D Rose - 2

D'ROSE.. (Chapter-2)

Ziaktu : Toni Râlte

"A sen ve ve.. A sen ve ve.. Huhu.. Lalpa, ka lawm e" Diteii chuan a pasal hlim lutuk chu hmuhnawm tizetin a lo melh tawp. Ni e, pregnancy kit-ah chuan rin sen pahnih a awm kalh tlat alawm. A rai!  Diteii'n Dinfela fa a pai ta. An khawvel thar bultanna chu.. 

"I lawm ve lo mi? " Dinfela chuan an nu ding ngawi reng chu mak tin hmel zet hian a en a. Diteii chuan fiamthu thawh a chak tlat, "Lawm viauna tur a awm em ni? Ka la nalh a, rai puar ka duh hleinem" a lo ti nghat. A nuih loh nan a heh a pet a. 

"Zoi" a ti tuar. A thinur apiangin Zoi tiin a ko thin. 

"Heii, i duh lo tak tak maw? Ti nge i sawi loh a? Tunah chuan i rai tawh sia" mangan hmel zeta a tih takah chuan Diteii a insum zo ta ngang lo. A nui chhuak ta hawk a. 

"Lal apa, i fa pai aia thlakhlelh leh chak ka neih i ring em ni? Nang aiin ka hlim aw" tih pahin a va kuah a. Dinfela a lo hamhaih lek lek, a'n hriatchhuah takah chuan, "Zodingpui.. Ka vèl dawn che" a ti a. A sawi zawh rualin Diteii a tal pit vat a, a tlanchhe zui nghal. An inum ta ziai ziai a. In hnuaiah an in um thla. Pi Zawmi leh an nula pahnih an lo awm a. An lo nuih ve tawp. 

"Nu, enteh, ka rai a maw? Lalapa hi a lawm miah lo nia" Diteii chuan a ti a. A nu phênah chuan a ding nghal. 

"Ehee.. Min lehpuh hlauh zawk.. Mawina, ka nu, amah hi a ngui nghal vek ania aw.. Hau rawh" tih pahin a nu phêna ding a nupui chu a va kai dâwrh a, a awmah a bei thlawp. Hmuhnawm ti zetin an lo thlir thap thung. 

"Nau i keng ve tawh maw? Ka va lawm tak em.. Ka fanu" tiin pi Zawmi chuan Diteii sam chu a va chul a. An nula tawng duh zawk Heri chuan, "Yess.. Nau awm tur ka nei dawn ta. A van nuam tak" a lo ti ve chul bawk. Tupawh chu an hlim a ni tawp mai. Pi Zawmi'n an pa a call nghal bawk. Pu Vanlala pawh a aw atang chuan a hlim hle tih a lang. Naute lo piang tur chuan hmun pawimawh tak a luah tan der mai. 

Mike-a te nupa pawh an inthen fel ta chu a ni mai a. Akimi chu a demawm miah loh, thil tam tak a ngaihtuah a, a chan chhiat dan tur pawh a hria. Mahse, thinlung dam taka a pasal pawm leh tur chuan hun tam a la mamwh dawn si a. Bakah hmeichhe laka rinawm loh san ni se tlem tal chu a hrethiam mahna. A mipatpui lakah a phatsan miau si a. Chuta karah HiV a la positive zui. A pawi tih bak sawi tur a vâng khawp mai. Bungrua pawh an la fel a, Mikea chhungte pawn thil nihna dik tak an hriat takah chuan an dem bik lo. An fate avang erawh chuan chhungkhat an la ni zui zel ang chu maw.. 

"Hmuh che ka duh takzet. A pawimawh ania" Dinfela chuan a msg dawn chu a chhiar nawn sek a. Vawi eng emaw zat he hmeichhia hian hmuh a rawn dil tawh. Mahse, chhuanlam a siam zel a, mahse, chumi tum erawh chuan engmah pawh a thleng dawn chuang lo va, hmuh ringawt chu eng nge a pawina tiin a inthiam chawp a. Hmu tur chuan thutlukna a siam ta. A vawi khat nan a nupui chu dawt a hrilh a ni. 

"Ka thian te nen chaw kan ei khawm dawn a. Min lo nghak suh aw' tiin. 

Malsawmi nen chuan Ophel Hotel-ah Dinner ei turin an inhmu dawn a ni. 

Malsawmi zet chu a lang nalh kher mai. Sap ram return a ni bawk a. A inla vah ni hian a lang. Hotel an thleng rual chiah lehnghal. An dawhkan an kil hnuah, "Nupui te i lo nei a.. " Malsawmi chuan ngaihsam zet hian a ti a. 

"Nia, ka vannei khwwp mai" Dinfela'n a ti thung. 

"Engpawh nise, ka lo haw leh tawh a.. Hei.. He khawpuiah hian nangmah ang ka hmu miah lo" tiin an inkar bul a han tan nghal pang a. A mizia hre thang tawh Dinfela chuan mak a ti lem lo. 

"Keimah ang te chu an vâng ang chu.. Keimah ang lo tak an tam zawk alawm" a lo ti ve salh. 

"Tak taka i inla puitling ve ta hle mai. Kum tam a la liam loh nen"

"Chhungkaw din tawh chuan a ngai alawm.. Taka.. Fa kan nei dawn asin" hlim zet hian a lo ti hmiah. 

Malsawmi chuan a duh dan angin thil a kal dawn lo tih a man thiam nghal. A rin dan chuan amah a hmu anga, a danglam leh vek a beisei a, chutiang chu a thleng ta hauh lo. Thlen a hnèkin a nupui chanchin a la sawikhum ta deuh deuh. Eitur an rawn chhawp a. Dinfela chuan hmelhriat hmuh a hlau ru viau. 

"Tak tak ana ka'n uang vak a nih kha. In nu chu min la hmelhriattir ve rawh aw" Malsawmi chuan a ti dam diai a. A thangkam dang a ni tih Dinfela hian a hre ngût ange maw le.. 

"Tehreng mai. Ani pawn a hmu chak ngawt ang che" a lo ti ve a. 

Titi phungleng dang sawiin an phul ta hlut a. Rin ai tak chuan an inkawm thei e. Dinfela huphurh ang aiin a tluang daih. Tunah chuan Malsawmi hian a laka beiseina nei niawm taka rawn biak a sim tawh ang chu.. Motor a ken ve tho vangin thlah pawh ngai lovin anmahni in lam hawiin an inthen hrang zui ta a. Zan dar 8 velah in a thleng a. Room a pan nghal. Diteii chu a lo inchhawk hnawk rum a, an project a lo buaipui leh mek a ni ngei ang. 

"Naute, i va buai ve" a bianga chuk zauh in a ti a. 

"Ee.. I lo haw tawh law.. A nuam em? I chau em? " a lo ti nghal sawt sawt a. 

'Chau lo ve.. Ka thiante nen kan ni tak tak lo. Malsawmi nen alawm kan ei dun" Dinfela chuan a ti tlang ta hmiah a. Diteii chuan a melh deuh hâ.  

"I laka zep neih ka duh lo. Nia, min sawm ngun sia, ka laka beisei a neih loh nan ka kal ta mai anih kha.  Tikha chuan i tan ka rinawmzia hriain min beisei fô tawh lo vang" Inringtawk zet hian a ti leh a. Diteii a ding a, a pasal kawnga kuahin hnai takah a han melh sawr sawr a, "I rinawm dawn tih ka hria alawm.. Ka ta chauh i nia" a ti sap a. Fawh chakawm zeta a hmui rawn tipawrh chu a pasal tan hnar phal rual a ni lo. A fawp a. Mahse, a va inbual leh phawt. Zan dang zawng zawng aiin nupa nun pawh an hmang nuam e. 

Lawma pawh Zami'n a enkawl hneh bawk a, a zia chho hret hret mai. Dizepum a ei vang erawh chuan addict mai te a hlau thin. A tukah hian a hai deuh chhawp zel a, chuvang tak chuan eitur a ei that pawh a ngai. Zami lahin a ngaihtuah si, nupui fel tak a nei chu a hnukulh lek lek fô, a nupui hmasa Teremi nen chuan tehkhin tlakah pawh a ngai lo. Duati pawh a duhawm telh telh a, school a lut tawh bawk a, Apa hna kal tur hian a hruai nghal mai thin. Mahse, a natna vang chuan Zami a hlauthawng a, an thenawm naupangte rualin taxi-ah a kaltir tawh thin. Lawma erawh bike in a kal mai zel a, motor an tuak ve mek a, an nei ve thuai ang chu. 

"Anu, nuuu" Duati school bang chu a rawn nûr khawp mai. Zami chuan a dawr bungraw khawih lai dahin a ngaihven vat, "Duatpui, ti nge i tah? Ti nge? " a ti nghal sawk sawk a. 

"Ih.. U zuala ten 'nu leh pa i nei tawh lo' min ti nih kha.. Hihihhh.. " a tap uar kher mai. Zami thinlung chu deng na tak a ni. Chutiang thu chu an vawikhat hriatna leh tawnna a la ni miau a. Zuala a tih chu an thenawm nau, Duati aia kum 3- vela upa a ni. Engtin nge Duati nu leh pa an ni lo tih a hriat theih? A awmzia chu a nu leh paten naupang hriat laiin chu thu chu an sawi tihna a ni mai. 

"A va zak lo ve, Zuala chu ka beng dawn.. Ngah nge ka duatpuii hi dawt a lo hrilh vak a.. Hmm.. Bang rawh le.. Nula i nih tawh kha" tiin a thlem heuh heuh a. Duati pawh la inhnit fuih fuih mah se, a bang ve mai. Eitur te an han inpek hnu chuan a buaina hre chang tawh lo niawm takin a toys khalin a hlim leh hle tawh. Zami erawh a lung a dam mawlh lo. A lo lian chho anga, thudik a la hre ngei awm si a, anu chu a pa in a thahsak tih hria se na a ti dawn lutuk, a fanu hi tuman engtikawng maha an tihnat a phal lo. A thei a nih chuan thudik pawh zep tluan thak a thlang zawk. 

Dawr a khar sawk sawk a, Duati bulah, "Tikhan lo awm la, lo chhuak suh aw.. Sawtah ka va kal lawk ang" a ti a. Zuala te in lam panin a kal ta nghal a. A va luh chuan Zuala tak chu a lo awm lo va, anu chu puan thuiin a lo awm a. An pa erawh hnathawkin a chhuak a ni maithei. 

"Lo leng rawh" Zuala nu Rini chuan a lo ti a. In hnaih viau e ti lo chuan an inlenpawh tehchiam lo. An in leh Duati te in inkarah in pahnih a awm bawk. 

"Englo ania, thu dang rawn sawi em em pawh ka tum lo. Vawiinah Zuala khan Duati bulah nu leh pa pawh i nei tawh lo a lo ti a niawm a. A rawn tap haw a. Kei chu ka duh miah lo ania hetia intih hi. Nu leh pa chu hei min nei alawm.. Ka ngaihdan chuan naupang an nia, Zuala khan mi dang ka a tangin a hre dawn lo. Nangmahni ka atang bakin, naupang bulah hian thil sawi fimkhur tur a ni reng a, an hriat ang ang hi an sawi chhuak duh riau a.. A pawi leh pawi loh an thliar thiam ve tawh si lo va. In hriat angin Duati chu a rualpui zingah pawh fing fel, thil man chak tak ania, kha thu khan amahah nghawng te pawh a la nei thei.. Chuvang chuan lo fimkhur tawh ula ka duh a ni" tlang takin a ti ta hmiah hmiah a. Zami hi a chawr chhuahna kan hre tawh a, a duh lohna lamah chuan pawisak nei lem lo, huaisar ve tak a ni bawk a. A fanu tan chuan nu nasa nih a hreh lo hle a ni. 

Rini chuan, "Awii Lalthanzuala chuan chutiang chuan a lo ti a maw? Keiman ka'n vel ang e.. Mai mai.. " a lo ti hluai a. Ngaipawimawh tak tak hmel erawh a pu hran lo. 

"Nia, kei pawn hauh ka duh a. Mahse, in lo hauh chuan a tawk mai" Zami chuan a ti a. 

"A thuhrimin thudik lo pawh a ni chuang lo va, nang pawn i lo huat viau le.. A la hre dawn tho tho alawm" Rini chuan a ti ta chiah a!  Zami a ter at, mahse,  a insum leh hram. 

"Thudik a ni emaw ni lo emaw hrilh a tul chuan kei nin kan hrilh mai ang. Hlawkna awm si lo va, kamtam viau hi a tha ngai lo ania" chang zet hian a ti ta sak a. 

Rini lah lo diau hek lo, "Chu min rawn mawhpuh vek ringawt a ni maw? Dawt kan sawi pawh a ni lo va.. Thiam lohna kan nei lo. Keimah ngeiin ka rawn hrilh nghal loh" a lo ti ve hlawih hlawih a. 

Zami chuan, "A tha dawn lo, ka'n chhuak phwwt ange, mahse, i khua te a sik hluah hluah dawn anih loh chuan mi dang chanchin hi lo sawi vak tawh lo la a that ka ring. I pawisawi miah lo te i hliam thei ania.. Hrereng rawh" a ti chang fak a. A chhuak zui daih. An inbakkaih dawna a hriat vang ania a chhuah. La tawngkhum chu a chak zek zek. Mahse, an pa lo haw phawt se, mipa ve vein sawifel se a duh. 

Zanriah an ei laiin Rini pasal Sanga a rawn lut a. A rawn sen tal mai. Duati a awm ve vangin Zami khan Lawma bulah engmah a la sawi lo hrim hrim a. 

"Lawmzual, in nuin vawiinah kan nu a lo ankhum chiam a niawm a. Ka lung a awi lo teh ania. In fanu in fa tak pawh ni hlei lo chungchanga thudik kan sawi vang maiin.. Ngaihdam a rawn dil loh chuan kan nasa viau ang" a rawn ti lut nghal bawrh bawrh mai le.. Lawma phei chu a hrilhhai letling. Zami chuan Duati chaw ei lai chu pawm vatin, roomah a va luhpui a, "Duatpui, hetah hian lo awm lawk rawh aw. Zuala pa te nen khan thil kan sawi lawk dawn a. A rei lo vang" a ti a. Duati chu naupang fing tih takah hrethiam takin a lo bu nghat nghat. A toys a phawrh nghal a. Zami pawh a va chhuak ve ta vat. 

Sanga chu a thinrim hle si a, Lawma lahin engmah a hre bawk si lo. 

"U sang, chutin ka ankhum loh kha. A zualko thiam ve bawk aniang. Thil awmzia nihphung ka sawi mai a ni. Anihna takah chuan lawm lo tur kan ni. Kan fanu chungchang hi in lo sawi ve sek a ngai reng reng lo. Thenawm heti zozai kan nei ve, tu'n an sawi kan hre lo. Chuvangjn naupang hriat lai chuan khatiang thu kha sawi tawh lo u la ka ti mai a nih kha. Tihdik loh ka nei lo" Zami chuan thinrimna tel miah lovin a ti ta a. Lawma pawn a man thiam tan. 

"Chutin i ti lo. Chhungkaw hnawksak, mi rèl ching te min ti a ni lawm ni? Zuala pawh velh i tum a, kan nu'n a ngen vang chein i vel lo mai zawk a ni lawm ni? " Sanga chuan pawr em em hian a ti a. Zu rim a nam deuh bawk. 

Zami chu a chek hlak a, a nui deuh bawk, "Awij a va han awihawm loh em em.. Ka sawi miah lo chutiang" a ti a. Chutia a nui chu a elsen emaw tiin Sanga chuan eng sawi set set lo in a va beng chawrh ringawt a. Lawma thin a so ve phat mai. Sanga bek dinglam a ri no chhawk, a kawr awmah thamsak zuiin, "Zawnga, mi va zah lo ve, ka in chhungah ka awm ve reng laiin ka nupui kut i thlak ngam a maw? Chhuak rawh. Ka khawih leh hma che hian" tiin a nawr chhuak a. Sanga lah chuan inla pa takin a rawn bei let bawk si, an ri ta rum rum mai a. Thenawm hnai an lo tlan khawm vat, Sanga chu a mitko a thi a, Lawma erawh hliam em em a nei lo. Thil awmzia an han zawt chiang a, Zami chuan hmaih nei miah loin chawhnu lama thil thleng leh zanina thil thleng chu a sawi ta vek a. Rini a rawn kal ve, eng sawi set set loin an pa thlavang hauh pahin Zami chu a sawi loh bak bak a rawn sawitir ta chiam a. Thenawm tan pawh a luhaithlak viau ang. 

"Keini aia in khwwsak theih vang hian min hmusit anih kha, Lawma nu uirena pa vanga khatia awm thei in nih kha.. Lawma farnu pawh mahni unaupa nei duh khawpa mi nasa, ka ten lutuk che u. In fanu atana in lak, nu leh pa nei lo, a nu pawh a pa ngeiin a thahsak avanga heng buaina hi lo awm a nia. Thudik kan sawi a, min khap in tum zawk anih kha. Thiam. Lohna kan nei lo. " Rini chuan a ti hlawih hlawih a, Zami tawng ve hma hma chuan, "Chuan kan pa thisen man hi a to khawp ang, lo hria ang che u. Court-ah ka kal dawn.. In chak lo khawp ang" a ti leh tâwn tâwn a. 

Zami chuan, "Eeee.  I duh phawt chuan kal rawh. Kan in chhung ngeia ka pasal awm laia kut min thlak ngamtu i pasal hian thiam a chan ring buai duh suh. U Lawm, lut ang. Duati a lo mangang tawh ang" tiin Lawma a kai a, in chhungah an lut zui hmiah. Rini chu a ang hlawih hlawih naa eng he huah an ngaihsak duh ta lo. An thin erawh a rim takzet a ni. 

"E taka, Kan film siam turah hian U puia hian chang rawh min ti tlat a. I remti em? " Diteii chuan an pa hnathawk bula thut pah chuan a ti a. 

"I rai kha" a lo ti hmuk. 

"Hmm.. A la puar vak chuang nang.. " a hmui a tipawrh a. 

"Puar lo pawh nise, i pum chhungah khan naute a awm tawh. Naktuk atang chuan motor pawh khalh tawh suh, driver in hruaitir tawh ang che. " Computer melh reng chung chuan a lo ti leh a. Diteii chuan ei lo tih hriat zetin a lo ner khum. 

"Min ner khum eng ang mah la, pa ka nih hi.  Thu i awih a tha" Diteii a tawp chat, "naaa.. Intihharh te ka duh ve sin" a ti nang nang a. 

"I duhna hmun apiangah ka kalpui thei che alawm.. Thla 5 a nih veleh chawlh i la bwk ang. Inah i awm ang a, exercise ka lakpui che bak chhuah a ngai lo" awii an pa over zia hi.. 

Diteii chuan chhan ngaihna pawh a hre tawh lo. A tana ti a ni tih a hrethiam ve tho si. Film pawh chu sawipui chi-ah a ngai ta lo. Thuawih kha tul a ti ve tho bawk sia. 

"A va mak e aw.. Tui lum hmang thin rawh ka tih kha.. Gas a hek alawm.. Bakah a remchang a.. Hei tihian" Heri, Diteii te awmpui chuan an nula awmpui thar Hriati chu thil tih dan tur a lo hrilh mawl mawlh a. Heri hi chu Dinfela te pawn unau tluk deuhthawa an en tawh kha a ni hrim a. A rei ve tawh bakah amah a felin a zuanzang si, Nunui a thih te khan a tap nasa ber pawl a ni. Teteii erawh kha chu a ui tehchiam lo. A lakah that chhuah ngai hek lo. Hriati hi Khawchhak thingtlang khua atanga rawn awm a ni a, Heri puitu tur a ni. A la zûm angreng a, a tawng tam lo viau bawk. Chet phung a la hre vak lo naa a fel lohna em em erawh a la awm lo. Chutia an inhrilh lawng lawng lai chuan, Zami a lo lut a. 

"U Her, Ditei a awm em? " tiin Heri chu a bia a. 

"Ehe, i lo kal law.. Khaw nge Duati? Awm ang, ka'n ko nge.. Lo thu rawh" tih leh in chung kailawn bula ding chung chuan, "Diteeee… i U zami a lo kal" a ti tial ruan a. Hriati leh Zami an lo nui tawp. Diteii pawh an hnathawh a laklawh loh vanga a hawn hma ni a ni bawk a, awmhmun kawr nen a rawn chhuk thla sawk sawk a. A nui sang bawk. 

"Min van rawn tlawh duh lo tak.. Duati i lo hruai na nge? " a ti nghal hlut a. 

"Alice-i ten vawiin tlai chu chaw lo ei rawh se an tia, a kal ta a nih kha.. " Zami chuan a lo ti ve mai a. 

Hriati'n thingpui a lum nghal. Pi Zawmi erawn incheck-up-in a chhuak a. 

"Ka rawn kal chhan zawk chu maw.. Awii, kan buai ve deuh a.. A bul chu Duati a nia.. " tiin Zami chuan Sanga te nupa nena an buaina zawng zawng chu a sawi nghal mawlh mawlh a. Diteii a lo bu leh nghat nghat thin. Hriati chuan thingpui a rawn dah a, an in hman meuh lo. Zami'n sawi tur a ngah sia, "Chuan court kal an tum a, an pa kha thisen a lo chhuak ve kher baek nen, mahse, ka hlau chuang lo va.. Chung vel chu hrilh che ka chak tawh sia" Zami chuan a ti a. 

"An kal ngam tak tak dawn mi? An thiam lo daih zawk sia" Diteii chuan a ti a. 

"Nia an ngam tak tak chu ka ring lo. Mahse, ka thinrim hi a la reh hlawl lo. Duati mitmei lah ven a ngai bawk si.. " Zami chuan a ti leh hmarh hmarh a. Duati a hmangaihzia Ditei hian a hriatchian tawh avangin Zami thinur viau chu a dem lo. 

An rin ang ngeiin Sanga te chu an reh ta hmiah a. Court em thlen chu an ngam ta lo aniang e. 

Diteii pawh a dul pawh la puar ûk lo mah se, An pa chuan thla 7 nau pai tawh ang maiin a treat tan a, a chang chuan a ning lek lek. Mahse, a thlahlel ve tho bawk si. Ei châk zawng pawh a neih a hmain thei lam leh thlai hrisel lam a rawn lei reng a, Heri nuih hi a za thin. Diteii nau pai thla thum  a ni ve chho dawn ta a, raino huat pawh a nei chho tan. A khua te a sik zeuh zeuh a, a uak deuh reng bawk. Chaw hi a haw tlat mai a. A buaithlak viau. Chakai leh chengkawl a duh em em a, chengkawl te hi a khawm ruih a, a kher ngat ngat reng mai. Chakai erawh ei an phalsak vak lo. Naute chilthli a tam duh an tia.. Thei lam chu a ei vak tawh lo zawk, Coconut erawh a ei deuh reng a. A chak zawng pawh hi a sawi tha ngam lo, a pasal hian tihsak a chak zek zek reng a. A inthlahrung letling. 

Zan khat an zanriah eikham atanga darkar khat velah chuan a pum a rawn na ta chiam mai. A vial a vial a, inthup theih ni hek lo. An pa mang a ang zet mai. Nau chhiat tawh turah an inngai tawp. An phek buai a ni deuh ber mai. A rang a rangin Damdawiinah an inphur chho ta a… Doctor in a lo en vat vat, "In tlai teuh hle mai. Hei aia tlaiah lo kal ula chuan naute hi kan chhan hman lo maithei a ni.. Tunah chuan a tha tawh e" Titu Doctor chu Dinfela chuan a kuah lo chauh.. 

"Anih leh Doctor, engvang ber nge ni ang.. Khatia a awm? " a lo ti vat a. 

A tarmit chawikan zauh pahin, "Nia, hei hi a fala sawipui che ka duh a. " tiin Dinfela nen chuan Corridor-ah an inzui phei nghal. 

"In nu hian nau pai a duh vak lo em ni? " a ti ta a. Dinfela a ding chawt. A thu hriat zet chu..! 

"Duh tehlul mai" a ti hluai a. A hrilhhai lek lek

"Inbengdai rawh. Englo ania, a zun kan test khan nau paihna a tihtlakna a ni mai ang chu kan hmu tel tlat a ni.. Chu chu ania a fala biak che ka duh chhan" a ti zawi raih a. Dinfela a lo ding khawng ut.. A ni lo.. Dawt a niang a ti rilru mawlh mawlh a. Diteii'n nau tihtlak a tum a maw?  Engvangin nge? Eng thil teh hrep nge a chunga thleng hi? 

A rai tih an hriat tirha a fiamthu kha a lo ti tak tak em ni? Film chan a duh luatah nau chu paih a duh ta mai nge? Nasa taka a duat chung pawha a changa ngeiawm taka a tawngkhum thin chhante kha a raino thinchhiat vang aiin naute a duh loh vang zawk em ni ang?! Engkim mai chu a tan thilmak a ni. Doctor khan dawt a sawi awm si lo. 

Khuma Diteii muhil mek chu a thlir ngawih ngawih a. Thinlung na tak chungin, "I duh lo anih pawhin min hrinsak hram la, tichuan, i duh duh ti turin i zalen dawn nia" ama hriat tham lek chuan a ti sup a.. 

(Zo leh ta 😁😁