BOSS AMANDA

BOSS AMANDA… (Season- 2)

Chapter - 1

Ziaktu : Toni Râlte

"Eheu, Sam, hei chu Diteii a ni reng mai.. Kan va inhmu khát ve, Dite" Boss chuan a ti zung zung a. Diteii chu a nui sâng a, Boss hmaa chair-ah chuan a thu ta tharh a. Diteii hi a hmain a û thihna chungchangah a rawn kal tawh a. A û kha a pasalin an in chung atangin a namthla a lo nia!  Chhui harsa em em a ni lo bawk a, Mahse, Diteii chu a ngainatawm reuh èm vangin Boss chuan sawi leh zauh a ching thin. Tuna a rawn lang leh ta hlawl pawh hi mak viau mah se; Boss chu a lawm riau hian ka hria. 

"Puih theihna che ka nei em? Dite" a ti dam thlap a. Diteii chuan a aw a thian kharh a, "Umm.. Englo a nia, a zahthlak zawnga lak chuan a zahthlak mai thei. Mahse, Ka thisen zawmpui chunga thil thleng a ni miau si a. Hmanni lawka ruang chhar Teteii kha ka û a nia. Nangmah hian a case kha i la dawn niin ka hria, thu thar te a awm tawh em tih ka rawn zawt mai mai che. Kan ina in rawn kal tum khan ka lo chhuak daih a.. " a ti ta a. Amanda chu a bu nghat nghat mai. 

"I û a ni tih ka hre hauh hleinem. Mami thihna kan buaipui lai khan ka hmu ve ngai bawk si lo va, a lo nih chu mawle aw.. Ni e, a pawi hle mai. Teteii kan buaipui lai takin case tenau pakhat khirh ru zet siin min tikhawlhkham pek a. Tunah chuan zalen takin kan buaipui thei tawh dawn e.. " Amanda chuan a ti a. Kei chuan, "Dite, i û te pahnih an tualthi ta mai chu a nia, nang pawh fimkhur la a tha lo maw? " ka lo ti ve a. Ka lo hlauhthawnpui ve ringawt. Tihnat a awlsam hmel si a. 

"Ka lawm e, ka tha kei chu." Tiin a nui sèih a. Hman ai khan a lang upa ve hlek tawh a, a sam pawh a tawi bul mut tawh lo. Hmuh a nuam a ni, he nau hi chu. Ka thinlungah Amanda tluk an awm thei lo naa Diteii te reuh hi chu venhim ka châk ve tlat. Ka va ngaizawng tihna a ni chuang lem lo. 

"Umm.. Dite, i û kha pawngsual a ni tih chu i hriat ka ring tawh a. Tin, an thah hma hian an nghaisa fè tih a lang bawk, a taksa kha hmuh tlak a awm meuh lo, a hmai kha a him ta hlauh zawk a.. Engpawhnise, he thil titu hian huatna nasa tak a nei a nih loh chuan mi nunrawng leh rawva tak chu a ni ngei mai. A kawp thinte pawh kan hmu tawh a, an fihlim niin a lang tlat bawk si a, khami zan a chhuak kha Ramthar veng tlangval pakhat nen an inkawp tih kan hre tawh a, mahse, kha pa kha chuan, 'An veng tawntirh thlrng ka thlah a, a chhuk duh tlat si a, ka hawnsan daih alawm' a ti mai si a. A thusawi a dik tih hriatpuitu a nei lehnghal. Teteii a thlah hnu khan an kawmthlang putar dam lo menpuiin a tlaivar zui ve tih hriatpuitu an awm nual tlat a ni. 

Tichuan, Teteii  kawp thin leh biak thin te kan han veh kual a, Teteii thah duhna chhan tur an neih loh bakah khami zan khan an awmna chiang taka an sawi theih bakah hriatpuitu an nei zel mai a. A mak khawp mai. Tunah chuan kei pawh ka la bangbo viau mai" Boss chuan fiah kek kawk hian a ti leh zung zung a. 

Diteii chuan, "Nia, khami zan khan a lo haw lai ka hre lo hrim hrim. Zan dangah a riah chhuah fó vang hian ngaiah kan nei ve tawh bawk nen, a tuka ka nuin min kaih thawh khan ka hre ve chiah alawm.. A pawi em mai.. " a lo ti ve a. Dawhkanah tui chu a thli a, a in khawlh khawlh a. 

"Engpawhnise, ka tiam a che. I û thattu chu kan zawng hmu em em ang. Lo lungngai lo phawt la aw. Nangmah kha lo inenkawl tha ang che" Amanda chuan a ti dam leh thliam a. A thlamuanthlak thin he nu hi chu aw. Diteii pawh chuan din pahin, "Ni e, ka ring tawk che alawm. Teteii kha mi tha tak a ni lo pawh a ni maithei. Mahse, khatia rawng taka thah kha a phû bik lo..chuan ka va haw tawh ang e, ka lawm lutuk a nia" a ti a. Kawngka bul thleng ka va thlah. 

"Kei hian hmakhalh lo ila chuan, i bawhzui mai hmel " a pen tuaivir paha chiang taka min melh chungin a ti sap a. Thinrim hmel leh thîk hmel erawh a pu hran lo. Ka nui huk ringawt. 

Nilengin Teteii biak thin leh a kalna thinte kan ngaihven leh a. Kei chu ka bangbo tawh viau. Kar khat a ral tawh a, eng kan la ang thei lo chu a nia. Tualthattu hi Teteii te hnaivai tak an nih ka ring lem lo, tunah pawh kan hriat miah lohin khawpuiah hian a leng vel mai thei a ni. 

"Zanin chu Diteii te inah khan va lang leh hrim hrim ila a tha ang. Hmanniah khan Teteii nunphung kha an sawi tha duh lo riau a, thup nei an ang tlat" A rawn ti hlawl a. Ka lo bu ringawt. 

Zan dar 7 bawr velah Pu Vanlala in ropui zetah chuan kan lut ta a. An lo kim thap bawk a, a zia e. Diteii û tlangval chu kei aiin a naupang hlek anga, a hmel pawh a chhe lem lo. Diteii tawng lai chu hmuhnawm tizet hian a lo melh kar thin a, mak ka ti ve mai mai. Unau pianghmun an ni lo tih erawh ka hre ve. Chuvang te pawh chu a ni mahna le.. 

"Teteii khan tu fa nge a pai..? " boss in a tih thut chuan ka phu zuk. A rai tih pawh ka hre ve renh reng si lo va. Pu Vanlala tih loh chu an danglam deuh nghal hû in ka hria. 

Pu Vanlala chuan thupui fun zet hian, "Khawiah mah a chhuak tawh lo turah ka ngai a, ni e, Teteii khan vanduaithlak takin nau a pai tlat mai a. Apa hi tu nge a nih kan hre thei tlat lo a ni. A sawi duh tlat si lo va.. A fa lah a chhiat zui ta mai bawk nen" a ti a. A chil a lem khawlh. Thup dang nei hian ka hria. Mahse, ka inrawlhna tur a ni lem lo. 

"A pa chu hre thei ila tlemin hma kan sawn thei mai tur aw.. A nih chuan a fa chhiat vel vang kha em ni ang khatianga a nun kha a hman chhoh tak le.. Eng emaw thup a nei em? Ka sawi awmzia chu a nunah thil thleng danglam bik te a awm em? " boss chuan a ti duah a. 

"Awm em em lo. Nia, nau a chhiat hnu lawk khan tikhan a awm zui ta mai a ni. Hauh a sawt lo va, kan tha en tawp tawh mai a ni" Pi Zawmi chuan a ti a. Diteii chu a thaw hak. Thil eng emaw ngaihtuah nei hmel a pu a.

"Chuan Pu Vanlal, i fanu i lo chân tawh bawk tiraw khah? " Boss chuan a ti a. Ka hriat loh hi a hre thei. Min hrilh ve tur a nia. 

"Aw.. Nunui a ni a, saw a thlalak pawh kan tar saw. Ani kha chu a tlu sual palh hlauh mai a, a lo tlu na hle niawm a ni.. Kha harh chhuak miah loin min liamsan ta chu a ni mai a" a ti dam thlup a. Pi Zawmi chu a tho nalh a, "Thingpui kan lum a nge" a ti a. Kan hnial duh bik lem lo. 

"Nunui pawh accident, Teteii pawh.. A mak hle mai. Diteii û Mami lah thah a ni bawk.. Mami kha chu thuhranah dah ta ila, Pu Vanlal, in chhungkua hian hmelma te hi in lo nei ru reng a ni mai lo maw? " Amanda chuan a ti sap a. Pu Vanalal a thaw hak. "Ka hre miah lo, Pathian zarah hmelma ka neih awm hi ka la hre miah lo mai a. Ka hriat si loha min lo hawtu chu an awm mahna le" a lo ti ve mai a. 

Chutihlai tak chuan Amanda phone a rawn ri a. "Hello' a ti zang vah a. Bathlar thlang lamah a chhuak ta daih. Mahse, a rei lem lo. 

"Sam, kan kal a ngai. Veng thenawmah ruang an chhar leh niawm tak a ni. Hmeichhia tho" a ti ta a. A mitmeng chu a nung sar mai. Engvang tak ni ang maw? Kei pawh chu ka tho a, Pi Zawmi chuan thingpui a rawn chawi lut chiah, mahse, Amanda a hmanhmawh tawh si, thupha te a han chawi leh rih a. Dik tak chuan mi nawlpuiin an chim hmaa a ruang zir chian a ngai thin si a, chuvanga hmanhmawh a ni. Diteii te in chu kan chhuahsan ta a. 

Diteii te veng nen an inrinaah thlanmual a awm a. Chu mi thlanmual atanga hla vak lo, side drain-ah ruang chu an hmu a ni. A awm ang angin an lo la dah a, Mipui erawh an tam tawh hle. Amanda chuan uluk zetin ruang chu a han en kual a, zan thil a ni bawk nen, a duh ang pawn a en that theih ka ring chiah lo. Chu hmeichhia chu Teteii nena inrual khat vel tur an ni a, Teteii ai kha chuan a te hlek mai thei. A hmai chu a chhe lem lo naa a kawr chu a thler avangin a hnute bawr vela nghaisakna rapthlak zet chu a langsar viau mai. A ban vei lam chu a kawih deuh ngâwk avangin a tliak tih a chiang bawk. Kekawr dum a ha a, chu erawh engmah a thler lo. A duh tawka a thlir hnuah kan kalsan ta a. Ruang pawh an senghawi zui nghal mai. 

"Lalrinkimi a ni a, Ramhlun south ah an awm. Nungchang tha zawk zawk erawh a ni bik lo a niawm e. Pasal pawh vawi thum lai a um tawh a, zu leh damdawi a duh ve hle bawk. Teteii nen khan inzawmna an nei hran lo thung. Mahse, a thattu hi mi thuhmun an nih erawh ka ring.  Ka beisei a ni mah zawk ang chu" Amanda chuan a ti a. Hmalam a bih ngar bawk. Rinkimi hmel kha ka mitthlaa a cham tlat vangin ka eng emaw ti nawm loh deuh. 

A tuk atangin mi pahnih thihna chu a inzawm theih dan tur a chhui chho ta a. Teteii chanchin pawh kan hriatbelh nual ta. Mak deuh chu a fa paina niawm kan hre thei tlat lo a ni. Tu tak ni ang maw..? Rinkimi chu nizan khan a pasal anga a neih thar ti mai ang chu nen chuan zu an in dun a, Khami a ruang hmuhna vengah khan a thiannu a awm thu leh a ina riah a tum thu a sawi a. A bialpa lah chuan zu zuar a nih vangin a lo phal lo ve tumhrang a. An inchai fe hnuah Rinkimi chuan phei a duh tlat vangin thinrim takin an kal hrang a niawm e. A bialpa Puia chu kan han dâwp ngial pawn engtinmah a tih loh thu bak sawi tur a hre lo. A dik pawh ka ring, pa huaisar hmel a pu lem lo e. Rinkimi chuan a thiannu te in chu a va thleng ta lo tihna a nih chu. A thih hun kha dar 8 bawr vel a nih a rinawm a. An hmuh khan a thihna a la rei lo a nih hmel. Zan reh pawh ni lo va veng hulum ang reng taka tualthahna thleng chu a mak khawp mai. Nge a thattu hian hmun dangah a that ang a, kha lai hmunah khan a paih zawk ni ang… hriat va ni suh. 

Rinkimi ruang hmuhna hmun panin kan kal leh mek a ni. Zan lamah kha chuan engmah hmuh hleih theih a ni lo va, a thattu khan sulhnu eng emaw tal a hnutchhiah beiseiin kan pan leh ta poh chu a nia. Kei hian tualthahna hi ka ning a ni. Ka duh angin ka bialnu hi ka kawm ve hman ngai si lo, a thluak hmang reng rengin a ngaihtuahna a kawm a. A bialpa ka ni tih pawh a theihnghilh fô hi ka ring a ni. A hmel erawh a tha telh telh mai. Diteii nen khan inanna an nei tak alawm.. An nu vak lo ve ve. 

"Sam.. Min hisap leh tawh em ni? " ka phu zuk. Ka va melh hrâwk ringawt. A nui sak a, "Hisap reng tur che hian min ngai thin suh. Ka hur uchuak lo ania" ka ti hluk a. 

"Hur uchuak lo in i hur ve pangngai tihna em ni? " chu nu tawng duh dan mai mai chuh! 

"Ni lo ni lo. A ninawm" ka ti leh nghut. 

"Ih maw, inngaizawng kan nih chuan ka laka i lungqwi lohna leh duhthawh lohna te sawi bawrh bawrh thin rawh. I boss angin min la en tlat zel a. Hna thawhna hmunah chiah i boss ka ni" nem zawk hian a ti a. Ka thep leh suai suai nghal. Mi hi chu a hneh thiam thei alawm. 

"Ka lungawi reng" ka ti leh lawi a. Tihnat ka hlauh vang a ni ngei ang. 

"Khu pa chu a va khawhar hmel rek ruk ve aw" a ti niah niah a. A hawina lam chu ka hawi thla ve a, Thlan vung thar lutuk tawh lo, a hungna erawh la tha viau si chhungah tlangval cher chhe ve tak hi a lo thu ran mai. A cher zia chu a mak ka ti angreng, addict emaw a nih ka ring. Kan thawm hre lo ang maiin a melh ngai chu a melh ngat ngat mai. A bialnu thlan a ni maithei ni. Boss chuan hnih kar te chu a bih thuak thuak a, hmuh erawh kan nei lem lo. Motor lam kan pan laiin tlangval hmel fai angreng tak leh a pa niawm tak hi an lo lang hlawl a, Tlangval lo thutna lam chu panin, "Bente, i lo chhuak leh daih a, hawh le.. Hawng ang le" apa niawm tak chuan a ti dam thlup a. Bena tia an koh chu a che chang eih lo. A unaupa niawm tak chuan a zuk kuah tho va, a tang lem bik lo. An rawn inzui chhoh lai chu Boss chuan a lo thlir ve reng ringawt. 

"A khawngaihthlak hle mai. Hmuh twwhna nei in ka inhria.  Kha nau kha" tiin a chhing vang vang a. Kei chuan ka hmuh tawh pawh ka hre lo e a. Kan hawn lam chuan a ngawi leh veng veng mai. Ngaihtuahna maksak deuh deuh a nei leh a ni mahna le.. Ka be buai duh bik lo. 

Ni chu a liam ve zel a. Kan thil chhuiah hma kan sawn mawh hle. Kei chu hotu sang zawkte thupek angin Duty indaih loh bawk nen, Court lamah min pawtpeng ta daih a. Kar khat vel zen zawn ka pengbo a nih ber chu. Amanda nen kan inhmu khât ta viau mai. A thil chhui lai pawh ka hre ve ta vak lo, mahse, ka zawt zauh zauh a. Hma a la sawn em em bik lo a ni maithei. 

Ka thianpa bialnu ka rimpui a, dar 8:30 bawr velah ka haw a. Amanda nen kan la inbe miah lo. A buai ka rin vang hian ka tibuai hreh ve deuh bawk nen. Ka inthlak a, ka mu nghal deuh mai. Ka phone ka bih nghal a. Amanda misscall a lo awm. Ka lo hre miah lo. Ka call back nghal. A la pick thei lo zui.. Ruah a rawn tla siar siar a, a sur tam ta zèk mai. Âi ruah a ni maithei. Amanda ber biak theih ni hek lo, ka chau ve deuh bawk nen phone ka dah a. Mutthilh tumin ka inlet thawk a. Mahse, min ko ri niawm tak ka hria, ka hawi vual vual a. Ka nu aw ri a ang hle. Room atang chuan ka chhuak a, sitting room ka va thleng chu mak ka ti kher mai. Amanda chu thawmhnaw huh vekin a lo ding far tluk tluk mai. Ka nu chuan towel a lo pe mek a. Hmanhmawh zetin bathroomah a lut zui nghal daih. 

"Koh i va hre thei lo ve. A la hma nen" ka nu chuan a ti a. Ruah pawh a la baw hawk hawk mai. Dar 9 a pel tawh a. Tun ang zanah ruah do ngai khawpa pawimawh eng nge awm ta ang le.. "Khatia ding khawng reng lo khan a hak tur thawmhnaw va zawnsak rawh" ka nu chuan a ti leh a. Harh chhuak thutin roomah ka lut nghal vat. Min lo call thei reng awm sia, ngati nge min hrilh lawk hmasa lo va a lo luh le… ti rilru chungin ka tshirt chu ka la chhuak a, ka pyzama nen. Ka chhuak zui nghal. Bathroom kawngka kikin thawmhnaw chu ka pe a. Ka nu erawh chuan thingpui a lum. Nu bengvar tih takah. 

Ka thawmhnaw haa a rawn chhuak chu ngun zetin ka lo melh a. A mawi tho mai. A sam huh chu a tuam mawlh mawlh a. 

"Ka phone ka tibo daih a" ka ngaihtuahna hria niawm takin a ti sap a. 

"Nia ka lo call back che a. I pick thei si lo va" ka lo ti ringawt. 

A ngawih leh daih vang chuan, "Eng nge thleng a, khaw nge i kal? " ka ti a. Ka nu chuan thingpui a rawn chawi phei mek bawk. 

"Mi ka va hmu lawk a. Mahse, ka inrin hmain ruahin min nan ta thut sia, ka bike a lo chhe kher bawk nen.. In in a hnai tho ka tia, ka rawn kal tawp" a ti ve mai a. Khawiah tak kal ang maw.. 

 Ka nu chuan, "ka mutsan ang che u aw.  Mengrei lutuk lo ula, i dam lo ange.. Ruah i do bawk si" Amanda melh chung chuan a ti a. An roomah a lut nghal. Hna chungchang a nih a rin vangin a inrawlh ve duh vak lo tih ka hre mai. Ka nu nge nge. 

"Khawiah maw i kal? " ka ti leh a. Ruah sur thawm avang chuan tawng rin a ngai viau lehnghal. 

Thingpui a in khalh a, "Rinkimi thihna hmunah khan mawle" a ti sam èt a. 

"Eng nge hmuh i inbeisei a.. Keipawh min sawm ve thei reng sia" vui aw deuh hian ka ti a. Dik tak chuan huaisenin fing teh mah se, hmeichhia a nihnaah ka ngaihtuah lo thei bik lo a ni. 

"Chhun lamah in buai thei sia, i chauh ka ring a.. Bakah ka tha alawm" a ti ve mai a. Thingpui no chu sengin a va sil a. A rawn let leh  chu ka lo pawm chawt.. A lang duhawm si a, ka ît thlawt. A hmuiah chuan ka fawp nghal chawt. A lo tang bik lem lo. Mahse, kan infawp rei lo. 

"Sam, hahchawlh ka mamawh. Mu phawt ila.. Naktukah kan sawi tha dawn nia" a ti a. Hnial chi a ni lo. Mikhual roomah a mu dawn a. A luh hmain ka kuah leh rih, "Lo mu ve mai la" ka ti a. A nui deuh, "Ruah sur thawm i hmang tangkai palh ang" a ti sap a. A lut nghal daih. He nu hi chu aw.. Mahse, ka lungawi tho mai. Rilru hlim leh room lehlama mu mek suangtuah chungin kei pawh ka muhil zui ve ta mai. 

A tukah ka thawh hmain a lo haw daih zui. Ka lungawi lo ru kher mai. Ka va bia a, "Sorry, ka biak chhia kha mechanic koh ka duh bawk sia,  i tho tlai ve bawk nen, ka kal ta mai a nih kha.. Nakinah engkim ka hrilh vek ang che" a rawn ti ve thliam a. Ka lungawi chawpchilh nghal. Court-ah kan buai leh viau mai. Tun hnaiah ramri lamah duty ngai bawk nen, kan indaih meuh lo a ni ber e. Kan ban pawh chuan ka chau hnâwp mai. Ka nu min tirh angin a damdawi ka lam kawisak pah a, ka lei zo ka bike-a ka chuang leh tur chiah hi ka ep chiah step atanga Amanda leh Diteii bakah hmannia thlanmuala kan hmuh tlangval maksak deuh kha an lo chhuk mek ka hmu ta a. Min hmu ve lo naa ka ngaichang deuh. Diteii chuan tlangval kha a kai a, Amanda nen eng emaw an sawi. Tlangval erawh ngawi rengin a kal ve mawp mawp ringawt. Amanda car dahna lamah an phei ta dial a, va biak buai kher chu tulin ka hre leh ta lo nen, ka hawnsan ve ta nghal a. 

Zanah ka va zawt a. "Tlangval kha Diteii best friend a lo ni reng alawm le.. Benjamin-a a nia. " a rawn ti a. 

"Chuan? " ka ti leh tawp. 

"Psychiatrist kan panpui anih kha. Thil inlumlet chhoh dan hi maw.. Huai lam kaihhnawih te a nih nawk hmel a, a chingchivet riau mai" a rawn ti a. Message type hi a peih vak lo va, nakinah inhmuh hunah zawh chiah atan ka duhtawk ta rih. Mitthi kan neih vangin tlaivar em em lo va, va lan ve tumin ka chhuak a. Ka thianpa Tea nen kan inzui a. Amanda nen kan inzawm tak atang hian ka mit te hi a lerh ta lo riau. Nula chhe lo hmu thei deuh kha ka kalpah ta vel mai mai chu a nih hi maw… 

A tuka hnaah ka buai leh dawn èm vangin dar 2 velah Tea chu ka hawnsan ta a. Mitthi te in kha veng mawng lam a lo ni bawk nen, chhoh ve fe a ngai mai. Muangchang takin ka inkhalh chho a, a reh kher mai. Ka hmelhriat tha em em, ka penkawi fôna thin, Pa Hminga te in thlen hma kawng kawi, a thlang lam kham a nih vanga in a din lohna lai ka thlen chuan ka ding hrâwk!  Kham atanga rawn chhuak chho hlawl niawm taka kawng rawn thleng chho chu mihring ngei niin ka hre si. Ka bike head light in a chhuk tak siah-ah chuan ka phu chiang kher mai. Kha tlangval cher chhe tak kha a lo ni reng mai. A mitmeng fiah leh tak zet chuan min rawn melh let ve siah bawk si, a rapawm lek lek mai. Kan hnuchhui laiah tangkaina a neih ka ring ve ta tlat. 

"Thianpa, ka lo thlah dawn che em ni? " ka ti lawi rût a. 

"Tihtur pakhat ka la nei a, tichuan, ka chawl tawh ang" a ti ringawt!  A aw lah chuan a zawi hle naa a fiah em em si. Ka tirilah min tham a, boruak vawt deuh nen ka khur deuh. 

"Eng nge i la tih dawn? " ka tilui thei hram.. Chiang zeta min rawn melh kal chung hian, "Phuba ka la dawn" a ti vawt ta raih a. Boruak chu a uap churh mai. Tlangvala pumpa hlauhna chuan min tuam tlat. Chupa hmelah chuan mi dang hmu hian ka inhre tlat a ni. A rang arangin ka tlansan ta daih.. Amanda chuan dawihzep min ti ngawt ang. 

Ka muhil tui nek lo ve. A tuka ka thu hriat hmasak ber chu ruang an chhar thu hi a ni. Bena kha ka mitthlaah a rawn lang nghal zawk. Ka rin dan ang ngeiin nula ruang a ni leh bawk. Amanda call ka tum lai takin min rawn call a, "Sam, kan tlai, a pawi khawp mai. Nizanah ka pa thian hluiin min rawn tlawh a, chet ka la thei lo a tin ni.. Tunah ruang chharnaah khan lo kal rawh" a rawn ti nghal mawlh mawlh. Engkim a hre vek tawh a ni ngei ang. 

Ruang chu a hmaa ruang dang ang tho khan a hmai a him a. A taksaah hliam a tuar nual. Nula kum 25 bawr vel, thau tawi lam deuh a ni a. A hmel erawh a tha zèk mai. Mak deuhin chu nula erawh chu an veng nula fel pawl taka an sawi a ni tlat thung. A hming chu Lawmkimi a ni awm e. Bena te veng ami a ni. Boss chuan a endik zung zung a, Rinkimi a en dik tuma a en ang chiah khan Lawmkimi kut zungtang vel chu a en ngun leh hle. Chhan tha tak a awm a ni mahna. 

Diteii a bia a, khawi hmunah emaw kan kal dawn a nih hmel. Ka la hre ve lo. Vawiin chu hotu lam ten min phalsak bawk a. Boss hnung ka zui leh dawn ta. Chaw ei khamah min rawn lam a, Diteii pawh kan lam kawi ve leh. Bena te veng lamah chuan kan phei ta a. Engmah sawi lo mah se, nizan lama ka thil tawn vang khan Bena chu rinhlelhna ka nei ve tho mai. Diteii chu a meng sen râm a, tap hrep hmel te pawh a pu. Ni danga a hlim theih tehlul nen,  a ngui nghiai mai. 

Bena nuin min lo chhawn a. Nu hawihhawm tak a ni. Amanda chuan Bena hmuh a duh thu a sawi nghal a. Bena nu chuan Diteii melhin, "Dite, engmah ka hre thiam lo. Eng nge awmzia" a ti a. 

"Nu, a pawi ka ti lutuk. Bena hi tualthah thubuaiah rinhlelh mek a ni" a ti ta a. Bena nu chu a tawlh hnung dâwrh. Apa a rawn lang ve chiah a, mak ti hmel a pu miah lo thung. Bena roomah chuan kan lut ta a. Khumah a lo mu meng kar a. Chunglam a melh veng veng mai. 

Amanda chu a bulah a zuk thu thla a, Bena nghawng leh biang vela hamna hnuhma niawm tak inrin ruak chu endik niawm takin a khawih kual a. Bena chu a chechang chuang hauh lo. 

"Bena, ka man dawn che a ni. Hmeichhe parhum i thah vangin ka man che a ngai tlat a ni" Amanda aw zawi raih chu a fiah tha hle. Bena chuan a rawn melh chuang lo reng reng. Bena nu chu a inhnit faih faih a, a unaute leh apa te chuan an hnem a. Bena chu kan kai tho va, Thawmhnaw pangngai deuh haktirin kan chhuahpui ta. 

A mak teh tawp e. Tual thattu chu kan man a ni ta reng sia. Tun tum chu a dangdai deuh nge, han chhui rep rep kha a awm lem lo a nih dawn hi. Mahse, Amandain Bena a rinhlelh chat dan erawh ka hre ma bik lo. Bena chu ka lainat letling, a chiangkuang lutuk lo tih a lang reng bawk si. 

A chhungte pawh an rawn lang ve nghal mai a. Mipui hriata la puanzar loh a ni bawk a, tu tehchiamin an hre ve lem lo. Office-ah chuan Bena chhungte bakah Diteii leh Dinfela leh keini chu kan kim ta thap a. Bena chu a thu ngawi ngul a. Psychiatrist lar tak Dr Pekmuana a rawn lang ta bawk a. Amanda chuan a aw thian kharhin Bena a rinhlelh chhoh dan leh a chet vel dan chu a sawi ta a. 

"Teteii thih kha chuan ka bangbo viau. Teteii lamhnai deuhho zingah rinhlelh tur ka hre mai bawk si lo. Ka mangang ru viau mai. Rinkimi a thi ve ta chiah a. Khatah kha chuan Rinkimi thattu leh Teteii thattu hi mi thuhmun an nih ka ring ta a. A chhan chu an taksa veilamah kut a thlak ve ve a, A pawngsual ve ve bawk. A chetdan a inzûl tak avangin mi pakhat chetna a nih ka ring mai a ni. Rinkimi ruang ka zir khan a kuttin a tliak nual a, a tin karah tisa them a bet nual bawk. Thisen pawh. Tichuan, tisa them leh thisen khang tawh chu lain, Forensic-ah endik turin ka thawn ta a. Mahse, a result hre ringawt mah ila, tu thisen leh tisa nge tih chu hriat mai theih a ni ta chuang lo. Rinkimi ruang hmuhna kan va endik leh ni khan Benjamina hi thlanah thuin a lo awm ve reng a. A tirah rinhlelhna ka nei lo. Mi pangngai chiah lo nia ka hriat vang a ni bawk a. 

Mahse, an haw tur min rawn kal pelh pah khan a nghawng leh a bek dinglama inrik rûak kha ka hmu ta a. A biangah phei chuan bandaid a lo inbel renh a lo nia. Kha khan ngaihtuahna min neihtir thei ta. Mahse, fimkhur a ngai tih ka hria. Khami hnuah khan Diteii te inah kalin Teteii Album en ka dil ta a. Bena  kha hmuh ka inbeisei tehlul nen ka hmu ta hauh lo mai. Ka beiseina pawh a phai leh ta duak mai. Bena thlalak lah ka nei si lo. Chumi tlaiah chuan thlanmualah khan a lo awm leh tak mialin tih thuah ka va kal leh a. Ka beisei ang ngeiin a lo awm leh ta chiah mai. A hmaa a thutnaah bawk khan a lo thu a, a phun sup sup bawk. Lang lo atangin a thla chu ka lak ruksak ta a. Chu thlalak chu Diteii hi ka thawn a, "I u nen khan an inzui emaw an inhriain i hria em? " ka ti a ni. Diteii best friend a ni tih ka hre hauh lo. Chutah chuan a rawn rak ta hlut a, a thianpa a nih thu leh a buai chhoh dan te min hrilh fai ta leng a. A buaina ka hriat khan ka rinhlelhna pawh a pung ta sawt mai. Amah Bena hi misual a ni lo, tual that duh tur a ni hauh lo. Mahse, Imaginery friend a nei tih ka hriat vangin ka ngaihtuahna chu ka sawrzim leh ta a ni. Diteii puihnain Bena chu hei  Dr Peka hi ka hmuhpui thei ta hlauh a. A chenchilhtu pawh kan be thei ta hlauh a ni. Multiple Personality Disorder  tia sawi theih ni si, mahse, a nih chiah lohna chu amah chenchilhtu hi a thi tawh tlat a ni. Ramthari a ni a. In hriat tawh kha. Hman deuha inawkhlum kha.. 

Ramthari nun chu ka chhui leh ta a. A chhan chu Bena kha ringhlel ringawt mah ila amah a inpuan miau loh vang leh finfiahna kan neih si loh vangin, amah chenchilhtu Ramthari nun ka hriat hmasak a ngai tih ka hria, Bena hmangin a that ngei em tih leh engvanga that duh nge a nih tih hriat a ngai si a ni. 

Tichuan, Ramthari chu ka chhui chho a. A thih tawh miau vangin a awlsam lem lo. A chhungte zawh vak vak chi a nih loh vangin an thenawmte atanga bultanin a thian kawm thinte ka lawr chho ta a. Ramthari pa kha a pa dik tak a ni lo tih leh kha a pahrawn khan thanthi a neih hmain a lo khawih tawh tih ka hre thei ta hlauh mai. Chu thu chu a thian kawm ve ber Sawmi min hrilh a ni. Piansual rukna nei chungin a hringnun a hmang chho va, inthunun theih loh chang a nei ta fô a. Amah a hmel chhe lo va, a ngainatawm bakah mi a lèm thiam riau a. A mipa kawp te pawh chhe berh tak an ni ngai lem lo. Chutia nawmchenna chena a hun a hman lai chuan, Teteii kha a rawn lang ta a. 

Tuna ka sawi tur hi chu Sam, Ruah sur vak zana in ina ka lo riah zana Ramthari te ina ka luhruk tuma a diary ka ruk chhuah atanga ka hriat a ni tawh. Ramthari kha a inawkhlum nge thah tih pawh chhui ngai a la ni tlat! A chhan chu a chhungte sawn a chanchin sawi an duh lo bur. A ruang lah an postmortem hek lo. Thil dik lo chu a awm a ni maithei. 

Ramthari chanchin chu a tam lo naa a pawimawh thung. Teteii a rawn lan atangin a hringnun a buai chho ta a. A chhan chu Diteii ten min lo hrethiam se; Teteii khan Ramthari sugar daddy a chhuhsak vang a ni. Dik tak chuan Ramthari khan a daddy kha a hmangaih tawh hial ti mai ang, a hmei nih kumhlun kha a hnial reng reng lo a ni. Chutih laia amah aia nalh leh zei zawkin a chanvo a rawn chhuhsak takah chuan a tal buai chho ta a ni. A thinlunga huatna chu a la up bet rih mai mai. Chutih lai tak chuan Rinkimi a rawn lang ve leh ta a. Rinkimi kha kan hriat angin nula nungchang tha tak a ni bik lo a nih kha. Ramthari te nen chuan zu in hoin, Rinkimi khan a lo hrechiang kher nge mawni an inhnial thinrim atangin Ramthari leh a pahrawn chungchang a sawi ta zauh mai. Teteii vanga a thinurna inup kha a rawn nek hawng ta chiah mai le.. An insual ta mai a. Mahse, Rinkimi thiante chuan an rawn khawih tel ve tak avangin thi phungin a hawng ta hnak hnak a. Hmusit zeta, "Mahni pa fa pai, i tihtlak avang chauha nula lena leng i nih kha" titu Rinkimi pawh chu a theihnghilh ngai ta lo. 

Inah a awm khât hle a, a chhungte pawn ngaiah an nei titih tawh a ni ber e. Hauh a sawt si lo va. Zan khat chu a rilru a mangang hle a, a nun a tuihal takzet a ni mahna. An ina hawn tuma a phei hnak hnak laiin an Biak in atanga hla zir ho hla sak chuan a thinlung a rawn thawng ta zawk mai. He lai thu sawi hi hrehawm ka ti. Ka hnuk a tiulh thei tlat nia!  Mahse, amah Ramthari hian a diary-a a ziah tam ber a ni miau a, ka sawi a ngai tlat. Biak in hul hliapah chuan a va thu ta chawt a. An zai tawp thlengin a thu ta a. An zai zawhah chawlh lawk neiin an rawn chhuak ta hlawm a, Ramthari chu mak an tih hmel hle… hetah tak hian Lawmkimi, An kohhran thalai pawla committee member ni pha ngat, Zai pawlah pawh a tlar hma lam chang thin chuan mi dang vengthawng hauh loin, "Ngah nge  hetah te i lo kal, kan Pathian Biak in i tihbawrhbang" a ti a nih chu.. Lawmkimi hian mi dang mitmei a ven vang zawk a ni thei tho mai. A chhan chu Ramthari nu te leh Lawmkimi pa te hi cousin an ni tlat!  A cousin chu a hau angah ngai ta ila, mahse, Ramthari thinlunga a tawngkamin nghawng a neih natzia erawh kan hmuh vek tawh kha.. 

Ramthari diary ka chhiar zawh takah chuan Bena hmanga khang tualthahna kha thleng a ni tih a chiang ta in ka hria. Amah Bena hian tual a that tih pawh a inhre kher lo maithei. A inhre maithei bawk. Ka finfiahna neihchhun erawh a beitham khawp mai. Bena taksaa hamna hnuhma kha a ni deuh tlawng. A chhungte hian min hrilh duh chu nise khang tualthahna thlen apiang khan Bena chu in atangin a chhuak thin tih an sawi thei mahna.. Tin, a awmdan pawh a hma aiin a danglam bawk ang. A thil tawn hi science atang khan pawn sawifiah a harsa riauin ka ring. Ramthari hian a thunun thei tlat si a. Doctor tihdam theih a ni ang em tih erawh ka hre hauh lo. Dr Pekmuana hian chiang zawka zir chiana tihdam theih a inring a, ka beiseipui khawp mai. Bena chhungte pawh lo thlaphang lo ula, ka tih loh dan ang takin tun tum chu Bena hi hum ka duh ve tlat mai. A thi ta te kha ka hnualsuatin ka tawrhpui lo tihna ni loin.. 

Mahse, dan anga kan man erawh a ngai si a. Court lamah sawifel tur a la ni ang a. A theih hram chuan Bena hi Dr Peka enkawlna hnuaiah awm se ka duh hle a, chutiang tur chuan dil theih pawh a nih a rinawm. Tin, beiseina ka neih chu Ramthari hian a tihtur a hlen ta bawk niin a lang a. A chhuahsan hlen ve mai thei bawk. Pathian thu thu ni se.."

Amanda thusawi chhung zawng chuan kan reh tlawk tlawk. A sawi zawh rual chuan kan thaw sang sang ni maiin ka hria. Bena chhungte chuan lungngai hmel ai mahin thawveng hawk hmel an pu zawk mahin ka hria ka rin danin an thuruk chu an lo up rei viau tawh a ni ngei ang. Amanda hnenah chuan zawh duh ka nei.. Mahse, ka ngawi ta rih. 

"Chung zawng zawng chu thleng ta se.. A thleng tak tak ang tih pawh ka ring tho a. Mahse, Hei hi ka hrethiam lo. Engvangin nge U Ramthari thlarau chuan Bena kher kher a chenchilh tih hi" Diteii aw chu a zawi hle naa a fiah kher mai. Amanda chu a thaw hawk a. Ngui hmel a pu deuh. 

"Chumi chhanna chu Bena pa khan a chhan theih ngei ka ring" a ti ta a. Bena pa kan melh thap. Amah pawh a meng phawk. A lai hû mai. 

"In sawi awmzia ka hre lo. Engmah tih ka nei lo" a ti nawk nawk a. 

Amanda chuan nui chungin, "Hlauthawng mah ta che. Chutiang lamin ka sawi lo. Ramthari kha i fa a ni tih sawi ka tum mai chauh a ni" a ti a. A va mak lehzel ve leh! 

Bena pa a ding, a nupui a ding ve nghal zat. "Ka.. Ih.. Nia, mahse.. " tiin Bena pa chu a riat niah niah a. A nupui mitmeng fiah kak chu a zahawm kher mai. 

"Pawi ka ti lutuk. Mahse, sawi chhuah a ngai miau si a. Ni e, Bena pa hi Ramthari pa a ni. Mahse, sâwn a ni.. Bena nu laka a uirena chu thup duh hle mah se, a thup hlen thei ta ngang lo a ni e. Ramthari khan a pa a ni tih a hriatchhuah takah chuan a pa thungrulh theihna awmchhun Bena chu a hmang tangkai ta mai a ni.. Mahse, ka pi, khawngaihin i pasal hi ngaidam ang che.. A tisual leh tawhin ka ring lo" Amanda chuan a ti ta zung zung a. A aw pawh a zangkhai chho leh ta bawk. Boruak erawh rit ru tak a ni. 

Dan anga hmalak a ni chho va, Amanda puihna nen, Doctor puihna nen, Bena chu  enkawl a ni dawn ta a. Mahse, a dam hunah Jail-ah hun a hman tho a ngaih hmel.. Ka hre tawh bik lo le.. 

Kan case tawh zawng zawngah a dangdai bik ngawt mai. Thlarau lam a tel tlat si a. Amanda tan pawh thil thar a ni ngei ang. Diteii pawn a u thattu Bena chu a ngaidam chiang hle. He nau hi hmeichhe eng emaw tak zawng a la ni ngei ang le.. 

"Zanin chu chaw min lei la" Amanda chuan zang vahin a ti a. 

"Lutuk.. Khaw nge niang" ka lo ti vat. 

"Ka inah " a ti a. Ka lo meng phawk. 

A nui a, "Ka inah i eirawngbawl ka ei ang.. A tha em? " a ti sap a. A inher a, a chhuak vut. 

Um zui rawk rawk pahin, "No.. A chi loh.. Artui bak ka kang thiam lo.. E sa chu ka siam thiam leh si" ka ti phei nawk nawk a.. A rawn lehhawi duh leh thak lo.. Umm.. Zanin chu a hre viau ang.. Hehe.. 

(Season-2 atan a hmasa ber atan harsa lo deuh hlek ka rawn dah rih aw. Diteii ka chhunzawm dawn sia, khi thubuai khi tihfel vat loh chuan, ka peng kawi peih tawh lo 😊