo tih chu a hre tho, mahse, an nu mitmei te pawh a veng ve a. Tin, he in hi Dinfela'n a roh nachhan tur chu a nu nena an sak kha a ni tlat a. Chuvang chuan a la sawi chhuak ngam ngang lo a ni. 

"A rawn awm ve dawn chuan a ţhat hlauh chu.. Mama pawh a mal tawh bik lo vang chu" Pi Zawmi chuan a ti thliam a. A rin aiin a chhung ten an dawngsawng thiam tih a hriat chuan a lawm takzet a ni. 

"Nia, ka pa sumdawnna hi ka tuipui ve em em si lo va, aman a chhunzawmsak theih dawn phei chuan a zia hlauh chu" Dinfela chuan a lo ti ve vat a. Pu Vanlala ippikna pawh a kiam duak mai. Mahse, Zaia khan suahsual a chhuah zui ang em a hre hauh lo. Pathian kuta innghah ngawt bak engmah tihtheih an nei rih lo. Zaia hi a fapa a ni tak tak em tih pawh chunglamin a ka rawn pholan mai a beisei. 

A tukah Zairemmawia chu a rawn lut ta rup mai. Ţha takin an lo welcome a, Ruati nen chuan la inhre ngai miah lo angin an la awm thung. Ani pawn ţhat a chhuah ve nge game dang a khel tih hriat va ni suh. A nungchang a mawi viau mai. Diteii erawh a en duh ngang mai. Ani rai ngeih, mum kâng, ti sen suah, a ìtawm zawk emaw tih tur a nih lai a lo ni sia. A melh duh dan chu a jerusalem hawi mawlh lo a ni. Dinfela'n a hmu lo hlauh zawk a. 

Akimi khan in hrang a chan ve dawn vangin a in thar lawm pah leh puih pahin an nupain an va kal dawn a. Diteii chuan kawrfual hring lar, simple zeta ţhui a ha hnalh a, a sam pawh a lo sei ve ta deuh bawk a. An pain khawih danglam a phal tawh si lo va, a tan duh ta bik lo. A lang tharlam sar sar kher mai. An chhuah daen chuan Zaia pek chuan, " Dina, in nu hi enkawl tha hle rawh. A rai puar chung pawha melh tai duh an tam maithei ania" a ti sur sur a. 

"Ka hria lawm.. Ka venghim zel ang" nui chungin a lo ti a. An inthlah liam ta a. 

"Awii kei chu ka sual nge ka hre lo. U zaia mitmeng hi ka rin loh chi tak. I ú ni tho mah se" Diteii chuan a ti a. 

"Aa.. A hun paltlang kha a harsa ve êm anih kha. Hrethiam rawh. Kan chengho rei ang a, i la hmu rem mai ang" a û thlavang hauh chuan a lo ti a. 

Akimi in an thleng a, an thil leisak te chu an han hlang a. Bungraw tam tham tak an leisak a ni. Akimi hi a nuţapa nupui nen an inngeih hleithei meuh lo va, ani nau nen a ni ve bawk si. A û lah an chhungkaw eizawngtu a nihna chen a awm bawk nen, a inthlahrung ta thuai a. A nu leh pa ten thuneihna an nei ta vak bawk si lo nen. Dinfela'n a dawrah a chhawr thei dawn hlauh a, chumi behchhan chuan in hrang a chang ve ta râwih mai a ni. Tin, Mike-a hian a fate a thlahthlam bik lo va, a chawmna tur sum a chhunglut ve reng bawk a. Harsa lutuk lova mahni thuneihna hmuna awm kha a châk ve a ni ber. Bakah chenho reng chuan innghirnghona a lo awm thuai thin si a. A nuten remti chiah lo mah se, aman tihtheih a inrin tlat vangin a indang ve ta râwih a ni ber. In chhung an lut a, a te fel rin ren viau. Mahse, an nufa thum tan chuan a tawk viau tho mai. 

Diteii dul puar luah chu naupang chuan an lawm a, an chul an chul mai. 

"Mike-a pawh rawn kal a tum kha" Dinfela chuan a ti a. 

"Nia, ka sawm ve a nih kha. Hei bawihteii hian a ngai thei bawk sia maw.. Inţhen mah ila, fate pa na nâ na chu huat theih an ni lo va, inhuatzui hi a ţha lo bawk a" Akimi chuan a lo ti var a. An sawi aţanga reivak loah Mike pawh a rawn thleng ve nghal mai. A fanu chuan a lo ban cheng cheng a, lungte pawh an tichhe lek lek e a. Akimi nen pawh pangngai takin an inbe thei a, a tihzia khawp mai. 

Akimi nu leh pa an rawn lang ve thei a. A bak an rawn tel lo. Chaw hlui chu hlim takin an kil ho ta a. Eikhamah reivak lo an ţhukhawm leh. An ţhianho chauha an awm hnu chuan, Dinfela chuan "Mike, Sawma nen chuan in inthlah fel tawh maw? " a ti luam a. Sawi zahthllakah a ngai tawh lem lo. Engkim an inhre pawh vek tho va. 

"Thlah chiang khawp mai. A thisen pawh a test tir ve tak kha. Kai a mual mual a ngah viauin ka ring. Pawi tak a ni. Hmeichhia a mutpui tho bawk sia" Mike chuan a ti ta duah a. 

"A zia lo ngawt mai. Nang chu inenkawl ţha la aw. Damdawi i ei ţha em? " Diteij chuan a lo ti a. 

"Ţha a ni mai. Ka haihawt lutuk hi lawm. Akimi hian min rawn hrilh thin lo phei se chuan a hunbi ka pelh zauh zauh ang" tiin Akimi a va melh a. Inhmangaih lo ni miah si lo, awm hran ngai si nun chu a va hahthlak dawn em.. Akimi hian Hiv a vangin a hlau a a ţih a ni lo. A mipatpui laka a uiresanna khan a nghawng na lutuk a, nupa nun a hmanpui leh theih a ring tawh lo a ni ber. Chu chu mikea tan a mak hran lo, Akimi chu demna chhete a nei hek lo. 

Zan dar 9 velah in an thleng a. In chungah Zaia room kha a awm ve ta bawk nen, in chung pawh a la eng kalh mai. Room an lut dawn chiah tihin Zaia room atanga hmeichhe nui har har thawm an hre ta a. An ding chawt. Hmeichhia a riahpui nghal hmiah chu a ni sia. Dinfela ngaihdan ni lo deuh mah se, hriatthiamna chin a la neihsak zel rih. A hun tawn kha a khirh êm a tiin. An nupain an inbual dun leh a. Sex erawh an hmang tawh rih lo. Naute neih a hun ve lek lek tawh a, Diteii tih dan takah, "A hurthlak leh lutuk"... Hehe.. 

"He in hi kan ta a ni ta mai chu a nia. A mak tiraw? " Ruati chuan a ti sar sar a. 

Zaia ban lukham chungin vei neih loh hmel zeta meizial zu khu luih luihtu a bialpa chu a kuah nghet sauh a. 

"Mahse, a hun hma chuan ţhat chhuaha inthup rih a ngai aw.. " Zaia chuan rilru nei fè hian a lo ti a. 

"Ka hre ve. Ka hlauhthawn zawk chu, nang hian min phatsan leh mai ang em? " tiin a inbeng kang uaih a. Zaia chuan a pawt mu vat, "Ka ke khalh ngiltu i nia. Hetiang dinhmuna min hruai thlengtu hi ka phatsan che i ring em ni? " a ti sur sur a. An infawp nawk nawk nghal. 

Zaia phone a rawn ri a. En chiang mang hlei lo vin a reject nghal. A rawn call leh.. "Teivet a" tia phun bul bul chungin a pick up a. 

"Ka bansan tawh ka tih kha" a ti pawr hlur a. 

Lehlam ami chuan aw nêm zet hian, "Naktukah ka hmu duh che. A zin dawn a" a rawn ti. 

"Ka bansan tawh alawm.. Min lo tibuai tawh lo teh. Nun thar ka nei tawh" a ti leh hluk hluk a. Ruati chuan a melh ran bawk. 

"A tawp nan a ni mai lawm.. Bakah i bansan dawn chuan kan inremna sum chungchang pawh sawifel a ngai anih chu" a rawn ti dam leh thlap a. 

" Buai suh. Ka rawn hmu ang che. I sum kha ka mamawh viau tawh lo. Tunah chuan hman sen loh leh in nuam tawk tak ka nei tawh e" chapo zet hian a ti lar lar a. Ruati'n mitmeiin a lo khap. 

"Aw le.. Hmuh che ka lo inbeisei ang" a rawn ti a. A dah nghal khap. 

"Tu nge" Ruati chuan a ti hâ a. Lungawi hmel a pu vak lo bawk. 

"Ka agent pakhat a nih kha. " ţha deuhin a ti a. 

"I sim theih tak tak pawh ka ring lo" a lo ti hlar a. 

"Sim tawh dawn. I awm a, hetah kan awm bawk a. Engmah mamawh ka nei tawh lo" tiin a kuah nghal a. 

"Anih engtikah nge thuneihna kan neih dawn. Pa ber hi a thih phawt loh chuan a ro i khawm ngawt thei dawn mi? " Ruati chuan a lo ti leh a. 

"Nia, bakah kan fimkhur a ngai. Pa mawl a ni lo va, a thurochhiah a thlak leh thut thei tih hriat reng tur. Lehkha pawimawh kha a hmuh phakah dah loh a ni mai. Tunah chuan hmun himah a awm rih a. Dinfela te hian fa hi nei phawt se, chet dan tur chu min rawn hrilh leh mai ang" Ngaihsam fê hian a ti a. 

"Ani hi i ring zo maw? A fin hmel sia.. Min bum let daih ang e" 

"Kan bum let keuh zawk ang chu mawle.. A tum dan ka hre ruak tawh alawm.. Engpawh ni raw sek sek, he in hi chu ka hmingin a awm kumkhua tur a ni ringawt" a ti phar phar a. 

"Mahse, heta awm chung hian kan rethei hle si ang e.. Eizawnna i ngaihtuah a ngai" Ruati chuan a lo ti a. 

"A sumdawnna hi ka luhchilh ve dawn alawm.. Share ka neih daen kha hre reng rawh" tiin Ruati ţwng tum mek hmuiah a zuk fawp a. An inkeih ta buan buan a. 

"Ka nei ngei ngei ang che. Ka va haw phawt ang a, tihfel ngai te ka va tifel ang a.. Ka rawn kir leh ang" tiin Tlanmawii samah chuan a zutsak a. 

"Ka lo nghak reng ang che. Nang lo chu neih ka nei lo" tia mittui tling pama entu Tlanmawii chu a kuah nghet sauh a. Chutih lai tak chuan Dinfela nu ngei kha rawn langinna rawn pawt ţhen dãwrh a, Tlanmawii ţap tuar tuar chu an kalsan ta. Phul hmunah a lo awm leh daih a, Tlanmawii leh mipa naupang pakhat hi a lam panin an rawn kal a. 

"I lo kal ve ta maw. Kan lo nghak reng che asin. Hei hi i fapa anih hi" tiin Tlanmawii chuan hmel hlim takin a lo bia a. A fapa chu Dinfela naupan lai nen an inang kher mai. 

"Ka fapa" tiin a pawm kang a. 

"Apa, Anu nen vanramah hian kan lo nghak rei tawh lutuk che asin" a lo ti reuh a. Chutia an inpawm lai chuan an piah ramngaw aţang chuan, "Paa.. Paa" a rawn ti vau vau a. Dinfela nu aw nge Zawmi aw a hre hrang thei hlek lo. A taksa chu a rawn che dut a, a harh hlawl mai. A mumang teh hrep chu! Zawmi chuan mak tih hmel zeta lo melh kiauin, "I va harh thei lo ve. I rúm nasa sia" a lo ti a. 

"Mumang ka lo nei alawm le" a ti phak chual a. Engmah sawi loin an mu ţha leh sawt sawt. 

Mahse, a mumang kha a ngaihtuah chhunzawm lo thei lo. A fapa khan eng nge a sawi kha, "Vanramah hian kan lo nghak reng che asin" a ti anih kha. Anih chuan Zairemmawia hi a fapa a ni lo thei. A thu chhuak ta hlawl a. Hmalak dan tur a ngaihtuah ta rauh ruah a. 

"Pa, lalapa, harh teh.. Hei ka huh vek tawh ka tuibawm a kehin ka hria" Dinfela chuan Diteii aw a hriat rual chuan thawh phan nei lêk loin a inperh tho nghal at. Diteii mutna zawn chu a lo huh pur tawh a, a pum eraeh a la na riai riai chauh. Hmanhmawh takin in hnuaiah a chhuk a, a pa te a kaitho nghal. Ruati kaih thawh a va tum chu a roomah a lo awm hlek lo mai a. Mahse, a ngaihtuah zui hman lo. Zaia room pawh a kik ve zuai, "Ka u, Ditei'n nau a nei dawn" tiin. 

Diteii thawmhnaw chu a thlaksak a, a pum a rawn na ţan ta bawk. Zaia a rawn lut ve nghal zat a. A ruka Ruati chhuk thla erawh an hmu hman lo aniang e. An buai bawk nen. Zing lam dar, 4 bawr vel a ni. Diteii chu kuah thlain Damdawiin lam an panpui ta a. 

Zing dar 5 vel atanga vei ţan kha chawhnu dar 2 velah a nei thei ta chauh. A chau hnêp mai. Zai mai an duh tawh laiin, Dinfela'n fa ngah a duhzia a hre sia, San chhuah ngei a duh tlat. A hlawhtling ta bawk. Naute ţap ngâk ngâk a hriat rual chuan, "Ditei'n Fa a nei ve ta" a ti sap a. A ţah nuih. A bak a hre mumal vak lo. A chau lutuk tlat. 

"Fanu i nei ta e" nurse-in a rawn tih chuan, "Lalpa, ka lawm e.. DROSE A LO PIANG TA" Dinfela chuan a ti sup a. A nui bawk. 

"Fanu a nei a, an hlim hmel khawp mai. Hei.. " Zaia chuan phone in tu emaw a hrilh sar sar a. 

Lehlam ami chuan, "Fapa a ni lo hlauh chu a zia e.. Tunah chuan lo hahdam rih rawh u" a rawn ti a. Phone a dah nghal hmak. 

Tu tak ni ang maw? Engvangin nge Diteii hringnun vul mek hi tihchhiat tuma an hual tup tup fó ni.. Mahse, Diteii zawng Diteii a ni kumkhua ang. 

A fanu pawm chungin a nui var var a, Diteii erawh drip an khai mek. A meng peih chang chang a ni ber. 

"Bawihte, i hming chu Zochhuanawmi ni rawh se aw.. Mahse, DRose tia hriat i ni fó zawk ang.. A chhan chu i nu hi Diteii a ni tlat" Tiin Dinfela chuan a fanu chu a be mawlh mawlh a. Hrethiam ve niawm takin a lu a tiche hret hret a. A va duhawm tehlul em… 

Hei hi Drose bulţanna chu a ni. 

(Tawk rih, ka lu pangkhing a nâ 🤕🤒