D Rose 3

D' ROSE.. (Chapter - 3)

Ziaktu : Toni Râlte

Doctor ten an vil tha bawk a, rei awm lo vin Diteii pawh a chhuak ve leh thei ta mai. A nu leh pate leh mi dangho chuan eng emaw thil ei sual vanga pum naah an ngai vek a, chu chu Dinfela duhdan tak pawh a ni. Diteii a hmangaih ém vangin nau tihtlak a tum tih chu tuman hre lo se a duh a ni. Mahse, amah chu a ippik a, a rilru natna nen a taksa thlengin nghawng a nei titih. Diteii bula hria anga lan chu nuam a ti lo bawk si, heti tak hian a hmangaih tih hria se, Diteii hian a fa pai chu a duh ngei a ring thin. 

"Doctor te khan eng nge ka eisual anga an hriat le.. A mak e, nidangah pawh ka ei fô sia" Diteii chuan a ti niah niah a. 

"Ei fó tawh pawh ei sual chang a awm ve alawm.. I fimkhur tawh dawn nia" A nem thei ang berin a lo ti a. Damdawiin atanga an haw leh atang khan Dinfela mizia chu a dang hret tih Diteii chuan a hai miah lo. A chhan erawh a hre lo thung. A hlauhthawnpui lutuk vangah a ngai deuh ringawt. Ni danga a duat ang hliak hliak khan a duat ta lem lo va, a tirah chuan a thawveng deuh hawk naa a rei a, mak a ti chho tan. Tin, tlai tin deuhthaw a ei châk zawng a rawn lei thin pawh a ti ngai ta lo. Mut hmuna titi dun leh a dul zût te kha a thleng ngai ta miah lo bawk. Chu chu kar khat lek ina a awm chhunga thleng a ni. Mahse, Diteii chuan a hre kar thung. A chhan a rinzawn thiam lo chu a buaina a ni. 

"Dite, i û hi a la rawn haw miah lo. Ka pa a lo haw tawh em? Ka be tlang thei si lo va" Zami'n a rawn ti a. 

"Ka pa te chu a lo haw tawh. Ngawi rawh aw, ka'n zawt ang e.. Lo mangang suh" Diteii chuan a ti a. Room atanga chhuak nghalin, "Pa, Âu Lawma te hna a laklawh deuh mi? A la haw lo va" tiin a pa a ko nghal lawng lawng a. 

"Ehe.. A va mak awm ve. Ka hawn hmain a hawn tawh kha.. " Pu Vanlala chuan a rawn ti si! Diteii chuan rang takin Dinfela a be nghal. A lo la dah busy zui. Hmm.. A pawi lo mai tiin a insiam sawk sawk a. Lawma te in lam panin a inkhalh chhuak nghal. A zu thlen chuan Duati tap a lo thlem mêk a. 

"U Zamte, ka pa chuan a haw daih tawh thu a sawi a. A rawn be miah lo che maw?" a ti nghal thâwr a. 

"Umm be lo. Ka'n call leh chhin aw" tiin a tho va. Duati chu Ditei'n a buaipui zui nghal. 

"A tlang thei lo. A mak, Dite, ka ngaih a tha lo ania" Zami mangang hmel chu hai rual a ni lo. 

Dinfela a call leh a,  pick up ve hram, "Nichin kha ka laklawh deuh a" a rawn ti nghal a. Thil awmzia Ditei'n an sawi chuan, "Mangang lutuk suh u. A rawn haw ve mai ang. Hei kan la laklawh lutuk a, keipawh ka rawn haw hma dawn lo aw' a rawn ti hmiah. Diteii beisei dan chuan a rawn mangang ve ang a, zawng tura chhuah a tum nghal a ring kha a nia!  A beisei loh lam daihin Dinfela chuan a ngai awlsam ta si. Chu chuan a tina zawk. 

"A buai sia.. Chuvang ania" ti rilru chungin, "U Zamte, hawh Duati te nen va zawng mai ang u. Mangang suh. Ka pa pawh ka'n bia ange" tiin a mô chu a hnem ve lehchhawng a. Duati tap pawh a bang ta bawk a. An pathum chuan an chhuak dial a. Zawnna tur lah hriat va ni suh. An rin zawn ve tawp mai a ni. Pu Vanlala pawh an be ta bawk a, ani pawh a dawr lamah a kal ve nghal. Khawpui chhunga han zawn risk tawp chu a bangbo thlak hle. Kawng dang a awm bawk si lo. Police pun mai te pawh a ngaih hmel. Khua a thim chhulh tawh a, an la hmu mai si lo. Rilruin ar bo a zawng tan. 

Zami phone a rawn ri ta ral ral a, hlauthawng zeta a'n en nak chuan Lawma lek!  

"Aw.. u lawm" a ti nghal mawlh mawlh a. 

"Khaw nge in awm daih. Ka lo haw a. In reh thap sia" a rawn ti!  Zami mittui a hnam sawk thei, a lawm lutuk chu tawng pawh a tawng tha thei lo. Hmanhmawh takin Diteii te nen bawk chuan an let leh ta a. Lawma chu a lo vei nghut nghut mai. Thinrim hmel erawh a pu hran lo. 

"In ka rawn thleng ţêp tawh tihin warehouse-ah khan ka pa sumdawnpui Pa Ruata kha kan kalh hnan tlatin ka hria a. Ka ngaih a tha thei thlawt lo va, ka va lêt leh alawm.. Mahse, tumah an lo awm lo va" a ti!  Diteii te an thaw huai mai. An ngaih ang em ema hlauhthawnawm chu a lo ni lo e. Mahse, ven deuh chu a ngai tan ta a nih hmel. Zami'n a sawm tlat vang leh an pa a rawn haw tlai dawn tho vangin chaw a ei ve nghal daih a. A damdawiin awm chungchangte an sawi kai a, "Fimkhur viau rawh. I la naupang si a, hrisel taka nau i hrin theih nan ei leh in pawh i fimkhur a ngai" Lawma chuan a ti mial mial a. Diteii pawh a bu nghat nghat mai. Zanriah ei khamah rei vak lo a awm leh hnuin hawn zai a rel ve ta a. Duati nen an in bye bye lauh lauh mai. 

In a thlen chuan an pa a lo la haw lo va. A inbual fai a, khumah hahdam takin an project a buaipui leh a. Thil harsa em em a awm tawh lem lo bawk a. Tin, Puia hi a rintlak bawk nen, film chang tur an duhthusam hmuh chiah an hmabak tawh a ni. A hriat loh karin a lo muthlu sek a,Bathroom atanga Dinfela rawn chhuak thawmin a tiharh a. A meng phawk hle. 

"I lo haw tawh law.. Ka lo muthlu ni maw.. Chaw i ei tawh ang tiraw? " a ti nghal siam siam a. 

"Umm ei tawh" teh hmuk a. 

"I chau em? " tha takin Diteii chuan a bia a. 

"Chau lo. Ka chhuak leh dawn a. Lo muhil rawh. Ka rawn tlai ang.. Emaw ka riak nghal maithei" a ti ta a. 

"A va pawimawh awm ve " Diteii aw pawh a dik zân lo. 

"Pawimawh khawp mai. " a ti chhum leh hmuk. An pa awm dan tehchai chu a hrethiam hlawl lo. A lakah lungawi lohna a nei a ni ngei ang. 

"Chuan Au Lawma kha kan zawn chhungin inah a lo haw a.. A lawmawm tak tak" Tha deuh chuan a ti leh a. 

"Nih chu, a lawmawm hle tak mai" a ti duh lek fang a. A be zawm châk ta bik lo. An ngawih chhungin Diteii te cameraman Sangzuala'n a lo call a.. 

"Dite, ka tibuai che em? Enteh, Puia nen buaina kan nei deuh a. Puia'n a lo sawi tawh maithei. Thil sawiho kan ngai a ni" a rawn ti deuh nghal mawlh mawlh a. Buaina dang bawk maw.. 

"A va zia lo ve, U Puia'n engmah min la hrilh lo. Naktukah inhmuh kan tum dawn em ni ang? " Diteii chuan a ti zangkhai vah a. 

"Nia ka lo beisei ang che. Ka studio-ah ti mai ang hmiang. I tan pawh a zia zawk ang. Duh leh ka lo hruai mai ang che" a rawn ti a. 

"Hruai ka ngai lo vang.. Ka lo kal dawn nia" tiin an inmang tha a. Dinfela pawh a inchei mawlh mawlh. 

"Khawihah ber nge i kal dawn? " ngaihtha vak loin Diteii chuan a ti leh ta nge nge a. 

"Mi ka hmu lawk dawn a. A pawimawh a ni tawp" a ti chang fak a. Biak zui ngam chi pawh ni lo chuan… 

Engmah sawi lo va a pasal chhuak chu a thlir tawp. A hrilhhai em em a, a pangchang takzet bawk. Ti nge hetianga a awm? A mak a ni. 

An in piah kawng kual kawngsirah chuan Dinfela chu a car chhungah a thu ngawi reng a. Hmalam bih ngur chungin steering a hum thlan dup. A mitmenga natna te chu en mai pawha hriat theih nghal a ni. A nupuiin a fa pai a duh tawh lo mah na a tih tawh nak a laiin vawiinah Malsawmi'n Diteii leh Sangzualate thlalak dun bakah Sangzuala'n Diteii hriat loha a thla a lak ruksak tam tak a rawn thawn a!  "In nu hi i ring em em ringawt a. Kan naua hian heti taka a buaipui chuan awm a awm a ni mai. " Malsawmi msg te kha a chhiar tirh lai ang chiahin a la mitthla thei. Malsawmi leh Sangzuala hi 1st cousin an ni. Sangzuala hian Diteii chu a lo star hle a nih a rinawm, khati zozai a thla a laksak ania. An pahnih thlalak dunah pawh hmangaihna vanga thikthu chhe tan chuan huat tham tling a awm nual. A then chu an inneih hmaa an lak te a ni. Dinfela tinatu ber erawh Diteii nen an inneih hnua Sangzuala Studio-a kut insuiha an thlalak dun kha a ni. Kha vang khan em ni ang a fa pai a duh loh? Malsawmi rawn thawn a nih vang khan a tirah chuan awih lohsaka namnul a tum. Mahse, khang thlalak zozai a thlir takah chuan rawn thawntu Malsawmi lam reng a hre chang tawh lo. An inkarah buaina thlen a tum a ni ang tih a rinna pawh khaw nge a awm a hre tawh lo. A hriat chhun chu Diteii leh Sangzuala hi an inngaina hle tih chauh. A nupui hian mipa thian nei mah se, a ngainat a phal lo. Tumah ngaina ve lo se, thian angin kawm ringawt se a duh. A lo ring leh lutuk kha a tisual ta em ni ang? Tawnhriat engmah a la nei lo va, Sangzuala mipa zei leh experience ngah lutuk tan chuan a lo khirh em em lo thei tlat. A ngaihtuah zawng pawn a nâ.. 

Zaninah hian khawiahmah kalna tur a nei lo. A nupui hmuh laia tawrhna hmachhawn a duh lo a ni zawk. Inpawh taka sawipui a duh laiin Diteii'n, "Ni e, rai ka la duh lo va. Bakah Sangzuala nen hian kan inngaizawng alawm.. Inthen ka duh' tia a sawi a hlau. Chu tiang thu hriat ai chuan amah chauha tawrha, tawrh dam mai a thlang zawk. 

Malsawmi chuan Dinfela nena an thlalak dun a la kawl te chu a en lawr dan dan a. A nui leh sak thin. A lo lêt leh ni atang khan a hmangaih hloh tawh kha neih let leh tumin a bei char char a. Mahse, Dinfela hian a lo phum bo tawh takzet aniang e. A beiseina sang tak khan hniam lam a pan zel chu a nih hi. Vawiin lama a thlalak va thawn khan nghawng eng emaw tal zawng a neih a beisei. Sangzuala phalna a la lem lo naa hre mah se, pawi a tih em em a ring lem lo. Dinfela chuan a hma khan nasa theihtawpin a atchilh thin a, tuna engahmah ngai lo ang maia a kalpel chu a tlawmngai takzet. Chona duhawm tak a ni. 

"Ka nei let leh ngei ang che. Lo inring reng rawh" a ti sap a. A hmel tha tak phêna vertherna lo lang erawh Diteii tan chuan a la hlauhawm khawp ang le.. Malsawmi hian mipa dang a hmu lo a ni lo. Dinfela kher kher hi a duh ngawih ngawih lah a ni hek lo, mahse, hmeichhe chapo tak a ni a, amah aia thlan zawk nei mipa chu hremna pek a duh a ni. Tin, Dinfela'n eng atan mah a tih tawh loh vang hian amah Dinfela chu a duh thar riau lehnghal. Khawvel tak hi chu aw.. Sap rama a awm laia Dinfela hming a thawi tham pawha a hriat ngai tawh loh nen. A sugar Daddy Jimmy nen nuam an chen reng a, pawisa a pe a, a duh a lei a. Kha kha khawvel nuam ber emaw a lo ti thin. A nihna takah chuan hna tihtlak engmah a zuk thawk lo. USA kalna remchang a hmuh rualin a chhuk ve râwih a, chuti maiin hna a zuk hmu lo. House maid te chu a duh bik der si lo va. Waitress lah a taimakna leh dawhtheihnain a tlin lo lam a ni. A zuk belh ber te lah Canada-ah an pem zui mai si!  A vakvai titih a. Mizo dang awm nual mah se, belh a tum lem lo. A chhe lo va, a zei bawk, chu chu hre karin, American mipa ten Asian an ît zia leh an ngaih easy zia hriain inphalrai mai pawi a ti ta lo va. A duh dan ang takin sugar daddy a hmu thuai a. Jimmy hi chu a pahnihna a ni. Flat pek a ni a, a hmingin hna chhe te chu a nei. Mahse, a hlawh chu tihtham a ni lo. A hlawh hmuhna ber chu a kap atanga a thawhchhuah a ni. Mahni inthiam lohna a nei hran lo. Mahse, a hawn a lo hun dawn ta a. A pawisa khawl sa chu a chhungte tan tiin a hmang duh ta bik lo va. Mizoram leilung a rawn rah leh chiah khan angel ang maia pawisawi lo a ni leh daih!  Ni e, sap ram atanga lo hawng, nula hmel tha leh changkang bawk si chu ngaihdan tawk nei mah se, a langah tuman an be chhe ngam lo. Ani lah lemchan hnehsawh turu a lo ni chhap nen. An vengah pawh a tlangtla leh thuai a. Zan inkhawm nen lam a han kal leh zat zat takah chuan a langsar pawl a rawn ni thei leh mai. Hetiang mai mai hi alawm.. Nun chu… a ho! 

Diteii chu Sangzuala studio-ah hahdam takin a thu a. A dul pawh a lang ve tan, a inhmeh phian a. Inchei a thiam vak lo naa an neihin a tlin hrim a, a mawipui mai zel. 

"Chuan, i hlawh chu i duhkhawp ta lo a.. A ni em? " zahawm ru deuh hian Diteii chuan Sangzuala melh chung chuan a ti sap a. 

"Enteh, dik tak chuan Leitlang Picture lam pawn thawhpuiah min sawm a, Shillong lamah thian ten min ko ve reng bawk. Mahse, in bula thawh nuam ka tih vangin ka hnar zel a. Ka share hi ka duhkhawp ta lo chu a ni ber. Cameraman ka ni satliah lo va, ka thil khawih hi a namai bik lo ania.. Dite" Sangzuala chuan a ti mawlh mawlh a. Thinrim hmel erawh a pu hran lo. 

"Puia chuan a remti lo thung tihna em ni? " hahdam zetin a lo ti a. 

"Umm.. Ama hlawkna chiah alawm a ngaihtuah. Tih tak takah chuan a hmaa kan film pahnih pawh Puia aiin i buaipui nasa zawk a. A hlawkna erawh Puia'n anih kha tel nasa zawk.. " awmze nei deuh hian a lo ti a. 

"U Puia sawn a rilru a hmang nasa thung alawm.. Ka hrethiam ve ve che u. Tihdan a awm ang. Ka share hi pawt hek mai ila" a ti ta a. Sangzuala chuan a melh kâwk ringawt. 

"Chutiang ringawt ka duh bik lo" a ti hmuk a. 

"Pawi ka ti hleinem. Kei chu ka pasalin min chawm hneh lutuk.. Tin, ka pa sumdawnna a la len belh zel bawk.. " chapo rawngkai miah si loin a ti a. 

"Ka hria.. Mahse, ka sawi tum i man lo. Dite, nangmaha kal hrang tur hian i thiamna leh theihna hian a tlin asin.. Ti nge Puia i belh tlat reng? " a rilru dik tak chu a puangchhuak ta nge nge a. 

"Chu chu ka thei rih lo. Nau te ka nei fel ve phawt ang a. Ka inzir belh leh pawh a ngai dawn a. Tun tut tutah chuan ka indan a rem lo alawm" a lo ti ve mai a. 

"Nia, ka hrethiam alawm. I chhuak a nih phawt chuan ka zui dawn che tih hria la" a mita rawn en kar chung chuan a ti sup a. Diteii chuan, "Ka lawm e.. Kan la sawi dun fó ang chu.. " a lo ti sap a. 

Diteii duh danin a share atang chuan Sangzuala share chu an tipung ta a. Puia erawh Ditei'n a hrilhfiah mai ang chu. Nupui fanau a nei tawh a, a lo duhâm ve pawh chu a dem hran lo. 

Sangzuala chuan Lunch a treat dawn a. A studio thlang lawka Restaurant hawn tharah chuan an chhuk dun a. Kawng an kan lai takin Dinfela motor a rawn tlan ve chiah!  Diteii chuan a hmu ve lem lo naa Dinfela chuan Sangzuala leh Diteii te inkai lai chu a hmu chiang kher mai. A thinlung na zawk zawk chu hrikthlakna tur dang hre hek lo. Chak zetin a tlan vak ringawt. A hah phah hle nghe nghe. 

Puia pawh Diteii'n an hrilhfiah takah chuan a nem ve mai. Diteii hian a dawr thiam ber mai. Chawhnu lamah a haw ve ta a. Anu damdawi leiin a peng kawi zawk. A motor-a a lut leh tur chiah chu a piah lawkah car leh bolero an insu bur mai. An pungkhawm chak zêk lehnghal. Diteii pawh chuan a va thlek ve hâ a. A tu amah a va hmu thei chuang lo. A hnu deuhah Traffic Police te nen an inbe rem tur kal hrang chu a va hmu thut. A ding châwih mai. Dinfela lèk lo niin… 

Dinfela bulah chuan Malsawmi a ding a, An bolero sut khalhtu a ding bawk. An rawn hmu ve lo. Diteii chu a khur deuh. Naute tan a tha lo vang tiin rei pawh en duh loin a tlan chhuak ta daih a. A tha khur erawh a reh fel har hle. Inah a lut a, a nu damdawi a pe a. Roomah lutin khumah a zangthal zawngin a mu thlawp.. Dinfela leh Malsawmi ding dun hmel kha a mitthlaah a rawn inlar zut zut. A maimi chhing tawp. A rawn lang leh zel si. Dinfela danglam chhoh dan nen a ngaihbel kual zel a, a zeldin ve pah bawk a. A na ut ut mai. Nizana a chhuah chhante, nupa nun an hman ngai tawh loh dan te.. Engkim.. A la rei lo viau naa engkim a lo thleng vek hman tawh a ni mai lo maw?!  A thawmhnaw a hlip a. Saruakin shower a va inphuhtir.. A dul a zút a. A tap hauh lo. Mahse, a mittui chu a rawn luang zaih zaih a. A pasal a hmangaih em em chuan a bialnu hlui lakah a lo thlim char char em ni? Zawhna a va ngah em.. A pasal chu rin a duh. A ringhlel bawk si. A buai vek.. Inbunruahna tur a nei ve bawk si lo. A tâwt lutuk chu au vak vak a châk kher mai. 

"U Her, zanin chu chaw ka ei peih lo aw. Vawiin ka thil ei ka la puar úl mai" tiin Heri a hrilh a. Tuma chimbuai duh loin roomah a inkhung hmiah a. A mu chawrh chawrh ringawt. Nau a pai lai kher khera hetiang thil a tawng hi nâ a ti a ni. He thil intanna niawma a hriat chu thil a eisual tuma a pum nat vak atang khan niin a hria. Damdawiin atanga an chhuah atang chiah khan a pasal chu a danglam chho tan. Thil ni lo lo a zeldin kual a, a pum nat chhan te kha a thil eisual vang ni loin a pasal leh Malsawmi te thiltih a nih te a ring rum rum mai. Mahse, a rai vanga hlima lawm ber chu a pasal a ni bawk si. Ama tawkah thil a ngaihtuah nasa kher mai. 

Zan dar 9 bawr velah Dinfela chu a lo haw a. Zu rim a rawn nam ta bawk!  a meng sen rûm mai. 

"I va tlai ve" thawh pawh tho duh bik lo vin a lo ti a. A aw pawn ngaihno a bei vak lo. 

"Nang angin mitmei ka veng ve peih lo va" a ti nghut. Diteii a meng phar deuh. Dinfela chu a phun zui bul bul a. Eng nge a sawi pawh a hriat loh. 

A va inbual phur phur a. A thawmhnaw hak tur erawh a lo dah chhuahsak hram. A zawi ngawih ngawih mai. A inthlak fel hnuah, "Mu hrang tawh ila a tha ang. Sofaah hian ka'n mu ang e" Dinfela chuan a ti ta a. Diteii bengah chuan ring tak a ni. 

"I thu thu alawm" a ti ve ta hmak. Bakah a pasal bula mut chu a chãk teh hûrh bik lo. Malsawmi kuah hnu leh khawih hnu kha a ni miau a. Sofaa Dinfela a insawn hnu chuan phone a khawih malh malh a, call a lo kal a, rang zeta lain, "ka mu chiah.. I mu tawh em? ' a ti sur sur a. 

"Umm kei pawn ka ngai che lawm.. Aw workshop-ah ka dah a. Naktukah ka lam mai ang" a ti nghal mawlh mawlh bawk. Diteii a awm ve tih reng a hre chang lo. Nâ ti zeta lo thlira lo ngaithla ve rengtu a nupui lam chu a hawi pawh a hawi chhin lo. 

Sana chek ri tlet tlet chu thawm awmchhun a ni. Diteii chuan lukham a hmer ngat ngat. Tah rik loh hram a tum, a insehruh na lamah a hah vek tawh bawk. Thla rei lote an innei a, nau a pai ve chauh a. Phatsan a ni leh ta mai maw? A mipa rin ber chuan awlsam takin a bum leh ta mai maw? Ti nge vanduaina hian a kal kân ve theih miah loh le? Khawvel hian a thîk em ni? Heti taka dinhmun chhiaah a dintir bik ziah.. A thil chân leh hloh tawh te a ngaihtuah a. A khawvel nun hmanah lawmna tur nei fô mah se, a tam zawk chu lungngaihna hun a ni. Teteii vangin nun hrehawm reng rnegin a nulat lai hun tha a lo hmang zo tawh a. Tunah a duhthusam khawvelah a cheng ve ţan chauh tihin bum a ni leh a. Ni lo, bum a ni lo. Phatsan a ni zawk e. Dinfela chu huat a duh a, mahse, haw tur pawhin chakna a nei lo. 

Sofaa mu meng kar pasal khawngaihthlak tak pawh hi kan dem ngawt thei chuang lo. Amah leh amah a inhua a, a indem a. Patling lo a inti bawk. Thil fiahna engmah awm lo va chuti maia inrunluihna a kalpui chu pa lo a inti a. A beiseina kil khatah a lo rin dan leh ngaih dan ang hian Diteii chu awm ta lo se, a awm dan avang chuan hrehawm a va ti dawn em tih a ngaihtuahna chuan a tichau hluah hluah ve tho. Diteii chuan tina mah se; tihnat ve kher hi a duh lo. Mahse, thikthu hnawksak zet leh zeldin thubawl chimawm zet chuan a inthununtir thei si lo a tin ni. A muhil bik hauh lo. Malsawmi nen khan engtin an va awm lo. Amah Malsawmi kha chu a inhawng húrh hûrh viau naa.. a thei tlat lo. A duh lo a ni mah zawk ang chu. Diteii chauh lo chu a thinlungin a la ti ve ţâng ţâng a. Diteii hian phatsan tak tak ta pawh nise, mi dang a pakaisan nghal mai theih a ring lo. A hmangaih êm a ni. 

An nupa nun chu a nuam lo ru ta hle. Mahse, chhungkuaah an tilang lem lo va. Bakah an lo chík vak lo bawk nen.. Rinhlelh pawh an ringhlel kher lo vang. Diteii erawh hmuh theihin a tla nghal kûam mai. "Ka thil ei a tui lo va" tiin a pha mai a. Mahse, Dinfela chuan a rukin a ngaihven reng. Nau tihtlak te hi a lo tum leh em ni ang tih ngaihtuahna nen… aa.. He ngaihtuahna hnawksak zet hian a kiansan thei si lo. An va hrehawm nupa tak èm.. 

"Ngati nge maw Maheri chu aw.. A dam loh teh tlat le.. " Pi zawmi chuan a ti niah niah a. An nula Heri chu ni hnih lai a nuamsam lo tawh. Inentir an sawi lahin injection ka hlau tih ţanin a ţang a. Buaithlak viau. Hriati a hah phah angreng viau. 

"Vawiin chu ka inentir dawn a, U Heri pawh ka rualin kal rawh se" Diteii chuan a ti a. Hriati hian bai siam a thiam viau naa thil dang hi Heri ang êmin a thiam ve lo va, Amah pawh a inthlahrung viau reng a. 

"Nia hruai tak teh. A ţha lo tlat, hetia awm tawp te chu.. Thisen te la se la, malaria te pawh a ni thei" Pu Vanlala chuan a lo ti ve a. Dinfela erawh a ngawi reng. 

Heri pawh an nawrluih tak tlat avangin a insiam ţuih ţuih a. A bialpa Zuia a lo kal ve dawn bawk. A bialpa hi veng thenawm ami a ni a, chhungkaw khawsak sang tak ni lo mah se; pangngai ve tak an ni. Tlangval fel tak, ruihhloa fihlim, An section-ah pawh OB ni thei ngat a ni a. Thalai pawlah pawh committee member ni phak a ni. Heri nen hian facebook kaltlanga inngaizawng an ni ve a. Heri hi nula nun tlang tak, zep leh thup nei lem lo a ni a, mi ina awm anih thu leh an chhungkaw dinhmun te pawh hrilh tlang vek a ni. Mahse, a hmel a chhe lo bawk a, an lo inbe rei tawh nen, dinhmun vang ringawt chuan Zuia paw'n a lo hnawl phal bik lo va. An ni chho ta kha a nia. Kum 2 dawn an inzui ve tawh a ni. Heri hi A putea te bula seilian a ni a, a nu hian pasal a nei leh daih bawk nen, a nuamsa vak bik lo va. A putea lah zu ngawlvei a lo ni chhap bawk a. Pawl 12 a pass a, college kal zawm turin an dinhmunin a zir ta lo nen, a tirah mi hausa ho inah daily-in a inhlwwh thin a. A rei a, an inah awmin awmpuiah a inlet ta hial a. Chhungkaw pahnih a hrawn hnuah Pu Vanlala te inah hian a awm ve a. Chhuak tawh loin tihian a awm ta ngat ngat a ni. Pu Vanlala hian chhuah a phal tawh loh bakah Diteii rawn awmtirh lai khan chhungkaw memberah an lalut tawh a ni. Mahse, amah hian a dinhmun leh nihna a hai ngai lo va, a tihtur chu tha takin a hlen chhuak zel thin. Nula hrisel tak a ni thin a, tuna a dam lo ve tlat pawh hi mak an ti viau reng a. An ngaihtuah em em a ni. 

An kal dawnah Dinfela'n, "Naute chu a tha ang tiraw? " Diteii bulah a ti sup a. 

"Ka beisei.. Tha lo se i duh anih ngawt loh chuan" a lo ti hmak. Dinfela a hrilhhai letling. Diteii te an kal nghal ta mai bawk sia. 

Zuia leh Heri, back seat-ah an thu dun a. An titi sep sep. Zuia hian a rawn rim fó vangin an inhre ţhang tawh tho va, Diteii lakah an zûm em em tawh lem lo. Damdawiin an thleng a. Diteii chu a va lut nghal. Special a ni bawk a. Hun a duh rei ve lem lo. 

"Thil i ei that a ngai anih hi.. Heti chuan naute tan a pawi thei ania" Doctorin a ti a. A lo thaw hawk ringawt. 

"Ka thil ei hi a tui lo va" a ti sap a. 

"Vitamins ka chawh ang che. Iron pawh i ei tha vak lo anih hi.. Lo ei leh deuh rawh aw.. Chuan rilru hahdam taka i awm a ngai.. " a hmel dâng bai melh chung chuan Doctor chuan a ti leh a. 

"Umm ka lo tum ang" a ti sep a. A mitmeng a dava riai mai. Doctor nen hian inhre ţha lutuk lo mah se; an chhungkaw dinhmun vangin inhmelhriat chu an ni tawh a. Doctor chuan eng emaw tak buaina a tawk aniang tih rinna a nei deuh. A hmaa a en te chuan a ţha hle si a. 

An inen zawhah Maheri te bulah chuan a va kal ve a. An luh a lo la hun lo deuh a. An han nghak leh rih. Heri chu a tla dâwk mai. Amah mi thau mi a lo ni lo sa bawk nen,  a cher ţhai mai. Zuia'n a va luhpui a. An rei zêk mai. An lo chhuah chuan, "A ţha vek em? " a lo ti var a. 

"Umm ţha a ni mai. Thisen lak tir a ngai a, chuan HB te test a ngai bawk. Test tur neuh neuh a awm. Zûn pawh an ti tak. Chuan,thisen test a ngai bawk" Zuia chuan a ti zung zung a. Heri erawh zan lama a kawthalo nen a chau a, a ţawng peih meuh lo. Test tur ang ang chu an han ti zung zung a, a ţhen chu a tuka ngaihven ngai te a lo ni a. A HB pawh a lo hniam hle a lo ni. Thisen test dawnah chuan a hminga counselling neih a lo ngai a. Amah a chau bawk nen, a tuk lama test ţhenkhat nen tih mai an titlu ta a. An haw leh ta phawt. Rin loh deuhin Dinfela a lo haw tawh. Hriati nen eirawng an lo bawl zui!  Diteii chuan mak a ti viau. Pi Zawmi hi a la che ţha thei meuh lo va, awmhmuna eng emaw lo khawih neuh neuh bak han chetsawn zung zung kha a la ti hlei thei lo a ni. 

"Naute chu a ţha ang tiraw? " rooma a awm lai chuan an pa chuan a rawn ti lut a. 

Ngei hmel zeta melh râw pahin, "A ţha. A paitu hian ka zir êm a a ţha aw" a lo ti sak sak a. Dinfela a tîm dûi mai. 

"Chutianga i huatthu sawi ka tum hran lo ania. Thil i ei ţha si lo va ka lo hlauthawng a" a ti nem duai a. 

"Anih tak chu" a lo ti nghat. Hman ang kha chu nise chutianga a titau chu a pasal chuan a lawmin a thlem leh duan duan awm si a. Tunah chuan naute a duh loh vangin a ţhat leh ţhat loh a zawt sek a. A ning. 

Dinfela thung chuan Diteii thinur hmel chu ngaihtuahna dang daihin a ngaihtuah thung. Naute a ţha chu Diteii a lawm lo niin a ngai. Ţha lo se chuan a lawm zawk ngei ang.. Nupa ni si, engmah sawi dun thei lo, thurûk kawl ve ve hi nupa hlimna daltu a va ni chiang tak êm… 

Zanriah an kil lai chuan, "Pa, kan film chan tur velah zan hnih ka zin chhuah lawk a ngai dawn a. Motor saw ka keng thei ang tiraw? " Diteii chuan a ti a. Dinfela a lo phu zawk. A zin dawn tih a hre ve miah lo. 

"Ngah nge i ken theih loh ang?  I ta alawm.. " Pu Vanlala chuan a lo ti awlsam êt a. 

"Mahse, fimkhur rawh aw. Nau pai i ni bawk sia, inpa hian a va hruai thei mai lo che mawni le.. Mama.. I thei mai lo mi? " Pi Zawmi chuan Dinfela en chungin a ti a. 

"Thei tlat lo.. Tunlai bungraw lo thleng thar nen, zirlai neih thar nen ka buai lutuk a" Dinfela chuan a ti ve hmak. An boruak hre miah lo tan chuan engmah danglam a awm hran lo. Tun laiah mahni hnaah ţheuh kan buai hlawm tawh si a. 

"Ka thei mai ang. Sangzuala pawn a khalh thei tho vang. Anih loh pawn a motorah ka bet ve thei mai ang" Diteii chuan Dinfela rilru hre miah loin a lo ti a. Dinfela a kham nghal hmak. Mahse, inthununin, "Nia, sangzuala a awm tak alawm.. " a ti thluam a. A thinlung erawh na tak a ni. 

Roomah Diteii a insiam mial mial. Reiek-ah an zin dawn chu a nia. 

"In zin tur thu pawh ka lo hre ve lo va" Dinfela chuan a ti ta nge nge a. 

"Hre turhoin an hriat chuan a tawk mai alawm" a lo ti leh hmak. Diteii pawh hi a tleirawl lai ang kha a ni ta lo. 

"Ni mai e.. A ţha vek e. Inenkawl ţha la" a ti liam puat a. 

"Nia.. Nangni pawh" a ti leh kher.. Nangni pawh a tih danah Malsawmi a hmer tel tih Dinfela'n a hai lo. Mahse, insawifiah ţul a ti lo. Sangzuala bulah a kal dawn tih a hriat khan a rilru a mang zo va, huatna in a khat a ni ber e. 

Nupui te nau pai lai pawh a zinnaa thlah thei lo pasal chu Diteii chuan a hua. Chuti taka a lak aţanga inlahrang duh chu kal hrang ang hmiang. A thei ve tih lantir a tum tlat a ni. Hmun hran ve vea mu chungin an ngaihtuahna an kawm dun mawlh mawlh mai. 

A tuk zingah Sangzuala leh Diteii chu Reiek lam panin an liam ta kha a nia. Dinfela chu a mood a chhe nileng ngei ang le.. 

Zuia leh Heri pawh Damdawiin lamah an kal leh a. Vawiin chu tlemin a zia ta deuh bawk. Mahse, nizan lamah vawi hnih lai a tlan leh a. A la chau deuh tho mai. Thisen an test hmain counsellor an va hmu phawt a. Ani chuan thu mak deuh deuh a lo zawt a. A chhang liam ve mai mai. Hei chu thisen test dawna tihtur kha a ni ve a. A tan chuan awmzia a nei ve vak lo. Result nghah chhungin thil an va ei a. A ei tlem angreng. Zuia chuan a theih ang tawkin a duat ve hle. Inneih te pawh an sawi ve reng tawh a, mahse, Diteii hian fa nei phawt se an ti ve deuh a. A chhan chu an buai ve dawn si a, Hriati a la nau deuh bawk si. 

Result chu an va ngaihven ta a. Counsellor-in a ko lut a. 

"Thiannu, hahdam deuhin awm rawh aw.. Ka thu hrilh tur che hian a ţhawng maithei che a. Khawngaihin lo inthunun hram hram ang che. Vanduaithlak takin i positive tlat mai! " titu chu Heri chuan a melh ngawt ngawt. A fiamthu a nih ringin a han melh chiang ngial thin. A titak tih chu a mitmengah a chiang ngang si. 

"Dâwt a nih chu! " a ti chhum hmak. A rilru a mang vek! 

"A pawi ka ti lutuk. Mahse, HIV hrik an hmu tlat si a ni. A pawi ka ti takzet a ni" a ti mawlh mawlh a. A khawngaih hmel takzet. Heri zawk chu a hamhaih atalângin awmdan tur leh sawi tur pawh a hre lo. Thil ni thei awma a ngaih miah loh chu a chungah a thleng tlat si.. Engkim hi dâwt a ni tiin a inhnem mawlh mawlh a. Mahse, thil thleng mek a ni miau si.. Ţah pawh a ţap thei chuang lo. 

Tichuan, Councellor chuan dam thlapin pangngai takin a sawipui chho leh ţan a. A sex hmanpui te thlengin.. Zuia bak tumah sex a la hmanpui lo. Tihtheih awm tawh hek lo, a inpuang fai ta kêlh a. Zuia'n pawna a nghah thu te thlengin. Tichuan, rang taka ko lut vein thil awm dan chu an han hrilh ve ta a. Zuia pawh chu a hrilhhai kher mai. A hmel chu a tla nghal kâwk kâwk a ni ber a. Ani pawh test ve turin an ngen a. Test lo pawh nise a rilru a nuam dawn chuang lo va,  a test ve ta nge nge a. 

Chutah chuan a ni Zuia chuan inpuanna a neih tak ni.. Tlangval fel leh ruihhloa fihlim, tuman Hiv+ tura an ngaih loh khan a bialnu a kai ta tlat si a.. 

Ni e, Heri nen an nih tawh hnuah ni khat chu a thawhpuite nen picnic an rêl a, mi sawm vak pawh an ti lem lo. Heri hi a sawm ve nghe nghe, mahse, khami ni tak kha Nunui thih cham emawni kha a lo nih vangin Heri chu a kal ve thei ta lo va. Tichuan, an va picnic a. Chutah chuan an thiannu Julie hian a thiannu Kimi a tih mai hi a rawn hruai ve a. A thawhpuite chu zu pawh in ve thei mai an lo ni bawk a, an in reng bawk a. Hmeichhia pawh an bang chuang lo. Kimi pawh chu mikhual ber e ti lo chuan a in thei phian a. An zingah a chuang ve ve an lo ni bawk nen, an papek deuh tawp leh nghal. An kal darh a, Kimi chuan a ta neih deuh tlat a. A zui ve zel si. Bakah tlangval pangngai tak ni bawk si chuan a buaipui lo thei bik lo va, Kimi rui luak te chu a buaipuiin tui te a leih huh a. An inbuaipui nasa hle. 

Chaw ei khamah reilote an han intihlim ve leh a. Chutah chuan amah leh Kimi chu chance an pe nge an kalbosan ta diak a. Kimi lah a inha bulin a taksa a lang tam si, amah a lo îtawm ve pur mai nen.. Tum loh deuhin an chesual ta mai a ni awm e. Chubak chu Zuia chuan rinhlelh tur a hre lo. Kimi lah a thangna chin a hre tawh hek lo. An inbe zui tawh bawk si lo va… 

Heri rilru natzia chu a ţap tlawk tlawk ringawt. Zuia chu a awmah a chum a, a sawi nawk nawk bawk… Zuia'n ngaihdam a dil bawk. An boruak chu a rit takzet a ni. 

Condom tal lo hmang se a ţha tur.. Hei hi a ni Mizo te zingah HiV hluar chhan pakhat chu. Mi tam tak ngaihdanah chuan Hiv chu Ks, Addict leh tlema mi khaw lo kan tih mai awm ţha duh lo deuhte vei turah kan ngai ringawt a. A ni lo nasa.. Kan zingah hian a cheng reng tawh zawk. Kan bula ding, kan rin ngawih ngawihte hian an lo pai ru reng thei tawh tlat.. Chu chu hre si lo vin rei tak an dampui a, mi hrang hrang sex an hmanpui phei chuan.. Rapthlak khawpin a darh dawn tihna a nia. A pawi a ni. Sex hi hman loh tur tiin kan inkhap ngawt thei si lo va, Condoms hi pai reng thei ila a ţha ber mai. Condoms pai zak tawk vela inla famkim hi an hlauhawm tawh zawk. Fimkhur tluk hi a lo awm lo ve… 

Maheri hringnun chu a vuai ta.. A chul ta hnúp mai. Beisei tur reng reng a hre ta lo. A zak bawk si. Amah ai mah chuan Zuia hmabak a la kó zui.. Mi khawngaihthlak inhmangaih si te hringnun tak chu aw… 

"Tu nge i bulah awm? " Dinfela'n Diteii a be mek. 

"Tumah tunah chuan" a lo ti ţha ve mai a. 

"U Maheri kha a lo Positive a.. Hiv " a ti ta a. 

Diteii a chhing sawk.. "Lo ţanpui rawh aw.. Lo hrethiam la, lo veng rawh. Kan unaunu a nih kha" a ti tham ţíak a. 

"Aw le" a lo ti ve mai. Chu chu an inbiak ve chhuna an inbiak ţhat vena ber a niawm asin. 

"Chuan naute kha i chhiat ang e aw" a la ti hram… hei zawng a pawi ta. 

Vin zet hian, "Nau ka chhiat in duh vangin Malsawmi nen tikhan in ţangrual a. Nau chhiat anga min lantir tumin. Tunah ka chhiat hlau ber angin rawn awm kual vel lo mai teh.. Engtin pawn chet la mah ula, ka naute hi ka hring dawn.. Chuan, nau ka neih veleh ka chhuak ang a.. In innei dawn nia" a ti ta tân tân a. 

Dinfela a hamhaih.. Sawi tur a hre lo… " I nihna sawi suh" a ti thawp sat. 

"Mai mai che u hian… ka naute hi ka ta a nih hi.. Hre reng rawh" a rawn ti leh. 

"Dite,  ka rawn kal dawn.. Ka lo kal" tih leh phone dah a rual.. 

Diteii chu a ngaihna hre lo zetin a ding khawng reng a.. 

(In chawh 😁