D ROSE 1

D' ROSE..  (Season- 2)

Chapter - 1

Ziaktu : Toni Râlte

Biak in dar ri val val chu a bengah a ring viau mai, pasal a nei dawn miau a.  A chhan pawh a bialpa dawhthei lo zet hian Biak in hawng thei lo khawpin a ei zo ang tih a hlauhawm tawh tlat a ni. Khawtlangin an lawmpui a, mi lian an ni bawk nen, mipui an tam kher mai. Mizorama designer tha bera an sawi Fakteii design a kawr fual var simple zet chu a inhmeh takzet a ni. A veil khim chu amah cheitu chuan a siam tha zauh a. An inpeih ta. Biak in hulhliapa lo nghak rantu a nuta neihchhun Lawma pawh a nalh kher mai. A suit hak pawh a zahawm e. Innuih sak chungin an inkai a, Biak in chhunga an inkaih luh lai chuan rimawi a ri riai riai a, a va nuamin a va mawi tak em. Dinfela mitmenga hlimna lo lang chhuak chu a va hmu thei. A lai lek lek zawk. Thutiam an chham laia a hnukulh zia erawh sawi sak lo mai ang. Tunah chuan Diteii chu nula a ni ta lo. 

"Zak miah lo la, ka khawih ang angin awm tum rawh aw" khum laizawla bawh thuah rantu a pasal hmel chu a hmu tha ngam meuh lo. Ni e, sex a hman a ngai ve ta si a. 

"Umm.. Ka zak eee" a ti lawi rât a. Dinfela nui hak a hriat chuan a lai zual. Boruak chu a chawl duk ni mai ten a hre hial. Tin, a vawikhatna a ni bawk a, a pasal zei viau mah se; a na a ti. Mahse, fake climax erawh a thlenpui ve tlat!  A lehpekah chuan a zia ve tawh èm ang chu. 

Khatia Teteii thih dan an han chhui chhuah hnu atang kha chuan mipui nawlpui hriat thamin an inngaihzawnna kha an phochhuak ti mai ang, an hre fur tawh a. In khata chen dun chu rem teuh loin a hria. Chuvangin a nu leh pate nena thutlukna siamin Lawma te bulah a va cheng leh hnuhnawh kha a nia. Dinfela erawh chuan a awm hran kher chu tul a ti lem lo. Mahse, amah zawkin a duh ve tlat. Hnial luih chi ni nghal lo chuan. Lawma te nupa lahin an duat si, Duati lahin a ngai em em a, an inawm nufa reng mai. School erawh a kal ta lo law law a. Modelling kawng pawh a zawh ta chuang lo. Mipui hmuh theiha inpholan vak kha Dinfela'n a remti chiah lo bawk a. Mahse, an film kha a lar ta em em a, hit tak a ni. Puia pawn a hlawkna a tel hnawk mai. Diteii chuan eizawnna mumal tak neih a duh miau vangin Puia sawmna angin Film Industry lamah a zuanglut ve ta râwih a. Puia Assistant angin a thawk a ni deuh mai. Film erawh a chang zui duh ta lo. Pasal a neih hma hian film pahnih hit zet zet an sual chhuak hman a. A kalna chi tak a lo ni tih a hrethiam chho a, nakinah phei chuan amaha kal hran hun te pawh a la nei ang chu. Sum lawm tak leh hmang na tak a ni lem lo bawk a, a sum tam zawk chu Duati tan a hmang nasa zawk. Lawma te lah puih an ngai tawh der si lo. Zami chuan wholesale dawr a hawng ve a, Lawma erawh Pu Vanlala hnuaiah a thawk ve thung. Teremi erawh kha chu pasal a nei ve leh daih tawh a, Phunchwwngah zu zuarin a buai ve hle tawh mai. Bena thung erawh Shillongah Assylum-ah dah niin tha chak lo viau mah se; hma erawh a sawn ve hret hret zel e. 

Dinfela nu te khua Lungdai-ah Honeymoon an va hmang a. Nuam an va ti dun tak. An inning ngai lo va, Diteii hi a hma khan a pangchang thiam vak lo kha a nia, a pasal zek zuk hian a tino ta vek a ni ber. A titau ngun ve ta mai. Chutak chu Dinfela'n thlem nuam a lo ti si. A tawpah an nui dun leh nge nge thin. 

"Fa hi engzat nge kan neih ang? " Diteii chuan a ti sar sar a. 

"Pathian thu thu chu a ni a, mahse, tam deuh ka duh. I pai peih chuan.. Kan chhungkua kan tlem sia, hung ve deuh ka duh. An zahawm bik' an pa chuan a ti a. 

"Hmm.. Ka tlin dawn mawni le" a lo ti a. A ner nâng a. Mahse, fa neih teuh chu a duh ve tho. Sum leh paiah an la buai lem lo bawk nen. 

Dinfela chuan a bianga chulin a hmuiah a rawn chuk zauh a. A hnute a piai nghal hlak bawk. 

"Het.. Nizanah pawh ka mut chhuah em em laiin min englo tawh.. A tawk" a lo ti hlak hlak a. Hei tak hi Dinfela chuan a lawm a, a nuih a za thin. An inchai thiak thiak laiin Dinfela phone a rawn ri a, an tawp ta hram. 

"Aw pa" Dinfela chuan a ti hlawi hlawi a. A hah deuh bawk a ni. 

"Hei i nu hi a chau thut mai. Damdawiinah chuan kan chhohpui tawh a. Chanchin ka rawn hrilh che u" a pa chuan a rawn ti a. Dinfela chuan thawh kan pahin, "A va zia lo ve. Engvang nge ni reng reng" a ti a. 

"Ka hre bik lo, kan nulain min lo call a, nikhaw hre lo va a tluk thu a rawn sawi ringawt a. Engmah thuchiang pawh kan la inzawt hman lo" a rawn ti a. 

"Aw le.. Kan rawn haw nghal ang e" Dinfela chuan a ti a. Diteii chuan an thusawi a hre ve si lo va, mak a lo ti deuh. Dinfela'n a han sawi takah chuan a rilru a hah ta hle mai. Mahni hringtunu te meuh an han nat hi chuan kalsan tawh nunhlui hi a lo lian ber tawh lo a niang e. An insiam nghal mawlh mawlh a, tawng pawh an tawng lem lo. 

Chauh pawh sawi lo vin Damdawiinah an tlan tlang nghal a, ICU-ah an lo dah lut tawh a lo nia. A la harh miah lo anih chu. A chhun thingpui in tur chokaa a va thli kha a lu a hai thut a, a tlu ta mai niin an nula te chuan an sawi. A mak mang e. Eng han tihtheih ni rih lo le.. Diteii te chu an haw ta phawt a. Chaw te eiin an han intifai ve a, in lama lo awm ngawt lah a nuam chuang bawk si lo. Chau chung chungin an tlan chho leh a. Diteii rilru a mangang takzet a ni. Pu Vanlala pawh a vei nghut nghut mai. A hmain a fanu neihchhunin vanduaina a lo tawk tawh a, tunah a nupui duhtak a ni leh a. A vai ruai mai. Mi an tha a, an rawn kan ve liam liam a, thalai eng emaw zatin an rawn tlaivarpui bawk. Eng em em ti loin khua pawh a var ve leh ta a. Pi Zawmi erawh Oxygen hmanga thawktir a la ni kal reng. Diteii te chau tawngkhawng tawh chu inah an zuk muhil ta bawrh bawrh a. Thinthi erawhin an mu lo. Dinfela tak pawh a mangang ve khawp mai. A chhan pawh Diteii vangin. A hmangaihber nu, a pa nupui ni bawk chu a kal anih vaih chuan an nupa hlimna pawh a nghawng phak dawn tih a hria. Innei thar chauh an la ni lehnghal. 

Ni 3 lai chu ICU-ah Pi zawmi a awm ta. Mahse, a tha ve hret hret a, tlem chuan rilru a hahdam tan ta deuh. Dinfela pawh a hnaah a bur chho tan a. Diteii erawh  la indah awl rih. Anu a vil deuh chawt a ni ber e. Hetia an buai mek lai hian Mike-a te nupa boruak a tha lo chho ta tlat. Dinfela bulah Mikea nupui Akimi a rawn vui nasa mai a. An buaina ber erawh tlangzarh lung lung chi a ni lem lo. Nupa kar tak tak a ni tlat. 

"Thla 4 lai chu nupa nun kan hmang tawh lo. Matea pian hnu lawk atang khan a danglam tlat. Ka hrethiam lo. A tirah chuan a chau ve thin sia, chuvang aniang ka ti ve mai a. Mahse, a ni em em tawh lo. Sex kha ka va chak a ni lo. Mahse, nupa kan ni a, kan nun phuartu a nihna chen a awm ve a; tin, heti taka a danglam chhan hi ka hre duh a ni" tiin Akimi chuan a sawi mawlh mawlh a. A hmel pawh a tla kuam mai. A rilru a hah ru hle tih a lang reng mai. Dinfela chuan, "Ka lo titipui dawn nia. I va inzèp rei thei zawk ve. Chutia i sawi takah chuan kei pawn ngaihbel tur ting chuan a awmdan hi a mak tlatin ka hria.. Ka lo ngaihven dawn nia. Hetia ama puala dawr a hawn hnu atang hi chuan inhmuh reng te a lo har ve bawk nen,. Anih zu te a la in zeuh zeuh em? " a ti a. 

"Zu rim hi chu nam zauh chang chu a nei, mahse, a rui chhe ngai lo. Zanah hian a rawn haw tlangpui a, a leng chhuak leh tawh vak chuang lo. Ngaihzawngte hi a nei mawni tih dawnin a phone te chu ka khawih thei vek a, rinhlelhawm an awm ka hre lo reng reng" Akimi chuan a ti a. Dinfela a bu nghat nghat, "Ngaihzawng chu a neih ka ring lo. Chutiang mize pu a ni lo. A sumdawnnaah buaina a tawk mawni zawk le.. Lo lungngai lo phawt rawh. Theihtawp ka lo chhuah ang" tiin a hnem ve a. Akimi pawh a thaw ve huai mai. 

Diteii bulah pawh Mike te nupa chungchang chu a hrilh ve a. Diteii pawh chuan pawi a lo tihpui ve hle. Nupa hlim leh inzui det det reng kha an ni ve si a. An pa chuan a chingfel thei êm ang chu. Diteii nu pawh a tha chho ve zel a, cabinah an indah lut thei ta bawk a. Thla a muang chho tan e. A Bp sang lutuk luhai a lo nia, stroke a lo ni ve leh zel bawk nen.. An in chhan hman ta hlauh zawk a, a lawmawm khawp mai. 

"Hello, Mike, zanin chu dine out ila, kan nupa tuak hnihin.. " Dinfela chuan a ti zangkhai vah a. 

"Aa… nia, a tha ngawt ang. Lawk aw. Programme ka neih leh neih loh kan en lawk" a rawn ti a. Dinfela chuan a lo nghak a. 

"A tha lawm.. Kan ei chhuak dawn nia. Kan nu pawh ka lo hrilh ang" a rawn ti zui zat a. Dinfela a khi suk. Engkim siam that theih ni se, Akimi chu puih a duh a ni. An nu a va lam a, an chaw eina tur lam panin an tlan nghal. Naupang an rawn hruai dawn lo va, chhangchhiat hi chuan thil a buaithlak ve thin bawk nen.. A zia e. Akimi pawh a lo inchei nalh ve hle, han en mai chuan nupa duhawm tak an la ang reng. Mahse, an chhungrilah buaina an nei tlat si a. Dawhkan pakhat kila an han thutho takah chuan Dinfela chuan boruak siam tum takin, "Naupangho pawh an ngaihawm tawh. Intlawh hi a har ve thin sia, kan la rawn kal ang. Chuan, Mike, in nu hi ka hai tèp alawm.. A nulat lai aimahin a chhe lo" tiin Akimi chu a mitmei zuk zuk a. Mike pawh a nui ve huah huah mai, "A khal daih zawk tiraw" a ti ve mai a. 

Akimi chuan, "I nu dam lo pawh kan rawn kan thei bik lo che u a. Fate nen chuan e buai hi a na ve thei sia" a ti ve sar sar a. 

"Kan hrethiam alawm, a ho lutuk. A tha tawh lutuk tunah chuan.. E chuan, Naupangho nen la picnic ve ang u aw. Kei pawh chhuahvah ka mamawh. " Diteii chuan a rawn ti ve zat a. An inpawh tlan hmel kher mai. Mahse, Mike chu chik taka en chuan a awm a nuam chiah lo tih a lang thei. A za sek ni te pawn a lang. Dinner  an rawn chhawp a, an ei nghal mawlh mawlh. An tawng loh lai tak chuan, an piah atang chuan, "Mike, hetah law in ei.. " mipa pakhat hian a rawn ti a. Mike a hawi chhuak vat, "Nih hi.. Nangni pawh sawtah zawk emaw ka tia" a ti hluai a. Chu pa chuan Dinfela a hmuh chuan, "Naua, inhmuh lohna a va rei ta ve. I dam maw? " a ti a. 

"Umm dam e, min hre tawh lo maw ka lo ti hman a.. Hei hi Diteii, ka nupui a nih hi, chuan Dite, hei ka thianpa ka û ni bawk thin Sawma a nih hi" tiin a hmelhriattir nghal zung zung a. A kal hnuah, "Mike in lo inhmu daih tawh ni maw.. Hman deuh khan news-ah khehpuam vanga man ang te khan ka lo hria a. Ka be pawp thei si lo va. " Dinfela chuan a ti a. Tumah mi hrang an awm lem lo bawk a, chutia sawi ta mai chu a ni. 

"Hmu tawh e, kan inhmuhna erawh a la rei vak lo. A che lian tawh khawp mai. Durtlangah in tha tawk a sa alawm. Mahse, nupui a la nei lo. " Mike chuan a lo ti ve mai a. Chaw an ei kham chuan rei vak lo thuin an han titi khawmuang a. Hawn zai an rel ta hlawm a. Dinfela chuan a hranpaa Mike-a la titipui erawh a tum tho. 

"Hei tu nge? " a mu tur chu Diteii chuan a phone lek vâ hian a rawn ti a. A'n en chuan  a bialnu hlui Malsawmi a lo nia. "Vawiinah ka lo haw a. Ka van hmu chak che" tih a lo thawn. Malsawmi hi USA-ah a awm char char a, Dinfela ai hian kum 3 in a upa bawk. Nula lu zo veh vawh, harhvang tak, a duhna lama pawisak nei tehchiam lo a ni a. A hnathawh ber pawh hriat lohin a nei phian lawi a!  Amah chuan Company-a thawk angin a insawi a, mahse, a thawhna company hming tuman an hre lo!  Kum 5 dawn sap rama a awm hnuah a rawn haw ve a ni ngei ang. USA a kal dawn thleng khan Dinfela nen hian an la ni ve a ni. Amah Dinfela a la nau èm a, Malsawmi hian a bawlzan deuh thin. Amah Dinfela khan a atchilh lo chauh bawk a. Mahse, tikhan sap ram a kal a, a tirah han inbe ve deuh mah se, a rei a, Dinfela nunah lah thil thar a lo thleng ve reng bawk nen, inhmu ta lo vang vang chu an intha then tawp mai a. Inbiak pawhna pawh an nei tawn ta lo kha a nia. Malsawmi hian Dinfela number hi tu te emaw a dil a ni ngei ang. 

"Malsawmi a nih hi " a ti tawi ták a. 

"A chhe lo sia" Diteii chian a ti ringawt a. Dinfela nuih a za leh deuh. 

"Ka ex a nia" a ti ta nge nge a. Zep kher tulna a hre lo. 

"A thîkawm ve dawn anih kha.. I hmuh vaih" a ti nghal tân tân a. A bianga chuks zauh pahin, "Nang aia thlan tur hi khawvel mihringah ka hre lo" a ti ta hmiah a. Diteii mitmeng pawh a danglam nghal. A hmangaih awmchhun leh a bialpa awmchhun kha a ni a, a ta neih hluah hluah a ni ber e. 

"Duati, rai tawh la ka ti" Dinfela chuan a ti sawt sawt a. A kuah nghal thlawp bawk. "Ka rai ve têp ang. " a lo ti ve mai a. Nupa nun hlim takin an hmang zui a, Diteii pawh a si ve hlat hlat kha.. 

Pi Zawmi pawh a tha ta hle a, an inla chhuak ve thei ta. A chhuah tlaiah chhungkhat hnai chaw an ei khawm a. Lawma te nupa bakah Puia te nupa an rawn tel bawk. Mike-a te pawh sawm an ni naa amah Mike-an programme a lo nei si a, an lo kal thei ta lo a ni. Lawma nupui Zami leh Diteii chu an nui dun hawk hawk a, Lawma haihawtzia an sawi dun a ni.

"Nimin zingah hmanhmawh tawkin a rawn haw a, "Ka file ka theihnghilh daih" a ti a. A thlan hluam mai si. Ka'n en thin, a kutah File a awm reng bawk si. "I kuta i ken kha eng nge" ka ti ta a. 

'Ehee.. ' tih leh a lu dawm a rual a, nuihzat lam ai mahin khawngaih thla a la zawk. La entir tur a ni. A haihawt dan em em hi. A meizial zuk lai te hi a theihnghilh a, a dang te a tan leh chut chut fô. Duati a lenpui te hian a rawn theihnghilh haw thul.. Buaithlak lutuk" Zami chuan a ti siam siam a. Diteii pawh chuan, "Entir a ngai anih chu. Chak lohna eng emaw tak a nei aniang" ngaihtha lo lutuk anga lan hreh si hian a lo ti ve a. Puia nupui Baby pawh an bulah a rawn thu ve a. A thau mum kâng mai. Duati pawh a lal bawk a, a tei kual at at reng mai. Kum 5 lai a ni ta bawk a, naupangchhia takin a awm tawh lem lo. A hmel tha reuh si a, Diteii naupan lai hmel a rawn phawk chhuak tha khawp mai. Puia fapa û zawk nen an infiam ve dat dat a, Diteii chuan hmuhnawm a ti kher mai. 

Chaw te an han ei kham a. An haw darh hnu khawiah Lawma te chhungkua pawh haw tumin a intintuah ve a. Lawma chuan an nu koh tumin a ang zuau a, a ko thei tlat lo!  A nupui hming a theihnghilh!  Khai aw.. "Nui," a ti ta ngawt a. A vawikhat kohna a ni. Zami pawh chuan mak a tih hmel viau. Duati erawh Diteii'n a ngaih em vangin an riahpui ve lawk dawn a ni. An in bye bye lap lap hnuah an chhuahsan ve ta a. Muthmunah a u Lawma haihawt dan chu an pa a hrilh ve a, Dinfela chuan a lo ngai serious viau mai. Entir ngei ngei a ngai anih chu a ti deuh reng mai. Duati erawh a muhil sâk sâk a. Hetiang tiat a lo ni ve thei ta mai hi amah hmangaihtu te tan chuan a lawmawm thlawt a ni. Hnute pawh a la nghei hmain a pain a nu a thahsak a, A pa nau nupui enkawl seilen niin a pa lahin  jail atanga a rawn chhuah hnu pawn a ngaihsak der si lo. A la nula ve ngei ang a, a tetlai nun hi hrilh a rem lohna chen a la awm khawp ang. Diteii chuan Duati lo enkawl seiliana hmangaih em em tu Alice te nupa a theihnghilh ngai lo va, a theihna zawnah puih zel pawh a duh ve. Mahse, puih an ngai em em bik lo, Alice te an lo khawsa thei bawk nen. Tin, Sangtea nu kha a boral ta bawk a, inpuiah intilal takin an khawsa ve thei tawh. Sangtea farnu erawh Pathlawi fa pathum nei a um a, pasal zu rui kutthak tuar reng rengin a khawsa chho zui ta kha a nia. A khawngaihthlak viau naa chunglam hian thungrulhna hi a lo siam ve reng a lo nia, Mami chunga that chhuah thei lo te khawvel chu a khirh ta viau mai. 

"Mike, sawi teh.. Khawngaihin.. Min duh tawh loin min hmangaih tawh lo em ni? Ti nge min then mai loh? " Akimi chuan aw khur lek lek hian a ti a. A hnuk a ulh. A pasal chu a thu ngawi ngul a, Dinfela'n boruak siam tum viau mah se; a la ngai reng. Zanin phei chu khum khatah pawh mu dun lo vin Sofaah a mutsan daih a. Akimi tan chuan a hrilhhaithlak lu deuh a ni. 

"Ngawi reng lo khan sawi rawh. Anih loh chuan ka nu te ka hrilh ang. Ka ning tawh" Akimi chuan a ti leh a. 

"Hrilh lo ve. Akim, min hrethiam rawh. A pawi ka ti khawp mai" Mike chuan a ti zawi raih a. A rilru a hah hmel angreng. 

"Buaina i nei a nih chuan nupa kan nia, sawi mai tur.. Min ten ta emaw tih turin tihian i awm a. Min mamawh tawh lo anih chuan ka fate nen kan chhuak mai ang. Ka peih tawh lo" Akimi pawh a insum zo tawh lo a ni ber. Dik tak chuan Mike hi a hmangaih em em a, inngaihzawn lai pawn a hnar thei lo va a fa a pai kha a ni reng a. Pawi tihna a nei lo. Inthen hi a duh miah lo, an chhungkaw khawsa chu harsa hran lo mah se, a u ten nupui an nei tawh a. Ani a fate nena va let leha inthlahrung reng renga va awm kha a hreh bakah a faten pa tia koh tur an nei lo tur chu a na a ti a ni. Hmeichhia chu an rilru a puitling hma reng a. 

"Engkim a tha leh vek mai ang.. Min lo nghak leh hram rawh" Mike chuan a ti a. Akimi a dam zo chuang lo. Inbe tawh lo vin an inmutsan ta a. Nupa nun khi mek chu siamtha theitu awm tak ang maw?!  

Diteii te erawh an hlimna chuan par a la chhuang dawn chauh a nih hmel e. Ani pawh a nu a dam ta bawk a, a hna lamah a insawrbing ve tan ta a. Puia in lamah pheiin project thar an han buaipui chho leh a. A buai ve leh map map ta viau. 

"He film hi chu a leading role hi chang la ka va ti tak" Puia chuan a ti a. 

"Ka chan chi tak chu a nih hi mawle" a lo ti ve hliai a. 

Puia chaun, "Diteii kha i ang tawh lo. I inla nutling vel e. Hmana tleirawl zûm deuh, innocent deuh nen khan in danglam daih tawh. A mak e" nui hak hak chungin a ti a. Diteii pawh a khi sâng mai, "Pasal neih tawh chuan ka inla nutling ve ang chu. Bakah ka upa tawh alawm" a ti ve a. A nui hmel erawh hman ang tho kha a la ni. A la upa hauh lo naa a pasal neih hma atang khan a mizia hi a siam nasa ve bawk a. A sam erawh a la tawi ta reng mai, a tibuang ve ngei a, mahse, a nasat hmel chuang loh. Tin, pheikhawk sang bun te a ching chho ve tawh a. A bun tirha a tlukpui nasatzia a ngaihtuah hian a nuih a za thin. Mi hmaa din te a ngaih ve tak fô avangin thusawi te a zir chho a, ama tawkah lehkhabu a rawn nasa bawk. Mahse, a sim theih miah loh chu Dinfela bula a la lai tût thin hi. He pa hi zawng a tan a danglam ve bawk a ni. 

"Ka lo inngaihtuah ang. Kan pa pawh ka lo rawn ve anga.. Intihharh chu ka mamawh. Chair atanga thupe kual lova chet chhuah ka mamawh ka tihna a nia" A ti ta a. Puia pawh a lawm ru viau. A chhan chu Diteii a inlan ve ngat chuan a hit zual dawn tih a hre tlat. Bakah Diteii chan chi tak a lo ni bawk nen. 

Diteii phone a ri a, Zami a lo ni. 

"Aw u zamte" a ti dam diai a. 

"Dite, i u hian ka mang a tiang tawh tak tak, nichin lawk khan a lo let a, 'Khaw nge kal dawn ka hre si lo va' a rawn tia!  A ti der maw ka tia, mahse, a tider miah lo. A thutak lutuk. Chuan Ka pa ka bia a, a rawn lamtir ringawt alawm.. A mak ee mai" a rawn ti nghal hliam hliam a. Diteii thin a na zawk, a chhan pawh a hre lo. Lawma chuan eng natna emaw tak a vei mek a ni. A awm a nuam ta lo. 

"Aw, kan pa ka lo bia ang a, tunah la la hian kan va la chhuak anga, Damdawiin kan lo panpui dawn nia.. Lo lungngai suh aw" a ti sawk sawk a. Puia bulah thil awmzia hrilhin a chhuak zui nghal. Kal pahin an pa a bia a, Dinfela pawh a insiam ve nghal. 

"Entir ka ngai lo. Zep loh chuan hmana ka zu in nasa lutuk khan ka hriatna a tikhaw lo mai mai alawm" Lawma chuan a ti nàng nang a. Mahse, Dinfela a tumruh nasa si, an inhruai chhuak thei hram. Dr Rinsanga'n a lo en ta a. Test neuh neih neih te a lo ngai bawk nen, an tlai ta duai mai. Ni 2 hnuah result lam tur a ni. Dinfela chuan Diteii a hnem mawlh mawlh a, mahse, Lawma awmdan avang chuan amah tak pawh a ngaih a tha hran chuang lo. Pi Zawmi erawh a la chak vak lo bawk nen, an la hrilh hre duh lem lo. 

Lawma result chu Dinfela'n a va lamsak dawn a. Mike nen an inhmu hlawl mai. Khatia chaw an eikhawm hnuah khan Dinfela hian a fala hmuh tumin hun a neih leh neih loh a zawt fô a.. Mahse, Mike hian a pehhel char char. Thil dik lo a awm tih chu a hrethiam tawh. Eng nge a nih tih a hre si lo chu buaina a ni. 

"Ka ha pui hnuailam hi a ngèt dawn tan a, phawi nghal ka duh deuh a, hei Sawma hian min kalpui thei hlauh a, a zia tak tak" Mike chuan a ti luam a. 

"In nu a hman meuh na nge? " Dinfela chuan awmze nei fe hian a lo ti a. 

"Nia.. A buai ve em a, ha phawi tir mai maiah ka tibuai hreh mawle.. Nang, eng nge i tih dawn? " a ti a. 

"Lawma Diteii û test result ka lam dawn anih hi.. Anih Mike, ka kalsan phawt ang che u, result hriat vat a chakawm sia" tiin a kalsan ta a. Zep loh chuan Mike nen an inkar hla ta duai chu a hre reng, a chhan sawi fak tur a hre bawk si lo. Mipa an nia, thian laka thikthu tichhe mi a ni lo bawk. Mahse, Tette atanga a kawm leh a sangawizawnpuiin buaina ruk a neih laia engmah a hre ve si lo chuan a thin a titâwt deuh. Dr Rinsanga nen an inhmachhawn ta a. 

"Dinfel, nangmah zawk i lo kal chu a tihzia e, hmeichhia hi chu an no thin a. A buaithlakna chen a awm. Lawma test result chu kha le.. " tiin File a pe a. Dinfela chuan a hawng a, a en nghal. A chal a chuar nâng mai. 

"A zia lo hle mai a.. Mahse, Cancer te ang a ni ve lem lo va. Chinfel dan kawng chu a la awm alawm tiraw? " a ti a. 

"Tehreng e. Lungngai suh u. Mahse, a hun taka damdawi pek erawh a ngai dawn a. An nu pawh i hrilhfiah thiam a ngai ang aw. Thla khatah vawi hnih tal check up a ngai dawn bawk a. Damdawi ka chawh hi ei tha se la, a la tantir bawk a, a zia chhoh ka ring. Haihawt stage chauh a la kai alawm.. Mahse, thil ei tha se la, muhil tam bawk se.. " Pu Rinsanga chuan a ti a. 

Dinfela pawh thu khawmuang lo vin a haw zui ve nghal. Diteii chu a hrilhfiah chuan a hrethiam mai ang a, Zamteii erawh a buaithlak deuh. A mawlmang ve a, hlauhawm pui leh eng emaw deuhah a lo ngai ang tih a hlau. Diteii a awm alawm. Aniin a chingfel thei êm ang chu maw.. 

"Eng nge result chu? " A sam huh chu a lo chhem ro mek a. 

Khumah file theh thlain, "Ka rin ang chiahin Schizpohrenia a lo ni e. Mahse, a la hlauhawm lutuk lo aw" a dam thei ang berin a ti a. Diteii a tho zawk, File chu a en ve nghal a. A meng nûr kher mai. 

"Mahse, ven ngun a la ngai dawn asin. Au Lawma ber kherin hetiang natna te a lo neih le" a ti vawng vawng a. A kut nem thep chu vawn pahin, "Duati, engkim a tha vek ang. I chak a ngai ania, Zamteii i hrilhfiah a ngai" a ti dam thlup a. Diteii pawh a inthing harh nghal. Thihpui nghal tur pawh a ni lo va, mi te pawn an lo vei ve fô alawm.. Ni e, a intihchak a ngai. 

Zanriah eikhamah Lawma te in lam panin an chhuak dun ta a. Lawma te pawn chaw an lo ei kham fel tawh. Inleng an lo nei lo bawk a. Dinfela chuan thukhuh lem lo vin Lawma natna chu a sawi ta a. Natna tlanglawn vak a ni lo va, mizo zingah vei chu an awm ve zeuh zeuh. Mahse, cancer te anga thihpuia inenkawl hrep ngai a nih loh thu te a sawi a. Mahse, a zualkai chuan thil awm lo awm anga hriat tlatna, va hmuh chhuah tur awma hriatna te, thil a tih ni si lo ti anga inhriatna te a la neih tur thu a sawi a. Chutiang hunah chuan ven a la ngai dawn a, thenkhat te pawh an inawhhlum ngawt thu te thlengin a sawi ta vek mai. Zamteii chu a men par a, mahse, Diteii chuan, "U zamte, hlau mah ta che. Kan awm alawm. Au Lawma hi mi chak a nia, a hneh thei em em ang. Mahse, a ngaih hi a sam ve a, nangman i enkawl a ngai dawn a. A damdawi hi a hunbi dik thlap thlapa i eitir a ngai dawn ania. Khawngaihin intichak hram hram rawh aw" a ti thliam thliam a. 

"Chu ai chuan kei hi min theihnghilh ka hlau ber" Zamteii chuan hnukulh tih hriat zet hian a ti ta a. Lawma chuan rang zetin, "I hming hi chu ka lo theihnghilh a ni maithei, mahse, ka nupui i ni tih chu ka dam chhungin ka hrereng ang.. Lungngai suh. Ka dam ang" a lo ti ta vat a.

"Alzheimer a ni lo va, engmah a theihnghilh hlen dawn lo.. Han hriat loh thut emaw chu a nei zawk ang, mahse, a hre leh vek dawn. Tin, haihawt hi chu a hlauhawm em em rih lo va. Ka sawi tawh ang khan, thil awm lo anga hriat tlatna ang te, a tihtur ni lo ti tura a inngaih tlat hun a thleng anih chuan chutiang chu buaina a tling zawk. Tunah chuan engkim a la tha vek. Pathian rinchhanin kan hmachhawn zel dawn alawm" a lo ti a. 

Lawma pawh chuan nui huah huah chungin, "Ka makpa hi chu aw.. A va rintlak thin em.. Diteii hi a lo piang lo vang tih a hlauhawm anih hi. Ka tan chuan" a lo ti a. Chu chuan boruak pawh a tinuam chho tan a. Zamteii pawh a hlim ve leh tan. Diteii laichin zinga a pahnihna Lawma hi a damkhawchhuah ngei a ngai a ni. 

"U Dinfel, awiii ka tah a chhuak lutuk. Ka rilru a na ngawih ngawih" Akimi chu phone atang chuan a rawn tap nghal hlawp hlawp. Dinfela hnathawk lai pawh a chawl tawp. 

"Akim, eng nge thleng? " a ti nghal vat a. 

"Ih maw.. U Mike-a a positive" a rawn ti ta mai! 

"Maw.. Eng maw a positive?! " ringhlel zet hian a ti a. 

"Hiv a positive.. U dinfel, a rapthlak ka ti lutuk. Kei pawh hei test nei turin ka kal dawn a.. Mike-a zawk hi ka mang a tiang. Inawhhlum te a tum a. Nangman pui rawh. Kei chuan rilru na deuha thlir bak tihtheih ka nei lo, ka chhungte ka la hrilh ngam bawk si lo" Tlema aw pangngai hian a rawn ti ta a. 

"Inah a awm em? Tunah"

"Aw awm e. Ka nute an zin lai a lo ni hlauh a, engmah an ni pawn an la hre lo" 

"Aw le.. Ka lo kal nghal. Lo chhuahtir miah suh. Chuan, Diteij ka bia anga, test nei tur chuan a hruai dawn che nia" Dinfela chuan a ti a. Phone a dah rualin a insiam nghal. A naute ho bulah tihtur a sawi mawlh mawlh a. Hmanhmawh zetin a chhuak ta a. 

Diteii pawh a hnathawhna hmun atanga chhuakin Akimi hruai turin a kal ve nghal. An pain chanchin a hrilh thuak thuak tawh a. Mak a ti ve hle. Hei vang hi em ni Mike chu a lo inlak hran em em. A lo inhre daih tawh em ni ang? Mahse, inawhhlum a tum tihte a awm sia, a hre ve chauh a va ang si em.. A rilru a buai nuaih mai. Mike te in a va thlen chuan Dinfela pawh a lo awm tawh. Khumah Mike nen an lo inthutchilh ran a. Akimi chuan naute thawmhnaw a lo thlaksak mek bawk. An fa û zawk erawh a lo awm lo. 

"Mike, patling takin le.. Mipa i nih kha aw.. Tha takin i inenkawl ang a, rei tak i la dam thei. I nupui fanaute tan pa i nih reng a ngai ania" Dinfela chuan a ti a. 

"Ni lo ve. Akimi hi chu a positive ka ring lo va. Vawiinah va test se, tlaiah min chhuahsan rawh se.. An tan pa nih ka tling tawh lo. Thianpa, a pawi ka ti. Ka zak ngawih ngawih. Ka positive chhan hian min la hmethlum thuai ang.. " Tih pahin a hmai a hup a. A khur nget nget mai. 

"Thianpa, in nu tan a nat dan tur chu ka hre tho, mahse, thil a thleng vek tawh a. Siamthat theih a ni tawh lo. Chuvangin tun hun hi a tha thei ang bera hman tum ang. I lo kaina chhan pawh kan hriat a tul hleinem.. Mipa i nia, tawnsabawp hi a awm ve châwk ania.. " Dinfela chuan a lo ti a. Akimi erawh chu a ngawi tlat. A na hle tih a lang reng mai. 

"Hmeichhia vanga kai ka ni lul lo mai. Mi tenawm ka nih hi. Mi tenawm azawnga tenawm chikim ber, mawngkawhur ka nih hi.. " tih pahin a tho hluai a, chak zetin choka lam a pan. Dinfela'n a va dang vat!  A thianpa thusawi khan a va thawng tehlul em??  Mawngkawhur maw? Gay maw!! Ni lo, a theih loh. Mike hi chutiang mi a ni lo. Tha tea indawr tumin theihtawp a chhuah a. Akimi ngei pawn tap chunga a rawn ngen tak avangin mike chu tha tak chuan a thu ve leh mai a. Hmui sar dar darin a positive chhan chu a sawi ta a ni. 

"Siama chu i hria. Kan inhmu hlawl a, sum a ngah a, kei dawr ka hawng tir nen ka lo intlak ral ve si a. Min pui min pui ta mai a. Thiantha inkara thleng mai turah ka lo ngai a kei pawn. Rulh leh pawh ka tum. Mahse, zan khat chu a inah party a huaihawt a, min sawm ngun bawk a. Ka va kal ve a. Hmeichhia an lo awm mang lo. Awm mah se, ka nupui hi rinawm lohsan ka tum lo. Zu te kan han in a, an ni phei chuan number 4 te pawh an ti nghe nghe. Zan a rei tial tial a. Sawm awmdan chu a danglam ta riau. Chutihrualin awm ve dangte pawh an danglam tlat. Ih e, thianpa, He khawpuiah hian gay hi i rin phak bakin an tam ang. Thenkhat chu i hriat chian lutuk te mi nawlpuiin kan hriat lar te pawh zuk ni a!  Pherh kan tih mai, nu zim zem ho hi chu a ve mai mai. Gay inthukru te chu mizo zingah pawh a pa ve khawp mai tia sawi an ni deuh vek. An lan dan engkim pawh mipa diktak vek an ni. Keimah hi min en la i hrethiam ang. 

Tichuan, sawma roomah chhoin thil kha a thleng tawp mai a ni. Ka mizia i hria, thil thar lawm mi ka ni tih pawh. Engkim a taste hriat chak thin ka ni. Ka rui bawk a. Pawisak ka nei lo bawk nen, Sawma nen kan khati zo ta anih kha.. A tuka ka intenna leh huatna khan min duhtawk tir mai se a tha tur.. Mahse,  mak takin Sawma chu ka ngai ta ngawih ngawih a. 

A thleng a. A thleng zel a, a thleng ta fô a ni. Inlaichinna nghet tak kan nei ta a. Kan thikthu pawh a chhia. Mahse, rinhlelhawmin kan awm ngai lo. Gay dang ka hriat te nen pawh rinhlelhawmin engmah public-ah kan tilang ngai lo. Sawma nen inzawmna nghet tak kan neih takah chuan Akimi ka ngaihna leh ka thlakhlelhna chu a kiam duak ka ti mai. Tihluihna hmanga nupa nun hmanpui pawh ka harsat tawh. Mahse, a lo lawmawm zawk kha kha. He natna atang hian a fihlim phah ka beisei.. Kei chu tihian ka ral hlen tawh mai ang chu" tiin. 

Boruak chu a reh tlawk tlawk a ni ber. A tawp atawpah Akimi a rawn tap chhuak ta hawm hawm a. Diteiin a kuah vat. Inphatsanna zawnga rapthlak leh tenawm ber hmanga inphatsanna chu tawrh a har viau ngei ang le… Thu tam an sawi hmain Test nei turin an inchhuahpui ta nge nge a. Dinfela leh Mike eraeh an infuih nileng ta zak mai. 

Vanneihthlak takin Akimi chu a him ta hlauh e. Mahse, an nupa nun kal zel dan tur chu hunin a la hril ang chu.. Mike lah a inchhirin a zak ngawih ngawih si a. Han hlamchhiah pawh a inthlahrunawm zawk. 

"Min phatsan ve suh aw" A pasal beng bulah a ti sar sar a. 

"Ka naute, phatsan tur atan chuan i uiawm mah mah aw.. " 

"E taka, ka period miah lo tun thla hi" Diteii chuan a ti hluai a. 

Dinfela a tho nghal zawk. 

"Aih.. La test lo vang. A lo nih loh khan kan na mai mai. Thla thar ni 15-ah kan test ang.. Umm" naupangchhia zet hian a ti a. 

"I thu vek alawm.. Boss" tih pahin a fawp zeuh a. An inkuah ta chial a. 

(Ka'n duhtawk rih ang e. A la ngaihnawm rih lem lo vang. Diteii te ngawr nngawr hi ka ziak dawn lo tih in hriat ka duh a. A chhan chu kei chuan khatiang chhui ngawr ngawr kha a boring ka ti. Ka style hi ka thlak dawn rih lo va, lo lawm lo viau mah ula, tihngaihna ka hre bik lo 😢 mahse, Diteii kaihhnawih zelin thil hi a thleng dawn tih eraeh in lo hre lawk dawn nia… muah vek u. Tihian.. Thil dang ka ziah leh char char a ngai.. 😢😭